#World_Health
Published 15 October 2024

▪️ ရေချိုးခန်းထဲက နမူနာ ရေပန်းခေါင်း ၉၂ ခုနဲ့ သွားတိုက်တံ ၃၄ ခုတို့ကနေ အမျိုးမျိုးသော ဗိုင်းရပ်စ် ၆၀၀ ကျော်ကို အနောက်မြောက်ပိုင်းတက္ကသိုလ်မှ သုတေသီများ တွေ့ရှိခဲ့ကြပါတယ်။

▪️ တွေ့ရှိတဲ့ ဗိုင်းရပ်စ်အရေအတွက်က အတော်လေးများလွန်းပြီး သိပ်မသိတဲ့ ဗိုင်းရပ်စ်တွေရော မမြင်ဖူးတဲ့ ဗိုင်းရပ်စ်တွေလည်း ပါဝင်တယ်လို့ အဏုဇီဝပညာရှင် အဲရစ်ကာဟာ့တ်မန်းက ပြောပါတယ်။

▪️ ရေပန်းခေါင်းတွေနဲ့ သွားတိုက်တံတွေမှာ တွေ့ရတဲ့ ပိုးမွှားတွေက ဘက်တီးရီးယားတွေကို စားပစ်တဲ့ ဗိုင်းရပ်စ်တွေသာ ဖြစ်ပါတယ်။

▪️ အများဆုံးကတော့ တီဘီ၊ အနာကြီးရောဂါ၊ အဆုတ်ရောဂါအချို့ စတဲ့ရောဂါတွေဖြစ်စေတဲ့ မိုင်ကိုဘက်တီးရီးယားတွေကို စားပစ်တဲ့ဗိုင်းရပ်စ်တွေ ဖြစ်ပါတယ်။

▪️ ဒီလိုရောဂါပိုးတွေကို ရှင်းပစ်တဲ့ဗိုင်းရပ်စ်တွေရဲ့ လုပ်ဆောင်ချက်တွေကို လေ့လာပြီး ဘယ်လိုအသုံးချရမလဲဆိုတာ ရှာဖွေရမယ်လို့ ဟာ့တ်မန်းက ရှင်းပြပါတယ်။

▪️ သွားတိုက်တံတွေမှာ တွေ့ရတဲ့ အဏုဇီဝပိုးမွှားအများစုဆိုရင် ပါးစပ်ထဲကနေလာတာ ဖြစ်ပြီး လေမှုန်များစွာ ပါဝင်ပါတယ်။

▪️ ပိုးမွှားတွေဟာ မျက်နှာပြင်တွေ နံရံတွေမှာ အသက်ရှင်ဖို့ ခက်ခဲပြီး ရေရှိတဲ့နေရာမှာ ရှင်သန်ကြတာကြောင့် ရေပန်းခေါင်းတွေနဲ့ သွားတိုက်တံတွေမှာ ရှိနေတာ ဖြစ်တယ်လို့ ဆိုပါတယ်။

▪️ ရေပန်းခေါင်းတွေကို ရေ၊ ဆပ်ပြာတို့ဖြင့် ဆေးကြောခြင်း၊ ရှာလကာရည် စိမ်ခြင်းတို့ ပြုလုပ်နိုင်ကြောင်း၊ လျှပ်စစ်သွားတိုက်တံခေါင်းတွေကိုလည်း ပုံမှန်အစားထိုးသင့်ကြောင်း အကြံပြုပါတယ်။

▪️ ပိုးမွှားတွေဟာ နေရာတကာမှာ ရှိပေမယ့် အများစုက လူတွေကို ရောဂါမဖြစ်စေကြောင်း၊ ပိုးသတ်ဆေးတွေ သုံးမယ်ဆိုရင် ဆေးယဉ်ပါးဖြစ်လာနိုင်ကြောင်း၊ ဒီတိုင်းထားတာ ပိုသင့်လျော်ကြောင်း ပြောပါတယ်။

#Source: New York Post

ဘရာဇီးလ် ဆော်ပေါ်လိုရှိ သဘာဝဘေးမဲ့တောတွေဟာ တောမီးများကြောင့် အပြင်းအထန် ထိခိုက်ပျက်စီးနေပြီး တိရိစ္ဆာန်အများအပြားဟာလည်း မီးလောင်မှုဒဏ်ကို ခံစားနေရကာ အရေးတကြီး စောင့်ရှောက်မှု လိုအပ်နေပါတယ်။
#World_Nature
Published 14 October 2024
#တောမီးလောင်ကျွမ်း #သဘာဝဘေးမဲ့တော
#YMG #Yangon_Times #Yangon_Media_Group

#Daily_News
Published 14 October 2024

၁။ သီတင်းကျွတ်ပိတ်ရက် ဝင်္ဂဘော်ဆင်စခန်းဖွင့်လှစ်ထားမည်ဖြစ်၍ လည်ပတ်နိုင်

၂။ ‌စားအုန်းဆီဈေး သုံးပတ်ဆက်တိုက်ရာဂဏာန်းပြန်ကျ၊ဖုန်းဆက်ပြီးအိမ်တိုင်ရာရောက်မှာယူနိုင်

၃။ ရွှေမော်ဓောစေတီတော်မြတ်ကြီး၌  သီတင်းကျွတ်ပွဲတော်နှင့် ဆီမီးတစ်သောင်းပူဇော်ကျင်းပသွားမည်

၄။ တောမီးလောင်ကျွမ်းမှုများကြောင့် ဆော်ပေါ်လိုသဘာဝဘေးမဲ့တောများမှ တိရိစ္ဆာန်များဒဏ်ရာရ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_News
Published 14 October 2024

▪️ အစ္စရေးလ်တင့်ကားများက လက်ဘနွန်တောင်ပိုင်း ကုလသမဂ္ဂ ငြိမ်းချမ်းရေးအစောင့်တပ်များရှိတဲ့ အခြေစိုက်စခန်းတစ်ခုရဲ့ ဂိတ်တွေကို ဖြတ်သန်းဖောက်ထွက်သွားခဲ့ကြောင်း ကုလကတနင်္ဂနွေနေ့မှာ ပြောကြားလိုက်သလို အစ္စရေးလ်ရဲ့ ကြမ်းရမ်းလုပ်ရပ်တွေ တိုက်ခိုက်မှုတွေကို ယင်းမဟာမိတ်များကပင် စွပ်စွဲလာကြပါတယ်။

▪️ အစ္စရေးလ်တို့ရဲ့ မာကေဗာတင့်ကားနှစ်စီးဟာ တနင်္ဂနွေနံနက်ပိုင်းက စခန်းရဲ့ အဓိကဂိတ်ကို ဖျက်ဆီးဝင်ရောက်သွားတယ်လို့ UNIFIL ငြိမ်းချမ်းရေးအစောင့်တပ်က ပြောပါတယ်။

▪️ တင့်ကားတွေ ထွက်သွားပြီး မီတာ ၁၀၀ အကွာလောက်မှာ ပေါက်ကွဲမှုတွေ ဖြစ်ပွားပြီး စခန်းတလျှောက် မီးခိုးများ ပျံ့လွင့်လာတယ်လို့ ဖော်ပြထားပါတယ်။

▪️ ထိုအဖြစ်အပျက်နဲ့ ပတ်သက်ပြီး အီရန်နောက်ခံပြု ဟက်ဇ်ဘိုလာ စစ်သွေးကြွတွေက အစ္စရေးလ်တပ်တွေကို တင့်ကားဖျက်ဒုံးကျည်များဖြင့် ပစ်ခတ်ခဲ့ရာ ၂၅ ဦးဒဏ်ရာရရှိခဲ့တယ်လို့ အစ္စရေးလ်စစ်တပ်က ပြောပါတယ်။

▪️ တိုက်ခိုက်မှုက UNIFIL စခန်းတစ်ခုနဲ့ အလွန်နီးကပ်ခဲ့ပြီး ဒဏ်ရာရသူတွေကို ခေါ်ဆောင်မယ့် တင့်ကားက တိုက်ခိုက်ခံရကာ UNIFIL စခန်းထဲသို့ နောက်ဆုတ်ခဲ့ရပါတယ်။

▪️ "ဒါဟာ စခန်းကို ဝင်ရောက်တိုက်ခိုက်တာ မဟုတ်ပါဘူး။ တင့်ကားတစ်စီး တိုက်ခိုက်ခံနေရပြီး တပ်သားအများအပြား ထိခိုက်ထားတာကို ကူညီဖို့ကြိုးစားတာပါ" လို့ အစ္စရေးလ်စစ်တပ်မှ ပြောရေးဆိုခွင့်ရှိသူ နာဒက်ဗ်ရှိုရှာနီက သတင်းထောက်များကို ပြောသွားပါတယ်။

▪️ ဒဏ်ရာရစစ်သည်များကို ခေါ်ထုတ်ဖို့ မီးခိုးဗုံးများအသုံးပြုခဲ့တာဖြစ်ကာ ကုလငြိမ်းချမ်းရေးအစောင့်တပ်ကို အန္တရာယ်ပြုတာ မဟုတ်ဘူးလို့ ဖော်ပြထားပါတယ်။

▪️ အစ္စရေးလ်ဝန်ကြီးချုပ် ဘင်ဂျမင်နေတန်ညာဟူက UNIFIL အနေနဲ့ ဟက်ဇ်ဘိုလာ အခြေပြုနေရာတွေနဲ့ စစ်ဖြစ်ရာနေရာတွေကနေ ဆုတ်ခွာသင့်ပြီလို့ ကုလအတွင်းရေးမှူးချုပ် အန်တိုနီယိုဂူတာရက်စ်ကို ပြောသွားပါတယ်။

▪️ အကြိမ်ကြိမ်တောင်းဆိုထားသလို အကြိမ်ကြိမ် ငြင်းပယ်ခံခဲ့ရပြီး ဒါဟာ ဟက်ဇ်ဘိုလာ အကြမ်းဖက်များအတွက် လူသားဒိုင်းထောက်ပံ့ပေးသလို ဖြစ်နိုင်တယ်လို့ ဆိုပါတယ်။

▪️ ငြိမ်းချမ်းရေးအစောင့်တပ်သားများကို ပစ်မှတ်ထားတိုက်ခိုက်လို့ မရဘူးလို့လည်း အတွင်းရေးမှူးချုပ်က သတိပေးထားပါတယ်။

#Source: Reuters

#World_Science
Published 14 October 2024

▪️ လင်းပိုင်အများစုက ရေထဲကနေ ပေါ်ထွက်လာတဲ့အခါ မျက်နှာပြုံးနေတဲ့ပုံစံ အမြဲရှိတတ်ပြီး လူတွေလိုမျိုး ပြုံးတာလားဆိုတာ သိချင်နေကြပါတယ်။

▪️ တကယ်တမ်းလည်း သူတို့ဟာ ထိုအချိန်မှာ ပြုံးနေတာဖြစ်ပြီး သူတို့အချင်းချင်းလည်း ပြုံးပြတတ်ကြပါတယ်။

▪️ လင်းပိုင်တွေ အချင်းချင်းကစားတဲ့အခါမှာလည်း မျက်နှာအမူအရာ လုပ်ပြတယ်လို့ သုတေသီများ ဆိုပါတယ်။

▪️ ပေါင်းသင်းဆက်ဆံရေးအနေနဲ့ ပါးစပ်ဟတာမျိုးလည်း ပါဝင်ကြောင်း အီတလီ ပီဆာတက္ကသိုလ်မှ ဇီဝပညာရှင် အယ်လီဆာဘက်တာပယ်လာဂီဦးဆောင်တဲ့ သုတေသီအဖွဲ့က ပြောပါတယ်။

▪️ သူတို့ဟာ တစ်ကောင်က မျက်နှာပုံစံ လုပ်ပြသလိုမျိုး လိုက်လုပ်ကြတယ်လို့လည်း မှတ်ချက်ပြုလိုက်ပါတယ်။

▪️ ဒီအတွက် သုတေသီအဖွဲ့က ရေအောက်ထဲမှာ လင်းပိုင် ၂၂ ကောင်ကို ထိန်းသိမ်းထားကာ နာရီ ၈၀ ကြာအောင် စောင့်ကြည့်ခဲ့ကြပါတယ်။

▪️ လင်းပိုင်တွေက တစ်ကောင်နဲ့တစ်ကောင် မြင်တဲ့အခါ ပါးစပ်ဟတဲ့ အမူအရာ လုပ်ပြကြပါတယ်။

▪️ ပြုံးပြတာဟာ ရန်လိုတဲ့သဘောမဟုတ်ဘဲ ဆော့ကစားတဲ့ အပြုအမူသာ ဖြစ်ပါတယ်။

▪️ ပြန်ပြီးပြုံးပြတာကတော့ ၃၃ ရာခိုင်နှုန်းလောက် ရှိပါတယ်။

▪️ အသားစားသတ္တဝါတွေမှာ အေးအေးဆေးဆေး ပါးစပ်ဟပြခြင်း၊ မျောက်တွေမှာ ဆော့ကစားတဲ့မျက်နှာပြခြင်း၊ လူသားတွေရဲ့ ရယ်မောခြင်းတို့က ခင်မင်ရင်းနှီးမှုကို ဖော်ဆောင်နေတယ်လို့ ပြောပါတယ်။

▪️ ပါးစပ်ဟပြခြင်းက လင်းပိုင်တွေ ဆော့ကစားတဲ့အချိန်မှာ လုပ်ပြတတ်တဲ့ အမူအရာဖြစ်ပြီး တစ်ကောင်တည်း ရှိနေချိန်မှာနဲ့ ကွဲပြားပါတယ်။

▪️ သူတို့အချင်းချင်း ရင်းနှီးဆက်သွယ်တဲ့ သင်္ကေတလည်း ဖြစ်ပါတယ်။

▪️ ပါးစပ်ဟခြင်းနဲ့ ပုံတူလိုက်လုပ်ခြင်းတို့က နို့တိုက်သတ္တဝါတွေကြားမှာ ဖြစ်လေ့ရှိပြီး ဆက်ဆံရေးပုံစံအမျိုးမျိုး ဖော်ဆောင်ရာမှာ ပတ်သက်နေတယ်လို့ ပယ်လာဂီက ပြောသွားပါတယ်။

#Source: WION

#World_Health
Published 14 October 2024

▪️ အိပ်ရာပေါ်မှာ မျက်လုံးမှိတ်အိပ်ဖို့ ကြိုးစားတဲ့အခါ ချက်ချင်း အိပ်ပျော်သွားတတ်သလား၊ ဒါမှမဟုတ် အိပ်ပျော်ဖို့ ကြာရှည်နေတတ်ပါသလား။

▪️ အလွန်လျင်မြန်စွာ အိပ်ပျော်တတ်ခြင်းနဲ့ အတော်လေးကြာမှ အိပ်ပျော်ခြင်းတို့ဟာ စိုးရိမ်ရတယ်လို့ အိပ်စက်မှုပညာရှင်များ ဆိုပါတယ်။

▪️ ကျန်းမာသူတစ်ယောက်အတွက် အိပ်ပျော်ဖို့ကြာချိန်က ၁၅ မိနစ်မှ မိနစ် ၂၀ ကြားဖြစ်တယ်လို့ စိတ်ရောဂါနဲ့ အိပ်စက်မှုကျန်းမာရေး ပညာရှင် ခရစ္စတန်ကေဆီက ပြောပါတယ်။

▪️ ပုံမှန်အိပ်စက်မှု ရရှိရန်အတွက် ပုံမှန်အိပ်စက်ချိန် ထားရှိဖို့ အရေးကြီးပါတယ်။
ခေါင်းချလိုက်တာနဲ့ တန်းအိပ်ပျော်သွားတာက နေထိုင်စားသောက်မှုပုံစံ ပြုပြင်ဖို့ လိုအပ်တာကို ညွှန်ပြနေပါတယ်။

▪️ အလွန်ပင်ပန်း နွမ်းနယ်တဲ့အခါ ချက်ချင်းအိပ်ပျော်တတ်ပြီး ဒါဟာ လုံလောက်စွာ အနားယူဖို့ အချိန်မရှိပါဘူး။

▪️ ပင်ပန်းပြီး အိပ်ပျော်တဲ့အခါ ကြာရှည်စွာ အိပ်ပျော်သွားတတ်ပေမယ့် တကယ်တမ်း ကျန်းမာရေးနဲ့ ညီညွတ်စွာ အိပ်စက်ရဖို့က ပိုအရေးကြီးပါတယ်။

▪️ အလွန်လှုပ်ရှားထားရလို့ ခန္ဓာကိုယ်က အိပ်စက်ချိန် အများကြီး လိုအပ်တာဖြစ်ပါတယ်။

▪️ ကြာရှည်စွာ အိပ်ရေးပျက်တဲ့အခါမှာတော့ စိတ်ဓာတ်ကျခြင်း၊ ပူပန်ခြင်းတို့ ဖြစ်စေနိုင်ပြီး စိတ်ကျန်းမာရေးကို ထိခိုက်စေနိုင်ပါတယ်။

▪️ အိပ်ပျော်နေစဉ် အသက်ရှူရပ်ခြင်း ပြဿနာက အတော်လေးအဖြစ်များပြီး အိပ်နေစဉ်မှာ အပေါ်ပိုင်း အသက်ရှူလမ်းကြောင်း ပိတ်ဆို့ကာ အသက်ရှူရပ်သွားတတ်ပါတယ်။

▪️ ဒါမျိုးပြဿနာဖြစ်ရင် ဆရာဝန်များနဲ့ တိုင်ပင်ဆွေးနွေးဖို့ အရေးကြီးပါတယ်။
အိပ်ပျော်ဖို့ အလွန်ကြာမြင့်ခြင်းကတော့ အိပ်မပျော်တတ်တဲ့ ပြဿနာထဲပါဝင်ပြီး စိတ်ကျန်းမာရေး အခြေအနေ တစ်ခုခုကြောင့် ဖြစ်နိုင်ပါတယ်။

▪️ အိပ်ချိန်အတည်တကျ မရှိခြင်း၊ ညဘက်အလုပ်လုပ်ရခြင်း၊ စိတ်ဖိစီးမှု၊ ပူပန်ခြင်းတို့ကြောင့် ဖြစ်လာနိုင်ပါတယ်။

▪️ အိပ်ရာမဝင်ခင် မိနစ် ၃၀ မှ ၆၀ လောက်အထိ ဖုန်း၊ ကွန်ပျူတာတို့မှ ထွက်တဲ့ အလင်းပြာကို ရှောင်ရှားဖို့လိုပါတယ်။

▪️ အိပ်မပျော်တဲ့အခါ စိတ်ဓာတ်ကျခြင်း ဖြစ်လာနိုင်ပြီး ထိုအခြေအနေကပဲ အိပ်မပျော်ခြင်းကို ပိုဆိုးစေနိုင်ပါတယ်။

▪️ စာဖတ်ခြင်း၊ ယောဂကျင့်ခြင်း၊ သီချင်းနားထောင်ခြင်းတို့ဖြင့် စိတ်ပြေလျော့အောင် ပြုလုပ်နိုင်ပါတယ်။

#Source: New York Post