#LocalNews
Published - 23 Feb 2022

ရန်ကုန်တိုင်းဒေသကြီး၊ဒဂုံမြို့သစ်ဆိပ်ကမ်းမြို့နယ်၊ စက်မှုဇုန် (၂)၊ မက္ခရာမင်းသားကြီးလမ်းပေါ်တွင်ရှိသော မြန်မာ့မဏ္ဍိုင် ငါးအအေးခန်းစက်ရုံမီးလောင်ရသည့်အကြောင်းရင်းနှင့်ပျက်စီးဆုံးရှံးမှုတန်ဖိုးကို မသိရသေးကြောင်း မြန်မာနိုင်ငံမီးသတ်တပ်ဖွဲ့ က သိရသည်။

ဖေဖော်ဝါရီလ ၂၂ ရက် ည ၁၀ နာရီ မိနစ် ၄၀ ခန့်တွင် စတင်လောင်ကျွမ်းသော မီးမှာ တစ်နာရီခွဲခန့်ကြာသည်ထိ လောင်ကျွမ်းနေသောကြောင့် ည သန်းခေါင်ကျော်အချိန်မှ မီးငြိမ်းခဲ့ကြောင်း သိရသည်။

"မီးဘာကြောင့်လောင်ရတယ်ဆိုတာကို စစ်ဆေးနေတုန်းပါ၊ပျက်စီးဆုံးရှုံးတာကိုလည်း စစ်နေပါတယ်။စက်ရုံမှာက လောင်စာများတယ်။အချိန်မီ မီးထိန်းနိုင်ခဲ့လို့သာ တခြားတွေကို မကူးစက်တာပါ။စက်ရုံထဲမှာ ဖော့ပုံးတွေ ရှိနေတယ်လေ။မီးလောင်ကျွမ်းမှုအဆင့်ကို Level 2 ထိ သတ်မှတ်ခဲ့ရတယ်။မီးက များတယ်။တော်တော်လေးကို ငြှိမ်းသတ်ခဲ့ကြရတယ်။အအေးခန်းစက်ရုံဘေးမှာက အထပ်သားစက်ရုံရှိနေတယ်"ဟု မီးသတ်တာဝန်ရှိသူက YMG ကို ပြောသည်။

အဆိုပါ မြန်မာ့မဏ္ဍိုင် ငါးအအေးခန်းစက်ရုံမှာ ပေ ၅၀၀၊ ပေ ၁၀၀ ပတ်လည် အကျယ်ရှိပြီး စက်ရုံတစ်ရုံ မီးလောင်ကျွမ်း ပျက်စီးခဲ့ရခြင်း ဖြစ်သည်။

ymg/mt
photo-MFSD
#Yangon_Media_Group 

 #LocalNews
Published - 23 Feb 2022

မဲခေါင်မြစ်ဝှမ်း နယ်စပ်ဒေသတွင် မိုးရေချိန်စောင့်ကြည့်လေ့လာရေးစခန်း ၁၀ ခု တပ်ဆင်ခဲ့တယ်လို့ သိရပါတယ်။
အဆိုပါ တပ်ဆင်မှုကို လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေ၏ အထောက်အပံ့ဖြင့် ဆောင်ရွက်ခဲ့ခြင်းဖြစ်တယ်လို့ မြန်မာနိုင်ငံ ဆိုင်ရာတရုတ်သံရုံးက ဒီကနေ့( ဖေ ဖော်ဝါရီ ၂၃)ရက်မှာ သတင်းထုတ်ပြန်ခဲ့တာပါ။

ယင်းအထူးရန်ပုံငွေ အထောက်အပံ့ဖြင့် တပ်ဆင်ခဲ့သည့် အလိုအလျောက် ရေအဆင့်နှင့် မိုးရေချိန်စောင့်ကြည့်လေ့လာရေးစခန်း ၁၀ ခုသည် မြန်မာနိုင်ငံ၏ မဲခေါင်မြစ်ဝှမ်း နယ်စပ်ဒေသများ၌ အချိန်နှင့်တပြေးညီ ဒေတာအချက်အလက်များ စုဆောင်းခြင်း၊ရေကြီးမှုအမှတ်နှင့် အန္တရာယ်အဆင့် မှတ်သားခြင်းတို့ တွင် အသုံးပြုနိုင်မှာဖြစ်တယ်လို့ ဆိုပါတယ်။

ဒါ့အပြင် အဆိုပါ စီမံကိန်းကို အကောင်အထည်ဖော်ဆောင်ခြင်းဖြင့် မြန်မာနိုင်ငံ၏ ရေကြီးမှု ကြိုတင်သတိပေးနိုင်စွမ်းကို အားကောင်းစေပြီး ရေလွှမ်းမိုးမှုကြောင့်ဖြစ်ပွားသော အသက်နှင့်ပိုင်ဆိုင်မှုများ ဆုံးရှုူံးမှုကို လျှော့ချရန်၊ ရေလွှမ်းမိုးမှု၏ လူမှုရေး၊ စီးပွားရေးနှင့် ဂေဟစနစ်ဆိုင်ရာ အကျိုးကျေးဇူးများ ပိုမိုမြင့်မားလာစေရန်နှင့် ရေလွှမ်းမိုးသောဒေသများအနီးတွင် ပိုမိုဘေးကင်းလုံခြုံမှုရှိသော လူနေရပ်ကွက်များ တည် ဆောက် ပေးနိုင်ရန် အထောက်အကူဖြစ်စေမှာ ဖြစ်တယ်လို့ လည်း မြန်မာနိုင်ငံဆိုင်ရာတရုတ်သံရုံး၏ ထုတ်ပြန်ချက်မှာဖော်ပြခဲ့ပါတယ်။

ဓါတ်ပုံ - မြန်မာနိုင်ငံ ဆိုင်ရာတရုတ်သံရုံး။

ymg/kg
#Yangon_Media_Group 

#LocalNews
Published -23 Feb 2022
မြန်မာနိုင်ငံတွင် ကိုဗစ်ရောဂါကူးစက်မှု မြင့်မားလာသောကြောင့် မြန်မာနိုင်ငံမှ ကိုရီးယားသို့ ကိုးရီးယားသို့ တရားဝင် ခွင့်ပြုစနစ်EPS( Employment Permit System) ဖြင့် အလုပ်သမားစေလွှတ်နေမှုကို ယာယီရပ်ဆိုင်းထားကြောင်း ပြည်ပအလုပ်အကိုင်အေဂျင်စီများက သိရသည်။

ကိုဗစ်-၁၉ ရောဂါ တွေ့ရှိမှုနှုန်း မြင့်တက်လာ၍ ကိုရီးယား နိုင်ငံသို့ EPS လုပ်သားများ ဝင်ရောက်မည့်နေ့ရက်ကို HRD- Korea မှ ယာယီရွှေ့ဆိုင်းထားခြင်းဖြစ်ပြီး ခွင့်ပြုမည့်ရက်ကို အစိုးရပြည်ပအလုပ်အကိုင်အေဂျင်စီရုံးများမှ ကြိုတင်အကြောင်းကြားမည် ဟုလည်း သိရသည်။

ကိုရီးယားနိုင်ငံသို့ ဝင်ရောက်မည့် နိုင်ငံခြားသားများအား နိုင်ငံတွင်း ဝင်ခွင့်ပေးရန် သင့်မသင့် စုံစမ်းစစ်ဆေးမှုများ ပြုလုပ်ပြီးနောက်သဘောတူကြောင်း ကိုရီးယားတရားရေး လဝကဌာနမှထုတ်ပေးသော ရုံးစာ (visa issuance) CCVI ရရှိပြီး အလုပ်သမားများအတွက် HRD-Korea မှ အစိုးရ ပြည်အလုပ် အကိုင်အေဂျင်စီရုံးသို့ ဝင်ရောက်ရမည့် ခန့်မှန်းနေ့ရက်ပေးပို့လာပါက အလုပ်သားများထံ စစ်ဆေးခြင်းနှင့် ဗီဇာတင်ခြင်းကို ဆောင်ရွက်ရန် အေဂျင်စီများမှ အကြောင်းကြားရမည် ဖြစ်ကြောင်းသိရသည်။

ကိုဗစ်-၁၉ ကြောင့် တောင်ကိုရီးယားနိုင်ငံ အစိုးရအနေဖြင့် မြန်မာနိုင်ငံမှ လုပ်သား များကို ၂၀၂၀ ပြည့်နှစ်၊ ဇွန်လ ၁ ရက်က စတင်၍ ပြည်ဝင်ခွင့်ပိတ်ပင်ထား ခဲ့ရာမှ၂၀၂၁ ခုနှစ်၊ ဒီ ဇင်ဘာလ ၃၀ တွင် လည်စေ‌လွှတ်ခွင့်ပြုခဲ့ရာ၂၀၂၂ ခုနှစ် ဖေဖော်ဝါရီ လ ၂၀ ရက်ထိ Re-Entry လုပ်သား ၁၂၈ ဦး ၊ EPS Regular လုပ်သား ၁၂၈ ဦး ကို စေလွှတ်ခဲ့ပြီးဖြစ်ကြောင်း တရားဝင် ပြည်ပအလုပ်အကိုင်အေဂျင်စီများထံမှ သိရသည်။

ymg/mt
#Yangon_Media_Group

Published 23 February 2022

သေဆုံးတော့မည့် လူတစ်ဦးရဲ့ ဦးနှောက်လှုပ်ရှားမှုကို လေ့လာကြည့်တဲ့အခါ မသေဆုံးခင်မှာ စွဲမက်စရာ လှုပ်ရှားမှုအခိုက်အတန့်ကလေးတွေကို အာရုံကြောသိပ္ပံပညာရှင်တွေက ရှာဖွေတွေ့ရှိလိုက်ရပါတယ်။  ဒီတွေ့ရှိချက်ဟာ  လူတစ်ဦးသေဆုံးချိန်မှာ ဘာတွေဖြစ်နေသလဲဆိုတာ ထိုးထွင်းသိမြင်နိုင်လိုက်ပါတယ်။

သုတေသနပြုလုပ်နေစဉ်အတွင်း အာရုံကြောသိပ္ပံပညာရှင်တွေဟာ သေခါနီးအချိန်မှာ စည်းချက်ကျနေတဲ့ ဦးနှောက်လှိုင်းပုံစံဟာ အိပ်မက်မက်နေစဉ်၊ နောက်ကြောင်းပြန်သတိရစဉ်နှင့် တရားထိုင်နေစဉ်ဖြစ်ပေါ်နေတဲ့ ဦးနှောက်လှိုင်းတွေနှင့် ဆင်တူနေတာကိုတွေ့ရပါတယ်။

အဲဒါကြောင့် လူတွေဟာ သူတို့မျက်စေ့မှိတ်ပြီး မသေဆုံးခင်မှာ နောက်ကြောင်းပြန်သတိရတာတွေရှိတယ်ဆိုတဲ့ စဉ်းစားစရာတွေ ရရှိခဲ့ပါတယ်။

Frontiers in Aging Neuroscience ဂျာနယ်မှာ ဖော်ပြတဲ့ တွေ့ရှိမှုအသစ်တစ်ခုမှာ သေဆုံးနေချိန်အတွင်း ဒါမှမဟုတ် သေဆုံးမှုကိုပြောင်းလဲသွားပြီးနောက်မှာ ဦးနှောက်ဟာ ဆက်ပြီးလှုပ်ရှားနေပြီး အဆက်အစပ်ဖြစ်နေသေးနိုင်တာကို ပြဆိုခဲ့ပါတယ်။

အဲဒီသုတေသနလုပ်ငန်းကိုလုပ်ခဲ့တဲ့ အက်စတိုနီးယားနိုင်ငံ တာတူးတက္ကသိုလ်က သုတေသနပညာရှင် ဒေါက်တာ ရောဗစ်ဆင်တီဟာ ဝက်ရူးပြန်ရောဂါဖြစ်နေတဲ့ အသက်၈၇နှစ်အရွယ် လူနာတစ်ဦးကိုလေ့လာခဲ့တာဖြစ်ပါတယ်။

ဒေါက်တာဗီဆင်တီနှင့်သူ့အဖွဲ့ဟာ အီးဂျီဂျီ(electroencephalography)စက်တပ်ဆင်ပြီး လူနာရဲ့အတက်ရောဂါကို စစ်ဆေးကုသနေခဲ့တာဖြစ်ပါတယ်။

အဲဒီလိုသူ့ရဲ့ဦးနှောက်လှိုင်းကိုဖမ်းယူထားနေတုန်း လူနာကွယ်လွန်ခဲ့တာပါ။

ဒီလိုမမျှော်လင့်တဲဖြစ်ရပ်ကြောင့် သိပ္ပံပညာရှင်တွေဟာ သေတော့မယ့်လူသားတစ်ဦးရဲ့ ဦးနှောက်လှုပ်ရှားမှုကို ပထမဆုံးအကြိမ်တွေ့မြင်ခွင့်ရလိုက်တာပဲဖြစ်ပါတယ်။

“ ကျွန်တော်တို့ဟာသေဆုံးချိန်ခန့်မှာ စက္ကန့်၉၀၀ကြာတဲ့  ဦးနှောက်လှုပ်ရှားမှုကို တိုင်းတာခဲ့ပါတယ်။အဲဒီနောက် နှလုံးမရပ်ခင် နှင့် ရပ်ပြီး ၃၀စက္ကန့်မှာ ဘာဖြစ်သလဲဆိုတာကို အာရုံစိုက်စူးစမ်းလေ့လာခဲ့တယ်” လို့ လေ့လာမှုကို ဦးဆောင်ခဲ့တဲ့ လူဝစ်ဗီလီတက္ကသိုလ်က အာရုံကြောသိပ္ပံပညာရှင်တစ်ဦးဖြစ်တဲ့ ဒေါက်တာ အဂျီမာဇီမာက ပြောပါတယ်။

“ နှလုံးမရပ်ခင်ကလေးနှင့်ရပ်ပြီးသွားတဲ့နောက် ဂမ်မာလို့ခေါ်တဲ့ အာရုံကြောဆိုင်ရာ လှိုင်းအတက်အကျပုံစံမှာသာမက အခြားဒယ်လ်တာ၊သက်တ်သာ ၊အယ်လ်ဖာနှင့်ဘီတာလှိုင်းတွေမှာလည်း အပြောင်းအလဲတွေမြင်တွေ့ခဲ့ကြရပါတယ်” လို့ သူကပြောပါတယ်။

အဲဒီလှိုင်းအတက်အကျပုံစံကို ဦးနှောက်လှိုင်းတွေလို့ သိကြတာပါ။ အသက်ရှင်နေတဲ့လူသားဦးနှောက်တွေမှာ သက်ရောက်နေတဲ့ စည်းချက်ညီလှုပ်ရှားမှုတွေဖြစ်ပါတယ်။

ဂမ်မာအပါအဝင် လှိုင်းတက်ကျပုံစံအမျိုးမျိုးဟာ အာရုံစူးစိုက်ခြင်း၊အိပ်မက်မက်ခြင်း၊သတိရစရာပြန်ဖော်ခြင်း၊နှင့် သတင်းအချက်အလက်ရယူမှုအစဉ်နှင့် နောက်ကြောင်းပြန်သတိရခြင်းတွေနှင့်ဆက်စပ်တဲ့ အသိနိုးကြားမှုတွေနှင့် သက်ဆိုင်ပါတယ်။

ဒီတွေ့ရှိချက်ဟာ ဘဝတစ်ခုနိဂုံးချုပ်မှုအပေါ် ကျွန်တော်တို့နားလည်ခဲ့တာတွေကို ပြန်စိန်ခေါ်နေတယ်။ ပြီးတော့  ခန္ဓာကိုယ်တွင်းအစိတ်အပိုင်းလှုဒါန်းရတဲ့ အချိန်ကိုက်သတ်မှတ်ချက်နှင့်ဆက်စပ်တာမျိုးအပါအဝင် အရေးကြီးတဲ့ နောက်ဆက်တွဲမေးခွန်းတွေလည်းပေါ်လာတယ်” လို့သူကပြောတယ်။

ဒါပေမယ့် သုတေသနတွေထပ်လုပ်ဖို့တော့လိုပါသေးတယ်။ ဘာဖြစ်လို့လဲဆိုတော့ သူတို့လေ့လာခဲ့တဲ ဦးနှောက်က ထိခိုက်ဒဏ်ရာရပြီး တက်တဲ့ရောဂါ ရောင်ရမ်းနာရှိနေတဲ့လူနာဖြစ်နေတဲ့အတွက် အဲဒါရောဂါတွေအားလုံးက အချက်အလက်တွေကို အနက်ဖွင့်ဆိုရာမှာ ရှပ်ထွေးမှုရှိလို့ဖြစ်ပါတယ်လို့ သုတေသနပညာရှင်တွေက မှတ်သားထားကြပါတယ်၊

Source: daily express

#LocalNews
Published-Feb 23 2022

နိုင်ငံတကာ သဘောတူစာချုပ်ရဲ့ အာတီကယ် (၉) အရ တရားရုံးသို အမှု တင်သွင်းရန် အဖွဲ့ဝင် နှစ်နိုင်ငံအကြား ဥပဒေကြောင်းအရ အငြင်းပွားမှုရှိရန် လိုအပ် ကာဂမ်ဘီယာနိုင်ငံနဲ့ မြန်မာနိုင်ငံအကြား ဥပဒေကြောင်းအရ အငြင်းပွားမှု လုံးဝမရှိကြောင်း လျှောက်လဲချက်ကို တရားရုံးသို့ တင်သွင်းခဲ့တယ်လို့ နစက နိုင်ငံခြားရေးဝန်ကြီးဌာန က သတင်းထုတ်ပြန်လိုက်ပါတယ်။

ဂမ်ဘီယာနိုင်ငံက မြန်မာနိုင်ငံကို အပြည်ပြည်ဆိုင်ရာတရားရုံး (ICJ) ၌ ၁၉၄၈ ခုနှစ် လူမျိုးသုဉ်းစေမှုကို တားဆီးရန်နှင့် ပြစ်ဒဏ်ပေးရန် နိုင်ငံတကာ သဘောတူစာချုပ် (Convention on the Prevention and Punishment of the Crime of Genocide) ကို ကျူးလွန်ဖောက်ဖျက်တယ်ဆိုတဲ့စွပ်စွဲချက်ဖြင့် တရားစွဲဆိုထားခြင်းနှင့် ပတ်သက်၍မြန်မာနိုင်ငံက တင်သွင်းခဲ့သော ကနဦးကန့်ကွက်လွှာနှင့် ပတ်သက်သည့် ကြားနာမှုကို နယ်သာလန်နိုင်ငံ၊ သည်ဟိဂ်မြို့တွင် ၂၀၂၂ ခုနှစ်၊ ဖေဖော်ဝါရီလ ၂၁ ရက်နေ့မှ ၂၈ ရက်နေ့အထိ ပြုလုပ်လျက် ရှိပြီး အဆိုပါ ကြားနာပွဲကို မြန်မာကိုယ်စားလှယ်အဖွဲ့ တက်ရောက်လျက်ရှိတာဖြစ်ပါတယ်။

မြန်မာနိုင်ငံကိုယ်စားပြု နိုင်ငံတကာရှေ့နေ့Professor Robert Kolb က မြန်မာနိုင်ငံဟာ ၁၉၄၈ ခုနှစ် လူမျိုးသုဉ်းစေမှုကို တားဆီးရန်နဲ့ ပြစ်ဒဏ်ပေးရန် နိုင်ငံတကာသဘောတူစာချုပ်ရဲ့ အာတီကယ် (၈) ကို ခြွင်းချက်ပြုလုပ်ထားကာမည်သည့်စာချုပ်ဝင်နိုင်ငံကမဆို ကုလသမဂ္ဂရဲ့ အဖွဲ့ အစည်းများ (အပြည်ပြည်ဆိုင်ရာတရားရုံး အပါအဝင်) သို့ စာချုပ်ဝင်နိုင်ငံတစ်နိုင်ငံအား အရေးယူဆောင်ရွက်ရန် တောင်းဆိုမှုကို လိုက်နာရန် မလိုကြောင်း လျှောက်လဲချက်ကို လည်းကောင်း၊ Dr. Christopher Staker က ၁၉၄၈ ခုနှစ် လူမျိုးသုဉ်းစေမှုကို တားဆီးရန်နဲ့ပြစ်ဒဏ်ပေးရန် နိုင်ငံတကာ သဘောတူစာချုပ်ရဲ့ အာတီကယ် (၉) အရ တရားရုံးသို အမှု တင်သွင်းရန် အဖွဲဝင် နှစ်နိုင်ငံအကြား ဥပဒေကြောင်းအရ အငြင်းပွားမှုရှိရန် လိုအပ်ကြောင်း၊ ဂမ်ဘီယာနိုင်ငံနဲ့ မြန်မာနိုင်ငံအကြား ဥပဒေကြောင်းအရ အငြင်းပွားမှု လုံးဝမရှိကြောင်း လျှောက်လဲချက်ကိုတင်သွင်းခဲ့တာဖြစ်တယ်လို့ သိရပါတယ်။

အပြည်ပြည်ဆိုင်ရာတရားရုံး (ICJ)ရဲ့ ကြားဖြတ်စီမံဆောင်ရွက်ချက်အမိန့်အတိုင်း အလေးထား အကောင်အ ထည်ဖော်လျက်ရှိကာ ပုံမှန်တင်သွင်းရမယ့်အစီရင်ခံစာများဆက်လက် တင်သွင်းလျက်ရှိကြောင်း အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာန ပြည်ထောင် စုဝန်ကြီး ဦးကိုကိုလှိင်က ပြောကြားခဲ့တယ်လို့ လည်းသိရပါတယ်။

ဖေဖော်ဝါရီ ၂၁ရက်နေ့က ပြုလုပ်ခဲ့တဲ့ကနဦးကန့် ကွက်လွှာဆိုင်ရာ ကြားနာပွဲမှာပြည်ထောင်စုဝန်ကြီး ဦးကိုကိုလှိုင် က " မြန်မာနိုင်ငံအစိုးရအနေဖြင့် ယခုတရားစွဲဆိုမှုနှင့် ပတ်သက်သည့် မြန်မာနိုင်ငံ၏ ဆက်လက်လုပ်ဆောင်ရမည့် တာဝန်ဝတ္တ ရားများကို လိုက်နာဆောင်ရွက်လျက်ရှိကာ တရားရုံးမှ ချမှတ်ခဲ့သော ကြားဖြတ်စီမံဆောင်ရွက်ချက်အမိန့်အတိုင်း အလေးထား အကောင်အထည်ဖော်လျက်ရှိပြီး ပုံမှန်တင်သွင်းရမည့် အစီရင်ခံစာများကိုလည်း ဆက်လက် တင်သွင်းလျက်ရှိကြောင်း" ထည့်သွင်း ပြောကြားခဲ့တယ်လို့ သိရပါတယ်။

မြန်မာနိုင်ငံအနေဖြင့် ယခုကဲ့သို့ တရားရုံးက ဤအမှုကို စီရင်ပိုင်ခွင့် မရှိကြောင်း (သိုမဟုတ်) လက်ခံကြားနာနိုင်မှု မရှိကြောင်း ကနဦးကန့်ကွက်လွှာ တင်သွင်းခြင်းသည် တရားရုံး၏ တရားစီရင်မှုလုပ်ထုံးလုပ်နည်းများအပေါ် ဆင်ခြေပေးကန့်သတ်ရန်အတွက် မဟုတ်ဘဲ တရားမျှတမှုကို တော်တည့်မှန်ကန်စွာ ဖော်ဆောင်နိုင်ရေးအတွက် ရည်ရွယ်တယ်လို့ လည်းပြောဆိုခဲ့ပါတယ်။

ဒါ့အပြင်မြန်မာနိုင်ငံအစိုးရအနေနဲ့ ရခိုင်ပြည်နယ်ရှိ IDP စခန်းများတွင် နေထိုင်လျက်ရှိသူများကို အခြားပြည်သူများနှင့်တန်းတူ ကိုဗစ်-၁၉ ရောဂါ ကာကွယ်ဆေး ထိုးနှံပေးလျက်ရှိကြောင်း၊ ယင်း IDP စခန်းများကို ရုပ်သိမ်းနိုင်ရေးအတွက်လည်း စတင်ပြင်ဆင်ဆောင်ရွက်လျက်ရှိကြောင်း၊ ထိုဖြစ်ပေါ်တိုးတက်မှုများကိုကြည့်လျှင် မြန်မာနိုင်ငံအစိုးရ၏ ထိရောက်ပြီး အပြုသဘော ဆောင်သည့် အဖြေရှာမှုနည်းလမ်းများအပေါ် အလေးအနက်ထားသည့် ဆန္ဒမှန်ကိုသိရနိုင်တယ်လို့ လည်းပြောဆိုခဲ့ပါတယ်။

ဂမ်ဘီယာနိုင်ငံရဲ့ ပထမအကြိမ် နှုတ်ဖြင့် လျှောက်လဲမှုကို ဖေဖော်ဝါရီ ၂၃ရက်နေ့တွင် ပြုလုပ်မည်ဖြစ်ကာ မြန်မာနိုင်ငံအနေဖြင့် ဂမ်ဘီယာနိုင်ငံရဲ့လျှောက်လဲမှုများအပေါ် တန်ပြန်လျှောက်လဲမှုကို ဖေဖော်ဝါရီ ၂၅ရက်နေ့တွင် ပြုလုပ်မှာဖြစ်ပါတယ်။

ymg/hm
#Yangon_Media_Group 

#WorldHealth
Published 23 February 2022

လူ့ခန္ဓာကိုယ်ထဲက ခုခံအားစနစ်မှာပါဝင်တဲ့ ဆိုက်တိုတောက်ဆစ်တီဆဲလ်ရဲ့ တုန့်ပြန်လှုပ်ရှားပုံတွေကို လေ့လာကြည့်ကြရာ အချို့လူအနည်းငယ်ရဲ့ ခန္ဓာကိုယ်ခုခံအားစနစ်ကို လက်ရှိကိုဗစ်မျိုးဗီဇကွဲတွေက ရှောင်ရှားသွားနိုင်ကြောင်း တွေ့ရှိခဲ့ကြပါတယ်။

ဆိုက်တိုတောက်ဆစ်တီဆဲလ်တွေက ခန္ဓာကိုယ်ခုခံအားစနစ်အစိတ်အပိုင်းတစ်ခုဖြစ်ကာ ခန္ဓာကိုယ်ထဲဝင်ရောက်လာတဲ့ ဗိုင်းရပ်စ်ကူးစက်ဆဲလ်တွေ၊ အကြိတ်ဆဲလ်တွေ၊ အသားစတစ်ရှူးတွေကို ဖျက်ဆီးပေးတဲ့ အကျိုးပြုဆဲလ်တစ်မျိုးဖြစ်ပါတယ်။

ပဋိပစ္စည်း antibody တွေမလိုအပ်ဘဲ ခုခံအားစနစ်ကို လှုံ့ဆော်ပေးနိုင်တာကြောင့် ပဋိပစ္စည်းမထွက်နိုင်တဲ့ ကိုရိုနာဗိုင်းရပ်စ်ပိုးကူးစက်သူတွေမှာ အရေးကြီးတဲ့အစိတ်အပိုင်းဖြစ်ပါတယ်။

လေ့လာစမ်းသပ်ချက်တွေအရ လက်ရှိကိုဗစ်ဗိုင်းရပ်စ်ပိုးတွေဟာ ဆင့်ကဲပြောင်းလဲပြီး ဆိုက်တိုတောက်ဆစ်တီဆဲလ်တုန့်ပြန်မှုကို ရှောင်ရှားသွားနိုင်တဲ့အပြင် နောက်ထပ်ဆင့်ကဲသန္ဓေပြောင်းလဲခြင်းတွေပါ ဖြစ်ပေါ်လာနိုင်ပါတယ်။

သုတေသနအဖွဲ့က ဒီလိုခုခံအားကျဆင်းရတဲ့ပြဿနာကို သိရှိနိုင်ဖို့ တွက်ချက်လေ့လာကြည့်ရာမှာ လူ ၁၀ ယောက်အနက် ၉ ယောက်က မူလကိုရိုနာဗိုင်းရပ်စ်ကို ခုခံပေးမယ့် တီဆဲလ်တု့န်ပြန်မှုထွက်ပေါခဲ့တာကို တွေ့ရှိခဲ့ကြပါတယ်။

နောက်တစ်ဆင့်ကို ဆက်လက်လေ့လာကြည့်ရာမှာ ဗိုင်းရပ်စ်က ဆက်တိုက်ဆင့်ကဲပြောင်းလဲနေပြီး ဆိုက်တိုတောက်ဆစ်တီဆဲလ်ခုခံအားကနေ လွတ်မြောက်နိုင်တဲ့ မျိုးဗီဇကွဲတွေကို ထုတ်လုပ်နိုင်တာကို တွေ့ရှိခဲ့ပါတယ်။

အဲဒီနောက်မှာတော့ ဒီလိုပြောင်းလဲမှုပြဿနာတွေကိုသိရှိအောင်ပြုလုပ်ဖို့ ဆုံးဖြတ်ခဲ့ကြပြီး ခုခံအားစနစ်အားရှောင်လွှဲသွားနိုင်တဲ့ အခြေအနေကိုသိရှိလာရန် ကြိုးပမ်းခဲ့ကြပါတယ်။

ကမ္ဘာ့အနှံ့က ဒေသအချို့မှာ တီဆဲလ်ခုခံအားစနစ်ကို ရှောင်ရှားသွားနိုင်တဲ့ မျိုးဗီဇကွဲတွေ ထပ်ခါထပ်ခါပြန်လည်ပေါ်ထွက်နေခဲ့တာကို တွေ့ရှိခဲ့ကြပါတယ်။

ဆာဟာရအာဖရိက၊ အရှေ့အာရှနဲ့ အရှေ့တောင်အာရှတို့ကလူတွေမှာ တီဆဲလ်ခုခံအားကိုရှောင်ရှားနိုင်တဲ့ ကိုရိုနာဗိုင်းရပ်စ်မျိုးဗီဇကွဲတွေ ပိုပြီးအဖြစ်လွယ်ကာ ခန္ဓာကိုယ်ခုခံအားမထုတ်လုပ်နိုင်တာကို တွေ့ရှိခဲ့ပါတယ်။

လူတစ်ဦးတစ်ယောက်ချင်းစီမှာ အခုလိုဆင့်ကဲပြောင်းလဲခြင်းဖြစ်စဉ်ဖြစ်ပေါ်ခြင်းက တစ်ကမ္ဘာလုံးရှိလူတွေကိုတော့ ခြိမ်းခြောက်တာမျိုးမဖြစ်နိုင်ပါဘူး။

အချို့သောလူအနည်းငယ်မှာ ဒီလိုဖြစ်စဉ်တွေဖြစ်ပေါ်လေ့ရှိတာကို သတိထားမိပြီး အနီးကပ်စောင့်ကြည့်လေ့လာမယ်ဆိုပါက ဒေသတွင်းကူးစက်ပျံ့ပွားမှုဖြစ်ရတဲ့အကြောင်းအရင်းကို သိရှိနိုင်မှာဖြစ်ပြီး ဘယ်လိုကာကွယ်ရမလဲဆိုတာကိုပါ သိရှိလာမှာဖြစ်ပါတယ်။

အချို့နေရာတွေမှာ ကိုဗစ်ကာကွယ်ဆေးထိုးနှံမှုနှုန်း အရှိန်နည်းနေပြီး ခန္ဓာကိုယ်ခုခံအားစနစ်ကိုရှောင်ရှားနိုင်တဲ့ မျိုးဗီဇကွဲကူးစက်မှုတွေဖြစ်ပွားလာပါက ကျန်းမာရေးကိုသိသိသာသာထိခိုက်လာနိုင်ပြီး လူမှုစီးပွားရေးမှာလည်း အခက်အခဲတွေဖြစ်လာမှာပါ။

Source: The Jerusalem Post
#Yangon_Media_Group

#WorldPolitics

Published - 23 February 2022

ယူကရိန်းနိုင်ငံအရှေ့ဘက်ရှိ ခွဲထွက်ရေးနယ်မြေများသို့ ရုရှားတပ်ဖွဲ့များအားစေလွှတ်ခဲ့တဲ့အတွက် အင်္ဂါနေ့က အနောက်နိုင်ငံတွေက ရုရှားအပေါ်ဒဏ်ခတ်ပိတ်ဆို့မှုအသစ်တွေ ချမှတ်လိုက်ပြီး နောက်ထပ်အလုံးအရင်းဖြင့်ဝင်ရောက်ကျူးကျော်လာပါက ဒီထက်ပိုပြင်းထန်တဲ့ပိတ်ဆို့မှုတွေ ချမှတ်သွားဦးမှာဖြစ်ကြောင်း သတိပေးလိုက်ပါတယ်။

အမေရိကန်၊ ဥရောပသမဂ္ဂ၊ ဗြိတိန်တို့က ရုရှားဘဏ်တွေနဲ့ အရေးကြီးပုဂ္ဂိုလ်များကိုပစ်မှတ်ထားအရေးယူဖို့ ကြေညာလိုက်ပြီး ဂျာမနီနိုင်ငံကလည်း ရုရှားရဲ့ဓာတ်ငွေ့ပိုက်လိုင်းစီမံကိန်းကြီးကို ရပ်တန့်လိုက်ပါတယ်။

ရုရှားသမ္မတ'ဗလက်ဒီမီယာပူတင်'က ငြိမ်းချမ်းရေးလုပ်ငန်းစဉ်တစ်ရပ်အနေနဲ့ ယူကရိန်းခွဲထွက်ရေးနယ်မြေများဖြစ်တဲ့ ဒိုနက်စ်မြို့နဲ့ လူဟန့်စ်မြို့များသို့ ရုရှားစစ်သည်များအားစေလွှတ်ဖို့ အမိန့်ပေးခဲ့ရာ အမေရိကန်တို့က ဒါဟာအခြေအမြစ်မရှိတဲ့လုပ်ရပ်ဖြစ်တယ်လို့တုန့်ပြန်လိုက်ပါတယ်။

ပြီးခဲ့တဲ့ ၂၄ နာရီအတွင်း မက်ဆာမှဖမ်းယူရရှိခဲ့တဲ့ အာကာသဂြိုဟ်တုပုံရိပ်များတွင် ယူကရိန်းနယ်စပ်နဲ့ထိစပ်နေတဲ့ ဘီလာရုစ်တောင်ပိုင်းရှိ လေယာဉ်ကွင်းငယ်တစ်ခုမှာ ရုရှားစစ်တပ်ယာဉ်ပေါင်း ၁ ရာကျော်ထပ်ရောက်လာပြီး ရုရှားအနောက်ဘက်မှာလည်း တပ်ဖွဲ့တွေနဲ့ လက်နက်ပစ္စည်းအများအပြား ထပ်မံရောက်ရှိလာတာကို တွေ့မြင်ခဲ့ကြပါတယ်။
သံတမန်ရေးညှိနှိင်းမှုများမှာလည်း အခုထက်ထိအောင်မြင်မှုမရရှိသေးတဲ့အပြင် အမေရိကန်နိုင်ငံခြားရေးဝန်ကြီး 'အန်တိုနီဘလင်ကန်'၊ ပြင်သစ်နိုင်ငံခြားရေးဝန်ကြီး 'ဂျွန်ယိဗ်လီဒရီယန်'တို့က ရုရှားနိုင်ငံခြားရေးဝန်ကြီး 'ဆာဂျီလက်ဗ်ရော့ဗ်'နဲ့ တွေ့ဆုံဖို့စီစဉ်ထားခြင်းကိုလည်း အင်္ဂါနေ့က ဖျက်သိမ်းလိုက်ပါတယ်။

"ရှင်းရှင်းလင်းလင်းပြောရရင် ရုရှားက ယူကရိန်းနိုင်ငံရဲ့ အစိတ်အပိုင်းကြီးတစ်ခုကို ဖဲ့ယူလိုက်သလိုပါပဲ။ ဒါဟာရုရှားတို့ကျူးကျော်ခြင်းရဲ့ အစပဲရှိပါသေးတယ်" လို့ အမေရိကန်သမ္မတ'ဂျိုးဘိုင်ဒန်'က မိန့်ခွန်းမှာပြောကြားခဲ့ပါတယ်။

အက်စ်တိုးနီးယား၊ လတ်ဗီးယား၊ လစ်သူရေးနီးယားနိုင်ငံတို့ထံ စစ်အင်အားဖြည့်တင်းသွားဖို့နဲ့ အမေရိကန်ခြေလျင်တပ်သား ၈၀၀ နဲ့ F-35 ဂျက်လေယာဉ် ၈ စင်းတို့ကို နေတိုး(NATO)တပ်ဖွဲ့အရှေ့ဘက်ခြမ်းသို့ ပို့ဆောင်သွားမယ့်အစီအစဉ်တွေကို 'ဘိုင်ဒန်'က ကြေညာသွားခဲ့ပါတယ်။

သံတမန်ရေးနည်းလမ်းအတိုင်းသွားဖို့ အမြဲတမ်းလမ်းဖွင့်ထားကြောင်း၊ ဒါပေမဲ့ ရုရှားနိုင်ငံရဲ့အကျိုးအမြတ်နဲ့ ရုရှားပြည်သူတွေရဲ့လုံခြုံရေးကိစ္စရပ်တွေမှာ ခြွင်းချက်မရှိကာကွယ်သွားမှာဖြစ်ကြောင်း 'ပူတင်'က ဗုဒ္ဓဟူးနေ့အစောပိုင်းက ပြောကြားသွားပါတယ်။

ယူကရိန်းအနေနဲ့ နေတိုးအဖွဲ့ဝင်အဖြစ် ဘယ်သောအခါမှ ဝင်ရောက်ခြင်းမပြုဖို့ကတိကဝတ်အပါအဝင် လုံခြုံရေးအာမခံချက်တွေကို ရုရှားတို့က အလိုရှိနေတာဖြစ်ပါတယ်။

အမေရိကန်တို့က VEB ဘဏ်နဲ့ ရုရှားစစ်တပ်ပိုင် ပရွမ်စ်ဗယက်ဘဏ်တို့ကို အရေးယူပိတ်ဆိုခြင်းများ ပြုလုပ်ထားပြီဖြစ်ပါတယ်။အင်္ဂါနေ့ကစပြီး ရုရှားစစ်တပ်မှ အထက်တန်းလွှာလူတန်းစားတွေနဲ့ သူတို့ရဲ့မိသားစုဝင်တွေကို စတင်ဒဏ်ခတ်ပိတ်ဆို့မှုတွေ ပြုလုပ်တော့မှာဖြစ်ပါတယ်။

ရုရှားနိုင်ငံမှ တက်စ်သတင်းဌာနရဲ့ဖော်ပြချက်အရ ပရွမ်စ်ဗယက်ဘဏ်က အချိန်မီကြိုတင်ပြင်ဆင်ကာကွယ်မှုတွေပြုလုပ်ထားတဲ့အတွက် ဒဏ်ခတ်ပိတ်ဆို့မှုတွေက သိပ်ပြီးထိရောက်မှုရှိမှာမဟုတ်ဘူးလို့ တုန့်ပြန်လိုက်ပါတယ်။

ရုရှားတို့ ဒီထက်ပိုပြီးကျူးကျော်မလာချင်အောင် ကြိုးပမ်းနေကြတာကြောင့် အနောက်နိုင်ငံတွေက အပြင်းထန်ဆုံးဒဏ်ခတ်ပိတ်ဆို့မှုတွေကိုတော့ ရုတ်သိမ်းခဲ့ပါတယ်။
ရုရှားတို့နောက်ထပ်ကျူးကျော်လာပါက Sberbank နဲ့ VTB ဘဏ်တို့ကို ဒဏ်ခတ်ပိတ်ဆို့မှုပြုလုပ်သွားမှာဖြစ်ပြီး စီးပွားရေးမှာထိခိုက်မှုတွေဖြစ်လာနိုင်တယ်လို့ အမေရိကန်အကြီးတန်းအရာရှိတစ်ဦးက သတိပေးလိုက်ပါတယ်။

ရုရှားနိုင်ငံခြားရေးဝန်ကြီး 'ဆာဂျီလကဗ်ရော့ဗ်'က "အနောက်နိုင်ငံတွေ သူတို့တတ်နိုင်တဲ့ဒဏ်ခတ်ပိတ်ဆို့မှုတွေမကုန်သေးသရွေ့ ကျွန်တော်တို့ဆီက ဥရောပ အမေရိကန် ဗြိတိသျှကောလိပ်တွေ ရပ်တန့်သွားမှာမဟုတ်ပါဘူး" လို့ ပြောကြားလိုက်ပါတယ်။
Source: Reuters

#WorldHealth
Published 23 February 2022

တူရကီလူမျိုးတစ်ဦးဟာ ကိုဗစ်ရောဂါပိုးစစ်ဆေးလိုက်တိုင်းမှာ ရောဂါပိုးတွေ့ရှိကြောင်းသာအဖြေထွက်နေတာကြောင့် သီးသန့်ခွဲနေထိုင်နေရတဲ့အချိန်ကာလ တစ်နှစ်ကျော်သွားပြီဖြစ်ပါတယ်။

တူရကီနိုင်ငံမှ 'မူဇာဖာကာယာဆန်'ဆိုတဲ့လူဟာ ၂၀၂၀ နှစ်ကုန်ပိုင်းလောက်ကစပြီး ကိုဗစ်ရောဂါပိုးစစ်ဆေးချက်ပေါင်း ၇၈ ကြိမ်စမ်းသပ်ခဲ့ရာမှာ အကြိမ်တိုင်းရောဂါပိုးတွေ့ရှိကြောင်း အဖြေထွက်ပေါ်နေခဲ့ပါတယ်။

ဒါကြောင့် ပြီးခဲ့တဲ့ ၁၄ လစလုံး အိမ်နဲ့ဆေးရုံမှာသာ သီးသန့်ခွဲနေထိုင်ရင်း အချိန်ကုန်နေခဲ့ရပါတယ်။

အသက် ၅၆ နှစ်ရှိ 'ကာယာဆန်'ဟာ သွေးကင်ဆာဝေဒနာခံစားနေရသူဖြစ်ကာ အခုလက်ရှိ အစ္စတန်ဘူလ်ရှိနေအိမ်မှာ နေထိုင်နေရတာဖြစ်ပါတယ်။

သီးသန့်ခွဲနေထိုင်ရခြင်းကို ကျင့်သားရနေပြီဖြစ်ပေမယ့် သူ့ကလေးတွေမြေးတွေနဲ့ အွန်လိုင်းမှ ဗီဒီယိုခေါ်ဆိုမှုတွေသာ ပြုလုပ်နေရပါတယ်။

ဒီလိုနေထိုင်ရတာကို အပြောင်းအလဲလုပ်ချင်နေပြီး အစိုးရကိုအကူအညီတောင်းခံထားပါတယ်။

တူရကီနိုင်ငံပိုင် အန်နာဒိုလူသတင်းဌာနရဲ့ပြောကြားချက်အရ 'ကာယာဆန်'ဟာ ၂၀၂၀ ဒီဇင်ဘာ ၁၉ ရက်နေ့မှာ ကိုရိုနာဗိုင်းရပ်စ်တွေ့ရှိခဲ့ပါတယ်။

အဲဒီအချိန်တုန်းက သူနဲ့အတူရှိခဲ့တဲ့ ဇနီးဖြစ်သူနဲ့သားဖြစ်သူတိုကတော့ ရောဂါပိုးမတွေ့ရှိခဲ့ကြပါဘူး။

တူရကီနိုင်ငံရဲ့ ကိုရိုနာဗိုင်းရပ်စ်ဥပဒေမှာ ရောဂါပိုးမတွေ့ရှိပါက သီးသန့်ခွဲနေထိုင်ခြင်းကာလ ၂ ပတ်နေထိုင်ရမှာဖြစ်ပြီး 'ကာယာဆန်'က အဆိုပါဥပဒေကနေ ကင်းလွတ်ခွင့်ရရှိချင်နေတာဖြစ်ပါတယ်။

သူ့ရဲ့ဆရာဝန်တွေက ဒါဟာသွေးကင်ဆာခံစားနေရတာကြောင့် ကိုယ်ခံအားကျဆင်းကာ အမြဲတမ်းရောဂါပိုးတွေ့ရှိကြောင်း အဖြေထွက်တာဖြစ်မယ်လို့ ယူဆနေကြပါတယ်။

"ကျွန်တော် ကိုဗစ်ရောဂါကနေသက်သာနေပါပြီ။ ဒါပေမယ့် ခန္ဓာကိုယ်ထဲမှာ ကိုရိုနာဗိုင်းရပ်စ်အကြွင်းအကျန်တွေ ရှိနေဆဲဖြစ်တာကြောင့် စစ်ဆေးတိုင်း ရောဂါပိုးတွေ့ရှိနေတာဖြစ်ပါလိမ့်မယ်" လို့ 'ကာယာဆန်'က ပြောပြလိုက်ပါတယ်။

ကိုဗစ်ရောဂါပိုးကင်းစင်မှ ကိုဗစ်ကာကွယ်ဆေးထိုးနိုင်မှာဖြစ်တဲ့အတွက် အမြဲရောဂါပိုးတွေ့နေတဲ့ 'ကာယာဆန်'ကတော့ အခုထက်ထိ ကာကွယ်ဆေးထိုးခွင့်မရသေးတာဖြစ်ပါတယ်။

Source: The Jerusalem Post
#Yangon_Media_Group

Published 22 February 2022

တရုတ်နိုင်ငံခြားရေးဝန်ကြီးဝမ်ယီနှင့် အမေရိကန်နိုင်ငံခြားရေးဝန်ကြီး အန်တိုနီဘလင်ကန်တို့ဟာ ယူကရိန်းပြသနာနှင့် ကိုရီးယားကျွန်းဆွယ်အရေးကိစ္စတို့ကို  ဖုန်းဖြင့်ပြောဆိုဆွေးနွေးခဲ့ကြပါတယ်။

ဖုန်းဆက်သွယ်ပြောဆိုရာမှာ ဘလင်ကန်က လက်ရှိယူကရိန်းအရေးကိစ္စနှင့်ပတ်သက်လို့ အမေရိကန်ရဲ့အမြင်နှင့်ရပ်တည်ချက်တွေကို အကျဉ်းချုပ်ပြောဆိုခဲ့ပါတယ်။

ယူကရိန်းအရေးကိစ္စနှင့်ပတ်သက်လို့ တရုတ်နိုင်ငံအနေနှင့်စိုးရိမ်မိပြီး တရုတ်ရဲ့ရပ်တည်ချက်ဟာ အပြောင်းအလဲမရှိတစ်သတ်မတ်တည်းရှိတယ်လို့ ဝမ်ယီက ဘလင်ကန်ကိုပြန်လည်ပြောဆိုခဲ့ပါတယ်။

Source CMG

#Ukraine_Issue_US_China

#WangYi_And_Blinken

#China_US_Politics

ရုပ်သံကြည့်ရှုရန်>>

Published_ 22 Feb 2022

 ကုန်းလမ်းပို့ဆောင်ရေးညွှန်ကြားမှုဦးစီးဌာနမှာ ယခင်ကမှတ်ပုံတင်ထားရှိပြီး သက်တမ်းတိုးဆက်လက်ဆောင်ရွက်ခြင်းမရှိတဲ့အတွက် မှတ်ပုံတင်ဖျက်သိမ်းပြီး ဖြစ်သည့် 1980 Model နှင့် ၎င်းမတိုင်မီယာဉ်များအား ရှေးဟောင်း Classic မော်တော်ယာဉ်အဖြစ် သတ်မှတ်ဒဏ်ကြေးနဲ့ ပြန်လည်မှတ်ပုံတင်ပေးမှာ ဖြစ်တယ်လို့ ပို့ဆောင်ရေးနှင့်ဆက်သွယ်ရေး ဝန်ကြီးဌာနက ကြေညာထားပါတယ်။

 မြန်မာနိုင်ငံအနေနဲ့ ရှေးဟောင်း Classic မော်တော်ယာဉ်များကို တန်ဖိုးထား ထိန်းသိမ်းနိုင်ရေး၊ သမိုင်းဝင်ယာဉ်များအဖြစ် တရားဝင်မှတ်ပုံတင်ခွင့်ပြုနိုင်ရေးအတွက် ကညန ကဆောင်ရွက်ပေးမှာဖြစ်ပါတယ်။

 မှတ်ပုံတင်ဆောင်ရွက်ရာမှာ မူလမှတ်ပုံတင်ထားရှိခဲ့တဲ့ ယာဉ်များကိုပဲ ပြန်လည် မှတ်ပုံတင်ဆောင်ရွက်ပေးမှာ ဖြစ်ပြီး၊ ယာဉ်အမှတ်ကို ရောက်ရှိယာဉ်အမှတ် အသစ်ဖြင့် သတ်မှတ်ပေးမှာဖြစ်ပါတယ်။ အရင်က မှတ်ပုံတင်ထားခြင်းမရှိတဲ့ ရှေးဟောင်း ယာဉ်များကို မှတ်ပုံတင်ပေးမှာ မဟုတ်ဘူးလို့ ဖော်ပြထားပါတယ်။

 ရှေးဟောင်း Classic မော်တော်ယာဉ်များ ပြန်လည်မှတ်ပုံတင်ဆောင်ရွက်ခြင်းကို သက်ဆိုင်ရာ

တိုင်းဒေသကြီး၊ ပြည်နယ်၊ ခရိုင်၊ ကညန ရုံးများမှာ ဖေဖော်ဝါရီလ ၂၄ ရက်မှ မတ်လ ၂၅ ရက်နေ့အထိ ဆက်သွယ်ဆောင်ရွက်နိုင်ပြီး၊ အသေးစိတ်အချက်အလက်များကို www.motc.gov.mm နှင့် www.myanmarrtad.com တို့မှာ ဝင်ရောက်ကြည့်ရှုနိုင် ကြောင်း သတင်းထုတ်ပြန်ထားပါတယ်။

ymg-mnn

#Yangon_Media_Group