#Local_News
Published_27 September 2022

အောက်တိုဘာလ ၁ ရက်နေ့မှစတင်၍ ဗန္ဓုလသယ်ယူပို့ဆောင်ရေးလက်အောက်ရှိ ပြေးဆွဲနေသော YBS ယာဉ်လိုင်းများ၏ ယာဉ်စီးခနှုန်းထားကို ပြောင်းလဲကောက်ခံသွားမည်ဖြစ်ကြောင်း အဆိုပါယာဉ်လိုင်းမှ အသိပေးကြေညာထားသည်။

အဆိုပါယာဉ်လိုင်းများမှာ YBS 12၊ YBS 13၊ YBS 14 ၊ YBS 25 ၊ YBS 30 ၊ YBS 38၊ YBS 55 ၊ YBS 117၊ YBS 128 ယာဉ်လိုင်းများဖြစ်ပြီး ပြောင်းလဲကောက်ခံမည့် ယာဉ်စီးခနှုန်းထားမှာ ခရီးစဉ်တစ်ပိုင်းလျှင် ၂၀၀ ကျပ်၊ ခရီးစဉ်အစ/အဆုံး ၃၀၀ ကျပ်၊ YPS ကတ်ဖြင့်စီးနင်းပါက ခရီးစဉ်မှတ်တိုင် (၃၀) အထိ ၂၀၀ ကျပ်၊ ခရီးစဉ်အစ/အဆုံး ၂၈၀ ကျပ်ဖြစ်ကြောင်း သိရသည်။

YRTC အနေဖြင့် YBS ယာဉ်လိုင်းအားလုံးကိုပုံသေနှုန်းထားတစ်ခုသာသတ်မှတ်ထားသော်လည်း ယာဉ်လိုင်းအချို့မှာ ၅၀၀ ကျပ်အထိတိုးမြှင့်ကောက်ခံမှုများရှိနေကြောင်း သိရသည်။

“YBS ယာဉ်စီးခက ၂၀၀ လို့သာ သတ်မှတ်ထားပေမယ့် အဲ့ထက်မက ပေးစီးနေရတယ်။ သူတို့ကိုပြန်ပြောရင်လည်း မချေမငံပြန်ပြောတယ်။ အခုအားလုံးက အစစအရာရာဈေးတက်နေတော့လည်း ဘာမှတော့ မပြောလိုပါဘူး”ဟု YBS စီးသည့်ခရီးသည်တစ်ဦးက ပြောသည်။

ယင်းအပြင် ရန်ကုန်မြို့ပြအများပြည်သူသယ်ယူပို့ဆောင်ရေး ကုမ္ပဏီလီမိတက်လက်အောက်တွင် ပြေးဆွဲနေသော YBS ယာဉ်လိုင်းအားလုံးတွင်လည်း ၎င်းနှုန်းထားအတိုင်း ပြောင်းလဲကောက်ခံနေခြင်းဖြစ်သည်။

ရန်ကုန်မြို့တွင်း၌ နေ့စဉ်ယာဉ်လိုင်းပေါင်း ၁၁၆ လိုင်း၊ ယာဉ်အစီးရေ ၃၂၅၀ စီးပုံမှန်ပြေးဆွဲပေးနေပြီး ခရီးသည် ၁၃ သိန်းဝန်းကျင်ကို နေ့စဉ်ပို့ဆောင်ပေးနေကြောင်း၊ ယင်းအပြင် YPS ကတ်စနစ်ဖြင့်စီးနင်းသူခရီးသည်ဦးရေမှာ ငါးသောင်းပတ်ဝန်းကျင်ရှိကြောင်း သိရသည်။

#ymg/sth
#Yangon_Media_Group

#World_News
Published 27 Sept 2022

ကာကွယ်ဆေးထုတ်လုပ်တဲ့ ဖိုက်ဇာကုမ္ပဏီရဲ့ စီအီးအိုဖြစ်တဲ့ ဒေါက်တာ အဲဘတ်ဘော်လာဟာ တစ်လအတွင်း နှစ်ကြိမ်မြောက် ကိုဗစ်ကူးစက်ခံခဲ့ရပါတယ်။

အသက် (၆၀)ရှိပြီဖြစ်တဲ့ သူဟာ ကုမ္ပဏီရဲ့ ကာကွယ်ဆေးကို လေးကြိမ်တိတိထိုးနှံခဲ့ပြီးဖြစ်ပါတယ်။ ပြီးခဲ့တဲ့ ဩဂုတ် လလယ်က သူဟာ ကိုဗစ်ကူးစက်ခံခဲ့ရတာပါ။

စနေနေ့က တွစ်တာမှာ သူက သူထပ်ပြီး ကိုဗစ်ကူးခံရတဲ့အကြောင်း ရေးတင်ခဲ့ပါတယ်။ သူဟာ နေလိုကောင်းပြီး ဘာရောဂါလက္ခဏာမှမရှိဘူးလို့လည်း ပြောပါတယ်။

ဒေါက်တာဘော်လာက သူ့အနေနှင့် အိုမီခရွန်မျိုးကွဲတွေကို မြင့်မြင့်မားမားကာကွယ်ပေးအောင် ဒီဇိုင်းလုပ်ထားတဲ့ ဖိုက်ဇာရဲ့ နောက်ဆုံးပေါ် နှစ်မျိုးတွဲ ကိုဗစ်ကာကွယ်ဆေးသစ်ကိုတော့ မထိုးနှံရသေးဘူးလို့လည်းပြောပါတယ်။

သူက သူ့ရဲ့ ဆက်တိုက်နှစ်ခါကူးစက်ခံရတာကိုကြည့်ပြီး လူတွေကို လက်ရှိအခြေအနေမှာ ကျေနပ်ပျော်ရွှင်မနေကြဖို့ ထပ်မံသတိပေးလိုက်ပါတယ်။ “ ကျွန်တော်တို့ တိုးတက်မှုအကြီးကြီးတွေလုပ်ခဲ့ကြပြီးချိန်မှာ ဗိုင်းရပ်စ်က ကျွန်တော်တို့နှင့် အတူရှိနေတုန်းပဲဖြစ်တယ်” လို့ သူက ဖြည့်စွက်ပြောကြားပါတယ်။

အချိန်တိုတိုအတွင်း လူတစ်ယောက်ဟာ ကိုဗစ်နှစ်ကြိမ်ကူးစက်ခံရတယ်ဆိုတာ ပုံမှန်မဟုတ်တဲ့ကိစ္စပါ။ သဘာဝအရ ကူးစက်ခံရခြင်းကိုက လပေါင်းများစွာ အားကောင်းစွာကာကွယ်မှုပေးနိုင်တာဖြစ်ပါတယ်။

စစ်ဆေးတာမှားယွင်းတာ ဒါမှမဟုတ် ယခင်ကူးစက်တုန်းက ဗိုင်းရပ်စ်အကြွင်းအကျန် ကျန်ခဲ့တာတွေဟာ ခပ်မြန်မြန်အတွင်း လူတွေ ထပ်ကူးစက်ခံခံရတဲ့ အကြောင်းရင်းဖြစ်ပါတယ်။

သူ့အနေနှင့် ငါးကြိမ်မြောက်ကာကွယ်ဆေးကိုထိုးလိုရဦးမှာ မဟုတ်ဘူး၊ဘာဖြစ်လိုလဲဆိုတော့ ပုံမှန်အရ ကူးစက်ခံရပြီး သုံးလ စောင့်ပြီးမှ ကာကွယ်ဆေးထိုးရမယ်လို့ CDC က ပြောထားလို့ပဲလို့ သူကပြောပါတယ်။

ပြီးခဲ့တဲ့လက သူကူးစက်ခံရစဉ်မှာ သူဟာ ဖိုက်ဇာရဲ့ ကိုဗစ်ဗိုင်းရပ်စ်တိုက် သောက်ဆေး ပက်ဇ်လိုဗစ် သောက်ခဲ့ပါတယ်။ အဲဒီဆေးဟာ အသက်ကြီးတဲ့ လူနာတွေလိုအန္တရာယ်များနေတဲ့ သူတွေကို ကုသဖို့ဖြစ်ပါတယ်။

Source Daily-Mail
#Pfizer_CEO
#Dr_Albert_Bourla
#Covid-19

#Local_News
Published _27 September 2022

ကရင်ပြည်နယ် ဘားအံမြို့ရှိ ဘားမဲတောင် သဘာဝဥယျာဉ် (Hpa – Mal Botanical Gardens) ကို အဆင့်မြှင့်တင်မှု ပြီးစီးပြီ ဖြစ်ကြောင်း ကရင်ပြည်နယ် အစိုးရအဖွဲ့က သိရသည်။

အဆိုပါ ဘားမဲတောင်သဘာဝဥယျာဉ်မှာ မြေဧရိယာ (၁၇) ဧက ခန့်အကျယ်ရှိပြီး ပြည်တွင်း၊ ပြည်ပခရီးသွားများ ဆွဲဆောင်ရာနေရာဒေသ ဖြစ်သောကြောင့် ၂၀၂၁ ခုနှစ်၊ ဇူလိုင်လတွင် ကရင်ပြည်နယ် စည်ပင်သာယာရေးအဖွဲ့ ငွေလုံးငွေရင်း အသုံးစရိတ် ရန်ပုံငွေကျပ် (၈၁၆ ဒသမ ၅၁)သန်းဖြင့် ပြည်နယ်စည်ပင်သာယာရေးအဖွဲမှ တာဝန်ယူတည်ဆောက်ခဲ့ခြင်းဖြစ်ကြောင်း သိရသည်။

ယင်းနောက် ၂၀၂၁ခုနှစ် နိုဝင်ဘာလ (၂၇) ရက်တွင် ဖွင့်ပွဲပြုလုပ်ခဲ့ခြင်း ဖြစ်ပြီးနောက် အဆင့်မြှင့်တင်ရန် ကျန်ရှိနေသေးသော လုပ်ငန်းများဖြစ်သည့် မူလအကျယ် (၁၆) ပေရှိ လမ်းကို (၂၄) ပေ ကွန်ကရစ်လမ်းသား တိုးချဲ့ခြင်း၊ ရိုးရာစားသောက်ဆိုင် ဆောက်လုပ်ခြင်း၊ ကျန်းမာရေး အားကစားပစ္စည်းများ တပ်ဆင်ခြင်း၊ ဘားမဲတောင်ဂိတ် (၃) ကားပါကင်ပြုလုပ်ခြင်း၊ ဒေသထွက်ပစ္စည်းဆိုင် ဆောက်လုပ်ခြင်းနဲ့ အများသုံး သန့်စင်ခန်းဆောက်လုပ်ခြင်းလုပ်ငန်း အပါအဝင် အဆင့်မြှင့်တင်ခြင်းလုပ်ငန်း စုစုပေါင်း ၃၁ ခု ဆောင်ရွက်ခဲ့ခြင်းဖြစ်ကြောင်း ပြည်နယ်အစိုးရ၏ မှတ်တမ်းများအရ သိရသည်။

အဆိုပါ သဘာဝဥယျာဉ်တွင် သဘာဝပေါက်ပင် သစ်မျိုးအရေအတွက် (၇၈)မျိုး၊ အပင်အရေအတွက် (၁၅၅၇)ပင် ရှိကြောင်း၊ ပြည်တွင်း၊ ပြည်ပ သဘာဝအခြေခံ ခရီးသွားဧည့်သည်များအတွက် ဆွဲဆောင်မှု ရှိသော အပန်းလည်းပြေ ဗဟုသုတလည်း ဖြန့်ဝေပေးသော အထင်ကရနေရာတစ်ခု ဖြစ်လာစေရန်ရည်ရွယ်ဆောင်ရွက်ခဲ့ခြင်းဖြစ်ကြောင်းသိရသည်။

#ymg/mt
#Yangon_Media_Group

#Local_News
Published_ 27 September 2022

ရှမ်းပြည်နယ်(မြောက်ပိုင်း)၊ နောင်ချိုမြို့နယ်တွင် ငွေကျပ်သိန်း ၂၅၀၀ ကျော်တန်ဖိုးရှိ စိတ်ကြွရူးသွပ်ဆေးပြား ၅ သိန်း ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့ရဲ့ ထုတ်ပြန်ချက်အရ သိရပါတယ်။

ဖြစ်စဉ်မှာ မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် စက်တင်ဘာ ၂၄ ရက် မွန်းလွဲ ၁ နာရီတွင် ရှမ်းပြည်နယ်(မြောက်ပိုင်း)၊ နောင်ချိုမြို့နယ်၊ လားရှိး-မန္တလေးသွား ကားလမ်း၊ အိုရီယမ်တယ်တိုးဂိတ်အနီးတွင် လားရှိုးမှ နောင်ချိုဘက်သို့ မင်းနိုင် မောင်းနှင်လာသည့် Nissan UD ၁၂ ဘီး မော်တော်ယာဉ်ကို သတင်းအရ ရှာဖွေခဲ့ပါတယ်။

ထိုသို့ရှာဖွေရာ ယာဉ်ပေါ်မှ ဒေသကာလတန်ဖိုးငွေကျပ်သိန်း ၂၅၀၀ ကျော်တန်ဖိုးရှိ စိတ်ကြွရူးသွပ်ဆေးပြား ၅ သိန်းနှင့် စိတ်ကြွရူးသွပ်ဆေးပြား ထုတ်လုပ်ရာတွင်အသုံးပြုသည့် အနံ့ဆေးရည် ၅၉ ဒသမ ၇ လီတာ၊ အရောင်မှုန့် ၁၃၂ ဒသမ ၂ ကီလို သိမ်းဆည်းရမိခဲ့ပါတယ်။

စစ်ဆေးချက်အရ ညနေ ၃ နာရီခွဲက နောင်ချိုမြို့နယ်၊ ကျောက်ကြမ်းကျေးရွာအနီး၊ လားရှိုး-မန္တလေးသွား ကားလမ်းဘေးတွင် စိတ်ကြွရူးသွပ်ဆေးပြားများ သယ်ဆောင်ရာ၌ ပူးပေါင်းပါဝင်သူ ရဲမင်းနိုင်အား ဆက်လက်ဖမ်းဆီးရမိခဲ့ပါတယ်။

စစ်ဆေးဖော်ထုတ်ချက်အရ သိမ်းဆည်းရမိ စိတ်ကြွရူးသွပ်ဆေးပြားများအား ရှမ်းပြည်နယ်(မြောက်ပိုင်း)မှ မန္တလေးတိုင်းဒေသကြီးသို့ သယ်ဆောင်ခြင်းဖြစ်ကြောင်း သိရှိရသဖြင့် ၎င်းတို့အား ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေး ဖော်ထုတ်လျက်ရှိကြောင်း သတင်းရရှိပါတယ်။

#ymg_mnn
#Yangon_Media_Group

#Local_News
Published _ 27 september 2022

ပြည်ပနေ နိုင်ငံသားများ၏ ပြည်ပတွင် နိုင်ငံခြားဝင်ငွေဖြင့် ရရှိသော လစာဝင်ငွေကို ဝင်ငွေရလမ်းအဖြစ် အသုံးပြုရာ၌ တင်ပြရမည့်အထောက်အထားများနှင့် စပ်လျဉ်း၍ စီမံကိန်းနှင့်ဘဏ္ဍာရေး ဝန်ကြီးဌာန၊ ပြည်တွင်းအခွန်များဦးစီးဌာနက စက်တင်ဘာ ၂၆ ရက်တွင် အသိပေးကြေညာချက်ထုတ်ပြန်ထားသည်။

လက်ရှိ ပြည်ပနေနိုင်ငံသားများ၏ ပြည်ပတွင် နိုင်ငံခြားဝင်ငွေဖြင့်ရရှိသော လစာဝင်ငွေသည် နှစ်စဉ်ပြဋ္ဌာန်းသော ပြည်ထောင်စု၏ အခွန်ကောက်ဥပဒေအရ ဝင်ငွေခွန်ကင်းလွတ်ခွင့်ရရှိပြီးဖြစ်ကာ အဆိုပါ လစာခေါင်းစဉ်မှ ဝင်ငွေတွင် လစာ၊ လုပ်ခ၊ နှစ်စဉ်ကြေး၊ ဆုကြေး၊ ချီးမြှင့်ငွေ၊ လစာနှင့်လုပ်ခအစား သို့မဟုတ် ယင်းတို့အပြင် ထပ်ဆောင်းရရှိသည့် အခကြေးငွေ၊ ကော်မရှင်တို ပါဝင်ကြောင်း သိရသည်။

ယင်းအပြင် အဆိုပါ လစာမှ ဝင်ငွေကို ပြည်တွင်းသို့ လွှဲပြောင်း၍ ပြည်တွင်း၌ မော်တော်ယာဉ်၊ အိမ်၊ ခြံ၊မြေ စသည့် အခြေပစ္စည်းများ ဝယ်ယူခြင်း၊ တည်ဆောက်ခြင်းနှင့် အစုရှယ်ယာများ ဝယ်ယူ၊ ထည့်ဝင်ရင်းနှီးမြှုပ်နှံခြင်းတို့ ဆောင်ရွက်ရာတွင် တည်ဆဲဝင်ငွေခွန်ဥပဒေအရ ဝင်ငွေခွန်ထပ်မံပေးဆောင်ရန်မလိုသည့် အခွန်ဆိုင်ရာအကျိုးခံစားခွင့်ကို ရရှိမည်ဖြစ်ကြောင်း ထုတ်ပြန်ချက်၌ ဖော်ပြထားသည်။

ပြည်ပနေနိုင်ငံသားများ၏ ပြည်တွင်းသို့လွှဲပြောင်းသည့် လစာငွေများသည် ပြည်ပတွင် နိုင်ငံခြားငွေဖြင့်ရရှိသည့် လစာခေါင်းစဉ်မှ ဝင်ငွေဖြစ်ခြင်း၊ ပြည်တွင်းသို့ ငွေလွှဲပြောင်းပေးပို့ရာတွင်ဘဏ် သို့မဟုတ် တရားဝင် ငွေလွှခွင့်လိုင်စင်ရရှိထားသည့် လုပ်ငန်းများမှတစ်ဆင့် လွှပိုမှုဖြစ်ခြင်း သိုမဟုတ် ကာယကံရှင်ကိုယ်တိုင် ပြည်ပမှ ပြန်လာစဉ်တစ်ပါတည်းယူဆောင်ခဲ့ ခြင်း စသည့်အချက်များနှင့်ပတ်သက်၍ သက်ဆိုင်ရာ အထောက်အထားများ ပြည့်စုံစွာ တင်ပြနိုင်မှသာ အခွန်ဆိုင်ရာအကျိုးခံစားခွင့်ကို ရရှိမည်ဖြစ်ကြောင်း သိရသည်။

သို့ဖြစ်၍ ပြည်ပ၌ အလုပ်လုပ်ကိုင်နေကြသည့် မြန်မာနိုင်ငံသားများအနေဖြင့် အခွန်ကင်းလွတ်ခွင့်ရရှိသော လစာဝင်ငွေအပေါ် အခွန်ဆိုင်ရာအကျိုးခံစားခွင့်များကို အပြည့်အဝခံစားနိုင်ရန်အတွက် မြန်မာနိုင်ငံသို့ ငွေလွှဲပြောင်းပေးပို့ခြင်း ဖြစ်ပါက ဘဏ် သို့မဟုတ် တရားဝင် ငွေလွှဲခွင့်လိုင်စင်ရရှိထားသည့် လုပ်ငန်းများမှတစ်ဆင့် လွှပြောင်းပေးပို့ကြရန်၊ ကာယကံရှင်ကိုယ်တိုင် ပြည်ပမှပြန်လာစဉ် တစ်ပါတည်း ယူဆောင်ခဲ့ခြင်းဖြစ်ပါက တရားဝင်ငွေလဲလှယ်ရေးကောင်တာများတွင် လဲလှယ်ကြရန်၊ လေဆိပ်တွင်ကြေညာသည့် အထောက်အထားနှင့် သက်ဆိုင်ရာ အထောက်အထားများကို စနစ်တကျသိမ်းဆည်းကြရန် ပြည်တွင်းအခွန်များဦးစီးဌာနမှ အသိပေး နှိးဆော်ထားသည်။

#ymg/NN
#Yangon_Media_Group

#Local_News
Published_27 September 2022

တောင်သူလယ်သမားတွေကို JICA Two Step Loan ချေးငွေစီမံကိန်းကနေ ငွေကျပ် ၂၃၀ ဘီလီယံကျော် ထုတ်ချေးထားကြောင်း မြန်မာ့လယ်ယာဖွံ့ဖြိုးရေးဘဏ်မှ အသိပေးကြေညာထားသည်။

လက်ရှိတွင် JICA Two Step Loan ချေးငွေစီမံကိန်းချထားမှုအခြေအနေမှာ စီမံကိန်းစတင်ခဲ့သည့် ၂၀၁၇ ခုနှစ် ဇန်နဝါရီလ ၂၁ ရက်ကနေ ၂၀၂၂ ခုနှစ် စက်တင်ဘာလ ၂၀ နေပြည်တော်ကောင်စီနယ်မြေအပါအဝင် ပြည်နယ်နှင့်တိုင်းဒေသကြီး ၁၄ ခုရှိ၊ မြို့နယ်ပေါင်း ၁၈၇ မြို့နယ်၊ တောင်သူပေါင်း ၅၅၉၃၂ ဦး၊ စက်အစီးရေ ၅၅၉၂ စီးနှင့် ချေးငွေပမာဏ ငွေကျပ် ၂၃၀ ဘီလီယံကျော်ကို ဘီလီယံကျော်ကို ထုတ်ချေးထားပြီးဖြစ်ကြောင်း အသိပေးထုတ်ပြန်ထားသည်။

ယင်းအပြင် ချေးငွေရယူထားသည့် တောင်သူများအနေဖြင့် တစ်နှစ်တစ်ကြိမ်အရစ်ကျ ပြန်လည်ပေးဆပ်သည့် အရင်းငွေတွေကို လှည့်ပတ်ရန်ပုံငွေအဖြစ် ဘဏ်တွင် စုဆောင်းထားပြီး ချေးငွေလိုအပ်သည့် တောင်သူတွေကို ဆက်လက်ထုတ်ချေးပေးနေခြင်းဖြစ်ကြောင်း သိရသည်။

တောင်သူများကို ထုတ်ချေးပေးနေသည့် ချေးငွေအတိုးနှုန်းမှာ ၅ ရာခိုင်နှုန်းဖြစ်ပြီး ချေးငွေသက်တမ်းမှာ နှစ်တို ၃ နှစ်၊ နှစ်ရှည် ၅ နှစ်ဖြစ်ကာ ချေးငွေပမာဏကို တစ်ဦးချင်းဆိုပါက အများဆုံးကျပ်သိန်း ၇၀၀၊ အစုအဖွဲ့အလိုက်ဆိုပါက အများဆုံးကျပ်သိန်း ၅၀၀၀ အထိ သတ်မှတ်ထားခြင်းဖြစ်သည်။

ယင်းအပြင် ချေးငွေရယူလိုသည့် တောင်သူတွေအနေဖြင့် ဂရန်မြေ (သို့မဟုတ်) လယ်ယာမြေ အမည်ပေါက်ပိုင်ဆိုင်မှု၊ ၃၀ ရာခိုင်နှုန်း စုဆောင်းငွေ၊ ဝင်ငွေတိုးတက် ရှာဖွေနိုင်မှုနှင့် ချေးငွေ ပြန်လည်ပေးဆပ်နိုင်စွမ်းတွေကို ကြိုတင်တွက်ချက် ပြင်ဆင်ပြီး လိုအပ်သည့်အထောက်အထား၊ အချက်အလက်တွေဖြင့် လျှောက်ထား ရယူနိုင်ကြောင်း သိရသည်။

JICA Two Step Loan ချေးငွေစီမံကိန်းသည် ဂျပန်အစိုးရကနေ မြန်မာအစိုးရကို နှစ် ၄၀ သက်တမ်းဖြင့် ချေးပေးထားသည့် ဂျပန်ယန်း ၁၅၁၃၅ သန်း၊ မြန်မာငွေအနေဖြင့် ဘီလီယံ ၂၀၀ ခန့်ကို တောင်သူလယ်သမားတွေဆီ တစ်ဆင့်ပြန်လည်ထုတ်ချေးပေးသည့်ချေးငွေစီမံကိန်းတစ်ခုဖြစ်သည်။

#ymg/sth
#Yangon_Media_Group

#Local_News
Published _27 September 2022

မတော်တဆမှုကြောင့် မလေးရှားနိုင်ငံတွင် သေဆုံးသွားသူနှစ်ဦး၏ အလောင်းများကို မနက်ဖြန် စက်တင်ဘာလ ၂၈ ရက်တွင် မြန်မာနိုင်ငံသို့ ပြန်ပို့မည်ဖြစ်ကြောင်း မလေးရှားနိုင်ငံ မြန်မာလူမူကူညီရေးအသင်း က သိရသည်။

"တစ်ယောက်က ကားအက်ဆီးဒင့်၊ နောက်တစ်ယောက်က အလုပ်ခွင် အက်ဆီးဒင့်ဖြစ်တာ။ ကျွန်တော်တိုကတော့ မိသားစုနဲ့ဆက်သွယ်လို့ ရတယ်ဆိုရင် မိသားစုရဲ့ ဆန္ဒအတိုင်း ပြန်ပို့ပေးတာ လုပ်ပါတယ်"ဟု အဆိုပါ အသင်းတာဝန်ရှိသူကပြောသည်။

စက်တင်ဘာလ ၂၂ ရက်က မလေးရှားနိုင်ငံ ကလန်းပြည်နယ် ဂါမူဆန်မြို့တွင် နေထိုင်သည့် ချင်းပြည်နယ် ကလေးမြို့မှ အသက် ၂၆ နှစ်အရွယ် (Lian Pom kim )ဆိုသူမှာ ကလန်တန်းပြည်နယ် ဂါမူဆန်မြို့၌ အလုပ်ခွင်အက်ဆီးဒင့်ဖြစ်ကာ ဂါမူဆန်မြို့ဆေးရုံကြီး၌ သေဆုံးခဲ့ကာ စက်တင်ဘာလ ၂၄ ရက်က အဆိုပါ ဂါမူဆန်မြို့၌ပင် ချင်းပြည်နယ် ကလေးမြို့မှ အသက် ၄၁ နှစ် အရွယ် (Suan Deih Thang ) ဆိုသူ ကားအက်ဆီးဒင့်ဖြင့် ကွယ်လွန်ခဲ့ခြင်း ဖြစ်ကြောင်း သိရသည်။

အဆိုပါ သေဆုံးသူနှစ်ဦး၏ ရုပ်အလောင်းများကိုမိသားစုများမှ မြန်မာနိုင်ငံသိုပြန်ပို့ပေးရန် အကူညီတောင်းခံလာသဖြင့် ဒေသဆိုင်ရာ ချင်းအမျိုးသားများ ဇိုမီးကွန်မြူနတီ မိသားစုများနှင့် ပူးပေါင်း၍ ယနေ့ စက်တင်ဘာလ ၂၇ ရက် မွန်းလွဲ ၂ နာရီအချိန် persuaran kajang ၌ ဆုတောင်းပွဲကျင်းပကာ မလေးရှားလေကြောင်းခရီးစဉ်ဖြင့် မြန်မာနိုင်ငံမင်္ဂလာဒုံလေဆိပ်သို စက်တင်ဘာလ ၂၈ ရက်တွင် ပို့ဆောင်မည် ဖြစ်ကြောင်း သိရသည်။

#ymg/mt
#Yangon_Media_Group

#World_Business
Published 27 September 2022

အရှေ့အာရှနဲ့ ပစိဖိတ်ဒေသအတွင်း ၂၀၂၂ စီးပွားရေးတိုးတက်မှုနှုန်းဟာ တရုတ်နိုင်ငံရဲ့အရှိန်လျော့ကျမှုကြောင့် သိသိသာသာ ယိုင်နဲ့လာမှာဖြစ်ပေမယ့် နောက်နှစ်ကျရင်တော့ စီးပွားရေးချဲ့ထွင်မှု အရှိန်မြင့်လာမှာဖြစ်ကြောင်း ကမ္ဘာ့ဘဏ်က အင်္ဂါနေ့မှာ ပြောကြားလိုက်ပါတယ်။

တရုတ်အပါအဝင် အရှေ့အာရှနဲ့ ပစိဖိတ်ဒေသအတွင်း ၂၀၂၂ စီးပွားရေးတိုးတက်မှုနှုန်းဟာ ၅ ရာခိုင်နှုန်းရှိမယ်လို့ ခန့်မှန်းခဲ့ကြပေမယ့် ၃.၂ ရာခိုင်နှုန်းသာ ရှိခဲ့ပြီး ပြီးခဲ့တဲ့နှစ်တုန်းက ၇.၂ ရာခိုင်နှုန်းအထိ ရှိခဲ့တာဖြစ်ကြောင်း ဝါရှင်တန်အခြေစိုက် ငွေတိုးချေးစားရေးဘဏ်ကြီးက တင်ပြခဲ့ပါတယ်။

တရုတ်နိုင်ငံအတွင်း တင်းကြပ်တဲ့ ကိုဗစ်စည်းမျဉ်းများကြောင့် စက်မှုထုတ်ကုန်၊ ပြည်တွင်းရောင်းချမှုနဲ့ ပိုကုန်လုပ်ငန်းများ နှောင့်ယှက်မှုဖြစ်စေတာကြောင့် စီးပွားရေးဖွံ့ဖြိုးမှု သိသိသာသာနှေးကွေးသွားမယ်လို့ ကမ္ဘာ့ဘဏ်က ခန့်မှန်းလိုက်တာဖြစ်ပါတယ်။

နိုင်ငံ ၂၃ နိုင်ငံပါဝင်တဲ့ဒေသစီးပွားရေးအခြေအနေရဲ့ ၈၆ ရာခိုင်နှုန်းဟာ တရုတ်နိုင်ငံကဖြစ်ပြီး ယခုနှစ်မှာ ၂.၈ ရာခိုင်နှုန်းသာ တိုးတက်ခဲ့တာကြောင့် ယခင်ခန့်မှန်းချက် ၅ ရာခိုင်နှုန်းနဲ့ယှဉ်ရင် သိသိသာသာနှောင့်နှေးနေရပါတယ်။

၂၀၂၁ တုန်းက တရုတ်စီးပွားရေး ၈.၁ ရာခိုင်နှုန်းတိုးတက်ခဲ့ပြီး ဆယ်စုနှစ်အတွင်း အတိုးတက်ဆုံးနှစ်ဖြစ်ခဲ့ပါတယ်။

၂၀၂၃ မှာတော့ ၄.၅ ရာခိုင်နှုန်းတိုးတက်မှုရှိမယ်လို ခန့်မှန်းလိုက်ပါတယ်။

စီးပွားရေးဖွံ့ဖြိုးတိုးတက်မှု နှောင့်နှေးခြင်းအတွက် နိုင်ငံတွေအနေနဲ့ ပြင်ဆင်ထားဖို့အတွက်ဆိုရင် ရေရှည်ဖွံ့ဖြိုးမှုကို အနှောင့်အယှက်ဖြစ်စေမယ့် ပြည်တွင်းမူဝါဒလွဲမှားမှုများကို ကိုင်တွယ်ဖြေရှင်းသင့်ကြောင်း အရှေ့အာရှနဲ့ ပစိဖိတ်ဒေသဆိုင်ရာ ကမ္ဘာ့ဘဏ်ဒုဥက္ကဌ'မန်နျူယယ်လာဖာရို'က ဖော်ပြခဲ့ပါတယ်။

နောက်ထပ်အန္တရာယ်တစ်ခုကတော့ ကမ္ဘာတဝှမ်းကဘဏ်တွေက ငွေကြေးဖောင်းပွမှုကို တိုက်ဖျက်ဖို့ကြိုးစားရာကနေ အတိုးနှုန်းမြင့်တက်လာခြင်းဖြစ်ပါတယ်။

အဲဒီကနေ ငွေကြေးပိုလျှံလာပြီး ငွေကြေးတန်ဖိုး ကျဆင်းလာနိုင်ကြောင်း ကမ္ဘာ့ဘဏ်က ဆိုပါတယ်။

ဈေးနှုန်းများထိန်းချုပ်ရန်အတွက် ထောက်ပံ့ကြေးများအသုံးပြုခြင်းဟာ ချမ်းသာကြွယ်ဝသူများကိုသာ အကျိုးဖြစ်ထွန်းစေမှာဖြစ်ပြီး အခြေခံအဆောက်အအုံများ၊ ကျန်းမာရေးနဲ့ ပညာရေးကဏ္ဍများမှာ အစိုးရရဲ့အသုံးစရိတ်များ ရရှိစေမှာမဟုတ်ကြောင်း ဘက်စုံကူညီရေးအေဂျင်စီက မူဝါဒချမှတ်သူများကို သတိပေးလိုက်ပါတယ်။

"ထောက်ပံ့ကြေးများနဲ့ ထိန်းချုပ်ခြင်းဖြင့် ကုန်ထုတ်စွမ်းအားကို ထိခိုက်စေနိုင်ပါတယ်" လို့ စီးပွားရေးပညာရှင်'အက်ဒစ်ယာမက်တူး'က ဖော်ပြခဲ့ပါတယ်။

Source: Reuters
#Yangon_Media_Group

#World_Health
Published 27 September 2022

ငွေကြေးဖောင်းပွမှု၊ အတိုးနှုန်းမြင့်တက်လာမှု၊ လောင်စာဆီဈေးနှုန်းအဆမတန်မြင့်တက်လာမှုတို့ကြောင့် ကမ္ဘာတဝှမ်းမှာ စိတ်ဖိစီးမှုတွေ တိုးမြင့်လာနိုင်ကြောင်း စိတ်ကျန်းမာရေးဖောင်ဒေးရှင်းမှ အမှုဆောင်ချုပ်'မာ့ခ်ရိုးလန်း'က သတိပေးလိုက်ပါတယ်။

ပြီးခဲ့တဲ့နှစ်များအတွင်း စိတ်ဖိစီးမှုတွေက လူတွေကိုအတော်လေးသက်ရောက်နေပြီး အိပ်မပျော်ခြင်း၊ ခေါင်းတစ်ခြမ်းကိုက်ခြင်း၊ အစာအိမ်မကောင်းခြင်းတို့ ကြုံတွေ့လာကြပါတယ်။

တကယ်တမ်းက စိတ်ဖိစီးမှုဆိုတာက ခန္ဓာကိုယ်ကနေ အလိုအလျောက်ကာကွယ်တဲ့ စနစ်တစ်ခုဖြစ်ပါတယ်။

အက်ဒရီနယ်လင်၊ ကော်တီဆောလ်ဟော်မုန်းတို့ ထွက်လာကာ နှလုံး၊ အဆုတ်၊ ကြွက်သား၊ ဦးနှောက်များဆီ ပို့ဆောင်ပေးပါတယ်။

အဲဒီအခါ နှလုံးခုန်နှုန်း၊ သွေးဖိအား မြင့်တက်လာပြီး ကြွက်သားများတောင့်တင်းလာကာ စိတ်အာရုံနိုးကြားထက်မြက်နေစေပါတယ်။

စိတ်ဖိစီးမှုဖြစ်တဲ့အခါ ခံစားရနိုင်တဲ့လက္ခဏာ ၇ မျိုးကတော့...

(၁) နှလုံးခုန်မြန်ခြင်း

စိတ်ဖိစီးမှုကြောင့် နှလုံးခုန်မြန်ခြင်း၊ သွေးတိုးခြင်း၊ သွေးလျှောက်မှုမြန်ခြင်းတို့ ဖြစ်စေနိုင်ပါတယ်။

(၂) အစာချေစနစ်ထိခိုက်ခြင်း

စိတ်ဖိစီးတဲ့အခါ အစာအိမ်အက်ဆစ်ထွက်ရှိမှုကို အနှောင့်အယှက်ဖြစ်စေပြီး ဝမ်းချုပ်ခြင်း၊ ဝမ်းလျှောခြင်း၊ အက်ဆစ်လျှံထွက်ခြင်း၊ မူးဝေခြင်းတို့ ဖြစ်ပေါ်နိုင်ပါတယ်။

(၃) အိပ်မပျော်ခြင်း

စိတ်ဖိစီးမှုဟော်မုန်းများထွက်ရှိတာကြောင့် ညဘက်တွေမှာ အာရုံကြောနိုးကြားနေပြီး အိပ်ပျော်ခြင်းကို နှောင့်ယှက်စေပါတယ်။

(၄) ရောဂါကူးစက်ဝင်ရောက်ခြင်း

စိတ်ဖိစီးမှုကြောင့် ထွက်လာတဲ့ ဆိုက်တိုကိုင်းတွေဟာ သွေးကြောကျဉ်းခြင်း၊ လေးဘက်နာနဲ့ နှလုံးရောဂါတို့ ဖြစ်စေနိုင်ပါတယ်။

(၅) အရေပြားပြဿနာများ

အက်ဒရီနယ်လင်နဲ့ ကော်တီဆောလ်ဟော်မုန်းများက အရေပြားရှိသွေးလည်ပတ်မှုကို သက်ရောက်စေတာကြောင့် အကွက်အကွက်များ ဖြစ်လာတတ်ကာ ဝက်ခြံထွက်လေ့ရှိသူတွေဆိုရင် ပိုထွက်လေ့ရှိပါတယ်။

(၆) ခါးအဆီတက်ခြင်း

စိတ်ဖိစီးမှုနဲ့ ကိုယ်အလေးချိန်တက်ခြင်းတို့ကြား ဆက်စပ်မှုရှိပေမယ့် အလုံးစုံတော့ မသိရှိရသေးပါဘူး။

(၇) အထိမခံနိုင်ခြင်း

စိတ်ခံစားမှုတွေက တစ်ခုခုကို သည်းမခံချင်တဲ့အနေအထား ရောက်နေတတ်ပြီး ဒါဟာ မောပန်းနွမ်းနယ်လာတဲ့အထိ ဖြစ်တတ်ပါတယ်။

စိတ်ဖိစီးမှုဖြေလျှော့နိုင်မယ့်နည်းလမ်းများကတော့...

(၁) တရားထိုင်ခြင်း

(၂) ပုံမှန်လေ့ကျင့်ခန်းပြုလုပ်ခြင်း

(၃) အသက်ဝဝရှူထုတ်ခြင်း

(၄) အကောင်းမြင်စိတ်ထားခြင်း

(၅) အချိုလျှော့၍ ရေများများသောက်ခြင်း

Source: The Telegraph
#Yangon_Media_Group

#Local_News
Published-27 Setember 2022

လာမည့်အောက်တိုဘာလ ၆ ရက်တွင် Yangon Water Bus ပြန်လည်ပြေးဆွဲမည်ဖြစ်ကြောင်း အသိပေးကြေညာထားသည်။

ယခင်က Yangon Water Bus ကို အောက်တိုဘာ ၁ ရက်နေ့တွင် ပြေးဆွဲမည်ဟု အသိပေးထုတ်ပြန်ထားပြီး ယခုအခါ ၅နှစ်ပြည့်နှစ်ပတ်လည်အထိမ်းအမှတ်အဖြစ် အောက်တိုဘာလ ၆ ရက်နေ့ တွင် ပြန်လည်ပြေးဆွဲခြင်းဖြစ်ကြောင်း သိရသည်။

Yangon Water Bus ပြေးဆွဲမှုကို(၂၀၁၇)ခုနှစ် အောက်တိုဘာလတွင် ရန်ကုန်မြစ်ရှိ ဆိပ်ကမ်း(၇) ခု၌ Water Bus (၅) စီးဖြင့် ပြေးဆွဲပေးခဲ့ပြီး ခရီးစဉ်လမ်းကြောင်းမှာ ဗိုလ်တထောင်ဆိပ်ကမ်း၊ လမ်းသစ်ဆိပ်ကမ်း၊ ကြည့်မြင်တိုင်ဆိပ်ကမ်း၊ ရွှေပိတောက်ဆိပ်ကမ်းနှင့် အင်းစိန်ဆိပ်ကမ်းအစရှိသည့် ဆိပ်ကမ်းမှတ်တိုင်များတွင် ပြေးဆွဲပေးခဲ့ခြင်းဖြစ်သည်။

ကိုဗစ်ကပ်ရောဂါကြောင့် နှစ်နှစ်ကျော်ကြာ ရပ်နားထားသည့် YANGON WATER BUS ကို လာမည့် အောက်တိုဘာလတွင် ပြန်လည်ပြေးဆွဲခြင်းဖြစ်ကြောင်း သိရသည်။ လက်ရှိတွင် ဗိုလ်တထောင်၊ ပန်းဆိုးတန်း၊ လမ်းသစ်၊ ဆာပါချောင်နှင့် အံ့ကြီးမှတ်တိုင်တို့ကို ပမာဏလမ်းကြောင်းအဖြစ် ပြေးဆွဲမည်ဖြစ်ပြီး ငွေပေးချေခြင်းအတွက် KPAY၊ CB PAY၊ WAVE PAY တို့ကို အသုံးပြုသွားမည်ဖြစ်ကြောင်း သိရသည်။

အလားတူ အများပြည်သူအပန်းဖြေရန် ခရီးတိုလမ်းကြောင်းများလည်း ၇၅ ရာခိုင်နှုန်း ရေးဆွဲပြင်ဆင်ပြီးဖြစ်ကာ သက်ဆိုင်ရာဌာနများနှင့် ချိတ်ဆက်၍ ပြန်လည်ပြေးဆွဲနိုင်ရေး လုပ်ဆောင်လျက်ရှိကြောင်း သိရသည်။

#Ymg/STH
#Yangon_Media_Group

#World_Health
Published 27 September 2022

ဆံပင်ကျွတ်ခြင်းဟာ ယာယီခံစားရတာရှိသလို တသက်လုံးခံစားရတာလည်း ရှိနိုင်ပါတယ်။

ကျား/မ မရွေးဖြစ်ပေါ်တတ်ပြီး အမျိုးသားတွေမှာ ပိုပြီးအဖြစ်များပါတယ်။

လူတွေဟာ တစ်နေ့ကို ဆံခြည်မျှင် ၅၀ မှ ၁၀၀ လောက် ကျွတ်တတ်ပါတယ်။

ဆံပင်ညှပ်လိုက်ရင် ဆံပင်ပြန်ပေါက်ခြင်းကို အားမပေးဘူးဆိုတာ သိထားရပါမယ်။

အသက်ကြီးလာတာနဲ့အမျှ ဆံပင်ကျွတ်လာတတ်ပေမယ့် ဟော်မုန်းအပြောင်းအလဲ၊ မျိုးရိုးလိုက်ခြင်းတို့ကြောင့်လည်း ဆံပင်ကျွတ်တတ်ပါတယ်။

ဒါ့အပြင် နေမကောင်းဖြစ်ခြင်း၊ ခွဲစိတ်ကုသခြင်း၊ ရောဂါကူးစက်ခြင်းတို့ကြောင့်ဖြစ်နိုင်ပြီး အမျိုးသမီးများ ကလေးမွေးပြီးတဲ့အချိန်မှာလည်း ဆံပင်ကျွတ်တတ်ပါတယ်။

လက္ခဏာတွေကတော့ ဦးခေါင်းထိပ်မှာ အကွက်လိုက်ဖြစ်နေတာမျိုး၊ ဆံပင်ပါးလာတာမျိုး၊ ခေါင်းဖြီးတဲ့အခါနဲ့ ခေါင်းလျှော်တဲ့အချိန်မှာ ဆံပင်ကျွတ်တာမျိုးတွေ ဖြစ်ပါတယ်။

ဆံပင်ကျွတ်ခြင်းအဓိကအကြောင်းအရင်းက မျိုးရိုးကြောင့်ဖြစ်ပြီး အသက်အရွယ်၊ ကိုယ်အလေးချိန်၊ စိတ်ဖိစီးမှု၊ အဟာရချို့တဲ့ခြင်းတို့ကြောင့်လည်း ဖြစ်နိုင်ပါတယ်။

ဆံပင်ကျွတ်ခြင်းကာကွယ်ဖို့ မိမိဆံပင်ကို သိမ်မွေ့စွာထိန်းသိမ်းသင့်ကြောင်း Mayo Clinic က အကြံပြုထားပါတယ်။

ခေါင်းရေဆိုနေစဉ် ဆံပင်မဆွဲမိဖို့ သတိပေးလိုက်ပါတယ်။

စိတ်ဖိစီးမှုနည်းအောင် သတိပြုခြင်း၊ ကျန်းမာမျှတတဲ့ အစားအစာစားသုံးခြင်း၊ ဆံပင်ကျွတ်ခြင်းမဖြစ်စေတဲ့ ဆေးကုသနည်းတို့ ရှာဖွေရန်ဖြစ်ပါတယ်။

နောက်တစ်ချက်ကတော့ ဦးထုပ်တွေ၊ ဘီးတွေ မျှဝေမသုံးစွဲဖို့ ဖြစ်ပါတယ်။

ဆံပင်အရောင်ချွတ်ခြင်းကလည်း ဦးခေါင်းကိုထိခိုက်စေကာ ထိပ်ပြောင်တဲ့ အခြေအနေအထိ ဖြစ်နိုင်ပါတယ်။

နေရောင်ထိတွေ့ခြင်းကိုကာကွယ်ဖို့နဲ့ ဆေးလိပ်မသောက်ခြင်းဖြင့်လည်း ကာကွယ်နိုင်ပါတယ်။

ဆံပင်ကျွတ်ခြင်းကို သက်သာအောင် ပြုလုပ်လိုရတဲ့နည်းလမ်းတွေရှိပါတယ်။

Minoxidil - ခေါင်းလျှော်ရည်အဖြစ်နဲ့ အသုံးပြုနိုင်ပြီး အနည်းဆုံးနှစ်ဝက်အတွင်း ဆံပင်ပြန်ပေါက်နိုင်ပါတယ်။

Finasteride (Propecia) - အမျိုးသားတွေမှာ သောက်ဆေးအနေနဲ့ အသုံးပြုနိုင်ပြီး အကျိုးအာနိသင်ရဖို့ လအနည်းငယ်ကြာနိုင်ပါတယ်။

အခြားနည်းလမ်းတွေကတော့ ဆံပင်စိုက်ခြင်း၊ လေဆာကုသနည်းတို့ဖြင့် ကုသနိုင်ပါတယ်။

Source: The Jerusalem Post
#Yangon_Media_Group

Published 27 Sept 2022

သမ္မတဗလက်ဒီမာ ပူတင်က တနင်္လာနေ့ စက်တင်ဘာ ၂၆ ရက်က ယခင်အမေရိကန်ထောက်လှမ်းရေးဟောင်း အက်ဒ်ဝပ်စနိုဒင်ကို ရုရှားနိုင်ငံသား ပေးအပ်လိုက်ပါတယ်။ အမေရိကန်အမျိုးသားလုံခြုံရေးအေဂျင်စီရဲ့  လျို့ဝှက် ထောက်လှမ်းရေးစစ်ဆင်ရေးတွေကို သူက ထုတ်ဖော်ပြောကြားခဲ့ပြီး ကိုးနှစ်အကြာမှာ ရုရှားက သူ့ကို နိုင်ငံသား ပေးလိုက်တာြဖစ်ပါတယ်။

၂၀၁၃ခုနှစ်မှာ သူအလုပ်လုပ်ခဲ့တဲ့ အမျိုးသားလုံခြုံရေးအေဂျင်စီရဲ့ ပြည်တွင်းနှင့်နိုင်ငံတကာ ထောက်လှမ်းရေး စစ်ဆင်ရေးတွေကို  ဖွင့်ချပြီးနောက် အသက် ၃၉နှစ်အရွယ် စနိုဒင်ဟာ အမေရိကန်ပြည်ထောင်စုကနေ ထွက်ပြေးခဲ့ပြီး ရုရှားက သူ့ကို နိုင်ငံရေးခိုလှုံခွင့်ပေးခဲ့တာပါ။

 သူလျှိုထောက်လှမ်းရေးအမှုတွေနှင့် ရာဇဝတ်မှုနှင့်တရားစွဲတာကို ရင်ဆိုင်ဖို့ အမေရိကန်အာဏာပိုင်တွေက နှစ်ပေါင်များစွာ သူ့ကို အမေရိကန်ပြန်ပို့စေချင်ခဲ့ပါတယ်။

နိုင်ငံခြားမှာမွေးဖွားသူ (၇၂)ဦးကို ရုရှားနိုင်ငံသားအဆင့်ပေးအပ်တဲ့ ပူတင်ရဲ့ အမိန့်မှာ ကရင်မလင်ရဲ့ မှတ်ချက်တစ်စုံတစ်ရာမပါဘဲ စနိုဒင်နာမည်ပါလာတာဖြစ်ပါတယ်။

စနိုဒင်က သူမိသားစုကို အတူတကွ သူနှင့်အတူရှိနေစေချင်ပြီး ပုဂ္ဂိုလ်ရေးလွတ်လပ်ခွင့် တောင်းတဲ့ မက်ဆေ့ကို တင်ခဲ့ပါတယ်။

“ကျွန်တော်တို့မိသားစုတွေနှင့် နှစ်ပေါင်းများစွာခွဲနေကြရပြီးနောက် ကျွန်တော့်ဇနီးနှင့် ကျွန်တော်ဟာ  ကျွန်တော်တို့ သားတွေနှင့် ခွဲနေဖို့ဆန္ဒမရှိကြပါဘူး”လို့ စနိုဒင်ကတွစ်တာမှာရေးခဲ့ပါတယ်။

“ (၂)နှစ်စောင့်ဆိုင်းပြီး ၁၀နှစ်နီးပါး  ပြည်ပြေးအဖြစ်နေခဲ့ရပြီးနောက်  အနည်းငယ်တည်ငြိမ်မှုကပဲ ကျွန်တော့်မိသားစု အတွက် ခြားနားမှုဖြစ်စေခဲ့ပါတယ်။ သူတို့နှင့် ကျွန်တော်တို့အားလုံးအတွက် ကိုယ်ရေးလွတ်လပ်ခွင့်အတွက် ကျွန်တော်ဆုတောင်းပါတယ်” လို့သူကရေးပါတယ်။

တွစ်အသစ်ဟာ ကရင်မလင်ခေါင်းဆောင်ရဲ့ အမိန့်ကိုတော့ရည်ညွှန်းခြင်းမရှိပါဘူး။ သူက ၂၀၂၀တုန်းကတွစ်တာက  သူနှင့်သူ့မိသားစုဟာ အမေရိန်-ရုရှား ပူးတွဲနိုင်ငံသားအဖြစ် လျှောက်ထားတယ်” ဆိုတဲ့ သူ့မက်ဆေ့ချ်ကိုတော့ တွဲ တင်ထားတာဖြစ်ပါတယ်။

Source Reuters

#Putin

#Snowden

#Russia Citizenship