#Local News
Published-26 April 2022

ရုရှားနိုင်ငံမှာ မြန်မာ့သိုင်းပညာရပ်ထွန်းကားပြန့်ပွားစေရေးအတွက် ရုရှားလူမျိုး၊ မြန်မာ့သိုင်းဝါသနာရှင်တွေနဲ့ အချိန်ယူတွေ့ဆုံကာ မြန်မာ့သိုင်းပညာရပ်များကို ဆွေးနွေးဖလှယ်ခြင်း၊လေ့ကျင့်ခြင်းများ စဉ်ဆက်မပြတ်ဆောင်ရွက်လျက်ရှိတယ်လို့ မော်စကိုမြို့ရှိ မြန်မာသံရုံးရဲ့ထုတ်ပြန်ချက်အရ သိရပါတယ်၊၊

မြန်မာ့သိုင်းနည်းပြ ဗိုလ်ကြီးမျိုးမင်းသန့်က ၂၀၁၆ ခုနှစ်မှ ၂၀၂၀ ခုနှစ်အထိ (၄)နှစ်တာ ကာလအတွင်း အဲဒီ့လိုစဉ်ဆက်မပြတ် ကြိုးစားလုပ်ဆောင်ခဲ့တာဖြစ်ပြီး ရုရှားဖက်ဒရေးရှင်းနိုင်ငံမှာ DME လေဆိပ် လုံခြုံရေးဝန်ထမ်းတွေနဲ့ ဖွဲ့စည်းထားတဲ့ DME Group အနေနဲ့ ၂၀၁၆ ခုနှစ်မှ ၂၀၂၁ ခုနှစ်အထိ မြန်မာ့သိုင်း ပညာသင်ယူလိုသူ လူပေါင်း (၅၄၀၈)ဦး တို့ကို သင်ကြားပေးခဲ့ပြီး လက်ရှိမှာ မြန်မာ့သိုင်းပညာသင်ကြားနေသူ သင်တန်းသား (၁၀၀၀)ခန့်ရှိတယ်လို့ မော်စကိုမြို့ရှိမြန်မာသံရုံးကထုတ်ပြန်ထားပါတယ်၊၊

ဧပြီလ(၂၅)ရက်မှာ ရုရှားဖက်ဒရေးရှင်းနိုင်ငံဆိုင်ရာ မြန်မာသံအမတ်ကြီး ဦးလွင်ဦးဟာ ရုရှားနိုင်ငံမှာဖွဲ့စည်းထားတဲ့ မြန်မာ့သိုင်း(ရှမ်းကြီး)ကိုယ်ခံပညာရပ်အဖွဲ့က တာဝန်ရှိပုဂ္ဂိုလ်တွေနဲ့ ရုရှားနိုင်ငံ၊မော်စကိုမြို့မှာ တွေ့ဆုံဆွေးနွေးခဲ့ပါတယ်၊၊

အဲဒီလိုတွေ့ဆုံဆွေးနွေးရာမှာ ရုရှားဖက်ဒရေးရှင်းနိုင်ငံမှာ မြန်မာ့ရိုးရာသိုင်းပညာရပ်ဆက်လက်အဓွန့်ရှည်ပြန့်ပွားစေရေးအတွက် ဆောင်ရွက်နေတဲ့ကိစ္စရပ်တွေနဲ့ ရုရှားနိုင်ငံမှာ မြန်မာ့သိုင်းလှုပ်ရှားမှုတွေအပေါ်အခြေခံပြီး မြန်မာ-ရုရှား နှစ်နိုင်ငံချစ်ကြည်ရေး တိုးမြှင့်စေရန် ဆောင်ရွက်နိုင်မယ့်အစီအစဉ်တွေကို ဆွေးနွေးညှိနှိုင်းခဲ့ပါတယ်၊၊

အဲဒီ့တွေ့ဆုံဆွေးနွေးပွဲမှာ ရုရှားဖက်ဒရေးရှင်းနိုင်ငံဆိုင်ရာ မြန်မာသံအမတ်ကြီးဦးလွင်ဦးနဲ့အတူ ရုရှားနိုင်ငံမှာ ဖွဲ့စည်းထားတဲ့ မြန်မာ့သိုင်း(ရှမ်းကြီး)ကိုယ်ခံပညာရပ်အဖွဲ့မှ တာဝန်ရှိပုဂ္ဂိုလ်တွေ ဖြစ်တဲ့ Domodedovo (DME) အပြည်ပြည်ဆိုင်ရာလေဆိပ်ဘုတ်အဖွဲ့ဥက္ကဋ္ဌ Mr. Dmitry Kamenshchik Vladimirovich ၊ DME လေဆိပ်အုပ်ချုပ်မှုဒါရိုက်တာအဖွဲ့ဝင် Mr. Kogan Valery Mikhaylovich ၊ လက်ရှိ DME လေဆိပ်လုံခြုံရေးတာဝန်ခံ မြန်မာ့သိုင်း (ရှမ်းကြီး) နည်းပြ Mr. Victor Smirnov Valentinovich နဲ့ မြန်မာ့သိုင်းနည်းပြ ဗိုလ်ကြီး မျိုးမင်းသန့်တို့ ပါဝင်ဆွေးနွေးခဲ့တာဖြစ်တယ်လို့ သိရပါတယ်၊၊

ymg/tthl
#Yangon_Media_Group

#LocalNews
Published_26 April 2022

ရှေးဟောင်းဘုရားစေတီတွေ ၊ သန်းနဲ့ချီတဲ့ လင်းနို့တွေအပါအဝင် ဇီဝမျိုးကွဲတွေ နှစ်ရှည်ခိုအောင်းနေတဲ့ မွန်ပြည်နယ်ထဲက အကြီးဆုံးထုံးကျောက်ဂူကို သွားရောက်လေ့လာခွင့် ပိတ်မထားဘူးလို့ သက်ဆိုင်ရာက သိရပါတယ်။

#Yangon_Media_Group

#LocalNews
Published-26 April 2022

အပူဒဏ်ကြောင့် ရုတ်တရတ်သတိလစ်ခြင်း(Heat Stroke)ဖြစ်ပွားခြင်းနဲ့ အပူဒဏ်ကြောင့် ပင်ပန်းနွမ်းနယ်ခြင်း(Heat Exhaustion)တွေအပါအဝင် သတိပြုရမည့် အပူဒဏ်အန္တရာယ်တွေကိုကျန်းမာရေးဝန်ကြီးဌာနက ဒီကနေ့ဧပြီလ(၂၆)ရက်မှာ သတိပေးချက် ထုတ်ပြန်လိုက်ပါတယ်၊၊

အပူဒဏ်ကြောင့် ရုတ်တရတ်သတိလစ်ခြင်း(Heat Stroke)ဖြစ်ပွားပြီး အသက်ဆုံးရှုံးခဲ့သူတွေ ရှိခဲ့ဖူးအတွက် အထူးသတိပြုဖို့ ကျန်းမာရေးဝန်ကြီးဌာနက ထုတ်ပြန်ပေးတာဖြစ်ပါတယ်၊၊

အဲဒီ့ သတိပေးချက်တွေထဲမှာ အပူဒဏ်အန္တရာယ်ကြောင့် မိတ်နဲ့ယားနာထွက်ခြင်း၊ပင်ပန်းနွမ်းနယ်ခြင်း၊မူးဝေခြင်း၊ခေါင်းကိုက်ခြင်း၊ကြွက်တက်ခြင်း၊ချွေးခြောက်ခြင်း၊ကိုယ်အပူချိန်မြင့်တက်ခြင်း၊ သတိလစ်ခြင်းအပြင် ပြင်းထန်ပါက အသက်အန္တရာယ်ထိခိုက်နိုင်တဲ့အတွက် ကျန်းမာရေးဝန်ကြီးဌာနကထုတ်ပြန်ပေးထားတဲ့ ဆောင်ရန်၊ရှောင်ရန်အချက်တွေကို လိုက်နာရမှာဖြစ်တယ်လို့ ဆိုပါတယ်၊၊

အဓိက ရှောင်ကြဥ်ရမယ့်အချက်တွေကတော့ နံနက်(၁၀)နာရီမှ(၄)နာရီအတွင်းနေရောင်ခြည် တိုက်ရိုက်ထိတွေ့ခြင်း၊ပူပြင်းတဲ့ နေရောင်အောက်မှာ အလုပ်လုပ်ခြင်း၊ပြင်းထန်စွာ ကိုယ်လက်လှုပ်ရှားမှုပြုခြင်း၊နေပူထဲပြန်လာလာချင်းချက်ချင်းရေချိုးခြင်း၊ ပူပြင်းတဲ့နေရာမှအဲကွန်းရှိပြီးအေးတဲ့နေရာတွေ ချက်ချင်းဝင်ရောက်တာကို ရှောင်ကြဥ်ရမှာဖြစ်ပါတယ်၊၊

အပူဒဏ်ပြင်းထန်နေချိန်မှာ ရှောင်ကြဥ်ရမယ့်အချက်တွေ၊လိုက်နာရမယ့်အချက်တွေ၊အရေးပေါ်ရှေးဦးပြုစုနည်းတွေကိုလည်း ထုတ်ပြန်ချက်မှာအသေးစိတ်ရေးသားဖော်ပြထားတယ်လို့ သိရပါတယ်၊၊

ymg/tthl
#Yangon_Media_Group

#LocalNews
Published - 26 April 2022

ပဲခူးမြို့နယ်၊ ရုံးကြီးရပ်ကွက်၊ ဗိုလ်တဲလမ်းရှိ အခြေခံပညာမူလတန်းလွန်ကျောင်းတွင် ဒီကနေ့
ဧပြီ ၂၆ ရက်၊ နံနက် ၉ နာရီ ၅၅ မိနစ် အချိန်က မီးလောင်မှုဖြစ်စဥ်တစ်ခု ဖြစ်ပွားခဲ့တယ်လို့ သိရပါတယ်။

အဆိုပါ မီးလောင်မှုကို ပဲခူးမြို့မီးသတ်တပ်ဖွဲ့နှင့် ရပ်ကွက်နေပြည်သူများ ဒေသခံလူမှုကူညီရေးအဖွဲ့တို့က ဝိုင်းဝန်းငြိမ်းသတ်ခဲ့ရပြီး နံနက် ၁၀ နာရီ ၅၅ မိနစ် အချိန်တွင် မီးကို ငြိမ်းသတ်နိုင်ခဲ့တယ်လို့ ဆိုပါတယ်။

ယင်း မီးလောင်မှုဖြစ်စဥ်ကြောင့် ကျောင်းဝန်းအတွင်းရှိ စာသင်ခန်း(၁)ခန်းမီးလောင် ဆုံးရှုံးမှုဖြစ် ပေါ်ခဲ့ရပါတယ်။

လက်ရှိတွင် မီးလောင်မှုအကြောင်းအရင်းအသေးစိတ်ကို မီးသတ်တပ်ဖွဲ့က ဆက်လက်စုံစမ်းစစ် ဆေးလျက်ရှိပြီး ထိခိုက်ဒဏ်ရာရသူတော့ မရှိခဲ့ဘူးလို့ သိရပါတယ်။

ဒါ့အပြင် အဆိုပါ မူလတန်းလွန်ကျောင်း မီးလောင်မှုဟာ ရှို့မီးကြောင့်ဖြစ်နိုင်တယ်လို့လည်း ဒေသခံတွေက ယူဆနေကြပါတယ်။

ဓါတ်ပုံ - ပဲခူး မီးသတ်တပ်ဖွဲ့

ymg/kg
#Yangon_Media_Group

#LocalNews
Published_26 April 2022

အင်ဒိုနီးရှားစားအုန်းဆီတင်ပို့မှု ရပ်ဆိုင်းမည့်ကိစ္စနှင့်ပတ်သက်၍ မြန်မာနိုင်ငံအတွက် စိတ်ပူရန်မလိုကြောင်းနှင့် အလုအယက်ဝယ်သိမ်းပါက ဈေးပိုကြီးနိုင်သောကြောင့် သတိထားရန်လိုကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက သိရသည်။

"စားသုံးဆီကဏ္ဍက အရေးကြီးတဲ့ကဏ္ဍထဲမှာပါတယ်။ပြီးခဲ့တဲ့ ၂၀၂၁ ခုနှစ် အောက်တိုဘာလကစပြီး ပြည်သူတွေစနစ်တကျနဲ့ စားသုံးဆီသုံးစွဲဖို့ ပညာပေးတဲ့အပိုင်းလည်းလုပ်တယ်။ ပြည်ပကတင်သွင်းမှုကိုလည်း ပုံမှန်ထက်ကို ၃ ပုံ ၂ ပုံ လျှော့ပြီး တစ်လကို တန်ချိန် ၅ သောင်းပဲပေးသွင်းတယ် ။

ဒါကြောင့်လည်း ပြည်တွင်းမှာထုတ်လုပ်မှုက တက်လာပြီး သူ့ဘာသူ ဟန်ချက်တော့ညီနေတယ်။ဒါပေမယ့် ဒီအချိန်မှာတော့ ပြည်တွင်းလိုအပ်ချက်အရ တစ်လကို ၅ သောင်းလောက်တော့ ပြည်ပကသွင်းဖို့ လိုနေသေးတယ်။ အင်ဒိုနီးရှားက သူ့နိုင်ငံက ဆီဈေးနှုန်းကြီးမြင့်တာကို ကုစားချင်တဲ့အတွက် သူကလည်း export ကို တားလိုက်တာ၊ယာယီပေါ့။အဲလိုတားတဲ့အပေါ်မှာ ချင့်ချိန်တွက်ချက်ပြီးပါပြီ။ စားသုံးဆီ တင်သွင်းသိုလှောင်ဖြန့်ဖြူး ကြီးကြပ်ရေးလုပ်ငန်းကော်မတီအနေနဲ့ စိစစ်တဲ့အခါမှာ စားအုန်းဆီကို ထုတ်လုပ်တာက အင်ဒိုနီးရှား တစ်နိုင်ငံပဲရှိပဲမဟုတ်ဘူး၊ မလေးရှားနိုင်ငံက အင်ဒိုနီးရှားနိုင်ငံထက်တောင် ပိုပြီးတော့ စားအုန်းဆီထုတ်ပါတယ်။

အဲအတွက် အင်ဒိုနီးရှားဘက်က မရရင် မလေးရှားဘက်က ဝယ်သွင်းဖို့၊ ဒီစားအုန်းဆီထက်ပိုကောင်းတဲ့ ပဲပုတ်ဆီတင်သွင်းဖို့ကို စဉ်းစားတယ်။ပူစရာအကြောင်းမရှိပါဘူး။ ပြည်တွင်းမှာ စားအုန်းဆီ တန်ချိန် ၃ သောင်းကျော်တဲ့ သိုလှောင်မှုရှိတယ်။လက်ရှိလည်း တန်ချိန် ၃ သောင်းကျော်ရှိတယ် ။ပြည်တွင်းထုတ်လုပ်မှုမှာလည်း တန်ချိန် ၂ သောင်းကျော်ရှိမယ်။ အဲ့ဒီတော့ တစ်လလောက်က အေးအေးဆေးဆေးသုံးလို့ရတယ်။ဒီတစ်လအတွင်းမှာတင် ကျနော်တို့ ဈေးကွက်က အင်ဒိုနီးရှားကမရရင် မလေးရှားက ပြန်သွင်းလို့ရတာပဲ ။ အလားတူ ထိုင်းကလည်း သွင်းလို့ရတာတွေရှိတယ်။

နောက် ပဲပုတ်ဆီနဲ့ ပတ်သက်ပြီးတော့ အမေရိကန်တို့ ရုရှားတို့က သွင်းလို့ရပါသေးတယ်။ ဒါကပူစရာအကြောင်းမရှိပါဘူး။ အလုအယက်တွေ ဝယ်သိမ်းရင် ဈေးကပိုတက်တတ်လို့ ကိုယ့်အမျိုးတွေက သိတယ်မလား အကုန်ဝယ်တာလေ ၊ စိုးရိမ်ပြီး စွတ်မဝယ်ပါနဲ့လို့ ပြောချင်ပါတယ်"ဟု စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ အရာထမ်းတစ်ဦးက YMG ကို ရှင်းပြပြောဆိုသည်။

စားအုန်းဆီအဓိက ထုတ်လုပ်တင်ပို့ရောင်းချသည့် အင်ဒိုနီးရှားနိုင်ငံအနေဖြင့် စားအုန်းဆီပြတ်လပ်မှုကိုလျှော့ချရန်၊ဈေးနှုန်းထိန်းညှိရန် ရည်ရွယ်၍ စားအုန်းဆီနှင့် ၎င်း၏ ကုန်ကြမ်းများကို ပြည်ပနိုင်ငံများသို့ လာမည့် ဧပြီလ ၂၈ ရက်မှ စတင်၍ တင်ပို့ရောင်းချမှုယာယီ ရပ်ဆိုင်းမည် ဖြစ်ကြောင်း သမ္မတ ဂျိုကိုဝီဒိုဒိုက ကြေညာထားကြောင်း သိရသည်။

ယင်းကြေညာချက်အရ မြန်မာနိုင်ငံပြည်တွင်းစားသုံးဆီဈေးနှုန်း မြင့်တက်လာနိုင်ကြောင်းလည်းပြောဆိုနေကြသည့်အပြင် လက်ရှိတွင် အချို့က စားသုံးဆီဈေးကို တိုးမြှင့်ရောင်းချနေကြကြောင်းလည်း သိရသည်။

"ဆီပြတ်တော့မယ်ဆိုပြီး ကိုယ့်အမျိုးတွေက ဈေးဆွဲတင်ဖို့က စနေပြီ။ မနေ့က(ဧပြီလ ၂၅ ရက်နေ့)အမှတ်တံဆိပ်တစ်ခုကို ၇,၀၀၀ ကနေ ၈,၀၀၀ အထိ ဖြစ်တယ် ။ ဖမ်းမယ်ဆိုလိုသာ ပြန်လျှော့သွားတာ"ဟု ယင်းအရာထမ်းက ပြောပြသည်။

ပြည်တွင်းဈေးကွက်အတွင်း ဈေးနှုန်းမြင့်တင်ရောင်းချခြင်း၊ ဈေးကစားရန် ရည်ရွယ်၍ သိုလှောင်ခြင်းများပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေဖြင့် အရေးယူမည်ဟု စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် ထုတ်ပြန်ထားသည်။

ymg/mt
#Yangon_Media_Group

#LocalNews
Published - 26 April 2022

ကိုဗစ်ကာကွယ်ဆေး အကြိမ်ပြည့်ထိုးနှံပြီးသူ အသက် (၄၀)အထက်ကို Booster များ ထပ်မံထိုးနှံပေးသွားမှာဖြစ်တယ်လို့ ကျန်းမာရေးဝန်ကြီးဌာနမှ သိရပါတယ်။

လက်ရှိမှာလည်း အကြိမ်ပြည့်ကာကွယ်ဆေးထိုးနှံဖို့ အကြုံးဝင်နေပြီဖြစ်တဲ့ အသက် ၁၅ နှစ်အထက်ရှိသူများကို ယခု ဧပြီလမှစလို့ ကိုဗစ်ကာကွယ်ဆေးတွေကို ထိုးနှံပေးနေတာဖြစ်ပါတယ်။

"ယခင်ကဆို အသက် ၁၈ နှစ်အထက်ပဲ ထိုးပေးနေရာက ယခု အသက် ၁၅ အထက်ထိုးပေးမှာပါ။
Booster ဆိုလဲယခင်က အသက် ၆၀ အထက်ကိုသာ ထိုးပေးနေရာကနေ အခုဆိုအသက် ၄၀ အထက် ဒုတိယအကြိမ်ကာကွယ်ဆေးထိုးပြီး ၆ လပြည့်ပြီးသူကို ထိုးပေးမှာမို့ မိမိတိုရပ်ကွက်ရုံးမှာ ဆက်သွယ်ပြီး စာရင်းပေးထိုးနှံနိုင်ကြောင်း အသိပေးအပ်ပါတယ်။

အသက် ၁၂ နှစ်အထက်ကျောင်းနေတဲ့ကလေးတွေလဲ ဆက်ထိုးပေးသွားမှာပါ။"လို ကျန်းမာ ရေးပညာရှင် ဒေါက်တာ ခင်ခင်ကြီး က အသိ ပေးပြောကြားထား
ပါတယ်။

ဒါ့အပြင် ဒုတိယအကြိမ် (၉)လနှင့်(၁၀)လပိုင်းတွင် ဆေးထိုးထားပြီးသူများသည် တတိယအကြိမ် အပိုထပ်ဆောင်းထိုးပေးခြင်း Booster Dose အစီအစဥ်တွင် မဖြစ်မနေ လာရောက်ထိုးနှံနိုင်ကြောင်းနှင့် ကိုယ်ဝန်ဆောင်များနို့တိုက်မိခင်များလည်း ထိုးနှံနိုင်ပြီဖြစ်တယ်လို့ ကျန်းမာရေးဝန်ကြီးဌာနက အသိပေးနှိုးဆော်ထားပါတယ်။

ကိုဗစ်ကာကွယ်ဆေး မထိုးနှံရသေးတဲ့သူတွေဟာ ကာကွယ်ဆေးထိုးနှံထားပြီးသူတွေထက် (၇)ဆ နီးပါးလောက် သေဆုံးနှုန်းမြင့်မားတာ တွေ့ရသည့်အတွက် ကိုဗစ်ကာကွယ်ဆေးကို မဖြစ်မနေထိုးနှံကြဖို့ကိုလည်း ကျန်းမာရေးပညာရှင်များက တိုက်တွန်းထားပါတယ်။

ယခုဆိုရင် မြန်မာနိုင်ငံအတွင်း ၂၈ ဒဿမ ၉၇ သန်းဟာ ကာကွယ်ဆေးထိုးနှံပြီးသွားပြီဖြစ်ပြီး ထပ်ဆောင်းကာကွယ်ဆေးအနေနဲ့ ၁ ဒဿမ ၂ သန်းကို ထိုးနှံပြီးသွားပြီလို့ ကျန်းမာရေးဝန်ကြီးဌာနက ထုတ်ပြန်ထားပါတယ်။

ဖြူးမြို့တွင် ဗစ်ကာကွယ်ဆေးထိုးနှံပေးနေမှုများအား ယခုလိုတွေ့မြင်ရစဥ်။

ymg/kg
#Yangon_Media_Group

#Local News
Published-26 April 2022

ဂျပန်နိုင်ငံကို ပညာတော်သင်သွားရောက်သင်လိုသူတွေအတွက် လာမယ့်မေလ(၄)ရက်မှာ ပညာတော်သင်ဆွေးနွေးပွဲကို မြန်မာနိုင်ငံအခြေစိုက်ဂျပန်သံရုံးကကြီးမှူးကျင်းပသွားမှာ ဖြစ်ပါတယ်၊၊

၂၀၂၂ ခုနှစ်မေလရဲ့ ပညာတော်သင်ဆွေးနွေးပွဲကို တက်ရောက်လိုပါက မြန်မာနိုင်ငံအခြေစိုက် ဂျပန်သံရုံးရဲ့ ဖေ့ဘုတ်စာမျက်နှာမှာကြည့်ရူနိုင်ပြီးအွန်လိုင်းzoomလင့် https://forms.gleLor18eE35RhuaNFb8 မှတစ်ဆင့် ပါဝင်လျှောက်ထားဆွေးနွေးနိုင်မှာဖြစ်တယ်လို့ ဆိုပါတယ်၊၊

အဲဒီ့ပညာတော်သင်ဆွေးနွေးပွဲအကြောင်း ပါဝင်ဆွေးနွေးပေးမယ့်သူတွေကတော့ ဒေါက်တာသင်းအေးအေးကို (MAJA)နဲ့ ဒေါက်တာသူသူနွယ်အေး (OJEIC Associate Coordinator)တို့ဖြစ်တယ်လို့ သိရပါတယ်၊၊

ဂျပန်သံရုံးအနေနဲ့ ၂၀၂၂ခုနှစ်မေလမှစတင်ပြီး တစ်လလျှင်တစ်ကြိမ် ပညာတော်သင်ဆွေးနွေးပွဲကို ကျင်းပသွားမှာဖြစ်ပြီးဇွန်လရဲ့ အချိန်ဇယားကို မကြာမီ ထပ်မံကြေညာသွားမှာပဲဖြစ်ပါတယ်၊၊

ymg/tthl
#Yangon_Media_Group

Published 26 April 2022

ကမ္ဘာ့အသက်အကြီးဆုံး ပုဂ္ဂိုလ်ဟု ယုံကြည်ရတဲ့ ဂျပန်အဘွားအိုတစ်ဦးဟာ တနင်္လာနေ့က အသက်၁၁၉နှစ်အရွယ်မှာ ကွယ်လွန်ခဲ့တယ်လို့  ဂျပန်ရုပ်သံ NHKက သတင်းထုတ်လွှင့်သွားပါတယ်။

ကိန်းတာနာကာလို့ ခေါ်တဲ့ အဲဒီအဘွားအိုဟာ  ၁၉၀၃ခုနှစ် ဇန်နဝါရီ (၂)ရက်နေ့မှာ မွေးဖွားခဲ့ပါတယ်။ အဲဒီနှစ်ဟာ ရိုက်ညီအစ်ကိုဟာ သူတို့ရဲ့မော်တာတပ်လေယာဉ်ပျံတစ်စီးကို ပထမဆုံးမောင်းနှင့်ပျံသန်းကြည့်တဲ့ နှစ်ဖြစ်ပါတယ်။ ၂၀၁၉ခုနှစ်က တာနာကာကို ဂင်းနက်ကမ္ဘာ့မှတ်တမ်းက အသက်အကြီးဆုံး အသက်ရှင်နေထိုင်သည့် ပုဂ္ဂိုလ်အဖြစ် မှတ်တမ်းတင်ခဲ့ပါတယ်။

အဘွားဟာ ဂျပန်နိုင်ငံ အနောက်ပိုင်း ဖူကူအိုကာရှိ ဆေးရုံတစ်ရုံမှာ အသက်အရွယ်ကြီးရင့်လို့ ကွယ်လွန်သွားတာ ဖြစ်ပါတယ်။ အဘွားရဲ့ဘဝတလျောက် ချောကလက်နှင့် အမြှပ်ထတဲ့အရည်တွေကို နှစ်သက်တယ်လို့လည်း NHK က ပြောပါတယ်။

ဂျပန်နိုင်ငံဟာ ခပ်မြန်မြန်အသက်အရွယ်ကြီးရင့်သူတွေရဲ့ လူဦးရေဟာ လျော့ပါးလာနေပါတယ်။ ပြီးခဲ့တဲ့နှစ် စက်တင်ဘာအထိ အသက်တစ်ရာတန်းလူဦးရေ ၈၆၁၅၀ ဦးရှိပြီး (၁၀) ဦးမှာ (၉)ဦးဟာ အမျိုးသမီးတွေဖြစ်ပါတယ်။

Source Reuters

#LocalNews
Published_26 April 2022

ဦးဖြိုးမင်းသိန်းနှင့်ပတ်သက်သော ဒေါ်အောင်ဆန်းစုကြည်၏ အဂတိအမှုကို ဧပြီလ ၁၈ ရက်က အပြီးသတ်လျှောက်လဲချက်ပေးခဲ့ပြီး မနက်ဖြန် ဧပြီလ ၂၇ ရက်တွင် အပြီးသတ်အမိန့်ချမည်ဖြစ်ကြောင်း သိရသည်။

"မူလက ဒီနေ့ ဧပြီလ ၂၆ ရက်နေ့ အမိန့်ချမယ်လို့ တရားသူကြီးက ပြောထားပြီးသား။ဘာ့ကြောင့် ရက်ကိုရွှေ့လိုက်သလဲ မသိရဘူး"ဟု တရားရုံးနှင့် နီးစပ်သူတစ်ဦးက ပြောသည်။

ရန်ကုန်တိုင်းဒေသကြီး ဝန်ကြီးချုပ်ဟောင်း ဦးဖြိုးမင်းသိန်းက ရွှေ ၇ ပိဿာနှင့် ဒေါ်လာ ၆ သိန်း လာဘ်ပေးခဲ့သည်ဟုဆိုသော အဂတိအမှုနှင့်ပတ်သက်၍ ပြီးခဲ့သည့် မတ်လ ၁၄ ရက်ရုံးချိန်းတွင် နိုင်ငံတော်၏ အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်ကို စစ်ဆေးခဲ့ရာစွပ်စွဲမှုများမမှန်ကန်ကြောင်း ထွက်ဆိုခဲ့ပြီးဖြစ်သည်။

ဦးဖြိုးမင်းသိန်းအနေဖြင့် ရန်ကုန်တိုင်းဒေသကြီးအတွင်း လုပ်ဆောင်ချက်များအပေါ် ထောက်ခံပေးရန်ဟုဆိုကာ ၂၀၁၇ ခုနှစ် ၊ ၂၀၁၈ ခုနှစ် ၊ ၂၀၁၉ ခုနှစ်တို့တွင် ဒေါ်အောင်ဆန်းစုကြည်ထံသို့ အကယ်ဒမီအခေါက်ရွှေ ၇ ပိဿာနှင့် ဒေါ်လာ ၆ သိန်းအား ၃ ကြိမ်းခွဲ၍ လက်ရောက်ပေးအပ်ခဲ့ကြောင်း နစက ထံ ထွက်ဆိုထားခြင်းဖြစ်သည်။

ယင်းထွက်ဆိုချက်နှင့် ပတ်သက်၍ ဒေါ်အောင်ဆန်းစုကြည်အား အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၅ ဖြင့် တရားစွဲဆိုခဲ့ကာ ပြီးခဲ့သည့် ၂၀၂၁ ခုနှစ် အောက်တိုဘာ ၁ ရက်ရုံးချိန်းတွင် ဦးဖြိုးမင်းသိန်းနှင့် ဇနီးဖြစ်သူတို့ တရားလိုပြသက်သေအနေဖြင့် တရားခွင်အတွင်း ထွက်ဆိုခဲ့ကြကြောင်းလည်း သိရသည်။

ymg/mt
#Yangon_Media_Group

#DailyNews
Published -26 April 2022

၁။ ရှေးဟောင်းဘုရားစေတီများရှိရာမွန်ပြည်နယ်၏အကြီးဆုံးထုံးကျောက်ဂူကို သွားရောက်လေ့လာခွင့် ပိတ်မထား။

၂။ Tourist Visa ဖွင့်ပေးဖို့ကျန်ရှိနေသေး၍ ပုဂံကို နိုင်ငံခြားသားဧည့်သည်မဝင်သေး။

၃။ နေ့စဉ်မိုးလေဝသသတင်း။

၄။ ဖိလစ်ပိုင်အာဏာရမင်းဆက်များက နိုင်ငံ့အုပ်ချုပ်ရေးပိုင်းကိုချုပ်ကိုင်ခြယ်လှယ်ထား...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published - 26 Apr 2022

ဧပြီလ ၂၅ ရက်နေ့တွင် တရားမဝင် သစ်မျိုးစုံ၊ တိရစ္ဆာန်များ ၊ စားသောက်ကုန်ပစ္စည်းများနှင့် အဝတ်အထည်များ စုစုပေါင်းခန့်မှန်းတန်ဖိုးငွေကျပ် (၁၂,၃၄၃,၀၀၀) ဖမ်းဆီးရမိခဲ့ကြောင်းတရားမဝင်ကုန်သွယ်မှုတိုက်ဖျက်ရေးကော်မတီ ထုတ်ပြန်ချက်အရသိရပါတယ်။

ဖမ်းဆီးရမိမှုဖြစ်စဥ်များမှာ ဧပြီ ၂၅ ရက်တွင် စစ်ကိုင်းတိုင်းဒေသကြီး တရားမဝင် ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် မြန်မာနိုင်ငံရဲတပ်ဖွဲ့ဦးဆောင်သော စစ်ဆေးရေးအဖွဲ့က စစ်ဆေးမှုများဆောင်ရွက်ခဲ့ရာ ကလေးမြို့နယ်အတွင်း တရားမဝင် တင်ဆောင်လာသော ခိုင်းနွားကိုးကောင် (ခန့်မှန်းတန်ဖိုးငွေကျပ် ၉၇၀၀၀ ၀၀) ဖမ်းဆီးရမိခဲ့ပြီး တိရစ္ဆာန်ကျန်းမာရေးနှင့် မွေးမြူရေးလုပ်ငန်းများ ဖွံ့ဖြိုးတိုးတက်ရေးဥပဒေဖြင့် အရေးယူထားတယ်လို့ သိရပါတယ်။

ဆက်လက်ပြီး ပဲခူးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေး အထူးအဖွဲ့၏ စီမံခန့်ခွဲမှုဖြင့် တိုင်းဒေသကြီး သစ်တောဦးစီးဌာနဦးဆောင်သော ပူးပေါင်းစစ်ဆေးရေးအဖွဲ့က စစ်ဆေးမှုများဆောင်ရွက်ခဲ့ရာ ဖြူးမြို့နယ်နှင့် အုတ်တွင်းမြို့နယ်တို့အတွင်း တရားမဝင်သစ်မျိုးစုံ ၄ ဒသမ ၆,၈၂၄ တန် (ခန့်မှန်းတန်ဖိုးငွေကျပ် ၆၅၂,၁၂၀) ဖမ်းဆီးရမိခဲ့ပြီး သစ်တောဥပဒေနှင့်အညီ အရေးယူဆောင်ရွက်လျက်ရှိတယ်လို့ သိရပါတယ်။

ထို့အပြင် မွန်ပြည်နယ် မရမ်းချောင်အမြဲတမ်း စစ်ဆေးရေးစခန်း၌ တာဝန်ကျပူးပေါင်းစစ်ဆေးရေးအဖွဲ့က စစ်ဆေးမှုများဆောင်ရွက်ခဲ့ရာ ခရီးသည်တင် မှန်လုံယာဉ်နှစ်စီးပေါ်၌ တရားဝင်စာရွက်စာတမ်း အထောက်အထားတစ်စုံတစ်ရာ တင်ပြနိုင်ခြင်းမရှိသည့် စားသောက်ကုန်ပစ္စည်းများနှင့် အဝတ်အထည်များ (ခန့်မှန်းတန်ဖိုးငွေကျပ် ၈,၃၄၃,၀၀၀)ကို လည်းကောင်း၊ ၂၂ ဘီး ကုန်တင်ယာဉ်တစ်စီးပေါ်၌ ဂျင်းဘောင်းဘီများ (ခန့်မှန်းတန်ဖိုးငွေကျပ် ၄,၀၀၀,၀၀၀) ကို လည်းကောင်း စုစုပေါင်း (ခန့်မှန်းတန်ဖိုးငွေကျပ် ၁,၂၃၄၃,၀၀၀) ဖမ်းဆီးရမိခဲ့ပြီး အကောက်ခွန်ဥပဒေ နှင့်အညီ အရေးယူဆောင်ရွက်လျက်ရှိတယ်လို့ သိရပါတယ်။

ဧပြီ ၂၅ ရက်တွင် ဖမ်းဆီးရမိမှု စုစုပေါင်းမှာ အမှုတွဲ(၇) မှု (ခန့်မှန်းတန်ဖိုး ငွေကျပ် ၂၂,၆၉၅,၁၂၀) ဖြစ်ကြောင်း တရားမဝင် ကုန်သွယ်မှုတိုက်ဖျက်ရေး ဦးဆောင်ကော်မတီက သိရပါတယ်။

ymg/hm
#Yangon_Media_Group

#LocalNews
Published_26 April 2022

ရန်ကုန်နှင့် မန္တလေးမြို့တို့တွင် လျှပ်စစ်ဘတ်စ်ကားများ ပြောင်းလဲပြေးဆွဲရန် Omni Focus ကုမ္ပဏီကအဆိုပြုထားကြောင်း စက်မှုဝန်ကြီးဌာန ပြည်ထောင်စုဝန်ကြီးဌာနက သိရသည်။

ယင်းအဆိုပြုချက်နှင့်ပတ်သက်၍ မူဝါဒချမှတ်နိုင်ရန် လုပ်ထုံးလုပ်နည်းများနှင့်အညီ ဆက်လက်ဆောင်ရွက်ရေး စက်မှုဝန်ကြီးဌာန ပြည်ထောင်စုဝန်ကြီးက ညွှန်ကြားထားသည့်အတွက် စီစဉ်နေကြောင်းလည်းသိရသည်။

နိုင်ငံတော်စီမံအုပ်ချုပ်ရေးကောင်စီဥက္ကဌ ဗိုလ်ချုပ်မှူးကြီး မင်းအောင်လှိုင်က လက်ရှိအသုံးပြုနေသော မီးရထားနှင့် မော်တော်ယာဉ်များကို လျှပ်စစ်ဖြင့် အစားထိုးသုံးစွဲပါက စက်သုံးဆီသုံးစွဲမှု ချွေတာနိုင်မည်ဖြစ်ကြောင်း ပြီးခဲ့သည့် မတ်လကုန်ပိုင်းတွင် ပြောကြားထားသည်။

ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ Yangon Region Public Transport Committee (YRTC) အနေဖြင့်လည်း ရန်ကုန်တိုင်းဒေသကြီးအတွင်း အများပြည်သူသုံးယာဉ်လိုင်းအချို့နေရာတွင် လျှပ်စစ်ကားများဝင်ရောက်ပြေးဆွဲရေးအတွက် ယာဉ်လိုင်းကုမ္ပဏီအချို့ထံ သဘောထားတောင်းခံထားကြောင်းလည်း သိရသည်။

လက်ရှိတွင် YBS ယာဉ်လိုင်းနံပါတ် ၂၀ ၊ ၅၆ ၊ ၈၂ ၊ ၈၃ ၊ ၉၈ ၊ ၉၉ ၊လေဆိပ်-ဆူးလေ ယာဉ်လိုင်းများကို Omni Focus ကုမ္ပဏီက ပြေးဆွဲပေးလျက် ရှိသည်။

ymg/mt
#Yangon_Media_Group