#World_News
Published 23 June 2026

■ ငြိမ်းချမ်းရေးသဘောတူညီချက်အရ ပထမဆုံးအကြိမ် ဆွေးနွေးပွဲများ ပြုလုပ်ပြီးနောက် တနင်္လာနေ့ကစပြီး အီရန်အပေါ် ချမှတ်ထားတဲ့ အရေးယူပိတ်ဆို့မှုများကို ရက်ပေါင်း ၆၀ ကြာ အမေရိကန်က ကင်းလွတ်ပေးခဲ့သလို ဒေသတွင်း ပဋိပက္ခများ အဆုံးသတ်ရန် ရည်ရွယ်ကာ လက်ဘနွန်နိုင်ငံအတွင်း တိုက်ပွဲများ ငြိမ်သက်သွားကြောင်း တာဝန်ရှိသူများ ပြောသွားပါတယ်။

■ ပြီးခဲ့တဲ့ ရက်သတ္တပတ်က ဟော်မုဇ်ရေလက်ကြားတလျှောက် သင်္ဘောဖြတ်သန်းသွားလာမှုတွေကို အီရန်နှောင့်ယှက်ပါက သမ္မတဒေါ်နယ်ထရမ့်က စစ်ပွဲပြန်စမယ်လို့ ခြိမ်းခြောက်ပြီးနောက် ဒီလိုသဘောတူညီချက် ရလာတာ ဖြစ်ပါတယ်။

■ ဆွစ်ဇာလန်မှာ အီရန်တာဝန်ရှိသူတွေနဲ့ ဆွေးနွေးခဲ့ပြီး နောက်ဆုံးပိတ် ငြိမ်းချမ်းရေးသဘောတူညီချက်အတွက် အခြေခံအုတ်မြစ်ကောင်း ချမှတ်နိုင်ခဲ့တယ်လို့ အမေရိကန်ဒုသမ္မတ ဂျေဒီဗန့်စ်က ပြောပါတယ်။

■ ကြားဖြတ်သဘောတူညီချက်ထဲမှာ လက်ဘနွန်အတွင်း တိုက်ခိုက်မှုများ အဆုံးသတ်ရန်နဲ့ ဟော်မုဇ်ရေလက်ကြားကနေ ဖြတ်သန်းသွားလာမယ့် သင်္ဘောများအတွက် ဘေးကင်းလုံခြုံစေရန်တို့ ပါဝင်ပါတယ်။

■ အီရန်က ရေနံနဲ့ ရေနံဓာတုပစ္စည်းများ တင်ပို့ခွင့်ဆိုင်ရာ ပိတ်ဆို့မှုကင်းလွတ်ခွင့်များနဲ့ ထိန်းချုပ်ခံထားရတဲ့ ပိုင်ဆိုင်မှုအချို့ ပြန်လည်အသုံးပြုခွင့် ရရှိခဲ့ပါတယ်။

■ အီရန်က နျူကလီးယား စစ်ဆေးရေးမှူးများ လာရောက်ခွင့်ပြုရန် သဘောတူခဲ့ပေမယ့် ဆွေးနွေးမှုများအတွင်း နျူကလီးယားအစီအစဉ်အကြောင်း ထည့်သွင်းဆွေးနွေးခဲ့ခြင်း မရှိဘူးလို့ ငြင်းဆိုခဲ့ပါတယ်။

■ လက်ဘနွန်မှာ တိုက်ပွဲများ လျော့နည်းသွားပြီး အပစ်အခတ်ရပ်စဲရေး ၂ ရက်တိုင်တိုင် တည်မြဲနေပေမယ့် အစ္စရေးလ်ကတော့ စစ်တပ်များ ပြန်လည်ရုပ်သိမ်းရန် သဘောမတူသေးပါဘူး။

Source: Reuters

#World_Health
Published 23 June 2026

■ ညအိပ်ချိန်ဆိုတာက ခန္ဓာကိုယ်အနားယူရင်း ပြုပြင်ထိန်းသိမ်းပေးတဲ့ ဖြစ်စဉ်ဖြစ်ပေမယ့် ဆီးချိုလက္ခဏာ ရှိသူတွေမှာတော့ ညဘက်မှာ သိသာစေပါတယ်။

■ ဆီးချိုဖြစ်နေနိုင်ကြောင်း ပြသနေတဲ့ ညဘက်ဖြစ်စဉ်တွေကို ဖော်ပြလိုက်ပါတယ်။

■ ■ (၁) ညအိပ်ချိန် ခဏခဏဆီးသွားခြင်းက ဆီးချိုရဲ့ အဓိကလက္ခဏာဖြစ်ပါတယ်။
သွေးတွင်းသကြားဓာတ် မြင့်မားခြင်းက ကျောက်ကပ်ကနေ ဂလူးကို့စ် ပြန်လည်စုပ်ယူခြင်း မပြုနိုင်အောင် တားဆီးပေးပြီး အရည်တွေက ဆီးဖြစ်စေပါတယ်။
ဒါကြောင့် ခဏခဏ ဆီးသွားခြင်းနဲ့ ရေငတ်ခြင်းတို့ သံသရာလည်စေပါတယ်။

■ ■ (၂) ဆီးချိုကြောင့် ညဘက်ကြွက်တက်ခြင်းက အာရုံကြောပျက်စီးခြင်းနဲ့ ဆက်စပ်နေပါတယ်။ ဆီးချိုတက်ခြင်းနဲ့ ဆီးခဏခဏသွားခြင်းဟာ ခန္ဓာကိုယ်တွင်း ဆားဓာတ်မမျှတခြင်းကြောင့် ဖြစ်ပါတယ်။ ကြွက်မတက်မီ ပူစပ်ပူလောင်ဖြစ်ခြင်း အရင်ခံစားရတတ်ပါတယ်။
ဒါဟာ သွေးတွင်းသကြားဓာတ်လွန်ကဲမှုကြောင့် အာရုံကြောနဲ့ ကြွက်သားစနစ်များ ပျက်စီးနေကြောင်း ပြသရာရောက်ပါတယ်။

■ ■ (၃) မနက် ၄ နာရီမှ ၈ နာရီကြား ဟော်မုန်းတွေက ဂလူးကို့စ်ထုတ်လွှတ်စေပြီး ဆီးချိုသမားတွေမှာ သွေးတွင်းသကြားဓာတ် မြင့်တက်စေပါတယ်။
ညဘက် သွေးတွင်းဂလူးကို့စ် လျော့နည်းခြင်းကြောင့် အိပ်မက်ဆိုးမက်ခြင်း၊ ချွေးပျံခြင်း၊ မနက်ခင်းနွမ်းနယ်ခြင်း စတဲ့လက္ခဏာတွေ ဖြစ်နိုင်ပါတယ်။ အလွန်အာခြောက်ခြင်း၊ ခံတွင်းရောဂါဖြစ်ခြင်း၊ ညဘက် ခဏခဏဆီးသွားခြင်း၊ ခြေထောက်နာခြင်း၊ ညဘက်ချွေးပျံခြင်းတို့က သွေးတွင်းသကြားဓာတ် မြင့်မားကြောင်းညွှန်ပြနေပါတယ်။

Source: The Jerusalem Post

#World_Health
Published 23 June 2026

■ တစ်နေ့တာအတွင်း အနည်းငယ်စီ လေ့ကျင့်ခန်းလုပ်ခြင်းက ဆီးချိုရောဂါဖြစ်နိုင်ခြေ လျှော့ချဖို့အတွက် အဓိကကျတယ်လို့ သုတေသနအသစ်မှာ အကြံပြုထားပါတယ်။

■ တစ်နေ့ကို အချိန် ၄ မိနစ်လောက် အနည်းငယ်စီ လှုပ်ရှားလေ့ကျင့်ခန်း ပြုလုပ်ခြင်းက ပုံမှန်လေ့ကျင့်ခန်း မလုပ်သူတွေထက် ဆီးချိုဖြစ်နိုင်ခြေ ၃ ပုံ ၁ ပုံကျော်လောက် လျော့ကျစေနိုင်ပါတယ်။

■ လှုပ်ရှားမှု အမျိုးအစားနှစ်မျိုးကို လေ့လာခဲ့ကြရာ ပြင်းထန်တဲ့ အပိုင်းအခြားလိုက် နေ့စဉ်လူနေမှုဘဝ ကိုယ်လက်လှုပ်ရှားမှု(VILPA)နဲ့ အသင့်အတင့်ကနေ ပြင်းထန်တဲ့ နေ့စဉ်လူနေမှုဘဝ ကိုယ်လက်လှုပ်ရှားမှု(MV-ILPA)တို့ ဖြစ်ပါတယ်။

■ VILPA ကို နေ့စဉ် ၃.၉ မိနစ်ပြုလုပ်ပေးရင် ဆီးချိုဖြစ်နိုင်ခြေကို ၃၆ ရာခိုင်နှုန်း လျှော့ချပေးပြီး MV-ILPA ၂၅ မိနစ်ပြုလုပ်ခြင်းကတော့ ၄၆ ရာခိုင်နှုန်း လျှော့ချပေးနိုင်ပါတယ်။

■ တိုတောင်းပြင်းထန်တဲ့ လှုပ်ရှားမှုတွေက ဂလူးကို့စ်စုပ်ယူနိုင်စွမ်းကို ထိရောက်စေကာ အင်ဆူလင်လှုံ့ဆော်မှု တိုးတက်စေသဖြင့် ဆီးချိုရောဂါဖြစ်နိုင်ခြေကို လျော့ကျစေတာ ဖြစ်ပါတယ်။

■ VILPA က ဘယ်လိုလှုပ်ရှားမှုတွေလဲဆိုရင် ဥပမာအားဖြင့် ပြေးခြင်း၊ လှေကားတက်ခြင်း၊ ဈေးဝယ်အိတ်အလေးကြီး သယ်ဆောင်ခြင်းတို့ ပါဝင်ပြီး MV-ILPA မှာတော့ ခပ်သွက်သွက် လမ်းလျှောက်ခြင်း၊ အိမ်အလုပ်လုပ်ခြင်းတို့ ပါဝင်ပါတယ်။

■ နေ့စဉ်စနစ်ကျတဲ့ လေ့ကျင့်ခန်းတွေ ပြုလုပ်ဖို့ ခက်ခဲနေသူတွေအတွက် လေ့ကျင့်ခန်းအနည်းငယ်စီကို မကြာခဏပြုလုပ်ခြင်းက လက်တွေ့ကျပြီး လှုပ်ရှားနေစေမှာ ဖြစ်ပါတယ်။

■ ဆီးချိုဖြစ်နိုင်ခြေ ကျဆင်းစေမယ့် အခြားသောနည်းလမ်းတွေမှာတော့ ကျန်းမာရေးညီညွတ်တဲ့ ကိုယ်အလေးချိန်ထိန်းသိမ်းခြင်း၊ မျှတတဲ့ အစားအသောက်၊ တစ်ပတ်ကို ၅ ရက် ကိုယ်လက်လှုပ်ရှားမှု အနည်းဆုံးမိနစ် ၃၀ ပြုလုပ်ခြင်းတို့ ပါဝင်ပါတယ်။

Source: Prevention

အီရန်နဲ့ အမေရိကန်ကြား ဆွေးနွေးမှုအသစ်ကို ဇွန် ၁၉ ရက်နေ့မှာ ဆွစ်ဇာလန်မှာ စတင်သွားမှာဖြစ်ကြောင်း အီရန်နိုင်ငံခြားရေးဝန်ကြီး အက်ဘက်စ်အာရတ်ချီကပြောခဲ့ပြီး နျူကလီးယားအရေးနဲ့ ပိတ်ဆိုအရေးယူမှုများ ဖယ်ရှားရေးတိုအပေါ် အဓိကထားဆွေးနွေးသွားဖို့ ရှိပါတယ်။

#World_Military
Published 22 June 2026
#အီရန် #အမေရိကန်
#YMG #Yangon_Times #Yangon_Media_Group

#World_Technology
Published 22 June 2026

■ ပိုင်ဆိုင်မှု ဒေါ်လာ ၁.၂ ထရီလီယံကျော်လွန်ပြီး ကမ္ဘာ့ပထမဆုံး ထရီလီယံနာဖြစ်လာတဲ့ အီလွန်မက်စ်က ယနေ့ခေတ်နဲ့ အလွန်ကွဲပြားမယ့် အနာဂတ်ကို ယုံကြည်နေပါတယ်။

■ ဉာဏ်ရည်တု(AI)နဲ့ လူသားပုံသဏ္ဍာန်စက်ရုပ်တွေကြောင့် ကုန်ပစ္စည်းများ ဝန်ဆောင်မှုများ များစွာဈေးသက်သာပြီး အလွယ်တကူရရှိလာနိုင်မယ့် ပေါများကြွယ်ဝသောခေတ် ရောက်ရှိလာမယ်လို့ ဆိုပါတယ်။

■ လူသားပုံသဏ္ဍာန်စက်ရုပ်တွေရဲ့ အနာဂတ်အလားအလာအကြောင်း ဆွေးနွေးထားရာမှာ သန်းနဲ့ချီတဲ့ အဆင့်မြင့်စက်ရုပ်တွေကနေ လပိုင်းအတွင်း တစ်မြို့လုံးကို ပြန်လည်တည်ဆောက်လာနိုင်ပြီး ၂၀၄၅ လောက်မှာ ကမ္ဘာ့စီးပွားရေး အသွင်ပြောင်းလာနိုင်တယ်လို့ ဆိုထားပါတယ်။

■ တက်စလာရဲ့ Optimus စက်ရုပ်ဟာ မက်စ်ရဲ့ ရည်မှန်းချက်မှာ အခရာကျပြီး စက်မှုလုပ်ငန်းအမျိုးမျိုးမှာ အကြိမ်ကြိမ်အဖန်ဖန် လုပ်ရတဲ့ အလုပ်တွေနဲ့ အန္တရာယ်များတဲ့ အလုပ်တွေကို လုပ်ဆောင်နိုင်ဖို့ ဒီဇိုင်းဖန်တီးထားတာ ဖြစ်ပါတယ်။

■ AI နဲ့ စက်ရုပ်တွေက နောက်ပိုင်းမှာ ကုန်ပစ္စည်းတွေနဲ့ ဝန်ဆောင်မှုတွေ အမြောက်အများ ဖန်တီးပေးလာနိုင်ပြီး လူတွေဟာ အလုပ်အကိုင်အခြေအနေနဲ့ မသက်ဆိုင်ဘဲ ပိုမိုမြင့်မားတဲ့ လူနေမှုအဆင့်အတန်း ရရှိခံစားနိုင်ကြမယ်လို့ ပြောပါတယ်။

■ AI ကြောင့် ပေါများကြွယ်ဝလာရာကနေ အလုပ်အကိုင်နဲ့ ဝင်ငွေလမ်းကြောင်းတွေ ပြောင်းလဲသွားနိုင်ပြီး ငွေရဲ့အရေးကြီးပုံ လျော့ကျသွားဖွယ်ရှိတယ်လို့ မက်စ်က ယူဆနေပါတယ်။

■ စက်ရုပ်လုပ်ငန်းကဏ္ဍနဲ့ ပတ်သက်ပြီး ကမ္ဘာတဝှမ်း ပြိုင်ဆိုင်မှုပြင်းထန်နေကာ Unitree ၊ Figure AI တို့လို ကုမ္ပဏီတွေက အဆင့်မြင့်မားတဲ့ လူသားပုံသဏ္ဍာန်စက်ရုပ်တွေ ထုတ်လုပ်နေကြပါတယ်။

Source: WION

#World_Health
Published 22 June 2026

■ လူတွေအစားများတဲ့ ကြက်ဥက ဦးနှောက်ကိုလည်း သက်ရောက်စေနိုင်ပြီး မှတ်ဉာဏ်၊ အာရုံစူးစိုက်မှု၊ ဦးနှောက်အသိဉာဏ် လုပ်ဆောင်ချက်တို့လို ဖြစ်စဉ်တွေနဲ့လည်း ဆက်စပ်နေတယ်လို့ တွေ့ရှိလာပါတယ်။

■ သုတေသန လေ့လာချက်ကြီးတစ်ခုမှာ ကြက်ဥပုံမှန်စားသုံးခြင်းက အယ်ဇိုင်းမားရောဂါ ဖြစ်နိုင်ခြေလျော့နည်းခြင်းနဲ့ ဆက်စပ်နေနိုင်တယ်လို့ ဖော်ပြလာပါတယ်။

■ အယောက် ၄ သောင်းခန့်ဖြင့် စမ်းသပ်ခဲ့ရာမှာ တစ်ပတ်ကို ကြက်ဥ ၂ ကြိမ်မှ ၄ ကြိမ်ခန့်စားသူတွေဟာ မစားသူတွေထက် ၂၀ ရာခိုင်နှုန်းခန့် အယ်ဇိုင်းမားရောဂါဖြစ်နိုင်ခြေ လျော့နည်းစေပြီး ၅ ကြိမ်ခန့်စားသူတွေကတော့ ၂၇ ရာခိုင်နှုန်းခန့် လျော့နည်းစေတာ တွေ့ရပါတယ်။

■ ကြက်ဥမှာ ကိုလင်း၊ လူတိန်း၊ ဇီဇန်သင်း၊ ဖက်တီးအက်ဆစ်တို့လို ဦးနှောက်အကျိုးပြု အာဟာရဓာတ်များ ပါဝင်ကာ မှတ်ဉာဏ်၊ လေ့လာနိုင်စွမ်းတို့ကို ထောက်ကူပေးပြီး ဓာတ်တိုးထိခိုက်မှုတွေကို လျှော့ချပေးပါတယ်။

■ ဒီလေ့လာမှုက စောင့်ကြည့်လေ့လာရုံသာဖြစ်ပြီး ဆက်စပ်မှုရှိတယ်လို့သာ ပြသနိုင်ပေမယ့် အကျိုးအကြောင်းတော့ မသိရပါဘူး။

■ စမ်းသပ်ပါဝင်သူတွေရဲ့ နေထိုင်မှုပုံစံတွေကလည်း ရောဂါဖြစ်နိုင်ခြေအပေါ် သက်ရောက်နေနိုင်ပါတယ်။

■ အယ်ဇိုင်းမားက ကမ္ဘာပေါ်မှာ စိုးရိမ်စရာတိုးများလာစေပြီး လာမယ့်ဆယ်စုနှစ်များမှာ ဖြစ်နိုင်ခြေ သိသိသာသာ များလာနိုင်ပါတယ်။

■ ဘယ်လိုပဲဖြစ်ဖြစ် အစားအစာတစ်ခုတည်းကို မှီခိုအားထားတာထက်စာရင် အစားအသောက်ပုံစံ၊ ကိုယ်လက်လှုပ်ရှားမှု၊ အိပ်စက်မှု၊ ဖိစီးမှုထိန်းချုပ်ပုံတို့ ပေါင်းစပ်ခြင်းက ဦးနှောက်ကျန်းမာရေး ထိန်းသိမ်းစေနိုင်မှာ ဖြစ်ပါတယ်။

Source: The Jerusalem Post