#Local_News
Published_1 August 2022

ပြည်တွင်းတွင် ကိုဗစ်စစ်ဆေးမှုအားနည်းနေပြီး ကိုဗစ်စစ်ဆေးသူအချို့မှာ ကိုဗစ် Positive တွေပြန်တွေ့နေရတယ်လို့ ပြည်သူ့ကျန်းမာရေးဖောင်ဒေးရှင်း ဥက္ကဌဒေါက်တာသန်းစိန်က ပြောပါတယ်၊၊

#Yangon_Media_Group

#Local_News
Published -1 August 2022

မြန်မာနိုင်ငံဆန်စပါးအသင်းချုပ်၊ မြန်မာနိုင်ငံဆန်စပါးကုန်သည်များအသင်း၊ မြန်မာနိုင်ငံဆန်စက်လုပ်ငန်းရှင်များအသင်း၊ မြန်မာနိုင်ငံဆန်စပါးစိုက်ပျိုးထုတ်လုပ်သူများအသင်းတိုနှင့် ဆန်စပါးကုန်စည်ဒိုင်(ဝါးတန်း)၊ ဆန်စပါးကုန်စည်ဒိုင်(ဘုရင့်နောင်)၊ တို၏ ပူးပေါင်းဆောင်ရွက်မှုဖြင့် ရွှေဘိုပေါ်ဆန်းတစ်အိတ်လျှက် ကျပ် ၇ သောင်းခွဲဖြင့် ရောင်းချပေးသွားမည်ဖြစ်ကြောင်း သိရသည်။

အဆိုပါရောင်းချမှုအသီအစဥ်ကိုဩဂုတ်လ ၃ ရက်နေ့တွင်စတင်မည်ဖြစ်ပြီး ဧရာဝတီပေါ်ဆန်း၊ ကြားပျံ၊ ရက် ၉၀ ဆန်များလည်း ပါဝင်ကြောင်း သိရသည်။

ယင်းအပြင် စားသုံးသူပြည်သူများအတွက်သာ ရည်ရွယ်၍ ရောင်းချင်ပေးခြင်းဖြစ်ပြီး အိမ်ထောင်စုတစ်စုလျှင် ဆန်တစ်အိတ်သာရောင်းချပေးမည်ဖြစ်ကြောင်းလည်း သိရသည်။

ပြည်တွင်း စားသုံးမှုများသည့် ရွှေဘိုပေါ်ဆန်းနှင့် ဆန်ချောစျေးနူန်းတွေသည် ၀ယ်လိုအားနှင့်အပြိုင် စျေးများ ထပ်မံမြင့်တက်လာပြီး စပါးလက်ကျန် လျော့နည်းနေချိန် ဝယ်လိုအားများ ခြင်းကြောင့် စျေးမြင့်တက်လာခြင်းဖြစ်ကြောင်း သိရသည်။

ymg/sth
#Yangon_Media_Group

#Local_News
Published_1 August 2022

ဒေါ်အောင်ဆန်းစုကြည်၏ အမှုများအနက် ရဟတ်ယာဉ်ငှားရမ်းသည့်အမှုအမှတ်(၄၇)ကို ယနေ့ သြဂုတ်လ ၁ရက်တွင် နေပြည်တော်အချုပ်ထောင်အတွင်း အထူးတရားရုံး၌ ရုံးထုတ်စစ်ဆေးခဲ့စစ်ဆေးခဲ့ကြောင်း တရားရုံးနှင့် နီးစပ်သူတစ်ဦးကပြောသည်။

"ရဟတ်ယာဉ်အမှု အမှုအမှတ် ၄၇ ကို ဒီနေ့ စစ်တယ်၊ လူကယ်ပြန်က ဒုဝန်ကြီးဟောင်းပေါ့ သူကလေ၊ ပြီးခဲ့တဲ့ တစ်ပတ်က အမှု အမှတ် ၄၆ ကို စစ်တယ်၊ဒီနေ့က ၄၇ ပေါ့၊မနက်ဖြန် အမှုအမှတ် ၄၈ ကို စစ်မယ်၊အားလုံး ကျန်းကျန်းမာမာပဲ"ဟု ယင်း တရားရုံးနှင့် နီးစပ်သူက YMG ကို ပြောသည်။

ဒေါ်အောင်ဆန်းစုကြည် အနေဖြင့် ရင်ဆိုင်နေရသည့် အမှုများထဲတွင် ရဟတ်ယာဉ်ငှားရမ်းဝယ်ယူမှုနှင့် ပတ်သက်သည့် အဂတိအမှုများကို စစ်ဆေးနေခြင်းဖြစ်ကြောင်း၊ ယင်းအမှုများတွင် ဦးဝင်းမြင့်လည်း ပါဝင်ကြောင်း သိရသည်။

ဒေါ်အောင်ဆန်းစုကြည်အနေဖြင့် ၂၀၂၂ ဇွန်လအထိ အမှုပေါင်း ၂၀ ထက်မနည်းဖြင့် စွဲဆိုထားခြင်းဖြစ်ပြီး ယင်းအထဲမှ ၆မှုအတွက် ထောင်ဒဏ် ၁၁နှစ်ချမှတ်ထားကြောင်း သိရသည်။

ymg/mt
#Yangon_Media_Group

#Local_News
Published_1 August 2022

စစ်ကိုင်းတိုင်းဒေသကြီး၊ မုံရွာမြို့နယ်တွင် လေပြင်းတိုက်ပြီး လူနေအိမ်ပေါ်သစ်ပင်လဲကျ လူ(၁)ဦးသေ ဆုံးခဲ့ကြောင်း မြန်မာနိုင်ငံမီးသတ်တပ်ဖွဲ့၏ထုတ်ပြန်ချက်အရ သိရသည်၊၊

ဇူလိုင်လ ၃၁ ရက်က စစ်ကိုင်းတိုင်းဒေသကြီး၊ မုံရွာမြို့နယ်၊ ဘုန်းစိုးရပ်ကွက်၊ သာစည်လမ်းတွင် လေပြင်းတိုက်ခတ်ပြီး မိုးရွာသွန်းမှုကြောင့် လူနေအိမ် (၁) လုံးပေါ်သို့ သစ်ပင်လဲကျ၍ လူ(၁) ဦး ပိမိနေပြီးသေဆုံးခဲ့ခြင်းဖြစ်သည်၊၊

ယင်းဖြစ်စဉ်တွင် မုံရွာခရိုင်မီးသတ်စခန်းမှ သန္ဓေမီးသတ်တပ်ဖွဲ့ဝင်များဖြင့် ရှာဖွေကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ရာ သစ်ပင်လဲကျ၍ ပိမိနေသူ ကျား(၁)ဦး(သေဆုံး)အား ရှာဖွေတွေ့ရှိခဲ့ပြီး မြန်မာနိုင်ငံလူမှုကယ်ဆယ်ရေးအသင်းမှယာဉ်ဖြင့် မုံရွာပြည်သူ့ဆေးရုံသို ပို့ဆောင်ပေးခဲ့ကြောင်း သိရသည်၊၊

အခုရက်ပိုင်းအတွင်း ရာသီဥတုပူပြင်းခြင်း၏ နောက်ဆက်တွဲအဖြစ် မိုးထစ်ချုန်းခြင်း၊ လေပြင်းတိုက်ခြင်း၊ မိုးကြိုးပစ်ခြင်းများကြုံတွေ့နိုင်ကြောင်း မိုး/ဇလမှ သတိပေးထားပြီး လေပြင်းတိုက်ခတ်မှုကြောင့် သစ်ပင်များပြိုလဲမှုများ ဖြစ်ပွားလေ့ရှိသော်လည်း ယခုတစ်ကြိမ်တွင်တော့ လူတစ်ဦးပါ သေဆုံးသွားခြင်းဖြစ်ကြောင်းသိရသည်၊၊

ymg/tthl
#Yangon_Media_Group

#Local_News
Published -1 August 2022

ပြည်ပတင်ပို့မှုမရှိသည့် ပြောင်းစျေးနှုန်းမှာ ယခင်ထက်ကျဆင်းလာကြောင်း ပြောင်းလုပ်ငန်းရှင်များထံမှ သိရသည်။

ဇူလိုင်လအတွင်း ပြောင်းဈေးနှုန်းသည် ဇွန်လထက် ၂၅ ရာခိုင်နှုန်းအထိ ထပ်မံကျဆင်းသွားကြောင်း၊ ယင်းအပြင် မူဝါဒအပြောင်းအလဲကြောင့် Normal Trade အပြင် Border Trade ပါ တင်ပို့မှု မရှိသလောက်ဖြစ်နေသည့်အတွက် ပြောင်းစျေးနှုန်း ထပ်မံကျဆင်းနိုင်ကြောင်း သိရသည်။

လက်ရှိပြောင်းစျေးကွက်တွင် အရောင်းအဝယ်အေးနေပြီး ပြောင်းတစ်ပိဿာလျှင် ၇၀၀ ကျော်သာရှိတော့ကြောင်း၊ လတ်တလောအခြေအနေအရ Normal Trade သည် တန်ချိန်သောင်းဂဏန်းခန့်သာ တင်ပို့မှုရှိပြီး Border Trade ပါ ဒေါ်လာစျေးဖြင့် မကိုက်သည့်အတွက် တင်ပို့မှုမရှိသလောက်ဖြစ်နေကြောင်း သိရသည်။

ယင်းအပြင် ပဲ၊ ပြောင်း၊ နှမ်းအမျိုးမျိုးနှင့် မြေပဲတို့ကို ပင်လယ်ရေကြောင်းမှ တင်ပို့ရန် ထောက်ခံချက်ရယူလိုပါက ပို့ကုန်ကြိုတင်ရငွေ USD လက်ခံကို ပူးတွဲလျှောက်ထားရမည် ဖြစ်ကြောင်း မြန်မာနိုင်ငံပဲမျိုးစုံ၊ ပြောင်းနှင့်နှမ်းကုန်သည်များအသင်းမှ အသင်းဝင်ပို့ကုန်လုပ်ငန်းရှင်များထံသို့ အသိပေးအကြောင်းကြားထားသည်။

ymg/sth
#Yangon_Media_Group

#Local_News
Published_1 August 2022

ထိုင်းနိုင်ငံ၊ ချိုင်းနတ်ခရိုင်၊ မနိုရုန်းမြို့နယ် လမ်းဘေးတောတစ်နေရာတွင် မြန်မာအမျိုးသမီးနှစ်ဦး၏ ရုပ်အလောင်းအားတွေ့ရှိမှုနှင့်ပတ်သက်ပြီး ထိုင်းနိုင်ငံ၌တရားမဝင်မြန်မာအလုပ်သမားများခေါ်ယူပေးနေသည့် မြန်မာပွဲစားတစ်ဦးကို ထိုင်းရဲတပ်ဖွဲ့က ဇူလိုင် ၂၈ ရက်တွင်ဖမ်းဆီးခဲ့ကြောင်း ထိုင်းနိုင်ငံအခြေစိုက်သတင်းမီဒီယာများတွင် ဖော်ပြထားသည်။

သေဆုံးသည့်မြန်မာအလုပ်သမားအမျိုးသမီးနှစ်ဦးမှာ ထိုင်းနိုင်ငံအတွင်းဝင်ရောက်စဉ် ကားအတွင်းအောက်စီဂျင်ပြတ်ကာသေဆုံးခဲ့ပြီးနောက် လမ်းဘေးတွင်စွန့်ပစ်ခံခဲ့ရခြင်းဖြစ်ကြောင်း၊ စွန့်ပစ်ထားသည့်ရုပ်အလောင်းများကို ပြီးခဲ့သည့် ဇွန်လ ၁၉ ရက်တွင်တွေ့ရှိခဲ့ခြင်းဖြစ်ကြောင်း ထိုင်းအာဏာပိုင်များက ပြောကြားထားသည်။

ယင်းနောက် ထိုင်းအာဏာပိုင်များသည် တရားမဝင်လမ်းကြောင်းတစ်လျှောက်ရှိ ပွဲစားများကိုစစ်ဆေးခဲ့ရာ သေဆုံးသူမြန်မာအမျိုးသမီးနှစ်ဦးကို ထိုင်းနိုင်ငံအတွင်းခေါ်သွင်းခဲ့သည့် မြန်မာပွဲစား အသက် ၃၈ နှစ်အရွယ် နန်းခင်စောမူကို တာ့ခရိုင်၊ မဲဆောက်မြို့၊ ထာ့ဆိုင်လွမြို့နယ်ရှိ အငှားအိမ်တစ်ခုတွင် ဖမ်းဆီးရမိခဲ့ကြောင်း ထိုင်းအခြေစိုက် MGR Online သတင်းဌာနက ဖော်ပြထားသည်။

နန်းခင်စောမူသည် ထိုင်းနိုင်ငံတွင်နေထိုင်ကာ မြန်မာနိုင်ငံဘက်မှ တရားမဝင်အလုပ်လုပ်ကိုင်ချင်သူများကို ထိုင်းအလုပ်ရှင်များနှင့်ချိတ်ဆက်ကာ မြန်မာပြည်ဘက်မှ အလုပ်သမားများခေါ်ယူနေသူဖြစ်ကြောင်းလည်း ထိုင်းအာဏာပိုင်များကပြောသည်။

ယခုဖမ်းဆီးရမိသည့် ပွဲစားအမျိုးသမီး နန်းခင်စောမူကို ထိုင်အာဏာပိုင်များက ဟန်းနမ်းဆာခွန်ရဲစခန်းတွင် ဖမ်းဆီးထားပြီး မြန်မာအမျိုးသမီးနှစ်ဦးသေဆုံးမှုနှင့် ပတ်သက်၍ ပါဝင်သူများကို ဆက်လက်စုံစမ်းနေကြောင်း ထိုင်းသတင်းများတွင် ရေးသားဖော်ပြထားသည်။

ymg/NN
#Yangon_Media_Group

#Local_News
Published_1 August 2022

မိုင်းကျက်ဂူ အတွင်း ၃နှစ် ၃ လ ၃ ရက် မဟာအဓိဌာန်ကျင့်ကြံနေသော မိုင်းဖုန်းဆရာတော်ဘုရားကြီး ယနေ့ ဩဂုတ်လ ၁ ရက်တွင် မိုင်းကျက်ဂူ အတွင်းမှ ပြန်လည် ထွက်လာပြီ ဖြစ်ကြောင်း သိရသည်။

ဆရာတော်၏ ဆံပင်များကို မြစ် ၃ ခုစုံရာ နမ့်ဟူးချောင်းတွင် ဆံချမည်ဖြစ်သည့်အတွက် ဆံချရန် နေရာလည်း ပြုလုပ်ထားပြီး ဖြစ်ကြောင်း ဒေသခံ သတင်းရင်းမြစ်များက ဆိုသည်။

အရညဝါသီ မိုင်းဖုန်းဆရာတော်ဘုရားကြီး အဓိဌာန်အောင်ကာ ဂူထွက်ချိန် ဩဂုတ်လ(၁)ရက်တွင် အပူဇော်ခံမည် ဖြစ်ပြီး (၅)ရက်တာအတွင်း အဆိုပါ အပူဇော်ခံရာ မိုင်းကျက်အောက်ဂူထိ မလာရောက်နိုင်သူများအတွက် ဩဂုတ်လ ၅ ရက်တွင် မိုင်းကျက်မှ မိုင်းဆတ် တာချီလိတ်လမ်းအတိုင်း ကြွချီမည် ဖြစ်ကြောင်းလည်း သိရသည်။

တာချီလိတ်ကိုရောက်သည်နှင့် နဂါးနှစ်ကောင် ဆရာတော်ဘုရားကြီးကျောင်းတော်သို့ကြွရောက်မည်ဖြစ်ပြီး ယင်းမှဆရာတော်ကြီး၏ မိုင်းဖုန်းရှိ လွန်းလိန်းကျောင်းသို့ ပြန်လည်ရောက်ရှိမည်ဖြစ်ကြောင်း၊ဆရာတော် နှီးဘုရားကျောင်းတွင် ဘုရားဝတ်တက်ချိန် ဖူးမျှော်နိုင်မည် ဖြစ်ကြောင်းလည်း ဖူးမျှော်နိုင်သူများအတွက် သတင်းထုတ်ပြန်ထားကြောင်း သိရသည်။

ymg/mt
#Yangon_Media_Group

#Local_News
Published_ 1 Aug 2022

ဩဂုတ်လ ၁ ရက်မှ ၇ ရက်အထိ ရန်ကုန်အထိုင်ဈေး အခြေခံလက်ကား ရည်ညွှန်း ဈေးနှုန်းမှာ စားအုန်းဆီတစ်ပိဿာလျှင် ၃၅၂၅ ကျပ် ဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီမှထုတ်ပြန် ကြေညာထားထားပါတယ်။

ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့တဲ့ နိုင်ငံများတွင်ဈေးကွက်နှင့် ဈေးနှုန်းဖြစ်ပေါ်မှုများအရ ထုတ်ပြန်ထားတာဖြစ်တယ်လို့ ဆိုပါတယ်။

ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာတဲ့ လုပ်ဆောင်မှုများပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမှာဖြစ်ကြောင်း အသိပေးထုတ်ပြန်ထားပါတယ်။

ထိုသို့ ထုတ်ပြန်ထားပေမယ့် ပြင်ပဈေးကွက်အတွင်း၌ စားအုန်းဆီးတစ်ပိဿာကို ၇၀၀၀ ကျပ်မှ ၈၅၀၀ ကျပ်အကြား ဝယ်ယူအသုံးပြုနေရတယ်လို့ စားသုံးသူများက ဆိုကြပါတယ်။

ygm_mnn
#Yangon_Media_Group

#World_Politics
Published 1 August 2022

အမေရိကန်အောက် လွှတ်တော်ဥက္ကဌ'နန်စ်ပယ်လိုစီ'ဟာ တနင်္ဂနွေနေ့မှာ အာရှ ၄ နိုင်ငံခရီးစဉ်ကို စတင်ထွက်ခွာခဲ့ကြောင်း အောက် လွှတ်တော်ရုံးက ကြေညာခဲ့ပါတယ်။

ထိုခရီးစဉ်အတွင်း အစကသွားရောက်လည်ပတ်မယ်လို့ အသံထွက်ခဲ့တဲ့ထိုင်ဝမ်ကိုတော့ ထည့်သွင်းဖော်ပြထားခြင်းမရှိပါဘူး။

တရုတ်တို့က ယင်းတို့ပိုင်ဆိုင်ကြောင်း အဆိုပြုထားတဲ့ ကိုယ်ပိုင်အုပ်ချုပ်ခွင့်ရထိုင်ဝမ်ကို 'ပယ်လိုစီ'သွားရောက်လည်ပတ်မယ့် သတင်းတွေနဲ့ပတ်သက်ပြီး အလေးပေးစောင့်ကြည့်နေခဲ့ကြတာလည်း ဖြစ်ပါတယ်။

ဥက္ကဌ'နန်စီပယ်လိုစီ'ဦးဆောင်တဲ့ ကွန်ဂရက်လွှတ်တော်ကိုယ်စားလှယ်အဖွဲက စင်္ကာပူ၊ မလေးရှား၊ တောင်ကိုရီးယား၊ ဂျပန်အပါအဝင် အင်ဒိုပစိဖိတ်ဒေသသို့ သွားရောက်နေကြောင်း ဖော်ပြခဲ့ပါတယ်။

သမ္မတရာထူးဆက်ခံခွင့်မှာ တတိယမြောက်နေရာမှာရှိနေတဲ့'ပယ်လိုစီ'ဟာ အဆိုပါနိုင်ငံတွေထံ သွားရောက်လည်ပတ်ဖို့ဖော်ပြထားပေမယ့် အခြားနိုင်ငံတွေကို ဝင်ဦးမှာလားဆိုတာကိုတော့ မဖော်ပြထားပါဘူး။

အဆိုပါ ခရီးစဉ်ဟာ အင်ဒိုပစိဖိတ်ဒေသအတွင်း အပြန်အလှန်လုံခြုံရေး၊ စီးပွားရေး ပူးပေါင်းဆောင်ရွက်ရေးနဲ့ ဒီမိုကရက်တစ်စိုးမိုးအုပ်ချုပ်ရေးတို့ကို အလေးပေးသွားမှာ ဖြစ်ပါတယ်။

ကိုယ်စားလှယ်အဖွဲ့ထဲမှာ အောက်လွှတ်တော်နိုင်ငံခြားရေးကော်မတီဥက္ကဌ'ဂရီဂေါ်ရီမိခ်စ်'လည်း ပါဝင်ပါတယ်။

'ပယ်လိုစီ'က စင်္ကာပူသို့ တနင်္လာနေ့မှာရောက်ရှိမှာဖြစ်ပြီး ၂ ရက်နေထိုင်မှာဖြစ်ကြောင်း နိုင်ငံခြားရေးဝန်ကြီးဌာနရဲ့ပြောကြားချက်အတိုင်း CNA ရုပ်သံက တင်ပြခဲ့ပါတယ်။

တနင်္လာနေ့မွန်းလွဲအချိန်မှာ စင်္ကာပူရှိ အမေရိကန်ကုန်သည်ကြီးများအသင်းက ဧည့်ခံပွဲဖြင့်ကြိုဆိုသွားမယ်လို့ ဝက်ဘ်ဆိုက်မှာ ဖော်ပြထားပါတယ်။

အမေရိကန်အရာရှိများ ထိုင်ဝမ်သို့လည်ပတ်ခြင်းဟာ ထိုင်ဝမ်ကျွန်းနိုင်ငံရဲ့လွတ်လပ်ရေးလိုလားခွင့်ကို အားပေးအားမြှောက်ပြုရာ ကျတယ်လို့ တရုတ်တို့က ယူဆထားပါတယ်။

အမေရိကန်က ထိုင်ဝမ်နဲ့တရားဝင်သံတမန်ဆက်ဆံရေး မရှိပေမယ့် ကိုယ်ပိုင်ကာကွယ်ရေးအတွက် ဥပဒေအရထောက်ပံ့ ကူညီခွင့်ရှိနေပါတယ်။

ဒါကြောင့် 'ပယ်လိုစီ'လည်ပတ်မယ့်ခရီးစဉ်က ထိုင်ဝမ်အပေါ် အမေရိကန်တိုရဲ့ ထောက်ပံ့ကူညီမှုကို ပြသနေရာရောက်ပါတယ်။

ရီပတ်ဘလစ်ကန်ခေါင်းဆောင်ဖြစ်ခဲ့တဲ့'နယူ့ဂင်ဂရစ်ချ်'က ၁၉၉၇ ခုနှစ်မှာ ထိုင်ဝမ်ကျွန်းကို နောက်ဆုံးသွားရောက်ခဲ့တဲ့ အောက်လွှတ်တော်ဥက္ကဌဖြစ်ပါတယ်။

အမေရိကန်အနေနဲ့ တရုတ်တို့ရဲ့တစ်သွေးတစ်မိန့်စည်းမျဉ်းအား လိုက်နာသင့်ပြီး တရုတ်တို့ကို စပြီးပြဿနာရှာသူတွေအနေနဲ့ အရေးယူခံရမယ်လို့ တရုတ်သမ္မတ'ရှီကျင့်ဖင်'က အမေရိကန်သမ္မတ'ဂျိုးဘိုင်ဒန်'ကို သတိပေးထားပါတယ်။

'ဘိုင်ဒန်'ကလည်း ထိုင်ဝမ်နဲ့ပတ်သက်တဲ့ အမေရိကန်မူဝါဒပေါ်လစီဟာ ပြောင်းလဲခြင်းမရှိဘဲ ထိုင်ဝမ်ကျွန်းရဲ့တည်ငြိမ်အေးချမ်းမှုကို ပြုပြင်ပြောင်းလဲဖို့ တဖက်သတ်ကြံစည်နေခြင်းကို ပြင်းပြင်းထန်ထန်ကန့်ကွက်ကြောင်း 'ရှီ'ကို တုံ့ပြန်သတိပေးခဲ့ပါတယ်။

ပြီးခဲ့တဲ့ရက်ပိုင်းအတွင်း 'ရှီ'နဲ့'ဘိုင်ဒန်'တို့ ဖုန်းဖြင့်ဆွေးနွေးပြောဆိုပြီးနောက် ထိုင်ဝမ်တို့က အမေရိကန်နဲ့ လုံခြုံရေးပူးပေါင်းဆောင်ရွက်မှုများကို ပိုပြီးအလေးအနက်ထားဆောင်ရွက်သွားမှာဖြစ်ကြောင်း ထိုင်ဝမ်နိုင်ငံခြားရေးဝန်ကြီးဌာနက သောကြာ့နေမှာ ကြေညာခဲ့ပါတယ်။

Source: Reuters
#Yangon_Media_Group

Published 1 August 2022

အပြစ်မဲ့သေဆုံးသူများအတွက် များစွာစိတ်မကောင်းဖြစ်မိပြီး အကြမ်းဖက် တိုက်ခိုက်သူတွေကို ထိရောက်စွာ အရေးယူ ဆောင်ရွက်သွားမယ်လို့ နစက ဥက္ကဋ္ဌက ပြောကြားလိုက်ပါတယ်။

နစကရဲ့ ၁၈လတာ ကာလ တာဝန်ထမ်းဆောင်ခဲ့မှုနှင့်ပတ်သက်တဲ့ မိန့်ခွန်းတစ်ရပ်ကို နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင်က ဩဂုတ် ၁ရက် မနက်က နိုင်ငံတော်ကိုပြောကြားရာမှာ ယခုလိုထည့်သွင်းပြောကြားခဲ့တာဖြစ်ပါတယ်။

၂၀၂၁ ခုနှစ် ဖေဖော်ဝါရီ(၁)ရက်မှ ၂၀၂၂ခုနှစ် ဇူလိုင် ၂၃ ရက်အထိ ၁၈ လတာနီးပါးအတွင်း တစ်နိုင်ငံလုံးမှာ လက်ပစ်ဗုံး/လက်လုပ်ဗုံး ပစ်ခတ်ခံရမှု၊ မိုင်းခွဲမှု ၇,၂၄၆ ကြိမ်၊ တိုက်ခိုက်/ သတ်ဖြတ်ခံရမှု ၆,၅၆၇ ကြိမ်၊ မီးရှို့ခံရမှု ၁,၀၉၄ ကြိမ်၊ စုစုပေါင်း ၁၄,၉၀၇ ကြိမ် ဖြစ်ပွားခဲ့ပါတယ်။ ရဟန်း/သံဃာ/သီလရှင်တွေ၊ အစိုးရဝန်ထမ်းတွေ၊ အုပ်ချုပ်ရေး ဆိုင်ရာတာဝန်ရှိသူတွေ၊ ကလေးသူငယ်အပါအဝင် အပြစ်မဲ့အရပ်သား ၃,၄၈၃ ဦး သေဆုံး ခဲ့ပြီး ၃,၀၆၅ ဦး ဒဏ်ရာရရှိ၍ ၄၁ ဦး ပျောက်ဆုံးမှုရှိခဲ့ပါတယ် လို့ ဗိုလ်ချူပ်မှူးကြီးကပြောပါတယ်။

အဲသလိုဖြစ်ပွားခဲ့တဲ့အထဲမှာ စစ်ကိုင်းတိုင်းဒေသကြီး၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး နှင့် မကွေးတိုင်းဒေသကြီးတွေမှာ အများဆုံးဖြစ်ပွားခဲ့တယ်လို့လည်းသိရပါတယ်။

စစ်ကိုင်းတိုင်းဒေသကြီးမှာ ၄,၀၂၆ ကြိမ်၊ ရန်ကုန်တိုင်းဒေသကြီးမှာ ၂,၄၄၂ ကြိမ်၊ မန္တလေးတိုင်းဒေသကြီးမှာ ၂,၁၉၄ ကြိမ်၊ မကွေးတိုင်းဒေသကြီးမှာ ၁,၃၉၅ ကြိမ်တို့နဲ့ အများဆုံးဖြစ်ပွားခဲ့တဲ့အတွက် အဆိုပါ ဒေသတွေအတွင်း မူလအခြေအနေတွေအတိုင်း လုံခြုံမှု၊ တည်ငြိမ်အေးချမ်းမှု၊ တရား ဥပဒေ စိုးမိုးမှုရှိအောင်ဆက်လက်ဆောင်ရွက်သွားမှာဖြစ်ပါတယ်”လို့ လည်း မိန့်ခွန်းမှာဖော်ပြထားပါတယ်။

“ အဆိုပါ ဒေသတွေအတွင်း မူလအခြေအနေတွေအတိုင်း လုံခြုံမှု၊ တည်ငြိမ်အေးချမ်းမှု၊ တရား ဥပဒေ စိုးမိုးမှုရှိအောင်ဆက်လက်ဆောင်ရွက်သွားမှာဖြစ်ပါတယ်။ ကျွန်တော့်အနေနဲ့ တရား ဥပဒေ စိုးမိုးရေးအတွက် အလွန်အရေးကြီးတဲ့ မြို့နယ်အချို့မှအပ စစ်အုပ်ချုပ်ရေး မလုပ်ခဲ့ပါဘူး၊ အုပ်ချုပ်ရေး၊ တရားစီရင်ရေးနဲ့ ဥပဒေပြုရေးအာဏာသုံးရပ်ကို မည်သို့ပင် အပ်နှင်းထားစေကာမူ အခြေခံဥပဒေပါပြဋ္ဌာန်းချက်၊ တည်ဆဲဥပဒေများနှင့်အညီသာ ဆောင်ရွက်ပါတယ်” လို့ ဗိုလ်ချူပ်မှူးကြီးကပြောပါတယ်။

၊၁၈ လတာကာလအတွင်း မြန်မာ နိုင်ငံအတွင်းကို နည်းမျိုးစုံနဲ့ သွင်းယူခဲ့တဲ့ လက်နက်တွေနဲ့ အကြမ်းဖက်တွေနဲ့ ထိတွေ့ပစ်ခတ်မှုတွေမှာ ဖမ်းဆီးရမိခဲ့တဲ့ လက်နက် ဟာ လက်နက်မျိုးစုံ ၆,၃၁၁ လက်၊ ခဲယမ်းမျိုးစုံ ၃၃၅,၁၈၄ တောင့်နဲ့ လက်ပစ်ဗုံး/မိုင်း ၁၁,၇၁၅ လုံး သိမ်းဆည်းရမိခဲ့ပါတယ်။  အကြမ်းဖက်သူ ၆၂၃၆ ဦးကို ဖမ်းဆီးရမိခဲ့ပါတယ်လို့လည်း မိန့်ခွန်း အရသိရပါတယ်။

ymg/knl/

#World_Health
Published 1 August 2022

မယ်လာတိုနင်(Melotonin)ဟော်မုန်းရေရှည်သုံးစွဲခြင်းက ကျန်းမာရေးပြဿနာအမျိုးမျိုးဖြစ်ပေါ်နိုင်ပြီး အသိဉာဏ်စွမ်းရည်ကျဆင်းကာ ရေရှည်မှာ စိတ်ကျန်းမာရေးပြဿနာများဖြစ်ပေါ်နိုင်ကြောင်း ကျွမ်းကျင်သူများက သတိပေးလိုက်ပါတယ်။

အခုဆိုရင် အမေရိကန်ရှိ အရွယ်ရောက်ပြီးသူ ၂ ရာခိုင်နှုန်းလောက်က မယ်လာတိုနင်ကို ပုံမှန်သုံးစွဲနေကြပြီး ပြီးခဲ့တဲ့နှစ် ၂၀ အတွင်း ၅ ဆများလာတာဖြစ်ပါတယ်။

JAMA ဂျာနယ်မှာဖော်ပြထားရာမှာ အမေရိကန်မှလူတွေဟာ မယ်လာတိုနင်ကို ဆေးပြင်းအားများများနဲ့ ရေရှည်အသုံးပြုနေကြပြီး မောပန်းခြင်း၊ မူးဝေခြင်း၊ ခေါင်းကိုက်ခြင်းနဲ့ ကျန်းမာရေးနောက်ဆက်တွဲဆိုးကျိုးများဖြစ်ပေါ်လာနိုင်ကြောင်း အိပ်စက်ခြင်းနဲ့ စိတ်ကျန်းမာရေးကျွမ်းကျင်ပညာရှင်များက ဖော်ပြထားပါတယ်။

အခြားနိုင်ငံတွေနဲ့မတူတာက အမေရိကန်မှာ အမေရိကန်မှာ မယ်လာတိုနင်ကို FDA က ထိန်းချုပ်ထားတာမဟုတ်သလို အွန်လိုင်းကနေရော ဆေးဆိုင်တွေမှာပါ ဆေးစာမပါဘဲဝယ်ယူရရှိနိုင်ပါတယ်။

အိပ်စက်ရာမှာ အကူအညီဖြစ်စေပြီး ဘေးကင်းစိတ်ချရတဲ့ဆေးအဖြစ် ရောင်းချနေကြကာ ၂၀၁၇ ခုနှစ်က ဒေါ်လာ ၃၃၉ သန်းဖိုးရောင်းချခဲ့ရပြီး ၂၀၂၀ မှာတော့ ၈၂၁ သန်းအထိ ရောင်းချလာရပါတယ်။

အလွန်အကျွံသုံးစွဲတဲ့အခါ နောက်ဆက်တွဲဆိုးကျိုးများ အနည်းငယ်သာတွေ့ရှိကြောင်းယူဆနေကြပါတယ်။

"ဆေးဆိုင်မှာအလွယ်တကူဝယ်ယူနိုင်တယ်ဆိုတာက ဘေးဥပါဒ်မဖြစ်ဘူး၊ ဇီဝကမ္မဖြစ်စဉ်ကြီးကြီးမားမားမဖြစ်ဘူးလို့ ဆိုလိုတာမဟုတ်ပါဘူး" လို့ မင်နီဆိုတာ မိုင်ယိုဆေးပညာကောလိပ်မှ ဒေါက်တာ'နေမာကိုဗက်ဆင်'က ပြောပြပါတယ်။

မယ်လာတိုနင်ဆေးတွေရဲ့ ရေရှည်ဘေးထွက်ဆိုးကျိုးတွေကို သိပ်ပြီးမသိကြတာကြောင့် ကမ္ဘာ့နေရာအနှံ့အပြားမှာ ဈေးကွက်မတွင်ကျယ်ကြပါဘူး။

ထိုအတွက်လည်း သိပ္ပံပညာရှင်များက သိရှိအောင်ကြိုးစားနေကြပါတယ်။

အမျိုးသားကျန်းမာရေးအဖွဲ့အစည်းကတော့ ထိုဆေးတွေဟာ မှတ်ဉာဏ်ချို့တဲ့ခြင်းနဲ့ အသက်တိုခြင်းတို့ဖြစ်နိုင်တယ်လို့ သုံးသပ်နေပါတယ်။

အိပ်ပျော်စေရန်အသုံးပြုရင်း အလွန်အကျွံဖြစ်သွားတဲ့အခါ နောက်ပိုင်းကျရင် အသိဉာဏ်စွမ်းရည်ကျဆင်းခြင်းနဲ့ စိတ်ပိုင်းဆိုင်ရာပြဿနာများဖြစ်ပေါ်လာနိုင်တယ်လို့ အချက်အလက်များတွေ့ရှိထားပါတယ်။
FDA ခွင့်ပြုချက်ဖြင့် ရောင်းချခြင်းမဟုတ်တာကြောင့် သတ်မှတ်ထားတဲ့ပမာဏထက် ပိုမိုများပြားစွာသုံးစွဲသူတွေရှိနေနိုင်ပါတယ်။

လူကြီးမှာပဲဖြစ်ဖြစ် ကလေးမှာပဲဖြစ်ဖြစ် အိပ်မပျော်ခြင်းအတွက် ရေရှည်ဆေးဝါးသုံးစွဲတာမျိုးကို အကြံမပြုကြောင်း လော့စ်အိန်ဂျလိစ် ကယ်လီဖိုးနီးယားတက္ကသိုလ်မှ ပရော်ဖက်ဆာဒေါက်တာ'ဂျန်နီဖာမာတင်'က ပြောကြားခဲ့ပါတယ်။

ကလေးတွေလက်လှမ်းမီတဲ့နေရာတွေမှာ မယ်လာတိုနင်ဆေးတွေကို မထားသင့်ပါဘူး။
ဒါပေမဲ့ လုံးဝအသုံးမဝင်တာမျိုးမဟုတ်ဘဲ ခရီးကပင်ပန်းလာတဲ့အချိန်မျိုးမှာ အိပ်စက်ချိန်ပြောင်းလဲဖို့လိုလာရင်တော့ အသုံးဝင်နိုင်ပါတယ်။

ဒါ့အပြင် အိပ်မပျော်လို့မဖြစ်တဲ့ညမျိုးတွေမှာလည်း ရံဖန်ရံခါအသုံးပြုနိုင်ပါတယ်။

Source: DailyMail.
#Yangon_Media_Group

#Local_News
Published_1 August 2022

လန်ချန်း-မဲခေါင်ပူးပေါင်းဆောင်ရွက်ရေး အထူးရန်ပုံငွေ၏ ပံ့ပိုးမှုဖြင့်သစ်သီးဝလံနှင့်ဟင်းသီးဟင်း ရွက်များထုပ်ပိုးမှုသင်တန်းကို မန္တလေးတိုင်းဒေသကြီး ပြင်ဦးလွင်မြို့တွင် ဇူလိုင်လ(၂၅)ရက်မှ (၂၇)ရက်အထိ ကျင်းပခဲ့ကြောင်း သိရသည်၊၊

“အရည်အသွေးထိန်းသိမ်းပြီး သက်တမ်းပိုမိုကြာမြင့်စေသည့် သစ်သီးဝလံနှင့် ဟင်းသီးဟင်းရွက်များ ထုပ်ပိုးမှု” စီမံကိန်းအနေဖြင့် ယင်းသင်တန်းကို ဆောင်ရွက်ခဲ့ခြင်းဖြစ်ကြောင်း မြန်မာနိုင်ငံဆိုင်ရာတရုတ်သံရုံး၏ ထုတ်ပြန်ချက်အရ သိရသည်၊၊

အဆိုပါသင်တန်းတွင် စိုက်ပျိုးရေးပညာရှင်များက ဒေသခံတောင်သူများအား ဟင်းသီးဟင်းရွက်ထုပ်ပိုးမှုနည်းပညာ၊ ပုပ်သိုးလွယ်သီးနှံများအတွက် တံဆိပ်ပြုလုပ်ခြင်း၊ စနစ်တကျသယ်ယူပို့ဆောင်ခြင်း၊ သုတေသနရလဒ်များ အသုံးချခြင်းတို့ဆိုင်ရာ အသိပညာများ ပို့ချခဲ့ရာ တောင်သူလယ်သမားများအား သစ်သီးဝလံနှင့် ဟင်းသီးဟင်းရွက်များ ဘေးကင်းစွာ ထုပ်ပိုးမှုနည်းလမ်းများ ကျွမ်းကျင်ပိုင်နိုင်စေပြီး စားသောက်ကုန်ထုပ်ပိုးမှုနည်းပညာများကို တိုးတက်စေပြီး သစ်သီးဝလံနှင့် ဟင်းသီးဟင်းရွက်များ သယ်ယူပို့ဆောင်စဉ်အတွင်း ဆုံးရှုံးမှုများကို လျှော့ချပေးနိုင်ကြောင်းထုတ်ပြန်ချက်တွင် ဖော်ပြပါရှိသည်၊၊

ymg/tthl
#Yangon_Media_Group