#Local_News
Published - 8 July 2022

လတ်တလောမှာ နယ်မြေဒေသမတည်ငြိမ်တဲ့နေရာတွေ အပါအဝင်ဒေသအသီးသီးက မသန်စွမ်းသူတွေမှာ ရာသီတုပ်ကွေးရောဂါတွေအဖြစ်များနေတယ်လို့ မြန်မာနိုင်ငံကိုယ်အင်္ဂါမသန်စွမ်းသူများအသင်းဥက္ကဌဒေါက်တာကိုကိုဦးကပြောပါတယ်၊၊

#Yangon_Media_Group

#Local_News
Published_8 July 2022

နိုင်ငံဘဏ္ဍာအသိမ်းခံထားရသည့် မော်တော်ယာဉ်များကို လေလံတင်မရောင်းဟု စီမံကိန်းနှင့်ဘဏ္ဍာရေးဝန်ကြီးဌာနက ထုတ်ပြန်ထားသည်။

"လူမှုကွန်ရက် စာမျက်နှာများပေါ်တွင် နိုင်ငံတော်မှ နိုင်ငံပိုင် (ပြည်သူ့ဘဏ္ဍာ) အဖြစ် သိမ်းဆည်းထားသည့် မော်တော်ယာဉ်များကို လေလံစနစ်ဖြင့် ထုခွဲရောင်းချမည်ဆိုသော သတင်းများ ထွက်ပေါ်နေကြောင်း သိရှိရပါသည်။ လက်ရှိအခြေအနေတွင် ဘဏ္ဍာသိမ်းမော်တော်ယာဉ်များ လေလံတင်ရောင်းချမည့် အစီအစဉ်မရှိပါကြောင်း အသိပေးကြေညာအပ်ပါသည်"ဟု အဆိုပါဌာနက ထုတ်ပြန်ထားခြင်း ဖြစ်သည်။

တရားမဝင်ကုန်သွယ်မှု တိုက်ဖျက်ရေးဦးဆောင်ကော်တီအစည်းအဝေးတွင် လေလံမပစ်မီ ဖမ်းဆီရမိသော ပစ္စည်းများပျက်စီးဆုံးရှုံးသွားလျှင် ဖမ်းဆီးပေးသူများ၏ ကြိုးပမ်းအားထုတ်မှုများ အချည်းနှီးဖြစ်နိုင်သကဲ့သို့ နိုင်ငံဘဏ္ဍာရရှိမှုလည်း လျော့နည်းသွားမည်ဖြစ်၍ ပုပ်သိုးပျက်စီးလွယ်ကုန်စည်များကို လုပ်ထုံးလုပ်နည်းနှင့်အညီ မြန်မြန်ဆန်ဆန် လေလံတင်ရောင်းချသွားမည်ဟု ဒုတိယဗိုလ်ချုပ်မှူးကြီးစိုးဝင်း က ပြောကြားထားဖူးသည်။

သို့သော်လည်း ဒုတိယဗိုလ်ချုပ်မှူးကြီးစိုးဝင်း ပြောသည့် "ပုပ်သိုးပျက်စီးလွယ်ကုန်စည်များ"တွင် တော်တော်ယာဉ်များ ပါဝင်သည်ဟု ဆိုလိုခြင်းမဟုတ်ကြောင်းလည်း နစက အဖွဲ့ဝင်တစ်ဦးက ပြောသည်။

ဒုတိယဗိုလ်ချုပ်မှူးကြီးစိုးဝင်းဦးဆောင်သည့် ကော်မတီအနေဖြင့် ၂၀၂၂ ဇန်နဝါရီလမှ မေလအထိခန့်မှန်းငွေကျပ် ၂၁ ဘီလီယံကျော် ဖမ်းဆီးရမိခဲ့ကာ ယခင်နှစ်ထက် ကျပ် ၁၃ ဘီလီယံကျော် ပိုမိုဖမ်းဆီးနိုင်ခဲ့ကြောင်း သိရသည်။

ymg/sth
#Yangon_Media_Group

#Local_News
Published - 8 July 2022

ဂျပန်ဝန်ကြီးချုပ်ဟောင်း ရှင်ဇိုအာဘေး သေနတ်နဲ့ ပစ်ခတ်လုပ်ကြံခံရတဲ့အပေါ် များစွာ အံ့ဩတုန်လှုပ်မိသလို မြန်မာနိုင်ငံအနေနဲ့ရှုတ်ချတယ်လို့ နိုင်ငံတော် စီမံအုပ်ချုပ်ရေး ကောင်စီ၊ သတင်းထုတ်ပြန်ရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောပါတယ်။

ဝန်ကြီးချုပ်ဟောင်း ရှင်ဇိုအာဘေး လုပ်ကြံခံရမှုအပေါ် မြန်မာနိုင်ငံရဲ့ သဘောထားကို မေးမြန်းရာမှာ နိုင်ငံတော် စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့က အခုလိုပြောကြားထားပါတယ်။

"ကျွန်တော်တို့ ဒီဂျပန်နိုင်ငံဝန်ကြီးချုပ်ဟောင်းရှင်ဇိုအာဘေးသေနတ်နဲ့လုပ်ကြံခံရတဲ့ သတင်းကြားသိရပါတယ်၊၊ မြန်မာနိုင်ငံအနေနဲ့ဒီသတင်းနဲ့ပတ်သက်လို့ များစွာအံ့သြတုန်လှုပ်မိပါတယ်၊၊ ဒီလိုလုပ်ကြံရန်ကြိုးစားမှုကိုလည်း ကျွန်တော်တို့ရှုတ်ချပါတယ်၊၊ ဂျပန်နိုင်ငံဝန်ကြီးချုပ်ဟောင်းရှင်ဇိုအာဘေးဟာ မြန်မာနိုင်ငံရဲ့ မိတ်ဆွေကောင်းနဲ့ မိတ်ဆွေဟောင်း ဖြစ်တဲ့အတွက် အမြန်ဆုံး ပြန်လည်ကျန်းမာစေရေး ဆုမွန်ကောင်းတောင်းပါတယ်"လို့ဗိုလ်ချုပ်ဇော်မင်းထွန်းက ပြောပါတယ်။

ဂျပန်ဝန်ကြီးချုပ်ဟောင်းကို လုပ်ကြံဖို ကြံစည်တာကို ရှုတ်ချပြီး မြန်မာနိုင်ငံအနေနဲ့လည်း ပြည်တွင်း ပြည်ပဘယ် အကြမ်းဖက်လုပ်ရပ်မျိုးကိုမဆို ပြင်းထန်စွာ ရှုတ်ချတယ်လိုလည်း ထည့်သွင်းပြောခဲ့ပါတယ်၊၊

ဂျပန်နိုင်ငံ၊ နာရာမြို့မှာ ဇူလိုင် (၈) ရက်၊ မနက် (၁၁) နာရီခွဲလောက်က ကျင်းပတဲ့ နိုင်ငံရေး အခမ်းအနားတစ်ခုမှာ ဂျပန်ဝန်ကြီးချုပ်ဟောင်း ရှင်ဇိုအာဘေး တက်ရောက်ပြီး မိန့်ခွန်းပြောနေစဉ် သေနတ်နဲ့ ပစ်ခတ်ခံခဲ့ရတာ ဖြစ်ပါတယ်။

ymg/tthl
#Yangon_Media_Group

#Local_News
Published - 8 July 2022

ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီမှ ပြည်တွင်းလုပ်သား (၃ဝဝဝ) ကျော် အလုပ်အကိုင်အခွင့်အလမ်းရရှိမည့် ရင်းနှီးမြှုပ်နှံမှုလုပ်ငန်း (၆)ခုကို ရန်ကုန်တိုင်းအတွင်း လုပ်ကိုင်ခွင့်ပြုလိုက်ကြောင်း သိရသည်။

အဆိုပါ လုပ်ငန်းများကို ရန်ကုန်တိုင်းဒေသကြီးရင်းနှီးမြှုပ်နှံမှုကော်မတီ၏ (၆/၂ဝ၂၂) ကြိမ်မြောက် အစည်းအဝေးတွင် ခွင့်ပြုခဲ့ခြင်းဖြစ်သည်။

ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီမှခွင့် ပြုထားသည့် လုပ်ငန်းများသည် စက်မှုကဏ္ဍမှဖြစ်ပြီး မြန်မာနိုင်ငံသား ရင်းနှီးမြှုပ်နှံမှုလုပ်ငန်း (၃) ခု နှင့် နိုင်ငံခြား ရင်းနှီးမြှုပ်နှံမှု လုပ်ငန်း (၃) ခုဖြစ်ကြောင်း အဆိုပါ ရင်းနှီးမြှုပ်နှံမှု လုပ်ငန်းများ၏ မတည်ငွေရင်း ပမာဏသည် အမေရိကန်ဒေါ်လာ ၆ ဒသမ ၆၅၉ သန်းဖြစ်ပြီး ပြည်တွင်း အလုပ်အကိုင် အခွင့်အလမ်းပေါင်း ၃၃၇၃ နေရာ ဖန်တီးပေးနိုင်မည်ဖြစ်ကြောင်းသိရသည်။

ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီသည် ရန်ကုန်တိုင်းဒေသကြီးအတွင်း လုပ်ဆောင်မည့် မတည်ငွေ ရင်းပမာဏ ဒေါ်လာငါးသန်း (သို့မဟုတ်) ငွေကျပ်သန်း ၆ဝဝဝ အထိ ရင်းနှီးမြှုပ်နှံမှုလုပ်ငန်းများ၏ အတည်ပြု လျှောက်လွှာများအား စိစစ်ခွင့်ပြုပေးလျက်ရှိကြောင်း သိရသည်။

ymg/sth
#Yangon_Media_Group

#Local_News
Published _ 8 June 2022

ရန်ကုန်မြို့ရှိ Mercury Online Shopping Mall ၏ ဖြည့်ဆည်းရေးစင်တာတာဝန်ခံဖြစ်သည့် တာမွေမြို့နယ်နေ ကိုအာကာမိုးကိုကို (၂၃)နှစ်သည် ယမန်နေ့ ဇူလိုင်လ ၆ ရက်ညပိုင်းက ရုံးကားဖြင့် နေအိမ်သို့ပြန်လာစဉ် ပစ္စည်းများ လုယက်ခံရ၍ သတ်ဖြတ်ခံခဲ့ရကြောင်း Mercury shopping Page တွင်ထုတ်ပြန်ထားသည်။

ကိုအာကာမိုးကိုကိုသည် နေအိမ်သိုရုံးကား Suzuki Pickup ဖြင့် အိမ်ပြန်လာစဉ် အမည်၊ နေရပ်လိပ်စာ၊ အသက်(စုံစမ်းဆဲ)တို့မှ ကားတံခါးအားဖွင့်၍ တက်လာပြီးနောက် ပါလာသည့်ပစ္စည်းများအား လုယက်စဉ် အသာတကြည်မပေးသဖြင့် ထိုးကြိတ်ရိုက်နှက်ကာသတ်ဖြတ်ခဲ့ကြကြောင်း သိရသည်။

ကိုအာကာမိုးကိုကို၏ ရုပ်အလောင်းနှင့် ရုံးကားအား လှိုင်သာယာမြို့နယ်ရှိ လမ်းဘေး၌ စွန့်ပစ်ထားခဲ့ကာ ပြန်လည်တွေ့ရှိချိန်၌ ကားပေါ်တွင် အဝတ်စုတ်၊ ကွမ်းတံတွေးများ ကျန်ခဲ့သည်ကို တွေ့ရှိခဲ့ရပြီး ဖြည့်ဆည်းရေးစင်တာ တာဝန်ခံသည် ကွမ်းစားခြင်း ဆေးလိပ်သောက်ခြင်းမရှိကြောင်း Mercury မှထုတ်ပြန်ခဲ့သည်။

လုယက်မှုကျူးလွန်သူများသည် ကိုအာကာမိုးကိုကို၏ iPhone 12 ၊ ASUS M4 13 DA Laptop နှင့် ငွေကျပ် ၄ သိန်းတို့အား ယူဆောင်သွားခဲ့ကြောင်း ယင်းမှသိရသည်။

သေဆုံးသူ ကိုအာကာမိုးကိုကို၏ ရုပ်အလောင်းအား ဇူလိုင်လ ၉ ရက်တွင် ရေဝေးသုဿာန်၌ ဂူသွင်းသဂြိုလ်သွားမည်ဖြစ်ကြောင်း သိရသည်။

ymg/NN
#Yangon_Media_Group

#MyanmarNews

Published 8 July 2022

ရှမ်းပြည်နယ်( အရှေ့ပိုင်း)တာချီလိတ်မြို့တွင် ထိုင်းနိုင်ငံမှနေရပ်သို့ပြန်လာကြသည့် ရွှေ့ပြောင်းမြန်မာအလုပ်သမားများမှ ကိုဗစ် ၁၉ ရောဂါပိုးတွေ့ရှိသူ( ၁၂)ဦး ကို ဝမ်လုံးကိုဗစ်(စင်တာ)တွင် Quarantine ထားရှိရာ ကျန်းမာရေးကောင်းမွန်လာသဖြင့် မိမိတို့နေထိုင်ရာ ဒေသသို့ ယနေ့နံနက် ၉ နာရီအချိန်က ပြန်လည်ထွက်ခွာခွင့်ပြုလိုက်ကြောင်း သိရပါတယ်။

ဇွန်လ (၂၈)ရက်နေ့က ထိုင်းနိုင်ငံမှရွှေ့ပြောင်း မြန်မာအလုပ်သမားများနှင့် ပြစ်ဒဏ်မှ လွတ်မြောက်လာသူ အမျိုးသား အမျိုးသမီးစုစုပေါင်း(၁၈၃)ဦးကို မြန်မာတာဝန်ရှိသူများက လက်ခံခဲ့ကြပြီး ဝမ်လုံးကိုဗစ်(စင်တာ)၌ Quarantine ထားရှိကာ ဒုတိယအကြိမ် ကျန်းမာရေးစစ်ဆေးမှုများ ပြန်လည်ပြုလုပ်ခဲ့ရာ၌ အမျိုးသား(၇)ဦး၊ အမျိုးသမီး(၅)စုစုပေါင်း(၁၂)ဦးတို့တွင်
ကိုဗစ် ၁၉ ရောဂါပိုးတွေ့ရှိသဖြင့် ဆက်လက်၍ Quarantine ထားရှိပြီး ကျန်းမာရေးစောင့်ရှောက်မှုပေးခဲ့ကြောင်း၊ ရောဂါပိုးကင်းစင်သူများကို ဇူလိုင် ၂ ရက်နေ့က ပြန်လည်ပို့ဆောင်ပေးခဲ့ကြောင်းသိရပါတယ်။

ယခုအချိန်၌ ပိုးတွေ့လူနာ(၁၂)ဦးတို့သည် ကျန်းမားရေးကောင်းမွန်လာပြီဖြစ်သဖြင့် လူနာစောင့်(၅)ဦး၊ စုစုပေါင်း(၁၇)ဦးတို့အား ကျန်းမာရေးအထောက် အထား စာရွက်စာတမ်းများထုတ်ပေးပြီး မိမိတို့နေရပ်အသီးသီးဖြစ်ကြသည့်တာချီလိတ်၊ ရန်ကုန်၊ မြစ်ကြီးနား၊ မန္တလေး၊ ဟဲဟိုးမြို့များသို့ ပြန်လည်ထွက်ခွာသွားခွင့်ပြုလိုက်တာဖြစ်ပါတယ်။

ymg/ys-tcl
#Yangon_Media_Group

#Local_News
Published_8 July 2022

မန္တလေး-မူဆယ် ပြည်ထောင်စုလမ်းပိုင်းရှိ ဂုတ်ထိပ်တံတားအနီး Oriental Highway ကုမ္ပဏီက တာဝန်ယူတည်ဆောက်ရန် လုပ်ဆောင်ခဲ့သော ဂုတ်ထိပ်တံတားပြန်လည်တည်ဆောက်ရန် နစက အနေဖြင့် ခွင့်ပြုထားကြောင်း သိရသည်။

ဂုတ်တွင်းကို ရှောင်နိုင်ရန် နောင်ချိုမှ ကျောက်မဲသို့ မီးရထားလမ်းတံတားနှင့်အပြိုင် ကားလမ်းတံတားအသစ်တည်ဆောက်ရန် စီမံကိန်းရေးဆွဲခဲ့ကြခြင်း ဖြစ်ပြီး လေ့လာဆန်းစစ်မှုများကို ကိုရီးယားကုမ္ပဏီနှင့် ဆောင်ရွက်ခဲ့ကြောင်း၊ ဆောက်လုပ်ရေးဝန်ကြီးဌာန တံတားဦးစီးဌာနနှင့် တည်ဆောက်မည့် ကုမ္ပဏီကြား ညှိနှိုင်းမှုများပြုလုပ်ကာ မြေယာလျော်ကြေးများလည်း ပေးအပ်ခဲ့ကြပြီးဖြစ်ကြောင်း၊ အမေရိကန်ဒေါ်လာသန်း ၁၅၀ ခန့်ကုန်ကျမည်ဟု ခန့်မှန်းထားကာ တံတားတည်ဆောက်မှုစတင်ပါက တည်ဆောက်ချိန်မှာ ၃၆ လ ခန့်သာ ကြာမြင့်နိုင်မည် ဖြစ်ကြောင်းလည်း သိရသည်။

"တံတားတည်ဆောက်ခွင့်ပြုဖို့အတွက် နိုင်ငံတော်စီမံအုပ်ချုပ်ရေး ကောင်စီကို တင်ပြခဲ့ပါတယ်။ နိုင်ငံတော်မံအုပ်ချုပ်ရေးကောင်စီအနေနဲ့လည်း မူအားဖြင့်ခွင့်ပြုပြီးဖြစ်ပါတယ်၊ ကုမ္ပဏီ အနေနဲ့ စီမံကိန်းတန်းဖိုးထပ်မံ အသေးစိတ် တွက်ချက်လျက်ရှိပြီး ရင်းနှီးမြှုပ်နှံနိုင်မယ့် လုံလောက်တဲ့ ငွေကြေးရရှိရေးစီစဉ် ဆောက်ရွက်လျက်ရှိပါတယ်၊ တံတားဦးစီးဌာနအနေနဲ့ ဘဏ္ဍာရေး ကိစ္စရပ်များကို ကုမ္ပဏီနဲ့ ညှိနှိုင်းဆောက်ရွက်လျက်ရှိပါပြီး ပြီးစီးရင်တော့ ဆက်လက်တင်ပြပြီး ခွင့်ပြုချက်ရရှိရင်လုပ်ထုံး လုပ်နည်းတွေနဲ့အညီ မြန်မာနိုင်ငံ ရင်းနှီး မြှုပ်နှံမှု ကော်မရှင်ရဲ့ ခွင့်ပြုချက်ရရှိရေး ဆက်လက်ဆောင်ရွက်တယ်။ စီမံကိန်း အကောင်အထည်ဖော်ရေး ဆက်လက်ဆောင်ရွက်သွားမှာ ဖြစ်ပါတယ်၊ တံတားပုံစံကတော့ အသေးစိတ်ရေးဆွဲ အတည်ပြုပြီးဖြစ်ပါတယ်"ဟု ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းကပြောသည်။

လက်ရှိ ဂုတ်ထိပ်တံတားမှာ ရှမ်းပြည်နယ်(မြောက်ပိုင်း) ကျောက်မဲမြို့ - နောင်ချိုမြို့ ကြားရှိပြီး သက်တမ်းနှစ်၁၂၀ ကျော်ရှိပြီ ဖြစ်ကာ ဒုတိယကမ္ဘာစစ်ကာလအတွင်းက တံတားအလယ်တိုင်လေးတိုင် ဗုံးခွဲဖျက်ဆီးခံခဲ့ရသည့်အတွက် လွတ်လပ်ရေးရပြီးနောက် ၁၉၄၈ ခုနှစ် မေလမှစတင်၍ ပြန်လည်ပြင်ဆင်မှုလုပ်ငန်းကို ဆောင်ရွက်ခဲ့ရကြောင်း သိရသည်။

ymg/mt
#Yangon_Media_Group

#DailyNews
Published - 8 July 2022

၁။ မသန်စွမ်းသူများတွင် ရာသီတုပ်ကွေးရောဂါဖြစ်ပွားမှုများနေ

၂။ ကြက်သွန်နီ ပြည်ပတင်ပို့မှု လုံးဝရပ်ဆိုင်းထားရ

၃။ နေ့စဉ်မိုးလေဝသသတင်း။

၄။ ယူကျူ့ဘ်ပေါ်တွင် ပန်းချီသင်ပေးနေသည့် ဂျပန်အဘိုးအိုဖော်လိုဝါ ၁.၄ သန်းအထိ ရှိလာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#WorldPolitics
Published 8 July 2022

ရုရှားတို့က ယူကရိန်းကိုအထူးစစ်ဆင်ရေးဆင်နွှဲရာမှာ အခုမှအရှိန်ရတာဖြစ်ကြောင်းနဲ့ စစ်မြေပြင်မှာ ရုရှားကိုအနိုင်ယူကြည့်ဖို့ အနောက်နိုင်ငံကိုစိန်ခေါ်ကြောင်း ရုရှားသမ္မတ'ဗလာဒီမီယာပူတင်'က ကြာသပတေးနေ့မှာ ပြောကြားလိုက်ပြီး ငြိမ်းချမ်းရေးဆွေးနွေးဖို့အတွက်ကတော့ လမ်းဖွင့်ထားဆဲဖြစ်ကြောင်း အသိပေးလိုက်ပါတယ်။

ပါလီမန်ခေါင်းဆောင်တွေကို 'ပူတင်'ကမိန့်ခွန်းပြောကြားခဲ့ရာမှာ ညှိနှိုင်းဆွေးနွေးဖို့အလားအလာက ပဋိပက္ခကြာရှည်လာတာနဲ့အမျှ ဝေဝါးလာနိုင်ကြောင်း ပြောကြားခဲ့ပါတယ်။

အနောက်နိုင်ငံက ရုရှားကိုအနိုင်ယူချင်နေတယ်လို့ ကြားသိရကြောင်း၊ ယင်းတို့ကိုစမ်းကြည့်စေချင်ကြောင်း ဆိုပါတယ်။

"ယူကရိန်းအတွက် နောက်ဆုံးအချိန်ထိကာကွယ်ဖို့ အနောက်နိုင်ငံက ကျုပ်တို့ကိုတိုက်ခိုက်ချင်နေတယ်ဆိုတာ ထပ်ခါထပ်ခါကြားနေရပါတယ်၊ ယူကရိန်းပြည်သူတွေအတွက်တော့ စိတ်မကောင်းဖြစ်ရပေမယ့် ဒီလိုဖြစ်ဖို့ကိုပဲ ဦးတည်လာတဲ့သဘောဖြစ်နေပါတယ်"လို့ ပြောကြားခဲ့ပါတယ်။

အနောက်နိုင်ငံတွေက ရုရှားကိုစီးပွားရေးပိတ်ဆို့မှုများပြုလုပ်ကာ ယူကရိန်းကိုအဆင့်မြင့်လက်နက်များ ထောက်ပံ့ပေးနေပြီး ရုရှားကိုဆန့်ကျင်တိုက်ခိုက်နေတယ်လို ရုရှားက စွပ်စွဲလိုက်ပါတယ်။

ရုရှားတို့ရဲ့စစ်ဆင်ရေး ခြေလှမ်းစတင်နေပြီလို့ဆိုခဲ့သလို စေ့စပ်ညှိနှိုင်းဖို့အလားအလာကိုလည်း 'ပူတင်'ကရည်ညွှန်းဖော်ပြခဲ့ပါ သေးတယ်။

"ကျုပ်တို့က စစ်ပွဲမှာဘာမှတောင် စမလုပ်ရသေးဘူးဆိုတာ အားလုံးသိထားသင့်ပါတယ်၊ တချိန်တည်းမှာပဲ ငြိမ်းချမ်းရေးစကားဆွေးနွေးမယ်ဆိုရင်လည်း မငြင်းဆန်ပါဘူး၊ ဒါပေမဲ့ အချိန်ကြာလာတာနဲ့အမျှ ငြိမ်းချမ်းရေးဆွေးနွေးဖို့ အလားအလာက ပိုမိုခက်ခဲလာလိမ့်မယ်ဆိုတာ သိထားသင့်ပါတယ်"
ဖေဖော်ဝါရီ ၂၄ ရက်နေ့ ယူကရိန်းကို စတင်ကျူးကျော်ပြီးနောက်ပိုင်း ရုရှားတို့က အရှေ့ဘက် လူဟန့်စ်ဒေသအပါအဝင် နိုင်ငံအနှံအပြားမှာလည်း သိမ်းပိုက်ထိန်းချုပ်နိုင်ခဲ့ပါတယ်။

ဒါပေမဲ့လဲ ရုရှားတို့စစ်ချီခြင်းက သုံးသပ်သူတွေခန့်မှန်းထားတာထက် များစွာနှောင့်နှေးခဲ့ပြီး စစ်ပွဲအစပိုင်းတုန်းက မြို့တော်ကိဗ်နဲ့ ဒုတိယအကြီးဆုံးမြို့ခါကိဗ်တို့ကို သိမ်းပိုက်ဖိုကြိုးစားရာမှာ ပြန်လည်ဆုတ်ခွာခဲ့ရပါတယ်။

ရုရှားအပေါ် အနောက်နိုင်ငံဆန့်ကျင်မှုနဲ့ပတ်သက်တဲ့ 'ပူတင်'ရဲ့အယူအဆတွေကို ယူကရိန်းညှိနှိုင်းရေးမှူးချုပ်'မစ်ခယ်လိုပိုဒိုလီယက်'က ပယ်ချလိုက်ပါတယ်။

"အနောက်နိုင်ငံက ဘာမှကြံစည်နေတာမဟုတ်ပါဘူး၊ ရုရှားတပ်တွေကသာ အချုပ်အခြာ အာဏာပိုင်ယူကရိန်းနိုင်ငံကိုကျူးကျော်ပြီး မြို့တွေကိုဗုံးတွေကျဲ အရပ်သားတွေကို သတ်ဖြတ်ခဲ့တာပါ၊ ရှေးရိုးစွဲဝါဒတွေ လက်ကိုင်ထားကြတဲ့သူတွေပါ၊ ယူကရိန်းဘက်ကနောက်ဆုံးကျန်တဲ့လူအထိ စစ်ပွဲဆင်နွှဲသွားမယ်ဆိုတဲ့'ပူတင်'ရဲ့စကားက လူမျိုးသုဉ်းသတ်ဖြတ်မယ်ဆိုတဲ့ သက်သေအထောက်အထားပါပဲ" လို့ 'ပိုဒိုလီယက်'က တွစ်တာမှာ ဖော်ပြထားပါတယ်။

ယူကရိန်းတို့လက်ခံညှိနှိုင်းနိုင်မယ့်ကိစ္စရပ်တွေထဲမှာ အပစ်အခတ်ရပ်စဲရေး၊ ရုရှားတပ်များ ဆုတ်ခွာခြင်း၊ ပြန်ပေးဆွဲထားတဲ့အရပ်သားများ ပြန်လည်ပေးအပ်ခြင်း၊ စစ်ရာဇဝတ်သားများနဲ့ လဲလှယ်ခြင်း၊ လျော်ကြေးကိစ္စနဲ့ ယူကရိန်းကိုယ်ပိုင်အချုပ်အခြာအာဏာကို အသိအမှတ်ပြုရေးတို့ပါဝင်ပါတယ်။

ပါလီမန်ခေါင်းဆောင်တွေက 'ပူတင်'ရဲ့မိန့်ကြားချက်များကို တုံ့ပြန်ခဲ့ကြပြီး 'A Just Russia'ပါတီမှ 'ဆာဂျီမီရိုနော့ဗ်'က ယူကရိန်းထံမှ သိမ်းပိုက်ထားတဲ့နယ်မြေတွေကို ရုရှားနိုင်ငံထဲပေါင်းစည်းရေးအဆင်ပြေစေရန် အထူးအေဂျင်စီထူထောင်ဖို့ တိုက်တွန်းခဲ့ပြီး 'ပူတင်'ကလည်း ထိုအကြောင်းကို ဆွေးနွေးဖို့ ကတိပြုခဲ့ပါတယ်။

Source: Reuters
#Yangon_Media_Group

#Local_News
Published_8 July 2022

ကမ္ဘောဇဘဏ်အပါအဝင် နာမည်ကြီးစီးပွားရေးလုပ်ငန်းရှင် ဦးအောင်ကိုဝင်း၏ ဇနီးအမည်ဖြင့် လုပ်ကိုင်ခွင့်ရ မြေ ၁၆၅၀၀ ဧကကျော်ကို နစက ပြန်သိမ်းလိုက်ကြောင်း ဇူလိုင်လ ၁ ရက် ရက်စွဲဖြင့် မြန်မာနိုင်ငံတော်ပြန်တမ်းတွင် ဖော်ပြထားသည်။

မလွတ်၊ မြေလပ်နှင့် မြေရိုင်းများစီမံခန့်ခွဲရေး ဗဟိုကော်မတီမှ ဦးအောင်ကိုဝင်းရဲ့ ဇနီးဖြစ်သူ ဒေါ်နန်းသန်းထွေး လုပ်ကိုင်ခွင့်ရရှိထားသည့်မြေ ၁၆၅၀၅ ဒသမ ၅၄ ဧကကို လုပ်ပိုင်ခွင့်၊ အသုံးပြုခွင့် ပြန်လည်ရုတ်သိမ်းကြောင်း ယင်းပြန်တမ်းတွင် ဖော်ပြထားသည်။

ယင်းမြေများမှာ တနင်္သာရီတိုင်းဒေသကြီး၊ မြိတ်ခရိုင်အတွင်းရှိ တမုတ်ချုန်းနှင့်သိန်ခွန်းကျေးရွာအုပ်စုအတွင်း စိုက်ပျိုးမြေများ ဖြစ်ပြီး သတ်မှတ်ကာလအတွင်း ဖော်ထုတ်ခြင်းမရှိသည့်အတွက် ရုတ်သိမ်းခြင်း ဖြစ်ကြောင်းလည်း သိရသည်။

ပြီးခဲ့သည့် မေလအတွင်းက ရွှေကမ္ဘောဇကုမ္ပဏီလီမိတက် လုပ်ပိုင်ခွင့်ရရှိခဲ့သော ဆီအုန်းစိုက်ပျိုးရန်ဟုဆိုကာ ရရှိထားသည့် မြေများကိုလည်း လုပ်ငန်းမဖော်ဆောင်သောကြောင့် လုပ်ကိုင်ခွင့်ရုပ်သိမ်းလိုက်ကာ ပေးသွင်းထားသည့်အာမခံကြေးများကိုလည်း နိုင်ငံတော်ဘဏ္ဍာအဖြစ် သိမ်းဆည်းလိုက်ကြောင်း သိရသည်။

ymg/mt
#Yangon_Media_group

#Local_News
Published_8 July 2022

မလေးရှားထိန်းသိမ်းရေးစခန်းများမှ မြန်မာနိုင်ငံသား ၆၀ ဦးခန့် နေရပ်ပြန်ခွင့်ရကြကြောင်း မလေးရှားနိုင်ငံဆိုင်ရာ မြန်မာသံရုံးက သိရသည်။

"ဇူလိုင်လ ၆ ရက်နေ့က မြန်မာသံရုံး၊ ကွာလာလမ်ပူမြို့တာဝန်ရှိသူတွေက မြန်မာ့အပြည်ပြည်ဆိုင်ရာ လေကြောင်းလိုင်း (MAI) ကယ်ဆယ်ရေးလေယာဉ်နဲ့ ပို့ဆောင်ပေးခဲ့ကြတာပါ။ စုစုပေါင်း ၅၉ ယောက် ဖြစ်ပါတယ်။ သူတို့တွေက
မလေးရှားနိုင်ငံမှာ ပြစ်ဒဏ်ကျခံပြီးသူတွေ ဖြစ်ပါ။ မြန်မာနိုင်ငံသားဖြစ်တဲ့ အထောက်အထားနဲ့ ပြည့်စုံတဲ့သူတွေ ဖြစ်ပါတယ်"ဟု သံရုံးတာဝန်ရှိသူက ပြောသည်။

ယင်းမြန်မာမလေးရှားနိုင်ငံ Kemayan Camp နှင့် Pekan Nanas ထိန်းသိမ်းရေးစခန်းများတွင် ရောက်ရှိနေသူများအနက်မှ မြန်မာနိုင်ငံသား ဖြစ်ကြောင်း စိစစ်မှန်ကန်သူများ ဖြစ်ကြောင်းလည်း သိရသည်။

မလေးရှားအစိုးရအနေဖြင့် အထောက်ထားမဲ့နိုင်ငံခြားသားလုပ်သားများအား ဇွန်လ ၃၀ ရက်နောက်ဆုံးထား၍ နိုင်ငံအတွင်းမှ ထွက်ခွာသွားရန် အချိန်သတ်မှတ်ပေးပြီးနောက် လက်ရှိတွင် အထောက်အထားမဲ့ နိုင်ငံခြားသားများအား ရှာဖွေဖမ်းဆီးမှုပြုလုပ်နေကြောင်း သိရသည်။

ymg/mt
#Yangon_Media_group

#Local_News
Published_8 July 2022

ထိုင်းနိုင်ငံသို့ တရားမဝင် နယ်စပ်ဖြတ်ကျော်ဝင်ရောက်လာသည့် မြန်မာနိုင်ငံသား (၃၅) ဦးကို ဇူလိုင်လ ၆ ရက်၊ ညပိုင်းတွင် ထိုင်းအာဏာပိုင်များက ဖမ်းဆီးလိုက်ကြောင်း သိရသည်။

ထိုင်းအာဏာပိုင်များက ထာ့ဆောင်ယန်မြို့နယ်၊ မဲ့ခမုနွဲ-ဖနော့ခီ လမ်းမပေါ်၌ မောင်းနှင်းလာသော မသင်္ကာဖွယ်ရာ မော်တော်ယာဉ် ၂ စီးကို စစ်ဆေးခဲ့ရာ အဆိုပါ တရားမဝင်မြန်မာများအာ တွေ့ရှိခဲ့ရခြင်းဖြစ်ကြောင်း သိရသည်။

ပထမ မော်တော်ယာဉ်တွင် အထောက်အထားမဲ့ မြန်မာနိုင်ငံသား အမျိုးသား ၇ ဦး၊အမျိုးသမီး ၃ ဦးကိုလည်းကောင်း၊ ဒုတိယမြောက် မော်တော်ယာဉ်တွင် အမျိုးသား ၁၈ ဦး၊ အမျိုးသမီး ၇ ဦး၊ ပွဲစား ၃ ဦးတို့ကိုလည်းကောင်း စစ်ဆေးတွေ့ရှိခဲ့ကြောင်း သိရသည်။

ယင်းတို့မှာ ကရင်ပြည်နယ်၊ ဘားအံမြို့ကဖြစ်ပြီး ထိုင်းနိုင်ငံ၊ ချင်းမိုင်၊ စမွတ်ပရကန်၊ ခွန်ဘူရီ၊ ပထုန်ဌာနီမြို့များသို့ သွားရောက်လုပ်ကိုင်ရန်အတွက် လူတစ်ဦး လျှင် ဘတ်ငွေ ၂၀၀၀၀၊ ၂၅၀၀၀ အထိ ပေးဆောင်ခဲ့ရကြောင်း ထိုင်းအာဏာပိုင်များထံ ဖမ်းဆီးခံရသူများက ဝန်ခံထွက်ဆိုခဲ့ကြကြောင်း သိရသည်။

ယခုအခါ ထိုင်းအာဏာပိုင်များက သက်သေခံ မော်တော်ယာဉ် ၂ စီးကို သိမ်းဆည်း၍ပြီး မြန်မာနိုင်ငံသား ၃၅ ဦး နှင့် ပွဲစား ၃ ဦးတို့ကို ထာ့ဆောင်ယန်မြို့ နယ် ရဲစခန်းတွင် အမှုဖွင့်လှစ်ထားပြီး ဥပဒေအရ အရေယူဆောက်ရွက်သွားမည် ဖြစ်ကြောင်း သိရသည်။

ymg/mt
#Yangon_Media_Group