#World_News
Published 20 December 2023

ဒေါ်နယ်ထရမ့်သာ ၂၀၂၄ သမ္မတရွေးကောက်ပွဲမှာ အနိုင်ရပါက ယူကရိန်း-ရုရှားစစ်ပွဲ သိသိသာသာ ပြောင်းလဲသွားလိမ့်မယ်လို့ ယူကရိန်းသမ္မတ ဗိုလိုဒီမီယာဇယ်လန်စကီက ဒီဇင်ဘာ ၁၉ ရက်နေ့က ပြောကြားလိုက်ပါတယ်။

စစ်ပွဲဒဏ်ခံနေရတဲ့ ယူကရိန်းအပေါ် အမေရိကန်ထောက်ပံ့ကူညီမှုတွေ လျော့နည်းလာမှာကို စိုးရိမ်နေရတဲ့အတွက် ဇယ်လန်စကီက အခုလို ပြောကြားလာတာ ဖြစ်ပါတယ်။

နောက်တက်မယ့်သမ္မတ ဘယ်သူပဲဖြစ်ဖြစ် ယူကရိန်းအပေါ်ထားမယ့် မူဝါဒက ပြောင်းလဲသွားနိုင်ကာ ပိုပြီးဆက်ဆံရေး အေးသွားတာမျိုး ပိုပြီးအကျိုးရှိလာတာမျိုး ဖြစ်နိုင်ပြီး ထိုကိစ္စတွေက စစ်ပွဲရဲ့လားရာအပေါ် များစွာ သက်ရောက်လိမ့်မယ်လို့ ဇယ်လန်စကီက မီဒီယာရှင်းလင်းပွဲတစ်ခုမှာ ပြောကြားခဲ့ပါတယ်။

စစ်တမ်းများအရ ယခုအချိန်အထိ ထရမ့်က ရီပတ်ဘလစ်ကန် နိုင်ငံရေးသမားစာရင်းမှာ ဦးဆောင်နေဆဲဖြစ်ပေမယ့် အကျဥ်းချခံရလောက်တဲ့ တရားဥပဒေကိစ္စတွေနဲ့ ရင်ဆိုင်နေရပါတယ်။

ထရမ့်က သူဟာ စစ်ပွဲကိုရပ်တန့်နိုင်ကြောင်းနဲ့ ယူကရိန်းကို ဂျိုးဘိုင်ဒင် စစ်ရေးထောက်ပံ့ကူညီနေတာကိုလည်း ဆန့်ကျင်ပြောဆိုလိုက်ပါတယ်။

ဇယ်လန်စကီကတော့ အမေရိကန်အနေနဲ့ သစ္စာမဖောက်ဘဲ သဘောတူညီထားတာတွေကို အပြည့်အဝ ဆောင်ရွက်ပေးမယ်လို့ ယုံကြည်ထားကြောင်း သတင်းထောက်တွေကို ပြောပြသွားပါတယ်။

ရုရှားရဲ့ မောက်မှုတွေ သတ်ဖြတ်မှုတွေကိုသာ မြင်နေရကြောင်း၊ စစ်ပွဲဘယ်တော့မှ အဆုံးသတ်မလဲဆိုတာ မသိကြောင်း ဆိုပါတယ်။

ပင်လယ်နက်မှာ ယူကရိန်းက ရုရှားစစ်သင်္ဘောတွေကို တိုက်ခိုက်နိုင်ခဲ့ပြီး ရေကြောင်းကုန်သွယ်ရေး လမ်းကြောင်းတွေကို ဘေးကင်းလုံခြုံအောင် ပြုလုပ်နိုင်ခဲ့တယ်လို့လည်း ဆိုပါတယ်။

ယူကရိန်းစစ်တပ်ဟာ ရုရှားတပ်တွေနဲ့ တိုက်ခိုက်ဖို့ တပ်သားသစ်များ စုဆောင်းရာမှာ ခက်ခဲနေတယ်လို့ စစ်တပ်အရာရှိများက AFP ကို ပြောကြားသွားပါတယ်။

၂၀၂၂ ဖေဖော်ဝါရီကတည်းက တိုက်ခိုက်လာတဲ့ ယူကရိန်းတပ်သားတွေဟာ ပင်ပန်းနွမ်းနယ်နေပြီဖြစ်ပြီး သေဆုံးသူတွေ ဒဏ်ရာရသူတွေနေရာမှာ အစားထိုးမယ့် လုပ်အားပေးတပ်သားတွေကလည်း ရှားပါးလာပါတယ်။

ယူကရိန်းအနေနဲ့ တပ်သားအများအပြား မစုဆောင်းနိုင်မှာကို ဇယ်လန်စကီက သတိပေးသွားပါတယ်။

#World_News #ဒေါ်နယ်ထရမ့် #အမေရိကန်သမ္မတ #ဇယ်လန်စကီ #Source: WION

#World_Health
Published 20 December 2023

တရုတ်ကုမ္ပဏီတစ်ခုမှ ထုတ်လုပ်လိုက်တဲ့ ဆေးတစ်မျိုးဟာ တွေ့ရခဲတဲ့ အဆုတ်ကင်ဆာတစ်မျိုးကို ထိရောက်စွာ တိုက်ဖျက်နိုင်တယ်လို့ SCMP က ဖော်ပြလိုက်ပါတယ်။

ပလက်တီနမ် အခြေပြုကုသနည်း အသုံးပြုလို့မရတဲ့ ထိုအဆုတ်ကင်ဆာတစ်မျိုးဟာ ထိုဆေးကိုတော့ ထိရောက်စွာ တုန့်ပြန်တာကို တွေ့ရှိခဲ့ကြပါတယ်။

တရုတ်အမျိုးသား ဆေးဝါးထုတ်ကုန် စီမံကွပ်ကဲရေးနဲ့ အမေရိကန် အစားအစာနဲ့ဆေးဝါး ကွပ်ကဲရေးတို့က ထိုဆေးကို အောင်မြင်တဲ့ကုသနည်းအဖြစ် သတ်မှတ်လိုက်ပါတယ်။

Sunvozertinib လို့ခေါ်တဲ့ဆေးဖြင့် ကင်ဆာအဆင့်မြင့်လူနာ ၁၀၄ ဦးကို ဒုတိယအဆင့် လက်တွေ့စမ်းသပ်ရာမှာ ၆၁ ရာခိုင်နှုန်းက ကင်ဆာအကျိတ်ကို ဆန့်ကျင်နိုင်ခဲ့ပါတယ်။

တရုတ်အရှေ့ပိုင်း ကျန်ဆုပြည်နယ်ရှိ Dizal ကုမ္ပဏီကနေ ထိုဆေးကို ထုတ်လုပ်လိုက်တာ ဖြစ်ပါတယ်။

အကျိတ်မှာ မျိုးဗီဇပြောင်းလဲတဲ့ အဆုတ်ကင်ဆာတစ်မျိုးကို တိုက်ဖျက်ရန် ရည်ရွယ်ပြီး ထိုဆေးကို ထုတ်လုပ်ခဲ့တာ ဖြစ်ပါတယ်။

တရုတ်နိုင်ငံရှိ ဆေးဘက်ဆိုင်ရာ စင်တာ ၃၇ ခုမှာ sunvozertinib ဒုတိယအဆင့် စမ်းသပ်မှုကို ပြုလုပ်ခဲ့ကြပါတယ်။

လူနာတွေထဲက ၆၁ ရာခိုင်နှုန်းက မျှော်မှန်းတဲ့အတိုင်း ဆေးကိုတုန့်ပြန်နိုင်ခဲ့ပြီး ၅၉ ဦးရှိခဲ့ပါတယ်။

#World_Health #အဆုတ်ကင်ဆာ #တိုက်ဖျက်နိုင်ကြောင်း #Source: WION

#World_Health
Published 20 December 2023

ဒီဇင်ဘာလ ပထမရက်သတ္တပတ်အတွင်း စင်္ကာပူနိုင်ငံမှာ ကိုရိုနာဗိုင်းရပ်စ် ကူးစက်မှုများ စံချိန်တင်မြင့်တက်ခဲ့ပါတယ်။

ကျန်းမာရေးဝန်ကြီးဌာန (MOH)က နှာခေါင်းစည်းတပ်ဆင်ကြရန် အလေးအနက် တိုက်တွန်းထားပါတယ်။

ဒီဇင်ဘာ ၃ ရက်နေ့မှ ၉ ရက်နေ့အထိ ကိုဗစ်ရောဂါကူးစက်မှု ၅၆,၀၀၀ ကျော်ရှိခဲ့ပြီး ထိုမတိုင်ခင် ရက်သတ္တပတ်က ၃၂,၀၀၀ ကျော် ရှိခဲ့တာဖြစ်ပါတယ်။

ဆေးရုံတက်ရောက်ကုသခံယူမှုက နေ့စဥ်ပျမ်းမျှ ၂၂၅ ဦးရှိရာကနေ ၃၅၀ ရှိလာပြီး အထူးကြပ်မတ်ကုသမှု ခံယူရသူ နေ့စဥ်ပျမ်းမျှ ၄ ဦးကနေ ၉ ဦးအထိ များပြားလာပါတယ်။

လက်ရှိမှာ အဖြစ်များနေတဲ့ ကိုရိုနာမျိုးဗီဇကွဲက BA.2.86 ရဲ့ မျိုးရိုးကွဲဖြစ်တဲ့ JN.1 ဖြစ်တယ်လို့ စင်္ကာပူအစိုးရက ဆိုပါတယ်။

နိုင်ငံတကာမှ ရရှိထားတဲ့ အချက်အလက်များအရ BA.2.86 နဲ့ JN.1 တို့ဟာ ယခင်မျိုးဗီဇကွဲတွေထက် ပိုမိုကူးစက်မြန်ပြီး ရောဂါပြင်းထန်စေသလားဆိုတာ မသိရသေးပါဘူး။

ရောဂါကူးစက်သူတွေအနေနဲ့ အိမ်မှာသာနေထိုင်ပြီး အခြားသူတွေနဲ့ ထိတွေ့ခြင်းမပြုလုပ်ဖို့၊ လူမှုကာကွယ်ရေး အတိုင်းအတာများ ဆောင်ရွက်ကြဖို့ MOH က တိုက်တွန်းထားပါတယ်။

အမှန်တကယ် ရောဂါပြင်းထန်တဲ့သူတွေသာ အရေးပေါ်ဌာနသို့ လာရောက်ကြဖို့ တိုက်တွန်းလိုက်ပြီး ဒါမှသာ အမှန်တကယ် ပြင်းထန်စွာခံစားရတဲ့ လူနာတွေအတွက် ကုတင်လုံလောက်မှာ ဖြစ်တယ်လို့ ကြေညာလိုက်ပါတယ်။

လူနာတွေ ပိုမိုထားရှိနိုင်ဖို့အတွက် စင်္ကာပူအိတ်စ်ပိုဟော ၁၀ မှာ ကိုဗစ်၁၉ ကုသရေးစင်တာ ဖွင့်လှစ်သွားဖို့ကိုလည်း ကြေညာထားပါတယ်။

ကျန်းမာရေးစောင့်ရှောက်မှုစနစ်အတွက် MOH က အစိုးရဆေးရုံများနဲ့ တိုင်ပင်ဆွေးနွေးနေပါတယ်။

ချက်ချင်းစောင့်ရှောက်ကုသမှု ခံယူရန်လိုအပ်တဲ့ လူနာများကို ထိန်းသိမ်းရန်အတွက်လည်း စီစဥ်နေပါတယ်။

#World_Health #စင်္ကာပူတွင်ကိုဗစ်-၁၉ရောဂါကူးစက်မှု #စံချိန်တင်မြင့်တက်နေ #နှာခေါင်းစည်းတပ်ဆင်ရန်ညွှန်ကြား #Source: WION

ကလေး(၃)ယောက်နှင့် အထက်မွေးဖွားသည့်မိသားစုများအတွက် အခမဲ့တက္ကသိုလ်အဆင့်ပညာရေးခံစားခွင့်ရရှိရေးဂျပန်အစိုးရစီစဥ်

ဂျပန်အစိုးရက တိုင်းပြည်မှာ ကလေးမွေးဖွားမှုနှုန်း ကျဆင်းနေတာကို ဖြေရှင်းတဲ့အနေဖြင့် ၂၀၂၅ ခုနှစ်ကစတင်ကာ ကလေး ၃ ယောက်နဲ့အထက်မွေးတဲ့ မိသားစုတွေအတွက် တက္ကသိုလ်အဆင့် ပညာရေးကို အခမဲ့ဖန်တီးပေးရန် စီစဥ်နေပါတယ်။
#Asia_News
Published 19 December 2023
#ကလေး(၃)ယောက်နှင့်အထက်မွေးဖွား #အခမဲ့တက္ကသိုလ်အဆင့်ပညာရေးခံစားခွင့်ရရှိ
#Yangon_Times #YMG_News #Yangon_Media_Group

၁၉ ဒီဇင်ဘာ။

လာမည့်လ အထွေထွေရွေးကောက်ပွဲမတိုင်ခင် အစိုးရကိုနှုတ်ထွက်ပေးရန် တောင်းဆိုဖို့ အတိုက်အခံတွေကိုဖိအားပေးတဲ့ ကန့်ကွက် ဆန္ဒပြပွဲတွေကို ဘင်္ဂလားဒေ့ရှ်နိုင်ငံမှာ နိုင်ငံအနှံ့ပြုလုပ်နေပြီး ဒီဇင်ဘာ ၁၉ရက်က ဆန္ဒပြသူတွေဟာ ရထားတစ်စီးကို မီးရှို့လိုက်တဲ့ အတွက် လူလေးဦးသေဆုံးသွားရပါတယ်။ သေဆုံးသူတွေထဲမှာ မိခင်တစ်ဦးနှင့်ကလေးငယ်တို့ပါဝင်တယ်လို့ ရိုက်တာသတင်းဌာနက သတင်းရေးသားပါတယ်။

အောက်တိုဘာ ၂၈ရက်ကတည်းက စတင်ခဲ့တဲ့ အစိုးရဆန့်ကျင်ရေးဆန္ဒပြပွဲတွေကနေအကြမ်းဖက်ပုံစံပြောင်းလဲသွားပြီးနောက်  ဒါဇင်ပေါင်းများစွာသော ဘတ်စကားနှင့်ယာဉ်များ မီးရှို့ဖျက်ဆီးခံရပြီး လူပေါင်း ခြောက်ဦးထက်မနည်းသေဆုံးခဲ့ရပြီးဖြစ်ပါတယ်။

“ ဆန္ဒပြသူတွေဟာ အမြန်ရထားတစ်စီးရဲ့ ရထားတွဲ(၃)တွဲကို မီးရှို့ဖျက်ဆီးခဲ့ကြပါတယ်။ ရထားတွဲတစ်ခုက အလောင်း(၄)လောင်း ရရှိပါတယ်” လို့ မီးသတ်ဌာနအရာရှိ ရှားဂျာဟန်ရှစ်ဒါက ပြောပါတယ်။

သေဆုံးသူတွေထဲမှာ အသက်၃၂နှစ်အရွယ်အမျိုးသမီးတစ်ဦးနှင့်သူမရဲ့ သုံးနှစ်အရွယ်သားကလေးလည်းပါဝင်ပါတယ်။

ရထားထဲ ခရီးသည်ဘယ်နှစ်ဦးစီးနင်းလိုက်ပါခဲ့သလဲဆိုတာမသိရပါဘူး။ ရထားဟာ မြောက်ပိုင်းက နီထရိုကိုနာခရိုင်မှ မြို့တော် ဒါကာကို ဦးတည်ခုတ်မောင်းခဲ့တာဖြစ်ပါတယ်။ ခရီးဆုံးရောက်ခါနီးမှာ ရထားမီးလောင်တာကို ခရီးသည်တွေ တွေ့ရှိခဲ့ကြပါတယ်။

“ ရထားကိုမီးရှို့တာအပြင် နေရာတော်တော်များများမှာလည်း ရထားလမ်းအစိတ်အပိုင်းတွေကို ဖြုတ်ထားကြတယ်” လို့ ရထားဝန်ကြီး နူယူအစ္စလမ်ဆူဂျန်ကပြောပါတယ်။ ဒီလောက်ကြီးမားတဲ့ရထားလိုင်းကြီးမှာ လုံလောက်တဲ့ လုံခြုံရေးထားရှိဖို့ဆိုတာ ခက်ခဲပါတယ်” လို့လည်း ဝန်ကြီးကဆက်ပြောပါတယ်။

ဘင်္ဂလားဒေ့ရှ်အတိုက်အခံပါတီဖြစ်တဲ့ ဘင်္ဂလားဒေ့ရှ်အမျိုးသားရေးဝါဒီပါတီ(ဘီအင်န်ပီ)ရဲ့ ထိပ်ပိုင်းခေါင်းဆောင်တွေဟာ ထောင်ကျနေကြတာ ဒါမှမဟုတ် ပြည်ပေးဘဝရောက်နေကြတာတွေရှိနေပါတယ်။ အဲဒါကြောင့် ဘီအင်န်ပီက ဝန်ကြီးချုပ် ရှိတ်ဟာဆီနာကို ရာထူးကဆင်းပေးဖို့နှင့် သပိတ်မှောက်ထားပြီးဖြစ်တဲ့ ဇန်နဝါရီ (၇)ရက်ရွေးကောက်ပွဲကို ကြီးကြပ်ရန် ကြားနေအစိုးရတစ်ရပ်အတွက် လမ်းဖွင့်ပေးဖို့ လိုလားနေကြပါတယ်။

သူမရဲ့ ငါးနှစ်တစ်ကြိမ်ဝန်ကြီးချုပ်သက်တမ်းရဲ့ စတုတ္ထမြောက်သက်တမ်းကို ဆက်သွားလိုတဲ့ ဟာဆီနာက အတိုက်အခံတွေတောင်းဆိုတဲ့ ရာထူးကဆင်းပေးဖို့ဆိုတာကို ပြန်ပယ်ချခဲ့ပါတယ်။ လတ်တလောလမ်းပေါ်ကသေဆုံးနေရမှုတွေအတွက် သူမက ဘီအင်န်ပီကို အပြစ်တင် လိုက်ပါတယ်။

ဘီအင်န်ပီ အကြီးတန်းခေါင်းဆောင်တစ်ဦးဖြစ်တဲ့ ရာဟုကာဘီယာရစ်ဗီက ရထားမီးရှို့ခဲ့တဲ့ဖြစ်ရပ်အတွက် စုံစမ်းစစ်ဆေးမှုပြုလုပ်ဖို့ တောင်းဆိုလိုက်ပါတယ်။  “ဒီလိုကောက်ကျစ်ယုတ်မာတဲ့အလုပ်တွေကိုလုပ်သူတွေဟာ တရားမဝင် ပြည်သူ့ဆန့်ကျင်ရေးအင်အားစုတွေရဲ့ အကူအညီနှင့်ပဲလုပ်နိုင်ကြဖို့များတယ်” လို့သူကပြောပါတယ်။

လူ့အခွင့်အရေးအုပ်စုတွေက အတိုက်အခံခေါင်းဆောင်တွေနှင့်ယင်းတို့ကိုထောက်ခံသူတွေကို ပစ်မှတ်ထားနေတယ်လို့ အစိုးရကို စွပ်စွဲထားပါတယ်။ အစိုးရက အဲဒီစွပ်စွဲချက်တွေကို ငြင်းပယ်ခဲ့ပါတယ်။ ဒါပေမယ့် လွတ်လပ်ပြီးတရားမျှတတဲ့ ရွေးကောက်ပွဲတွေကျင်းပဖို့ အနောက်နိုင်ငံတွေရဲ့ ဖိအားကိုတော့ အစိုးရအနေနှင့်ရင်ဆိုင်နေရပါတယ်။

ပုံမှန်ပြုလုပ်နေကျအတိုင်း ဘင်္ဂလားဒေ့ရှ်ရွေးကောက်ပွဲကော်မရှင်ဟာ အကြမ်းဖက်မှုတွေကို ဟန့်တားနိုင်ဖို့ ဒီဇင်ဘာ ၂၉ရက်ကစပြီး စစ်တပ်တွေကိုဖြန့်ကျက်ချထားဖို့ ဆုံးဖြတ်ထားပါတယ်။

Source:Reuters

-ymg/knl

#Daily_News
Published 19 December 2023

၁။ ကာလပေါက်ဈေးပေးသည့်အပြင် အမြတ်ငွေ၏ ၂၀ရာခိုင်နှုန်းပေးမည်ဖြစ်သောကြောင့် မြေပဲစိုက်တောင်သူတွေရောင်းချမှုများနေ

၂။ ခရစ်စမတ်နှင့်နယူးရီးယားတွင် ကမ်း‌ခြေခရီးသွားရန်ဘိုကင်တင်သူပြန်ပြည့်လာ

၃။ အိန္ဒိယ၏ ကြက်သွန်ဈေး သတ်မှတ်ချက်ကြောင့် မြန်မာ့ကြက်သွန်နီဈေးနှုန်းမြင့်လာပြီး မိုးကြက်သွန်စိုက်တောင်သူများဈေးကောင်းရနေ

၄။ ကလေး(၃)ယောက်နှင့်အထက်မွေးဖွားသည့်မိသားစုများအတွက် အခမဲ့တက္ကသိုလ်အဆင့်ပညာရေးခံစားခွင့်ရရှိရေးဂျပန်အစိုးရစီစဉ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group