#Local_News
Published_ 25 April 2023

၂၀၂၃ ခုနှစ်အတွက် ဂျပန်ပညာတော်သင်ဆုပေးမည်ဖြစ်ပြီး Daiohs Memorial Foundationမှ ချီးမြှင့်မည့် ပညာသင်ဆုလျှောက်ထားနိုင်ကြောင်း ဂျပန်နိုင်ငံ၊တိုကျိုမြို့ရှိ မြန်မာသံရုံးမှသိရသည်၊၊

အဆိုပါပညာသင်ဆုအတွက် ပညာသင်ဆု ထောက် ပံ့ကြေးပေးမည့် ကျောင်းသားအရေအတွက် (၂၀)ဦးသတ်မှတ်ထားပြီး၂၀၂၃ ခုနှစ်၊ ဧပြီလမှ ၂၀၂၅ ခုနှစ်၊ မတ်လအထိတစ်လလျှင် ယန်း ၁၀,၀၀၀/- ( ယန်းတစ်သောင်းတိတိ ) ( (၆)လလျှင် တစ်ကြိမ် ) ထောက်ပံ့သွားမည်ဖြစ်သည်၊၊

Daiohs Memorial Foundation မှယခုနှစ်အတွက် ချီးမြှင့်မည့် ပညာသင်ဆုသည် တက္ကသိုလ်များ၊ သုတေသနအဖွဲ့အစည်းများနှင့် သုတေသနလုပ်ငန်းများ ဆောင်ရွက်နေသည့် သုတေသနပညာ ရှင်များအား ထောက်ပံ့ပေးရန်အတွက် ရည်ရွယ်ပါကြောင်း၊ အဆိုပါ ဖောင်ဒေးရှင်းမှ ပေးအပ် သည့် ပညာသင်ဆုအား ပြန်လည်ပေးဆပ်ရန်မလိုသည့်အပြင် အခြားအဖွဲ့အစည်းများမှ ပေးအပ်သည့် ပညာသင်ဆုကိုလည်း လက်ခံနိုင်ကြောင်းသိရသည်၊၊

ပညာသင်ဆု လျှောက်ထားရာတွင် ပြည့်မီရမည့် အချက်အလက်များ၊ လိုအပ်သည့် စာရွက်စာတမ်းများနှင့် ပတ်သက်၍ အသေးစိတ်သိရှိလိုပါက မြန်မာသံရုံး၏ ဝက်ဆိုက်ဒ် http://www.myanmar-embassy-tokyo.net/2023/Daiohs/Daiohs.htm တွင် ဝင်ရောက်ကြည့်ရှုနိုင်ကြောင်း သိရသည်၊၊

#Local_News #ဂျပန်ပညာတော်သင်ဆု #Daiohs Memorial Foundation
#YMG #Yangon_Media_Group

#Local_News
Published_ 25 April 2023

Online Shoppingမှဝယ်သူများအနေဖြင့် Online စာမျက်နှာတွင် ကြေညာထားသည့် ပစ္စည်းနှင့် အမှန်တကယ်လက်ခံရရှိသည့်ပစ္စည်း အရည်အသွေး ကွဲလွဲမှုတွေရှိပါက စာသုံးသူရေးရာဦးစီးဌာနကို ဆက်သွယ်တိုင်ကြားနိုင်ကြောင်း အဆိုပါဌာနမှသိရသည်။ လက်ရှိမှာ Online shop တွေမှာ ဆက်သွယ်ဝယ်ယူသူတွေအနေနဲ့ ဝယ်သည့်ပစ္စည်းအရည်အသွေးကွဲလွဲမှုတွေရှိနေတာဖြစ်သည်။

Online Shopping နှင့်ပတ်သက်၍ ငွေပေးချေပြီးသည့်အခါ ပစ္စည်းပေးပို့ခြင်း၊ Page စာမျက်နှာဖော်ပြထားသည့် ဖုန်းနံပတ်များဆက်သွယ်၍မရခြင်း၊ ကုန်ပစ္စည်းတွေပါဝင်သည့် သတင်းအချက်အလတ်များချဲ့ကားဖော်ပြခြင်း စသည့် အခက်အခဲများကို စားသုံးသူများကြုံတွေ့နေရခြင်းဖြစ်ကြောင်း သိရသည်။

ထိုသို့အခက်အခဲများဖြစ်ပေါ်ပါက စားသုံးသူရေးရာဦးစီးဌာန တရားဝင် Website ၊ စားသုံးသူရေးရာဦးစီးဌာန၏ Call Center နံပတ် ( 1535)၊ စားသုံးသူရေးရာဦးစီးဌာန၏ Facebook စာမျက်နှာ၊ ပြည်ထောင်စုနယ်မြေ တိုင်ဒေသကြီးပြည်နယ်တို့တွင်ဖွင့်လှစ်ထားသည့် တိုင်ကြားမူလက်ခံဆောင်ရွက်ရေးစင်တာများတွေ တိုင်ကြားနိုင်ကြောင်း သိရသည်။

#ymg/yn #Local_News #Online #လက်ခံရရှိသည့်ပစ္စည်း #တိုင်ကြားနိုင်
#YMG #Yangon-Media-Group

#Local_News
Published_ 25 April 2023

ရွှေတိဂုံစေတီတော်မြတ်ကြီးတွင် လာမည့်ကဆုန်လပြည့်နေ့မေလ (၃)ရက်တွင် ကဆုန်ညောင်ရေသွန်းလောင်းလှူ ပူဇော်ပွဲကျင်းပမည်ဖြစ်ကြောင်းဂေါပကအဖွဲ့ထံမှ သိရသည်၊၊

ယခုနှစ်ကျင်းပသည့် ကဆုန်ညောင်ရေသွန်းပွဲသည်ရွှေတိဂုံစေတီတော်ကြီး၏ (၄၀)ကြိမ်မြောက် ကဆုန်ညောင်ရေသွန်းလောင်းလှူပူဇော်ပွဲဖြစ်သည်ဟု ဆိုသည်၊၊

ကဆုန်ညောင်ရေသွန်းလောင်းလှူ ပူဇော်ပွဲဖွင့်ပွဲ အခမ်းအနားကို စေတီတော်ရင်ပြင်အင်္ဂါထောင့် မဟာဗောဓိညောင်ပင်၌ကျင်းပမည်ဖြစ်ပြီး ရွှေတိဂုံစေတီတော်သြဝါဒစရိယ ဆရာတော်ကြီးများ၊ဘဏာတော်ထိန်းဂေါပကအဖွဲ့ဝင်လူကြီးများ၊ ဂေါပကအဖွဲ့ရုံးဝန်ထမ်းများ၊ ဗုဒ္ဓဝေယျာဝစ္စအသင်းများ ဖွင့်ပွဲအခမ်းအနားကျင်းပကြမည် ဖြစ်သည်၊၊

ဘုရားဖူးပြည်သူများ ကဆုန်ညောင်ရေသွန်းနိုင်ရန် ရင်ပြင်တော်ထောင့်လေးထောင့်ရှိ ညောင်ပင်များတွင် ဗုဒ္ဓဝေယျာဝစ္စအသင်းများနှင့် ဝန်ထမ်းများကညောင်ရေသွန်းနိုင်ရန်စီစဉ်ဆောင်ရွက်ပေးထားမည်ဖြစ်ကြောင်း ထုတ်ပြန်ထားသည်၊၊

#ymg/tthl #ရွှေတိဂုံစေတီတော် #ကဆုန်ညောင်ရေသွန်း
#YMG #Yangon_Media_Group

#Local_News
Published-25 April 2023

ထိုင်းနိုင်ငံ အီလက်ထရွန်းနစ် စက်ရုံမှအလုပ်ထုတ်ခံရသည့်  MOU  မြန်မာလုပ်သားများ ယခုအပတ်အတွင်းအလုပ် ပြန်ရရှိနိုင်ရန်ကွင်းဆင်းဆောင်ရွက်နေကြောင်း ဗန်ကောက်မြို့ရှိ မြန်မာ အလုပ်သမားသံအရာရရှိရုံးက သိရသည်။

ထိုင်းနိုင်ငံ စမုစခွန်ခရိုင်ရှိ Cal-Comp အီလက်ထရွန်းနစ်စက်ရုံမှ အလုပ်ထုတ်ပယ်ခံရသည့် MoU အလုပ်သမားများ အလုပ်အကိုင်သစ်အမြန်ရရှိရေးအတွက် ရည်ရွယ်၍ အလုပ်သမားသံအရာရှိရုံးမှ စမုစခွန်နယ်မြေ၊ အလုပ်အကိုင်ဌာနရုံး၌ ရုံးတာဝန်ခံအရာရှိများ၊ သက်ဆိုင်ရာ ထိုင်းဘတ်ငါးသန်းအေဂျင်စီများ၊ စက်ရုံမှ တာဝန်ရှိသူများဖြင့် အသေးစိတ် ညှိနှိုင်းဆွေးနွေးလျှက်ရှိပြီး Cal-Comp စက်ရုံ သို့မဟုတ် အခြားအလုပ်အကိုင်သစ်ရရှိရေး စောင့်ဆိုင်းသူများအတွက် ယခုရက်သတ္တပတ်အတွင်း ကွင်းဆင်းညှိနှိုင်းဆောင်ရွက်ရန် စီစဉ်ဆောင်ရွက်နေကြောင်း ဧပြီလ ၂၄ရက်က ထုတ်ပြန်ထားသည်။

ထို့အပြင်ထိုင်းနိုင်ငံ စမုစခွန်ခရိုင်ရှိ Cal-Comp Electronics စက်ရုံမှ အလုပ်ထုတ်ပယ်ခံရသည့် MOU အလုပ်သမားများအလုပ်ပြန်လည်ခန့်အပ်နိုင်ရေးအတွက် ရည်ရွယ်၍ အလုပ်ရှင်များနှင့်တွေ့ဆုံဆွေးနွေးခဲ့ရာ အလုပ်ပြန်ခန့်အပ်ပါက နှစ်ဆိုင်းမှသုံးဆိုင်းသိုပြောင်းလဲသတ်မှတ်ရမည်ဖြစ်ကြောင်း၊ ထိုသို့ဆောင်ရွက်လျှင် ထပ်မံဆန္ဒပြမည်ကိုစိုးရိမ်ကြောင်း၊ ခန့်ထားဆဲအလုပ်သမားများနှင့်ပြန်လည်ခန့်အပ်ရမည့်အလုပ်သမားများက သုံးဆိုင်းဖြင့် လုပ်ကိုင်ရန်သဘောတူညီချက်လိုအပ်ကြောင်းသိရပြီး အလုပ်သမားသံအရာရှိရုံးမှသက်ဆိုင်ရာတာဝန်ရှိသူများနှင့်ဆက်လက်ဆွေးနွေးလျက်ရှိကြောင်း သိရသည်။

ပြီးခဲ့သည့် မတ်လ ၃၀ ရက်က စမုစခွန်ခရိုင်ရှိ Cal-Comp Electronics စက်ရုံမှ အလုပ်သမား ၁၀၅၇ဦး အလုပ်ထုတ်ခံခဲ့ရခြင်း ဖြစ်သည်။

#ymg/pl #Local_News #Cal-Comp Electronics #MoU မြန်မာလုပ်သား #အလုပ်သမားသံအရာရှိ #YMG #Yangon-Media-Group

#Local_News
Published_ 25 April 2023

ပြည်တွင်း စားသုံးဆန်ဈေးနှုန်းများ မြင့်တက်စေရန် ရည်ရွယ်ချက်ဖြင့် ဆောင်ရွက်နေသူများ ရှိနေတာကြောင့် ဆန်ဈေးနှုန်း တည်ငြိမ်စေရန်နှင့် ပစ္စည်းမှန်၊ ဈေးနှုန်းမှန် ၊ အရောင်းအဝယ်မှန် ဖြစ်စေရေး ထိန်းကျောင်းဆောင်ရွက်သွားရန် လုပ်ဆောင်မယ်လို့ မြန်မာနိုင်ငံဆန်စပါးအဖွဲ့ချုပ်က သိရသည်။

ဆန်ဈေးမြင့်တက်စေရန်နှင့် စားသုံးသူပြည်သူများအတွက် စိုးရိမ်ထိတ်လန့်စေရန် လှုံ့ဆော် ဆောင်ရွက်သူများ၊ Online ပေါ်တွင် စိုးရိမ်စိတ် တိုးပွါးစေရန် မမှန်သော ဈေးနှုန်းများ၊ မမှန်သော သတင်းအချက်အလက် တင်နေသူများကို ရှာဖွေစီစစ်သွားမည်ဟု ဆိုသည်။

လက်တလောတွင် ဆန်ဈေးများဆက်တိုက်မြင့်တက်လာမည်ဟုသော သတင်းအမှားများကို လူမှုကွန်ယက်မှ တဆင်ဖြန့်ဝေမှုများလဲရှိနေကြောင်း သိရသည်။

ထို့အပြင်ဆန်စပါးကုန်သည်များအသင်း၊ ကုန်စည်ဒိုင်များ၊ ဆန်စက်ပိုင်များ၊ ဆန်ကုန်သည်များ၊ ကုမ္ပဏီများနှင့် ပူးပေါင်းကာ ဆန်ဈေးကစားမှုများကို ထိန်းချုပ်သွားရန်စီစဉ်နေကြောင်း သိရသည်။

သင်္ကြန်ကာလအပြီးတွင် ရန်ကုန်သို့ဆန်အဝင်နည်းသွားပြီး ပြည်တွင်းစားသုံးဆန်အချောအမျိုးအစားအလိုက်တစ်အိတ်လျင်၁၅၀၀မှ၂၀၀၀ကြားဈေးမြင့်တက်နေကြောင်းဆန်ကုန်သည်များထံမှသိရသည်။

#ymg/ppk #Local_News #ဆန်ဈေး #သတင်းမှား
#YMG #Yangon-Media-Group

Published 24 April 2023

ပါကစ္စတန်ရဲ့လက်ရှိ နိုင်ငံရေးနှင့်စီးပွားရေးအကျပ်အတည်းတွေက စစ်တပ်က အာဏာရယူမည့်အခြေအနေသို့ ဦးတည်သွားနိုင်တယ်လို့ ပါကစ္စတန်ဝန်ကြီးချုပ်ဟောင်းက သတိပေးပြောကြားလိုက်ပါတယ်။

လက်ရှိဖြစ်ပေါ်နေတဲ့ ပြဿနာတွေ ခပ်မြန်မြန်အဆုံးမသတ်ဘူးဆိုရင် စစ်တပ်က အာဏာယူဖို့ ဖြစ်နိုင်ချေရှိနေတယ်လို့ ဝန်ကြီးချုပ်ဟောင်း ရှာဟစ်ခါကန်အက်ဘာဆီက အရုဏ်ဦးသတင်းဌာနကို ပြောကြားခဲ့ပါတယ်။

ဘက်ဘာဆီက ပါကစ္စတန်ရဲ့ စစ်အုပ်ချုပ်ရေးရှည်ကြာခဲ့တဲ့ကာလတွေကို ရည်ညွှန်းပြောဆိုခဲ့ပြီး စစ်တပ်ဟာ သိပ်ပြီးဆိုးရွားမှုမရှိတဲ့အခြေအနေမှာတောင် အာဏာကို ထိန်းချုပ်ရယူတာမျိုးတွေရှိခဲ့တယ်လို့ပြောပါတယ်။

ဒီလိုအဖြစ်မျိုးကို ဟန့်တားနိုင်ဖို့အတွက် ထိပ်ပိုင်းခေါင်းဆောင်တွေဟာ တွေ့ဆုံဆွေးနွေးမှုတွေစတင်ဖို့လိုအပ်နေပြီလို့ သူကအလေးပေးပြောဆိုပါတယ်။ အဖွဲ့အစည်းတွေနှင့်အခြေအနေအကြား ပဋိပက္ခကို မဖြေရှင်းနိုင်ဘူးဆိုရင် စစ်အုပ်ချုပ် ရေးဥပဒေဟာ ဖြစ်လာနိုင်တယ်လို့လည်း သူကပြောပါတယ်။

“ စနစ်က အလုပ်မဖြစ်တော့တဲ့အခါ ဒါမှမဟုတ် အဖွဲ့အစည်း institutions  တွေနှင့် နိုင်ငံရေးခေါင်းဆောင်မှုအကြား ပဋိပက္ခတစ်ခုရှိနေတဲ့အခါ ပြီးတော့ နိုင်ငံရေးခေါင်းဆောင်တွေက ရှေ့ကိုမတိုးနိုင်တော့ရင် စစ်အုပ်ချုပ်ရေးဟာ ဖြစ်နိုင်ချေ ရှိနေတုန်းပဲ” လို့  ပါကစ္စတန်အာဏာရပါတီဖြစ်တဲ့ ပါကစ္စတန်မူစလင်အဖွဲ့ချုပ်-နာဝက်ဇ်ရဲ့ အကြီးတန်းခေါင်းဆောင်   လည်းဖြစ်တဲ့ သူကပြောပါတယ်။

ပါကစ္စတန်ရဲ့လက်ရှိအကျပ်အတည်းမှာ အဓိကကစားသမား(၃)ဦးရှိနေတယ်လို့သူကပြောပါတယ်။ အဲဒီသူတွေက ပါကစ္စတန်တီဟရက်အိုင်အင်ဆပ်(ပီတီအိုင်)ရဲ့ ဥက္ကဋ္ဌ အင်မရန်ခန်၊ ပါကစ္စတန်မူစလင်အဖွဲ့ချုပ် နာဝက်ဇ်ရဲ့ ခေါင်းဆောင် နာဝက်ဇ်ရှာရစ်နှင့် စစ်တပ်အကြီးအကဲ ဗိုလ်ချူပ်ကြီး အာဆင်မူနီယာတို့ဖြစ်ကြပြီး သူတို့ဟာ ကိုယ့်ရဲ့အကျိုးစီးပွားတွေ ကိုဘေးဖယ်ထားပြီး အတူတကွထိုင်ဆွေးနွေးဖို့လိုအပ်တယ်လို့လည်း ဆက်ပြောပါတယ်။

လက်ရှိ ပါကစ္စတန်ရဲ့ စီးပွားရေးနှင့်နိုင်ငံရေးအခြေအနေတွေဟာ အရင်တွေထက် ပိုပြီးဆိုရွားနေပြီး ဒီလိုအခြေအနေမျိုး ယခင်ကရှိခဲ့တိုင်း စစ်တပ်က အာဏာရယူလေ့ရှိတယ်လို့လည်း သူက အလေးပေးပြောဆိုပါတယ်။

ပါကစ္စတန်ရဲ့လက်ရှိ စီးပွားရေးနှင့်နိုင်ငံရေးအခြေအနေတွေက တိုးတက်လာမယ့် အရိပ်အယောင်မတွေ့ရဖြစ်နေပါတယ်။ စစ်တပ်က ကြားဝင်တာဖြစ်လာမှာမဟုတ်ဘူးလို့ သူမျှော်လင့်ကြောင်းနှင့် ကြားဝင်စွက်ဖက်လိုက်ရင် အခြေအနေက ပိုဆိုး သွားလိမ့်မယ်လို့လည်းသူကဆိုပါတယ်။

နိုင်ငံရေးအရအဖြေရှာခြင်းကသာ တိုးတက်မှဒရှိစေနိုင်မှာဖြစ်တယ်လို့လည်း သူကဆက်လက်ပြောဆိုပါတယ်။

အဲဒီအပြင် အမေရိကန်တို့၊ဗြိတိန်တို့လို နိုင်ငံခြားတိုင်းပြည်တွေက ပြဿနာတွေပြေငြိမ်းအောင် ဝင်ရောက် ဖျန်ဖြေပေးတဲ့ စိတ်ကူးကိုလည်း အက်ဘာဆီက ပယ်ချခဲ့ပါတယ်။ အဖြေဟာ ပြည်တွင်းထဲကပဲ လာဖို့လိုအပ်တယ်လို့ သူကပြောပါတယ်။

Source WION

#ပါကစ္စတန်အကျပ်အတည်း

#ပါကစ္စတန်ဝန်ကြီးချုပ်ဟောင်းရှာဟစ်ခါကန်အက်ဘာဆီ

#YangonMediaGroup

#World_Population
Published 25 April 2023

အိန္ဒိယနိုင်ငံဟာ လာမယ့်ရက်သတ္တပတ်အတွင်း ကမ္ဘာ့လူဦးရေအများဆုံးနိုင်ငံအဖြစ် တရုတ်ထံကနေ လွှဲပြောင်းတော့မှာဖြစ်ပြီး လူဦးရေ ၁.၄၃ ဘီလီယံနီးပါးရှိနေပြီဖြစ်ကြောင်း ကုလသမဂ္ဂက ဧပြီ ၂၄ ရက်နေ့မှာ ပြောကြားလိုက်ပါတယ်။

"ယခုလအကုန်မှာ အိန္ဒိယလူဦးရေ ၁,၄၂၅,၇၇၅,၈၅၀ ယောက်ရှိလာရန်နဲ့ တရုတ်ပြည်မကြီးရဲ့လူဦးရေကို ကျော်လွန်သွားရန် ခန့်မှန်းထားပါတယ်" လို့ ကုလစီးပွားရေးနှင့်လူမှုရေးရာဌာနက ပြောပြလိုက်ပါတယ်။

ဒါဟာ အိန္ဒိယကိုယ်တိုင်က လူဦးရေအလွန်များပြားလာခြင်းနဲ့အတူ တရုတ်ကလည်း ပြီးခဲ့တဲ့နှစ်က လူဦးရေ ၁.၄၂၆ ဘီလီယံအထိ ကျဆင်းခဲ့တာကြောင့် ဖြစ်ပါတယ်။

ခရစ်နှစ် ၅ ရာစု ရောမအင်ပါယာကျဆုံးပြီးကတည်းက ကမ္ဘာ့လူဦးရေအထူထပ်ဆုံးနိုင်ငံအဖြစ် တရုတ်ကိုသတ်မှတ်ထားရာ ယခုရာစုနှစ်အကုန်မှာ တရုတ်လူဦးရေ ၁ ဘီလီယံခန့်အထိ ပုံမှန်ကျဆင်းသွားနိုင်တယ်လို့ ကုလကခန့်မှန်းထားပါတယ်။

တရုတ်ရဲ့လူဦးရေဆိုရာမှာ ထိုင်ဝမ်၊ ဟောင်ကောင်၊ မကာအိုတို့မှ လူဦးရေတို့ကို ထည့်မတွက်ထားပါဘူး။

ထိုအချိန်မှာပဲ အိန္ဒိယလူဦးရေကတော့ လာမယ့်ဆယ်စုနှစ်များအတွင်း ဆက်လက်မြင့်တက်နေဦးမယ်လို့လည်း ဖော်ပြထားပါတယ်။

ရာစုနှစ်ဝက်အရောက်မှာ အိန္ဒိယလူဦးရေ ၁.၅ ဘီလီယံရှိလာနိုင်တယ်လို့ ခန့်မှန်းထားပါတယ်။
၂၀၁၆ ခုနှစ်မှာအဆုံးသတ်ခဲ့တဲ့ တရုတ်ရဲ့ကလေးတစ်ယောက်မူဝါဒကြောင့် တရုတ်တို့လူဦးရေ အလွန်အမင်းကျဆင်းလာရတာပဲ ဖြစ်ပါတယ်။

ဒါ့အပြင် တရုတ်မှာ နေထိုင်စရိတ်မြင့်တက်လာကာ အလုပ်ခွင်ဝင်ရောက်လာကြတဲ့ တရုတ်အမျိုးသမီး များပြားလာကြပြီး အဆင့်မြင့်ပညာရေးကို မျှော်မှန်းလာကြတာကြောင့်လည်း ပတ်သက်နေပါတယ်။

ပြီးခဲ့တဲ့နှစ်က တရုတ်နိုင်ငံရဲ့ကလေးမွေးဖွားနှုန်းဟာ ကမ္ဘာမှာ အနည်းဆုံးနိုင်ငံတွေထဲက တစ်နိုင်ငံဖြစ်ခဲ့ပြီး အမျိုးသမီးတစ်ဦးလျှင် ကလေး ၁.၂ ယောက်နှုန်းဖြစ်ခဲ့ပါတယ်။
လူဦးရေထိန်းချုပ်ရန် ခက်ခဲနေတဲ့အိန္ဒိယကတော့ အမျိုးသမီးတစ်ဦးလျှင် ၂ ယောက်နှုန်းမွေးဖွားခဲ့တာဖြစ်ပါတယ်။

တရုတ်နဲ့အိန္ဒိယကြား အဓိကကွာခြားချက်တစ်ခုက တရုတ်ကလေးတစ်ယောက်မူဝါဒဖြစ်ပြီး နောက်တစ်ချက်ကတော့ အိန္ဒိယရဲ့ နိမ့်ပါးတဲ့လူသားရင်းနှီးမြှုပ်နှံမှုနဲ့ ၁၉၇၀၊ ၁၉၈၀ ခုနှစ်များအတွင်း စီးပွားရေးတိုးတက်မှု နှောင့်နှေးတာကြောင့်ဖြစ်ပါတယ်။

အဆိုပါနှစ်နိုင်ငံစလုံးအနေနဲ့ သက်ကြီးလူဦးရေများလာတာကိုလည်း ရင်ဆိုင်နေရပြီး တရုတ်ကပိုဆိုးရွားနေပါတယ်။

အိန္ဒိယမှာ လူဦးရေများလာတာနဲ့အလျောက် လျှပ်စစ်၊ စားသောက်ကုန်၊ နေရာထိုင်ခင်းတို့နဲ့ပတ်သက်ပြီး အခက်အခဲများရှိလာကာ မြို့တွေမှာ ရေရှားပါးပြတ်လပ်ခြင်း၊ လေထုရေထုညစ်ညမ်းခြင်း၊ စွန့်ပစ်ပစ္စည်းများပြားခြင်းတို့ ဖြစ်ပေါ်နေပါတယ်။

များပြားလာတဲ့လူဦးရေအတွက် အလုပ်အကိုင်နေရာပေါင်းများစွာဖန်တီးဖို့လည်း ဝန်ကြီးချုပ်'နာရန်ဒရာမိုဒီ'မှာ တာဝန်ရှိနေပါတယ်။

တရုတ်မှာလည်း အသက်အရွယ်ကြီးလာတဲ့သူတွေနေရာမှာ အစားထိုးဖို့ပြဿနာတွေ မြင့်တက်နေပါတယ်။

Source: CNA #World_Population #ကမ္ဘာ့လူဦးရေ #အိန္ဒိယ #တရုတ်
#YMG#Yangon_Media_Group

#World_Health
Published 25 April 2023

နွေရာသီမှာ ကိုယ့်ကိုယ်ကို သေချာဂရုမစိုက်ရင် နေရောင်က မျက်လုံးတွေကို ထိခိုက်စေနိုင်ပါတယ်။

နေကာခရင်မ်က အသားအရည်ကို နေရောင်ခြည်ဒဏ်မှကာကွယ်ရန် အရေးကြီးသလို ပူပြင်းတဲ့ကာလတွေမှာ မျက်လုံးတွင်အကာအကွယ်တပ်ဆင်ခြင်းဖြင့် ယိုယွင်းရောဂါအမျိုးမျိုးမှ ကင်းဝေးစေနိုင်မှာဖြစ်ပါတယ်။

ခရမ်းလွန်ရောင်ခြည်ဆိုတာ လျှပ်စစ်သံလိုက်ရောင်ခြည်တစ်မျိုးဖြစ်ပါတယ်။
မျက်စိနဲ့မမြင်ရပေမယ့် မျက်လုံးတစ်ရှူးတွေကို ဖောက်ဝင်နိုင်ကာ မျက်လုံးပြဿနာအမျိုးမျိုး ဖြစ်နိုင်ချေများပါတယ်။

ဒါကြောင့် မျက်စိရောဂါအမျိုးမျိုး မဖြစ်ပွားရအောင် မျက်လုံးကို နေရောင်နဲ့မထိအောင် ကာကွယ်ဖို့က အရေးကြီးပါတယ်။

နေရောင်ထိတွေ့မှုပြင်းထန်နှုန်း၊ အကြိမ်အရေအတွက်တို့အပေါ် မူတည်ပြီး အတွင်းတိမ်၊ မျက်စိယိုယွင်းခြင်း၊ မျက်ခမ်းခြောက်ခြင်း၊ မျက်ကြည်လွှာလောင်ကျွမ်းခြင်း၊ မျက်လုံးအတွင်းသားအတွင်းတိမ်ကင်ဆာတို့ ဖြစ်စေနိုင်ကြောင်း မျက်စိခွဲစိတ်ဆရာဝန်'နီရာဂျ်ဆန်ဒူဂျာ'က ပြောကြားလိုက်ပါတယ်။

- နေကာမျက်မှန်တပ်ပါ

နေကာမျက်မှန်ရွေးချယ်တပ်ဆင်ဖို့က အရေးကြီးပြီး ခရမ်းလွန်ရောင်ခြည်အပြည့်အဝကာကွယ်ပေးတဲ့ မျက်မှန်၊ UV 400 လို့တံဆိပ်တပ်ထားတဲ့မျက်မှန်တွေဖြစ်ဖို့ အရေးကြီးပါတယ်။

- ဦးထုပ်ဆောင်းပါ

နေပူထဲထွက်လို့ ဦးထုပ်ဆောင်းတဲ့အခါ နေရောင်အများစုကို ကာကွယ်နိုင်တဲ့ဟာမျိုး ဝတ်ဆင်ပါ။

မျက်စိကိုအကာအကွယ်ဖြစ်စေမယ့် ဦးထုပ်မျိုး၊ နေကာမျက်မှန်တို့ဖြင့် ခရမ်းလွန်ရောင်ခြည်တွေကို အရိုးရှင်းဆုံးကာကွယ်နိုင်မှာဖြစ်ပါတယ်။

- မွန်းတည့်ချိန်အပြင်မထွက်ပါနှင့်

နေ့လယ် ၁၂ နာရီမှ ၃ နာရီအတွင်း နေအပြင်းဆုံးဖြစ်ပြီး ထိုအချိန်အပြင်ရောက်နေတယ်ဆိုရင် မျက်လုံးကိုအထိခိုက်နိုင်ဆုံး အခြေအနေဖြစ်ပါတယ်။
ဒါကြောင့် ခရမ်းလွန်ရောင်ခြည်ထိတွေ့မှု အတတ်နိုင်ဆုံးလျှော့ချနိုင်အောင် အပြင်မထွက်သင့်ပါဘူး။

နေလုံးကိုတိုက်ရိုက်ကြည့်ရှုခြင်းကလည်း မျက်လုံးအိမ်အပေါက်ဖြစ်ခြင်းနဲ့ မျက်ကြည်လွှာရောဂါများ ဖြစ်နိုင်ပါတယ်။

Source: India Today #World_Health #နေရောင်ခြည် #ဘယ်လိုကာကွယ်ရမလဲ
#YMG #Yangon_Media_Group

#Local_News
Published _24 April 2023

နိုင်ငံရေးအရ တည်ငြိမ်အေးချမ်းစွာ လျှောက်လှမ်းနိုင်မည့် ရလဒ်များ ရရှိနေပြီဖြစ်ကြောင်း နစက ဥက္ကဌက ဧပြီလ ၂၄ ရက်တွင် ပြုလုပ်ခဲ့သောပြည်ထောင်စုတိုင်းရင်းသားလူမျိုးများ ဖွံ့ဖြိုးရေးတက္ကသိုလ်ပညာရေးဘွဲ့ ၅ နှစ်သင်တန်း အမှတ်စဉ်(၅) ကျောင်းသား၊ ကျောင်းသူများနှင့်တွေ့ဆုံအမှာစကားပြောကြားသည့်အခမ်းအနားအတွင်း ထည့်သွင်းပြောကြားလိုက်သည်။

နစက အနေဖြင့် တာဝန်ယူခဲ့သည့် ကာလအတွင်း ၂၀၂၂ ခုနှစ်ကို ငြိမ်းချမ်းရေးနှစ်အဖြစ် သတ်မှတ်ပြီး ပြည်တွင်းလက်နက်ကိုင် ပဋိပက္ခများချုပ်ငြိမ်းရေး၊ ရေရှည်တည်တံ့ ခိုင်မြဲသည့် ထာဝရငြိမ်းချမ်းရေးရရှိရန်အတွက် ကိုယ်တိုင်ကိုယ်ကျ တွေ့ဆုံဆွေးနွေးနိုင်ရေး ဖိတ်ခေါ်ကမ်းလှမ်းခဲ့ကြောင်း၊ ယနေ့အထိ NCA လက်မှတ်ရေး ထိုးပြီးဖြစ်သည့် တိုင်းရင်းသားလက်နက်ကိုင်အဖွဲ့(၇)ဖွဲ့နှင့် လက်မှတ်ရေးထိုးခြင်း မပြုရသေးသည့် လက်နက်ကိုင် အဖွဲ့(၃)ဖွဲ စုစုပေါင်း(၁၀)ဖွဲ့တို့က ကိုယ်စားလှယ်များနှင့် တွေ့ဆုံဆွေးနွေးနေကြောင်းလည်း ၎င်းက ပြောသည်။

ယင်းသို့ ဆွေးနွေးရာတွင် နိုင်ငံရေးအရ တည်ငြိမ်အေးချမ်းစွာ လျှောက်လှမ်းနိုင်မည့်ရလဒ်များ ရရှိနေပြီဖြစ်ကြောင်း၊ ငြိမ်းချမ်းရေးစားပွဲဝိုင်းကို ရောက်ရှိလာ ခြင်းမရှိသေးသည့် တိုင်းရင်းသားအဖွဲ့ အစည်းများကိုလည်း ကြိုတင်ကန့်သတ်ချက် တစ်ခုမှမထားဘဲ တွေ့ဆုံဆွေးနွေးခြင်းကို အစဉ်အမြဲ တံခါးဖွင့်ကြိုဆိုထားကြောင်း နစက ဥက္ကဌ ဗိုလ်ချုပ်မှူးကြီးမင်းအောင်လှိုင်က ပြောသည်။

ထို့အပြင် တပ်မတော်အနေဖြင့် ပစ်ခတ်တိုက်ခိုက်မှုရပ်စဲရေးကို ၂၂ ကြိမ်ထုတ်ပြန်ခဲ့ပြီး ၂၀၂၃ ခုနှစ်ကုန်သည်ထိ ပစ်ခတ်တိုက်ခိုက်မှု ရပ်စဲရေးကို တိုးမြှင့်ပေးထားပြီး ဖြစ်ကြောင်း၊ လက်နက်ကိုင်လမ်းစဉ်နှင့် လက်နက်ကိုင်ပဋိပက္ခများကို စွန့်ခွာပြီး တွေ့ဆုံဆွေးနွေးခြင်းက တစ်ဆင့် မှန်ကန်သည့် နိုင်ငံရေးလမ်းကြောင်းဖြစ်သော NCA အတိုင်း ငြိမ်းချမ်းစွာလျှောက်လှမ်းကြမှသာ ဒီမိုကရေစီနှင့် ဖက်ဒရယ်စနစ်ကို အခြေခံ သည့် ပြည်ထောင်စုနိုင်ငံတော်ကို တည်ဆောက်နိုင်မည်ဖြစ်ကြောင်းလည်း ပြောသည်။

#ymg/pl #Local_News #နိုင်ငံရေး #နစက
#YMG #Yangon_Media_Group

#Local_News
Published_ 25 April 2023

တရုတ်-မြန်မာနယ်စပ်မြို့များတွင် မိုးလေဝသဝန်ဆောင်မှုများဆောင်ရွက်ထားကြောင်း မြန်မာ နိုင်ငံဆိုင်ရာတရုတ်သံရုံး၏ ထုတ်ပြန်ချက်အရ သိရသည်၊၊

ထုတ်ပြန်ချက်တွင် ဝမ်တိန်နယ်စပ်ဂိတ်သည် ယူနန်ပြည်နယ် တယ်ဟုန်ပြည်နယ်ခွဲတွင် တည်ရှိပြီး တရုတ်-မြန်မာနှစ်နိုင်ငံ သွားလာဆက်ဆံသည့် အရေးပါနယ်စပ်ဂိတ်ဖြစ်ကြောင်း၊ နယ်စပ်ဂိတ်ဆက်သွယ်ရေးနှင့် ကုန်စည်စီးဆင်းမှုလုံခြုံရေးကို အာမခံနိုင်ရန်အတွက် ၂၀၂၁ ခုနှစ်တွင် နယ်စပ်ဂိတ်များ ကုန်စည်ဖြတ်သန်းမှုကို ပြန်လည်ဖွင့်လှစ်ပြီးနောက် ရွှေလီမြို့မိုးလေဝသဦးစီးဌာနသည် ဝမ်တိန်အပါအဝင် ကုန်စည်ဖြတ်သန်းရာလမ်းကြောင်း သုံးခုအတွက် သီးသန့်မိုးလေဝသ အာမခံဝန်ဆောင်မှုပေးခဲ့သည်ဟုဆိုသည်၊၊

မိုးရာသီကျရောက်လာချိန်တွင် တရုတ်-မြန်မာနှစ်ဖက်မှ ယာဉ်မောင်းများသည် လက်ကိုင်ဖုန်းတွင် ကြိုတင်သတိပေးသည့် စာတိုများလက်ခံရရှိနိုင်သဖြင့် မကောင်းမွန်သော ရာသီဥတုကြောင့် ကုန်စည်ပို့ဆောင်မှုအပေါ်အကျိုးသက်ရောက်မှုကို လျှော့ချနိုင်မည်ဖြစ်ကြောင်းမြန်မာနိုင်ငံသား ကျောင်းသားကျောင်းသူပေါင်း သုံးပုံတစ်ပုံရှိသည့် ရွှေလီမြို့ ကျယ်ဂေါင်မူလတန်းကျောင်းတွင် ရွှေလီမြို့မိုးလေဝသဦးစီးဌာနသည် ကျောင်းနှင့်အတူ မိုးလေဝသထူးခြားချက်လှုပ်ရှားမှုသင်ခန်းစာ အတူဖော်ဆောင်ပြီး မိုးလေဝသယေဘုယျဗဟုသုတများအား နေ့စဉ်သင်ကြားမှုတွင် ပေါင်းစပ်ခဲ့ကြောင်း ဖော်ပြထားသည်၊၊

ယင်းအပြင်၂၀၁၈ ခုနှစ် ဇူလိုင်လတွင် ရွှေလီမြို့ ပထမဆုံး ကျေးလက်တောရွာ မိုးကြိုးအန္တရာယ်ကာကွယ်ရေးနှင့် ဘေးအန္တရာယ်လျှော့ချရေးစံနမူနာပြနေရာကို တရုတ်-မြန်မာနယ်စပ်ရှိ ရင်ကျင်ရွာတွင် တည်ဆောက်ပြီးစီး၍ စတင်အသုံးပြုခဲ့ကြောင်း၊ ရွှေလီမြို့မိုးလေဝသဦးစီးဌာနသည် ယူနန်ပြည်နယ် မိုးလေဝသအန္တရာယ် ကြိုတင်ကာကွယ်ရေးစင်တာနှင့်အတူ ဤနေရာ၌ မိုးကြိုးအန္တရာယ်အရေးပေါ် ရှောင်တိမ်းရာနေရာ ၁ ခုနှင့် မိုးကြိုးလွှဲ ၃ ခုတပ်ဆင်ခဲ့ကြောင်း၊ ၎င်းသည် တရုတ်နိုင်ငံပြည်တွင်းရှိ ရင်ကျင်ရွာကို လွှမ်းခြုံနိုင်ရုံသာမက မြန်မာနိုင်ငံပြည်တွင်းရှိ မန့်ဟီးရိုးမြို့ကိုလည်း လွှမ်းခြုံနိုင်ကြောင်း ထုတ်ပြန်ချက်တွင်ဖော်ပြထားသည်၊၊

#ymg/tthl #Local_News #တရုတ်-မြန်မာ #မိုးလေဝသ
#YMG #Yangon_Media_Group

#World_Health
Published 25 April 2023

အချို့လူတွေက နေ့စဉ်ဘဝဖိစီးမှုများကြောင့် အရွယ်မတိုင်ခင် အိုမင်းရင့်ရော်လာမှာကို ကြောက်ရွံ့နေတတ်ပါတယ်။

ထိုပြဿနာအတွက် ဖိစီးမှုလျော့နည်းအောင်ပြုလုပ်ခြင်းဖြင့် ရက်ပိုင်းအတွင်းမှာပင် ဇီဝဖြစ်စဉ်အသက်အရွယ်နုပျိုလာနိုင်တယ်လို့ လေ့လာမှုတစ်ခုက အကြံပြုထားပါတယ်။

ပြင်ပလောကသက်တမ်းရှိသကဲ့သို့ ခန္ဓာကိုယ်ထဲက ဆဲလ်တွေ တစ်ရှူးတွေရဲ့လက်ရှိအခြေအနေပေါ်မူတည်ပြီး ဇီဝဖြစ်စဉ်သက်တမ်းလည်း ရှိနေပါတယ်။

သင်ဟာ ကျန်းမာကြံ့ခိုင်နေတယ်ဆိုရင် ဇီဝဖြစ်စဉ်သက်တမ်းက ပြင်ပလက်တွေ့အသက်ထက် ပိုမိုငယ်ရွယ်နေနိုင်ပါတယ်။

အထိုင်များတဲ့သူ၊ နာတာရှည်ရောဂါရှိသူ၊ ရုပ်ပိုင်းဆိုင်ရာချို့တဲ့သူတွေမှာတော့ ဇီဝဖြစ်စဉ်သက်တမ်းကြီးရင့်နေနိုင်ပြီး ရောဂါဘယပိုမိုဖြစ်နိုင်ချေရှိကာ သက်တမ်းတိုစေနိုင်ပါတယ်။
ဇီဝဖြစ်စဉ်အသက်အရွယ်က စိတ်ဖိစီးမှုကြောင့် အလျင်အမြန်ရင့်ရော်လာတယ်လို့ သုတေသနပြုလုပ်ထားပြီးဖြစ်ပါတယ်။

ဟားဗတ်ဆေးတက္ကသိုလ်မှ ဒေါက်တာ'ဗာဒင်ဂလေဒီရှက်ဗ်'ပါဝင်တဲ့အဖွဲ့က ဇီဝဖြစ်စဉ်အသက်အရွယ် ဘယ်လိုပြောင်းလဲနိုင်လဲဆိုတာကို စူးစမ်းချင်ကြပါတယ်။

ဘဝတလျှောက်လုံး ဇီဝဖြစ်စဉ်သက်တမ်း ပြန်ပြောင်းနိုင်တဲ့အတိုင်းအတာနဲ့ ဖြစ်စဉ်တွေကိုတော့ မသိရသေးပါဘူး။

သူ့အဖွဲ့နဲ့အတူ ဒုခ်ဆေးတက္ကသိုလ်မှ သိပ္ပံပညာရှင်များက လူသားတွေနဲ့ကြွက်တွေမှာ စိတ်ဖိစီးမှုအခြေအနေအမျိုးမျိုးကို တုန့်ပြန်ရာကနေ ဇီဝဖြစ်စဉ်အသက်အရွယ်ပြောင်းလဲပုံတွေကို တိုင်းတာခဲ့ကြပါတယ်။

လက်တွေ့ဘဝမှာ တကယ့်ဖိစီးမှုတွေဆိုတာ ခွဲစိတ်မှုကြီးတွေ၊ ကိုယ်ဝန်ဆောင်ချိန်၊ ရောဂါဆိုးဖြစ်ပွားချိန်တို့ဖြစ်ပါတယ်။

ဖိစီးမှုဖြစ်လာတဲ့အခါ ဇီဝဖြစ်စဉ်အသက်အရွယ်လည်း လျင်မြန်စွာကြီးရင့်လာပြီး ဖိစီးမှုပြန်ကျသွားချိန်မှာလည်း မူလအနေအထားပြန်ရောက်သွားကြပါတယ်။

လေ့လာချက်များအရ အခြေခံအကျဆုံးအချက်ကတော့ ဇီဝဖြစ်စဉ်အသက်အရွယ်ရဲ့ သဘာဝကို ဖော်ထုတ်လိုက်ကာ ဖိစီးမှုကြောင့် သက်တမ်းအိုမင်းလာနိုင်သလို အပြန်အလှန်သဘောလည်း သက်ရောက်နေပါတယ်။

ကယ်လိုရီလျှော့ချစားသုံးခြင်းဖြင့် လူတွေရဲ့ဇီဝဖြစ်စဉ်အသက်အရွယ် လျင်မြန်စွာနုပျိုစေနိုင်တယ်လို့ တွေ့ရှိထားပါတယ်။

ကယ်လိုရီကို ၂ နှစ်ကျော်ကြာသည့်တိုင်အောင် ၂၅ ရာခိုင်နှုန်းလျှော့စားသူတွေဟာ ပုံမှန်ကယ်လိုရီစားသုံးသူတွေထက် ဇီဝဖြစ်စဉ်သက်တမ်းရင့်ရော်လာတဲ့အခြေအနေ ၂ - ၃ ရာခိုင်နှုန်း ပိုမိုကြာရှည်စေပါတယ်။

ဒါ့အပြင် စောစီးစွာအသက်ဆုံးပါးနိုင်ချေဟာလည်း ၁၀ -၁၅ ရာခိုင်နှုန်းလျော့ကျလာတာနဲ့လည်း ဆက်စပ်နေပါတယ်။

Source: Daily Mail
#YMG #Yangon_Media_Group

#Local_News
Published_ 24 April 2023

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေး ကော်မတီအနေနဲ့ ဧပြီလ ၂၄ ရက်မှ မေလ ၁ရက်နေ့အထိ စားသုံးဆီရည်ညွှန်းသတ်မှတ်ဈေးမှာ တစ်ပိဿာ ငွေကျပ် ၄၆၈၀ ကျပ်ဖြစ်ကြောင်း ထုတ်ပြန်ထားပါတယ်။

#Local_News #စားသုံးဆီ #ရည်ညွှန်းသတ်မှတ်ဈေး
#YMG #Yangon_Media_Group