#World_News
Published 10 June 2025

▪️ လော့စ်အိန်ဂျလိစ်မှာ နောက်ထပ်အမျိုးသားကာကွယ်ရေးတပ်များ မရောက်ရှိခင်မှာ အမေရိကန်စစ်တပ်က မရိန်းတပ်သား ၇၀၀ ခန့် ယာယီနေရာချသွားမှာဖြစ်ကာ ဆန္ဒပြပွဲများနဲ့ ပတ်သက်ပြီး သမ္မတဒေါ်နယ်ထရမ့်ရဲ့ တုံ့ပြန်မှုတွေမှာ အခြေအနေ ပိုပြီးတင်းမာလာပါတယ်။

▪️ ကယ်လီဖိုးနီးယားတောင်ပိုင်း လူဝင်မှုနှိမ်နင်းရေးများနဲ့ ပတ်သက်လို့ လမ်းပေါ်မှာဆန္ဒပြပွဲတွေ ဖြစ်ပေါ်ပြီးနောက် ထရမ့်က စနေနေ့မှာ အမျိုးသားကာကွယ်ရေးတပ် ဖြန့်ကျက်ခဲ့သဖြင့် တင်းမာမှုမြင့်တက်နေခဲ့ပါတယ်။

▪️ ဒါဟာ ထရမ့်အစိုးရကနေ တိုင်းပြည်အတွင်းမှာ တရားမဝင်နေထိုင်နေသူများကို နေရပ်ပြန်ပို့နေရာမှာ အကြီးမားဆုံး အဖြစ်အပျက် ဖြစ်လာပါတယ်။

▪️ မရိန်းတပ်သားတွေ ဖြန့်ကျက်သွားမယ်ဆိုတဲ့ ကြေညာချက်က ဆန္ဒပြပွဲတွေ ၄ ရက်ဆက်တိုက် ဖြစ်ပွားတဲ့နေ့မှာ ဖြစ်ပါတယ်။

▪️ အမျိုးသားကာကွယ်ရေးတပ်တွေကတော့ အဆောက်အအုံတွေဆီ လူတွေဝင်မလာနိုင်အောင် အတားအဆီးတွေ ချထားပါတယ်။

▪️ လော့စ်အိန်ဂျလိစ်မြို့လယ်ရှိ အစိုးရထိန်းသိမ်းရေးဌာနအပြင်ဘက်မှာ ရာနဲ့ချီတဲ့ ဆန္ဒပြသူတွေကို ရဲတွေက လူစုခွဲခဲ့ပါတယ်။

▪️ ဆန္ဒပြသူအချို့က ရဲအရာရှိတွေကို ပစ္စည်းတွေနဲ့ စတင်ပစ်ပေါက်တဲ့အတွက် ထိခိုက်မှုနည်းတဲ့ ကျည်ဆံတွေပစ်ခတ်ဖို့ ခွင့်ပြုခဲ့ကြောင့် LAPD က တနင်္လာနေ့ မွန်းလွဲပိုင်းမှာ ပြောခဲ့ပါတယ်။

▪️ အမျိုးသားကာကွယ်ရေးတပ်တွေနဲ့ မရိန်းတပ်တွေ နေရာချတာဟာ ဖက်ဒရယ်ဥပဒေနဲ့ တိုင်းပြည်အချုပ်အခြာအာဏာကို ချိုးဖောက်ရာကျတယ်လို့ ကယ်လီဖိုးနီးယားက ထရမ့်အစိုးရအဖွဲ့ကို တရားစွဲဆိုထားပါတယ်။

▪️ အမေရိကန် မရိန်းတပ်သားတွေကို ၂၀၀၁ စက်တင်ဘာ ၁၁ ရက်နေ့ အကြမ်းဖက်တိုက်ခိုက်မှုတွေ၊ ဟာရီကိန်းကက်ထရီနာလို ကပ်ဘေးတွေအတွက် ဖြန့်ကျက်ခဲ့ဖူးပေမယ့် ပြည်တွင်းနိုင်ငံရေးမှာတော့ ပါဝင်တာမျိုး အတော်ရှားပါးပါတယ်။

▪️ အစိုးရရဲ့ လူဝင်မှုထိန်းချုပ်ရေး အစီအစဉ်များကို ပိတ်ဆို့ရန်ကြိုးပမ်းတဲ့ ကယ်လီဖိုးနီးယား အုပ်ချုပ်ရေးမှူး ဂေဗင်နယူးဆမ်ကို ဖမ်းဆီးသင့်တယ်လို့ ထရမ့်က ပြောသွားပါတယ်။

#Source: Reuters

#World_Science
Published 10 June 2025

▪️ ကျွန်ုပ်တို့ နေစကြဝဠာထဲရှိ ဂြိုဟ် ၈ ခုထဲက ဂျူပီတာ၊ စေတန်၊ ယူရေးနပ်စ်၊ နက်ပကျွန်းတို့မှာ စက်ဝိုင်းကွင်းရှိကြပါတယ်။

▪️ လာမယ့်နှစ်တွေမှာတော့ စက်ဝိုင်းကွင်းရှိတဲ့ ၅ ခုမြောက်ဂြိုဟ် ပေါ်ပေါက်လာနိုင်ပါတယ်။

▪️ ကမ္ဘာနဲ့နီးစပ်တဲ့ မားစ်ဂြိုဟ်မှာ လာမယ့်နှစ်ပေါင်း သန်း ၅၀ မှ သန်း ၇၀ အတွင်း စက်ဝိုင်းကွင်းများ ဖြစ်ပေါ်လာမယ့် ယူဆနေကြပါတယ်။

▪️ ယခင်ကလည်း မားစ်မှာ စက်ဝိုင်းကွင်းများ ရှိခဲ့တယ်လို့ သိပ္ပံပညာရှင်များ ထင်ခဲ့ကြဖူးပါတယ်။

▪️ မားစ်တဝိုက် စက်ဝိုင်းကွင်းတွေ ဖြစ်ပေါ်တာဟာ သူ့ရဲ့လ ဖိုဘိုစ်ကြောင့် ဖြစ်နိုင်ပြီး ဖိုဘိုစ်က တစ်ချိန်ချိန်မှာ ပြိုကွဲသွားကာ အစအနတွေက မားစ်ဂြိုဟ်ပတ်ပတ်လည်မှာ စုပြုံကာ စက်ဝိုင်းကွင်း ဖြစ်လာနိုင်ပါတယ်။

▪️ ဖိုဘိုစ်က မားစ်ဂြိုဟ်ဆီကို ဖြည်းဖြည်းချင်းရွေ့လျားနေပြီး နှစ် ၁၀၀ လျှင် ၆ ပေနှုန်းဖြင့် နီးကပ်လာတာကြောင့် ဝင်တိုက်ပျက်စီးနိုင်ခြေ ရှိနေပါတယ်။

▪️ လွန်ခဲ့တဲ့ နှစ်ပေါင်း ၄.၃ ဘီလီယံကလည်း မားစ်ဂြိုဟ်ကို အရာဝတ္ထုတစ်ခု ဝင်တိုက်ပြီးနောက် စက်ဝိုင်းကွင်းအဖြစ် ပျံ့ကျဲခဲ့ကာ အစအနများပေါင်းစည်းပြီး ဖိုဘိုစ်ဖြစ်လာခဲ့တယ်လို့ နာဆာက လေ့လာတွေ့ရှိခဲ့ပါတယ်။

▪️ ဒါဟာ တစ်ကြိမ်တည်းမဟုတ်ဘဲ ပုံမှန်ပြိုကွဲဖြစ်ပေါ်နေပြီး တစ်ကြမ်ဖြစ်တိုင်းမှာ လက ၅ ဆပိုပိုသေးလာပါတယ်။

▪️ ကမ္ဘာဂြိုဟ်အတွက်ကတော့ လဟာ တည်ငြိမ်တဲ့ ပတ်လမ်းကြောင်းမှာ ရှိတာကြောင့် ဝင်တိုက်နိုင်ခြေ သိပ်မရှိပါဘူး။

▪️ ဒါ့အပြင် မားစ်ဂြိုဟ်နဲ့ ဖိုဘိုစ်တို့ကြား အကွာအဝေးထက်လည်း များစွာပိုဝေးနေပါတယ်။

#Source: WION

#World_Health
Published 10 June 2025

▪️ ယနေ့ခေတ်ကြီးမှာ အရာရာ လျင်မြင်စွာတိုးတက်နေပေမယ့် လုံလောက်စွာ မအိပ်စက်ရတာကြောင့် ပင်ပန်းနွမ်းနယ်မှုတွေ စုပြုံလာနိုင်ပါတယ်။

▪️ အိပ်ရေးပျက်တာတွေများလာပြီး အိပ်စက်မှုအကြွေးတင်လာရင် ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ ကျန်းမာရေးတို့မှာ ထိခိုက်လာနိုင်ပါတယ်။

▪️ ဒါကြောင့် လုံလောက်စွာ အနားမယူရင် ခန္ဓာကိုယ်လုပ်ဆောင်ချက်တွေအပေါ် ဖြည်းဖြည်းချင်း ထိခိုက်လာနိုင်ပုံကို ဖော်ပြလိုက်ပါတယ်။

▪️ (၁) အိပ်ရေးပျက်တာများလာရင် ဦးနှောက်လုပ်ဆောင်ချက်ပိုင်း ထိခိုက်လာပြီး ဦးနှောက်ထိုင်းမှိုင်းခြင်း၊ တုံ့ပြန်မှုအားနည်းခြင်း၊ အလုပ်မှာ အမှားလုပ်မိခြင်းတို့ ဖြစ်ပေါ်နိုင်ပါတယ်။

▪️ (၂) ကိုယ်ခံအားနည်းလာစေနိုင်ပြီး သာမန်အအေးမိဖျားနာခြင်းကနေ ရောဂါဘယများ ဆိုးရွားတဲ့အထိ ဖြစ်စေနိုင်ပါတယ်။

▪️ (၃) အိပ်စက်ခြင်းက ဟော်မုန်းထိန်းညှိရာမှာ အဓိကပတ်သက်တာကြောင့် အိပ်ရေးပျက်ရင် ဟော်မုန်းမညီမျှမှုများဖြစ်လာကာ ဟော်မုန်းနဲ့သက်ဆိုင်တဲ့ ရောဂါတွေ ဖြစ်လာနိုင်ပါတယ်။

▪️ (၄) အိပ်ရေးမဝရင် သွေးဖိအားများခြင်း၊ နှလုံးခုန်မမှန်ခြင်း၊ နှလုံးရောဂါနဲ့ လေဖြတ်ခြင်းတို့ ဖြစ်နိုင်ခြေ များစေပါတယ်။

▪️ (၅) အစာခြေစနစ် အနှောင့်အယှက်ဖြစ်စေကာ ဇီဝဖြစ်ပျက်မှုနှုန်း နှောင့်နှေးသွားနိုင်ပါတယ်။

▪️ (၆) ရေရှည်အိပ်ရေးပျက်တဲ့အခါ စိုးရိမ်ပူပန်ခြင်း၊ စိတ်ဓာတ်ကျခြင်း၊ စိတ်အပြောင်းအလဲ ဖြစ်ခြင်းတို့ ဖြစ်စေနိုင်ပါတယ်။

▪️ (၇) အရေပြားမှဆဲလ်တွေ ပြုပြင်အသစ်ဖြစ်ခြင်းတို့ ထိခိုက်စေသဖြင့် အရေးကြောင်းထင်ခြင်း၊ အသားအရေမွဲခြောက်ခြင်းတို့ ဖြစ်စေနိုင်ပါတယ်။

▪️ (၈) အိပ်ရေးမဝရင် မျိုးပွားဟော်မုန်းများ နှောင့်ယှက်စေကာ လိင်စိတ်ဆန္ဒလျော့ခြင်း၊ ကလေးရနိုင်ခြေ ထိခိုက်ခြင်းတို့ ဖြစ်စေနိုင်ပါတယ်။

▪️ (၉) အဝလွန်ခြင်း၊ သွေးတိုး၊ ဆီးချိုနဲ့ ကင်ဆာအချို့လို နာတာရှည်ရောဂါများ ဖြစ်စေနိုင်ပါတယ်။

▪️ (၁၀) အိပ်ရေးပျက်ပြီး ပင်ပန်းနွမ်းနယ်သဖြင့် လမ်းမတော်တဆမှုများ၊ အလုပ်ခွင်မှာ မှားယွင်းမှုများ၊ ဆုံးဖြတ်မှုအလွဲများ ချနိုင်ပါတယ်။

#Source: DoctorNDTV

ဆီးရီးယားမြို့တော် ဒမတ်စ်ကပ်စ်မှာ ရေရှားမှုပြဿနာ အလွန်ဆိုးရွားနေပြီး လူအများဟာ သောက်သုံးရေနဲ့ နေ့စဉ်သုံးရေ အလုံအလောက်ရရှိဖို့ ခက်ခဲနေပါတယ်။
#World_Crisis
Published 9 June 2025
#အပူချိန်မြင့်တက်လာခြင်း #ဆိုးရွားစွာမိုးခေါင်ရေရှား
#YMG #Yangon_Times #Yangon_Media_Group

#Daily_News

Published 9 June 2025

၁။ စားအုန်းဆီရည်ညွှန်းဈေး တစ်ပိဿာကျပ် ခြောက်ထောင်ဝန်းကျင်သို့ ကျဆင်း

၂။ ကမ္ဘာ့အိုလံပစ်နေ့ အထိမ်းအမှတ် Steward Course သင်တန်း၌ သင်တန်းသား ၄၀ဦးခန့်တက်ရောက်

၃။ MSME များအတွက် ထိခိုက်ဆုံးရှုံးနိုင်ခြေများ စီမံခန့်ခွဲမှု သင်တန်းကိုအခမဲ့တက်ရောက်နိုင်မည်

၄။ အပူချိန်မြင့်တက်လာခြင်းနှင့်အတူ ဆီးရီးယားမြို့တော်၌ ဆိုးရွားစွာမိုးခေါင်ရေရှား ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_Science
Published 09 June 2025

▪️ ပစိဖိတ်ကမ်းရိုးတန်းနားမှ ထူးခြားဆန်းကျယ်ပြီး အလွန်လှုပ်ရှားနေတဲ့ ပင်လယ်ရေအောက်မီးတောင်တစ်ခုဟာ ယခုနှစ်ကုန်ပိုင်းလောက်မှာ ပေါက်ကွဲနိုင်တယ်လို့ သိပ္ပံပညာရှင်များ ပြောပါတယ်။

▪️ Axial Seamount လို့ခေါ်တဲ့ မီးတောင်ဟာ ဆန်ဖရန်ဆစ္စကို အနောက်မြောက်ဖက် မိုင် ၇၀၀ အကွာ ရေအောက်တစ်မိုင်နီးပါးမှာ တည်ရှိပြီး ၁၉၈၀ ဝန်းကျင်တွေမှာ သိပ္ပံပညာရှင်တွေ တွေ့ရှိပြီး စိတ်ဝင်စားလာကြပါတယ်။

▪️ ၁၉၉၈၊ ၂၀၁၁၊ ၂၀၁၅ တို့မှာ ၃ ကြိမ်ပေါက်ကွဲခဲ့တယ်လို့ အော်ရီဂွန်ပြည်နယ်တက္ကသိုလ်မှ သုတေသီ ဘီလ်ချက်ဝစ်က ပြောပါတယ်။

▪️ ဒါပေမဲ့ ပြင်းပြင်းထန်ထန်ကြီး ပေါက်ကွဲတာမဟုတ်တဲ့အတွက် ကယ်လီဖိုးနီးယား၊ အော်ရီဂွန်၊ ဝါရှင်တန်တို့မှ နေထိုင်သူတွေအတွက် ဆူနာမီအန္တရာယ် လုံးဝမရှိပါဘူး။

▪️ Axial Seamount ပင်လယ်ရေအောက်မီးတောင်က ပေါက်ကွဲတဲ့အခါ ချော်ရည်တွေ စိမ့်ထွက်လာရုံဖြစ်ပြီး လူတွေသတိထားမိမှာ မဟုတ်ပါဘူး။

▪️ ပေါက်ကွဲရာကနေ ထွက်လာတဲ့ အပူငွေ့တွေက မိုင်တဝက်နီးပါးလောက်သာ ရှိနိုင်တာကြောင့် ရေမျက်နှာပြင်အထိတောင် မရောက်နိုင်ဘူးလို့ ဝါရှင်တန်တက္ကသိုလ်မှ သမုဒ္ဒရာဆိုင်ပါမောက္ခ ဝီလီယံဝီလ်ကော့ခ်က ပြောပါတယ်။

▪️ ချော်ရည်တွေပိကျလာတဲ့အခါ ပင်လယ်နေသတ္တဝါများနဲ့ သိပ္ပံနည်းပညာပစ္စည်းများ ပျက်စီးနိုင်ပေမယ့် မျက်နှာပြင်နားနေထိုင်တတ်တဲ့ ဝေလငါးလို သတ္တဝါတွေကတော့ မသက်ရောက်နိုင်လောက်ပါဘူး။

▪️ ကုန်းပေါ်က မီးတောင်အများအပြားက အချိန်ကြာမြင့်စွာ ငြိမ်နေတတ်ပြီးမှ ရုတ်တရက်လှုပ်ရှားတတ်ပေမယ့် Axial Seamount ကတော့ အချိန်တိုင်းလှုပ်ရှားနေပါတယ်။

▪️ မီးတောင်ပေါက်ကွဲတာက သိပ်ပြီးမကြာမြင့်တာကြောင့် ဖမ်းယူရိုက်ကူးမိဖို့ဆိုရင် အချိန်မှန်နေရာမှန်မှာ ရှိနေရမှာဖြစ်ပါတယ်။

#Source: Seattle Times