#Local_News
Published 09 October 2026

■ သတ်မှတ်စံနှုန်းထက် Benzoic Acid ၂ ဒသမ ၅၆ ဆကျော်လွန်ပါဝင်နေသည့် ‘ကင်းမွန်’ အမှတ်တံဆိပ် ပဲငံပြာရည်နှင့် နိုက်ထရိုဂျင်ပါဝင်မှု စံနှုန်းမမီသည့် ‘ကျားနဂါး’ အမှတ်တံဆိပ် မြိတ်ငံပြာရည်တို့ကို ဈေးကွက်အတွင်းမှ ပြန်လည်ရုပ်သိမ်းရန် အစားအသောက်နှင့် ဆေးဝါးကွပ်ကဲရေးဦးစီးဌာန (FDA) က အသိပေးထုတ်ပြန်ထားသည်။

■ FDA ၏ စစ်ဆေးတွေ့ရှိချက်အရ ကင်းမွန်စားသောက်ကုန်လုပ်ငန်းမှ ထုတ်လုပ်သည့် ‘ကင်းမွန်’ ပဲငံပြာရည် ၇၅၀ မီလီလီတာတွင် တာရှည်ခံပစ္စည်း Benzoic Acid ပါဝင်မှုမှာ တစ်ကီလိုဂရမ်လျှင် ၂,၅၅၉ ဒသမ ၂၆ မီလီဂရမ်ရှိပြီး သတ်မှတ်ပမာဏဖြစ်သည့် ၁,၀၀၀ မီလီဂရမ်ထက် ၂ ဒသမ ၅၆ ဆခန့် ကျော်လွန်နေကြောင်း သိရသည်။

■ အဆိုပါပဲငံပြာရည်၏ ထုတ်လုပ်သည့်ရက်စွဲမှာ ၂၀၂၆ ခုနှစ် မေလ ၁၉ ရက်ဖြစ်ပြီး သက်တမ်းကုန်ဆုံးရက်မှာ ၂၀၂၇ ခုနှစ် မေလ ၁၉ ရက်ဖြစ်ကြောင်း ဖော်ပြထားသည်။ စစ်ဆေးခဲ့သည့် နမူနာကို မန္တလေးတိုင်းဒေသကြီး၊ ဈေးချိုဈေးမှ ကောက်ယူခဲ့ခြင်းဖြစ်သည်။

■ အလားတူ ရန်ကုန်တိုင်းဒေသကြီး၊ ဒဂုံဆိပ်ကမ်းမြို့နယ်ရှိ ကျားနဂါးမြိတ်ငံပြာရည်လုပ်ငန်းမှ ထုတ်လုပ်သည့် ‘ကျားနဂါး’ မြိတ်ငံပြာရည် ၁,၀၀၀ မီလီလီတာတွင် နိုက်ထရိုဂျင်ပါဝင်မှုသည် သတ်မှတ်စံနှုန်းအောက် လျော့နည်းနေကြောင်း FDA ၏ စစ်ဆေးချက်အရ သိရသည်။

■ ထို့ပြင် အဆိုပါမြိတ်ငံပြာရည်တွင် ထုတ်လုပ်သည့်ရက်စွဲ ဖော်ပြထားခြင်းမရှိကြောင်း သိရပြီး စစ်ဆေးခဲ့သည့် နမူနာကို ဧရာဝတီတိုင်းဒေသကြီး၊ အင်္ဂပူဈေးရှိ မချစ်ချစ်ဆိုင်မှ ကောက်ယူခဲ့ခြင်းဖြစ်သည်။

■ သတ်မှတ်အရည်အသွေးနှင့် စံချိန်စံညွှန်းများ မပြည့်မီသည့် အဆိုပါအစားအသောက်ထုတ်ကုန်နှစ်မျိုးကို ဈေးကွက်အတွင်းမှ ပြန်လည်ရုပ်သိမ်းရန် FDA က အသိပေးထားသည်။

#YMG/SW #Yangon_Times

#Local_News
Published 09 October 2026

■ ဖိလစ်ပိုင်နိုင်ငံ၊ မနီလာမြို့တွင် ကျင်းပသည့် International World Rice Conference 2026 ၌ မြန်မာ့ပေါ်ဆန်းဆန်သည် ကမ္ဘာ့အကောင်းဆုံးဆန်ဆု (World Best Rice Award) ကို ဒုတိယအကြိမ်မြောက် ထပ်မံဆွတ်ခူးရရှိခဲ့ကြောင်း မြန်မာနိုင်ငံဆန်စပါးအသင်းချုပ် (MRF) မှ အောက်တိုဘာ ၉ ရက်တွင် သတင်းထုတ်ပြန်သည်။

■ အဆိုပါ ဆန်အရည်အသွေးပြိုင်ပွဲကို အမေရိကန်ပြည်ထောင်စုအခြေစိုက် International Commodity Institute နှင့် The Rice Trader တို့က ကြီးမှူး၍ နိုင်ငံတကာမှဆန်အမျိုးအစားပေါင်းစုံကို ပါဝင်ယှဉ်ပြိုင်စေခဲ့ခြင်းဖြစ်သည်။

■ မြန်မာ့ပေါ်ဆန်းဆန်သည် လွန်ခဲ့သော ၂၀၁၁ ခုနှစ်က ဗီယက်နမ်နိုင်ငံ၊ ဟိုချီမင်းမြို့၌ ကျင်းပခဲ့သည့် ညီလာခံတွင်လည်း ယခုဆုကို ပထမအကြိမ် ဆွတ်ခူးခဲ့ဖူးသဖြင့် ယခုအကြိမ်သည် ဒုတိယအကြိမ်မြောက်ရရှိခြင်းဖြစ်သည်။

■ အောက်တိုဘာ ၇ ရက်မှ ၁၀ ရက်အထိ မနီလာမြို့၌ ကျင်းပလျက်ရှိသည့် ၎င်းနိုင်ငံတကာဆန်စပါးညီလာခံနှင့် ပြပွဲများသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနှင့် MRF တို့မှ အစိုးရ-ပုဂ္ဂလိက ပို့ကုန်မြှင့်တင်ရေးကိုယ်စားလှယ်အဖွဲ့၊ ဆန်တင်ပို့သည့် ကုမ္ပဏီများမှ ကိုယ်စားလှယ် စုစုပေါင်း ၅၅ ဦး တက်ရောက်ခဲ့ကြသည်။

■ ခရီးစဉ်အတွင်း ဖိလစ်ပိုင်၊ မလေးရှားနှင့် အာဖရိကနိုင်ငံများသို့ မြန်မာ့ဆန် တင်ပို့မှုတိုးမြှင့်နိုင်ရေး နားလည်မှုများ ရယူနိုင်ခဲ့သည့်အပြင် တက်ရောက်လာသည့် ကုမ္ပဏီများအကြား အရောင်းအဝယ်စာချုပ်များ ချုပ်ဆိုနိုင်ရေး စေတနာစကားများ ဆွေးနွေးညှိနှိုင်းနိုင်ခဲ့ကြောင်း သိရသည်။

■ မြန်မာနိုင်ငံဆန်စပါးအသင်းချုပ်အနေဖြင့် ၂၀၂၆-၂၀၂၇ ဘဏ္ဍာနှစ်အတွင်း တန်းမြင့်ဆန် တန်ချိန် ၃ သန်း တင်ပို့ရန် ရည်မှန်းထားပြီး အဆိုပါ ရည်မှန်းချက် ပြည့်မီကျော်လွန်ရေးအတွက် ပုဂ္ဂလိကကဏ္ဍမှ ကြိုးပမ်းဆောင်ရွက်လျက်ရှိကြောင်း ထုတ်ပြန်ချက်အရ သိရသည်။

#YMG/SW #Yangon_Times

#Local_News
PuPublished 09 October 2026

■ ကုန်အမှတ်တံဆိပ်မူပိုင်ခွင့်ဥပဒေအရ ကုန်ပစ္စည်းများအတွက် ဒေသဆိုင်ရာအညွှန်းမှတ်ပုံတင် လျှောက်ထားမှုများနှင့်ပတ်သက်၍ဝန်ဆောင်မှုအမျိုးအစားများအလိုက်ပေးသွင်းရမည့်  အခကြေးငွေနှုန်းထားများကို မူပိုင်ခွင့်ဆိုင်ရာအေဂျင်စီ၏ ထုတ်ပြန်ချက်အရသိရသည်။

■ အဆိုပါပေးသွင်းရမည့် အခကြေးငွေနှုန်းထားများမှာ ဒေသဆိုင်ရာအညွှန်းမှတ်ပုံတင်လျှောက်ထားမှု(GI-1)ကို စစ်ဆေးခြင်းအတွက် ၄၅၀,၀၀၀ကျပ်၊ ဒေသဆိုင်ရာအညွှန်းမှတ်ပုံတင်ပြန်လည်လျှောက်ထားမှု(GI-3)ကို စစ်ဆေးခြင်းအတွက် ၁၅၀,၀၀၀ကျပ်၊ဒေသဆိုင်ရာအညွှန်း မှတ်ပုံတင်လျှောက်ထားချက်တွင် စာအရေးအသားအမှားနှင့် ပြင်ဆင်ခွင့်ပြုနိုင်သည့်အခြားမှားယွင်းမှုများကို ပြင်ဆင်ပေးရန် လျှောက်ထားမှု(GI-4)ကို စစ်ဆေးခြင်းအတွက် ၈၀,၀၀၀ကျပ်
၊ကန့်ကွက်လွှာ(GI-6)လျှောက်ထားမှုကို စစ်ဆေးခြင်းအတွက် ၄၅၀,၀၀၀ ကျပ်၊ ဒေသအညွှန်းမှတ်ပုံတင်ခြင်းအတွက် ပေးသွင်းရမယ့် မှတ်ပုံတင်အခကြေးငွေအဖြစ်  ၁၅၀,၀၀၀ ကျပ်နှင့် ဒေသဆိုင်ရာအညွှန်းမှတ်ပုံတင်လက်မှတ် မိတ္တူမှန်ထုတ်ပေးရန်လျှောက်ထားမှု(GI-7)ကို စစ်ဆေးခြင်းအတွက်  ၅၀,၀၀၀ကျပ် သတ်မှတ်ထားကြောင်းသိရသည်။

■ ထို့အပြင် မှတ်ပုံတင်စာရင်း၌ မှတ်တမ်းတင်ထားသည့်အချက်အလက်များကို ပြင်ဆင်ပေးရန် လျှောက်ထားမှု(GI-8) ကို စစ်ဆေးခြင်းအတွက် ၈၀,၀၀၀ကျပ်၊ ဒေသဆိုင်ရာအညွှန်းမှတ်ပုံတင်ခြင်းကို တရားမဝင်ကြောင်း ကြေညာပေးရန် သို့မဟုတ် ပယ်ဖျက်ပေးရန်လျှောက်ထားမှု(GI-9)ကို စစ်ဆေးခြင်းအတွက် ၄၅၀၀၀၀ကျပ်၊ ဒေသဆိုင်ရာအညွှန်းအမှတ်အသားအသုံးပြုခွင့်လျှောက်ထားမှု(GI-10)ကို စစ်ဆေးခြင်းအတွက် ၁၀၀,၀၀၀ကျပ်၊ ကိုယ်စားလှယ်အမည် ပြောင်းလဲပေးရန် လျှောက်ထားမှု(GI-12)ကို စစ်ဆေးခြင်းအတွက် ၂၅၀၀၀ကျပ်
၊ အယူခံလျှောက်ထားမှု(GI-14)ကို စစ်ဆေးခြင်းအတွက် ၅၀၀,၀၀၀ကျပ်
၊ အချိန်ကာလတိုးမြှင့်ပေးရန် လျှောက်ထားမှု(GI-15)ကို စစ်ဆေးခြင်းအတွင်  ၈၀,၀၀၀ကျပ် သတ်မှတ်ထားကြောင်းသိရသည်။

■ ထို့အပြင်ဒေသဆိုင်ရာအညွှန်းမှတ်ပုံတင်လျှောက်ထားခြင်းသည် ဒေသထွက်ကုန်ပစ္စည်းများကို အတုအပပြုလုပ်ခြင်းမှ ကာကွယ်ရန်နှင့်ဈေးကွက်မြှင့်တင်ရန်အရေးကြီးကြောင်းသိရသည်။

■ ၎င်းအပြင် ဒေသဆိုင်ရာအညွှန်းမှတ်ပုံတင်လျှောက်ထားသည့်  ကုန်ပစ္စည်းများသည်  ဥပဒေအရ သီးသန့်အခွင့်အရေးများရရှိမည်ဖြစ်သကဲ့သို့  ဒေသထွက်အစစ်အမှန်ဖြစ်ကြောင်း အသိအမှတ်ပြုလက်မှတ်ရရှိသည့်အတွက် ဈေးကောင်းရရှိနိုင်မည်ဖြစ်ကြောင်းလည်း သိရသည်။

#YMG/NN #Yangon_Times

#Local_News
PuPublished 09 October 2026

■ စားသောက်ဆိုင်များ ကုန်သွယ်လုပ်ငန်းခွန်လစဉ်ပေးသွင်းရန် လိုအပ်ပြီး တိုင်းဒေသကြီး/ပြည်နယ် အချို့ရှိ လုပ်ငန်းရှင်အချို့ အခွန်အမှတ် တံဆိပ်ကပ်နှိပ်ထားသည့် ပြေစာထုတ်ပေးရန် ပြဋ္ဌာန်းချက်အပေါ် လိုက်နာဆောင်ရွက်မှု အားနည်းနေကြောင်းပြည်တွင်းအခွန်များ ဦးစီးဌာန၏ အသိပေးထုတ်ပြန်ချက်အရသိရသည်။

■ ထို့အပြင် စားသောက်ဆိုင်လုပ်ငန်းရှင်များ အနေဖြင့် ဒဏ်ငွေတပ်ရိုက်ခံရမှုမှ  ကာကွယ်နိုင်ရန် စားသုံးသူ ဆီမှ ရောင်းရငွေနှင့်အတူ ကျသင့်ကုန်သွယ်လုပ်ငန်းခွန်ကို တစ်ပါတည်းကောက်ခံပြီး အခွန်အမှတ် တံဆိပ်ကပ်နှိပ်ထားသည့် ပြေစာထုတ်ပေးရန်နှင့်ကောက်ခံရရှိသည့် ကုန်သွယ်လုပ်ငန်းခွန်များကို သက်ဆိုင်ရာအခွန်ရုံးသို့ လစဉ်ပေးသွင်းရန်အလေးအနက် တိုက်တွန်းကြောင်း ဖော်ပြထားသည်။

■ ၎င်းအပြင် ဥပဒေနှင့်အညီ အခွန်တာဝန်ကျေပွန်ပြီး နိုင်ငံကြီးသားပီသသည့် စားသုံးသူများနှင့်  စားသောက်ဆိုင်များမှ လိုက်နာဆောင်ရွက်မှုများတိုးတက်လာသော်လည်း တိုင်းဒေသကြီး/ပြည်နယ် အချို့ရှိ လုပ်ငန်းရှင်အချို့သည် အခွန်အမှတ်တံဆိပ်ကပ်နှိပ်ထားသည့် ပြေစာထုတ်ပေးရန် ပြဋ္ဌာန်းချက်အပေါ် လိုက်နာဆောင်ရွက်မှု အားနည်းနေသည်ကိုစိစစ်တွေ့ရှိရကြောင်း ဆိုထားသည်။

■ စားသုံးသူများအနေဖြင့် စားသောက်ဆိုင်ကို ကျသင့်ငွေပေးချေချိန်တွင် အခွန်အမှတ်တံဆိပ် ကပ်နှိပ်ထားသည့် ပြေစာကိုတောင်းယူရန် ၊ စားသောက်ဆိုင်များအနေဖြင့်လည်း စားသုံးသူများက တောင်းခံသည်ဖြစ်စေ၊ မတောင်းခံသည် ဖြစ်စေ အခွန်အမှတ်တံဆိပ်ကပ်နှိပ်ထားသည့်  ပြေစာများကို မဖြစ်မနေထုတ်ပေးရန်တာဝန်ရှိကြောင်းဖော်ပြထားသည်။

■ အခွန်အမှတ်တံဆိပ်ကပ်နှိပ်ထားသည့်  ပြေစာထုတ်ပေးရန် တာဝန်ပျက်ကွက်သည့်  စားသောက်ဆိုင်လုပ်ငန်းရှင်များကို ပြည်ထောင်စု၏ အခွန်အကောက်ဥပဒေ ပုဒ်မ ၄၀ (က) အရ ပျက်ကွက်မှုများအလိုက် ဒဏ်ကြေးငွေများတပ်ရိုက်နေကြောင်းထုတ်ပြန်ချက်အရ သိရသည်။

■ ထို့အပြင် ကောက်ခံရရှိသည့် ဒဏ်ကြေးငွေ၏ ၃၀ ရာခိုင်နှုန်းကို သတင်းပေးတင်ပြသူများကို ဆုကြေးငွေအဖြစ် ချီးမြှင့်နေသကဲ့သို့ သတင်းပေးတင်ပြသူဘယ်သူဘယ်ဝါဖြစ်ကြောင်းကိုလည်း ထုတ်ဖော်မည်မဟုတ်ကြောင်းသိရသည်။

#YMG/NN #Yangon_Times

၁။ မြန်မာ–မလေးရှား နှစ်နိုင်ငံဆက်ဆံရေး

• နိုင်ငံတော်သမ္မတ ဦးမင်းအောင်လှိုင်၏ မလေးရှားနိုင်ငံ တရားဝင်ခရီးစဉ်ကို ကြိုဆိုပြီး ဖိတ်ကြားချက်လက်ခံခဲ့သည့်အတွက် ကျေးဇူးတင်ရှိကြောင်း ပြောကြား။


• မြန်မာ–မလေးရှား နှစ်နိုင်ငံအကြား ကာလရှည်ကြာ ကောင်းမွန်သည့် ဆက်ဆံရေးရှိခဲ့ကြောင်း ဖော်ပြ။


• မကြာသေးမီကာလအတွင်း နှစ်နိုင်ငံဆက်ဆံရေး၌ အတားအဆီးအချို့ ရှိခဲ့သော်လည်း ယခုအချိန်သည် ပူးပေါင်းဆောင်ရွက်မှုများ ပြန်လည်မြှင့်တင်ရမည့် အချိန်ဖြစ်ကြောင်း ပြောကြား။


• နှစ်နိုင်ငံခေါင်းဆောင်များအကြား ပွင့်လင်းရိုးသားစွာ ဆွေးနွေးနိုင်ခဲ့ခြင်းသည် အပြန်အလှန်နားလည်မှုနှင့် အနာဂတ်ဆက်ဆံရေး တိုးတက်မှုအတွက် အရေးပါကြောင်း ပြောကြား။



၂။ မြန်မာနိုင်ငံ၏ အခြေအနေနှင့် အာဆီယံ၏ အခန်းကဏ္ဍ

• မြန်မာသမ္မတနှင့် အစိုးရ၏ အာဆီယံမူဘောင်အတွင်း ကြိုးပမ်းဆောင်ရွက်မှုများကို အသိအမှတ်ပြုကြောင်း ပြောကြား။


• မြန်မာနိုင်ငံ၏ မူဝါဒအပြောင်းအလဲများနှင့် ဆက်ဆံရေးတိုးတက်စေရန် ကြိုးပမ်းမှုများကို သတိပြုမိကြောင်း ဖော်ပြ။


• မြန်မာနိုင်ငံသည် တိုင်းရင်းသားလူမျိုးစုံရှိပြီး ရှုပ်ထွေးသည့် အခြေအနေများ ရင်ဆိုင်နေရသောကြောင့် မြန်မာ့အရေးကို ချဉ်းကပ်ရာတွင် ယင်းအခြေအနေများကို ထည့်သွင်းစဉ်းစား နားလည်ရန်လိုအပ်ကြောင်း ပြောကြား။


• ဒီမိုကရေစီပြုပြင်ပြောင်းလဲရေးနှင့် ပြည်တွင်းရေးကိစ္စများအပေါ် နားလည်မှုလွဲမှားနေသည့် အခြေအနေများရှိကြောင်း ထောက်ပြ။


• မြန်မာနိုင်ငံ၏ အခြေအနေနှင့် မူဝါဒဆိုင်ရာ ကြိုးပမ်းမှုများကို အခြားအာဆီယံခေါင်းဆောင်များအား ရှင်းလင်းပြောကြားခဲ့ကြောင်း ဖော်ပြ။



၃။ ငလျင်အပြီး လူသားချင်းစာနာထောက်ထားမှုနှင့် အကြမ်းဖက်မှုလျှော့ချရေး

• မြန်မာနိုင်ငံ ငလျင်လှုပ်ခတ်ပြီးနောက် ဘန်ကောက်မြို့၌ သမ္မတ ဦးမင်းအောင်လှိုင်နှင့် တွေ့ဆုံခဲ့မှုကို ပြန်လည်ဖော်ပြ။


• ဆေးကုသမှုခံယူရာတွင် မည်သူ့ကိုမဆို ခွဲခြားမှုမရှိဘဲ ကုသခွင့်ရရှိစေရေး မူဝါဒကို မြန်မာဘက်က လက်ခံခဲ့ကြောင်း ပြောကြား။


• အကြမ်းဖက်မှုများ ဆက်လက်မဖြစ်ပွားစေရေးအတွက် မြန်မာဘက်က မူဝါဒပြောင်းလဲ၍ ကြိုးပမ်းဆောင်ရွက်နေမှုများကို တွေ့ရှိရကြောင်း ပြောကြား။


• ယင်းကိစ္စများကို အာဆီယံမိတ်ဖက်ခေါင်းဆောင်များအား အသိပေးခဲ့ပြီး အကောင်အထည်ဖော်ရေးယန္တရားများနှင့်ပတ်သက်၍ အာဆီယံခေါင်းဆောင်များ၏ အခန်းကဏ္ဍကိုလည်း ထောက်ပြခဲ့ကြောင်း ပြောကြား။



၄။ စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှု

• နှစ်နိုင်ငံအကြား စီးပွားရေးနှင့် ကုန်သွယ်ရေး (Trade)၊ ရင်းနှီးမြှုပ်နှံမှု (Investment) ပူးပေါင်းဆောင်ရွက်မှုများ တိုးမြှင့်ရန် ဆွေးနွေး။


• စားနပ်ရိက္ခာ (Food)၊ စွမ်းအင် (Energy) နှင့် စွမ်းဆောင်ရည်မြှင့်တင်ရေး (Capacity Building) ကဏ္ဍများတွင် ပူးပေါင်းဆောင်ရွက်မှု တိုးချဲ့ရန်။


• စီးပွားရေးဆိုင်ရာ အခွင့်အလမ်းများကို အသုံးချ၍ နှစ်အလိုက် ပူးပေါင်းဆောင်ရွက်မှုများ တိုးမြှင့်ရန်လိုအပ်ကြောင်း ပြောကြား။


• စီးပွားရေးဆိုင်ရာ အခွင့်အလမ်းများအရ ၁၄၀ ရာခိုင်နှုန်းခန့်အထိ တိုးတက်လာအောင် ဆောင်ရွက်ရန်လိုကြောင်း ပြောကြား။



၅။ နှစ်နိုင်ငံ နိုင်ငံခြားရေးဝန်ကြီးများအကြား ပူးပေါင်းဆောင်ရွက်မှု

• မလေးရှားနိုင်ငံခြားရေးဝန်ကြီး Hasan ၏ မြန်မာနိုင်ငံခရီးစဉ်အတွင်း မြန်မာနိုင်ငံခြားရေးဝန်ကြီးနှင့် တွေ့ဆုံဆွေးနွေးမှုများသည် ရလဒ်ကောင်းများ ရရှိခဲ့ကြောင်း ပြောကြား။


• ယင်းသို့ ပူးပေါင်းဆောင်ရွက်ပေးမှုအတွက် မြန်မာသမ္မတအား ကျေးဇူးတင်ရှိကြောင်း ဖော်ပြ။



၆။ မလေးရှားရောက် မြန်မာနိုင်ငံသားများ နေရပ်ပြန်လည်ပို့ဆောင်ရေး

• မြန်မာအစိုးရက နိုင်ငံသားအများအပြားကို ပြန်လည်လက်ခံရန် ဆန္ဒရှိခြင်းကို အသိအမှတ်ပြုကြောင်း ပြောကြား။


• မြန်မာနိုင်ငံသား ၁,၄၀၀ ကျော်ကို မြန်မာတပ်မတော် ရေယာဉ်သင်္ဘောဖြင့် ပြန်လည်ခေါ်ဆောင်ခဲ့ပြီးဖြစ်ကြောင်း ပြောကြား။


• မလေးရှားနိုင်ငံတွင် နေရပ်ပြန်ပို့ရန် မြန်မာနိုင်ငံသား ၃,၀၀၀ ခန့် ကျန်ရှိနေသေးကြောင်း ဖော်ပြ။


• ကျန်ရှိသူများကိုလည်း နှစ်နိုင်ငံ ပြည်ထဲရေးဝန်ကြီးဌာနများ၏ မှတ်တမ်းများ၊ လက်ရှိစည်းမျဉ်းစည်းကမ်းများနှင့် သဘောတူညီချက်များအပေါ် အခြေခံ၍ မကြာမီ ပြန်လည်လက်ခံသွားမည်ဟု ပြောကြား။


• ရာဇဝတ်မှုကျူးလွန်ထားခြင်းမရှိဘဲ စိစစ်ရှင်းလင်းပြီးသူများကို မြန်မာဘက်က ပြန်လည်လက်ခံမည်ဖြစ်ကြောင်း ဖော်ပြ။


• မြန်မာအစိုးရ၏ ပွင့်လင်းစွာ ပူးပေါင်းဆောင်ရွက်မှုအတွက် ကျေးဇူးတင်ရှိကြောင်း ပြောကြား။



၇။ ခရီးစဉ်၏ အရေးပါမှုနှင့် အနာဂတ်ပူးပေါင်းဆောင်ရွက်ရေး

• သမ္မတ ဦးမင်းအောင်လှိုင်၏ ယခုခရီးစဉ်သည် မလေးရှားနိုင်ငံအတွက်သာမက အခြားနိုင်ငံများနှင့် ဒေသတွင်းအတွက်ပါ အရေးကြီးကြောင်း ပြောကြား။


• ဘန်ကောက်မြို့၌ ပထမဆုံးတွေ့ဆုံစဉ်က သမ္မတ ဦးမင်းအောင်လှိုင်၏ ပွင့်လင်းမှုနှင့် အခြားသူများ၏ အမြင်ကို နားထောင်လိုသည့် သဘောထားကို သတိပြုမိခဲ့ကြောင်း ပြောကြား။


• ယခုခရီးစဉ်မှတစ်ဆင့် ဖြစ်နိုင်သမျှ ပူးပေါင်းဆောင်ရွက်မှုနယ်ပယ်အားလုံးတွင် ဆက်လက်တိုးမြှင့်ဆောင်ရွက်သွားမည်ဖြစ်ကြောင်း ပြောကြား။


• မြန်မာနိုင်ငံသည် အာဆီယံအသိုက်အဝန်း၏ မိသားစုဝင်နိုင်ငံတစ်နိုင်ငံဖြစ်ကြောင်း အလေးအနက် ပြောကြား။


• မြန်မာ–မလေးရှား နှစ်နိုင်ငံဆက်ဆံရေးနှင့် အာဆီယံမူဘောင်အတွင်း ပူးပေါင်းဆောင်ရွက်မှုများ ဆက်လက်မြှင့်တင်သွားမည်ဖြစ်ကြောင်း ပြောကြား။



၁။ ခရီးစဉ်နှင့် နှစ်နိုင်ငံဆက်ဆံရေး

• မလေးရှားဝန်ကြီးချုပ် ဒါတို ဆရီ အန်နဝါ အီဘရာဟင်၏ ဖိတ်ကြားချက်အရ တရားဝင်ချစ်ကြည်ရေးခရီး လာရောက်ခြင်းဖြစ်။


• နိုင်ငံတော်သမ္မတတာဝန် ထမ်းဆောင်ပြီးနောက် ပထမဆုံး မလေးရှားခရီးစဉ်ဖြစ်ပြီး အာဆီယံနိုင်ငံများသို့ သွားရောက်သည့် ပဉ္စမမြောက်နိုင်ငံခရီးစဉ်ဖြစ်။


• မလေးရှားနိုင်ငံသို့ ယခင်က သုံးကြိမ်ရောက်ရှိခဲ့ဖူးပြီး ယခုခရီးစဉ်တွင် မလေးရှားနိုင်ငံ၏ ဖွံ့ဖြိုးတိုးတက်မှုများကို အသိအမှတ်ပြုချီးကျူး။


• မြန်မာ–မလေးရှား သံတမန်ဆက်ဆံရေး ၂၀၂၈ ခုနှစ်တွင် နှစ် ၇၀ ပြည့်မြောက်မည်ဖြစ်၍ အထိမ်းအမှတ်အစီအစဉ်များ တိုးမြှင့်ဆောင်ရွက်ရေး ဆွေးနွေး။


• ၁၉၉၇ ခုနှစ် မြန်မာနိုင်ငံ အာဆီယံအဖွဲ့ဝင်ဖြစ်ရေးအတွက် မလေးရှားနိုင်ငံက ထောက်ခံစည်းရုံးဆောင်ရွက်ပေးခဲ့မှုကို ပြန်လည်ဖော်ပြ။


• နှစ်နိုင်ငံ ချစ်ကြည်ရင်းနှီးမှု၊ အပြန်အလှန်နားလည်မှုနှင့် လက်တွေ့ပူးပေါင်းဆောင်ရွက်မှုများ တိုးမြှင့်ရန် သဘောထားဖော်ပြ။



၂။ စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှု

• မလေးရှားနိုင်ငံသည် မြန်မာနိုင်ငံ၏ ကုန်သွယ်ဖက်နိုင်ငံများအနက် အဆင့် ၄ နှင့် ရင်းနှီးမြှုပ်နှံမှုတွင် အဆင့် ၉ ရှိကြောင်း ပြောကြား။


• နှစ်နိုင်ငံ စီးပွားရေးလုပ်ငန်းရှင်များအကြား ချိတ်ဆက်ပူးပေါင်းမှုမြှင့်တင်ရန် ဆွေးနွေး။


• စိုက်ပျိုးရေး၊ ရေထွက်ပစ္စည်း၊ အထည်အလိပ်၊ အစားအသောက်နှင့် တန်ဖိုးမြှင့်ကုန်ထုတ်လုပ်မှုကဏ္ဍများတွင် ကုန်သွယ်မှုတိုးမြှင့်ရန် ဆွေးနွေး။


• ကုန်သွယ်မှုအဟန့်အတားများ လျှော့ချပြီး နှစ်နိုင်ငံဈေးကွက်များသို့ အပြန်အလှန် ဝင်ရောက်နိုင်ရေး ဆောင်ရွက်ရန်။


• ကမ္ဘာ့ Halal ဈေးကွက် သို့ နှစ်နိုင်ငံ ပူးပေါင်းဝင်ရောက်နိုင်ရေး တွန်းအားပေးဆောင်ရွက်ရန်။


• စိုက်ပျိုးရေးနှင့် အခြေခံအဆောက်အအုံကဏ္ဍများတွင် မလေးရှားနည်းပညာနှင့် ရင်းနှီးမြှုပ်နှံမှုများကို ကြိုဆို။


• ဆီအုန်း၊ ရော်ဘာနှင့် စားသောက်ကုန်ထုတ်လုပ်မှု နည်းပညာကဏ္ဍများတွင် ပူးပေါင်းဆောင်ရွက်မှု တိုးချဲ့ရန်။


• အသေးစား၊ အငယ်စားနှင့် အလတ်စားစီးပွားရေးလုပ်ငန်းများ (MSME) ချိတ်ဆက်မှုနှင့် ဒစ်ဂျစ်တယ်စီးပွားရေး ပူးပေါင်းဆောင်ရွက်မှုများ မြှင့်တင်ရန်။


• မြန်မာနိုင်ငံတွင် မလေးရှားစီးပွားရေးလုပ်ငန်းရှင်များ လာရောက်ရင်းနှီးမြှုပ်နှံကြရန် ဖိတ်ခေါ်။



၃။ လေကြောင်း၊ ခရီးသွားလုပ်ငန်းနှင့် ပြည်သူအချင်းချင်း ဆက်ဆံရေး

• နှစ်နိုင်ငံအကြား လေကြောင်းလိုင်းများ တိုးချဲ့ပျံသန်းနိုင်ရေး အပြုသဘောဆွေးနွေး။


• လက်ရှိ ဗီဇာကင်းလွတ်ခွင့်နှင့် တိုက်ရိုက်လေကြောင်းဆက်သွယ်မှုများကို အခြေခံ၍ ခရီးသွားလုပ်ငန်း မြှင့်တင်ရန်။


• ယဉ်ကျေးမှုဖလှယ်ရေးနှင့် ပြည်သူအချင်းချင်း ထိတွေ့ဆက်ဆံမှုများ တိုးမြှင့်ရန်။


• နှစ်နိုင်ငံ စီးပွားရေးပူးပေါင်းဆောင်ရွက်မှုမှ အလုပ်အကိုင်အခွင့်အလမ်းများနှင့် လက်တွေ့စီးပွားရေးအကျိုးအမြတ်များ ဖန်တီးနိုင်မည်ဟု ယုံကြည်ကြောင်း ပြောကြား။



၄။ မြန်မာရွှေ့ပြောင်းအလုပ်သမားများ၏ အခွင့်အရေးနှင့် အကာအကွယ်

• မလေးရှားနိုင်ငံ၏ စီးပွားရေးနှင့် အခြေခံအဆောက်အအုံဖွံ့ဖြိုးရေးတွင် မြန်မာရွှေ့ပြောင်းအလုပ်သမားများ၏ အခန်းကဏ္ဍကို အသိအမှတ်ပြု။


• မြန်မာအလုပ်သမားများ၏ လုပ်ငန်းခွင်ဘေးအန္တရာယ်ကင်းရှင်းရေး၊ ရပိုင်ခွင့်နှင့် အကာအကွယ်များ ရရှိရေး ပူးပေါင်းဆောင်ရွက်ရန်။


• အလုပ်သမားများ၏ လူမှုဖူလုံရေးနှင့် စောင့်ရှောက်မှုများ ပိုမိုကောင်းမွန်လာစေရေး ဆောင်ရွက်ရန်။


• တရားဝင်လမ်းကြောင်းမှ အလုပ်သမားများ စနစ်တကျ ဝင်ရောက်လုပ်ကိုင်နိုင်ရေးနှင့် ခေါင်းပုံဖြတ်ခံရမှုမှ ကာကွယ်ရေး ဆွေးနွေး။


• ဗီဇာနှင့် အလုပ်လုပ်ကိုင်ခွင့်ပါမစ်ဆိုင်ရာ လုပ်ငန်းစဉ်များ ချောမွေ့စေရေး ဆောင်ရွက်ရန်။


• နှစ်နိုင်ငံ အလုပ်သမားရေးရာ နားလည်မှုစာချွန်လွှာ (MoU) များကို ထိရောက်စွာ အကောင်အထည်ဖော်ရန်။



၅။ မလေးရှားထိန်းသိမ်းရေးစခန်းများရှိ မြန်မာနိုင်ငံသားများ နေရပ်ပြန်လည်ခေါ်ဆောင်ရေး

• မလေးရှား လူဝင်မှုကြီးကြပ်ရေးထိန်းသိမ်းရေးစခန်းများတွင် ရောက်ရှိနေသူများအနက် မြန်မာနိုင်ငံသားအဖြစ် စိစစ်အတည်ပြုပြီးသူများကို ပြန်လည်ခေါ်ဆောင်ရန် ဆွေးနွေး။


• စိစစ်အတည်ပြုပြီးသည့် မြန်မာနိုင်ငံသားများကို အမြန်ဆုံးပြန်လည်ခေါ်ဆောင်ရန် စီစဉ်ဆောင်ရွက်မည်ဖြစ်ကြောင်း ပြောကြား။


• ရာသီဥတုကောင်းမွန်သည့် ယခုကာလအတွင်း မြန်မာ့တပ်မတော်(ရေ) သင်္ဘောများ စေလွှတ်၍ ပြန်လည်ခေါ်ဆောင်မည် ဖြစ်ကြောင်း ပြောကြား။


• အဆိုပါအစီအစဉ်အတွက် မလေးရှားအစိုးရ၏ ခွင့်ပြုမှုရရှိရေး မေတ္တာရပ်ခံ။


• နှစ်နိုင်ငံ အလုပ်သမားရေးရာဝန်ကြီးများအကြား ဆက်လက်တွေ့ဆုံဆွေးနွေးနိုင်ရန် မျှော်လင့်ကြောင်း ပြောကြား။



၆။ မူးယစ်ဆေးဝါး၊ အွန်လိုင်းလိမ်လည်မှုနှင့် နယ်စပ်ဖြတ်ကျော်ရာဇဝတ်မှု တိုက်ဖျက်ရေး

• မြန်မာနိုင်ငံတွင် မူးယစ်ဆေးဝါး၊ အွန်လိုင်းလိမ်လည်မှုနှင့် အွန်လိုင်းရာဇဝတ်မှု တိုက်ဖျက်ရေးကို အမျိုးသားရေးတာဝန်အဖြစ် သတ်မှတ်ပြီး လုံးဝသည်းမခံရေးမူဝါဒ (Zero Tolerance) ဖြင့် ဆောင်ရွက်နေကြောင်း ပြောကြား။


• မူးယစ်ဆေးဝါး တရားမဝင်ထုတ်လုပ်မှု၊ သယ်ဆောင်မှုနှင့် ရောင်းဝယ်မှုများ တားဆီးနှိမ်နင်းရေး နှစ်နိုင်ငံ ပူးပေါင်းဆောင်ရွက်ရန်။


• သတင်းအချက်အလက်ဖလှယ်မှုနှင့် တရားဥပဒေစိုးမိုးရေး အဖွဲ့အစည်းများအကြား ချိတ်ဆက်ဆောင်ရွက်မှု တိုးမြှင့်ရန်။


• အွန်လိုင်းလိမ်လည်မှုလုပ်ငန်းများနှင့် ဆိုက်ဘာရာဇဝတ်မှုကွန်ရက်များ အမြစ်ပြတ်ချေမှုန်းရေး နှစ်နိုင်ငံ ရဲတပ်ဖွဲ့နှင့် လုံခြုံရေးအဖွဲ့များအကြား အချိန်နှင့်တစ်ပြေးညီ ပူးပေါင်းဆောင်ရွက်ရန်။


• လူကုန်ကူးမှု ကာကွယ်တားဆီးရေး၊ လူကုန်ကူးခံရသူများ ဘေးကင်းစွာ ကယ်တင်စောင့်ရှောက်ရေး ဆွေးနွေး။


• မူးယစ်ဆေးဝါးနှင့် အွန်လိုင်းလိမ်လည်မှုကင်းစင်ပြီး လုံခြုံစိတ်ချရသည့် ဒေသပတ်ဝန်းကျင် ဖန်တီးနိုင်ရေး မလေးရှားနိုင်ငံနှင့် ဆက်လက်ပူးပေါင်းဆောင်ရွက်မည်ဟု ပြောကြား။



၇။ လူဝင်မှုကြီးကြပ်ရေးနှင့် နေရပ်ပြန်လည်ပို့ဆောင်ရေး

• မြန်မာနိုင်ငံအတွင်း အခက်အခဲကြုံတွေ့နေသည့် မလေးရှားနိုင်ငံသားများကို ကူညီကယ်ဆယ်၍ နေရပ်ပြန်လည်ပို့ဆောင်ပေးလျက်ရှိကြောင်း ပြောကြား။


• နှစ်နိုင်ငံ နိုင်ငံသားများနှင့်သက်ဆိုင်သည့် လူဝင်မှုကြီးကြပ်ရေး၊ အလုပ်သမားရေးရာ၊ နေရပ်ပြန်ပို့ရေးနှင့် ကယ်ဆယ်ရေးကိစ္စများတွင် နီးကပ်စွာ ပူးပေါင်းဆောင်ရွက်ရန် ဆွေးနွေး။



၈။ အခြားပူးပေါင်းဆောင်ရွက်ရေးကဏ္ဍများ

• နှစ်နိုင်ငံ လွှတ်တော်အချင်းချင်း ပူးပေါင်းဆောင်ရွက်ရေး။


• စိုက်ပျိုးမွေးမြူရေးကဏ္ဍ ပူးပေါင်းဆောင်ရွက်ရေး။


• သိပ္ပံနှင့်နည်းပညာ ပူးပေါင်းဆောင်ရွက်ရေး။


• လူ့စွမ်းအားအရင်းအမြစ် ဖွံ့ဖြိုးတိုးတက်ရေး။


• ပြည်သူအချင်းချင်း ထိတွေ့ဆက်ဆံမှုနှင့် အပြန်အလှန်ဖလှယ်ရေး။



၉။ ခရီးစဉ်၏ ရလဒ်နှင့် အနာဂတ်ဆက်ဆံရေး

• ယခုခရီးစဉ်မှတစ်ဆင့် နှစ်နိုင်ငံ ချစ်ကြည်ရင်းနှီးမှု၊ အပြန်အလှန်နားလည်မှုနှင့် ပူးပေါင်းဆောင်ရွက်မှုများ အရှိန်အဟုန်မြှင့်တင်နိုင်မည်ဟု ယုံကြည်ကြောင်း ပြောကြား။


• မလေးရှားအစိုးရ၊ ပြည်သူများနှင့်အတူ နှစ်နိုင်ငံဆက်ဆံရေး ပိုမိုတိုးတက်စေရန် လက်တွဲဆောင်ရွက်သွားမည်ဟု ဆန္ဒပြု။


• မလေးရှားဝန်ကြီးချုပ် အန်နဝါ အီဘရာဟင်အား မြန်မာနိုင်ငံသို့ ချစ်ကြည်ရေးခရီး လာရောက်ရန် ဖိတ်ကြားခဲ့ကြောင်း အသိပေး။

  -END-