Published 15 June 2022
တောင်ကိုးရီးယားရဲ့ ကမ္ဘာကျော် K-pop အဖွဲ့ဖြစ်တဲ့ BTS က တစ်ဦးချင်းစီရဲ့ ပရောဂျက်တွေကို အာရုံစိုက်လုပ်ကိုင်တော့မှာမို့ အဖွဲ့လိုက်ဖျော်ဖြေပွဲတွေကို ရပ်နားထားမယ်လို့ အဖွဲ့အဆိုတော်တွေက အင်္ဂါနေ့က ပြောပါတယ်။
အဖွဲ့တည်ထောင်ခြင်းအထိမ်းအမှတ် FESTA နှစ်ပတ်လည် ညစာစားပွဲမှာ အဖွဲ့သားတစ်ဦးဖြစ်တဲ့ RM က သူ့အနေနှင့် BTS အတွက် ပုံမှန်အသံသွင်းရတာ ဖျော်ဖြေတင်ဆက်တာတွေမပါဘဲနှင့် တစ်ဦးတည်းသီဆိုမှုတွေလုပ်ဆောင်ဖို့ လိုအပ်လာပြီလို့ ခံစားလာရတယ်လို့ ပြောခဲ့ပါတယ်။
“ ကေပေါ့နှင့် idol စနစ်ကြီးတစ်ခုလုံးရဲ့ ပြဿနာက ခင်ဗျားတို့ကို ရင့်ကျက်လာအောင် အချိန်မပေးနိုင်ဘူး။ သီချင်းတွေ ဆက်ထုတ်လုပ်၊တစ်ခုခုအမြဲတမ်းလုပ်ခိုင်းနေတော့တာပဲ” လို့ RM ကပြောပါတယ်။ သူက အခြားအဖွဲ့သားခြောက်ဦးနှင့်အတူ စားပွဲတစ်ခုထဲထိုင်နေပြီး ကိုရီးယားလိုပြောတာဖြစ်ပါတယ်။
အဲဒီလိုရပ်နားတာကို အဖွဲ့သားတစ်ဦးက ကြားပြတ်သွားတဲ့သဘော ပြောတယ်လို့ အင်္ဂလိပ်ဘာသာသို့ပြန်ဆိုမှုအရ နားလည် ရပါတယ်။ ဒီစကားလုံးနှင့်ပတ်သက်ပြီး အငြင်းပွားခဲ့ကြတာကို သတင်းထုတ်ပြန်ချက်အရသိရပါတယ်။
“ ရှင်းလင်းအောင်ပြောရရင် ဒါဟာ ကြားအဆက်ပြတ်တဲ့သဘောမဟုတ်ပါဘူး။ ဒါပေမယ့် တစ်ကိုယ်တော်အစီအစဉ်အချို့ လုပ်စရာရှိလို့ အချိန်ယူကြမယ် ပြီးတော့ မတူတဲ့ ပုံစံအမျိုးမျိုးနှင့် ဆက်လှုပ်ရှားနေကြဦးမှာပါ” လို့ သတင်းထုတ်ပြန်ချက်က ဆိုပါတယ်။
BTS ဟာ ၂၀၁၃ခုနှစ်မှာ ပွဲဦးထွက်ဖျော်ဖြေခဲ့ပြီးနာက် တစ်ကမ္ဘာလုံးရဲ့ နှစ်ချိုက်အားပေးမှုကိုရရှိခဲ့ကြပါတယ်။ သောကြာနေ့က သူတို့ဟာ "Proof” ဆိုတဲ့ အယ်ဘမ်အသစ်ထွက်ခဲ့ပါသေးတယ်။
မနှစ်က သူတို့ဟာ အမေရိကန်တေးဂီတဆုပေးပွဲမှာ အာရှဂီတအဖွဲ့အနေနှင့် ပထမဆုံးဆုရခဲ့ပါတယ်။ ပြီးတော့ မေလကလည်း သူတို့ဟာ အမေရိကန်သမ္မတ ဂျိုးဘိုင်ဒင်နှင့် တွေ့ခဲ့ပြီး အာရှသားတွေကို ပစ်မှတ်ထားနေတဲ့ အမုန်းတရားမှုခင်းတွေကိစ္စဆွေးနွေးခဲ့ကြပါတယ်။
Source Reuters
#DailyNews
Published - 15 June 2022
၁။ ခရီးသွားပါးနေ၍ ပုဂံဒေသရှိ ခရီးသွားကိုမှီခိုနေရသည့်လုပ်ငန်းအချို့ရပ်သလောက်ဖြစ်၊ လာမည့်ခရီးသွားရာသီတွင် လည်ပတ်နိုင်ရန်မျှော်မှန်း
၂။ တန့်ကြည်တောင်ဖြစ်စဉ်ကြောင့် ပြည်တွင်းခရီးသွားလာမှုကျဆင်းသွားနိုင်သည်ဟု UMTA ဥက္ကဌပြော
၃။ နေ့စဉ်မိုးလေဝသသတင်း။
၄။ မက္ကဆီကိုတွင် ကြောင်ကြီးမျိုးနွယ်များအား ထိန်းသိမ်းမွေးစားမှုများရှိလာ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။
#Yangon_Media_Group
#Ukraine_Crisis
Published 15 June 2022
ယူကရိန်းအရှေ့ပိုင်းကို ထိန်းချုပ်နိုင်ဖို့ ရုရှားတို့က အရှိန်အဟုန်ဖြင့် တိုက်ခိုက်နေရာခဲ့ရာ တိုက်ပွဲဖြစ်ပွားနေတဲ့ ဆီဗီရိုဒိုနက်မြို့မှ ဓာတုစက်ရုံတစ်ခုမှာ ပုန်းခိုနေတဲ့ယူကရိန်းတပ်သားတွေကိုလက်နက်ချရန် ဗုဒ္ဓဟူးနေ့အစောပိုင်းက အသိပေးလိုက်ပါတယ်။
အရှေ့ဘက်ဒွန်ဘတ်စ်ဒေသမှာ ရုရှားတို့က အင်တိုက်အားတိုက် ပစ်ခတ်တိုက်ခိုက်ခဲ့ပြီးနောက် ယူကရိန်းက အနောက်နိုင်ငံများထံမှ လက်နက်ကြီးများထောက်ပံ့ပေးဖို့ တောင်းဆိုထားပြီး ဒီကိစ္စက ဗုဒ္ဓဟူးနေ့ ဘရူဆဲလ်မှာပြုလုပ်မယ့် နေတိုး(NATO)ကာကွယ်ရေးဝန်ကြီးများအစည်းအဝေးပွဲမှာ အရေးကြီးခေါင်းစဉ်တစ်ခု ဖြစ်လာနိုင်ပါတယ်။
ရုရှားဗုံးကျဲတိုက်ခိုက်မှုတွေကြား ယူကရိန်းတပ်ဖွဲ့တွေ ခုခံနေခဲ့တဲ့ ဓာတုစက်ရုံ Azot ထဲမှာ အရပ်သား ၅၀၀ ကျော်ပိတ်မိနေပြီး တိုက်ခိုက်မှုများကြောင့် ဆီဗီရိုဒိုနက်စ်မြို့နေရာအတော်များများလည်း ပျက်စီးကြေမွကုန်ကြောင်း ယူကရိန်းဘက်က ပြောကြားလိုက်ပါတယ်။
ယူကရိန်းတပ်ဖွဲ့တွေအနေနဲ့ အဓိပ္ပာယ်မဲ့ ခုခံနေခြင်းကိုရပ်တန့်ပြီး မော်စကိုစံတော်ချိန်နံနက် ၈ နာရီမှာ လက်နက်ချသင့်တယ်လို့ ရုရှားနိုင်ငံတော်ကာကွယ်ရေးစီမံခန့်ခွဲမှုဗဟိုဌာနမှအကြီးအကဲ'မီခေးလ်မီဇင့်ဆက်ဗ်'က အင်တာဖက်စ်နယူးစ်အေဂျင်စီကို ပြောပြခဲ့ပါတယ်။
လူသားချင်း စာနာထောက်ထားမှုအရ အရပ်သားတွေကိုထွက်ခွာခွင့်ပေးမယ်လို့ အသိပေးခဲ့ပါတယ်။
မာရီယူပိုလ်မြို့ကသံမဏိမှာလည်း ယူကရိန်းတိုက်ခိုက်ရေးသမားတွေနဲ့ အရပ်သားတွေပုန်းခိုနေခဲ့ရပြီး မေလလယ်လောက်က အညံ့ခံခဲ့ကာ ရုရှားတိုကထိန်းသိမ်းခေါ်ဆောင်သွားခဲ့ပါတယ်။
ဗုံးကျဲတိုက်ခိုက်မှုတွေက ပြင်းထန်လွန်းလို့ ပုန်းနေတဲ့သူတွေတောင်မခံနိုင်တော့ဘူးလို့ လူဟန့်စ်ဒေသဆိုင်ရာ အုပ်ချုပ်ရေးမှူး'ဆာဟေဂေဒိုင်'က ပြောပြပါတယ်။
စစ်ပွဲပဋိပက္ခဖြစ်ရာကနေ ချေမှုန်းရေးအသွင်ဖြင့်လာပြီး စစ်ပွဲမတိုင်ခင်က လူဦးရေ ၁ သိန်းကျော်သာရှိတဲ့ ဆီဗီရိုဒိုနက်စ်မြို့ဟာ တိုက်ပွဲအပြင်းထန်ဆုံး နေရာဖြစ်လာပါတယ်။
မြို့ကိုဆက်သွယ်ထားတဲ့ နောက်ဆုံးတံတားကို ရုရှားတပ်များ ဖျက်ဆီးပစ်ပြီးနောက် ယူကရိန်းဘက်က အရပ်သားတွေကို ကယ်ထုတ်ဖို့ ကြိုးစားနေဆဲဖြစ်ပါတယ်။
ပြီးခဲ့တဲ့ရက်သတ္တပတ်များအတွင်း အပြန်အလှန်အသာရနေခဲ့ကြပြီး ယူကရိန်းအရာရှိတွေဘက်က နောက်ဆုတ်မယ့်အရိပ်အယောင်အနည်းငယ်ပြသခဲ့ပါတယ်။
"ကျွန်တော်တိုကြံ့ကြံ့ခံထားရပါမယ်၊ ရန်သူဘက်က အကျအဆုံးများရင် သူတို့ရှေ့ဆက်ဖို့အင်အားရှိတော့မှာမဟုတ်ပါဘူး" လို့ ယူကရိန်းသမ္မတ'ဇယ်လန်စကီ'က မိန့်ခွန်းပြောကြားခဲ့ပါတယ်။
Source: Reuters
#Yangon_Media_Group
#WorldNews
Published 15 June 2022
အမေရိကန်ပြည်ထောင်စု မင်နီဆိုတာရှိစက်သုံးဆီအရောင်းဆိုင်တစ်ဆိုင်ဟာ တစ်နိုင်ငံလုံးဓာတ်ဆီဈေးနှုန်းမြင့်တက်လာတာကို စာနာနားလည်တဲ့အနေနဲ့ "ငါတို့လည်းဆီဈေးတက်လာတာကို သဘောမကျဘူး"ဆိုတဲ့ ဆိုင်းဘုတ်ကို ဆိုင်အပြင်မှာချိတ်ဆွဲထားပါတယ်။ ပြီးခဲ့တဲ့အပတ်က ဆီဈေးတစ်ဂါလံကို ၄.၇၂ ဒေါ်လာအထိမြင့်တက်လာခဲ့ကာ မာဖီကားပြုပြင်ရေးစင်တာရဲ့ပိုင်ရှင်များက စိန့်အန်သိုနီဓာတ်ဆီဆိုင်အပြင်ဘက်မှာ အဆိုပါ ဆိုင်းဘုတ်ကိုထောင်ထားလိုက်တာဖြစ်ပါတယ်။
ဓာတ်ဆီဆိုင်ပိုင်ရှင်'ချက်ခ်ဂရက်ဖ်'က ဆီဝယ်ယူသူတွေရဲ့ဒုက္ခကို သူတို့လည်းသိရှိနားလည်ကြောင်း ဖော်ပြထားတာဖြစ်တယ်လို မီဒီယာတစ်ခုကိုပြောပြခဲ့ပါတယ်။
အမေရိကန်မှာ ပြီးခဲ့တဲ့ ၁၃ ရက်စလုံး ဓာတ်ဆီဈေးစံချိန်တင်မြင့်တက်ခဲ့ရာ တစ်နိုင်ငံလုံးအနေနဲ့ တစ်ဂါလံကို ၅ ဒေါ်လာနီးပါးအထိရောက်ရှိခဲ့ပါတယ်။
ဝါရှင်တန်ဒီစီအပါအဝင် ပြည်နယ် ၂၁ ခုမှာ ခဲမပါတဲ့လောင်စာဆီတစ်ဂါလံကို ၅ ဒေါ်လာအထိရှိခဲ့ပါတယ်။
"အဲဒီအကြောင်းကို သည်းမခံနိုင်ဘူးဆိုရင်လည်း ထိုင်ငိုနေရုံသာရှိပါတယ်၊ သူတို့လည်းဘာမှမတတ်နိုင်ပါဘူး၊ တစ်ဂါလံအတွက် ၅ ဒေါ်လာပေးရမယ်ဆိုရင် အကုန်အကျများတယ်ဆိုပေမယ့် ပေးမှရမှာပဲလေ" လို့ ဆီဖြည့်သူတစ်ဦးက ပြောပြသွားပါတယ်။
နောက်ထပ်ဝယ်သူတစ်ဦးကလည်း ဆီဈေးမြင့်တက်လာတာကြောင့် သူ့ရဲ့ထရပ်ကားကြီးကို မမောင်းသာတော့ဘဲ ဆီဒန်ကားလေးကိုမောင်းနှင်နေရတယ်လို့ ဆိုလာပါတယ်။
"တခြားကားကိုမောင်းရင် ဆီအပြည့်ဖြည့်ဖို ဒေါ်လာ ၁၀၀ လောက်ကုန်ပါတယ်၊ ဒီကားလေဆိုရင်တော့ ၅၀ ဒေါ်လာလောက်ပဲကုန်ပါတယ်၊ ဆိုင်ကဒီလိုမျိုး ဆိုင်းဘုတ်လေးနဲ့ဖော်ပြထားတာကောင်းပါတယ်၊ ဘဝကအမြဲတမ်း ခက်ခဲနေတာပါပဲ၊ ဒါကြောင့် စိတ်အပန်းပြေစရာရဖို့လည်းလိုအပ်ပါတယ်" လို့ ပြောပြသွားပါတယ်။
Source: New York Post
#Yangon_Media_Group
#WorldHealth
Published 15 June 2022
အသက်အန္တရာယ်ထိခိုက်စေနိုင်တဲ့ နှလုံးဖောက်ခြင်းဝေဒနာဖြစ်နိုင်ချေကို မျက်လုံးတွေကနေတဆင့် ၅ နှစ်လောက်စောပြီး သိရှိနိုင်ပါတယ်။
ဆီးချိုရောဂါနဲ့ လေဖြတ်ခြင်းတို့အတွက်လည်း လက္ခဏာများပေါ်ပေါက်လာနိုင်ကြောင်း သိပ္ပံပညာရှင်များ တွေ့ရှိထားပါတယ်။
ယူကေဘိုင်အိုဘဏ်ရဲ့အချက်အလက်တွေထဲမှာပါဝင်တဲ့ ဗြိတိန်နိုင်ငံသားသိန်းဂဏန်းခန့်ကို အီဒင်ဘာ့ဂ်တက္ကသိုလ်မှ သုတေသီများက လေ့လာခဲ့ကြပါတယ်။
တစ်ယောက်စီတိုင်းမှာ မျက်လုံးအနောက်ဘက်ရှိ အလင်းအာရုံခံနိုင်တဲ့အလွှာကို ပုံဖော်ထားကြပါတယ်။
ထိုပုံတွေကနေမှ သုတေသီများဟာ Fractal Dimension (Df) ဆိုတဲ့ အတိုင်းအတာတစ်ခုကိုအသုံးပြုပြီး မြင်လွှာမှသွေးကြောများရဲ့ကျန်းမာရေးအခြေအနေကို ကြည့်ရှုခဲ့ကြပါတယ်။
Df အတိုင်းအတာ တန်ဖိုးနည်းပါးခြင်းက နှလုံးသွေးကြောကျဉ်းရောဂါဖြစ်နိုင်ချေနဲ့ ဆက်စပ်နေပြီး အသက်အန္တရာယ်ဖြစ်စေတဲ့ နှလုံးဖောက်ခြင်းမျိုးဖြစ်လာနိုင်ကြောင်း တွေ့ရှိခဲ့ကြပါတယ်။
နှလုံးသွေးကြောကျဉ်းရောဂါဟာ အဖြစ်အများဆုံးနှလုံးရောဂါမျိုးဖြစ်ပြီး နှလုံးဖောက်ခြင်းအဖြစ်နိုင်ဆုံး အကြောင်းအရင်းဖြစ်ပါတယ်။
၂၀၁၉ ခုနှစ်က တစ်ကမ္ဘာလုံးအတိုင်းအတာမှာ အမျိုးသားတွေရော အမျိုးသမီးတွေမှာပါ နှလုံးသွေးကြောကျဉ်းရောဂါက အန္တရာယ်အပေးဆုံးအအကြောင်းအရာတစ်ခုဖြစ်ခဲ့ပါတယ်။
အဲဒီနောက် သုတေသီတွေက နှလုံးဖောက်ခြင်းဖြစ်နိုင်ချေကို ခန့်မှန်းသိရှိနိုင်မယ့် နည်းလမ်းပုံစံတစ်ခုကို တီထွင်ခဲ့ကြပါတယ်။
အဆိုပါ ဂရပ်ဖ်နဲ့တွက်ချက်ဖော်ပြတဲ့အချက်အလက်တွေထဲမှာ Df အပြင် အသက်၊ လိင်အမျိုးအစား၊ လူမျိုးအလိုက် BMI အတိုင်းအတာနဲ့ ဆေးလိပ်သောက်ခြင်းအခြေအနေတို့လည်း ပါဝင်ပတ်သက်နေပါတယ်။
ဂရပ်ဖ်အချက်အလက် ချည်းသက်သက်နဲ့စာရင် နှလုံးဖောက်ပြန်နိုင်ခြင်းရှိတဲ့သူတွေမှာ ရလာဒ်ထွက်ရှိမှုက ပိုပြီးသိသာပါတယ်။
နှလုံးဖောက်ပြန်နိုင်ခြင်း မျိုးရိုးဗီဇအလားအလာကို ထည့်သွင်းတွက်ချက်ပါက ရလာဒ်ကပိုပြီးသိသာကောင်းမွန်စေပါတယ်။
မြင်လွှာပေါ်က သွေးကြောအပြောင်းအလဲများကိုကြည့်ပြီး ဆီးချိုကြောင့် မျက်လုံးထိခိုက်ခြင်းနဲ့ လေဖြတ်ခြင်းတို့ဖြစ်နိုင်ကြောင်းကိုလည်း ထောက်ပြနိုင်ပါတယ်။
သုတေသီတွေ တီထွင်ထားတဲ့နည်းလမ်းပုံစံဟာ ရောဂါမဖြစ်ခင် ၅ နှစ်လောက်စောပြီး သိရှိစေနိုင်ကြောင်း ဖော်ပြထားကြပါတယ်။
သူတို့ရဲ့တွေ့ရှိချက်တွေကို လူသားမျိုးရိုးဗီဇဆိုင်ရာ ဥရောပအဖွဲ့အစည်းရဲ့ နှစ်စဉ်ညီလာခံမှာတင်ပြထားပါတယ်။
Source: The Sun
#Yangon_Media_Group
#WorldBusiness
Published 14 June 2022
တူရကီနိုင်ငံ အစ္စတန်ဘူလ်မြို့မှ ခေတ်မီဆန်းသစ်တဲ့ ဆိပ်ကမ်းတစ်ခုမှာ မြေအောက်ဘူတာရုံတစ်ခု၊ နာမည်ကြီးစားဖိုမှူးတစ်ဦးရဲ့စားသောက်ဆိုင်နဲ့ ဈေးဝယ်စင်တာတို့ ဖွင့်လှစ်ထားပါတယ်။
#Yangon_Media_Group
Published 14 June 2022
အမေရိကန်ပြည်ထောင်စုဟာ စီးပွားရေကျဆင်းမှုကို ဦးတည်နေဖွယ်ရှိကြောင်း ထိပ်တန်းစီးပွားရေးပညာရှင်တွေက ခန့်မှန်း လိုက်ကြပါတယ်။ ထကြွနေတဲ့ ငွေကြေးဖောင်းပွမှုနှင့် မြင့်မားလာနေတဲ့ အတိုးနှုန်းတွေက စီးပွားရေးဖွံ့ဖြိုးတိုးတက်မှုကို ဖိနှိပ်ထားနေတာကြောင့်ဖြစ်တယ်လို့ တနင်္ဂနွေနေ့က ထုတ်ဝေတဲ့ ဖိုင်နယ်ရှယ်တိုင်းမ်သတင်းစာမှာ ဖော်ပြထားပါတယ်။
ချီကာဂိုတက္ကသိုလ်နှင့် ပူးတွဲပြုလုပ်တဲ့ စစ်တမ်းအရ စီးပွားရေးပညာရှင်၄၉ဦးကိုမေးမြန်းခဲ့ရာမှာ သူတို့ထဲက ၇၀ ရာခိုင်နှုန်းက အမေရိကန်စီးပွားရေးဟာ ၂၀၂၃ ပထမနှစ်ဝက် သို့မဟုတ် ဒုတိယနှစ်ဝက်မှာ စီးပွားရေးကျဆင်းမှုနှင့်ကြုံရဖွယ်ရှိတယ်လို့ ပြောကြပါတယ်။
အမေရိကန်အလုပ်သမားဝန်ကြီးဌာနက ပြီးခဲ့တဲ့အပတ်က ထုတ်ပြန်ရာမှာ အမေရိကန်ရဲ့ စားသုံးသူဈေးနှုန်းတွေဟာ မေလမှာ ခန့်မှန်းထားခဲ့တဲ့ ၈.၆ ရာခိုင်နှုန်းထက် မြင့်မားနေပြီး ၁၉၈၁ခုနှစ်ဒီဇင်ဘာကတည်းက ဒါဟာ အမြင့်ဆုံးငွေကြေးဖောင်းပွမှု ဖြစ်ပါတယ်။
ငွေကြေးဖောင်းပွမှုမြင့်တက်လာနေတာကို အဆိုးရွားဆုံးဖြစ်လာမှာ စိုးရိမ်တာကြောင့် အမေရိကန်ဖက်ဒရယ်အရန်ငွေကြေး အဖွဲ့က အတိုးနှုန်းတွေကို တိုးပစ်လိုက်ပါတယ်။ ဒါပေမယ့် အဲသလိုလုပ်လိုက်တာကြောင့် ငွေကြေးဖောင်းပွမှုမြင့်နေတာကို ကာကွယ်ပေးနိုင်ပါ့မလား သံသယဖြစ်နေကြပြီး ဒါဟာ စီးပွားရေးတိုးတက်မှုအလားအလာကိုပါ အနှောက်အယှက်ဖြစ်စေမှာကို ပညာရှင်တွေ စိုးရိမ်နေကြတာဖြစ်ပါတယ်။
Source CCTV+
Page 637 of 768