#Local_News
Published 17 September 2023

အိမ်လိပ်စာ၊ ဖုန်းနံပါတ်မမှတ်မိသည့် အဘိုးတစ်ဦး ဗိုလ်တထောင်ဘုရားလမ်း၊ ကားဂိတ်တွင်ချော်လဲခဲ့ပြီး ပေါင်ရိုးကျိုးသွားကြောင်း ရှင်သန်ရေးကူညီမှု အသင်းမှသိရသည်။

ကားဂိတ်တွင် အဘိုးတစ်ဦးချော်လဲကျနေသဖြင့် ရှင်သန်ရေးကူညီမှုအသင်းမှသွားရောက်ကူညီရာ လမ်းမလျှောက်နိုင်တော့ကြောင်း ခြေထောက်အရမ်းနာကြောင်းပြောသည့်အတွက် ရန်ကုန်ပြည်သူ့ဆေးရုံကြီးကို ကူညီပို့ဆောင်ခဲ့သည်။

ဆေးရုံကြီးတွင် ဓာတ်မှန်စစ်ဆေးရာပေါင်ရိုးကျိုးသွားသဖြင့် ခွဲစိတ်ကုသရန်လိုအပ်သည့်အတွက် မိသားစုဝင်များ၏ခွင့်ပြုချက်လိုအပ်ခဲ့ပြီး အဘိုးဦးတင်ရီသည် မိသားစုဝင်များကိုဆက်သွယ်ရန် လိပ်စာ၊ ဖုန်းနံပါတ်အတိအကျမမှတ်မိတော့၍ လူမှုကွန်ရက်ပေါ်မှ အဘိုးမိသားစုဝင်များဆက်သွယ်ပေးရန် အကူအညီတောင်းခံခဲ့ရာ အဆက်အသွယ် ရရှိခဲ့သည်။
ယင်းကဲ့သို့ မိသားစုဝင်များနှင့်အဆက်အသွယ်ရခဲ့သည့်အတွက်နေအိမ်သို့ ပြန်ပို့ဆောင်ပေးခဲ့ပြီး နေအိမ်မှသျှင်ပါဂူဆေးရုံတွင် ဆေးကုသမှုခံယူနိုင်ရန် ရှင်သန်ရေးကူညီမှုအသင်းမှဆက်လက်ကူညီ ပို့ဆောင်ခဲ့ကြောင်း သိရသည်။

#tthl #Local_News #ပေါင်ရိုးကျိုး လူနာအဖိုး #ပြန်တွေ့ပြီးဆေးကုသခွင့်ရ
#Yangon_Times 

၁၇ စက်တင်ဘာ ၂၀၂၃

ဘန်ကောက်အဲဝေးစ်က အောက်တိုဘာ ၃၁ ရက်အထိ  လေယာဉ်ပေါ်မတက်ခင် ခရီးသည်အာလုံး ကိုယ်အလေးချိန် ချိန်တွယ်ရမည့် အစီအစဉ်ကိုကြေညာခဲ့သည်။ အချက်အလက်များကို လျှို့ဝှက်ထားပေးမည်ဟုလည်းပြောသည်။

လေကြောင်းလိုင်း၏ကြေညာချက်တွင်  ခရီသည်များ ကိုယ်အလေးချိန် ချိန်တွယ်သည်မှာ နိုင်ငံတကာလေကြောင်းပျံသန်းရေးအဖွဲ့ကြီး၏ စံနှုန်းများအတိုင်းဆောင်ရွက်ခြင်းဖြစ်ပြီး  လေယာဉ်ပျံသန်းမှု လုံခြုံစိတ်ချမှုရှိစေရေးအတွက် ပျံတက်စဉ် ဝန်အလေးချိန်ကို တွက်ချက်ရာ တွင် အထောက်အကူဖြစ်စေရန်ဟုဆိုသည်။

ကိုယ်အလေးချိန် ချိန်ခြင်းကို ထွက်ခွာဂိတ်ပေါက်တွင် လေယာဉ်မတင်ခင် ပြုလုပ်မည်ဖြစ်ပြီး ခရီးသည်အားလုံး ပူးပေါင်းဆောင်ရွက်ကြဖို့‌ေ လေကြောင်းလိုင်းက မေတ္တာရပ်ခံထားသည်။

ကိုရီးယားလေကြောင်းနှင့် အဲနယူးဇီလန်တို့ကလည်း ယင်းကဲ့သို့ ဆောင်ရွက်ခဲ့ကြပြီးဖြစ်သည်။

ဘန်ကောက်အဲဝေးစ်သည် ထိုင်း၊ကမ္ဘောဒီးယား၊ဟောင်ကောင်၊လာအို၊မော်လဒိုက်၊မြန်မာ၊စင်္ကာပူနှင့်ဗီယက်နမ်များသို့ ပျံသန်းပေးနေပြီး ဘန်ကောက်မြို့ သုဝဏ္ဏဘူမိလေဆိပ်တွင် အခြေပြုထားသည်။

Source ThaiPBS

၁၇ စက်တင်ဘာ ၂၀၂၃

ထိုင်းနိုင်ငံ အနောက်ပိုင်း ဆန်ခလာပူရီ ခရိုင်တွင် စက်တင်ဘာ ၁၆ရက်စနေနေ့က မြန်မာအမျိုးသမီးတစ်ဦးကို M16 ကျည်ခွံ ၉၂၀ ခုနှင့်  M16 ခဲယမ်းများတပ်ဆင်ထားတဲ့ ကျည်ကပ် ၂၄ ခုနှင့်အတူ ဖမ်းဆီးမိခဲ့တယ်လို့ ဘန်ကောက်ပို့စ်သတင်းစာမှာသတင်းဖော်ပြထားပါတယ်။

ဆန်ခလာပူရီခရိုင်၊ တမ်ဘွန်နွန်လူရှိ Moo 2 ရွာမှာရှိတဲ့ ပုဂ္ဂလိကပိုင် ပစ္စည်းပို့ကုမ္ပဏီတစ်ခုကို ရဲတွေက အပြေးအလွှားစီးနင်းခဲ့တာပါ။ ကုမ္ပဏီ ရုံးခန်းကို မသင်္ကာစရာ အထဲမှာ ကျည်ဆံတွေလို့ယူဆရတဲ့ ပါဆယ်တစ်ထုတ်ရောက်နေတယ်လို့ ဝန်ထမ်းတစ်ဦးက ပြောတာ ကြောင့် ရဲတွေရောက်ရှိခဲ့တာဖြစ်ပါတယ်။ သူတို့ဟာ ပါဆယ်ထုတ်က အပေါက်ကလေးတစ်ခုကနေ အတွင်းကိုကြည့်လိုက်တဲ့အခါ သတ္တုပစ္စည်းတွေတွေ့ရတယ်လို့ အဆိုပါဝန်ထမ်းကပြောပြပါတယ်။

အဆိုပါပါဆယ်ထုပ်မှာ မမ်ဘွန်နွန်လူ Moo 2 ရွာ အိမ်နံပါတ် ၂၄၁ ကိုလိပ်မူထားပြီး ပွန်တစ်လို့ အမည်ပေးထားသူက ချွန်ပူရီပြည်နယ် ဘန်ဘမ်းခရိုင် တမ်ဘွန်နွန်ဆက်လိပ်စာနှင့်  ပေးပို့တာဖြစ်ပါတယ်။

ပါဆယ်အတွင်းမှာ ယမ်းတောင့် ၅၀တောင့်စီပါတဲ့ ဘူး ၁၈ခုနှင့် ယမ်းတောင့် ၂၀ပါတဲ့ ဘူးတစ်ဘူးကို ထည့်ထားပါတယ်။  အစမှာ ကျည်ဆံတွေလို့ထင်ပေမယ့် စစ်ကြည့်တဲ့အခါ အခု ၉၂၀ ဟာ M16 ကျည်ခွံတွေဖြစ်နေပါတယ်။ ပါဆယ်ထုတ်ထဲမှာ ကျည်ကပ် ၂၀ခုကိုလည်းတွေ့ရပြီး တစ်ခုဆီမှာ M16 ကျည်တောင့် ၂၀ခုထည့်ထားပါတယ်။ နောက်ထပ် ကျည်ကပ် (၄)ခုမှာတော့ M16 ကျည်တောင့် ၃၀ခုဆီထည့်ထားပါတယ်။

ရဲတွေဟာ ကုမ္ပဏီဝန်ထမ်းနှီင့်အတူ ပါဆယ်ထုတ်လက်ခံမယ့် အိမ်ကိုသွားပြီး ရဲတွေက မလှမ်းမကမ်းကနေ စောင့်ကြည့်ခဲ့ကြပါတယ်။ ည (၇)နာရီခန့်မှာ အမျိုးသမီးတစ်ဦးထွက်လာပြီး ပါဆယ်ကို လာယူပါတယ်။ အဲဒီအခါ သူမကိုဖမ်းဆီးပြီး စစ်ဆေးမေးမြန်းဖို့ ရဲစခန်းကို ခေါ် ဆောင်သွားခဲ့တယ်လို့ သတင်းမှာဖော်ပြထားပါတယ်။

အမျိုးသမီးက သူ့ကိုယ်သူ မြန်မာနိုင်ငံမှ မွန်လူမျိုးဖြစ်တယ်လို့ သက်သေခံပါတယ်။ သူမရဲ့မူရင်းအမည်ဟာ ပွန်တစ်ဖြစ်ပြီး ထိုင်းနိုင်ငံမှာ တရားမဝင် ၁၃နှစ်ကြာနေထိုင်နေသူဖြစ်ပါတယ်။

သူမကတော့ ပါဆယ်ဟာ သူမပစ္စည်းမဟုတ်ကြောင်းနှင့် အိမ်ရှေ့မှာထားခဲ့လို့ဘာလဲကြည့်ချင်လို့ ထွက်ယူတာဖြစ်တယ်လို့ ငြင်းဆိုထား ပါတယ်။

အဲဒီအမျိုးသမီးကို ဆက်လက်စုံစမ်းမေးမြန်းစရာတွေရှိလို့ ရဲကဆက်လက်ထိန်းသိမ်းထားပါတယ်။ သူမကို ကနဦးအနေနှင့် ထိုင်းနိုင်ငံကို တရားမဝင် ဝင်ရောက်မှုနှင့် ခွင့်ပြုချက်မရှိဘဲ လက်နက်ခဲယမ်းများလက်ဝယ်ထားရှိမှုတို့နှင့် အမှုဖွင့်ထားပါတယ်။

၁၇ စက်တင်ဘလာ ၂၀၂၃

Googleကို ပူးတွဲတည်ထောင်တဲ့ ဆာဂေးဘရင်ဟာ သူ့ဇနီး နီကိုးလ်ရှန်နာဟန်နှင့်တိတ်တိတ်ကလေးကွာရှင်းလိုက်ပါတယ်။ ဘာဖြစ်လို့လဲ ဆိုတော့  ရှေ့နေနှင့် လုပ်ငန်းရှင်တစ်ဦးဖြစ်တဲ့ သူ့ဇနီးနီးကိုလ်ရှန်နာဟန်ဟာ ဘီလျံနာသူဋ္ဌေး အီလွန်မတ်စ်နှင့် ဇာတ်လမ်းရှုပ်ခဲ့တာကြောင့်ဖြစ်တယ်လို့ Business Insider ကသတင်းရေးသားပါတယ်။

တရားရုံးစာရွက်စာတမ်းများအရ သူတို့လင်မယားဟာ မေ ၂၆ရက်နေ့မှာ ကွာရှင်းပြတ်စဲခဲ့ကြတယ်လို့ အတည်ပြုထားပါတယ်။ အခု သူတို့ဟာ တရားဝင် ကွဲသွားကြတာဖြစ်ပြီး သူတို့ရဲ့ လေးနှစ်သမီး ထိန်းသိမ်းစောင့်ရှောက်ရေး ဆက်လက်ရင်ဆိုင်ကြမှာဖြစ်ပါတယ်။

သူတို့ဇနီးမောင်နှံနှစ်ဦးဟာ ၂၀၁၅ခုနှစ်မှာ စပြိးတွဲခဲ့ကြတာဖြစ်ပါတယ်။ အဲဒီနှစ်မှာပဲ မစ္စတာဘရင်ဟာ သူ့ပထမဇနီး အန်းဝိုစစ်စကီနှင့် ကွာရှင်းခဲ့တာပါ။ အဲဒီနောက်သူတို့ဟာ ၂၀၁၈ခုနှစ်မှာ လက်ထပ်ခဲ့ကြတယ်လို့ သတင်းမှာဆက်လက်ရေးသားထားပါတယ်။

ဒါပေမယ့် သူတို့ဟာ ၂၀၂၁ ခုနှစ်မှာ ခွဲနေကြပြီးနောက် ၂၀၂၂ခုနှစ်မှာ မစ္စတာဘရင်က ကွာရှင်းဖို့ တရားရုံးမှာ လျှောက်ထားခဲ့ပါတယ်။ ညှိနှိုင်းပေါင်းစပ်လို့မရနိုင်တဲ့ ကွာဟမှုတွေကြောင့်လို့ သူက အကြောင်းပြပါတယ်။

သူ့ဇနီးဟာ အီလွန်မတ်စ်နှင့် ဇာတ်လမ်းရှုပ်တာကို သူသိရှိပြီးနောက် တစ်လအကြာမှာ သူက ကွာရှင်းခွင့်တင်ခဲ့တာဖြစ်တယ်လို့ နယူးယောက်ပို့စ်သတင်းစာကရေးသားပါတယ်။ အီလွန်မတ်စ်နှင့် ဘရင်တို့ဟာ နှစ်ပေါင်းများစွာကတည်းက ခင်မင်လာခဲ့ကြတဲ့ သူငယ်ချင်းတွေဖြစ်ကြပါတယ်။ ဒါပေမယ့် သူစွပ်စွဲတာမဟုတ်ဘူးလို့တော့ အီလွန်မတ်စ်နှင့် ရှန်နာဟန်တို့နှစ်ဦးစလုံးက ငြင်းဆိုထားကြပါတယ်။

“ဆာဂေးနှင့် ကျွန်တော်တို့ သူငယ်ချင်းတွေပါ။ မနေ့ညကတောင်ပါတီမှာ အတူရှိခဲ့ကြပါသေးတယ်။ ကျွန်တော်နှင့် နီးကိုလ်တို့ သုံးနှစ် အတွင်း နှစ်ကြိမ်ပဲဆုံဖူးတယ်။ အဲဒီအခါတိုင်းမှာ အခြားလူတွေအနားမှာရှိနေတာချည်းပဲ။ ဘာဇာတ်လမ်းမှမရှိဘူး” လို့ အီလွန်မတ်စ်က သူ့ရဲ့ အိတ်စ် ပလက်ဖောင်းပေါ်ကနေ  ၂၀၂၂ခုနှစ် ဇူလိုင် ၂၅ရက်တုန်းက ရှင်းလင်းခဲ့ပါတယ်။ အဲဒီတုန်းက ဝေါစထရိဂျာနယ်သတင်းစာရဲ့ ဆောင်းပါး “ အီလွန်မတ်ရဲ့ ဆာဂေးဘရင်နှင့် မိတ်ဆွေဖြစ်မှု ဇာတ်လမ်းရှုပ်မှုကြောင့် အကွဲအပြဲဖြစ်”ကို သူကပြန်တုန့်ပြန်ခဲ့တာပါ။

ယခုလောလောဆယ်လည်း ရှန်နာဟန်က ဒါမဟုတ်တမ်းတရားတွေလို့ပြောလိုက်ပြီး သူမအနေနှင့် မတ်စ်နှင့် မိတ်ဆွေအဖြစ်ထက် ဘယ်တုန်းကမှ မပိုခဲ့ဘူးလို့ ပြောပါတယ်။

“ကျွန်မနှင့် အီလွန်နှင့် ရမက်ပြင်းပြစွာ အတူအိပ်ခဲ့ကြတဲ့တခဏာတာ ဒါနှင့်ပြီးသွားတာလား ၊ဟင့်အင်းပါ။ ကျွန်မတို့ မေတ္တာဇာတ်လမ်း တွေခင်းခဲ့ကြတာလား။ ဟင်းအင်းပဲ။ ကျွန်မတို့ဘာဇာတ်လမ်းမှမရှုပ်ခဲ့ကြဘူး” လို့ သူမကလည်း ဇူလိုင်လတုန်းက ပြောခဲ့ပါတယ်။ ဝေါစထရိဂျာနယ်ကတော့ သူတို့ရဲ့ သတင်းအရင်းအမြစ်ဟာစိတ်ချရတယ်။ သူတို့သတင်းအပေါ်သူတို့ရပ်တည်ထားတယ်လို့ ပြောပါတယ်။

အသက် ၅၀အရွယ်ရှိပြီဖြစ်တဲ့ Google ပူးတွဲတည်ထောင်သူ ဆာဂေးဘရင်းဟာ ကမ္ဘာပေါ်မှာ (၉)ဦးမြောက် အချမ်းသာဆုံးသူဖြစ်ပါတယ်။

ဒေါ်လာ ၁၁၈ ဘီလျံချမ်းသာပါတယ်လို့ ဘလွန်းဘတ်အညွှန်းကိန်းအရသိရပါတယ်။  မစ် ရှန်နာဟန်ဟာ အသက် ၃၄နှစ်ရှိပြီး ကာလီဖိုနီးယား အခြေစိုက် ရှေ့နေတစ်ဦးနှင့် ဘိုင်ယာ-အက်ကိုးဖောင်ဒေးရှင်းတည်ထောင်သူနှင့် ဥက္ကဋ္ဌဖြစ်ပါတယ်။

Source : BusinessInsider/NYPost

#Local_News
Published 17 September 2023

တရုတ်နိုင်ငံတွင်ကျင်းပနေသည့် ‘တရုတ်-အာဆီယံ နျူကလီးယားနည်းပညာကိုငြိမ်းချမ်းစွာအသုံးပြုခြင်းဖိုရမ်’သို့ မြန်မာနိုင်ငံမှတက်ရောက်ခဲ့ပြီးနျူကလီးယားနည်းပညာကိုအသုံးချကာစိုက်ပျိုးရေးကိုအခြေခံသည့် MSMEs လုပ်ငန်းများဖွံ့ဖြိုးရေးနှင့်ကျန်းမာရေးကဏ္ဍများမြှင့်တင်ဆောင်ရွက်ရန်ကိစ္စရပ်များကိုဆွေးနွေးခဲ့ကြောင်းသိရသည်။

အဆိုပါဖိုရမ်သို့ မြန်မာနိုင်ငံမှ သိပ္ပံနှင့်နည်းပညာဝန်ကြီးဌာန၊ဒုတိယဝန်ကြီးဒေါက်တာအောင်ဇေယျဦးဆောင်တဲ့ အဖွဲ့ဝင်တွေတက်ရောက်ခဲ့ပြီး ဒုတိယဝန်ကြီးကအမှာစကားပြောရာတွင် ‘ စိုက်ပျိုးရေးကိုအခြေခံသည့် MSMEsကုန်ထုတ်လုပ်ငန်းများ ဖွံ့ဖြိုးရေးနှင့်ကျန်းမာရေးကဏ္ဍများမြှင့်တင်ဆောင်ရွက်ရန်ရှိကြောင်း၊ သို့ဖြစ်ရာ ယင်းလုပ်ငန်းများတိုးတက်ရန်ပံ့ပိုးပေးမည့်နျူကလီးယားနည်းပညာကို ငြိမ်းချမ်းစွာအသုံးပြုရေးဆိုင်ရာ သုတေသနများ၊ လူ့စွမ်းအားအရင်းအမြစ်ဖွံ့ဖြိုးရေးလုပ်ငန်းများအတွက်ပူးပေါင်းဆောင်ရွက်ရန် ဖိတ်ခေါ်ကြောင်း’ ထည့်သွင်းပြောကြားခဲ့သည်။

ဖိုရမ်အတွင်း ဒုတိယဝန်ကြီးသည် တရုတ်အဏုမြူစွမ်းအင်အေဂျင်စီဒုတိယညွှန်ကြား‌ရေးမှူးချုပ်၊တရုတ် အမျိုးသားနျူကလီးယားကော်ပိုရေးရှင်းဒုတိယဥက္ကဌနှင့်တွေ့ဆုံပြီး စိုက်ပျိုးရေးထုတ်ကုန်ကဏ္ဍမြှင့်တင် ရန်နှင့်ကျန်းမာရေးစောင့်ရှောက်ရန်နျူကလီးယားနည်းပညာကိုအသုံးချခြင်းအပြင် သုတေသနနှင့်လူ့စွမ်းအား အရင်းအမြစ်ဆိုင်ရာပူးပေါင်းဆောင်ရွက်ရေးကိစ္စရပ်များကိုဆွေးနွေးခဲ့ကြောင်း သိရသည်။

မြန်မာနိုင်ငံအနေဖြင့်အရှေ့တောင်အာရှနျူကလီးယားလက်နက်ကင်းမဲ့ရေးဇုန် စာချုပ်ကိုလက်မှတ်ရေးထိုး ထားပြီးခိုင်မာသောကတိကဝတ်များကို ထပ်မံအတည်ပြုခဲ့ပြီးဖြစ်ကြောင်းနှင့် မြန်မာနိုင်ငံသည် အာဆီယံအဏုမြူစွမ်းအင် ကြပ်မတ်ရေးဌာနများကွန်ရက်(ASEANTOM)အဖွဲ့ဝင်နိုင်ငံဖြစ်သလို အဆိုပါ ASEANTOM-IAEA၏နျူကလီးယားလုံခြုံရေးနှင့်ဓာတ်ရောင်ခြည်အရေးပေါ်ကိစ္စရပ်များအတွက် ကြိုတင်ပြင်ဆင်မှုနှင့်တုံပြန်ရေးဆိုင်ရာစီမံကိန်းတွင်လည်းပါဝင်ဆောင်ရွက်နေကြောင်း ၊IAEA၏ နျူကလီးယားနည်းပညာပူးပေါင်းဆောင်ရွက်ရေးအစီအစဉ်ဖြင့် နျူကလီးယားသိပ္ပံနှင့်နည်းပညာအသုံးချ ရေးများအပြင်စွမ်းရည်မြှင့်တင်ခြင်းများကိုဆောင်ရွက်နေကြောင်း ဖိုရမ်တွင် ဒုတိယဝန်ကြီးမှထည့်သွင်း ပြောခဲ့သည်။

#tthl #Local_News #နျူကလီးယားနည်းပညာ #MSMEs လုပ်ငန်း #ကျန်းမာရေးကဏ္ဍမြှင့်တင် #Yangon_Times 

#Local_News
Published 17 September 2023

ရွှေတိဂုံစေတီတွင်CCTVအလုံးရေ(၅၀၀)ကျော်တပ်ဆင်ပြီးဘုရားဖူးများကိုလုံခြုံရေးပေးထားကြောင်း ဂေါပကအဖွဲ့ထံမှသိရသည်။

ယခင်က ရွှေတိဂုံစေတီတော်ကြီးတစ်ခုလုံးပဲတပ်ဆင်ထားခြင်းဖြစ်ပြီး ယခုအချိန်တွင် အာဇာနည်လမ်းတစ်လျှောက်ရော ရွှေတိဂုံစေတီတော်ကိုဝင်ရောက်သည့် ပတ်ပတ်လည်လမ်းများတွင်ပါ CCTVများဖြင့်လုံခြုံရေးဆောင်ရွက်ပေးထားသည်ဟုဆိုသည်။

"အရင်က ရွှေတိဂုံစေတီတော်မှာပဲ CCTVတွေနဲ့ လုံခြုံရေးပေးထားတယ်။အခုတော့ စေတီတော်ကြီးရော စေတီတော်ကိုဝင်တဲ့လမ်းတစ်လျှောက် ပတ်ပတ်လည်မှာရော CCTVတွေတပ်ဆင်ထားပြီးဖြစ်ပါတယ်"ဟု ရွှေတိဂုံဂေါပကအဖွဲ့ဝင်တစ်ဦးကပြောသည်။

အရင်တုန်းက CCTVအလုံး၂၀၀ကျော်တပ်ဆင်ခဲ့ပြီးပြီးခဲ့သည့်နှစ်နှစ်အတွင်း အလုံး၃၅၀ကျော်ထပ်တိုးတပ်ဆင်ထားကြောင်း ရွှေတိဂုံလုံခြုံရေးကို မြန်မာနိုင်ငံရဲတပ်ဖွဲ့၊ဘုရားလုံခြုံရေးအဖွဲ့နှင့် XRayစက်တွေအသုံးပြုဆောင်ရွက်လျက်ရှိကြောင်း သိရသည်။

#tthl #Local_News #ရွှေတိဂုံစေတီ #CCTV အလုံးရေ(၅၀၀)ကျော်တပ်ဆင်ပြီး
#Yangon_Times 

#Local_News
Published 17 September 2023

၂၀၂၃ ခုနှစ်၊ ပြည်နယ်နှင့်တိုင်းဒေသကြီးအလေးမပြိုင်ပွဲတွင် အမျိုးသမီးတံခွန်စိုက်ဆုဖလားရရှိသည့် မကွေးတိုင်းဒေသကြီးအသင်း၊ အမျိုးသားတံခွန်စိုက် ဆုဖလားရရှိသည့် ဧရာဝတီတိုင်းဒေသကြီးအသင်းနှင့် စုပေါင်းတံခွန်စိုက်ဆုဖလားရရှိသည့် မကွေးတိုင်းဒေသကြီးအသင်းတို့မှဆုများရရှိခဲ့ကြောင်း သိရသည်။

ဆုရရှိသောအသင်းများကို အားကစားနှင့်လူငယ်ရေးရာဝန်ကြီးဌာန ပြည်ထောင်စုဝန်ကြီး ဦးမင်းသိန်းဇံနှင့် တာဝန်ရှိသူများမှဆုချီးမြှင့်ခဲ့သည်။

ယခုနှစ်ပြိုင်ပွဲတွင် အလေးမစံချိန်ဟောင်းကို ချိုးနိုင်ပြီး စံချိန်သစ်တင်နိုင်ခဲ့သော အားကစားသမား များလည်းရှိခဲ့သည်။

အမျိုးသမီး(၅၉)ကီလိုပြိုင်ပွဲတွင် ပြည်နယ်နှင့်တိုင်း ဒေသကြီး နှစ်ဆင့်မ သတ်မှတ်စံချိန်သစ်တင်နိုင်ခဲ့သည့် အားကစားသမား၊အမျိုးသား(၅၅)ကီလို ပြိုင်ပွဲတွင် ပြည်နယ်နှင့်တိုင်းဒေသကြီး အမြန်မသတ်မှတ်စံချိန်သစ်တင်နိုင်ခဲ့သည့် အားကစားသမား၊အမျိုးသား(၇၃) ကီလိုပြိုင်ပွဲတွင် ပြည်နယ်နှင့်တိုင်းဒေသကြီး နှစ်ဆင့်မ စံချိန်သစ် တင်နိုင်ခဲ့သည့်  အားကစားသမား၊အမျိုးသမီး(၄၉) ကီလိုပြိုင်ပွဲနှင့်အမျိုးသား (၆၇) ကီလိုပြိုင်ပွဲတို့တွင် ပြည်နယ်နှင့်တိုင်းဒေသကြီး စံချိန်သစ်တင်နိုင်ခဲ့သည့် အားကစားသမားများ၊အမျိုးသမီး (၆၄) ကီလိုပြိုင်ပွဲနှင့် အမျိုးသား (၈၉)ကီလိုပြိုင်ပွဲတို့တွင် ပြည်နယ်နှင့်တိုင်းဒေသကြီး စံချိန်သစ်တင်နိုင်ခဲ့သည့် အားကစားသမားများကိုလည်းဆုချီးမြှင့်ခဲ့‌သည်။

၂၀၂၃ ခုနှစ်၊ ပြည်နယ်နှင့်တိုင်းဒေသကြီး အလေးမပြိုင်ပွဲကို စက်တင်ဘာလ (၁၂)ရက်နေ့ မှ (၁၆)ရက်နေ့အထိ နေပြည်တော်၊ ဝဏ္ဏသိဒိ္ဓအားကစားကွင်းရှိ အလေးမလေ့ကျင့်ရေးရုံ၌ ကျင်းပ ပြုလုပ်ခဲ့ပြီး ပြည်နယ်နှင့်တိုင်းဒေသကြီးများမှ ပြိုင်ပွဲဝင်အမျိုးသားအသင်း (၁၃)သင်းနှင့် အမျိုးသမီး အသင်း(၁၁)သင်း၊ ပြိုင်ပွဲဝင်အင်အားစုစုပေါင်း(၁၇၂)ဦး ပါဝင်ယှဉ်ပြိုင်ခဲ့ကြကြောင်းသိရသည်။

#tthl #Local_News #အလေးမအားကစားသမား #အသင်းများကိုဆုချီးမြှင့်
#Yangon_Times 

#Local_News
Published 17 September 2023

ရုရှား-မြန်မာ နှစ်နိုင်ငံအကြား ရင်းနှီးမြှုပ်နှံမှုများ ပိုမိုအဆင်ပြေစေရန်နှင့် ငွေပေးချေမှုများ အဆင် ပြေချောမွေ့စေရန်အတွက်ရုရှားဘဏ်များမှ မြန်မာနိုင်ငံ၌ ဘဏ်ခွဲ(သို့မဟုတ်) ကိုယ်စားလှယ်ရုံးခွဲများ လာရောက်ဖွင့်လှစ်နိုင်ရန်   ရည်ရွယ်ချက်ဖြင့် ရုရှားနိုင်ငံ ဗဟိုဘဏ်နှင့်  မြန်မာနိုင်ငံတော် ဗဟိုဘဏ်တို့အကြား ဘဏ်စာရင်းဖွင့်လှစ်သည့်  သဘောတူစာချုပ်အားလက်မှတ် ရေးထိုးခဲ့ကြကြောင်း သိရသည်။

အဆိုပါသဘောတူစာချုပ်ကို ရုရှားတွင်ကျင်းပသည့် အဋ္ဌမအကြိမ်မြောက် အရှေ့ဖျားစီးပွားရေးဖိုရမ်ခရီးစဉ်တွင်မြန်မာနိုင်ငံတော် ဗဟိုဘဏ် ဥက္ကဋ္ဌနှင့်  ရုရှားနိုင်ငံဗဟိုဘဏ် ဒုတိယဥက္ကဋ္ဌတို့ကလက်မှတ်ရေးထိုးခဲ့ခြင်းဖြစ်သည်။

ယင်းအပြင် နှစ်နိုင်ငံခရီးသွား ဧည့်သည် ဝင်ရောက်မှုများ တိုးမြှင့်လာစေရေး၊   ခရီးသွားလုပ်ငန်းဝန်ဆောင်မှု အရည်အသွေးများ မြှင့်တင်ရေး၊   ခရီးသွားလုပ်ငန်း အလားအလာများ တိုးမြှင့်လာစေရေးနှင့် ခရီးသွားလုပ်ငန်းတွင်  ပူးပေါင်း ဆောင်ရွက်မှုများ   ပိုမိုခိုင်မာစေရေးတို့ကို ရည်ရွယ်၍ ခရီးသွားလုပ်ငန်း ပူးပေါင်းဆောင်ရွက်မှုဆိုင်ရာ  နားလည်မှု စာချွန်လွှာကိုလက်မှတ်ရေးထိုးခဲ့သည်။

အဆိုပါစာချွန်လွှာကိုဟိုတယ်နှင့် ခရီးသွားလာရေးဝန်ကြီးဌာန   ပြည်ထောင်စုဝန်ကြီးနှင့်  ရုရှား ဖက်ဒရေးရှင်းနိုင်ငံ   စီးပွားရေးဖွံ့ဖြိုးတိုးတက်မှု ဝန်ကြီးဌာနဝန်ကြီးတို့က လည်းကောင်း လက်မှတ် ရေးထိုးခဲ့ကြကြောင်း သိရသည်။

#tthl #Local_News #ရုရှားဘဏ်ခွဲ #ကိုယ်စားလှယ်ရုံးခွဲ #ရုရှား-မြန်မာခရီးသွား
#Yangon_Times 

#Local_News
Published 17 September 2023
 
(၂၀) ကြိမ်မြောက် တရုတ်-အာဆီယံကုန်စည်ပြပွဲ တွင်မြန်မာထွက်ကုန်(၁၀)မျိုးကိုပြခန်း(၈၀)ဖြင့်ပြသထားကြောင်းနှင့် ယခုနှစ်ခုနှစ်လတာအတွင်း တရုတ်-အာဆီယံနှစ်ဦးနှစ်ဖက်အပြန်အလှန်ရင်းနှီးမြှုပ်နှံမှုသည်အမေရိကန်ဒေါ်လာ ၂၈၀ ဘီလီယံကျော်ပြီဖြစ်ကြောင်း မြန်မာနိုင်ငံဆိုင်ရာတရုတ်သံရုံးမှ သိရသည်။

အဆိုပါကုန်စည်ပြပွဲကို စက်တင်ဘာလ ၁၆ ရက်နေ့မှ ၁၉ ရက်အထိတရုတ်နိုင်ငံ၊ ကွမ်ရှီးဒေသ ၊နန်နင်းမြို့တွင် ကျင်းပနေခြင်းဖြစ်သည်။

မြန်မာနိုင်ငံအနေဖြင့် ပြခန်းပေါင်း ၈၀ တွင် ဆန်၊ ရေထွက်ကုန်ပစ္စည်း၊ သစ်သီး၊ ကော်ဖီ၊ လက်ဖက်စိမ်း၊ အမွှေးအကြိုင်၊ သစ်ထွက်ကုန်၊ အထည်ချုပ်ပစ္စည်းနှင့် အဝတ်အစား၊ လက်မှုပစ္စည်းနှင့် ကျောက်မျက်ရတနာတို့ကို ပြသလျက်ရှိသည်။

အဆိုပါ ကုန်စည်ပြပွဲသို့ မြန်မာနိုင်ငံ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦးက ကိုယ်စားလှယ်အဖွဲ့ဦးဆောင်၍ တက်ရောက်မည်ဖြစ်ပြီးယခုအကြိမ် တရုတ်-အာဆီယံ ကုန်စည်ပြပွဲ၏ စုစုပေါင်းပြခန်းဧရိယာမှာ စတုရန်းမီတာ ၁၀၂,၀၀၀ ရှိပြီး နိုင်ငံပေါင်း ၄၅ နိုင်ငံမှ လုပ်ငန်းကုမ္ပဏီပေါင်း ၇၅၀ နီးပါးတက်ရောက်ပြသမည်ဖြစ်သည်။ 

ယခုအကြိမ် တရုတ်-အာဆီယံကုန်စည်ပြပွဲတွင် “Belt and Road အရည်အသွေးမြင့်စွာ ဖွံ့ဖြိုးလာစေရေးမြှင့်တင်ခြင်းနှင့် စီးပွားရေးကြီးထွားမှုဗဟိုချက် အသစ်ကိုပြုစုပျိုးထောင်ပေးခြင်းတို့ဖြင့် အတူမျှဝေခံစားသည့် အနာဂတ်နှင့် ဟန်ချက်ညီမျှသည့် နေရာတစ်ခု ဖြစ်လာစေရေးအတွက် အတူတကွ ကြိုးပမ်းဆောင်ရွက်ကြပါစို့” ခေါင်းစဉ်ဖြင့်ကျင်းပခြင်းဖြစ်သည်။

ယမန်နှစ်က တရုတ်-အာဆီယံ ကုန်သွယ်မှုပမာဏသည် အမေရိကန်ဒေါ်လာ ၉၇၀ ဘီလီယံကျော်လွန်ခဲ့ပြီး ယမန်နှစ်ကာလတူထက် ၁၁.၂% တိုးတက်လာခဲ့သည်။ ယခုနှစ် ဇူလိုင်လအထိ တရုတ်နိုင်ငံသည် အာဆီယံနိုင်ငံများနှင့် နှစ်ဦးနှစ်ဖက်အပြန်အလှန်ရင်းနှီးမြှုပ်နှံမှုသည် အမေရိကန်ဒေါ်လာ ၂၈၀ ဘီလီယံကျော်ပြီဖြစ်ကြောင်းသိရသည်။

#tthl #Local_News #တရုတ်-အာဆီယံကုန်စည်ပြပွဲ #မြန်မာထွက်ကုန်ပြခန်း
#Yangon_Times

၁၇ စက်တင်ဘာ ၂၀၂၃
ညီနောင်မဟာမိတ် (၃)ဖွဲ့က နိုင်ငံတကာရင်းနှီးမြှုပ်နှံမှုကုမ္ပဏီ (သို့မဟုတ်) ပုဂ္ဂိုလ်များအပေါ် အနှောင့်အယှက် ပေးခြင်း၊ ဆက်ကြေး တောင်းခြင်း စသည့်ပြစ်မှုများကျူးလွန်သည့် မည်သူကိုမဆို ဥပဒေအရ အရေးယူဆောင် ရွက်သွားရန် ဆုံးဖြတ်ချက် တစ်ရပ်ကို ပြီးခဲ့သည့် ဇူလိုင်လကတည်းကပင် ချမှတ်ခဲ့ကြသည်ကို ယင်းတို့၏ ထုတ်ပြန်ချက်အရ သိရသည်။
ညီနောင် ၃ ဖွဲ့မှာ ရက္ခိုင့် တပ်တော် (AA)၊ တအာင်း (ပလောင်) အမျိုးသားလွတ်မြောက်ရေး တပ်မတော် (TNLA)၊ မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) ကိုးကန့်တပ် တို့ဖြစ်ကြသည်။
ညီနောင် အဖွဲ့ ၃ ဖွဲ့၏ ပူးတွဲထုတ်ပြန်ကြေညာချက်တွင် ဒေသတည်ငြိမ်အေးချမ်းရေးနှင့်ပြည်သူ လူထု တစ်ရပ် လုံး ၏အသက်အိုးအိမ်စည်းစိမ်များကိုကာကွယ်စောင့် ရှောက်ရေးဟူသည့် မွန်မြတ်သောတာဝန်ဝတ္တရား ကို ကျေပွန်စွာထမ်းဆောင်ရန်အတွက် ယင်းတို့၏ ထိန်းချုပ်နယ်မြေများနှင့် လှုပ်ရှားနယ်မြေများအတွင်း၌ အကြမ်း ဖက်တိုက်ဖျက်ရေး နှင့်ရာဇဝတ်မှုကျူးလွန်သည့်လုပ်ရပ်များအားချေမှုန်းရေးလုပ်ငန်းများကို ပိုမိုတိုး တက် ကောင်းမွန်ရန်အတွက် တက် တက်ကြွကြွနှင့်အတူတကွပူးပေါင်းဆောင်ရွက်သွားနိုင်ရန် သဘောထားထုတ်ပြန် ခြင်း ဖြစ်ကြောင်းလည်း ဖော်ပြထားသည်။
ယင်းဖော်ပြချက်တွင် ဒေသတည်ငြိမ်အေးချမ်းရေး၊လုံခြုံရေး နှင့် သူတစ်ပါး၏ အသက်အိုးအိမ်စည်းစိမ်များကို ထိခိုက်စေနိုင်သော မည်သည့်အကြမ်းဖက်လုပ်ရပ်များနှင့် ကျူးလွန်သူများကို မည်သည့်အခါတွင်မျှအား မပေး ဘဲ တားဆီးတိုက်ဖျက် ချေမှုန်းသွားမည် ဖြစ်ကြောင်းနှင့် ရာဇဝတ်မှုကျူးလွန်သည့်လုပ်ရပ်များ နှင့်ပတ် သက် သောပစ္စည်းဥစ္စာများကို ဥပဒေနှင့်အညီထိန်းသိမ်းပြီး စစ်ဆေးကာ နည်းမှန်လမ်းမှန်အရေးယူသွား မည် ဖြစ် ကြောင်းလည်း ပါရှိသည်။
ယင်းအပြင် နိုင်ငံတကာမှလာရောက်ရင်းနှီးမြှုပ်နှံသောစီမံကိန်းများအား နှောင့်ယှက်ဖျက်ဆီးသူများကို ထိရောက်စွာ အရေးယူဆောင်ရွက်သွားမည်ဖြစ်ကြောင်းနှင့် နိုင်ငံတကာရင်းနှီးမြှုပ်နှံမှုကုမ္ပဏီ (သို့မဟုတ်) ပုဂ္ဂိုလ်များအပေါ် အနှောင့်အယှက်ပေးခြင်း၊ ဆက်ကြေး တောင်းခြင်း စသည့်ပြစ်မှုများကျူးလွန်သည့် မည်သူ့ ကို မဆို ဥပဒေအရ အရေးယူဆောင်ရွက်သွားရန်၊အကြမ်းဖက်လုပ်ရပ်အားကျူးလွန်သူများ၊ ရာဇဝတ်မှုကျူး လွန်သူများအား အကာအကွယ်ပေးနေသူများကို ဖြိုခွင်းတိုက်ဖျက်အရေးယူသွားရန်၊လူကုန်ကူးခြင်း နှင့် အတင်းအဓမ္မလုပ်အားခိုင်းစေသူများကို ထိထိရောက်ရောက် အရေးယူဆောင်ရွက်သွားရန် နှင့် အကြမ်းဖက်လုပ် ရပ်များ ကျူးလွန်သောသူများကိုတွေ့ရှိပါက ယင်းတို့ထံအချိန်မီသတင်းပို့ကြပါရန်လည်း မေတ္တာရပ်ခံထားသည်ကိုတွေ့ရသည်။
အလားတူ မြန်မာပြည်သူလူထုတစ်ရပ်လုံး နှင့် ယင်းတို့၏ တော်လှန်ရေးအဖွဲ့အစည်းများအပေါ် အားပေး ထောက်ခံ ကြသောသူများအနေဖြင့် ကမ္ဘာ့ငြိမ်းချမ်းရေး၊အကြမ်းဖက်တိုက်ဖျက်ရေး နှင့် ရာဇဝတ်မှုကျူး လွန်သည့်လုပ်ရပ် များကို ချေမှုန်းရေးလုပ်ငန်းများတွင် အတူတကွတက်ကြွစွာပူးပေါင်းဆောင်ရွက်ကြရန် လည်း အထူးတိုက်တွန်းထားသည်ကိုတွေ့ရသည်။

“ကျွန်တော်တို့ တိုင်းပြည်က ဖွံ့ဖြိုးမှူအနိမ့်ဆုံးနိုင်ငံ ပဲ ရှိပါသေးတယ်။ပြီးတော့ ဈေးကွက်စီးပွားရေးနဲ့ ဒီမိုက ရေစီကို သွားတဲ့အခါ အားလုံးသိတဲ့အတိုင်းပဲ ၂၀၂၀ ရွေးကောက်ပွဲ ကိစ္စကြောင့် ၂၀၂၁ ခုနှစ်မှာ အာဏာ ထိန်းရတဲ့အနေအထားဆိုတော့ ဒီမိုကရေစီကလည်း တန့်ရပ်နေတယ်ဆိုတဲ့ သဘော ဖြစ်နေ တာပေါ့နော်။ နောက်စ်ပိုင်းက ဈေးကွက် စီးပွားရေးမှာလည်း ၆၂ ခုနှစ် အာဏာသိမ်းပြီးတဲ့နောက် တံခါး ပိတ်စီးပွားရေး ဖြစ်ခဲ့ပြီး ဒီဘက်ကိုရောက်လာတော့လည်း တိုင်းပြည်က ဖွံ့ဖြိုးမှု နည်းခဲ့တာ ရှိတယ်။ဒီဘက်မှာ ကျတော့ တပ်မတော် လက်ထက်မှာ စီးပွားရေးပိတ်ဆို့ခဲ့တာ ဖြစ်တယ်။ဒါကြောင့် ဖွံ့ဖြိုးမှု မရှိ ဖြစ်နေတယ်။အခု က တံခါးပြန်ဖွင့်တဲ့အခါ ရင်းနှီးမြှုပ်နှံမှုက မဖြစ်မနေ လိုအပ်တယ်။ကျွန်တော်တို့ ဆီမှာလေ။အဲဒါကြောင့် ကျွန်တော် တို့ကို ပိတ်ဆို့ထားတဲ့ နိုင်ငံ ရှိနေပေမဲ့လည်း ကျွန်တော်တို့နဲ့ လက်တွဲလုပ်နိုင်တဲ့ ဥပမာ တရုတ်လို နိုင်ငံပေါ့။ ကမ္ဘာမှာ ဒုတိယအကြီးဆုံးနိုင်ငံကြီးနားမှာ နေရတဲ့အတွက် ရင်းနှီးမြှုပ်နှံမှုတွေ လာတာကို ကြိုဆိုရမယ်။ ပြည်တွင်းမှာကလည်း တိုင်းရင်းသားလက်နက်ကိုင် အဖွဲ့အစည်းတွေ များတယ်ပေါ့။ပိုဆိုးတာက အခု နွေဦးတော်လှန်ရေးလို့ ဖြစ်လာပြီးတဲ့နောက် အဖွဲ့အစည်းတွေက ထွက်ပေါ်လာတဲ့အခါကျတော့ တိုင်းပြည်မှာ မတည်ငြိမ်မှုတွေက အများကြီး ဖြစ်လာတယ်။အများကြီး ဖြစ်လာတော့ ရင်းနှီးမြှုပ်နှံမယ့်သူတွေကလည်း မြန်မာပြည်ကို လာဖို့ လက်တွန့်နေတယ်ပေါ့နော်။ဆိုတော့ ဒီကာလမှာ သူတို့ရဲ့ ထုတ်ပြန်ချက်ကို ပြန်ကောက်ရရင် ဒီထုတ်ပြန်ချက်က အပြုသဘောဆောင်တယ်လို့ပဲ ပြောရမှာပါ။ဘယ်လိုပဲ ဖြစ်ဖြစ် ကျွန်တော်တို့ တိုင်းပြည်မှာ ဘယ်သူပဲ ရင်းနှီးမြှုပ်နှံမှု လာလုပ်လုပ် ကျွန်တော်တို့အနေနဲ့ မထိခိုက် မဆုံးရှုံးအောင် ကာကွယ်ရမှာပဲ။ဒါဆိုရင် တဖြည်းဖြည်းနဲ့ ရင်းနှီးမြှုပ်နှံသူတွေရောက်လာပြီး စီးပွားရေး ပြန်လည် ဦးမော့လာမယ်လို့ ယူဆပါတယ်။ဒါကြောင့် ဒီထုတ်ပြန်ချက်က ကောင်းတဲ့ သဘော ဖြစ်တယ်လို့ ယူဆပါတယ်။နောက်တစ်ခုက တိုင်းရင်းသားလက်နက် ကိုင်တွေက တောင်းဆိုလာခဲ့ကြတဲ့ ဖက်ဒရယ်တွေ ကိုယ်ပိုင်ပြဌာန်းခွင့်တွေ၊တန်းတူညီမျှမှုတွေပေါ့။ အစိုးရအဆက်ဆက်နဲ့ ညှိနှိုင်းနေကြတုန်းပါပဲ။ဥပမာရခိုင်မှာ ရင်းနှီးမြှုပ်နှံရင် ဘယ်လိုပဲ ဖြစ်ဖြစ်ရခိုင်ပြည်နယ်ကြီး တိုးတက်ရင် ရခိုင်လူမျိုးတွေ ခံစားရတာပဲလေ။AA ရဲ့ ဦးတည်ချက်က ရခိုင်ပြည်နယ်အတွက် တိုက်ပွဲဝင်နေတယ်ဆိုရင် ရခိုင်ပြည်နယ် မှာ ဖျက်ဆီးနှောင့်ယှက်တာ ကို ကာကွယ်မယ်ဆိုရင်တော့ ဒါက မှန်တယ်လို့ ပြောရမှာပေါ့။အခုလို အပြုသဘောဆောင်တဲ့ အရာတွေကို လက်နက်ကိုင်အဖွဲ့အစည်းတွေက ထုတ်ပြန်လာတာကို ကျင့်သုံးလာတယ်ဆိုတာကိုတော့ ကြိုဆိုရမှာ ဖြစ်ပါတယ်”ဟု အမျိုးသားနိုင်ငံရေး မဟာမိတ်များအဖွဲ့ချုပ်ပါတီ အထွေထွေအတွင်းရေးမှူး ဦးကျော်သူအောင် က ပြောသည်။

ယင်းညီနောင် ၃ ဖွဲ့က ပြီးခဲ့သည့် ဇွန်လ ၁ ရက် နှင့် ဇွန်လ ၂ ရက်က အမျိုးသား ဒီမိုကရေစီ မဟာမိတ်တပ်မ တော် (NDAA) ထိန်းချုပ်သည့် မိုင်းလားမြို့၌ နစက၏ အမျိုးသား စည်းလုံးညီညွှတ်ရေး နှင့် ငြိမ်းချမ်းရေး ဖော်ဆောင်မှု ညှိနှိုင်းရေး ကော်မတီ (NSPNC) နှင့် တွေ့ဆုံ ဆွေးနွေးမှု ဖြစ်စဉ် နောက်ပိုင်း ယင်း ထုတ်ပြန် ချက်ကို ထုတ်ပြန်ခဲ့ခြင်းလည်း ဖြစ်သည်။

အဆိုပါ တွေ့ဆုံဆွေးနွေးမှုမှာလည်း တရုတ်နိုင်ငံ၏ ကြားဝင်ပေးမှုကြောင့် ဖြစ်လာသည့်ဆွေးနွေးမှု ဖြစ် ကြောင်း အားလုံးက နားလည် ထားကြခြင်း ဖြစ်သည်။ယင်းအပြင် ၎င်းတို့ တွေ့ဆုံဆွေးနွေးမှုတွင် တရုတ်နိုင်ငံ ယူနန်ပြည်နယ် နိုင်ငံခြားရေးရာ အထူး သံတမန် မစ္စတာကောပေါင်လည်း ပါဝင်တက်ရောက်ခဲ့ကြောင်း သိရသည်။

ယင်းမှာ နစက တာဝန်ယူသည့် ၂၀၂၁ ခုနှစ် ဖေဖော်ဝါရီလ နောက်ပိုင်းတွင် NSPNC နှင့် ညီနောင် မဟာမိတ် (၃) ဖွဲ့တို့ ၏ ပထမဆုံးအကြိမ် တွေ့ဆုံမှုလည်း ဖြစ်ခဲ့သည်။

နိုင်ငံရေး လေ့လာသုံးသပ်သူ ဦးရဲထွန်း (သီပေါ) က မြောက်ပိုင်းမဟာမိတ် (၃) ဖွဲ့ အနေဖြင့် အဆိုပါ ဆွေးနွေးပွဲကို လိုလိုလားလား ဆွေးနွေးချင်ပုံ မရကြောင်းနှင့် တရုတ်တိုက်တွန်းမှုကို မလွဲသာ၍ အစည်း အဝေးလာတက် ရခြင်း ဖြစ်ကြောင်း သျှမ်းသံတော်ဆင့် ကို သုံးသပ်ပြောဆိုထားခဲ့သည်။

“တိုင်းရင်းသားလက်နက်ကိုင်အဖွဲ့အစည်းတွေ ၊ ခွဲထွက်ရေးလက်နက်ကိုင်လှုပ်ရှားမှုတွေ ၊ ပျောက်ကြားလှုပ် ရှား မှုတွေ ၊ နောက်ပြီးတော့ ဝါဒရေးရာနဲ့ သဘောတရားရေးရာ အပိုင်းတွေ ပါဝင်တဲ့လက်နက်ကိုင်လှုပ် ရှားမှုတွေနဲ့ ပတ်သက်တဲ့ထောက်ပံ့ရေးလမ်းကြောင်းတွေက မြန်မာပြည် မြောက်ပိုင်းလို့ခေါ်တဲ့ ကချင်ပြည် နယ်အတွင်းမှာ တည်ရှိနေတယ်။  KIA/KIO ရဲ့အရေးကြီးတဲ့အခန်းကဏ္ဍမှာ ပြီးခဲ့တဲ့ ဆယ်စုနှစ်ပေါင်းများစွာ တောက်လျှောက် ရပ်တည်ခဲ့တယ်ပေါ့။တိတိကျကျ ပြောရရင် ၁၉၆၀ ဝန်းကျင် ခုနှစ်တွေကစပြီး တောက် လျှောက်ရပ်တည်လာ ခဲ့တာကိုး ။ဆိုတော့ ဒီဘက်မှာကျတော့ ရခိုင်နဲ့ ၊ ရှမ်းနဲ့ အခြားအရပ်ဖက်အဖွဲ့အစည်း တွေ အများကြီးပါဝင်ကြ တယ်လေ။ နောက်ဆုံး Oversea နဲ့ပင်လယ်ရပ်ခြားမှာ သွားရောက်အလုပ်လုပ်ကိုင် ၊ ရွှေ့ပြောင်းနေထိုင်နေကြ တဲ့ ရခိုင် Community ( လူမှုအစုအဝန်း ) တွေ ၊ ရှမ်း Community ( လူမှုအစုအဝန်း ) တွေရဲ့ ဆက်သွယ်ရေး လမ်း ကြောင်းတွေက ရှိကြတာကိုး။ အမေရိကမှာလည်း ရှိတယ်။ ကနေဒါ၊ EU ဥရောပမှာလည်း ရှိကြတယ် ။ ဒီလိုပုံစံတွေထဲမှာ ပညာတတ်တွေလည်း ရှိတယ်လေ ။ ခေတ်မီတဲ့နည်းစနစ်တွေ လည်း ရှိတယ်။ ဒါတစ်ခုပေါ့ ။ နောက်တစ်ခုက မြန်မာပြည်ရဲ့ အနောက်ဖျားပေါ့ ။ ချင်းပြည်နယ်နဲ့ ရခိုင်ပြည်နယ် မြောက်ပိုင်းမှာရှိတဲ့ အိန္ဒိယရဲ့စီမံကိန်းတွေ ၊ ပရောဂျက်တွေကို တိုက်ခိုက်မှုတွေကို တိုင်းရင်းသားလက် နက်ကိုင်အဖွဲ့အစည်း တချို့က လုပ်ခဲ့သည်ရှိသော် ၊ တခြားတစ်ဖွဲ့က လုပ်ခဲ့သည်ရှိသော် ၊ တခြားတစ်ဖက်မှာ လည်း တရုတ်ရဲ့ ပရောဂျက်တွေကို တိုက်ခိုက်ဖို့ တခြားစင်ပြိုင် ပြိုင်ဘက်အဖွဲ့အစည်းတွေကို ပြန်တွန်းအား ပေးတာမျိုး တွေလည်း ရှိကောင်းရှိလာနိုင်တယ်။ ဒါကပဋိပက္ခတွေမှာ ရှိလာနိုင်တယ် ။ တစ်ဖက်က တစ်ဖက်ကို လုပ်ရင် ၊ တစ်ဖက်က တစ်ဖက်ကို ပြန်တုံ့ပြန်ပြီး ပြန်လုပ်တာကို လှုံ့ဆော်တတ်တယ် ၊ အားပေးတတ်တယ် ။ ကောင်းတာကတော့ မြန်မာပြည်ကတော့ Global Powers တွေနဲ့ ဒေသဆိုင်ရာ Powers တွေရဲ့ အင်အားယှဉ် ပြိုင် မှုမှာ မြန်မာပြည်ကကြားခံပစ္စည်းတစ်ခု မဖြစ်သင့်ဘူး ။ အခုက Proxy War တစ်ခု ၊ တစ်ဆင့်ခံရုပ်သေး နယ်ရုပ်စစ်ပွဲ တစ်ခုလိုဖြစ်နေတယ် ။ ဒါက မြန်မာပြည်ရဲ့ အခြေအနေအရ ။ အဲ့တော့ ရှမ်းပြည်နယ်ထဲမှာ ဆိုလို့ရှိရင် အမေရိကန် ၊ EU တွေက ချပေးတဲ့ Projects ( စီမံချက် ) တွေ ၊ Grants ( အကူအညီထောက်ပံ့မှု ) တွေအနေနဲ့ အလုပ်လုပ်တယ် ။ NGOs, INGO တွေနဲ့ဆက်စပ်ပြီး ၊ အရပ်ဖက်အဖွဲ့အစည်းတွေ (CSOs) တွေ ၊ ရပ်ရွာလူမှုအစုအဝန်းအခြေပြုအဖွဲ့ အစည်းတွေ (CBOs) လည်း ရှိကြပါတယ်။ ရှိကြတော့ အပြန်အလှန်ဆွေး နွေးချက်တွေနဲ့ သူတို့ကြုံတွေ့ရတဲ့ အခါ သူတို့ရင်ဆိုင်ဖြေရှင်းတဲ့နေရာမှာ ဒီကြေညာချက် ထွက်လာတယ် လို့မြင်တယ်”ဟု ၁၉၉၆-၁၉၉၈ လှုပ်ရှားမှုမျိုးဆက် မှ ဦးရဲကျော်စွာ က ပြောသည်။

ယင်းအပြင် ၎င်းက“( ကြေညာချက် ထုတ်ပြန်တာ ) ဒါကတော့ လုပ်ရမယ့် ကိစ္စပါပဲ ။ ထုတ်ပြန်ချက် ၊ ကြေညာချက် သဘောထက် မြေပြင်မှာ လက်တွေ့ လုပ်ရမယ့်ကိစ္စပါ ။ နောက်တစ်ခုက ( ကာကွယ်စောင့်ရှောက်မှု ပေးဖို့ ) အဲဒါက နိုင်ငံခြား သား ခရီးသွား ၊ နိုင်ငံခြားသား ရင်းနှီးမြှုပ်နှံမှုမှ မဟုတ်ဘူးလေ ။ မြန်မာနိုင်ငံသား ခရီးသွား ၊ မြန်မာနိုင်ငံသား ရင်းနှီးမြှုပ်နှံမှုတွေကိုပါ ကာကွယ်ပေးရမယ် ။ဥပမာ - ခေါင်းရွက်ဗျက်ထိုးဈေးသည်တွေ ၊ ရွာစဉ်လှည့်ပြီး ဈေး ရောင်းနေတဲ့ ဈေးသည်တွေကို ဗမာလူမျိုး ဖြစ်နေလို့ တချို့ " သတင်းပေး " လို့စွပ်စွဲပြီး ဖမ်းဆီးသတ်ဖြတ်တယ် ဆိုတဲ့ကိစ္စမျိုးတွေ  ၊ မြန်မာဘုန်းကြီးမို့လို့ ကျောင်းလာဆောက်တာကို မောင်းထုတ်တယ် ဆိုတဲ့ကိစ္စမျိုးတွေ ဒါတွေက မှားတယ်လေ ။နိုင်ငံခြားသား ရင်းနှီးမြှုပ်နှံသူမှ မဟုတ်ဘူး ။နိုင်ငံခြားသား ခရီးသွားမှ မဟုတ်ဘူး။ မြန်မာနိုင်ငံသား ခရီးသွားဖြစ်နေရင်လည်း အကာအကွယ်ပေးရမယ် ။ မြန်မာနိုင်ငံသား ရင်းနှီးမြှုပ်နှံမှုဖြစ်နေ ရင်လည်း အကာအကွယ်ပေးရမှာပါပဲ ။ နိုင်ငံခြားသား ရင်းနှီးမြှုပ်နှံသူတွေဆိုရင် ငွေညှစ်လိုက်မယ် ။ ဆက် ကြေးကောက်လိုက်မယ် ။ ဆက်ကြေးမပေးရင် ဖမ်းပြီး သတ်ဖြတ်လိုက်မယ် ဆိုတာမျိုး လုပ်မယ် ။ နောက် မြန်မာနိုင်ငံသားခရီးသွားဆိုရင် အမျိုးမျိုးနဲ့ ရစ်မယ် ၊ ဖမ်းမယ်၊ မဟုတ်ကဟုတ်ကနဲ့ စွဲချက်တွေ တင်မယ် ။ ပြီးရင် သတ်ဖြတ်လိုက်မယ် ဆိုတာက ဒါမှားတာပေါ့ ။ ဒါက ဖြစ်တတ်တဲ့ ပြဿနာကို ပြောတာ ။ ပြည်တွင်း လက်နက်ကိုင်ပဋိပက္ခတွေ နဲ့အတူ မြန်မာနိုင်ငံမှာဖြစ်နေတဲ့ ပြဿနာက " ဘာလဲ " ဆိုရင် ရင်းနှီးမြှုပ်နှံ သူအချင်းချင်း တူရင်တောင် " ငါတို့က နိုင်ငံခြားသား ရင်းနှီးမြှုပ်နှံသူကို ပိုကာကွယ်ပေးရမယ် " ဆိုတဲ့ ကျွန်အတွေးအခေါ် သိပ်ကြီးတယ် ။ခရီးသွားချင်းအတူတူ နိုင်ငံခြားသားခရီးသွား ၊နိုင်ငံခြားသား (Tour) ကို ငါတို့က ပိုကာကွယ်ပေးရမယ် ။ ပိုဂရုစိုက်ပေးရမယ်ဆိုတာက အဲဒါကလည်း " ကျွန်အတွေးအခေါ် " ပဲ ဖြစ်တယ် ။ ကိုလိုနီခေတ်ထဲက ၊ ဗြိတိသျှကိုလိုနီအောက်ထဲက ပုံသွင်းထားတဲ့ ကိုလိုနီကျွန်စိတ် ၊ အခုအထိအဲ ကျွန်စိတ်က လျော့မသွား တဲ့အပြင် ပိုပိုပြီးကြီးလာတဲ့အဓိပ္ပါယ်ပဲ ။ နိုင်ငံသားတိုင်းရော၊ နိုင်ငံခြားသားရော၊ ဧည့်နိုင်ငံသားရော၊ နိုင်ငံသားပြုခွင့်ရတဲ့သူရော ဘယ်နိုင်ငံသားမှ မဟုတ်သူရော ၊ ခရီးသွားမှန်သမျှ ၊ ရင်းနှီး မြှုပ်နှံသူမှန်သမျှ အကုန်လုံးကို ကာကွယ်ပေးရမှာ ဖြစ်ပါတယ် ။ တန်းတူညီတူ  အကာအကွယ်ပေးရမယ်”ဟု ထပ်လောင်း ပြောသည်။

ညီနောင် အဖွဲ့ ၃ ဖွဲ့ အနေဖြင့် ထုတ်ပြန်သည့်ထုတ်ပြန်ချက်မှာ ရိုးရှင်းသော ထုတ်ပြန်ချက် ဖြစ်ကြောင်းနှင့် ပြည်ပအဖွဲ့အစည်း လူပုဂ္ဂိုလ်တို့ အပေါ် ကာကွယ်မှုများပြုလုပ်ပေးမည်ဆိုသည့် အတိုင်း ပြည်တွင်း လုပ်ငန်းများကို ထိန်းသိမ်းကာကွယ်မှုမျိုးလည်း ပြုလုပ်သင့်ကြောင်း ဝါရင့် နိုင်ငံရေးလေ့လာသုံးသပ်သူ တစ်ဦးက တိုက်တွန်းပြောဆိုသည်။

 “ဒါက ရိုးရိုးလေးပါပဲ။ပြည်ပ ရင်းနှီးမြှုပ်နှံမှုတွေကို ကာကွယ်မယ်ဆိုတာမျိုးပြောသလိုပဲ ဒီအဖွဲ့အစည်းတွေက လည်း ဒီနိုင်ငံသားတွေ ဖြစ်တဲ့အတွက် ပြည်တွင်းမှာ လုပ်တဲ့လူတွေကိုကော မကာကွယ်သင့်ပေဘူးလားလို့ မရဲတရဲနဲ့ ပြောလိုက်ချင်ပါတယ်”ဟု ၎င်းက ပြောသည်။

+++++++

၁၇ စက်တင်ဘာ ၂၀၂၃

တော်လှန်သူပုန်ထမှုများနှင့် ပြင်ပကျူးကျော်မှုများရှိလာပါက တစ်နိုင်ငံနှင့်တစ်နိုင်ငံ အပြန်အလှန်ကူညီရန် ကတိကဝတ်ပြုသည့် လုံခြုံရေးစာချုပ်တစ်ခုကို  အာဖရိကတိုက်မှ အာဏာသိမ်းထားသည့် မာလီ၊နိုင်ဂျာနှင့်ဘာကီနာဖာဆိုစစ်အစိုးရများက စနေနေ့တွင် လက်မှတ်ရေးထိုးလိုက်ကြပါတယ်။

လစ်တာကို- ဂေါ်မာ သဘောတူ ပဋိညာဉ်သည် ဆာဟေးလ်နိုင်ငံများမဟာမိတ်အဖွဲ့ Alliance of Sahel States (AES) ကို ဖန်တီးပေးလိမ့်မည်ဟု မာလီစစ်အစိုးရခေါင်းဆောင် အက်ဆီမီဂိုအီတာက အိတ်စ်(တွစ်တာ)တွင် ရေးသားသတင်းထုတ်ပြန်ပါတယ်။  “ ကျွန်တော်တို့ပြည်သူတွေရဲ့ အကျိုးအတွက် ကာကွယ်ရေးနှင့် အပြန်အလှန်ကူညီရေးဆိုင်ရာ စုပေါင်းဖွဲ့စည်းမှုတစ်ရပ်ကို တည်ထောင်ဖို့ ရည်ရွယ်တာဖြစ်တယ်လို့ သူကရေးသားပါတယ်။

ကုန်းတွင်းပိတ် ဆာဟေားနိုင်ငံ (၃)နိုင်ငံဟာ အယ်ကေးဒါးနှင့် အစ္စလမ်မစ်နိုင်ငံတော်(အိုင်အက်စ်)တို့ရဲ့ အစ္စလမ်မစ် သူပုန်ထတာတွေကို နှိမ်နှင်းနေကြရတဲ့အချိန်မှာ စစ်အာဏာသိမ်းမှုကြောင့် အိမ်နီးချင်းနိုင်ငံများ၊နိုင်ငံတကာမိမ်ဖက်များနှင့်ဆက်ဆံရေးယိုယွင်းလာနေတာ ဖြစ်ပါတယ်။

မကြာသေးမီက နိုင်ဂျာတွင် အာဏာသိမ်းမှုဖြစ်ပီဲးနောက် ဒေသဆိုင်ရာအဖွဲ့အစည်းတစ်ခုဖြစ်တဲ့ အနောက်အာဖရိကနိုင်ငံများ စီးပွားရေး အသိုက်အဝန်း(ECOWAS) က နိုင်ငံမှာ အခြေခံဥပဒေအရအုပ်ချူပ်မှုတစ်ရပ်ပြန်ပေါ်ထွန်းလာဖို့ အင်အားသုံးမယ်လို့ ခြိမ်းခြောက်ခဲ့ပါတယ်။ တိုက်ခိုက်မှုရှိလာရင် နိုင်ဂျာကိုအကူအညီပေးဖို့ မာလီနှင့် ဘာကီနာဖာဆိုတို့က ကတိပေးပြီးသားတော့ဖြစ်ပါတယ်၊

လစ်တာကို-ဂေါ်မာ ဒေသဟာ မာလီ၊ဘာကီနာဖူဆိုနှင့် နိုင်ဂျာနယ်စပ်တွေ ထိတွေ့နေတဲ့နေရာဖြစ်ပါတယ်။ ပြီးခဲ့တဲ့ နှစ်များက  အဲဒီဒေသဟာ ဂျီဟတ်ဝါဒီတွေရဲ့ဖျက်ဆီးတဲ့ဒဏ်ခံနေကြရပါတယ်။

“ ဒီမဟာမိတ်အဖွဲ့ဟာ နိုင်ငံ(၃)နိုင်ငံအကြား စစ်ရေးနှင့်စီးပွာ‌းရေးပေါင်းစည်းဆောင်ရွက်ကြမှာဖြစ်ပါတယ်” လို့ မာလီနိုင်ငံ ကာကွယ်ရေးဝန်ကြီး အက်ဒိုလာရေးဒီယော့က သတင်းစာဆရာတွေကိုပြောပါတယ်။ “ ကျွန်တော်တို့ရဲ့ ဦးစားပေးက နိုင်ငံ(၃)နိုင်ငံမှာရှိတဲ့ အကြမ်းဖက်မှုတွေကို တိုက်ခိုက်ဖို့ပဲဖြစ်တယ်” လို့ သူကပြောပါတယ်။

စာချုပ်အရ  တစ်နိုင်ငံဒါမှမဟုတ် ဒီထက်ပိုတဲ့နိုင်ငံတွေရဲ့ အချုပ်အခြာအာဏာနှင့် ပိုင်နက်တည်တံ့ခိုင်မြဲရေးကို တိုက်ခိုက်လာကြတဲ့မည်သူကိုမဆို အခြား နိုင်ငံတွေကလည်း ကျူးကျော်မှုလို့ ခံယူကြမှာဖြစ်ပါတယ်။ အဲဒီအခါ အခြားနိုင်ငံတွေက တစ်နိုင်ငံချင်းအရသော်လည်းကောင်း၊စုပေါင်း၍သော်လည်းကောင်း လက်နက်အင်အားအသုံးပြုခြင်းအပါအဝင် အကူအညီတွေ ပေးမယ် လို့လည်း ဖော်ပြထားပါတယ်

ယခု(၃) နိုင်ငံစလုံးဟာ ၂၀၁၇မှာဖွဲ့စည်းခဲ့တဲ့ ပြင်သစ်ကထောက်ခံအားပေးထားတဲ့ G5 Sahel alliance ဆာဟေးမဟာမိတ်(၅)နိုင်ငံ အဖွဲ့မှာ ချတ်ဒ်နှင့် မောရစ်တန်နီးယားတို့နှင့်အတူ အဖွဲ့ဝင်နိုင်ငံတွေဖြစ်နေကြပါတယ်။ ဒါပေမယ့် အာဏာသိမ်းမှုဖြစ်ပွားပြီးနောက် ပြင်သစ်နှင့် ယခု(၃)နိုင်ငံရဲ့ဆက်ဆံရေးဟာ ဆိုးရွားနေပါတယ်။

Source AFP/Reuters

#World_Health
Published 17 September 2023

အသက် ၆ လအရွယ် ဂျပန်လူမျိုး ယောက်ျားလေးတစ်ဦးဟာ ကိုရိုနာဗိုင်းရပ်စ်ရောဂါ ကုသမှုခံယူပြီးနောက် မျက်လုံးဟာ အပြာရောင်ပြောင်းသွားခဲ့ပါတယ်။

ကလေးဟာ အစက ချောင်းဆိုးဖျားနာ ဖြစ်နေခဲ့ကာ အန်တီဂျင်စစ်ဆေးပြီးနောက် ကိုရိုနာကူးစက်ကြောင်း တွေ့ရှိခဲ့ပါတယ်။

ဆရာဝန်တွေက တုပ်ကွေးကုသရာမှာ အသုံးပြုပြီး အေဗီဂန်လို့ ခေါ်ကြတဲ့ ဂျပန်ဆေးဝါး ဖေဗီပီရာဗီယာကို အသုံးပြုခိုင်းခဲ့ပါတယ်။

ဒီဆေးက ကိုရိုနာအစောပိုင်းအဆင့် လူနာတွေမှာ အကျိုးသက်ရောက်မှု နည်းပါးပေမယ့် အသက် ၆၀ အောက် ဆေးရုံတက်ကုသမှုခံယူရတဲ့ လူနာတွေမှာတော့ အကျိုးကျေးဇူးများစွာ ရရှိစေပါတယ်။

ထိုဆေးရဲ့ ဘေးထွက်ဆိုးကျိုးအနေနဲ့ အနည်းငယ်ဝမ်းလျှောခြင်း၊ သွေးထဲက ယူရစ်အက်ဆစ်မြင့်တက်ခြင်းတို့ အဖြစ်များပါတယ်။

ဒါပေမဲ့ ထိုကလေးကတော့ ဆေးကုသမှုခံယူပြီး ၁၈ နာရီအကြာမှာ မျက်လုံးတွေက အပြာရောင်တောက်တောက် ပြောင်းသွားပြီး အထူးသဖြင့် နေရောင်နဲ့ ထိတဲ့အခါ ပိုသိသာတာကို ကလေးအမေက သတိထားမိခဲ့ပါတယ်။  

ဒီလိုရှားပါး ဘေးထွက်ဆိုးကျိုးက အသက် ၂၀ အရွယ်လူနာတစ်ဦးမှာလည်း ဖြစ်ခဲ့ဖူးပြီး ထိုဖြစ်ရပ်နှစ်ခုစလုံးမှာ ဆေးကုသမှု ရပ်လိုက်တဲ့အခါ မျက်လုံးက သာမန်အရောင် ပြန်ပြောင်းသွားခဲ့ပါတယ်။

ဖေဗီပီရာဗီယာဆေးဟာ ဆံပင်နဲ့ လက်သည်းတွေ အရောင်ပြောင်းသွားနိုင်တယ်လို့လည်း ဖော်ပြထားဖူးပါတယ်။

ဒီလိုဖြစ်ရတာဟာ ဆေးမှာပါဝင်တဲ့ ဇီဝဖြစ်စဥ်အရာတွေနဲ့ တိုက်တေနီယမ်ဒိုင်အောက်ဆိုဒ်၊ ယဲလိုးအိုင်းယွန်းအောက်ဆိုဒ်တို့လို ပစ္စည်းတွေကြောင့် ဖြစ်နိုင်ပါတယ်။

ဆေးမှာပါဝင်တဲ့ ဇီဝဖြစ်စဥ်အရာတွေရဲ့ ပါဝင်မှုပမာဏနဲ့ ရောင်ခြယ်ထွက်ခြင်း ပမာဏတို့က တိုက်ရိုက်ဆက်စပ်နေတယ်လို့ လေ့လာချက်တွေမှာ တွေ့ရပါတယ်။

ဓာတ်ခွဲခန်း လေ့လာမှုများအရ ထိုဆေးဟာ မော်လီကျူးတစ်ခုမှ အလင်းထွက်ပေါ်လာအောင် လှုံ့ဆော်လိုက်တာ ဖြစ်ပါတယ်။

ဒါတွေနဲ့ ပတ်သက်ပြီး ကိုရိုနာရောဂါ ကုသမှုအတွက် ဖေဗီပီရာဗီယာရဲ့ ဘေးကင်းစိတ်ချရမှုကို စိုးရိမ်နေကြပါတယ်။

အဆိုပါ ဘေးထွက်ဆိုးကျိုးက ရှားပါးပေမယ့် နောက်ထပ်ကုသမှုတွေကို သေချာစောင့်ကြည့်သွားရမယ်လို့ ဆရာဝန်များက ဖော်ပြခဲ့ပါတယ်။

အဆိုပါ ဘေးထွက်ဆိုးကျိုးတွေ ကာကွယ်နိုင်ရန်နဲ့ မျက်ကြည်လွှာ ကျန်းမာရေးအပေါ် ရေရှည်သက်ရောက်နိုင်ချေတို့ကို သိရှိရန် နောက်ထပ်လေ့လာမှုတွေ ပြုလုပ်ဖို့ လိုအပ်တယ်လို့လည်း ပြောကြားသွားပါတယ်။

#World_Health #ကိုရိုနာဗိုင်းရပ်စ် #မျက်လုံးအပြာရောင်သို့ပြောင်းလဲ
Source: The Jerusalem Post