Published 21 April 2022

တရုတ်သမ္မတ ရှီကျင့်ဖင်းဟာ ဧပြီလ ၂၁ရက် ကြာသပတေးနေ့ မနက်ပိုင်းက ကျင်းပတဲ့ အာရှအတွက် ဘိုအောင်းဖိုရမ် BFA နှစ်ပတ်လည်ကွန်ဖရင့် ၂၀၂၂ဖွင့်ပွဲမှာ အမှာစကးးပြောကြားခဲ့ပါတယ်။

တရုတ်နိုင်ငံ တောင်ပိုင်း ကျွန်းပြည်တယ် ဟိုင်နန်မှာ ဧပြီ ၂၀ရက်မှ ၂၂ရက်အထိကျင်းပတဲ့ နှစ်ပတ်လည် ဘိုအောင်းဖိုရမ်ကို “ ကိုဗစ်-၁၉နှင့် အလွန်ကမ္ဘာ- ကမ္ဘာလုံးဆိုင်ရာဖွံ့ဖြိုးရေးနှင့် မျှဝေခံစားအနာဂတ်” ဆိုတဲ့ ခေါင်းစဉ်နှင့် ကျင်းပနေတာပါ။

ကမ္ဘာကြီးမှာ စိန်ခေါ်မှုများစွာနှင့်ရင်ဆိုင်နေရတဲ့အချိန်မှာ ကျင်းပတဲ့ ဒီနှစ် နှစ်ပတ်လည်ဘိုအောင်းဖိုရမ်ဟာ အလွန့်ကို ထူးခြားအရေးပါနေပါတယ် လို့  သမ္မတရှီကပြောပါတယ်။

“ကမ္ဘာကြီး၊အချိန်ကာလတွေနှင့် သမိုင်းရဲ့ပြောင်းလဲမှုတွေဟာ အခုဆိုရင် မကြုံစဖူးသောလမ်းကြောင်းတွေ လှစ်ဟပြသနေပါတယ်။ အဲဒါတွေဟာ လူသားတွေအပေါ် စိန်ခေါ်မှုတွေဖြစ်လာပြီး ဒါကို ဂရုတစ်စိုက်ကိုင်တွယ်ရပါမယ်။  ရာစုနှစ်မှာတစ်ခါကြုံရတဲ့ ကပ်ဘေးရဲ့အရိပ်ကနေ လူသားတွေ မထွက်ခွာနိုင်သေးတဲ့အလျောက်  သမားရိုးကျလုံခြုံရေး အန္တရာယ်အသစ်တွေဟာလည်း ပေါက်ဖွားလာနေပါတယ်။ ထိခိုက်လွယ်ပြီးယိုင်တိယိုင်တိုင်ဖြစ်နေတဲ့ ကမ္ဘာ့စီးပွာရေးနာလန်ထူမှုဟာ ဖွံ့ဖြိုးတိုးတက်မှုကွာဟမှုတွေကျယ်ပြန်လာကြောင့် ပိုဆိုးရွားလာနေစေပါတယ်။ အုပ်ချုပ်မှုလိုငွေပြနေတဲ့ ရာသီဥတုပြောင်းလဲမှုလိုမျိုးနယ်ပယ်တွေကိစ္စ မကိုင်တွယ်ရသေးချိန်မှာ ဒစ်ဂျစ်တယ်အုပ်ချုပ်မှုလိုမျိုတွေက ကျွန်တော်တို့ရှေ့ရောက်လာနေတယ်။ အဲဒါကြောင့် ဒီနောက်ခံကားပေါ်က ဒီနှစ် ကွန်ဖရင့်ရဲ့ ခေါင်းစဉ်ဟာ အထူးကိုအရေးကြီးနေပါတယ်” လို့ သမ္မတရှီကပြောပါတယ်။

တရုတ်ဒုတိယဝန်ကြီးချုပ် ဟန်ကျိုင်းကလည်း ဖွင့်ပွဲနှင့်အခြားဆက်စပ်အခမ်းအနားတွေကို တက်ရောက်ပါတယ်။

တက်ရောက်သူတွေဟာ အာရှနှင့် ကမ္ဘာကြီးရဲ့ ကပ်ဘေးအလွန်ဖွံဖြိုးရေးတိုးတက်ရေးအစီအစဉ်တွေကို ကွန်ဖရင့် အစည်းအဝေးတွေအတွင်း‌ ဆွေးနွေးဖလှယ်ကြမှာဖြစ်ပါတယ်။

၁၉၉၈ စီးပွားရေးအကျပ်အတည်းဖြစ်ပြီးတဲ့နောက် အာရှနိုင်ငံတွေဟာ စီးပွားရေး ပေါင်းစည်းဆောင်ရွက်မှုတွေကိုရှာဖွေရင်း ၂၀၀၁ခုနှစ်မှာ ဘိုအောင်းဖိုရမ်ကို အစိုးရမဟုတ်တဲ့ အဖွဲ့အစည်းကြီးအဖြစ် တည်ထောင်ခဲ့ကြတာဖြစ်ပါတယ်။

Source CMG

#LocalNews
Published - 21 April 2022

မြစ်ကြီးနား - ပူတာအို ကားလမ်းမကြီးတွင် ဖြစ်ပွားလျက်ရှိတဲ့ နှစ်ဖက်ထိတွေ့တိုက်ပွဲများကြောင့် ကုန်စည်စီးဆင်းမှုတွေနှောင့်နှေးမှာကို ပူတာအိုဒေသခံများအနေနဲ့ စိုးရိမ်လျက်ရှိနေကြတယ်လို့ သိရပါတယ်။

အဆိုပါ လမ်းမကြီးဟာ ပူတာအိုဒေသတစ်ခုလုံး၏ အဓိကကုန်သွယ်ရေးလမ်းကြောင်းဖြစ်ပြီး ယခုလို တိုက်ပွဲများဖြစ်ပွားနေခြင်းကြောင့် လမ်းများပိတ်ဆို့နေသည့်အတွက် ကုန်တင်ကားကြီးများ သွားလာနိုင်မှုမရှိခြင်းကြောင့် အခြေခံစားသောက်ကုန်နှင့် စက်သုံးဆီများပြတ်လပ်မှုဖြစ်ပေါ်မှာကို ဒေသခံများက စိုးရိမ်နေကြတာဖြစ်တယ်လို့ ဆိုပါတယ်။

"သူက လမ်းကြောင်းပေါ်မှာဖြစ်တာပေါ့ နော်။မြို့ပေါ်မှာကတော့ ငြိမ်နေတယ်၊ တိုက်ပွဲဖြစ်တာ တွေက မရှိတော့ဘူး။ တစ်လကျော်လောက်ရှိပြီ အခုက မြစ်ကြီးနား - ပူတာအို သွားတဲ့လမ်းမှာ တိုက်ပွဲတွေဖြစ်နေတာလို့ သိရတယ်။ အခုလည်း မြို့ပေါ်မှာ စက်သုံးဆီတွေကို အလုအယက်ဝယ် ယူနေကြရတယ်။ ကျနော်တို့က မိုးတွင်းကာလအတွက် စိုးရိမ်တာပေါ့နော်။ကုန်စျေးနှုန်းတွေ တက်မှာ ပစ္စည်းတွေပြတ်လပ်မှာကို ဘယ်လိုဖြစ်လာအုံးမလဲဆိုတာ ဆက်ပြီးတော့စောင့်ကြည့်ရအုံးမှာနော်။" လို့ ပူတာအိုမြို့ ဒေသခံတစ်ဦးက ပြောပြခဲ့ပါတယ်။

လက်ရှိ ကချင်ပြည်နယ်၊ ပူတာအိုဒေသတွင် ဓါတ်ဆီတစ်ဂါလံလျှင် ၁၂,၀၀၀ ကျပ်အထိ ပေါက် စျေးရှိနေပြီး ဓါတ်ဆီရရှိဖို့အတွက် ဒေသခံများက ဆီဆိုင်များမှာအလုအယက်ဝယ်ယူနေကြရတယ်လို့လည်း သိရပါတယ်။

ပူတာအိုဒေသဟာ လမ်းပန်းဆက်သွယ်ရေးခက်ခဲတဲ့ ဒေသတစ်ခုဖြစ်ပြီး တိုက်ပွဲများကြောင့် ကုန်စည်စီးဆင်းမှု နှောင့်နှေးမှု ရှိ၊မရှိ ဆိုတာကိုလည်း ဆက်လက်စောင့်ကြည့်ရမယ့် အနေအထားဖြစ်တယ်လို့ ပူတာအိုဒေသခံတွေက ပြောပါတယ်။

Photo - CJ

ymg/kg
#Yangon_Media_Group

#LocalNews
Published - 21 April 2022

ဒီကနေ့ နံနက်ပိုင်းအချိန်က အမြန်လမ်းမကြီးတွင် အိမ်စီးယာဥ်တစ်စီးကားရှေ့ဘီးပေါက်ပြီး လမ်းလယ်ကျွန်း အုတ်ကန်အား ဝင်ရောက်တိုက်မိမှုဖြစ်ပွားခဲ့တယ်လို့ သိရပါတယ်။

ဖြစ်စဥ်မှာ ယနေ့ ဧပြီ ၂၁ ရက်၊ နံနက် ၁၀ နာရီခွဲ အချိန်က ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ်(၃၃၉/၃)နှင့် (၃၃၉/၄)ကြားတွင် အိမ်စီးယာဉ်(၁)စီး ရှေ့ယာဘက်ဘီးပေါက်မှုဖြစ်ပွားကာ လမ်းလယ်ကျွန်းရှိ အုတ်ကန်အား ဝင်ရောက်တိုက်မိခဲ့တာဖြစ်ပါတယ်။

အဆိုပါ ယာဥ်မတော်တဆမှုဖြစ်ပွားရာသို့ စကားအင်းအမြန်လမ်းမီးသတ်စခန်းမှ တပ်ဖွဲ့ဝင်များက သွားရောက်၍ ကူညီကယ်ဆယ်ရေးလုပ်ငန်းများကို ဆောင်ရွက်ပေးခဲ့ရပြီး ယင်းဖြစ်စဥ်ကြောင့် ယာဥ်ပေါ်ပါ အမျိုးသား(၂)ဦး ထိခိုက်ဒဏ်ရာရခဲ့တယ်လို့ သိရပါတယ်။

ယာဥ်တိုက်မှုကြောင့် ထိခိုက်ဒဏ်ရာရရှိသူ (၂)ဦးကိုလည်း အမြန်လမ်းမီးသတ်တပ်ဖွဲ့က တံတားဦးမြိုနယ်ဆေးရုံသို့ ကူညီပို့ဆောင်ပေးခဲ့တယ်လို့ သိရပါတယ်။

ဓါတ်ပုံ - MFSD

ymg/kg
#Yangon_Media_Group

#LocalNews
Published_21 April 2022

ဒေါ်လာမှ သတ်မှတ်မြန်မာကျပ်ငွေ လဲလှယ်ရာတွင် ကင်းလွတ်ခွင့်ရစာရင်းများကို ဗဟိုဘဏ်က ထုတ်ပြန်ခဲ့သည်။

အဆိုပါ ထုတ်ပြန်ချက်တွင် MIC ခွင့်ပြုချက်ဖြင့်လုပ်နေသော နိုင်ငံခြားတိုက်ရိုက်ရင်းနှီးမြုပ်နှံမှုလုပ်ငန်းများ၊အထူးစီးပွားရေးဇုန်များမှ ရင်းနှီးမြုပ်နှံမှုလုပ်ငန်းများ၊မြန်မာနိုင်ငံရှိ နိုင်ငံခြားသံတမန်များနှင့် မိသားစုဝင်များ၊ကုလသမဂ္ဂဝန်ထမ်းများ၊ကုလသမဂ္ဂ ခရီးသွားလက်မှတ်ကိုင် မြန်မာနိုင်ငံသားများ၊ ပြည်ပက လာရောက်လုပ်ကိုင်နေသည့် ဖွံဖြိုးရေးအေဂျင်စီများမှ နိုင်ငံခြားသားဝန်ထမ်းများ၊အပြည်ပြည်ဆိုင်ရာအဖွဲ့အစည်း(INGO)နှင့် အေဂျင်စီ ဝန်ထမ်းများ၊နိုင်ငံပိုင် နိုင်ငံသားပိုင် အပြည်ပြည်ဆိုင်ရာလေကြောင်းလိုင်းများက ကင်းလွတ်ခွင့်ရကြောင်း ပါရှိသည်။

နိုင်ငံခြားသုံးငွေဖြင့်ရသော ဝင်ငွေတွေကို တစ်ရက်အတွင်းလဲလှယ်ရန်နှင့် နိုင်ငံခြားငွေစာရင်းထဲမှ ငွေများကို အမေရိကန်တစ်ဒေါ်လာလျှင် မြန်မာငွေ ၁,၈၅၀ ကျပ်ဖြင့် ရောင်းချကြရန် ဗဟိုဘဏ်က ပြီးခဲ့သည့် ဧပြီလ ၃ ရက်တွင် သတ်မှတ်ခဲ့ခြင်း ဖြစ်သည်။

ymg/mt
#Yangon_Media_Group

#LocalNews
Published_21 April 2022

သရုပ်ဆောင်ရဲတိုက် ရင်ဆိုင်နေရသော မူးယစ်အမှုအတွက် ဧပြီလ ၂၀ ရက်က ရဲတိုက်ဘက်မှ သက်သေများအားစစ်ဆေးခဲ့ကြောင်း အမှုလိုက်ပါဆောင်ရွက်ပေးနေသော ရှေ့နေက YMG ကို ပြောသည်။

"ဧပြီလ ၂၀ ရက်နေ့က ကိုရဲတိုက်ဘက်က တရားခံပြသက်သေနှစ်ယောက်ကို စစ်ဆေးပါတယ်။မေလ တစ်ရက်နေ့မှာ ကျန်နေတဲ့ သက်သေကို စစ်ပါမယ်။မေလ ၁၇ ရက်နေ့မှာ အပြီးသတ် လျှောက်လဲချက်ပေးပါမယ်။အဲဒီ အပြီးသတ်လျှောက်လဲချက် ပေးတဲ့နေ့မှာပဲ ဘယ်နေ့မှာ အမိန့်ချမယ်ဆိုတာ သိရပါမယ်"ဟု ယင်းက ဆိုသည်။

ပြီးခဲ့သည့် မတ်လ ၂ ရက်က နစက ပေးခဲ့သော ၅၀၅ (က) လွတ်ငြိမ်းတွင် သရုပ်ဆောင် ရဲတိုက် ပါဝင်ခဲ့သော်လည်း ကျန်ရှိနေသေးသည့် မူးယစ်စေတတ်သော ဆေးဝါးများ ဥပဒေပုဒ်မ ၁၆ (ဂ) ကို ရင်ဆိုင်နေရခြင်း ဖြစ်သည်။

အဆိုပါပုဒ်မမှာ ပြစ်မှုထင်ရှားပါက ထောင်ဒဏ် ၅ နှစ်မှ ၁၀ နှစ်ထိ ချမှတ်နိုင်ကြောင်းလည်း သိရသည်။

ymg/mt
#Yangon_Media_Group

#WorldMilitary
Published 21 April 2022

ယူကရိန်းနိုင်ငံကို ကျူးကျော်တိုက်ခိုက်လာတာ အချိန်နှစ်လကြာမြင့်လာပြီဖြစ်တဲ့ရုရှားက နျူကလီးယားတိုက်ချင်းပစ်ဒုံးကျည်အသစ်ကို စမ်းသပ်ပစ်လွှတ်ခဲ့ပြီး သူတို့ရဲ့ စစ်ရေးလက်နက်စွမ်းအားကို ထုတ်ဖော်ပြသလိုက်ပါတယ်။

ရုရှားသမ္မတ 'ဗလာဒီမီယာပူတင်'က ရုရှားရန်ဘက်တွေအနေနဲ့ ဒီလက်နက်စွမ်းအားကိုကြည့်ပြီး တွေဝေပူပန်နေရတော့မှာဖြစ်ကြောင်း ဗုဒ္ဓဟူးနေ့က ပြောကြားလိုက်ပါတယ်။

စမ်းသပ်ပစ်လွှတ်နိုင်ဖို့ အချိန်ကြာမြင့်စွာစောင့်ဆိုင်းခဲ့ရတဲ့ 'ဆာမတ်'ဒုံးကျည်ကို ရုရှားနိုင်ငံအနောက်မြောက်ဘက် ပလဲဆက်ခ်ဒေသကနေပစ်လွှတ်ခဲ့ပြီး ၆,၀၀၀ ကီလိုမီတာနီးပါးကွာဝေးတဲ့ ကမ်ချက်ကာကျွန်းဆွယ်ရှိ ပစ်မှတ်တွေကို ထိရောက်အောင်ပစ်ခတ်နိုင်ခဲ့ပါတယ်။

ဆာမတ်ဒုံးကျည်ကို စမ်းသပ်ထုတ်လုပ်လာတာ နှစ်ပေါင်းကြာမြင့်နေပြီဖြစ်တာကြောင့် အနောက်နိုင်ငံအတွက် အံ့အားသင့်စရာမဟုတ်ခဲ့ပေမယ့် ပထဝီနိုင်ငံရေးတင်းမာမှုမြင့်မားနေတဲ့အချိန်ဖြစ်နေတာက စဉ်းစားစရာဖြစ်နေပါတယ်။

"ယခုလက်နက်အသစ်ဟာ နည်းပညာပိုင်းနဲ့ နည်းဗျူဟာပိုင်းအဆင့်အမြင့်ဆုံးလက်နက်ဖြစ်ပြီး ခေတ်ပေါ်ဒုံးကျည်ဖျက်ကာကွယ်ရေးစနစ်အားလုံးကိုလည်း ကျော်ဖြတ်နိုင်စွမ်းရှိပါတယ်။ ဒီလက်နက်နဲ့ပုံစုံတူတာမျိုး ကမ္ဘာပေါ်မှာမရှိသေးသလို အချိန်အတော်ကြာတဲ့အထိ ပေါ်ပေါက်လာမှာမဟုတ်ပါဘူး။ ဒီလို ပြိုင်ဘက်ကင်းလက်နက်ထုတ်လုပ်နိုင်တာကြောင့် ရုရှားစစ်တပ်အင်အားပိုမိုတောင့်တင်းစေမှာဖြစ်ပြီး နိုင်ငံ့လုံခြုံရေးကိုခြိမ်းခြောက်လာတဲ့ ပြင်ပရန်တွေကိုလည်း ကာကွယ်ပေးနိုင်မှာဖြစ်ပါတယ်" လို့ 'ပူတင်'က ဆိုပါတယ်။

ယူကရိန်းကို စတင်ကျူးကျော်ခဲ့စဉ်ကလည်း ရုရှားတို့ရဲ့ နျူကလီးယားလက်နက်အင်အားအကြောင်းကို 'ပူတင်' ရည်ညွှန်းပြောဆိုခဲ့ဖူးပြီး ရုရှားလမ်းစဉ်ကို ဝင်ရောက်နှောင့်ယှက်ပါက တစ်ခါမှမကြုံဖူးတဲ့ နောက်ဆက်တွဲဆိုးကျိုးတွေ ခံစားရလိမ့်မယ်လို့ အနောက်နိုင်ငံကို သတိပေးခဲ့ပါတယ်။

အဲဒီနောက် နျူကလီးယားလက်နက်တပ်ဖွဲတွေကို အထူးတပ်လှန့်ထားဖို 'ပူတင်'ကအမိန့်ပေးခဲ့ပါတယ်။
"အရင်ကနျူကလီးယားစစ်ပွဲတွေဖြစ်ပွားမယ်လို မထင်မှတ်ခဲ့ပေမယ့် အခုတော့တကယ်ဖြစ်လာနိုင်ချေရှိနေပါတယ်" လို ကုလအထွေထွေအတွင်းရေးမှူးချုပ်'အန်တိုနီယိုဂူတာရက်စ်'က ပြီးခဲ့တဲ့လက မှတ်ချက်ပြုလိုက်ပါတယ်။

ဖေဖော်ဝါရီ ၂၄ ရက်နေ့က ရုရှားစစ်အင်အားသောင်းဂဏန်းခန့်ဖြင့် ယူကရိန်းကိုစတင်ကျူးကျော်ခဲ့ပေမယ့် အဓိကမြို့ကြီးတွေကိုတော့ သိမ်းပိုက်နိုင်ခြင်းမရှိသေးတာဖြစ်ပါတယ်။

ယခု နျူကလီးယားဒုံးကျည်စမ်းသပ်မှုနဲ့ပတ်သက်ပြီး ယူကရိန်းကာကွယ်ရေးဝန်ကြီးဌာနဘက်က မှတ်ချက်ပြုပြောကြားခြင်းမရှိပါဘူး။

ဒုံးကျည်အသစ် စမ်းသပ်ထုတ်လုပ်ခြင်းပြီးမြောက်သွားတာနဲ့ ယခုနှစ်ဆောင်းဦးပိုင်းအတွင်း ရုရှားနျူကလီးယားတပ်ဖွဲ့တွေကနေ သယ်ယူပို့ဆောင်သွားမှာဖြစ်ကြောင်း ရော့စ်ကော့စ်မိုစ်အာကာသနည်းပညာဌာနမှ အကြီးအမှူး'ဒီမစ်ထရီရိုဂိုဇင်'ရဲ့ပြောကြားချက်ကို တက်စ်သတင်းဌာနကဖော်ပြခဲ့ပါတယ်။

Source: Reuters
#Yangon_Media_Group

#LocalNews
Published - 21 April 2022

နိုင်ငံတော်အတိုင်ပင်ခံပုဂ္ဂိုလ်ဟောင်း ဒေါ် အောင်ဆန်းစုကြည်အပါအဝင် နိုင်ငံရေးအကျဥ်းသားအားလုံးကို ခြွင်းချက်မရှိ အမြန်ဆုံးလွှတ်ပေးဖို့ ပြင်သစ်သံရုံးက ဒီကနေ့ ဧပြီ ၂၁ ရက်မှာ ထပ်လောင်းတောင်းဆိုလိုက်ပါတယ်။

ဒီကနေ့ဟာ သတင်းစာဆရာ ဟံသာဝတီ ဦးဝင်းတင် ကွယ်လွန်ခြင်း (၈)နှစ်ပြည့်နေ့ဖြစ်ပြီး ယနေ့တွင် ပြင်သစ်သံရုံးက အင်္ကျီအပြာဝတ်ဆင်၍ ဒေါ်အောင်ဆန်းစုကြည်အပါအဝင် ဖမ်းဆီးထားသူတွေကို လွှတ်ပေးဖို့တောင်းဆိုလိုက်တာဖြစ်ပါတယ်။

ဒီကနေ့ ထုတ်ပြန်လိုက်တဲ့ မြန်မာနိုင်ငံဆိုင်ရာ ပြင်သစ်သံရုံး၏ ထုတ်ပြန်ချက်မှာ "ယနေ့တွင် ပြင်သစ်သံရုံးသည် မြန်မာနိုင်ငံတွင် မတရားဖမ်းဆီးခံနေရသော ထောင်နှင့်ချီသည့် ပြည်သူများကို စာနာထောက်ထားကာ - ရှပ်အင်္ကျီအပြာရောင် - လှုပ်ရှားမှုကို ပူးပေါင်းဆောင်ရွက်မည်ဖြစ်ပြီး နိုင်ငံတော်သမ္မတ ဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နှင့် အမျိုးသား ဒီမိုကရေစီအဖွဲ့ချုပ်၏ ခေါင်းဆောင်များအပါအ၀င် နိုင်ငံရေးအကျဉ်းသား အားလုံးကို ခြွင်းချက်မရှိ အမြန်ဆုံးလွှတ်ပေးရန် ပြင်သစ်နိုင်ငံက ထပ်လောင်းတောင်းဆိုပါတယ်။"ဟု ဖော်ပြခဲ့တာ ဖြစ်ပါတယ်။

နိုင်ငံရေးအကျဉ်းသားဟောင်း၊ သတင်းစာဆရာ ဟံသာဝတီ ဦးဝင်းတင်ကွယ်လွန်သည့် နှစ်စဉ်တိုင်းမှာ အထိမ်းအမှတ်အဖြစ် ဦးဝင်းတင် ကွယ်လွန်ချိန်အထိ မချွတ်တမ်းဝတ်ဆင်ခဲ့တဲ့ ထောင်ဝတ်စုံ ရှပ်အင်္ကျီအပြာကိုဝတ်ဆင်ကာ နိုင်ငံရေးအကျဉ်းသားတွေအတွက် အခွင့်အရေးရရှိဖို့ တက်ကြွလှုပ်ရှားသူတွေက တောင်းဆိုလေ့ရှိကြတဲ့ နေ့တစ်နေ့ လည်းဖြစ်ပါတယ်။

ဓါတ်ပုံ - မြန်မာနိုင်ငံဆိုင်ရာ ပြင်သစ်သံရုံး

ymg/kg
#Yangon_Media_Group

#Health_Defect
Published 21 April 2022

ဘရာဇီးလ်နိုင်ငံမှာ မွေးဖွားခဲ့တဲ့ကလေးငယ်တစ်ဦးဟာ လိင်တံနှစ်ခုပါဝင်လာခဲ့ပြီး ဆရာဝန်များက ပိုကြီးတဲ့လိင်တံကို ဖြတ်တောက်ခွဲစိတ်ခဲ့ကြောင်း ဖော်ပြခဲ့ပါတယ်။

အဆိုပါဖြစ်ရပ်ဟာ အယောက် ၅ သန်းမွေးဖွားရာမှာ တစ်ယောက်ဖြစ်ပွားနိုင်တဲ့အခြေအနေဖြစ်ပြီး ဒီကလေးငယ်ရဲ့လိင်တံနှစ်ခုဟာ အရင်းကနေ ပူးပြီးတည်ရှိနေခဲ့တာဖြစ်ပါတယ်။

ဆာပေါ်လိုတက္ကသိုလ်မှဆရာဝန်များက ကလေးငယ်ရဲ့ ပိုသေးတဲ့လိင်တံကိုဖယ်ရှားဖို့ အစက စီစဉ်ခဲ့ကြပါတယ်။

ဒါပေမယ့် ပိုသေးတဲ့လိင်တံကနေပဲ ဆီးသွားနိုင်တယ်လို့ ကလေးအမေက အကြောင်းကြားခဲ့တာကြောင့် ပိုကြီးတဲ့တစ်ခုဖြတ်တောက်ပစ်ဖို့ ခွဲစိတ်ဆရာဝန်များကဆုံးဖြတ်ခဲ့ကြပါတယ်။

စမ်းသပ်စစ်ဆေးကြည့်ရာမှာလည်း ပိုကြီးတဲ့တစ်ခုက ဆီးသွားလမ်းကြောင်းဟာ ကျဉ်းလွန်းနေပြီး ပုံမှန်အလုပ်မလုပ်နိုင်ကြောင်း တွေ့ရှိခဲ့ကြပါတယ်။

ခွဲစိတ်ဆရာဝန်များက အောင်မြင်စွာဖြတ်တောက်ခွဲစိတ်နိုင်ခဲ့ပြီး အစအနလက်ရာတောင်မကျန်ခဲ့ပါဘူး။

ဒီလိုမျိုး လိင်တံနှစ်ခုဖြင့် မွေးဖွားလာတဲ့ဖြစ်ရပ်ကို diphallia လို့ခေါ်ပြီး ၁၆၀၉ ခုနှစ်က စတင်တွေ့ရှိခဲ့ကာ စုစုပေါင်းမှအယောက် ၁၀၀ လောက်သာဖြစ်ပွားခဲ့တယ်လို့ ခန့်မှန်းရပါတယ်။

မွေးဖွားလာတဲ့ယောကျ်ားအယောက် ၅ သန်း/၆ သန်းမှာ တစ်ယောက်ဖြစ်ပွားနိုင်တယ်လို့ ပညာရှင်များက သုံးသပ်ထားပါတယ်။

diphallia အခြေအနေဟာ ဘာကြောင့်ဖြစ်ပွားရသလဲဆိုတာကို မသိရှိရသေးသလို အခြားအန္တရာယ်ဖြစ်နိုင်/မဖြစ်နိုင်ဆိုတာကိုလည်း ရှင်းရှင်းလင်းလင်း မသိရသေးပါဘူး။

ဖြစ်ပေါ်လာပုံကတော့ မိခင်ဝမ်းထဲရှိနေစဉ် လိင်အင်္ဂါဖွံဖြိုးလာတဲ့အချိန်မှာ ဖြစ်ပေါ်လာတာဖြစ်နိုင်ပါတယ်။

လိင်တံနှစ်ခုစလုံး ကောင်းစွာဖွံ့ဖြိုးတဲ့ဖြစ်စဉ်ကို diphallia လို့ခေါ်ပြီး တစ်ခုကအလုပ်မလုပ်တဲ့ဖြစ်စဉ်ကိုတော့ partial diphallia လို့ ခေါ်လေ့ရှိပါတယ်။

ဥဇဘက်ကစ္စတန်မှာ မွေးဖွားခဲ့တဲ့ကလေးဆိုရင် လိင်တံနှစ်ခုစလုံး ပုံမှန်အလုပ်လုပ်နေကြောင်း ယခုလအစောပိုင်းက MailOnline ကနေဖော်ပြခဲ့ပါတယ်။

အဆိုပါကလေးဟာ လိင်တံနှစ်ခုဖြင့် ၇ နှစ်တာနေထိုင်လာခဲ့ပြီး မသက်မသာဖြစ်တာမျိုး မခံစားရကြောင်းနဲ့ နှစ်ခုစလုံးကနေ ဆီးသွားနိုင်ကြောင်း ဖော်ပြထားပါတယ်။

Source: DailyMail
#Yangon_Media_Group

#LocalNews
Published - 21 April 2022

တရုတ်-မြန်မာ နိုင်ငံတကာလမ်းကြောင်းကြီး၏ အဓိကအစိတ်အပိုင်းဖြစ်တဲ့ ယူနန်ပြည်နယ် တာလီ-ရွှေလီရထားလမ်း၏ ပေါင်တွမ်းလမ်းပိုင်းတည်ဆောက်မှုသည် ကြီးမားသည့်တိုးတက်မှုရရှိခဲ့ကာ ပေါင်စန်းလိုဏ်ခေါင်းအား ဧပြီလ ၁၉ ရက်နေ့က ဘေးကင်းအောင်မြင်စွာဖြင့်ဖောက်လုပ်ပြီးစီးခဲ့ပြီဖြစ်တယ်လို့ မြန်မာနိုင်ငံဆိုင်ရာ တရုတ်သံရုံးက သတင်းထုတ်ပြန်ခဲ့ပါတယ်။

ထို့ကြောင့် တာလီ-ရွှေလီ ရထားလမ်းတစ်လျှောက် လိုဏ်ခေါင်း (၄၄)ခုတွင် လိုဏ်ခေါင်း (၂)ခုသာကျန်ရှိပြီး (၁၀)ကီလိုမီတာနှင့်အထက်တွင် လိုဏ်ခေါင်းတစ်ခုသာကျန်ရှိတော့ကြောင်းနှင့် ရထားလမ်းကြောင်းတစ်ခုလုံးအား အချိန်မီတည်ဆောက်ပြီးစီးနိုင်ရေးအတွက် ခိုင်မာသည့်အခြေခံအုတ်မြစ်ချပေးနိုင်ခဲ့ပြီဖြစ်တယ်လို့ တရုတ်သံရုံးက ဆိုပါတယ်။

အဆိုပါ လိုဏ်ခေါင်းလမ်း ဖောက်လုပ်မှုကို ဆောက်လုပ်သူများမှ (၆)နှစ်ကြာ ခက်ခဲကြမ်းတမ်းစွာကြိုးပမ်းခဲ့ပြီးနောက် တရုတ်-မြန်မာ နိုင်ငံတကာလမ်းကြောင်းကြီးဖြစ်သော ယူနန်ပြည်နယ် တာလီ-ရွှေလီရထားလမ်း၏ ဖူဖျောင်းမြို့နယ်မှ နုကျန်းမြစ် အရှေ့ဘက်ကမ်းအထိ အလွန်ရှည်လျားသော ဥမင်လိုဏ်ခေါင်းအုပ်စုကို တည်ဆောက်နိုင်ခဲ့ခြင်းဖြစ်တယ်လို့ သိရပါတယ်။

တာလီ-ရွှေလီရထားလမ်းသည် စုစုပေါင်း (၃၃၀) ကီလိုမီတာ ရှည်လျားပြီး တံတားနှင့်ဥမင်လိုဏ်ခေါင်း (၇၆)ရာခိုင်နှုန်း အထိ ပါဝင်တည်ဆောက်ခဲ့ရတာဖြစ်ပါတယ်။

ထို့အပြင် လမ်းတစ်လျှောက်လုံးကို တာလီမှ ပေါင်စန်း၊ ပေါင်စန်းမှ ရွှေလီ အပိုင်းခွဲ ဆောက်လုပ်မှုပုံစံဖြင့်ဆောင်ရွက်ပြီး ၎င်းအနက် တာလီမှ ပေါင်စန်းအပိုင်းကို ယခုနှစ်အတွင်း စတင်ဖွင့်လှစ်လည်ပတ်နိုင်မည်ဟု ခန့်မှန်းရကြောင်း မြန်မာနိုင်ငံဆိုင်ရာ တရုတ်သံရုံး၏ သတင်းထုတ်ပြန်ချက်မှာ ဖော်ပြခဲ့ပါတယ်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး

ymg/kg
#Yangon_Media_Group

#WorldHealth
Published 21 April 2022

ကိုဗစ်ကာကွယ်ဆေးမထိုးနှံရသေးတဲ့လူတွေမှာ အိုမီခရွန်မျိုးဗီဇကွဲကူးစက်ခြင်းဖြင့် ခန္ဓာကိုယ်ခုခံအားစနစ်ကိုထိခိုက်စေပြီး ကိုရိုနာဗိုင်းရပ်စ်ရဲ့အခြားမျိုးဗီဇကွဲကူးစက်မှုတွေကို ကာကွယ်ပေးနိုင်စွမ်းနည်းပါးသွားကြောင်း လေ့လာတွေ့ရှိချက်အသစ်တစ်ခုမှာ ဖော်ပြထားပါတယ်။

ကိုဗစ်ကာကွယ်ဆေးထိုးနှံပြီးရရှိတဲ့ ပဋိပစ္စည်း(antibody)ထွက်ရှိမှု သို့မဟုတ် အရင် SARS-CoV-2 ဗိုင်းရပ်စ်မျိုးဗီဇကွဲကူးစက်မှုတွေကရတဲ့ ပဋိပစ္စည်းတွေနဲ့မတူတဲ့အချက်က အိုမီခရွန် BA.1, BA.2 မျိုးဗီဇကွဲကူးစက်မှုများမှရရှိတဲ့ ပဋိပစ္စည်းတွေဟာ ဗိုင်းရပ်စ်ရဲ့အခြားမျိုးဗီဇကွဲကူးစက်မှုတွေကို မကာကွယ်ပေးနိုင်ကြောင်း သုတေသီတွေက အိုမီခရွန်ကူးစက်ထားတဲ့ သွေးနမူနာများကိုစစ်ဆေးကြည့်ပြီး သိရှိခဲ့ကြပါတယ်။

ဗိုင်းရပ်စ်ရဲ့ အရင်မျိုးဗီဇကွဲတွေကို ကာကွယ်ပေးနိုင်ဖို့ထုတ်လုပ်ထားတဲ့ mRNA ကာကွယ်ဆေး ၃ ကြိမ်ထိုးပြီးနောက် အိုမီခရွန်ကူးစက်ခဲ့တဲ့လူတွေဟာ အိုမီခရွန်ရဲ့နောက်ထပ်မျိုးဗီဇကွဲနှစ်မျိုးကိုကာကွယ်နိုင်မယ့် ပဋိပစ္စည်းတွေအများအပြားထွက်ရှိနိုင်ပေမယ့် အရင် SARS-CoV-2 ဗိုင်းရပ်စ်မျိုးဗီဇကွဲတွေကိုတော့ ကာကွယ်နိုင်စွမ်းနည်းပါးကြောင်း Nature Portfolio မှာဖော်ပြထားပါတယ်။

ကာကွယ်ဆေးထိုးနှံခြင်း သို့မဟုတ် ကိုဗစ်ရောဂါကူးစက်ခြင်းမှရရှိတဲ့ခုခံအားစနစ်က အိုမီခရွန်ကူးစက်ပြီးနောက် ထွက်လာတဲ့ပဋိပစ္စည်းတွေဟာ အိုမီခရွန်မျိုးဗီဇကွဲတွေကိုသာ သီးသန့်ကာကွယ်ပေးနိုင်ပြီး အိုမီခရွန်မဟုတ်တဲ့မျိုးဗီဇကွဲတွေကိုကာကွယ်နိုင်မယ့် ပဋိပစ္စည်းတွေတော့ ထွက်ပေါ်လာခြင်းမရှိကြောင်း ဩစတြီးယား ဗီယင်နာဆေးပညာတက္ကသိုလ်မှ'ကာရင်စတီယက်စနီ'နဲ့ 'ဂျူဒီတီအဘာလေ'တို့က ပြောပြခဲ့ပါတယ်။

BA.2 ကူးစက်မှုမှရရှိတဲ့ ပဋိပစ္စည်းတွေဟာ အခြားမျိုးဗီဇကွဲတွေကို ကာကွယ်ပေးနိုင်ဖွယ်မရှိဘူးလို့ ဖော်ပြထားပါတယ်။

လေ့လာချက်ထဲမှာတော့ ကိုယ်ခံအားစနစ်ကောင်းမွန်ဖို့ အားမြှင့်ကာကွယ်ဆေး(booster)တွေ အရေးကြီးကြောင်း အလေးထားဖော်ပြထားပါတယ်။

Source: Reuters
#Yangon_Media_Group

#Local_News
Published_ 21 April 2022

မလေးရှားနိုင်ငံက မြန်မာနိုင်ငံသို့လှူဒါန်းသော Astrazeneca အမှတ်တံဆိပ် ကိုဗစ်-၁၉ ရောဂါကာကွယ်ဆေး ၅ သိန်း doses သည် ဧပြီ ၂၀ ရက်နေ့ နံနက်ပိုင်းတွင် ကွာလာလမ်ပူလေဆိပ်မှ ရန်ကုန်အပြည်ပြည်ဆိုင်ရာ လေဆိပ်သို့ ရောက်ရှိလာခဲ့ပါတယ်။

မလေးရှားနိုင်ငံက လှူဒါန်းသည့် Astrazeneca ကိုဗစ်-၁၉ ရောဂါ ကာကွယ်ဆေးများအား Malaysia-Myanmar Business Clamber(MMBC) ဥက္ကဌ Ms. Loi Jin Choo ၊ မြန်မာနိုင်ငံဆိုင်ရာ မလေးရှားသံရုံးမှ Counsellor, Mr. Muhammad Syukri Bin Azmi နှင့် တာဝန်ရှိသူများက ရန်ကုန်တိုင်းဒေသကြီး၊ ပြည်သူ့ကျန်းမာရေးနှင့် ကုသရေးဦးစီးဌာနမှူး ဒေါက်တာထွန်းမင်းနှင့် တာ၀န်ရှိသူများထံ လွှဲပြောင်းပေးအပ်ခဲ့ပါတယ်။

ရောက်ရှိလာတဲ့ ကာကွယ်ဆေးများကို မရမ်းကုန်းမြို့နယ် မင်းဓမ္မလမ်းရှိ ပြည်သူ့ကျန်းမာရေးဦးစီးဌာန၊ ဗဟိုကာကွယ်ဆေးသိုလှောင်ခန်းတွင် အအေးလမ်းကြောင်းမပြတ် သိုလှောင်ထားရှိမှာ ဖြစ်ပါတယ်။

အဆိုပါ Astrazeneca ကိုဗစ်-၁၉ ရောဂါ ကာကွယ်ဆေးများကို နေပြည်တော် ကောင်စီနယ်မြေ၊ တိုင်းဒေသကြီးနှင့် ပြည်နယ်များသို ဆက်လက်ဖြန့်ဝေသွားမည်ဖြစ်ကြောင်းနှင့် ဦးတည်အုပ်စုအလိုက် ပြည်သူ့ဆေးရုံများနှင့် ကာကွယ်ဆေးထိုးစုရပ်များတွင် ထိုးနှံပေးသွားမယ်လို့ ဆိုပါတယ်။

မြန်မာနိုင်ငံတွင် ကိုဗစ်-၁၉ ရောဂါ ကာကွယ်ဆေးထိုးနှံပြီးစီးမှုအနေဖြင့် ယနေ့အထိ ကာကွယ် ဆေးတစ်ကြိမ်နှင့်အထက် ထိုးနှံပြီးသူဦးရေ ၂၈ ဒသမ ၉၇ သန်းကျော်ရှိပြီး ထပ်ဆောင်းကာကွယ်ဆေး ၁ ဒသမ ၂ သန်း doses ထိုးနှံပြီးဖြစ်ရာ ကာကွယ်ဆေး doses ပေါင်း ၅၂ ဒသမ ၆၅ သန်းကျော် ထိုးနှံပြီးစီးပြီးဖြစ်ကြောင်း သိရပါတယ်။

ymg-mnn
#Yangon_Media_Group.

#Local_News
Published_ 21 April 2022

အဂတိလိုက်စားမှု တိုက်ဖျက်ရေးဥပဒေအရ တရားစွဲဆိုခံရသည့် ကျန်းမာရေးနှင့် အားကစားဝန်ကြီးဌာန၊ ပြည်သူ့ကျန်းမာရေးဦးစီးဌာန၊ ညွှန်ကြားရေးမှူး ဒေါက်တာ ထားထားလင်းကို အလုပ်နှင့်ထောင်ဒဏ် ၃ နှစ် နှင့် ညွှန်ကြားရေးမှူးချုပ်(ငြိမ်း) ဒေါက်တာ စိုးဦးကို အလုပ်နှင့်ထောင်ဒဏ် ၂ နှစ် ကျခံစေရန် အမိန့်ချမှတ်လိုက်ကြောင်း အဂတိ လိုက်စားမှု တိုက်ဖျက်ရေးကော်မရှင်ရဲ့ သတင်းထုတ်ပြန်မှုအရ သိရပါတယ်။

ကျန်းမာရေးနှင့် အားကစားဝန်ကြီးဌာန၊ ပြည်သူ့ကျန်းမာရေးဦးစီးဌာန၊ ညွှန်ကြား
ရေးမှူး ဒေါက်တာထားထားလင်းနှင့် တာဝန်ရှိသူများအပေါ် အဂတိလိုက်စားမှု တိုက်ဖျက်ရေးဥပဒေနှင့်အညီ အရေးယူပေးပါရန် တိုင်ကြားခြင်းနှင့်စပ်လျဉ်း၍ အဂတိ လိုက်စားမှု တိုက်ဖျက်ရေးကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့တာဖြစ်တယ်လို့ ဖော်ပြထားပါတယ်။

ကျန်းမာရေးနှင့် အားကစားဝန်ကြီးဌာန၊ ပြည်သူ့ကျန်းမာရေးဦးစီးဌာန၊ ညွှန်ကြားရေးမှူး ဒေါက်တာ ထားထားလင်းသည် GAVI HSS2 Grant (Global Alliance for Vaccines and Immunization-Health System Strengthening 2) ဖြင့် ဆောင်ရွက်သော လုပ်ငန်းများနှင့်ပတ်သက်၍ စီမံချက်မန်နေဂျာအဖြစ် ဆောင်ရွက်စဉ် ညွှန်ကြားချက်ကို လိုက်နာဆောင်ရွက်ခြင်းမရှိသဖြင့် နိုင်ငံတော်၏ ဘဏ္ဍာငွေကျပ် ၁၆၁ ဒသမ ၁၉၈ သန်းကို နစ်နာဆုံးရှုံးစေခဲ့ခြင်းကြောင့် ဒေါက်တာ ထားထားလင်းအပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၆ အရ တရားစွဲဆိုခဲ့တာဖြစ်ပါတယ်။

ထို့ပြင် ညွှန်ကြားရေးမှူးချုပ် ဒေါက်တာစိုးဦးသည် GAVI HSS2 Grant ဖြင့် ဆောင်ရွက်သည့်လုပ်ငန်းများတွင် တာဝန်ယူကြီးကြပ်ပြီး စီမံခန့်ခွဲရသူဖြစ်သည့် အလျောက် နိုင်ငံတော်၏ ငွေကြေးနစ်နာဆုံးရှုံးစေသည့် ဒေါက်တာထားထားလင်း၏ ဆောင်ရွက်မှုတွင် ကြီးကြပ်စစ်ဆေးရန် ပျက်ကွက်ခြင်း၊ စီမံခန့်ခွဲရန် ပျက်ကွက်ခြင်း တို့သည် နိုင်ငံတော်ဘဏ္ဍာငွေများ နစ်နာဆုံးရှုံးရန်အတွက် အားပေးကူညီမှုကို ဖြစ်စေခဲ့ခြင်းကြောင့် ဒေါက်တာစိုးဦးအပေါ် ယင်းဥပဒေပုဒ်မ ၅၆/၆၃ အရလည်းကောင်း မန္တလေးတိုင်းဒေသကြီး တရားလွှတ်တော်တွင် ၂၀၂၁ ခုနှစ် ဒီဇင်ဘာ ၁၅ ရက်၌ တရားစွဲဆိုတင်ပိုခဲ့ရာ ရာဇဝတ်ကြီးမှုအမှတ် ၃၆/၂၀၂၁ ဖြင့် လက်ခံစစ်ဆေးခဲ့ခြင်းဖြစ်တယ်လို့ သတင်းထုတ်ပြန်ချက်တွင် ဖော်ပြထားပါတယ်။

ymg-mnn
#Yangon_Media_Group.