၂၈ ဇူလိုင်၊၂၀၂၆

ဂျပန်စီးပွားရေး လုပ်ငန်းရှင်များ လာရောက်ရင်းနှီးမြုပ်နှံမှုများကို အစဉ်အမြဲ လက်ကမ်းကြိုဆိုလျက်ရှိ  ကြောင်းနှင့်လိုအပ်သည့် ပံ့ပိုးကူညီမှုများကိုလည်း အတတ်နိုင်ဆုံး ဆောင်ရွက်ပေးသွားမည်ဟု  နိုင်ငံတော်သမ္မတ ဦးမင်းအောင်လှိုင်က ဂျပန်စီးပွားရေးလုပ်ငန်းရှင်များကို ပြောကြားသည်။

ရန်ကုန်မြို့ရှိ မြန်မာကွန်ဗင်းရှင်းစင်တာ(ရန်ကုန်)၌ ကျင်းပပြုလုပ်သည့် မြန်မာ-ဂျပန် စီးပွားရေးဖိုရမ်တွင် နိုင်ငံတော်သမ္မတဦးမင်းအောင်လှိုင်က မိန့်ခွန်းပြောကြားရာတွင် ယင်းကဲ့သို့ထည့်သွင်းပြောကြားခဲ့ခြင်း ဖြစ်သည်။

ဂျပန်စီးပွားရေးလုပ်ငန်းရှင်များအနေဖြင့် မြန်မာနိုင်ငံ၏ ရေရှည်ဖွံ့ဖြိုးတိုးတက်ရေးတွင် ယုံကြည်  စိတ်ချစွာ ပါဝင်ရင်းနှီးမြှုပ်နှံကြရန်လည်း လှိုက်လှိုက်လှဲလှဲဖိတ်ခေါ်လိုပါကြောင်း နိုင်ငံတော်သမ္မတက ထပ်လောင်းဖိတ်ခေါ်ခဲ့သည်။

မြန်မာအစိုးရအနေဖြင့် ရင်းနှီးမြှုပ်နှံသူများအတွက် ပိုမိုရှင်းလင်းခိုင်မာပြီးပွင့်လင်းမြင်သာသည့် စီးပွားရေးဝန်းကျင်ကောင်းတစ်ခု ဖန်တီးပေးရန်၊ လုပ်ထုံးလုပ်နည်းများကို လွယ်ကူချောမွေ့စေရေး ပြုပြင်ပြောင်းလဲရန်နှင့် သင့်တော်သည့်မူဝါဒဆိုင်ရာ ကူညီပံ့ပိုးမှုများပေးနိုင်ရန် အစဉ်တစိုက် ကြိုးပမ်း‌  ဆောင်ရွက်နေကြောင်းလည်း နိုင်ငံတော်သမ္မတက ဂျပန်ဧည့်သည်များကို အသိပေးပြောကြားခဲ့ သည်။

မြန်မာနိုင်ငံခြားရေးဝန်ကြီးဌာန၊ မြန်မာ-ဂျပန် လူမှုစီးပွားဖွံ့ဖြိုးတိုးတက်ရေးပူးပေါင်း ဆောင်ရွက်မှု အသင်းနှင့် ဂျပန်နိုင်ငံ Ingo Peace တို့ပူးပေါင်းကျင်းပသည့် အဆိုပါမြန်မာ-ဂျပန် စီးပွားရေးဖိုရမ်သို့ ဂျပန်စီးပွာရေးလုပ်ငန်းရှင် ၉၄ဦးနှင့် မြန်မာလုပ်ငန်းရှင် ၃၀၀ကျော်တက်ရောက်ခဲ့သည်ဟု နိုင်ငံတော် သမ္မတရုံး၏ ပြောရေးဆိုခွင့်ရှိသူဒေါက်တာ ဒေါ်ခိုင်ခိုင်စိုးကပြောကြားသည်။

ဂျပန်နိုင်ငံသားတစ်ဦးအနေဖြင့် မြန်မာ-ဂျပန် နှစ်နိုင်ငံပူးပေါင်းဆောင်ရွက်ရေး အစီအစဉ်အောက်တွင်နှစ်နိုင်ငံ၏ အနာဂတ်ပူးပေါင်းဆောင်ရွက်ရေးအတူတကွ ဆွေးနွေးနိုင်မည့် အခွင့်အလမ်းကို ဖန်တီး ပေးနိုင်သည့်အတွက် အထူးပင်ဝမ်းမြောက်ဝမ်းသာဖြစ်ရကြောင်း ဖိုရမ်ကို ပူးတွဲကျင်းပသည့် ဂျပန်နိုင်ငံIngo Peace ဥက္ကဋ္ဌ Mr.Nakazawa Hiroyuki ကပြောသည်။

မြန်မာနှင့်ဂျပန် နှစ်နိုင်ငံကုန်သွယ်မှုပမာဏမှာ ၂၀၂၃–၂၀၂၄ ဘဏ္ဍာနှစ်တွင် အမေရိကန်ဒေါ်လာ ၁,၃၃၄ ဒဿမ ၇၉၅ သန်း၊ ၂၀၂၄–၂၀၂၅ ဘဏ္ဍာနှစ်တွင် ၁,၁၉၄ ဒဿမ ၃၉၄ သန်းနှင့် ၂၀၂၅–၂၀၂၆ ဘဏ္ဍာနှစ်တွင် ၁,၃၄၃ ဒဿမ ၆၆၅ သန်းရှိကြောင်းနှင့်မြန်မာနိုင်ငံက ဂျပန်နိုင်ငံသို့ ချုပ်ပြီးအထည်၊ ဖိနပ်၊ ပဲအမျိုးမျိုး၊ ပုလဲနှင့် လျှပ်စစ်ပစ္စည်းများ အဓိကတင်ပို့လျက်ရှိကြောင်းသိရသည်။

ထို့အပြင် ရန်ကုန်မြို့နှင့် အနီးဆုံးနေရာတွင်ရှိသည် အောင်မြင်နေသော သီလဝါအထူးစီးပွားရေးဇုန်၌ ဂျပန်ကုမ္ပဏီ ၅၀ ကျော်ဖြင့် စုစုပေါင်းရင်းနှီးမြှုပ်နှံမှု၏ ၂၉ ဒသမ ၉၂ ရာခိုင်နှုန်းဖြင့် အဓိကအခန်းကဏ္ဍမှ ပါဝင် ဆောင်ရွက်နေကြောင်းသတင်းရရှိသည်။

တောင်တရုတ်ပင်လယ်အတွင်း သင်္ဘောနစ်မြုပ်ခဲ့ပြီး တရုတ်ကယ်ဆယ်ရေးသမားများ ကယ်ဆယ်ခဲ့တဲ့ ဗီယက်နမ်သင်္ဘောသား ၄၇ ဦးကို တနင်္လာနေ့နံနက်ပိုင်းမှာ ဗီယက်နမ်သို့ လွှဲပြောင်းပေးခဲ့ပြီဖြစ်ကာ အားလုံးကို စနစ်တကျ ပြုစုစောင့်ရှောက်ပေးခဲ့ပါတယ်။

#Asia_News
Published 27 July 2026
#တောင်တရုတ်ပင်လယ် #ဗီယက်နမ်သင်္ဘောသား
#YMG #Yangon_Times #Yangon_Media_Group

ရာသီဥတုခိုလှုံနိုင်တဲ့နေရာတွေမှာ လာရောက်ခိုလှုံကြတဲ့ ကမ်းဝေး၊ ကမ်းနီးငါးဖမ်းရေယာဉ်တွေအနေနဲ့ ၎င်းတို့လာရောက်ခိုလှုံကြတဲ့
ကမ်းနီးဒေသအတွင်း ငါး/ပုစွန်ဖမ်းဆီးနေတာကို စစ်ဆေးတွေ့ရှိပါက ထိရောက်စွာအရေးယူသွားမယ်လို့ စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန၊ ငါးလုပ်ငန်းဦးစီးဌာနက အသိပေးထုတ်ပြန်ထားပါတယ်။

#Local_News
Published 27 July 2026
#ငါးဖမ်းရေယာဉ်
#YMG/NN #Yangon_Times

နှစ်ပေါင်း(၁၀၀)ကျော် သက်တမ်းရှိ ရှေးဟောင်းသမိုင်းဝင် အမွေအနှစ်ဖြစ်တဲ့ ဝဇီရာကဇာတ်ရုံကို မူလလက်ရာမပျက် ပြန်လည်ထိန်းသိမ်းမွမ်းမံပြီး နိုင်ငံတကာအဆင့်မီ ဂုဏ်ပြုခံကဇာတ်ရုံအဖြစ် အဆင့်မြှင့်တင်ဖွင့်လှစ်လိုက်ပြီ ဖြစ်ပါတယ်။

#Local_News
Published 27 July 2026
#ဝဇီရာကဇာတ်ရုံ
#YMG/SW #Yangon_Times

ကျောင်းပြင်ပမူလတန်းပညာရေး-NFPE နဲ့ ကျောင်းပြင်ပ အလယ်တန်းပညာရေး-NFME အတန်းနေရာချထားစစ်ဆေးမှု (Placement Test) အစီအစဉ် ကို ဩဂုတ်လအတွင်းဆောင်ရွက်သွားမယ်လို့ ပညာရေးဝန်ကြီးဌာနက သိရပါတယ်။

#Local_News
Published 27 July 2026
#NFPE #NFME
#YMG/NN #Yangon_Times

စရိတ်နည်းပါးပြီး ရိတ်သိမ်းချိန်တိုတဲ့ Sunflower Microgreens စိုက်ပျိုးမှုဟာ ဝင်ငွေအမြန်ပြန်လည်ရရှိနိုင်တဲ့သီးနှံဖြစ်တာကြောင့် ဈေးကွက်ဝယ်လိုအားမြင့်တက်လာတယ်လို့ စားသုံးသူရေးရာဦးစီးဌာနရဲ့ သတင်းဖော်ပြချက်အရသိရပါတယ်။

#Local_News
Published 27 July 2026
#Sunflower_Microgreens
#YMG/SW #Yangon_Times

#Daily_News
Published 27 July 2026

၁။‌ ကမ်းဝေး ၊ကမ်းနီးရေယာဉ်များ ရာသီဥတုခိုလှုံသည့် ကမ်းနီးဒေသတွင်း ငါး/ပုစွန်ဖမ်းဆီးလျှင် အရေးယူမည်

‌‎၂။ ‌ဝဇီရာကဇာတ်ရုံကို နိုင်ငံတကာအဆင့်မီ ဂုဏ်ပြုခံကဇာတ်ရုံအဖြစ်နိုင်ငံတော်သမ္မတတက်ရောက်ဖွင့်လှစ်

၃။‌‌‎ ကျောင်းပြင်ပမူလတန်းနှင့်အလယ်တန်း ပညာရေးနေရာချထားစစ်ဆေးမှုများ ဩဂုတ်လအတွင်းပြုလုပ်မည်

၄။‎ ‌‌‌‌‌‌‌‌‌သင်္ဘောနစ်မြုပ်ခဲ့သောဗီယက်နမ်အဖွဲ့သား(၄၇)ဦးကို တရုတ်ကယ်ဆယ်ပြီးနောက်ဗီယက်နမ်ဘက်သိုလွှဲပြောင်း... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 28 July 2026

■ မြောက်ဥက္ကလာပပြည်သူ့ဆေးရုံကြီးတွင် သစ်စက်ဖြင့် ထိခိုက်မှုကြောင့် ပြတ်တောက်သွားသည့် လက်ညှိုးကို အောင်မြင်စွာ ပြန်လည်ဆက်ပေးနိုင်ခဲ့ကြောင်း ကျန်းမာရေးဝန်ကြီးဌာန၏ ထုတ်ပြန်ချက်အရ သိရသည်။

■ ဖြစ်စဉ်မှာ မင်္ဂလာဒုံမြို့နယ်တွင် နေထိုင်သည့် အသက် (၂၅) နှစ်အရွယ် အမျိုးသားတစ်ဦးသည် ဇူလိုင် ၂ ရက် နံနက် ၉ နာရီခွဲခန့်က သစ်စက်တွင် အလုပ်လုပ်နေစဉ် သစ်ဖြတ်စက်ဖြင့် ထိခိုက်မိရာ ဝဲဘက်လက်ညှိုး၏ အလယ်ပိုင်းမှထက်ပိုင်း ပြတ်တောက်သွားခဲ့ခြင်းဖြစ်ကြောင်း သိရသည်။

■ လူနာအား အင်းစိန်ပြည်သူ့ဆေးရုံကြီးတွင် ကနဦးကုသမှုပေးပြီးနောက် မြောက်ဥက္ကလာပပြည်သူ့ဆေးရုံကြီး အရိုးရောဂါကုသဆောင်ရှိ လက်ပိုင်းဆိုင်ရာ ခွဲစိတ်ကုသမှုအဖွဲ့ထံ အရေးပေါ်လွှဲပြောင်းပို့ဆောင်ခဲ့ကြောင်း ထုတ်ပြန်ချက်တွင်ဖော်ပြထားသည်။

■ လူနာရောက်ရှိလာပြီးနောက် လက်ညှိုးပြန်လည်ဆက်ပေးနိုင်ရန် လိုအပ်သည့် စစ်ဆေးမှုများကို အမြန်ဆုံးဆောင်ရွက်ခဲ့ပြီး ဇူလိုင် ၂ ရက် ညနေ ၅ နာရီခွဲမှ ဇူလိုင် ၃ ရက် နံနက် ၀၀:၃၀ နာရီအထိ ကြာမြင့်သည့် ခွဲစိတ်ကုသမှုကို ဆောင်ရွက်ခဲ့ရာ အောင်မြင်စွာပြန်လည်ဆက်ပေးနိုင်ခဲ့ကြောင်း သိရသည်။

■ ခွဲစိတ်ကုသမှုပြီးနောက် လက်ပိုင်းဆိုင်ရာ ခွဲစိတ်ကုသမှု အထူးကုဆရာဝန်များက လူနာ၏အခြေအနေကို အနီးကပ်စောင့်ကြည့်ကာ လိုအပ်သည့်ကုသမှုများကို ဆက်လက်ဆောင်ရွက်ပေးခဲ့သဖြင့် ပြန်လည်ဆက်ထားသည့် လက်ညှိုးမှာ ကောင်းမွန်စွာရှင်သန်လျက်ရှိကြောင်း ၊ထို့နောက် ဇူလိုင် ၁၆ ရက်တွင် ခွဲစိတ်ပြီး ၁၄ ရက်မြောက်နေ့၌ လူနာအား ဆေးရုံမှ ပြန်လည်ဆင်းခွင့်ပြုခဲ့ပြီး လက်ချောင်း၏ လုပ်ဆောင်နိုင်စွမ်း ပိုမိုကောင်းမွန်လာစေရန် လိုအပ်သည့် ပြန်လည်ထူထောင်ရေး လေ့ကျင့်ခန်းများကို ဆက်လက်ပြုလုပ်လျက်ရှိကြောင်း သိရသည်။

#YMG/SW #Yangon_Times

#Local_News
Published 28 July 2026

■ Japan Culture & Education Fair 2026 ကို ဩဂုတ်လ ၁ ရက်မှ ၂ ရက်အထိ ရန်ကုန်မြို့ Melia Yangon(Inya Ballroom, Function Room 1) ၌ နံနက် ၁၀ နာရီမှ မွန်းလွဲ ၃ နာရီခွဲအထိ ကျင်းပသွားပြုလုပ်သွားမည်ဖြစ်ကြောင်း သိရသည်။

■ အဆိုပါပွဲတော်ကို The Japan Foundation Yangon(JFYG) သည် License Academy Co.,Ltd. မြန်မာနိုင်ငံဂျပန်ပြန်ကျောင်းသားဟောင်းများအသင်း(MAJA) တို့နှင့် ပူးပေါင်း၍ကျင်းပခြင်းဖြစ်သည်။

■ ယင်းပွဲတော်တွင် ဂျပန်နိုင်ငံရဲ့ နွေရာသီပွဲတော်ယဉ်ကျေးမှုကို ကိုယ်တိုင်ကိုယ်ကျ ပါဝင်ခံစားနိုင်ပြီး ဂျပန်နိုင်ငံမလာရောက်ပြသကြမည့် တက္ကသိုလ်များ၊ အသက်မွေးဝမ်းကျောင်းကောလိပ်များ၊ ဂျပန်ဘာသာစကားကျောင်းများနှင့် ပညာသင်ဆု၊ ပညာရေးဆိုင်ရာ အကြံဉာဏ်များနှင့် ဂျပန်ပညာတော်သင်ဆွေးနွေးပွဲ နှစ်ခုစလုံးကိုတစ်နေရာတည်းတွင် ရယူနိုင်မည့်အပြင် Cosplayer များ၏ စင်မြင့်ဖျော်ဖြေတင်ဆက်မှုများ၊ ကန်ဒို(Kendo)နှင့် ကရာတေး(Karate) ပြသပွဲများ၊ ဂျပန်ယဉ်ကျေးမှုကိုလေ့လာနိုင်မည့် ဉာဏ်စမ်းပဟေဠိပြိုင်ပွဲများ၊ ဂိမ်းကစားနည်းအစီအစဉ်များ၊ ယုကတ (Yukata) ဝတ်ဆင်မှုအတွေ့အကြုံများနှင့် ဂျပန်ပညာတော်သင် အကြံပေးကောင်တာများပါဝင်မည်ဖြစ်ရာ စိတ်ပါဝင်စားသူများအနေဖြင့် လာရောက်ပါဝင် ဆင်နွှဲနိုင်ကြောင်း သိရသည်။

#YMG/NN #Yangon_Times

#World_News
Published 28 July 2026

■ အီရန်ဟာ လတ်တလော ပဋိပက္ခအတွင်းမှ အမေရိကန်ရဲ့ စစ်ရာဇဝတ်မှု ကျူးလွန်မှု စွပ်စွဲချက်များကို တရားစွဲဆိုရန် ၁၀ နှစ်မှ ၁၅ နှစ်အထိ ကြာမြင့်မှာဖြစ်တဲ့ ဥပဒေလမ်းကြောင်း ကြိုးပမ်းမှုကို စီစဉ်နေပါတယ်။

■ အီရန်က စာမျက်နှာ ၁,၄၀၀ ကျော်ရှိတဲ့ မှတ်တမ်းအထောက်အထားများကို စုဆောင်းပြုစုထားကြောင်း နိုင်ငံခြားရေးဒုဝန်ကြီး ကာဇမ်ဂါရီဘာဘာဒီက ပြောကြားခဲ့ပါတယ်။

■ အီရန်အစိုးရက ကုလသမဂ္ဂလုံခြုံရေးကောင်စီထံသို့ အထောက်အကူပြု စာရွက်စာတမ်းပေါင်း ၁၂၀ ကျော်ကို တိုက်ရိုက်ပေးပို့တင်ပြထားပြီးဖြစ်ပါတယ်။

■ တရားစွဲဆိုခြင်းခံရတဲ့ အဖွဲ့အစည်းလူပုဂ္ဂိုလ်များကို တရားစီရင်ဆုံးဖြတ်ချက်များ ချမှတ်ရန်နဲ့ ဥပဒေလမ်းကြောင်းအရ အခြေခံအုတ်မြစ်များတည်ဆောက်ရန် အီရန်ဟာ ပြည်တွင်း တရားစီရင်ရေးစနစ်ကို အသုံးပြုသွားမှာဖြစ်ပါတယ်။

■ အီရန်ဟာ ကုလသမဂ္ဂလုပ်ထုံးလုပ်နည်းများကို အသုံးပြုကာနိုင်ငံတကာတရားရုံး ICJ ထံသို့ လိုအပ်သလို ချဉ်းကပ်ဆောင်ရွက်သွားရန် အစီအစဉ်ရှိပါတယ်။

■ နိုင်ငံတကာပြစ်မှုများကို တရားစွဲဆိုခွင့် ပြဋ္ဌာန်းထားတဲ့ တတိယနိုင်ငံများရဲ့တရားရုံးများမှာလည်း အမှုဖွင့် တိုင်ကြားသွားနိုင်ပါတယ်။

■ အမေရိကန်အပေါ် သံတမန်ရေးနဲ့ ဥပ‌ေဒလမ်းကြောင်းအရ ဆက်တိုက်ဖိအားပေးနိုင်ရေးအတွက် သီးသန့်အထူးတရားရုံးတစ်ခု ဖွဲ့စည်းရန် အီရန်ကအဆိုပြုထားပါတယ်။

Source: WION

#World_Health
Published 28 July 2026

■ ဘက်စုံမျက်စိစစ်ဆေးမှုများဟာ ဆီးချို၊ သွေးတိုးနဲ့ ကိုလက်စထရော မြင့်မားခြင်းစတဲ့ ရောဂါများ စောစီးစွာပြသတဲ့ လက္ခဏာများကို သိရှိစေနိုင်ပါတယ်။

■ မျက်ကြည်လွှာအတွင်းရှိ အလွန်သေးငယ်တဲ့ သွေးကြောမျှင်လေးများဟာ တစ်ခန္ဓာကိုယ်လုံးရှိ သွေးကြောများရဲ့ ကျန်းမာရေးအခြေအနေကို ထင်ဟပ်ဖော်ပြနေပါတယ်။

■ မျက်စိအာရုံကြောနဲ့ အမြင်အာရုံလမ်းကြောင်းဆိုင်ရာ ပြောင်းလဲမှုများဟာ လေဖြတ်ခြင်း ဒါမှမဟုတ် အာရုံကြောအမျှင်ခဲရောဂါ လိုမျိုး အာရုံကြောဆိုင်ရာ ရောဂါများကို စောစီးစွာပြသပေးတဲ့ လက္ခဏာများ ဖော်ပြပေးနိုင်ပါတယ်။

■ မျက်စိရောင်ရမ်းတဲ့ ဝေဒနာများက လေးဘက်နာ သို့မဟုတ် Lupus ကဲ့သို့ ခန္ဓာကိုယ်ခုခံအားစနစ် ဖောက်ပြန်တဲ့ ရောဂါများနဲ့ မကြာခဏ ဆက်စပ်နေပါတယ်။

■ အိုမီဂါ-၃၊ ဓာတ်တိုးဆန့်ကျင်ပစ္စည်းနဲ့ ဗီတာမင် အေ၊ စီ၊ အီး တို့ ကြွယ်ဝတဲ့ အစားအစာများဟာ အမြင်အာရုံရော တစ်ကိုယ်လုံး ကျန်းမာရေးကိုပါ အထောက်အကူပြုပါတယ်။

■ ဖုန်းမျက်နှာပြင်များကို အချိန်အကြာကြီးကြည့်ခြင်းက မျက်စိညောင်းညာခြင်းနဲ့ ခေါင်းကိုက်ခြင်းတို့ကို ဖြစ်စေပြီး ခန္ဓာကိုယ်ထိုင်နည်းအမူအရာ၊ အိပ်စက်မှုနဲ့ ဖုန်းကြည့်ချိန် ခေတ္တနားပေးရန် လိုအပ်ကြောင်း အချက်ပြနေပါတယ်။

■ ပုံမှန် မျက်စိစစ်ဆေးမှုပြုလုပ်ခြင်းက တစ်ကိုယ်လုံး ကျန်းမာရေးအခြေအနေကို စောင့်ကြည့်ရန်နဲ့အမြင်အာရုံကွယ်ခြင်းမှ ကာကွယ်ရန်အတွက် အရေးကြီးတဲ့ ပထမဆုံး ကာကွယ်ရေးတစ်ခု ဖြစ်ပါတယ်။

Source: AOL

#Local_News
Published 28 July 2026

■ ရန်ကုန် - မော်လမြိုင် ပြေးဆွဲလျက်ရှိသည့် DEMU လူစီးအမြန်ရထားပေါ်တွင် ဆူညံစွာ အော်ဟစ်သီချင်းဆိုခြင်း၊ ရထားထိုင်ခုံလက်တန်းများပေါ်တွင် ထိုင်ခြင်းနှင့် လျှောက်လမ်းများတွင် ပိတ်ဆို့၍ ထမင်းဝိုင်းဖွဲ့စားသောက်ခြင်းများ ပြုလုပ်ခဲ့သူများ၅၄ ဦးကို မော်လမြိုင်မြို့မရဲစခန်း၌ (ပ)၁၂၉/၂၀၂၆၊ ရထားပို့ဆောင်ရေးဥပဒေ ပုဒ်မ ၈၈ (က) ဖြင့် အမှုဖွင့်လှစ်၍ ဥပဒေနှင့်အညီ အရေးယူနိုင်ရေး ဆက်လက်ဆောင်ရွက်လျက်ရှိကြောင်း သိရသည်။
 
■ ဖြစ်စဉ်မှာ မြန်မာ့မီးရထားအနေဖြင့် ပြည်သူများ သက်သောင့်သက်သာ ဘေးကင်းလုံခြုံပြီး ဈေးနှုန်းသင့်တင့်စွာ သွားလာနိုင်ရေးအတွက် အဆင့်မြင့်ရထားတွဲဆိုင်းအသစ်များဖြင့် ခရီးစဉ်များကို ပြေးဆွဲပေးလျက်ရှိရာတွင် စည်းကမ်းမလိုက်နာသည့် ခရီးသည်အချို့ကြောင့် အခြားခရီးသည်များ စိတ်အနှောင့်အယှက် ကြုံတွေ့ရမှုများရှိသည့်အတွက် ရထားစီးခရီးသည်များအနေဖြင့် ခရီးစဉ်တစ်လျှောက် သန့်ရှင်းသပ်ရပ်ပြီး အခြားခရီးသည်များအတွက် အနှောင့်အယှက်မဖြစ်စေရန်နှင့် ရထားတွင်းသန့်ရှင်းမှုကို ထိန်းသိမ်းရန်၊ ကွမ်းတံတွေးထွေးခြင်းကို ရှောင်ကြဉ်ပေးရန်၊ ထိုင်ခုံပေါ်တွင် ခြေထောက်တင်ခြင်း မပြုရန်၊ အခြားခရီးသည်များ သန့်ရှင်းစွာ အသုံးပြုနိုင်ရန် ထိုင်ခုံများအား စနစ်တကျအသုံးပြုပေးပါရန် အသိပေးချက်များအား နိုင်ငံပိုင်သတင်းစာများနှင့် သက်ဆိုင်ရာရထားများပေါ်တွင် အသိပေးကြေညာချက်များ ထုတ်ပြန်ထားရှိပြီးဖြစ်သည်။
 
■ ထိုသို့ ထုတ်ပြန်ကြေညာထားရှိသော်လည်း ဇူလိုင် ၂၃ ရက် မွန်းတည့် ၁၂ နာရီတွင် မော်လမြိုင်ဘူတာမှ ရန်ကုန်ဘူတာကြီးသို့ ထွက်ခွာလာသည့် အမှတ် (၈၄) (အစုန်) DEMU အမြန်ရထား ပထမတန်းတွဲ (၃) တွင် လိုက်ပါလာသည့် မော်လမြိုင်ကမ်းနားလမ်း အားကစားအဖွဲ့ခေါင်းဆောင်ဖြစ်သူ ဒေါ်မြသန်း ဦးဆောင်သည့် အမျိုးသမီး ၅၃ ဦး၊ အမျိုးသားတစ်ဦး စုစုပေါင်း ၅၄ ဦးတို့သည် ရထားပေါ်တွင် ဆူညံစွာအော်ဟစ်သီချင်းဆိုခြင်း၊ Tiktok ဆော့ကစားခြင်း၊ ရထားထိုင်ခုံလက်တန်းပေါ်တွင်ထိုင်ခြင်း၊ ရထားကြမ်းခင်း လျှောက်လမ်းအားပိတ်ဆို့၍ ထမင်းဝိုင်းဖွဲ့စားသောက်ခြင်းများ စည်းကမ်းမဲ့ပြုလုပ်နေကြသဖြင့် ရထားဝန်ထမ်းများနှင့် ရထားရဲတပ်ဖွဲ့မှ တပ်ဖွဲ့ဝင်များက အခြားခရီးသည်များ စိတ်အနှောင့်အယှက်မဖြစ်စေရန် နှစ်ကြိမ်တိုင်တိုင် သတိပေးတားမြစ်ခဲ့သော်လည်း လိုက်နာခြင်းမရှိဘဲ ဆက်လက်ပြုလုပ်ခဲ့ကြောင်း စိစစ်တွေ့ရှိရသဖြင့် အဖွဲ့ခေါင်းဆောင်ဖြစ်သူ ဒေါ်မြသန်းပါ အမျိုးသမီး ၅၃ ဦး၊ အမျိုးသား တစ်ဦး စုစုပေါင်း ၅၄ ဦးတို့ကို မော်လမြိုင်မြို့မရဲစခန်း၌ (ပ) ၁၂၉ / ၂၀၂၆၊ ရထားပို့ဆောင်ရေးဥပဒေပုဒ်မ ၈၈ (က) ဖြင့် အမှုဖွင့်လှစ်၍ ဥပဒေနှင့်အညီ အရေးယူနိုင်ရေးဆက်လက်ဆောင်ရွက်လျက်ရှိကြောင်း သတင်းရရှိသည်။
 
#YMG/NN #Yangon_Times