#World_Health
Published_ 4 April 2023

လမ်းလျှောက်ခြင်းနဲ့ ပြေးခြင်းတို့ဟာ နှလုံးသွေးကြောကျန်းမာရေးအတွက် အဓိကလေ့ကျင့်ခန်းတွေဖြစ်ပြီး ပိုမိုအသက်ပြင်းပြင်းရှူစေကာ နှလုံးခုန်မြန်စေပါတယ်။

နှလုံးက သွေးကိုမြန်မြန်ညှစ်ထုတ်တဲ့အခါ သွေးကြောတွေမှာပိတ်နေတဲ့ အစအနတွေကို ဖယ်ရှားပေးပြီး လေဖြတ်ခြင်း နှလုံးရောဂါစတာတွေ ဖြစ်နိုင်ချေနည်းစေပါတယ်။

နှလုံးလေ့ကျင့်ခန်းပြုလုပ်ခြင်းဖြင့် သွေးတွင်းသကြားဓာတ်ကောင်းမွန်စေခြင်း၊ စိတ်ပျော်ရွှင်စေခြင်း၊ မှတ်ဉာဏ်တိုးတက်စေခြင်း၊ ဒီမန်ရှာဖြစ်နိုင်ချေနည်းစေခြင်း၊ ကိုလက်စ်ထရောပမာဏသင့်တင့်ခြင်းတို့ အကျိုးကျေးဇူးရရှိစေပါတယ်။

လူအများစုက အခြေခံလေ့ကျင့်ခန်းဖြင့် စတင်ပြုလုပ်ကြပါတယ်။

တစ်နေ့တာခန္ဓာကိုယ်လှုပ်ရှားခြင်းဖြင့် သက်ရှည်ကျန်းမာတဲ့ဘဝအတွက် အကောင်းဆုံးဖြစ်စေမှာဖြစ်ပါတယ်။

ပြေးခြင်းနဲ့ လမ်းလျှောက်ခြင်းနှစ်မျိုးစလုံးဟာ နှလုံးအတွက်ကောင်းမွန်စေတယ်ဆိုပေမယ့် နှလုံးကျွမ်းကျင်ပညာရှင်များကတော့ ခပ်သွက်သွက်လမ်းလျှောက်ခြင်းကို ပိုအားပေးထားပါတယ်။

ပြေးခြင်းက နှလုံးကြွက်သားတွေအပေါ် ဖိအားသက်ရောက်စေပေမယ့် အရွယ်မတိုင်ခင်သေဆုံးနိုင်ချေကိုတော့ လျှော့ချနိုင်ဖွယ်မရှိကြောင်း၊ ခပ်သွက်သွက်လမ်းလျှောက်ခြင်းကတော့ နှလုံးအပေါ် ဖိအားနည်းစေကာ အရွယ်မတိုင်ခင်သေဆုံးနိုင်ချေကို လျှော့ချနိုင်ကြောင်း ဒေါက်တာ'နက်ရှ်ကမ်ဒင်'က ဆိုပါတယ်။

၂၀၁၃ ခုနှစ်က ပြေးခြင်းလေ့ကျင့်ခန်းပြုလုပ်သူ ၃၃,၀၆၀ ဦးနဲ့ လမ်းလျှောက်လေ့ကျင့်ခန်းပြုလုပ်သူ ၁၅,၀၄၅ ဦးတို့ကို လေ့လာခဲ့ရာ ခပ်သွက်သွက်လမ်းလျှောက်ခြင်းက နှလုံးရောဂါဖြစ်နိုင်ချေလျှော့ချရာမှာ ပြေးခြင်းထက် ပိုမိုထိရောက်ကြောင်း တွေ့ရှိခဲ့ပါတယ်။

ဒါ့အပြင် လမ်းလျှောက်ခြင်းဖြင့် ဒူး၊ ခြေကျင်းဝတ်၊ ကျောပြဿနာရှိသူတွေနဲ့ အဝလွန်သူတွေမှာ ကိုယ်အလေးချိန်ကိုလည်း လျှော့ချပေးနိုင်ပါတယ်။

ကြွက်သားတွေကို အကြောလျှော့ပြီးတဲ့အခါ သွေးပူလေ့ကျင့်ခန်း ၁၀ မိနစ်ခန့်ပြုလုပ်ပြီး အဆစ်အမြစ်အားလုံးလှုပ်ရှားကာ လမ်းလျှောက်သင့်ပါတယ်။

Source: India Today
#World_Health #လမ်းလျှောက်ခြင်း #ပြေးခြင်း
#YMG#Yangon_Media_Group

#Asia_Trade
Published_ 3 April 2023

ဒေသတွင်း ဘက်စုံစီးပွားရေး ပူးပေါင်းဆောင်ရွက်မှု(RCEP)ကို ပြဌာန်းပြီးနောက်ပိုင်း ဗီယက်နမ်မှာစိုက်ပျိုးပြီး တင်ပို့လိုက်တဲ့ဒူးရင်းသီ ပထမအသုတ်ဟာ တရုတ်နိုင်ငံတောင်ပိုင်းရှိ လေဆိပ်တစ်ခုသို့ ကြာသပတေးနေ့က ရောက်ရှိလာပါတယ်။

#Asia_Trade #ဗီယက်နမ် # ဒူးရင်းသီး #တရုတ်လေဆိပ်
#YMG#Yangon_Media_Group

#Daily_News
Published_3 April 2023

၁။ရခိုင်ရိုးရာသင်္ကြန် နံ့သာသွေးပွဲနှင့်ဘုရားရေသပ္ပာယ်ပွဲ ရန်ကုန်မြိုတွင်ကျင်းပမည်

၂။သင်္ကြန်ကာလ မတိုင်မှီမှာပင် စားသုံးဆီဈေးတစ်ပိဿာ ကျပ်၇၀၀၀ကျော်ထိရောက်ရှိ

၃။ရန်ကုန်ရွှေအသင်း ၂၂သိန်း၉သောင်းနှုန်း ရန်ကုန်ရွှေအသင်းသတ်မှတ် ဈေးကွက်အတွင်း အရောင်းအဝယ်အေးနေ

၄။ဗီယက်နမ်မှ ပထမဆုံးအသုတ်ဒူးရင်းသီးများ တရုတ်လေဆိပ်သို့တင်ပို့ရောက်ရှိ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

Published 3 April 2023

ဆိုရှယ်မီဒီယာ TikTok တစ်တော့ခ်ကို နေတိုးအဖွဲ့ဝင်နိုင်ငံတွေက အစိုးရဝန်ထမ်းတွေကိုပေးထားတဲ့ ဖုန်းတွေမှာ အသုံးပြု ခွင့် တရားဝင်ပိတ်ပင်လိုက်တယ်လို့ နေတိုးအရာရှိနှစ်ဦးကပြောကြားပါတယ်။

အခုလိုတစ်တော့ခ်တားဆီးလိုက်တာကို အကြောင်းကြားတဲ့ ရုံးတွင်းလှည့်လည်စာကို ဝန်ထမ်းတွေဆီပေးပို့ခဲ့တယ်လို့ အရာရှိတွေက အတည်ပြုပြောကြားခဲ့ကြပါတယ်။ ဒီလိုပိတ်ပင်လိုက်ပေမယ့်လည်း နေတိုးကထုတ်ပေးထားတဲ့ ဖုန်းတွေမှာ ယခင်ကတည်းက နည်းပညာအရအကန့်အသတ်လုပ်ထားလို့ သိပ်ပြီးသုံးလေ့မရှိဘူးလို့အရာရှိတွေက ပြောပါတယ်။

တစ်တော့ခ်ကို ယူကေ၊အမေရိကန်၊ဥရောပပါလီမာန်နှင့် နော်ဝေးတို့မှာ အစိုးရ ဖုန်းတွေမှာ အသုံးပြုခွင့် ပိတ်ထားပြီး ဖြစ်ပါတယ်။

တစ်တော့ရဲ့စီအီးအို ရှောင်ချူးက သူတို့ဟာ တရုတ်အစိုးရနှင့်မသက်ဆိုင်ဘဲ လုံးဝလွတ်လပ်ကြောင်းနှင့် တရုတ်အစိုးရဟာ အချက်အလက်တွေဝင်ကြည့်တယ်ဆိုတာလည်း ဘာသက်သေအထောက်အထားမှမရှိကြောင်း၊ တစ်ကြိမ်တစ်ခါမှလည်း အစိုးရက အချက်အလက်တောင်းမကြည့်ဘူးသလို တစ်ခါမှလည်းမပေးဖူးကြောင်း အမေရိကန်လွှတ်တော်အမတ်တွေကို ဒီလစောစောပိုင်းက ရှင်းလင်းပြောကြားခဲ့ပါသေးတယ်။

ဒါပေမယ့် အနောက်အစိုးရတွေက သံသယရှိနေကြတုန်းဖြစ်ပြီး တစ်တော့ခ်ဟာ နစ်တည်းမဟုတ်တစ်နည်း အဆုံးသတ် သင့်တယ်လို့ အမေရိကန်နိုင်ငံခြားရေးဝန်ကြီး အင်တိုနီဘလင်ကန်က ဒီလစောစောပိုင်း တစ်တော့စီအီးအိုကြားနာတဲ့ ရက်နှင့်တစ်ရက်တည်းမှာ ကွန်ဂရက်ကို ပြောခဲ့ပါတယ်။

Source WION

#နေတိုးနိုင်ငံအစိုးရဝန်ထမ်းဖုံးများတွင်တစ်တော့ခ်ပိတ်

#တစ်တော့_TikTok

#YangonMediaGroup

#World_News
Published_ 3 April 2023

နယူးယော့ခ်ရဲတပ်ဖွဲ့က ထရမ့်တာဝါပတ်ပတ်လည်မှာ သတ္တုအကာအရံများဖြင့် တားဆီးထားပြီး မန်ဟက်တန်မှုခင်းတရားရုံးအနီးရှိ လမ်းတွေကို ပိတ်ဆို့ထားပါတယ်။

ဒေါ်နယ်ထရမ့်က အင်္ဂါနေ့မှာ အစိုးရရှေ့နေများထံ တရားခွင်ရုံးတက်ရမှာနဲ့ ပတ်သက်ပြီး ဆန္ဒပြပွဲတွေဖြစ်လာနိုင်တာကို ကြိုတင်ပြင်ဆင်တဲ့သဘောဖြစ်ပါတယ်။

ထရမ့်က အပြာကားမင်းသမီးတစ်ဦးကို နှုတ်ပိတ်ခပေးခြင်းအပေါ် ဂျူရီတရားသူကြီးတစ်ဦးက စွဲချက်တင်လိုက်ပြီးနောက် အင်္ဂါနေ့မွန်းလွဲပိုင်း၌ တရားရုံးမှာ စီရင်ခံရမှာဖြစ်ပါတယ်။

ဒါဟာ ရာဇဝတ်မှုစွဲချက်တွေနဲ့ ရင်ဆိုင်ရတဲ့ ပထမဆုံးအမေရိကန်သမ္မတဟောင်း ဖြစ်လာပါတယ်။

ထရမ့်က ထိုစုံစမ်းစစ်ဆေးမှုကို နိုင်ငံရေးပယောဂလိုက်စားမှုအဖြစ် ဖော်ပြထားပြီး ရီပတ်ဘလစ်ကန်အမတ်'မာဂျာရီတိုင်လာဂရင်းန်' အပါအဝင် အင်အားကြီးထောက်ခံသူများက အင်္ဂါနေ့မှာ နယူးယော့ခ်သို့လာပြီး ဆန္ဒပြမယ်လို့ဆိုနေကြပါတယ်။

ရာဇဝတ်မှုနဲ့ တရားရုံးချုပ်များတည်ရှိရာ မြို့လယ်တရားရုံးမှာ ထရမ့်အမှုကိစ္စမတိုင်ခင် အချို့တရားရုံးတွေကို ပိတ်ထားမယ်လို့ တရားရုံးတာဝန်ရှိသူတစ်ဦးက ပြောကြားခဲ့ပါတယ်။

ထရမ့်ကိုကွပ်မျက်ပေးဖို့ ဆိုရှယ်မီဒီယာမှလူအချို့က သူ့ကိုစွဲချက်တင်ခဲ့တဲ့ ဂျူရီတရားသူကြီးနဲ့ မန်ဟက်တန်ခရိုင်ရှေ့နေ'အယ်ဗင်ဘရက်ဂ်'တို့ကို တောင်းဆိုနေကြကြောင်း ထောက်လှမ်းရေးအဖွဲ့တစ်ခုက ဆိုပါတယ်။

ထရမ့်က ဆန္ဒပြပွဲပြုလုပ်ဖို့ တောင်းဆိုထားပေမယ့် ထရမ့်ထောက်ခံသူအများအပြားက အဖမ်းဆီးခံရမှာကို စိုးရိမ်နေတာကြောင့် သတိထားနေကြရပါတယ်။

ရဲတပ်ဖွဲ့က လိုအပ်သလိုတုံ့ပြန်နိုင်ရန် အသင့်ရှိနေပြီး လူတိုင်းဟာလည်း သူတို့ရဲ့ရပိုင်ခွင့်အတိုင်း ငြိမ်းချမ်းစွာဖော်ထုတ်ခွင့်ရှိစေမှာဖြစ်ကြောင်း NYPD က ထုတ်ပြန်ထားပါတယ်။

ထရမ့်က တနင်္လာနေ့မှာ ဖလော်ရီဒါကနေ နယူးယော့ခ်သို့လာပြီး ညဘက် ထရမ့်တာဝါမှာရှိနေရန် စီစဉ်ထားပြီးနောက် အင်္ဂါနေ့မနက်ပိုင်းမှာ တရားရုံးသို့ရောက်ရှိမှာဖြစ်ကြောင်း ထရမ့်အကြံပေးတစ်ဦးကဆိုပါတယ်။

နယူးယော့ခ်ရီပတ်ဘလစ်ကန်လူငယ်အဖွဲ့က တရားရုံးလမ်းတစ်ဖက်မှ ပန်းခြံတစ်ခုမှာ ဆန္ဒပြပွဲပြုလုပ်ဖို့ စီစဉ်နေပြီး ထရမ့်အမာခံထောက်ခံသူတစ်ဦးဖြစ်တဲ့ ဂရင်းန်ကလည်း ပါဝင်မယ်လို့ဆိုထားပါတယ်။

"ဆန္ဒပြတယ်ဆိုတာ အခြေခံဥပဒေဆိုင်ရာအခွင့်အရေးတစ်ခုဖြစ်ပါတယ်၊ ကျွန်မတို့ရဲ့တရားရေးစနစ်မျှတမှုမရှိခြင်းနဲ့ ရွေးကောက်ပွဲနှောင့်ယှက်ခြင်းတို့အတွက် ဆန္ဒပြသွားပါမယ်" လို့ တွစ်တာမှာဖော်ပြထားပါတယ်။

ထရမ့်အမှုမစတင်မီ နေ့လယ် ၁ နာရီမှာ တရားရုံးအထပ်မြင့်တွေမှာရှိတဲ့ တရားရုံးခန်းတွေကို ပိတ်သွားမှာဖြစ်ပါတယ်။

အခြားတရားရုံးအမှုတွေကို တရားရုံးချုပ်လမ်းတစ်ဖက်ရှိ အဆောက်အဦသို့ ရွှေ့ပြောင်းသွားမှာလည်း ဖြစ်ပါတယ်။

Source: Reuters
#World_News #ဒေါ်နယ်ထရမ့်#နယူးယော့ခ်တရားရုံး #ဆန္ဒပြပွဲများ
#YMG#Yangon_Media_Group

#World_Health
Published 3 April 2023

ကလေးမိဘတွေအနေနဲ့ အသက် ၆ နှစ်အောက်ကလေးတွေကို ဖုန်း၊ ကွန်ပျူတာများ ပေးမသုံးသင့်ကြောင်း စိတ်ရောဂါပညာရှင်တစ်ဦးက ဆိုလိုက်ပါတယ်။

စမတ်ဖုန်းတွေ၊ တက်ဘလက်တွေ၊ ကွန်ပျူတာတွေ ကြည့်လေ့ရှိတဲ့ကလေးတွေဟာ မကြည့်တဲ့ကလေးတွေထက် စိတ်အလိုမကျ၊ အထိမခံနိုင်ခြင်း၊ အာရုံစူးစိုက်မှုနဲ့ မှတ်ဉာဏ်စွမ်းရည်လျော့နည်းခြင်းတို့ ဖြစ်ပေါ်စေနိုင်ကြောင်း အာရုံကြောစိတ်ရောဂါပညာရှင် ဒေါက်တာ'အယ်ဗာရိုဘီလ်ဘာအို'က ပြောကြားလိုက်ပါတယ်။

ခေတ်မီနည်းပညာကိရိယာတွေက သူတို့ရဲ့ဘဝမှာ တစ်စိတ်တစ်ပိုင်းပါဝင်လာပေမယ့် သူတို့လက်ထဲ တဖြည်းဖြည်းချင်းထည့်ပေးတာက ပိုပြီးသင့်တော်တယ်လို့ ဖော်ပြခဲ့ပါတယ်။

သူတို့ရဲ့ဦးနှောက် အနည်းငယ်ပိုဖွံ့ဖြိုးချိန်၊ စိတ်ခံစားချက်အရ စကားပြောနိုင်ချိန်၊ သူတို့ကိုယ်သူတို့ ထိန်းသိမ်းနိုင်စွမ်းရှိလာတဲ့ အချိန်ကျ တစ်နည်းအားဖြင့် အသက် ၆ နှစ်အရွယ်လောက်မှ ပေးသုံးသင့်ပါတယ်။

လေ့လာချက်များအရ ဖုန်း၊ ကွန်ပျူတာရှေ့မှာ အချိန်ဖြုန်းတဲ့သူတွေဟာ အပြုအမူပြဿနာများနဲ့ ကလေးဘဝစိတ်ဓာတ်ကျခြင်းတို့ ပိုမိုဖြစ်စေနိုင်ပါတယ်။

ဒါတွေဟာ သူတို့ဘဝဖွံ့ဖြိုးတိုးတက်မှုအတွက် အရေးပါတဲ့ အခြားလှုပ်ရှားမှုတွေမှာ စိတ်ဝင်စားမှုနည်းပါးသွားပြီး ဒီစက်ပစ္စည်းတွေအပေါ်မှာပဲ ကျန်းမာရေးနဲ့မညီညွတ်စွာ စိတ်ရောက်နေမှာဖြစ်ပါတယ်။

ကျွန်တော့်ရဲ့ မိုဘိုင်းဖုန်းတွေ တက်ဘလက်တွေထဲမှာ ကလေးတွေစိတ်ဝင်စားမယ့် App တွေ မထည့်ထားပါဘူးလို့ ဒေါက်တာ'ဘီလ်ဘာအို'က ဆိုပါတယ်။

သူ့ကလေးတွေက မိသားစုဓာတ်ပုံတွေ ပျော်ရွှင်စရာပုံတွေကို ကြည့်ချင်မှသာ ဖုန်းကိုအသုံးပြုကြပါတယ်လို့ ဆိုပါတယ်။

တစ်ခါတလေမှာ ကလေးတွေနဲ့အတူ သီချင်းတွေ ကကွက်တွေကိုကြည့်ရှုတတ်ပေမယ့် ဂိမ်းတော့ မဆော့ကြသလို တီဗီကိုလည်း အချိန်အကန့်အသတ်ဖြင့်သာ ကြည့်ရှုစေပါတယ်။

အသက် ၅ နှစ်အောက်ကလေးတွေအတွက် တစ်နေ့တာတီဗီကြည့်ရှုချိန် တစ်နာရီထက်ပိုမပေးသင့်သလို အသက် ၂ နှစ်အောက်အတွက်တော့ လုံးဝမကြည့်ရှုစေသင့်ပါဘူး။

Source: Daily Mail
#အသက်(၆)နှစ်အောက်ကလေးငယ်များ #စမတ်ဖုန်း၊ကွန်ပျူတာများ #စိတ်ရောဂါဆရာဝန်များသတိပေး
#YMG#Yangon_Media_Group