#World_Health
Published 23 December 2023

ဟောင်ကောင်တက္ကသိုလ်မှ သုတေသီများက အသည်းကင်ဆာ နောက်ပိုင်းအဆင့်လူနာတွေရဲ့ အသက်ကို ဆွဲဆန့်နိုင်စေမယ့် ကမ္ဘာ့ပထမဆုံးကုသနည်းကို တွေ့ရှိပြီလို့ ဆိုလိုက်ပါတယ်။

ထိုကုသနည်းအသစ်ဟာ ကင်ဆာအကျိတ်ကို အစားထိုးခွဲစိတ်လို့ ရလောက်တဲ့ အခြေအနေအထိ လျှော့ချနိုင်မှာ ဖြစ်ပါတယ်။

အကျိတ်ကို ပစ်မှတ်ထားကုသတဲ့ နည်းလမ်းနဲ့ အကျိတ်ကို အဆင့်တစ်အခြေအနေသို့ ပြန်ရောက်အောင် လျှော့ချတဲ့ နည်းလမ်းတို့ကို ပေါင်းစပ်ထားတာ ဖြစ်ပါတယ်။

ထိုနည်းလမ်းဖြင့် အသည်းကင်ဆာ အဆင့် ၄ ဖြစ်ပွားနေတဲ့ အသက် ၆၅ နှစ်အရွယ်လူနာကို ကုသနိုင်ခဲ့ကာ အကျိတ်ကိုဦးစွာ သေးသွားအောင် ပြုလုပ်ပြီး ဖယ်ရှားခဲ့ကြကြောင်း လီကာရှင်းဆေးစင်တာမှ ပရော်ဖက်ဆာ အယ်ဘတ်ချန်ချီယန်က ပြောပြသွားပါတယ်။

အသည်းကင်ဆာကို ကုသနိုင်ဖို့ ဖြစ်နိုင်ခြေတွေ ယူဆောင်လာပေးတဲ့ သုတေသနအဖွဲ့ကို ဂုဏ်ယူမိပါတယ်လို့ ဆိုပါတယ်။

ဝေါင်လော့ဝင်းလို့ အမည်ရတဲ့ လူနာဟာ ယမန်နှစ်နိုဝင်ဘာလက အသက်ရှင်နေထိုင်ရန် အချိန် ၆ လခန့်သာ ကျန်တော့တယ်လို့ သိခဲ့ရပါတယ်။

၁၈.၂ စင်တီမီတာအချင်းရှိတဲ့ အကျိတ်က အသည်းသို့ သွေးပို့ဆောင်ပေးတဲ့ အဓိကသွေးကြောမကြီးဆီ ကူးစက်ပျံ့နှံ့နေပြီ ဖြစ်ပါတယ်။

ဒီနောက် သုတေသီတွေရဲ့ ကုသနည်းဖြင့် နောက်ဆုံးမျှော်လင့်ခွဲစိတ်ခဲ့ရာမှာ အကျိတ်အရွယ်အစားကို လျှော့ချနိုင်ခဲ့ပြီး သားဖြစ်သူရဲ့ အသည်းအစိတ်အပိုင်းဖြင့် အစားထိုးခွဲစိတ်ခဲ့ကာ အခုဆိုရင် ကင်ဆာပျောက်ကင်းသွားပြီ ဖြစ်ပါတယ်။

လူနာတွေမှာ ထိုကုသနည်း ထိရောက်မှုကို ၈၀ ရာခိုင်နှုန်းလောက်အထိ ရောက်ရှိလာစေရန် မျှော်လင့်ကာ ကိုယ်ခံအားကုထုံးကိုလည်း ထည့်သွင်းသွားဖို့ သုတေသီများ ဖော်ထုတ်နေပါတယ်။

အသည်းကင်ဆာဖြစ်ရတဲ့ အဓိကအကြောင်းအရင်းကို သေချာမသိရသေးပေမယ့် အသည်းခြောက်ခြင်းဝေဒနာနဲ့ ဆက်စပ်နေတတ်ပါတယ်။

အရက် အလွန်အကျွံသောက်ခြင်း၊ အသည်းရောင် ဘီ သို့မဟုတ် စီရောဂါ ကူးစက်ခြင်းတို့ကြောင့် အသည်းအဓိက ပျက်စီးနေရပါတယ်။

ပြောင်းလဲလာတဲ့ နေထိုင်စားသောက်မှုစနစ်တွေကြောင့်လည်း အသည်းရောဂါ အဖြစ်များလာကြပါတယ်။

#World_Health #အသည်းကင်ဆာနောက်ပိုင်းအဆင့် #အံ့ဖွယ်ကုသနိုင်သည့်နည်းလမ်း #Source: WION

#World_Health
Published 23 December 2023

ဆောင်းရာသီ ချမ်းအေးလာတဲ့အချိန်မှာ အဆစ်အမြစ်နာသူတွေဟာ ရောဂါလက္ခဏာတွေ ပိုမိုဆိုးရွားလာတတ်ပါတယ်။

ထိုရောဂါက အဆစ်နေရာတွေမှာ နာကျင်ခြင်း၊ ဖောရောင်ခြင်း၊ တောင့်တင်းခြင်းတို့ ခံစားရစေပါတယ်။

အဆစ်အမြစ်နာ ရောဂါ ၂ မျိုးကတော့ လေးဖက်နာလိုမျိုး အသက်အရွယ် ကြီးလာတာနဲ့အမျှ ဖြစ်တတ်တဲ့ အမျိုးအစားဖြစ်ပြီး နောက်တစ်မျိုးကတော့ လူသန်းပေါင်းများစွာမှာ အဖြစ်များနေတဲ့ အရိုးအဆစ်နာ အမျိုးအစား ဖြစ်ပါတယ်။

ပတ်ဝန်းကျင် အပူချိန်ကျဆင်းလာတာနဲ့အမျှ ဒီရောဂါက ပိုမိုနာကျင်တောင့်တင်းလာပြီး ထိန်းချုပ်ကုသဖို့ လိုအပ်လာပါတယ်။

ဒါကြောင့် ဆောင်းရာသီမှာ အဆစ်နာရောဂါ သက်သာစေနိုင်မယ့် နည်းလမ်းတွေကတော့..

နွေးထွေးစွာနေထိုင်ခြင်း - ဦးထုပ်၊ လက်အိတ်၊ ခြေအိတ်များ ဝတ်ဆင်ခြင်းဖြင့် နွေးထွေးမှုပေးနိုင်သလို ရေနွေးဖြင့်ရေချိုးခြင်းက အဆစ်နာကျင်ခြင်းများကို သက်သာစေနိုင်ပါတယ်။

လေ့ကျင့်ခန်းပြုလုပ်ခြင်း - ပုံမှန်လေ့ကျင့်ခန်း ပြုလုပ်ပါက လှုပ်ရှားနိုင်စွမ်းနဲ့ နှလုံးကျန်းမာရေးတို့ကို အထောက်အကူ ဖြစ်စေပြီး အဆစ်အမြစ်နာခြင်းအတွက် အကျိုးရှိစေပါတယ်။

ရေဓာတ်ဖြည့်ပေးခြင်း - အရိုးများ တစ်ခုနဲ့တစ်ခု ပွတ်တိုက်ခြင်းမှ ကာကွယ်ပေးတဲ့ အဆစ်နားတဝိုက်မှ အရည်များထုတ်လုပ်နိုင်အောင် ပုံမှန်ရေဓာတ် ဖြည့်ပေးဖို့လိုအပ်ပါတယ်။

အကိုက်အခဲပျောက်ဆေး ရှောင်ရှားခြင်း - အက်ဆီတမီနိုဖန်နဲ့ အိုင်ဗျူပရိုဖန်တို့လို ဆေးတွေက နာကျင်မှုကို ခဏတာ သက်သာစေနိုင်ပေမယ့် ကျန်းမာရေးပညာရှင်နဲ့ တိုင်ပင်ပြီးမှသာ အသုံးပြုသင့်ပါတယ်။

အာယုဗေဒဆေးနည်းလမ်းများ ရှောင်ရှားခြင်း - အဆစ်အမြစ်နာခြင်းအတွက် အာယုဗေဒ ဆေးနည်းလမ်းများ အသုံးမပြုဖို့ကိုလည်း အကြံပြုချင်ပါတယ်။

#World_Health #အဆစ်အမြစ်နာကျင်ခြင်း #သက်သာစေမည့်နည်းလမ်းများ #Source: India Today

ရှန်ဟိုင်းဒစ္စနေအပန်းဖြေစခန်းမှာ ကမ္ဘာ့ပထမဆုံး ဇူတိုးပီးယားနေရာကို အင်္ဂါနေ့က ဖွင့်လှစ်လိုက်ပြီး လာရောက်တဲ့ဧည့်သည်တွေအနေနဲ့ ကာတွန်းရုပ်ရှင်တွေထဲက ဇာတ်ကောင်များကို အနီးကပ်ကြည့်ရှုနိုင်မှာ ဖြစ်ပါတယ်။
#World_Entertainment
Published 22 December 2023
#Zootopiaကာတွန်းရုပ်ရှင် #ရှန်ဟိုင်းဒစ္စနေအပန်းဖြေစခန်း
#Yangon_Times #YMG_News #Yangon_Media_Group

#Daily_News
Published 22 December 2023

၁။ ပြည်တွင်းစက်သုံးဆီ ဓါတ်ဆီတစ်လီကျပ် ၁၀၀ကျော်နှင့် ဒီဇယ်တစ်လီတာကျပ် ၂၀၀ကျော်အထိ ဈေးမြင့်တက်

၂။ ပုဂ္ဂလိကကိုယ်ပိုင်ကျောင်းများမှ ဆယ်တန်းဖြေမည့်သူအများဆုံး တစ်သောင်းကျော်ရှိနိုင်ဟုဆို

၃။ အခမဲ့ စက်ချုပ်သင်တန်းတက်ရောက်သည့် ထူးချွန်သူများအား အပ်ချုပ်စက်တစ်လုံးစီ ပံ့ပိုးပေးမည်

၄။ Zootopia ကာတွန်းရုပ်ရှင်နောက်ခံပြုပထမဆုံးဥယျာဥ် ရှန်ဟိုင်းဒစ္စနေအပန်းဖြေစခန်းတွင်ဖွင့်လှစ်... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

#World_News
Published 22 December 2023

အသက် ၂၄ နှစ်အရွယ် ချက်လူမျိုး ကျောင်းသားတစ်ဦးဟာ ကြာသပတေးနေ့က ကလေးအဖေတစ်ဦးနဲ့ ပရက်ဂ်တက္ကသိုလ်ရှိ လူ ၁၄ ဦးကို ပစ်သတ်ခဲ့ပြီး ၂၅ ဦးကို ဒဏ်ရာရရှိစေခဲ့ကာ သူ့ကိုယ်သူ အဆုံးစီရင်သွားကြောင်း ရဲတပ်ဖွဲ့က ပြောကြားခဲ့ပါတယ်။

ဒါဟာ ချက်နိုင်ငံမှာ အဆိုးရွားဆုံး လူအစုလိုက် သတ်ဖြတ်မှုတစ်ခု ဖြစ်လာပါတယ်။

အစိုးရက ကွယ်လွန်သွားသူတွေကို အမှတ်ရတဲ့အနေနဲ့ ဒီဇင်ဘာ ၂၃ ရက်နေ့ကို ဝမ်းနည်းပူဆွေးခြင်း အထိမ်းအမှတ်နေ့အဖြစ် ကြေညာရန် သမ္မတပီတာပေဗယ်လ်က ဝန်ကြီးများနဲ့ အထူးတွေ့ဆုံဆွေးနွေးမှုမှာ ဆုံးဖြတ်လိုက်ပါတယ်။

ငယ်ရွယ်တဲ့ လူငယ်မျိုးဆက်သစ်များ မလိုလားအပ်ဘဲ ဆုံးရှုံးရတဲ့အတွက် အလွန်ဝမ်းနည်းရကြောင်း၊ ကွယ်လွန်သွားသူတွေရဲ့ ဆွေမျိုးအားလုံး ဒီဖြစ်ရပ်ဆိုးကြီးမှာ ပါဝင်ခဲ့သူအားလုံးကို တောင်းပန်အပ်ကြောင်း၊ ချက်ပြည်သူ့သမ္မတနိုင်ငံသမိုင်းမှာ အဆိုးရွားဆုံး ဖြစ်ရပ်ဆိုးဖြစ်ကြောင်း ပေဗယ်လ်က ပြောပြသွားပါတယ်။

ပစ်ခတ်မှုဖြစ်ပွားတဲ့ ပရက်ဂ်ချားလ်စ်တက္ကသိုလ် အဆောက်အအုံမှာ လက်နက်အများအပြားကို ရဲတပ်ဖွဲ့က တွေ့ရှိခဲ့ပြီး တရားခံက သူ့ကိုယ်သူအဆုံးစီရင်ရန် ရည်ရွယ်ချက်ဖြင့် ကလက်ဒ်နိုရှိ သူ့နေရပ်မြို့ကနေ ပရက်ဂ်မြို့သို့ ဦးတည်ထွက်ခွာဖို့များတယ်လို့ ထိုနေ့အစောပိုင်းက သတင်းကြားမိခဲ့ကြပါတယ်။

သေနတ်သမား အတန်းတက်ရောက်ရမယ့် အနုပညာအဆောက်အအုံမှ လူတွေကို ရဲတွေက ဖယ်ရှားရှင်းလင်းခဲ့ပေမယ့် ဒီထက်ပိုကြီးတဲ့ အဆောက်အအုံကနေ အကူအညီတောင်းခဲ့ကြရာ ပစ်ခတ်မှုအကြောင်း တိုင်ကြားပြီးနောက်မိနစ်ပိုင်းအတွင်း ရောက်ရှိလာကြကြောင်း ရဲတပ်ဖွဲ့ဥက္ကဌ မာတင်ဗွန်ဒရာဆက်ခ်က ပြောပြခဲ့ပါတယ်။

ဒါ့အပြင် လူတစ်ဦးနဲ့ ၂ လသားအရွယ်ကလေး တစ်ယောက်တို့ကိုလည်း ပရက်ဂ်မြို့အပြင်ဘက် ရွာတစ်ရွာက တောအုပ်ထဲမှာ အသေပစ်သတ်ခဲ့တာကို ပြီးခဲ့တဲ့အပတ်က တွေ့ရှိထားရာမှာ ထိုသေနတ်သမားကိုပဲ သံသယရှိထားပါတယ်။

သေနတ်သမား သေဆုံးရတာဟာ ကိုယ့်ကိုယ်ကို အဆုံးစီရင်တာ ဖြစ်နိုင်သလို ရဲတွေပြန်ပစ်လို့ သေဆုံးတာလားဆိုတာ အာဏာပိုင်တွေ စုံစမ်းနေပါတယ်။

သေနတ်သမားဟာ အောင်မြင်မှုကြီးကြီးမားမား ရရှိထားတဲ့ ကျောင်းသားတစ်ဦးဖြစ်ပြီး ယခင်က ပြစ်မှုကျူးလွန်ထားတာ မရှိဘဲ တစ်ဦးတည်း လှုပ်ရှားခဲ့တာ ဖြစ်တယ်လို့ ရဲတွေက ဆိုပါတယ်။

အဆိုပါ ပစ်ခတ်မှုက အပြည်ပြည်ဆိုင်ရာ အကြမ်းဖက်မှုတွေနဲ့ ဆက်စပ်ခြင်းမရှိဘူးလို့ ပြည်ထဲရေးဝန်ကြီး ဗစ်ရာကူဆန်က ပြောပြလိုက်ပါတယ်။

အခင်းဖြစ်ပွားရာ အဆောက်အအုံ ဝန်းကျင်နေရာမှာ အတားအဆီးများ ချထားပါတယ်။

မျက်မြင်သက်သေတစ်ဦးဖြစ်တဲ့ အသက် ၄၃ နှစ်ရှိ အီဗိုဟက်ဗ်နာရက်က အဆောက်အအုံထဲကနေ ကျောင်းသားတွေ ဆရာတွေ ရုတ်တရက် ပြေးထွက်လာကြတာ မြင်ရကြောင်း၊ ပရက်ဂ်မှာ ဒီလိုပစ်ခတ်မှုမျိုး ဖြစ်မယ်လို့ မထင်မိကြောင်း၊ ရိုင်ဖယ်သေနတ်တွေကိုင်ပြီး ရဲတွေပါလာတော့မှ တကယ်ဖြစ်နေတယ်ဆိုတာ သိရကြောင်း ပြောပြသွားပါတယ်။

ချက်ပြည်သူ့သမ္မတနိုင်ငံဟာ သေနတ်ပစ်ခတ်မှု အလွန်ရှားပါးတဲ့ နိုင်ငံတစ်နိုင်ငံဖြစ်ပါတယ်။

#World_News #ချက်နိုင်ငံပရက်ဂ်တက္ကသိုလ် #သေနတ်ဖြင့်ပစ်ခတ်မှုဖြစ် #လူ(၁၄)ဦးသေဆုံး #Source: Reuters

#World_Health
Published 22 December 2023

ရောဂါကူးစက်မှုများ၊ မအီမသာဖြစ်ခြင်းများ မဖြစ်စေရန်အတွက် သန့်စင်ခန်းကို မှန်ကန်စွာ သန့်ရှင်းအောင်ထားဖို့က အရေးကြီးပါတယ်။

အိမ်သာသုံးစက္ကူများအစား ရေပန်းအသုံးပြုဖို့ကို ဂျပန်သိပ္ပံပညာရှင်များ အကြံပြုနေကြပြီး ဒီနည်းလမ်းက ရောဂါကူးစက်မှုတွေကို သိသိသာသာ လျှော့ချနိုင်တယ်လို့ ဆိုပါတယ်။

အိမ်သာသုံးစက္ကူ အသုံးပြုသူတွေထက် ရေပန်းအသုံးပြုသူတွေဟာ လက်တွေဟာ ဘက်တီးရီးယားပါနိုင်ခြေ ၁၀ ဆပိုနည်းကြောင်း တွေ့ရှိဖော်ပြခဲ့ကြပါတယ်။

အိမ်သာသုံးစက္ကူ အသုံးပြုခြင်းကြောင့် Clostridium difficile ဘက်တီးရီးယား ပျံ့နှံ့စေပြီး ဝမ်းပျော့စေကာ အူလမ်းကြောင်း ရောင်ရမ်းခြင်းရောဂါများ ဖြစ်နိုင်ပါတယ်။

အမေရိကမှာ C.difficile ကူးစက်သူ နှစ်စဥ်ငါးသိန်းခန့်ရှိနေပြီး သေဆုံးသူသောင်းဂဏန်းခန့် ရှိပါတယ်။

နယူးယော့ခ်မှ ဒေါက်တာ အီဗန်ဂိုးလ်စတိုင်းက အိမ်သာသုံးစက္ကူတွေဟာ ထင်ထားသလို မသန့်ရှင်းကြောင်း၊ ရေပန်းအသုံးပြုဖို့ကို တိုက်တွန်းလိုကြောင်း ပြောပြခဲ့ပါတယ်။

ရေပန်းပြောင်းလဲဖို့ အခက်အခဲရှိသူတွေအနေနဲ့ မှန်ကန်တဲ့ စက္ကူအမျိုးအစားနဲ့ သုတ်ပုံသုတ်နည်း အသုံးပြုခြင်းဖြင့် ရောဂါကူးစက်မှုများကို ကာကွယ်နိုင်မှာ ဖြစ်ပါတယ်။

တစ်ရွက်တည်းပါတဲ့ တစ်ရှူးစက္ကူတွေဆိုရင် မျက်နှာပြင်ကြမ်းတမ်းတာကြောင့် ဒဏ်ရာအနာတရများ ဖြစ်စေနိုင်ပါတယ်။

ဒီအတွက် ထူထဲပျော့ပျောင်းပြီး စုပ်ယူနိုင်စွမ်းကောင်းတဲ့ အိမ်သာသုံးတစ်ရှူးများ အသုံးပြုဖို့ ကျွမ်းကျင်သူများ အကြံပြုထားပါတယ်။

ပြင်းပြင်းထန်ထန် သုတ်ပါက ထိုနေရာမှာ ပွန်းပဲ့ဒဏ်ရာ ဖြစ်နိုင်ပါတယ်။

စအိုတဝိုက်နေရာကို အိမ်သာတက်ပြီးတိုင်း သန့်ရှင်းရေးလုပ်သင့်ပေမယ့် ညင်သာစွာ ပြုလုပ်သင့်ပါတယ်။

အမျိုးသမီးတွေ သန့်ရှင်းရေးလုပ်တဲ့အခါမှာ အရှေ့ကနေ အနောက်သို့ သုတ်သွားမှသာ ဆီးလမ်းကြောင်းထဲ ပိုးဝင်တာမျိုး ကာကွယ်နိုင်မှာ ဖြစ်ပါတယ်။

အမျိုးသမီးတွေရဲ့ ဆီးလမ်းပြွန်က တိုတာကြောင့် ဆီးလမ်းကြောင်းပိုးဝင်တာ အဖြစ်များပေမယ့် အမျိုးသားတွေမှာလည်း ပိုးဝင်တာမျိုး ရှိတတ်ပါတယ်။

ဘိုထိုင်အိမ်သာတွေမှာ ရေဆွဲချတဲ့အခါ အဖုံးမပိတ်ဘဲ ရေဆွဲပါက အဖုံးပိတ်တာထက် ဘက်တီးရီးယား ကူးစက်နိုင်ခြေ ၁၂ ဆ ပိုများပါတယ်။

ထိုကဲ့သို့ မှန်ကန်တဲ့ အိမ်သာသုံးစက္ကူ၊ သင့်လျော်တဲ့ သုတ်ပုံသုတ်နည်း၊ ရေမဆွဲချခင် အဖုံးပိတ်ခြင်းတို့က လူတစ်ဦးချင်းစီနဲ့ လူအများရဲ့ ကျန်းမာရေးကို ကာကွယ်ပေးသွားမှာ ဖြစ်ပါတယ်။

#World_Health #ရောဂါကူးစက်မှု #အိမ်သာသန့်ရှင်းမှုနည်းလမ်း #Source: The Jerusalem Post