#World_Military
Published 7 October 2022

ယူကရိန်းနှင့်တိုက်ခိုက်လာတာ ၈ လကြာမြင့်လာချိန်မှာ ရုရှားတို့ကြီးမားတဲ့ ဆုံးရှုံးမှုဖြစ်လာရပြီးနောက် ရုရှားအရာရှိတွေက နည်းဗျူဟာမြောက်နျူကလီးယားလက်နက်များ အသုံးပြုလာနိုင်ချေအကြောင်း ပြောဆိုနေကြတာကြောင့် ၁၉၆၂ ခုနှစ်ကျူးဘားဒုံးကျည်ပြဿနာနောက်ပိုင်း နျူကလီးယားအဆုံးသတ်စစ်ပွဲ အမြင့်ဆုံးအနေအထားမှာရှိနေတယ်လို့ အမေရိကန်သမ္မတ'ဂျိုးဘိုင်ဒန်'က အင်္ဂါနေ့မှာ ပြောကြားလိုက်ပါတယ်။

ဒီမိုကရက်တစ်အထက်လွှတ်တော်လှုပ်ရှားမှုကော်မတီအတွက် ရန်ပုံငွေပွဲတစ်ခုမှာ 'ဘိုင်ဒန်'ကပြောကြားခဲ့ရာမှာ "ပူတင်ကို ကျွန်တော်ကောင်းကောင်းသိပါတယ်၊ နျူကလီးယားလက်နက်တွေ ဓာတုလက်နက် ဇီဝလက်နက်တွေအကြောင်း မဟုတ်ဘဲနဲ့ သူပြောမှာမဟုတ်ပါဘူး" လို့ ဆိုပါတယ်။

"ကန်နက်ဒီနဲ့ ကျူးဘားဒုံးကျည်ပြဿနာပြီးကတည်းက အဆုံးအဖြတ်တိုက်ပွဲရင်ဆိုင်ရမယ့်အခြေအနေ မကြုံတွေ့ခဲ့ရပါဘူး၊ သူ့စစ်တပ်က သိသိသာသာရှုံးနိမ့်လာတာကြောင့် ပူတင်ခြိမ်းခြောက်မှုက တကယ်ဖြစ်လာနိုင်ပါတယ်" လို့ 'ဘိုင်ဒန်'က ဆိုပါတယ်။

ယူကရိန်းနဲ့တိုက်ပွဲမှာ ရုရှားတို့ရှုံးနိမ့်လာတာကြောင့် ရုရှားက အဖျက်အားမြင့်မားတဲ့လက်နက်များ သုံးစွဲလာနိုင်တယ်လို့ အမေရိကန်အရာရှိများက သတိပေးနေတာ လအနည်းငယ်ရှိနေပါပြီ။

ဒါပေမဲ့ ယခု'ဘိုင်ဒန်'ပြောဆိုလိုက်တဲ့ မှတ်ချက်ကတော့ နျူကလီးယားနဲ့ပတ်သက်တဲ့ အထင်ရှားဆုံး သတိပေးချက်ဖြစ်နေပါတယ်။

ရုရှားနျူကလီးယားတပ်ဖွဲ့များ လှုပ်ရှားမှုမရှိသေးတာကြောင့် အမေရိကန်နျူကလီးယားတပ်များလည်း တပ်လှန့်ဖို့မလိုလောက်သေးကြောင်း မကြာသေးမီရက်သတ္တပတ်ကမှ အမေရိကန်အရာရှိများ ပြောကြားခဲ့ပါသေးတယ်။

"ကျွန်တော်တို့ရဲ့ နျူကလီးယားဗျူဟာပြောင်းလဲဖို့ အကြောင်းမတွေ့ရသလို ရုရှားကလည်း သူတို့ရဲ့နျူကလီးယားလက်နက် အသုံးပြုဖို့ပြင်ဆင်နေတယ်ဆိုတဲ့ အရိပ်အယောင် မတွေ့ရသေးပါဘူး" လို့ အိမ်ဖြူတော်စာနယ်ဇင်းဦးစီးမှူးက အင်္ဂါနေ့က ပြောကြားခဲ့ပါတယ်။

၁၉၆၂ ခုနှစ်တုန်းက ဆိုဗီယက်ပြည်ထောင်စုက ကျူးဘားထံသို့ နျူကလီးယားလက်နက်များ လျှို့ဝှက်နေရာချနေတာကို အမေရိကန်ကတွေ့ရှိခဲ့ရာမှာ ၁၃ ရက်တာဖြစ်ပျက်မှုအတွင်း ကမ္ဘာကြီးမှာ နျူကလီးယားအဆုံးသတ်ရေး အနီးဆုံးအခြေအနေသို့ ရောက်ရှိခဲ့ဖူးကြောင်း ကျွမ်းကျင်သူများ သုံးသပ်ထားပါတယ်။

နျူကလီးယားအသုံးပြုခြင်းဖြင့် ကမ္ဘာပျက်စီးမယ့်အခြေအနေကို ရောက်ရှိလာနိုင်တယ်လို့ 'ဘိုင်ဒန်'က 'ပူတင်'ကိုသတိပေးခဲ့ပါတယ်။

"နျူကလီးယားလက်နက် အလွယ်တကူထုတ်သုံးရမယ့် အကြောင်းတရားမရှိသလို အဆုံးအဖြတ်တိုက်ပွဲအထိ ဖြစ်လာစရာအကြောင်းမရှိပါဘူး"

"သူဘယ်လိုထွက်လမ်းရှာမလဲ၊ စစ်ပွဲရှုံးရုံသာမက ရုရှားနိုင်ငံအတွင်းမှာပါ အာဏာသက်ရောက်မှုကျဆင်းသွားရင် သူဘယ်လမ်းသွားရမလဲ" လို့ 'ဘိုင်ဒန်'က မေးခွန်းထုတ်လိုက်ပါတယ်။

"ကျုပ်တို့နိုင်ငံမှာ ဖျက်ဆီးရေးစွမ်းအားမြင့်လက်နက်အမျိုးမျိုး ရှိတယ်ဆိုတာ သတိပေးလိုက်ချင်ပါတယ်၊ ကျုပ်တို့ပိုင်နယ်မြေတွေ ခြိမ်းခြောက်ခံလာရရင် ကျုပ်တို့နိုင်ငံနဲ့လူမျိုးတွေကိုကာကွယ်ဖို့ ရသမျှနည်းလမ်းအားလုံး အသုံးပြုသွားမှာပါ၊ ဒါဟာ အပြောချည်းသက်သက် မဟုတ်ပါဘူး" လို့ 'ပူတင်'က စက်တင်ဘာ ၂၁ ရက်နေ့က ကင်မရာကို စူးစူးစိုက်စိုက်ကြည့်ပြီး ပြောကြားခဲ့ပါတယ်။

အိမ်ဖြူတော်နိုင်ငံတော်လုံခြုံရေးအကြံပေးပုဂ္ဂိုလ်က ယူကရိန်းမှာ နျူကလီးယားအသုံးပြုခဲ့ရင် ဖြစ်လာနိုင်တဲ့အကျိုးဆက်တွေကို ရုရှားကိုရှင်းရှင်းလင်းလင်း အသိပေးပြီးသားဖြစ်တယ်လို့ ပြီးခဲ့တဲ့အပတ်က ပြောကြားခဲ့ပါတယ်။

ကမ္ဘာကြီးကလည်း 'ပူတင်'နျူကလီးယားလက်နက်သုံးခဲ့တာကို ဘယ်တော့မှမေ့မှာမဟုတ်ဘူးဆိုတာ 'ပူတင်'ကိုယ်တိုင်နားလည်ထားကြောင်း ယူကရိန်းသမ္မတကလည်း ကြာသပတေးနေ့က ပြောကြားခဲ့ပါတယ်။

Source: AP News
#Yangon_Media_Group

#World_Health
Published 7 October 2022

အသီးအနှံ၊ ဟင်းသီးဟင်းရွက်၊ ပဲအမျိုးမျိုး၊ ကောက်ပဲသီးနှံများမှာ ဗိုက်တာမင်၊ သတ္တုဓာတ်၊ အန်တီအောက်ဆီဒင့်၊ ဖိုင်တိုအဟာရဓာတ်နဲ့ အမျှင်ဓာတ်များကြွယ်ဝကာ ကျန်းမာရေးအတွက် မရှိမဖြစ်လိုအပ်တဲ့အရာတွေ ဖြစ်ပါတယ်။

ဆီးချိုရောဂါ၊ အသည်းရောဂါ၊ နှလုံးသွေးကြောရောဂါ၊ အစာခြေလမ်းကြောင်းပြဿနာများ၊ စိတ်ဓာတ်ကျခြင်းများအထိ နာတာရှည်အခြေအနေများ ဖြစ်နိုင်ချေကို လျော့ကျစေတဲ့ ကျန်းမာရေးညီညွတ်တဲ့ အပင်အခြေစိုက်အစာများ စားသုံးမှုနဲ့ဆက်စပ်နေကြောင်း ဟောင်ကောင်အဟာရဆိုင်ရာ ကျွမ်းကျင်ပညာရှင် 'ဆိုင်းရပ်စ်လုခ်ရှူလွန်'က ပြောပြခဲ့ပါတယ်။

အပင်အခြေပြုအစားအစာများက ဆီးချိုရောဂါ၊ နှလုံးရောဂါလျော့ကျစေပြီး ကျန်းမာရေးကိုတိုးတက်စေကြောင်း လေ့လာချက် ၅ ခုမှာ ဖော်ပြထားပါတယ်။

ထောပတ်သီးက ကယ်လိုရီမြင့်မားပေမယ့် တစ်နေ့တစ်လုံးမျှ စားသုံးခြင်းက ကိုယ်အလေးချိန်မတက်စေဘဲ ကိုလက်စ်ထရောပမာဏ လျော့ကျစေပါတယ်။

ဝမ်းဗိုက်အဆီကိုလည်း မသက်ရောက်စေဘဲ အစားအစာအဟာရမျှတရေးအတွက် အကျိုးရှိစေကြောင်း ပန်ဆယ်ဗေးနီးယားပြည်နယ်တက္ကသိုလ်မှ ပရော်ဖက်ဆာ'ပန်နီခရစ္စအီသာတန်'က ဆိုပါတယ်။

ဗိုက်ဆာလို့ မုန့်အဆာပြေစားသူတွေက စိတ်ပိုင်းဆိုင်ရာကျန်းမာရေး ထိခိုက်စေပါတယ်။

စိုးရိမ်ပူပန်ခြင်း၊ စိတ်ဖိစီးခြင်း၊ စိတ်ဓာတ်ကျခြင်းစတဲ့ ပြဿနာများနဲ့ ပတ်သက်နေပါတယ်။

အသီးအနှံမကြာခဏစားတဲ့သူတွေကတော့ ထိုကဲ့သို့စိတ်ပိုင်းဆိုင်ရာပြဿနာများ မပေါ်ပေါက်ခဲ့ကြောင်း လေ့လာတွေ့ရှိခဲ့ကြပါတယ်။

အသီးအနှံတွေနဲ့ ဟင်းသီးဟင်းရွက်တွေက အန်တီအောက်ဆီဒင့်များ၊ အမျှင်ဓာတ်များ၊ အဟာရဓာတ်များကြွယ်ဝကာ ဦးနှောက်လုပ်ဆောင်ချက် ကောင်းမွန်စေပေမယ့် ဒီအဟာရဓာတ်တွေက ဟင်းချက်ပြုတ်လိုက်ရင် ဆုံးရှုံးသွားရပါတယ်။

ဒါကြောင့် အသီးတွေကို အစိမ်းလိုက်စားခြင်းက စိတ်ကျန်းမာရေးဆိုင်ရာကို ကောင်းစွာသက်ရောက်စေပါတယ်။

သင့်လျော်တဲ့ပမာဏကတော့ လိမ္မော်သီး ပန်းသီးတစ်လုံး၊ ဆီးသီး ကီဝီသီး အသေး ၂ လုံး၊ စပျစ်သီး လိုင်ချီး ဘယ်ရီသီး ခွက်တစ်ဝက်ခန့်ဖြစ်ပြီး ဖျော်ရည်နဲ့တော့ အစားမထိုးသင့်ပါဘူး။

ပဲအမျိုးမျိုးမှ ပရိုတိန်းက အားနည်းခြင်းကိုလျော့ကျစေနိုင်ပြီး ကြွက်သားဆုံးရှုံးခြင်း၊ နုံးချည့်ခြင်း၊ ကိုယ်အလေးချိန်ကျခြင်းတို့ကို ကာကွယ်ပေးနိုင်ပါတယ်။

အပင်ကရရှိတဲ့ပရိုတိန်းအများစုကို ပေါင်မုန့်၊ ကွေကာ၊ ခေါက်ဆွဲ၊ မြေပဲ၊ ပဲအမျိုးမျိုးတို့မှရရှိပြီး အသားပရိုတိန်းတွေကိုတော့ အသားကြီးငါးကြီး၊ ကြက်၊ ငါး၊ ပင်လယ်စာ၊ ကြက်ဥ၊ နို့ထွက်ပစ္စည်းများမှ ရရှိပါတယ်။

ဖရဲသီးမှာပါဝင်တဲ့ဆစ်ထရူလိုင်းနဲ့ အာဂျင်နင်းတို့က နှလုံးသွေးကြောနဲ့ ဇီဝဖြစ်စဉ်ကျန်းမာရေးတို့အတွက် အရေးကြီးပါတယ်။

အဆီဓာတ်လျှော့ချခြင်း၊ ဂလူးကို့စ်ထိန်းချုပ်ပေးခြင်း၊ သွေးကြောများလျှော့ချခြင်းတို့ကို ဖရဲသီးမှာပါဝင်တဲ့ အမိုင်နိုအက်ဆစ်များက ကူညီပေးပါတယ်။

Source: South China Morning Post
#Yangon_Media_Group

#World_Health
Published 7 October 2022

ကင်ဆာဆဲလ်တွေကို ချေဖျက်ရန်အတွက် သောက်သုံးရတဲ့ဆေးတွေဟာ ခန္ဓာကိုယ်ထဲပျံ့နှံ့သွားပြီးတော့ ကျန်းမာသန်စွမ်းတဲ့ ဆဲလ်တစ်ရှူးတွေကိုပါ ပျက်စီးစေကာ အူလမ်းကြောင်းတစ်ရှူးများ ထိခိုက်ခြင်း၊ ဆံပင်ကျွတ်ခြင်းနဲ့ အခြားဘေးထွက်ဆိုးကျိုးများ ဖြစ်ပေါ်နိုင်စေပါတယ်။

ဒါကြောင့် အဲဒီအစား ဆေးတွေကို အလွန်သေးငယ်တဲ့ နာနိုမက်ထရစ်ပုံစံနဲ့ ထုတ်လုပ်နိုင်ပါပြီ။

ခန္ဓာကိုယ်ထဲက ကင်ဆာစင်တာများထံ ဆေးတိုက်ရိုက်ရောက်ရှိစေရန် နာနိုမက်ထရစ်ပုံစံနဲ့ ထုတ်လုပ်နိုင်ဖို့ ပြင်ဆင်မှုများနဲ့ လိုအပ်သည်များကို အစ္စရေးလ် ဟိုင်ဖာမှ တက်ခ်နီယန်တက္ကသိုလ်က ထုတ်လုပ်ခဲ့ကြပါတယ်။

သုတေသီများက လိုအပ်တဲ့ပစ္စည်းများဖြင့် ဖန်တီးခဲ့ကြပြီး အကြိုစမ်းသပ်မှုများအရ အကျိတ်အစိုင်အခဲများကို ထိရောက်စွာကုသနိုင်ခဲ့ပါတယ်။

ကင်ဆာကုသနည်းများဖြစ်တဲ့ ဓာတုကုထုံးများနဲ့ ကိုင်နေ့စ်အင်ဟစ်ဘစ်တာတို့ဟာ ကင်ဆာဆဲလ်တွေကို ဖျက်ဆီးရန်ရည်ရွယ်ပေမယ့် အဓိကပြဿနာတစ်ရပ်က ဆေးပမာဏအနည်းငယ်ကသာ ကင်ဆာဆဲလ်တွေဆီ ရောက်ရှိပြီး ကျန်တဲ့ဆေးအစိတ်အပိုင်းတွေက သန်စွမ်းတဲ့တစ်ရှူးတွေဆီ ရောက်ရှိကုန်ကြတာဖြစ်ပါတယ်။

ဖိုင်ဇာနဲ့ မိုဒါနာကိုဗစ်ကာကွယ်ဆေးအပါအဝင် နာနိုဆေးထုတ်ကုန် ၄၀ ခန့်ကို အမေရိကန်ဆေးဝါးကွပ်ကဲရေးအဖွဲ့က အသိအမှတ်ပြုထားပေမယ့် ခန္ဓာကိုယ်ထဲရောက်ရှိစေဖို့ ဆေးတောင့်တွေထုတ်လုပ်ရာမှာ နည်းပညာအခက်အခဲရှိ နေပါတယ်။

တက်ခ်နီယန်သုတေသီတွေက ဒီနေရာမှာ တိုးတက်မှုရှိခဲ့ပြီး ကင်ဆာကုသဆေးပါဝင်တဲ့ နာနိုဆေးတောင့်များဖြစ်အောင် ဖန်တီးနိုင်ခဲ့ကြပါတယ်။

သုတေသီအဖွဲ့မှ တီထွင်ထားတဲ့ အလိုအလျောက်စနစ်က ဆေးဝါးမှထုတ်လွှတ်တဲ့ အလင်းစွမ်းအင်အရ ထိုဆေးအတွက် အကောင်းဆုံးနာနိုအမှုန်များကို ဘယ်လိုပြုလုပ်ရသလဲဆိုတာကို သိရှိနိုင်စေပါတယ်။

ဒီနည်းပညာက ဆေးဝါးရောက်ရှိရန်အတွက် နာနိုမက်ထရစ်ဆေးတောင့်များ ဖန်တီးရာမှာ အသုံးပြုတဲ့ရှိပြီးသားဆေးများထက် အားသာချက်များစွာပေးနိုင်ပြီး တည်ငြိမ်တဲ့ ပစ္စည်းအသစ်တစ်ခုကို ရှာဖွေတွေ့ရှိခဲ့ပါတယ်။

ပစ္စည်းအသစ်က ထိရောက်မှု၊ ဘေးကင်းမှု၊ အချိန်ကြာလာတာနဲ့အမျှ တည်ငြိမ်မှုနဲ့ ရှိပြီးသားပစ္စည်းများအတွက် ရှုထောင့်အမျိုးမျိုးကနေ ပိုမိုကောင်းမွန်ကြောင်း သုတေသီများရှာဖွေ တွေ့ရှိခဲ့ကြပါတယ်။

ဒီပုံစံတွေက နာနိုဆေးတောင့်များကို အသုံးပြုပြီး ကုသရေးအတွက် အထူးသင့်လျော်ပါတယ်။

R595 လို့အမည်ပေးထားပြီး ပစ္စည်းအသစ်ကို အဆိပ်အတောက်ဖြစ်စေတဲ့ အော်ဂဲနစ်ပျော်ရည်များကို အသုံးပြုရန် သန့်ရှင်းတဲ့ဓာတုတုံ့ပြန်မှုနဲ့ ဖန်တီးထားပါတယ်။

ဆေးရဲ့ထိရောက်မှုက ၉၀ ရာခိုင်နှုန်းအထိရှိခဲ့ပြီး စမ်းသပ်မှုတွေမှာ ဆေးတောင့်က အဆုတ်ကင်ဆာ၊ ပန်ကရိယကင်ဆာ၊ အူကင်ဆာတို့မှာ အဖြစ်များတဲ့ ဗီဇပြောင်းလဲမှုကြောင့်ဖြစ်တဲ့ အစိုင်အခဲအကျိတ်များကို ကုသရာမှာ ထိရောက်မှုရှိခဲ့ပါတယ်။

Source: The Jerusalem Post
#Yangon_Media_Group

Published 6 Oct 2022

စင်္ကာပူအစားအစာ အေဂျင်စီ (SFA) က Mie Sedaap တံဆိပ် အသင့်စားခေါက်ဆွဲနှစ်မျိုးမှာ အက်သလင်းအောက်ဆိုက် ethylene oxide ဆိုတဲ့ ပိုးသတ်ဆေးတစ်မျိုးကို တွေ့ရှိရတဲ့အတွက် အဲဒါတွေကို ပြန်လည်သိမ်းယူရန် အမိန့်ထုတ်ပြန်ခဲ့ပါတယ်။

အက်စ်အက်ဖက်အေက Mie Sedaap ကိုးရီးယားအစပ် အသင့်စားခေါက်ဆွဲပြုတ်နှင့် Mie Sedaap ကိုရီးယားအစပ် ကြက်သား အသင့်စားခေါက်ဆွဲတွေကို ပြန်လည်သိမ်းဆည်းဖို့ ရှန်းရှန်း အစားအစာနှင့် အဖျော်ယမကာ လုပ်ငန်းကို ညွှန်ကြားခဲ့တာပါ။သိမ်းဆည်းမှုတွေလုပ်ဆောင်ဆဲလို့လည်းသိရပါတယ်။

အဲဒီပြန်လည်သိမ်းယူတဲ့ အသင့်ခေါက်ဆွဲတွေကတော့ Mie Sedaap ကိုရီးယား အစပ် အသင့်ခေါက်ဆွဲပြုတ်အထုတ်တွေမှာ သက်တမ်းကုန်ရက် ၂၀၂၃ မေလ ၁၇ ရက်ရှိတဲ့ အထုတ်တွေနှင့် Mie Sedaap ကိုရီးယား အစပ် အသင့်ခေါက်ဆွဲ သက်တမ်းကုန်ရက် ၂၀၂၃ မေ ၂၁ရက်ရှိတဲ့အထုတ်တွေဖြစ်ပါတယ်။

“ အက်သလင်းအောက်ဆိုက် Ethylene oxide ဟာ ပိုးသတ်ဆေးတစ်မျိုုးဖြစ်ပြီး အစားအစာထဲမှာ အသုံးပြုရန် ခွင့်မပြုထားပါဘူး” လို့ အက်စ်အက်ဖ်အေက သတင်းထုတ်ပြန်ပါတယ်။အဲဒီခေါက်ဆွဲထုတ်တွေက အင်ဒိုနီးရှားက တင်သွင်းတာတွေပါ။

“အက်သလင်းအောက်ဆိုက်ကို ဟင်းခတ်အမွှေးအကြိုင်တွေမှာပိုးသတ်ဖို့ခွင့်ပြုထားတာပါ။အဲဒီအတွက်သတ်မှတ်ချက်က ဟင်းခတ်အမွှေးအကြိုင်တစ်ကီလိုဂရမ်မှာ အက်သလင်းအောက်ဆိုက် ၅၀မီလီဂရမ်အထိပဲခွင့်ပြုတာပါ” လို့ အဖွဲ့က ဆက်ပြောပါတယ်။

တင်သွင်းသူတွေနှင့်အင်ဒိုနီးရှားအာဏာပိုင်တွေကို ဒီလိုဖြစ်ရတာနှင့်ပတ်သက်ပြီး စုံစမ်းစစ်ဆေးမှုတွေပြုလုပ်နိုင်ရေး အဖွဲ့က ပူးပေါင်းဆောင်ရွက်နေပါတယ်။

Source: CNA

#Mie_Sedaap_Korean_Spicy_Soup

#Mie_Sedaap_Korean_Spicy_Chicken

#Recall_Indo_made_Instant_noddles

Published 6 Oct 2022

ဥရောပမှ လျှပ်စစ်ဓာတ်အားတင်သွင်းလို့မရခဲ့လျှင်၊လောင်စာဓာတ်ငွေ့လျှပ်စစ်ဓာတ်အားပေးစက်ရုံများအတွက် လုံလောက်တဲ့ သဘာဝဓာတ်ငွေ့တွေမရခဲ့လျှင် ယခုနှစ်ဆောင်းရာသီတွင် ဗြိတိန်နိုင်ငံတွင် တစ်ရက်လျင် သုံနာရီကြာ လျှပ်စစ်မီးဖြတ်တောက်မှုနှင့် ကြုံရနိုင်ကြောင်း ဗြိတိန်နိုင်ငံရဲ့ အမျိုးသား လျှပ်စစ်ဓာတ်အားကွန်ယက်လိုင်း National Grid ကုမ္ပဏီက သတိပေးလိုက်တဲ့အကြောင်း ရိုက်တာကသတင်းရေးသားပါတယ်။

ဗြိတိန်ဝန်ကြီးချုပ် လစ်ထရပ်ဇ်က ဥရောပအနေဖြင့် စွမ်းအင်တင်ပို့စီးဆင်းမှုကို ဆောင်းရာသီအတွင်း ဆက်လက်ထိန်းသိမ်းထားရန် တောင်းဆိုခဲ့အပြီး လျှပ်စစ်ဓာတ်အားဖြတ်တောက်မယ့်အလားအလာတွေရှိလာတာဖြစ်ပါတယ်။

ဥရောပတစ်လွှားက နိုင်ငံတွေက ယူကရိန်းနှင့်စစ်ပွဲကြောင့် ရုရှားထံမှ ဓာတ်ငွေ့တွေ ပြတ်တောက်မှုဖြစ်လာတဲ့အခါ ဆောင်းရာသီအရေးပေါ်အစီအစဉ်တွေ ရေးဆွဲနေပါတယ်။  အဲသလိုဆိုရင် ခွဲတမ်းတွေဖြစ်လာနိုင်ပြီး အခြားနိုင်ငံတွေကို လောင်စာဆီတင်ပို့တာတွေလည်း ဖြတ်တောက်ရဖွယ်ရှိနေပါတယ်။

ဥရောပကဓာတ်ငွေ့တွေ မလုံလောက်တာနှင့် ပြင်သစ်ရဲ့နျူကလီးယားဓာတ်အားပေးစက်ရုံတော်တော်များများ ပြုပြင်မွမ်းမံနေရတဲ့အတွက် အဲဒါတွေဟာ ဗြိတိန်အတွက် လုံလောက်တဲ့ ဓာတ်ငွေ့ရရှိဖို့ ခက်ခဲလာနေပါတယ်။ အဲဒါကြောင့် လျှပ်စစ်ဓာတ်အားကို ပုံမှန်အားဖြင့်ရရှိတဲ့ ပြင်သစ်၊ဘယ်ဂျီယံနှင့် နယ်သာလန်တို့ကနေ့ တင်သွင်းဖို့လိုအပ်နေပါတယ်။

“အလားအလာမရှိတဲ့ အရေးကြီးဖြစ်ရပ်နှင့် အနေအထားမှာကြုံနေရတယ်။ ဆိုလိုတာက အချို့သော ကျွန်တော်တို့ရဲ့ ဖောက်သည်တွေဟာ ရက်တစ်ရက်ရဲ့ ကြိုတင်ကြေညာထားတဲ့အချိန်တွေမှာ လျှပ်စစ်မီးပြတ်တောက်တာဖြစ်နိုင်တယ်။  ယေဘုယျအားဖြင့်တော့ သုံးနာရီကြာအလှည့်ကျပြတ်တောက်တာမျိုးပေါ့” လို့ အမျိုးသား လျှပ်စစ်ဂရစ်စနစ်အော်ပရေတာ(ESO)က ယင်းရဲ့ဆောင်းရာသီအခြေအနေခန့်မှန်းချက်မှာ ဖော်ပြထားတာဖြစ်ပါတယ်။

ဒါပေမယ့် ဗြိတိန်အစိုးရကတော့ ဆောင်းရာသီမှာ လုံလောက်တဲ့ လျှပ်စစ်ဓာတ်အားရရှိဖို့ သူယုံကြည်နေတယ်လို့ ပြောပါတယ်။

“ ယူကေဟာ လုံခြုံစိတ်ချရပြီးကွဲပြားတဲ့ စွမ်းအင်စနစ်တစ်ခုရှိပါတယ်။ ဒီနှစ်ဆောင်းရာသီမှာ အိမ်ထောင်စုတွေနင့်စီးပွားရေးလုပ်ငန်းတွေကို လျှပ်စစ်မီးအပြည့်ရရှိစေဖို့ ကျွန်တော်တို့ ယုံကြည်မှုရှိပါတယ်” လို့ အစိုးရရဲ့ ပြောရေးဆိုခွင့်ရသူကပြောပါတယ်။

ပိုပြီးစိတ်ချရအောင် အစီအစဉ်တွေလည်းချပြီးပါပြီ။ ဗြိတိန်ရဲ့ မြောက်ပင်လယ် ဓာတ်ငွေ့အရန်တွေ၊ ပြီးတော့ နော်ဝေနှင့် သန့်ရှင်းတဲ့စွမ်းအင်အရင်းအမြစ်တွေလိုမျိုးပေါ့ လို့ သူက ထပ်မံဖြည့်စွက်ပြောပါတယ်။

Source Reuters

#Britain

#Electricity_Shortage

#Russia_gas

Published 6 Oct 2022

တောင်ကိုရီးယားနိုင်ငံ ဆိပ်ကမ်းမြို့ ဘူဆန်မှာ ဘူဆန်နိုင်ငံတကာ ရုပ်ရှင်ပွဲတော်ကို ဗုဒ္ဓဟူးနေ့က စတင်ဖွင့်လှစ်ခဲ့ပါတယ်။

ဘူဆန်ရုပ်ရှင်ပွဲတော်ဟာ အာရှရဲ့ အကြီးဆုံးရုပ်ရှင်ပွဲတော်ဖြစ်ပြီး  ကိုဗစ်ကပ်ဘေးအလွန် ဒီနှစ်မှာ ပုံစံအပြည့် ပြန်လည်ကျင်းပပေးခြင်းဖြစ်ပါတယ်။

ဖွင့်ပွဲမှာ အီရန်ရဲ့ရုပ်ရှင်ဇာတ်ကာတစ်ကားကို စတင်ပြသဖွင့်လှစ်ပေးခဲ့ပါတယ်။

အဆိုပါဘူဆန်နိုင်ငံတကာရုပ်ရှင်ပွဲတော်ဖွင့်ပွဲသို့ ရုပ်ရှင်သရုပ်ဆောင်တွေ၊ဒါရိုက်တာတွေနှင့် ပရိဿတ်တွေ တက်ရောက်ဆင်နွှဲခဲ့ကြပါတယ်။

တက်ရောက်သူတွေထဲမှာ ဟောင်ကောင်အကျော်ဇေယျ သရုပ်ဆောင် Tony Leung အပါအဝင်  ထိပ်တန်း တောင်ကိုးရီယား ရုပ်ရှင်သရုပ်ဆောင်များနှင့် အာရှကြယ်ပွင့်တွေပါတက်ရောက်ခဲ့ကြပါတယ်။

ဒီပွဲတော်ကို ကော်ဇော်နီအခမ်းအနားဖြင့်ဖွင့်လှစ်ခဲ့ပြီး အောက်တိုဘာ ၁၄ရက်အထိ ကျင်းပမှာဖြစ်ပါတယ်။

Source AFP

#Busan_International_Film_Festival

#South_Korea

#Asia’s_Biggest_Film_Festival