၃ အောက်တိုဘာ ၂၀၂၄

ဂျပန်လေဆိပ်တစ်ခုအတွင်း မြုပ်နေတဲ့ မပေါက်ကွဲသေးတဲ့ ဒုတိယကမ္ဘာစစ်အတွင်းက အမေရိကန်ဗုံး တစ်လုံး ဗုဒ္ဓဟူးနေ့က ပေါက်ကွဲခဲ့ရာ လေယာဉ်ချည်းကပ်ပြေးလမ်းတစ်ခုတွင် တွင်းပေါက်ကြီးဖြစ်သွားခဲ့ သည့်အပြင် လေယာဉ်ခရီးစဉ်ပေါင်း ၈၀ ကျော် ဖျက်သိမ်းခဲ့ရပါတယ်။

ဂျပန်နိုင်ငံ အနောက်တောင်ပိုင်း မီယာဇာကီလေဆိပ်တွင် အဆိုပါ ဗုံးဟောင်းပေါက်ကွဲမှုကြောင့် ထိခိုက် ဒဏ်ရာရသူများမရှိခဲ့ပဲ ပေါက်ကွဲသည့်အနားတွင်လည်း မည်သည့် လေယာဉ်မှရှိမနေကြောင်း ဂျပန်နိုင်ငံ ကုန်းလမ်းနှင့်သယ်ယူပို့ဆောင်ရေးဝန်ကြီးဌာနက အရာရှိတွေက ပြောကြပါတယ်။

ဂျပန်ကာကွယ်ရေးတပ်ဖွဲ့နှင့်ရဲဌာနတွေရဲ့ စုံစမ်းစစ်ဆေးမှုအရ ထိုသို့ပေါက်ကွဲမှုမှာ ၅၀၀ ပေါင်ရှိသော အမေရိကန်ဗုံးဟောင်းတစ်လုံးကြောင့်ဖြစ်ကြောင်းသိရပါတယ်။ရုတ်တရက်ကြီးပေါက်ကွဲရတဲ့ အကြောင်း   ရင်းကိုတော့ အရာရှိတွေက ဆက်လက်စုံစမ်းစစ်ဆေးနေဆဲ ဖြစ်ပါတယ်။  ပေါက်ကွဲမှုကြောင့်ဖြစ်ပေါ်ခဲ့ တဲ့တွင်းကြီးမှာ အချင်း ၇မီတာနှင့် အနက်တစ်မီတာခန့်ရှိတယ်လို့သိရပါတယ်။

လေယာဉ်ခရီးစဉ်  ၈၀ ကျော်ဖျက်သိမ်းခဲ့ရတယ်လို့ ဝန်ကြီးအဖွဲ့အတွင်းရေးမှူးချုပ် ယိုရှီမာဆာ ဟာရာရှီ ကပြောပါတယ်။

ပျက်စီးသွားတဲ့ ချည်းကပ်ပြေးလမ်းကို ပြန်လည်ပြုပြင်ခဲ့ပြီးနောက် ကြာသပတေးနေ့ မနက်မှာ လေယာဉ်ပျံသန်းမှုတွေပြန်လည်ပြုလုပ်နိုင်ခဲ့ပါတယ်။

မီယာဇာကီလေဆိပ်ကို ၁၉၄၃ခုနှစ်မှာ ဂျပန်အင်ပါယာရေတပ် လေ့ကျင့်ရေးကွင်းအဖြစ် တည်ဆောက်ခဲ့ ပါတယ်။ အဲဒီလေဆိပ်ကနေ အချို့လေယာဉ်မှူးတွေဟာ အသေခံ တိုက်ခိုက်ရေးမစ်ရှင်တွေပျံသန်းလုပ် ဆောင်ခဲ့ကြပါတယ်။

အဲဒီနေရာတစ်ဝိုက်မှာ ဒုတိယကမ္ဘာစစ်အတွင်း အမေရိကန်စစ်တပ်က ပစ်ချခဲ့တဲ့ ဗုံးအဟောင်း တွေ တော်တော်များများ တူးဖော်တွေ့ရှိခဲ့ပါတယ်လို့ ကာကွယ်ရေးဝန်ကြီးဌာနကပြောပါတယ်။

မပေါက်ကွဲသေးတဲ့ ဒုတိယကမ္ဘာစစ်လက်ကျန်ဗုံးဟောင်းတွေ တန်ရာနှင့်ချီပြီး ဂျပန်နိုင်ငံရဲ့မြေကြီးထဲမှာ ရှိနေတုန်းပဲဖြစ်ပြီး တစ်ခါတရံမှာ ဆောက်လုပ်ရေးလုပ်ရင်းမြေတူးဖော်တဲ့အခါ တွေ့ရှိခဲ့ကြပါတယ်။

Source AP

#World_News
Published 03 October 2024

▪️ အမေရိကန် ထောက်လှမ်းရေးအေဂျင်စီ (CIA)က တရုတ်၊ အီရန်၊ မြောက်ကိုရီးယားတို့မှာ သတင်းပေးများ ခေါ်ယူမယ့် အစီအစဉ်ကို ထုတ်ပြန်လိုက်ပြီး ဒီနည်းလမ်းဖြင့် ရုရှားတွေကို သိမ်းသွင်းရာမှာလည်း အောင်မြင်မှုရခဲ့တယ်လို့ ပြောပါတယ်။

▪️ အဆိုပါ ထောက်လှမ်းရေးအေဂျင်စီက ယင်းတို့ထံ ဘယ်လိုမျိုးလုံခြုံစိတ်ချစွာ ဆက်သွယ်နိုင်လဲဆိုတာကို X ၊ ဖေ့စ်ဘွတ်ခ်၊ အင်စတာဂရမ်၊ တယ်လီဂရမ်၊ LinkedIn ၊ the Dark Web အစရှိတဲ့ ဆိုရှယ်မီဒီယာတွေရဲ့ အကောင့်တွေမှာ မန်ဒရင်း၊ ဖာစီ၊ ကိုရီးယား ဘာသာစကားတို့ဖြင့် ဖော်ပြထားတယ်လို့ CIA ပြောရေးဆိုခွင့်ရှိသူတစ်ဦးက ဖော်ပြထားပါတယ်။

▪️ "ဒီနည်းလမ်းဖြင့် ကြိုးပမ်းခဲ့ရာ ရုရှားမှာ အောင်မြင်ခဲ့ပါတယ်။ အခြားနိုင်ငံတွေမှ လူတွေအတွက်လည်း လမ်းဖွင့်ပေးထားတယ်ဆိုတာကို သိရှိစေချင်ပါတယ်" လို့ ပြောသွားပါတယ်။

▪️ ယူကျူ့ဘ်မှာ မန်ဒရင်းဘာသာစကားဖြင့် ရေးသားထားတဲ့ ဗီဒီယိုမှာဆိုရင် စိတ်ချရတဲ့ VPN ဒါမှမဟုတ် TOR ကွန်ရက်များအသုံးပြုပြီး CIA တရားဝင်ဝက်ဘ်ဆိုက်တွေကတဆင့် ဆက်သွယ်ဖို့ အကြံပြုထားပါတယ်။

▪️ "သင့်ရဲ့လုံခြုံဘေးကင်းမှုကို အဓိကထားတယ်" လို့ ဆိုပါတယ်။ သတင်းပေးတွေရဲ့ ကိုယ်ရေးအချက်အလက်မှန်တွေနဲ့ မပတ်သက်ဘဲ ယင်းတို့ရဲ့ အမည်တွေ၊ တည်နေရာတွေ၊ ဆက်သွယ်ရေး အချက်အလက်တွေကို တောင်းခံထားပြီး CIA အတွက် အကျိုးဖြစ်စေမယ့် အချက်အလက်တွေလည်း ပါဝင်ပါတယ်။

▪️ တရုတ်သံရုံးမှ ပြောရေးဆိုခွင့်ရှိသူ လျူပန်ယုက တရုတ်ပြည်ကို ထိုကဲ့သို့ ကျင့်ကြံဖို့ကြိုးစားနေတဲ့ အမေရိကန်ကို စွပ်စွဲလိုက်ပြီး တရုတ်ပြည်သူတွေနဲ့ တရုတ်ကွန်မြူနစ်ပါတီကြား သွေးကွဲအောင် ကြံစည်တာမှန်သမျှ အောင်မြင်မှာမဟုတ်ဘူးလို့ ပြောပါတယ်။

▪️ တရုတ်က ရုရှား၊ အီရန်တို့နဲ့ ပိုမိုပူးပေါင်းဆောင်ရွက်လာကာ ဒေသတွင်း စစ်ရေးချဲ့ထွင်မှုများ ပြုလုပ်လာတာကြောင့် CIA က ထောက်လှမ်းရေးတွေ တိုးမြှင့်ချင်တာ ဖြစ်ပါတယ်။

▪️ အမေရိကန် ထောက်လှမ်းရေး အဖွဲ့အစည်းအတွင်းမှာ ရုရှား၊ တရုတ်၊ အီရန်၊ မြောက်ကိုရီးယား အစိုးရတို့က ထောက်လှမ်းရခက်ခဲတယ်လို့ သိထားကြပါတယ်။
CIA ဟာ ၂၀၂၂ တုန်းကလည်း ရုရှားဘာသာစကားဖြင့် ဆိုရှယ်မီဒီယာတွေပေါ်ကနေ ရုရှားလူမျိုးတွေကို သိမ်းသွင်းခဲ့ဖူးပါတယ်။

#Source: Reuters

#World_Science
Published 03 October 2024

▪️ ဖန်ပြွန်သန္ဓေသား နည်းလမ်းဖြင့် မွေးလာတဲ့ကလေးတွေမှာ အသက်အန္တရာယ်ရှိ နှလုံးချို့ယွင်းမှု ဖြစ်နိုင်ခြေရှိတယ်လို့ လေ့လာမှုကြီးတစ်ခုမှာ တွေ့ရှိထားပါတယ်။

▪️ အမွှာမွေးလာပါက ဖြစ်နိုင်ခြေ ပိုပြီးများနေပြီး သုတေသနရလဒ်များကနေ ဆရာဝန်များ အဖြေရှာနိုင်ဖို့ အကူအညီဖြစ်မယ်လို့ မျှော်လင့်နေကြပါတယ်။

▪️ မွေးရာပါနှလုံးချို့ယွင်းမှုက ကလေးတွေ အလွန်ငယ်သေးတဲ့အခါ အထူးခွဲစိတ်မှုပြုလုပ်ရန် အန္တရာယ်အလွန်များတာကြောင့် ဘယ်လိုကလေးတွေက အန္တရာယ်အများဆုံးလဲဆိုတာ သိရှိခြင်းဖြင့် နှလုံးချို့ယွင်းမှုကို စောစီးစွာ သိရှိစေကာ မှန်ကန်တဲ့ ကုသစောင့်ရှောက်မှု ပေးနိုင်မှာဖြစ်ကြောင်း ဆွီဒင် ဂေါ့သန်ဘာ့ဂ်တက္ကသိုလ်မှ ပရော်ဖက်ဆာ အူလာဘရစ်ဝမ်နာဟုမ်းလ်က ပြောပါတယ်။

▪️ လူပေါင်း ၇.၇ သန်းကျော်ပါဝင်တဲ့ လေ့လာချက်အရ ဖန်ပြွန်သန္ဓေလိုမျိုး နည်းပညာအကူအညီများဟာ ကလေးတွေမှာ မွေးရာပါနှလုံးပြဿနာ ဖြစ်နိုင်ခြေ သိသိသာသာ များစေပါတယ်။

▪️ နှစ်ပေါင်း ၂၀ မှ ၃၁ နှစ်အတွင်း ဒိန်းမတ်၊ ဖင်လန်၊ နော်ဝေး၊ ဆွီဒင်တို့မှာ မွေးဖွားတဲ့ ကလေးတွေရဲ့ ဆေးမှတ်တမ်းတွေကို ဆန်းစစ်ခဲ့တာ ဖြစ်ပါတယ်။

▪️ ဖန်ပြွန်သန္ဓေသားနဲ့ အခြားမျိုးပွားအကူအညီနည်းလမ်းများ အသုံးပြုပြီး မွေးလာတဲ့ကလေးတွေနဲ့ သာမန်အတိုင်း မွေးဖွားတဲ့ကလေးတွေရဲ့ အချက်အလက်များကို နှိုင်းယှဉ်ခဲ့ကြပါတယ်။

▪️ မိခင်တွေ ကိုယ်ဝန်ဆောင်စဉ် ဆေးလိပ်သောက်ခြင်း၊ ဆီးချို၊ နှလုံးပြဿနာတို့ ရှိမရှိ အခြေအနေတွေကိုပါ ထည့်သွင်းဆန်းစစ်ခဲ့ကြပါတယ်။

▪️ ထိုအခါမှာ မျိုးပွားအကူအညီနည်းပညာများ အသုံးပြုပြီး မွေးလာတဲ့ ကလေးတွေမှာ နှလုံးချို့ယွင်းမှုက ၃၆ ရာခိုင်နှုန်းပိုများနေတာ တွေ့ရှိခဲ့ကြပါတယ်။

▪️ နှစ်မွှာပူး သုံးမွှာပူးကလေးတွေမှာ နှလုံးချို့ယွင်းမှုက အခြားသူတွေထက် ပြဿနာပိုများနေပါတယ်။

▪️ ဒါကြောင့် မိဘတွေမှာ မျိုးမပွားနိုင်ခြင်းနဲ့ ကလေးတွေမှာ မွေးရာပါနှလုံးရောဂါဖြစ်ခြင်းတို့က ပတ်သက်နေတယ်လို့ ကျွမ်းကျင်သူများ ထင်မြင်နေကြပါတယ်။

#Source: WION

#World_Health
Published 03 Oct 2024

▪️ အာရုံကြောတွေ ချို့ယွင်းလာတဲ့ အယ်လ်ဇိုင်းမားရောဂါဟာ သက်ကြီးရွယ်အိုတွေမှာ ဒီမန်ရှာရောဂါဖြစ်ရတဲ့ အဓိကအကြောင်းအရင်းတစ်ခု ဖြစ်ပါတယ်။

▪️ ဒီရောဂါကြောင့် မှတ်ဉာဏ်၊ စဉ်းစားတွေးခေါ်မှု၊ အပြုအမူတို့ကို အဓိကထိခိုက်စေကာ သာမန်လုပ်ငန်းဆောင်တာများ လုပ်ဆောင်နိုင်စွမ်းကိုပင် တဖြည်းဖြည်း ချို့ယွင်းလာစေပါတယ်။

▪️ သုတေသနများအရ ကျန်းမာတဲ့အလေ့အထ ကျင့်သုံးခြင်းဖြင့် အယ်လ်ဇိုင်းမားရောဂါ ဖြစ်နိုင်ခြေ လျှော့ချခြင်းနဲ့ နှောင့်နှေးစေခြင်းတို့ ရရှိစေနိုင်ပါတယ်။
ဘယ်လိုအလေ့အကျင့်တွေက ဦးနှောက်ကျန်းမာရေးကို ကာကွယ်ပေးနိုင်မလဲဆိုတော့..

(၁) ကိုယ်လက်လှုပ်ရှားမှုပုံမှန်ပြုလုပ်ခြင်း
▪️ ပုံမှန်လှုပ်ရှားမှု ပြုလုပ်ခြင်းဖြင့် နှလုံးသွေးကြောကျန်းမာရေး ကောင်းမွန်စေကာ ဦးနှောက်သို့ သွေးလည်ပတ်မှု ကောင်းစေပါတယ်။

▪️ တစ်ပတ်ကို ကိုယ်ကာယလေ့ကျင့်ခန်း အနည်းဆုံး ၁၅၀ မိနစ် ပြုလုပ်ခြင်းဖြင့် အယ်လ်ဇိုင်းမား ဖြစ်နိုင်ခြေကို လျှော့ချပေးနိုင်ပါတယ်။

(၂) ကျန်းမာရေးနှင့်ညီညွတ်စွာ စားသုံးခြင်း
▪️ စားလိုက်တဲ့ အစားအစာက ဦးနှောက်ကျန်းမာရေးကို တိုက်ရိုက်သက်ရောက်စေတာကြောင့် ဓာတ်တိုးဆန့်ကျင်ပစ္စည်းများ၊ ကျန်းမာရေးအဆီများ၊ သကြားနည်းတဲ့အစာများက မှတ်ဉာဏ်လုပ်ဆောင်ချက်ကို ထောက်ပံ့ပေးပြီး ဦးနှောက်ဓာတ်တိုးဖိစီးခြင်းကို လျှော့ချပေးပါတယ်။

▪️ အပင်အခြေပြု အစားအစာများ၊ သံလွင်ဆီလိုမျိုး ကျန်းမာရေးအတွက် ညီညွတ်တဲ့အဆီ၊ ငါးလိုမျိုး ပရိုတိန်းတို့ စားသုံးသင့်ပါတယ်။

(၃) ဦးနှောက်အသုံးချခြင်း
▪️ ဦးနှောက်လှုပ်ရှားနေအောင် စိတ်ပိုင်းဆိုင်ရာ လှုပ်ရှားမှုများ ပြုလုပ်ခြင်းဖြင့် အယ်လ်ဇိုင်းမားရောဂါ ဖြစ်ပေါ်မှုကို နှောင့်နှေးစေပါတယ်။

▪️ စာဖတ်ခြင်း၊ အတတ်ပညာတစ်ခုခု သင်ယူလေ့လာခြင်း၊ ပဟေဌိဖြေရှင်းခြင်း၊ လူမှုပေါင်းသင်းခြင်းတို့က မှတ်ဉာဏ်နဲ့ စဉ်းစားမှုတို့ အားကောင်းစေပါတယ်။

(၄) ကောင်းစွာအိပ်စက်ခြင်း
▪️ ကောင်းစွာ မအိပ်ရခြင်းက အယ်လ်ဇိုင်းမားဖြစ်နိုင်ခြေ များစေပါတယ်။

▪️ အိပ်စက်ခြင်းဖြင့် ဦးနှောက်ထဲမှာ အဆိပ်အတောက်တွေကို ဖယ်ရှားပေးကာ ကြာရှည်အိပ်ရေးပျက်လာပါက အယ်လ်ဇိုင်းမားဖြစ်စဉ် မြန်မြန်ဆန်ဆန် ဖြစ်ပေါ်စေပါတယ်။

(၅) ဖိစီးမှုထိရောက်စွာလျှော့ချခြင်း
▪️ ကြာရှည်စွာ ဖိစီးမှုခံစားရပါက ဦးနှောက်အလျင်အမြန် အိုမင်းလာပြီး မှတ်ဉာဏ်ပိုင်း စွမ်းဆောင်ရည် ကျဆင်းစေပါတယ်။

▪️ တရားထိုင်ခြင်း၊ အသက်ပြင်းပြင်းရှူခြင်း၊ ယောဂကျင့်ခြင်း၊ သဘာဝပတ်ဝန်းကျင်မှာ နေထိုင်ခြင်းတို့ဖြင့် ဖိစီးမှုလျော့ကျစေနိုင်ပါတယ်။

(၆) လူမှုပေါင်းသင်းရေးလိုက်စားခြင်း
▪️ လူမှုဆက်ဆံရေးမှာ တက်ကြွစွာ နေထိုင်ခြင်းဖြင့် ဦးနှောက်ကျန်းမာရေး ကောင်းမွန်စေပါတယ်။

▪️ စိတ်ပိုင်းဆိုင်ရာကို လှုံ့ဆော်ပေးပြီး မိတ်ဆွေအပေါင်းအသင်း မိသားစုတို့နဲ့ ဆက်ဆံခြင်း၊ အသင်းအဖွဲ့များ ပါဝင်ခြင်းတို့ဖြင့် စိတ်ပိုင်းဆိုင်ရာ တက်ကြွနေမှာ ဖြစ်ပါတယ်။

(၇) ဆေးလိပ်အရက်သေစာ ရှောင်ရှားခြင်း
▪️ ဆေးလိပ်ရော အရက်သေစာရော အလွန်အကျွံသုံးစွဲခြင်းက အယ်လ်ဇိုင်းမားရောဂါ ဖြစ်နိုင်ခြေကို များစေပါတယ်။

▪️ ဒါကြောင့် ကန့်သတ်သုံးစွဲခြင်း ဒါမှမဟုတ် ဖြတ်ခြင်းတို့ဖြင့် ထိုပြဿနာများကို လျှော့ချနိုင်ပါတယ်။

▪️ အယ်လ်ဇိုင်းမားရောဂါကို လုံးဝကာကွယ်နိုင်မယ့် နည်းလမ်း မရှိပေမယ့် ကျန်းမာရေးနဲ့ ညီညွတ်စွာ နေထိုင်ခြင်းဖြင့် မှတ်ဉာဏ်ချို့ယွင်းမှု ပြဿနာတွေကို အတော်အသင့် လျှော့ချနိုင်မှာ ဖြစ်ပါတယ်။

#Source: DoctorNDTV

Black Myth: ဝူခုန်း ဂိမ်းဖန်တီးနေခဲ့ချိန်အတွင်း အခက်အခဲများစွာကြုံတွေ့ခဲ့ရသော်ငြားကျော်လွှားနိုင်ခဲ့ကြောင်း ဂိမ်းကုမ္ပဏီစီအီးအိုပြောကြား

လက်ရှိမှာ အလွန်လူကြိုက်များနေတဲ့ Black Myth: Wukong ဝူခုန်းဂိမ်းရဲ့ အဓိကဖန်တီးသူတွေထဲက တစ်ဦးဖြစ်တဲ့ ဖန်းကျိက ဂိမ်းဖန်တီးနေစဉ်မှာ တွေ့ကြုံခဲ့တဲ့ အခက်အခဲတွေကို ပြန်လည်ပြောပြသွားပါတယ်။
#World_Entertainment
Published 02 October 2024
#Black Myth #ဂိမ်းကုမ္ပဏီစီအီးအိုပြော
#YMG #Yangon_Times #Yangon_Media_Group

#Daily_News
Published 2 October 2024

၁။ သီတင်းကျွတ်ပိတ်ရက် ကျိုက်ထီးရိုးစေတီ‌တော်၌ ဘုရားဖူး(၅၀၀)ကျော် အခမဲ့တည်းခိုနိုင်အောင်စီစဉ်ပေးထား

၂။ ရွှေတောင်ဒေသထွက်မီးပုံးများ အော်ဒါများစတင်ရရှိ

၃။ ကောလဟာလများ မယုံကြရန်နှင့် ရွှေထွက်ရာသီဖြစ်သောကြောင့် စိုးရိမ်ပူပန်မှုမရှိဘဲ ရောင်းဝယ်ရန် YGEA ဥက္ကဌတိုက်တွန်း

၄။ Black Myth: ဝူခုန်း ဂိမ်းဖန်တီးနေခဲ့ချိန်အတွင်း အခက်အခဲများစွာကြုံတွေ့ခဲ့ရသော်ငြားကျော်လွှားနိုင်ခဲ့ကြောင်း ဂိမ်းကုမ္ပဏီစီအီးအိုပြောကြား ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group