#LocalNews
Published_20 April 2022

မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု) မြို့နယ်အတွင်း၌ ယနေ့ ဧပြီလ ၂၀ ရက် ညနေပိုင်းက လေပြင်းတိုက်ခတ်မှုများကြောင့် လူနေအိမ် (၂)နှစ်လုံးပြိုလဲသွားကာ အလုံး(၅၀) အမိုးလန်ပျက်စီးသွားကြောင်း သိရသည်။

ယင်းအပြင် သစ်ပင်ကြီးငယ်များ၊ဆက်သွယ်ရေးတာဝါတိုင်များ၊လျှပ်စစ်မီးတိုင်များလည်း ကျိုးကျပြိုလဲမှုများ ဖြစ်ခဲ့ရကြောင်း ၊ မင်းဘူးမြို့ အမှတ်(၁)ရပ်ကွက်မှ နေအိမ် ၂ လုံး၊ စကုမြို့ အမှတ်(၁)ရပ်ကွက်မှ နေအိမ် ၄ လုံး၊ ကံသာကျေးရွာမှ နေအိမ် ၄ လုံး၊ ကံကုလားကျေးရွာမှ နေအိမ် အလုံး(၃၀)၊ တောင်မန်းကျေးရွာမှ နေအိမ်တစ်လုံး၊ ကြာကန်ကျေးရွာမှ နေအိမ် ၃ လုံး၊ ဆင်ခေါင်းကျေးရွာမှ နေအိမ် ၄ လုံး၊ ကျောက်တန်းကျေးရွာမှ နေအိမ်တစ်လုံးနှင့် ကဒီးကျေးရွာတွင် နေအိမ် ၂ လုံး ပြိုလဲကာ နေအိမ်တစ်လုံးအမိုးလန်ပျက်စီးခဲ့ကြောင်း မြို့နယ်အထွေထွေအုပ်ချုပ်ရေးဦးစီးဌာနက သိရသည်။

လေပြင်းတိုက်ခတ်မှုများရှိခဲ့သော်လည်း လူနှင့်တိရိစ္ဆာန် ထိခိုက်သေဆုံးမှုမရှိခဲ့ပေ။

ymg/mt
#Yangon_Media_Group

#WorldAutomotive
Published 20 April 2022

အမေရိကန်ပြည်ထောင်စုမှာ လျှပ်စစ်ကားများရေပန်းစားလျက်ရှိပြီး လောင်စာဆီဈေးနှုန်းမြင့်တက်လာမှုကြောင့် ကားပိုင်ရှင်တွေက စီးပွားရေးအရတွက်ချေကိုက်စေဖို့ လျှပ်စစ်ကားများကိုစိတ်ဝင်စားလာကြကြောင်း နယူးယော့ခ် နိုင်ငံတကာမော်တော်ကားပြပွဲမှ ပြသသူများက ပြောကြားလိုက်ပါတယ်။

#Yangon_Media_Group

Published 20 April 2022

အီရတ်နိုင်ငံဟာ နှစ်ပတ်အတွင်းမှာ ဖုန်မှုန်မုန်တိုင်း တတိယအကြိမ်မြောက် တိုက်ခတ်ခြင်းခံရပါတယ်။အဲဒါကြောင့်  ဘဂ္ဂဒက်နှင့် နာဂျက်ဖ် အကြားပျံသန်းနေတဲ့ လေယာဉ်တွေအားလုံး ရပ်နားထားရပါတယ်။ ဒါဟာ ရာသီဥတုဖြစ်စဉ်တွေ အကြိမ်ကြိမ်ဖြစ်မှုတွေ များပြားလာနေတဲ့ အရိပ်အယောင်တွေပဲဖြစ်ပါတယ်။

Source AFP

Published 20 April 2022

တရုတ်နိုင်ငံ၊  ဟွာလောင်းဝမ်းဓာတ်ပေါင်းဖိုက တည်ဆောက်တဲ့  တတိယမျိုးဆက်သစ် နျူကလီးယားဓာတ်ပေါင်းဖိုက ထုတ်လုပ်ပေးတဲ့ နျူကလီးယားလျှပ်စစ်ဓါတ်အားပေးစက်ရုံ ပါကစ္စတန်နိုင်ငံမှာ ဧပြီ၁၈ရက် တနင်္လာနေ့က စတင်လည်ပတ်နေပြီဖြစ်ပါတယ်။

ကရာချိယူနစ်(၃) လို့အမည်ပေးထားတဲ့ အဆိုပါစက်ရုံဟာ ဟွာလောင်းဓာတ်ပေါင်းဖိုအသုံးပြုပြီး  ကမ္ဘာအနှံ့ တည်ဆောက်တဲ့  နျူကလီယားဓာတ်အားပေးစက်ရုံတွေထဲမှာ စတုတ္ထမြောက်ဖြစ်ပါတယ်။ကရာချိယူနစ်(၂)နှင့်(၃)တို့ဟာ ဟွာလောင်းဝမ်းက တည်ဆောက်ပေးတာဖြစ်ပြီး ပါကစ္စတန်နိုင်ငံမှာလျှပ်စစ်ဓာတ်အား ၂၀ ဘီလီယံကီလိုဝပ်နာရီ ထုတ်လုပ် ပေးတော့မှာဖြစ်တယ်လို့ တရုတ်အမျိုးသား နျူကလီးယားကော်ပိုရေးရှင်း (CNNC) ကပြောပါတယ်။

ဟွာလောင်းဝမ်းဓာတ်ပေါင်းဖိုရဲ့ ပင်မအစိတ်အပိုင်းတွေအားလုံးကို တရုတ်နိုင်ငံက ထုတ်လုပ်တာဖြစ်ပါတယ်။ ဓာတ်ပေါင်းဖိုရဲ့ ဒီဇိုင်းအရ သက်တမ်းဟာ နှစ်ပေါင်း ၆၀ရှိပြီး ကမ္ဘာ့အန္တရာယ်ကင်းရှင်းရေးစံနှုန်းတွေနှင့် အညီတည်ဆောက်ထားပါတယ်လို့ ကုမ္ပဏီကပြောပါတယ်။

ဒီစီမံကိန်းက ပါကစ္စတန်ရဲ့စီးပွားရေးနှင့်ဆက်စပ်စီးပွားရေးလုပ်ငန်းတွေကို မြှင့်တင်ပေးရာမှာ အကူအညီဖြစ်စေပါလိမ့်မယ်။

ဟွာလောင်းဝမ်းရဲ့ နျူကလီးယားဓာတ်အားပေးစက်ရုံ (၂)ရုံဟာ တရုတ်နိုင်ငံမှာ လည်ပတ်နေတာဖြစ်ပါတယ်။

Source CMG

#LocalNews
Published_20 April 2022

ရခိုင်ပြည်နယ်တစ်ခုလုံးသို့ သင်္ကြန်ကာလအတွင်းမှာ လေကြောင်းနဲ့ ဝင်လာတဲ့ ခရီးသည် တစ်သောင်းခြောက်ထောင်ကျော်ရှိတယ်လို့ ဟိုတယ်နှင့် ခရီးသွားလာရေးဝန်ကြီးဌာနက သိရပါတယ်။

#Yangon_Media_Group

#LocalNews
Published_20 April 2022

မဲသဝေါဒေသကို စစ်မီးပွားမကျရောက်လာစေဖို့ ထိုင်းနယ်ခြားစောင့်တပ်၊ မြန်မာဘက်က နစက မဲသဝေါအခြေစိုက်တပ်နဲ့ ကရင်အမျိုးသားလွတ်မြောက်ရေးတပ်မတော် (KNLA) တို့ လုပ်ဆောင်နေကြတယ်လို့ သိရပါတယ်။

#Yangon_Media_Group

#LocalNews
Published - 20 April 2022

မြန်မာနိုင်ငံအတွင်း ဧပြီလ ၁၇ ရက်နေ့ နှစ်ဆန်းတစ်ရက်နေ့ကစတင်ပြီး ပြည်ပလေကြောင်းခရီးစဉ်တွေကို စတင်ခွင့်ပြုလိုက်တဲ့အတွက် လာရောက်မယ့် ခရီးသည်တွေအနေနဲ့ လက်မှတ်ဝယ်ရာမှာ ကော်မာရှယ်လေယာဉ်နဲ့ ကယ်ဆယ်ရေးလေယာဉ် ကွဲပြားစွာ ဝယ်ယူဖို့လိုပါတယ်။

#Yangon_Media_Group

#LocalNews
Published - 20 April 2022

ကချင်ပြည်နယ်အတွင်းရှိ ပူတာအိုဒေသတွင် ဓါတ်ဆီတစ်ဂါလံလျှင် ၁၂,၀၀၀ ကျပ်အထိ ပေါက် ဈေးရှိနေပြီး ဓါတ်ဆီရရှိဖို့အတွက် ဒေသခံများက ဆီဆိုင်များမှာအလုအယက်ဝယ်ယူနေကြရတယ်လို့ သိရပါတယ်။

#Yangon_Media_Group

#LocalNews
Published -20 Apr 2022

ရန်ကုန်တိုင်းဒေသကြီးအတွင် အများပြည်သူသုံးယာဉ်လိုင်းအချို့နေရာတွင် လျှပ်စစ်ကားများဝင်ရောက်ပြေးဆွဲရေးအတွက် ရန်ကုန်တိုင်းဒေသကြီးပုဂ္ဂလိကသယ်သယ်ယူပို့ဆောင်ရေး ကြီးကြပ်မှု ကော်မတီ YRTA ကနေ ယာဉ်လိုင်းကုမ္ပဏီအချို့ကိုဆက်သွယ်မေးမြန်းပြီး သဘောထားတောင်းခံတယ်လို့ သိရပါတယ်။

အဆိုပါ သဘောထားတောင်းခံမှုကို ဖုန်းဖြင့်ဆက်သွယ်ပြောဆိုတာဖြစ်ပြီး မည်သည့်ယာဉ်အမျိုးအစားမည်သည့်ကုမ္ပဏီက လုပ်ကိုင်ဆောင်ရွက်မယ်ဆိုတာကိုတော့ တရားဝင်စာရွက်စာတမ်းနဲ့အကြောင်းကြားတာမျိုးမရှိဘူးလို့ ရန်ကုန်မြို့တွင်းပြေးဆွဲနေတဲ့ ယာဉ်လိုင်းကုမ္ပဏီ တစ်ခုကနေသိရပါတယ်။

"ဘာကားအမျိုးအစားလည်း ဘယ်နှစ်ယောက်ဆံ့တာလည်း ဘယ်သူလုပ်မှာလည်းဆိုတာမသိရပါဘူး ဖုန်းနဲ့ဆက်သွယ်မေးမြန်းပြီး သဘောထားတောင်းခံတာပဲ စာရွက်စာတမ်းမပေးပါဘူးသဘောထားသိချင်တယ်ပဲပြောတယ် ကုမ္ပဏီဘက်ကတော့ ဒါရိုက်တာအဖွဲ့ဝင်တွေနဲ့ တွေ့ဆုံပြီးမှ သဘောထားအကြောင်းပြန်ပေးမယ်ပြောထားတယ်"လို့ ယာဉ်လိုင်းကုမ္ပဏီတစ်ခုမှ တာဝန်ရှိသူတစ်ဦးက ပြောပါတယ်။

မတ်လ ၂၉ ရက်နေ့ကပြုလုပ်တဲ့ နိုင်ငံတော်စီမံအုပ်ချုပ်ရေးကောင်စီအစည်းအဝေးမှာ ဗိုလ်ချုပ်မှူးကြီး မင်းအောင်လှိုင်က မိမိတို့နိုင်ငံမှာ လက်ရှိအသုံးပြုနေတဲ့ မီးရထားနဲ့မော်တော်ယာဉ်တွေမှာ လျှပ်စစ်ကားနဲ့ လျှပ်စစ်ရထားတွေ အစားထိုးသုံးစွဲပါက စက်သုံးဆီသုံးစွဲမှုကို လျော့ချချွေတာနိုင်မယ်လို့ ပြောပါတယ်။

ပြည်ပကတင်သွင်းတဲ့ လောင်စာဆီတွေကို ပို့ဆောင်ဆက်သွယ်ရေးကဏ္ဍမှာ ၇၂ ရာခိုင်နှုန်း၊ စက်မှုကဏ္ဍမှာ ၂၆ ရာခိုင်နှုန်းနဲ့ လျှပ်စစ်ထုတ်လုပ်ရေးကဏ္ဍမှာ ၁ ရာခိုင်နှုန်းသာ အသုံးပြုနေပြီး လျှပ်စစ်ကား၊ လျှပ်စစ်ရထားတွေ အစားထိုးသုံးစွဲပါက စက်သုံးဆီသုံးစွဲမှုတွေ ချွေတာနိုင်မယ်လို့ ဗိုလ်ချုပ်မှူးကြီး မင်းအောင်လှိုင်က ပြောပါတယ်။

ဒါ့အပြင် Public Transportations ကိစ္စရပ်တွေမှာ လျှပ်စစ်ကို အသုံးပြုနိုင်မယ်ဆိုပါက နိုင်ငံအတွက် များစွာအကျိုးရှိမှာဖြစ်တယ်လို့လည်း ဗိုလ်ချုပ်မှူးကြီး မင်းအောင်လှိုင်က ထပ်လောင်းပြောကြားခဲ့ပါတယ်။

ymg/hm
#Yangon_Media_Group

#LocalNews
Published - 20 April 2022

ဒီကနေ့ ဧပြီ ၂၀ ရက်၊ နံနက်ပိုင်းအချိန်က ရန်ကုန်တိုင်းဒေသကြီး၊ မင်္ဂလာဒုံမြို့နယ် အတွင်းမှာ
ပရိုဘောက်တက္ကစီယာဥ်နှင့် ဘေးတွဲဆိုင်ကယ်တိုက်မိမှုဖြစ်ပွားပြီး လူတစ်ဦး ထိခိုက်ဒဏ်ရာရရှိခဲ့တယ်လို့ သိရပါတယ်။

အဆိုပါ ယာဥ်မတော်တဆမှုဖြစ်စဥ်ဟာ မင်္ဂလာဒုံမြို့နယ်၊ Terminal စက်သုံးဆီဆိုင်ဘေးလမ်းကြား သဃန်းကျွန်းကြီးကျေးရွာအုပ်စု ဇောတိကလမ်းထိပ်တွင် ဖြစ်ပွားခဲ့ခြင်းဖြစ်တယ်လို့ ဆိုပါတယ်။

ယာဥ်တိုက်မှုဖြစ်ပွားရာသို့ ဒေသခံလူမှုကယ်ဆယ်ရေးအဖွဲ့ဖြစ်တဲ့ ပုလဲအရန်မီးသတ်တပ်ဖွဲ့မှ သွားရောက်၍ ကူညီကယ်ဆယ်ရေးလုပ်ငန်းများကို ဆောင်ရွက်ပေးခဲ့ရတာပါ ။

ဒါ့အပြင် ယာဥ်တိုက်မှုကြောင့် ဦးခေါင်းကွဲဒဏ်ရာရရှိခဲ့သည့် လူနာအမျိုးသားကိုလည်း မေဓါဝီ ဆေးရုံသို့ ပို့ဆောင်ကူညီပေးခဲ့ကြောင်း ပုလဲအရန်မီးသတ်တပ်ဖွဲ့မှ သတင်းထုတ်ပြန်ခဲ့ပါတယ်။

Photo - ပုလဲအရန်မီးသတ်တပ်ဖွဲ့

ymg/kg
#Yangon_Media_Group

#LocalNews
Published - 20 April 2022

ပုဂံဒေသသို့ ပြည်ပဧည့်သည် ကမ္ဘာလှည့် ခရီးသည်များ ပြန်လည် ဝင် ရောက်လာဖို အဆိုပါ ဒေသရှိ ခရီးသွားလုပ်ငန်း လုပ်ကိုင်သူများက မျှော်မှန်းထားကြပါတယ်။

လေကြောင်းလိုင်းတွေ ပြန်လည်ဖွင့်လှစ်ပြီးနောက်ပိုင်း မြန်မာနိုင်ငံကို နိုင်ငံခြားသားဧည့်သည်တွေ ပြန်လည်ဝင်ရောက်လာခဲ့ပြီး (၃)ရက်အတွင်း နိုင်ငံခြားသားဧည့်သည်တွေ အပါအဝင် ခရီးသည် (၁,၁၀၀)ကျော် ဝင်‌ရောက်ခဲ့တယ်လို့ ယနေ့ ဧပြီ ၂၀ ရက်ထုတ် နိုင်ငံပိုင်သတင်းစာမှာ ဖော်ပြထားပါတယ်။

ပြီးခဲ့တဲ့ သင်္ကြန်ရုံးပိတ်ရက်ကာလအတွင်းမှာ ပုဂံဒေသသို့ ပြည်တွင်းခရီးသွား အများအပြားဝင် ရောက်ခဲ့သော်လည်း ပြည်ပခရီးသွားဧည့်သည်တွေကတော့ အနည်းအကျင်းသာရှိခဲ့တာ ဖြစ်ပါတယ်။

"ပုဂံကို ဧည့်သည်တွေကလာကြတယ်။ ဒါပေမယ့် Local ပဲများတာပေါ့နော် နိုင်ငံခြားသားဧည့်သည်သိပ်မရှိဘူး။ အခုက လေကြောင်းလိုင်းတွေကို ပြန်ဖွင့်ပေးလိုက်ပြီဆိုတော့ တစ်ချက် တော့ စောင့်ကြည့်ရအုံးမှာပေါ့ ။ ပြည်တွင်း၊ ပြည်ပ ဧည်သည့်တွေလာမှလည်း ဒေသခံတွေရဲ့ အလုပ်အကိုင်တွေ အဆင်ပြေသလို ခရီးသွားလုပ်ငန်းတွေလည်း အဆင်ပြေတာကိုး နိုင်ငံခြားသား အများစု မြန်မာကိုလာပြီဆိုရင် ပုဂံဒေသကို ရောက်အောင်လာကြတော့ ပြည်ပခရီးသွားကို မျှော်ရတာပေါ့။ နောက်ပိုင်း ပြည်တွင်းခရီးသွားတင်မကဘူး၊ ပြည်ပခရီးသွားတွေပါ ပုဂံဒေသကို ပြန်ဝင်လာမယ်လို့ မျှော်လင့်ထားပါတယ်။"လို့ ပုဂံဒေသရှိ ခရီးသွားလုပ်ငန်း လုပ်ကိုင်သူတစ်ဦးက ပြောပြခဲ့ပါတယ်။

ပြီးခဲ့တဲ့ နှစ်နှစ်တာကာလအတွင်းမှာ ကိုဗစ်ကပ်ရောဂါအခြေအနေနဲ့ နိုင်ငံရေးဖြစ်စဉ် အခြေ
အနေ အချို့ကြောင့် ပုဂံဒေသသို့ ခရီးသွားဝင်ရောက်မှုတွေ သိသိသာသာကျဆင်းသွားခဲ့ရတာဖြစ်ပါတယ်။

သို့သော်လည်း ယခုနှစ်ပိုင်းမှစတင်ပြီး ပုဂံဒေသသို့ ပြည်တွင်းခရီးသွားတွေ ပြန်လည်ဝင်ရောက်မှု တွေ ရှိလာတာပါ။

ဒါ့အပြင် ယခု သင်္ကြန်ရုံးပိတ်ရက်ကာလအတွင်းမှာလည်း ဟိုတယ်၊မိုတယ်တွေ ပြည့်သည်အထိ ပုဂံဒေသသို့ ပြည်တွင်းခရီးသွားများ စံချိန်တင်ဝင်ရောက်ခဲ့ပြီး (၉၀)ရာခိုင်နှုန်းကျော်အထိ ခရီးသွား တွေ ပြန်လည်မြင့်တက်ခဲ့တာဖြစ်ပါတယ်။

ထို့အပြင် ပုဂံဒေသဟာ ပြည်တွင်း၊ ပြည်ပ ခရီးသွားများကိုသာ အဓိက မှီခိုအားထားနေရတဲ့ ခရီးသွားဒေသတစ်ခုလည်း ဖြစ်ပါတယ်။

ymg/kg
#Yangon_Media_Group

#DailyNews
Published -20 April 2022

၁။ ပူတာအိုဒေသတွင် ဓါတ်ဆီတစ်ဂါလံလျှင် ၁၂,၀၀၀အထိ ပေါက်ဈေးရှိနေပြီး အလုအယက်ဝယ်ယူနေကြရ

၂။ မြန်မာနိုင်ငံတွင်းဝင်ရောက်မည့် ခရီးသည်များအနေဖြင့် ကော်မာရှယ်လေယာဉ်နှင့် ကယ်ဆယ်ရေးလေယာဉ်ကို သတိပြုရန်လိုအပ်

၃။ မိုးလေဝသ သတင်း

၄။ လောင်စာဆီဈေးနှုန်းမြင့်တက်လာခြင်းကြောင့် အမေရိကန်တွင် လျှပ်စစ်ကားများအရောင်းသွက်...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group