#LocalNews
Published_15 April 2022

မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု) မြို့နယ်ရှိ မန်းရွှေစက်တော်ဘုရားကြီးသို့ ယနေ့ ဧပြီလ ၁၅ ရက် သင်္ကြန်အကြတ်နေ့တွင် ဘုရားဖူးလာရောက်သူများပြားကြောင်း သိရသည်။

ယင်းအပြင် လာရောက်သော အနယ်နယ်အရပ်ရပ်မှ ဘုရားဖူးခရီးသည်များက မန်းချောင်းအတွင်း ရေချိုး၍အပန်းဖြေကြကြောင်းလည်း သိရသည်။

မန်းရွှေစက်တော်ဘုရားပွဲတော်ကြီးကို တပို့တွဲလဆန်း ၅ ရက်နေ့က စတင်ဖွင့်လှစ်ပေးခဲ့ခြင်းဖြစ်ပြီး မြန်မာနှစ်ဆန်းတစ်ရက်နေ့ (ဧပြီလ ၁၇ ရက်)တွင် အောက်ခြေတော်ရာ ဖန်အုပ်စောင်းတော်နှင့် အထက်ခြေတော်ရာ သံတံကားတို့ကို ပိတ်ပွဲကျင်းပပြုလုပ်သွားမည်ဖြစ်ကြောင်း သိရသည်။

ymg/mt
#Yangon_Media_Group

Published 15 April 2022

အမေရိကန်နှင့်နေတိုးတို့က ယူကရိန်းနိုင်ငံဆီ အရေးအကြိးဆုံးလက်နက်စနစ်တွေပေးပို့နေတာဟာ ပဋိပက္ခကို လောင်စာ ထပ်သွင်းတာဖြစ်ပြီး မျှော်မှန်းလို့မရတဲ့ အကျိုးဆက်တွေ ရလာနိုင်တယ်လို့ ရုရှားနိုင်ငံက အမေရိကန်ပြည်ထောင်စုကို တရားဝင်သံတမန်စာတစ်စောင် ဒီတစ်ပတ်ထဲမှာ ပေးပို့လိုက်ပါတယ်။

၁၅၅ မမ ဟောင်ဝစ်ဇာအပါအဝင် ရုရှားရဲ့ တာဝေးပစ်အမြောက်တွေ၊ ကန်းရိုးတန်းကာကွယ်ရေးဒရုန်းတွေနှင့် သံချပ်ကာကားတွေ၊ အပေါ့စားလေယာဉ်ဖျက်နှင့် တင်ကားဖျက်လက်နက်တွေ၊သန်းနှင့်ချီတဲ့ ခဲယမ်းမီးကျောက်တွေဒေါ်လာသန်း၈၀၀တန်ဖိုးရှိတဲ့လက်နက်တွေ ယူကရိန်းကိုပေးမယ်လို့ သမ္မတ ဂျိုးဘိုင်ဒင်က အတည်ပြုအပြီးမှာ ဝါရှင်တန်ပို့စ်က လက်ခံရရှိထားတဲ့ အဆိုပါသံတမန်စာ ထွက်ပေါ်လာတာဖြစ်ပါတယ်။

ယူကရိန်းရဲ့တာဝေးလေကြောင်းကာကွယ်ရေးစနစ်တွေကို ပေးပို့ဖို့လည်း စီစဉ်ခဲ့ပါတယ် လို့ အမေရိကန်အစိုးရက ပြီးခဲ့တဲ့ အပတ်ကပြောပါတယ်။ အဲဒီအထဲမှာ ဆလိုဗေးကီးယားက ပေးပို့မယ်ါ့ ဆိုဗီယက်ခေတ်က ထုတ်လုပ်ထားတဲ့ S-300 လောင်ချာတွေလည်းပါဝင်ပါတယ်။ အဲဒီလောင်ချာတေံဟာ ယူကရန်းက လေ့ကျင့်ထားပြီးလက်နက်တွေဖြစ်ပါတယ်။

ယူကရိန်းသမ္မတ ဗိုလိုဒီမီယာဇီလင်စကီးက သမ္မတ ဘိုင်ဒင်ကို အရေးပေါ် အသနားခံထားတာကြောင့်

လက်နက်တွေပထမအသုတ်ဟာ လာမယ့်ရက်အနည်းငယ်အတွင်း ယူကရိန်းကို ရောက်ရှိမယ်လို့ အမေရိကန် အရာရှိတွေက ပြောပါတယ်။

စာမျက်နှာ(၂)မျက်နှာပါတဲ့ ရုရှားရဲ့ သံတမန်စာပါအကြောင်းအရာ နှင့်ပတ်သက်လို့ အမေရိကန် နိုင်ငံခြားရေးဝန်ကြီးဌာနက မှတ်ချက်ပေးဖို့ ငြင်းဆန်ပါတယ်။  ယူကရိန်းထဲဝင်လာမယ့် လက်နက်ကားတန်းတွေကို တရားဝင်ပစ်မှတ်တွေလို့ ရုရှားက တံဆိပ်ကပ်ထားပြီးဖြစ်ပေမယ့် အဲဒါတွေကို အခုထက်ထိမတိုက်ခိုက်သေးတာ ပြင်ဆင်နေလို့ဖြစ်ကောင်းဖြစ်မယ်လို့ ရုရှား အရေးကျွမ်းကျင်သူတွေက ပြောကြပါတယ်။

“ ယူကရိန်းရဲ့ အဲဒီလက်နက်သိုလှောင်ရုံတွေကို သူတို့ ပစ်မှတ်ထားခဲ့တယ်။ အဲဒီနေရာတွေမှာ ပေးပို့ထားတာတွေထဲက အချို့ ရောက်နေကြပြီ” လို့ စီအိုင်အေမှာ ရုရှားကျွမ်းကျင်သုံးသပ်ရေးညွှန်ကြားရေးမှူးလုပ်ခဲ့သူ ဂျော့ ဘီဘီးက ပြောပါတယ်။သူဟာ ဒုတိယသမ္မတဟောင်း ဒစ်ချင်နေရဲ့ ရုရှားအကြံပေးလုပ်ခဲ့သူလည်းဖြစ်ပါတယ်။

လက်နက်(ပစ်မှတ်)တွေကို ယူကရိန်းနယ်နမိတ်ကျော်ပြီး သူတို့လုပ်မှာလား ဆိုတာက မေးခွန်းပဲဖြစ်တယ်။  ယူကရိန်းရဲ့ အဖျားအနားမှာရှိနေကြတဲ့ နေတိုးနိုင်ငံတွေရောဖြစ်ကောင်းဖြစ်နိုင်သလား” လို့ သူကပြောပါတယ်။ဘာဖြစ်လို့လဲဆိုတော့ အမေရိကန်ကပေးပို့တဲ့လက်နက်တွေဟာ အဲဒီနိုင်ငံတွေနေက ပြောင်းရွှေ့ပေးလို့ဖြစ်ပါတယ်။

“ကိဗ်အစိုးရထံ ပေးပို့မည့် မြောက်များလှစွာသော လက်နက်များနှင့်စစ်ရေးကိရိယာများနှင့်ပတ်သက်၍ ရုရှား၏ စိုးရိမ်ပူပန်မှု” လို့ အဲဒီစာမှာ ခေါင်းစဉ်တပ်ထားတာဖြစ်ပါတယ်။ အဲဒီစာကို ရုရှားလိုရေးထားပြီး အင်္ဂလိပ်ဘာသာပြန်စာကိုပါ ပူးတွဲထားပါတယ်။ စာကို ဝါရှင်တန်မှာရှိတဲ့ ရုရှားသံရုံးက အမေရိကန် နိုင်ငံခြားရေးဝန်ကြီးဌာနကို ပေးပို့တာဖြစ်ပါတယ်။

ရုရှားသံရုံးဆီက စာအပေါ်မှတ်ချက်တောင်းတာ ပြန်မတုန့်ပြန်ပါဘူး။

“ အမေရိကန်ပြည်ထောင်စုနှင့်ယင်းရဲ့မဟာမိတ်တွေဟာ ဒေသဆိုင်ရာနှင့် နိုင်ငံတကာလုံခြုံရေးအတွက် မျှော်မှန်းလို့မရတဲ့ အကျိုးဆက်တွေညွှန်းဆိုပြနေတဲ့ ယူကရိန်းကို တာဝန်မဲ့စစ်လက်နက်တပ်ဆင်ရေးလုပ်နေတာတွေကို ရပ်တန့်ဖို့ ကျွန်ုပ်တို့ တောင်းဆိုပါတယ်” လို့ အဆိုပါစာမှာဖော်ပြထားပါတယ်။

Source: Washington Post

Published 15 April 2022

ကမ္ဘောဒီးယားနိုင်ငံမှာ ခမာနှစ်သစ်ကို ကြာသပတေးနေ့ကစပြီး (၃)ရက်တိုင် ဆင်နွှဲနေကြပါပြီ။ ကိုဗစ်-၁၉ကူးစက်မှုတွေ လျော့ကျသွားပြီးနောက် အစိုးရက နိုင်ငံကိုပြန်လည်ဖွင့်လှစ်ခဲ့တဲ့အတွက် ယခင်(၂)နှစ်က မကျင်းပဖြစ်ခဲ့တဲ့ ခမာနှစ်သစ်ကူးပွဲကို ဒီနှစ်မှာ ဆင်နွှဲနိုင်ကြတာဖြစ်ပါတယ်။

သုံးရက်တာ နှစ်သစ်ကူးပွဲတော်အတွင်း ပြည်သူတွေဟာ ပြည်နယ်တွေဆီမှာရှိတဲ့ မိသားစုတွေထံ ပြန်လည်ပတ်ကြပါတယ်။ ဗုဒ္ဓဘာသာဘုန်းတော်ကြီးတွေထံ စားဖွယ်များ ကပ်လှူကြပါတယ်။ ပြီးတော့ ရိုးရာ အားကစားပွဲတွေ ကစားကြပါတယ်။

Source AFP

#LocalNews
Published - 15 April 2022

ပဲခူးတိုင်းဒေသကြီး တောင်ငူမြို့တွင် စိတ်ရိုင်းဝင်ကုတ်ခြစ်ခဲ့၍အသက်ဆုံးရှုံးခဲ့ရသူမွေးမြူထားသည့် ကျန်ရှိဝက်ဝံများကို နေပြည်တော် တိရိစ္ဆာန်ဥယျာဉ်သို့ ရွှေ့ပြောင်းလိုက်ကြောင်း သိရသည်။

ပြီးခဲ့သည့် ဧပြီလ ၇ ရက်က ငယ်စဉ်ကပင် မွေးမြူထားခဲ့သော ဝက်ဝံများထဲမှ အိစိကွေးနှင့် ချစ်ပိုအမည်ရှိ ဝက်ဝံနှစ်ကောင်က စိတ်ရိုင်းဝင်ရန်ပြုတိုက်ခိုက်ခဲ့သည့်အတွက် သခင်ဖြစ်သူသေဆုံးပြီးနောက် အဆိုပါကျန်ရှိ ဝက်ဝံ (၅) ကောင်ကို နေပြည်တော်တိစ္ဆာန်ဥယျာဉ်သို့ ရွှေ့ပြောင်းပေးလိုက်ခြင်း ဖြစ်သည်။

"ကိုအောင်မွေးမြူခဲ့တဲ့ ဝက်ဝံတွေ တောင်ငူမြို့ နာရေးကူညီမှုအသင်း (တောင်ငူ) နဲ့ ၁၁၅ မိုင်မှ ပိုင်အိုးနီးယား က ကိုဇော်တို့နဲ့ နေပြည်တော် တိရိစ္ဆာန် ဥယျာဉ်ကို ဧပြီလ ၁၂ ရက်နေ့က ရွှေ့ပြောင်းပေးခဲ့တယ်"ဟု လူမှုကူညီရေးအသင်းသား တစ်ဦးက ဆိုသည်။

ဝက်ဝံမွေးမြူထားသော ကိုအောင် ဟု အများက ခင်မင်စွာ ခေါ်ကြသည့် ဦးစိုးမိုးအောင်မှာ တိရိစ္ဆာန်များကို ချစ်မြတ်နိုးသူ ဖြစ်ပြီး "အနှိုင်းမဲ့အကြင်နာပရဟိတ" အမည်ဖြင့်လည်း ဝက်ဝံများအပါအဝင် အခြားတိရိစ္ဆာန်များကို ထိန်းသိမ်းမွေးမြူထားသူ ဖြစ်သောကြောင့် လူသိများသူတစ်ဦးလည်း ဖြစ်သည်။

ymg/mt
#Yangon_Media_Group

#LocalNews
Published -15 Apr 2022

ရခိုင်ပြည်နယ်၊ ဂွမြို့၊ မြို့မရပ်ကွက်တွင် ဧပြီလ ၁၄ ရက်ညပိုင်းက အသက်(၁၃)နှစ်အရွယ် မိန်းကလေးတစ်ဦးအား မုန့်ဝယ်ကျွေးမယ်ဟု အပြင်သို့ခေါ်ဆောင်သွားကာ အလိုမတူပဲသားမယားအဖြစ်ပြုကျင့်သည့် ဖြစ်စဥ်တစ်ခုဖြစ်ပွားခဲ့တယ်လို့ ဂွမြို့ရဲတပ်ဖွဲ့စခန်းက သိရပါတယ်။

ဖြစ်စဥ်မှာ မြို့မရပ်ကွက်တွင်နေထိုင်သူ ရဲနိုင်(ခ)မျိုးမင်းမောင် (၄၃)နှစ် စျေးရောင်းလုပ်ကိုင်သူက တစ်လမ်းနေသူ မ---(၁၃)နှစ်အား အပြင်သို့ မုန့်ဝယ်စားရန် ဆိုင်ကယ်ဖြင့်ခေါ်ဆောင်သွားပြီး မြို့ပြင်ရှိ မြို့အဝင်အထွက်ဂိတ်အကျော် တောင်ကြားလမ်းအတွင်းသို့ ခေါ်ဆောင်သွားပြီး သားမယားအဖြစ် (၁)ကြိမ် ပြုကျင့်ခဲ့ကြောင်း၊ ထို့နောက် မ------အား ပြန်လည်ခေါ်ဆောင်လာပြီး သစ်သီးဆိုင်မှ ပန်းသီးနှစ်လုံးဝယ်ပေးကာ နေအိမ်အနီးသို့ ပြန်ပို့ပေးခဲ့ကြောင်း၊ ဘုန်းကြီးကျောင်းတွင် ကျောင်းဝေယျာဝစ္စလုပ်ကိုင်နေသူ မ-----၏ မိခင်ဖြစ်သူအား ၎င်း၏ ယောက်မဖြစ်သူက သမီးဖြစ်သူ၏ ဖြစ်စဥ်ကို သွားရောက်ပြောကြားခဲ့သောကြောင့် မ------၏ မိခင်ဖြစ်သူသည် မြို့မရဲစခန်းသို့ တရားလိုပြုလာရောက် တိုင်တန်းသဖြင့် ရဲနိုင်(ခ)မျိုးမင်းမောင် (၄၃)နှစ်အား ရာဇသတ်ကြီးပုဒ်မ ၃၇၆/၃၆၃အရ အမှုရေးဖွင့် အရေးယူဆောင်ရွက်ထားတယ်လို့ သိရပါတယ်။

ymg/hm
#Yangon_Media_Group

Published 15 April 2022

ယူကရိန်းနိုင်ငံ၊မြို့တော်ကိဗ်မှာ သောကြာနေ့က အင်အားပြင်းပေါက်ကွဲသံတွေကြားရပြီး ယူကရိန်းအရှေ့ဘက်ခြမ်းမှာ တိုက်ပွဲတွေများပြားလာပါတယ်။ ရုရှားရေတပ်ရဲ့ ပင်လယ်နက်အထင်ကရသင်္ဘောကို ယူကရိန်းကနှစ်မြှပ်ခဲ့ပြီးနောက် ယခုလိုဖြစ်ပေါ်ခဲ့တာပါ။

တောင်ပိုင်းနှင့်အရှေ့ပိုင်းမှာ စစ်ပွဲတွေပြင်ဆင်ဖို့အတွက် ရုရှားတပ်တွေ ဒီလစောစောပိုင်းက ယူကရိန်းမြို့တော်ကနေ ဆုတ်ခွာပြီး ကတည်းကဆိုရင် ယခုကြားရတဲ့‌ ပေါက်ကွဲသံတွေဟာ အသိသာဆုံးဖြစ်ပါတယ်။

ယူကရိန်းက သူတို့ဟာ ရုရှားရဲ့ ဒုံးကျည်တင်ရေတပ်သင်္ဘော Moskva ကို သူတို့ရဲ့ နက်ပ်ကျွန်း တန်ပြန် သင်္ဘောဒုံးကျည်နှင့် ထိမှန်အောင်ပစ်ခတ်ခဲ့တယ်လို့ ကြာသပတေးနေ့က ပြောပါတယ်။  အဲဒီသင်္ဘော ပေါက်ကွဲမီးလောင်မှုဖြစ်ပြီးနောက် သင်္ဘောကိုဆိပ်ကမ်းသို့တွဲဖြင့်ဆွဲလာစဉ် နစ်မြုပ်သွားတယ်လို့ ရုရှားကာကွယ်ရေးဝန်ကြီးဋ္ဌာနက ပြောပါတယ်။

ရေတပ်သား ၅၀၀ ကျော်ကို သင်္ဘောပေါ်က ကယ်ထုတ်လာနိုင်ခဲ့တယ်လို့ တိုက်ခိုက်ခံရမှုကို သိရှိမှုပြသခြင်းမရှိဘဲ ရုရှား ကာကွယ်ရေးဝန်ကြီးဌာနက ပြောပါတယ်။

ရုရှားရေတပ်ဟာ ပင်လက်နက်ကနေပြီး ယူကရိန်းမြို့တော်ကို ဗုံးကြဲနေတာ ရက်ပေါင်း၅၀နီးပါးအကြာမှာ ရုရှားဟာ ယင်းရဲ့ အထင်ကရ ရေတပ်သင်္ဘောတစ်စီး ဆုံးရှုံးခဲ့တာဖြစ်ပါတယ်။

ရုရှားစစ်တပ်ရဲ့ အဆုံးမရှိတဲ့ စစ်ကိရိယာကားတန်းတွေရပ်တန့်အောင်လုပ်ပစ်ခဲ့သူတွေနှင့် ရုရှားသင်္ဘောတွေကို နစ်မြုပ်အောင် လုပ်နိုင်သူတွေကို ဂုဏ်ပြုတဲ့အကြောင်း ယူကရိန်းသမ္မတ ဗိုလိုဒီမီယာ ဇီလင်စကီးက ပြောပါတယ်။

ကိဗ်မြို့တော်၊ တောင်ပိုင်းက ခါဆွန်မြို့၊အရှေ့ပိုင်း ခါကစ်မြို့နှင့် အနောက်က အိုင်ဗန်နိုဖရန်ကီဗစ်မြို့တွေမှာ  ပေါက်ကွဲမှုတွေဖြစ်ပြီးနောက် ပျက်စီးဆုံးရှုံးမှုနှင့်ပတ်သက်လို့ အသေးစိတ်သတင်းတွေမရသေးပါဘူး။

မြောက်ပိုင်းဆိပ်ကမ်းမြို့မာယီယူပူလ်က ပေါ့ပက်စ်နာနှင့်ရူဘစ်ဇိုင်းမြို့ကလေးတွေမှာ ရုရှားရဲ့တိုက်ခိုက်မှုကို ယူကရိန်းစစ်တပ်က ပြန်လည်တွန်းလှန်နိုင်ခဲ့ပြီး တင့်ကားတွေနှင့် သံချပ်ကာကားတော်တော်များများကို ဖျက်စီးပစ်လိုက်တယ်လို့ ယူကရိန်းစစ်တပ်ကပြောပေမယ့် ဒီသတင်းကို ရိုက်တာက အတည်ပြုလို့မရသေးပဲရှိပါတယ်။

Source Reuters

#LocalNews
Published -15 Apr 2022

ရခိုင်ပြည်နယ်၊ သံတွဲမြို့ ၌ မဟာသင်္ကြန်အကြတ်နေ့တွင် ရခိုင့်ရိုးရာရေကစားးမဏ္ဍပ်များ ၊ဖျော်ဖြေရေးမဏ္ဍပ်များနှင့်ငပလီကမ်းခြေတို့တွင် ယနေ့နံနက်ပိုင်းတွင် ရေကစားသူများပြားနေတယ်လို့ မြို့ခံတွေဆီက သတင်းရရှိပါတယ်။

အဆိုပါမဟာသင်္ကြန်အကြတ်နေ့တွင် အနယ်နယ်၊ အရပ်ရပ်မှလာရောက်လည်ပတ်သူများ ၊ ကားများ၊သုံးဘီးဆိုင်ကယ်များဖြင့် လှည့်လည်ရေပက်ခံထွက်သူများ၊ ငပလီကမ်းခြေတွင် ရေကစားအပန်းဖြေအနားယူသူများ များပြားနေတာဖြစ်ပါတယ်။

ymg/hm
#Yangon_Media_Group

Published 15 April 2022

သင့်ရဲ့ကျန်းမာရေးနှင့်ချမ်းသာသုခ ရဲ့အခြေခံက သင့်ရဲ့နှလုံးလည်းမဟုတ်၊အဆုတ်လည်းမဟုတ်။ ဦးနှောက်လည်းမဟုတ်။ အခြေံခံက သင့်ရဲ့ အူတွေပဲဖြစ်ပါတယ်။

ဒါကိုစေ့စေ့တွေးပါ- သင့်ရဲ့ ခုခံအား စနစ်ကြီးရဲ့ ၇၀ ရာခိုင်နှုန်း ဟာ သင့်ရဲ့ ဝမ်းခေါင်းပေါ် အခြေပြုထားတယ်။

ဘာကြောင့်ဒါကအရေးကြီးရတာလဲ- သင်ဟာ သင်ဘာစားတယ်ဆိုတာမှာဖြစ်တည်နေတယ်။ ကျန်းမာသန်စွမ်းတဲ့ အူတွေဟာ သင့်ရဲ့ ခန္ဓာကိုယ်နှင့်စိတ်တွေကို နာမကျန်းဖြစ်ခြင်းမှ ကာကွယ်ပေးတယ်။

၁။ သင့်ရဲ့ခုခံအားစနစ်- ကျန်းမာသန်စွမ်းတဲ့အူဟာ ဗိုင်းရပ်စ်တွေ၊မှုတွေနှင့် ဘက်တီးရီးယားအဆိုးတွေကို တိုက်ထုတ်ပစ်နိုင်တဲ့ ကိုယ်ခံအားဆဲလ်တွေနှင့် ဘက်တီးရီးယားအကောင်းတွေနှင့်ပြည့်နှက်နေတယ်။ မကျန်းမာတဲ့ အူဟာ ရောဂါကူးစက်မှုတွေကို ဦးတည်စေနိုင်တဲ့အပြင်  ကင်ဆာကို တိုက်ထုတ်ပစ်တဲ့ သင့် ခန္ဓာကိုယ်ရဲ့ အစွမ်းသတ္တိတွေကိုတောင် ဟန့်တားပစ်နိုင်ကြတယ်။

၂။ သင့်ရဲ့စိတ်ကျန်းမာရေး- ယုံချင်ယုံ မယုံချင်နေ။ သင့်ရဲ့ အူဆီမှာ သူ့ရဲ့ ကျောရိုးနဗ်ကြောလိုပဲ အာရုံကြောတွေ အများ ကြီးရှိနေတယ်။ အဲဒီအာရုံကြောတွေက ဦးနှော်ကထဲ တိုက်ရိုက်ချိတ်ဆက်နေတယ်။ အဲဒါကြောင့် ညံ့ညံ့ဖျင်းဖျင်း စားသောက်ရင် စိုးရိမ်ကြောင့်ကြမှုတွေနှင့် စိတ်ဓာတ်ကျဆင်းမှုတွေဖြစ်စေနိုင်တယ်။ အပြန်အလှန်အားဖြင့် စိတ်ကျန်းမာရေး ကျဆင်းလာတာဟာ အူတွေကိုလည်း မကျန်းမမာဖြစ်စေနိုင်တယ်။

၃။ သင့်ရဲ့ခွန်အား-ဒုက္ခပေးနေတဲ့ အူတစ်ခုနှင့် အားနည်းနေတဲ့ ခုခံအားစနစ်ဟာ ဖောရောင်တာတွေကို ဦးတည်စေလာနိုင်ပြီး သင့်ရဲ့ အဆစ်အမြစ်တွေနှင့်ကြွက်သားတွေကို ထိခိုက်စေလာနိုင်တယ်။

“အူကို ဒုတိယမြောက် ဦးနှောက်လိုသဘောထားပါ”-ဆေးပညာရှင်တွေကအဲသလိုပြောကြ

အူထဲက သန်းပေါင်းများစွာသော ဘက်တီးရီးယားတွေဟာ သင့်ရဲ့အစားအစာထဲက အဟာရတွေကို ထုတ်ယူပြီး သင့် ခန္ဓာကိုယ်ထဲပေးပို့ရုံတင်မကဘဲ အဆုံးမတော့ သင့်ရဲ့စိတ်နှင့်ချမ်းသာသုခကို ထိန်းကျောင်းဖို့အတွက် သင့်ဦးနှောက်နှင့် ဟိုမုန်းတွေကို သင့်ရဲ့နဗ်တွေက ပြောဆိုပေးတယ်။ ဒါဆိုအူကိုကောင်းမွန်အောင် ဘယ်လိုထိန်းသိမ်းရမလဲ

ကိုယ်ဘာတွေစားသလဲ၊ဘယ်အချိန်စားသလဲ စောင့်ကြည့်- အမျှင်တွေအပြည့်၊ရောင်စုံသစ်သီးတွေနှင့် ဟင်းသီးဟင်းရွက်တွေ၊ ကောက်နှံအကုန်လုံး၊ ပရိုတိန်းနှင့် ဟင်းခတ်အမွှေးအကြိုင်ကို စားသုံးပြီး သင့်အူထဲမှာ ဘက်တီးရီးယားအကောင်းတွေကို ထိန်းသိမ်းမွေးမြူထားပြီး အူကိုကျန်းမာသန်စွမ်းအောင်ထားပါ။ အာလူးကြော်လို ဆိုဒါလိုမျိုး အလွန်အကျွန် ပြုပြင်ထုတ်လုပ် တဲ့ အစားအစာ တွေကို ရှောင်ပါ။

            သင့်ရဲ့အူဟာ ဇီဝနာရီအပေါ်မှာ လှုပ်ရှားနေပါတယ်။ နေ့စဉ်အချိန်မှန်စားသုံးခြင်းဟာ အစာခြေဖျက်မှု အကောင်းဆု့း ဖြစ်စေပါတယ်လို့ UCLAရဲ့ လူသားအာဟာရညွှန်ကြားရေးမှူးနှင့် ဆရာဝန်ဖြစ်တဲ့ ဒေါက်တာဒေးဗစ်ဟီဘာက ပြော ပါတယ်။

သင့်ရဲ့အစားအစာထဲကို ပရိုဘိုင်အိုတစ်ကို ထည့်စား- သင့်အူအတွက် စားနိုင်တဲ့ အကောင်းဆုံးအရာက ပိုးမသတ်ထားတဲ့ ဒိန်ချဉ်ပဲဖြစ်ပါတယ်လို့ ဟီဘာကပြောပါတယ်။ဒိန်ချဉ်ဟာ သင့်ခန္ဓာထဲ အကူအညီရတဲ့ ဘက်တီးရီးယားတွေ ယူဆောင်ပေးရုံ သာမကဘဲ လက်ရှိဘက်တီးရီးယားအကောင်းတွေကိုလည်း အားပေးကူညီပေးပါတယ်။

            အချဉ်ဖောက်ထားတဲ့ သနပ်တွေ။ဂေါ်ဖီထုပ်ချဉ်နှင့် ကင်ချီတို့ဟာလည်း အူကို ပိုကောင်းအောင်လုပ်ပေးပါတယ်။

အိပ်ရေးဝအောင်အိပ်- သင့်အူဟာ အနားယူဖို့လိုအပ်တယ်

လေ့ကျင့်ခန်းလုပ်- လှုပ်ရှားမှုဟာ အူရဲ့လုပ်ဆောင်မှုအတွက် သော့ချက်ပါ။ပြီးတော့ လှုပ်ရှာသွားလာ လှည့်ပတ်နေတာ တွေဟာ အူရဲ့လှုပ်ရှားမှုကိုကောင်းစေပါတယ်။

ဖြည့်စွက်ဆေးရှာနေတယ်ဆိုရင်- ထိပ်တန်းအာဟာရပညာရှင်တွေက အကောင်းဆုံး ပရိုဘိုင်အိုတစ် သုံးမျိုးကို ထောက်ခံပေးထားပါတယ်။ အဲဒါတွေဟာ လေပွတာကိုထိန်းချုပ်နိုင်ပြီး ခုခံအားမြှင့်တင်ပေးနိုင်ပါတယ်။ဈေးနှုန်း၊ ဆေးသက်တမ်းနှင့် အစွမ်းထက်မှုတွေအလိုက် အဆင့်သတ်မှတ်ပေးထားပါတယ်။

သူတို့ရွေးချယ်ပေးတဲ့ ထိပ်တန်းဖြည့်စွက်ဆေး(၃)မျိုး- Culturelle Digestive Daily၊Align Probiotic Extra Strength နှင့် Bio-Kult.

သင်တတ်နိုင်တယ်ဆိုရင်- functional medicine ဆိုတာ ကြီးထွားလာနေတဲ့နယ်ပယ်ပါ။ သင့်အူကျန်းမာရေးကို အသေးစိတ် စစ်ဆေးဖို့ ဆရာဝန်တော်တော်များများက ကမ်းလှမ်းနေကြပါတယ်။အဲဒါဆို သင့်အူကျန်းမာရေးအတွက် တိကျတဲ့အဆင့်တွေ ဆက်လုပ်နိုင်မှာဖြစ်ပါတယ်။

Source Axios

#LocalNews
Published -15 Apr 2022

ဧပြီလ ၁၅ ရက်နေ့ ယနေ့ နံနက် ၇ နာရီခွဲခန့်က ရန်ကုန်တိုင်းဒေသကြီး၊ သန်လျင်မြို့နယ်၊ရေနံရပ်ကွက်၊ ရေနံချက်စက်ရုံအတွင်းနေသူတစ်ဦးကို စက်ရုံအပြင်လမ်းပေါ်မှ သေနတ်ဖြင့်ပစ်ခတ်မှုဖြစ်ပွားခဲ့တယ်လို့ အဆိုပါစက်ရုံဝန်ထမ်းအသိုင်းအဝိုင်းက သိရပါတယ်။

စက်ရုံအတွင်းစက်ရုံဝန်ထမ်း လိုင်းခန်းအမှတ်၂၅ ၊ အခန်း ၄ သည် လမ်းနှင့် ၅ ပေသာကွာဝေးပြီး လိုင်းခန်းနေအိမ်ရှေ့အဖီအောက်တွင်ထိုင်နေတဲ့ ဦးခင်ဇော်ကို ဆိုင်ကယ်စီးလာသည့် သေနတ်သမားနှစ်ဦးက လမ်းပေါ်မှပစ်ခတ်သွားတာဖြစ်တယ်လို့ သိရပါတယ်။

"ဝန်ထမ်းလိုင်းခန်းကို အပြင်ကလာပစ်သွားတာ စစ်ဆေးတာတွေလုပ်နေတယ် ပစ်ခံရသူရဲ့အခြေအနေတော့မသိသေးဘူး"လို့ ဝန်ထမ်းတစ်ဦးကဆိုပါတယ်။

ပစ်ခတ်မှုကြောင့် ဦးခင်ဇော်မှာ ယာနံတွင်ကျည်ထိဒဏ်ရာလေးချက်၊ ယာလက်ဖျံတစ်ချက်ထိမှန်ပြီး ဆေးရုံသို့ ပို့ဆောင်ကုသပေးထားတယ်လို့ ကနဦးသိရပါတယ်။

ymg/hm
#Yangon_Media_Group

#Local_News
Published_ 15 April 2022

ဧရာဝတီတိုင်းဒေသကြီးရှိ ဒေသခံပြည်သူများကို မရှိမဖြစ်လိုအပ်တဲ့ အာဟာရ ဝန်ဆောင်မှုများ တိုးချဲ့ပံ့ပိုးပေးနေတယ်လို့ ယူနီဆက်က ထုတ်ပြန်ထားပါတယ်။

အသက်ငါးနှစ်အောက် ကလေးငယ်ဦးရေ ၄,၀၀၀ နီးပါးကို စစ်ဆေးမှုများပြုလုပ်ပေးခဲ့ကာ မိခင်နဲ့ပြုစုစောင့်ရှောက်သူ ၂,၀၀၀ ဦးခန့်ကိုလည်း နှစ်သိမ့်ဆွေးနွေးပြီး အကြံဉာဏ် များပေးခဲ့တယ်လို့ ဆိုထားပါတယ်။

မြန်မာနိုင်ငံရှိ ကလေးငယ်များနဲ့ အခြားသူများအတွက် အရေးပေါ် အာဟာရ၊ ကျန်းမာရေး၊ ရေ၊ ပတ်ဝန်းကျင်နဲ့ တစ်ကိုယ်ရေသန့်ရှင်းရေး၊ ပညာရေးနဲ့ ကလေးသူငယ် ကာကွယ်ရေး အကူအညီတွေပေးနိုင်ဖို့ ဆောင်ရွက်နေကြောင်း သိရပါတယ်။

မြန်မာနိုင်ငံရှိ အားနည်းထိခိုက်လွယ်တဲ့ ကလေးငယ်များနဲ့ မိသားစုများကို ရေနဲ့ သန့်ရှင်းရေး ဝန်ဆောင်မှုများ ပံ့ပိုးပေးနေပြီး သန့်ရှင်းတဲ့သောက်သုံးရေက ကလေးငယ်များ ရှင်သန်ရပ်တည်ဖို့နဲ့ ဖွံ့ဖြိုးတိုးတက်ဖို့အတွက် အရေးပါလှပါတယ်။

ယူနီဆက်နဲ့ မိတ်ဖက်အဖွဲ့အစည်းများက မတ်လအတွင်းမှာ ရခိုင်ပြည်နယ်၊ ကချင်ပြည်နယ်၊ ရှမ်းပြည်နယ်၊ ကရင်ပြည်နယ်နဲ့ ရန်ကုန်တိုင်းဒေသကြီးတို့ရှိ လူဦးရေ ၂၃,၀၀၀ ကျော်ကို အခြေခံကျန်းမာရေးစောင့်ရှောက်မှုများလည်း ပံ့ပိုးပေးခဲ့ပါသေးတယ်။

ထို့ပြင် မတ်လအတွင်းကလည်း ပဋိပက္ခဖြစ်ပွားရာဒေသမှ လူဦးရေ ၁၀၈,၀၀၀ ကို သန့်ရှင်းသော သောက်သုံးရေများ ပံ့ပိုးပေးခဲ့တယ်လို့ ယူနီဆက်ကဆိုပါတယ်။

ymg-mnn
#Yangon_Media_Group

#Local_News
Published_ 15 April 2022

သီပေါမြို့နယ်၌ ခရီးသည်တင်မော်တော်ယာဉ်ပေါ် လိုက်ပါလာသူနှစ်ဦးထံမှ ဘိန်းဖြူများ ဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့က သတင်းထုတ်ပြန်ထားပါတယ်။

ဧပြီ ၁၃ ရက် နေ့လည် ၁၁ နာရီအချိန်ခန့် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့၀င်များနှင့် လုံခြုံရေးတပ်ဖွဲ့၀င်များပါ၀င်သော ပူးပေါင်းအဖွဲ့ဟာ သက်သေများနှင့်အတူ သီပေါမြို့နယ်၊ မူဆယ်-မန္တလေးသွား ပြည်ထောင်စုကားလမ်း၊ အိုရီယမ်တယ်တိုးဂိတ်အနီးတွင် မော်တော် ယာဉ်များအား စစ်ဆေးရှာဖွေခဲ့ပါတယ်။

လားရှိုးမြို့ဘက်မှ မိုးကုတ်မြို့ဘက်သို့ မောင်းနှင်လာတဲ့ ခရီးသည်တင်မော်တော်ယာဉ်အား စစ်ဆေးရှာဖွေရာ ယာဉ်ပေါ်မှာ လိုက်ပါလာတဲ့ ခရီးသည် စိုင်းအိုက်ဟုန် နှင့် စိုးသန်း(ခ)ရခိုင် တို့သယ်ဆောင်လာသော ခရီးဆောင်အိတ်အတွင်းနှင့် စက္ကူဂျပ်ဖာအတွင်းတို့မှ ဆပ်ပြာခွက်များဖြင့်ထည့်ထားသည့် ဘိန်းဖြူအလေးချိန် ၁.၁ ကီလို၊ ဒေသကာလ ပေါက်စျေးတန်ဖိုးငွေကျပ် ၁၆၅ သိန်းနှင့် လက်ကိုင်ဖုန်း ၂ လုံးတို့အား တွေ့ရှိသိမ်းဆည်းရမိခဲ့ပါတယ်။

စိုင်းအိုက်ဟုန် (၃၈)နှစ်နှင့် စိုးသန်း(ခ)ရခိုင်(၂၇)နှစ်တို့အား သီပေါမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အမှုဖွင့် အရေးယူထားရှိပြီး ကွင်းဆက်များ ဆက်လက်ဖော်ထုတ်လျက်ရှိတယ်လို့ သတင်းရရှိပါတယ်။

ymg-mnn
#Yangon_Media_

#WorldNews_Health
Published 15 April 2022

ကိုဗစ်-၁၉ ကူးစက်ခံခဲ့ဖူးသူတွေဟာ ရုတ်တရက်နှင့် ကြောက်မက်ဖွယ်ကောင်းတဲ့ ဘေးထွက်ဆိုးကျိုးတွေရဲ့ အန္တရာယ်ပိုကြီးမားနေပါတယ်။ သူတို့ဟာ ကိုဗစ်ကူးစက်ခံရတုန်းက ဆေးရုံတက်ရလောက်အောင် ရောဂါမဖြစ်ခဲ့သူတွေအတွက်လည်း အန္တရာယ်ကရှိနေပါတယ်လို့ ဆရာဝန်တွေကပြောပါတယ်။

သဘာဝဆေးပညာစာစောင်မှာပါတဲ့ သုတေသနစာတမ်းတစ်ခုမှာ အဲဒီရေရှည်အကျိုးဆက်ကို နှလုံးနှင့် သွေးကြောဆိုင်ရာစနစ်တွေထဲမှာ တွေ့ကြုံခံစားရနိုင်တယ်လို့ သတိပေးထားပါတယ်။

အဲဒီအကျိုးဆက်တွေထဲမှာ နှလုံးရပ်သွားတာမျိုးလည်းပါဝင်ပါတယ်။အဲဒီလိုဖြစ်ရင် CPR ဖြင့် ကုသမှုအပါအဝင် ချက်ခြင်းဆေးကုသပေးဖို့ လိုအပ်မှာဖြစ်ပါတယ်။အဲသလိုမလုပ်ရင် သေဆုံး သွားနိုင်ပါတယ်။

ကိုဗစ်နှင့် တိုက်ပွဲဝင်ခဲ့ရသူတွေဟာ ကူးစက်ခံရပြီးနောက်ပိုင်းနှစ်တွေမှာ နှလုံးရပ်နိုင်တဲ့ အန္တရာယ်ဟာ ကူးစက်မခံခဲ့ရသူတွေနှင့် နှိင်းယှဉ်ရင် ၂.၅ဆ ပိုမိုများပြားနေတယ်လို့ သုတေသနက ရှာဖွေတွေ့ရှိထားပါတယ်။

ဒါဟာ ကိုဗစ်ကနေပြန်သက်သာလာသူတွေ ခံစားနိုင်ဖွယ်ရှိတဲ့ စိုးရိမ်စရာရှိတဲ့ ဘေးထွက်ဆိုးကျိုး ၂၀ ခန့်ထဲက တစ်ခုဖြစ်ပါတယ်။ကျန်ဘေးထွက်ဆိုးကျိုးတွေကတော့ အသက်ကိုအန္တရာယ်ပြုနိုင်လောက်တဲ့ လေဖြတ်တာ၊သွေးကြောပိတ်တာတို့ပဲ ဖြစ်ပါတယ်။

ကျွမ်းကျင်သူတွေဟာ ကိုဗစ်ကူးစက်ခံထားရတဲ့ လူပေါင်း ၁၅၄,၀၀၀ အပါအဝင် အမေရိကန်က စစ်မှုထမ်း ၁၁ သန်းဆီကရရှိတဲ့ အချက်အလက်တွေအပေါ် အခြေပြုထားတာပါ။

ကိုဗစ်ရောဂါပြင်းထန်မှု အနည်းအများအပေါ်မူတည်ပြီး ရောဂါရှုပ်ထွေးမှုတွေ ပိုဖြစ်နိုင်ပါတယ်။ဒါပေမယ့် ကိုဗစ် ပျော့ပျော့ပဲ ကူးစက်ခံခဲ့ရသူတွေအတွက်လည်း အန္တရာယ်ကရှိနေပါတယ်။

Òကူးစက်ခံရတုန်းက ဆေးရုံတက်ဖို့မလိုခဲ့တဲ့သူတွေပါ အန္တရာယ်ရှိနေတာတွေ့ရှိခဲ့ပါတယ်Ó လို့ စာတမ်းမှာဖော်ပြထားပါတယ်။

ကူးစက်မခံခဲ့ရသူတွေနှင့်ယှဉ်ရင် လူတစ်ထောင်မှာ ၄၅ ဦးဟာ အဲဒီဘေးထွက်ဆိုးကျိုး အခု ၂၀ ထဲက တစ်ခုမဟုတ်တစ်ခုနှင့် ကြုံခဲ့ကြရတာတွေ့ရပါတယ်။

“ နှလုံးသွေးကြောဆိုင်ရာပြဿနာတွေဟာ အသက်ကြီးကြီး ငယ်ငယ်၊ ဆီးချိုရှိရှိ မရှိရှိ၊ အဝလွန်လွန် မလွန်လွန်၊ ဆေးလိပ်သောက်သောက် မသောက်သောက် အားလုံးအတွက် အန္တရာယ်ရှိနေတာဖြစ်ပါတယ်။ကျွန်တော်စိတ်ပူတာက အချို့သော ဒီလိုအခြေအနေတွေဟာ နာတာရှည်အခြေအနေတွေဖြစ်ပြီး ဘဝတစ်လျောက်လုံး ခံစားသွားကြရမှာပဲဖြစ်တယ်Ó လို့ လေ့လာရေးအကြီးတန်းစာတမ်းရှင်နှင့် သုတေသနမှူးချုပ် ဇီယတ်အယ်လ်အလီက ပြောပါတယ်။

Òမနက်ဖန်မှာ ခင်ဗျားနိုးလာပြီး ရုတ်တရက်ကြီးပဲ ကျွန်တော့်မှာ နှလုံးပြဿနာမရှိတော့ဘူးဆိုတာမျိုးမဟုတ်ဘူးÓ လို့ သူက ပြောပါတယ်။

ကိုဗစ်နှင့် ကြုံတွေ့ခဲ့ရသူတွေဟာ နောက် ၁၂ လကြာရင် နှလုံးချို့ယွင်းနိုင်ခြေ ၇၂ရာခိုင်နှုန်းမြင့်မားနေပါတယ်။

Source The Sun.
#Yangon_Media_Group