#World_Science
Published 1 August 2024

▪️ ဦးနှောက်ထိခိုက်ခြင်း၊ ဦးနှောက်လေဖြတ်ခြင်း၊ ဘေးထွက်အာရုံကြောချို့ယွင်းခြင်း (ALS)စတဲ့ ရောဂါတွေကြောင့် အကြောသေပြီး စကားမပြောနိုင်သူတွေအတွက် အတွေးနဲ့တင် AIစနစ်ဖြင့် ပြောဆိုနိုင်မယ့် နည်းပညာကို အစ္စရေးလ် တဲလ်အေဗစ်တက္ကသိုလ်မှ သုတေသီများ စမ်းသပ်နေကြပါတယ်။

▪️ စမ်းသပ်မှုတစ်ခုပြုလုပ်ရာမှာ လူနာက အသံထွက်စာလုံးနှစ်လုံးထဲက တစ်လုံးကို ပြောတယ်ဆိုပြီး ပုံဖော်ခိုင်းပါတယ်။

▪️ ဦးနှောက်ထဲမှာ ထည့်သွင်းထားတဲ့ လျှပ်တိုင်တွေက လျှပ်စစ်အချက်ပြချက်တွေကို ကွန်ပျူတာသို့ ကူးပြောင်းပေးကာ အသံထွက်စေတာ ဖြစ်ပါတယ်။

▪️ စကားပြောပေးတဲ့ ဦးနှောက်ကွန်ပျူတာ လုပ်ဆောင်ချက်ဟာ ဦးနှောက်ထဲက ကြိမ်နှုန်းမြင့်လှုပ်ရှားမှုအပေါ် အခြေခံကာ စကားအရာတွေကို ဉာဏ်ရည်တု တည်ဆောက်တာ ဖြစ်ပါတယ်။

▪️ ဒီနည်းလမ်းဖြင့် လုံးဝအကြောသေထားသူတွေအတွက် ပြန်လည်ပြောဆိုနိုင်စွမ်း ရလာဖို့ မျှော်လင့်နိုင်ပါတယ်။

▪️ ၃၇ နှစ်ရှိ လူနာတစ်ဦးကို ဆေးရုံတင်ပြီး ဦးနှောက်ထဲမှာ လျှပ်တိုင်တွေကို ထည့်သွင်းခဲ့ကာ ပထမစမ်းသပ်မှုများအတွင်း စကားသံအမျိုးမျိုးကို ဉာဏ်ရည်တုစနစ်ဖြင့် ၈၅ ရာခိုင်နှုန်းတိကျအောင် အသံထွက်နိုင်ခဲ့ပါတယ်။

▪️ လူနာကို 'အေ'နဲ့ 'အီး' အသံနှစ်မျိုးကို အသံထွက်ခိုင်းခဲ့ပြီးနောက် ထိုအသံတွေကို လူနာက ပုံဖော်တဲ့အချိန်မှာ ဦးနှောက်လှုပ်ရှားမှုကို မှတ်သားခဲ့ပါတယ်။

▪️ ဉာဏ်ရည်တုမှတ်သားစနစ်ဖြင့် ပြောချင်တဲ့ စကားလုံးအသံထွက်အတိုင်း လှုပ်ရှားတဲ့ ဦးနှောက်ဆဲလ်တွေကို ရှာတွေ့နိုင်အောင် ဖန်တီးခဲ့ကြပါတယ်။

▪️ လူနာဦးနှောက်ထဲမှာ အသံထွက်စကားလုံး ၂ ခုနဲ့ပတ်သက်တဲ့ လှုပ်ရှားမှုပုံစံကို ကွန်ပျူတာက မှတ်သားပြီးနောက် 'အေ'နဲ့ 'အီး' ကို ပြောတယ်လို့ ပုံဖော်ခိုင်းပါတယ်။

▪️ ကွန်ပျူတာက ထိုလှုပ်ရှားမှုတွေကို ဘာသာပြန်ပြီး ကြိုတင်အသံထည့်ထားတဲ့ စကားလုံးအသံထွက်အတိုင်း ထွက်ပေါ်စေပါတယ်။

▪️ 'အေ'နဲ့ 'အီး' အသံတွေကို ကိုယ်စားပြုတဲ့ လျှပ်စီးအချက်ပြမှုတွေကို ခွဲခြားသိရှိနိုင်ခဲ့ပြီး ယင်းတို့ရဲ့ ရည်မှန်းချက်က စကားအပြည့်အစုံ ပြောနိုင်ရန် ဖြစ်ပေမယ့် အခုလိုအသံထွက်နိုင်လျှင်ပင် လူနာအနေနဲ့ ဟုတ်တယ် မဟုတ်ဘူးဆိုတာကို ပြောနိုင်မှာဖြစ်ပါတယ်။

▪️ အနာဂတ်မှာဆိုရင်တော့ ထိုကဲ့သို့ ရောဂါလက္ခဏာ အစောပိုင်းအဆင့် ရောက်နေသူတွေ စကားပြောနေနိုင်သေးတဲ့ အခြေအနေမှာ ကွန်ပျူတာကို မှတ်သားခိုင်းဖို့ ဖြစ်လာနိုင်ပါတယ်။

▪️ ဒါမှ လူနာဦးနှောက်ထဲက လှုပ်ရှားမှုတွေကို ကွန်ပျူတာက မှတ်သားပြီး လူနာက အကြောသေသွားတဲ့အခါ ဘာသာပြန်နိုင်မှာ ဖြစ်ပါတယ်။

#Source: The Jerusalem Post

#World_Health
Published 1 August 2024

▪️ သန့်စင်ထားတဲ့ ဂီးထောပတ်ကို အိန္ဒိယဟင်းလျာတွေမှာ အသုံးပြုလာတာ နှစ်ပေါင်းထောင်ချီ ကြာလာပါပြီ။

▪️ အာယုဗေဒဆေးပညာမှာဆိုရင် ဂီးထောပတ်က အစာကြေစေခြင်း၊ ကြံ့ခိုင်စေခြင်း၊ သက်ရှည်ခြင်းစတဲ့ အကျိုးကျေးဇူးများ ရှိပါတယ်။

▪️ အဆီပါဝင်မှု များတာကြောင့် ကျန်းမာရေးနဲ့ မညီညွတ်ဘူးလို့လည်း ငြင်းခုံသူများရှိနေပေမယ့် အာဟာရပညာရှင် အန်မာမီအေဂါဝယ်လ်ကတော့ ဂီးထောပတ်ကို အစာမရှိတဲ့အချိန် စားပေးဖို့ အကြံပြုလိုက်ပြီး နံနက်တိုင်း စားပေးခြင်းရဲ့ အကျိုးကျေးဇူးတွေကို ဖော်ပြလိုက်ပါတယ်။

▪️ (၁) အစာအိမ်အက်ဆစ်ကို လှုံ့ဆော်ပေးကာ အစာခြေခြင်းကို မြှင့်တင်ပေးပါတယ်။
အာဟာရဓာတ်တွေကို ကောင်းစွာစုပ်ယူပြီး အလုံးစုံကျန်းမာရေးကို ကောင်းမွန်စေပါတယ်။

▪️ (၂) အဆိပ်အတောက် ဖယ်ရှားပေးခြင်းနဲ့ အူလမ်းကြောင်း ကျန်းမာရေးတို့ကို ထောက်ပံ့ပေးပါတယ်။

▪️ အူလမ်းကြောင်းနံရံတွေကို သန့်စင်ပေးပြီး အာဟာရဓာတ်စုပ်ယူမှု ကောင်းမွန်စေကာ ကိုယ်ခံအားစနစ် မြှင့်တင်ပေးပါတယ်။

▪️ (၃) အူလမ်းကြောင်းထဲက ရောင်ရမ်းခြင်းကို ဆန့်ကျင်ပေးကာ အူလမ်းကြောင်းနဲ့ ပတ်သက်တဲ့ လက္ခဏာများကို သက်သာစေပါတယ်။

▪️ (၄) သူ့မှာပါတဲ့ ထူးကဲတဲ့ ဖက်တီးအက်ဆစ်က ဇီဝကမ္မဖြစ်စဉ်ကို ကူညီပေးကာ ကိုယ်အလေးချိန် လျှော့ချဖို့ အသုံးဝင်ပေမယ့် ကယ်လိုရီများတာကိုလည်း ထည့်သွင်းသတိပြုသင့်ပါတယ်။

▪️ ဂီးထောပတ်စားပြီးနောက် နေထိုင်လို့မကောင်းဘူးဆိုရင်တော့ ချင့်ချိန်စားသုံးတာမျိုး၊ ဆရာဝန်နဲ့ တိုင်ပင်တာမျိုး ပြုလုပ်သင့်ပါတယ်။

#Source: DoctorNDTV

၂၀၂၄ ပဲရစ်အိုလံပစ် ဆုတံဆိပ်တွေကို ခေတ်ဆန်ဆန်ဖြင့် သမိုင်းကြောင်းကို ရောစပ်ပြီး ဖန်တီးသွားမှာဖြစ်ကာ ပွဲစီစဉ်သူတွေက နောက်ဆုံးအဆင့် ထုတ်လုပ်ဖန်တီးရာမှာ အီဖယ်မျှော်စင်မှ သတ္တုများဖြင့် ပေါင်းစပ်သွားမှာ ဖြစ်ပါတယ်။
#World_Sports
Published 31 July 2024
#အီဖယ်မျှော်စင် #ပဲရစ်အိုလံပစ်ဆုတံဆိပ်များ

#Daily_News
Published 31 July 2024

၁။ ရေဘေးသင့်ပြည်သူများကို အငြိမ့်မင်းသမီးများမှထမင်းထုတ်များလှူဒါန်းမည်

၂။ ပုသိမ်တွင်ရေကြီးနေပေမည့် ချောင်းသာကို ဧည့်ဝင်နေသေး၊ ကမ်းခြေအချို့ရေဝဲသတိပြုရန်လို

၃။ ကွမ်းခြံများရေမြုပ်၍ ကွမ်းဈေးစံချိန်တင်မြင့်တက်နေ

၄။ ပဲရစ်အိုလံပစ် ဆုတံဆိပ်များကို အီဖယ်မျှော်စင်က ဘေးထွက်သတ္တုအပိုင်းအစများဖြင့် ဖန်တီး ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_News
Published 31 July 2024
▪️ အစ္စရေးလ်စစ်တပ်က အင်္ဂါနေ့မှာ လက်ဘနွန်မြို့တော် ဘိုင်ရုကို လေကြောင်းတိုက်ခိုက်မှု ပြုလုပ်ခဲ့ရာမှာ ဟက်ဇ်ဘိုလာလက်နက်ကိုင်အဖွဲ့မှ ဝါအရင့်ဆုံး တပ်မှူးကွန်မန်ဒါတစ်ယောက် သေဆုံးခဲ့တယ်လို့ အခိုင်အမာဆိုလိုက်ပါတယ်။

▪️ ဒါဟာ လွန်ခဲ့တဲ့ ၃ ရက်က ဟက်ဇ်ဘိုလာတို့ နယ်စပ်ကိုကျော်ပြီး ဒုံးကျည်များဖြင့် ပစ်ခတ်ခဲ့တယ်လို့ ပြစ်တင်ခဲ့ကာ အစ္စရေးလ်လူငယ် ၁၂ ဦးသေဆုံးစေခဲ့တဲ့ ဖြစ်စဉ်ကို လက်တုန့်ပြန်တဲ့သဘော ဖြစ်ပါတယ်။

▪️ ဘိုင်ရုမြို့ တောင်ပိုင်းဆင်ခြေဖုံးရှိ အီရန်ကျောထောက်နောက်ခံပြု ဟက်ဇ်ဘိုလာအဖွဲ့ အခြေကုပ်စခန်းတစ်ခုတည်ရှိရာ နေရာအထက်ကနေ ညနေ ၇ နာရီ ၄၀ မိနစ်ခန့်မှာ ပေါက်ကွဲသံကြီးကြားရပြီး မီးခိုးတွေ ထွက်လာခဲ့တယ်လို့ ရိုက်တာမှ မျက်မြင်သက်သေတစ်ဦးက ဆိုပါတယ်။

▪️ အစ္စရေးလ်တွေကို သတ်ခဲ့တဲ့တရားခံ ဖော့ရှုကာကို သတ်နိုင်ခဲ့ကြောင်း၊ ဒီညမှာ အစ္စရေးလ်တွေရဲ့ သွေးကြွေးကို ဆပ်နိုင်ခဲ့ကြောင်း၊ ဒီစစ်ပွဲကြီး အဆုံးသတ်သည်အထိ အစ္စရေးလ်တပ်တွေ မမီနိုင်တဲ့နေရာမရှိကြောင်း အစ္စရေးလ်ကာကွယ်ရေးဝန်ကြီး ယိုအက်ဗ်ဂဲလန့်က ပြောပါတယ်။ ဒီကိစ္စနဲ့ ပတ်သက်ပြီး ဟက်ဇ်ဘိုလာဘက်က ပြောဆိုခြင်းမရှိသေးပါဘူး။

▪️ အစ္စရေးလ်ကို စနေနေ့က ဒုံးကျည်တိုက်ခိုက်ခဲ့မှုမှာ မပါဝင်ဘူးလို့တော့ ငြင်းထားပါတယ်။
ဘိုင်ရုမှာရောက်နေတဲ့ အခြားနိုင်ငံမှ လုံခြုံရေး သတင်းရင်းမြစ်တစ်ဦးရဲ့ ပြောကြားချက်အရ ရှုကာဟာ တိုက်ခိုက်မှုအတွင်း ရရှိခဲ့တဲ့ ဒဏ်ရာတွေကြောင့် သေဆုံးသွားပါတယ်။

▪️ ရှုကာဟာ စနေနေ့တိုက်ခိုက်မှုမှာ ပါဝင်ပတ်သက်ခဲ့သူဖြစ်ပြီး ဟက်ဇ်ဘိုလာ အထွေထွေအတွင်းရေးမှူး ဟာဆန်နက်စ်ရယ်လာအတွက် အရေးကြီးဆုံးအကြံပေး ပုဂ္ဂိုလ်ဖြစ်ခဲ့တယ်လို့ အစ္စရေးလ်စစ်တပ်က ဆိုပါတယ်။

▪️ ဘိုင်ရုမြို့ကို အစ္စရေးလ်တိုက်ခိုက်ရာမှာ အရပ်သား ၃ ဦးလည်း သေဆုံးခဲ့တယ်လို့ ဆေးဘက်ဆိုင်ရာနဲ့ လုံခြုံရေးရင်းမြစ်များက ရိုက်တာသတင်းဌာနကို ပြောပြပါတယ်။

▪️ လက်ဘနွန် ကျန်းမာရေးဝန်ကြီးဌာနကတော့ ၃ ဦးသေဆုံးတဲ့အပြင် ၇၄ ဦးဒဏ်ရာရခဲ့တယ်လို့ အယ်လ်မာနာတီဗီက ဖော်ပြထားပါတယ်။

▪️ အစ္စရေးလ်ဘက်က လူငယ်တွေ သေဆုံးသွားတာက တင်းမာမှုမြင့်တက်လာနိုင်တာကို အနောက်တိုင်းက စိုးရိမ်နေပါတယ်။

▪️ နှစ်ဖက်စလုံး အခြေအနေ တင်းမာမှုတွေကို လျှော့ချဖို့ ကုလသမဂ္ဂ အထူးသံတမန် ဂျင်နင်းဟန်နစ်ပလက်စ်ချာ့က တောင်းဆိုလိုက်ပါတယ်။

▪️ လက်ဘနွန်နိုင်ငံခြားရေးဝန်ကြီး အက်ဒူလာဘိုဟာဘစ်က အစ္စရေးလ်တိုက်ခိုက်မှုကို ရှုတ်ချလိုက်ပြီး ကုလသမဂ္ဂကို တိုင်ကြားရန် စီစဉ်နေပါတယ်။

▪️ ပြီးခဲ့တဲ့နှစ် အောက်တိုဘာလက ဂါဇာမှာ စစ်ပွဲစတင်ဖြစ်ပွားကတည်းက ဟက်ဇ်ဘိုလာနဲ့ အစ္စရေးလ်တို့ အပြန်အလှန်တိုက်ခိုက်နေခဲ့ကြပါတယ်။

#Source: Reuters

#World_Discovery
Published 31 July 2024

▪️ ကိုမိုဒိုနဂါးလို့ခေါ်တဲ့ ဖွတ်ကောင်တွေဟာ ကမ္ဘာပေါ်မှာ အကြီးဆုံးသက်ရှိပုတ်သင်မျိုးဖြစ်ပြီး သားကောင်တွေကို သတ်ဖြတ်နိုင်တဲ့ ချွန်မြတဲ့သွားတွေမှာ သံလွှာအုပ်ထားတယ်လို့ သိပ္ပံပညာရှင်များ တွေ့ရှိထားပါတယ်။

▪️ ဒီလိုမျိုး အသားစား တွားသွားသတ္တဝါတွေမှာ ယခင်က ဒီလိုအရာမျိုး မတွေ့ခဲ့ဖူးဘူးလို့ ကင်းစ်ကောလိပ်လန်ဒန်မှ သုတေသီများဦးဆောင်တဲ့ လေ့လာချက်မှာ ဖော်ပြထားပါတယ်။

▪️ သုတေသီတွေက ဖွတ်မျိုးစိတ် အမျိုးမျိုးမှ သွားတွေကို ယူဆောင်ပြီး အခြားပုတ်သင်အမျိုးမျိုးရဲ့ သွားတွေကိုလည်း လေ့လာခဲ့ပါတယ်။

▪️ ဖွတ်သွားတွေရဲ့ထိပ်တွေဘေးတွေမှာ လိမ္မော်ရောင်ခြယ်ရှိတဲ့ သံလွှာအုပ်ထားတာကို တွေ့ခဲ့ကြတယ်လို့ ဖော်ပြထားပါတယ်။

▪️ ဒီလိုသွားတွေကြောင့် ဖွတ်တွေဟာ ကြွက်ကနေစလို့ ရေထဲကကျွဲတွေကို ဖမ်းစားကာ ချွန်မြတဲ့သွားများဖြင့်ကိုက်ပြီး အဆိပ်ထုတ်လွှတ်ကြပါတယ်။

▪️ အသားစား ဒိုင်နိုဆောတွေမှာလည်း သံလွှာအုပ်ထားတဲ့ သွားတွေ ရှိနိုင်ခဲ့ပေမယ့် အချိန်ကြာလာတာနဲ့အမျှ ကျောက်ဖြစ်ရုပ်ကြွင်း သွားတွေကနေ အထောက်အထား မတွေ့ရတော့ပါဘူး။

▪️ ကိုမိုဒိုနဂါးတွေမှာ ချွန်မြပြီး ကွေးနေတဲ့ သွားများရှိပြီး အသားစားဒိုင်နိုဆောတွေလို သားကောင်တွေကို ဆွဲဖြဲပစ်နိုင်တယ်လို့ ကင်းစ်ကောလိပ်လန်ဒန်မှ ဒေါက်တာ အာရွန်လီဘလန့်စ်က ဆိုပါတယ်။

▪️ ဖွတ်ကောင်တွေဟာ အလျား ၃ မီတာနဲ့ အလေးချိန် ၉၀ ကီလိုဂရမ်အထိ ရှိနိုင်ပြီး လူသားလုပ်ရပ်တွေကြောင့် ခြိမ်းခြောက်ခံနေရကာ ရာသီဥတုပြောင်းလဲမှုကလည်း သူတို့ကျက်စားရာနေရာတွေကို ဖျက်ဆီးနေပါတယ်။

#Source: WION