Published 15 Sept 2022

၂၀၂၂ခုနှစ် အာဆီယံမိတ်ဖက် မီဒီယာများ ဖိုရမ်ကို စက်တင်ဘာ ၁၅ ရက် ကြာသပတေးနေ့က တရုတ်နိုင်ငံ တောင်ပိုင်း ကွမ်ရှီကျန်း ကိုယ်ပိုင်အုပ်ချုပ်ခွင့်ရေးဒေသ နန်နင်းမြို့မှာ ကျင်းပရာ နိုင်ငံပေါင်း ၇၀ကျော်မှ ဧည့်သည် ၁၈၀ကျော် အွန်လိုင်းနှင့် ကိုယ်တိုင် တက်ရောက်ခဲ့ကြပါတယ်။

“အသိဉာဏ်၊ပူးပေါင်းဆောင်ရွက်မှု၊ပေါင်းစည်းညီညွတ်မှု” ဆိုတဲ့ အာဘော်နှင့် ပြုလုပ်တဲ့ ဒီနှစ်ဖိုရမ်ကို တရုတ်မီဒီယာအုပ်စု CMG နှင့် ကွမ်ရှီကျန်း ကိုယ်ပိုင်အုပ်ချုပ်ရေးဒေသအစိုးရတို့ ပူးပေါင်းကျင်းပပါတယ်။

ဖွင့်ပွဲအခမ်းအနားမှာ CMG နှင့် အာဆီယံမီဒီယာများအကြား ပူးပေါင်းဆောင်ရွက်မှုအသစ်တွေဖြစ်တဲ့ “ဇီ မျိုးဆက် ဩဇာလွှမ်းမိုးသူများ လေ့ကျင့်ရေးစင်တာ” နှင့် “ တရုတ်-အာဆီယံ မီဒီယာ အရေးပေါ်လိုင်း” စီမံကိန်းနှစ်ခုကို မိတ်ဆက်ပေးခဲ့ပါတယ်။

ဖိုရမ်နှင့်အတူ CMG နှင့် ကွမ်ရှီကျင်းအစိုးရတို့အကြား မဟာဗျူဟာမြောက် ပူးပေါင်းဆောင်ရွက်ရေးသဘောတူစာချွန်လွှာ လက်မှတ်ရေးထိုးခဲ့ကြပါတယ်။

အဲဒီအပြင် တရုတ်-အာဆီယံ မီဒီယာကွန်ပလက်စ် ဖွင့်ပွဲကိုပါ တစ်ပါတည်းကျင်းပခဲ့ကြပါတယ်။

Source CCTV+

#ASEAN_China_Media_Partners_Forum

#Guangxi_Zhuang

#China_media

#World_Politics
Published 15 September 2022

ထိုင်ဝမ်သို့ ဒေါ်လာဘီလီယံများစွာ တန်ကြေးရှိတဲ့ စစ်ဘက်ဆိုင်ရာအကူအညီများကို အမေရိကန်က တိုက်ရိုက်ထောက်ပံ့ခြင်းအစီအစဉ်နဲ့ပတ်သက်ပြီး လွှတ်တော်ကော်မတီက ဗုဒ္ဓဟူးနေ့(စက်တင်ဘာ ၁၄ ရက်)မှာ ပထမဆုံးခြေလှမ်းစတင်လိုက်ပါတယ်။

တရုတ်နဲ့တင်းမာမှု မြင့်တက်နေတဲ့ကြားက ထိုင်ဝမ်ကို အကူအညီများထပ်တိုးထောက်ပံ့နေကာ ထိုင်ဝမ်နဲ့ဆက်ဆံရေးကို ပိုမိုပြီးတရားဝင်ဖြစ်လာအောင် အမေရိကန်က ကြိုးပမ်းနေတာဖြစ်ပါတယ်။

အမေရိကန်ဟာ ဆယ်စုနှစ်တွေတိုင်အောင် ထိုင်ဝမ်ကို လက်နက်တွေရောင်းချနေခဲ့ပါတယ်။

ဒါပေမဲ့ ဥပဒေအသစ်အရ ၄ နှစ်အတွင်း အမေရိကန်လုံခြုံ‌ရေးထောက်ပံ့မှုအတွက် ဒေါ်လာ ၄.၅ ဘီလီယံ ထပ်မံပေးအပ်သွားမည်ဖြစ်ရာ တရုတ်အတွက်တော့ အမျက်ထွက်စရာဖြစ်မှာ သေချာပါတယ်။

ဒါ့အပြင် ထိုင်ဝမ်ကျွန်းကို တရုတ်ကအင်အားသုံးကျူးကျော်ပါက အရေးယူပိတ်ဆိုမှုတွေချမှတ်ဖိုအစီအစဉ်တွေလည်း ပါဝင်နေပါတယ်။

အကျယ်ပြန့်ဆုံး ဆက်ဆံရေးမြှင့်တင်မှုအဖြစ် ထိုင်ဝမ်မူဝါဒဥပဒေကို အထက်လွှတ်တော်နိုင်ငံခြားဆက်ဆံရေးကော်မတီက အတည်ပြုလိုက်ပါတယ်။

ယူကရိန်းကို ရုရှားကျူးကျော်ခြင်းကိစ္စအပြင် အောက်လွှတ်တော်ဥက္ကဌ'နန်စီပယ်လိုစီ' ထိုင်ဝမ်သို့လာရောက်ခြင်းတို့ကြောင့် တရုတ်က စစ်ရေးလေ့ကျင့်မှုများ ပြုလုပ်ခဲ့ပြီးနောက် ထိုင်ဝမ်အတွက် စိုးရိမ်မှုမြင့်တက်နေတဲ့အချိန်မှာ လွှတ်တော်အမတ်တွေက အခုလိုအတည်ပြုလိုက်တာဖြစ်ပါတယ်။

ကော်မတီကိုဦးဆောင်နေတဲ့ ဘိုင်ဒန်ရဲ့ ဒီမိုကရက်တစ်ပါတီမှ လွှတ်တော်အမတ်'ဘော့မီနန်ဒက်ဇ်'က အမေရိကန်ဟာ စစ်ပွဲဖြစ်လာအောင် ကြံစည်နေတာမဟုတ်သလို တရုတ်နဲ့လည်း တင်းမာအောင်ဖန်တီးနေတာမဟုတ်ကြောင်း၊ အားလုံးကို ရှင်းရှင်းလင်းလင်းမြင်သင့်ကြောင်း ပြောကြားလိုက်ပါတယ်။

"ထိုင်ဝမ်ရင်ဆိုင်နေရတဲ့ ခြိမ်းခြောက်မှုအန္တရာယ်ကို လျော့ကျအောင် ဗျူဟာကျကျလုပ်ဆောင်နေတာပါ၊ ထိုင်ဝမ်ကိုကျူးကျော်ဖို့ တရုတ်ဘက်က ဘယ်လောက်ရင်းရနိုင်လဲ ဘယ်လောက်အထိ စွန့်စားရာကျပြီး အောင်မြင်နိုင်ချေနည်းလဲဆိုတာကို မြင်သာအောင် ပြုလုပ်နေပါတယ်"လို့ ပြောပြသွားပါတယ်။

ကော်မတီထဲမှ ထိပ်သီးရီပတ်ဘလစ်ကန် လွှတ်တော်အမတ်'ဂျင်မ်ရစ်ချ်'ကလည်း သိပ်နောက်မကျခင် ထိုင်ဝမ်ရဲ့ကိုယ်ပိုင်ကာကွယ်ရေးကို အင်အားတောင့်တင်းအောင် ဆောင်ရွက်သင့်ကြောင်း ဆိုပါတယ်။

ဒီဥပဒေကြမ်းဟာ အထက်လွှတ်တော်နဲ့ အောက်လွှတ်တော်တစ်ခုလုံး အသိအမှတ်ပြုရဦးမှာဖြစ်သလို သမ္မတ'ဂျိုးဘိုင်ဒန်'က လက်မှတ်ထိုးပေးမှာလားဆိုတာ မသိရသေးပါဘူး။

ဒါပေမဲ့ ဥပဒေကြမ်းကို ထောက်ခံမှုမြင့်မားတာကြောင့် အာဏာသုံးငြင်းပယ်မယ်ဆိုရင်တောင် ကွန်ဂရက်လွှတ်တော်က ကျော်လွှားသွားနိုင်တဲ့ သဘောလည်းရှိနေပါတယ်။

အိမ်ဖြူတော်သတင်းစာရှင်းလင်းပွဲဝန်ကြီး'ကာရင်ဂျင်းပီယာရဲလ်'က ဥပဒေကြမ်းနဲ့ပတ်သက်ပြီး အစိုးရအဖွဲ့နဲ့ လွှတ်တော်အမတ်များ ပြောဆိုလျက်ရှိကြောင်း၊ ထိုင်ဝမ်အရေးအတွက် ပါတီနှစ်ဖွဲ့စလုံးက ထောက်ခံနေကြတာကို ဝမ်းသာမိကြောင်း ပြောကြားသွားပါတယ်။

Source: CNA
#Yangon_Media_Group

#World_Science
Published 15 September 2022

နိုင်ငံတော်လုံခြုံရေးကို ထိပါးမှာစိုးတဲ့အတွက် အမေရိကန်ရေတပ်က အမျိုးအမည် မသိယာဉ်ပျံ(UFO)များကို ရိုက်ကူးရမိတဲ့ ဗီဒီယိုများအား ထုတ်ဖော်ပြသမှာ မဟုတ်ကြောင်း အသိပေးလိုက်ပါတယ်။

၂၀၂၀ ခုနှစ်တုန်းက အမျိုးအမည်မသိ နည်းပညာမြင့်ယာဉ်ပျံအချို့အား ရေတပ်မှမောင်းနှင်သူများ ရိုက်ကူးမိခဲ့တဲ့ ဗီဒီယိုများကို ရေတပ်က ထုတ်ဖော်ခဲ့ပါသေးတယ်။

အစိုးရသတင်းဖွင့်ချရေး(Black Vault)က ရေတပ်ကခေါ်ဝေါ်သတ်မှတ်ထားတဲ့ အမျိုးအမည်မသိယာဉ်ပျံဖြစ်စဉ်(UAP) နဲ့ပတ်သက်ပြီး အခြားဗီဒီယိုများကိုလည်း တောင်းဆိုခဲ့ပါတယ်။

ဒီဗီဒီယိုမှာ ရေတပ်ကာကွယ်ရေးဌာနရဲ့ အရေးကြီးအချက်အလက်တွေ၊ လုပ်ငန်းစဉ်တွေပါဝင်နိုင်တဲ့အတွက် ထုတ်လွှင့်လိုက်ပါက နိုင်ငံတော်လုံခြုံရေးကို ထိခိုက်စေလိမ့်မယ်လို့ ရေတပ်လက်ထောက်ညွှန်ကြားရေးမှူး 'ဂရက်ဂေါ်ရီကေဆန်'က ပြောပြသွားပါတယ်။

အရင်ဗီဒီယို ၃ ခုကတော့ မီဒီယာတွေဆီ ပေါက်ကြားသွားပြီး လူအများကြားရောက်ရှိသွားတဲ့အတွက် ရေတပ်က ပြသခဲ့တာဖြစ်ကြောင်း 'ကေဆန်'က ရှင်းပြပါတယ်။

ဒီသတင်းတွေမှာပါဝင်တဲ့ အချက်အလက်များအရ နိုင်ငံတော်လုံခြုံရေးကို ထိခိုက်စေလောက်တဲ့ အကြောင်းအရာများ မပါဝင်ဘူးလို့ ဆိုပါတယ်။

ထုတ်လွှင့်ပြသသည် မပြသသည်ဖြစ်စေ ပင်တဂွန်က UFO အန္တရာယ်ကို အလေးထားဆောင်ရွက်နေပါတယ်။

ပြီးခဲ့တဲ့နှစ်များအတွင်း ပင်တဂွန်မှ UAP အမျိုးအစားယာဉ်ပျံ ၄၀၀ ကျော်လောက် တွေ့ရှိခဲ့ပြီး ၂၀၀၄ ခုနှစ်နောက်ပိုင်းကထက် ၁၄၄ ကြိမ်ပိုများနေပါတယ်။

အဲဒီထဲကမှ ၁၁ ကြိမ်ဟာ စစ်တပ်လေယာဉ်များနဲ့ မတိုက်မိရုံသာ ဖြတ်သန်းခဲ့ကြ ဖူးပါတယ်။

ဒီအဖြစ်အပျက်တွေက အခြားဂြိုဟ်တွေနဲ့ ဆက်စပ်နေနိုင်လားဆိုတာကိုတော့ အစိုးရက မပြောပြခဲ့ကြောင်း ပင်တဂွန်ထိပ်တန်းစုံစမ်းရေးအရာရှိ 'ရော်နယ်မိုလ်ထရီ'က ဆိုပါတယ်။

ဒီအဖြစ်အပျက်တွေကို ဖုံးအုပ်ရမှာမဟုတ်ဘဲ ဘာတွေလဲဆိုတာ သဘောပေါက်အောင် လေ့လာရမှာဖြစ်ပါတယ်။

"ကျွန်တော်တို့လည်း အမျိုးအမည်မသိတဲ့အရာတွေကို သိချင်နေပါတယ်၊ သက်တမ်းရင့် စုံစမ်းရေးအရာရှိအနေနဲ့ စိတ်မရှည်ဖြစ်မိပါတယ်၊ ဒီအရာတွေအတွက် ဖြေရှင်းချက် ချက်ချင်းလိုချင်နေပါတယ်၊ ဒါပေမဲ့ ဒါတွေကိုနားလည်ဖို့က ကြိုးစားအားထုတ်မှုနဲ့ အချိန်များစွာလိုအပ်ပါတယ်"လို့ ရေတပ်စုံစမ်းရေးလက်ထောက်ညွှန်ကြားရေးမှူး'စကော့ဘရေး'က ဥပဒေရေးရာအမတ်များကို ပြောကြားခဲ့ပါတယ်။

အမေရိကန်စစ်တပ်၊ ရေတပ်၊ လေတပ်တို့မှ တွေ့ရှိမိတဲ့ UFO တွေကို သီးသန့်လေ့လာတင်ပြနိုင်ရန် အစိုးရမှငွေကြေးထောက်ပံ့ထားတဲ့ ရုံးအသစ်တစ်ခုဖွင့်လှစ်သွားမှာဖြစ်ကြောင်း ပင်တဂွန်က ဇူလိုင်လမှာ ကြေညာခဲ့ပါတယ်။

Source: Daily Mail
#Yangon_Media_Group

Published 15 Sept 2022

ကမ္ဘာကြီးဟာ ကိုဗစ်-၁၉ ကပ်ဘေးကို အဆုံးသတ်ဖို့ ယခုလို ပိုမိုကောင်းမွန်လာတဲ့ အနေအထား တစ်ခါမှ မရှိခဲ့သေးဘူးလို့ ကမ္ဘာ့ကျန်းမာရေးအဖွဲ့ အကြီးအကဲက ဗုဒ္ဓဟူးနေ့က ပြောပါတယ်။ ဒါဟာ လူခြောက်သန်းကျော်သေဆုံးခဲ့ရတဲ့ နှစ်ရှည် ကျန်းမာရေးအကျပ်အတည်းအပေါ် သူ့ရဲ့ အကောင်းအမြင်ဆုံး ရှုမြင်သုံးသပ်ချက်ဖြစ်ပါတယ်။

“ ကျွန်တော်တို့ အဲဒီနေရာတေ့ မရောက်သေးဘူး။ ဒါပေမယ့် နိဂုံးကို မြင်နေရပြီ” လို့ ကမ္ဘာ့ကျန်းမာရေးအဖွဲ့ရဲ့ ညွှန်ကြားရေးမှူးချုပ် တက်ဒရော့စ် အက်ဟာနွမ် ဂီဘရီယက်ဆတ်က သတင်းစာရှင်းလင်းပွဲမှာ ပြောပါတယ်။

ကပ်ဘေးကို သုံးလကြာပြီးမှ ၂၀၂၀ပြည့်နှစ် ဇန်နဝါရီလမှာ နိုင်ငံတကာ အရေးပေါ်အခြေအနေကြေညာပြီးနောက်ပိုင်း ဒါဟာ ကမ္ဘာ့ကျန်းမာရေးအဖွဲ့ရဲ့ စိတ်အချမ်းသာရဆုံး အကဲဖြတ်ချက်ဖြစ်ပါတယ်။

၂၀၁၉ခုနှစ် နှစ်ကုန်ပိုင်းမှာ တရုတ်က စတင်ဖြစ်ခဲ့တဲ့ အဲဒီဗိုင်းရပ်စ်ဟာ အခုဆို ကမ္ဘာပေါ်မှာ လူ ၆.၅သန်းနီးပါးကို သေစေခဲ့ပြီး ၆၀၆သန်းဟာ ကူးစက်ခံခဲ့ကြရပါတယ်။ ကမ္ဘာ့စီးပွားရေးကို တွန်းချခဲ့ပြီး ကျန်းမာရေးစောင့်ရှောက်မှုစနစ်တွေကိုလည်း ဒုက္ခအကြီးအကျယ်ပေးခဲ့ပါတယ်။

ကာကွယ်ဆေးတွေနှင့် ကုထုံးတွေ ပေါ်လာတာဟ သေဆုံးမှုနှင့်ဆေးရုံတက်ရတာတွေကို ပိတ်ဆိုံပေးခဲ့ပါတယ်။ ပြီးခဲ့တဲ့ နှစ်ကုန်ပိုင်းက ပေါ်ပေါက်ခဲ့တဲ့ အိုမီခရွန်မျိုးကွဲဟာ ရောဂါပြင်းထန်မှုလျော့နည်းခဲ့ပါတယ်။ ပြီးခဲ့တဲ့ အပတ်က တစ်ကမ္ဘာလုံး သေဆုံးတဲ့အရေအတွက်ဟာ ၂၀၂၀ မတ်လကတည်းကဆိုရင် အနိမ့်ဆုံးဖြစ်ကြောင်း ကုလအေဂျင်စီဖြစ်တဲ့ ကမ္ဘာ့ကျန်းမာရေးအဖွဲ့က အစီရင်ခံထားပါတယ်။

နိုင်ငံတွေအနေနှင့် ဆက်လက်ပြီး နိုးကြားသတိရှိနေကြဖို့ သူက ဆော်ဩလိုက်ပြီး ကပ်ဘေးကို မာရသွန်ပြေးပွဲနှင့် သူက ခိုင်းနှိုင်းသွားပါတယ်။

နိုင်ငံတွေဟာ ဆေးပစ္စည်းကိရိယာတွေ နှင့် ကျန်းမာရေးလုပ်သားတွေ လုံလုံလောက်လောက် ဆက်လက်ထားရှိဖို့ လိုတယ် လို့လည်း သူကပြောပါတယ်။

“ အနာဂတ်မှာ ကူးစက်မှုလိုင်းအသစ်တွေကို မျှော်လင့်နိုင်သေးတယ်။ အိုမီခရွန်မျိုးကွဲတွေက ဒါမှမဟုတ် အခြားမျိုးကွဲတွေ ကနေ ဖြစ်လာနိုင်သေးတယ်” လို့တော့ ကမ္ဘာ့ကျန်းမာရေးအဖွဲ့ အကြီးတန်းကပ်ဘေးပညာရှင် မာရီယာဗန် ကာကော့က ပြောပါတယ်။

ဒီနှစ်တစ်နှစ်တည်းမှာ လူတစ်သန်းသေဆုံးခဲ့ရတဲ့အတွက် ကပ်ဘေးဟာ ကမ္ဘာ့တစ်ခုလုံးအလိုက် ဒါမှမဟုတ် အချို့သော နိုင်ငံတွေအတွင်းမှာ  အရေးကြီးကျန်းမာရေး အခြေအနေဆက်ရှိ‌နေပါတယ်။

“ အိုမီခရွန် BA.4 နှင့် BA.5တို့ကြောင့်  ကိုဗစ်-၁၉ဟာ နွေရာသီလှိုင်းတစ်ခုဖြစ်ခဲ့တယ်။ ဘာကိုပြသလဲဆိုရင် ရောဂါကပ်ဘေးဟာ မပြီးဆုံးသေးဘဲ ဥရောပနှင့် ဥရောပကိုကျော်လွန်ပြီး ဗိုင်းရပ်စ်ဟာ လှည့်လည်နေတုန်းပဲ” လို့ ဥရောပ ကော်မရှင်ပြောရေးဆိုခွင့်ရှိသူကပြောပါတယ်။

လာမယ့် ကမ္ဘာ့ကျန်းမာရေးအဖွဲ့ ပညာရှင်အစည်းအဝေးမှာ အောက်တိုဘာမှ သက်တမ်းကုန်မယ့် အများပြည်သူကျန်းမာရေးဆိုင်ရာ အရေးပေါ် အခြေအနေဟာ ဆက်လက်ရှိနေတုန်းပဲလားဆိုတာကို ဆုံးဖြတ်ကြမယ်လို့ ကမ္ဘာ့ကျန်းမာရေးအဖွဲ့ပြောရေးဆိုခွင့်ရှိသူကပြောပါတယ်။

Source: AFP

#Tedros_Adhanom_Ghebreyesus

#Covid_19

#WHO

#World_Health
Published 15 September 2022

ရေအသက် တစ်မနက်ဆိုတဲ့အတိုင်း ခန္ဓာကိုယ်အတွက်လိုအပ်မယ့် ရေကို ဂရုတစိုက်သောက်သုံးဖို့ အရေးကြီးပါတယ်။

အခြားအရည်တွေ သောက်မယ့်အစား ရေချည်းပဲသောက်မယ်ဆိုရင် ခန္ဓာကိုယ်မှာ အကျိုးသက်ရောက်မှုများစွာ ဖြစ်ပေါ်စေမှာဖြစ်ပြီး အထူးသဖြင့် ကောင်းကျိုးတွေဖြစ်ပါတယ်။

လူ့ခန္ဓာကိုယ်မှာ ရေဓာတ် ၆၀ ရာခိုင်နှုန်းဖြင့် ဖွဲ့စည်းထားတာကြောင့် ရေမကြာခဏသောက်ပေးဖို့ အရေးကြီးပါတယ်။

ရေချည်းသာသောက်ရင် အလှအပဆိုင်ရာမှာ အလိုအလျောက်သက်ရောက်စေပါတယ်။

ရေဓာတ်က ခန္ဓာကိုယ်နဲ့ အသားအရည်ကို အားပြည့်စေပြီး အစာအိမ်အူလမ်းကြောင်းကို ကောင်းမွန်စေပါတယ်။

အချိန်မှန်ရေသောက်ပေးခြင်းဖြင့် ဆာလောင်စိတ်ကို လျော့နည်းစေကာ အဆီအဆိပ်တွေကို ဖယ်ရှားပေးပါတယ်။

ဒါကြောင့် ကယ်လိုရီပိုမိုလောင်ကျွမ်းစေပြီး ကိုယ်အလေးချိန်ကိုလည်း လျော့ကျစေပါတယ်။

လူတွေက ကျန်းမာလာတဲ့အခါ ပိုပြီးဆွဲဆောင်မှုရှိလာပါတယ်။

ရေချည်းသာသောက်ရင် အသားအရည်လည်း ပိုမိုစိုပြည်လာစေပြီး ရေဓာတ်က အရေပြားပေါ်က အဆိပ်အတောက်တွေကို ဖယ်ရှားပေးကာ အသားအရည်မွဲခြောက်ခြင်းမှ ကာကွယ်ပေးတဲ့အပြင် တင်းရင်းလှပစေပါတယ်။

ရေသောက်တဲ့အခါ ဦးနှောက်ကို ပုံမှန်ဖြစ်အောင်ထိန်းညှိပေးကာ ဦးနှောက်အနေနဲ့ လျင်မြန်ထိရောက်စွာ လုပ်ကိုင်နိုင်ပါတယ်။

ရေဓာတ်က ဆဲလ်တွေကို ပိုမိုထိရောက်စွာ ပြန်လည်အားဖြည့်စေတာကြောင့် ဦးနှောက်ကျန်းမာရေးကောင်းမွန်စေပါတယ်။

ဒါ့အပြင် ရေချည်းသာသောက်တဲ့အခါ ရောဂါဘယဖြစ်နိုင်ချေ နည်းပါးပါတယ်။

ဥပမာအားဖြင့် တစ်နေ့ကို ရေ ၅ ခွက်သောက်သုံးရင် နှလုံးဖောက်ခြင်းအန္တရာယ်ဖြစ်နိုင်ချေ ၄၁ ရာခိုင်နှုန်းလျှော့ချပေးပါတယ်။

အချိုရည်သောက်သုံးခြင်းကို စွဲလမ်းနေတယ်ဆိုရင် ဒီအကျင့်ကိုပြုပြင်သင့်ပြီး ရေကိုသာသောက်သုံးသင့်ပါတယ်။

ရေအရသာအတိုင်း မနှစ်သက်ဘူးဆိုရင်လည်း ပျားရည်နဲ့ သံပရာအနည်းငယ်ထည့်သောက်နိုင်ပါတယ်။

Source: Soo Healthy
#Yangon_Media_Group

#World_Tourism
Published 14 September 2022

ဂျီဟတ်ဒ်အစွန်းရောက်တွေ အုပ်စိုးစဉ်က ဖျက်ဆီးခံခဲ့ရတဲ့ အီရတ်မြောက်ပိုင်း ဟတ်တရာရှေးဟောင်းအပျက်အစီးမြို့ကို ဒေသတွင်းအာဏာပိုင်များက ပြန်လည်မွမ်းမံလျက်ရှိပြီး ခရီးသွားဧည့်သည်အချို့ကလည်း ထိုနေရာကို သဘောကျနေကြပါတယ်။

#Yangon_Media_Group