Published 29 December 2023

အမေရိကန်မှ မိန်းပြည်နယ်ဟာ လာမယ့်နှစ် သမ္မတရွေးကောက်ပွဲမှာ ဒေါ်နယ်ထရမ့်ကို ပြည်နယ်မဲပေးမှုကနေ ထုတ်ပယ်လိုက်ပါတယ်။

ဒါဟာ ထိုသမ္မတဟောင်းကို မဲပေးမှုကနေ ပိတ်ပင်လိုက်တဲ့ ဒုတိယမြောက်ပြည်နယ် ဖြစ်လာပါတယ်။

ဒီမိုကရက်တစ်ဦးဖြစ်တဲ့ မိန်းပြည်နယ်ဝန်ကြီးချုပ် ရှန်နာဘယ်လိုးစ်က ၂၀၂၀ ရွေးကောက်ပွဲတုန်းက ထရမ့်ဟာ မဲပေးလိမ်လည်မှု သတင်းမှားတွေကို ဖြန့်ခဲ့ကာ ဥပဒေပြုအမတ်တွေ မဲပေးမှုကို အတည်မပြုနိုင်စေရန် လွှတ်တော်အဆောက်အအုံ ကပ်ပီတိုလ်ကို တိုက်ခိုက်ဖို့ ထောက်ခံသူတွေကို တိုက်တွန်းခဲ့တဲ့ ဖြစ်စဥ်ကို ထောက်ပြလိုက်ပါတယ်။

အစိုးရအခြေခံအုတ်မြစ်ကို ထိပါးလာမယ့် အခြေအနေတစ်ခုကို အမေရိကန် ဖွဲ့စည်းအခြေခံက သည်းခံသွားမှာ မဟုတ်ဘူးလို့ စာရွက် ၃၄ မျက်နှာပါ အုပ်ချုပ်ပုံမှာ ဘယ်လိုးစ်က ရေးသားခဲ့ပါတယ်။

ထိုဆုံးဖြတ်ချက်ကို ပြည်နယ်အထက်တရားရုံးမှာ အယူခံဝင်နိုင်ပြီး တရားရုံးကနေ မဖြေရှင်းသေးသရွေ့ ဘယ်လိုးစ်က သူမပြဌာန်းချက်ကို ဆိုင်းငံ့ထားပါတယ်။

ဒီလိုဆုံးဖြတ်ချက်အတွက် ကန့်ကွက်ကြောင်း အလျင်အမြန် တင်သွင်းသွားမယ်လို့ ထရမ့်ရဲ့ မဲဆွယ်ရေးအဖွဲ့က ပြောကြားလိုက်ပါတယ်။

ပုန်ကန်မှုမှာ ထရမ့်ပါဝင်နေတယ်ဆိုတာကို ထရမ့်ရဲ့ရှေ့နေတွေက ငြင်းချက်ပြနေကြပြီး ထိုနေ့က ထောက်ခံသူတွေကို ပြောကြားခဲ့တာတွေဟာ လွတ်လပ်စွာ ပြောဆိုပိုင်ခွင့်နဲ့ညီတယ်လို့ ပြန်လည်ချေပထားပါတယ်။

သမ္မတတွေဟာ အမေရိကန်အတွက် သစ္စာဆိုပြီးနောက် ပုန်ကန်မှုမှာ ပါဝင်ပါက အမေရိကန် ဖွဲ့စည်းပုံအခြေခံဥပဒေအရ သမ္မတရာထူး ထမ်းဆောင်ခွင့်မရှိဆိုတဲ့ အချက်အပေါ် အခြေခံကာ ထရမ့်ဟာ ပါဝင်ယှဥ်ပြိုင်ခွင့် မရှိဘူးလို့ မိန်းပြည်နယ် လွှတ်တော်အမတ်တွေက ဆိုခဲ့တာ ဖြစ်ပါတယ်။

ဘယ်လိုးစ်အနေနဲ့ သမ္မတဟောင်း ဒေါ်နယ်ထရမ့်ကို မိန်းမဲပေးမှုကနေ ပိတ်ပင်ဖို့ဆုံးဖြတ်တာဟာ ဒီမိုကရေစီနဲ့ ဖွဲ့စည်းပုံအခြေခံဥပဒေဘက်ကနေ ရပ်တည်လိုက်တာဖြစ်ကြောင်း ဥပဒေပြု လွှတ်တော်အမတ်ဟောင်းတွေကလည်း ပြောကြားလိုက်ပါတယ်။

မိန်းပြဌာန်းချက်ဟာ ရွေးကောက်ပွဲမှာ ထရမ့်ပါဝင်ခွင့်နဲ့ ပတ်သက်ပြီး ဖြေရှင်းဖို့ အထက်တရားရုံးအတွက် ဖိအားတွေ ဖြစ်လာစေဦးမှာပါ။

ထရမ့်ဟာ ရီပတ်ဘလစ်ကန် အမည်စာရင်းမှာ ထိပ်ဆုံးကနေ ပြတ်ပြတ်သားသား ဦးဆောင်နေသူ ဖြစ်ပါတယ်။

ဒီဇင်ဘာ ၁၉ ရက်နေ့က ကိုလိုရာဒိုပြည်နယ်ဟာ ထရမ့်ကို ပြည်နယ်မဲပေးမှုကနေ ထုတ်ပယ်လိုက်တဲ့ ပထမဆုံးပြည်နယ် ဖြစ်ခဲ့ပါတယ်။

အခွင့်အရေး လှုပ်ရှားသူများနဲ့ ထရမ့်ဆန့်ကျင်သူများက ပုန်ကန်မှုကိစ္စဖြင့် ထရမ့်ကို ပြည်နယ်အများအပြားကနေ ယှဥ်ပြိုင်ခွင့်ပိတ်ပင်ဖို့ ကြိုးပမ်းနေကြပါတယ်။
Source: Reuters
Published 29 December 2023
#World_Politics
#Yangon_Times #YMG_News #Yangon_Media_Group

#World_Science
Published 29 December 2023

အင်္ဂါဂြိုဟ်လို့ခေါ်တဲ့ မားစ်ဂြိုဟ်ဟာ လူသားတွေအတွက် စိတ်ဝင်စားစရာ အကောင်းဆုံးဂြိုဟ်ဖြစ်နေပါတယ်။

သိပ္ပံပညာရှင်များ ဆယ်စုနှစ်တွေတိုင်အောင် လေ့လာခဲ့ပြီးနောက် လွန်ခဲ့တဲ့ နှစ်သန်းပေါင်းများစွာက မားစ်ဂြိုဟ်မျက်နှာပြင်ပေါ်မှာ ရေတွေနဲ့ သက်ရှိများပင် တည်ရှိခဲ့ပုံရတယ်လို့ ကောက်ချက်ချလိုက်ကြပါတယ်။

Perseverance လို့အမည်ပေးထားတဲ့ နာဆာမှ အာကာသယာဥ်ဟာ မားစ်ဂြိုဟ်ပေါ်မှာ လှည့်လည်သွားလာနေပြီး အရေးကြီးတွေ့ရှိချက်များ ထမ်းဆောင်နေကာ ရေရှိခဲ့တဲ့ အထောက်အထားကို မကြာသေးမီက တွေ့ရှိခဲ့ပါတယ်။

မားစ်ဂြိုဟ်ပေါ်မှာ ကျောက်ခဲ ကျောက်စရစ်များ ပြန့်ကျဲနေပုံကို ထိုယာဥ်မှ ကင်မရာဖြင့် ရိုက်ကူးရရှိခဲ့ပါတယ်။

ဓာတ်ပုံထဲက ကျောက်စရစ်ခဲနဲ့ ကျောက်တုံးတွေဟာ လွန်ခဲ့တဲ့နှစ်ဘီလီယံလောက်က အင်အားပြင်းရေလျှံမှုကြောင့် ပါလာတာဖြစ်တယ်လို့ နာဆာက ဆိုပါတယ်။

နောက်ထပ်အကြောင်းအရာက အခြားဂြိုဟ်ပေါ်မှာ သက်ရှိတည်ရှိတယ်ဆိုတဲ့ အထောက်အထား ရှာဖွေဖို့ပါပဲ။

 ပုံပြင်တွေ ဇာတ်ကားတွေထဲကလို ဂြိုဟ်သားအကောင်လိုက်လားဆိုတာ မသေချာပေမယ့် မားစ်ဂြိုဟ်ပေါ်မှာ အဏုဇီဝပိုးမွှားတွေ၊ ရုပ်ကြွင်းတွေရဲ့ သက်သေတွေကို တွေ့နိုင်ရင်တောင် အရေးပါနေပါပြီ။

ကမ္ဘာဂြိုဟ် စတင်ဖွဲ့စည်းစဥ်ကလည်း သက်ရှိများကင်းမဲ့နေခဲ့ကာ ရေထဲမှာ အဏုဇီဝသက်ရှိများ စတင်ဖြစ်ပေါ်လာပြီး အမျိုးမျိုးသော ရေနေသတ္တဝါများ ဖြစ်ပေါ်လာကာ ကုန်းပေါ်က သတ္တဝါတွေ အပင်တွေက နောက်မှပေါ်ပေါက်လာတယ်လို့ ယူဆနေကြပါတယ်။

ဖြစ်နိုင်တာကတော့ ဂြိုဟ်တစ်ခုမှာ ရေရှိတယ်ဆိုရင် သက်ရှိဖြစ်ပေါ်နိုင်ခြေ ပိုများတယ်လို့ ဆိုရမှာဖြစ်ပါတယ်။

#World_Science #မားစ်ဂြိုဟ် #နာဆာအာကာသယာဥ်မှတွေ့ရှိ #Source: WION

ဘိုင်အိုနစ်ရော်ဘာတုဖြင့်လေယာဥ်တာယာထုတ်လုပ်သည့်နည်းပညာကို တရုတ်ပညာရှင်များ အောင်မြင်စွာဖန်တီးနိုင်ကြောင်းကြေညာ

တရုတ်သုတေသီများဟာ ဘိုင်အိုနစ်ရော်ဘာတုဖြင့် လေယာဥ်တာယာထုတ်လုပ်ခြင်း၊ သက်ဆိုင်ရာ ဒီဂျစ်တယ်တာယာ စက်မှုလုပ်ငန်းဆော့ဝဲ ထုတ်လုပ်ခြင်း နည်းပညာတိုမှာ ဆန်းသစ်တီထွင်မှုများ အောင်မြင်ခဲ့ပါတယ်။
#Asia_Development
Published 28 December 2023
#ဘိုင်အိုနစ်ရော်ဘာတု #အောင်မြင်စွာဖန်တီး
#Yangon_Times #YMG_News #Yangon_Media_Group

#Daily_News
Published 28 December 2023

၁။ ယခုလအတွင်း ကိုဗစ်ပိုးတွေ့သူ(၈၅)ဦးအထိရှိလာ၊ မျိုးကွဲကိုဗစ်ပိုးကိုကာကွယ်နိုင်သည့် ဖိုင်ဇာကာကွယ်ဆေးများရောက်ရှိလာတော့မည်

၂။ ပို့ကုန်မူဝါဒအပြောင်းအလဲကြောင့် နိုင်ငံခြားငွေလဲလှယ်နှုန်းထားပြင်ပ ပေါက်ဈေးဖြင့် ၉၀%ခန့်အထိရရှိသောကြောင့် တွက်ခြေကိုက်ဟုဆို

၃။ ရောဂါ ဖြစ်ပွားခဲ့ခြင်းနှင့်ဆောင်းတွင်းကာလ ရောက်ရှိလာတာကြောင့် ဆိတ်မွေးမြူရေးဈေးကွက် အရောင်းဝယ်အေးနေ

၄။ ဘိုင်အိုနစ်ရော်ဘာတုဖြင့် လေယာဥ်တာယာထုတ်လုပ်သည့်နည်းပညာကို တရုတ်ပညာရှင်များ အောင်မြင်စွာဖန်တီးနိုင်ကြောင်းကြေညာ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

#World_Military
Published 28 December 2023

မြောက်ကိုရီးယား ခေါင်းဆောင်ကင်မ်ဂျုံအန်းက အမေရိကန်တို့ရဲ့ ထိပ်တိုက်တွေ့ဆုံဖွယ် လှုပ်ရှားမှုများကို တုန့်ပြန်ရန် တိုင်းပြည်မှ စစ်တပ်၊ လက်နက်ခဲယမ်းလုပ်ငန်းများ၊ နျူကလီးယားလက်နက်ကဏ္ဍတို့ကို စစ်ပွဲအတွက် ပြင်ဆင်မှုများ အရှိန်မြှင့်တင်ရန် အမိန့်ပေးလိုက်ကြောင်း နိုင်ငံပိုင်မီဒီယာက ကြာသပတေးနေ့မှာ ဖော်ပြခဲ့ပါတယ်။

မြောက်ကိုရီးယားအနေနဲ့ နယ်ချဲ့ဆန့်ကျင်ရေးနိုင်ငံများနဲ့ ဗျူဟာမြောက် ပူးပေါင်းဆောင်ရွက်မှုများ ချဲ့ထွင်သွားမယ်လို့ အစိုးရပါတီအဓိကဆွေးနွေးပွဲတစ်ရပ်မှာ ကင်မ်ဂျုံအန်းက ပြောကြားသွားတယ်လို့ KCNA သတင်းဌာနက ဖော်ပြသွားပါတယ်။

မြောက်ကိုရီးယားက ရုရှားနဲ့ဆက်ဆံရေး တိုးချဲ့လာပြီး ယူကရိန်းစစ်ပွဲအတွက် ရုရှားကို စစ်လက်နက်ပစ္စည်းများ ထောက်ပံ့နေတယ်လို့ အမေရိကန်က စွပ်စွဲထားပါတယ်။

ရုရှားကတော့ မြောက်ကိုရီးယား စစ်ရေးဆောင်ရွက်မှုများ အဆင့်မြင့်လာစေရန် နည်းပညာများ ကူညီထောက်ပံ့နေပါတယ်။

တိုင်းပြည်ရဲ့ ၅ နှစ်ဖွံ့ဖြိုးရေး အစီအစဥ်အတိုင်း နှစ်သစ်အတွက် စီးပွားရေးပန်းတိုင်များကို အစည်းအဝေးပွဲမှာ ဖော်ပြသွားပါတယ်။

အဓိကစက်မှုကဏ္ဍတွေမှာ တွန်းအားပေးဖို့ နှစ်သစ်အတွက် အရေးကြီးတာဝန်များကို ရှင်းလင်းပြောကြားခဲ့ကာ စိုက်ပျိုးမွေးမြူရေး ထုတ်လုပ်မှုမှာ အဆင့်အတန်းမြင့်မားစွာ တည်ငြိမ်လုပ်ဆောင်နိုင်စေရန် တောင်းဆိုလိုက်ပါတယ်။

မြောက်ကိုရီးယားဟာ လတ်တလောဆယ်စုနှစ်များအတွင်း စားနပ်ရိက္ခာ ဆိုးဆိုးရွားရွား ပြတ်လပ်မှုများ ကြုံတွေ့နေရပြီး ကိုဗစ်ကပ်ရောဂါကာလအတွင်း နယ်စပ်ပိတ်ဆို့ထားခြင်းက စားနပ်ရိက္ခာပြဿနာကို ပိုမိုဆိုးရွားစေလိမ့်မယ်လို့ နိုင်ငံတကာမှ ကျွမ်းကျင်သူများက သတိပေးထားပါတယ်။

ကောင်းမွန်လာတဲ့ ရာသီဥတုကြောင့် နှစ်စဥ်သီးနှံအထွက်နှုန်း တိုးတက်လာမယ်လို့ မျှော်မှန်းခဲ့ပေမယ့် တိုင်းပြည်ရဲ့ ရေရှည်စားနပ်ရိက္ခာ ပြတ်လပ်မှုကို ဖြေရှင်းဖို့အတွက်တော့ နည်းပါးနေဆဲဖြစ်ကြောင်း တောင်ကိုရီးယားအရာရှိတစ်ဦးက ဆိုလိုက်ပါတယ်။

မြောက်ကိုရီးယားနှစ်ချုပ်အကြောင်း ဆွေးနွေးတဲ့ ကိုရီးယားအလုပ်သမားပါတီကော်မတီ အစည်းအဝေးမှာ နျူကလီးယားမူဝါဒကို အခြေခံဖွဲ့စည်းပုံမှာ ထည့်သွင်းတဲ့အကြောင်း၊ စပိုင်ဂြိုဟ်တု လွှတ်တင်ခြင်းနဲ့ တိုက်ချင်းပစ်ဒုံးကျည်ပစ်လွှတ်ခြင်းတို့အကြောင်း ဆွေးနွေးသွားပါတယ်။

#World_Military #စစ်ပွဲပြင်ဆင်မှုအရှိန်မြှင့်ထား #ကင်မ်ဂျုံအန်းအမိန့်ပေး #Source: Reuters

Published 28 December 2023