#Daily_News
Published 17 August 2024

၁။ ထောပတ်သီးအထွက်နည်းပါးချိန်ထွက်ရှိသည့် ဗီယက်နမ်မျိုးများဈေးကောင်းရနေ

၂။ တက္ကသိုလ်ဝင်တန်းအောင်မြင်ထားသူများ ဆေးဘက်ဆိုင်ရာတက္ကသိုလ်များမှ ဝင်ခွင့်ခေါ်ယူ

၃။ သုံးနှစ်ကျော်ကာလအတွင်း ပဲခူးတိုင်းသို့ နိုင်ငံခြားရင်းနှီးမြှုပ်နှံမှု ဒေါ်လာသန်း၂၀၀ကျော်ဝင်ရောက်ထား

၄။ ဒုတိယကမ္ဘာစစ်အတွင်း ဂျပန်တပ်များ အတင်းအဓမ္မလိင်ကျွန်ပြုခြင်းခံခဲ့ရသည့် ဖိလစ်ပိုင်အမျိုးသမီးများ၏မိသားစုဝင်များ ငိုကြွေးဆန္ဒပြ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 17 August 2024

▪️ ယခုဘဏ္ဍာနှစ်လေးလတာကာလအတွင်း ပြည်ပနိုင်ငံများကို ဒေါ်လာသန်း ၁၀၀ နီးပါးတန်ဖိုးရှိသည့် ငါးမျိုးစုံတန်ချိန် ရှစ်သောင်းကျော်တင်ပို့ထားကြောင်း ငါးလုပ်ငန်းဦးစီးဌာနမှ သိရသည်။

▪️ ၂၀၂၄-၂၀၂၅ဘဏ္ဍာနှစ် ဧပြီ ၁ ရက်မှ  ဇူလိုင်လကုန်အထိ ပြည်ပကို ငါးတန်ချိန် ၈၈,၀၀၀ နီးပါး တင်ပို့ခဲ့ခြင်းဖြစ်ပြီး အမေရိကန်ဒေါ်လာ ၉၈ ဒသမ ၄၈၈ သန်း ရရှိထားခြင်းဖြစ်ကြောင်း  သိရသည်။

▪️ မြန်မာနိုင်ငံမှ ပြည်ပနိုင်ငံကို ငါးမျိုးစုံအပါအဝင် ရေထွက်ကုန်များကို ပုံမှန်ကုန်သွယ်ရေးလမ်းကြောင်းနှင့်  နယ်စပ်ကုန်သွယ်ရေးစခန်းများမှ တင်ပို့နေခြင်းဖြစ်ကာ ယခုဘဏ္ဍာနှစ် တစ်နှစ်တာအတွင်း၌  ပြည်ပကို ရေထွက်ကုန်တင်ပို့မှုမှ ဒေါ်လာ ၈၀၅ သန်းရရန်မျှော်မှန်းထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ သိရသည်။

▪️ ပြည်ပသို့ ငါးတင်ပို့ရာတွင် ဘဏ္ဍာနှစ်တစ်နှစ်အတွင်းပျှမ်းမျှ တန်ချိန်သုံးသိန်းမှ လေးသိန်းကျော်အထိတင်ပိုလေ့ရှိကြောင်း၊ ကိုဗစ်မတိုင်မီကာလဖြစ်သည့် ၂၀၁၇-၂၀၁၈ ဘဏ္ဍာနှစ်၌ တန်ချိန် (၄၁၃၀၄၂.၉၆) တန်၊ တန်ဖိုး အမေရိကန်ဒေါ်လာ (၃၉၁.၆၀၁) သန်း၊ ၂၀၁၈-၂၀၁၉ ဘဏ္ဍာနှစ်တွင် တန်ချိန် (၃၈၇၁၄၀.၁၅) တန်၊ တန်ဖိုး အမေရိကန်ဒေါ်လာ (၃၈၀.၈၄၅) သန်း၊ ၂၀၁၉-၂၀၂၀ ဘဏ္ဍာနှစ်တွင် တန်ချိန် (၄၃၇၆၉၆.၂၂) တန်၊ တန်ဖိုး အမေရိကန်ဒေါ်လာ (၄၆၈.၇၅) သန်း အသီး သီးတင်ပို့နိုင်ခဲ့ကြောင်း သိရသည်။

▪️ မြန်မာနိုင်ငံ၏ နှစ်စဉ်ပြည်ပငါးတင်ပို့မှုမှာ စုစုပေါင်းငါးထုတ်လုပ်မှု၏ ပျမ်းမျှ ၁၀ % ကိုသာ တင်ပို့နိုင်ခဲ့ပြီး ထိုင်း၊ တရုတ်၊ ဂျပန်၊ စင်္ကာပူနှင့် အာရပ်နိုင်ငံများသို့ တင်ပို့လျှက်ရှိကြောင်း သိရသည်။

#YMG/NN #Yangon_Times

၁၇ ဩဂုတ် ၂၀၂၄

မြန်မာနိုင်ငံမှ တရားမဝင်တင်သွင်းလာတဲ့ အသားနှင့် မွေးမြူရေးထုတ်ကုန်အစားအစာတွေကို အမေရိကန်နိုင်ငံအနှံ့ လက်လီ ဆိုင်တွေမှာ ရောင်းချ နေတာကို အမေရိကန်နိုင်ငံ့ လယ်ယာထွက်အစားအစာဘေးကင်းရေးနှင့် စစ်ဆေးရေးဌာန Agriculture’s Food Safety and Inspection Service ကရှာဖွေတွေ့ရှိတဲ့အတွက် ကျန်းမာရေးသတိပေးချက်ထုတ်ပြန်ပြီး ဆိုင်တွေကနေ ဖယ်ရှားပေးဖို့ ညွှန်ကြားခဲ့တဲ့အကြောင်း အမေရိကန်ဒေသဆိုင်ရာမီဒီယာတစ်ခုဖြစ်တဲ့ နယူးအင်္ဂလန် ကေဘယ်လ်ကွန်ယက်က သတင်းဖော်ပြပါတယ်။

အမေရိကန်ဟာ မြန်မာနိုင်ငံမှ အသားနှင့် မွေးမြူရေးထုတ်ကုန်များ ရောင်းချတာကို ခွင့်မပြုထားပါဘူး။

ပုံမှန်စစ်ဆေးမှုတွေပြုလုပ်စဉ်မှာ အဆိုပါ မြန်မာနိုင်ငံထုတ် အစားအစာများတွေ့ရှိခဲ့တာဖြစ်ပြီး အဆိုပါအစားအစာများနှင့် ပတ်သက်လို့ ဆိုးကျိုးတစ်စုံတစ်ရာဖြစ်ခဲ့တယ်ဆိုတဲ့သတင်းတွေတော့ မရှိသေးပါဘူးလို့လည်း သတင်းကဆိုပါတယ်။

အဲဒီအစားအစာတွေကို ရောင်းချတဲ့မည်သည့်ရက်ပဲဖြစ်ဖြစ် စွန့်ပစ်ကြဖို့ အာဏာပိုင်တွေက တောင်းဆိုထားပါတယ်။

အဲဒီ မြန်မာနိုင်ငံထုတ်အစားအစာတွေက Grandmaအမှတ်တံဆိပ် စည်သွတ်အစားအစာများ၊ စံပြဒေါ်ကြည် ငါးခူမုန့်ဟင်းခါး၊ထိမိဂွိ မော်လမြိုင် ငါးခူမုန့်ဟင်းခါးတွေ ဖြစ်တယ်လို့ သတင်းမှာဖော်ပြထားပါတယ်။

Ref: NECBNW

သုံးနှစ်ကျော်ကာလအတွင်း ပဲခူးတိုင်းဒေသကြီးကို နိုင်ငံခြားရင်းနှီးမြှုပ်နှံမှု ဒေါ်လာသန်း၂၀၀ကျော် ဝင်ရောက်ထားတယ်လို့ တိုင်းဒေသကြီးရင်းနှီးမြှုပ်နှံမှုကော်မတီက သိရပါတယ်။
#Local_News
Published 17 August 2024
#နိုင်ငံခြားရင်းနှီးမြှုပ်နှံမှု #ဒေါ်လာသန်း၂၀၀ကျော်ဝင်ရောက်
#YMG/NN #Yangon_Times

၂၀၂၄ ခုနှစ် တက္ကသိုလ်ဝင်စာမေးပွဲအောင်မြင်သူတွေအနေနဲ့ ဆေးတက္ကသိုလ်တွေ၊ သွားဘက်ဆိုင်ရာဆေးတက္ကသိုလ်တွေနဲ့ ဆေးပညာနှီးနွှယ်တက္ကသိုလ်တွေကို ဝင်ခွင့်လျှောက်ထားနိုင်ပြီဖြစ်တယ်လို့ သိရပါတယ်။
#Local_News
Published 17 August 2024
#ဆေးဘက်ဆိုင်ရာတက္ကသိုလ် #ဝင်ခွင့်ခေါ်ယူ
#YMG/tthl #Yangon_Times

ထောပတ်သီး အထွက်နည်းပါးချိန်မှာထွက်ရှိတဲ့ ဗီယက်နမ်မျိုးတွေ ဈေးကောင်းရနေတယ်လို့ မြန်မာနိုင်ငံထောပတ်သီး စိုက်ပျိုးထုတ်လုပ်တင်ပို့ရောင်းချသူများအသင်းက
သိရပါတယ်။
#Local_News
Published 17 August 2024
#ထောပတ်သီးအထွက်နည်ပါး #ဗီယက်နမ်မျိုးများဈေးကောင်းရ
#YMG/NN #Yangon_Times

၁၇ ဩဂုတ် ၂၀၂၄

အမေရိကန်နိုင်ငံခြားရေးဝန်ကြီးဌာန အကြံပေး တွမ်ဆူလီဗန်၊ USAID လက်ထောက်အုပ်ချုပ်ရေးမှူး မိုက်ကယ်ရှစ်ဖာတို့ဟာ NUG နှင့် NUCC ၊အဓိကခုခံရေးအဖွဲ့တွေ၊ KNU ၊ KNPP နှင့်  CNFတို့မှ ဦးဆောင်သူတွေနှင့် ဩဂုတ် ၁၆ ရက်သောကြာနေ့က အွန်လိုင်းပေါ်ကနေ တွေ့ဆုံခဲ့တယ်လို့ အမေရိကန် နိုင်ငံခြားရေးဝန်ကြီးဌာနရဲ့ သတင်းထုတ်ပြန်ချက်ကို ကိုးကားပြီး ရိုက်တာ သတင်းက ဖော်ပြရေးသားပါတယ်။

အွန်လိုင်းအစည်းအဝေးမှာ အရပ်သားအစိုးရ အသွင်ကူးပြောင်းရေးကို ကူညီဖို့နှင့် လက်ရှိ နစက ကို ဖိအား ဆက်လက်ပေးနေဖို့ သဘောတူခဲ့ကြတယ်လို့လည်း အဆိုပါသတင်းအရသိရပါတယ်။

တရုတ်နိုင်ငံခြားရေးဝန်ကြီး ဝမ်ယိ မြန်မာနိုင်ငံလာရောက်ပြီးဗိုလ်ချုပ်မှူးကြီးမင်းအောင်လှိုင်နှင့်တွေ့ဆုံကာ နောက်တစ်ရက် မှာ လာအို၊မြန်မာနှင့်ထိုင်းနိုင်ငံခြားရေးဝန်ကြီးတွေနှင့်အတူ ထိုင်းနိုင်ငံ ချင်းမိုင်မြို့မှာ မြန်မာနိုင်ငံကိုအကူအညီပေးဖို့  ဝမ်ယိ  က တိုက်တွန်းခဲ့အပြီးမှာ အမေရိကန်အရာရှိများနှင့် အတိုက်အခံတွေ အွန်လိုင်း အစည်းအဝေးလုပ်ခဲ့ကြတာဖြစ်ပါတယ်။

အစည်းအဝေးမှာ နစကကို ဖိအားဆက်ပေးနေဖို့ အရေးကြီးတယ်လို့ သဘောတူခဲ့ကြပါတယ်။

“ အမေရိကန်အနေနှင့် သူတို့ပေါင်းစည်းညီညွတ်မှုကို တည်ဆောက်ရာမှာ ကူညီနိုင်ဖို့အတွက် ဒီမိုကရေစီလိုလားသူတွေကို တိုက်ရိုက်အကူအညီတွေတိုးချဲ့ပေးသွားမှာဖြစ်ပါတယ်။ပြည်သူဝန်ဆောင်မှုအလုပ်တွေနှင့် လိုအပ်နေတဲ့နေရာတွေမှာ လူသားချင်းစာနာထောက်ထား မှု အကူအညီတွေကို ပေးအပ်နိုင်ဖို့ သူတို့ရဲ့လုပ်နိုင်စွမ်းတွေတိုးတက်အောင်ကူညီမှာပါ” လို့ အမေရိကန်အရာရှိတွေက ပြောတယ်လို့ ရိုက်တာကရေးပါတယ်။

နှစ်ဘက်စလုံးက မြန်မာနိုင်ငံရဲ့ အကျပ်အတည်း အဆုံးသတ်စေဖို့အတွက်   ကုလသမဂ္ဂရဲ့ မြန်မာနိုင်ငံဆိုင်ရာ   အထူး   ကိုယ်စားလှယ်တွေနှင့် အာဆီယံတို့အပါအဝင် နိုင်ငံတကာ အသိုက်အဝန်းနှင့် လက်တွဲလုပ်ဆောင်ဖို့လည်း သဘောတူခဲ့  ကြတယ်လို့ဆိုပါတယ်။

ခပ်စောစောပိုင်းကလည်း တရုတ်နိုင်ငံခြားရေးဝန်ကြီးဝမ်ယိက မြန်မာနိုင်ငံအခြေအနေဟာ စိတ်ပူစရာဖြစ်ပြီး အိမ်နီးချင်း နိုင်ငံတွေအနေနှင့်   ပဋိပက္ခတွေတားဆီးဖို့အတွက် စီးပွားရေးနှင့်လူမှုအခြေအနေတွေဖန်တီးရေးကူညီရာမှာ မြန်မာ နိုင်ငံနှင့် ပူးပေါင်းဆောင်ရွက်မှုတွေတိုးမြှင့်လုပ်ဆောင်ကြဖို့ တိုက်တွန်းခဲ့ပါတယ်လို့ ရိုက်တာက သတင်းဖော်ပြပါတယ်။

မြန်မာနိုင်ငံရဲ့ ဒီမိုကရေစီအတွင်းကူပြောင်းရေးကို အားပေးထောက်ခံပြီး လက်ရှိအကျပ်အတည်းကိုဖြေရှင်းမယ့်နည်းလမ်း ရှာဖွေနေတဲ့ ဒေသဆိုင်ရာ အစီအစဉ်ကိုလည်း ထောက်ခံတယ်လို့ ဝမ်ယိကပြောထားတာဖြစ်ပါတယ်။

Ref: Reuters

#Local_News
Published 17 August 2024

▪️ ရန်ကုန်-နေပြည်တော် အမြန်လမ်းမကြီး၌ ယနေ့မနက်ပိုင်းက ယာဉ်တစ်စီးမီးလောင်မှုဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့ မှသိရသည်။

▪️ ဩဂုတ် ၁၇ ရက်နေ့၊ မနက် ၃ နာရီ၂၀မိနစ်  အချိန်ခန့် က ရန်ကုန်-နေပြည်တော် အမြန်လမ်းမကြီး၊ မိုင်တိုင်အမှတ်(၁၃၄/၇)နှင့် (၁၄၃/၆)ကြားတွင် ကား(၁)စီး မီးလောင်မှုဖြစ်ပွားခဲ့ကြောင်း သိရသည်။

▪️ အဆိုပါ သတင်းရရှိသဖြင့် ဗောဓိကုန်းအမြန်လမ်းမီးသတ်စခန်းမှ မီးသတ်ရေသယ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ရာ ၃ နာရီ ၅၀ မိနစ် အချိန်တွင် မီးငြိမ်းခဲ့ ကြောင်း သိရသည်။

#YMG/NN #Yangon_Times

#World_News
Published 17 August 2024

▪️ ဘင်္ဂလားဒေ့ရှ်ဝန်ကြီးချုပ် ရှိတ်ခ်ဟာဆီနာကို ရာထူးမှဖြုတ်ချခဲ့ကြတဲ့ ဆန္ဒပြကျောင်းသားတွေဟာ နိုင်ငံရဲ့ အဓိကနိုင်ငံရေးပါတီ ၂ ခုမှ ရွေးကောက်ပွဲ အလျင်အမြန်ပြုလုပ်ရန် တောင်းဆိုချက်များကို ငြင်းဆန်လိုက်ပြီး ယင်းတို့ရဲ့ ကိုယ်ပိုင်ပါတီ ထူထောင်ရန် စီစဉ်နေကြတယ်လို့ ဆန္ဒပြခေါင်းဆောင် ၄ ဦးနဲ့ အင်တာဗျူးရာကနေ သိရှိရပါတယ်။

▪️ လွန်ခဲ့တဲ့ ၁၅ နှစ်အတွင်း တိုင်းပြည်ကို ဟာဆီနာ သံမဏိစည်းမျဉ်းဖြင့် အုပ်ချုပ်ခဲ့တာမျိုး ထပ်မံမဖြစ်ပွားရန် မျှော်လင့်နေကြတာ ဖြစ်ပါတယ်။

▪️ ဇွန်လတုန်းက အစိုးရအလုပ်နေရာတွေအတွက် တိုင်းပြည်လူဦးရေကို ခွဲတမ်းဖြင့် တာဝန်ပေးသွားမယ့် ဥပဒေကို ဆန့်ကျင်တဲ့အနေနဲ့ အသက် ၂၀ ဝန်းကျင် ကျောင်းသားခေါင်းဆောင် အနည်းငယ်ဟာ ဆန္ဒပြပွဲများ စတင်ပြုလုပ်ခဲ့ကြပါတယ်။

▪️ ၂ လအတွင်းမှာပဲ ဆန္ဒပြသူများကို အကြမ်းဖက်ဖြိုခွင်းခဲ့သဖြင့် ဟာဆီနာအစိုးရအဖွဲ့အပေါ် မကျေနပ်မှုပိုမိုကြီးထွားလာကာ ရာထူးမှနုတ်ထွက်ရတဲ့အထိ ဖြစ်ခဲ့ပါတယ်။

▪️ ဆန္ဒပြမှုဖြိုခွင်းစဉ် အနည်းဆုံးလူ ၃၀၀ သေဆုံးခဲ့ကြပါတယ်။

▪️ ဒီလှုပ်ရှားမှုဟာ ဂျန်ဇီတော်လှန်ရေး ဖြစ်လာပြီး ဘင်္ဂလားဒေ့ရှ်လူငယ်တွေက အလုပ်လက်မဲ့ များပြားလာခြင်း၊ ပြည်သူ့လွတ်လပ်ခွင့် လျော့နည်းလာခြင်းတို့အပေါ် နှစ်ပေါင်းများစွာ မကျေနပ်ခြင်းကြောင့် ပေါ်ပေါက်လာရပါတယ်။

▪️ အခုဆိုရင် နိုဘယ်လ်ဆုရှင် စာဆိုတော် မူဟာမက်ယူနက်စ်ဦးဆောင်တဲ့ ကြားဖြတ်အစိုးရက နိုင်ငံကိုအုပ်ချုပ်နေပြီး ကျောင်းသားခေါင်းဆောင် ၂ ဦးက အကြီးတန်းရာထူးနေရာမှာ ပါဝင်နေပါတယ်။

▪️ ပြီးခဲ့တဲ့ ဆယ်စုနှစ် ၃ ခုအတွင်း ဘင်္ဂလားဒေ့ရှ်မှာ ဟာဆီနာရဲ့ အဝါမီလိဂ်ပါတီနဲ့ ပြိုင်ဘက် ခါလီဒါဇီယာရဲ့ ဘင်္ဂလားဒေ့ရှ် အမျိုးသားရေးပါတီတို့ကသာ တစ်ခုမဟုတ်တစ်ခု အုပ်ချုပ်နေခဲ့ကာ ထိုနှစ်ဦးစလုံးက အသက် ၇၀ ဝန်းကျင်ရှိနေပြီ ဖြစ်ပါတယ်။

▪️ ဒါကြောင့် ကျောင်းသားခေါင်းဆောင်တွေက နိုင်ငံရေးပါတီတစ်ခု ဖွဲ့စည်းရန် ဆွေးနွေးနေကြကြောင်း အစိုးရနဲ့ လှုပ်ရှားသူများကြား စေ့စပ်ညှိနှိုင်းရေးတာဝန် ပေးအပ်ခံထားရတဲ့ ကော်မတီဥက္ကဌ မာဖူဂျ်အလမ်က ပြောပါတယ်။

▪️ ၁ လအတွင်း ဆုံးဖြတ်ချက်ချသွားမှာဖြစ်ပြီး ဆန္ဒပြခေါင်းဆောင်တွေက မဆုံးဖြတ်ခင်မှာ အရပ်သားတွေနဲ့ ကျယ်ကျယ်ပြန့်ပြန့် ဆွေးနွေးသွားလိုကြောင်း အသက် ၂၆ နှစ်အရွယ် ဥပဒေကျောင်းသားက ရိုက်တာသတင်းဌာနကို ပြောပြပါတယ်။

▪️ အစိုးရပြောင်းလဲမှုကြောင့် တရားရေးဌာန အကြီးအကဲ၊ ဗဟိုဘဏ်အုပ်ချုပ်ရေးမှူး၊ ကျောင်းသားများဖြိုခွင်းခြင်းကို ကြီးကြပ်ခဲ့တဲ့ ရဲမှူးတို့ကတော့ ရာထူးမှနုတ်ထွက်လိုက်ရပါတယ်။

#Source: Reuters

#Local_News
Published 17 August 2024

▪️ အကယ်ဒမီကျော်ဟိန်းဓာတ်ပုံနှင့် သူ၏လက်သုံးစကားများကို ခွင့်ပြုချက်မရှိဘဲတီရှပ်၌ ပုံနှိပ်ပြီးရောင်းချအသုံးပြုမိ၍ တီရှပ်များပုံနှိပ်ရောင်းချသည့်လုပ်ငန်းလုပ်ကိုင်သူဦးအောင်ခန့်ပိုင်မှ နိုင်ငံပိုင်သတင်းစာမှ တစ်ဆင့် ပြန်တောင်းပန်လိုက်ကြောင်း သိရသည်။

▪️ အကယ်ဒမီကျော်ဟိန်းဓာတ်ပုံနှင့် သူ၏လက်သုံး စကားဖြစ်သည့် "လူသားအားလုံးကို လေးစားပါတယ်"ဆိုသည့်စာသားကို တီရှပ်ပေါ်တွင် ရိုက်နှိပ် ထုတ်လုပ်ပြီးရောင်းချခြင်း၊ အမှတ်ရပေးခဲ့ခြင်းများဆောင်ရွက်ခဲ့သည့်အတွက် ပုဏ္ဏကအမည်ဖြင့် တီရှပ်များပုံနှိပ်ရောင်းချသည့်လုပ်ငန်းလုပ်ကိုင်သူ ဦးအောင်ခန့်ပိုင်က အကယ်ဒမီကျော်ဟိန်းနှင့်ပတ်သက်၍ မူပိုင်ခွင့်ရှိသည့် အကယ်ဒမီကျော်ဟိန်း၏ဇနီး ဒေါ်ခင်သန်းနွယ်‌အေးနှင့်မိသားစုဝင်များကို နိုင်ငံပိုင်သတင်းစာမှ တစ်ဆင့် ပြန်တောင်းပန်လိုက်ခြင်းဖြစ်သည်။

▪️ သရုပ်‌ဆောင် အကယ်ဒမီကျော်ဟိန်းနှင့် ပတ်သက်သည့် အနုပညာကိစ္စအဝဝနှင့်တရားတော်များ၊ ဓာတ်ပုံများကို အကယ်ဒမီကျော်ဟိန်း၏ဇနီး PENTA LUCKY Service ကုမ္ပဏီ၏ မူပိုင်ခွင့်အဖြစ်မှတ်ပုံတင်သွင်းထားခြင်းဖြစ်သည်။

▪️ သို့ဖြစ်၍ သရုပ်‌ဆောင် အကယ်ဒမီကျော်ဟိန်းနှင့် ပတ်သက်သည့်ရုပ်ရှင်ဇာတ်ကားများ၊တေးသီချင်းများ၊ တေးသီချင်းစာသားများ၊ စာပေဝတ္ထုများ၊ ဓာတ်ပုံများ အစရှိသည့် အနုပညာကိစ္စအဝဝကို ဒေါ်သန်းနွယ်အေးနှင့်သားသမီး(၃)ဦးတို့၏ ခွင့်ပြုချက်မပါဘဲ မသုံးစွဲရန်နှင့် အသုံးပြုပါက ဥပဒေနှင့်အညီ အရေးယူသွားမည်ဖြစ်ကြောင်းလည်း နိုင်ငံပိုင်သတင်းစာမှတစ်ဆင့် အသိပေးကြေညာထားကြောင်းလည်း သိရသည်။

#YMG/tthl #Yangon_Times

#World_Health
Published 17 August 2024

▪️ အာလူးဟာ ကျန်းမာရေးအတွက် ကောင်းမွန်တဲ့ အစားအစာလို့ အတော်များများက မမြင်ကြပါဘူး။

▪️ ယခုသုတေသနအသစ်မှာတော့ အာလူးဟာ ဆီးချိုရောဂါခံစားနေရသူတွေအတွက် အပြောင်းအလဲဖြစ်နိုင်ပြီး နှလုံးကျန်းမာရေးကိုလည်း တိုးတက်စေနိုင်တယ်လို့ တွေ့ရှိလာပါတယ်။

▪️ အာဟာရဓာတ် အမျိုးမျိုး ပါဝင်ကာ သွေးတွင်းသကြားဓာတ် တိုးတက်စေနိုင်သလို ခါးအရွယ်အစား လျော့ကျစေနိုင်ပါတယ်။

▪️ ကျန်းမာရေး အကျိုးကျေးဇူးတွေနဲ့ သတ္တုဓာတ်များ ကြွယ်ဝပေမယ့် အာလူးကို သိပ်ပြီးအလေးမထားကြပါဘူး။

▪️ အာလူးဆိုတာနဲ့ အာလူးကြော်လိုမျိုး အဆီပါတဲ့အစာအဖြစ် မြင်နေကြကြောင်း၊ အာလူးကို သေချာလေးပြင်ဆင်စားသုံးရင် ကျန်းမာရေးအတွက် ကောင်းမွန်နိုင်ကြောင်း တွဲဖက်ပရော်ဖက်ဆာ နက်ဒါအက်ခါဗန်က ရှင်းပြပါတယ်။

▪️ သုတေသနပြုလုပ်ရာမှာ ဆီးချိုရောဂါရှိသူ ၂၄ ဦးကို အာလူးဖုတ် နေ့စဉ်ကျွေးမွေးပြီး နောက်ထပ်အဖွဲ့ကိုတော့ ထမင်းစားစေခဲ့ပါတယ်။

▪️ ၁၂ ပတ်အကြာ လေ့လာရာမှာ နှလုံးဇီဝကမ္မ ကျန်းမာရေး အမှတ်အသားတွေနဲ့ သွေးတွင်းသကြားဓာတ်တို့ကို စောင့်ကြည့်ခဲ့ပါတယ်။

▪️ ထိုအခါမှာ အာလူးစားသူတွေက သွေးတွင်းသကြားဓာတ် အတော်အသင့် ကျဆင်းသွားပြီး ခန္ဓာကိုယ် ဖွဲ့စည်းပုံအရွယ်အစားလည်း အနေတော်ဖြစ်လာကာ ငြိမ်နေတဲ့အချိန် နှလုံးခုန်နှုန်းလည်း ကျဆင်းသွားပါတယ်။

▪️ ဒီလေ့လာချက်များအရ ဆီးချိုရောဂါသည်တွေမှာ ထမင်းလိုမျိုး အချိုဓာတ်များတဲ့ အစားအစာနေရာမှာ အာလူးစားသုံးခြင်းက ကျန်းမာရေးကောင်းမွန်စေတဲ့ အထောက်အထားတွေ တွေ့ရတယ်လို့ ဆိုပါတယ်။

▪️ ဒါကြောင့် အာလူးကို အနေတော် အတန်သင့်ပြင်ဆင် စားသောက်ဖို့ အရေးကြီးတယ်လို့ ပြောသွားပါတယ်။

#Source: WION

#World_Health
Published 17 August 2024

▪️ ဆေးခြောက်ကို အလွန်အမင်း သုံးစွဲသူများဟာ ဦးခေါင်းနဲ့ လည်ပင်းကင်ဆာများ ဖြစ်နိုင်ခြေ များစေတယ်လို့ ကယ်လီဖိုးနီးယားတောင်ပိုင်း တက္ကသိုလ်မှ လေ့လာတွေ့ရှိထားပါတယ်။

▪️ ဦးခေါင်းနဲ့ လည်ပင်းကင်ဆာတို့ ဘယ်လိုဖြစ်စေတယ်ဆိုတာ သိရှိမယ်ဆိုပါက ကာကွယ်နိုင်မှာ ဖြစ်တဲ့အတွက် ဒီလိုတွေ့ရှိခြင်းက အရေးကြီးကြောင်း ဦးခေါင်းနဲ့ လည်ပင်းခွဲစိတ်ဆရာဝန် ဒေါက်တာ နိုင်ယယ်စ်ကိုကော့က ပြောပါတယ်။

▪️ ထိုကင်ဆာထဲမှာ ပါးစပ်၊ နှာခေါင်းပေါက်၊ လည်မျို၊ အသံအိုး၊ တံတွေးဂလင်း၊ သိုင်းရွိုက်တို့ ပါဝင်ပြီး အမေရိကန်မှာ ကင်ဆာဖြစ်ပွားမှုတွေရဲ့ ၃ ရာခိုင်နှုန်းနီးပါးရှိကာ ကင်ဆာကြောင့် သေဆုံးမှုတွေရဲ့ ၁.၅ ရာခိုင်နှုန်းကျော် ရှိပါတယ်။

▪️ ဆေးခြောက်က ကမ္ဘာပေါ်မှာ အသုံးအများဆုံး တရားမဝင်ပစ္စည်းဖြစ်နေပြီး ပြီးခဲ့တဲ့ ဆယ်စုနှစ်အတွင်း အသုံးပြုသူတွေ ပိုများလာပါတယ်။

▪️ ဆေးလိပ်၊ အရက်သုံးစွဲသူတွေမှာလည်း ဦးခေါင်းနဲ့ လည်ပင်းကင်ဆာ ဖြစ်နိုင်ခြေများတယ်လို့ တွေ့ရှိထားပြီး ဖြစ်ပါတယ်။

▪️ ဆေးခြောက်သုံးစွဲသူတွေနဲ့ မသုံးစွဲသူတွေပါဝင်တဲ့ လူပေါင်း ၁၁၆၀၀၀ ရဲ့ ကျန်းမာရေး အချက်အလက်တွေကို နှစ် ၂၀ ကြာအောင် နှိုင်းယှဉ်လေ့လာခဲ့ကြပါတယ်။

▪️ ဆေးခြောက်ရော ဆေးရွက်ကြီးမှာပါ ကင်ဆာဖြစ်စေတဲ့ ပစ္စည်းတွေ ပါဝင်ကြပေမယ့် ဆေးခြောက်သုံးစွဲခြင်းက ပိုပြီးကင်ဆာဖြစ်နိုင်ခြေ များစေတယ်လို့ တွေ့ရှိကြပါတယ်။

▪️ ဆေးခြောက်သောက်ခြင်းက ရောင်ရမ်းခြင်း ပိုဖြစ်စေနိုင်သလို ပိုမိုရှိုက်သွင်းရပြီး အပူချိန်ပိုများတာကြောင့် ထိခိုက်ရောင်ရမ်းခြင်း ပိုဖြစ်နိုင်တယ်လို့ သုတေသနပြုစုသူများ ဖော်ပြထားပါတယ်။

▪️ ဒါပေမဲ့ သုံးစွဲသူတွေရဲ့ သုံးစွဲမှုပမာဏ၊ အကြိမ်ရေ၊ အသုံးပြုပုံနည်းလမ်းတို့နဲ့ ပတ်သက်ပြီး အချက်အလက် မစုံသေးတာကြောင့် လေ့လာချက်ကို ပုံသေယူဆလို့ မရပါဘူး။

▪️ ဘယ်လောက်အတိုင်းအတာက ဘေးကင်းသလဲ၊ ဘယ်လိုအသုံးပြုရင် ဘေးကင်းမလဲဆိုတာ မသိရဘူးလို့ စတေတင်အိုင်လန် တက္ကသိုလ်ဆေးရုံမှ ဦးခေါင်းနဲ့ လည်ပင်းကင်ဆာ ညွှန်ကြားရေးမှူး ဒေါက်တာ မိုက်ကယ်ဘလက်စ်ကိုက ပြောပါတယ်။

#Source: New York Post