#WorldHealth
Published 30 April 2022

အက်စ်ပရင်ဆေးကို နေ့စဉ်သောက်သုံးနေရတဲ့ အသက် ၆၀ အထက်လူကြီးတွေကို ဆရာဝန်တွေက သတိပေးလိုက်ပါတယ်။

နှလုံးရောဂါနဲ့ နှလုံးသွေးကြောပိတ်ခြင်းအန္တရာယ်ကို ကာကွယ်ဖို့ အက်စ်ပရင်ကို နေ့စဉ်သောက်ကြတာက ထုံးတမ်းတစ်ခုလိုဖြစ်နေပါပြီ။

ဒါပေမဲ့ အမေရိကန်မှ ထိပ်သီးဆေးပညာရှင်အဖွဲ့က အက်စ်ပရင်သောက်လေ့ရှိတဲ့အကျင့်ကို ပြင်ဆင်ဖို့ အကြံပြုနေကြပါတယ်။

အက်စ်ပရင်က ခန္ဓာကိုယ်တွင်းသွေးကြောပေါက်ခြင်းဖြစ်နိုင်ကြောင်း သတိပေးလိုက်ပါတယ်။
နှလုံးရောဂါမျိုးရိုးလိုက်တဲ့ အသက် ၄၀ မှ ၅၉ နှစ်ကြားလူမျိုးတွေသာ အက်စ်ပရင်ကိုနေ့စဉ်သောက်သုံးသင့်ကြောင်း အမေရိကန်ရောဂါတိုက်ဖျက်ကာကွယ်ရေးအဖွဲ့(USPSTF)က ဆိုပါတယ်။

အသက် ၇၅ နှစ်ကျော်တဲ့လူကြီးတွေမှာတော့ ဆေးရဲ့အာနိသင်အကျိုးက အနည်းငယ်သာသက်ရောက်နိုင်တာမို့လို့ မသောက်သုံးသင့်တော့ပါဘူး။

ကိုယ်တွင်းသွေးစိမ့်ထွက်ခြင်းက အသက်ကြီးလာတာနဲ့အမျှ ဖြစ်နိုင်ချေများလာတာကြောင့် အသက်ကြီးသူတွေမှာ အက်စ်ပရင်ရဲ့သက်ရောက်မှုက ဆိုးကျိုးသာပိုမိုဖြစ်ပေါ်စေနိုင်ပါတယ်။
ဒီလိုညွှန်ကြားချက်က အခုမှအက်စ်ပရင်စတင်သုံးစွဲသူတွေအတွက်သာ ရည်ညွှန်းတာဖြစ်ပါတယ်။

သုံးစွဲနေကျသူတွေကတော့ ဆရာဝန်များနဲ့မတိုင်ပင်ဘဲ သုံးစွဲခြင်းကိုမရပ်တန့်သင့်ပါဘူး။
၂၀၁၉ ခုနှစ်က ယူကေလေ့လာမှုတစ်ခုမှာ အက်စ်ပရင်က ကိုယ်တွင်းသွေးကြောပေါက်ခြင်းအန္တရာယ် ၅၀ ရာခိုင်နှုန်းနီးပါးပိုများစေကြောင်း တွေ့ရှိခဲ့ကြပါတယ်။

အက်စ်ပရင်သုံးစွဲသူတွေမှာ နှလုံးသွေးကြောဆိုင်ရာပြဿနာတွေကိုလျှော့ချပေးနိုင်ပေမယ့်လည်း သွေးယိုစိမ့်ခြင်းအန္တရာယ်ကလည်း အလားတူဖြစ်နိုင်ချေရှိနေပါတယ်။

အက်စ်ပရင်သုံးစွဲဖို့ကို လူနာနဲ့ဆရာဝန်ဆွေးနွေးတိုင်ပင်သင့်ပြီး သွေးယိုစိမ့်နိုင်တဲ့အန္တရာယ်နဲ့ ချိန်ညှိပြီးဆုံးဖြတ်ရမှာ ဖြစ်ပါတယ်။

အနာသက်သာစေတဲ့ဆေးလည်းဖြစ်တဲ့ အက်စ်ပရင်ဟာ ရင်သားကင်ဆာ၊ အူမကြီးကင်ဆာ၊ ဆီးကျိတ်ကင်ဆာ၊ အစာအိမ်ကင်ဆာဖြစ်နိုင်ချေတွေကိုလည်း လျှော့ချပေးနိုင်တယ်လို့ ယူဆထားကြပါတယ်။

Source: New York Post.
#Yangon_Media_Group

#Local_News
Published_ 30 April 2022

မြန်မာ-တရုတ် နှစ်နိုင်ငံဗဟိုအစိုးရများအကြား တောမီးအန္တရာယ်ဆိုင်ရာ ပူးတွဲကာကွယ်ရေးယန္တရားတစ်ရပ် ထူထောင်နိုင်ရန်နှင့် နှစ်နိုင်ငံနယ်စပ်ဒေသ တောမီးအန္တရာယ် တားဆီးထိန်းချုပ်ရေး လုပ်ငန်းနယ်ပယ်တွင် ပူးပေါင်းဆောင်ရွက်မှုကို မြှင့်တင်ခြင်းဖြင့် တောမီးများလောင်ကျွမ်းမှုကြောင့် ဖြစ်ပေါ်နိုင်သည့် ဆုံးရှုံးမှုများကို ထိရောက်စွာ ကာကွယ်သွားမယ်လို့ သိရပါတယ်။

မြန်မာ-တရုတ် နှစ်နိုင်ငံဗဟိုအစိုးရများအကြား တောမီးအန္တရာယ်ဆိုင်ရာ ပူးတွဲကာကွယ်ရေး လုပ်ငန်းကော်မတီ ပထမအကြိမ် ညှိနှိုင်းအစည်းအဝေးကို ဧပြီ ၂၉ နံနက်ပိုင်းတွင် ပတ်ဝန်းကျင်ထိန်းသိမ်းရေးဦးစီးဌာန၊ ရုံးအမှတ် ၅၈ ၌ ကျင်းပခဲ့ပါတယ်။

အစည်းအဝေးတွင် မြန်မာနှင့်တရုတ် နှစ်နိုင်ငံနယ်စပ်အကြား မီးလောင်ကွက်များ ပျံ့နှံမှု၊ နယ်စပ်ဖြတ်ကျော် မီးခိုးမြူငွေ့ညစ်ညမ်းမှုဆိုင်ရာ လုပ်ငန်းစီမံချက်ရေးဆွဲဆောင်ရွက်မှု၊ ဘက်စုံပါဝင်သော အမျိုးသားအဆင့် မီးစီမံအုပ်ချုပ်မှုဆိုင်ရာ မဟာဗျူဟာလုပ်ငန်းအစီအစဉ် ရေးဆွဲဆောင်ရွက်မှု၊ နယ်စပ်ဖြတ်ကျော် မီးခိုးမြူငွေ့ဆိုင်ရာ အာဆီယံ သဘောတူညီချက်အပေါ် ပူးပေါင်းဆောင်ရွက်မှုများကို ဆွေးနွေးခဲ့ကြပါတယ်။

ရွှေ့ပြောင်းတောင်ယာ စိုက်ပျိုးခြင်းကြောင့် တောမီးလောင်ကျွမ်းခြင်းကို ကာကွယ်နိုင်ရေးအတွက် ကုန်းမြင့်လယ်ယာစိုက်ပျိုးခြင်းစနစ် တိုးမြှင့်ဆောင်ရွက်မှု၊ တောမီးလောင်ကျွမ်းမှုအန္တရာယ် လျှော့ချရေးနှင့်စပ်လျဉ်း၍ နိုင်ငံတကာနှင့်ဒေသတွင်းပူးပေါင်းဆောင်ရွက်ရေး တိုးမြှင့်မှုတို့ကို ဆွေးနွေးကြပါတယ်။

နယ်စပ်ဖြတ်ကျော် မီးခိုးမြူငွေ့ညစ်ညမ်းမှု လေ့လာဆန်းစစ်ခြင်းနှင့် ထိန်းချုပ်ခြင်းဆိုင်ရာလုပ်ငန်းများ တိုးမြှင့်ဆောင်ရွက်ရေး၊ တောမီးကြိုတင်ကာကွယ်ရေးနှင့် ကြိုတင်သတိပေးရေး၊ တောမီးလောင်ကျွမ်းမှု လျော့ချရေး၊ တောမီးလောင်ကျွမ်းမှုကြောင့် ဖြစ်ပေါ် လာသော ပျက်စီးဆုံးရှုံးမှုများကို ပြန်လည်ထူထောင်ရေးလုပ်ငန်းများ ဆောင်ရွက်ရေးနှင့် နှစ်နိုင်ငံနယ်စပ်ဒေသအပါအဝင် နိုင်ငံအတွင်းတောမီးကာကွယ်ရေးဆိုင်ရာ ဘက်စုံပါဝင်သော အမျိုးသားအဆင့်လုပ်ငန်းအစီအစဉ်ကို ဆက်လက်ရေးဆွဲ အကောင်အထည်ဖော်ဆောင်ရွက်ရေးနဲ့ပတ်သက်တဲ့ ရှေ့ဆက်ဆောင်ရွက်မယ့် လုပ်ငန်းစဉ်များ ချမှတ်ခဲ့ကြောင်း သတင်းရရှိပါတယ်။

ymg-mnn
#Yangon_Media_Group

#WorldHealth
Published 30 April 2022

ကိုဗစ်ကပ်ရောဂါကာလအတွင်း အိပ်ရေးဝအောင်မအိပ်တဲ့သူတွေဟာ စိတ်ဓာတ်ကျခြင်း၊ စိုးရိမ်ပူပန်ခြင်း၊ အားအင်ကုန်ခမ်းခြင်းများ ခံစားရနိုင်ကြောင်း တွေ့ရှိချက်အသစ်မှာ ဖော်ပြထားပါတယ်။

တစ်ညကို အိပ်ချိန် ၆ နာရီမပြည့်တဲ့သူတွေဟာ ပုံမှန်အိပ်ရေးဝအောင်အိပ်သူတွေထက် ဒီလိုလက္ခဏာတွေ ပေါ်ပေါက်လာဖို့ ၇၅ ရာခိုင်နှုန်းပိုများပါတယ်။

လူလတ်ပိုင်းအရွယ်တွေက တစ်ညကို ၇ - ၉ နာရီကြား အိပ်စက်ဖို့လိုအပ်ပြီး အိပ်ချိန်နည်းပါးပါက စဉ်းစားတွေးခေါ်နိုင်စွမ်းလျော့နည်းလာနိုင်ကြောင်း လမ်းညွှန်ထားပါတယ်။

အမေရိကန်မှ လူဦးရေ ၃ ပုံ ၁ ပုံခန့်ဟာ ညဘက်အိပ်ရေးဝဖို့ ခက်ခဲနေကြောင်းသိရပါတယ်။
ကိုဗစ်လော့ဒေါင်းကာလတုန်းက အိမ်မှာပဲအချိန်ကုန်ကြရတာကြောင့် အိပ်ရေးမဝတာမျိုးအဖြစ်နည်းသွားခဲ့ပေမယ့် အခုအခါ ပြန်လည်ဆိုးရွားလာဖွယ်ရှိနေပါတယ်။

အလုပ်ကိစ္စနဲ့ မိသားစုကိစ္စများတွင် စိတ်ဖိစီးမှုများဖြစ်လာရသလို အခြားနေထိုင်မှုစရိုက်များကြောင့်လည်း ဖြစ်ပေါ်နိုင်ပါတယ်။

ကောင်းစွာအိပ်ပျော်နိုင်စေဖို့ နေထိုင်မှုအကျင့်များပြောင်းလဲပစ်ပြီး အိပ်ခန်းပြင်ဆင်သင့်ကြောင်း ဆရာဝန်များက အကြံပြုထားပါတယ်။

လူပေါင်း ၅,၀၀၀ ရဲ့အိပ်စက်ခြင်းပုံစံကိုလေ့လာကြရာမှာ တစ်ညကိုအိပ်ချိန် ၆ နာရီအောက်သာရှိတဲ့ လူ ၁၈၀ ဟာ စိတ်ဓာတ်ကျခြင်းနဲ့ စိုးရိမ်ပူပန်ခြင်းခံစားရသူ ၂၄ ရာခိုင်နှုန်းရှိပြီး အားအင်ကုန်ခမ်းခြင်းခံစားရသူ ၃၆ ရာခိုင်နှုန်းရှိနေပါတယ်။

ကိုဗစ်ကာလအတွင်း ပျမ်းမျှခြင်းအားဖြင့် ၁၈ မိနစ်နောက်ကျကာအိပ်ရာဝင်ကြပြီး ၃၆ မိနစ်နောက်ကျပြီး အိပ်ရာထကြကြောင်း တွေ့ရှိထားပါတယ်။

အိပ်စက်ဖို့အကြောင်းကို အဓိကထားပြီး အိပ်ချိန်စနစ်တကျစီစဉ်မယ်ဆိုရင် ဒီလိုဝေဒနာတွေကိုကာကွယ်နိုင်မယ်လို့ အကြံပြုထားပါတယ်။

Source: DailyMail
#Yangon_Media_Group

#Local_News
Published_ 30 April 2022

မလေးရှားနိုင်ငံ၌ အကြောင်းအမျိုးမျိုးဖြင့် ပြစ်ဒဏ်ကျခံပြီးဖြစ်ကာ ထိန်းသိမ်းရေးစခန်းများ၌ ရောက်ရှိနေတဲ့ မြန်မာနိုင်ငံသား ၆၄ ဦးအား ဧပြီ ၂၈ ရက်က ပြန်လည်ပို့ဆောင်ပေးခဲ့ကြောင်း ကွာလာလမ်ပူမြို့ရှိ မြန်မာသံရုံးက သတင်းထုတ်ပြန်ထားပါတယ်။

မြန်မာနိုင်ငံသို့ ပြန်လည်ပို့ဆောင်ရာတွင် အပြည်ပြည်ဆိုင်ရာ မြန်မာ့လေကြောင်း လိုင်း (MAI) ကယ်ဆယ်ရေးလေယာဥ်ဖြင့် ပြန်လည်ပို့ဆောင်ပေးခဲ့ခြင်းဖြစ်ပါတယ်။

ပြန်လည်ပို့ဆောင်ခြင်းမပြုမီ မြန်မာသံရုံးမှတာဝန်ရှိသူများက ထိန်းသိမ်းရေးစခန်းများသို့ သွားရောက်တွေ့ဆုံခဲ့တယ်လို့ ဆိုပါတယ်။

ထို့နောက် မြန်မာနိုင်ငံသားများအား အမြန်ဆုံးပြန်နိုင်ရန် မလေးရှားနိုင်ငံမှ တာဝန်ရှိသူများနှင့် ညှိနှိုင်းဆောင်ရွက်ပေးခဲ့တယ်လို့ သံရုံးရဲ့ထုတ်ပြန်ချက်မှာ ဖော်ပြထားပါတယ်။

ymg-mnn
#Yangon_Media_Group.

Published 29 April 2022

ရောဘတ်ဒီနဲရိုးဟာ ဧပြီ၂၈ရက် ကြာသပတေးနေ့က လာဗီးဂက်စ်မှာကျင်းပတဲ့ ရုပ်ရှင်ရုံပိုင်ရှင်များရဲ့ နှစ်ပတ်လည်ညီလာခံကို  စုဝေးရောက်ရှိလာကြတဲ့ ရုံပိုင်ရှင်တွေကို ပြသတဲ့ ရုပ်ရှင်အထူးပွဲရဲ့ လိုင်းရင်းဂိတ် ကော်ဇော်နီလမ်းမှာ လျှောက်လှမ်းခဲ့ပါတယ်။ ဒီနဲရိုးဟာ "About my Father" ဇာတ်မြူးကားထဲမှာ လူရွှင်တော် ဆီဘက်ရှန် မန်နစ်ကာလ်ကို ရဲ့ တကယ့်ဘဝကို သရုပ်ဆောင်ခဲ့ပါတယ်။ ပါဝင်သရုပ်ဆောင်သူတွေတော်တော်များများဟာ အီတလီ-အမေရိကန်တွေဖြစ်လို့ ရိုက်ကွင်းမှာ လူတိုင်း တစ်ဦးနှင့်တစ်ဦးသိကြပြီး နားလည်မှုရှိကြတယ်လို့ ရောဘတ်ဒီနဲရိုးက ပြောပါတယ်။

Source AFP

#WorldWildlife
Published 29 April 2022

မျိုးသုဉ်းပျောက်ကွယ်တော့မယ့်အန္တရာယ်ရင်ဆိုင်နေရတဲ့ အမောက်ဖြူမျောက်တစ်ကောင်ကို ကိုလံဘီယာတိရိစ္ဆာန်ရုံတစ်ခုမှာ ဧပြီ ၁၂ ရက်နေ့က မွေးဖွားခဲ့ကြောင်း ကြေညာလိုက်ပါတယ်။

#Yangon_Media_Group

Published 29 April 2022

ရုရှားသမ္မတဗလာဒီမာပူတင်ဟာ G20 ထိပ်သီးအစည်းအဝေးတက်ရောက်မှာဖြစ်ပြီး ယူကရိန်းခေါင်းဆောင် ဗိုလိုဒီမာ ဇီလင်စကီးကိုလည်း တက်ရောက်ဖို့ဖိတ်ကြားခဲ့တယ်လို့ G20 အစည်းအဝေးရဲ့ အိမ်ရှင်နိုင်ငံ အင်ဒိုနီးရှားသမ္မတ ဂျိုကိုဝီဒိုမိုက ဧပြီ ၂၉ရက်က ပြောပါတယ်။ ယူကရိန်းကိုကျူးကျော်မှုကြောင့် ရုရှားကို အဲဒီအစည်းအဝေးတက်ခွင့်မပေးဖို့ အနောက်နိုင်ငံတွေရဲ့ဖိအားနှင့်ပတ်သက်ပြီး ညှိနှိုင်းပြီး သဘောတူညီမှုရခဲ့တာကြောင့်ဖြစ်ပါတယ်။

ယူကရိန်းသမ္မတ ဇီလင်စကီးက အင်ဒိုနီးရှားထံမှ လက်နက်အကူအညီတောင်းခံခဲ့ပေမယ့် အင်ဒိုနီးရှားရဲ့ ဖွဲ့စည်းပုံ အခြေခံဥပဒေနှင့် နိုင်ငံခြားရေးမူဝါဒတို့အရ အခြားနိုင်ငံတွေကို လက်နက်အကူအညီပေးလို့မရတဲ့အကြောင်း သူပြန်ပြောခဲ့တယ်လို့ အင်ဒိုသမ္မတက ပြောပါတယ်။

Source AFP

#LocalNews
Published-29 April 2022

ကိုဗစ်ရောဂါဖြစ်ပွားမှုတွေကြောင့် မလုပ်နိုင်ခဲ့တဲ့ ပုံမှန်ကာကွယ်ဆေးထိုးလုပ်ငန်းတွေ ပြန်လည်ထိုးနှံပေးတော့မှာဖြစ်တဲ့အတွက် မွေးစမှ(၅)ငါးနှစ်အရွယ် ကလေးတွေ ပြန်လည်ထိုးနှံဖို့လိုတယ်လို့ ပြည်သူ့ကျန်းမာရေးဖောင်ဒေးရှင်းဥက္ကဌ ဒေါက်တာသန်းစိန်က ပြောပါတယ်၊၊

#Yangon_Media_Group

#LocalNews
Published - 29 April 2022

ဒေါ်လာနှင့် စက်သုံးဆီဂယက်ကြောင့် ပြည်တွင်းကားစျေးနှုန်းတွေ မြင့်တက်လာခဲ့တယ်လို့ ကားဝယ်ရောင်းလုပ်ကိုင်သူများထံမှ သိရပါတယ်။

#Yangon_Media_Group

#LocalNews
Published_29 April 2022

ကျိုးကျပျက်စီးသည်ထိ အဖျက်ဆီးခံထားရသော အများပြည်သူအတွက် လျှပ်စစ်မီးပေးဝေသည့် လောပိတရေအားလျှပ်စစ်တာဝါတိုင်များကို ပြင်ရန်သွားသည့်လျှပ်စစ်ဝန်ထမ်း ၂၆ ဦး သတင်းအစအနမရဘဲ ပျောက်ဆုံးနေကြောင်း လျှပ်စစ်နှင့်စွမ်းအင်ဝန်ကြီးဌာနက သိရသည်။

"ပြီးခဲ့တဲ့တစ်ပတ်ကတည်းက ပျောက်နေတာပါ။တာဝန်တိုင်ပြင်တဲ့အခါ လိုအပ်တဲ့ပစ္စည်းတွေအပါအဝင် ဝန်ထမ်း ၂၆ ယောက် ပျောက်နေတာ။အခုထိ သတင်းမရဘူး၊လောပိတက သုံးလိုင်းရှိတဲ့အထဲမှာ လက်ရှိ တစ်လိုင်းပဲဖြစ်တာကြောင့် လျှပ်စစ်ပေးရတာ သုံးပုံတစ်ပုံပဲ ပေးရတာဖြစ်တယ်။အဲဒီ

နေရာတွေ နယ်မြေမစိုးမိုးလို့ ဘာမှလုပ်လို့မရဘူးဖြစ်နေတယ်။တာဝါတိုင်တွေကို သွားပြင်လိုက်၊ပြန်ပြီးတော့ ဖျက်လိုက် လုပ်နေတာက ၅ ကြိမ် ရှိပါပြီ။အခု ပျောက်နေတဲ့ဝန်ထမ်းတွေဟာ သေသလားရှင်သလား မသိရသေးဘူး"ဟု အဆိုပါ ဝန်ကြီးဌာန တာဝန်ရှိသူကပြောသည်။

လောပိတစီမံကိန်းမှ လျှပ်စစ်မဂ္ဂါဝပ် ၂၄၀ ကျော်ထုတ်လုပ်နိုင်သော်လည်း လက်ရှိတွင် မဂ္ဂါဝပ် ၈၀ ခန့်သာ ထုတ်လုပ်နိုင်ကြောင်း၊ယင်းမှာ ပြီးခဲ့သည့် ၂၀၂၁ ခုနှစ် သြဂုတ်လအတွင်းကပင် လွိုင်ကော်မြို့နယ် လောပိတမဟာဓါတ်အားလိုင်းမှ တာဝါတိုင် ၂ တိုင် အဖျက်ဆီးခံခဲ့ရခြင်းကြောင့်ဖြစ်ကြောင်း သိရသည်။

ymg/mt
#Yangon_Media_Group

#LocalNews
Published - 29 April 2022

သီတဂူဆရာတော်ကြီးနှင့် နီပေါလ်သမ္မတတို့သည် တွေ့ဆုံဆွေးနွေးမှုတစ်ရပ်ကို ဧပြီ ၂၈ ရက်နေ့က ပြုလုပ်ခဲ့ကြောင်း သီတဂူသတင်းထုတ်ပြန်ရေးအဖွဲ့က ဒီကနေ့မှာ ထုတ်ပြန်ခဲ့ပါတယ်။

တွေ့ဆုံစဥ် နီပေါလ်သမ္မတကြီးက မြန်မာနိုင်ငံသို့ လာရောက်ဖူးမြော်ရသဖြင့် ဝမ်းသာအားရ ပြန်လည်ဖော်ဆောင်ခဲ့ပြီး လုမ္ဗိနီဥယျာဉ်နှင့် ဖွံ့ဖြိုးတိုးတက်ရေးအတွက် စိုးရိမ်ပူပန်မှု၊ ပံ့ပိုးကူညီမှု၊ နှစ်ပေါင်းများစွာ စီမံကိန်းများစွာကို စဉ်ဆက်မပြတ် ကူညီပံ့ပိုးပေးခဲ့သည့် ဆရာတော်ကြီးအား ကျေးဇူးတင်ရှိကြောင်း ပြောကြားခဲ့ပါတယ်။

နီပေါလ်လူမျိုးတွေ လုမ္ဗိနီကို အမျိုးသားအမွေအနှစ်အဖြစ်ထားရှိရတာ ဘယ်လောက်ကံကောင်းကြောင်းနဲ့ ဒီအမျိုးသားအမွေအနှစ်ကို ပြန်လည်အသက်သွင်းထိန်းသိမ်းဖို့ ထူးခြားတဲ့ အခွင့်အရေးကိုရရှိခဲ့တာ ဘယ်လောက်ကံကောင်းကြောင်း ဆရာတော်ကြီးက နီပေါလ်သမ္မတနဲ့တွေ့ဆုံစဥ်မှာ ပြန်လည်မိန့်ကြားခဲ့တယ်လို့ သိရပါတယ်။

Lumbini ဟာ ကမ္ဘာပေါ်မှာ အမြင့်မြတ်ဆုံးသောနေရာဖြစ်သလို အမြင့်မြတ်ဆုံးလူသားရဲ့ မွေးရပ်မြေဖြစ်ပြီး Buddha တရားကိုပဲဟောပြောပေးခဲ့တာ လေးဆယ့်ငါးနှစ်အတွင်း ဒီတရားဟာ နီပေါလ်နိုင်ငံရဲ့ အမျိုးသားအမွေအနှစ်ဖြစ်သလို ကမ္ဘာ့အမွေအနှစ်လည်းဖြစ်တယ်လို့ သီတဂူဆရာ တော်ကြီးက မိန့်ကြားပါတယ်။

ဆရာတော်ကြီးဟာ ယခင်က ဗုဒ္ဓရုပ်ပွားတော် အဆူသုံးဆယ်ကို နီပေါလ်သမ္မတထံသို့ လှူဒါန်း ပေးခဲ့ပြီး ဒီအခမ်းအနားမှာ ဗုဒ္ဓရုပ်ပွားတော်တွေ အမြဲတည်ထားမယ့် လုမ္ဗိနီပြတိုက်ဖြစ်တဲ့ ဗုဒ္ဓဝိဟာရ တည်ဆောက်ရေးအတွက် အလှူငွေလွှဲပြောင်းပေးအပ်ခဲ့တယ်လို့လည်း သိရပါတယ်။

အခမ်းအနားတွင် ရုပ်ပွားတော် အဆူသုံးဆယ်ကို လုမ္ဗိနီပြတိုက်သို့ ပင့်ဆောင်ပူဇော်ရန်ဆရာတော်ကြီးက အမေရိကန်ဒေါ်လာ တစ်သောင်းကိုလည်း လှူဒါန်းခဲ့တာပါ။

အဆိုပါ ဗုဒ္ဓရုပ်တုတော်တွေကို နီပေါလ်သမ္မတ မစ္စတာ ဘစ်ဒရာဒေဗီ ဘန္ဒရီက ၂၀၁၉ ခုနှစ် အောက်တိုဘာလက မြန်မာနိုင်ငံကို လာရောက်စဉ်က လှူဒါန်းခဲ့တာဖြစ်ပါတယ်။

ဤသုံးဆယ်သော ဗုဒ္ဓရုပ်ပွားတော်များသည် နိုင်ငံပေါင်းစုံ၊ ခေတ်ပေါင်းစုံ၊ မုဒြရာမျိုးစုံဖြစ်ပြီး ရုပ်ပွားတော်များသည် သုံးပေမြင့်ကာ မြန်မာနိုင်ငံ မန္တလေးမြို့တွင် ကြေးဝါဖြင့် ပြုလုပ်ထားခြင်းဖြစ်တယ်လို့ သိရပါတယ်။

ယင်း Lumbini ပြတိုက်ဟာ ဗုဒ္ဓရဲ့ ဇာတိသမိုင်းနဲ့ ထင်ရှားမှုကိုပြသထားတဲ့ ကမ္ဘာ့ပထမဆုံး ပြည်နယ်အနုပညာပြတိုက် ဖြစ်လာမှာဖြစ်တယ်လို့ သီတဂူစတား၏ သတင်းထုတ်ပြန်ချက်မှာ ဖော်ပြခဲ့ပါတယ်။

ဓါတ်ပုံ - သီတဂူ စတား

ymg/kg
#Yangon_Media_Group

#LocalNews
Published_29 April 2022

ထိုင်း မြန်မာနယ်စပ် မဲဆောက် - မြဝတီ နှင့် ရနောင်းဘက်ခြမ်းမှ မေလတစ်ရက်ကစ၍ Border Pass ဖြင့် ထိုင်းနိုင်ငံကို ဝင်းခွင့်ပြုတော့မည်ဖြစ်ကြောင်း သိရသည်။

ကိုဗစ်ကာကွယ်ဆေးအပြည့် ထိုးနှံထားသူများ၊ကိုဗစ်ကာကွယ်ဆေး မထိုးနှံထားရသူများ (သို့မဟုတ်) ကိုဗစ်ကာကွယ်ဆေး အကြိမ်ပြည့်မထိုးနှံထားရသေးသည့် သူများအနေဖြင့် မြဝတီ-မဲဆောက် နယ်စပ်ဘက်ခြမ်းတွင် နေထိုင်သည့်ကာလ ၃ ရက်ထက်ကျော်သည် ဖြစ်စေ၊မကျော်သေးသည်ဖြစ်စေ စည်းမျည်းဥပဒေအတိုင်း Passport ဖြင့် နယ်စပ်ဖြတ်ကျော် Border Pass ဖြင့် နယ်စပ်ဖြတ်ကျော် ဝင်ရောက်ရာတွင် Self -ATK ဖြင့် ကိုဗစ်စစ်ဆေးမှုများ ထပ်မံလုပ်ဆောင်ကြရမည်ဖြစ်ကြောင်း သိရသည်။

Thailand Pass ဖြင့် ဝင်ရောက်ရာတွင် ကိုဗစ်ကာကွယ်ဆေးထောက်ခံစာ တင်ပြနိုင်ပါက ကွာရန်တင်းဝင်ရန်မလိုဘဲ Self-ATK ကိုဗစ်စစ်ကြရမည်ဖြစ်ကြောင်း၊ကိုဗစ်ကာကွယ်ဆေး အကြိမ်ပြည့်မရရှိသူများအနေဖြင့် RT-PCR နည်းဖြင့်ကိုဗစ်စစ်ဆေးရမည်ဖြစ်ပြီး ကိုဗစ်ကူးစက်ခံထားရကြောင်း အဖြေထွက်လျင် ကွာရန်တင်း ၅ ရက် ဝင်ရောက်ရမည်ဖြစ်ကြောင်း မဲဆောက်နှင့် ရနောင်းခရိုင် ပြည်သူ့ဆက်ဆံရေးဌာနက ထုတ်ပြန်ထားကြောင်း သိရသည်။

ymg/mt
#Yangon_Media_Group