#Local_News
Published _ 2 August 2022

ပြည်တွင်းစားသုံးဆီဈေးကွက်တွင် စားအုန်းဆီဈေးနှုန်းတစ်ပိဿာလျှင် ၇၅၀၀ ကျပ်ဈေးအထက်ဖြင့်ဝယ်ယူနေရပြီး စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက ထုတ်ပြန်သည့်ရည်ညွှန်းဈေးနှုန်းနှင့် ထက်ဝက်ခန့် ကွာဟနေကြောင်း ဈေးကွက်အတွင်းမှ စုံစမ်းသိရှိရသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီက သြဂုတ်လ ၁ ရက်မှ ၇ ရက်အထိ အခြေခံလက်ကားရည်ညွှန်း ရန်ကုန်ဈေးနှုန်း တစ်ပိဿာလျှင် ၃၅၂၅ ကျပ်ဖြစ်ကြောင်း ထုတ်ပြန်ကြေညာထားသော်လည်း ပြင်ပတွင် တစ်ပိဿာ ၇၀၀၀ ကျပ်ကျော်ဖြင့် ဝယ်ယူနေရခြင်းဖြစ်ကြောင်း အဆိုပါစျေးကွက်မှ တဆင့်သိရသည်။

ရည်ညွှန်းဈေးနှုန်းတွက်ချက်မှုမှာ စားအုန်းဆီအဓိက ထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခကုန်ကျစရိတ်များ၊ ဘဏ်စရိတ်များ၊ အခွန်အခများထည့်သွင်းတွက်ချက်၍ အခြေခံလက်ကားရည်ညွှန်းဈေးနှုန်းကို ထုတ်ပြန်ခြင်းဖြစ်ကြောင်း စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ထုတ်ပြန်ထားသည်။

ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်၍သိုလှောင်ခြင်းနှင့် မသမာသည့်လုပ်ဆောင်မှုများ ပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်း သိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီက အသိပေးထုတ်ပြန်ထားသည်။

လက်ရှိ ဈေးကွက်အတွင်းရောင်းချနေသည့် ပဲဆီဈေးနှုန်းမှာလည်း တစ်ပိဿာလျှင် ၁၁၀၀၀ ကျပ်မှ ၁၃၀၀၀ ကျပ်ဈေးအထိ ရောင်းချကြောင်း ဈေးကွက်အတွင်းမှ သိရသည်။

ymg/NN
#Yangon_Media_Group

#Local_News
Published _ 2 August 2022

လူမူဖူလုံရေးအလုပ်သမားတွေ ဆေးကုသမှုခံယူနိုင်ရန် ပုဂ္ဂလိဆေးခန်း(၂၁)ခုဖြင့် ချိတ်ဆက်မှုများပြုလုပ်ထားကြောင်း လူမှုဖူလုံရေးအဖွဲက ထုတ်ပြန်ထားသည်။

လူမှုဖူလုံရေးအာမခံ အလုပ်သမားတွေအနေနှင့် ယင်းဆေးခန်းများတွင် အခမဲ့သွားရောက်ဆေးကုသမှုခံယူနိုင်ပြီး ကုန်ကျငွေကို လူမှုဖူလုံရေးအဖွဲ့မှ စိုက်ထုတ်ပေးမှာဖြစ်ကြောင်း သိရသည်။

ထိုပုဂ္ဂလိကဆေးရုံဆေးခန်းများနှင့် ပူးပေါင်းဆေးကုသမှုပေးနိုင်ရန် ၂၀၁၉ ခုနှစ် ကထဲက စတင်ကြိုးစားခဲ့တာဖြစ်ပြီး ယခုဆို ပုဂ္ဂလိကဆေးခန်း (၂၁)ခုအထိချိတ်ဆက်ထားနိုင်ပြီဖြစ်ကြောင်း ယင်းမှသိရသည်။

"မြို့နယ်အလိုက် ဖူလုံရေးဆေးခန်းတွေမှာလည်း လိုအပ်တဲ့ကျန်းမာရေးစောင့်ရှောက်မှုခံလို့ရတယ်။ ပိုပြီးကျန်းမာရေးစောင့်ရှောက်ပေးနိူင်ဖို့အတွက် ပုဂ္ဂလိကဆေးခန်းတွေနဲ့ထပ်ပူးပေါင်းလုပ်နေတာ"ဟု လူမှုဖူလုံရေးအဖွဲ့တာဝန်ရှိသူတစ်ဦးက ဆိုသည်။

ချိတ်ဆက်ထားသည့် ဆေးခန်းများအနက် ရန်ကုန်၊ မန္တလေး၌အများဆုံးဖြစ်ပြီး ပဲခူး၊ မြိတ်၊ မြစ်ကြီးနား၊ တောင်ကြီး၊ နေပြည်တော်စသည့် မြို့များမှ ဆေးခန်းများလည်းပါဝင်ကြောင်း တွေ့ရှိရသည်။

လူမှုဖူလုံရေးအဖွဲ့အနေနှင့် အလုပ်သမားဆေးရုံ(၃)ခု၊ ဌာနကြီးဆေးခန်း(၅၇)ခန်း၊ လူမူဖူလုံရေးဆေးခန်း (၉၆)ခုမှနေ၍ ဆေးကုသမှုများ ပြုလုပ်ပေးလျှက်ရှိကြောင်း သိရသည်။

ymg/NN
#Yangon_Media_Group

#Local_News
Published_2 August 2022

ထိုင်းနိုင်ငံသို့ တရားမဝင်လာရောက်သည့် မြန်မာနိုင်ငံသား ၁၀ ဦးနှင့် ယင်းတိုကိုတင်ဆောင်မောင်းနှင်လာသည့် ချင်းမိုင်ခရိုင်ဒေသခံ အိုက်ဟွမ် အမည်ရှိ ယာဉ်မောင်းတစ်ဦးအား ထိုင်းနိုင်ငံ အမြန်လမ်းရဲတပ်ဖွဲ့က အယုဒ္ဓယခရိုင်အဝင် အာရှလမ်းတွင် သြဂုတ်လ (၁) ရက် ညပိုင်းက ဖမ်းဆီးလိုက်ကြောင်း သိရသည်။

အရှိန်မြှင့်မောင်းလာသော အဆိုပါယာဉ်ကို သံသယဖြစ်၍ လှည့်ကင်းပြုလုပ်‌နေသော အမြန်လမ်းရဲတပ်ဖွဲ့က တားစီးစစ်ဆေးစဉ် ယင်းတို့ကို ဖမ်းဆီးမိခြင်းဖြစ်ကြောင်း ထိုင်းနိုင်ငံဆိုင်ရာ မြန်မာအလုပ်သမားအရေး ဆောင်ရွက်နေသူတစ်ဦးက ပြောသည်။

အဲဒီအလုပ်သမားများမှာ တာချီလိတ်မြို့ဘက်မှ တောလမ်းကြောင်းသုံးပြုပြီး ထိုင်းနိုင်ငံ ချင်းမိုင်ခရိုင်ဘက်သို့ ဝင်ရောက်လာခြင်း ဖြစ်ကြောင်း၊ ပွဲစားခအဖြစ် တစ်ယောက်လျှင် ဘတ် ၁၅၀၀၀ စီပေးဆောင်ရကြောင်းနှင့် လိုက်ပါပို့ဆောင်သည့် ယာဉ်မောင်းအား ပို့ဆောင်ခတစ်ဦးလျှင် ဘတ် ၄၅၀၀ ပေးရကြောင်း သိရသည်။

လက်ရှိတွင် အဆိုပါ အဖမ်းခံရသူများအား အယုဒ္ဓယခရိုင် မဟာရတ်ရဲစခန်းသို့ ပို့ဆောင်ထားကြောင်းနှင့် ထိုင်းနိုင်ငံဆိုင်ရာ ပြဌာန်းဥပဒေများနှင့်အညီ ရင်ဆိုင်ရမည် ဖြစ်ကြောင်း သိရသည်။

ymg/mt
#Yangon_Media_Group

#Local_News
Published -2 August 2022

ပြည်တွင်းငွေလဲစျေးနှုန်းမှာ မတည်ငြိမ်ခြင်းကြောင့် ပဲ၊ နှမ်းစျေးကွက်၌ ပုံမှန်မဟုတ်သည့် ဈေးနှုန်းများဖြင့် အရောင်းအဝယ်ဖြစ်နေကြောင်း ကုန်သည်များ၏ ပြောပြချက်အရ သိရသည်။

ဒေါ်လာဈေးအပေါ် အခြေခံသည့် ကုန်သွယ်ရေးမူဝါဒအပြောင်းအလဲကြောင့် ပဲမျိုးစုံဈေးကွက်အတွင်း ပဲ၊ နှမ်းအားလုံး ဈေးမြင့်တက်လာသည့်အပြင် လက်ကျန်နည်းလာသည့် ပို့ကုန်ပဲများမှာ ဈေးမြင့်တက်လာကြောင်း သိရသည်။

အစိုးရမှ ဒေါ်လာငွေသတ်မှတ်ချက်အပြင် ငွေပေးချေမှု၊ တင်ပို့မှုဆိုင်ရာ လိုင်စင်လျှောက်ထားရမှုတို့ကြောင့် ပဲ၊ နှမ်းဈေးကွက်တွင် နှစ်ရက်ခန့် အရောင်းအဝယ် ရပ်ဆိုင်းလုဖြစ်သွားပြီး ပစ္စည်းလက်ဝယ်ရှိသူများမှ ပြင်ပဒေါ်လာဈေးပေါ်မူတည်၍ ဈေးချိန်ညှိကာ ကြိုက်ဈေးရမှသာ ရောင်းချသည့် ပုံစံဖြစ်လာကြောင်း သိရသည်။

ကုန်သွယ်ရေးမှုဝါဒ အပြောင်းအလဲကြောင့် နယ်စပ်ကုန်သွယ်မှုတွင် ပို့ကုန်သမားများ တင်ပို့မှုရပ်ဆိုင်းထားရကြောင်း သိရသည်။

ပဲ၊ ပြောင်း၊ နှမ်းအမျိုးမျိုးနှင့် မြေပဲတို့ကို ပင်လယ်ရေကြောင်းမှ တင်ပို့ရန် ထောက်ခံချက်ရယူလိုပါက ပို့ကုန်ကြိုတင်ရငွေ USD လက်ခံကို ပူးတွဲလျှောက်ထားရမည် ဖြစ်ကြောင်း စီးပွားရေးနှင့် ကူးသန်း ရောင်းဝယ်ရေးဝန်ကြီးဌာနမှ ထုတ်ပြန်ကြေညာထားသည်။

ymg/sth
#Yangon_Media_Group

#World_News
Published 2 August 2022

အမေရိကန်က အယ်လ်ကိုင်ဒါအဖွဲ့ခေါင်းဆောင်'အေမန်အယ်လ်ဇာဝါဟီရီ'ကို အာဖဂန်နစ္စတန်နိုင်ငံအတွင်း အသေပစ်သတ်နိုင်ခဲ့ကြောင်း သမ္မတ'ဂျိုးဘိုင်ဒန်'က တနင်္လာနေ့မှာ ကြေညာခဲ့ပါတယ်။

ဒီသတင်းဟာ အယ်လ်ကိုင်ဒါအဖွဲ့တည်ထောင်သူ'အိုစာမာဘင်လာဒင်' ၂၀၁၁ ခုနှစ်က အသတ်ခံရပြီးနောက်ပိုင်း အဆိုပါစစ်သွေးကြွအဖွဲ့အတွက် အကြီးမားဆုံးနစ်နာဆုံးရှုံးမှုကြီး ဖြစ်ပါတယ်။

'ဇာဝါဟီရီ'ဟာ အီဂျစ်ခွဲစိတ်ဆရာဝန်တစ်ဦးဖြစ်ပြီး အမေရိကန်ပြည်သူပေါင်း ၃ ထောင်နီးပါးသေဆုံးခဲ့ရတဲ့ ၂၀၀၁ ခုနှစ် စက်တင်ဘာ ၁၁ ရက်နေ့တိုက်ခိုက်မှုမှာ ပါဝင်ကူညီခဲ့တာကြောင့် သူ့ရဲ့အသက်အတွက် ဒေါ်လာ ၂၅ သန်းဆုကြေး ထုတ်ထားပါတယ်။

အာဖဂန်မြို့တော်ကာဘူးလ်မှာ အမေရိကန်ဒရုန်းဖြင့် ပစ်ခတ်ခဲ့ရာ တနင်္ဂနွေနေ့ မနက် ၆ နာရီ ၁၈ မိနစ်မှာ 'ဇာဝါဟီရီ'သေဆုံးခဲ့တာဖြစ်ကြောင်း အမေရိကန်အရာရှိများက ပြောကြားခဲ့ကြပါတယ်။

"အခုတော့ တရားမျှတအောင် စီရင်လိုက်နိုင်ပါပြီ၊ အကြမ်းဖက်ခေါင်းဆောင်မရှိတော့ပါဘူး၊ အမေရိကန်နိုင်ငံသားတွေကို ခြိမ်းခြောက်လာရင် ဘယ်လောက်ပဲရှာရရှာရ ပြေးမလွတ်ပါဘူး၊ အမေရိကန်ကတွေ့အောင်ရှာပြီး ပြစ်ဒဏ်ချသွားမှာပါ" လို့ သမ္မတ'ဘိုင်ဒန်'က အိမ်ဖြူတော်မှာပြောကြားခဲ့ပါတယ်။

အမေရိကန်ထောက်လှမ်းရေးအဖွဲ့က ထောက်လှမ်းရေးလမ်းကြောင်းဘက်ပေါင်းစုံကနေ အကဲဖြတ်ခဲ့ရာ သေဆုံးသွားတဲ့လူက 'ဇာဝါဟီရီ'ဖြစ်တယ်ဆိုတာ အလွန်သေချာကြောင်း ဆုံးဖြတ်ချက်ချခဲ့ပါတယ်။

အကြီးတန်းအရာရှိတစ်ဦးက သတင်းထောက်တွေကို ပြောကြားရာမှာ 'ဇာဝါဟီရီ'က ကာဘူးလ်မြို့ရှိ နေအိမ်တစ်ခုမှာ မိသားစုဝင်များနဲ့နေထိုင်နေတာဖြစ်ပြီး ဝရန်တာမှာရှိနေခိုက်အသတ်ခံလိုက်ရကာ တခြားထိခိုက်မှုများ မရှိခဲ့ပါဘူး။

'ဇာဝါဟီရီ'ဟာ USS Cole သင်္ဘောနဲ့ ကင်ညာ၊ တန်ဇန်နီးယားတိုရှိ အမေရိကန်သံရုံးများကို တိုက်ခိုက်ခဲ့မှုတွေမှာ နောက်ကွယ်ကနေ အဓိကချုပ်ကိုင် ပါဝင်ခဲ့သူဖြစ်ကြောင်း 'ဘိုင်ဒန်'ကဆိုပါတယ်။

"ဇာဝါဟီရီက အမေရိကန်နိုင်ငံတော်လုံခြုံရေး၊ အမေရိကန်ပြည်သူတွေနဲ့ အမေရိကန်ရဲ့အကျိုးစီးပွားကို အမြဲခြိမ်းခြောက်နေသူပါ၊ သူ့ရဲ့သေဆုံးမှုက အယ်လ်ကိုင်ဒါအတွက် အလွန်အထိနာပြီး စစ်သွေးကြွအဖွဲ့ရဲ့လုပ်ဆောင်ချက်တွေ နိမ့်ပါးသွားတော့မှာဖြစ်တယ်"လို့ အရာရှိတစ်ဦးက ပြောကြားခဲ့ပါတယ်။

လတ်တလောနှစ်များ အတွင်း 'ဇာဝါဟီရီ'သေဆုံးခဲ့တယ်ဆိုတဲ့ ကောလာဟလတွေ အကြိမ်ကြိမ်ထွက်ပေါ်ခဲ့တဲ့အပြင် ကျန်းမာရေးမကောင်းဘူးလို့လည်း သတင်းကြားနေခဲ့ရပါတယ်။

ယခုတိုက်ခိုက်ခြင်းဟာ အမေရိကန်တပ်ဖွဲ့များနဲ့ သံတမန်တွေ ၂၀၂၁ ဩဂုတ်လက အာဖဂန်မှထွက်ခွာပြီးနောက်ပိုင်း နိုင်ငံအတွင်း အမေရိကန်တို့ ပထမဆုံးအနေနဲ့ တိုက်ခိုက်ခဲ့တာလည်းဖြစ်ပါတယ်။

ဒါဟာ အာဖဂန်နိုင်ငံအတွင်း အမေရိကန်တပ်များ မရှိဘဲနဲ့တောင် ခြိမ်းခြောက်မှုတွေ ပြုလုပ်နိုင်ဆဲဖြစ်တယ်ဆိုတာကို ပြသရာရောက်ပါတယ်။

တာလီဘန်မှ ပြောရေးဆိုခွင့်ရှိသူ'ဇာဘီဟူလာမူဂျာဟစ်'က ပစ်ခတ်မှုဖြစ်ပွားခဲ့ကြောင်းအတည်ပြုခဲ့ပြီး နိုင်ငံတကာအခြေခံမူများကို ချိုးဖောက်ရာကျကြောင်း ပြင်းပြင်းထန်ထန်ရှုတ်ချ လိုက်ပါတယ်။

'ဇာဝါဟီရီ'ဟာ အယ်လ်ကိုင်ဒါအဖွဲရဲ့ ဗျူဟာမှူးဖြစ်ပြီး နှစ်ပေါင်းများစွာ စီစဉ်ကြီးကြပ်ခဲ့ပြီးနောက် 'ဘင်လာဒင်'ရဲ့နေရာကို ဆက်ခံခဲ့သူဖြစ်ပါတယ်။

Source: Reuters
#Yangon_Media_Group

#Local_News
Published -2 August 2022

မြန်မာနိုင်ငံရှိ အလုပ်အကိုင်အခွင့်အလမ်းများသည် ၂၀၂၀ ခုနှစ်နှင့် နှိုင်းယှဉ်မည်ဆိုပါက အလုပ်အကိုင်အခွင့်အလမ်း ၁ ဒသမ ၁ သန်း လျော့နည်းသွားကြောင်း အပြည်ပြည်ဆိုင်ရာအလုပ်သမားအဖွဲ့ (ILO) က ထုတ်ပြန်ထားသည်။

အပြည်ပြည်ဆိုင်ရာ အလုပ်သမားအဖွဲ့ချုပ် (ILO) အနေဖြင့် မြန်မာနိုင်ငံရှိအလုပ်အကိုင်များနှင့် ပတ်သက်၍ အစီရင်ခံစာကို ဩဂုတ်လ ၁ ရက်နေ့တွင် ထုတ်ပြန်ခဲ့ခြင်းဖြစ်သည်။

နိုင်ငံအတွင်း၌ အလုပ်အကိုင်အရည်အသွေး ပိုမိုဆိုးရွားစွာကျဆင်းလာလျက်ရှိပြီး ကုန်ထုတ်စွမ်းအားများ ပိုမိုပြီးကျုံလာကာ ၂၀၂၀ ပြည့်နှစ် အချိန်ကာလ အလုပ်အကိုင်တွေထက် အဆင့်နိမ့်ကျလျက်ရှိနေဆဲဖြစ်ကြောင်း ILO မှ ခန့်မှန်းထားခြင်းဖြစ်သည်။

၂၀၂၁ ခုနှစ်၊ ဖေဖော်ဝါရီလ ၁ ရက်နေ့ မှ ၁၈ လ ကြာကာလအတွင်းနှင့် ကိုဗစ်ကပ်ရောဂါဖြစ်ပွားသည့် တစ်နှစ်ခွဲကြာကာလအတွင်း မြန်မာနိုင်ငံတွင် အလုပ်အကိုင်ဆုံးရှုံးမှုများနှင့် အလွန်အမင်းကြုံတွေ့နေရကြောင်း သိရသည်။

ယင်းအပြင် ၂၀၂၀ ပြည့်နှစ်နှင့် နှိင်းယှဉ်ပါက အမျိုးသမီးများသည် အမျိုးသားများ၏ အလုပ်ကိုင် ၁ ဒသမ ၁ သန်း နည်းပါးသွားကြောင်း၊ ၂၀၂၂ ခုနှစ်၊ ပထမနှစ်ဝက်တွင် အလုပ်အကိုင်အခြေအနေ အနည်းငယ်ပြန်လည်ကောင်းမွန်လာကြောင်း သိရသည်။

အလားတူ ၂၀၂၁ ခုနှစ်တွင် လုပ်သားကုန်ထုတ်စွမ်းအား ၈ ရာခိုင်နှုန်း ကျုံဆင်းသွားခဲ့ပြီး၊ ၂၀၂၂ ခုနှစ်၊ ပထမနှစ်ဝက်၌ ၂ ရာခိုင်နှုန်း ထပ်မံကျုံဆင်းသွားကြောင်း ထုတ်ပြန်ခဲ့သည်။

ymg/sth
#Yangon_Media_Group

#Local_News
Published_2 August 2022

တောင်ကိုရီးယားနိုင်ငံတွင် သွားရောက်အလုပ်လုပ်ကြမည့် မြန်မာလုပ်သား ၁၄၇ ဦး ယနေ့ သြဂုတ်လ ၂ ရက်တွင် ထပ်မံ သွားရောက်ခဲ့ကြကြောင်း တောင်ကိုရီးယားနိုင်ငံဆိုင်ရာ ဆိုးလ်မြို့မြန်မာသံရုံးက ထုတ်ပြန်လိုက်သည်။

ယင်းတွင် Re-entry လုပ်သား ၂၀ ဦးနှင့် ကုန်ထုတ်လုပ်သားအဖြစ် အသစ်ဝင်ရောက် လုပ်ကိုင်မည့် လုပ်သားသစ် ၁၂၇ ဦး စုစုပေါင်း ၁၄၇ ဦး ဖြစ်ပြီး ရန်ကုန်မှ အင်ချွန်း အပြည်ပြည်ဆိုင်ရာလေဆိပ်ကို ရောက်ရှိခဲ့ကြပြီ ဖြစ်ကြောင်း အဆိုပါ ထုတ်ပြန်ချက်တွင် ဖော်ပြထားသည်။

ယင်းတို့အား တောင်ကိုရီးယားနိုင်ငံဆိုင်ရာဆိုးလ်မြို့ရှိ မြန်မာသံရုံးမှ အလုပ်သမားသံအရာရှိကကြိုဆို၍ အလုပ်သမားများ သိရှိလိုက်နာသင့်သည့် အချက်များကို မှာကြားခြင်း၊ လိုအပ်သည်များ ကူညီပံ့ပိုးပေးခြင်းများပြုလုပ်ခဲ့ကြောင်း သိရသည်။

ပြီးခဲ့သည့် ဇူလိုင်လ ၂၆ ရက်ကလည်း စိုက်ပျိုးရေးနှင့် မွေးမြူရေးလုပ်သားအဖြစ်အသစ်ဝင်ရောက် လုပ်ကိုင်မည့် လုပ်သားသစ်(၂၃)ဦးနှင့် ကုန်ထုတ်လုပ်သားအဖြစ် အသစ်ဝင်ရောက် လုပ်ကိုင်မည့် လုပ်သားသစ်(၁၁၉)ဦး ၊ ဇူလိုင် ၂၈ ရက်တွင် ၁၇၉ ဦး သွားရောက်ခဲ့ကြသေးကြောင်း သိရသည်။

လက်ရှိအချိန်အထိ တောင်ကိုရီးယားနိုင်ငံ၌ မြန်မာလုပ်သား ၄၀၀၀၀ ကျော်ရောက်ရှိလုပ်ကိုင်နေကြကြောင်း အလုပ်သမားရေးဝန်ကြီးဌာန စာရင်းများအရ သိရသည်။

ymg/mt
#Yangon_Media_Group

#Local_News
Published_2 August 2022

တရုတ်-မြန်မာနိုင်ငံတကာလမ်းကြောင်းရှိ အဓိကအစိတ်အပိုင်းဖြစ်သော ယူနန်ပြည်နယ် တာလီ-ရွှေလီရထားလမ်း၏ တာ့လီ-ပေါင်စန်းလမ်းပိုင်းဖွင့်လှစ်လိုက်ပြီ ဖြစ်ကြောင်း မြန်မာနိုင်ငံဆိုင်ရာ တရုတ်သံရုံးက ထုတ်ပြန်လိုက်သည်။

အဆိုပါ ရထားလမ်း ဖွင့်လှစ်ပြေးဆွဲပြီးနောက် တရုတ်နိုင်ငံနှင့် မြန်မာနိုင်ငံအပါအဝင် အရှေ့တောင်အာရှနိုင်ငံများအကြား ကုန်စည်စီးဆင်းမှုလမ်းကြောင်းသစ်များကို ကုန်းလမ်းနှင့် ရထားလမ်း၊ ရေကြောင်းနှင့် ရထားလမ်းပေါင်းစပ် ပို့ဆောင်သည့်နည်းလမ်းဖြင့် လုပ်ဆောင်နိုင်မည် ဖြစ်ကြောင်း သိရသည်။

ယူနန်ပြည်နယ် ပေါင်စန်းဘူတာမှ C296 Fuxing EMU ရထားထွက်ခွာဖွင့်လှစ်ခဲ့ပြီးအရှေ့ဘက် တာ့လီသို့ ဦးတည်ခုတ်မောင်းခဲ့ကြောင်း၊ ယင်းရထားလမ်းမှာ ၁၄ နှစ်ကြာမြင့်ခဲ့ပြီး ယခုအခါ တာ့လီ-ရွှေလီရထားလမ်း၏ တာ့လီ-ပေါင်စန်းလမ်းပိုင်းကို တရားဝင် ဖွင့်လှစ်ပြေးဆွဲနိုင်ခဲ့ခြင်း ဖြစ်ကြောင်းလည်း သိရသည်။

ယင်းရထားလမ်းပိုင်းတွင်ပါသည့် ပေါင်စန်းလိုဏ်ခေါင်းကို (၆)နှစ်ကြာ ဖောက်လုပ်ခဲ့ရကာ ပြီးခဲ့သည့် ဧပြီလ ၁၉ ရက်တွင် ဖောက်လုပ်ပြီးစီးခဲ့ကြောင်း ၊တရုတ်-မြန်မာ နိုင်ငံတကာလမ်းကြောင်းကြီးဖြစ်သော ယူနန်ပြည်နယ် တာလီ-ရွှေလီရထားလမ်း၏ ဖူဖျောင်းမြို့နယ်မှ နုကျန်းမြစ် အရှေ့ဘက်ကမ်းထိ အလွန်ရှည်လျားသော ဥမင်လိုဏ်ခေါင်းအုပ်စု အဖြစ် တည် ဆောက်နိုင်ခဲ့ခြင်းဖြစ်ကြောင်း မြန်မာနိုင်ငံဆိုင်ရာ တရုတ်သံရုံးက ထုတ်ပြန်ထားခဲ့သည်။

တာလီ-ရွှေလီရထားလမ်းမှာ စုစုပေါင်း (၃၃၀) ကီလိုမီတာ ရှည်လျားပြီး တံတားနှင့် ဥမင်လိုဏ်ခေါင်း (၇၆)ရာခိုင်နှုန်း ထိ ပါဝင်ကြောင်း၊တာလီ-ရွှေလီရထားလမ်းတစ်လျှောက် လိုဏ်ခေါင်း ၄၄ ခုတွင် လိုဏ်ခေါင်း ၂ ခုသာကျန်ရှိတော့ကြောင်း၊ တာလီမှ ပေါင်စန်း၊ ပေါင်စန်းမှ ရွှေလီ အပိုင်းခွဲဆောက်လုပ်ခဲ့ခြင်း ဖြစ်ကြောင်းလည်း သိရသည်။

မြန်မာနိုင်ငံနှင့် တောတောင်ရေမြေထိစပ်လျက်ရှိသော ပေါင်စန်းမြို့မှာ ယူနန်ပြည်နယ် အနောက်တောင်ပိုင်းတွင် တည်ရှိသော မြို့ ဖြစ်ကြောင်း သိရသည်။

လက်ရှိတွင် တာ့လီ-ရွှေလီရထားလမ်း၏ ပေါင်စန်း-ရွှေလီလမ်းပိုင်းဖောက်လုပ်မှုကို စနစ်တကျ မြှင့်တင်လျက်ရှိပြီးလမ်းကြောင်း တစ်ခုလုံးဖွင့်လှစ်နိုင်ပါကတရုတ်-မြန်မာနိုင်ငံတကာ ရထားလမ်းကြောင်း၏ တရုတ်နိုင်ငံတွင်းလမ်းပိုင်းကို ဘက်စုံတည်ဆောက်ပြီးစီးမည်ဖြစ်ကာ “Belt and Road” နှင့် တရုတ်-မြန်မာစီးပွားရေးစင်္ကြံ တည်ဆောက်ရေးအတွက် တာ့လီ-ရွှေလီရထားလမ်းမှ ဝန်ဆောင်မှုပေးသည့် အခန်းကဏ္ဍကို ပိုမိုသိသာထင်ရှားစေမည် ဖြစ်ကြောင်း သိရသည်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး
ymg/mt
#Yangon_Media_Group

#Health_Tips
Published 2 August 2022

အမေရိကန်နဲ့ ယူကေတို့ရှိ အရွယ်ရောက်ပြီးသူ ၃ ပုံ ၂ ပုံခန့်ဟာ တစ်နေ့တာအိပ်စက်ချိန် ၈ နာရီလုံလောက်အောင် မရရှိကြဘဲ ပျမ်းမျှအားဖြင့် ၆ နာရီလောက်သာ အိပ်ချိန်ရှိနေကြပါတယ်။

လုပ်ငန်းခွင်တာတွေကြောင့် အိပ်ချိန်မလုံလောက်တာမျိုး ဖြစ်ကြပေမယ့် ခေတ်မီနည်းပညာများစွဲလမ်းစွာ အသုံးပြုခြင်း၊ လေ့ကျင့်ခန်းမလိုက်စားခြင်း၊ စားသောက်ခြင်းပုံစံမမှန်ခြင်းတို့ကြောင့်လည်း အိပ်ချိန်နည်းပါးနေရတာဖြစ်ပါတယ်။

အကောင်းဆုံးအိပ်စက်ခြင်းရရှိစေရန် ကျွမ်းကျင်သူဆရာဝန်များက ၁၀-၃-၂-၁ ဖော်မြူလာအတိုင်း တစ်ဆင့်ချင်းလုပ်ဆောင်သွားဖို့ အကြံပြုထားပါတယ်။

*ညမအိပ်ခင် ၁၀ နာရီအလိုကစပြီး ကဖင်းဓာတ်သောက်သုံးခြင်းကိုရှောင်ရှားပါ*
ကဖင်းဓာတ် ပါဝင်တဲ့သောက်စရာများကို ညအိပ်ရာမဝင်ခင် ၁၀ နာရီအလိုကတည်းက မသောက်သင့်တော့ပါဘူး။

ဥပမာ ည ၁၁ နာရီအိပ်လေ့ရှိသူဟာ နေ့လယ် ၁ နာရီနောက်ပိုင်းကတည်းက ကော်ဖီ၊ လက်ဖက်ရည်၊ အားမြှင့်အချိုရည်များ မသောက်သင့်ပါဘူး။

ဘာကြောင့်လဲဆိုတော့ ခန္ဓာကိုယ်ထဲမှာ ကဖင်းဓာတ်ကို ချေဖျက်ဖို့ ပျမ်းမျှအားဖြင့် ၁၀ နာရီခန့်ကြာမြင့်တတ်ပါတယ်။

ကဖင်းဓာတ်က အသိဉာဏ်ကိုအားကောင်းစေပြီး အိပ်ငိုက်ခြင်းခံစားမှုမျိုးကို ခဏတာဖယ်ရှားပေးပါတယ်။

ဒါပေမဲ့ အာရုံခံစားသိရှိမှုတွေကို လှုံ့ဆော်ပေးနေတာကြောင့် အိပ်ပျော်ဖို့ ခက်ခဲစေပါတယ်။

*ညစာနဲ့ယမကာများကို အိပ်ရာမဝင်ခင် ၃ နာရီအလိုမှာ အပြီးစားသုံးပါ*

၁၀-၃-၂-၁ နည်းလမ်းအရ ညစာနဲ့ ယမကာဖျော်ရည်များကို ညမအိပ်ခင် ၃ နာရီနောက်ဆုံးထားပြီး စားသောက်ဖို့အကြံပြုပါတယ်။

ဒါဟာ ခန္ဓာကိုယ်ကို အစာချေဖျက်ဖို့ အချိန်ပေးလိုက်တဲ့သဘောပါပဲ။
နောက်ကျမှစားသောက်ခြင်းမျိုးက အစာချေဖျက်ဖို့အချိန်နည်းပါးသွားပြီး အစာအိမ်အက်ဆစ်လျှံထွက်စေနိုင်တဲ့အပြင် ညအိပ်ခါနီးအစာချေစနစ်အလုပ်လုပ်တဲ့အခါ အိပ်ရတာသက်တောင့်သက်သာ မဖြစ်စေပါဘူး။

ညအိပ်ခါနီး ၂ နာရီအလိုမှ စားသောက်တဲ့အခါ သွေးပေါင်ချိန်မြင့်တက်လာကာ စိတ်ဖိစီးမှုဟော်မုန်းတွေထွက်လာစေပြီး နှလုံးနဲ့ပတ်သက်တဲ့ဝေဒနာတွေ ဖြစ်လာနိုင်ပါတယ်။

*ညမအိပ်ခင် ၂ နာရီအလို နောက်ဆုံးထားပြီး အလုပ်နားပါ*
ညအိပ်ရာမဝင်ခင် ၂ နာရီလောက်ကတည်းက ဦးနှောက်ကိုအနားပေးသင့်ကြောင်း ကျွမ်းကျင်သူများက ဆိုပါတယ်။

ထိုအချိန်အတွင်းမှာ အလုပ်နဲ့ပတ်သက်တဲ့ အီးမေးလ်၊ ဖုန်း၊ နောက်နေ့အစီအစဉ်များနဲ့ပတ်သက်တဲ့ အကြောင်းအရာတွေကို စဉ်းစာတွေးခေါ်ခြင်းကနေ ရပ်တန့်သင့်ပါတယ်။

ကောင်းစွာအိပ်မပျော်သူတွေက စိတ်ဖိစီးမှုနဲ့ ပူပန်မှုကြောင့်လို့ ယူဆကြပါတယ်။

အလွန်အကျူးဖြစ်လာတဲ့အခါ ပိုမိုနိုးကြားစေတဲ့ ဟော်မုန်းတွေထွက်လာပြီး နှလုံးခုန်နှုန်းနဲ့ သွေးပေါင်ချိန်မြင့်တက်လာနိုင်ပါတယ်။

*မအိပ်ခင် ၁ နာရီအလိုတွင် တီဗီ၊ ဖုန်းများ အသုံးမပြုသင့်ပါ*
ညအိပ်ခါနီးအချိန်တွေမှာ ဖုန်း၊ လက်ပ်တော့၊ တီဗီစတဲ့ စက်ပစ္စည်းများကြည့်ရှုခြင်းဖြင့် နေ့ညပုံမှန်ဟော်မုန်းများထွက်ရှိမှုကို အနှောင့်အယှက်ဖြစ်စေပါတယ်။

ညအချိန်မှာ ထိုကဲ့သို့ကြည့်ရှုခြင်းက အလင်းရောင်ဓာတ်ရရှိစေတာကြောင့် အိပ်ပျော်ခြင်းကိုဖြစ်စေတဲ့ဟော်မုန်းထွက်ရှိမှုကို ရပ်တန့်စေပါတယ်။

ဒီလိုပြောင်းလဲမှုတွေကြောင့် ညအိပ်စက်ခြင်းကို အနှောင့်အယှက်ဖြစ်စေတာဖြစ်ပါတယ်။

Source: DailyMail
#Yangon_Media_Group

#Local_News
Published_2 August 2022

ထိုင်းနိုင်ငံသို့ MoU လုပ်သား ၈၀၀ ကျော်ထပ်မံသွားရောက်ခွင့်ရရှိကြောင်း ပြည်ပအလုပ်အကိုင် အေဂျင်စီများက သိရသည်။

သြဂုတ်လ ၁ ရက်က မြဝတီ- မဲဆောက် ချစ်ကြည်ရေး အမှတ် (၂) တံတားမှတစ်ဆင့် ထိုင်းနိုင်ငံသို့ သွားရောက်ခွင့် ရခဲ့ကြခြင်းဖြစ်ပြီး Myanamar Experience Iink Co.Itd အေဂျင်စီ၊ New Covenant အေဂျင်စီ၊ ထူးသစ်ဇေ အေဂျင်စီ၊ ယွန်းနဒီဦး အေဂျင်စီ၊ Arbourfield Manpower အေဂျင်စီ၊ ထရိန်းဝင်း အေဂျင်စီ ကုမ္ပဏီများက တာဝန်ယူ ပိုဆောင်ပေးကြောင်းလည်း သိရသည်။

ထူးသစ်ဇေ အေဂျင်စီမှ တာဝန်ယူ စေလွှတ်သည့် လုပ်သား (၁၀၀)၊Myanamar Experience Iink အေဂျင်စီမှ လုပ်သား (၆၅) ဦး၊ ယွန်းနဒီ အေဂျင်စီမှ လုပ်သား (၂၀၀) ဦး၊ New Covenant အေဂျင်စီမှ လုပ်သား (၅၈) ဦး၊ Arbourfield Manpower အေဂျင်စီ မှ လုပ်သား (၃၁၅) ဦး၊ထရိန်းဝင်း အေဂျင်စီမှ လုပ်သား (၆၉) ဦး၊ စုစုပေါင်းလုပ်သား (၈၀၇) ဦးဖြစ်ကြောင်း သိရသည်။

ယင်းတွင် ထူးသစ်ဇေ အေဂျင်စီမှ တာဝန်ယူ စေလွှတ်သည့် လုပ်သား (၁၀၀) ဦးမှာ နခွန်းပထုံမြို့ရှိ ကြာဇံစက်ရုံသို့လည်းကောင်း၊Myanamar Experience Iink အေဂျင်စီမှ စေလွှတ်ခဲ့သည့် လုပ်သား (၆၅) ဦးမှာ ကုမ္ပဏီသို့ ဝန်ဆောင်ခပေးစရာမလိုသည့် ဇီးရိုးကော့ဖြင့် ချိုင်ယာဖွန်မြို့ရှိ အထည်ချုပ်စက်ရုံသို့ လည်းကောင်း သိရသည်။

လက်ရှိတွင် ထိုင်းနိုင်ငံသို့ မြဝတီ-မဲဆောက် ချစ်ကြည်ရေး အမှတ် (၂) တံတားနှင့် ကော့သောင်း-ရနောင်း ရေလမ်းကြောင်းတို့မှ သွားရောက်နေကြခြင်းဖြစ်ကြောင်းလည်း အလုပ်သမားဝန်ကြီးဌာနက သိရသည်။

ymg/mt
#Yangon_Media_group

#Local_News
Published_2 August 2022

အော်ပရာစီ စီမံချက်လုပ်ဆောင်နေသော မလေးရှားတွင် မြန်မာအပါအဝင်နိုင်ငံခြားသားအချို့ ဖမ်းဆီးခံရကြောင်း မလေးရှားရောက် မြန်မာရွှေ့ပြောင်းအလုပ်သမားများအရေး လုပ်ဆောင်နေသူများက သိရသည်။

အဆိုပါ စီမံချက်ကို မလေးရှားနိုင်ငံရှိ JIMWPKL ထိန်းသိမ်းရေးဌာနခွဲက ဇူလိုင်လ ၃၀ ရက်တွင် စတင်ခြင်းဖြစ်ပြီး တရားမဝင်နိုင်ငံခြားသားများအားစစ်ဆင်ရေးတစ်ရပ်အနေဖြင့် ရှာဖွေဖမ်းဆီးခဲ့ရာ လူ ၁၇၁ ဦးကို စစ်ဆေးမှုပြုလုပ်စဉ် ပြည်ပနိုင်ငံသား စုစုပေါင်း ၃၆ ဦးကို ပြစ်မှုကျူးလွန်မှုဖြင့် ဖမ်းဆီးအရေးယူခဲ့ကြောင်း သိရသည်။

ဖမ်းဆီးရမိသော မြန်မာနိုင်ငံသားများ အပါအဝင်နိုင်ငံခြားသားများအား မလေးရှားနိုင်ငံ ဥပဒေပုဒ်မ - ၁၅(၁)(ဂ) လူဝင်မှုကြီးကြပ်ရေး အက်ဥပဒေ ၁၉၅၉/၆၃ ပုဒ်မ - ၆(၁)(ဂ) လူဝင်မှုကြီးကြပ်ရေးအက်ဥပဒေ ၁၉၅၉/၆၃ ပုဒ်မများဖြင့် အရေးယူဆောင်ရွက်နေကြောင်း မလေးရှားအာဏာပိုင်များ၏ ထုတ်ပြန်ချက်ကို ကိုးကား၍ မြန်မာရွှေ့ပြောင်းအလုပ်သမားများအရေး လုပ်ဆောင်နေသူများက ပြောသည်။

အဆိုပါ အဖမ်းခံထားရသူ ၃၆ ဦးထဲတွင် အိန္ဒိယနိုင်ငံသား (၂၆)ဦး၊ အင်ဒိုနီးရှား(၃)ဦး၊ မြန်မာ(၃)ဦး၊ပါကစ္စတန် နိုင်ငံသား (၄) ဦးတို့ဖြစ်ကြောင်းသတင်းရရှိသည်။

"သူတို့က ဘာပြစ်မှုနဲ့ ဖမ်းခံရတယ်ဆိုတာတော့ မသိဘူး။ ပြစ်မှုတွေ ကျူးလွန်တာရှိတယ်ဆိုပြီးတော့ ပတ်ဝန်းကျင်က တိုင်တာတွေကြောင့် စစ်ဆေးတာကနေ အဖမ်းခံရတာ။ ကျွန်တော်တို့ နိုင်ငံသားတွေပါတာက ဘယ်သူဘယ်ဝါ မသိရသေးဘူး။ စုံစမ်းပြီးတော့ လိုအပ်တာတွေကို ကူညီသွားရမှာပေါ့"ဟု မြန်မာရွှေ့ပြောင်းအလုပ်သမားများအရေးလုပ်ဆောင်နေသူတစ်ဦးကပြောသည်။

ymg/mt
#Yangon_Media_Group

#Local_News
Published _2 August 2022

စားသုံးသူပြည်သူများ ဈေးနှုန်းသက်သာစွာ စားသုံးနိုင်ရန် မြန်မာနိုင်ငံဆန်စပါးအသင်းချုပ်က ဦးဆောင်၍ ဆန် ၁အိတ်လျင် ၃၅၀၀၀ ကျပ်မှ စ၍ရောင်းချပေးသွားမည် ဖြစ်ကြောင်း အဆိုပါအသင်းချုပ်မှ သိရသည်။

ယင်း ဆန်ရောင်းချခြင်း အစီအစဉ်အား ဩ ဂုတ်လ ၃ရက်မှ စတင်ကာ နေ့စဉ် နံနက် ၉နာရီမှ ညနေ ၃နာရီအတွင်း ရောင်းချပေးသွားမည် ဖြစ်ကြောင်း သိရသည်။

အစီအစဉ်ကို မြန်မာနိုင်ငံ ဆန်စပါးအသင်းချုပ်၊ မြန်မာနိုင်ငံ ဆန်စပါးကုန်သည်များအသင်း၊ မြန်မာနိုင်ငံ ဆန်စက်လုပ်ငန်းရှင်များအသင်း၊ ဆန်စပါး ကုန်စည်ဒိုင်(ဝါးတန်း) နှင့် ဆန်စပါးကုန်စည်ဒိုင် (ဘုရင့်နောင်) တို့ ပူးပေါင်းကာ ဆောင်ရွက်ခြင်းဖြစ် ကြောင်းလည်း သိရသည်။

ယခုရောင်းချပေးမည့် အစီအစဉ်တွင် ရွှေဘိုပေါ်ဆန်း၊ ဧရာဝတီပေါ်ဆန်း၊ ကြားပျံ၊ ရက် ၉၀ စသည့် ဆန်အမျိုးအစားများ ပါဝင်မည်ဖြစ်ပြီး ဈေးနှုန်းအနေဖြင့် ၁ အိတ်လျှင် ၃၅၀၀၀ ကျပ်မှ ၇၇၀၀၀ ကျပ်အထိ အ စားစားရှိမည်ဖြစ်ကြောင်း မြန်မာနိုင်ငံ ဆန်စပါးအသင်းချုပ်မှ သိရသည်။

ရောင်းချပေးသွားမည့် ဈေးနှုန်းများမှာ ရက် ၉၀ ဆန် ၁ အိတ်လျှင် ၃၅၀၀၀ ကျပ်မှ ၃၇၀၀၀ ကျပ်၊ ကြားပျံဆန် ၁ အိတ်လျှင် ၅၅၀၀၀ ကျပ်မှ ၆၀၀၀၀ ကျပ်၊ ဧရာဝတီ ပေါ်ဆန်း ၁ အိတ်လျှင် ၅၂၀၀၀ ကျပ်မှ ၅၅ ၀၀၀ ကျပ်၊ ရွှေဘိုပေါ်ဆန်း ၁ အိတ်လျှင် ၇၅၀၀၀ ကျပ်မှ ၇၇၀၀၀ ကျပ်ဖြင့် ရောင်း ချပေးသွားမည် ဖြစ်ကြောင်း သိရသည်။

လက်ရှိဈေးကွက်အတွင်း တန်းမြင့်ဆန်အဖြစ် သတ်မှတ်ထားသည့် ရွှေဘိုပေါ်ဆန်း တစ်အိပ်လျင် ၉၀၀၀၀ ဝန်းကျင်အထိ ပေါက်ဈေးရှိနေပြီး အခြားဆန်အမျိုးအစားများမှာလည်း ယခင်လဆန်းပိုင်းကနှင့်နှိင်းယှဉ်ပါက ၁အိတ်လျှင် ၅၀၀၀ ကျပ်မှ ၁၀၀၀၀ ဝန်းကျင်အထိ ဈေးနှုန်းမြင့်တက်မှုများရှိခဲ့ကြောင်း ဆန်ဈေးကွက်အတွင်းမှ သိရသည်။

ရွှေဘိုပေါ်ဆန်း ဈေးနှုန်းမြင့်တက်ရခြင်းမှာ စစ်ကိုင်းတိုင်းအတွင်း နယ်မြေမတည်ငြိမ်မှုကြောင့် အပါအဝင်၊ ကုန်ထုတ်လုပ်မှု စရိတ်များ မြင့်တက်လာခြင်း၊ သွင်းအားစု ဈေးနှုန်းများ မြင့်တက်လာခြင်း၊ သယ်ယူခ စရိတ်များ မြင့်တက်လာခြင်းတို့ကြောင့်ဖြစ်ပြီး ဈေးနှုန်း ဆက်လက် မြင့်တက်နေဦးမည် ဖြစ်ကြောင်း ဆန်စပါးအသင်းချုပ်မှ တာဝန်ရှိသူ တစ်ဦးထံမှ သိရသည်။

ဆန်ရောင်းချမည့် အစီအစဉ်မှာ အခြေခံ ပြည်သူလူထုသို့ ရောင်းချပေးမည့် အစီအစဉ်ဖြစ်ပြီး တစ်အိမ်ထောင်လျင် ဆန် (၁) အိတ်နှုန်းသာ ရောင်းချပေးသွားမည်ဖြစ်ကာ ဆန်စပါး ကုန်စည်ဒိုင် (ဝါးတန်း)တည်ရှိရာ၊ ဝါးတန်းဆိပ်ကမ်းနယ်မြေတွင် ရောင်းချပေးသွားမည်ဖြစ်ကြောင်း သိရသည်။

ymg/NN
#Yangon_Media_Group