#World_News
Published 30 April 2025

▪️ အိန္ဒိယ ကက်ရှ်မီးယားဒေသမှာ တိုက်ခိုက်မှုဖြစ်ပြီးနောက် နျူကလီးယားလက်နက်ပိုင် ပါကစ္စတန်နဲ့ အိန္ဒိယတို့ကြား တင်းမာမှုမြင့်တက်လာကာ မကြာခင်မှာ အိန္ဒိယတို့ စစ်ရေးလှုပ်ရှားမှု စတင်တော့မယ်ဆိုတဲ့ ခိုင်မာတဲ့ ထောက်လှမ်းရေးအချက်အလက် ရရှိထားကြောင်း ပါကစ္စတန်ဘက်က ဗုဒ္ဓဟူးနေ့မှာ ပြောလိုက်ပါတယ်။

▪️ ဧပြီ ၂၂ရက်နေ့က တိုက်ခိုက်မှုအတွင်း ရန်လိုသူတွေက ပါဟယ်ဂမ်ဒေသမှာ ယောက်ျားတွေကို ဘာသာရေးအရ ခွဲထုတ်ကာ နာမည်တွေမေးမြန်းပြီး ဟိန္ဒူတွေကိုပစ်မှတ်ထားပြီးတော့ အနီးကပ်ပစ်သတ်ခဲ့တာကြောင့် ၂၆ဦးသေဆုံးခဲ့တယ်လို့ တာဝန်ရှိသူများနဲ့ အသက်ရှင်ကျန်ရစ်သူများက ပြောပါတယ်။

▪️ အကြမ်းဖက်တွေက မွတ်ဆလင်အများစုရှိတဲ့ ကက်ရှ်မီးယားမှာ သောင်းကျန်းခဲ့ကြတာဖြစ်ပြီး ပါကစ္စတန်နိုင်ငံသား ၂ဦးအပါအဝင် တိုက်ခိုက်သူ ၃ဦးကို ‌အိန္ဒိယက ဖော်ထုတ်ခဲ့ပါတယ်။

▪️ ပါကစ္စတန်ကတော့ ပတ်သက်မှုမရှိဘူးလို့ ငြင်းဆိုထားကာ ကြားနေစုံစမ်းစစ်ဆေးရေး ပြုလုပ်ပေးဖို့ တောင်းဆိုထားပါတယ်။

▪️ တိုက်ခိုက်မှုအပြီး ရန်ဘက်ဟောင်းတွေဖြစ်တဲ့ ထိုနှစ်နိုင်ငံဟာ အပြန်အလှန် အတိုင်းအတာများ ထုတ်ပြန်ခဲ့ကြပြီး အိန္ဒိယက ဟိန္ဒူရေပိုင်နက် သဘောတူညီချက်ကို မထီမဲ့မြင်ပြုထားသလို ပါကစ္စတန်ကတော့ အိန္ဒိယလေကြောင်းတွေကို ယင်းတို့လေပိုင်နက်ထဲ ပျံသန်းခွင့် ပိတ်ပင်လိုက်ပါတယ်။

▪️ အိန္ဒိယဘက်က ဒီဖြစ်ရပ်နဲ့ပတ်သက်ပြီး အခြေအမြစ်မရှိတဲ့ စွပ်စွဲချက် အကြောင်းပြချက်တွေနဲ့အတူ လာမယ့် ၂၄နာရီမှ ၃၆နာရီအတွင်း စစ်ရေးလှုပ်ရှားမှု ပြုလုပ်ဖို့ရည်ရွယ်နေတဲ့ ထောက်လှမ်းချက်အခိုင်အမာ ရရှိထားတယ်လို့ ပါကစ္စတန်က ပြောပါတယ်။

▪️ အကြမ်းဖက်မှုမှန်သမျှကို ရှုတ်ချကြောင်းနဲ့ အိန္ဒိယဘက်မှ စစ်ရေးလှုပ်ရှားမှုမှန်သမျှကို ပြတ်သားစွာ တုံ့ပြန်သွားမယ်လို့ ပါကစ္စတန်မှ ထုတ်ပြန်ထားပါတယ်။

▪️ အိန္ဒိယဝန်ကြီးချုပ် နရန်ဒရာမိုဒီက တိုက်ခိုက်သူများကို ရှာဖွေအပြစ်ပေးမယ်လို့ ကတိပြုထားပါတယ်။

▪️ နှစ်ဖက်စစ်တပ်ကြား နယ်စပ်တလျှောက် ပစ်ခတ်မှုအသေးစားများ ပျံ့ပွားလာပါတယ်။

▪️ အမေရိကန်က တင်းမာမှုမတက်လာစေဖို့ နှစ်နိုင်ငံစလုံးကို တိုက်တွန်းထားပါတယ်။

#Source: Reuters

#World_Science
Published 30 April 2025

▪️ မိုးကြိုးပစ်တယ်ဆိုတာက လူထိရင်သေဆုံးတတ်သလို အပင်တွေကိုပစ်မိရင် ပျက်စီးဆုံးရှုံးကြရပေမယ့် အပူပိုင်းသစ်ပင်မျိုးစိတ်တစ်ခုကတော့ မိုးကြိုးကိုအသုံးချပြီး အကျိုးကျေးဇူးရရှိနိုင်ပါတယ်။

▪️ သိပ္ပံနာမည် Dipteryx oleiferaလို့ခေါ်တဲ့ tonka beanသစ်ပင်ဟာ မိုးကြိုးပစ်ခံရရင် ရှင်သန်ရုံမက မိုးကြိုးထံမှ လျှပ်စီးကို ရန်သူတွေနဲ့ ကပ်ပါးနွယ်တွေဆီ လွှဲပြောင်းနိုင်တယ်လို့ လေ့လာချက်တစ်ခုမှာ တွေ့ရှိထားပါတယ်။

▪️ အပူပိုင်းသစ်တောတွေမှာ မိုးကြိုးကြောင့် အပျက်အစီးများပြီး အထူးသဖြင့် သစ်ပင်အိုကြီးတွေမှာ ထိခိုက်ကြပါတယ်။

▪️ သစ်ပင်ကြီးတွေတောင် မိုးကြိုးပစ်ရင် သေဆုံးပျက်စီးရပေမယ့် Dipteryx oleiferaကတော့ ပျက်စီးတဲ့ပုံ မတွေ့ရဘူးလို့ ကယ်ရီဂေဟလေ့လာရေးအဖွဲ့အစည်းမှ သစ်တောဂေဟပညာရှင် အီဗန်ဂိုရာက ဖော်ပြထားပါတယ်။

▪️ ပနားမား ဘာရိုကိုလိုရာဒိုသဘာဝကျောက်တိုင်မှာ လျှပ်စီးစက်ကွင်းအာရုံခံစက်များ၊ ကင်မရာများဖြင့် မိုးကြိုးပစ်မှုပေါင်း ၁၀၀ နီးပါးကို သုတေသီများ စောင့်ကြည့်ဖမ်းယူခဲ့ကြပြီး ဆယ်စုနှစ်စာရှိတဲ့ သစ်ပင်မှတ်တမ်းများ လေ့လာခဲ့ကြပါတယ်။

▪️ သစ်ပင်တစ်ပင်ဟာ တောအုပ်ထဲက ပိုကြီးပြီးသက်တမ်းပိုရင့်တဲ့ သစ်ပင်ဘေးမှာ ရှင်သန်ရရင် သေဆုံးနိုင်ခြေပိုများကြောင်း ဂိုရာကပြောပါတယ်။

▪️ မိုးကြိုးတစ်ချက်ပစ်တိုင်းမှာ tonka beanသစ်ပင်နဲ့နွယ်နေတဲ့ ကပ်ပါးနွယ် ၇၈ ရာခိုင်နှုန်း၊ အနီးနားရှိ ဇီဝသက်ရှိထုထည် ၂.၄ တန်လောက် သေဆုံးစေတယ်လို့ တွေ့ရှိရပါတယ်။

▪️ tonka beanသစ်ပင်ရဲ့ တည်ဆောက်ပုံက မိုးကြိုးကိုခံနိုင်ရည်ရှိပြီး မိုးကြိုးတစ်ချက်ပစ်ခံရတိုင်း နွယ်တွေ ရန်သူတွေကိုရှင်းလင်းစေကာ သစ်ပင်သက်တမ်းပိုရှည်ပြီး ရှင်သန်နိုင်စေတယ်လို့ ယူဆထားပါတယ်။

▪️ ဒါ့အပြင် မိုးကြိုးပစ်ခံရရင် အစေ့ထုတ်လုပ်မှု ၁၄ ဆမြင့်တက်လာတယ်လို့လည်း ဆိုကြပါတယ်။

#Source: New York Post

#World_Health
Published 30 April 2025

▪️ ဖြည့်စွက်အားဆေးတစ်မျိုးက ဦးနှောက်စွမ်းရည် ကျဆင်းခြင်းကို နှောင့်နှေးစေတာကစလို့ ကင်ဆာကာကွယ်ပေးသလို အရေပြားနုနယ်ကျန်းမာစေတယ်လို့ ပလတ်စတစ်ခွဲစိတ်ဆရာဝန် ဒေါက်တာကိုရီဂိုးလ်ဘာ့ဂ်က ပြောသွားပါတယ်။

▪️ GliSODinဆိုတဲ့ ဖြည့်စွက်အားဆေးက သခွားမွှေးသီးကနေရတဲ့ ဓာတ်တိုးဆန့်ကျင်ပစ္စည်းဖြင့် ထုတ်လုပ်ထားပါတယ်။

▪️ ဂိုးလ်ဘာ့ဂ်က GliSODinကို လူနာတွေကိုသောက်သုံးစေတာ ဆယ်စုနှစ်နဲ့ တဝက်ခန့်ရှိပြီဖြစ်ပြီး ခွဲစိတ်ပြီးတဲ့အခါမှာ လူနာတွေမှာ ကွာခြားချက်သိသိသာသာ မြင်ရတယ်လို့ ဆိုပါတယ်။

▪️ ကင်ဆာ၊ နှလုံးရောဂါ၊ ဦးနှောက်အသိဉာဏ် ကျဆင်းခြင်းတို့ရဲ့ အဓိကအကြောင်းအရင်းဖြစ်တဲ့ ဓာတ်တိုးဖိစီးမှုကို လျှော့ချပေးတာဖြစ်တယ်လို့ ရှင်းပြပါတယ်။

▪️ စမ်းသပ်ချက် ၄၀ ကျော်လုပ်ခဲ့ရာမှာ အင်္ဂါစနစ်တိုင်း၊ မျက်လုံးကနေ ကျောက်ကပ် အဆုတ် အရေပြားအထိ အကျိုးဖြစ်စေပါတယ်။

▪️ SODဆိုတဲ့ အင်ဇိုင်းဟာ ဂေါ်ဖီ၊ ပန်းပွင့်စိမ်းတို့မှာပါဝင်ပြီး GliSODinထဲမှာထည့်သွင်းထားကာ ဂလီယာဒင်နဲ့ ပေါင်းစပ်လိုက်ပါတယ်။

▪️ ရရှိလာတဲ့ အကျိုးကျေးဇူးတွေထဲမှာ အသားအရေတိုးတက်စေတာ ပါဝင်ပါတယ်။

▪️ ဓာတ်တိုးဖိစီးမှု လျှော့ချပေးတာကြောင့် အရေပြားအကွက်ဖြစ်ခြင်းကို လျော့ပါးစေပြီး ဆဲလ်သေတွေ ရှင်းလင်းပေးပါတယ်။

▪️ ဓာတုပစ္စည်းတွေကတော့ အရေပြားအိုမင်းရင့်ရော်ခြင်းကို ဖြစ်စေပါတယ်။ နောက်တစ်ချက်က နှလုံးရောဂါမှ ကာကွယ်ပေးတာပါ။

▪️ ဒီဆေးအသုံးပြုသူတွေမှာ သွေးကြောနံရံတွေထူထဲတာကို လျှော့ချပေးပါတယ်။

▪️ GliSODinက ကင်ဆာကုသရာမှာ အကျိုးကျေးဇူးလည်း ပေးနိုင်ဖွယ်ရှိပါတယ်။

▪️ အကျိတ်တွေထဲက ဓာတ်တိုးဖိစီးမှုကို လျှော့ချနိုင်ပြီး ပျံ့နှံ့မှုကိုလည်း လျှော့ချနိုင်တယ်လို့ တွေ့ရှိထားပါတယ်။

▪️ ကင်ဆာကို ကုသနိုင်တာမဟုတ်ပေမယ့် ရောဂါပြင်းထန်မှုကို လျှော့ချပေးမှာဖြစ်ပါတယ်။

#Source: New York Post

၂၁ကြိမ်မြောက် ရှန်ဟိုင်းနိုင်ငံတကာ မော်တော်ယာဉ်စက်မှုပြပွဲမှာ ကားမော်ဒယ်သစ် ၁၀၀ ခန့် ပြသထားကာ ကမ္ဘာလုံးဆိုင်ရာ မော်တော်ကားဈေးကွက်ရဲ့ ဗဟိုချက်ဖြစ်လာပါတယ်။
#World_Automobile
Published 29 Apirl 2025
#ရှန်ဟိုင်းမော်တော်ယာဉ်ပြပွဲ #ကားမော်ဒယ်သစ်တစ်ရာခန့်ပြသ
#YMG #Yangon_Times #Yangon_Media_Group

#World_News
Published 29 April 2025

▪️ ရုရှားသမ္မတ ဗလာဒီမာပူတင်က ဒုတိယကမ္ဘာစစ်မှာ ဆိုဗီယက်ပြည်ထောင်စုနဲ့ မဟာမိတ်တွေ အောင်ပွဲရတဲ့ နှစ် ၈၀ပြည့်အထိမ်းအမှတ်အနေဖြင့် ယူကရိန်းနဲ့စစ်ပွဲကို မေလအတွင်း ၃ ရက်တာအပစ်အခတ်ရပ်စဲဖို့ တနင်္လာနေ့က ကြေညာလိုက်ပါတယ်။

▪️ ဒါဟာ ရုရှားအနေနဲ့ ငြိမ်းချမ်းရေးအပေါ် စိတ်ဝင်စားနေဆဲဖြစ်တဲ့သဘော မြင်တွေ့နေရပြီး ယူကရိန်းနဲ့ ဥရောပမဟာမိတ်တို့ကတော့ အငြင်းပွားနေကြပါတယ်။

▪️ အမေရိကန်သမ္မတ ဒေါ်နယ်ထရမ့်ကတော့ ငြိမ်းချမ်းရေးအတွက် အားထုတ်မှုအခြေအနေနဲ့ ပတ်သက်ပြီး စိတ်မရှည်ဖြစ်လာပါတယ်။

▪️ ၇၂နာရီကြာရှည်ခံမယ့် အပစ်အခတ်ရပ်စဲရေးက နာဇီဂျာမနီတွေအပေါ် အောင်ပွဲရခဲ့တဲ့ အထိမ်းအမှတ် အခမ်းအနားအတွက် တရုတ်သမ္မတ ရှီကျင့်ဖျင်အပါအဝင် နိုင်ငံတကာခေါင်းဆောင်များကို ပူတင်က လက်ခံကျင်းပသွားမယ့် မေလ ၈ ရက်၊ ၉ ရက်တို့နဲ့ မေလ ၁၀ ရက်နေ့တို့မှာ အကျုံးဝင်မှာဖြစ်ပါတယ်။

▪️ သံတမန်ရေးလမ်းကြောင်း ဖြစ်လာနိုင်တဲ့ ရက် ၃၀ ကြာ ချက်ချင်းအပစ်အခတ်ရပ်စဲရေးအတွက်တော့ ပူတင်ဘာလို့ လက်မခံလဲဆိုတာကို ယူကရိန်းက မေးခွန်းထုတ်နေပါတယ်။

▪️ ဒီအတိုင်းဆိုရင် မေလ ၈ ရက်နေ့ကို စောင့်မျှော်ကြရပြီး ရုရှားတို့စစ်ရေးပြပွဲပြုလုပ်စဉ် ပူတင်စိတ်အေးလက်အေးရှိအောင် အပစ်အခတ်ရပ်စဲတဲ့သဘောပဲ ဖြစ်တယ်လို့ ယူကရိန်းသမ္မတ ဗိုလိုဒီမာဇယ်လန်စကီက ပြောသွားပါတယ်။

▪️ အမေရိကန် နိုင်ငံခြားရေးဝန်ကြီး မာကိုရူဘီယိုနဲ့ ရုရှားနိုင်ငံခြားရေးဝန်ကြီး ဆာဂေးလက်ဗ်ရော့တို့ တနင်္ဂနွေနေ့က ပြောဆိုကြပြီးနောက်မှာ ပူတင်မှ ကြေညာခဲ့တာ ဖြစ်ပါတယ်။

▪️ "သမ္မတထရမ့်က ဗလာဒီမာပူတင် စစ်ပွဲရပ်ဆိုင်းချင်တာကို ကြိုဆိုလိုက်ပေမယ့် အပြီးတိုင် အပစ်အခတ်ရပ်စဲရေးကိုပဲ အလိုရှိတယ်ဆိုတာကို ရှင်းရှင်းလင်းလင်း ပြောထားပါတယ်" လို့ အမျိုးသားလုံခြုံရေးကောင်စီ ပြောရေးဆိုခွင့်ရှိသူ ဘရိုင်ယန်ဟုချ်က ပြောပါတယ်။

▪️ ပြီးခဲ့တဲ့ရက်သတ္တပတ်က ယူကရိန်းကို ရုရှားတို့ အပြင်းအထန်တိုက်ခိုက်ခဲ့တဲ့အပေါ် ထရမ့်က ပူတင်ကို ဝေဖန်ထားပြီးနောက်မှာ အခုလို ယာယီအပစ်အခတ်ရပ်စဲဖို့ ကြေညာလာတာ ဖြစ်ပါတယ်။

▪️ အမေရိကန်ကတော့ ငြိမ်းချမ်းရေးအားထုတ်မှုတွေမှာ တကယ့်တိုးတက်မှုမရှိရင် လက်ရှောင်သွားမယ်လို့ အကြိမ်ကြိမ်ပြောထားပါတယ်။

#Source: Reuters

#World_Health
Published 29 April 2025

▪️ နွေရာသီချွေးထွက်များတဲ့အချိန်မှာ ရေဓာတ်ပြည့်ဝအောင်နေဖို့က အရေးကြီးပါတယ်။

▪️ ရေဓာတ်လုံလောက်မှ ခန္ဓာကိုယ်အပူချိန် ထိန်းသိမ်းနိုင်ကာ ကိုယ်တွင်းလုပ်ဆောင်ချက်တွေကို ကူညီနိုင်မှာဖြစ်သလို ရေဓာတ်ခန်းခြောက်ခြင်း၊ အပူရှိန်ကြောင့် မောဟိုက်ခြင်းတို့မှ ကာကွယ်နိုင်မှာပါ။

▪️ ရေများများသောက်နိုင်တဲ့အပြင် ရေဓာတ်ကြွယ်ဝတဲ့ အသီးတွေကလည်း ရေဓာတ်ဖြည့်တင်းစေနိုင်ပါတယ်။

▪️ (၁) ဖရဲသီး - ဖရဲသီးမှာ ၉၂ ရာခိုင်နှုန်းက ရေဓာတ်ဖြစ်ပြီး လန်းဆန်းစေရုံမက မရှိမဖြစ် အာဟာရဓာတ်အများအပြားလည်း ပါဝင်ပါတယ်။

▪️ (၂) သခွားသီး - ရေဓာတ် ၉၅ ရာခိုင်နှုန်းပါဝင်တဲ့အပြင် ကယ်လိုရီနည်းပါးတာကြောင့် နွေရာသီအတွက် သင့်လျော်ပါတယ်။

▪️ (၃) စတော်ဘယ်ရီ - ရေဓာတ်ကြွယ်ဝသလို ဓာတ်တိုးဆန့်ကျင်ပစ္စည်းများ၊ ဗိုက်တာမင်-စီ၊ ဖောလိတ်၊ ပိုတက်ဆီယံ၊ အမျှင်ဓာတ်များ ကြွယ်ဝပါတယ်။

▪️ (၄) သခွားမွှေးသီး - ချိုမွှေးပြီး ရေဓာတ်ပြည့်ဝကာ ကယ်လိုရီနည်းတဲ့အပြင် ဗိုက်တာမင်-အေ၊ ပိုတက်ဆီယံ၊ ဘီတာကယ်ရိုတင်းတို့ ပါဝင်ပါတယ်။

▪️ (၅) ခရမ်းချဉ်သီး - ဗိုက်တာမင်-စီမြင့်မားတဲ့ ခရမ်းချဉ်သီးက ရေဓာတ်များပြားကာ အမျိုးမျိုးပြင်ဆင်စားသုံးနိုင်ပါတယ်။

▪️ ဒီအသီးတွေစားပေးရင် ရေဓာတ်ပြည့်ဝနိုင်ပေမယ့် ရေကိုလည်းပုံမှန်သောက်သုံးဖို့က အရေးကြီးပါတယ်။

#Source: DoctorNDTV