#Ukraine_Crisis
Published 7 June 2023
ကာခိုဗာရေကာတာကျိုးပျက်ရာမှ ခါဆန်တောင်ပိုင်းမြို့အချို့နေရာမှာ ရေလွှမ်းမိုးလာတာကြောင့် ဒေသခံယူကရိန်းပြည်သူတွေရဲ့ နေအိမ်များ အန္တရာယ်ကျရောက်နေတဲ့အတွက် စိုးရိမ်ပူပန်နေရကြောင်း ထုတ်ဖော်လာကြပါတယ်။
ဆည်ကျိုးပေါက်ခြင်းကြောင့် လူပေါင်း ၁၇,၀၀၀ နေအိမ်များကိုစွန့်ခွာကာ ဘေးလွတ်ကင်းရာသို့ ပြောင်းရွှေ့ခဲ့ရပါတယ်။
ရေကာတာကနေ မြို့ထဲသို့စီးဆင်းနေတဲ့ ဒီနီပရိုမြစ်ဘေးမှာ 'အိုင်ရီနာ'က သူ့အိမ်နီးချင်းတွေနဲ့အတူ ရပ်ကြည့်နေရကာ အိမ်ကနေ စွန့်ခွာခဲ့ရပါတယ်။
"အခုဆိုရင် ကျွန်မတို့ လျှပ်စစ်မီးမရ၊ ဓာတ်ငွေ့မရှိ၊ သုံးစွဲရေမရှိဘဲ နေနေရပါတယ်။ သာမန်နေ့စဉ်ဘဝ ပျက်သုဉ်းရပြီး စိုက်ခင်းတွေ ရေနစ်မြုပ်သွားပါပြီ" လို့ အသက် ၅၂ နှစ်ရှိအိုင်ရီနာက မျက်ရည်ကျလျက် ပြောကြားသွားပါတယ်။
အိုင်ရီနာနဲ့အိမ်နီးချင်းတို့ဟာ ရေလွှမ်းမိုးမှုမြင့်တက်လာပြီး ယင်းတို့နေအိမ်များပျက်စီးဆုံးရှုံးသွားတာကို ကြည့်နေရပြီး နောက်ထပ်ဘာဆက်ဖြစ်မလဲဆိုတာကို စိုးရိမ်နေရပါတယ်။
"ဒီညနေဘာဖြစ်မလဲဆိုတာ ကြောက်နေရပါတယ်။ ကပ်ဘေးကြီးဖြစ်လာမှာ စိုးရိမ်ရပါတယ်" လို့ ပြောနေကြပါတယ်။
ယမန်နှစ် မတ်လကနေ နိုဝင်ဘာလအထိ ခါဆန်မြို့ကို ရုရှားတပ်များသိမ်းပိုက်ထားခဲ့ပြီးနောက် ယူကရိန်းတပ်တွေက ပြန်လည်လွတ်မြောက်စေခဲ့ပြီးကတည်းက အပြင်းအထန်တိုက်ခိုက်ခံနေရတာဖြစ်ပါတယ်။
အသက် ၅၆ နှစ်အရွယ် သူနာပြု'ဆဗစ်လာနာ'က မြို့ရေကြီးရတဲ့အတွက် ရုရှားတပ်တွေကို အပြစ်တင်လိုက်ကာ အခုဆိုရင် ပိုပြီးတောင် အမျက်ထွက်စရာကောင်းနေပြီလို့ ပြောကြားခဲ့ပါတယ်။
ထိခိုက်မှုက ဘယ်လောက်အထိ ကြာရှည်မလဲ၊ ဘယ်တော့မှ အိမ်ပြန်နိုင်မလဲဆိုတာ စိုးရိမ်နေကြရပါတယ်။
ရေပြန်ကျသွားတဲ့အချိန်မှာ ပြဿနာတွေကျန်နေမှာဖြစ်ကြောင်း၊ ပြန်လည်လည်ပတ်နိုင်ဖို့ ဘယ်လိုထူထောင်သင့်ကြောင်း၊ ဘယ်နေထိုင်ရမလဲ မစဉ်းစားတတ်ကြောင်း၊ ဒီနေရာမှာ အားလုံးက သေဆုံးကြတော့မှာဖြစ်ကြောင်း လူတစ်ဦးက AFP ကိုပြောကြားခဲ့ပါတယ်။
ရုရှားတွေက သူတို့တွေဆီကို ရေကြီးအောင်လုပ်နေတယ် တစ်ခုခုလုပ်နေကြတယ်လို့ ဒေသခံနောက်တစ်ဦးကလည်း ပြောကြားလိုက်ပါတယ်။
ရေတက်နေတာကို မျက်စိရှေ့မှာတင်မြင်နေရတယ်လို့ ခါဆန်ဒေသခံဗစ်ခ်တာက ပြောကြားလိုက်ပါတယ်။
Source: barron's #Ukraine_Crisis #ဆည်ကျိုးကာရေကြီး #ခါဆန်
#YMG #Yangon_Media_Group
