#Local_News
Published 22 December 2022

ကရင်တိုင်းရင်းသားများ အနေဖြင့် ပညာနှင့်ယှဉ်သောသတ္တိ၊ မေတ္တာနှင့်ယှဉ်သော ရဲရင့်ခြင်း၊ မွန်မြတ်သည့် ပြည်ထောင်စု စိတ်ဓာတ်တို့ဖြင့် နိုင်ငံတော်အတွက် ညီညီညွတ်ညွတ်ဖြင့် လက်တွဲပူးပေါင်း ဖော်ဆောင်ကြရန် နှစ်သစ်ကူးအခါသမယတွင် အလေးအနက် ဖိတ်ခေါ်လိုကြောင်း နစက ဥက္ကဌက ပြောသည်။

ဒီဇင်ဘာလ ၂၂ ရက်တွင် ကျရောက်သော ကရင်အမျိုးသား နှစ်သစ်ကူးနေ့ထူးနေ့အတွက် ပေးပို့သောသဝဏ်လွှာမိန့်ခွန်းတွင် နစက ဥက္ကဌက အထက်ပါအတိုင်း ဖိတ်ခေါ်ထားခြင်း ဖြစ်သည်။

"ယနေ့အချိန်အခါသည် နိုင်ငံတော်စီမံအုပ်ချုပ်ရေးကောင်စီက နိုင်ငံတာဝန်အရပ်ရပ်ကို ဖွဲ့စည်းပုံအခြေခံဥပဒေနှင့်အညီ ထိန်းသိမ်း ဆောင်ရွက်လျက်ရှိပြီး နိုင်ငံတော်စီမံအုပ်ချုပ်ရေးကောင်စီ၏အခြေခံမူများဖြစ်သော ရှေ့လုပ်ငန်းစဉ်(၅)ရပ်နှင့် နိုင်ငံရေး၊ စီးပွားရေး၊ လူမှုရေး၊ ဦးတည်ချက်(၉)ရပ်တို့ကိုချမှတ်လျက် နိုင်ငံတော်တည်ငြိမ်အေးချမ်းရေး၊ ဖွံ့ဖြိုးတိုးတက်ရေးနှင့် တိုင်းရင်းသားပြည်သူများ၏ လူမှုစီးပွားဘဝများ တိုးတက်ဖွံ့ဖြိုးရေးကို ကိုယ်စွမ်းဉာဏ်စွမ်းရှိသရွေ့ ကြိုးပမ်းလုပ်ဆောင်လျက်ရှိပါသည်။ ကရင် တိုင်းရင်းသားများ အနေဖြင့်လည်း ပညာနှင့်ယှဉ်သောသတ္တိ၊ မေတ္တာနှင့်ယှဉ်သော ရဲရင့်ခြင်း၊ မွန်မြတ်သည့် ပြည်ထောင်စု စိတ်ဓာတ်တို့ဖြင့် နိုင်ငံတော်အတွက် ညီညီညွတ်ညွတ်ဖြင့် လက်တွဲပူးပေါင်းဖော်ဆောင်ကြရန် နှစ်သစ်ကူးအခါသမယတွင် အလေးအနက် ဖိတ်ခေါ်လိုပါသည်။"ဟု ယင်းက အဆိုပါ သဝဏ်လွှမိန့်ခွန်းတွင် ထည့်သွင်းပြောကြားထားသည်။

ယင်းအပြင် မြန်မာနိုင်ငံအတွင်း နေထိုင်ကြသည့် ကရင်တိုင်းရင်းသားများနှင့် အနယ်နယ်အရပ်ရပ်ရှိ ကရင်တိုင်းရင်းသား ညီအစ်ကိုမောင်နှမများ အားလုံးအနေဖြင့် စည်းလုံးညီညွတ်ခြင်းများနှင့်အတူ ရိုးရာယဉ်ကျေးမှု၊ ဓလေ့ထုံးတမ်းများကို သားစဉ်မြေးဆက် လက်ဆင့်ကမ်းထိန်းသိမ်း စောင့်ရှောက်သွားကြရန်နှင့် လူနေမှုဘဝများ ဖွံ့ဖြိုးတိုးတက်ပြောင်းလဲလာသည်နှင့်အမျှ တိုင်းရင်းသားတို့၏ ယဉ်ကျေးမှုရိုးရာဓလေ့ ထုံးစံများမှာလည်း လျော့နည်းတိမ်ကောပပျောက်မှုများ ဖြစ်လာနိုင်သဖြင့် အလေးထားထိန်းသိမ်းကြရန်လည်း နစက ဥက္ကဌက ထည့်သွင်း တိုက်တွန်းထားသည်။

#ymg/myn
#Yangon_Media_Group

#Local_News
Published _ 22 December 2022

ဦးဝင်းမြင့်နှင့်ဒေါ်အောင်ဆန်းစုကြည်တို့၏ ရဟတ်ယာဉ်အမှုများကို လာမည့်တစ်ပတ်တွင် အပြီးသတ်လျှောက်လဲချက်ပေးမည် ဖြစ်ကြောင်းတရားရုံးနှင့် နီးစပ်သူများထံမှ သိရသည်။

ပြီးခဲ့သည့် ဒီဇင်ဘာလ ၁၉ ရက် နှင့် ရက် ၂၀ တို့တွင် သက်သေများ အားလုံးစစ်ဆေးပြီး ဖြစ်သောကြောင့် လာမည့် ဒီဇင်ဘာလ ၂၆ ရက် ၊တနင်္လာနေ့တွင် အပြီးသတ်လျှောက်လဲရတော့မည် ဖြစ်ကြောင်းအဆိုပါ နီးစပ်သူက ပြောသည်။

"ဒီတစ်ပတ် တနင်္လာနေ့က ဒုသမ္မတ ဦးဟင်နရီဗန်ထီးယူကို စစ်ဆေးဖို့ ကျန်နေသေးတာတွေအတွက် စစ်ဆေးတယ်။ အင်္ဂါနေ့က ဦးမင်းထက်ကို စစ်တယ်၊ ပြီးသွားပြီ။ ဒါကြောင့် လာမယ့်တစ်ပတ်မှာ အပြီးသတ်လျှောက်လဲချက် ပေးမှာ ဖြစ်တယ်"ဟု ယင်းက ဆိုသည်။

ဦးဝင်းမြင့်နှင့်ဒေါ်အောင်ဆန်းစုကြည်တို့ကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရ နေပြည်တော်၊ ဘုရားကုန်း မြို့မရဲစခန်းတွင် ၂၀၂၁ ခုနှစ် နိုဝင်ဘာလ ၃၀ ရက် ရက်စွဲဖြင့် ပထမသတင်းပေး တိုင်ကြားချက်ဖွင့်လှစ်ခဲ့ကာ ရဟတ်ယာဉ် နှင့်ပတ်သက်၍ ရာဇဝတ်ကြီးအမှုအမှတ် ၄၆ ၊ ၄၇ ၊ ၄၈ ၊ ၄၉ နှင့် ၅၀ တိုဖြင့် တရားစွဲဆိုခဲ့ခြင်းလည်း ဖြစ်သည်။

#ymg/mt
#Yangon_Media_Group

#Local_News
Published_ 22 December 2022

၂၀၂၂ အာဆီယံချန်ပီယံရှစ် (AFF Mitsubishi Electric Cup 2022 )အုပ်စုပွဲစဉ် ကစားရန်အတွက် မြန်မာကိုယ်စားပြုလက်ရွေးစင်ဘောလုံးအသင်သည် ယနေ့ ဒီဇင်ဘာ ၂၂ ရက် မွန်းလွဲပိုင်းတွင် စင်ကာပူနိုင်ငံသို့ရောက်ရှိခဲ့ပြီဖြစ်ကြောင်း မြန်မာနိုင်ငံဘောလုံးအဖွဲ့ချုပ်က အသိပေးထုတ်ပြန်ထားသည်။

မြန်မာလက်ရွေးစင်အသင်းသည် စင်ကာပူလက်ရွေးစင်အသင်းနှင့် ဒီဇင်ဘာ ၂၄ ရက် မြန်မာစံတော်ချိန် ညနေ ၄နာရီ မိနစ် ၃၀ အချိန်တွင် စင်ကာပူနိုင်ငံ Jalan Besar Stadium တွင် ယှဉ်ပြိုင်ကစားသွားမည်ဖြစ်သည်။

ယှဉ်ပြိုင်ကစားမှုကို SKY NET Sports HD, SKY NET Sport 4 Channel တို့မှတဆင့် Live ထုတ်လွှင့်ပြသသွားမည်ဖြစ်ကြောင်း အသိပေးထားသည်။

ပြီးခဲ့သော ဒီဇင်ဘာ ၂၁ ရက်တွင် မြန်မာ့လက်ရွေးစင်အမျိုးသားအသင်းနှင့် မလေးရှားလက်ရွေးစင်အမျိုးသားအသင်းတို့သည် ရန်ကုန်မြို့၊ သုဝဏ္ဏအားကစားကွင်း၌ ယှဉ်ပြိုင်ကစားခဲ့ကြသည်။

#MYN/ YMG
#Yangon_Media_Group

#Local_News
Published_ 22 December 2022

မန္တလေး-လားရှိုး လမ်းပိုင်းရှိ ပြင်ဦးလွင်-ဂုတ်ထိပ်-ပြင်ဦးလွင် ခရီးစဉ် RBE ရထားများ ပြေးဆွဲမှုကို ယနေ့ ဒီဇင်ဘာလ ၂၂ ရက် ကရင်နှစ်သစ်ကူးနေ့တွင် စတင်ခဲ့ကြောင်း မြန်မာ့ မီးရထားက သိရသည်။

မန္တလေး- လားရှိုးလမ်းပိုင်းရှိ ပြင်ဦးလွင်-ဂုတ်ထိပ် အပိုင်းတွင် ပြည်တွင်းမှ ခရီးသွားလာမည့် ပြည်သူများ၊ နိုင်ငံခြားသားခရီးသွားလာသူများအနေဖြင့် သမိုင်းဝင်ဂုတ်ထိပ်တံတားကြီးကို လေ့လာကြည့်ရှုနိုင်ရန်၊ လမ်းခရီးရှိရေမြေတောတောင် သဘာဝရှုခင်းများ လေ့လာကြည့်ရှုနိုင်ရန်၊ ရှမ်းပြည်နယ်အတွင်းရှိ ဒေသခံပြည်သူများနှင့် ချစ်ကြည်ရင်းနှီးမှု ရရှိစေရန်နှင့် ဒေသန္တရဗဟုသုတများ ရရှိစေရန် ရည်ရွယ်၍ ပြေးဆွဲပေးခြင်း ဖြစ်ကြောင်းလည်း သိရသည်။

ယင်းရထားသည် ပြင်ဦးလွင်ဘူတာမှ နံနက် ၈ နာရီခွဲတွင် ထွက်ခွာ၍ ဂုတ်ထိပ်ဘူတာသို့ မွန်းလွဲ ၁ နာရီတွင် ရောက်ရှိမည်ဖြစ်ကာ ဂုတ်ထိပ်ဘူတာမှ မွန်းလွဲ ၂ နာရီတွင် ပြန်လည်ထွက်ခွာပြီး ပြင်ဦးလွင်ဘူတာသို့ ညနေ ၅ နာရီခွဲတွင် ပြန်လည်ရောက်ရှိမည်ဖြစ်ကြောင်း ၊ ခရီးစဉ်တွင် ခရီးသည် ၄၀ ဦး လိုက်ပါစီးနင်းနိုင်မည်ဖြစ်ပြီး ပွဲကောက်၊ ဝက်ဝံ၊ ဆမ်ဆယ်၊ နောင်ချိုဘူတာတို့တွင် ရပ်တန့်ပေးမည်ဖြစ်ကာ တစ်ဦးလျှင် ခရီးစဉ် အစအဆုံး ငွေကျပ်၃၅၀၀ နှုန်းဖြင့် ပြေးဆွဲပေးခြင်း ဖြစ်ကြောင်းလည်း မြန်မာ့မီးရထား၏ မှတ်တမ်းများအရ သိရသည်။

#ymg/mt
#Yangon_Media_Group

#World_Health
Published 22 December 2022

ရုံးအလုပ်၊ အိမ်အလုပ်၊ ကလေးကိစ္စ၊ စားဝတ်နေရေးကိစ္စတွေကြောင့် ကိုယ့်ကိုယ်ကို ဂရုမစိုက်နိုင်တဲ့လူတွေအများကြီး ရှိနေပါတယ်။

ဒီတာဝန်ကိစ္စကို ဘယ်လောက်အထိ ကောင်းစွာကိုင်တွယ်နိုင်သလဲဆိုတာ စိတ်ကျန်းမာရေးအခြေအနေနဲ့ သက်ဆိုင်နေပါတယ်။

ကိုယ့်ရဲ့စိတ်ကျန်းမာရေးအခြေအနေက ဖိစီးမှုအောက်ရောက်နေလားဆိုတာ သိနိုင်တဲ့အရာတွေရှိပါတယ်။

(၁) အလွန်အကျွံအလုပ်လုပ်ရခြင်း

စားဝတ်နေရေးပြေလည်ဖို့ အချိန်ပိုတွေ နောက်ထပ်အလုပ်တွေ လုပ်နေရခြင်းက စိုးရိမ်ပူပန်မှု၊ စိတ်ဓာတ်ကျခြင်း၊ အားအင်ကုန်ခမ်းခြင်းတို့ကို ဖြစ်စေပါတယ်။

အလုပ်ချိန်များတဲ့အခါ ကိုယ်အလေးချိန်အတက်အကျဖြစ်ခြင်း၊ မောပန်းနွမ်းနယ်နေခြင်း၊ အိပ်ရေးမဝခြင်းတို့ ခံစားရနိုင်ကာ ကိုယ်ခံအားနည်းလာတတ်ပါတယ်။

ယေဘုယျကျန်းမာရေးကောင်းမွန်စေရန်အတွက် တစ်ပတ်အတွင်း အလုပ်ချိန် နာရီ ၄၀ ခန့်သာရှိသင့်ပါတယ်။

(၂) ကျန်းမာရေးအတွက်မသင့်လျော်တဲ့အစားအစာများ စားလွန်းခြင်း

အသီးအနှံ၊ ဟင်းသီးဟင်းရွက်၊ ငါး၊ အစေ့အဆန်၊ အဆီနည်းပါးတဲ့ အစားအစာများစားသုံးခြင်းဟာ စိတ်ဓာတ်ကျခြင်းဖြစ်နိုင်ချေနည်းပါးစေပါတယ်။

ပြည့်ဝဆီ၊ အမျှင်ဓာတ်နည်းခြင်း၊ အသီးအနှံအစားနည်းခြင်းတို့ကြောင့် ဦးနှောက်ဧရိယာတစ်ခုကို သက်ရောက်စေပြီး စိတ်ဖိစီးခြင်း၊ စိတ်ဓာတ်ကျခြင်း၊ အယ်လ်ဇိုင်းမားရောဂါတို့ ဖြစ်တတ်ပါတယ်။

(၃) ပရိုတိန်းအစားနည်းခြင်း

ပရိုတိန်းက ကြွက်သားအတွက်သာမက ဦးနှောက်ကျန်းမာရေးအတွက်လည်း အရေးပါပါတယ်။

ပရိုတိန်းစားသုံးတဲ့အခါ ဒိုပါမင်းဟော်မုန်းများလာကာ ဦးနှောက်မှာစိတ်အခြေအနေကို ထိန်းညှိပေးပါတယ်။

အမျိုးသမီးများအတွက် တစ်နေ့ကို ပရိုတိန်း ၄၅ ဂရမ်မျှစားသုံးသင့်ပြီး အမျိုးသားတွေကတော့ ၅၅ ဂရမ်စားပေးသင့်ပါတယ်။

(၄) မကြာခဏနိုး၍အိပ်ရေးမဝခြင်း

တစ်နေ့လုံး စိတ်ဖိစီးမှုတွေကြုံတွေ့ရတဲ့အခါ ညဘက်မှာ ကောင်းစွာအိပ်မပျော်နိုင်ဘဲ စိတ်ကျန်းမာရေးကို ဆိုးရွားစွာထိခိုက်စေပါတယ်။

ဖိစီးမှုဖြစ်စေတဲ့ဟော်မုန်းတွေက အိပ်ပျော်ခြင်းနဲ့ နိုးကြားခြင်းကြား မျှခြေကိုနှောင့်ယှက်စေကာ ဖိစီးမှုသံသရာလည်ပြီး ပိုမိုဆိုးရွားလာစေပါတယ်။

(၅) ငါးလုံလောက်စွာမစားခြင်း

ငါးများမှရရှိတဲ့ အိုမီဂါ ၃ က ဦးနှောက်ရော စိတ်ကျန်းမာရေးအတွက်ပါ အလွန်အရေးကြီးပါတယ်။

ငါးမစားနိုင်တဲ့အခြေအနေမျိုးမှာ ဖြည့်စွက်အားဆေးဖြင့် စားသုံးသင့်ပါတယ်။

Source: The Sun
#Yangon_Media_Group

#Local_News
Published_ 22 December 2022

လျှပ်စစ်ရထားပြေးဆွဲနိုင်မည့် အခွင့်အလမ်းများရှိသော်လည်း လျှပ်စစ်ထုတ်ယူနိုင်မှုမအောင်မြင်သေးကြောင်း ဒီဇင်ဘာလ ၂၁ ရက် က ရန်ကုန်တိုင်းဒေသကြီး၊ အင်းစိန်မြို့နယ်ရှိ မြန်မာ့မီးရထား၊ စက်ခေါင်းစက်ရုံ(အင်းစိန်)မှ ဝန်ထမ်းများအား နစက ဥက္ကဌက သွားရောက်တွေ့ဆုံစဉ် ပြောကြားခဲ့သည်။

လက်ရှိအချိန်တွင် ကမ္ဘာ့နိုင်ငံအသီးသီး၌ စက်သုံးဆီဈေးနှုန်းမြင့်တက်မှုများကို ကြုံတွေ့နေကြရသောကြောင့် စက်သုံးဆီတင် သွင်းနေရမှုများကို လျှော့ချနိုင်ရေးအတွက် သယ်ယူပို့ဆောင်ရေးလုပ်ငန်းများတွင် လျှပ်စစ်စွမ်းအင်သုံး ပို့ဆောင်ရေးယာဉ်များကို ပြောင်းလဲအသုံးပြုနိုင်ရေး ဆောင်ရွက် နိုင်ရန်လိုအပ်ကြောင်းလည်း ယင်းက ဆိုသည်။

မြန်မာနိုင်ငံအနေဖြင့် လျှပ်စစ်ရထားပြေးဆွဲနိုင်မည့် အခွင့်အလမ်းများ များစွာရှိပြီး ဖြစ်သော်လည်း နိုင်ငံတွင်း၌ရှိသည့် သယံဇာတရင်းမြစ်များမှ လျှပ်စစ်ဓာတ်အား ထုတ်ယူနိုင်မည့် အခြေအနေများမှာ အကြောင်းအမျိုးမျိုးကြောင့် အောင်မြင်မှု မရှိခဲ့ကြောင်း၊ နိုင်ငံရေးအရ အားပြိုင်မှုများ၊ သွေးထိုးလှုံဆော်မှုများကြောင့် နိုင်ငံ့အတွက် အကျိုးရှိမည့် စီမံကိန်းများဆောင်ရွက်နေမှုကို ကန့်ကွက်နေမှုများအပေါ် စဉ်းစားဆောင်ရွက်ကြစေလိုကြောင်း၊ သို့သော်လည်း လက်ရှိအချိန်၌ လျှပ်စစ်ဓာတ်အား လုံလောက်စွာ ထုတ်လုပ်သုံးစွဲနိုင်ရေး လုပ်ဆောင်နေသောကြောင့် လျှပ်စစ်ဓာတ်အားသုံး ရထားစက်ခေါင်းတွဲများ အသုံးပြုနိုင်ရေး ကြိုတင်ပြင်ဆင်မှုများဆောင်ရွက်ထားရန် ယင်းက အထက်ပါအတိုင်း ထည့်သွင်းပြောကြားခဲ့သည်။

ရထားပို့ဆောင်ရေး စနစ်ကို ယခုထက် ပိုမိုလျှင်မြန်စွာ သွားလာနိုင်သည့်အဆင့်ထိရောက်ရှိစေရန် ရထားလမ်းများ အဆင့်မြှင့်တင်ခြင်းနှင့် ပြုပြင်ထိန်းသိမ်းခြင်းများကို စဉ်ဆက်မပြတ်ဆောင်ရွက်နေရန်၊ ရထားတွဲ၊ စက်ခေါင်းတွဲ၊ လူစီးတွဲ၊ ကုန်တင်တွဲများကိုလည်း အမြဲကောင်းမွန်စေရေး ထိန်းသိမ်းဆောင်ရွက်နေရန် နစက ဥက္ကဌက ပြောသည်။

မြန်မာနိုင်ငံတွင် ရထားအသုံးပြုမှုမှာ နှစ်ပေါင်း ၁၅၀ ခန့် ကြာမြင့်ခဲ့ပြီ ဖြစ်ကာ အင်းစိန်ရထားစက်ခေါင်းစက်ရုံတည်ဆောက်မှုမှာ နှစ်ပေါင်း ၁၀၀ ကျော်ခန့် ရှိပြီ ဖြစ်သောကြောင့် ယင်းအတွေ့အကြုံများကို အသုံးချ၍ နိုင်ငံအတွင်း မီးရထားစက်ခေါင်းများကို ထုတ်လုပ်နိုင်ရန်လိုအပ်ပြီး ယင်းမှတစ်ဆင့် လျှပ်စစ် ဓာတ်အား အသုံးပြု မီးရထားစက်ခေါင်းများကို ထုတ်လုပ်နိုင်ရန် မီးရထား စက်ခေါင်း နည်းပညာများကို ယခုထက် တိုးတက်စေရန် လုပ်ဆောင်ရမည် ဖြစ်ကြောင်းလည်း နစက ဥက္ကဌက ဆိုသည်။

#ymg/mt
#Yangon_Media_Group

#Local_News
Published _ 22 December 2022

ပြည်ထောင်စုသမ္မတမြန်မာနိုင်ငံတော်၏ ၂၀၂၃ ခုနှစ်၊ ဇန်နဝါရီလ ၄ ရက်နေ့တွင် ကျရောက်သော  ၇၅ နှစ်မြောက်၊ စိန်ရတုလွတ်လပ်ရေးနေ့ အထိမ်းအမှတ်အဖြစ် တစ်ကျပ်သားရွှေဒင်္ဂါးနှင့် ငါးမူးသား ရွှေဒင်္ဂါးများအား အသစ်သွန်းလောင်းထုတ်ဝေမည်ဖြစ်ကြောင်း သိရပါတယ်။

အသစ်သွန်းလောင်းသည့် တစ်ကျပ်သားရွှေဒင်္ဂါး၏ အချက်အလက်များမှာ အချင်း ၂၆.၀ မီလီမီတာ၊ အထူမှာ ၂.၀ မီလီမီတာရှိ၍  ဒင်္ဂါး၏ရှေ့မျက်နှာပြင် အလယ်ဗဟိုတွင် ဆင်ဖြူတော်ပုံပါရှိပြီး ပုံ၏ ယာဖက်တွင် “၇၅ နှစ်မြောက်” ဟု ဖော်ပြပါရှိပါတယ်။

ဆင်ဖြူတော်၏အောက်ခြေတွင် “၁ ကျပ်သား ၂၀၂၃” ဟု လည်းကောင်း၊ ရွှေဒင်္ဂါး၏အနားပတ်လည်တွင် “မြန်မာနိုင်ငံတော်ဗဟိုဘဏ်”  “၇၅ နှစ်မြောက် စိန်ရတုလွတ်လပ်ရေးနေ့”ဟုလည်းကောင်း ဖော်ပြထားပါတယ်။

ရွှေဒင်္ဂါး၏ ကျောဖက်မျက်နှာပြင်တွင်လည်း ဆင်ဖြူတော်ပုံပါရှိပြီး၊ အင်္ဂလိပ်ဘာသာဖြင့် ယာဖက်တွင် “75th”၊ ပုံ၏အောက်ဖက်တွင် “16.329 gm. 2023” ဟုလည်းကောင်း၊  ရွှေဒင်္ဂါးပြားအနားပတ်လည်တွင် “Central Bank of Myanmar” “75th Diamond Jubilee Independence Day” ဟုလည်းကောင်း ဖော်ပြထားပါတယ်။

အသစ်သွန်းလောင်းသည့် ငါးမူးသားရွှေဒင်္ဂါး၏ အချက်အလက်များမှာ အချင်း ၂၂.၀ မီလီမီတာ၊ အထူမှာ ၁.၅ မီလီမီတာရှိ၍  ဒင်္ဂါး၏ရှေ့မျက်နှာပြင်အလယ်ဗဟိုတွင် ဆင်ဖြူတော်ပုံပါရှိပြီး ပုံ၏ ယာဖက်တွင် “၇၅ နှစ်မြောက်” ဟု ဖော်ပြပါရှိပါတယ်။

ဆင်ဖြူတော်၏အောက်ခြေတွင် “၅ မူးသား ၂၀၂၃” ဟု လည်းကောင်း၊ ရွှေဒင်္ဂါး၏အနားပတ်လည်တွင် “မြန်မာနိုင်ငံတော်ဗဟိုဘဏ်” “၇၅ နှစ်မြောက် စိန်ရတုလွတ်လပ်ရေးနေ့” ဟု လည်းကောင်းဖော်ပြထားပါတယ်။

ရွှေဒင်္ဂါး၏ ကျောဖက်မျက်နှာပြင်တွင်လည်း ဆင်ဖြူတော်ပုံပါရှိပြီး၊ အင်္ဂလိပ်ဘာသာဖြင့် ယာဖက်တွင် “75th” ၊  ပုံ၏အောက်ဖက်တွင် “8.164 gm. 2023” ဟု လည်းကောင်း၊  ရွှေဒင်္ဂါးပြားအနားပတ်လည်တွင် “Central Bank of Myanmar” “75th Diamond Jubilee Independence Day” ဟု လည်းကောင်း ဖော်ပြထားပါတယ်။

တစ်ကျပ်သားနှင့် ငါးမူးသားရွှေဒင်္ဂါးများ ဝယ်ယူသည့်အခါ ရွှေဒင်္ဂါးပြားနှင့်အတူ မြန်မာနိုင်ငံတော် ဗဟိုဘဏ်ဥက္ကဋ္ဌနှင့် သွန်းလောင်းသည့်ဌာနအကြီးအကဲတို့၏ မှန်ကန်ကြောင်း ထောက်ခံချက်များ တစ်ပေါင်းတည်းပါရှိမှာ ဖြစ်ပါတယ်။

တစ်ကျပ်သားနှင့် ငါးမူးသားရွှေဒင်္ဂါးများကို မြန်မာ့ကျောက်မျက်ရတနာရောင်းဝယ်ရေးလုပ်ငန်း၏ အရောင်းဆိုင်များ(နေပြည်တော်၊ ရန်ကုန်နှင့် မန္တလေး)တွင် ဇန်နဝါရီလ ၅ ရက်နေ့မှစ၍ ဝယ်ယူရရှိနိုင်ကြောင်း သတင်းရရှိပါတယ်။

#Yangon_Media_Group

#World_Health
Published 22 December 2022

တက္ကသိုလ်ကျောင်းသူကျောင်းသားတွေအနေနဲ့ စိတ်ဖိစီးမှု၊ စိုးရိမ်ပူပန်မှုများ ကြုံတွေ့နေရတယ်ဆိုရင် သစ်ကြားသီးစားသုံးပေးသင့်ကြောင်း လေ့လာချက်တစ်ခုမှာ အကြံပြုထားပါတယ်။

ပညာရေးဂျာနယ် Nutrients မှာ ဖော်ပြထားချက်အရ တစ်နေ့ကို သစ်ကြားသီး ၅၆ ဂရမ်စားသုံးပေးခြင်းဖြင့် စိတ်ကျန်းမာရေးအတွက် ကောင်းကျိုးဖြစ်စေနိုင်ပါတယ်။

ဩစတြေးလျတောင်ပိုင်းတက္ကသိုလ်မှ သုတေသီများဦးဆောင်ကာ ကျောင်းသားကျောင်းသူများရဲ့ စိတ်ဖိစီးမှုပြေလျော့စေမယ့်အကြောင်း လေ့လာတင်ပြခဲ့ကြပါတယ်။

တက္ကသိုလ်တက်ရတဲ့အခါ ဖိအားများခြင်း၊ ပြိုင်ဆိုင်မှုပြင်းထန်ခြင်း၊ သင်ရိုးညွှန်းတမ်းများခက်ခဲခြင်း၊ သင်ခန်းစာများလွန်း၍ ဝန်ပိခြင်း၊ စာတမ်းအချိန်မီတင်ပြရခြင်း၊ စာမေးပွဲများစသဖြင့် ဖိအားမျိုးစုံကြုံတွေ့ရပါတယ်။

ဖိအားတွေက စုပြုံပြီးပိုဆိုးရွားလာကာ စိတ်ဓာတ်ကျခြင်း၊ စိုးရိမ်ပူပန်ခြင်းတို့ ဖြစ်လာစေပြီး မှတ်ဉာဏ်ပျောက်ဆုံးခြင်း၊ စိတ်ရောဂါအခြေအနေဖြစ်လာခြင်းတို့ ဖြစ်တတ်ပါတယ်။

ဒါတွေကြောင့်ပဲ စိတ်သက်သာရာရဖို့အတွက် ကျောင်းသားအများစုဟာ အခြားအကြောင်းအရာများကို မှီခိုလာတတ်ကြပါတယ်။

ဒီလိုနည်းလမ်းတွေထဲမှာ အဟာရနဲ့ပတ်သက်ပြီး ဖြေရှင်းလို့ရသလို အစားအစာပြောင်းလဲစားသောက်ပေးခြင်းဖြင့် ဝမ်းဗိုက်ထဲက ပိုးမွှားတွေကိုသက်ရောက်စေကာ ဦးနှောက်အထိ ရောက်စေပါတယ်။

သစ်ကြားသီးမှာ ဗိုက်တာမင်-အီး၊ မယ်လတိုနင်၊ အိုမီဂါ ၃ ဖက်တီးအက်ဆစ်တို့လို ကျန်းမာရေးအတွက်သင့်တော်တဲ့ ဓာတ်များပါဝင်တာကြောင့် ဦးနှောက်အတွက် ကောင်းကျိုးသက်ရောက်စေပါတယ်။

သုတေသီများက ဘွဲ့မရသေးတဲ့ ကျန်းမာရေးကောင်းမွန်တဲ့ ကျောင်းသားကျောင်းသူများကို ခေါ်ယူကာ သစ်ကြားသီးများကို စားသုံးစေခဲ့ပါတယ်။

စမ်းသပ်ခံသူတွေရဲ့ သွေး၊ တံတွေး၊ မစင်နမူနာများကို ရယူတဲ့အပြင် အိပ်စက်ခြင်း၊ စိတ်ကျန်းမာရေး၊ စိတ်အခြေအနေတို့ကိုလည်း စစ်တမ်းမေးမြန်းခဲ့ပါတယ်။

သစ်ကြားသီးစားတဲ့သူတွေက စိတ်ဖိစီးမှုလျော့ကျပြီး ကောင်းစွာအိပ်စက်ရကြောင်း တွေ့ရှိခဲ့ရပါတယ်။

ဒီလိုမျိုး ပညာရေးအပိုင်းမှာ ဖိစီးမှုတွေကိုလျှော့ချနိုင်တာဟာ သစ်ကြားသီးက ပရိုတိန်းနဲ့ အယ်လ်ဗျူမင်ပမာဏကို တိုးများစေပြီး အမိုင်လေ့စ်ကိုလျှော့ချပေးတာကြောင့် ဖြစ်နိုင်ပါတယ်။

ဒီနည်းလမ်းက တကယ်အလုပ်ဖြစ်လားဆိုတာကို သိရဖို့အတွက်တော့ နောက်ထပ်လေ့လာမှု ပြုလုပ်ရဦးမှာဖြစ်ပါတယ်။

Source: The Jerusalem Post
#Yangon_Media_Group

Published 21 December 2022

ဆရာဝန်တစ်ဦး၏ ကတိသစ္စာပြုအဓိဋ္ဌာန် ၉ ချက်ကို ရွတ်ဆိုသစ္စာပြုပြီး ဆရာဝန်ဘဝကို ခံယူခဲ့ပြီးသူတစ်ဦးသည် လူသားတို့၏အသက်ကို ကယ်တင်ရန် ပျက်ကွက်ခဲ့ပါက အဆိုပါဆရာဝန်များသည် သစ္စာမဲ့သူ၊ လူနာများအပေါ် ထိခိုက်ကျူးလွန်ခဲ့ သူတွေသာဖြစ်တယ်လို့ နစက ဥက္ကဋ္ဌ၊တပ်မတော်ကာကွယ်ရေးဦးစီးချုပ် ဗိုလ်ချူပ်မှူးကြီး မင်းအောင်လှိုင်ကပြောပါတယ်။

ဒီဇင်ဘာ ၂၁ ရက် နံနက်ပိုင်းက ရန်ကုန်မြို့ရှိ တပ်မတော် ဆေးတက္ကသိုလ်စစ်ရေးပြကွင်း၌ ကျင်းပပြုလုပ်တဲ့ တပ်မတော်ဆေးတက္ကသိုလ်၊ ဗိုလ်လောင်းသင်တန်းအမှတ်စဉ်(၂၃) သင်တန်းဆင်း ဂုဏ်ပြုစစ်ရေးပြအခမ်းအနားမှာ  ဗိုလ်ချုပ်မှူးကြီး  မင်းအောင်လှိုင်က မိန့်ခွန်းပြောကြားရာမှာထည့်သွင်းပြောကြားခဲ့တာဖြစ်တယ်လို့ နစကရဲ့ သတင်းထုတ်ပြန်ချက်မှာဖော်ပြထားပါတယ်။

“သစ္စာဆိုသည့်စကား၏ အဓိပ္ပါယ်ဟာ ကိုယ်၊ နှုတ်၊ နှလုံး သုံးပါးလုံးဖြင့် မှန်ကန်စွာ စောင့်ရှောက်ဆောင်ရွက်ခြင်းဖြစ်ပြီး သစ္စာတရားတည်ကြည်ခြင်းသည် အကျိုးရလဒ်ဖြင့် ပြည့်ဝနေမည်ဖြစ်သလို သစ္စာတရားပျက်ယွင်းခြင်းဟာ ဆုတ်ယုတ်ပျက်စီးခြင်းများနှင့်သာ ပြည့်နှက်နေမည်ဖြစ်ပါတယ်။ အဲဒီအချက်တွေကို သင်ခန်းစာယူပြီး မိမိအဖွဲ့အစည်းနှင့် မိမိအလုပ်အပေါ် ကတိသစ္စာမြဲကြဖို့နှင့် မိမိတို့စောင့်ထိန်းရမည့် ဆေးပညာကျင့်ဝတ်များကို ခါးဝတ်ပုဆိုးသဖွယ် မြဲကြဖို့ လိုတယ်” လို့ ဗိုလ်ချူပ်မှူးကြီးက ပြောကြားခဲ့ပါတယ်။

ကိုဗစ်-၁၉ ကပ်ရောဂါကြောင့် ကျန်းမာရေးဝန်ထမ်းလိုအပ်ချက် မြင့်မားနေချိန်အတွင်း ကျန်းမာရေးဝန်ထမ်း အချို့အနေဖြင့် အများပြည်သူ၏ကျန်းမာရေး စောင့်ရှောက်မှုလုပ်ငန်းများကို လျစ်လျူရှုရုံသာမက ကိုယ်ကျိုးမငဲ့ကွက်ဘဲ ကျန်းမာရေးစောင့်ရှောက်မှု ပြုလုပ်ပေးနေသူများကို နည်းလမ်းမျိုးစုံဖြင့် နှောင့်ယှက်ဟန့်တား ဖျက်ဆီးမှုများပြုလုပ်ခဲ့ခြင်းသည် သမိုင်းတွင် မည်သို့မျှ ဖျောက်ဖျက်မရသည့် အမည်းစက်များပင် ဖြစ်တယ်လို့လည်း နစက ဥက္ကဋ္ဌတာဝန်ရယူထားတဲ့ တပ်မတော်ကာကွယ်ရေးဦးစီးချုပ်က  ဝေဖန်ပြောဆိုခဲ့ပါတယ်။

ဗိုလ်ချုပ်မှူးကြီးမင်းအောင်လှိုင်ဟာ ဗိုလ်လောင်းတပ်ရင်းများ၏ အလေးပြုခြင်းကိုခံယူပြီး ကျောင်းဆင်းဗိုလ်လောင်းတပ်ခွဲအား စစ်ဆေးသည်။ ထို့နောက် ဗိုလ်လောင်းတပ်ခွဲများက တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်အား အနှေးလျှောက်၊ အမြန်လျှောက်ဖြင့် ချီတက်အလေးပြုခဲ့ကြပြီး ထူးချွန်ဆုရ ကျောင်းဆင်းဗိုလ်လောင်းတွေကိုလည်း ဗိုလ်ချူပ်မှူးကြီးက ဆုတွေချီးမြှင့်ခဲ့တယ်လို့သိရပါတယ်။

-ymg/knl

#Yangon_Media_Groupp

#Local_News
Published_ 21 December 2022

အခုရက်ပိုင်းအတွင်း မွန်ပြည်နယ်မှာမီးလောင်ကျွမ်းမှုတွေ ဆက်တိုက်ကြုံတွေ့နေရပြီး လတ်တလောမှာမီးဘေးသင့်လို့ အိုးအိမ်မဲ့သွားတဲ့အိမ်ထောင်စု(၁၃)စု ရှိတယ်လို့ သိရပါတယ်၊၊

#Yangon_Media_Group

#World_Heritage
Published 21 December 2022

အီရတ်အမျိုးသားပြတိုက်ရဲ့ဘေးအခန်းမှာ ထိန်းသိမ်းစောင့်ရှောက်ရေးပညာရှင်တစ်ဦးက ၁၇ ရာစုလက်ရေးစာမူကို အလေးထားပြီး အဖိုးတန်စာသားပေါင်း ၄၇,၀၀၀ ကို ဒီဂျစ်တယ်စနစ်ဖြင့် ထိန်းသိမ်းရန် ပြန်လည်မွမ်းမံရေးလုပ်ငန်းများ လုပ်ဆောင်နေပါတယ်။

#Yangon_Media_Group

Published 21 December 2022

ရုရှားရေတပ်ဟာ ဟိုက်ပါဆိုနစ် ဇိုင်ယာကွန် ခရုစ်ဒုံးကျည် အသစ်တွေကို လာမယ့် ဇန်နဝါရီလစောစောပိုင်းကနေ စတင်ပြီး ရရှိတော့မယ်လို့ သမ္မတဗလက်ဒီမာပူတင်က ဒီဇင်ဘာ ၂၁ ရက်ကပြောပါတယ်။ အဲဒီလက်နက်ကို ရုရှားက သိပ်မကြာသေးခင်နှစ်တွေက ဖန်တီးခဲ့တာဖြစ်ပါတယ်။

“ ဇန်နဝါရီကစပြီးတော့ အက်ဒ်မိုင်ရယ်လ် ဂေါ့ရှ်ကော့ဗ် ဖရီးဂိတ်သင်္ဘောကြီးကို ဇိုင်ယာကွန်ဟိုက်ပါဆိုနစ်ဒုံးကျည်တွေ တပ်ဆင်မှာဖြစ်ပါတယ်။ ဒီဒုံးကျည်နှင့် အဆင့်တူတာ ဒီကမ္ဘာမှာ မရှိသေးပါဘူး” လို့ ပူတင်က ရုရှားနိုင်ငံရဲ့ အဆင့်မြင့် အရာရှိကြီးတွေနှင့်အစည်းအဝေးတစ်ခုမှာ ပြောကြားခဲ့တာဖြစ်ပါတယ်။

Source: AFP

#Russsia_Military_Power

#New_hypersonic_Zircon_cruise_missiles

#Vladimir_Putin