#World_Health
Published 13 February 2025

▪️ အစာစားတာ ကြာသွားပြီးနောက် သွေးတွင်းသကြားဓာတ် အတော်လေး ကျဆင်းတတ်တဲ့သူတွေဟာ ပိုမိုဆာလောင်မှု ခံစားရတတ်ပြီး အခြားသူတွေထက် ကယ်လိုရီတွေ အများကြီးပိုပြီး စားသုံးမိတတ်ကြတယ်လို့ သုတေသနအသစ်မှာ တွေ့ရပါတယ်။

▪️ ကင်းစ်ကောလိပ်လန်ဒန်နဲ့ ZOE ကျန်းမာရေးသိပ္ပံကုမ္ပဏီတို့မှ သုတေသနအဖွဲ့က လူတွေဟာ ကယ်လိုရီထိန်းချုပ်ပြီး စားသောက်နေတာတောင် ကိုယ်အလေးချိန်ချဖို့ ခက်ခဲနေတဲ့ အကြောင်းအရင်းကို တွေ့ရှိခဲ့ကြပါတယ်။

▪️ လူပေါင်း ၁၀၇၀ သာမန်နံနက်စာစားပြီးနောက် သွေးတွင်းသကြားဓာတ် တုံ့ပြန်မှုနဲ့ ကျန်းမာရေး အခြားအချက်အလက်များအကြောင်း စုဆောင်းခဲ့ကြပါတယ်။

▪️ ကာဗိုဟိုက်ဒရိတ်၊ ပရိုတိန်း၊ အဆီ၊ အမျှင်ဓာတ်တို့ပါဝင်တဲ့ ကယ်လိုရီများအတိုင်း စံနှုန်းအခြေခံထားပြီး အစာမရှိချိန် သွေးတွင်းသကြားဓာတ် တုံ့ပြန်စမ်းသပ်မှု ပြုလုပ်ခဲ့ကြပါတယ်။

▪️ တစ်နေ့တာအတွင်း သွေးတွင်းသကြားဓာတ် တိုင်းတာဖို့ CGMကိရိယာအပြင် လှုပ်ရှားမှုနဲ့ အိပ်စက်မှုတို့ကို စောင့်ကြည့်ဖို့ ကိရိယာလည်း တပ်ဆင်တိုင်းတာခဲ့ပါတယ်။

▪️ ဘယ်အချိန် ဘာစားတယ်ဆိုတာအပြင် ဆာလောင်စိတ်နဲ့ နိုးကြားစိတ်တို့ကိုလည်း တိုင်းတာမှတ်သားခဲ့ကြပါတယ်။

▪️ ဆန်းစစ်ချက်များအရ အချို့လူတွေမှာ သကြားဓာတ်အမြင့်ဆုံးရောက်ပြီး ၂-၄ နာရီအတွင်း သိသိသာသာ ကျဆင်းသွားပါတယ်။

▪️ သကြားဓာတ် မြန်မြန်ကျဆင်းသူတွေမှာ ဆာလောင်စိတ် ၉ ရာခိုင်နှုန်း မြင့်တက်သွားပြီး တခြားသူတွေထက် နာရီဝက်လောက်စောပြီး ထပ်စားတတ်ကြပါတယ်။

▪️ သကြားဓာတ် အများအပြားကျဆင်းသူတွေက နံနက်စာစားပြီး ၃-၄ နာရီအတွင်း ၇၅ ကယ်လိုရီပိုမိုစားသုံးကြပြီး တစ်နေ့တာလုံးမှာ ၃၁၂ ကယ်လိုရီ ပိုစားဖြစ်ကြကာ တစ်နှစ်လုံးစာအနေနဲ့ ပေါင် ၂၀ လောက် တိုးလာနိုင်ပါတယ်။

▪️ ယခင်တည်းက သွေးတွင်းသကြားဓာတ်က ဆာလောင်စိတ်ကို ထိန်းချုပ်ရာမှာ အရေးပါတယ်လို့ တွေ့ရှိထားတာဖြစ်ကြောင်း ကင်းစ်ကောလိပ်လန်ဒန်မှ ဒေါက်တာ ဆာရာဘယ်ရီက ပြောသွားပါတယ်။

▪️ ဒီစမ်းသပ်ချက်တွေက အသက်အရွယ်၊ ကိုယ်အလေးချိန်၊ BMIတို့ကြား ပတ်သက်မှုမရှိဘူးလို့ ဆိုပါတယ်။

#Source: DoctorNDTV

#World_Health
Published 13 February 2025

▪️ အိပ်စက်တဲ့အခါ အိပ်မက်အဆင့်ရောက်ရှိရန် ကြာမြင့်တဲ့သူတွေက ဒီမန်ရှာရောဂါ ဖြစ်နိုင်ခြေ ပိုများတယ်လို့ လေ့လာချက်တစ်ခုမှာ ယူဆနေကြပါတယ်။

▪️ REMလို့ခေါ်တဲ့ အိပ်မက်အဆင့်ရောက်ရှိရန် ကြာမြင့်သူတွေမှာ မှတ်ဉာဏ်ပေါင်းစည်းနိုင်စွမ်းနဲ့ စိတ်ခံစားချက် ထိန်းချုပ်မှုတို့မှာ နှောင့်ယှက်စေတယ်လို့ သိပ္ပံပညာရှင်များ ဆိုပါတယ်။

▪️ အိပ်စက်မှု အရည်အသွေးနဲ့ အချိန်ပမာဏတို့က အယ်လ်ဇိုင်းမားရောဂါ ဖြစ်နိုင်ခြေအပေါ် သက်ရောက်နေတယ်ဆိုတာ လေ့လာချက်တွေမှာ တွေ့ရှိလာကြပါတယ်။

▪️ အိပ်စက်မှုအဆင့် ၄ ဆင့်ပြီးမြောက်ဖို့ မိနစ် ၉၀ ခန့်ကြာမြင့်တတ်ပြီး အသက်အရွယ်အလိုက် ပိုမိုကြာမြင့်နိုင်ပါတယ်။

▪️ REMအိပ်စက်မှုအတွင်း ဦးနှောက်က စိတ်ခံစားချက်အရ ဖြစ်လာတဲ့ မှတ်ဉာဏ်တွေကို လုပ်ဆောင်ကာ ရေရှည်သိုလှောင်မှုအဖြစ် သိမ်းဆည်းပေးပါတယ်။

▪️ REMအိပ်စက်မှုအဆင့် နှောင့်နှေးတဲ့အခါ အဆိုပါဖြစ်စဉ် အနှောင့်အယှက် ဖြစ်စေပြီး မှတ်ဉာဏ်တွေ ပေါင်းစည်းနိုင်စွမ်း ထိခိုက်စေတယ်လို့ ကယ်လီဖိုးနီးယားတက္ကသိုလ်မှ ပရော်ဖက်ဆာ ယွဲ့လန်က ဆိုပါတယ်။

▪️ ပေကျင်းရှိ တရုတ်-ဂျပန် ချစ်ကြည်ရေးဆေးရုံ အာရုံကြောရောဂါဆောင်မှ ပျမ်းမျှအသက် ၇၀ ရှိတဲ့ လူ ၁၂၈ ဦးကို သုတေသီများ လေ့လာခဲ့ကြပါတယ်။

▪️ လူနာတဝက်ခန့်က အယ်လ်ဇိုင်းမားရောဂါရှိပြီး ၃ ပုံ ၁ ပုံလောက်က အယ်လ်ဇိုင်းမားရှေ့ပြေးလက္ခဏာများ ဖြစ်နေပါတယ်။

▪️ ဆေးခန်းမှာ ညအိပ်ခိုင်းပြီး ယင်းတို့ရဲ့ ဦးနှောက်လှိုင်း လှုပ်ရှားမှုတွေ၊ မျက်လုံးရွေ့လျားပုံတွေ၊ နှလုံးခုန်နှုန်း၊ အသက်ရှူနှုန်းတို့ကို တိုင်းတာခဲ့ကြပါတယ်။

▪️ REMအဆင့်ကို စောစီးစွာရောက်တဲ့အဖွဲ့က အိပ်ပျော်ပြီးနောက် ၉၈ မိနစ်အတွင်း ရောက်ရှိပြီး နောက်အဖွဲ့ကတော့ ၁၉၃ မိနစ်နောက်ပိုင်းမှ REMကို ရောက်ရှိခဲ့ပါတယ်။

▪️ အယ်လ်ဇိုင်းမားရှိတဲ့သူတွေက REMအဆင့်ကို နောက်ကျမှ ရောက်ရှိတာများတယ်လို့ ဖော်ပြခဲ့ကြပါတယ်။

▪️ အနာဂတ်မှာ အိပ်စက်မှုပုံစံကို သက်ရောက်စေတဲ့ ဆေးဝါးတွေအကြောင်းကိုလည်း လေ့လာသင့်တယ်လို့ ယွဲ့လန်က ပြောပါတယ်။

▪️ မယ်လတိုနင်ဓာတ်က REMအိပ်စက်မှုအဆင့်ကို အားပေးနိုင်တယ်လို့ ကြွက်တွေနဲ့ စမ်းသပ်ချက်မှာ တွေ့ရပါတယ်။

▪️ ဒါကြောင့် အယ်လ်ဇိုင်းမားဖြစ်မှာ စိုးရိမ်တဲ့သူတွေအနေနဲ့ REMအဆင့်သို့ အလွယ်တကူ ရောက်ရှိနိုင်စေမယ့် အိပ်စက်မှုအလေ့အထတွေ ကျင့်သုံးသင့်တယ်လို့ သုတေသနအဖွဲ့က ပြောထားပါတယ်။

#Source: New York Post

တရုတ်နိုင်ငံအမျိုးသားလူဝင်မှုကြီးကြပ်ရေး စီမံခန့်ခွဲရေး(NIA)က အရှေ့တောင်အာရှ အာဆီယံ ၁၀ နိုင်ငံမှ ဧည့်ခရီးသွားအဖွဲ့များကို ဗီဇာကင်းလွတ်ခွင့်ဖြင့် ယူနန်ပြည်နယ်ရှိ ဆစ်ဆောင်ပနားထိုင် ကိုယ်ပိုင်အုပ်ချုပ်ခွင့်ရစီရင်စုရဲ့ နာမည်ကျော်ရှုခင်းနေရာတွေသို့ ဝင်ရောက်ခွင့်ပြုသွားမယ်လို့ တနင်္လာနေ့က ကြေညာလိုက်ပါတယ်။
#Asia_Travel
Published  12 February 2025
#တရုတ်ပြည်ယူနန်ရှိဆစ်ဆောင်ပနား #ဗီဇာကင်းလွတ်ခွင့်ရရှိ
#YMG #Yangon_Times #Yangon_Media_Group

#Daily_News
Published  12 February 2025

၁။ မသန်စွမ်းသူများ ဘဝအမှီခိုကင်းစွာရပ်တည်နိုင်ရေးဆောင်ရွက်ရန်လက်မှတ်ရေးထိုး

၂။ တိုင်းရင်းသားဈေးပွဲတော်နှင့် “သွေးချင်းစုံလင် သနပ်ခါးသဘင်”ပြိုင်ပွဲ ကျင်းပနေ

၃။ ပြည်ပသို့ ဒေါ်လာသန်းတစ်ထောင်ကျော်တန်ဖိုးရှိ ဆန်နှင့်ဆန်ကွဲတန်ချိန် ၂သန်းကျော်တင်ပို့ထား

၄။ အာဆီယံနိုင်ငံများမှ ခရီးသွားဧည့်သည်များ တရုတ်ပြည်ယူနန်ရှိဆစ်ဆောင်ပနားသို့လာရောက်လည်ပတ်ပါက ဗီဇာကင်းလွတ်ခွင့်ဖြင့် ဝင်ရောက်ခွင့်ရရှိမည် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_Health
Published 12 February 2025

▪️ တရုတ်ရိုးရာဆေးတွေမှာ ရာစုနှစ်တွေကြာအောင် အသုံးပြုနေတဲ့ မက်မွန်စေးဟာ အခုဆိုရင် အချက်အပြုတ်၊ အလှအပနဲ့ ကျန်းမာရေးအပိုင်းတွေမှာပါ အကျိုးကျေးဇူးရှိနေပါတယ်။

▪️ အဓိကပါဝင်ပစ္စည်းက မက်မွန်မှထုတ်တဲ့ အစေးဖြစ်ပြီး ပြင်ပဖိစီးမှုဒဏ်တွေကြောင့်ဖြစ်တဲ့ ထိခိုက်မှုတွေကို သက်သာအောင် တရုတ်မက်မွန်ပင်များ အသုံးပြုကြတာ ဖြစ်ပါတယ်။

▪️ ထိုအစေးတွေ မာကျောသွားတဲ့အခါ ပယင်းရောင်ကျောက်များ ဖြစ်သွားကြပါတယ်။

▪️ ကော်လာဂျင်၊ အမိုင်နိုအက်ဆစ်၊ ဂလက်တို့စ်၊ ရမ်နို့စ်တို့ပါဝင်ပြီး တရုတ်တိုင်းရင်းဆေးလောကမှာ ဖိစီးမှု၊ ရေဓာတ်ခန်းခြောက်ခြင်းကနေစလို့ ဆီးလမ်းကြောင်း ရောဂါပိုးဝင်ခြင်းအထိ ရောဂါအမျိုးမျိုးကုသရာမှာ အသုံးပြုပါတယ်။

▪️ ယနေ့ဆိုရင် မက်မွန်စေးကို မျက်နှာကပ်ခွာများ၊ လိုးရှင်းများ၊ ဆီရမ်များမှာပါ အသုံးပြုလာကြပြီး ကော်လာဂျင်ထုတ်လုပ်မှုက အသက်အရွယ် အိုမင်းခြင်းလက္ခဏာများကို သက်သာဖို့ သုံးလာကြပါတယ်။

▪️ အသက်ကြီးလာတာနဲ့အမျှ ကော်လာဂျင်ထုတ်လုပ်မှု လျော့နည်းလာပြီး ပါးရေတွန့်ခြင်း၊ အရေးကြောင်းပေါ်ခြင်း၊ ဆံပင်ပါးခြင်း၊ လက်သည်းကြွပ်ဆတ်ခြင်း၊ အရိုးအားနည်းခြင်းတို့ ဖြစ်နိုင်ပါတယ်။

▪️ မက်မွန်စေးမှာပါတဲ့ ပိုလီဆက်ခရိုက်ကလည်း အရေပြားအိုမင်းရင့်ရော်ခြင်းနဲ့ ဓာတ်တိုးပျက်စီးခြင်းကို ဖြစ်စေတဲ့ ခရမ်းလွန်ရောင်ခြည် ထိတွေ့ခြင်းမှ ဘေးအန္တရာယ်ကို ကာကွယ်ပေးနိုင်တယ်လို့ တွေ့ရှိထားပါတယ်။

▪️ အိုမင်းဆန့်ကျင်အာနိသင်အပြင် သွေးတွင်းသကြားဓာတ် ထိန်းညှိခြင်း၊ ရောင်ရမ်းမှု လျှော့ချခြင်း၊ အူလမ်းကြောင်း ကျန်းမာရေး တိုးတက်ခြင်းတို့ ပေးစွမ်းနိုင်ပါသေးတယ်။

▪️ အစားအစာအကြောင်း ရေးသားသူ ဂျက်စီကာတွမ်က မက်မွန်စေးကို ဘယ်လိုပြင်ဆင်ရမလဲဆိုတာ TikTokမှာ ဖော်ပြသွားပါတယ်။

▪️ မက်မွန်စေးခြောက်တွေကို ဝယ်ယူပြီး အခန်းအပူချိန်မှာ ၂၄ နာရီကြာအောင် ရေစိမ်ထားရပါမယ်။

▪️ ရေဓာတ်ရသွားတဲ့အခါ အစေးတွေက ၃-၄ဆလောက်အထိ ပွလာပါတယ်။
ဒီနောက် ရေစစ်လိုက်ရင် ဂျယ်လီလိုမျိုး ပျော့ပြောင်းသွားမှာဖြစ်ပြီး စားသုံးနိုင်ပြီ ဖြစ်ပါတယ်။

#Source: New York Post

#World_Science
Published 12 February 2025

▪️ လွန်ခဲ့တဲ့ နှစ်ပေါင်းသန်း ၄၈၀ ကျော်လောက်မှာဆိုရင် ရေဘဝဲတွေက တိရိစ္ဆာန်တွေကြားမှာ သက်တမ်းအရင့်ဆုံး အထီးအမခွဲခြား ခရိုမိုဆုန်းတွေ ပိုင်ဆိုင်ခဲ့ဖွယ်ရှိတယ်လို့ အံ့အားသင့်ဖွယ် လေ့လာချက်တစ်ခုမှာ တွေ့ရှိထားပါတယ်။

▪️ လက်တံများစွာပါတဲ့ ဆက်ဖလိုပေါ့ဒ်မျိုးနွယ်တွေမှာ အထီးအမခွဲခြား ခရိုမိုဆုန်းတွေရဲ့ ပထမဆုံး မျိုးဗီဇအထောက်အထားကို အော်ရီဂွန်တက္ကသိုလ်မှ သုတေသီများ လေ့လာဖော်ပြခဲ့ကြပါတယ်။

▪️ ဒီမတိုင်ခင်အထိ ရေဘဝဲတွေမှာ အထီးအမခွဲခြား ခရိုမိုဆုန်းတွေ ရှိမရှိတောင် မသေချာခဲ့ပါဘူး။

▪️ ဥဥတဲ့သတ္တဝါတွေနဲ့ သုတ်ပိုးထုတ်တဲ့ သတ္တဝါတွေကို ခွဲခြားစောင့်ကြည့်ခဲ့ရတာ ဖြစ်ပါတယ်။

▪️ သုတေသီအချို့ဆိုရင် ရေဘဝဲလို မျိုးနွယ်တွေဟာ ငါးတွေနဲ့ တွားသွားသတ္တဝါတွေလိုမျိုး ပတ်ဝန်းကျင် အခြေအနေများပေါ် အခြေခံကာ အထီးအမခွဲခြားကြတယ်လို့တောင် သုံးသပ်နေကြပါတယ်။

▪️ မျိုးဗီဇအချက်အလက် အပြည့်အစုံ ပထမဆုံးတွေ့ထားတဲ့ ကယ်လီဖိုးနီးယား အစက်ပြောက် ၂ ခုရေဘဝဲမျိုးမှာ မျိုးဗီဇချိတ်ဆက်လေ့လာခြင်းဖြင့် အထီးနဲ့ အမခွဲခြားနိုင်တဲ့ ခရိုမိုဆုန်း-၁၇ကို ထင်ရှားစွာ တွေ့ခဲ့ကြပါတယ်။

▪️ ရေဘဝဲမတွေက အဆိုပါခရိုမိုဆုန်း တစ်ခုသာပိုင်ဆိုင်ပြီး အထီးတွေကတော့ Zနှစ်ခုတစ်စုံ ပိုင်ဆိုင်ပါတယ်။

▪️ ဆက်ဖလိုပေါ့ဒ်မျိုးစိတ် အမျိုးမျိုးဖြင့် စမ်းသပ်ခဲ့ကြရာမှာ အဆိုပါ Zခရိုမိုဆုန်းစနစ်က ဆင့်ကဲပြောင်းလဲရာ မျိုးရိုးမှာ အတော်လေးဆက်စပ်နေတာ သေချာတွေ့ရှိခဲ့ကြပါတယ်။

▪️ ဒါကြောင့် ဆက်ဖလိုပေါ့ဒ်တွေဟာ သတ္တဝါလောကမှာ သက်တမ်းအကြာဆုံး အထီးအမခွဲခြား ခရိုမိုဆုန်းတွေ ပိုင်ဆိုင်ဖွယ်ရှိပြီး နှစ်ပေါင်းသန်း ၄၅၀ လောက်သက်တမ်းရှိတဲ့ အင်းဆက်များထက်ပင် ပိုနိုင်တယ်လို့ ယူဆနေကြပါတယ်။

#Source: WION