#LocalNews
Published_11 April 2022

ရခိုင်ပြည်နယ် စစ်တွေမြိုဝေသာလီကွင်းတွင် ရခိုင်နာမည်ကြီးအဆိုတော်များဖြင့် သင်္ကြန်အကြို "ဂန္တဝင်များရဲ့အိမ်အပြန်" ဂီတဖျော်ဖြေပွဲပြုလုပ်မည်ဖြစ်ကြောင်း Rakhapura Entertainment Group ဥက္ကဋ္ဌ ဦးသိန်းထိုက်ဇော်ကပြောသည်။

ဧပြီလ ၁၂ ရက်တွင်ပြုလုပ်မည့် အဆိုပါ ဂီတဖျော်ဖြေပွဲတွင် ရခိုင်ဂီတနာမည်ကြီး အဆိုတော်များ ဖြစ်ကြသော မြတ်ခိုင်ကျော်၊ ဝင်းကိုခိုင်၊ ခိုင်ကျော်လင်း၊ သိန်းထိုက်ဇော်၊ နေထက်လင်း၊ ညီမင်းခိုင်၊ ဒိုးရ်အီ တို့ အပါဝင် အခြားနာမည်ကြီး အဆိုတော်များနှင့် မျိုးဆက်သစ် အဆိုတော်များ ပါဝင်ကြမည်ဖြစ်ကြောင်း သိရသည်။

ဂီတဖျော်ဖြေပွဲအတွက် ဝင်ခွင့်လက်မှတ်ကို ကျပ်တစ်သောင်း၊ နှစ်သောင်း၊သုံးသောင်း သတ်မှတ်ရောင်းချမည် ဖြစ်ကြောင်း၊အဆိုပါ ဂီတဖျော်ဖြေပွဲမှ ရရှိသောငွေကြေးများကို ရက္ခပူရယူနိုက်တက်ဘောလုံးအသင်းရန်ပုံငွေအဖြစ် လှူဒါန်းသွားမည်ဖြစ်ကြောင်းလည်း သိရသည်။

ymg/mt
#Yangon_Media_Group

#Local_News
Published_ 11 April 2022

သင်္ကြန်ရုံးပိတ်ရက်ကာလတွင် ရန်ကုန်ရှိ ဆိပ်ကမ်းဝန်ဆောင်မှုများ ပိတ်ရက်မရှိ ဆောင်ရွက်ပေးမှာဖြစ်ကြောင်း သိရပါတယ်။

သင်္ကြန်ရုံးပိတ်ရက်များဖြစ်သည့် ဧပြီ ၉ ရက်မှ ၁၇ ရက်အထိ ဆိပ်ကမ်းဝန်ဆောင်မှုများကို ပိတ်ရက်မရှိ ဖွင့်လှစ်ဆောင်ရွက်ပေးသွားမည်ဟု မြန်မာ့ဆိပ်ကမ်းအာဏာပိုင်က အသိပေးကြေညာထားပါတယ်။

ကုန်သွယ်မှုနှင့် ကုန်စည်စီးဆင်းမှုများ ပုံမှန်လည်ပတ်နိုင်ရေးအတွက် မြန်မာ့ဆိပ်ကမ်းအာဏာပိုင်နှင့် ရန်ကုန်ဆိပ်ကမ်းရှိ ဆိပ်ကမ်းတံတားများအားလုံး၏ ဆိပ်ကမ်းဝန်ဆောင်မှုများကို ဖွင့်လှစ်ဆောင်ရွက်ပေးသွားမှာဖြစ်ကြောင်း ဆိုပါတယ်။

ymg-mnn
#Yangon_Media_Group

Published 11 April 2022

မူးယစ်ဆေးဝါး ဂိုဏ်းတွေဟာ အန္တရာယ်ရှိလှတဲ့ ဆေးခြောက်သကြားလုံးတွေနှင့် လူငယ်တွေကို ရာဇဝတ်လုပ်ငန်းတွေထဲ သွေးဆောင်ဖြားယောင်းကာ ဆွဲသွင်းနေတယ်လို့  လန်ဒန်ထုတ် The Sun သတင်းစာကရေးသားလိုက်ပါတယ်။

ပြီးခဲ့တဲ့ အပတ်က လန်ဒန်မြို့တော်မှာ အသက်၂၃နှစ်အရွယ် ဒါမီလိုလာ အိုလာကန်မီဟာ “Gummy Bear”မူးယစ်သကြားလုံး စားခဲ့ပြီးနောက် သေဆုံးခဲ့ရပါတယ်။  

မူးယစ်ဆေးဝါးရောင်းဝယ်ဖောက်ကားသူတွေဟာ ဆယ်ကျော်သက်အရွယ်တွေနှင့် သူတို့ထက်ပင်ငယ်ရွယ်တဲ့ကလေးငယ်တွေကို ဆေးခြောက်သကြားလုံးတွေ ကျွေးပြီး သူတို့ရဲ့ ရာဇဝတ်ဂိုဏ်တွေထဲ စည်းရုံး ဆွဲသွင်းနေကြတာတွေ့ရတယ်လို့ ဗြိတိန်ထောက်လှမ်းရေးတွေကပြောပါတယ်။

ဝိတ်ခ်ဖီးမှာရှိတဲ့ အိမ်တစ်အိမ်ကနေ မကြာသေးခင်ကပဲ အနောက်ယောက်ရှိုင်းယားရဲတွေက ပေါင်စတာလင်း သုံးသိန်းတန်ဖိုးရှိတဲ့ ဆေးခြောက် စားဖွယ်ရာတွေကို သိမ်းဆည်းရမိခဲ့ပါတယ်။

အဲဒီစားဖွယ်ရာတွေဟာ သကြာလုံးတွေနှင့် ဆင်တူအောင်လုပ်ထားတာဖြစ်ပြီး အရောင်မျိုးစုံနှင့် ထုတ်ပိုးထားပါတယ်။

ပြီးခဲ့တဲ့ခြောက်လတာမျှ ကာလအတွင်း အလားတူတွေ့ရှိမှုမျိုး ၁၅၀ခန့်ကို ရရှိထားတယ်လို့ အရှေ့အင်္ဂလန်အရာရှိတွေက ပြောပါတယ်။

“ ဂိုဏ်းအဖွဲ့တွေဟာ လူငယ်တွေကို ပစ္စည်းပေးပို့တဲ့အလုပ်တွေအပါအဣင် ရာဇဝတ်မှုခင်းတွေထဲ ဖြားယောင်သိမ်းသွင်းနေတာကို ကျွန်တော်တို့ စိတ်ပူပန်မိပါတယ်”လို့ ထောက်လှမ်းရေးအရာရှိတစ်ဦးဖြစ်တဲ့ ကယ်လီဂရေးက ပြောပါတယ်။

Source The Sun

#LocalNews
Published -11 Apr 2022

ရှမ်းပြည်နယ်(တောင်ပိုင်း)၊ ရွာငံမြို့နယ်၌ တက္ကသိုလ်ဝင်စာမေးပွဲအဖြေလွှာများ ပေးပို့ပြီး ပြန်လာတဲ့ မော်တော်ယာဥ်ကို လက်နက်ကိုင်အဖွဲ့တွေက သေနတ်နဲ့ချောင်းမြောင်း ပစ်ခတ် ခဲ့တာကြောင့် လုံခြုံရေးတပ်ဖွဲ့ဝင်တစ်ဦး ကျဆုံးပြီး အမျိုးသားတစ်ဦးသေဆုံးကာ ဒုမြို့နယ်ပညာရေးမှူးတစ်ဦး ထိခိုက်ဒဏ်ရာရရှိခဲ့တယ်လို့ နစကရဲ့ ထုတ်ပြန်ချက်အရသိရပါတယ်။။

ဖြစ်စဉ်မှာ ဧပြီလ ၉ ရက်နေ့ နံနက်ပိုင်းတွင် ရွာငံမြို့နယ်ပညာရေးမှူးရုံးမှ ဒုမြို့နယ် ပညာရေးမှူး ဦးဝင်းလွင်မိုး ဦးစီးသည့် ပညာရေးဝန်ထမ်းများသည် ရွာငံမြို့နယ်စာစစ်ဌာနမှ ၂၀၂၂ ခုနှစ် တက္ကသိုလ်ဝင်တန်းစာမေးပွဲအဖြေလွှာများအား တောင်ကြီးမြို့ရှိ ပြည်နယ်ပညာရေးမှူးရုံးသို့ မော်တော်ယာဉ်တစ်စီးဖြင့် သွားရောက်အပ်နှံပြီး မွန်းလွဲ ၃ နာရီခွဲအချိန်တွင် တောင်ကြီးမြို့မှ ရွာငံမြို့သို့ အောင်ပန်း-ရွာငံကားလမ်းအတိုင်း ထွက်ခွာလာခဲ့ရာ ရွာငံမြို့နယ်၊ ပဲရင်းတောင်ကျေးရွာ အနီးအရောက်၌ လမ်း၏ဝဲယာတို့မှ အသင့်စောင့်ဆိုင်းနေတဲ့ လက်နက်ကိုင်အင်အား ၂၅ ဦးခန့်မှ လက်နက်ငယ်များဖြင့် ဝိုင်းဝန်းပစ်ခတ်ခဲ့သဖြင့် မော်တော်ယာဉ်ပေါ်ပါ လုံခြုံရေးတပ်ဖွဲ့ဝင်များနဲ့ အပြန်အလှန်ပစ်ခတ်မှုဖြစ်ပွားခဲ့တယ်လို့ သိရပါတယ်။

ချောင်းမြောင်းပစ်ခတ်ခဲ့မှုကြောင့် လုံခြုံရေးတပ်ဖွဲ့ဝင် တစ်ဦးကျဆုံးကာ အောင်ပန်း-ရွာငံလမ်းအတိုင်းမောင်းနှင်လာသည့် MDY 2G/5848 မန္တလေး-တောင်ကြီးခရီးသည်တင်ယာဉ်ပေါ် လိုက်ပါစီးနင်းလာတဲ့ ခရီးသည်တစ်ဦး နဖူးကျည်ဖောက်ဝင်ဒဏ်ရာတစ်ချက်ဖြင့် သေဆုံးခဲ့ပြီး အဖြေလွှာပို့ပြီးပြန်လာသည့် မော်တော်ယာဉ်ပေါ်ပါ ဒုမြို့နယ်ပညာရေးမှူး ဦးဝင်းလွင်မိုးတွင် ဦးခေါင်းဝဲဘက် ကျည်ရှပ်ထိဒဏ်ရာတစ်ချက် ရရှိခဲ့တယ်လို့သိရပါတယ်။

ymg/hm
#Yangon_Media_Group

#WorldPolitics
Published 11 April 2022

ဩစတြီးယားနိုင်ငံ အဓိပတိ'ကားလ်နီဟမ်မာ'က တနင်္လာနေ့မှာ ရုရှားသမ္မတ'ဗလာဒီမီယာပူတင်'နဲ့ မော်စကိုမြို့တွင် တွေ့ဆုံဆွေးနွေးသွားမှာဖြစ်ကြောင်း၊ စစ်ရေးတိုက်ခိုက်မှုတွေရပ်တန့်ပြီး ရုရှားနဲ့ယူကရိန်းတိုပဋိပက္ခမှာ ကြားဝင်ဖြေရှင်းပေးပြီး ပြေလည်မှုရရှိရေးအတွက် ကူညီပေးနိုင်ဖို့မျှော်လင့်ထားကြောင်း ကြေညာလိုက်ပါတယ်။

ယူကရိန်းကို ကျူးကျော်ခဲ့တဲ့ရုရှားနိုင်ငံကို အနောက်နိုင်ငံများက ရှောင်ဖယ်ထားဖို့ ကြိုးပမ်းလျက်ရှိရာ ယခု'နီဟမ်မာ'လာရောက်တွေ့ဆုံခြင်းက ဖေဖော်ဝါရီ ၂၄ ရက်နေ့နောက်ပိုင်း 'ပူတင်'နဲ့ ဥရောပသမဂ္ဂခေါင်းဆောင်တစ်ဦး ပထမဆုံးအကြိမ်မျက်နှာချင်းဆိုင်တွေ့ဆုံမှု ဖြစ်လာမှာဖြစ်ပါတယ်။

"ကျွန်တော်တို့က စစ်ရေးပတ်သက်မှုအရ ကြားနေအခြေအနေမှာပဲရှိပါတယ်။ ဒါပေမဲ့ ယူကရိန်းကိုကျူးကျာ်ခဲ့တဲ့အခြေအနေမှာတော့ လူသားချင်းစာနာတဲ့ဘက်ကနေ ပြတ်ပြတ်သားသားရပ်တည်ပါတယ်။ စစ်ပွဲရပ်တန့်ရပါမယ်။ လူသားချင်းစာနာထောက်ထားခြင်းအကူအညီတွေ၊ အပစ်အခတ်ရပ်စဲခြင်းတွေ၊ စစ်ရာဇဝတ်မှုစုံစမ်းစစ်ဆေးခြင်းတွေ ပြုလုပ်ဖိုလိုအပ်ပါတယ်" လို့ 'နီဟမ်မာ'က တနင်္ဂနွေနေ့က တွစ်တာမှာဖော်ပြခဲ့ပါတယ်။

ရုရှားအစိုးရအဖွဲ့မှ ပြောရေးဆိုခွင့်ရှိသူ 'ဒီမစ်ထရီပက်စ်ကော့ဗ်' ကလည်း 'ပူတင်'နဲ့ 'နီဟမ်မာ'တို့ တနင်္လာနေ့မှာ တွေ့ဆုံဆွေးနွေးသွားမှာဖြစ်ကြောင်း RIA သတင်းဌာနကို အတည်ပြုပြောကြားခဲ့ပါတယ်။

ရုရှားတိုစစ်ရေးကျူးကျော်မှုစတင်တကည်းက 'ပူတင်'ကို အနောက်နိုင်ငံများမှခေါင်းဆောင်များက ရှောင်ဖယ်ထားကြပေမယ့် မတ်လအစောပိုင်းကတော့ အစ္စရေးလ်ဝန်ကြီးချုပ်'နက်ဖ်တယ်လီဘန်းနက်'က 'ပူတင်'နဲ့ တွေ့ဆုံခဲ့ပါသေးတယ်။

မော်စကိုသို့ သွားရောက်ဖို့ မစီစဉ်ရသေးခင်မှာ 'နီဟမ်မာ'က ယူကရိန်းသမ္မတ'ဗိုလိုဒီမီယာဇယ်လန်စကီ'နဲ့ စနေနေ့ကတွေ့ဆုံခဲ့ပါတယ်။

'နီဟမ်မာ'က မော်စကိုသိုသွားရောက်မယ့်အစီအစဉ်အကြောင်း သတင်းထောက်တွေကိုပြောကြားခဲ့ရာမှာ "ရုရှားနဲ့ယူကရိန်းတို ပြေလည်မှုရရှိရေး ကြားဝင်စေ့စပ်သွားမှာဖြစ်ပြီး စစ်ပွဲရပ်တန့်ဖိုတတ်စွမ်းသမျှလုပ်ဆောင်သွားဖိုနဲ့ ငြိမ်းချမ်းရေးလမ်းစဉ်အတိုင်းဆောင်ရွက်သွားနိုင်ဖို မျှော်လင့်ထားပါတယ်" လို ဩစတြီးယားသတင်းဌာန APA ကို ပြောကြားခဲ့ပါတယ်။

ဒါပေမဲ့လည်း မျှော်မှန်းချက်အောင်မြင်ဖို့ကတော့ အခွင့်အရေးနည်းတယ်လို့ ဝန်ခံခဲ့ပါတယ်။

ဩစတြီးယားက ကြားနေအဖြစ်ကြေညာထားပေမယ့် ယူကရိန်းပြည်သူများအတွက် လူသားချင်းထောက်ထားမှုအကူအညီများ ပံ့ပိုးပေးလျက်ရှိတဲ့အပြင် အရပ်သားတွေအတွက် ဦးထုပ်ခေါင်းဆောင်တွေနဲ့ ကျည်ကာဝတ်စုံတွေထောက်ပံ့ပေးခဲ့ပါတယ်။

ကွန်ဆာဗေးတစ်လက်ယာနိုင်ငံရေးသမား'နီဟမ်မာ'က 'ဇယ်လန်စကီ'နဲ့တယ်လီဖုန်းပြောဆိုခဲ့ပြီးနောက် စာနာထောက်ထားစိတ်ပေါ်ပေါက်လာပြီး ထောက်ပံ့ကူညီပေးချင်ကြောင်း ဖော်ထုတ်ပြောဆိုခဲ့ပါတယ်။

ဂျာမနီမီဒီယာအချို့နဲ့ ယူကရိန်းအာဏာပိုင်အချို့ကတော့ 'နီဟမ်မာ'မော်စကိုကို သွားရောက်မယ့်ခရီးစဉ်အပေါ် ဝေဖန်မှုပြုလုပ်ခဲ့ပါတယ်။

ရုရှားစစ်တပ်များ အဝိုင်းခံထားရတဲ့ ယူကရိန်းမြို့တစ်မြို့ဖြစ်တဲ့ မာရီယူပေါလ်မှလက်ထောက်မြို့တော်ဝန်'ဆာဂျီအိုလော့ဗ်'က အခုလက်ရှိအချိန်မှာ ဒီလိုသွားရောက်ဆွေးနွေးတာက လက်ခံနိုင်စရာမရှိဘူးလို့ ဂျာမနီသတင်းဌာန Bild ကို ပြောပြသွားပါတယ်။

"အခုအချိန်အထိ ယူကရိန်းမြေမှာ ရုရှားတို့စစ်ရာဇဝတ်မှုတွေ ကျူးလွန်နေဆဲဖြစ်ပါတယ်။ ဒီလိုအချိန်မှာ 'ပူတင်'နဲ့ သွားရောက်တွေ့ဆုံမယ်ဆိုတာကို ကျွန်တော်နားမလည်နိုင်ပါဘူး။ သူနဲ့ ဘယ်လိုလုပ်သွားညှိနှိုင်းလို့ရမှာလဲ" လို့ တီဗီအစီအစဉ်မှာ ပြောကြားသွားပါတယ်။

Source: Reuters
#Yangon_Media_Group

#WorldNews_Health
Published 11 April 2022

နေ့စဉ် ရေလုံလောက်အောင်မသောက်တဲ့သူတွေဟာ သေစေလောက်တဲ့ ရောဂါဆိုးကံကြမ္မာတွေနှင့် ကြုံလာရမယ့် အန္တရာယ်ရှိနေပါတယ်။

နှလုံးချို့ယွင်းမယ့် အန္တရာယ်က ရှောင်ရှားနိုင်ဖို့အတွက် လူတွေကို နေ့စဉ် ရေကို (၆)ခွက်ကနေ (၈)ခွက်အထိ သောက်သုံးကြဖို့ သိပ္ပံပညာရှင်တွေက တိုက်တွန်းထားပါတယ်။

နှလုံးကနေ သွေးတွေကို ခန္ဓာကိုယ်အနှံ့ မှန်မှန်ကန်ကန် မပို့လွှတ်နိုင်တဲ့အခါ နှလုံးချို့ယွင်းတာ ဖြစ်တတ်ပါတယ်။ဘာဖြစ်လို့လဲဆိုတော့ နှလုံးဟာ အားနည်းလာတာ ဒါမှမဟုတ် တောင့်လာတာဖြစ်လာလို့ပါ။

ဒါဟာ ရေရှည်အခြေအနေဖြစ်ပြီး အချိန်နှင့်အမျှ ဆိုးရွားလာတတ်ပါတယ်။
Òဆားကို လျှော့စားတာ၊ ရေကိုလုံလောက်အောင်သောက်သုံးတာနှင့် အမြဲတမ်း ရေဓာတ်ရှိနေစေတာဟာ နှလုံးကို အထောက်အကူပြုပါတယ်။ပြီးတော့ ရေရှည်မှာ နှလုံးရောဂါဖြစ်နိုင်ချေကိုလည်း လျှော့ချပေးနိုင်ပါတယ်Ó လို့ လေ့လာမှုအသစ်ပြုလုပ်ခဲ့တဲ အဖွဲ့ခေါင်းဆောင် ဒေါက်တာ နာတာလီယာဒီမစ်ထရီဗာက ပြောပါတယ်။

ဒေါက်တာ ဒီမစ်ထရီဗာဟာ အမေရိကန်က လူကြီး ၁၂,၀၀၀ ဦးကို လေ့လာတဲ့ အမေရိကန် အမျိုးသားကျန်းမာရေးအင်စတီကျူ သုတေသနအဖွဲ့ကို ဦးဆောင်သူဖြစ်ပါတယ်။

သူတို့ဟာ အသက် ၄၅ နှစ်နှင့် ၆၆ နှစ်အကြားလူကြီးတွေရဲ့ ၂၅ နှစ်ကြာ ကျန်းမာရေးမှတ်တမ်းတွေကို လေ့လာခဲ့ပါတယ်။ သူတို့ဟာ အစပိုင်းမှာ နှလုံးချို့ယွင်းမှုမရှိခဲ့ကြသူတွေဖြစ်ပါတယ်။

အဲဒီထဲက ၁၁.၅၆ ရာခိုင်နှုန်းဖြစ်တဲ့ လူပေါင်း ၁,၃၆၆ ဦးဟာ နောက်ပိုင်းမှာ နှလုံးချို့ယွင်းမှုတွေ ဖြစ်လာခဲ့ကြပါတယ်။ အသက်ကြီးရင့်လာတာနှင့် အဖြစ်များလာကြပါတယ်။သုတေသနအဖွဲ့ဟာ သွေးထဲက ဆိုဒီယမ်ပမာဏာကိုစစ်ဆေးခဲ့ကြပါတယ်။

တစ်စုံတစ်ယောက်ရဲ့ ရေဓာတ်ကျဆင်းလာရင် ဆိုဒီယမ်တက်လာတတ်ပါတယ်။ဆိုဒီယမ် ပုံမှန်ပမာဏဟာ ၁၃၅ နှင့် ၁၄၃ mEq/L အကြားရှိရမှာဖြစ်ပါတယ်။ဒါပေမယ့် သက်လတ်ပိုင်းရောက်တဲ့အခါ ဆိုဒီယမ်ပမာဏာက ၁၄၃ mEq/L ဝန်းကျင်ရှိနေရင် အဲဒီထက်ပမာဏာနည်းသူတွေထက်စာရင် နှလုံးချို့ယွင်းမှုဖြစ်နိုင်ချေ ၃၉ ရာခိုင်နှုန်းပိုလာတတ်ပါတယ်။

အသက် ၇၀ ကျော်သူတွေဆိုရင် ၁၄၃ mEq/L ရှိနေပါက နှလုံးရောဂါအန္တရာယ်ဖြစ်နိုင်ချေ ၆၂ ရာခိုင်နှုန်းအထိရှိလာပါတယ်။

အစောပိုင်းတွေ့ရှိချက်တွေအရ ရေဓာတ်ကောင်းကောင်းရှိနေသူတွေဟာ နှလုံးချို့ယွင်းမှုကို ဦးတည်စေတဲ့ နှလုံးအတွင်း အပြောင်းအလဲတွေကို ကာကွယ်နိုင်တာ ဒါမှမဟုတ်အပြောင်းအလဲကို နှေးစေတာ ဖြစ်လာနိုင်ဖွယ်ရှိကြောင်း တွေ့ရှိရပါတယ်။

ရေဓာတ်ဆိုတာ ရေ ဒါမှမဟုတ် လက်ဖက်ရည် သို့မဟုတ် ဖျော်ရည် အားလုံးပါဝင်ပါတယ်။ရေဓာတ်ဟာ ခန္ဓာကိုယ် ကောင်းစွာလုပ်ဆောင်နိုင်ဖို့ မရှိမဖြစ်အရေးကြီးတဲ့အပြင် နှလုံးသွေးပို့လွှတ်မှုကိုလည်း စွမ်းရည်ကောင်းစေအောင် အထောက်အပံ့ဖြစ်ပါတယ်။

ရေဓာတ်အမြဲတမ်းထိန်းသိမ်းထားတာဟာ သွေးကြောတွေအလုပ်ကောင်းကောင်းလုပ်ဖို့နှင့် သွေးလှည့်ပတ်မှုကို အထောက်အကူပေးပါတယ်။

အဲဒါကြောင့် အမျိုးသမီးတွေဟာ တစ်ရက်ကို ရေ(၆)ခွက်ကနေ (၈)ခွက်အထိနှင့် အမျိုးသားတွေဟာ ရေ(၈)ခွက်ကနေ (၁၂)ခွက်အထိသောက်သုံးကြဖို့ သုတေသနပညာရှင်တွေက ထောက်ခံမှုပေးထားပါတယ်။

နှလုံးကျန်းမာရေးအတွက် ပုံမှန်လေ့ကျင့်ခန်းလုပ်ဖို့၊ဆေးလိပ်မသောက်ဖို့၊ အရက်မသောက်ဖို့နှင့် ကဖင်းကို အတန်အသင့်သာ သောက်သုံးဖို့နှင့် ကျန်းမာရေးနှင့်ညီညွတ်တဲ့ အစားအစာတွေစားဖို့ ပညာရှင်တွေက ထောက်ခံပြောကြားထားပါတယ်။ ငန်တဲ့အစားအစာတွေ၊ချိုလွန်းတာတွေနှင့် အဆီများတာတွေကို ကန့်သတ်သင့်ပါတယ်။

Source: NYPost
#Yangon_Media_Group

#LocalNews
Published_11 April 2022

ယူနက်စကိုပညာရှင်များ လာရောက်မစစ်ဆေးမီ မြောက်ဦးရှေးဟောင်းနယ်မြေအတွင်းမှ ကျူးများကို အပြီးဖယ်ရှားမည်ဖြစ်ကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန တာဝန်ရှိသူများက ပြောသည်။

"နောက် ၆ လအတွင်းမှာ ဖယ်ရမယ်။အပြီးပေါ့။အခုဆိုရင် မြောက်ဦးမြို့ ရှေးဟောင်းနယ်မြေအတွင်းမှာ ကျူးကျော်နေအိမ်တွေနဲ့ အခြားအဆောက်အအုံ ၆၀၀ လောက်ရှိတယ်။ အဓိက အနေနဲ့တော့ ကျုံးပတ်ဝန်းကျင် နဲ့ ရေအရင်းမြစ်ရှိတဲ့ နေရာဝန်းကျင်တွေက ဟာတွေကို အဓိက ဖယ်ရမယ်"ဟု ရှေးဟောင်းသုတေသနနှင့်အမျိုးသားပြတိုက်ဦးစီးဌာန တာဝန်ရှိသူက ပြောသည်။

အဆိုပါ ဖယ်ရှားမည့် ကျူးကျော်နေထိုင်သူများအား အစားထိုးနေရာ ပြန်လည်ပေးအပ်နိုင်ရန်လည်း ပြည်နယ်အစိုးရအဖွဲ့အနေဖြင့် စီစဉ်ပေးမည်ဖြစ်ကြောင်းလည်း သိရသည်။

ရခိုင်ပြည်နယ် မြောက်ဦးဒေသကမ္ဘာ့ရှေးဟောင်းအမွေအနှစ် စာရင်းဝင်နိုင်ရေးအတွက် အီတလီနိုင်ငံသားပညာရှင်ကလည်း ပြီးခဲ့သည့် ဖေဖော်ဝါရီလ ၉ ရက်က ကွင်းဆင်းခဲ့ကာ လက်ရှိတွင် သက်ဆိုင်ရာ ဌာနပေါင်းစံမှလည်း အမှိုက်ကောက်သည့်လုပ်ငန်းများကို ဆောင်ရွက်လျက်ရှိကြောင်း သိရသည်။

ရှေးဟောင်းယဉ်ကျေးမှုဒေသ ကမ္ဘာ့အမွေအနှစ်စာရင်း တင်သွင်းရေး အပြီးသတ်အဆိုပြုလွှာအချောကို ပြီးခဲ့သည့် ၂၀၂၁ ခုနှစ် ဒီဇင်ဘာလ ၃၀ ရက်က လက်ရှိ ပြင်သစ်နိုင်ငံ သံအမတ်ကြီး ၊ မြန်မာနိုင်ငံ၏ ယူနက်စကိုဆိုင်ရာ သံအမတ်ကြီးမှတစ်ဆင့် ပေးပိုခဲ့ပြီး၂၀၂၃ ခုနှစ် နှစ်လယ်ပိုင်းတွင် ကမ္ဘာ့အမွေအနှစ်စာရင်း ဝင်၊မဝင် ဆုံးဖြတ်ရန် ကနဦး စစ်ဆေးရေးအဖွဲ့များက ၂၀၂၂ ခုနှစ် စက်တင်ဘာလနှင့် အောက်တိုဘာလ အတွင်း လာရောက်ရန် ရှိနေကြောင်းလည်း သိရသည်။

အေဒီ ၁၄၃၀ ပြည့်နှစ်တွင် ရခိုင်ဘုရင်မင်းစောမွန် စတင်တည်ထောင်ခဲ့သော မြောက်ဦးမြို့သည် ရခိုင်ဘုရင်အဆက်ဆက် နှစ်ပေါင်း ၃၅၄ နှစ်တိုင်တိုင် ထီးနန်းစိုးစံအုပ်ချုပ်ခဲ့သော မင်းနေပြည်တော်တစ်ခုဖြစ်ပြီး သိမ်ကုန်းပေါင်၊ ငွေတောင်ပေါက်စသည့် ကျုံးစုစုပေါင်း ၄၀ ကျော်ရှိကြောင်းလည်း သိရသည်။

ymg/mt
#Yangon_Media_Group

#WorldHealth
Published 11 April 2022

မိုဒါနာကုမ္ပဏီက ကန်ထရိုက်ပေးထားတဲ့ ရိုဗီက ထုတ်လုပ်ထားတဲ့ မိုဒါနာကိုဗစ်ကာကွယ်ဆေးပေါင်း ၇၆၄,၉၀၀ doses ကို ပြန်လည်သိမ်းယူနေတယ်လို့ သောကြာနေ့က ကြေညာခဲ့ပါတယ်။ အဲဒီမိုဒါနာကိုဗစ်ကာကွယ်ဆေးရည်တွေထဲမှာ ပြင်ပက အရာဝတ္တုတစ်ခုကြောင့် မသန့်မပြန့်ဖြစ်နေတာကို တွေ့ရှိခဲ့လို့ ယခုလိုပြန်လည်သိမ်းယူတာဖြစ်ပါတယ်။

ဘေးကင်းစိတ်ချရမှုဆိုင်ရာ ပြဿနာတစ်စုံတစ်ခု မတွေ့ရသေးကြောင်း မိုဒါနာကပြောပါတယ်။ အဲဒီဆေးတွေကို နော်ဝေ၊ပိုလန်၊ပေါ်တူဂီ၊စပိန်နှင့်ဆွီဒင်နိုင်ငံတွေကို ဇန်နဝါရီလကတည်းက တင်ပို့ထားတာဖြစ်ပါတယ်။

ဆေးထုတ်လုပ်သူကတော့ အဲသလိုမသန့်မပြန့်ဖြစ်တာကို ဆေးတစ်ပုလင်းထဲမှာသာ တွေ့ရှိခဲ့တာဖြစ်ပေမယ့် ကြိုတင်ကာကွယ်နိုင်စေဖို့အတွက် အဲဒီတစ်သုတ်လုံးကို ပြန်သိမ်းယူတာဖြစ်တယ်လို့ ပြောပါတယ်။ ဒါပေမယ့် ပုလင်းထဲမှာတွေ့တဲ့ မသန့်မပြန့်ဆိုတာ ဘာကိုပြောတာလဲဆိုတာကိုတော့ သူတို့က ဖွင့်မပြောပါဘူး။

ပြီးခဲ့တဲ့နှစ်ကလည်း မိုဒါနာကာကွယ်ဆေးအချို့ပုလင်းတွေကို ဂျပန်နိုင်ငံမှာ အစိုးရက သုံးစွဲမှုရပ်ဆိုင်းခဲ့ပါတယ်။ အဲဒီနောက်တော့ အချို့ပုလင်းတွေထဲမှာ သံမဏိအမှုန်အမွှားတွေတွေ့ရကြောင်း စစ်ဆေးပေါ်ပေါက်ပြီးနောက် မိုဒါနာက ဆေးပုလင်းတွေကိုပြန်သိမ်းယူခဲ့ပါတယ်။

တစ်ကမ္ဘာလုံးမှာ ယခုထက်ထိ မိုဒါနာ ကာကွယ်ဆေးပေါင်း သန်း ၉၀၀ doses ကို ထိုးနှံပေးပြီးဖြစ်ပါတယ်။ အခြားဆေးပုလင်းတွေမှာ အဲသလိုမသန့်မပြန့်ဖြစ်တာ ရှိနိုင်မယ့်အန္တရာယ်မရှိနိုင်ဘူးလို့ ယုံကြည်တယ်လို့ မိုဒါနာက သောကြာနေ့ကပြောပါတယ်။

Source Reuters
#Yangon_Media_Group

#Local_News
Published_ 11 April 2022

မန္တလေးတိုင်းဒေသကြီး၊ ပြင်ဦးလွင်မြို့နယ်၌ ဧပြီ ၈ ရက် ညနေ ၅ နာရီခန့်က ငွေကျပ် ၁,၈၇၁ သိန်းကျော်တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်း သိရပါတယ်။

လုံခြုံရေးတပ်ဖွဲ့ဝင်များနှင့်အဖွဲ့သည် သက်သေများနှင့်အတူ ပြင်ဦးလွင်မြို့နယ်၊ ဆေးတလုံးကျေးရွာ-ပွဲကောက်ကျေးရွာကြားတွင် မော်တော်ယာဉ်များအား စစ်ဆေးရှာဖွေစဉ် ဆေးတလုံးကျေးရွာဘက်မှ ပွဲကောက်ကျေးရွာဘက်သို့ အောင်ဇော်စိုးဝင်း၊ မောင်းနှင်ပြီး ဒေါ်ခင်မို့မို့ဝင်း လိုက်ပါလာသော AD VAN မော်တော်ယာဉ်အားရပ်တန့်စစ်ဆေးရှာဖွေရာ သိုဝှက်သယ်ဆောင်လာသည့် စိတ်ကြွရူးသွပ်ဆေးပြား ၁၁၈,၈၀၀ ပြား၊ လက်ကိုင်ဖုန်း ၂ လုံးနှင့် မြန်မာငွေကျပ် ၅ သိန်းတို့ကို တွေ့ရှိသိမ်းဆည်း ရမိခဲ့ပါတယ်။

ဖော်ထုတ်ချက်အရ ည ၆ နာရီခွဲတွင် ၎င်းတို့နေထိုင်သည့် ပြင်ဦးလွင်မြို့နယ်၊ ရပ်ကွက်ကြီး (၁၂) ရှိ နေအိမ်အား ၀င်ရောက်ရှာဖွေရာ နေအိမ်အတွင်းမှ စိတ်ကြွရူးသွပ် ဆေးပြား ၅,၉၄၀ ပြား၊ စုစုပေါင်းစိတ်ကြွရူးသွပ်ဆေးပြား ၁၂၄,၇၄၀ ပြား၊ ကာလပေါက်ဈေး တန်ဖိုးငွေကျပ် ၁၈၇၁.၁ သိန်း အားသိမ်းဆည်းရမိခဲ့ပါတယ်။

အောင်ဇော်စိုးဝင်း (၄၈) နှစ်နှင့် ဒေါ်ခင်မို့မို့ဝင်း (၄၉) နှစ်တို့အား ပိတ်ချင်းမြောင် နယ်မြေရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာ ဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း သတင်းရရှိပါတယ်။

ymg-mnn
#Yangon_Media_Group

Published 11 April 2022

မြန်မာ့ကော်ဖီအမှတ်တံဆိပ်များကို ကမ္ဘာ့ဈေးကွက်သို့ထိုးဖောက်နိုင်ရေးအတွက်  ကော်ဖီစိုက်ပျိုးထုတ်လုပ်သည့် ပုဂ္ဂလိက လုပ်ငန်းများကို သက်ဆိုင်ရာဝန်ကြီးဌာနများက လိုအပ်သည့် အရင်းအနှီးတွေ ကူညီဆောင်ရွက်ပေးမယ်လို့သိရပါတယ်။

ဧပြီလ(၁၀)ရက်က မန္တလေးတိုင်းဒေသကြီး ပြင်ဦးလွင်မြို့မှာ ကော်ဖီလုပ်ငန်းရှင်တွေနှင့် တွေ့ဆုံရာတွင်  နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင်က ပြောကြားခဲ့တာဖြစ်ပါတယ်။

“ကော်ဖီစိုက်ပျိုးမှုနှင့်ပတ်သက်ပြီး စနစ်ကျနသည့် စိုက်ပျိုးမှု စနစ်ရှိရမည်ဖြစ်သလို လိုအပ်တဲ့ သွင်းအားစုတွေကိုလည်း မှန်မှန်ကန်ကန်ထည့်သွင်းဖို့လိုပါတယ်။အဲသလိုဆောင်ရွက်မှ အရည်အသွေးကောင်းမွန်တဲ့ ကော်ဖီရရှိမည်ဖြစ်ပါတယ်။ ကော်ဖီထုတ်ကုန်တွေ ဈေးကွက်ရရှိဖို့နှင့်  အရည်အသွေးမြင့် ထုတ်ကုန်ဖြစ်စေဖို့  အစိုးရက ဝိုင်းဝန်းကူညီ ဆောင်ရွက်ပေးမည်ဖြစ်ပါတယ်။ လိုအပ်တဲ့ အရင်းအနှီးတွေကိုလည်း သက်ဆိုင်ရာ ဝန်ကြီးဌာနတွေက  ကူညီဆောင်ရွက်ပေးသွားမှာဖြစ်လို့  အမှန်တကယ် အောင်မြင်ပြီး မြန်မာ့ ကော်ဖီ(Myanmar Coffee Brand)ကို ကမ္ဘာ့ဈေးကွက်သို့ ထိုးဖောက်နိုင်ရေး ကြိုးပမ်းဆောင်ရွက်ကြစေလိုပါတယ်” လို့ နစကဥက္ကဋ္ဌက ပြောကြားခဲ့ပါတယ်။

ကော်ဖီလုပ်ငန်းရှင်တွေကလည်း ကော်ဖီစိုက်ပျိုးရေးစီမံကိန်းကို ဖော်ဆောင်ရာတွင် အစိုးရနှင့်သက်ဆိုင်ရာ ဝန်ကြီးဌာန တွေကတာဝန်ရှိသူတွေ၊ ကော်ဖီလုပ်ငန်းရှင်တွေအားလုံး ညီညီညွတ်ညွတ်ဖြင့် လုပ်ငန်းအောင်မြင်အောင် ဝိုင်းဝန်းဆောင်ရွက် ဖို့ လိုအပ်တဲ့အခြေအနေတွေ၊ ကော်ဖီစီမံကိန်းတွေ စတင်ဆောင်ရွက်ပေးခဲ့စဉ် လုပ်ငန်းအောင်မြင်စွာ ဆောင်ရွက်နိုင်ခဲ့ပေမယ့် နောက်ပိုင်းတွင် မြန်မာ့ဈေးကွက်နှင့် ကမ္ဘာ့ဈေးကွက် ချိတ်ဆက်ဆောင် ရွက်နိုင်ခဲ့ခြင်းမရှိတဲ့အတွက် ကော်ဖီလုပ်ငန်းရှင်များ ထိခိုက်နစ်နာခဲ့ရတာတွေ၊ မြန်မာနိုင်ငံကော်ဖီလုပ်ငန်းရှင်များအသင်းကို ဖွဲ့စည်းပြီး နိုင်ငံတကာ ကော်ဖီ  ဈေးကွက်ကို ထိုးဖောက်နိုင် ရေးဆောင်ရွက်ခဲ့ပြီး လက်ရှိတွင် ကော်ဖီသည် အလားအလာကောင်းသည့် ဈေးကွက် ရရှိလာတဲ့ အနေအထား၊ ကော်ဖီလုပ်ငန်းအောင်မြင်စွာဖြစ်ပေါ်လာရေး၊ မြန်မာ့ကော်ဖီကို ကမ္ဘာ့ဈေးကွက်သို့ ထိုးဖောက်နိုင်ရေးအတွက် အစိုးရအဖွဲ့မှ တာဝန်ရှိသူတွေက ဦးဆောင်ပြီး လုပ်ငန်းရှင်တွေအားလုံး ကြိုးပမ်းဆောင်ရွက်ဖို့လိုအပ်မှုတွေ၊အစိုးရက ခွင့်ပြုပေးထားတဲ့ စိုက်ပျိုးမြေ ဧရိယာတွေအတွင်း တရားမဲ့ဝင်ရောက်နေထိုင်ခြင်း၊ ရာသီသီးနှံများ စိုက်ပျိုးခြင်းတွေကြောင့် ကော်ဖီလုပ်ငန်းရှင်တွေရဲ့ ထိခိုက်နစ်နာနေရမှုတွေကို ဖြေရှင်းဆောင်ရွက်ပေးစေလိုတာတွေကို ဆွေးနွေးတင်ပြခဲ့ကြတယ်လို့ သတင်းထုတ်ပြန်ချက်အရသိရပါတယ်။

ဆွေးနွေးပွဲမှာ ကော်ဖီစိုက်ပျိုးမည်ဆိုကာ မြေကွက်တွေရယူထားပြီး လုပ်ငန်းဆောင်ရွက်ခြင်းမရှိကြတဲ့ လုပ်ငန်းရှင်တွေကို နစကဥက္ကဋ္ဌက သတိပေးစကားပြောခဲ့ပါတယ်။

လုပ်ငန်းဆောင်ရွက်မှု မရှိတာတွေကို  စည်းကမ်းနှင့်အညီ ဆောင်ရွက်သွား မည်ဖြစ်ပြီး လုပ်ငန်းဆောင်ရွက်ခြင်းရှိသော်လည်း တရားမဲ့နေထိုင်မှုများ၊ သဘာဝဘေးအန္တရာယ်များကြောင့် ထိခိုက်နစ်နာပျက်စီးခဲ့မှုများကို ပြန်လည် စိစစ်ဆောင်ရွက် ပေးသွားမည်ဖြစ်တယ်လို့သူကပြောပါတယ်။

ကျူးကျော်မှုများဖြစ်ပေါ်နေခြင်းဟာ  သတ်မှတ်ကာလ အတွင်း စိုက်ပျိုးဧရိယာအတွင်း၌ လုပ်ငန်းဆောင်ရွက်မှု မရှိခဲ့ခြင်း ကြောင့်ဖြစ်တဲ့အတွက် လုပ်ငန်းရှင်များ အနေဖြင့်လည်း မှန်မှန်ကန်ကန် အသုံးချဆောင်ရွက်ရန်လိုကြောင်းနှင့် စည်းကမ်းနှင့် မညီညွတ်သည့် ခွင့်ပြု မြေဧရိယာများကို ပြန်လည်သိမ်းဆည်းပြီး နောက်ပိုင်းတွင်လည်း စနစ်တကျ စိုက်ပျိုးနိုင်ရေး ဆောင်ရွက်သွားမည်ဖြစ်ကြောင်းကို နစကဥက္ကဋ္ဌက သတိပေးခဲ့တာဖြစ်ပါတယ်။

မြန်မာနိုင်ငံဟာ ဒီနှစ်ကော်ဖီရာသီမှာ နိုင်ငံခြားကို ကော်ဖီတန်ချိန် ၄၅၀မှ ၅၀၀အကြား တင်ပို့ဖို့ရှိတယ်လို့ ပြင်ဦးလွင်မြို့က ကော်ဖီသုတေသနနှင့်နည်းပညာဖြန့်ဝေရေးစင်တာကို ကိုးကားပြီး ပြည်တွင်းမီဒီယာတစ်ခုမှာ ဇန်နဝါရီလတုန်းက သတင်းဖော်ပြခဲ့ပါတယ်။ အဲသလိုတင်ပို့ရာမှာ အမေရိကန်၊နယ်သာလန်၊ဩစတြေးလျ၊ဂျပန်၊ကိုးရီးယား၊   ပြင်သစ်၊ဂျာမနီ၊  ထိုင်းနှင့် တရုတ်နိုင်ငံတွေပါဝင်တယ်လို့ အဲဒီသတင်းမှာ ဆက်လက်ဖော်ပြခဲ့ပါတယ်။

Published 10 April 2022

တောင်ကိုရီးယားနိုင်ငံသားတွေဟာ ဆိုးလ်မြို့တော်က ဘူဂွမ်ချီယွမ်ချောင်းကို စနေနေ့က သွားရောက်လည်ပတ်ကြပါတယ်။ ဘာဖြစ်လို့လဲဆိုတော့ အဲဒီနေရာတစ်ဝိုက်မှာ ချယ်ရီတွေဟာ ဝေနေအောင် အပြည့်အဝဖူးပွင့်နေလို့ဖြစ်ပါတယ်။ တောင်ကိုရီးယားမှာ ကူးစက်မှုတွေမြင့်မားနေပေမယ့် ကန့်သတ်ချက်တွေဖြေလျော့ပေးလိုက်တာကြောင့် လည်ပတ်သူတွေ များပြားနေပါတယ်။

ကိုဗစ်ကန့်သတ်ချက်တွေကြောင့် တစ်နှစ်တစ်ကြိမ် ဘူဂွမ်ချီယွမ်ချောင်းမှာ ကျင်းပတဲ့ ချယ်ရီပွင့်ချိန်ပွဲတော်ကို ဖျက်သိမ်းခဲ့တာ (၂)နှစ်ရှိခဲ့တာဖြစ်ပါတယ်။

Source AFP

#TV Yangon Times Mattersအစီအစဉ်
Published - 10 April 2022

အစီအစဉ်တင်ဆက်သူ ဆရာဟိန်းလတ် က ဦးခင်မောင်လွင်(လွတ်လပ်သောလူသား) နှင့်အတူ
_ ဆရာ ဦးခင်မောင်လွင်(လွတ်လပ်သောလူသား) ရေးသားတဲ့
" လွတ်လပ်သော လူသား" ဆိုတဲ့ စာအုပ်နှင့် လွတ်လပ်မှုအပေါ် ဆရာရဲ့ ခံယူချက်သဘောထား
_ "လွတ်လပ်‌‌သောစာပေအကြောင်း" နှင့်
_ "လွတ်လပ်သောဂီတအကြောင်း" စသဖြင့် စိတ်ဝင်စားဖွယ်ရာ အကြောင်းအရာတွေကို ဆွေးနွေးခဲ့ကြပါတယ်။

#Yangon_Media_Group