#World_Health
Published 18 December 2022

အခုနောက်ပိုင်းခေတ်မှာ အမျိုးသားတွေရဲ့ သုတ်ပိုးအကောင်ရေ သိသိသာသာလျော့နည်းလာကြကာ မျိုးမအောင်တဲ့ပြဿနာ အဖြစ်များလာကြပါတယ်။

တဲလ်အေဗစ်ဆူရာစကီဆေးစင်တာရှိ အမျိုးသားကျန်းမာရေးဌာန ညွှန်ကြားရေးမှူး ဒေါက်တာ'စနဲဒက်ကလို'က ဒီလိုဖြစ်ရတဲ့အကြောင်းကို ရှင်းပြသွားပါတယ်။

အရင်တုန်းက စုံတွဲတွေ ကလေးမရဘူးဆိုရင် အမျိုးသမီးတွေကြောင့်လို့ ယေဘုယျယူဆခဲ့ကြပါတယ်။

အခုခေတ်မှာတော့ ကလေးမရခြင်းရဲ့ ပြဿနာအကြောင်းအရင်း ၅၀ ရာခိုင်နှုန်းလောက်က အမျိုးသားတွေကြောင့်လည်း ဖြစ်တယ်လို့ သိလာကြပါပြီ။

ဒီအကြောင်းနဲ့ပတ်သက်ပြီးလည်း အချက်အလက်တွေက ရှုပ်ထွေးလျက်ရှိပြီး သုတ်ပိုးအကောင်ရေက တက်လိုက်ကျလိုက်ဖြစ်နေတတ်ပါတယ်။

သုတ်ပိုးကျဆင်းရခြင်းအကြောင်းအရင်း များစွာခန့်မှန်းနေကြပေမယ့် စိတ်ဖိစီးမှု၊ အဝလွန်ခြင်း၊ ဆေးလိပ်သောက်ခြင်း၊ ဘောင်းဘီအိတ်ထဲ လက်ကိုင်ဖုန်းထည့်ခြင်းတို့လောက် သေချာမသိကြပါဘူး။

ဒီပြဿနာအတွက် အမျိုးသမီးတွေကို ကုသတဲ့နည်းလမ်းများရှိသလို အမျိုးသားတွေအတွက်လည်း နည်းလမ်းတွေရှိပါတယ်။

သုတ်ရည်လွှတ်လိုက်တဲ့အထဲ ပမာဏ ၁ စီစီမှာ သုတ်ပိုးအကောင်ရေ ၁၅ သန်းရှိသင့်တဲ့အပြင် သုတ်ရည်ပမာဏ၊ သုတ်ပိုးလှုပ်ရှားနိုင်စွမ်းတို့ကိုလည်း အလေးထားရပါမယ်။

လှုပ်ရှားနိုင်စွမ်းကောင်းတဲ့ သုတ်ကောင်ရေ အနည်းဆုံး ၄၀ ရာခိုင်နှုန်းပါဝင်ဖို့လိုပြီး အရည်အသွေးလည်း ကောင်းရပါမယ်။

အမျိုးသားအယောက် ၁၀၀ မှာ တစ်ယောက်နှုန်းက သုတ်ရည်လွှတ်လိုက်တဲ့အထဲ သုတ်ပိုးလုံးဝမပါဝင်တာမျိုး ဖြစ်တတ်ပါတယ်။
ဓာတုကုထုံးများခံယူနေရတဲ့ အမျိုးသားတွေ၊ အကြောင်းအမျိုးမျိုးကြောင့် ဝှေးစေ့မဖွံ့ဖြိုးတဲ့အမျိုးသားတွေမှာ အဖြစ်များတတ်ပါတယ်။
အချို့လူတွေမှာတော့ သုတ်ပိုးထုတ်လွှတ်ရာ ဝှေးစေ့လမ်းကြောင်းမှာ ပိတ်ဆို့နေတာမျိုး ဖြစ်နေတတ်ပါတယ်။

သူတို့မှာတော့ သုတ်ပိုးထွက်ရှိတာဖြစ်တဲ့အတွက် ဝှေးစေ့ကနေ တိုက်ရိုက်ရရှိနိုင်အောင် ခွဲစိတ်နိုင်ရင် ၁၀၀ ရာခိုင်နှုန်းအောင်မြင်နိုင်ပါတယ်။

သုတ်ပိုးကောင်ရေနည်းခြင်း လှုပ်ရှားနိုင်စွမ်းနည်းခြင်းတို့မှာတော့ ကိုယ်အလေးချိန်လျှော့ချခြင်း၊ ဆေးလိပ်ဖြတ်ခြင်း စသဖြင့် နေထိုင်မှုပုံစံပြောင်းလဲပစ်ရပါတယ်။

ယောက်ျားတွေဟာ ဘဝတလျှောက်လုံး သုတ်ပိုးထုတ်လုပ်နိုင်ပေမယ့် အသက်ကြီးလာတာနဲ့အမျှ သုတ်ပိုးအရည်အသွေးကျဆင်းလာပါတယ်။
အခုခေတ်ဟာ မျိုးမအောင်တဲ့ပြဿနာဟာ ကိုယ်တစ်ယောက်တည်းဖြစ်တာ မဟုတ်ဘူးဆိုတာကို သိလာတာနဲ့အမျှ ပိုမိုပွင့်လင်းစွာပြောကြားလာကြတာကြောင့် ကုသမှုခံယူလာကြပါတယ်။

Source: The Jerusalem Post
#Yangon_Media_Group

#World_Health
Published 18 December 2022

ကိုယ့်ကိုယ်ကိုသတ်သေချင်စိတ်ဟာ အချို့လူတွေရဲ့ မျိုးရိုးဗီဇနဲ့ သက်ဆိုင်နေကြောင်း လေ့လာတွေ့ရှိထားပါတယ်။

မိမိကိုယ်ကိုသတ်သေခြင်း ဒါမှမဟုတ် သတ်သေချင်စိတ်ရှိတဲ့ စစ်မှုထမ်းဟောင်းတွေမှာ အတွေ့များတဲ့မျိုးရိုးဗီဇ ၄ မျိုးကို သိပ္ပံပညာရှင်များ တွေ့ရှိခဲ့ကြပါတယ်။

ထိုမျိုးရိုးဗီဇတွေက စိတ်ထိခိုက်ဒဏ်ရာရခြင်း၊ စိတ်ဓာတ်ကျခြင်း၊ စိတ်ကစဉ့်ကလျားဖြစ်စဉ်တို့နဲ့ ဆက်စပ်နေတာကို အရင်ကလည်း တွေ့ရှိခဲ့ကြပါတယ်။

ဒီမျိုးရိုးဗီဇတွေက သတ်သေချင်စိတ်ကို ဖြစ်စေပေမယ့် လူတွေရဲ့အနာဂတ်ကိုတော့ ဆုံးဖြတ်ပေးတာမဟုတ်ပါဘူး။

၂၀၂၀ မှာ အမေရိကန်လူမျိုး ၄၅,၉၇၉ ယောက် ကိုယ့်ကိုယ်ကိုသတ်သေခဲ့ပြီး စစ်မှုထမ်းဟောင်း ၆,၁၄၆ ယောက် ပါဝင်ခဲ့ပါတယ်။

အသက် ၄၅ နှစ်အောက် အမေရိကန်အမျိုးသားတွေမှာ ကိုယ့်ကိုယ်ကိုသတ်သေခြင်းက ဒုတိယသေဆုံးမှုအများဆုံး အကြောင်းအရင်းဖြစ်နေကြောင်း ရောဂါထိန်းချုပ်ကာကွယ်ရေးစင်တာရဲ့ အချက်အလက်တွေအရ သိရပါတယ်။

အမျိုးသမီးတွေမှာလည်း ၅၀ ရာခိုင်နှုန်း အဖြစ်များလာကာ ဆိုရှယ်မီဒီယာတွေကနေ စိတ်ဖိစီးမှုတွေနဲ့ မိမိကိုယ်ကိုယုံကြည်မှု ပြဿနာတွေ များလာတာက အဓိကသက်ဆိုင်နေနိုင်တယ်လို့ ပညာရှင်များက သတိပေးထားပါတယ်။

စစ်မှုထမ်းဟောင်း ၆၃၀,၀၀၀ ပါဝင်တဲ့ ဒေတာဘေ့စ်ထဲက သွေးနမူနာများကို မြောက်ကယ်ရိုလိုင်းနားမှ သုတေသီများ လေ့လာခဲ့ကြပါတယ်။
မျိုးရိုးဗီဇတွေက လူတိုင်းရဲ့သွင်ပြင်လက္ခဏာတွေနဲ့ ဦးနှောက်ဆောင်ရွက်ပုံတို့မှာ ပါဝင်ပတ်သက်နေပါတယ်။

လူတစ်ယောက်မှာ မျိုးရိုးဗီဇအတွဲပေါင်း ၂ သောင်းခန့်ရှိပါတယ်။
ဖခင်ဆီက တစ်ခုနဲ့ မိခင်ဆီက တစ်ခုတို့ဟာ သားအိမ်ထဲမှာပေါင်းစပ်ပြီး တစ်စုံဖြစ်သွားပါတယ်။

မျိုးရိုးဗီဇကွဲပြားချက်အရ လူတစ်ယောက်ရဲ့ ဦးနှောက်၊ အာရုံကြောစနစ်၊ ခန္ဓာကိုယ်လုပ်ဆောင်မှုတို့ဟာ စိတ်ကျန်းမာရေးအပေါ် သိသိသာသာပြောင်းလဲမှု ဖြစ်ပေါ်စေပါတယ်။

စမ်းသပ်ခဲ့တဲ့သူတွေထဲမှာ မိမိကိုယ်ကိုသတ်သေချင်သူနဲ့ သတ်သေဖို့ကြိုးပမ်းခဲ့သူ ၁၂၁,၂၁၁ ဦးရှိခဲ့ပါတယ်။

ထိုလူတွေမှာ အတွေ့အများဆုံးမျိုးရိုးဗီဇ ၄ မျိုးက ESR1, DRD2, DCC နဲ့ TRAF3 တို့ဖြစ်ပါတယ်။

မျိုးရိုးဗီဇတွေက အခြားပြဿနာအန္တရာယ်တွေမှာ သိပ်ပြီးမသက်ရောက်ပေမယ့် သတ်သေချင်စိတ်နဲ့ ပတ်သက်လာရင်တော့ ဇီဝဖြစ်စဉ်လမ်းကြောင်းတွေကို သိထားဖို့လိုပါတယ်လို့ ဒေါက်တာ'‌နသန်ကင်ဘရယ်လ်'က ဖော်ပြထားပါတယ်။

ကိုယ့်ကိုယ်ကိုသတ်သေချင်တဲ့စိတ်ဟာ အချို့လူမျိုး‌တွေနဲ့ ပိုမိုသက်ဆိုင်တယ်ဆိုတဲ့ ပတ်သက်မှုမျိုးတော့ မတွေ့ခဲ့ကြပါဘူး။

Source: DailyMail
#Yangon_Media_Group

#World_Species
Published 17 December 2022

မျိုးသုဉ်းပျောက်ကွယ်လုနီးပါးဖြစ်နေတဲ့ အာဖရိကကုန်းတွင်းလိပ်အကောင်ရေ တိုးများလာစေရန်ရည်ရွယ်ပြီး လိပ်ကောင်ရေ ၅၀ ခန့်ကို မိုနာကိုကနေ ဆီနီဂေါကို စနေနေ့က ပို့ဆောင်နေပြီဖြစ်ပါတယ်။

#Yangon_Media_Group

Published 17 Dec 2022

အဆိပ်သင့်တဲ့အရက်ကြောင့် အိန္ဒိယနိုင်ငံ အရှေ့ပိုင်း ဘီဟာပြည်နယ်မှာ လူ ၃၇ ဦးသေဆုံးခဲ့ရတယ်လို့ ဒီဇင်ဘာ ၁၇ ရက် စနေနေ့မှာ အရာရှိတွေကပြောပါတယ်။ အဲဒီပြည်နယ်ဟာ အရက်သောက်သုံးခြင်း တားမြစ်ထားတဲ့ပြည်နယ်ဖြစ်ပြီး အတည်မပြုရသေးတဲ့သတင်းတွေအရ သေဆုံးသူအရေအတွက်ဟာ ၆၀ကျော်အထိရှိနေတယ်လို့လည်းသိရပါတယ်။

အိန္ဒိယနိုင်ငံရဲ့ နေရာတော်တော်များများမှာ အရက်ကိုရောင်းချသောက်သုံးခြင်းတွေကို တားမြစ်ထားတဲ့အတွက် အရက်ပုန်းသမား ပုရိဿတွေအတွက် မှောင်ခိုဈေးကွက်ဟာ အလုပ်ဖြစ်နေခဲ့ပါတယ်။ အဲဒီမှောင်ခိုအရက်တွေဟာ တစ်ခါတစ်ရံမှာ အက်သနောတွေထည့်ထားလို့ နှစ်စဉ် လူရာနှင့်ချီသေဆုံးနေခဲ့ကြရပါတယ်။

ဒေသကထုတ်တဲ့ချက်အရက် မာဟွာနှင့် ဒေစီဒါရူးတွေကို  တနင်္လာနေ့က မင်္ဂလာဆောင်တစ်ခုနှင့် အခြားပွဲတွေမှာ ရွာတော်တော်များများက ရွာသားတွေ သောက်သုံးခဲ့ကြတယ်လို့ နောက်ဆုံးအဖြစ်ဆိုးမှာ သေဆုံးသူတွေရဲ့ မိသားစုဝင်တွေကပြောပါတယ်။

တော်တော်များများဟာ ဗိုက်အောင့်ပြီး အမြင်အာရုံပျောက်ကုန်တယ်လို့ ပြောဆိုလာကြပြီးနောက် အော့အန်လာကြပါတယ်။ ကြာသပတေးနေ့အထိ နောက်ထပ် ၂၀ ဦးသေဆုံးခဲ့ပြီး စနေနေ့မှာတော့ လူဒါဇင်ခန့်ဟာ‌ ဆေးရုံမှာ အသည်းအသန်ဖြစ်နေကြပါတယ်။

“ ပြီးခဲ့တဲ့ ၄၈ နာရီအတွင်း လူပေါင်း နှစ်ဒါဇင်ကျော် သေဆုံးခဲ့တယ်” လို့ ပုလိပ်အရာရှိ တစ်ဦးက အေအက်ဖ်ပီကို ပြောပါတယ်။ အခုအထိ ၃၇ ဦးသေဆုံးခဲ့ပြီလို့လည်း သူကပြောပါတယ်။  ဒါပေမယ့် ဒေသမီဒီယာတွေက သတင်းရေးနေကြတဲ့ ၆၂ ဦးသေတယ်ဆိုတာကိုတော့ သူက အတည်ပြုမပေးနိုင်ပါဘူး။

တရားမဝင်အရက်ချက်လုပ်ရောင်းချတာနှင့်ပတ်သက်တဲ့ လူ၁၀၀ကျော်ကို လွန်ခဲ့တဲ့ သုံးရက်အတွင်း ရဲက ထိန်းသိမ်းလိုက်ပါတယ်။အရက် ၆၀၀လီတာကျော်ကိုလည်း သိမ်းဆည်းခဲ့ပါတယ်။

မှောင်ခိုဈေးကွက်နှိမ်နှင်းဖို့ ဒေသအာဏာပိုင်တွေဟာ ဒရုန်းတွေ၊ရဟတ်ယာဉ်တွေနှင့် မော်တော်ဘုတ်တွေအသုံးပြု ကြိးစားခဲ့ကြပေမယ့် အခုနောက်ဆုံး ဖြစ်ရပ်ဟာ အလားတူဖြစ်ရပ်တွေ ဆက်တိုက်ဖြစ်ခဲ့တာတွေမှာ နောက်ဆုံးဖြစ်ခဲ့ရတာလို အေအက်ဖ်ပီကသတင်းပေးပို့ပါတယ်။

Source AFP

#Toxic_alcohol_kills_37_in_India

#Toxic Alcohol_incident_Bihar

#India_Illegal_Alcohol_business

#Ukraine_Crisis
Published 17 December 2022

သောကြာနေ့မှာ ရုရှားတို့က ယူကရိန်းဘက်ကို ဒုံးကျည် ၇၀ ကျော်ပစ်ခတ်ခဲ့ရာ စစ်ပွဲစတင်ပြီးနောက်ပိုင်း အကြီးမားဆုံးတိုက်ခိုက်မှုတွေထဲက တစ်ခုဖြစ်ခဲ့ပါတယ်။

ယခုပစ်ခတ်မှုကြောင့် ယူကရိန်းရဲ့ ဒုတိယအကြီးဆုံးမြို့မှာ လျှပ်စစ်ဓာတ်အားပြတ်တောက်သွားပြီး နိုင်ငံအနှံ့အရေးပေါ်ဓာတ်အားဖြတ်တောက်လိုက်ရကြောင်း ယူကရိန်းအရာရှိများက ပြောကြားလိုက်ပါတယ်။

ခရီဗီရိအလယ်ပိုင်းက လူနေအဆောက်အအုံကို ထိမှန်ခဲ့ကာ လူ ၃ ဦးသေဆုံးခဲ့ပြီး တောင်ပိုင်းမြို့ခါဆန်မှာ တစ်ဦးသေဆုံးခဲ့ပါတယ်။

ရုရှားဘက်က အရာရှိများပြောကြားရာမှာတော့ ရုရှားတို့သိမ်းပိုက်ထားတဲ့ ယူကရိန်းအရှေ့ပိုင်းမှာ ယူကရိန်းတို့တိုက်ခိုက်မှုကြောင့် လူ ၁၂ ဦးသေဆုံးခဲ့တယ်လို့ ထုတ်ပြန်ထားပါတယ်။

ယူကရိန်းသမ္မတ'ဗိုလိုဒီမီယာဇယ်လန်စကီ'က ညနေခင်းဗီဒီယိုမိန့်ခွန်းမှာပြောကြားရာမှာ ရုရှားက နောက်ထပ်တိုက်ခိုက်မှုကြီးများပြုလုပ်ရန် ဒုံးကျည်အများအပြားရှိနေသေးကြောင်း ဆိုလိုက်ကာ ယူကရိန်းအတွက် ပိုမိုအားကောင်းတဲ့ လေကြောင်းကာကွယ်ရေးလက်နက်များ ထပ်မံထောက်ပံ့ပေးဖို့ အနောက်မဟာမိတ်နိုင်ငံများကို တောင်းဆိုလိုက်ပါတယ်။

ယူကရိန်းအနေနဲ့ ပြန်လာနိုင်ဖို့အတွက် စွမ်းဆောင်နိုင်ကြောင်း၊ ရုရှားက ဘယ်လောက်ပဲဒုံးကျည်တွေ ပစ်ခတ်နေပါစေ ဒီစစ်ပွဲရဲ့အင်အားမျှခြေက ပြောင်းလဲသွားမှာမဟုတ်ကြောင်း မိန့်ကြားခဲ့ပါတယ်။
ရုရှားတို့က နောက်နှစ်အစောပိုင်းမှာ တိုက်ခိုက်ရေးအစီအစဉ်တွေနဲ့ တိုက်ခိုက်ရန်စီစဉ်နေကြောင်းလည်း ယူကရိန်းက သတိပေးလိုက်ပါတယ်။

ယူကရိန်းနယ်မြေအများအပြားကို ရုရှားတို့က ဒုံးကျည်များ အမြှောက်များဖြင့် တိုက်ခိုက်နေပေမယ့် နယ်မြေအနည်းစုကိုသာ သိမ်းပိုက်နိုင်ပါသေးတယ်။

ရုရှားတို့ဟာ စစ်မြေပြင်တွေမှာ ရှုံးနိမ့်လာပြီးနောက် အောက်တိုဘာအစောပိုင်းကတည်းက ယူကရိန်းရဲ့ စွမ်းအင်ထုတ်လုပ်ရေးအဆောက်အအုံများကို ပစ်မှတ်ထားတိုက်ခိုက်လာခဲ့ရာ သောကြာနေ့တိုက်ခိုက်မှုကတော့ ပိုပြီးပြင်းထန်ခဲ့ပါတယ်။

ပြီးခဲ့တဲ့ရက်များက ပြုပြင်မှုများပြုလုပ်ပြီးနောက် ဓာတ်အားထုတ်လွှတ်ရေးစက်ရုံယူကရီနာဂိုက ဓာတ်အားပြန်လည်ပေးဝေနေပေမယ့် ပြင်ဆင်ဖို့ အချိန်တွေထပ်လိုအပ်သေးကြောင်း သတိပေးလိုက်ပါတယ်။

ရုရှားဘက်ကပစ်လိုက်တဲ့ ဒုံးကျည် ၇၆ စင်းအနက် အစင်း ၆၀ ကို ယူကရိန်းကာကွယ်ရေးက ပစ်ချနိုင်ခဲ့ပေမယ့် ဓာတ်အားပေးစက်ရုံ အနည်းဆုံး ၉ ခုထိမှန်ခဲ့ကြောင်း စွမ်းအင်ဝန်ကြီးက ထုတ်ပြန်ထားပါတယ်။

ရုရှားကတော့ ဒီတိုက်ခိုက်မှုတွေဟာ ယူကရိန်းစစ်တပ်ကို ဖြိုခွဲဖို့ရည်ရွယ်တာဖြစ်တယ်လို့ ဆိုပေမယ့် ယူကရိန်းကတော့ ဒါဟာ စစ်ရာဇဝတ်မှုဖြစ်တယ်လို့ တုန့်ပြန်လိုက်ပါတယ်။

"သူတို့က ကျွန်မတို့ကိုဖျက်ဆီးပြီး ကျေးကျွန်လုပ်ခိုင်းချင်တာပါ၊ ဒါပေမဲ့ ကျွန်မတို့အရှုံးပေးမှာမဟုတ်ပါဘူး" လို့ ကိဗ်မြို့တော်မှ အသက် ၅၃ နှစ်အရွယ်အမျိုးသမီးတစ်ဦးက ပြောကြားခဲ့ပါတယ်။

သောကြာနေ့နှောင်းပိုင်းအထိ အရပ်သား ၃ ပုံ ၁ ပုံလောက်ကသာ လျှပ်စစ်ဓာတ်အား ၄၀ ရာခိုင်နှုန်း၊ အပူပေးစနစ်နဲ့ ရေတို့ ရရှိနေကာ အဓိကသွားလာရေးဖြစ်တဲ့ ရထားလမ်းကြောင်းများ ပိတ်ထားရပါတယ်။

ယူကရိန်းပြည်သူများအနေနဲ့ စိတ်ရှည်သည်းခံဖို့ သမ္မတက တိုက်တွန်းလိုက်ကာ အရေးပေါ်ဓာတ်အားပေးနိုင်ရန် ဒေသဆိုင်ရာအာဏာပိုင်များကို မှာကြားလိုက်ပါတယ်။

Source: Reuters
#Yangon_Media_Group

#World_Health
Published 17 December 2022

အရေပြားကင်ဆာအကျိတ် ပြန်လည်ဖြစ်ပွားခြင်းကို တားဆီးပေးပြီး အခြားကင်ဆာတွေကိုလည်း ကာကွယ်ပေးနိုင်တဲ့ မိုဒါနာကင်ဆာကာကွယ်ဆေးအသစ်ဟာ ထိရောက်မှုရှိကြောင်း တွေ့ရှိလာကြောင်း ဝေါလ်စထရိဂျာနယ်မှာ ဖော်ပြခဲ့ပါတယ်။

ခွဲစိတ်ပြီးသားလူနာတွေပါ ပါဝင်တဲ့ဒုတိယအဆင့်စမ်းသပ်မှုမှာ ထိုကာကွယ်ဆေးကို Merck မှထုတ်လုပ်တဲ့ Keytruda ကိုယ်ခံအားမြှင့်တင်ဆေးနဲ့ တွဲဖက်အသုံးပြုစေခဲ့ပါတယ်။

ထိုအခါ Keytruda တစ်မျိုးတည်း အသုံးပြုတုန်းကထက် အရေပြားကင်ဆာကြောင့် သေဆုံးနိုင်ချေ၊ ရောဂါပြန်လည်ဖြစ်ပွားနိုင်ချေ ၄၄ ရာခိုင်နှုန်း ပိုနည်းသွားပါတယ်။

တကယ်ထိရောက်တဲ့ ကင်ဆာကာကွယ်ဆေးကို ပထမဆုံးမြင်တွေ့ရတာဖြစ်ကြောင်း Merck ကုမ္ပဏီမှ ဆေးမှူးချုပ်'အယ်လီယက်ဗ်ဘား'က ပြောပြခဲ့ပါတယ်။

ကာကွယ်ဆေးက ပြင်ပမှသုံးသပ်မှု မပြုရသေးပေမယ့် မိုဒါနာကိုဗစ်ကာကွယ်ဆေးရဲ့ mRNA ပုံစံကိုအသုံးချထားတာဖြစ်ပြီး မျိုးရိုးဗီဇနဲ့ ဆက်နွယ်တဲ့နည်းပညာကို ပထမဆုံးအသုံးပြုထားတာဖြစ်ပါတယ်။

ကာကွယ်ဆေးဘေးကင်းစိတ်ချရစေရန် ပိုမိုကြီးမားတဲ့စမ်းသပ်မှုပြုလုပ်သွားဖို့ ကုမ္ပဏီနှစ်ဖက်စလုံးမှ စီစဉ်နေကြပါတယ်။

စမ်းသပ်မှုအခြေအနေကောင်းပါက နောက်ထပ်ကင်ဆာအမျိုးအစားတွေကိုပါ စမ်းသပ်ဖို့ ခွင့်ပြုချက်ရသွားနိုင်ပါတယ်။

ဆေးနှစ်မျိုးစလုံးနဲ့ ကုသခြင်းက Keytruda ရဲ့ထိရောက်မှုကို ပိုမိုအားကောင်းလာစေပြီး အကျိတ်တွေကိုဖျက်ဆီးဖို့ ခန္ဓာကိုယ်ရောဂါခုခံအားစနစ်ကို မြှင့်တင်ပေးပါတယ်။

Source: NY Post
#Yangon_Media_Group