#DailyNews
Published -26 April 2022

၁။ ရှေးဟောင်းဘုရားစေတီများရှိရာမွန်ပြည်နယ်၏အကြီးဆုံးထုံးကျောက်ဂူကို သွားရောက်လေ့လာခွင့် ပိတ်မထား။

၂။ Tourist Visa ဖွင့်ပေးဖို့ကျန်ရှိနေသေး၍ ပုဂံကို နိုင်ငံခြားသားဧည့်သည်မဝင်သေး။

၃။ နေ့စဉ်မိုးလေဝသသတင်း။

၄။ ဖိလစ်ပိုင်အာဏာရမင်းဆက်များက နိုင်ငံ့အုပ်ချုပ်ရေးပိုင်းကိုချုပ်ကိုင်ခြယ်လှယ်ထား...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published - 26 Apr 2022

ဧပြီလ ၂၅ ရက်နေ့တွင် တရားမဝင် သစ်မျိုးစုံ၊ တိရစ္ဆာန်များ ၊ စားသောက်ကုန်ပစ္စည်းများနှင့် အဝတ်အထည်များ စုစုပေါင်းခန့်မှန်းတန်ဖိုးငွေကျပ် (၁၂,၃၄၃,၀၀၀) ဖမ်းဆီးရမိခဲ့ကြောင်းတရားမဝင်ကုန်သွယ်မှုတိုက်ဖျက်ရေးကော်မတီ ထုတ်ပြန်ချက်အရသိရပါတယ်။

ဖမ်းဆီးရမိမှုဖြစ်စဥ်များမှာ ဧပြီ ၂၅ ရက်တွင် စစ်ကိုင်းတိုင်းဒေသကြီး တရားမဝင် ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် မြန်မာနိုင်ငံရဲတပ်ဖွဲ့ဦးဆောင်သော စစ်ဆေးရေးအဖွဲ့က စစ်ဆေးမှုများဆောင်ရွက်ခဲ့ရာ ကလေးမြို့နယ်အတွင်း တရားမဝင် တင်ဆောင်လာသော ခိုင်းနွားကိုးကောင် (ခန့်မှန်းတန်ဖိုးငွေကျပ် ၉၇၀၀၀ ၀၀) ဖမ်းဆီးရမိခဲ့ပြီး တိရစ္ဆာန်ကျန်းမာရေးနှင့် မွေးမြူရေးလုပ်ငန်းများ ဖွံ့ဖြိုးတိုးတက်ရေးဥပဒေဖြင့် အရေးယူထားတယ်လို့ သိရပါတယ်။

ဆက်လက်ပြီး ပဲခူးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေး အထူးအဖွဲ့၏ စီမံခန့်ခွဲမှုဖြင့် တိုင်းဒေသကြီး သစ်တောဦးစီးဌာနဦးဆောင်သော ပူးပေါင်းစစ်ဆေးရေးအဖွဲ့က စစ်ဆေးမှုများဆောင်ရွက်ခဲ့ရာ ဖြူးမြို့နယ်နှင့် အုတ်တွင်းမြို့နယ်တို့အတွင်း တရားမဝင်သစ်မျိုးစုံ ၄ ဒသမ ၆,၈၂၄ တန် (ခန့်မှန်းတန်ဖိုးငွေကျပ် ၆၅၂,၁၂၀) ဖမ်းဆီးရမိခဲ့ပြီး သစ်တောဥပဒေနှင့်အညီ အရေးယူဆောင်ရွက်လျက်ရှိတယ်လို့ သိရပါတယ်။

ထို့အပြင် မွန်ပြည်နယ် မရမ်းချောင်အမြဲတမ်း စစ်ဆေးရေးစခန်း၌ တာဝန်ကျပူးပေါင်းစစ်ဆေးရေးအဖွဲ့က စစ်ဆေးမှုများဆောင်ရွက်ခဲ့ရာ ခရီးသည်တင် မှန်လုံယာဉ်နှစ်စီးပေါ်၌ တရားဝင်စာရွက်စာတမ်း အထောက်အထားတစ်စုံတစ်ရာ တင်ပြနိုင်ခြင်းမရှိသည့် စားသောက်ကုန်ပစ္စည်းများနှင့် အဝတ်အထည်များ (ခန့်မှန်းတန်ဖိုးငွေကျပ် ၈,၃၄၃,၀၀၀)ကို လည်းကောင်း၊ ၂၂ ဘီး ကုန်တင်ယာဉ်တစ်စီးပေါ်၌ ဂျင်းဘောင်းဘီများ (ခန့်မှန်းတန်ဖိုးငွေကျပ် ၄,၀၀၀,၀၀၀) ကို လည်းကောင်း စုစုပေါင်း (ခန့်မှန်းတန်ဖိုးငွေကျပ် ၁,၂၃၄၃,၀၀၀) ဖမ်းဆီးရမိခဲ့ပြီး အကောက်ခွန်ဥပဒေ နှင့်အညီ အရေးယူဆောင်ရွက်လျက်ရှိတယ်လို့ သိရပါတယ်။

ဧပြီ ၂၅ ရက်တွင် ဖမ်းဆီးရမိမှု စုစုပေါင်းမှာ အမှုတွဲ(၇) မှု (ခန့်မှန်းတန်ဖိုး ငွေကျပ် ၂၂,၆၉၅,၁၂၀) ဖြစ်ကြောင်း တရားမဝင် ကုန်သွယ်မှုတိုက်ဖျက်ရေး ဦးဆောင်ကော်မတီက သိရပါတယ်။

ymg/hm
#Yangon_Media_Group

#LocalNews
Published_26 April 2022

ရန်ကုန်နှင့် မန္တလေးမြို့တို့တွင် လျှပ်စစ်ဘတ်စ်ကားများ ပြောင်းလဲပြေးဆွဲရန် Omni Focus ကုမ္ပဏီကအဆိုပြုထားကြောင်း စက်မှုဝန်ကြီးဌာန ပြည်ထောင်စုဝန်ကြီးဌာနက သိရသည်။

ယင်းအဆိုပြုချက်နှင့်ပတ်သက်၍ မူဝါဒချမှတ်နိုင်ရန် လုပ်ထုံးလုပ်နည်းများနှင့်အညီ ဆက်လက်ဆောင်ရွက်ရေး စက်မှုဝန်ကြီးဌာန ပြည်ထောင်စုဝန်ကြီးက ညွှန်ကြားထားသည့်အတွက် စီစဉ်နေကြောင်းလည်းသိရသည်။

နိုင်ငံတော်စီမံအုပ်ချုပ်ရေးကောင်စီဥက္ကဌ ဗိုလ်ချုပ်မှူးကြီး မင်းအောင်လှိုင်က လက်ရှိအသုံးပြုနေသော မီးရထားနှင့် မော်တော်ယာဉ်များကို လျှပ်စစ်ဖြင့် အစားထိုးသုံးစွဲပါက စက်သုံးဆီသုံးစွဲမှု ချွေတာနိုင်မည်ဖြစ်ကြောင်း ပြီးခဲ့သည့် မတ်လကုန်ပိုင်းတွင် ပြောကြားထားသည်။

ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ Yangon Region Public Transport Committee (YRTC) အနေဖြင့်လည်း ရန်ကုန်တိုင်းဒေသကြီးအတွင်း အများပြည်သူသုံးယာဉ်လိုင်းအချို့နေရာတွင် လျှပ်စစ်ကားများဝင်ရောက်ပြေးဆွဲရေးအတွက် ယာဉ်လိုင်းကုမ္ပဏီအချို့ထံ သဘောထားတောင်းခံထားကြောင်းလည်း သိရသည်။

လက်ရှိတွင် YBS ယာဉ်လိုင်းနံပါတ် ၂၀ ၊ ၅၆ ၊ ၈၂ ၊ ၈၃ ၊ ၉၈ ၊ ၉၉ ၊လေဆိပ်-ဆူးလေ ယာဉ်လိုင်းများကို Omni Focus ကုမ္ပဏီက ပြေးဆွဲပေးလျက် ရှိသည်။

ymg/mt
#Yangon_Media_Group

#WorldBusiness
Published 26 April 2022

'အီလွန်မက်စ်'က တွစ်တာကို ဒေါ်လာ ၄၄ ဘီလီယံငွေသားဖြင့်ဝယ်ယူဖို့ တနင်္လာနေ့က အပြီးသတ် သဘောတူညီမှုရရှိခဲ့ပါတယ်။

ဒါကြောင့် ကမ္ဘာတဝန်းသုံးစွဲသူသန်းပေါင်းများစွာနဲ့ နာမည်ကျော်ပုဂ္ဂိုလ်အများအပြားအသုံးပြုလျက်ရှိတဲ့ တွစ်တာဆိုရှယ်မီဒီယာကြီးဟာ ကမ္ဘာ့အချမ်းသာဆုံးပုဂ္ဂိုလ်ဆီသို့ လွှဲပြောင်းရောက်ရှိလာတော့မှာဖြစ်ပါတယ်။

တွစ်တာကုမ္ပဏီက သက်တမ်း ၁၆ နှစ်ရှိပြီဖြစ်ကာ နောက်ပိုင်းနှစ်တွေမှာ အောင်မြင်မှုရလာခဲ့ပြီး ကမ္ဘာပေါ်မှာ လွှမ်းမိုးမှုအရှိဆုံး လူမှုကွန်ရက်တွေထဲက တစ်ခုဖြစ်လာခဲ့ကာ အခုတော့ စိန်ခေါ်မှုတွေနဲ့ရင်ဆိုင်ရတော့မှာဖြစ်ပါတယ်။

'မက်စ်'က တွစ်တာရဲ့အလယ်အလတ်လမ်းစဉ်ကို ဝေဖန်လိုက်ကာ သူ့ကိုယ်သူလွတ်လပ်စွာပြောဆိုတဲ့ အကြွင်းမဲ့ဝါဒီတစ်ဦးလို့ ခေါ်ဝေါ်ခဲ့ပါတယ်။

ဒါ့အပြင် တွစ်တာမှာ အကြောင်းအရာတင်ခြင်းကိုလည်း လူအများမြင်သာတဲ့အခြေအနေဖြစ်အောင် ဦးစားပေးဖော်ပြသင့်တယ်လို့ ပြောဆိုခဲ့ပြီး ကြော်ငြာတင်ဆက်တဲ့လုပ်ငန်းအဖွဲ့အစည်းတွေကို မျက်နှာသာပေးလွန်းတယ်လို့ ဝေဖန်လိုက်ပါတယ်။

နိုင်ငံရေးတက်ကြွလှုပ်ရှားသူများ သုံးသပ်ထားရာမှာတော့ တွစ်တာကို'အီလွန်မက်စ်'ပိုင်ဆိုင်လာတဲ့အခါမှာ အလယ်အလတ်လမ်းစဉ်ကနေသွေဖီလာနိုင်ပြီး အမေရိကန်သမ္မတဟောင်း'ဒေါ်နယ်လ်ထရမ့်'တို့လို တွစ်တာသုံးစွဲခွင့်ပိတ်ပင်ခံထားရတဲ့ ပုဂ္ဂိုလ်တွေကို ပြန်လည်အသုံးပြုခွင့်ပေးလာနိုင်ကြောင်း ခန့်မှန်းလိုက်ကြပါတယ်။

ကွန်ဆာဗေးတစ်ပုဂ္ဂိုလ်တွေက လူမှုကွန်ရက်ပေါ်က ကန့်သတ်ထိန်းချုပ်ချက်လျော့နည်းလာမယ့်အခြေအနေကို အားပေးထောက်ခံနေကြပြီး လူ့အခွင့်အရေးတက်ကြွလှုပ်ရှားသူများကတော့ အငြင်းအခုံတွေနဲ့ အမုန်းတရားစကားတွေပေါ်ထွက်လာမှာကို စိုးရိမ်နေကြပါတယ်။

'မက်စ်'က တွစ်တာအသုံးပြုသူတွေ ပိုမိုလွယ်ကူရင်းနှီးစွာအသုံးပြုနိုင်အောင် ဆောင်ရွက်လာဖွယ်ရှိပြီး ပြင်ဆင်စီမံခြင်းခလုတ်ထည့်သွင်းခြင်းနဲ့ မကြည့်ရှုလိုတဲ့အကြောင်းအရာများစွာပေါ်လာစေတဲ့ spam bots တွေကိုလည်း ဖြုတ်ချနိုင်ဖို့ကိုလည်း ထည့်သွင်းပြောကြားသွားပါတယ်။

ပြီးခဲ့တဲ့အပတ်တုန်းက ဝယ်ယူနိုင်ဖိုအရေး သဘောတူညီချက်မရေမရာဖြစ်ခဲ့ပေမယ့် ယခုရက်သတ္တပတ်အကုန်မှာတော့ 'မက်စ်'က တွစ်တာရှယ်ယာရှင်တွေကို သူ့ရဲ့ငွေကြေးထောက်ပံ့ကမ်းလှမ်းချက်အသေးစိတ်ကို ဖော်ပြခဲ့ပြီး သူ့ဘက်ပါအောင် ကြိုးပမ်းနိုင်ခဲ့ပါတယ်။
'မက်စ်'က ရှယ်ယာတစ်စုတန်ဖိုးကို ဒေါ်လာ ၅၄.၂၀ ဖြင့်ဝယ်ယူကမ်းလှမ်းဖို တွစ်တာကုမ္ပဏီဘက်က ဖိအားတွေအောက်ကနေပဲ စတင်ညှိနှိင်းခဲ့ရတာပါ။

လွတ်လပ်စွာပြောဆိုခွင့်ရခြင်းက ဒီမိုကရေစီစနစ်ရဲ့အခြေခံအုတ်မြစ်ဖြစ်ပြီး တွစ်တာက အနာဂတ်အတွက်အရေးပါတဲ့ အကြောင်းအရာတွေကို လူသားတွေအပြန်အလှန် ပြောဆိုဖလှယ်နိုင်မယ့် ဒီဂျစ်တယ်ဆွေးနွေးပွဲရပ်ဝန်းဖြစ်လာမှာဖြစ်ကြောင်း 'မက်စ်'ကဖော်ပြထားပါတယ်။

တနင်္လာနေ့က တွစ်တာရှယ်ယာတန်ဖိုး ၅.၇ ရာခိုင်နှုန်းမြင့်တက်လာခဲ့ပြီး ၅၁.၇၀ ဒေါ်လာအထိရောက်ရှိခဲ့ပါတယ်။

"ကုမ္ပဏီကို အခြေအနေပြောင်းလဲနိုင်ဖို့ အချိန်အလုံအလောက်သာရခဲ့ရင် အခု'အီလွန်မက်စ်'ကမ်းလှမ်းထာထက်ပိုပြီးသာလွန်အောင် ပြုလုပ်နိုင်မှာဖြစ်ပါတယ်" လို့ ဘွိင်ယာဗဲလျူးကုမ္ပဏီမှ ဦးဆောင်ညွှန်ကြားရေးမှူး'ဂျိုနသန်ဘွိင်ယာ'က ပြောကြားခဲ့ပါတယ်။

အရင်ကလည်း ဘီလျံနာတွေက နာမည်ကြီးလူမှုကွန်ရက်တွေကို ဝယ်ယူထိန်းချုပ်နိုင်ခဲ့တဲ့လမ်းစဉ်အတိုင်း 'မက်စ်'ကအသုံးချလာတာဖြစ်ပါတယ်။

ဒေါ်လာ ၂၆၈ ဘီလီယံပိုင်ဆိုင်တဲ့ 'အီလွန်မက်စ်'က "အပြည့်အဝယုံကြည်စိတ်ချနိုင်တဲ့ လူမှုကွန်ရက်ရှိနေခြင်းက လူ့အဖွဲ့အစည်းအတွက်အလွန်အရေးကြီးပါတယ်။ စီးပွားရေးအခြေအနေကို ဂရုမစိုက်ပါဘူး" လို့ ပြောကြားသွားပါတယ်။

Tesla နဲ့ SpaceX ကုမ္ပဏီတို့မှာလည်း အမှုဆောင်အရာရှိချုပ်ဖြစ်တဲ့'မက်စ်'အတွက် တွစ်တာကိုဘယ်လောက်အထိ ဦးစားပေးမလဲဆိုတာ မသိရသေးပါဘူး။

တွစ်တာနဲ့အပြိုင် 'ဒေါ်နယ်ထရမ့်'က Truth Social လူမှုကွန်ရက်ကိုတည်ထောင်ထားပြီး တွစ်တာကိုပြန်လည်သုံးစွဲမှာမဟုတ်ဘူးလို့ တနင်္လာနေ့က Fox News နဲ့အင်တာဗျူးမှာ ပြောကြားခဲ့ပါတယ်။

အမေရိကန်အိမ်ဖြူတော်မှပြောရေးဆိုခွင့်ရှိသူ'ယန်ဆာကီ'က "သမ္မတက တွစ်တာနဲ့ အခြားလူမှုကွန်ရက်တွေမှာ သတင်းမှားတွေပျံ့နှံ့နေမှာကို စိုးရိမ်နေရပါတယ်" လို့ ပြောဆိုသွားပါတယ်။

Source: Reuters.
#Yangon_Media_Group

#Local News
Published-26 April 2022

ထင်းကောက်ရင်းကြုံတွေ့ရမယ့် ဘေးအန္တရာယ်တွေကိုလျှော့ချနိုင်ဖို့ အပြည်ပြည်ဆိုင်ရာ ကြက်ခြေနီအဖွဲ့ ICRCကရခိုင်ပြည်နယ်အတွင်းရှိ နေရပ်စွန့်ခွာခဲ့ရသူတွေကို မီးသွေးမီးဖိုတွေလှူဒါန်းခဲ့ပါတယ်၊၊

ရခိုင်ပြည်နယ်အတွင်း လက်နက်ကိုင်ပဋိပက္ခကြောင့် နေရပ်စွန့်ခွာခဲ့ရသူတွေအတွက် အပြည်ပြည်ဆိုင်ရာ ကြက်ခြေနီအဖွဲ့ ICRCကမိသားစုတွေ (ချက်ပြုတ်) စားသောက်နိုင်စေဖို့ မီးသွေးမီးဖိုတွေလှူဒါန်းခဲ့တယ်လို့ ICRC Myanmar က ထုတ်ပြန်ထားပါတယ်၊၊

နေရပ်စွန့်ခွာရသူတွေဟာ အစားအသောက်ချက်ပြုတ်ဖို့အပါအဝင် စိန်ခေါ်မှုများစွာကို ရင်ဆိုင်နေတယ်လို့ ဆိုပါတယ်၊၊

အပြည်ပြည်ဆိုင်ရာ ကြက်ခြေနီအဖွဲ့ ICRC အနေနဲ့ လွန်ခဲ့တဲ့လအနည်းငယ်အတွင်း ရသေ့တောင်မြို့ပေါ်က စစ်ဘေးရှောင်စခန်း (၂၄) ခုမှာရှိတဲ့ မိသားစုတွေ (ချက်ပြုတ်)စားသောက်နိုင်စေဖို့ မီးသွေးမီးဖို အခုရေ(၂၀၀၀)နီးပါး ပေးအပ်ခဲ့တာဖြစ်ပါတယ်၊၊

‘‘ကျွန်မ ဒီစခန်းမှာနေတာ မိုးတွင်း ၃ တွင်း ရှိပါပြီ။ မီးဖိုမရခင်တုန်းကဆို ကျွန်မတို့က အုတ်ခဲသုံးလုံးကို တြိဂံပုံစံထားပြီး အဲဒီပေါ်မှာပဲ ချက်ပြုတ်လေ့ရှိပါတယ်။ အနီးနားကတောထဲကနေ ထင်းကောက်ပါတယ်။ တစ်ခါတလေ ထင်းမလုံလောက်လို့ မြို့ပေါ်ထိသွားဝယ်ရတယ်” လို့ ရသေ့တောင်မြို့နယ် ထီးဆွဲကျေးရွာက ဒေါ်ဝေညွန့်စိန်က ပြောပါတယ်။ “ဒီမီးဖိုက မီးသွေးနဲ့ရော ထင်းနဲ့ရော သုံးလို့ရပါတယ်။ မီးကလည်းပိုကြာရှည်ခံလို့ မီးဖိုချောင်ကုန်ကျစားရိတ်ကိုလည်း လျော့စေပါတယ်” လို့ သူကထပ်ပြောပါတယ်။

အခုရရှိတဲ့ မီးဖိုတွေကိုအသုံးပြုပြီး မိသားစုပေါင်း ၁,၇၀၀ ကျော်ဟာ စားစရာတွေကို ချက်ပြုတ်စားသောက်နိုင်ပြီး လက်နက်ကိုင်ပဋိပက္ခကြောင့် ထိခိုက်ခံစားရတဲ့နေရာတွေမှာ ထင်းကောက်ရင်းကြုံတွေ့နိုင်တဲ့ ဘေးအန္တရာယ်တွေကိုလည်း လျှော့ချနိုင်မှာဖြစ်တယ်လို့ သိရပါတယ်၊၊

ymg/tthl
#Yangon_Media_Group

#WorldScience
Published 26 April 2022

ရှေးဟောင်းသုတေသနပညာရှင်များက လူသားသမိုင်းတလျှောက်မှာ အင်အားအကြီးမားဆုံးငလျှင်လှုပ်ခတ်မှုကြီးကို တွေ့ရှိခဲ့ကြရာ ထောင်စုနှစ်တစ်ခုတိုင်အောင် ကမ်းရိုးတန်းတွေကိုဖျက်ဆီးခဲ့တဲ့ မိုင် ၅,၀၀၀ ဧရာမဆူနာမီလှိုင်းကြီးဖြစ်ပွားခဲ့တာကို တွေ့ရှိခဲ့ကြကြောင်း LiveScience က သတင်းတင်ပို့ထားပါတယ်။

လွန်ခဲ့တဲ့နှစ်ပေါင်း ၃,၈၀၀ ခန့်က ချီလီနိုင်ငံမြောက်ပိုင်းမှာ ပြင်းအား ၉.၅ အဆင့်ရှိမြေငလျှင်လှုပ်ခတ်ခဲ့ကြောင်း Science Advances ဂျာနယ်ကဖော်ပြထားပါတယ်။

လေ့လာချက်ထဲကဖော်ပြချက်အရ ကမ္ဘာ့အပေါ်ယံအလွှာက နောက်ထပ်တစ်လွှာအောက် အင်အားပြင်းပြင်းနဲ့ လှုပ်ရှားခဲ့တာကြောင့် ပြင်းအားမြင့်ငလျှင်ဖြစ်ပေါ်လာကြောင်း၊ အဆိုပါငလျှင်တွေကြောင့် ဆူနာမီလှိုင်းကြီးတွေဖြစ်ပေါ်လာကာ ပိုမိုပျက်စီးစေခဲ့ကြောင်း ဖော်ပြထားပါတယ်။

ငလျှင်လှုပ်ခတ်မှုကြောင့် ၆၆ ပေအမြင့်ရှိဆူနာမီလှိုင်းလုံးကြီးတွေပေါ်ပေါက်လာကာ ချီလီနိုင်ငံမြောက်ပိုင်းကနေ နယူးဇီလန်အထိရောက်ရှိသွားပါတယ်။

ဆူနာမီလှိုင်းတွေကနေ မော်တော်ကားအရွယ်အစားလောက်ရှိတဲ့ ကျောက်တုံးကြီးတွေဟာ ကုန်းတွင်းပိုင်းမိုင် ၂၆၀ လောက်အထိ ဖျက်ဆီးသွားခဲ့ပြီး နှစ်ပေါင်း ၁,၀၀၀ လောက်အထိ ကမ်းရိုးတန်းတွေအနီးအနား ကျက်စားနေထိုင်စရာနေရာမရှိခဲ့ကြောင်း ဆောက်သမ်တန်တက္ကသိုလ်မှဖော်ပြထားပါတယ်။

ပင်လယ်နုန်းတွေအလွန်မြင့်တက်လာကာ ကုန်းတွင်းပိုင်းအတော်ဝေးဝေးအထိ ရောက်ရှိသွားခဲ့ပါတယ်။

ချီလီမြောက်ပိုင်းကမ်းရိုးတန်းမှာ ဆူနာမီဒဏ်ကြောင့်မြေအောက်ရောက်နေခဲ့တဲ့ ရှေးဟောင်းအဆောက်အအုံများကိုလည်း တွေ့ရှိခဲ့ကြပါတယ်။

ဆူနာမီလှိုင်းရဲ့ နောက်ပြန်ဆွဲအားကြောင့် အဆောက်အအုံတွေပြောင်းပြန်ဖြစ်နေခဲ့ပြီး ဒေသနေလူတွေ ဘာမှမကျန်ရှိခဲ့ပါဘူးလို့ ဆောက်သမ်တန်တက္ကသိုလ်မှပရော်ဖက်ဆာ'ဂျိမ်းစ်ဂေါ့ဖ်'က ပြောကြားခဲ့ပါတယ်။

ရှေးဟောင်းသုတေသနကောက်နုတ်ချက်များအရ ထိုခေတ်မှလူတွေဟာ ဆူနာမီနဲ့အလှမ်းဝေးရာ ကုန်းတွင်းပိုင်းများသို့ ပြောင်းရွှေ့ခဲ့ကြတယ်လို့ ယူဆရပါတယ်။

'ဂေါ့ဖ်'နဲ့သုတေသနအဖွဲ့က မော်တော်ကားအရွယ်လောက်ရှိတဲ့ ကျောက်စိုင်ခဲတွေကို နယူးဇီလန်ချာသမ်ကျွန်းကုန်းတွင်းပိုင်းအထိတွေ့ရှိခဲ့ကြပြီးနောက် ဆူနာမီလှိုင်းက ဩစတြေးလျရှားဒေသအထိ ရောက်ရှိခဲ့ကြောင်း သုံးသပ်ခဲ့ကြပါတယ်။

အဆိုပါကျောက်စိုင်ခဲကြီးတွေက ငလျှင်လှုပ်ခတ်ခဲ့တဲ့အချိန်ခေတ်ကာလလောက်က ဖြစ်မယ်လို့ယူဆရပါတယ်။

ချီလီမြောက်ပိုင်းကနေ ဆူနာမီလှိုင်းများက ကျောက်စိုင်ခဲကြီးတွေကို သယ်ဆောင်သွားခဲ့တာဟာ ပြင်းအား ၉.၅ အဆင့်ရှိတဲ့ငလျှင်ကြောင့်သာဖြစ်မယ်လို့ ဖော်ပြထားပါတယ်။

ဒီလေ့လာမှုမတိုင်ခင်က အကြီးမားဆုံးငလျှင်ကို ၁၉၆၀ ခုနှစ်က မှတ်တမ်းတင်ခဲ့ပါတယ်။
ချီလီတောင်ပိုင်းမှ ပြင်းအား ၉.၄ မှ ၉.၆ အဆင့်ရှိ ဗယ်လ်ဒီဗီယာငလျှင်လှုပ်ခတ်မှုက ဟာဝိုင်အီအထိ ဆူနာမီလှိုင်းတိုက်ခတ်ခဲ့ပြီး လူပေါင်း ၆,၀၀၀ ခန့်သေဆုံးခဲ့ပါတယ်။

Source: LiveScience
#Yangon_Media_Group

#WorldHealth
Published 26 April 2022

ကိုဗစ်ရောဂါဖြင့် ဆေးရုံတက်ကုသခံယူရဖူးသူ ၃ ပုံ ၂ ပုံကျော်ဟာ နောက်တစ်နှစ်ကျော်ကြာတဲ့အထိ ရောဂါလက္ခဏာများခံစားနေရသေးကြောင်း ယူကေသုတေသီများပြောကြားလိုက်ပါတယ်။
အမျိုးသမီးများနဲ့ အဝလွန်သူများက နောက်ဆက်တွဲလက္ခဏာခံစားရနိုင်ချေအများဆုံးဖြစ်တာကို တွေ့ရှိခဲ့ကြပါတယ်။

ကိုဗစ်ရောဂါကူးစက်ပြီး တစ်နှစ်ကျော်ကြာတာတောင် ကျန်းမာရေးဆိုးကျိုးတွေခံစားနေရဆဲဖြစ်တာကြောင့် ထိုလက္ခဏာဆိုးကျိုးတွေကိုကုသဖို့ အရေးတကြီးလိုအပ်လာကြောင်း တနင်္ဂနွေနေ့က ဖော်ပြလိုက်ပါတယ်။

"ထိရောက်တဲ့ကုသမှုတွေ မပြုလုပ်နိုင်ရင် နောက်ဆက်တွဲလက္ခဏာတွေက ရေရှည်ဝေဒနာများဖြစ်ပေါ်လာနိုင်ပါတယ်" လို့ လက်စ်တာတက္ကသိုလ်မှ'ခရစ္စတိုဖာဘရိုက်တ်လင်'က လန်းဆက်ဆေးပညာဂျာနယ်မှာ ဖော်ပြလိုက်ပါတယ်။

လူပေါင်း ၂,၃၀၀ ကျော်ကိုစမ်းသပ်မှုပြုလုပ်ရာမှာ ကိုဗစ်ရောဂါဖြင့်ဆေးရုံတက်ကုသခံယူခဲ့ရသူ ၂၆ ရာခိုင်နှုန်းဟာ ၅ လအကြာမှာ ဝေဒနာလက္ခဏာများသက်သာသွားခဲ့ပြီး ၂၈.၉ ရာခိုင်နှုန်းကတော့ တစ်နှစ်ကျော်ပြီးမှသက်သာသွားပါတယ်။

အမျိုးသမီးများက အမျိုးသားများထက် ရောဂါလက္ခဏာမှပြန်လည်သက်သာလာနိုင်ချေ ၃၃ ရာခိုင်နှုန်းပိုနည်းတာကို တွေ့ရှိခဲ့ကြပါတယ်။

ဆေးရုံတက်ကုသခံယူရပြီး အသက်ရှူကိရိယာလိုအပ်ခဲ့သူများနဲ့ အဝလွန်သူများက နောက်ဆက်တွဲလက္ခဏာဖြစ်ပွားနိုင်ချေပိုများပါတယ်။

အဖြစ်အများဆုံးနောက်ဆက်တွဲလက္ခဏာတွေက အသက်ရှူရခက်ခဲခြင်း၊ နွမ်းနယ်ခြင်း၊ ကြွက်သားနာခြင်း၊ အိပ်ရေးမဝခြင်း၊ ခြေတံလက်တံများအားနည်းခြင်း၊ စိတ်ကျန်းမာရေးအခြေအနေပြဿနာများ ဖြစ်ပါတယ်။

"ကိုဗစ်နောက်ဆက်တွဲလက္ခဏာခံစားရသူတွေ အလွန်များလာတာကြောင့် ကျန်းမာရေးစောင့်ရှောက်မှုတွေ အရေးတကြီးလိုအပ်လာပါတယ်" လို့ 'ဘရိုက်တ်လင်'ကဆိုပါတယ်။

လူအများစုဟာ ဆေးရုံမှဆင်းပြီးတစ်နှစ်ကျော်ကြာတာတောင် နောက်ဆက်တွဲလက္ခဏာဆိုးများခံစားနေရပြီး ကိုယ်လက်လှုပ်ရှားနိုင်စွမ်းကျဆင်းခြင်း၊ လူမှုဘဝကျန်းမာရေးဆုတ်ယုတ်ခြင်းတို့ ခံစားနေရကြောင်း ဖော်ပြထားကြပါတယ်။

Source: Deutsche Welle
#Yangon_Media_Group

#WorldNews
Published 25 April 2022

စိမ်းလန်းစိုပြည်တဲ့ ရှုခင်းတွေ၊ဟန်ကျပန်ကျနှင့် တောင်သူအမျိုးသမီးရုပ်ပုံတွေနှင့် ပန်းပုရုပ်တွေဟာ ပြန်ရှာတွေ့ခဲ့တဲ့အီရတ်ရဲ့ ခေတ်ပြိုင်ပန်းချီ အစကနဦးလက်ရာတွေဖြစ်ပြီး ပန်းချီဝါသနာအိုးတွေအနေနှင့် ပြပွဲမှာ ကြည့်ရှုခွင့်ရကြပြီဖြစ်ပါတယ်။

#Yangon_Media_Group

Published 25 April 2022

နိုင်ငံပေါင်း ၁၂ နိုင်ငံက ကလေးသူငယ်တွေအကြားမှာ အမျိုးအမည်မသိ စိုးရိမ်ဖွယ်ရာ အသည်းရောင်ရောဂါဖြစ်ပွားနေပြီး အနည်းဆုံး ကလေးတစ်ဦး သေဆုံးသွားတယ်လို့ ကမ္ဘာ့ကျန်းမာရေးအဖွဲ့ကြီးက ပြောပါတယ်။

အနည်းဆုံးကလေးပေါင်း ၁၆၉ ဦးမှာ စိုးရိမ်ဖွယ်အသည်းရောဂါတွေဖြစ်လာပြီး အဲဒီအထဲမှာ ဗြိတိန်နိုင်ငံမှာ ကလေး ၁၁၄ ဦးဖြစ်ပွားနေပါတယ်။ အဲဒီအပြင် အမေရိကန်၊စပိန်၊အစ္စရေး၊ဒိန်းမတ်နှင့် အခြားနိုင်ငံတွေမှာလည်း အလားတူရောဂါတွေ ဖြစ်ပွားနေတာတွေ့ရှိရတယ်လို့ ကမ္ဘာ့ကျန်းမာရေးအဖွဲ့ကြီးက ပြောပါတယ်။

လူနာတွေထဲမှာ တစ်လသားကလေးငယ်ကနေ ၁၆နှစ်အရွယ်အထိ ပါဝင်နေပါတယ်။ အဲဒီအထဲက ကလေး(၁၇)ဦးဟာ အသည်းအစားထိုး ခွဲစိတ်ကုသဖို့လိုအပ်ပါတယ်။

သေဆုံးမှုဖြစ်ခဲ့တဲ့ နိုင်ငံနှင့်ပတ်သက်လို့ အသေးစိတ်ကိုတော့ ကမ္ဘာ့ကျန်းမာရေးအဖွဲ့ကြီးက မထုတ်ပြန်ပါဘူး။

ရောဂါလက္ခဏာတွေထဲမှာ ဝမ်းလျောတာ၊ပျို့အံတာတွေပါဝင်ပြီး အများစုဟာ အဖျားမရှိကြပါဘူး။

အဲဒီရောဂါဖြစ်ပွားသူတွေအားလုံးမှာ ဖြစ်နေကျ အသည်းရောင်ဗိုင်းရပ်စ်(၅)မျိုးကိုလည်း မတွေ့ရှိရပါဘူး။

ရောဂါဖြစ်ပွားမှု ၇၄မှုမှာ အင်ဒီနိုဗိုင်းရပ်စ်တွေ တွေ့ရှိရပြီး အဲဒီအထဲက ၂၀ဦးဟာ ကိုရိုနာဗိုင်းရပ်စ်ကူးစက်ခံထားရပါတယ်။ ၁၉ဦးဟာ ကိုရိုနာဗိုင်းရပ်စ်ရော၊အင်ဒီနိုဗိုင်းရပ်စ်ရောတွေ့ရှိရပါတယ်။

ကူးစက်ခံရသူအများစုဟာ ကိုဗစ်-၁၉ ကာကွယ်ဆေးမထိုးနှံကြရသေးပါဘူး။ အဲဒါကြောင့်လည်း သူတို့ရဲ့ အသည်းရောင် ရောဂါဟာ ကာကွယ်ဆေးရဲ့ ဘေးထွက်ဆိုးကျိုးလို့ သတ်မှတ်လို့မရနိုင်ပါဘူး။

ကမ္ဘာ့ကျန်းမာရေးအဖွဲ့ဟာ အခြေအနေကို အနီးကပ်စောင့်ကြည့်နေပြီး ယူကေရဲ့ ကျန်းမာရေးဌာနှင့်ယင်းရဲ့ မိတ်ဖက် အဖွဲ့အစည်းတွေနှင့် ပူးပေါင်းဆောင်ရွက်နေတယ်လို့ပြောပါတယ်ခင်ဗျာ

Source CMG

Published: 25 April 2022

ရေအားနှင့် ရေပေါ် နေရောင်ခြည်စွမ်းအင်နှစ်မျိုးစပ် ကမ္ဘာ့အကြီးဆုံးထဲက တစ်ခုဖြစ်တဲ့ လျှပ်စစ်ဓာတ်အားပေးစက်ရုံတစ်ရုံကို ထိုင်းနိုင်ငံ အရှေ့မြောက်ပိုင်း ယူဘွန်ရက်ချန်သနီမှာ စတင်လည်ပတ်နေပြီ ဖြစ်ပါတယ်။ ထိုင်းနိုင်ငံက ၂၀၃၇ အရောက်မှာ နိုင်ငံရဲ့ လျှပ်စစ်ဓာတ်အားရဲ့ ၃၅ ရာခိုင်နှုန်းကို ပြန်လည်ပြည့်ဖြိုးမြဲ စွမ်းအင် တွေဖြစ်လာဖို့ ရည်မှန်းထားပါတယ်။

ဒီစီမံကိန်းဟာ ဘန်ကောက်ရဲ့ ကာဘွန်ထုတ်လုပ်မှုလျှော့ချရေး စီမံကိန်းအတွက် အဓိက ခြေလှမ်းအဖြစ် မှတ်ယူရမှာ ဖြစ်ပါတယ်။

ဒီစီံမံကိန်းမှာ အသစ်တည်ဆောက်တဲ့ ရေပေါ်နေရောင်ခြည်စွမ်းအင်ကွင်းတွေနှင့် လက်ရှိရေအားလျှပ်စစ်စက်ရုံကို ပေါင်းစပ် ထားတာပါ။ အဲဒီပြည်နယ်ရဲ့ သီရိဒွန်ဆည်မှာ ဟက်တာ၁၂၀ရှိတဲ့ရေပြင်ပေါ်မှာ ဆိုလာပြားပေါင်း တစ်သောင်း လေးထောင့် လေးရာကျော်တပ်ဆင်ပေးထားပါတယ်။

အဲဒီဆိုလာပြားတွေကို ထိုင်းနိုင်ငံရဲ့ ဘီ ဂရင်း ပါဝါ အများပိုင်ကုမ္ပဏီနှင့် တရုတ်စွမ်းအင် အင်ဂျင်နီယာကော်ပိုရေးရှင်းတို့က ပူးတွဲတည်ဆောက်ပေးခဲ့တာပါ။ အဲဒီနေရောင်ခြည်စွမ်းအင်သုံးစက်ရုံတွေကနေ အမျိုးသား Grid လိုင်းထဲ ၄၅ မဂ္ဂါဝင် ထည့်သွင်းပေးနိုင်ပါလိမ့်မယ်။

တစ်ပြိုင်နက်မှာပဲ အလားတူ စီမံကိန်း ၁၅ခုကို ထိုင်းနိုင်ငံရဲ့ ရေလှောင်ကန်ကြီး(၉)ခုမှာ တည်ဆောက်တော့မှာဖြစ်ပြီး ထိုင်းနိုင်ငံရဲ့ ကာဘွန်ထုတ်လုပ်မှုသုညအဆင့်ရည်မှန်းချက်အတွက် ပိုပြီးနီးစပ်လာနေပါတယ်။

“ ကျွန်တော်တို့ရဲ့ စွမ်းအင်လုံခြုံရေးတိုးမြှင့်ဖို့  ကြီးမားတဲ့ ခြေလှမ်းတစ်ခု လှမ်းလိုက်နိုင်တာကို ဂုဏ်ယူမိပါတယ်။ အနာဂတ်မှာနောင် အနှစ်၂၀မှ ၃၀အတွင်း  ကျွန်တော်တို့ရဲ့ နေရောင်ခြည်စွမ်းအင်စီမံကိန်းတွေကနေ ၅၀၀၀ မဂ္ဂါဝပ်အထိ လျှပ်စစ်ဓာတ်အားတွေ ထုတ်လုပ်နိုင်ပါလိမ့်မယ်။ အဲဒါဆို ရုပ်ကြွင်းလောင်စာအပေါ် ကျွန်တော်တို့မှီခိုနေရတာကို လျှော့ချပေးနိုင်ပါလိမ့်မယ်” လို့ ဆည်ရဲ့လျှပ်စစ်ဓာတ်အားစက်ရုံအကြီးအကဲ ဆန်ဝန်ပရုမ်ဆမ်လီက ပြောပါတယ်။

ထိုင်းနိုင်ငံတလျောက် စွမ်းအင်ကွန်ယက်ဟာ ရုပ်ကြွင်းလောင်စာတွေအပေါ် အလွန်အမင်းမှီခိုနေရတဲ့အတွက်  ကာဘွန် ထုတ်လုပ်မှုလျှော့ချဖို့က ခရီးရှည်ကြီးဖြစ်နေပါတယ်။ ယခုထိုင်းရဲ့လျှပ်စစ်ဓာတ်အားထုတ်လုပ်မှုစုစုပေါင်းရဲ့ ၈၀ ရာခိုင်နှုန်းဟာ ရုပ်ကြွင်းလောင်စာတွေနှင့် ထုတ်လုပ်နေရတာပါ။ပြန်လည်ပြည့်ဖြိုးမြဲစွမ်းအင်ကနေ ထုတ်လုပ်တာ ၁၇ ရာခိုင်နှုန်းပဲရှိပါတယ်။ဒါပေမယ့် ဒီလိုစီမံကိန်းတွေကတော့ ကောင်းတဲ့အလားအလာတွေဖြစ်ပါတယ်။

ကိုဗစ်ကြောင့် ဒုက္ခရောက်ကြရတယ်။ ဝင်ငွေတွေကျသွားပြီး ငွေကြေးအကူအညီရဖို့လည်း အတော်ခက်သွားတယ်။ တစ်ရွာလုံးက ဒီဆည်စီမံကိန်းကို ကျေးဇူးတင်ကြပါတယ်။ လူတွေရဲ့ ဘဝတွေသိသိသာသာပြောင်းသွားတာ တွေ့ရတယ်။ ပြည်နယ်မှာ စီးပွာရေးလည်းတိုးတက်လာပါတယ် လို့ ရွာသားတစ်ဦးဖြစ်တဲ့ အိုလန်အင်တီယမ်ကပြောပါတယ်။

Source: CMG

#LocalNews
Published - 25 April 2022

လတ်တလောမှာ ကိုဗစ်လူနာတွေပို့ဆောင်ပေးရမှု မရှိသလောက်နည်းနေပြီး မွေးလူနာနဲ့ အခြား သော ထိခိုက်ဒဏ်ရာရရှိသူတွေကို ပို့ဆောင်ပေးရတာအများဆုံးဖြစ်နေတယ်လို့ ရွှေလောင်းလှေပရဟိတဖောင်ဒေးရှင်း ဥက္ကဌဦးသော်တာထွေးကပြောပါတယ်၊၊

#Yangon_Media_Group

#Local News
Published-25 April 2022

ပုဂံဒေသမှာ ရှေးဟောင်းအဆောက်အအုံများ ပြုပြင်ထိန်းသိမ်းရေးနှင့် မြစ်ရေတိုက်စားမှုကာကွယ်ရေး ဆောင်ရွက်လျက်ရှိတယ်လို့ ရှေးဟောင်းသုတေသနဌာန(ပုဂံဌာနခွဲ)မှသိရပါတယ်၊၊

ရှေးဟောင်းအဆောက်အအုံအမှတ် (၁၅၉၉)ဘုရားတွင် မြောက်ဘက်ရင်ပြင်တံတိုင်း ပဲ့ကျပျက်စီးမှုအား အုတ်စားဖြည့်စီခြင်း၊ရှေးဟောင်းအဆောက်အအုံအမှတ် (၁၀၄၂) ဆင်ကအုတ်တိုက် အနောက်တောင်ထောင့် အထက်ချင်မိတ်တိုးအုတ်စားဖြည့်စီခြင်းလုပ်ငန်းတွေကို ပုဂံဌာနခွဲမှ ညွှန်ကြားရေးမှူး၊ ဒုတိယညွှန်ကြားရေးမှူး၊ လက်ထောက်ညွှန်ကြားရေးမှူးတွေနဲ့ လက်ထောက်‌ အင်ဂျင်နီယာတွေ၊ ဌာနအင်ဂျင်နီယာတွေက ကြည့်ရူစစ်ဆေးခဲ့ပါတယ်၊၊

ဒီ့အပြင် ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာနနှင့် တင်ဒါအောင်မြင်တဲ့ လင်းလက်ပြည့်စုံ‌အောင် ကုမ္ပဏီလီမိတက်မှ ဆောင်ရွက်လျှက်ရှိတဲ့ လောကနန္ဒာ စွယ်တော်မြတ်စေတီတော်နဲ့ လောကနန္ဒာဘေးမဲ့တော ဥယျာဉ်တို့ကို ဧရာဝတီမြစ်ရေတိုက်စားမှုမှ ကာကွယ်ထိန်းသိမ်းနိုင်ရေးအတွက် Bored Pile အခြေပြုမြစ်ကမ်းထိန်း ကျောက်စီနံရံနဲ့ Gabion Box ကျောက်ဖြည့်မြေထိန်း အကာအရံတည်ဆောက်ခြင်းလုပ်ငန်းတွေကိုလည်း ကွင်းဆင်းစစ်ဆေးပြီး လိုအပ်သည်များကို ဖြည့်စွက်မှာကြားခဲ့တယ်လို့ သိရပါတယ်၊၊

ymg/tthl
#Yangon_Media_Group