Published 6 Oct 2022

ထိုင်းနိုင်ငံမှာ ရဲအရာရှိဟောင်းတစ်ဦးဟာ ကြာသပတေးနေ့က နေ့ကလေးထိန်းဌာနတစ်ခုကို သေနတ်တစ်လက်၊ဒါးတစ်ချောင်းနှင့် ဝင်ရောက်တိုက်ခိုက်ရာ ကလေးငယ် အနည်းဆုံး ၂၄ဦးနှင့် လူကြီး ၁၁ဦးသေဆုံးသွားခဲ့ရပါတယ်။(သတင်းဖော်ပြပြီး)။ အဲဒီရဲအရာရှိဟောင်းဟာ အခင်းဖြစ်ပွားရာနေရာကနေ ကားနှင့် ထွက်ပြေးသွားပြီး အိမ်အပြန် ကားပေါ်ကနေလည်း ပစ်ခတ်သွားပါတယ်။ အဲဒီနောက် သူ့ဇနီးနှင့် သူ့သားကို အိမ်မှာ ပစ်သတ်ပြီးနောက် သူ့ကိုယ်သူ သတ်သေသွားခဲ့ပါတယ်။

အွန်လိုင်းမှာပျံ့နှံ့နေတဲ့ ဗွီဒီယိုတွေနှင့် ဓာတ်ပုံတွေထဲမှာ သွေးတွေပေကျံနေတဲ့ အခန်းတစ်ခန်းနှင့် ပြန့်ကျဲနေတဲ့ ဖျာတွေကိုတွေ့ရပါတယ်။

ဗွီဒီယိုတွေထဲမှာလည်း ကလေးထိန်းဌာနအပြင်ဘက်မှာ အော်ဟစ်ငိုကြွေးနေကြတဲ့ မိသားစုတွေကိုတွေ့ရပြီး ရဲတွေနှင့် ဆေးဘက်ဝန်ထမ်းတွေက အနားတစ်ဝိုက်အလုပ်များနေပြီး အရေးပေါ်လူနာတင်ယာဉ်က အဆင်သင့်ရပ်ထားတာတွေ့ရပါတယ်။

အဲဒီရန်ပြုသူဟာ ရဲအရာရှိဟောင်းတစ်ဦးလို့ အာဏာပိုင်တွေက အတည်ပြုပါတယ်။ သူဟာ ထိုင်းနိုင်ငံ အရှေ့မြောက်ပိုင်း နောင်ဘွာလမ်ပူပြည်နယ်က မြို့ကလေးတစ်မြို့မှာရှိတဲ့ ကလေးထိန်းဌာနထဲ ကြာသပတေးနေ့ မွန်းလွဲပိုင်းမှာ ဝင်ရောက်လာခဲ့ပါတယ်။

သူဟာ အဆောက်အဦထဲကထွက်မပြေးခင် အဆောက်အဦထဲက ကလေးငယ် ၂၂ ဦးနှင့်လူကြီးနှစ်ဦးတို့ အသတ်ခံရပြီး သေဆုံးခဲ့ပါတယ်လို့ ထိုင်းရဲတပ်ဖွဲ့ရဲ့ သတင်းထုတ်ပြန်ချက်အရသိရပါတယ်။ ဒါပေမယ့် သူဟာ ကားထဲကနေ ဆက်လက်ပြီး ပစ်ခတ် ခဲ့သေးတယ်လို့ ရဲမှူးချုပ် ပိုင်းဆဲလ် လူဆွမ်ဘွန်းက အေပီသတင်းဌာနကိုပြောပါတယ်။

သူဟာ အိမ်ရောက်တဲ့အခါ သူ့ဇနီးနှင့် သူ့ကလေးကိုပစ်သတ်ခဲ့တယ်။ အဲဒီနောက်ကိုယ့်ကိုကိုယ်ပစ်သတ်ခဲ့တယ်လို့ ရဲကပြောပါတယ်။

သူဟာ နောက်ထပ်ကလေးနှစ်ဦးနှင့် လူကြီး ၉ ဦးကို ကလေးထိန်းဌာနအပြင်ဘက်မှာ ပစ်သတ်ခဲ့တာဖြစ်တယ်လို့ ရဲက ပြောပါတယ်။

ထိုင်းနိုင်ငံရဲ့ သေနတ်နှင့်ဆက်စပ်တဲ့ သေမှုသေခင်းတွေဟာ အမေရိကန်ပြည်ထောင်စုနှင့် ဘရာဇီးနိုင်ငံတွေထက် နည်းပါးပါတယ်။ ဒါပေမယ့် သေနတ်ဥပဒေတင်းကြပ်တဲ့ စင်္ကာပူနှင့် ဂျပန်တို့ထက်တော့ များနေပါတယ်။  ၂၀၁၉ခုနှစ်စာရင်းဇယားများအရ သေနတ်ပစ်ခတ်သေဆုံးမှုဟာ လူတစ်သိန်းမှာ လေးဦးနှုန်းရှိခဲ့ပါတယ်။ အမေရိကန်မှာတော့ လူတစ်သိန်းမှာ ၁၁ ဦးနှုန်းရှိပြီး ဘရာဇီးမှာတော့ လူတစ်သိန်းမှာ ၂၃ ဦးနှုန်းရှိနေတာဖြစ်ပါတယ်။

ပြီးခဲ့တဲ့လက ဘန်ကောက်မှာရှိတဲ့ ထိုင်းစစ်တပ် စစ်ကောလိပ်က တစ်ဦးဟာ သေနတ်ဖြင့်ပစ်ခတ်မှုကြောင့်  လူနစ်ဦှးကိုသတ်ပစ်ခဲ့ပြီး တစ်ဦးဒဏ်ရာရရှိခဲ့ပါတယ်။

၂၀၂၀ပြည့်နှစ်တုန်းက အရှေ့မြောက်ဘက်မြို့တစ်မြိုက ဈေးဝယ်စင်တာအနီးဝန်းကျင်မှာ စစ်သားတစ်ဦးက သေနတ်ဖြင့် ပစ်ခတ်ခဲ့လို့ လူ၂၉ ဦးသေဆုံးခဲ့ပါတယ်။

Source AP

#Thailand

#Thailand_Gun_mass_shooting

#Gun_Laws

Published 6 Oct 2022

ထိုင်းနိုင်ငံအရှေ့မြောက်ပိုင်းပြည်နယ်တစ်ခုက နေ့ကလေးထိန်းစင်တာတစ်ခုမှာ အောက်တိုဘာ ၆ရက် ကြာသပတေးနေ့က အစုလိုက်အပြုံလိုက် သေနတ်ပစ်ခံခဲ့ရတဲ့အတွက် အနည်းဆုံး လူ၃၁ ဦး သေဆုံးခဲ့တယ်လို့ ရဲတပ်ဖွဲ့ပြောရေးဆိုခွင့်ရသူက ပြောပါတယ်။ အဆိုပါသေနတ်ပစ်မှုဖြစ်ပွားတဲ့နေရဟာ နောင်ဘွာလမ်ပူပြည်နယ် ယူထိုင်းဆာဝန် နာကလန်း ခရိုင်မှာဖြစ်ပါတယ်။ အသတ်ခံရသူတွေအထဲမှာ ကလေးငယ်တွေနှင့် လူကြီးတွေပါဝင်တယ်လို့ ရဲသတင်းထုတ်ပြန်ချက်မှာ ဖော်ပြထားပါတယ်။ သေနတ်သမားမှာ ရဲအရာရှိဟောင်းတစ်ဦးဖြစ်ပြီး သူ့ကို ဖမ်းဆီးဖို့ လိုက်လံရှာဖွေနေတယ်လို့ပြောပါတယ်။ အရေးယူဆောင်ရွက်မှုတွေလုပ်ဆောင်ကြဖို့နှင့် လက်သည်တရားခံကို ဖမ်းမိရေးဆောင်ရွက်ကြဖို့ ဝန်ကြီးချုပ်က အေဂျင်စီတွေအားလုံးကို တပ်လှန့်ထားတယ်လို့ အစိုးရပြောရေးဆိုခွင့်ရသူကပြောပါတယ်။ ထိုင်းနိုင်ငံမှာ သေနတ်ပိုင်ဆိုင်သူတွေဟာ အခြားဒေသတွင်းနိုင်ငံတွေနှင့် ယှဉ်ရင် သိသိသာသာမြင့်မားပါတယ်။ ဒါပေမယ့် အဲဒီစာရင်းတွေထဲမှာ အင်မတန်များပြားလှတဲ့ တရားမဝင်လက်နက်တွေ မပါဝင်သေးပါဘူး။ အဲဒီတရား မဝင်လက်နက်တွေဟာ နယ်စပ်တွေကတစ်ဆင့် စိမ့်ဝင်နေကြပါတယ်လို့ ရိုက်တာကရေးပါတယ်။ ထိုင်းနိုင်ငံမှာ အစုလိုက်အပြုံလိုက်သေနတ်ပစ်ခံရတဲ့ကိစ္စက ရှားပါးကိစ္စပါ။ ဒါပေမယ့် ၂၀၂၀ မှာ စိတ်ဆိုးနေတဲ့ စစ်သားတစ်ဦးဟာ နေရာလေးနေရာမှာ သေနတ်နှင့်ပစ်ခတ်လို့ အနည်းဆုံး လူ၂၉ဦးကိုသတ်ပစ်ခဲ့ပြီး ၅၇ ဦးဒဏ်ရာရရှိခဲ့ပါတယ်။ Source Reuters #Thailand #Thailand_Mass_shooting #Thailand

#World_Military
Published 5 October 2022

မြောက်ကိုရီးယားက ကြာသပတေးနေ့မှာ တာတိုပစ်ပဲ့ထိန်းဒုံးကျည် ၂ စင်းကို ဂျပန်ဘက်သို့ဦးတည်ပြီး ပင်လယ်ထဲသို့ ပစ်ခတ်ခဲ့ပါတယ်။

ဒီပစ်လွှတ်မှုဟာ မြောက်ကိုရီးယားမှ လတ်တလောပစ်လွှတ်မှုတွေကို တုံ့ပြန်တဲ့အနေနဲ့ပြုလုပ်တဲ့ ကုလလုံခြုံရေးကောင်စီအစည်းအဝေးနဲ့ အမေရိကန်လေယာဉ်တင်သင်္ဘောကြီး ဒေသတွင်းသို့ပြန်လာခဲ့ပြီးနောက် အခုလို ထပ်မံပစ်ခတ်ခဲ့တာဖြစ်ပါတယ်။

ယခုဒုံးကျည်ပစ်လွှတ်ခြင်းဟာ ၁၂ ရက်အတွင်း ၆ ကြိမ်မြောက်ပစ်လွှတ်တာဖြစ်ပြီး အင်္ဂါနေ့တုန်းကလည်း တာလတ်ပစ်ဒုံးကျည်တစ်စင်းကို ဂျပန်အပေါ်ကနေကျော်ပြီး ပစ်ခတ်ခဲ့တာကြောင့် တောင်ကိုရီးယားနဲ့ အမေရိကန်တို့ ပူးတွဲစစ်ရေးလေ့ကျင့်မှုများပြုလုပ်ကာ တုံ့ပြန်ခဲ့ကြပါတယ်။

"စက်တင်ဘာလကုန်က စတွက်ကြည့်လိုက်ရင် ဒီလောက်အချိန်တိုအတွင်း ၆ ကြိမ်မြောက်ပစ်ခတ်ခဲ့တာဖြစ်ပါတယ်၊ ဘယ်လိုမှ သည်းခံနိုင်စရာမရှိပါဘူး" လို့ ဂျပန်ဝန်ကြီးချုပ်'ဖူမီယိုကီရှီဒါ'က သတင်းထောက်တွေကို ပြောကြားခဲ့ပါတယ်။

မြောက်ကိုရီးယားရဲ့ ပစ်ခတ်မှုတွေအကြောင်း ကုလသမဂ္ဂနဲ့တိုင်ပင်ခဲ့တဲ့ အမေရိကန်ကို မြောက်ကိုရီးယားက ရှုတ်ချခဲ့ပြီး ၁ နာရီအကြာမှာပဲ အခုလိုထပ်မံပစ်ခတ်ခဲ့တာဖြစ်ပါတယ်။

မြောက်ကိုရီးယားရဲ့ ဒုံးကျည်စမ်းသပ်ပစ်ခတ်မှုတွေက လုံခြုံရေးအရ စမ်းသပ်ခဲ့တာသာဖြစ်တယ်လို့ မြောက်ကိုရီးယားဘက်က ဆိုခဲ့ပါတယ်။

အမေရိကန်လေယာဉ်တင်သင်္ဘော ကိုရီးယားကျွန်းဆွယ်နားမှာ နေရာချထားတာကို မြောက်ကိုရီးယားက ရှုတ်ချလိုက်ကာ ဒါဟာ တည်ငြိမ်အေးချမ်းရေးကို ပြင်းထန်စွာခြိမ်းခြောက်ရာကျတယ်လို့ နိုင်ငံခြားရေးဝန်ကြီးဌာနက ထုတ်ပြန်လိုက်ပါတယ်။

ဂျပန်နိုင်ငံအပေါ်ကနေကျော်ပြီး မြောက်ကိုရီးယားက ဒုံးကျည်ပစ်လွှတ်ခဲ့တာကြောင့် တုံ့ပြန်တဲ့အနေနဲ့ USS Ronald Reagan နဲ့အတူ စစ်သင်္ဘောအဖွဲ့လိုက်ကြီးက ချက်ချင်းနေရာပြန်ယူလာခဲ့တာဖြစ်ပါတယ်။

ကြာသပတေးနေ့က ဒုံးကျည်ပစ်လွှတ်မှုကို အမေရိကန်က ရှုတ်ချလိုက်ပြီး ဒါဟာ ကုလသမဂ္ဂလုံခြုံရေးကောင်စီရဲ့ စည်းမျဉ်းများကိုချိုးဖောက်ရာကျသလို ဒေသတွင်းအိမ်နီးချင်းတွေနဲ့ နိုင်ငံတကာကိုလည်း ခြိမ်းခြောက်ရာကျတယ်လို့ အမေရိကန်နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူတစ်ဦးက ပြောကြားခဲ့ပါတယ်။

ဒါပေမဲ့လည်း အမေရိကန်က မြောက်ကိုရီးယားနဲ့ သံတမန်ရေးဆွေးနွေးညှိနှိုင်းမှုများပြုလုပ်ရန် တောင်းဆိုထားပါတယ်။

နျူကလီးယားလက်နက်များထုတ်လုပ်နေတဲ့ မြောက်ကိုရီးယားကို ကုလလုံခြုံရေးကောင်စီမှ ဒဏ်ခတ်ပိတ်ဆို့မှုများ ထပ်မံချမှတ်ဖို့အရေးကို ပိတ်ပင်ခဲ့တဲ့ တရုတ်နဲ့ရုရှားတို့အား အမေရိကန်က စွပ်စွဲလိုက်ပါတယ်။

တောင်ကိုရီးယားသမ္မတ'ယွန်ဆော့ယောလ်'က 'ကီရှီဒါ'နဲ့ ဖုန်းပြောဆိုခဲ့ရာမှာ အမေရိကန်နဲ့မဟာမိတ်ပူးပေါင်းမှုကို သေချာအောင်ပြုလုပ်ပြီး ဂျပန်နဲ့ပူးပေါင်းသွားမှာဖြစ်ကြောင်း အခိုင်အမာဆိုလိုက်ပါတယ်။

ဒုံးကျည်စမ်းသပ်မှုတွေပြုလုပ်နေတဲ့ မြောက်ကိုရီးယားအနေနဲ့ နိုင်ငံတကာမှ ပြင်းထန်တဲ့တုံ့ပြန်မှုတွေနဲ့ ရင်ဆိုင်သွားရမယ်လို့ တောင်ကိုရီးယားသမ္မတက သတိပေးလိုက်ပါတယ်။

မြောက်ကိုရီးယားဟာ မဆင်မခြင်စမ်းသပ်မှုပြုလုပ်နေတာဖြစ်ပြီး ယခုနှစ်စကတည်းက သူတစ်နိုင်ငံတည်း ရန်ဆောင်တဲ့လုပ်ရပ်တွေ ပြုလုပ်နေတာဖြစ်ပါတယ်။

Source: Reuters
#Yangon_Media_Group

#World_Wildlife
Published 6 October 2022

တိရိစ္ဆာန်အမျိုးအစားတွေထဲမှာ တောရိုင်းမျောက်တွေကနေ ကိုရိုနာဗိုင်းရပ်စ်နဲ့ တုပ်ကွေးဗိုင်းရပ်စ်တို့လို ရောဂါတွေ အလွန်ကူးစက်စေနိုင်ပါတယ်။

အန်ဂလီယာရပ်စ်ကင်တက္ကသိုလ်မှ သုတေသီများက တောရိုင်းတိရိစ္ဆာန်တွေကြား ထိုကဲ့သို့ရောဂါများပျံ့ပွားပုံကို လေ့လာချိတ်ဆက်ခဲ့ကြပါတယ်။

သူတို့လေ့လာချက်အရ မျောက်ရိုင်းတွေဟာ လူတွေအနီးနားမှာ အုပ်လိုက်နေထိုင်ကြကာ ရောဂါပျံ့ပွားသူတွေလို့ သတ်မှတ်နိုင်ပါတယ်။

မျောက်တွေက လူတွေနဲ့ ပေါင်းသင်းဆက်ဆံရေးအရှိဆုံးဖြစ်ပြီး တွေ့ရှိချက်များဖြင့် ခွဲခြားသိရှိနိုင်စေမယ်လို့ မျှော်လင့်နေကြပါတယ်။

ဒီသတ္တဝါတွေကို ကာကွယ်ဆေး ဒါမှမဟုတ် ဆေးကုသမှုပေးမယ်ဆိုရင် နီးကပ်စွာနေတဲ့နေရာက မျောက်တွေရော လူတွေပါ ကာကွယ်ပေးနိုင်မှာဖြစ်ပါတယ်။

လေ့လာမှုပြုလုပ်ရာမှာ တောင်အာရှနဲ့ အရှေ့တောင်အာရှရှိ မြို့ပြနေရာတွေမှာ နေထိုင်တဲ့မျောက်တွေနဲ့ လူသားများကြား ကူးစက်ရောဂါပျံ့ပွားပုံကို ကွန်ပျူတာပုံစံများဖြင့် အသုံးပြုလေ့လာခဲ့ကြပါတယ်။

လူဦးရေ အကောင်ရေတွေ တိုးပွားလာတာနဲ့အမျှ လူသားတွေနဲ့ တောရိုင်းသတ္တဝါများ ပိုမိုနီးစပ်လာရဖို့ ရှိနေပါတယ်။

သုတေသီများက အိန္ဒိယမြောက်ပိုင်း၊ မလေးရှား၊ အိန္ဒိယတောင်ပိုင်းတို့မှ မျောက်အဖွဲ့ ၁၀ ကို လေ့လာခဲ့ကြပါတယ်။

ထို့နောက်အချက်အလက်တွေကို ကွန်ပျူတာထဲသို့ထည့်သွင်းကာ တုပ်ကွေး၊ ကိုရိုနာဗိုင်းရပ်စ်၊ ဝက်သက်စတဲ့ရောဂါများ ပျံ့ပွားပုံကို ပုံစံတူဖန်တီးခဲ့ကြပါတယ်။

ရလာဒ်တွေကတော့ ပျံ့ပွားမှုပမာဏဟာ အရင်ဆုံးကူးစက်ခဲ့တဲ့ မျောက်အဖွဲ့အပေါ်မူတည်နေပါတယ်။

အရင်ဆုံးကူးစက်တဲ့မျောက်ဟာ ကျန်တဲ့ကောင်အများအပြားနဲ့ ထိတွေ့ခဲ့ရင် ပျံ့ပွားမှုကြီးဖြစ်ပွားနိုင်ပါတယ်။

လူသားတွေနဲ့ အလွန်နီးစပ်တဲ့မျောက်တွေဟာ လူတွေကိုလည်း ရောဂါကူးစက်စေမှာဖြစ်ပါတယ်။

ထို့အတူ လူသားတွေဖြစ်တတ်တဲ့ အစာအိမ်လမ်းကြောင်းရောဂါနဲ့ အသက်ရှူလမ်းကြောင်းရောဂါတွေဟာလည်း မျောက်တွေထံ ကူးစက်တတ်ပါတယ်။

ဒါကြောင့် နောင်အခါ ရောဂါပျံ့ပွားမှုမဖြစ်ရအောင် မျောက်တွေကိုလည်း ကာကွယ်ဆေးထိုးပေးသင့်တယ်လို့ သုတေသီများ အကြံပြုကြပါတယ်။

Source: Daily Mail
#Yangon_Media_Group

#World_Health
Published 6 October 2022

အစားအစာထုတ်ကုန်တွေမှာ သကြားဓာတ်အများအပြားပါဝင်ရင် အနီရောင်အဝိုင်းနဲ့ အမှတ်အသားပြုလုပ်ဖို့ ကျန်းမာရေးဝန်ကြီးဌာနက ညွှန်ကြားထားပေမယ့် ဆိုင်တွေမှာ အချိုဓာတ်များတဲ့ ပစ္စည်းတွေသာ တွေ့ရတတ်ပြီး သကြားဓာတ်နည်းတဲ့ အစားအစာက အလွန်ရှားပါးသွားပါပြီ။

နို့တိုက်သတ္တဝါတွေဆိုရင် မိခင်နို့ရဲ့အချိုဓာတ်နဲ့ ကာဗိုဟိုက်ဒရိတ် ကယ်လိုရီအရင်းအမြစ်များကို နှစ်ခြိုက်ကြပါတယ်။

လက်ရှိအချိန်မှာ သကြားနဲ့ အချိုဓာတ်ပေးနိုင်တဲ့အမှုန့်များ တွင်ကျယ်လာတဲ့အပြင် စားသောက်ကုန်လုပ်ငန်းများက အရသာအကောင်းမွန်ဆုံးရရှိစေရန် ထုတ်လုပ်လာတာကြောင့် အချိုဓာတ်များတဲ့အစားအစာ များပြားလာကာ ကျန်းမာရေးကို ခြိမ်းခြောက်လာပါတယ်။

ဂျေရုဆလမ် ဟီဘရူးတက္ကသိုလ်မှ အရသာကျွမ်းကျင်ပညာရှင် ပရော်ဖက်ဆာ'မာရှာနစ်ဗ်'က စမ်းသပ်မှုပြုလုပ်ခဲ့ရာမှာ အွန်လိုင်းမှရောင်းချတဲ့ စားသောက်ကုန်တွေကို စားသုံးသူ ထောင်ပေါင်းများစွာ သုံးသပ်ခဲ့ပြီး ချိုလွန်းတဲ့အစားအစာတွေကို အမှတ်အနည်းငယ်သာ ပေးခဲ့ကြပါတယ်။

စားသောက်ကုန်များအကြောင်း မှတ်ချက်ပေးကြရာမှာ ၇ ရာခိုင်နှုန်းကနေ ၁၆ ရာခိုင်နှုန်းလောက်က အချိုလွန်ကဲတယ်လို့ လေ့လာတွေ့ရှိရပါတယ်။

အစားအစာတစ်ခုခုကို ချိုလွန်းတယ်လို့ မှတ်ချက်များလာရင် အခြားတစ်ခုကိုသာ ပြောင်းလဲသုံးစွဲလာကြပါတယ်။

အချိုလွန်ကဲရတဲ့ ပါဝင်ပစ္စည်းတွေထဲမှာ အချိုဓာတ်ပေးစွမ်းတဲ့အမှုန့်တွေကြောင့်လည်း ပါဝင်ပါတယ်။

သကြားလုံး၊ မုန့်၊ အချိုရည်ထုတ်လုပ်တဲ့ ကုမ္ပဏီတွေက သုံးစွဲသူတွေလိုချင်တဲ့ အချိုနည်းတဲ့စားသောက်ကုန်တွေကို အသားပေးသင့်ပါတယ်လို့ ဆိုခဲ့ပါတယ်။

လူတွေကိုလည်း ကျန်းမာရေးနဲ့ညီညွတ်တဲ့ အချိုနည်းတဲ့အစားအစာကို စားသုံးချင်အောင် တိုက်တွန်းဖို့လိုအပ်သလို စားသောက်ကုန်လုပ်ငန်းတွေကိုလည်း ကျန်းမာရေးနဲ့ ညီညွတ်စွာထုတ်လုပ်ဖို့ တိုက်တွန်းသင့်ပါတယ်။

အချိုကြိုက်လို့ အဝလွန် ဆီးချိုမဖြစ်နိုင်ပေမယ့် အချိုလွန်ကဲရင်တော့ ဖြစ်နိုင်ပါတယ်။

အချိုကြိုက်နှစ်သက်ခြင်းက အသက်အရွယ်၊ ကျား/မ၊ လူမျိုး၊ ယဉ်ကျေးမှု၊ လူတစ်ဦးချင်းစီအပေါ်လည်း မူတည်နေပါတယ်။

အစားရွေးတာက နှစ်သက်တဲ့အစားအစာနဲ့ ကိုက်ညီနေတာမဟုတ်ပါဘူး။

အချိုစားချင်တဲ့ဆန္ဒက စားသောက်ပုံစံနဲ့ ဗိုက်ပြည့်/မပြည့်အပေါ်လည်း မူတည်ပါတယ်။

လူတွေက ဝမ်းဝသွားတဲ့ခါ အချိုစားချင်စိတ်လျော့ပါးသွားပေမယ့် အလွယ်တကူစားသုံးနိုင်တဲ့ အစားအစာတွေကိုတော့ စားသုံးမိကာ အချိုဓာတ်များလာစေပါတယ်။

ဒါ့အပြင် လူတိုင်းက ချိုတိုင်းအရသာရှိတယ်လို့ မထင်ကြပါဘူး။

ဒါကြောင့် လူအများစုရဲ့ နှစ်ခြိုက်ပုံအရသာနဲ့ ကိုက်ညီတဲ့အတိုင်း ခွဲခြမ်းလေ့လာပြီး ထုတ်လုပ်သင့်ပါတယ်။

Source: The Jerusalem Post
#Yangon_Media_Group

Published 5 Oct 2022

အိုပက်နှင့်အပေါင်း OPEC+ နိုင်ငံတွေဟာ  အမေရိကန်ပြည်ထောင်စုက ဖိအားပေးနေတဲ့ကြားထဲက ရေနံထုတ်လုပ်မှုတွေကို ၂၀၂၀ ကိုဗစ်-၁၉ ကပ်ဘေးစသည့်အချိန်ကစလျှင် အနက်ရှိုင်းဆုံး ဖြတ်တောက်ရန် ဗုဒ္ဓဟူးနေ့က ဗီယင်နာမှာကျင်းပတဲ့ အစည်းအဝေးတစ်ခုအတွင်း သဘောတူခဲ့ကြပါတယ်။

အိုပက်နှင့်အပေါင်း နိုင်ငံတွေဟာ အိုပက်အဖွဲ့ဝင်နိုင်ငံတွေနှင့် အိုပက်အဖွဲ့ဝင်မဟုတ်တဲ့အခြားနိုင်ငံ ၁၀နိုင်ငံတို့ ပူးပေါင်း ဖွဲ့စည်းထားပြီး နိုင်ငံပေါင်း ၂၄နိုင်ငံပါဝင်တာပါ။

ဒီလိုရေနံထုတ်လုပ်မှုဖြတ်တောက်ဖို့ ဆုံးဖြတ်လိုက်တဲ့အတွက် လွန်ခဲ့တဲ့သုံးလက ရေနံတစ်စည် ဒေါ်လာ ၁၂၀ရှိရာကနေ ဒေါ်လာ၆၀အထိကျဆင်းလာခဲ့တဲ့အပေါ် ရေနံဈေးနှုန်းပြန်လည်ကောင်းမွန်လာဖို့ တွန်းအားဖြစ်လာစေပါလိမ့်မယ်။

အမေရိကန်က အိုပက်အဖွဲ့ကြီးကို ရေနံထုတ်လုပ်မှု မဖြတ်တောက်ပစ်ဖို့ တွန်းအားပေးခဲ့တယ်လို့ ဒီကိစ္စတွေနှင့်နီးစပ်တဲ့ သတင်းအရင်းအမြစ်တစ်ခုက ရိုက်တာကိုပြောပါတယ်။

အခုဖြတ်တောက်ပစ်မယ့်ပမာဏာထဲမှာ ဆော်ဒီအာရေဗျတို့လို သူ့နိုင်ငံအလိုက် ဆန္ဒအလျောက်ထုတ်လုပ်မှုလျော့ချထား တာတွေပါဝင်သလား၊ အဖွဲ့အနေနှင့် လက်ရှိထုတ်လုပ်နေတဲ့အပေါ်လား ဆိုတာတော့ ရှင်းရှင်းလင်းလင်းမသိရပါဘူး။

အိုပက်အဖွဲ့နှင့်အပေါင်း နိုင်ငံတွေဟာ ဩဂုတ်လတုန်းက ရည်မှန်းထားတာတဲ့လျော့နည်းပြီး တစ်ရက်ကို ရေနံစည် ၃.၆သန်းထုတ်လုပ်ခဲ့ကြပါတယ်။ အခုတစ်ရက်ကို ရေနံစည် (၂)သန်းပဲထုတ်မယ်လို့ သဘောတူခဲ့ကြတာဖြစ်ပါတယ်။

“ဖြတ်တောက်မှုသိသာခဲ့လို့ ရေနံဈေးနှုန်းတက်လာရင် အမေရိကန်ရဲ့ သက်တမ်းအလယ် ရွေးကောက်ပွဲမတိုင်ခင်မို့ ဘိုင်ဒင်အစိုးရအတွက် ဒေါသထွက်စရာဖြစ်လိမ့်မယ်” လို့ Citi analysts ကမှတ်ချက်ပေးပါတယ်။

“ ဒါဆိုရင် အမေရိကန်ဆီကနေ နောက်ထပ် နိုင်ငံရေးတုန့်ပြန်ဆောင်ရွက်မှုတွေလာနိုင်တယ်။ အဲဒီအထဲမှာ NOPEC ဥပဒေကြမ်းကို အတည်ပြုတာမျိုးနှင့်အတူ မဟာဗျူဟာအရသိုလှောင်ထားရှိတဲ့ ရေနံတွေကို ထပ်ပြီး အပြင်ထုတ်ရောင်းပေးတာမျိုး လုပ်လာနိုင်တယ်” လို့ စီတီကဆက်ပြောပါတယ်။ အဲဒီ NOPEC ဥပဒေကြမ်းဆိုတာ အိုပက်အပေါ် စီးပွားရေးလက်ဝါးကြီးအုပ်မှုတိုက်ဖျက်ရေး antitrust ဥပဒေတစ်ခုဖြစ်ပါတယ်။

Pmorgan ကလည်း ဝါရှင်တန်ဟာ သူ့ရဲ့ လှောင်ထားတဲ့ရေနံတွေကို ပိုထုတ်ရောင်းတာမျိုးလုပ်လိမ့်မယ်လို့ ပြောပါတယ်။

ဆုံးဖြတ်ချက်ဟာ နည်းပညာအရသာဖြစ်တယ် နိုင်ငံရေးမဟုတ်ဘူးလို့ ယူအေအီး စွမ်းအင်ဝန်ကြီး ဆူဟေးလ် အယ်လ် မက်ရိုယီကပြေပါတယ်။ ဒါကို နိုင်ငံရေးအဖွဲ့အစည်းအနေနှင့်သုံးမှာမဟုတ်ဘူးလို့ သူကဆက်ပြောပါတယ်။

အဆိုပါအစည်းအဝေးသို့ အိုပက်နှင့်အပေါင်း နိုင်ငံတွေထဲက တစ်နိုင်ငံဖြစ်တဲ့ ရုရှားနိုင်ငံရဲ့  ဒုတိယဝန်ကြီးချုပ် အလက်ဇင်းဒါး နိုဗက်လည်း တက်ရောက်ခဲ့ပါတယ်။

Source: Agencies

#OPEC+

#US_Oil_Politics

#US_Vs_OPEC