#DailyNews
Published - 27 August 2022

၁။ စစ်ကိုင်းတိုင်းရှိ မိဘမဲ့ကလေးငယ်နှင့် ဘိုးဘွားများအတွက် အလှူရှင်များလိုအပ်နေ

၂။ တရုတ် ဝမ်တိန်ဘက်ခြမ်းတွင် ကိုဗစ်ပိုးတွေ့သော်လည်း နယ်စပ်ကုန်သွယ်ရေး ပုံမှန်လည်ပတ်

၃။ အခေါက်ရွှေ ၂၈ သိန်းခွဲအထိရှိလာပြီး ဒေါ်လာဈေး ၃၀၀၀ ကျော်အထိရှိနေ

၄။ ကမ္ဘာ့ပထမဆုံး ဟိုက်ဒရိုဂျင်စွမ်းအင်သုံးမီးရထားများအား ဂျာမနီမှစတင်ပြေးဆွဲ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Health_Matters
Published - 27 August 2022

-အိုမီခရွန်ဗီဇပြောင်းတွေ အမျိုးမျိုးထွက်ပေါ်နေတဲ့အန္တရာယ် ဘယ်လောက်ကြီးသလဲ???

#Yangon_Media_Group

TV Yangon Times Matters အစီအစဉ်
Published - 28 August 2022

အစီအစဉ်တင်ဆင်သူ ဆရာဟိန်းလတ်က ဦးအောင်မျိုးရှိန်နှင့်အတူ

- "ခိုင်ထူးက သီချင်းစဆိုကတည်းက ဘယ်သီချင်းကို ဘယ်လောက်ရမှဆိုမယ်ဆိုတာမျိုး မရှိခဲ့ဘူးဆိုတဲ့အကြောင်း

- သီချင်းဆိုနေရရင်ပျော်တာ သီချင်းမဆိုရရင် ဘဝမရှိတော့ဘူး သီချင်းကို ဘဝလိုခံယူထားသူတစ်ဦးဖြစ်တဲ့အကြောင်း" စတဲ့ စိတ်ဝင်စားဖွယ်အကြောင်းအရာများကို ဆွေးနွေးခဲ့ကြပါတယ်။

#Yangon_Media_Group

#Local_News
Published - 27 August 2022

ပြည်တွင်း၌ နိုင်ငံခြားဆေးဝါးမျိုးစုံများ၏ဈေးနှုန်းမှာ ထက်ဝက်ကျော်ခန့် မြင့်တက်လာကြောင်း ဆေးဝါးရောင်းဝယ်သူများနှင့် ဝယ်ယူသူများထံမှ သိရသည်။

နိုင်ငံခြားဆေးဝါးမျိုးစုံ၏ဈေးနှုန်းများသည် ပြီးခဲ့သည့် ဇူလိုင်လတွင် ၁၅ရာခိုင်နှုန်းလောက်သာ မြင့်တက်ခဲ့သော်လည်း လက်ရှိတွင် တဖြည်းဖြည်းမြင့်တက်လာခြင်းဖြစ်ကြောင်း သိရသည်။

"ဆေးရဲ့ဈေးနှုန်းက တဖြည်းဖြည်းမြင့်လာတယ်။ ကိုယ်ကဆေးစွဲသောက်ရတယ့်သူဆိုတော့ ဆေးတွေဝယ်မရမှာစိုးလို့ နှစ်ပတ်စာလောက်ကြိုဝယ်ရတယ်။ နောက်တစ်ခေါက်သွားထပ်ဝယ်ရင် ဈေးကတမျိုးပြန်ဖြစ်သွားတယ်။ ဈေးမကျပဲ တတ်တတ်လာတာ"ဟု ဆေးဝါးဝယ်ယူသူ တစ်ဦးကပြောသည်။

နိုင်ငံခြားဆေးဝါးဈေးကွက်အတွင်း ဈေးမြင့်တက်မှုအပြင်အချို့ဆေးဝါးများဝယ်မရခြင်း၊ ဆေးပြတ်လပ်မှုများရှိနေကြောင်း၊ နေ့စဉ်ဈေးမြင့်တက်မှုကြောင့် လက်လီဆေးဝါးအရောင်းဆိုင်များအနေဖြင့် ရောင်းရှုံးဖြစ်လာပြီး အရင်းထဲကပါနေကြောင်း သိရသည်။

ယင်းအပြင် ဝယ်လိုအားနှင့် ရောင်းလိုအားအခြေအနေ၊ နိုင်ငံခြားငွေဈေးမြင့်တက်လာမှုစသည့်အခြေအနေများကြောင့် နိုင်ငံခြားဆေးဝါးမျိုးစုံ ဈေးဆက်လက်မြင့်တက်ဖို့ရှိနေကြောင်း ဆေးဝါးရောင်းသူများက သုံးသပ်ပြောဆိုထားသည်။

ယင်းအပြင် ဆေးဝါးကုမ္ပဏီများ၊ လက်ကားဖြန့်ဖြူးရေးဆိုင်များ၊ လက်လီဆိုင်များအနေဖြင့် ဈေးကွက်ထဲတွင် အရောင်းပိတ်စရာမလိုဘဲ ပုံမှန်အတိုင်းဆက်လက်ရောင်းချကြရန်လည်း မြန်မာနိုင်ငံဆေးနှင့်ဆေးလုပ်ငန်းရှင်များအသင်းက တိုက်တွန်းထားသည်။

Ymg/STH
#Yangon_Media_Group

#Local_News
Published - 27 August 2022

ဆန်စပါးထွက်သည့် ဧရာဝတီတိုင်းဒေသကြီးတွင် ပေါ်ဆန်းမွှေးတစ်ပြည် ကျပ် ၃,၀၀၀ ဝန်းကျင်အထိ ပေါက်စျေးရှိနေကြောင်း ဒေသခံများ၏ ပြောပြချက်အရ သိရသည်။

လက်ရှိတွင် ပေါ်ဆန်းမွှေးဆန် တစ်အိတ်လျှင် ကျပ် ၆၉,၀၀၀ မှ ၇,၃၀၀၀ ဝန်းကျင်အထိ ပေါက်စျေးရှိနေပြီး ရွှေသွယ်တစ်အိတ်လျှင် ကျပ် ၅၂,၀၀၀ ဝန်းကျင်၊ ဆန်ကြမ်းတစ်အိတ်လျှင် ကျပ် ၄၅,၀၀၀ ဝန်းကျင်အထိ ပေါက်စျေးရှိနေကြောင်း သိရသည်။

ဧရာဝတီတိုင်း၊ ပုသိမ်မြို့ရှိ ဆန်ဆိုင်တချို့တွင် ရွှေဘိုပေါ်ဆန်းတစ်အိတ် ၉၆,၀၀၀ကျပ်ဖြင့် စျေးအမြင့်ဆုံးဖြစ်နေကြောင်း ဆန်ရောင်းချသူများ၏ ပြောပြချက်အရ သိရသည်။

ဆန်ဈေးအပြင် အခြေခံစားသောက်ကုန်များပါ ဈေနှုန်းမြင့်တက်နေမှုကြောင့် အခြေခံလူတန်းစားများ စားဝတ်နေရေး ကျပ်တည်းနေ ကြောင်းလည်း သိရသည်။

Ymg/STH
#Yangon_Media_Group

#Local_News
Published _ 27 August 2022

ပြည်တွင်းစက်သုံးဆီဈေး မြင့်တက်မှုကြောင့် အဝေးပြေးကားတချို့ပြေးဆွဲမှုရပ်ထားရပြီး ယာဉ်လုပ်သားတွေ စားဝတ်နေရေးအခက်ကြုံနေရကြောင်း သိရသည်။

စက်သုံးဆီဈေးနူန်းဟာ ယခုလဆန်းပိုင်းမှစ၍ တရှိန်ထိုးမြင့်တက်လာသောကြောင့် အဝေးပြေးကားများ ယခင်ကထက်အစီးရေ လျှော့ချ ပြေးဆွဲနေရခြင်းဖြစ်ကြောင်း သိရသည်။

"အခုနောက်ပိုင်း ရပ်ထားရတဲ့ ရက်တွေများတယ်။ ခေါက်ရေစားနဲ့ လုပ်နေရတာဆိုတော့ မထွက်ဘဲရပ်ထားရရင် ဒရိုင်ဘာရော၊ စပယ်ယာပါ ဝင်ငွေမရှိတော့ဘူး"လို့ အဝေးပြေးယာဉ်မောင်းတစ်ဦးက ဆိုသည်။

လက်ရှိဆီဈေးနှင့် ကားပြေးဆွဲလျင် ရရှိငွေ မမျှသောကြောင့် ကားများကို ခေါက်ရေခြားပြီး ပြေးဆွဲနေရခြင်းဖြစ်ကြောင်း ယာဉ်လိုင်းပိုင်ရှင်များက ဆိုထားသည်။

"ခရီးသည်ရတဲ့အပေါ်မူတည်ပြီး တစ်ရက်ခြား၊ နှစ်ရက်ခြား ထွက်နေရတယ်။ အရင်လို ခေါက်ရေစိပ် မဆွဲနိုင်ဘူး။ စိုက်သုံးနေရတာကြာတော့ ပိုင်ရှင်တွေလည်း မခံနိုင်တော့ဘူး"လို့ အဝေးပြေးယာဉ်လိုင်းပိုင်ရှင်တစ်ဦးက ပြောသည်။

ဒီဇယ်ဆီဈေးဟာ တစ်လီတာကို ၃,၂၀၀ကျပ် အထက်ရောက်ရှိနေပြီး တစ်လအတွင်း ၁,၀၀၀ ကျော်တက်သွားသော်လည်း ပြန်လည်ရရှိငွေအနေဖြင့် တက်လာခြင်းမရှိကြောင်း သိရသည်။

အဝေးပြေးကားတစ်စီးကို ယာဉ်မောင်းနှစ်ဦး၊ ယာဉ်နောက်လိုက် အနည်းဆုံးတစ်ဦးနှင့်ပြေးဆွဲနေကြခြင်း ဖြစ်သည်။

ယခုရက်များမှာ ရန်ကုန်မြို့မှ တစ်ရက်ကို ကားစီးရေ ၅၀၀ ကျော် ပြေးဆွဲနိုင်ပြီး ယခင်ထက် အစီးရေ ၁၀၀ လောက်လျော့သွားကြောင်း မှတ်တမ်းများအရ သိရသည်။

အဝေးပြေးကားပြေးဆွဲသည့် အစီးရေ လျော့သွားသောကြောင့် ယာဉ်လုပ်သား ၃၀၀ထက်မနည်း ဝင်ငွေမရှိသည့် အခြေအနေဖြင့် ရင်ဆိုင်နေရကြောင်း သိရှိရသည်။

#ymg/NN
#Yangon _ Media_ Group

#Local_News
Published _ 27 August 2022

၂၀၂၂ ခုနှစ် ဩဂုတ်လဆန်းမှ ဩဂုတ်လ ၂၆ ရက်အတွင်း တောင်ကိုရီးယားနိုင်ငံသို့ အလုပ်လုပ်ကိုင်ရန် မြန်မာလုပ်သား ၁၀၀၀ ကျော် စေလွှတ်ခဲ့ပြီးဖြစ်ကြောင်း တောင်ကိုရီးယားနိုင်ငံဆိုင်ရာ မြန်မာသံရုံးမှ သတင်းထုတ်ပြန်ချက်များအရ သိရသည်။

တောင်ကိုရီးယား လုပ်ငန်းခွင်များတွင် ကုန်ထုတ်လုပ်သားအဖြစ် အသစ်ဝင်ရောက် လုပ်ကိုင်မည့် လုပ်သားသစ် ၁၄၈ ဦးကို ဩဂုတ် ၂၅ ရက်က အင်ချွန်းအပြည်ပြည်ဆိုင်ရာလေဆိပ်တွင် မြန်မာအလုပ်သမားသံအရာရှိက ကြိုဆိုခဲ့ကြောင်းနှင့် မြန်မာလုပ်သားများ သိရှိသင့်သည့်အချက်များကို ပြောကြားပေးခဲ့ကြောင်း မြန်မာသံရုံးထုတ်ပြန်ချက်တွင် ဖော်ပြထားသည်။

မြန်မာလုပ်သားအများစုသည် တောင်ကိုရီးယား၊ ထိုင်း၊ မလေးရှားတို့သို့ သွားရောက်လုပ်ကိုင်မှု အများဆုံးဖြစ်ကြောင်း၊ တောင်ကိုရီးယားသို့ သွားရောက်မှု အများဆုံးမှာ စိုက်ပျိုးမွေးမြူရေး လုပ်ငန်းခွင်များတွင် ဝင်ရောက်လုပ်ကိုင်မှု အများဆုံးဖြစ်သည်။

တောင်ကိုရီးယားသို့ မွေးမြူရေးလုပ်သားအဖြစ်အသစ်ဝင်ရောက် လုပ်ကိုင်မည့် လုပ်သားသစ် ၁၀ ဦး၊ ကုန်ထုတ်လုပ်သားအဖြစ် ဝင်ရောက်လုပ်ကိုင်မည့် လုပ်သားသစ် ၁၃၉ ဦး၊ စုစုပေါင်း ၁၄၉ ဦး ကို သြဂုတ် ၂၃ ရက်တွင် လည်းကောင်း၊ ဩဂုတ် ၁၈ ရက်တွင် မြန်မာလုပ်သား ၁၆၈ ဦးကိုလည်းကောင်း စေလွှတ်ခဲ့ပြီးဖြစ်ရာ ဩဂုတ်လအတွင်း တောင်ကိုရီးယားသို့ မြန်မာလုပ်သားစေလွှတ်မှုမှာ ၁၀၀၀ ကျော်ရှိသွားပြီဖြစ်သည်ဟု သိရသည်။

#ymg/NN
#Yangon_Media_Group

#World_Politics
Published 27 August 2022

တရားမဝင် ငါးဖမ်းခြင်းများကို တားဆီးရန် နိုင်ငံတကာတာဝန်ထမ်းဆောင်နေတဲ့ အမေရိကန်ကမ်းရိုးတန်းကင်းလှည့်သင်္ဘောကို ဆော်လမွန်ကျွန်းက ကမ်းကပ်ခွင့်မပေးခဲ့ပါဘူး။

ဒါဟာ တရုတ်နိုင်ငံက ပစိဖိတ်ဒေသကိုလွှမ်းမိုးရန် ကြိုးပမ်းလာမှုကို စိုးရိမ်နေကြတဲ့အချိန်မှာ ဖြစ်ပွားခဲ့တာဖြစ်ပါတယ်။

ကင်းလှည့်သင်္ဘော'အိုလီဗာဟင်နရီ'ဟာ ပစိဖိတ်သမုဒ္ဒရာပြင်က ငါးဖမ်းခြင်းများကို ကင်းလှည့်စောင့်ကြပ်ရတဲ့တာဝန် ထမ်းဆောင်ခဲ့ပြီး သောကြာနေ့က တာဝန်ပြီးဆုံးခဲ့ပါတယ်။

အဲဒီနောက် ဆောလမွန်ကျွန်းရဲ့ ဂွာဒါကန်နဲလ်ကျွန်းမှာ ရိက္ခာနဲ့လောင်စာဖြည့်တင်းရန် ကြိုတင်စီစဉ်ထားတဲ့အတိုင်း ကမ်းကပ်ဖို့ချဉ်းကပ်ခဲ့ကြောင်း ဟိုနိုလူလူရှိ ကမ်းရိုးတန်းစောင့်ရုံးက ပြောကြားခဲ့ပါတယ်။

ဆောလမွန်ကျွန်းအစိုးရက သင်္ဘောကမ်းကပ်ဖို့ သံတမန်ရေးရာခွင့်ပြုချက် မထုတ်ခဲ့တာကြောင့် အိုလီဗာဟင်နရီသင်္ဘောဟာ ပါပူဝါနယူးဂီနီသို့ လမ်းကြောင်းပြောင်းလွှင့်ခဲ့ရတယ်လို့ ကမ်းရိုးတန်းစောင့်ရုံးက ရှင်းပြခဲ့ပါတယ်။

အိုလီဗာဟင်နရီဟာ သန္တာပင်လယ်နဲ့ ဆိုလိုမွန်ကျွန်းနားတဝိုက် ကင်းလှည့်ပြီးပြန်လာတဲ့နောက် ပါပူဝါနယူးဂီနီ မိုရက်စ်ဘီဆိပ်ကမ်းသို့ ရောက်ရှိခဲ့ပါတယ်။

ပစိဖိတ်ကျွန်းနိုင်ငံများတဝိုက် ကင်းလှည့်စောင့်ကြပ်ရေးတာဝန်မှာ ပါဝင်ခဲ့တဲ့ ဗြိတိန်တော်ဝင်ရေတပ် HMS Spey ဟာလည်း ဆော်လမွန်ကျွန်းမှာ ကမ်းကပ်ခွင့်မရခဲ့ကာ တစ်စုံတစ်ရာမှတ်ချက်ပြုခြင်း မရှိသေးပါဘူး။

"သင်္ဘောတာဝန်ကိစ္စတွေကို အစဉ်မပြတ်လေ့လာသုံးသပ်ပြီး လိုအပ်သလို ပြောင်းလဲတတ်ပါတယ်၊ လုံခြုံရေးကိစ္စရပ်များကြောင့် အသေးစိတ်ကိုတော့ ပြောပြလို့မရပါဘူး၊ တော်ဝင်ရေတပ်အနေနဲ့ ဆော်လမွန်ကျွန်းကို တစ်ချိန်ချိန်မှာ သွားရောက်လည်ပတ်နိုင်ဖို့ မျှော်လင့်ပါတယ်" လို့ တော်ဝင်ရေတပ်က ထုတ်ပြန်ခဲ့ပါတယ်။

ပစိဖိတ်ကျွန်းနိုင်ငံများတဝိုက် ကင်းလှည့်စောင့်ကြပ်ရေးတာဝန်အတွင်း အမေရိကန်၊ ဩစတြေးလျ၊ ဗြိတိန်၊ နယူးဇီလန်တိုက ဆော်လမွန်ကျွန်းအပါအဝင် ပါဝင်တဲ့ပစိဖိတ်ကျွန်းနိုင်ငံများအတွက် ဝေဟင်နဲ့ မြေပြင်စောင့်ကြည့်ရေးတို့ကို ထောက်ပံ့ကူညီခဲ့ပါတယ်။

တရုတ်က ပစိဖိတ်ဒေသမှာ ဩဇာလွှမ်းမိုးရန်ကြိုးပမ်းလာပြီး ဆော်လမွန်ကျွန်းဝန်ကြီးချုပ်'မာနာဆာဆိုဂါဗာရီ'က တရုတ်နဲ့ လုံခြုံရေးသဘောတူညီချက်တစ်ခုကို လက်မှတ်ရေးထိုးခဲ့ပြီး အမေရိကန်အပါအဝင် အိမ်နီးချင်းနိုင်ငံများကို သတိပေးလိုက်ပါတယ်။

ထိုလုံခြုံရေးသဘောတူညီချက်အရ ဩစတြေးလျအရှေ့မြောက်ကမ်းရိုးတန်းမှ ၂ ထောင်ကီလိုမီတာအတွင်း တရုတ်ရေတပ်အခြေစိုက်တစ်ခု ဆောက်လုပ်လာမှာကို စိုးရိမ်နေရပါတယ်။

ဆော်လမွန်ကျွန်းမှာ တရုတ်စစ်တပ်ရောက်ရှိလာခြင်းက ဩစတြေးလျနဲ့ နယူးဇီလန်တို့ သတိထားရမယ့်အခြေအနေဖြစ်တဲ့အပြင် အမေရိကန်အဓိကစစ်ရေးအခြေစိုက်တစ်ခုရှိရာ ဂူအမ်နဲ့လည်း နီးစပ်လာမှာဖြစ်ပါတယ်။

အမေရိကန်လွှတ်တော်အမတ်'မာရှာဘလက်ခ်ဘန်း'က ဆော်လမွန်ကျွန်းမှာ 'ဆိုဂါဗီရာ'နဲ့တွေ့ဆုံခဲ့ပေမယ့် ကမ်းကပ်ခွင့်မရတဲ့ ကိစ္စကို ပြောဆိုခဲ့လားဆိုတာတော့ မသိရပါဘူး။

ဆော်လမွန်ကျွန်းအပြင် ဖီဂျီနဲ့ ပါပူဝါနယူးဂီနီတို့ကိုလည်း သွားရောက်ခဲ့တဲ့ခရီးစဉ်က ပစိဖိတ်ဒေသကို အမေရိကန်အလေးထားကြောင်း ပြသချင်တဲ့ သဘောသာဖြစ်ပါတယ်။

ကမ်းရိုးတန်းကင်းလှည့်တပ်ဖွဲ့က ဆော်လမွန်ကျွန်းရဲ့ အချုပ်အခြာ အာဏာကို လေးစားကြောင်း၊ အနာဂတ်မှာ ဆက်ဆံရေးကောင်းမွန်လာဖို့ မျှော်လင့်ကြောင်း ထုတ်ပြန်ခဲ့ပါတယ်။

ကမ်းရိုးတန်းကင်းလှည့်တပ်ဖွဲ့မှ ဗိုလ်မှူး'ခရစ္စတင်ကမ်'က ကမ်းကပ်ခွင့်မရတာနဲ့ပတ်သက်ပြီး နောင်အခါ အမေရိကန်သင်္ဘောတွေကို ကမ်းကပ်ခွင့်ပေးဖို့မျှော်လင့်ကြောင်း ပြောကြားခဲ့ပါတယ်။

Source: AP News
#Yangon_Media_Group

#Local_News
Published - 27 August 2022

နစကဘက်မှ သွင်းကုန်လုပ်ငန်းရှင်တွေအပေါ် ကန့်သတ်ထားသည့် စည်းကမ်းချက်တွေ အပါအဝင် ဒေါ်လာငွေ ထိန်းချုပ်မှုတွေကြောင့် သြဂုတ်လ ၂၆ ရက်နေ့တွင်ဒေါ်လာနှင့် ဘတ်ဈေးနှုန်းမှာ စံချိန်တင် ထပ်မံ မြင့်တက်လာကြောင်း သိရသည်။

ဗဟိုဘဏ်က တစ်ဒေါ်လာကို ကျပ် ၂,၁၀၀ သတ်မှတ်ပေးထားသော်လည်း ပြင်ပဈေးကွက်တွင် တစ်ဒေါ်လာကို ကျပ် ၃,၁၀၀ ကျော်ထိ ဈေးနှုန်းမှာ စံချိန်တင် မြင့်တက်နေခြင်းဖြစ်သည်။

ယင်းအပြင် ဘတ်ဈေးနှုန်းသည်လည်း ဒေါ်လာဈေးနှုန်းနှင့်အတူ ဆက်လက်မြင့်တက် နေဆဲဖြစ်ပြီး သြဂုတ်လ ၂၆ ရက်နေ့မှာ တစ်ဘတ်ကို မြန်မာငွေ ၈၉ ကျပ်အထိ စံချိန်တင်ဈေးနှုန်း မြင့်တက်ခဲ့သည်။

ဘတ်ဈေးနှုန်းသည် မြန်မာနိုင်ငံမှ ထိုင်းနိုင်ငံဆီသို့ ပို့ကုန်တင်သွင်းရောင်းချနိုင်မှု ကျဆင်းလာခြင်း၊ ဘတ်ငွေလိုအပ်ချက် မြင့်တက်များပြားလာခြင်း၊ ဒေါ်လာဈေးနှုန်း မြင့်တက်လာခြင်းကြောင့် ဘတ်ဈေးနှုန်း လိုက်တက်လာခြင် စသည့်အချက်များကြောင့် ဈေးတက်လာခြင်းဖြစ်ကြောင်း သိရသည်။

ဒေါ်လာဈေးနှုန်းမှာ နစကဘက်မှ ဒေါ်လာအလုံအလောက် မရောင်းချပေးနိုင်သည့်အပြင် ဗဟိုဘဏ်မှ ပို့ကုန်လုပ်ငန်းရှင်များ၏ ပြင်ပပုဂ္ဂလိကဘဏ်များတွင် ဒေါ်လာဝယ်ယူနေသည့် စာရင်းပေးပို့ရန် ညွှန်ကြားလာသည့်အတွက် ဈေးနှုန်း ဆက်လက်မြင့်တက်လာခြင်းဖြစ်ကြောင်း သိရသည်။

Ymg/STH
#Yangon_Media_Group

#Local_News
Published-27 August 2022

ပြည်တွင်း၌ ငွေလဲနှုန်းအပြင် ပြောင်းရှားပါးလာသည့်အတွက် ပြောင်းဈေးများ ပြန်လည်မြင့်တက်လာကြောင်း ပြောင်းလုပ်ငန်းရှင်များထံမှ သိရသည်။

နှစ်စဉ်ယခုလိုအချိန်သည် အရောင်းအဝယ်ကောင်း ဈေးကောင်းရရှိသည့်ကာလဖြစ်သော်လည်း မြန်မာနိုင်ငံ၏ ငွေကြေးမူဝါဒများ၊ ပို့ကုန်၊ ထုတ်ကုန် မူဝါဒအပြောင်းအလဲများကြောင့် ပြောင်းဈေးမှာ ထိုးကျခဲ့ပြီး ငွေလဲနှုန်း ၁၈၅၀ မှ ၂၁၀၀ သို့ ပြောင်းလဲလိုက်သည့်အရှိန်ကြောင့် လက်ရှိတွင် ပြောင်းဈေးမှာ အနညးငယ်ပြန်လည်မြင့်တက်လာခြင်းဖြစ်ကြောင်း သိရသည်။

လာမည့်နှစ်တွင် ပြောင်းစိုက်ဧကလျော့မည်ဖြစ်သော်လည်း ဝယ်လိုအားလျော့သွားမည် မဟုတ်ကြောင်း၊ ပြည်ပသို့ ပြောင်းတင်ပို့သည့်နိုင်ငံမှာ မြန်မာနိုင်ငံတစ်ခုတည်းရှိသည့်အတွက် ဝယ်လိုအားကောင်းလာမည်ဖြစ်ကြောင်းကုန်သည်များက ခန့်မှန်းထားသည်။

ယခင်က ပြောင်းတစ်ပိသာလျှင် ၈၀၀ ဝန်းကျင်သာရှိခဲ့ပြီး လက်ရှိပြောင်းတစ်ပိသာဈေးနှုန်းမှာ ၉၄၀ မှ ၉၆၀ ကျပ်ရှိပြီး စက်တင်ဘာလ လဆန်းပိုင်းတွင် ပြောင်းအသစ်ထွက်ရှိမည်ဖြစ်ကြောင်း သိရသည်။ ပြီးခဲ့သည့် ၂၀၂၁ ခုနှစ်တွင် ထိုင်းနိုင်ငံသို့တင်ပို့မှုမှာ စုစုပေါင်း ၄သန်းနီးပါးအထိရှိခဲ့ပြီး လက်ရှိအချိန်တွင် အကြောင်းအမျိုးမျိုးကြောင့် တင်ပို့မှုနောက်ကျနေသည့်အတွက် ပုံမှန်အခြေအနေသို ပြန်လည်မရောက်ရှိသေးကြောင်းသိရသည်။

ပြည်တွင်း၌ တစ်နှစ်လျှင် စိုက်ပျိုးထုတ်လုပ်သည့် ပြောင်းတန်ချိန်မှာ ၂ ဒသမ ၃ သန်းနှင့် ၂ ဒသမ ၆ သန်းကြားထွက်ရှိပြီး ယခုနှစ်တွင် အထွက်နှုန်းလျော့ကျနေခြင်းဖြစ်ကြောင်း သိရသည်။

Ymg/STH
#Yangon_Media_Group

#Health_Tips
Published 27 August 2022

လူအတော်များများ စပျစ်သီးကြိုက်တတ်ကြပါတယ်။

နယူးအင်္ဂလန်အနောက်ပိုင်းတက္ကသိုလ်မှ သုတေသနအသစ်ပြုချက်အရ စပျစ်သီးစားသုံးခြင်းဖြင့် နာတာရှည်ရောဂါတွေကို ကာကွယ်ပေးပြီး လူ့ဘဝသက်တမ်း ၅ နှစ်လောက် ပိုရှည်စေကြောင်း သိရပါတယ်။

စပျစ်သီးမှာပါဝင်တဲ့ ဓာတုပစ္စည်းတွေက အူလမ်းကြောင်းထဲရှိ ကောင်းကျိုးပြု ဘက်တီးရီးယားများကို တိုးများစေပြီး ကိုလက်စ်ထရောလျှော့ချပေးပါတယ်။

အောက်ဆီဒင့်ဆန့်ကျင်ပစ္စည်းများ ပါဝင်တာကြောင့် ရောင်ရမ်းခြင်းကိုလျှော့ချပေးကာ နှလုံးရောဂါ၊ ကင်ဆာရောဂါဖြစ်နိုင်ချေများကို ကာကွယ်ပေးပါတယ်။

လမ်းဘေးမုန့်ပဲသရေစာတွေမှာပါဝင်တဲ့ အဆီဓာတ်တွေနဲ့ အချိုဓာတ်တွေကို လျင်မြန်စွာချေဖျက်နိုင်ကြောင်း သုတေသီများ အခိုင်အမာဆိုထားပါတယ်။

အစားအစာအားလုံးက ခန္ဓာကိုယ်ထဲက အင်္ဂါတွေနဲ့ စနစ်တွေအပေါ် သက်ရောက်ပေမယ့်လို စပျစ်သီးရဲ့ကောင်းကျိုးသက်ရောက်မှုတွေကတော့ တကယ်ကိုအံ့အားသင့်စရာဖြစ်စေပါတယ်။

ကြွက်များဖြင့် စမ်းသပ်ကြရာမှာတော့ အချို့ကြွက်များကို အနောက်တိုင်းနိုင်ငံများမှာ အစားများတဲ့ အဆီအစိမ့်အစာများ ကျွေးခဲ့ပြီး အချို့ကြွက်တွေကိုတော့ စပျစ်သီးအမှုန့်များ နေ့စဉ်ကျွေးခဲ့ပါတယ်။

အဲဒီနောက် စပျစ်သီးအမှုန့်စားသုံးရတဲ့ကြွက်တွေက အသည်းအဆီဖုံးခြင်းမျိုး မဖြစ်ပေါ်ခဲ့ဘဲ အခြားကြွက်တွေထက် သက်တမ်းပိုမိုကြာရှည်စွာ နေထိုင်ခဲ့ရကြောင်း တွေ့ရှိရပါတယ်။

လူ့သက်တမ်းနဲ့တွက်ကြည့်ရင်တော့ ၄ နှစ်မှ ၅ နှစ်သက်တမ်းမျှရှိနေတာဖြစ်ပါတယ်။

ဒါ့အပြင် စပျစ်သီးက အာရုံကြောမျှင်တွေရဲ့ လုပ်ဆောင်ချက်များကို တိုးတက်စေပြီး အယ်လ်ဇိုင်းမားရောဂါမဖြစ်အောင် ကာကွယ်ပေးနိုင်ကြောင်း၊ နှလုံးဖောက်ခြင်းနဲ့ လေဖြတ်ခြင်းတိုကိုလည်း ကာကွယ်ပေးနိုင်ကြောင်း တွေ့ရှိရပြန်တယ်။

စမ်းသပ်ချက်များအရ အဆီများတဲ့အစားအစာတွေ စားသုံးသူတွေတောင် စပျစ်သီးစားသုံးပေးပါက ခန္ဓာကိုယ်အတွင်း မကောင်းတဲ့ဖြစ်စဉ်များကို ကာကွယ်ပေးပြီး အသက်ရှည်စေမှာဖြစ်ပါတယ်။

Source: The Jerusalem Post
#Yangon_Media_Group

#Local_News
Published_ 27 Aug 2022

စိုက်ပျိုးသီးနှံများ အောင်မြင်ဖြစ်ထွန်းရန်၊ ကျေးလက်ဒေသများ ဖွံ့ဖြိုးတိုးတက်စေရန် ဆောင်ရွက်ရာတွင် ဆည်ရေပေးဝေမှုလုပ်ငန်းသည် လွန်စွာအရေးပါသည့်အတွက် နိုင်ငံတော်အစိုးရအနေဖြင့် ဆည်မြောင်းစီမံကိန်းများကို အလေးထား ရင်းနှီးမြှုပ်နှံပေးလျက်ရှိကြောင်း နစကဥက္ကဌ ဗိုလ်ချုပ်မှူးကြီးမင်းအောင်လှိုင်က ပြောကြားခဲ့ပါတယ်။

ပူးပေါင်းပါဝင် ဆည်မြောင်းစနစ်ဖြင့် လယ်ယာကဏ္ဍနှင့် တောင်သူတို့၏ လူမှုစီးပွားဘဝ မြှင့်တင်ရေးဆွေးနွေးပွဲ ဖွင့်ပွဲအခမ်းအနားကို ယမန်နေ့နံနက်ပိုင်းတွင် နေပြည်တော် ဇေယျာသီရိမြို့နယ်ရှိ စိုက်ပျိုးပညာပေးရေးနှင့် ကျေးလက်ဒေသဖွံ့ဖြိုးရေး သင်တန်းကျောင်း၌ ကျင်းပပြုလုပ်ခဲ့ပါတယ်။

အခမ်းအနားတွင် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က နိုင်ငံတော်ဖွံ့ဖြိုး တိုးတက်ရေးနှင့် သာယာဝပြောပြီး စားရေရိက္ခာပေါများသည့်နိုင်ငံ ဖြစ်ပေါ်လာစေရေး အတွက် အဓိကကျသည့် လယ်ယာကဏ္ဍဖွံ့ဖြိုးတိုးတက်ရေးကို ဦးတည်ချက်နှင့် မူဝါဒများ ချမှတ် အကောင်အထည်ဖော် ဆောင်ရွက်နေတယ်လို့ ဆိုပါတယ်။

မြန်မာနိုင်ငံသည် ရေအရင်းအမြစ် ပေါများကြွယ်ဝသည့် နိုင်ငံတစ်ခုဖြစ်ပြီး နိုင်ငံ၏ အလယ်အတိုင်း မြောက်မှတောင်သို့ စီးဆင်းနေသည့် ဧရာဝတီ၊ ချင်းတွင်း၊ သံလွင်နှင့် စစ်တောင်းမြစ်ကြီး ၄ စင်းတွင် မြစ်လက်တက်များစွာရှိပြီး နှစ်စဉ်ရေက ပေသန်းပေါင်း ၈၇၆ ခန့် ပင်လယ်ထဲသို့ စီးဆင်းဝင်ရောက်လျက်ရှိပါတယ်။

အဆိုပါမြစ်ကြီးများနှင့် မြစ်လက်တက်များပေါ်တွင် ဆည်တမံ ၂၄၅ ခုနှင့် ရေတင်လုပ်ငန်း ၂၁၀ ခုတို့ တည်ဆောက်ထားပြီး နှစ်စဉ်ပင်လယ်ထဲသို စီးဆင်းလျက်ရှိသည့် ရေထုထည်ပမာဏ၏ ၂ ဒသမ ၃ ရာခိုင်နှုန်းခန့်ကို အသုံးပြုလျက်ရှိတယ်လို့ ဆိုပါတယ်။

တစ်နိုင်ငံလုံးတွင် သီးနှံမျိုးစုံ စိုက်ဧက ၃၃ ဒသမ ၂ သန်းခန့်ရှိပြီး မိုးကောင်း ရေသောက်၊ ဆည်ရေသောက်၊ မြစ်ရေတင်စိုက်ပျိုးမြေသည် ၂၅ ဒသမ ၅၁၇ သန်းခန့်ရှိပြီး မိုးစပါးစိုက်ဧက ၁၅ သန်းခန့်နှင့် နွေစပါးစိုက်ဧက ၃ သန်းခန့်ရှိကြောင်း သိရပါတယ်။

အဆိုပါ စိုက်ပျိုးမြေများထဲမှ ရေသွင်းစိုက်ဧရိယာဧက ၆ ဒသမ ၇၁ သန်းရှိတဲ့အတွက် သီးနှံမျိုးစုံ စိုက်ပျိုးနေသည့် အသားတင်စိုက်ဧရိယာဧက ၃၃ ဒသမ ၂ သန်း၏ ၂၀ ရာခိုင်နှုန်းကျော်ကို ဆည်ရေပေးဝေလျက်ရှိတယ်လို့ ဆိုပါတယ်။

ယခုနောက်ပိုင်း ကုန်ကျစရိတ်သက်သာသည့် Poly Ethylene လို ပလတ်စတစ် အစများကို အသုံးပြုလာနိုင်ပြီဖြစ်သည့်အတွက် ရေပေးမြောင်းများကို လိုင်စင်ပြုလုပ်ပါက ဆောင်ရွက်ရန်လွယ်ကူပြီး အချိန်တိုအတွင်း ပြီးစီးနိုင်သည့်အပြင် ရေသွယ်ယူရာတွင် လေလွင့်ဆုံးရှုံးမှုမရှိသလောက် နည်းပါးသွားစေမှာ ဖြစ်ပါတယ်။

ရေပေးဝေသည့်မြောင်းများ၊ အဆောက်အအုံများ ရေရှည်တည်တံ့ပြီး ရေပေးဝေမှု စနစ်များ တိုးတက်လာစေရေးအတွက် သက်ဆိုင်ရာတောင်သူများ စုဖွဲ့ကာဆည်ရေ စီမံခန့်ခွဲမှု လုပ်ငန်းစဉ်များတွင် ပူးပေါင်းပါဝင်ဆောင်ရွက်လာစေရန် သက်ဆိုင်ရာရေသောက် မြောင်းများအလိုက် ရေအသုံးချသူများအဖွဲ့ (Water User Group-WUG) များကို ဖွဲ့စည်းခြင်း၊ အဆိုပါအဖွဲ့များအချင်းချင်း ပူးပေါင်းဆောင်ရွက်နိုင်စေရန်နှင့် ပိုမိုကျယ်ပြန့် အားကောင်းလာစေရန် ရေအသုံးချသူများအသင်း (Water User Association-WUA) အဖြစ်သို့ အဆင့်မြှင့်တိုးချဲ့ ဖွဲစည်းခြင်းများ ဆောင်ရွက်လျက်ရှိကြောင်းသိရပါတယ်။

ယခုစနစ်တွင် တောင်သူများကိုယ်တိုင် ပါဝင်စီမံဆောင်ရွက်ရသည့်အတွက် တောင်သူအချင်းချင်းကြား ရေကြောင့်ဖြစ်ပွားရသည့် ပဋိပက္ခများ ကင်းဝေးခြင်း၊ ဆည်ရေကို အကျိုးရှိစွာ အသုံးပြုနိုင်မည်ဖြစ်သည့်အတွက် ရေအလေအလွင့်နည်းပါးပြီး ဆည်ရေစိုက်ဧရိယာ ပိုမိုတိုးချဲ့ ပေးဝေလာနိုင်ခြင်း စတဲ့အကျိုးကျေးဇူးများကို ရရှိလာစေမှာ ဖြစ်ပါတယ်။

ygm_mnn

#Yangon_Media_Group