#LocalNews
Published - 2 May 2022

ယာဉ်တိုက်မှုဖြစ်ပွားပြီး ကားခေါင်းခန်းအတွင်းညပ်မိနေသည့် ယာဥ်မောင်းဖြစ်သူကို မီးသတ်တပ်ဖွဲ့က ခက်ခက်ခဲခဲ ကယ်ထုတ်ခဲ့ရသည့်ဖြစ်စဥ်တစ်ခု မန္တလေးတိုင်းဒေသကြီးအတွင်းမှာ ဒီကနေ့ ဖြစ်ပွားခဲ့တယ်လို့ သိရပါတယ်။

ဖြစ်စဥ်မှာ ယနေ့ မေ ၂ ရက်၊ မွန်းလွဲပိုင်းအချိန်က မန္တလေးတိုင်းဒေသကြီး၊ ညောင်ဦးမြို့နယ်၊ ဝက်ကြီးအင်းရပ်၊ အနော်ရထာလမ်းမကြီး၊ မိုင်တိုင်အမှတ်(၁/၀)နှင့် (၁/၁)ကြားတွင် ယာဉ်တိုက်မှုဖြစ်ပွားခဲ့ခြင်း ဖြစ်ပါတယ်။

အဆိုပါ ယာဥ်တိုက်မှုဖြစ်စဥ်ကြောင့် ယာဉ်မောင်းအမျိုးသား(၁)ဦး ညပ်မိနေသဖြင့် ညောင်ဦးခရိုင်/မြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များ၊ အမှတ်(၅)အရန်မီးသတ်တပ်ဖွဲ့ဝင်များဖြင့် ကယ်ဆယ်ရေးလုပ်ငန်းများကို သွားရောက်ဆောင်ရွက်ခဲ့ရတာဖြစ်တယ်လို့ သိရပါတယ်။

အသက်ရှင်လျှက် ကယ်ထုတ်ရရှိခဲ့တဲ့ အဆိုပါ အမျိုးသားလူနာကို ညောင်ဦးခရိုင် ပြည်သူ့ဆေးရုံကြီးသို့ အမှတ်(၅)အရန်မီးသတ်မှ လူမှုကူညီရေးယာဉ်ဖြင့် ကူညီပို့ဆောင်ပေးခဲ့ရတယ်လို့လည်း သိရပါတယ်။

Photo - MFSD

ymg/kg
#Yangon_Media_Group

Published 02 May 2022

ဖိလစ်ပိုင်နိုင်ငံ မနီလာမြို့တော်ရှိ ဆင်းရဲသားရပ်ကွက်တစ်ခုမှာ မေ(၂)ရက် တနင်္လာနေ့က

မီးလောင်ကျွမ်းမှုဖြစ်ပွားခဲ့ရာ ကလေးငယ်(၆)ဦးအပါအဝင် လူ(၈)ဦးသေဆုံးခဲ့ရပါတယ်။

အဲဒီအပြင်  နောက်ထပ်လူ(၃)ဦးထိခိုက်ဒဏ်ရာရရှိပြီး အိမ်ခြေပေါင်း ၈၀ လည်း

မီးထဲပါသွားတယ်လို့ မီးသတ်ဌာန အရာရှိတစ်ဦးက ပြောပါတယ်။

ဖိလစ်ပိုင်တက္ကသိုလ်ရဲ့ ပြန့်ကျဲနေတဲ့ ဝင်းထဲက တရားမဝင်ဆောက်လုပ်ထားတဲ့ ပြွတ်သိပ်နေတဲ့ အိမ်ရာတွေထဲက အိမ်တစ်လုံးကို  တနင်္လာနေ့ မနက်၅နာရီမှာ စတင်လောင်ကျွမ်းခဲ့တာဖြစ်ပါတယ်။

မီးစွယ်ကျိုးဖို့အတွက် နှစ်နာရီခန့်ကြာအောင် မီးငြိမ်းသတ်ခဲ့ရပြီး သေဆုံးသူတွေဟာ အိမ်ထဲမှာပိတ်မိနေသူတွေဖြစ်တယ်လို့ အကြီးတန်းမီးသတ်အရာရှိ ဂရက်ဘီချေဒါက အေအက်ဖ်ပီကိုပြောပါတယ်။

မီးလောင်ကျွမ်းရတဲ့အကြောင်းရင်း စုံစမ်းစစ်ဆေးနေဆဲဖြစ်ပါတယ်။

Source AFP

#LocalNews
Published - 2 May 2022

ထိုင်းနိုင်ငံချင်းရိုင်ပြည်နယ် မဲ့ဖာလုံမြို့နယ်အတွင်းရှိ တောတွင်းတစ်နေရာတွင် မူးယစ်ဆေးဝါးမှောင်ခိုပြုလုပ်သူ မြန်မာနိုင်ငံသား ၈ ဦးကို ထိုင်းရဲတပ်ဖွဲ့ အသေပစ်ခတ်ဖမ်းဆီးခဲ့ပြီး စိတ်ကြွရူးသွပ်ဆေးပြား ၆.၇ သန်း သိမ်းဆည်းရမိကြောင်း ထိုင်းနိုင်ငံအခြေစိုက် မြန်မာနိုင်ငံသားများပူးတွဲလှုပ်ရှားမှုကော်မတီမှ သိရသည်။

ဧပြီလ ၁ ရက်နေ့ နံနနက်အစောပိုင်းက ချင်းရိုင်ပြည်နယ်တော၀တွင်းတစ်နေရာတွင် မူးယစ်ဆေးဝါးမှောင်ခိုသမားများနှင့် ထိုင်းမူးယစ်ဆေးဝါးတားဆီးနှိမ်နှင်းရေးတပ်ဖွဲ့နှင့် နယ်ခြားစောင့်ရဲများအကြား အပြန်အလှန် ပစ်ခတ်မှုဖြစ်ပွားခဲ့ကာ မြန်မာနိုင်ငံသား ၈ ဦး ပစ်ခတ်ဖမ်းဆီးခံခဲ့ရပြီး အစီရင်ခံစာအရ လုံခြုံရေးရဲတပ်ဖွဲ့ဝင်များက စစ်ဆင်ရေးအတွင်း စိတ်ကြွဆေးပြား ၆.၇ သန်းကို သိမ်းဆည်းရမိခဲ့ကြောင်း သိရသည်။

"ရွှေတြိဂံဒေသကတော့ မကြာခဏမူးယစ်ဆေးဝါးဖမ်းဆီးရမိမှုတွေ အပြန်အလှန်တွေပစ်ခတ်မှုတွေဖြစ်ပွားခဲ့တတ်ပါတယ်။

ခုတစ်ကြိမ်ကတော့ ၆ ဒသမ ၇ သန်းကတော့ ပမာဏများတာပေါ့"ဟု မြန်မာနိုင်ငံသားများအရေးပူးတွဲလှုပ်ရှားမှုကော်မတီဥက္ကဌ ဦးမိုးကြိုးက ပြောသည်။

မြန်မာနယ်စပ်မှ ၅ ကီလိုမီတာအကွာ၊ ချင်းရိုင်ခရိုင်၊ မယ်ဖလုံမှာ ထိုင်းတပ်တွေက ကင်းလှည့်နေချိန် လူ ၁၀ ဦးနှင့် ထိပ်တိုက်တွေ့ခဲ့ပြီး မြန်မာနိုင်ငံသားများဟု ယူဆရသည့်သူများက လက်နက်ကိုင်ဆောင်ထားကာ ကျောပိုးအိတ်များသယ်ဆောင်လာကြရာ မူးယစ်ဆေးဝါး ရောင်းဝယ်ဖောက်ကားမှုနှင့် သံသယရှိသဖြင့် တားဆီးရှာဖွေရန် ထိုင်းစစ်တပ်က အမိန့်ပေးခဲ့ပြီးနောက် အပြန်အလှန် စတင်ပစ်ခတ်မှုတွေဖြစ်ခဲ့ပြီး ၁၀ မိနစ်ကြာမြင့်ခဲ့ကြောင်းသိရသည်။

အခင်းဖြစ်ပွားရာနေရာမှာ အမျိုးသားအလောင်း ၈ လောင်းနှင့်အတူ ကျောပိုးအိတ်အတွင်း ယာဘဆေးပြား ၆.၇ သန်းတွေ့ရှိခဲ့ခြင်းဖြစ်သည်။

ygm/hm
#Yangon_Media_Group

#LocalNews
Published - 2 May 2022

စက်သုံးဆီဖူလှုံမှုရှိစေရေးနှင့် ပြည်သူများ ဈေးနှုန်းတည်ငြိမ်စွာဖြင့် ဝယ်ယူသုံးစွဲနိုင်ရေး အပါအဝင် စျေးနှုန်းကြီးမြင့်မှုကို အထူးကြီးကြပ်ဆောင်ရွက်ထိန်းကျောင်းနိုင်ဖို့ ညှိနှိုင်းအစည်းအ ဝေးတစ်ရပ်ကို ဒီကနေ့မှာ နေပြည်တော်ကောင်စီရုံးတွင် ပြုလုပ်ခဲ့တယ်လို့ သိရပါတယ်။

ဒါ့အပြင် စက်သုံးဆီဖူလုံမှုရှိစေရေးနှင့် ဈေးနှုန်းတည်ငြိမ်မှုရှိစေရေးအတွက် ဆောင်ရွက်မည့် အစီအမံနှင့်ပတ်သက်လို့လည်း ဒီကနေ့ ဆွေးနွေးပွဲမှာ ထည့်သွင်းဆွေးနွေးခဲ့ကြပြီး နေပြည်တော်ကောင်စီနှင့် နေပြည်တော်ရေနံနှင့် ရေနံထွက်ပစ္စည်းဆိုင်ရာ လုပ်ငန်းဆပ်ကော်မတီသို့ ရှင်းလင်းတင်ပြခဲ့တယ်လို့ ဆိုပါတယ်။

အဆိုပါ ဆွေးနွေးပွဲသို့ နေပြည်တော်ကောင်စီ ဥက္ကဋ္ဌ ဒေါက်တာမောင်မောင်နိုင်၊ ရေနံထွက်ပစ္စည်းကြီးကြပ်စစ်ဆေးရေးဦးစီးဌာန စစ်ဆေးရေးအရာရှိချုပ် ဦးနိုင်ဝင်းထွန်းနှင့် တာဝန်ရှိသူများက တက်ရောက်ခဲ့ကြတာလည်း ဖြစ်ပါတယ်။

အစည်းအဝေးတွင် နေပြည်တော်ကောင်စီ ဥက္ကဋ္ဌ ဒေါက်တာမောင်မောင်နိုင်က ပြည်ပမှစက်သုံးဆီတင်သွင်းခြင်း၊ တင်သွင်းလာတဲ့ စက်သုံးဆီများကို သိုလှောင်ခြင်း၊ ဖြန့်ဖြူးရောင်းချခြင်းလုပ်ငန်းစဉ်များ၏ လုပ်ငန်းတာဝန်များကို အကောင်အထည်ဖော်ဆောင်ရွက်ရာတွင် ရေနံထွက်ပစ္စည်းကြီးကြပ်စစ်ဆေးရေးဦးစီးဌာနအနေဖြင့် တင်သွင်းလာသည့်စက်သုံးဆီများ အရည်အသွေးပြည့်မီမှု ရှိ/မရှိ ဓာတ်ခွဲစမ်းသပ်စစ်ဆေးခြင်း၊ ပြည်သူများ ဈေးနှုန်းတည်ငြိမ်စွာဖြင့် ဝယ်ယူသုံးစွဲနိုင်ရေးတို့ကို ကြီးကြပ်ဆောင်ရွက်သွားကြဖို့ကို လမ်းညွှန်မှာကြားခဲ့တာဖြစ်ပါတယ်။

ထို့အပြင် အရည်အသွေးနှင့် အရေအတွက်ပြည့်မီမှန်ကန်စွာ ဝယ်ယူရရှိနိုင်ရေးတို့အတွက်
စက်သုံးဆီတင်သွင်း သိုလှောင်ဖြန့်ဖြူးရောင်းချခြင်း လုပ်ငန်းများအပေါ် ဆောင်ရွက်သွားမည့် အစီအမံများနှင့်စပ်လျဉ်း၍ လိုက်နာဆောင်ရွက်ခြင်းရှိ/မရှိကို ပိုမိုထိရောက်စွာ ထိန်းကျောင်းနိုင်ရေး စီမံဆောင်ရွက်ရေးကိစ္စရပ်များကိုလည်း ပြုလုပ်ဖို့ လမ်းညွှန်ခဲ့တယ်လို့ သိရပါတယ်။

ဆက်လက်၍ ရေနံထွက်ပစ္စည်းကြီးကြပ်စစ်ဆေးရေးဦးစီးဌာန စစ်ဆေးရေးအရာရှိချုပ် ဦးနိုင်ဝင်းထွန်းက စက်သုံးဆီဖူလုံမှုရှိစေရေးနှင့် ဈေးနှုန်းတည်ငြိမ်မှုရှိစေရေးအတွက် လုပ်ငန်းဆောင်ရွက်ချက်များနှင့်ပတ်သက်၍ ရှင်းလင်းတင်ပြခဲ့တယ်လို့ သိပါတယ်။

ယင်းနောက် နေပြည်တော်ကောင်စီအဖွဲ့ဝင်များနှင့် ဌာနဆိုင်ရာများက စက်သုံးဆီဖူလုံမှုရှိစေရေးနှင့် ဈေးနှုန်းတည်ငြိမ်မှုရှိစေရေး၊ သိုလှောင်ခြင်း၊ ဖြန့်ဖြူးရောင်းချခြင်းလုပ်ငန်းစဉ်များနှင့် စပ်လျဉ်း၍ အသီးသီး ဆွေးနွေးတင်ပြကြရာ နေပြည်တော်ကောင်စီဥက္ကဋ္ဌက လိုအပ်သည်များကို ဖြည့်စွက်ဆွေးနွေးပေးခဲ့တယ်လို့ သတင်းရရှိပါတယ်။

ဓါတ်ပုံ - နေပြည်တော်ကောင်စီနယ်မြေ

ymg/kg
#Yangon_Media_Group

#LocalNews
Published_2 May 2022

ရှမ်းတိုင်းရင်းသားများဒီမိုကရေစီအဖွဲ့ချုပ်(SNLD) ပါတီ၏ ဥက္ကဋ္ဌဟောင်းဖြစ်သူ ဦးခွန်ထွန်းဦး၏ ရုပ်အလောင်းကို ယနေ့ မေလ ၂ ရက် ညနေ ၅ နာရီက ရေဝေးသုဿာန်တွင် ရှမ်းရိုးရာအတိုင်း မီးသဂြိုဟ်ခဲ့သည်။

၁၉၈၈ ခုနှစ် ၊ အောက်တိုဘာလတွင် ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီ (SNLD) ကို စတင်တည်ထောင်ခဲ့သည့် ဦးခွန်ထွန်းဦးသည် ပြီးခဲ့သည့် ဧပြီလ ၃၀ ရက်က မရမ်းကုန်းမြို့နယ် ၉ မိုင်နေအိမ်တွင် ကွယ်လွန်ခဲ့ခြင်းဖြစ်ကြောင်း၊ SNLD ဥက္ကဋ္ဌတာဝန်ကို နှစ်ပေါင်း ၃၀ ကျော် တာဝန်ထမ်းဆောင်ခဲ့သူဖြစ်ပြီး လက်ရှိကွယ်လွန်ချိန်တွင် အသက် (၇၉)နှစ်အရွယ်ရှိပြီဖြစ်ကြောင်း သိရသည်။

ဦးခွန်ထွန်းဦးသည် ၁၉၉၀ ပြည့်နှစ် ရွေးကောက်ပွဲတွင် ဇာတိမြို့ဖြစ်တဲ့ သီပေါမြို့နယ် မဲဆန္ဒနယ်အမှတ် (၁) တွင် ဝင်ရောက်ယှဉ်ပြိုင်ခဲ့ရာတွင် အောင်မြင်ခဲ့သူဖြစ်သည်။ လွန်ခဲ့သော ၂၀၀၅ ခုနှစ်က ရှမ်းပြည်နယ်အတိုင်ပင်ခံကောင်စီ ဖွဲ့စည်းသည်ဆိုသည့်အမှုကြောင့် ထောင်ဒဏ် ၉၃ နှစ်ချမှတ်ခဲ့ရကာ ပြီးခဲ့သည့် ဦးသိန်းစိန်အစိုးရလက်ထက် ၂၀၁၂ ခုနှစ် ဇန်နဝါရီလတွင် လွတ်ငြိမ်းချမ်းသာခွင့်ဖြင့် ပြန်လည်လွတ်မြောက်လာခဲ့သူလည်း ဖြစ်သည်။

ymg/mt
#Yangon_Media_Group

#LocalNews
Published-2 May 2022

လတ်တလောမှာ ရာသီဥတုက မိုးရွာလိုက်နေပူလိုက်ဖြစ်နေပြီး အပူချိန်မြင့်တက်မှုတွေ ရှိနေသေးတဲ့အတွက် အပူရှပ်ပြီး သတိလစ်တဲ့လူနာတွေ အပူကြောင့် တက်တဲ့လူနာတွေ၊ ဖျားနာတဲ့လူနာတွေ များနေတယ်လို့ သိရပါတယ်၊၊

#Yangon_Media_Group

#LocalNews
#Published - 2 May 2022

လက်ရှိနွေစပါးရိတ်သိမ်းရာသီမှာ စပါးစျေးမြင့်တက်နေပေမယ့် သယ်ယူပို့ဆောင်စရိတ်တွေ မြင့်တက်နေတာကြောင့် တောင်သူတွေ အမြတ်ငွေနည်းပါးနေတယ်လို့ တောင်သူတွေဆီက သိရပါတယ်။

#Yangon_Media_Group

#Local_News

Published_ 2 May 2022

မြန်မာနိုင်ငံ၏ ကုန်ထုတ်လုပ်ရေးကဏ္ဍ ၂၀၂၀ ပြည့်နှစ် သြဂုတ်လနောက်ပိုင်း ပထမဦးဆုံးအကြိမ် တိုးတက်လာကြောင်း မေ ၂ ရက်မှာ ထုတ်ပြန်တဲ့ S&P Global ရဲ့ ဧပြီလမှာ ကောက်ယူခဲ့တဲ့ မြန်မာနိုင်ငံဆိုင်ရာထုတ်လုပ်မှု အညွှန်းကိန်းမှာ ဖော်ပြထားပါတယ်။

ထိုသို့ တိုးတက်လာခြင်းရဲ့ အဓိကတွေ့ရှိချက်များမှာ အော်ဒါသစ်များ ထပ်မံတိုးလာ၍ ထုတ်လုပ်မှု မြင့်တက်လာခြင်း၊ အလုပ်နေရာဖန်တီးမှုမှာလည်း ဧပြီလတွင် စစ်တမ်းရဲ့ အမြင့်ဆုံးအညွှန်းကိန်းသို့ ရောက်ရှိလာခဲ့ပါတယ်။ ဈေးနှုန်းများမြင့်တက်မှုနဲ့ ကုန်ကြမ်းရှားပါးမှုတွေကတော့ ဆက်လက်ဖြစ်ပေါ်နေတယ်လို့ ဆိုပါတယ်။

ဧပြီလအတွင်း ထုတ်လုပ်မှုရော မှာယူမှုအသစ်များပါ ပြန်လည်တိုးတက်လာချိန်မှာ မြန်မာနိုင်ငံ၏ ထုတ်လုပ်မှုကဏ္ဍသည် ဒုတိယသုံးလပတ်အစတွင် လုပ်ငန်းလည်ပတ်မှု အခြေအနေများမှာ ကိုဗစ်ကပ်ရောဂါကာလနောက်ပိုင်း ပထမဦးဆုံးအကြိမ် တိုးတက်မှုရှိလာတယ်လို့ ထုတ်ပြန်ချက်မှာဖော်ပြထားပါတယ်။

ဧပြီလ စစ်တမ်းအရ အလုပ်သမားဦးရေ အမြောက်အမြားတိုးလာကြောင်း ဖော်ပြထားပြီး အလုပ်နေရာဖန်တီးမှုနှုန်းမှာ စစ်တမ်းကောက်ယူခဲ့တဲ့ကာလအတွင်း အမြင့်ဆုံးနှုန်းဖြင့် တိုးတက်လာခဲ့ပါတယ်။

S&P Global က မြန်မာနိုင်ငံရဲ့ ကုန်ထုတ်လုပ်မှုလုပ်ကိုင်နိုင်စွမ်းမှာ မတ်လတွင် ၄၇.၁ ရှိခဲ့ရာမှ ဧပြီလတွင် ၅၀.၄ သို့ မြင့်တက်လာခဲ့ကြောင်း ဖော်ပြထားပါတယ်။ ကုန်စည်ထုတ်လုပ်ရေးကဏ္ဍရဲ့ အခြေအနေမှာ ၂၀၂၀ ပြည့်နှစ် သြဂုတ်လ နောက်ပိုင်းတွင် ပထမဦးဆုံးအကြိမ် တိုးတက်လာကြောင်းကို ညွှန်ပြနေပါတယ်။

အဆိုပါစစ်တမ်းတွင် ပါဝင်ဖြေကြားသူတို့၏အဆိုအရ ဝယ်ယူသူများဘက်မှ ဝယ်လိုအားတိုးလာမှုက ကုန်ထုတ်လုပ်ရေးကဏ္ဍ ပြန်လည်နာလန်ထူလာရေးကို တွန်းအားဖြစ်စေခဲ့ကြောင်း ဖော်ပြထားပါတယ်။

မေ ၂ ရက်တွင် ထွက်ရှိလာတဲ့ စစ်တမ်းရလဒ်များကို သုံးသပ်ဖေါ်ပြရာတွင် S&P Global မှ စီးပွားရေးပညာရှင် Maryam Baluch က "ကုန်ထုတ်လုပ်မှုကဏ္ဍဟာ ဧပြီလမတိုင်မီအထိ အချိန်အတော်ကြာ ကျဆင်းခဲ့ရာမှ ၂၀၂၀ ပြည့်နှစ် သြဂုတ်လနောက်ပိုင်းတွင် ပထမဦးဆုံးအကြိမ် တိုးတက်ထုတ်လုပ်မှုကို မှတ်တမ်းတင်နိုင်ခဲ့တယ်" လို့ဆိုပါတယ်။

ပို့ဆောင်ခများနှင့် လောင်စာဈေးနှုန်းများ မြင့်တက်နေမှုအပြင် ကုန်ကြမ်းရှားပါးမှုကြောင့် ဒုတိယသုံးလပတ်၏ အစပိုင်းတွင် သွင်းကုန်ဈေးနှုန်းများ ထိုးတက်သွားခဲ့ပြီး ကုမ္ပဏီများက မြင့်တက်လာတဲ့ ကုန်ကျစရိတ်များကိုကာမိစေဖို့ ၎င်းတို့ရဲ့စက်ရုံရောင်းဈေးများကို တဟုန်ထိုး မြှင့်တင်ခဲ့ကြတယ်လို့ ဆိုပါတယ်။

မြန်မာနိုင်ငံရဲ့ ကုန်ထုတ်လုပ်မှုကဏ္ဍတွင် ကုန်ကြမ်းရှားပါးမှုများနှင့် လျှပ်စစ်ဓာတ်အား မမှန်မှုကဲ့သို့သော အကြောင်းအရာများက စိန်ခေါ်မှုများနဲ့ အဟန့်အတားများ ဖြစ်တယ်လို့ ဆိုပါတယ်။

ymg-mnn
#Yangon_Media_Group

#LocalNews
Published_2 May 2022

ဂျပန်နိုင်ငံတိုကျိုတွင် မြောက်ဦးယူနက်စကိုဝင်နိုင်ရေးအတွက် လိုအပ်သည့် ရန်ပုံငွေကြေးဖြည့်စွမ်း ကူညီနိုင်ရန် Arakan Fc က ကြီးမှူး၍ ဘောလုံးပြိုင်ပွဲနှင့် ရိုးရာကျင်ပွဲတစ်ခုကို မေလ ၁ ရက်က ကျင်းပပြုလုပ်ခဲ့ကြောင်း သိရသည်။

"ရည်ရွယ်ချက်ကတော့ မြောက်ဦးယူနက်စကိုဝင်ဖို့ ရန်ပုံငွေရရှိချင်တာ အဓိကဖြစ်ပါတယ်။ ပြီးတော့ ဂျပန်နိုင်ငံမှာရှိတဲ့ ရခိုင်လူမျိုးတွေကိုလည်း စည်းစည်းရုံးရုံး ဖြစ်အောင်ဆိုတဲ့ သဘောဖြစ်ပါတယ်၊ အဲဒီနေ့က အလှူငွေတွေ ထည့်ကြတယ်၊ အသင်းဝင်ကြေး ကောက်တာတွေလုပ်တယ်။နောက်ပြီးတော့ အားကစားအင်္ကျီရောင်းတာနဲ့ ထမင်းဗူးအစားအသောက်တွေရောင်းတာတွေလည်း လုပ်ခဲ့ပါတယ်"ဟု Arakan Fc အသင်း ဖြစ်မြောက်ရေး တာဝန်ခံကိုညီညီအောင်က ပြောသည်။

အဆိုပါပြိုင်ပွဲတွင် ဘောလုံးအသင်း ၁၃ သင်းပါဝင်ယှဉ်ပြိုင်ကစားခဲ့ကြပြီး ပထမဆုရရှိသည့်အသင်းကို ဆုကြေးငွေ ကျပ် ၁၀ သိန်း၊ ဒုတိယဆုကို ၆ သိန်းကျပ် ချီးမြှင့်ခဲ့ကာ ရိုးရာကျင်ပွဲတွင်လည်း ပထမဆုရရှိသည့်သူကို ငွေကျပ် ၂သိန်း၊ ဒုတိယဆုကို ကျပ် ၁ သိန်းစီဖြင့် ချီးမြှင့်ခဲ့ကြောင်း သိရသည်။

ymg/mt
#Yangon_Media_Group

#Local News
Published-2 May 2022

အရင်တစ်ပတ်က စားအုန်းဆီတစ်ပိဿာကိုကျပ် (၅၆၀၀)နဲ့ မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းက မြို့နယ်အသီးသီးမှာ ရောင်းချပေးခဲ့ပြီး အခုအပတ်မှာတော့ ဈေးနှုန်းအပြောင်းအလဲရှိကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင်ဖြန့်ဖြူးကြီးကြပ်ရေးကော်မတီက ထုတ်ပြန်ခဲ့ပါတယ်၊၊

အခုအပတ်မှာတော့ ကမ္ဘာ့စားအုန်းဆီထုတ်လုပ်တင်ပိုတဲ့ နိုင်ငံတွေမှာ စားအုန်းဆီဈေးမြင့်တက်လာပြီး တစ်ပတ်အတွင်းဖြစ်ပေါ်ခဲ့တဲ့ FOB ဈေးနှုန်းတွေကို အခြေခံ၍ တွက်ချက်မှုတွေအရ ၂၀၂၂ခုနှစ် မေလ (၂)ရက်မှ(၈)ရက်အထိ စားအုန်းဆီတစ်ပိဿာကို
ရန်ကုန်အထိုင် အခြေခံလက်ကားရည်ညွှန်းဈေးနှုန်း (၆၀၂၅)ကျပ်နဲ့ ရောင်းချသွားမှာဖြစ်တယ်လို့စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင်ဖြန့်ဖြူးကြီးကြပ်ရေးကော်မတီက ထုတ်ပြန်ထားပါတယ်၊၊

စားအုန်းဆီနဲ့ပတ်သက်လို့ ဈေးနှုန်းမြင့်တင်ရောင်းချခြင်း၊ ဈေးကစားခြင်းနဲ့ ဈေးကစားရန်သိုလှောင်ထားခြင်းများ ပြုလုပ်ပါက အရေးကြီးကုန်စည်နှင့် ဝန်ဆောင်မှု ဥပဒေအရအရေးယူသွားမှာဖြစ်တယ်လို့ လည်းထုတ်ပြန်ချက်မှာ ဖော်ပြပါရှိပါတယ်၊၊

ymg/tthl
#Yangon_Media_Group

#LocalNews
Published_2 May 2022

ဒေါ်ခင်ကြည်ဖောင်ဒေးရှင်းအတွက် စီးပွားရေးလုပ်ငန်းရှင် ဦးမောင်ဝိတ်လှူဒါန်းမှုကိစ္စ ဒေါ်အောင်ဆန်းစုကြည်အဂတိအမှုကို ယနေ့ မေလ ၂ ရက်တွင် နေပြည်တော် ဇမ္ဗူသီရိတရားရုံး၌ စတင်စစ်ဆေးကြောင်း ရှေ့နေအသိုင်းအဝိုင်းက သိရသည်။

ယနေ့တွင် ဒေါ်အောင်ဆန်းစုကြည်အပေါ်စွဲဆိုထားသော အဂတိအမှုများအနက် အမှတ် CRT ၃/၂၀၂၂ နှင့် ၄/၂၀၂၂ တို့ကို စစ်ဆေးခြင်းဖြစ်ကြောင်း၊ ဦးမောင်ဝိတ်လှူဒါန်းသည်ဆိုသည့် အဂတိအမှုအတွက် တရားလိုဖြစ်သူ အဂတိလိုက်စားမှုတိုက်ဖျက်ရေးကော်မရှင်၏ တာဝန်ရှိသူ တရားလို ဦးရဲထက်အား အထူးတရားရုံးတွင် စစ်ဆေးခဲ့ခြင်းဖြစ်ကြောင်း သိရသည်။

"ဦးမောင်ဝိတ်က ဒေါ်ခင်ကြည်ဖောင်ဒေးရှင်းကို လှူတယ်ဆိုတဲ့ကိစ္စနဲ့ ပတ်သက်ပြီးတော့ စစ်ဆေးတာ ဖြစ်ပါတယ်။ တရားလိုဦးရဲထက်ကိုပဲ စစ်သေးတာပေါ့”ဟု ရှေ့နေအသိုင်းအဝိုင်းနှင့် နီးစပ်သူတစ်ဦးက ပြောသည်။

နိုင်ငံတော်အတိုင်ပင်ခံပုဂ္ဂိုလ်ဟောင်း ဒေါ်ဆောင်ဆန်းစုကြည်ကို စေပိုင်ကုမ္ပဏီပိုင်ရှင် ဦးမောင်ဝိတ်က ဒေါ်လာငွေ ၅ သိန်း လာဘ်ထိုးခဲ့တယ်ဆိုကာ အဂတိအမှုဖြင့် စွဲဆိုထားခြင်း ဖြစ်သည်။

ymg/mt
Yangon_Media_Group

#LocalNews
Published - 2 May 2022

မန္တလေး- ကျောက်ဆည်ကားလမ်းမကြီးတွင် ဆိုင်ကယ်ကို တိမ်းရှောင်ရာမှ ၁၂ ဘီးယာဥ်နှင့် တွဲကားယာဥ်တို့ တိုက်မိမှုဖြစ်ပွားခဲ့တယ်လို့ သိရတယ်။

အဆိုပါ ယာဥ်မတော်တဆမှုဖြစ်စဥ်ဟာ မေ ၁ ရက် နေ့က မန္တလေးတိုင်းဒေသကြီး၊ စဥ့်ကိုင်မြို့ နယ်၊ မန္တလေး-ကျောက်ဆည်ကားလမ်း၊ မိုင်တိုင်အမှတ်(၃၇၆/၄) နှင့် (၃၇၆/၅)ကြားတွင် ဖြစ်ပွားခဲ့ခြင်းဖြစ်ပါတယ်။

ဖြစ်စဥ်မှာ ကုန်မျိုးစုံတင်ဆောင်လာသည့် NISSAN အမျိုးအစား (၁၂)ဘီးယာဉ်သည် ၄င်းရှေ့ရှိ မော်တော်ဆိုင်ကယ်အား တိမ်းရှောင်ရာမှ ၎င်းယာဉ်၏ အနောက်ဘယ်ဘက်ခြမ်းအား ကျောက်မှုန့်တင်ဆောင်လာသော ISUZU အမျိုးအစား (၂၄)ဘီးတွဲယာဉ်မှ ဝင်ရောက်တိုက်မိခဲ့တယ်လို့ ဆိုပါတယ်။

ယင်းယာဥ်တိုက်မှုဖြစ်စဥ်ကြောင့် (၂၄)ဘီးတွဲယာဉ်မှ ယာဉ်မောင်း အမျိုးသား(၁)ဦး ကားခေါင်းခန်းတွင် ညပ်မိနေသဖြင့် မြန်မာနိုင်ငံလူမှုကယ်ဆယ်ရေးအသင်း (ဘယ်လင်း)မှ ကယ်ဆယ်ပေးခဲ့ပြီး စဉ့်ကိုင်မြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များက ယာဉ်ပေါ်တွင်ပါရှိသော ကုန်ပစ္စည်းများအား အခြားယာဉ်သို့ ပြောင်းရွှေ့ကူညီဆောင်ရွက်ပေးခဲ့ရတယ်လို့ သိရပါတယ်။

ဒါ့အပြင် ယာဥ်တိုက်မှုကြောင့် ထိခိုက်ဒဏ်ရာရသူယာဉ်မောင်း အမျိုးသား(၁)ဦးကိုလည်း သုခဒါနလူမှုကူညီရေးအသင်းကားဖြင့် စဉ့်ကိုင်မြို့နယ် ပြည်သူ့ဆေးရုံကြီးသို့ ပို့ဆောင်ပေးခဲ့တယ်လို့ မီးသတ်တပ်ဖွဲ့က သတင်းထုတ်ပြန်ထားပါတယ်။

Photo - MFSD

ymg/kg
#Yangon_Media_Group