#LocalNews
Published_21 April 2022

မြောက်ဦးမှာ ကားဂိတ်ကို ရွှေ့ပြောင်းမှာဖြစ်တာကြောင့် ကားဂိတ်နဲ့အတူ နန်းရာကုန်းပတ်ဝန်းကျင်မှာရှိတဲ့ ဆိုင်ခန်းတွေကိစ္စကလည်း ကျွဲကူးရေပါဆိုသလို အဆင်ပြေသွားမှာဖြစ်တယ်လို့ ရှေးဟောင်းသုတေသနနှင့် အမျိုးသားပြတိုက်ဦးစီးဌာန(မြောက်ဦးဌာနခွဲ)က သိရပါတယ်။

#Yangon_Media_Group

#DailyNews
Published -23 April 2022

၁။ မြောက်ဦး နန်းရာကုန်းပတ်ဝန်းကျင်ရှိ ဆိုင်ခန်းများကိစ္စ သက်ဆိုင်ရာက ဆောင်ရွက်ပေးမည်

၂။ ပူတာအိုဒေသ ရေခဲတောင်တက်ခရီးသွားလုပ်ငန်းများ ၈၀ ရာခိုင်နှုန်းအထိ ကျဆင်းခဲ့

၃။ မိုးလေဝသ သတင်း

၄။ ကမ္ဘောဒီးယားခရီးသွားလုပ်ငန်း ပြန်လည်ဦးမော့လာရေး ပြန်လည်မွမ်းမံထားသည့်
အန်ကာဝတ်ဘုရားကျောင်းက အဓိကမျှော်လင့်ချက်ဖြစ်လာ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

Published 23 April 2022

အကြင်နာအနမ်းပေးခြင်းက သင့်ရဲ့သွားနဲ့ခံတွင်းကိုကျန်းမာစေပြီး ခံတွင်းနံ့ဆိုးခြင်းမှကာကွယ်ပေးနိုင်ကြောင်း သွားဆရာဝန်တစ်ဦးက အကြံပြုလိုက်ပါတယ်။

ဒါပေမဲ့အလျင်စလိုနမ်းရှိုက်တာမျိုးကတော့ ထိရောက်မှုရှိမှာ မဟုတ်ပါဘူး။

နိုင်ငံတကာသွားဘက်ဆိုင်ရာအဖွဲ့အစည်းမှ ဒေါက်တာ'ခါလိကာဆမ်'က တစ်နေ့ကို ၄ မိနစ်မျှ ထွေးပွေ့နမ်းရှိုက်သင့်ကြောင်း အကြုံပြုထားပါတယ်။

အကြင်နာပေးခြင်းမှရရှိလာတဲ့အကျိုးကျေးဇူးက ပါးစပ်ထဲမှာတံတွေးတွေ ပိုမိုထွက်ရှိလာစေတာဖြစ်ပါတယ်။

တံတွေးက အစာဝါးခြင်း၊ အရသာခံခြင်း၊ မျိုးချခြင်းနဲ့ ပါးစပ်ထဲရှိ ပိုးမွှားများတိုက်ထုတ်ခြင်းတို့ကိုပြုလုပ်ရာမှာ အရေးပါပါတယ်။

ဒါ့အပြင် သွားကြားတွေထဲက အက်ဆစ်ဓာတ်တွေကိုလည်း ချေဖျက်နိုင်ပြီး သွားပိုးစားခြင်းအန္တရာယ်ကိုလည်း လျှော့ချပေးပါတယ်။

အချစ်ရေးကိစ္စကံမကောင်းတဲ့သူတွေအတွက်ကတော့ သကြားမပါတဲ့ပီကေဝါးစားခြင်းက တံတွေးပိုမိုထွက်ရှိစေမှာဖြစ်ပါတယ်။

အကြင်နာပေးခြင်းရဲ့နောက်ထပ်အကျိုးကျေးဇူးတစ်ခုက ကိုယ်ခံအားစနစ်ကိုကူညီပေးတာဖြစ်ကြောင်း ဒေါက်တာ'ကာဆမ်'က ဆိုပါတယ်။

နမ်းရှိုက်စဉ် တစ်ဦးနဲ့တစ်ဦးတံတွေးဖလှယ်သွားတာကြောင့် ပဋိပစ္စည်း(antibody)တွေ ပိုမိုထွက်ရှိစေပြီး ရောဂါပိုးကူးစက်ခြင်းမှကာကွယ်ပေးနိုင်ပါတယ်။

ခံတွင်းထဲမှာ အပူနာပေါက်ခြင်း၊ ကူးစက်ရောဂါဖြစ်ပွားခြင်းနဲ့ ခံတွင်းကျန်းမာရေးဆိုးတဲ့သူတွေအနေနဲ့ အကြင်နာပေးခြင်းဖြင့် ဝေဒနာသက်သာစေပါတယ်။

ဒါပေမဲ့လည်း သွားတိုက်ခြင်းနဲ့ ခံတွင်းသန့်ရှင်းရေးကိုတော့ ဆက်လက်ပုံမှန်ဆောင်ရွက်သင့်ကြောင်း တိုက်တွန်းထားပါတယ်။

ဗြိတိန်နိုင်ငံသားတွေက ခံတွင်းကျန်းမာရေးအတွက် အခြားအစားထိုးနည်းလမ်းတွေရှာဖွေနေတဲ့အချိန်မှာ အခုလိုအကြံပြုချက်တွေပေါ်ထွက်လာတာဖြစ်ပါတယ်။

တရားဝင်ဖော်ပြချက်များအရ ပြီးခဲ့တဲ့ ၂ နှစ်အတွင်း အင်္ဂလိပ်လူမျိုး ၃ ပုံ ၁ ပုံခန့်သာ သွားဆေးခန်းကိုလာရောက်ခဲ့ကြပါတယ်။

ကိုဗစ်ကပ်ရောဂါလော့ဒေါင်းကာလအတွင်း အခြားလုပ်ငန်းများလိုပဲ သွားဆေးခန်းတွေဟာလည်း ပိတ်ပင်ထားကြရတာကြောင့် ပြည်သူတွေအနေနဲ့ ခံတွင်းကျန်းမာရေးစစ်ဆေးဖို့ခက်ခဲနေခဲ့ကြပါတယ်။

Source: DailyMail

#Local_News
Published_ 23 April 2022

ရခိုင်ပြည်နယ်က ယာယီစခန်းတွေမှာ နေရပ်စွန့်ခွာသူ ၂၈,၀၀၀ ကျော်နေထိုင်နေတဲ့ တန်းလျားရှည်အလုံး ၅၅၀ ဟာ မိုးရာသီမတိုင်ခင်ပြုပြင်ဖို့ လိုအပ်နေတယ်လို့ ကုလသမဂ္ဂလူသားချင်းစာနာမှုဆိုင်ရာညှိနှိုင်းရေးရုံး(UNOCHA) က ထုတ်ပြန်ထားပါတယ်။

တန်းလျားတွေပြုပြင်ဖို့အတွက် အမေရိကန်ဒေါ်လာ ၄.၇ သန်း လိုအပ်တယ်လို့ UNOCHA ရဲ့ထုတ်ပြန်ချက်မှာ ဆက်လက်ဖော်ပြထားပါတယ်။

မြန်မာနိုင်ငံအတွင်း လူသားချင်းစာနာမှုဆိုင်ရာ အကူအညီတွေပေးဖို့အတွက် ရန်ပုံငွေလိုအပ်ချက်ဟာ ၂၀၂၂ ခုနှစ်မှာ အမေရိကန်ဒေါ်လာ ၇၈၇ သန်းရရှိဖို့လိုအပ်ပြီး ၃၉ သန်းသာ ရရှိထားတယ်လို့ဆိုပါတယ်။

မြန်မာနိုင်ငံအတွင်း လူသားချင်းစာနာမှုဆိုင်ရာအကူအညီတွေ ပေးဖို့အတွက် ရန်ပုံငွေရရှိမှုဟာ ၂၀၂၂ ခုနှစ်အတွင်း တောင်းခံထားတဲ့ပမာဏနဲ့ယှဉ်ရင် နည်းပါးနေဆဲ ဖြစ်ပါတယ်။ဧပြီလ ၁၁ ရက်အထိ စာရင်းများအရ နိုင်ငံတစ်ဝန်းမှာ ပြည်တွင်းနေရပ်စွန့်ခွာ နေထိုင်သူပေါင်း ၉၁၂,၇၀၀ ဦးခန့်ရှိတယ်လို့ ဆိုပါတယ်။

ဒီအထဲမှာ ၂၀၂၁ ခုနှစ် ဖေဖော်ဝါရီလနောက်ပိုင်း အိုးအိမ်စွန့်ခွာရသူဦးရေ ၅၆၆,၁၀၀ ပါဝင်ပါတယ်။ ချင်းပြည်နယ်၊ စစ်ကိုင်းတိုင်းဒေသကြီးနဲ့ မကွေးတိုင်းဒေသကြီးတွေမှာ နေရပ်စွန့်ခွာ ရသူဦးရေဟာ လူ ၃၀၀,၀၀၀ ကျော်နိုင်ရှိတယ်လို့ ခန့်မှန်းထားပါတယ်။

စားနပ်ရိက္ခာဖူလုံရေး အကူအညီပေးတဲ့မိတ်ဖက်အဖွဲ့အစည်းတွေဟာ လူဦးရေ ၁.၄ သန်းထံကို အရေးပေါ်အကူအညီတွေ ပေးထားပြီးပါပြီ။ ဒါဟာ ၂၀၂၂ ခုနှစ်အတွက် ဒီကဏ္ဍမှာ လျာထားတဲ့ သုံးလစာပမာဏလည်းဖြစ်တယ်လို့ ဆိုပါတယ်။

မိုးတွင်းကာလမ‌ရောက်ခင် ဘေးအန္တရာယ်ကျရောက်နိုင်ဖွယ်ရှိရာဒေသတွေမှာ အရေးပေါ်အခြေအနေတွေကြုံလာရင် အချိန်နဲ့တပြေးညီ ထိထိရောက်ရောက်တုံ့ပြန်ဆောင်ရွက်နိုင်ဖို့ ကြိုတင်ပြင်ဆင်ရေးအစီအစဉ်တွေကို ပြင်ဆင်နေပြီလို့လည်း UNOCHA က ထုတ်ပြန်ချက်မှာဖော်ပြထားပါတယ်။

ymg-mnn
#Yangon_Media_Group

#WorldHealth
Published- 23 April 2022

CureVac နဲ့ GSK ကုမ္ပဏီတိုဟာ လက်ရှိကိုဗစ်မျိုးဗီဇကွဲနှစ်မျိုးကို ပစ်မှတ်ထားကာကွယ်နိုင်မယ့်ကာကွယ်ဆေးကို စမ်းသပ်ထုတ်လုပ်လျက်ရှိပြီး ကြွက်များမှာစမ်းသပ်လေ့လာခဲ့ရာမှာ အတော်လေးထိရောက်မှုရှိခဲ့ကြောင်း CureVac ကုမ္ပဏီကပြောကြားခဲ့ပြီး ပြိုင်ဘက်ကာကွယ်ဆေးကုမ္ပဏီတွေကို အမီလိုက်နိုင်ဖို့ ရည်ရွယ်ထားပါတယ်။

ဘီတာနဲ့ ဒယ်လ်တာမျိုးဗီဇကွဲနှစ်မျိုးကို ကာကွယ်ပေးနိုင်မယ့် ကိုဗစ်ကာကွယ်ဆေးကို ကြွက်များမှာ စမ်းသပ်ကြည့်ရာမှာ မျိုးဗီဇကွဲတစ်မျိုးတည်းကို ကာကွယ်ပေးမယ့် ကာကွယ်ဆေးကဲ့သို့ ပဋိပစ္စည်း(antibody)ထွက်ရှိခဲ့ကြောင်း တွေ့ရှိခဲ့ကြပါတယ်။

"ဒီကာကွယ်ဆေးထိုးထားတဲ့ကြွက်တွေကို ဘီတာနဲ့ ဒယ်လ်တာမျိုးဗီဇကွဲတွေနဲ့ ကူးစက်စေတဲ့အခါ ကာကွယ်ဆေးက ကြွက်တွေထဲက ဗိုင်းရပ်စ်ပမာဏအများအပြားကို သိသိသာသာလျှော့ချပေးနိုင်ခဲ့ပါတယ်" လို့ CureVac ကုမ္ပဏီက ကြာသပတေးနေ့က ပြောကြားလိုက်ပါတယ်။

မျိုးဗီဇကွဲနှစ်မျိုး ကာကွယ်ဆေးထိုးနှံခြင်းက မျိုးဗီဇကွဲတစ်မျိုးကာကွယ်ဆေးထိုးနှံခြင်းထက် ပိုမိုထိရောက်စွာ ကာကွယ်နိုင်တယ်လို့ တွေ့ရှိထားပေမယ့် လူသားတွေနဲ့စမ်းသပ်ဖို့ကိုတော့ နောက်ထပ်လိုအပ်ချက်တွေ ရှိနေပါသေးတယ်။

ဂျာမနီကုမ္ပဏီ CureVac က ကိုဗစ်ကာကွယ်ဆေးကိုထုတ်လုပ်ရာမှာ ဘိုင်အိုတက်ခ်-ဖိုင်ဇာကာကွယ်ဆေးနဲ့ မိုဒါနာကာကွယ်ဆေးနည်းတူ mRNA နည်းပညာကိုအသုံးပြုပြီးထုတ်လုပ်ပါတယ်။

ပြီးခဲ့တဲ့နှစ်က ဈေးကွက်ထဲမထိုးဖောက်နိုင်ခဲ့တာကြောင့် CureVac က GlaxoSmithKline(GSK)နဲ့ လက်တွဲခဲ့ပြီး ကာကွယ်ဆေးကို အဆင့်မြှင့်ထုတ်လုပ်လာခဲ့ပါတယ်။
ဂျာမနီနိုင်ငံက နောက်ထပ်ပြည်သူ့ကျန်းမာရေးအခြေအနေတွေမှာ ကာကွယ်ဆေးအဆင်သင့်ရှိနေဖို့ mRNA ကာကွယ်ဆေးပေါင်းသန်း ၈၀ ကျော်ထုတ်လုပ်ပေးဖို့ CureVac, GSK ကုမ္ပဏီတို့နဲ့ ယခုလအတွင်းစာချုပ်ချုပ်ဆိုခဲ့ပြီး ယုံကြည်မှုသဘောကိုပြသခဲ့ပါတယ်။

အိုမီခရွန်နဲ့ နောက်ထပ်ဖြစ်ပေါ်လာနိုင်တဲ့မျိုးဗီဇကွဲတွေကို ပိုမိုကာကွယ်နိုင်ဖို့ မျိုးဗီဇကွဲသီးသန့်ကာကွယ်ဆေးတွေထုတ်လုပ်ရာမှာ ဘိုင်အိုတက်ခ်-ဖိုင်ဇာနဲ့ မိုဒါနာတိုက ဦးဆောင်လျက်ရှိပါတယ်။

CureVac က မတ်လကုန်တုန်းက မူလကိုရိုနာဗိုင်းရပ်စ်ကိုပစ်မှတ်ထားကာကွယ်နိုင်မယ့် ကာကွယ်ဆေးကို လူသားတွေမှာ စတင်စမ်းသပ်ခဲ့ပါတယ်။

Source: Reuters.
#Yangon_Media_Group

#WorldBusiness
Published 23 April 2022

စားအုန်းဆီအများဆုံးထုတ်လုပ်ရာ အင်ဒိုနီးရှားနိုင်ငံမှာ အသုံးအများဆုံးဟင်းရွက်ဆီတင်ပို့ခွင့်ကို ရပ်ဆိုင်းပိတ်ပင်လိုက်ပြီဖြစ်ကြောင်း သောကြာနေ့က ကြေညာလိုက်ပါတယ်။

အခုလိုကြေညာချက်ကြောင့် ကမ္ဘာ့စားသောက်ကုန်ဈေးနှုန်းမြင့်တက်နေတဲ့အခြေအနေ ပိုမိုဆိုးရွားလာဖွယ်ရှိနေပါတယ်။

ဟင်းချက်ဆီတွေနဲ့ မုန့်အမျိုးမျိုး အလှကုန်ပစ္စည်းတွေမှာပါ ကျယ်ကျယ်ပြန့်ပြန့်အသုံးပြုလေ့ရှိတဲ့ ကုန်ကြမ်းဆီတွေကို တင်ပို့ခြင်းရပ်ဆိုင်းလိုက်ပါက တစ်ကမ္ဘာလုံးရှိ စားသောက်ကုန်ထုတ်လုပ်ရေးလုပ်ငန်းတွေမှာ ကုန်ကျစရိတ်များပြားလာနိုင်ပြီး အစိုးရတွေအနေနဲ့ ဟင်းရွက်ဆီကို အစားအစာအတွက်အသုံးပြုမှာလား ဒါမှမဟုတ် ဇီဝလောင်စာအတွက် အသုံးပြုမှာလားဆိုတာ မဖြစ်မနေ ဆုံးဖြတ်ရတော့မှာဖြစ်ပါတယ်။

တစ်ကမ္ဘာလုံးရှိ စားအုန်းဆီထုတ်လုပ်မှုတဝက်ကျော်လောက်ကို အင်ဒိုနီးရှားမှရရှိနေတာဖြစ်ပါတယ်။

အင်ဒိုနီးရှားသမ္မတ 'ဂျိုကိုဝီဒိုဒို' က ရုပ်သံလွှင့်ပြောကြားရာမှာ ကောက်ပဲသီးနှံအဓိကထွက်ရှိရာယူကရိန်းကို ရုရှားတို့ကျူးကျော်လိုက်တာကြောင့် ကမ္ဘာ့စားသောက်ကုန်ဈေးနှုန်း အဆမတန်မြင့်တက်လာခဲ့တဲ့အခြေအနေမှာ အင်ဒိုနီးရှားပြည်သူတွေဆီမှာ စားသောက်ကုန်များအဆင်သင့်ရှိနေစေချင်ကြောင်း ပြောကြားခဲ့ပါတယ်။

"ပြည်တွင်းဈေးကွက်မှာ ဟင်းချက်ဆီ သက်သက်သာသာနဲ့ လုံလုံလောက်လောက်ရှိနေဖို့ စောင့်ကြည့်ထိန်းချုပ်သွားမှာပါ"

အင်ဒိုနီးရှားရဲ့ကြေညာချက်ကြောင့် တစ်ကမ္ဘာလုံးအပြင် အဓိကဝယ်ယူသူဖြစ်တဲ့ အိန္ဒိယနိုင်ငံကိုပါ ထိခိုက်လာစေပါတယ်။

အခြားဟင်းရွက်ဆီဈေးနှုန်းကိုလည်း ဧပြီ ၂၈ ရက်နေ့ကစပြီး မြင့်တက်သွားမှာဖြစ်ပါတယ်။
ဒုတိယအသုံးအများဆုံး ပဲပိစပ်ဆီကလည်း ၄.၅ ရာခိုင်နှုန်းဈေးတက်လာကာ တစ်ပေါင်ကို ဒေါ်လာ ၈၃.၂၁ ပြား စံချိန်တင်မြင့်တက်လာခဲ့ပါတယ်။

စားအုန်းဆီမြင့်တက်လာရတဲ့ အဓိကအကြောင်းအရင်းက ဝယ်လိုအားများလာခြင်းနဲ့ အဓိကထုတ်လုပ်တဲ့ အင်ဒိုနီးရှားနဲ့ မလေးရှားနိုင်ငံတို့က ထုတ်လုပ်မှုနည်းပါးလာတာကြောင့် ဖြစ်ပါတယ်။

အိမ်သုံးပစ္စည်းများနဲ့ စားသောက်ကုန်ထုတ်လုပ်ရေးကုမ္ပဏီတွေဖြစ်တဲ့ Procter & Gamble, Nestle, Unilever တို့ဟာ စားအုန်းဆီအများဆုံးဝယ်ယူသူတွေဖြစ်ပါတယ်။

Oreo ကွတ်ကီးထုတ်လုပ်တဲ့ Mondelez International ကုမ္ပဏီဟာ တစ်ကမ္ဘာလုံးရှိစားအုန်းဆီ ၀.၅ ရာခိုင်နှုန်းကို ဝယ်ယူထားတာဖြစ်ပါတယ်။

ပဲပိစပ်အဓိကတင်ပို့ရာ အာဂျင်တီးနားက ပဲပိစပ်ဆီနဲ့ အစားအစာများကို နိုင်ငံခြားသို့တင်ပို့ရောင်းချခြင်းအား မတ်လလယ်လောက်က ရပ်ဆိုင်းလိုက်ပါတယ်။

ယူကရိန်းနိုင်ငံကို ရုရှားတို့ ကျူးကျော်လိုက်တာကြောင့် ထိုဒေသမှနေကြာဆီတင်ပို့ခြင်းများ ရပ်ဆိုင်းလိုက်ရပြီး ကမ္ဘာ့စားသုံးဆီဈေးကွက် ဂယက်ရိုက်ခတ်သွားခဲ့ပါတယ်။

အင်ဒိုနီးရှားနိုင်ငံမှာ စားသုံးဆီဈေးနှုန်း ၄၀ ရာခိုင်နှုန်းကျော်မြင့်တက်လာပြီး တစ်လီတာကို လက်လီရောင်းချဈေး ၁.၈၄ ဒေါ်လာရှိလာပါတယ်။

အချို့ဒေသတွေမှာဆိုရင် တစ်လအတွင်းမှာပဲ ဈေးနှစ်ဆနီးပါးမြင့်တက်လာခဲ့ပါတယ်။

Source: Reuters.
#Yangon_Media_Group

#Local_News
Published_ 23 April 2022

အဂတိလိုက်စားမှု တိုက်ဖျက်ရေးဥပဒေအရ တရားစွဲဆိုခံထားရတဲ့ ဆောက်လုပ်ရေးဝန်ကြီးဌာန၊ ဒုတိယဝန်ကြီးဟောင်း ဦးကျော်လင်း၊ ညွှန်ကြားရေးမှူးချုပ် ဦးအောင်မြင့်ဦး၊ ဦးရဲမင်းဇော်နှင့် ဦးနေအောင်ရဲမြင့်တို့အား အလုပ်နှင့်ထောင်ဒဏ်အမိန့်များ ချမှတ်ခဲ့ကြောင်း သိရပါတယ်။

ဆောက်လုပ်ရေးဝန်ကြီးဌာန၊ ဒုတိယဝန်ကြီးဟောင်း ဦးကျော်လင်း၏ ဆောင်ရွက်ချက်များအပေါ် အဂတိလိုက်စားမှု တိုက်ဖျက်ရေးဥပဒေနှင့်အညီ အရေးယူပေးပါရန် တိုင်ကြားခြင်းနှင့်စပ်လျဉ်း၍ အဂတိလိုက်စားမှု တိုက်ဖျက်ရေးကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့ပါတယ်။

စစ်ဆေးတွေ့ရှိချက်အရ ဆောက်လုပ်ရေးဝန်ကြီးဌာန၊ ဒုတိယဝန်ကြီးဟောင်း ဦးကျော်လင်းသည် စစ်ကိုင်းတိုင်းဒေသကြီး မင်းကင်းမြို့နယ်တွင် ပြည်သူ့လွှတ်တော် ကိုယ်စားလှယ်အဖြစ် ဝင်ရောက်ရွေးချယ်ခံရန် ဆောင်ရွက်နေသည့်အချိန်တွင် ဒေသခံပြည်သူလူထု ထောက်ခံမှုရရှိစေရန်အတွက် စီမံကိန်းနှင့် ဘဏ္ဍာရေးဝန်ကြီးဌာန၏ အမိန့် ကြော်ငြာ စာအမှတ် ၃၅/၂၀၁၇ ဖြင့် ထုတ်ပြန်ထားသည့် မြန်မာနိုင်ငံ၏ ဘဏ္ဍာရေး စီမံခန့်ခွဲမှုဆိုင်ရာ စည်းမျဉ်းကို လိုက်နာမှုမရှိဘဲ မုံရွာ-ယာကြီး-ကလေးဝလမ်း၊ မိုင်(၈၅/ဝ)မှ ကြာပင်ကျေးရွာသို့ ဆက်သွယ်ထားသော လမ်းအား ငွေစာရင်းခေါင်းစဉ် လျာထားသတ်မှတ်မှုမရှိဘဲ လမ်းဦးစီးဌာန ညွှန်ကြားရေးမှူးချုပ် ဦးအောင်မြင့်ဦးက လမ်းဦးစီးဌာန ပြင်ဆင်ထိန်းသိမ်းရေး ရန်ပုံငွေကျပ် ၅၆၂ သန်းကျော်ဖြင့် သုံးစွဲစေရေး ဆောင်ရွက်စေခဲ့ကြောင်း သိရပါတယ်။

ထို့ပြင် မင်းကင်းမြို့နယ်တွင် ကျောက်အိုးတံတားအသစ်ကို ငွေလုံးငွေရင်း ရန်ပုံငွေမှ လျာထားခွင့်ပြုထားခြင်းမရှိဘဲ ဦးကျော်လင်း၏ လမ်းညွှန်ချက်ဖြင့် တံတားဦးစီးဌာန၊ ညွှန်ကြားရေးမှူးချုပ် ဦးနေအောင်ရဲမြင့်က တံတားပြင်ဆင် ထိန်းသိမ်းရေးရန်ပုံ ငွေကျပ်သန်း ၁၂၀ ဖြင့် တည်ဆောက်စေခဲ့ခြင်းတို့ကြောင့် နိုင်ငံတော်၏ ငွေကြေးများကို ထိခိုက်နစ်နာ ဆုံးရှုံးစေခဲ့တယ်လို့ ဆိုပါတယ်။

ဦးကျော်လင်းသည် ဆောက်လုပ်ရေးဝန်ကြီးဌာန၊ ဒုတိယဝန်ကြီး တာဝန်ထမ်း ဆောင်စဉ် ၂၀၂၀ ပြည့်နှစ်၊ ဇူလိုင်လအတွင်း အမျိုးသားဒီမိုကရေစီအဖွဲ့ချုပ် ပါတီခရိုင်ရုံး ဆောက်လုပ်ရန်အတွက် အဆောက်အဦဦးစီးဌာန ညွှန်ကြားရေးမှူးချုပ် ဦးရဲမင်းဇော်ထံမှ တစ်ဆင့် အဆောက်အဦအထူးအဖွဲ့ ၁၆ ဖွဲ့ရှိ လက်အောက်ဝန်ထမ်းများထံမှ ငွေကျပ် သိန်း ၃၀ ကို လက်ခံရယူခဲ့ကြောင်း သိရပါတယ်။

စစ်ကိုင်းတိုင်းဒေသကြီး၊ မင်းကင်းမြို့နယ်မှ ပြည်သူ့လွှတ်တော် ကိုယ်စားလှယ် အဖြစ် ဝင်ရောက်ယှဉ်ပြိုင်ရန် ဆောင်ရွက်နေသည့်အချိန်တွင် မင်းကင်းမြို့နယ်သို့ သွားရောက်သည့် ခရီးစဉ်များ၌ ဘုန်းတော်ကြီးကျောင်းများသို့ ဝင်ရောက်ဖူးမြော်၍ အလှူငွေနှင့် ဆန်အိတ်များ ပေးအပ်လှူဒါန်းရာတွင် ၎င်း၏ ညွှန်ကြားချက်အရ ဆောက်လုပ်ရေးဝန်ကြီးဌာန ဝန်ထမ်းများမှ စီစဉ်ပေးသည့် ဆန်အိတ် ၆၈ အိတ်ကို ထိုက်သင့်သည့်တန်ဖိုးငွေ ပေးချေခြင်းမရှိဘဲ လက်ခံခဲ့ကြောင်းသိရပါတယ်။

ဦးကျော်လင်းသည် ပါတီအောင်နိုင်ရေးတွင် အသုံးပြုရန် အကြောင်းပြ၍ အလှူငွေများကို ၎င်းကိုယ်တိုင်နှင့် ၎င်း၏ ကိုယ်ရေးအရာရှိ ဖြစ်သူမှတစ်ဆင့် ဆောက်လုပ်ရေးဝန်ထမ်းများနှင့် ဆောက်လုပ်ရေးကုမ္ပဏီများထံမှ စုစုပေါင်း ငွေကျပ် ၃၆၃ သိန်းကျော်ကို လက်ခံ၍ ရွေးကောက်ပွဲစည်းရုံးရေးအတွက် ပါတီအလံ၊ အင်္ကျီ၊ တီရှပ်၊ ဦးထုပ်နှင့် လက်ကမ်း စာစောင်များ ဝယ်ယူရာတွင် အသုံးပြုခဲ့ကြောင်း၊ ဆောက်လုပ်ရေးကုမ္ပဏီ နှစ်ခုထံမှ စုစုပေါင်း ငွေကျပ်သိန်း ၆၀၀ ကို ၎င်း၏ ကိုယ်ရေးအရာရှိမှတစ်ဆင့် လက်ခံရယူခဲ့ကြောင်းတို့ကို စစ်ဆေးပေါ်ပေါက်သဖြင့် ဆောက်လုပ်ရေးဝန်ကြီးဌာန၊ ဒုတိယဝန်ကြီးဟောင်း ဦးကျော်လင်း အပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရလည်းကောင်း၊ ညွှန်ကြားရေးမှူးချုပ် တာဝန်ထမ်းဆောင်ခဲ့ကြသည့် ဦးအောင်မြင့်ဦး၊ ဦးရဲမင်းဇော်နှင့် ဦးနေအောင်ရဲမြင့် တိုအပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅/၆၃ အရလည်းကောင်း မန္တလေးတိုင်း ဒေသကြီး တရားလွှတ်တော်တွင် ၂၀၂၁ ခုနှစ် ဒီဇင်ဘာ ၁၄ ရက်၌ တရားစွဲဆိုတင်ပိုခဲ့ရာ ရာဇဝတ်ကြီးမှုအမှတ် ၂၆/၂၀၂၁ မှ ၃၅/၂၀၂၁ အထိ အမှု ၁၀ မှုဖြင့် လက်ခံစစ်ဆေးခဲ့သည်။

၎င်းအမှုများအပေါ် ပြစ်မှုထင်ရှားသဖြင့် မန္တလေးတိုင်းဒေသကြီး တရားလွှတ်တော်က ယနေ့ရက်စွဲဖြင့် ဆောက်လုပ်ရေးဝန်ကြီးဌာန၊ ဒုတိယဝန်ကြီးဟောင်း ဦးကျော်လင်းကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရ အလုပ်နှင့် ထောင်ဒဏ် ၂၀ နှစ် ကျခံစေရန်၊ ညွှန်ကြားရေးမှူးချုပ်ဟောင်း ဦးအောင်မြင့်ဦးကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅/၆၃ အရ အလုပ်နှင့်ထောင်ဒဏ် ၄ နှစ် ကျခံစေရန်နှင့် ညွှန်ကြားရေးမှူးချုပ်ဟောင်း ဦးရဲမင်းဇော်နှင့် ဦးနေအောင်ရဲမြင့် တို့အား အဂတိ လိုက်စားမှု တိုက်ဖျက်ရေးဥပဒေ ပုဒ်မ ၅၅/၆၃ အရ အလုပ်နှင့်ထောင်ဒဏ် ၂ နှစ်စီ ကျခံစေရန် အမိန့်ချမှတ်ခဲ့ကြောင်း သတင်းရရှိပါတယ်။

ymg-mnn
#Yangon_Media_Group

#Local_News

Published_ 23 April 2022

ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီးဟောင်း ဦးသောင်းထွန်းအား အဂတိလိုက်စားမှု တိုက်ဖျက်ရေးဥပဒေပုဒ်မ ၅၅ အရ မန္တလေးတိုင်းဒေသကြီး တရားလွှတ်တော်တွင် ၂၀၂၁ ခုနှစ် ဒီဇင်ဘာ ၂၀ ရက်၌ တရားစွဲဆိုတင်ပို့ခဲ့ရာ ရာဇဝတ်ကြီးမှုအမှတ် ၄၁/၂၀၂၁၊ ၄၂/၂၀၂၁ နှင့် ၄၃/၂၀၂၁ အထိ အမှုသုံးမှုဖြင့် လက်ခံစစ်ဆေးခဲ့ပြီး အဆိုပါအမှုများမှာ ပြစ်မှုထင်ရှားသဖြင့် မန္တလေးတိုင်းဒေသကြီး တရားလွှတ်တော်က ယနေ့ရက်စွဲဖြင့် ဦးသောင်းထွန်းကို အဂတိလိုက်စားမှုတိုက်ဖျက်ရေး ဥပဒေ ပုဒ်မ ၅၅ အရ အမှုသုံးမှုအတွက် စုစုပေါင်း အလုပ်နှင့် ထောင်ဒဏ် ၉ နှစ် ကျခံစေရန် အမိန့်ချမှတ်ခဲ့ကြောင်း သတင်းရရှိပါတယ်။

ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဟောင်း ဦးသောင်းထွန်း၏ ဆောင်ရွက်မှုများအပေါ် အဂတိလိုက်စားမှုတိုက်ဖျက်ရေး ဥပဒေနှင့်အညီ အရေးယူပေးပါရန် တိုင်ကြားခြင်းနှင့်စပ်လျဉ်း၍ အဂတိလိုက်စားမှု တိုက်ဖျက်ရေး ကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့ခြင်း ဖြစ်ပါတယ်။

စစ်ဆေးတွေ့ရှိချက်အရ မြန်မာနိုင်ငံရင်းနှီးမြှုပ်နှံမှုကော်မရှင် ဥက္ကဋ္ဌဟောင်း ဦးသောင်းထွန်းသည် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး တာဝန်ထမ်းဆောင်စဉ် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ စားသုံးသူရေးရာဦးစီးဌာနပိုင် မင်္ဂလာတောင်ညွန့်မြို့နယ်၊ အထက်ပုဇွန်တောင်လမ်းပေါ်ရှိ မြေဧက ၉ ဒသမ ၂၂၀ အား ၎င်းနှင့် ပုဂ္ဂိုလ်ရေးရင်းနှီးသော ပုဂ္ဂလိကကုမ္ပဏီတစ်ခုသို့ တင်ဒါခေါ်ယူမှုမရှိဘဲ နှစ် ၃၀ ငှားရမ်းပေးခဲ့ရာတွင် ပြည်ထောင်စုအစိုးရအဖွဲ့ အမိန့်ကြော်ငြာစာအမှတ် ၃၉/၂၀၁၁ နှင့် နိုင်ငံတော်သမ္မတရုံး၏ ညွှန်ကြားချက် ၃/၂၀၁၈ ၌ ငှားရမ်းခအား နိုင်ငံပိုင်မြေ၊ အဆောက်အအုံများ တည်ရှိရာဒေသ၏ ကာလပေါက်ဈေးအတိုင်း သတ်မှတ်ရမည်ဟူသော ပြဋ္ဌာန်းချက်ကို လိုက်နာမှု မရှိခြင်း၊ နိုင်ငံတော်သမ္မတရုံး၏ ညွှန်ကြားချက်အမှတ် ၁/၂၀၁၇ တင်ဒါလုပ်ထုံး လုပ်နည်းများနှင့်အညီ လိုက်နာဆောင်ရွက်မှုမရှိခြင်းတို့ကြောင့် တစ်နှစ်အတွက် မြေငှားရမ်းခ အမေရိကန် ဒေါ်လာ ၁ ဒသမ ၃ သိန်းကျော်နှင့် မြေအသုံးချမှု ပရီမီယံကြေးအမေရိကန် ဒေါ်လာ ၈ ဒသမ ၉ သန်းကျော် နစ်နာဆုံးရှုံးခဲ့ကြောင်း သိရပါတယ်။

ymg-mnn

#Yangon_Media_Group

Published 22 April 2022

မြန်မာ့ကျောက်မျက်ရတနာတွေကို ပြပွဲဖြင့်ခင်းကျင်းရောင်းချကြရာမှာ နောင်မှာ ဟောင်ကောင်ဒေါ်လာနှင့် ထိုင်းဘတ်ငွေ တို့ဖြင့်ပါ ရောင်းချနိုင်ရေးစီစဉ်ကြဖို့ နစက ဥက္ကဋ္ဌက ပြပွဲတာဝန်ရှိသူတွေကို မှာကြားခဲ့တယ်လို့ နစကရဲ့ သတင်းထုတ်ပြန်ချက်အရသိရပါတယ်။ 

(၅၇)ကြိမ်မြောက် မြန်မာ့ကျောက်မျက်ရတနာပြပွဲဖွင့်ပွဲကို ဧပြီ ၂၂ရက် သောကြနေ့က နေပြည်တော်မှာရှိတဲ့ မဏိရတနာ ကျောက်စိမ်းခန်းမမှာ ကျင်းပခဲ့ရာ မှာ နစကဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်တက်ရောက်ပြီး မှာကြားခဲ့တာ ဖြစ်ပါတယ်။

လက်ရှိမှာ မြန်မာ့ကျောက်မျက်ရတနာတွေကို ပြည်တွင်းပြည်ပကုန်သည်တွေက အမေရိကန်ဒေါ်လာ၊ယူရို၊ယွမ်နှင့်ကျပ်ငွေတို့ဖြင့် ပေးချေနိုင်ကြပါတယ်။ အဲသလိုရောင်းချကြရမှာ ပုလဲအတွဲတွေကို အမေရိကန်ဒေါ်လာဖြင့် ကြမ်းခင်းဈေးသတ်မှတ်ပေးပြီး ကျောက်စိမ်းနှင့် ကျောက်မျက်အတွဲတွေကို ယူရိုငွေဖြင့် ကြမ်းခင်းဈေးသတ်မှတ်ပေးထားတယ်လို့သိရပါတယ်။ပေးချေကြရမှာတော့ ပုလဲအတွဲတွေကို ပြည်ပကုန်သည်တွေက အမေရိကန်ဒေါ်လာ၊ယွမ်တို့ဖြင့်၊ ပြည်တွင်းကုန်သည်တွေက အမေရိကန်ဒေါ်လာ၊ယွမ်နှင့်ကျပ်ငွေတို့ဖြင့် ပေးချေဝယ်ယူနိုင်ကြပါတယ်။ ကျောက်မျက်နှင့် ကျောက်စိမ်းအတွဲတွေကိုတော့ အမေရိကန်ဒေါ်လာ၊ယူရိုနှင့်ယွမ်ငွေတို့ဖြင့်ပေးချေဝယ်နိုင်ကြပါတယ်လို့သိရပါတယ်။

ယခုပြပွဲတွင် အလေးချိန်  ၇၇၅၃၈ ဒသမ ၁၅ မိုမီရှိ နိုင်ငံပိုင်ပုလဲအတွဲပေါင်း (၃၃၀)၊ အလေးချိန် ၁၂၆၀၂ ဒသမ ၇၃၈၉ ကရက်၊ ၃၃၅ ဒသမ ၄၆ ဂရမ်ရှိ နိုင်ငံပိုင်ကျောက်မျက်အတွဲ ၆၂ တွဲ၊ အလေးချိန် ၉၉၁၀၅ ဒသမ ၀၀ ကရက်၊ ၆၁ ဒသမ ၂၆ ကီလိုရှိ နိုင်ငံတော်နှင့် အကျိုးတူဆောင်ရွက်သော ကုမ္ပဏီများမှ ကျောက်မျက်အတွဲ ၂၀ နှင့် အလေးချိန် ၂၉၇၈ ဒသမ ၅၁ ကရက်၊ ၄၇ ဒသမ ၈၃ ကီလို၊ ၄၃၉ ဒသမ ၆၃ ဂရမ်ရှိ ပုဂ္ဂလိကကုမ္ပဏီများမှ ကျောက်မျက်အတွဲ ၃၈ တွဲ စုစုပေါင်းအလေးချိန် ၁၁၄၆၈၆ ဒသမ ၂၄၈၉ ကရက်ရှိ ကျောက်မျက်အတွဲပေါင်း (၁၂၀)၊ အလေးချိန် ၅၈ ဒသမ ၅၉၇ တန်ရှိ နိုင်ငံပိုင် ကျောက်စိမ်းအတွဲ ၁၅၀၊ အလေးချိန် ၅၂၉ ဒသမ ၀၁၃ တန်ရှိ နိုင်ငံတော်နှင့် အကျိုးတူဆောင်ရွက်သော ကုမ္ပဏီများမှ ကျောက်စိမ်းအတွဲ ၈၀၀၊ အလေးချိန် ၁၁၉၀ ဒသမ ၉၃၅ တန်ရှိ ပုဂ္ဂလိကကုမ္ပဏီများမှ ကျောက်စိမ်းအတွဲ ၁၀၅၀ စုစုပေါင်း အလေးချိန် ၁၇၇၈ ဒသမ ၅၄၅ တန်ရှိ ကျောက်စိမ်းအတွဲပေါင်း (၂၀၀၀) တို့ကို ပြည်တွင်း၊ ပြည်ပ ရတနာကုန်သည်များအား အိတ်ဖွင့်တင်ဒါစနစ်ဖြင့် ရောင်းချပေးသွားမယ်လို့ ပြန်ကြားရေးဝန်ကြီးဌာနရဲ့သတင်းထုတ်ပြန်ချက်မှာ ဖော်ပြထားပါတယ်။

ပုလဲအတွဲများကို ဧပြီ ၂၃ ရက်နှင့် ၂၄ ရက်တို့တွင် အိတ်ဖွင့်တင်ဒါစနစ် ဖြင့်လည်းကောင်း၊ ကျောက်မျက်အတွဲများကို ဧပြီ ၂၂ ရက် မှ ၂၄ ရက်အထိ ခင်းကျင်းပြသပြီး ဧပြီ ၂၅ ရက်တွင် အိတ်ဖွင့်တင်ဒါစနစ်ဖြင့်  လည်းကောင်း၊  ကျောက်စိမ်းအတွဲများကို ဧပြီ ၂၂ ရက်မှ ၂၅ ရက်အထိ ခင်းကျင်းပြသပြီး ဧပြီ ၂၆ ရက်မှ ၂၈ ရက်အထိ အိတ်ဖွင့်တင်ဒါစနစ်ဖြင့် ရောင်းချပေးသွားမယ်လို့ လည်းသတင်းကဆိုပါတယ်။

မြန်မာ့ကျောက်မျက်ရတနာပြပွဲတွေကို  ၁၉၆၄ ခုနှစ်မှ စတင်၍ ကျင်းပခဲ့ပြီး ယခု ၅၇ ကြိမ်မြောက် မြန်မာ့ ကျောက်မျက်ရတနာ ပြပွဲကို ဧပြီ ၂၂ ရက်မှ ၂၈ ရက်အထိ ခင်းကျင်းပြသသွားမှာဖြစ်ပါတယ်။

#WorldCulture
Published 22 April 2022

ဂျပန်နိုင်ငံမှာ အလောင်းမြေမြှုပ်ခြင်းနဲ့ ဝမ်းနည်းကြောင်းဖော်ပြခြင်းတို့အတွက် အရင်ရှေးရိုးအစဉ်အလာများ ပြောင်းလဲလာခဲ့ပြီး အုတ်ဂူသင်္ချိုင်းနေရာတွေမှာ ခေတ်မီသုဿန်အဆောက်အအုံတွေနဲ့ အစားထိုးလာကြပါတယ်။

#Yangon_Media_Group

Published 22 April 2022

ဆယ်စုနှစ်တစ်စုကျော်အကြာ ပျောက်ကွယ်နေပြီးမှ အသက်၁၃နှစ်အရွယ် မိန်းကလေး ရှာလွတ်ဘရန်တီး ရေးတဲ့ လက်ရေးကဗျာစာအုပ် အသေးစားကလေးဟာ နယူးယောက်မှာ ပြန်ပေါ်လာပါတယ်။ ရှာလွတ်ဘရန်တီဟာ အင်္ဂလိပ်ဝတ္ထုရေးဆရာမနှင့် ကဗျာဆရာမတစ်ဦးအဖြစ် အင်္ဂလန်ရဲ့ ဂန္ထဝင်စာပေမှာ ထင်ရှားသူတစ်ဦးဖြစ်ပါတယ်။

ဖဲချပ်တစ်ချပ်ထက်ပင်သေးငယ်တဲ့ ၁၈၂၉ ရက်စွဲနှင့် အဲဒီလက်ရေးစာမူဟာ စာမျက်နှာ ၁၅ မျက်နှာပါပြီး သူမရဲ့ မထုတ်ဝေရသေးတဲ့ ကဗျာ(၁၀)ပုဒ်ကို စုစည်းထားပါတယ်။

အဲဒီကဗျာစာမူ စာအုပ်သေးသေးကလေးကို နယူယောက်ရဲ့ နိုင်ငံတကာ ရှေးဟောင်းစာအုပ်ပွဲတော်မှာ ခင်းကျင်း ရောင်းချပေးမှာ ဖြစ်ပြီး စာအုပ်ဈေးနှုန်းက ဒေါ်လာ၁.၂၅သန်းဖြစ်ပါတယ်။

ပြပွဲကို ကြာသပတေးနေ့က ဖွင့်လှစ်ပေးခဲ့ပြီး တနင်္ဂနွေအထိ ပြသရောင်းချပေးမှာဖြစ်ပါတယ်။

Source AFP

#LocalNews
Published - 22 April 2022

လန်ချန်း-မဲခေါင်ပူးပေါင်းဆောင်ရွက်မှု အစီအစဉ်အရ အရည်သွေးမြင့် ကော်ဖီစိုက်ပျိုး ထုတ်လုပ်ရေးအတွက် တရုတ်က မြန်မာကို အမေရိကန်ဒေါ်လာ လေးသိန်းလေးသောင်းကျော်အား ကူညီထောက်ပံ့ပေးအပ်ခဲ့တယ်လို့ မြန်မာနိုင်ငံဆိုင်ရာ တရုတ်သံရုံးက သတင်းထုတ်ပြန်ခဲ့ပါတယ်။

အဆိုပါ စီမံကိန်းကို ၂၀၁၈ ခုနှစ်မှစတင်ခဲ့ခြင်းဖြစ်ပြီး တရုတ်-မြန်မာ နှစ်ဦးနှစ်ဖက်က လန်ချန်း-မဲခေါင်ပူးပေါင်းဆောင်ရွက်မှု မူဘောင်အောက်တွင် “လန်ချန်း-မဲခေါင်ဒေသ ကော်ဖီအထွက်နှုန်းနှင့် အရည်အသွေးမြင့်စီမံကိန်း” ဖော်ဆောင်ခဲ့ကာ မြန်မာနိုင်ငံ၏ ကော်ဖီစိုက်ဒေသ၏ ဒေသလက္ခဏာနှင့် ဖွံ့ဖြိုးတိုးတက်မှုလိုအပ်ချက်အရ ကော်ဖီဆွတ်ခူးမှု၊ အကိုင်းအခတ်များဖြတ်ညှပ်ခြင်းနှင့် ထုတ်လုပ်မှုလေ့ကျင့်ရေးများ ပူးပေါင်းဆောင်ရွက်ခဲ့ခြင်းဖြစ်တယ်လို့ သိရပါတယ်။

ဒါ့အပြင် တောင်သူများအား ပျော့ဖတ်ပြုလုပ်သည့်စက် (Pulping machine)နှင့် ကော်ဖီပျိုးပင်များလက်ဆောင်ပေးအပ်ကာ မြန်မာ့ကော်ဖီလုပ်ငန်းတိုးတက်စေရန် ကူညီပေး၍ ဒေသန္တရစီးပွားရေးဖွံ့ ဖြိုးတိုးတက်မှုနှင့် တောင်သူများအထွက်နှုန်းတိုးမြှင့်ရေးကို အထောက်အကူပြုခဲ့ကြောင်း တရုတ်သံရုံးက ဆိုပါတယ်။

၂၀၂၁ ခုနှစ်တွင် လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေက “အသေးစားတောင်သူများ ကော်ဖီထုတ်လုပ်မှုအရည်အသွေးအား ပြုပြင်ထုတ်လုပ်မှုနည်းပညာဖြင့် မြှင့်တင်ခြင်း” စီမံကိန်းကို ထပ်မံထားရှိပြီး မြန်မာဘက်သို့ ရင်းနှီးငွေ အမေရိကန်ဒေါ်လာ လေးသိန်းလေးသောင်းကျော် ထောက်ပံ့ပေးခဲ့ကာ မြန်မာနိုင်ငံက ကော်ဖီလုပ်ငန်းဖော်ဆောင်၍ ပြုပြင်ထုတ်လုပ်သည့်နည်းပညာ အဆင့်အတန်းမြှင့်တင်ရန် ထောက်ပံ့ကူညီ ပေးခဲ့ကြောင်း တရုတ်သံရုံး၏ သတင်းထုတ်ပြန်ချက်မှာ ဖော်ပြခဲ့ပါတယ်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး

ymg/kg
#Yangon_Media_Group