#Local_News
Published - 26 July 2022

နောင်ကျင်းပပြုလုပ်မည့် ရွေးကောက်ပွဲတွင် ကျောင်း ဆရာ၊ ဆရာမများသာမက ဥပဒေနှင့်ကိုက်ညီသည့် အခြားဝန်ထမ်းများကိုလည်း မဲရုံမှူးနှင့် မဲရုံအဖွဲ့ဝင်အဖြစ် တာဝန်ပေးအပ်သွားမည်ဖြစ်ကြောင်း နစက၏ ပြည်ထောင်စုရွေးကောက်ပွဲကော်မရှင်အဖွဲ့ဝင်ဦးခင်မောင်ဦးက ပြောသည်၊၊

ဇူလိုင်လ(၂၆)ရက်တွင်ကျင်းပသည့် နစက၏သတင်းထုတ်ပြန်ရေး အဖွဲ့၏(၁၈)ကြိမ်မြောက် သတင်းစာရှင်းလင်းပွဲ၌ ထည့်သွင်းပြောခဲ့ ခြင်းဖြစ်သည်၊၊

ဘူးလက်နယူးဂျာနယ်မှ ဘူးလက်ဦးလှဆွေ၏ ပညာရေးဝန်ထမ်းများအပြင် လ.ဝ.ကအပါအဝင် အခြားဝန်ထမ်းများကို မဲရုံမှူးများအဖြစ်တာဝန်ပေးရန်ရှိ မရှိမေးခွန်းကို ပြန်လည်ဖြေကြားရာမှာ ယခုလိုပြန်လည် ဖြေကြားခဲ့ခြင်းဖြစ်သည်၊၊

"ပြီးခဲ့တဲ့ ရွေးကောက်ပွဲမှာ ဖြစ်ပေါ်လာတဲ့ဖြစ်စဉ်တွေကို သုံးသပ်ပြီးတော့ အများစုကတော့လုပ်ဆောင်မှုမှာ မှန်ကန်မှုရှိသလို အချို့မဲရုံမှူးပိုင်းမှာလည်း အချို့ကိစ္စတွေမှာ အားနည်းချက်တွေရှိတာ၊ ဥပဒေချိုးဖောက်တာတွေရှိခဲ့လို့ ဥပဒေနဲ့အညီအရေးယူဆောင်ရွက်မှုတွေရှိခဲ့ပါတယ်၊၊ ဒါ့ကြောင့် ကျွန်တော်တို့က ဒီအခြေအနေကို သုံးသပ်ပြီးတဲ့အခါကျတော့ နောင်ကျင်းပပြုလုပ်မယ့် ရွေးကောက်ပွဲမှာတော့ ကျောင်းဆရာ၊ ဆရာမတွေတင် မဟုတ်ပါဘူး ကျွန်တော်တို့ ဥပဒေနဲ့အညီသတ်မှတ်ချက်နဲ့ ကိုက်ညီတဲ့အခြား အကြံပြုတဲ့ ဝန်ထမ်းတွေအပါအဝင် အားလုံးပဲခြုံငုံသုံးသပ်ပြီးတော့ မဲရုံမှူးနဲ့ မဲရုံအဖွဲ့ဝင်တာဝန်တွေကို ကျွန်တော်တို့ပေးအပ်သွားမှာဖြစ်တဲ့အကြောင်းပြန်လည်ဖြေကြားအပ်ပါတယ်"လို့ နစက၏ ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးခင်မောင်ဦးက သတင်းစာရှင်းလင်းပွဲတွင်ပြောခဲ့သည်၊၊

ymg/tthl
#Yangon_Media_Group

#Local_News
Published - 26 July 2022

နိုင်ငံတော်တွင် သင့်တင့်သည့် နိုင်ငံခြားအရန်ငွေကြေးနှင့်ဘဏ္ဍာငွေများ ရှိပြီးဖြစ်ကြောင်း နစကပြောရေးဆိုခွင့်ရှိသူ၊ ပြန်ကြားရေးဒုတိယဝန်ကြီး ဗိုလ်ချုပ်ဇော်မင်းထွန်းက ပြောသည်။

ဇူလိုင်လ ၂၆ ရက်တွင် ကျင်းပပြုလုပ်သည့် သတင်းစာရှင်းလင်းပွဲတွင် ထည့်သွင်းပြောကြားခဲ့ ခြင်းဖြစ်သည်။

‘‘နိုင်ငံတော်မှာ လုံလောက်တဲ့ ငွေကြေးရှိလိုလည်း နိုင်ငံတော်ဝန်ကြီးချုပ် ဦးဆောင်ပြီး ယခုလ ၂၂ ရက်နေ့မှာ ကျင်းပပြုလုပ်ခဲ့တဲ့ နိုင်ငံတော်အစိုးရရဲ့ စီးပွားရေးကော်မတီ အစည်းအဝေးဆုံးဖြတ်ချက်အရ နိုင်ငံ့ဝန်ထမ်း အမြဲတမ်းဝန်ထမ်းတွေကို အိမ်ငှားစရိတ်အဖြစ် အိမ်ထောင်သည်ဖြစ်ပါက မူရင်းလစာရဲ့ ၈ ရာခိုင်နှုန်းနဲ့ လူပျိုဖြစ်ပါက ၄ ရာခိုင်နှုန်း ထောက်ပံ့မှာဖြစ်ပါတယ်’’ဟု ပြောကြားခဲ့သည်။

ယင်းအပြင် ရဲတပ်ဖွဲ့ဝင်များကို လစာအပြင် ဩဂုတ်လမှ စတင်ကာ ပင်ပန်းကြမ်းတမ်းမှုနှင့် သက်စွန့်တာဝန်စရိတ်အဖြစ် တစ်ဦးလျှင် တစ်လ ကျပ် ၁၀၀၀၀ ခံစားခွင့်ပြုမည်ဖြစ်ကြောင်း ၎င်းက ဆက်လက်ပြောကြားခဲ့သည်။

ကိုဗစ်-၁၉ အသုံးစရိတ်များကို အမျိုးသားအဆင့် ဗဟိုကော်မတီ၏ ခွင့်ပြုချက်ဖြင့် စိစစ်သုံးစွဲနေသည့် အမျိုးသား သဘာဝ ဘေးအန္တရာယ်ဆိုင်ရာ စီမံခန့်ခွဲမှု ရန်ပုံငွေလက်ကျန်ထဲမှ ကျပ်ဘီလီယံ ၄၀၀ ကိုလည်း ပြည်တွင်းစီးပွားရေးလုပ်ငန်းတွေထံ ထုတ်ချေးပေးရန် စီစဉ်နေကြောင်း သိရသည်။

ymg/sth
#Yangon_Media_Group

#Local_News
Published_26 July 2022

ဒေါ်အောင်ဆန်းစုကြည်ရင်ဆိုင်နေရသော ရဟတ်ယာဉ်အမှု၏ တရားလိုပြသက်သေများအား ယနေ့ ဇူလိုင်လ ၂၆ ရက်တွင် နေပြည်တော်အကျဉ်းထောင်တွင်း တရားရုံး၌ ဆက်လက် စစ်ဆေးခဲ့ကြောင်း သိရသည်။

"ရဟတ်ယာဉ်အမှု ဖြစ်တဲ့ ၄၀(၇) အတွက် တရားလိုပြသက်သေ ဦးစိုးအောင်ကို ဆက်လက်စစ်ဆေးခဲ့ပါတယ်၊ ပြီးတော့ဒေါ်ခင်ကြည်ဖောင်ဒေးရှင်းကို ဦးမောင်ဝိတ်ကအလှူငွေပေးအပ်ခဲ့တဲ့ အဂတိအမှု ၂မှုအတွက်ကတော့ တရားလိုပြသက်သေ ဦးရဲထက်ကို ပြန်ခေါ်သက်သေ ဆက်လက်စစ်ဆေးခဲ့ပါတယ်။ နောက်ထပ်လည်း လိုပြသက်သေတွေကိုဆက်လက်စစ်ဆေးဖို့ အများကြီး ကျန်ပါသေးတယ်"ဟုတရားရုံးနှင့် နီးစပ်သူက YMG ကို ပြောသည်။

ယမန်နေ့ ဇူလိုင်လ ၂၅ ရက်က ဒေါ်ခင်ကြည်ဖောင်ဒေးရှင်းအတွက် ဦးမောင်ဝိတ်ကအလှူငွေပေးအပ်ခဲ့သည့်အမှုကို စွဲချက်တင်ကြောင်းလည်း တရားရုံးက ဆုံးဖြတ်ထားသေးသည်။ ယင်းအပြင် အဆိုပါအမှုကို ပြီးခဲ့သည့် ဇူလိုင်လ ၁၃ ရက်က တရားလွှတ်တော်ချုပ်သို ချေဖျက်ခွင့်လည်း တင်ထားသေးကြောင်း အဆိုပါ တရားရုံးနှင့် နီးစပ်သည့် အသိုင်းအဝိုင်းက သိရသည်။

၎င်းအမှု နှစ်မှုမှာ ဒေါ်ခင်ကြည်ဖောင်ဒေးရှင်းအတွက် ဒေါ်လာငွေလှူဒါန်းသည်ဆိုသည့် အမှုများဖြစ်ကာ အမှတ်အမှတ် ၃ မှာ ဒေါ်လာ နှစ်သိန်းခွဲ လှူသည်ဆိုသော အမှုဖြစ်ပြီး အမှုအမှတ် ၄ မှာ ဒေါ်လာ ၃ သိန်း လှူသည့် ဆိုသည့် အမှူများ ဖြစ်ကြောင်း သိရသည်။

ဒေါ်အောင်ဆန်းစုကြည်အနေဖြင့် ၂၀၂၂ ဇွန်လအထိ အမှုပေါင်း ၂၀ ထက်မနည်းဖြင့် စွဲဆိုထားခြင်းဖြစ်ပြီး ယင်းအထဲမှ ၆မှုအတွက် ထောင်ဒဏ် ၁၁ နှစ်ချမှတ်ထားကြောင်း သိရသည်။

ymg/mt
#Yangon_Media_Group

#World_Politics
Published 26 July 2022

ရုရှားက ဥရောပထံဓာတ်ငွေ့တင်ပို့ခြင်းများကို ထပ်မံဖြတ်တောက်သွားမှာဖြစ်ပြီး ယူကရိန်းကိုထောက်ပံ့နေတဲ့ နိုင်ငံများအတွက်တော့ အထိနာဦးမယ့် အခြေအနေဖြစ်နေပါတယ်။

ပင်လယ်နက်ဒေသတဝိုက် ဂျုံစေ့ပြန်လည်တင်ပို့ရေးကို ယခုသီတင်းပတ်အတွင်း သဘောတူညီခဲ့ကြတာကြောင့် စီးပွားရေးဖိအားလျော့ကျလာဖို့ မျှော်လင့်နေကြတဲ့အချိန်မှာ အခုလိုသတင်းထွက်ပေါ်လာတာဖြစ်ပါတယ်။

ယူကရိန်းဘက်က အင်္ဂါနေ့ကထုတ်ပြန်ရာမှာ ရုရှားက ပဲ့ထိန်းဒုံးကျည်များဖြင့် တောင်ပိုင်းကိုတိုက်ခိုက်ခဲ့ကြောင်း၊ ယူကရိန်းတပ်ဖွဲ့တွေကလည်း ရန်သူပစ်မှတ်တွေကို တိုက်ခိုက်နိုင်ခဲ့ကြောင်းသိရှိရပြီး ရုရှားကာကွယ်ရေးဝန်ကြီးဌာနဘက်ကတော့ မှတ်ချက်ပြုခြင်းမရှိသေးပါဘူး။

သောကြာနေ့မှာရရှိခဲ့တဲ့ သဘောတူညီချက်အရ ယူကရိန်းမှပထမဆုံးကုန်တင်သင်္ဘောတွေ ရက်ပိုင်းအတွင်းထွက်ခွာနိုင်တော့မယ်လို့ ကုလသမဂ္ဂက ထုတ်ပြန်ခဲ့ပေမယ့် ရုရှားတို့က ယူကရိန်းရဲ့အိုဒက်ဆာဆိပ်ကမ်းကို တိုက်ခိုက်ခဲ့တာပါတယ်။

ယူကရိန်း-ရုရှားစစ်ပွဲဖြစ်ပွားလာတာ ၆ လခန့်ကြာမြင့်လာပြီဖြစ်ပြီး ဒုတိယကမ္ဘာစစ်နောက်ပိုင်း ဥရောပမှာအကြီးဆုံးစစ်ပွဲဖြစ်လာပါတယ်။

စစ်ပွဲရဲ့သက်ရောက်မှုက ယူကရိန်းသာမက နိုင်ငံအများအပြားကိုပါထိခိုက်နေပြီး လောင်စာစွမ်းအင်ဈေးနှုန်းများ ထိုးတက်ကာ ဆင်းရဲတဲ့နိုင်ငံတွေက လူသန်းပေါင်းများစွာဟာ အငတ်ဘေးကြုံရဖွယ်ရှိနေပါတယ်။

အနောက်နိုင်ငံအနေနဲ့ စီးပွားရေးဒဏ်ခတ်ပိတ်ဆို့မှုတွေ ပြုလုပ်တာဟာ ကမ္ဘာ့လောင်စာဆီဈေးနှုန်းတွေကို မြင့်တက်စေနိုင်တယ်လို့ ရုရှားသမ္မတ'ဗလာဒီမာပူတင်'က ယခုလအတွင်း သတိပေးခဲ့ပါတယ်။

စက်မှုလုပ်ငန်းစောင့်ကြည့်ရေးအဖွဲ့ရဲ့အဆိုအရ နော့ဒ်စထရင်းမ်(၁)ဂတ်စ်ပိုက်လိုင်းကနေ ဂျာမနီကိုပေးပို့နေတဲ့ ဓာတ်ငွေ့ပမာဏကို ဗုဒ္ဓဟူးနေ့ကစတင်ပြီး တစ်နေ့ကို ၃၃ သန်းကုဗမီတာအထိ လျှော့ချသွားဖွယ်ရှိကြောင်း ရုရှားဓာတ်ငွေ့ကုမ္ပဏီကြီး Gazprom က အသိပေးခဲ့ပါတယ်။

စစ်ပွဲကာလမတိုင်ခင်က ဥရောပသို့ပေးပို့နေတဲ့ ဓာတ်ငွေ့ ၄၀ ရာခိုင်နှုန်းနဲ့ ရေနံ ၃၀ ရာခိုင်နှုန်းဟာ ရုရှားဆီကနေ တင်သွင်းဝယ်ယူခဲ့ကြတာဖြစ်ပါတယ်။

အခုအချိန်မှာတော့ ထိုပမာဏရဲ့တဝက်ခန့်ကိုသာ ဆက်လက်ပေးပို့သွားဖွယ်ရှိပါတယ်။

ဓာတ်ငွေ့တင်ပို့ခြင်းကို လျှော့ချရခြင်းက ပြုပြင်ထိန်းသိမ်းခြင်းကိစ္စတွေနဲ့ အနောက်နိုင်ငံရဲ့ဒဏ်ခတ်ပိတ်ဆို့ခြင်းတွေကြောင့်လို့ ရုရှားဘက်ကဆိုခဲ့ပြီး ဥရောပသမဂ္ဂကတော့ ရုရှားတို့ဟာ လောင်စာဆီတင်ပို့ခြင်းနဲ့ပတ်သက်ပြီး ခြိမ်းခြောက်နေတယ်လို့ စွပ်စွဲလိုက်ပါတယ်။

လာမယ့်ဆောင်းတွင်းမှာ ရုရှားကဓာတ်ငွေ့ဖြတ်တောက်သွားဖွယ်ရှိပြီး ထိုသို့ဖြတ်တောက်လိုက်ပါက ဂျာမနီအနေနဲ့ စီးပွားရေးဆုတ်ယုတ်မှုကိုကြုံတွေ့လာနိုင်ပြီး ငွေကြေးဖောင်းပွခြင်းကြောင့် အထိနာနေရတဲ့သူတွေလည်း ပိုမိုနစ်နာလာမှာဖြစ်ကြောင်း ဥရောပနိုင်ငံရေးသမာများက အကြိမ်ကြိမ် သတိပေးထားပါတယ်။

ရုရှားက ဥရောပထံဓာတ်ငွေ့တင်ပို့ခြင်းကို အလုံးစုံဖြတ်တောက်ဖို့တော့ အစီအစဉ်မရှိဘူးလို့ ဆိုထားပါတယ်။

ကျူးကျော်မှုတွေ၊ ဒဏ်ခတ်ပိတ်ဆို့မှုတွေ မရှိခင်တုန်းက ကမ္ဘာ့ဂျုံတင်ပို့မှုရဲ့ ၃ ပုံ ၁ ပုံနီးပါးဟာ ရုရှားနဲ့ယူကရိန်းထံမှ ဖြစ်ပါတယ်။

ပင်လယ်နက်မှတဆင့် တူရကီရဲ့ဘော့စ်ဖောရပ်စ် ရေလက်ကြားကနေ ဈေးကွက်များထံဖြန့်ချိမယ့် ကုန်သည်သင်္ဘောများကို မတိုက်ခိုက်ရန် ရုရှား၊ တူရကီ၊ ယူကရိန်း၊ ကုလသမဂ္ဂတိုက သောကြာနေ့မှာ ‌သဘောတူညီခဲ့ကြပါတယ်။

ထိုကဲ့သို့သဘောတူညီပြီး ခဏအကြာမှာပဲ ရုရှားတို့က အိုဒက်ဆာဆိပ်ကမ်းကို တိုက်ခိုက်ခဲ့တာဖြစ်ပါတယ်။

ဒါကြောင့် ရုရှားတို့က သူတို့ရဲ့ကတိကဝတ်ကို စောင့်ထိန်းမှာလားဆိုတာ စောင့်ကြည့်သွားရမှာဖြစ်တယ်လို့ အိမ်ဖြူတော်ကပြောကြားခဲ့ပါတယ်။

Source: Reuters
#Yangon_Media_Group

#DailyNews
Published - 26 July 2022

၁။ မြန်မာနိုင်ငံကို ခရီးမသွားသင့်သည့် နိုင်ငံအဆင့် အမေရိကန်သတ်မှတ်ခြင်းအတွက် ခရီးသွားလုပ်ငန်းနစ်နာမှုရှိ

၂။ မြန်မာ့လူဦးရေ(၅)သန်းကျော်တွင် အသည်းရောင်ရောဂါများရှိနေ၊ B ပိုး C ပိုး ရှိမရှိအခမဲ့ စစ်ဆေးပေးမည်ဟုဆို

၃။ နေ့စဉ်မိုးလေဝသသတင်း။

၄။ ဗီယက်နမ်စစ်ပွဲကာလမှ စတင်အသုံးပြုခဲ့သည့် ရော်ဘာဖိနပ်များ ယနေ့အချိန်အထိ လူကြိုက်များလျက်ရှိ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published - 26 July 2022

မြန်မာနိုင်ငံကိုသုံးလအတွင်း နိုင်ငံခြားသားခရီးသွားဧည့်သည် တစ်သောင်းကျော် ဝင်ရောက်ခဲ့ကြောင်းဟိုတယ်နှင့် ခရီးသွားလာရေး ညွှန်ကြားမှုဦးစီးဌာနမှ သိရသည်။

ကိုဗစ်ကြောင့် ရပ်နားထားရသည့် လေကြောင်းလိုင်းများကို မြန်မာနိုင်ငံဘက်မှ ဧပြီလထဲတွင် ပြန်လည်ခွင့်ပြုပေးလိုက်ပြီးနောက်ပိုင်း နိုင်ငံခြားခရီးသွား ၁၆,၃၈၂ ဦး လာရောက်ခဲ့ကြောင်း စာရင်းများအရ သိရသည်။

ပြည်တွင်းသို့ အမေရိကန်ပြည်ထောင်စု၊ တရုတ်၊ ဂျပန်၊ မလေးရှား၊ ထိုင်း အပါအဝင် နိုင်ငံပေါင်း ၅၄ နိုင်ငံဆီကနေ လာရောက်ခဲ့ကြောင်း သိရသည်။

အမေရိကန်ပြည်ထောင်စုကောင်စစ်ရေးရာဦးစီးဌာနက မြန်မာအပါအဝင် ၇ နိုင်ငံကို အမေရိကန်နိုင်ငံသားများ ခရီးသွားလာရန်မသင့်သည့် အန္တရာယ်အများဆုံးနိုင်ငံတွေအဖြစ် သတ်မှတ်ထား ပြီး အဆိုပါစာရင်းတွင် မြန်မာ၊ ဟောင်ကောင်၊ အီရတ်၊ အီရန်၊ မြောက်ကိုရီးယား၊ ရုရှားနှင့်ဗင်နီဇွဲလားတို့ ပါဝင်နေကြောင်း သိရသည်။

ymg/sth
#Yangon_Media_Group

#Local_News
Published _ 26 July 2022

စိုက်ပျိုးရာသီချိန်ဖြစ်နေသဖြင့် ဇူလိုင်လ ပထမတစ်ပတ် အတွင်းမှာပင် ဓာတ်မြေဩဇာတန်ချိန် ၅၆၀၀ ကျော် တင်သွင်းကြောင်း သိရသည်။

ဓာတ်မြေဩဇာများကို ပင်လယ်ရေကြောင်းကုန်သွယ်ရေးလမ်းကြောင်းနှင့် နယ်စပ်ကုန်သွယ်ရေးလမ်းကြောင်းများက တင်သွင်းလျှက်ရှိရာ ၂၀၂၂ ခုနှစ်၊ ဇူလိုင်လ နှစ်ရက်မှ ရှစ်ရက်အထိ တစ်ပတ်အတွင်းမှာ ပင်လယ်ရေကြောင်းကုန်သွယ်ရေးလမ်းကြောင်းက အမေရိကန်ဒေါ်လာ ၂ ဒသမ ၂၁၉ သန်းတန်ဖိုးရှိ ဓာတ်မြေဩဇာတန်ချိန် ၃၁၈၀ ကျော်နှင့် နယ်စပ်ကုန်သွယ်ရေး လမ်းကြောင်းက အမေရိကန် ဒေါ်လာ ၁ ဒသမ ၅၁၅ သန်း တန်ဖိုးရှိ ဓာတ်မြေဩဇာ တန်ချိန် ၂၅၀၀ ကျော် စုစုပေါင်း ပင်လယ်ရေကြောင်း ကုန်သွယ်ရေးလမ်းကြောင်းနှင့် နယ်စပ်ကုန်သွယ်ရေးလမ်းကြောင်းများက အမေရိကန် ဒေါ်လာ ၃ ဒသမ ၇၃၄ သန်း တန်ဖိုးရှိ ဓာတ်မြေဩဇာ တန်ချိန် ၅၆၈၀ ကျော် တင်သွင်းခဲ့သည်။

ယင်း ကာလအတွင်း ဓာတ်မြေဩဇာများကို ပင်လယ်ရေကြောင်း ကုန်သွယ်ရေး လမ်းကြောင်းများမှ တင်သွင်းရာတွင် တရုတ်နိုင်ငံမှ တန်ချိန် ၁၃၀၀ ကျော်၊ ထိုင်းနိုင်ငံမှ တန်ချိန် ၆၀၀ ကျော်၊ ဂျာမနီနိုင်ငံမှ တန်ချိန် ၁၂၀ ကျော် တင်သွင်းခဲ့ခြင်းဖြစ်သည်။

နယ်စပ်ကုန်သွယ်ရေး လမ်းကြောင်းများမှ တင်သွင်းဆောင်ရွက်ရာတွင် ထိုင်းနိုင်ငံမှ တန်ချိန် ၁၃၀၀ ကျော်၊ အိန္ဒိယနိုင်ငံမှ တန်ချိန် ၇၀၀ ကျော်နှင့် တရုတ်နိုင်ငံမှ တန်ချိန် ၅၀၀ ကျော် တင်သွင်းခဲ့ခြင်း ဖြစ်ကြောင်း သိရသည်။

ymg/NN
#Yangon_Media_Group

#Local_News
Published _ 26 July 2022

မြန်မာနိုင်ငံတွင် လာမည့် ၂၀၂၃- ၂၀၂၄ ခုနှစ် ဘဏ္ဍာနှစ်မှ စတင်ပြီး ငါးနှစ်အတွင်း ကော်ဖီစိုက်ဧက သုံးသိန်းတိုးချဲ့စိုက်ပျိုးနိုင်ရေး စီမံချက်ရေးဆွဲကာ အကောင်အထည်ဖော် ဆောင်ရွက်သွားမည်ဖြစ်ကြောင်း သိရသည်။

ကုန်းမြင့်ကော်ဖီဖြစ်သော အာရေးဗီးကားကော်ဖီ (Arabica Coffee) ကို ဇုန် ၄ ခုခွဲပြီး ဧက နှစ်သိန်း၊ မြေနိမ့်ကော်ဖီဖြစ်သော ရိုဘတ်စတာကော်ဖီ (Robusta Coffee) ကို ဇုန် ၃ ခုခွဲပြီး ဧက တစ်သိန်း၊ စုစုပေါင်း ကော်ဖီ စိုက်ဧက သုံးသိန်းတိုးချဲ့စိုက်ပျိုးသွားမည်ဖြစ်ကြောင်း သိရသည်။

အာရေးဗီးကားကော်ဖီ (Arabica Coffee) စိုက်ပျိုးမည့် ဇုန်လေးခုအနက်၊ ဇုန် ၁ တွင် ပြင်ဦးလွင်၊ မိုးကုတ်နှင့် နောင်ချိုတို့ပါဝင်ပြီး၊ ဇုန် ၂ တွင် ရွာငံ၊ ပင်းတယနှင့် နောင်တရားစသည့် ဒေသများပါဝင်ကြောင်း၊ ဇုန် ၃ တွင် ဟိုပုံး၊ ဟဲဟိုး၊ ပင်လောင်းနှင့် မဲနယ်တောင်တန်းဒေသများ ပါဝင်ကာ ဇုန် ၄ တွင် ကျိုင်းတုံ၊ တာချီလိတ်စသည့်ဒေသများ ပါဝင်ကြောင်း သိရသည်။

ရိုဘတ်စတာ ကော်ဖီ (Robusta Coffee) စိုက်ပျိုးမည့်ဇုန် ၃ အနက် တနင်္သာရီတိုင်းဒေသကြီးတွင် ဇုန် ၁ ၊ ဧရာဝတီတိုင်းဒေသကြီးတွင် ဇုန် ၂ နှင့် ကရင်ပြည်နယ်တွင် ဇုန် ၃ စသည်ဖြင့် သတ်မှတ်ဖော်ဆောင်ကာ ကော်ဖီပင်များ တိုးချဲ့စိုက်ပျိုးသွားမည် ဖြစ်သည်။

မြန်မာ့ကော်ဖီများကို ကမ္ဘာ့ဈေးကွက်တွင် ယခုထက်ပို၍ ထိုးဖောက်နေရာယူနိုင်စေရန်နှင့် မြန်မာနိုင်ငံကို ကော်ဖီအမြောက်အများ တင်ပို့သော နိုင်ငံတစ်နိုင်ငံအဖြစ် အသိအမှတ်ပြုလာစေရန်အတွက် စီမံချက် ရေးဆွဲ ဆောင်ရွက်သွားမည်ဖြစ်ကြောင်း၊ မြန်မာ့ကော်ဖီသည် ကမ္ဘာ့ဈေးကွက်တွင် နေရာရပြီးသား ဖြစ်သည့်အတွက် ယင်းကဲ့သို့တိုးချဲ့စိုက်ပျိုးခြင်းဖြင့် ပြည်ပဈေးကွက် ပိုမိုကျယ်ပြန့်လာကာ ပြည်တွင်း ကော်ဖီစိုက် တောင်သူများနှင့် နိုင်ငံတော်အတွက် နိုင်ငံခြားဝင်ငွေ ပိုမိုရရှိလာစေနိုင်ရန် ရည်မှန်းထားကြောင်း သိရသည်။

လက်ရှိ မြန်မာနိုင်ငံတွင် ကုန်းမြင့်ကော်ဖီစိုက်ဧက လေးသောင်းခန့်နှင့် မြေနိမ့် ကော်ဖီစိုက်ဧက တစ်သောင်းခန့်၊ စုစုပေါင်းကော်ဖီစိုက်ဧက ငါးသောင်းခန့်ရှိပြီး၊ အများအားဖြင့် ကုန်းမြင့်ကော်ဖီများကို ရှမ်းပြည်နယ်တောင်ပိုင်း၊ ရှမ်းပြည်နယ်မြောက်ပိုင်း၊ ချင်းပြည်နယ်၊ ကယားပြည်နယ်၊ မန္တလေးတိုင်း ဒေသကြီးရှိ ပြင်ဦးလွင်နှင့် မကွေးတိုင်းဒေသကြီးတို့တွင် စိုက်ပျိုးကြပြီး မြေနိမ့်ကော်ဖီများကို ပဲခူးတိုင်း ဒေသကြီး၊တနင်္သာရီတိုင်းဒေသကြီးနှင့် ကရင်ပြည်နယ်တို့တွင် စိုက်ပျိုးကြကြောင်း သိရသည်။

ymg/NN
#Yangon_Media_Group

#Local_News
Published_26 July 2022

ထိုင်းနိုင်ငံ ဆုန်ခလာခရိုင်တွင် အဖမ်းခံထားရသော ရွေ့ပြောင်းအလုပ်သမား ၄၀၀ ကျော်အနက် မြန်မာနိုင်ငံသို့ ပြန်ပို့ရန်အတွက် ဆုန်ခလာခရိုင် ဒန်နို(ယာယီ)အချုပ်သို့ ပို့ဆောင်ပေးထားသည့်မြန်မာများထဲမှ ချင်းတိုင်းရင်းသားတစ်ဦး ကိုဗစ်ကြောင့် သေဆုံးခဲ့ကြောင်း ထိုင်းနိုင်ငံ ရွေ့ပြောင်းအလုပ်သမားအခွင့်အရေးကွန်ရက် (MWRN) ဟတ်ယိုင်ရုံး က သိရသည်။

"ချင်းလူမျိုးတစ်ယောက်ပါ။ ကိုဗစ်ရောဂါကြောင့် ဟတ်ယိုင်ဆေးရုံမှာ ဇူလိုင်လ ၂၄ ရက်နေ့ မနက် ၇ နာရီခွဲက ကွယ်လွန်သွားခဲ့ပါတယ်။ကွယ်လွန်သွားသူရဲ့ မိသားစုတွေက ဝေယျာဝိဇ္ဇအတွက် MWRN ဟတ်ယိုင်ရုံးကို အကူအညီတောင်းခံတာကြောင့် ဟတ်ယိုင်ရဲစခန်း ၊ ဟတ်ယိုင်နိုင်ဘုန်းကြီးကျောင်းနဲ့ ဒန်နို လဝက ယာယီအချုပ်တွေကို သွားပြီး ကွယ်လွန်သူရဲ့စာရွက်စာတမ်းတွေ၊ ဖုန်း ၊ ပိုက်ဆံ ဘတ် ၃၀၀၀ ကျော်နဲ့ ကွယ်လွန်သူရဲ့ အရိုးတွေကိုမြန်မာနိုင်ငံက မိသားစုတွေဆီရောက်အောင် ချိတ်ဆက် ပိုဆောင်ခဲ့ပါတယ်"ဟု ဟတ်ယိုင်ရုံးတာဝန်ခံ ကိုသိန်းထွန်း ကပြောသည်။

ကွယ်လွန်သူအား ထိုင်းအစိုးရတာဝန်ရှိသည့် ထိုင်းလဝကအနေဖြင့် ရိုးရာမပျက် တာဝန်ယူသင်္ဂြိုဟ်ပေးခဲ့ပြီးသင်္ဂြိုဟ်စရိတ် ဘတ် ၄၀၀၀ ကျော်အထိကုန်ကျကြောင်း ထိုင်းနိုင်ငံ ဆုန်ခလာခရိုင် လဝကတာဝန်ရှိသူများထံမှ သိရကြောင်းလည်း ၎င်းကပြောသည်။

"ကျွန်တော်တို့နဲ့အတူ လိုက်ပါကူညီပေးခဲ့ကြတဲ့ညီအစ်ကိုမောင်နှမတွေအားလုံးနဲ့ ဆုန်ခလာခရိုင် လဝက တာဝန်ရှိသူတွေ၊ ပူးပေါင်းကူညီခဲ့ကြသူတွေကို ကျေးဇူးတင်ပါတယ်"ဟု ကိုသိန်းထွန်းက ပြောသည်။

ယင်းအပြင် ဇူလိုင်လ ၂၅ ရက် က ဒန်နိုအချုပ်မှ ရွေ့ပြောင်းမြန်မာ ၃၅ ဦးတို့အား မြန်မာနိုင်ငံသို့ ပြန်ပို့ရန် အချုပ်ကားဖြင့် ခေါ်ဆောင်သွားခဲ့ပြီး ဖြစ်ကြောင်းလည်း သိရသည်။

ymg/mt
#Yangon_Media_Group

#World_Health
Published 26 July 2022

မိမိရဲ့အတွေးအခေါ်တွေ၊ စိတ်ခံစားမှုတွေ၊ ပြုမူပုံတွေကိုပုံမှန်သုံးသပ်လေ့ရှိတဲ့ လူကြီးတွေဟာ အယ်လ်ဇိုင်းမားရောဂါဖြစ်နိုင်ချေလျော့နည်းကြောင်း လေ့လာတွေ့ရှိထားပါတယ်။

တစ်နေ့ကို ၁၀ မိနစ်မျှ မိမိကိုယ်မိမိပြန်လည်သုံးသပ်ခြင်းဖြင့် ဦးနှောက်ကျန်းမာရေးနဲ့ အသိဉာဏ်စွမ်းရည်တွေကို သိသိသာသာကောင်းမွန်စေနိုင်တယ်လို သုတေသီများတွေ့ရှိခဲ့ပါတယ်။

မှတ်ဉာဏ်ချို့ယွင်းလာခြင်းဝေဒနာနဲ့ ပတ်သက်ပြီး ကုသဆေးမရှိတာကြောင့် ယခုလိုတွေ့ရှိချက်က စိတ်ပိုင်းဆိုင်ရာနဲ့ သက်ဆိုင်တဲ့ဝေဒနာ ဖြစ်လာနိုင်ချေကို လျှော့ချပေးနိုင်ဖို့ အထောက်အကူဖြစ်လာဖွယ်ရှိနေပါတယ်။

လန်ဒန်တက္ကသိုလ်ကောလိပ်မှ သုတေသနအဖွဲ့ကဦးဆောင်ပြီး အသက် ၇၀ ဝန်းကျင် လူ ၂၅၉ ယောက်ကို စမ်းသပ်မှု ၂ ခုပြုလုပ်ပြီး ရရှိလာတဲ့အချက်အလက်များကို ဆန်းစစ်ခဲ့ကြပါတယ်။

စမ်းသပ်ခံတဲ့သူတွေကို သူတို့ရဲ့အတွေးအခေါ်၊ ခံစားမှုတွေနဲ့ပတ်သက်ပြီး ပြန်လည်စဉ်းစားသုံးသပ်လေ့ ရှိသလဲဆိုတာကို မေးမြန်းခဲ့ကြပါတယ်။

မိမိကိုယ်ကိုပြန်လည်သုံးသပ်လေ့ရှိသူတွေက မှတ်ဉာဏ်စွမ်းရည်၊ အာရုံစူးစိုက်မှု၊ ပြဿနာဖြေရှင်းနိုင်စွမ်း၊ ဦးနှောက်ကျန်းမာရေးတို့မှာ ပိုမိုသာလွန်ကြကြောင်း 'ဟာရီယက်ဒမ်နစ်ဇ်ကင်း'ရဲ့တင်ပြချက်ကို Neurology ဂျာနယ်မှာ ဖော်ပြထားပါတယ်။

မိမိကိုယ် မိမိသုံးသပ်ခြင်းက ရုပ်ပိုင်းဆိုင်ရာ လူမှုရေးဆိုင်ရာအချက်များနဲ့မသက်ဆိုင်ဘဲ ဘယ်သူမဆိုဆောင်ရွက်နိုင်ပါတယ်။

ဒီလိုသုံးသပ်ခြင်းက ဘာကြောင့်မှတ်ဉာဏ်စွမ်းရည်တွေကို ကာကွယ်ပေးနိုင်လဲဆိုတာကို သုတေသီတွေသေချာ မသိရှိသေးပါဘူး။

ဒါပေမဲ့ စိတ်ပိုင်းဆိုင်ရာအခြေအနေကို တိုးတက်စေသလို ခန္ဓာကိုယ်ထဲက ဖိစီးမှုကိုလျှော့ချပြီး စိတ်တည်ငြိမ်ခြင်းတိုကို ဖြစ်ပေါ်စေနိုင်ပါတယ်။

နေ့တိုင်းအချိန်ပေးပြီး အလုပ်အကိုင်၊ လူမှုဆက်ဆံရေးကိစ္စတွေမှာ မျှမျှတတပြန်လည်တွေးတောခြင်းက မှတ်ဉာဏ်ချိုယွင်းမှုဖြစ်နိုင်ချေကိုလျှော့ချပေးနိုင်ပါတယ်။

"မိမိကိုယ်ကိုသုံးသပ်ခြင်းက ဦးနှောက်လုပ်ဆောင်ချက်ကို ကောင်းမွန်အောင်ပြုလုပ်နိုင်တယ်ဆိုရင် စိတ်ပိုင်းဆိုင်ရာ ပြဿနာတွေဖြစ်နိုင်ချေကိုလည်း လျှော့ချနိုင်ဖွယ်ရှိနေပါတယ်" လို့ ဒေါက်တာ'ရစ်ချတ်အုတ်ကလေ'က ရှင်းပြခဲ့ပါတယ်။

၂၀၄၀ အရောက်တွင် ယူကေမှာ မှတ်ဉာဏ်ချို့ယွင်းတဲ့ဝေဒနာခံစားရသူ ၁.၆ သန်းရှိလာမယ်လို ခန့်မှန်းရပါတယ်။

Source: DailyMail
#Yangon_Media_Group

#Local_News
Published_26 July 2022

ရန်ကုန်တွင် ကျောင်းတက်ရင်းပျောက်သွားသည့် ရခိုင်မှ အသက် ၁၄ နှစ်အရွယ် Grade 10 ကျောင်းသူ မလဲ့လဲ့ရွှေရည်(ခ)မေပြည့်ဖြိုးအား ပြန်တွေ့ပြီဖြစ်ကြောင်း ရန်ကုန်ရှိ ရခိုင်အမျိုးသားကွန်ရက်က သိရသည်။

မလဲ့လဲ့ရွှေရည်(ခ)မေပြည့်ဖြိုးသည် ရခိုင်ပြည်နယ်၊ မင်းပြားမြို့နယ်၊ မေလွန်းကျေးရွာမှဖြစ်ပြီး ထောက်ကြန့်မြို့နယ်ရှိ စွယ်စုံကိုယ်ပိုင်အထက်တန်းကျောင်းတွင် Grade 10 အတွဲ(၇) ဇီဝဘာသာတွဲကိုတက်နေသူဖြစ်သည်။

သူမအား ဇူလိုင်လ ၂၅ ရက် နံနက်တွင် ရန်ကုန်တိုင်းဒေသကြီး၊ တိုက်ကြီးမြို အိုးတန်းရပ်ကွက်၊ ဇေယျာသီရိ(၂)လမ်းရှိ ဒေါ်မူမူမြင့်ဆိုသူ၏နေအိမ်တွင် တွေ့ရှိခဲ့ခြင်းဖြစ်ကြောင်း၊ လမ်းပျောက်သွားသည့်အချိန် အမျိုးသမီးတစ်ဦးနှင့်တွေ့ကာ ယင်းအမျိုးသမီးက သူမ ကျောင်းတက်နေသည့် စွယ်စုံကျောင်းသို့ အကြောင်းကြားခဲ့ခြင်း ဖြစ်ကြောင်း သိရသည်။

ယင်းမှာ ရန်ကုန်တိုင်းဒေသကြီး ထောက်ကြန့်မြို့နယ်၊ မြောက်ပိုင်းရပ်ကွက်၊ အောင်သပြေ(၅)လမ်း၌ အဒေါ်ဖြစ်သူ ဒေါ်ကျော့စန္ဒာမြင့်နှင့်အတူနေထိုင်စဉ် ပြီးခဲ့သည့် ဇူလိုင်လ ၁၉ ရက် နံနက် ၁၁ နာရီခန့်က အိမ်တွင် လူမရှိခိုက် နေအိမ်မှ တစ်ဦးတည်းထွက်သွားခဲ့ပြီးနောက် ပျောက်ဆုံးခဲ့ခြင်းဖြစ်သည်။

Photo – TinHtooAung
ymg/mt
#Yangon_Media_Group

#Local_News
Published_26 July 2022

ရန်ကုန်တိုင်းဒေသကြီးအတွင်း စိုက်ပျိုးရေးလုပ်ငန်းလုပ်ဆောင်ကြသည့် တွံတေး၊ ကော့မှူး၊ သန်လျင်နှင့် လှည်းကူးမြို့နယ်တို့တွင် သဘာဝ အခြေခံခရီးသွားလုပ်ငန်းဖော်ဆောင်မည်ဖြစ်ကြောင်း မြန်မာနိုင်ငံခရီးသွားလုပ်ငန်းရှင်များအသင်းက သိရသည်။

“ပြင်ပသွင်းအားစုများကို အသုံးပြုခြင်းထက် ဂေဟစနစ်အစီအမံတွေအပေါ်မှာအားထားရတဲ့ ဓာတုသွင်းအားစုများဖြစ်တဲ့ ဓာတ်မြေသြဇာတွေ၊ ပိုးသတ်ဆေးနဲ့ ပေါင်းသတ်ဆေးတွေ ၊ တိရစ္ဆာန် မွေးမြူရေးဆိုင်ရာဆေးဝါးတွေ၊ မျိုးဗီဇပြုပြင်ထားတဲ့ မျိုးစေ့နဲ့ စပ်မျိုးတွေ ၊ တာရှည်ခံဆေးတွေ ၊ အစားအစာဖြည့်စွက်ပစ္စည်းတွေ၊ ဓာတ်ရောင်ခြည်သုံးပြုပြင်တာတွေကို ရှောင်ထားတဲ့ အော်ဂဲနစ်စိုက်ပျိုးရေးစနစ်ရှိနေတဲ့ နေရာပေါ့။ ပတ်ဝန်းကျင်နဲ့လူမှုဘဝတွေအပေါ် ဆိုးကျိုးမသက်ရောက်စေတဲ့ စနစ်ဖြစ်လို ပြည်တွင်းပြည်ပခရီးသွားတွေ စိတ်ဝင်တစားလည်ပတ်နိုင်တဲ့ နေရာတွေကို အကောင်အထည်ဖော်ဆောင်ရွက်သွားမှာပါ"ဟု အသင်းတာဝန်ရှိသူက ပြောသည်။

သစ်သီးနှင့် စပါးစိုက်ခင်းများကို သွားရောက်လေ့လာခွင့် လည်ပတ်ခွင့်အတွက် စိုက်ခင်းပိုင်ရှင်များနှင့် ချိတ်ဆက်၍ လာမည့် ပွင့်လင်းရာသီတွင် ဆောင်ရွက်မည်ဖြစ်ကြောင်း၊ လက်ရှိတွင် ပြင်ဦးလွင်မြို့ ဟိုတယ်ဇုန်အနီး ကျွဲနားထောက်ကျေးရွာမှာ ၂၀၁၇ ခုနှစ်၊ ဖေဖော်ဝါရီလကစတင်ခဲ့သည့် မြန်မာ့ဆေးဖက်ဝင်အပင် အမျိုးပေါင်း ၈၅ မျိုးကျော်စိုက်ပျိုးထားသော Fame Organic Farming စိုက်ခင်းများကိုပြည်တွင်း၊ ပြည်ပခရီးသွားများ ဝင်ရောက်လေ့လာနိုင်သည့်နေရာအဖြစ် အကောင်အထည်ဖော်ထားကြောင်းလည်း သိရသည်။

ymg/mt
#Yangon_Media_group