#Local_News
Published 14 September 2024

▪️ ပြည်ထောင်စုနယ်မြေ၊ နေပြည်တော်အတွင်းရှိ ကျေးရွာများနှင့်မြစ်ချောင်းများတွင်  ပိတ်ဆို့မှုများကိုရှင်းလင်းမှုများဆောင်ရွက်နေကြောင်း မြန်မာနိုင်ငံမီးသတ်တပ်ဖွဲ့မှ သိရသည်။

▪️ ထိုသို့ဆောင်ရွက်ရာတွင် နေပြည်တော်အတွင်းရှိ ကျေးရွာများတွင် ရေဝင်ရောက်မှုကြောင့် သစ်ပင်လဲကျခြင်း၊ လမ်းပိတ်ဆို့ခြင်းနှင့် မြစ်ချောင်းများအတွင်း ပိတ်ဆို့နေသော သစ်ပင်သစ်ကိုင်း၊ အမှိုက်သရိုက်များအား မြန်မာနိုင်ငံမီးသတ်တပ်ဖွဲ့မှ ရှာဖွေကယ်ဆယ်ရေးတပ်ဖွဲ့ဝင်များသည် သက်ဆိုင်ရာအဖွဲ့အစည်းများနှင့် ပူးပေါင်း၍ ရှင်းလင်းရေးလုပ်ငန်းများ ဆောင်ရွက်လျက်ရှိကြောင်း သိရသည်။

#YMG/NN #Yangon_Times

#Local_News
Published 14 September 2024

▪️ နေပြည်တော်၊လယ်ဝေးမြို့နယ်၊ ကရင်ပြည်နယ်၊ ဘားအံမြို့ပေါ်ရှိရပ်ကွက်များ၊ ပဲခူးတိုင်းဒေသကြီး၊တောင်ငူမြို့များ၌ရေကြီး၊ ရေလျှံမှုများဖြစ်ပေါ်နေ၍ ကူညီကယ်ဆယ်ရေးများပြုလုပ်နေကြောင်း မြန်မာနိုင်ငံမီးသတ်တပ်ဖွဲ့မှ သိရသည်။

▪️ စက်တင်ဘာ ၁၄  ရက်နေ့တွင်  နေပြည်တော်၊ လယ်ဝေးမြို့နယ်၊ စစ်တောင်းမြစ်အရှေ့ဘက်၊ သစ်ကိုးပင်ရွာရှိ ရေဘေးသင့်ပြည်သူများအား မြန်မာနိုင်ငံမီးသတ်တပ်ဖွဲ့မှ ရှာဖွေကယ်ဆယ်ရေးတပ်ဖွဲ့ဝင်များသည် သက်ဆိုင်ရာအဖွဲ့အစည်းများနှင့် ပူးပေါင်း၍ ရေဘေးလွတ်ရာသို့ ကူညီကယ်ဆယ်ရွှေ့ပြောင်းပေးခဲ့ကြောင်း သိရသည်။

▪️ ထို့အပြင် ကရင်ပြည်နယ်၊ ဘားအံမြို့နယ်တွင် ရေမြင့်တက်ဝင်ရောက်လျက်ရှိသောအမှတ်(၄)ရပ်ကွက်၊ အမှတ်(၅) ရပ်ကွက်၊ အမှတ်(၇)ရပ်ကွက်နှင့် အမှတ်(၉)ရပ်ကွက်တို့မှ ရေဘေးသင့်ပြည်သူများအား ကရင်ပြည်နယ်အတွင်းရှိ မီးသတ်စခန်းများမှ ရှာဖွေကယ်ဆယ်ရေးတပ်ဖွဲ့ဝင်များသည် သက်ဆိုင်ရာအဖွဲ့အစည်းများနှင့် ပူးပေါင်း၍ ရေဘေးလွတ်ရာသို့ ကူညီကယ်ဆယ်ရေးရွှေ့ပြောင်းရေးလုပ်ငန်းများဆောင်ရွက်လျက်ရှိကြောင်း သိရသည်။

▪️ အလားတူ  ပဲခူးတိုင်းဒေသကြီးအတွင်း ရေဝင်ရောက်လျက်ရှိသော အုတ်တွင်းမြို့နယ်၊ ဝက်ဖြူကုန်းကျေးရွာ၊ သာယာကုန်းကျေးရွာ၊ တောင်ငူမြို့နယ်၊ ကံရိုးရွာ၊ မြစ်ကြီးပေါက်ကျေးရွာ၊ ဒိုးအင်းရွာ၊ အရှေ့ဆင်ရွာ၊ အနောက်ဆင်ရွာ၊ ရေတာရှည်မြို့နယ် ထိပ်ပေါက်ကျေးရွာ၊ နှောပင်ကျေးရွာနှင့် ထန်းတပင်မြို့၊ အောင်ချမ်းသာရွာများရှိ ရေဘေးသင့်ပြည်သူများအား ပဲခူးတိုင်းဒေသကြီးအတွင်းရှိ  မီးသတ်စခန်းများမှ ရှာဖွေကယ်ဆယ်ရေးတပ်ဖွဲ့ဝင်များသည် သက်ဆိုင်ရာအဖွဲ့အစည်းများနှင့် ပူးပေါင်း၍ ကူညီကယ်ဆယ်ရွှေ့ပြောင်းပေးခြင်းလုပ်ငန်းများ ဆောင်ရွက်ပေးလျက်ရှိကြောင်း သိရသည်။

#YMG/NN #Yangon_Times

ရန်ချို ပါလော့စ်ဗာဒက်စ်၊ ကာလီဖိုနီးယား ၊ စက်တင်ဘာ ၁၄

သူသာသမ္မတဖြစ်လာပါက အမေရိကန်ပြည်ထောင်စုတွင် ဟေတီလူမျိုးအများစုမှာ တရားဝင်နေထိုင်နေကြသော်လည်း အိုဟိုင်းအိုပြည်နယ် စပရင်းဖီးလ်မြို့တွင်ရှိနေသည့်  ရွှေ့ပြောင်းရောက်ရှိလာသော ဟေတီများကို အမြောက်အများ ပြည်နှင်ဒဏ်ပေးပစ်မယ်လို့ အမေရိကန် ရီပတ်ဗလီကန် သမ္မတလောင်း ဒေါ်နယ် ထရမ့်က ပြောကြားလိုက်ပါတယ်။

အဲဒီမှာရှိနေကြတဲ့ ဟေတီလူမျိုးတွေဟာ အိမ်မွေးတိရိစ္ဆာန်တွေကို သတ်စားကြတယ်လို့ ဆိုရှယ်မီဒီယာမှာ ရုတ်ရုတ်သဲသဲ ဖြစ်လာခဲ့တာဖြစ်ပါတယ်။

“အိုဟိုင်းအို စပရင်းဖီးလ်မှာ နေရပ်ကို အကြီးအကျယ်ပြန်ပို့တာကို ကျွန်တော်တို့လုပ်မယ်” လို့ သူ့ရဲ့ ဂေါက်ကွင်းအပန်း   ဖြေစခန်းမှာ ကျင်းပပြုလုပ်တဲ့ သတင်းစာရှင်းလင်းပွဲမှာ ထရမ့်ကပြောခဲ့တာပါ။

စပရင်းဖီးလ်မှာရှိနေတဲ့ ဟေတီသား ၁၅,၀၀၀ထဲက အများစုဟာ တရားဝင်နေထိုင်ကြတာပါ။ နေရပ်ကို အမြောက်အများ ပြန်ပို့မယ်လို့ ကာလရှည်ကြာ ထရမ့်ရဲ့ ကတိဟာ နိုင်ငံမှာ တရားမဝင်နေထိုင်သူတွေကို ရည်ညွှန်းလေ့ရှိတာဖြစ်ပါတယ်။

“ စပရင်းဖီးလ်မှာ တရားမဝင်ရွှေ့ပြောင်းလာရောက်နေထိုင်သူတွေကို ကျွန်တော်စိတ်ဆိုးတယ်။ ဒါဟာအမှိုက်တွေပဲ။ ဟုတ်တယ်မဟုတ်လား” လို့ သောကြာနေ့က လားဗီဂါးစ်မှာကျင်းပတဲ့ လူထုစည်းရုံးပွဲမှာ ထရမ့်ကပြောခဲ့ပါတယ်။

“ ကျွန်တော်တို့နိုင်ငံထဲကို အလွန်လွယ်ကူစွာနှင့် တရားမဝင်ဘဲ ရောက်လာကြတဲ့ လူ့အရိုင်းအစိုင်း ရာဇဝတ်သား  ပြည်ပသားတွေဟာ အမေရိကန်မိန်းမပျိုတွေကို မုဒိမ်းပြုကျင့်ပြီး သတ်ပစ်နေကြတာကို ကျွန်တော်စိတ်ဆိုးတယ်” လို့ ထရမ့်က ဆက်ပြောပါတယ်။

အမေရိကန်နိုင်ငံတစ်လွှားက ဟေတီအသိုက်အဝန်းခေါင်ဆောင်တွေက ထရမ့်ရဲ့မှတ်ချက်စကားဟာ စပရင်ဖီးလ်မှာ  အသက်အန္တရာယ်တွေ စိုးရိမ်ရပြီး တင်းမာမှုကို မီးထပ်မွှေးတာလို့ ပြောနေကြပါတယ်။

“ ကျွန်တော်တို့အကူအညီလိုပါတယ်။ အမုန်းတွေ မလိုပါ” လို့ စပရင်းဖီးလ်မြို့တော်ဝန် ရော့ရူးက အေဘီစီသတင်းဌာနကို ပြောပါတယ်။

အိမ်မွေးတိရိစ္ဆာန်တွေသတ်စားတယ်ဆိုတဲ့ မယုံကြည်ရတဲ့ သတင်းတွေရရှိနေတယ်လို့ မြို့ အရာရှိတွေကပြောကြပါတယ်။

 ဟေတီဒေသခံတွေကို ပစ်မှတ်ထားတဲ့ မုန်းတီးမှုကြောင့်ဖြစ်တဲ့ ရာဇဝတ်မှုတွေအကြောင်း သတိမထားမိဘူးလို့ မြို့ ပြောရေးဆိုခွင့်ရ ကာရင်ဂရေ့ဗ်ကပြောပါတယ်။ ဒါပေမယ့် အချို့မှာ ခိုးမှုလို အခွင့်အရေး အသုံးချ ရာဇဝတ်မှုအချို့မှာ သားကောင်ဖြစ်ရသူတွေတော့ရှိတယ်လို့သူမကပြောပါတယ်။

သောကြာနေ့ကတော့ စပရင်းဖီးလ်မှာ ဗုံးဖောက်ခွဲမယ်ဆိုတဲ့ အမည်မသိ ခြိမ်းခြောက်မှုတွေကြောင့် မူလတန်းကျောင်း နှစ်ကျောင်းက ကလေးတွေကိုကယ်ထုတ်ခဲ့ရပြီး အလယ်တန်းကျောင်းတစ်ကျောင်းကို ပိတ်ပစ်ခဲ့ရပါတယ်။

ဘိုင်ဒင်အစိုးရဟာ အမေရိကန်ပြည်ထောင်စုမှာရှိနေတဲ့ ဟေတီသား ထောင်ပေါင်းများစွာကို ထုတ်ပေးထားတဲ့ ယာယီအကာအကွယ်ပေးတဲ့ အဆင့်အတန်းကို သက်တမ်းတိုးခဲ့ပါတယ်။ အဲဒီအစီအစဉ်ဟာ တရားဝင်ရွှေ့ပြောင်း နေထိုင်လာကြသူများ နေရပ်ပြန်ပို့ပေးကို ကာကွယ်ပေးပြီး အလုပ်လုပ်ခွင့်လည်းပေးထားပါတယ်။  ဂိုဏ်း စစ်ပွဲတွေကြောင့် ဟေတီမှာ လူငါးသောင်းခန့်ဟာ နေရပ်ရွှေ့ပြောင်းခံခဲ့ကြရပြီး လူငါးသန်းခန့်ဟာ စားနပ်ရိက္ခာမပြည့်စုံမှုနှင့် ကြုံတွေ့နေကြရပါတယ်။

 Source Reuters

မြစ်(၃)မြစ် စိုးရိမ်ရေအမှတ်အထက်ဆက်တက်ဖိုရှိတဲ့အတွက် မြေနိမ့်ပိုင်းနေထိုင်သူတွေအနေနဲ့
ကြိုတင်ရွှေ့ပြောင်းထားရန်လိုအပ်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနမှ သိရပါတယ်။
#Local_News
Published 14 September 2024
#စိုးရိမ်ရေအမှတ်အထက်ဆက်တက်နိုင် #မြစ်ရေများ
#YMG/tthl #Yangon_Times

ရှမ်းပြည်နယ်တောင်ပိုင်း၊ ကလောနဲ့အောင်ပန်းမြို့တွေမှာ ရေကြီး၊ ရေလျှံတာတွေဖြစ်နေတာကြောင့် ရန်ကုန်အပါအဝင် နယ်ဒေသတွေကို ရှမ်းပြည်နယ်‌ဒေသထွက် ကုန်တွေတင်ပို့တာ ရပ်နားထားရတာ‌ကြောင့် ရန်ကုန်ဈေးကွက်မှာ ရှမ်းကုန်တွေဈေးတက်နေတယ်လို့ အောင်ပန်းမြို့နယ်ရှိ ပွဲရုံတွေနဲ့ စားသုံးသူ‌ တွေ‌ဆီက သိရပါတယ်။
#Local_News
Published 14 September 2024
#ရှမ်းကုန်တင်ပို့မှုရပ်နား #ရှမ်းကုန်တွေဈေးတက်
#YMG/NN #Yangon_Times

မိုးသည်းထန်လို့ ထိခိုက်ပျက်စီးခဲ့တဲ့ ပုဂံရှေးဟောင်းအဆောက် အအုံ(၉)ခုကို ဘိလပ်မြေလုံးဝမသုံးဘဲ ရှေးမူလက်ရာအတိုင်း ပြုပြင်ရေးစံချိန်စံညွှန်းနဲ့အညီပြုပြင်သွားဖို့ရှိတယ်လို့ ပုဂံရှေးဟောင်း သုတေသနနှင့် အမျိုးသားပြတိုက်ဦးစီးဌာနမှ သိရပါတယ်။
#Local_News
Published 14 September 2024
#ဘုရား(၉)ဆူ #ရှေးမူမပျက်ပြုပြင်နေ
#YMG/tthl #Yangon_Times

#World_News
Published 14 September 2024

▪️ မြောက်ကိုရီးယားခေါင်းဆောင် ကင်မ်ဂျုံအန်းနဲ့ ရုရှားလုံခြုံရေးထိပ်သီးအရာရှိ ဆာဂျေးရွှိုင်ဂူတို့ တွေ့ဆုံခဲ့ကြကာ နှစ်နိုင်ငံကြား ဗျူဟာမြောက် ပူးပေါင်းရန်ကိစ္စကို ထဲထဲဝင်ဝင် ဆွေးနွေးခဲ့ကြတယ်လို့ မြောက်ကိုရီးယား သတင်းဌာန KCNA က စနေနေ့မှာ ဖော်ပြလိုက်ပါတယ်။

▪️ နှစ်ဦးစလုံးက ဒေသတွင်းနဲ့ နိုင်ငံတကာ အခြေအနေများအကြောင်း ရှုမြင်ပုံတွေကို ကျယ်ကျယ်ပြန့်ပြန့် ဖလှယ်ခဲ့ကာ လုံခြုံရေးအကျိုးစီးပွား အပြန်အလှန် ကာကွယ်ကြရန်အတွက် ပိုမိုပူးပေါင်းဆောင်ရွက်ခြင်း အပါအဝင် အခြားကိစ္စရပ်များမှာလည်း ကျေနပ်လောက်တဲ့ ဘုံသဘောတူညီချက်များ ရရှိခဲ့တယ်လို့ ဆိုပါတယ်။

▪️ နှစ်နိုင်ငံကြား ဗျူဟာမြောက် မိတ်ဖက်ရေးလမ်းစဉ်အတိုင်း တိုးမြှင့်ပူးပေါင်းရေးကို ဆက်လက်ချဲ့ထွင်သွားမယ်လို့ ကင်မ်ဂျုံအန်းက ပြောပါတယ်။

▪️ အမေရိကန်နဲ့ ယူကရိန်းတို့အပြင် ဘက်မလိုက်သော ဆန်းစစ်သူများကလည်း မြောက်ကိုရီးယားဟာ ရုရှားထံမှ စီးပွားရေးနဲ့ အခြားစစ်ရေး ထောက်ပံ့မှုများ ရယူဖို့ အပြန်အလှန်အနေနဲ့ ယူကရိန်းကို ရုရှားကျူးကျော်ရာမှာ ဒုံးကျည်တွေ ထောက်ပံ့ကူညီနေတယ်လို့ ဆိုကြပါတယ်။

▪️ နှစ်နိုင်ငံစလုံးက ဒီစွပ်စွဲချက်တွေကို ငြင်းဆန်ထားပေမယ့် စစ်ရေးပူးပေါင်းဆောင်ရွက်မှု မြှင့်တင်ရန် ကတိပြုလိုက်ကြပြီးနဲ့ ဇွန်လက ထိပ်သီးအစည်းအဝေးတစ်ခုမှာ ဗျူဟာမြောက်မိတ်ဖက်ရေးတစ်ခု သဘောတူ လက်မှတ်ရေးထိုးခဲ့ကြပါတယ်။

▪️ ယခင်က ရုရှားကာကွယ်ရေးဝန်ကြီး ဖြစ်ခဲ့တဲ့ ရွှိုင်ဂူက အခုအခါ လုံခြုံရေးကောင်စီ အတွင်းရေးမှူး ဖြစ်လာပြီး ယမန်နှစ် ဇူလိုင်လက မြောက်ကိုရီးယားသို့ သွားရောက်ကာ နှစ်နိုင်ငံကြား ဆက်ဆံရေးနီးစပ်လာတဲ့ သဘောကို ပြသခဲ့ပါတယ်။

▪️ ထိုအချိန်တုန်းက ကင်မ်ဂျုံအန်းနဲ့ တူယှဉ်တွဲ တွေ့ဆုံသွားလာခဲ့ပြီး မြောက်ကိုရီးယား စစ်ရေးအခင်းအကျင်းများကို ကြည့်ရှုခဲ့ကာ ဆိုဗီယက်ပြည်ထောင်စု ပြိုကွဲပြီးနောက်ပိုင်း မြောက်ကိုရီးယားသို့ ရောက်လာတဲ့ ပထမဆုံး ရုရှားထိပ်သီးကာကွယ်ရေးအရာရှိ ဖြစ်ခဲ့ပါတယ်။

#Source: Reuters

#Local_News
Published 14 September 2024

▪️ ရာဂီမုန်တိုင်းဒဏ်ကြောင့် ရေကြီး/ရေလျှံမှုများ ကြုံတွေ့နေရသည့်ရေဘေးသင့်ပြည်သူများအတွက် ဆက်သွယ်ရေးအော်ပရေတာလေးခုမှ ဖုန်းပြောခွင့်နှင့်စာတိုပေးပို့ခွင့်ကိုအခ မဲ့ ပံ့ပိုး ပေးနေပြီဖြစ်ကြောင်း ပို့ဆောင်ရေးနှင့်ဆက်သွယ်ရေးဝန်ကြီးဌာနမှ သိရသည်။

▪️ ရေဘေးသင့်ပြည်သူများအတွက် ဆက်သွယ်ရေးကဏ္ဍ၏ လူမှုအကျိုးပြုလုပ်ငန်း Corporate Social Responsibility (CSR) အဖြစ် ကူညီပံ့ပိုးဆောင်ရွက်ပေးခြင်းဖြစ်သည်။

▪️ အဆိုပါကဲ့သို့ဆောင်ရွက်ရာတွင် မြန်မာ့ဆက်သွယ်ရေးလုပ်ငန်း (MPT) မိုဘိုင်းဖုန်းအချင်းချင်း အခမဲ့ဖုန်းပြောဆိုခွင့်မိနစ် (၇၀၀) နှင့် အခမဲ့စာတိုပေးပို့ခွင့်အစောင်(၇၀၀)၊ အက်တမ်မြန်မာလီမိတက် (ATOM) မိုဘိုင်းဖုန်းအချင်းချင်း အခမဲ့ဖုန်းပြောဆိုခွင့် မိနစ်(၅၀၀)နှင့် အခမဲ့စာတိုပေးပို့ခွင့် အစောင်(၅၀၀)၊ အော်ရီဒူးမြန်မာလီမိတက် (Ooredoo) မိုဘိုင်းဖုန်းအချင်းချင်း အခမဲ့ဖုန်းပြောဆိုခွင့်အကန့်အသတ်မဲ့နှင့် အခမဲ့စာတိုပေးပို့ခွင့် အကန့်အသတ်မဲ့၊ တယ်လီကွန်းအင်တာနေရှင်နယ် မြန်မာကုမ္ပဏီလီမိတက်(MYTEL) မိုဘိုင်းဖုန်း အချင်းချင်းအခမဲ့ဖုန်းပြောဆိုခွင့် မိနစ်(၁၀၀၀)နှင့် အခမဲ့စာတိုပေးပို့ခွင့် အစောင်(၁၀၀၀)တို့အားစက်တင်ဘာ  ၁၃ ရက်မှစတင်၍ (၇)ရက်အထိ အသုံးပြုခွင့်ကို မိုဘိုင်းဆက်သွယ်ရေးအော်ပရေတာများက ပေးအပ်လှူဒါန်းသွားမည်ဖြစ်ကြောင်းသိရသည်။

#YMG/NN #Yangon_Times

#World_Health
Published 14 September 2024

▪️ အရပ်ရှည်တဲ့သူတွေက ကင်ဆာဖြစ်နိုင်ခြေ အနည်းငယ် ပိုများတယ်လို့ ကမ္ဘာ့ကင်ဆာသုတေသန ရန်ပုံငွေအဖွဲ့က ဖော်ပြလိုက်ကာ ပန်ကရိယ၊ အူမကြီး၊ သားအိမ်၊ မျိုးဥအိမ်၊ ဆီးကျိတ်၊ ကျောက်ကပ်၊ အရေပြား၊ ရင်သားကင်ဆာတို့ ပိုဖြစ်တတ်ကြတဲ့ အထောက်အထားတွေ ရှိတယ်လို့ ဆိုပါတယ်။

▪️ အရပ်အမြင့် ၁၀ စင်တီမီတာ ပိုရှည်လာတိုင်း ကင်ဆာဖြစ်နိုင်ခြေ ၁၆ ရာခိုင်နှုန်း ပိုများလာတယ်လို့ တွေ့ရှိထားပါတယ်။

▪️ နောက်ထပ်လေ့လာချက် တစ်ခုမှာ ကင်ဆာ ၂၃ မျိုးထဲက ၂၂ မျိုးဟာ အရပ်ပိုရှည်သူတွေမှာ ပိုအဖြစ်များနေပါတယ်။

▪️ ဘာကြောင့် အရပ်ရှည်ခြင်းနဲ့ ကင်ဆာဖြစ်နိုင်ခြေ များခြင်းတို့ ဆက်စပ်နေရတဲ့ အကြောင်းအရင်းကို သေချာမသိရသေးပေမယ့် သိပ္ပံပညာရှင်တွေ ယူဆချက်အများအပြား တင်ပြလာကြပါတယ်။

▪️ အများစုကတော့ ဆဲလ်တစ်ခုက ဆဲလ်အသစ်တွေ ဖြစ်လာအောင် ကွဲတဲ့အခါမှာ မျိုးဗီဇထိခိုက်မှုများ တဖြည်းဖြည်းစုလာကာ ကင်ဆာဖြစ်လာရတယ်လို့ ယူဆနေကြပါတယ်။

▪️ IGF-1 ဟော်မုန်းက ကလေးဘဝမှာ ကြီးထွားမှုကို အားပေးပြီး လူကြီးဘဝမှာ ဆဲလ်ကွဲပြားစေပါတယ်။

▪️ ဆဲလ်များ ပျက်စီးသွားတဲ့အခါ အစားထိုးဖို့ ဆဲလ်အသစ်တွေ အမြဲလိုအပ်ပါတယ်။
ဒါပေမဲ့ IGF-1 အလွန်များသွားတဲ့အခါ အန္တရာယ်ဖြစ်နိုင်ပြီး ရင်သားနဲ့ ဆီးကျိတ်ကင်ဆာများ ဖြစ်နိုင်ခြေ များစေပါတယ်။

▪️ ဒါကြောင့် ဆဲလ်များပြားခြင်းနဲ့ IGF-1 များပြားခြင်းတို့က အရပ်ရှည်သူတွေမှာ ကင်ဆာဖြစ်နိုင်ခြေ ပိုများစေတဲ့ အကြောင်းအရင်း ဖြစ်နိုင်ပါတယ်။

▪️ ဒီအတွက် ကင်ဆာဖြစ်နိုင်ခြေ လျှော့ချဖို့အတွက်ဆိုရင် ကျန်းမာရေးနဲ့ ညီညွတ်စွာ စားသောက်ခြင်း၊ လေ့ကျင့်ခန်းပုံမှန်လုပ်ခြင်း၊ ကိုယ်အလေးချိန် ကောင်းစွာထိန်းသိမ်းခြင်း၊ အရက်သေစာ ထိန်းချုပ်ရှောင်ရှားခြင်း၊ ဆေးလိပ်ရှောင်ရှားခြင်းတို့ ပြုလုပ်သင့်သလို ကင်ဆာစစ်ဆေးခြင်းများလည်း ပြုလုပ်သင့်တယ်လို့ သုတေသီများ အကြံပြုသွားပါတယ်။

#Source: India Today

#World_Health
Published 14 September 2024

▪️ အနီးမှုန်သူတွေမှာ စာကြည့်မျက်မှန် မလိုလောက်အောင် ကူညီပေးနိုင်မယ့် မျက်စဉ်းဆေးအသစ်တစ်မျိုးကို အိန္ဒိယဆေးဝါးကွပ်ကဲရေးဌာနက အသိအမှတ်ပြုလိုက်ပါပြီ။

▪️ မွမ်ဘိုင်းအခြေစိုက် Entod Pharmaceuticals မှထုတ်လုပ်တဲ့ PresVu မျက်စဉ်းဆေးဟာ အောက်လိုဘာလကစတင်ပြီး ဆေးဆိုင်တွေမှာ ရရှိနိုင်မှာဖြစ်ပြီး ဆေးစာပါရင် ရူပီး ၃၅၀ ဖြင့် ရောင်းချမှာဖြစ်ပါတယ်။

▪️ ဗဟိုဆေးဝါးစံနှုန်း ထိန်းချုပ်ရေးအဖွဲ့အစည်းမှ ညွှန်းချက်ရပြီးနောက် အခုနောက်ဆုံး အိန္ဒိယအထွေထွေ ဆေးဝါးထိန်းချုပ်ရေးမှ အသိအမှတ်ပြုလိုက်တာ ဖြစ်ပါတယ်။

▪️ ဒါကြောင့် PresVu ဟာ အနီးမှုန်သူတွေမှာ စာကြည့်မျက်မှန် လိုအပ်မှုကို လျှော့ချနိုင်မယ့် အိန္ဒိယမှ ပထမဆုံးမျက်စဉ်းဆေး ဖြစ်လာမှာပါ။

▪️ အနီးမှုန်ဆိုတာက မျက်လုံးထဲက မှန်ဘီလူးတွေ အနီးကပ်အရာတွေကို မစူးစိုက်နိုင်တော့တဲ့ အခြေအနေ ဖြစ်ပါတယ်။

▪️ မှန်ဘီလူးတွေက သက်တမ်းကြာလာတာနဲ့ သိပ်ပြီး မလှုပ်ရှားနိုင်တော့ကာ အနီးကပ် အရာတွေကို ကြည့်ရှုဖို့ ခက်ခဲလာပါတယ်။

▪️ ဒီလိုအခြေအနေဟာ အသက် ၄၀၊ ၅၀ ဝန်းကျင်မှာ စတင်ဖြစ်ပေါ်လာတတ်ပြီး အနီးကပ် ဖတ်ရှုရတာ ခက်ခဲလာကာ မျက်လုံးကိုက်ခဲလာတတ်ပါတယ်။

▪️ ဒါကြောင့် ဒီလိုလူတွေဟာ စာကြည့်မျက်မှန် အသုံးပြုကြရပါတယ်။

▪️ ကမ္ဘာတဝှမ်းမှာ အနီးမှုန်သူ ၁.၀၉ မှ ၁.၈ ဘီလီယံကြား ရှိနေနိုင်ပါတယ်။

▪️ PresVu က အမြင်အာရုံဝေဝါးခြင်းကို သက်သာစေရုံမက စာကြည့်မျက်မှန် မလိုအပ်စေသလို မျက်စိကိုလည်း စိုစွတ်ချောမွေ့နေစေမှာ ဖြစ်ပါတယ်။

▪️ ဈေးနှုန်းကလည်း အများတတ်နိုင်ကာ အလွယ်တကူ ရနိုင်တာကြောင့် နှစ်ပေါင်းများစွာ အသုံးပြုနိုင်မှာ ဖြစ်ပါတယ်။

#Source: India Today

ကင်ညာအလယ်ပိုင်း နိုင်ယာရီကောင်တီရှိ ကျောင်းတစ်ကျောင်းမှာ ကြာသပတေးနေ့ညက မီးလောင်ကျွမ်းခဲ့သဖြင့် အနည်းဆုံး ကျောင်းသား ၂၁ ဦးသေဆုံးခဲ့တယ်လို့ အရာရှိများက တနင်္လာနေ့မှာ ဖော်ပြခဲ့ပါတယ်။
#World_News
Published 13 September 2024
#ကင်ညာစာသင်ကျောင်းမီးလောင် # ကျောင်းသား(၂၁)ဦးသေဆုံး
#YMG #Yangon_Times #Yangon_Media_Group

၁၃ စက်တင်ဘာ ၂၀၂၄

နေပြည်တော်အပါအဝင် နိုင်ငံတစ်ဝန်းရေကြီးနစ်မြုပ်မှုတွေကြောင့်  ယခုအချိန်အထိ လူပေါင်း (၃၃)ဦး အသက်ဆုံးရှုံးခဲ့ရတယ်လို့ နစကရဲ့ သတင်းထုတ်ပြန်ချက်အရသိရပါတယ်။

မုန်တိုင်းဒဏ်ကြောင့် နိုင်ငံတစ်ဝန်း ရေကြီးရေလျှံဖြစ်ပွားနေသော မြို့နယ်ပေါင်း ၃၄ မြို့နယ်တွင် ရေဝင်ရောက်မှုကြောင့် ပြောင်းရွှေ့ခဲ့ရသည့် အိမ်ထောင်စု ၅၉၄၁၃ စု၊ လူဦးရေ ၂၃၆၆၄၉ ဦး ရှိကြောင်းနှင့်  ယင်းတို့အတွက် ကူညီကယ်ဆယ်ရေးစခန်း ၁၈၇ ခု ဖွင့်လှစ်ပေးထားပြီးဖြစ်ကြောင်းလည်း သတင်းထုတ်ပြန်ထားပါတယ်။

နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင် ကိုယ်တိုင် ရေဘေးဒဏ်သင့်ဒေသများအတွင်း ထိခိုက်ဆုံးရှုံးမှု အနည်းဆုံးဖြစ်အောင်နှင့် ကူညီကယ်ဆယ်ရေးလုပ်ငန်းများ အမြန်ဆုံးရရှိအောင် ကြပ်မတ် ဆောင်ရွက်လျက်ရှိတယ်လို့လည်း သိရှိရပါတယ်။

@ymg/knl