၂၀၂၅-၂၀၂၆ ဘဏ္ဍာနှစ်မှာ ပြည်ပနိုင်ငံတွေကို  ပဲမျိုးစုံ၊ ပြောင်းနဲ့ နှမ်းတန်ချိန် သုံးသန်းကျော်တင်ပို့ထားတယ်လို့ မြန်မာနိုင်ငံ ပဲမျိုးစုံ၊ ပြောင်းနှင့်နှမ်းကုန်သည်များအသင်းက သိရပါတယ်။

#Local_News
Published 26 May 2026
#ပဲမျိုးစုံ #ပြောင်း_နှမ်း
#YMG/NN #Yangon_Times

မြန်မာနိုင်ငံစက်ဘီးအဖွဲချုပ် (MCF) မှ(၆၄) ကြိမ်မြောက် မြန်မာနိုင်ငံ စက်ဘီးစီးတံခွန်စိုက်ပြိုင်ပွဲ ၂၀၂၆ ကို အားကစား ရေးရာဝန်ကြီးဌာနရဲ့ဦးဆောင်မှုဖြင့် ရန်ကုန်မြို့မှာ ဇွန် ၂၆ ရက်မှ ဇွန် ၂၈ ရက်အထိကျင်းပသွားမှာဖြစ်တယ်လို့သိရပါတယ်။

#Local_News
Published 26 May 2026
#စက်ဘီးစီးတံခွန်စိုက်ပြိုင်ပွဲ #MCF
#YMG/SW #Yangon_Times

စစ်ကိုင်းတိုင်း မှာအခု ၂၀၂၆-၂၀၂၇ စိုက်ပျိုးရာသီအတွက် ဆီထွက်သီးနှံ တွေဖြစ်တဲ့ မြေပဲ၊နှမ်း၊နေကြာ စိုက်ဧက ၂၄ သိန်းကျော် စိုက်ပျိုးဖို့လျာထားတယ်လို့ စစ်ကိုင်းတိုင်းဒေသကြီး စိုက်ပျိုးရေးဦးစီးဌာနက သိရပါတယ်။

#Local_News
Published 26 May 2026
#စစ်ကိုင်းတိုင်း #ဆီထွက်သီးနှံ
#YMG/NN #Yangon_Times

ထုတ်ကုန်တစ်ခုတွင် မူပိုင်ခွင့်(၄)ခုဖြင့် အကာအကွယ်ရယူနိုင်ရေး ဆောင်ရွက်ပေးလျှက်ရှိရာ လျှောက်လွှာ ၃၀၀ ကျော်ကို စက်မှုဒီဇိုင်းမှတ်ပုံတင်မူပိုင်ခွင့်လက်မှတ်များ ထုတ်ပေးပြီးဖြစ်တယ်လို့ စက်မှုဒီဇိုင်းမူပိုင်ခွင့်ဌာနခွဲ သိရပါတယ်။

#Local_News
Published 26 May 2026
#စက်မှုဒီဇိုင်းမှတ်ပုံတင်လက်မှတ်
#YMG/SW #Yangon_Times

#Local_News
Published 27 May 2026

■ လာမည့် နှစ်ရက်အတွင်း မြန်မာနိုင်ငံအလယ်ပိုင်းဒေသများသို့အနောက်တောင်မုတ်သုံလေ ဝင်ရောက်နိုင်ကြောင်းမိုးလေဝသနှင့်ဇလ‌ဗေဒညွှန်ကြားမှုဦးစီးဌာန၏ ယနေ့မနက်ပိုင်းထုတ်ပြန်ချက်အရသိရသည်။

■ ထို့အပြင် မွန်ပြည်နယ်တွင် မိုးတိမ်တောင်များ ဖြစ်ထွန်းလျက်ရှိပြီး အဆိုပါ မိုးတိမ်တောင်များ ရွေ့လျားရာ နေရာတစ်လျှောက်တွင် မိုးရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းစသည့် မိုးလေဝသဖြစ်စဉ်များ ဖြစ်ပေါ်နိုင်ပါသဖြင့် ကြိုတင်သတိပြုနိုင်ပါရန် အကြံပြုထားကြောင်းသိရသည်။

■ ၎င်းအပြင် ကပ္ပလီပင်လယ်ပြင်၊ ဘင်္ဂလားပင်လယ်အော်တောင်ပိုင်းနှင့် အရှေ့အလယ်ပိုင်း တို့တွင် မုတ်သုံလေ အားအသင့်အတင့်မှ အားကောင်းနေပြီး ဘင်္ဂလားပင်လယ်အော်အ‌ရှေ့မြောက်ပိုင်းတွင် တိမ်အနည်းငယ် ဖြစ်ထွန်းနေပြီး ကပ္ပလီပင်လယ်ပြင်နှင့် ကျန်ဘင်္ဂလားပင်လယ်အော်တို့တွင် တိမ်အသင့်အတင့်မှ တိမ်ထူထပ်နေကြောင်း ဆိုထားသည်။

■ ယနေ့ညနေအထိခန့်မှန်းချက်မှာ ရန်ကုန်တိုင်းဒေသကြီး၊ တနင်္သာရီတိုင်းဒေသကြီး၊ ကရင်ပြည်နယ်နှင့် မွန်ပြည်နယ် တို့တွင် နေရာအနှံ့အပြား၊ နေပြည်တော်၊ ပဲခူးတိုင်းဒေသကြီး၊ ဧရာဝတီတိုင်းဒေသကြီး၊ ချင်းပြည်နယ်နှင့် ရှမ်း ပြည်နယ်(တောင်ပိုင်း)တို့တွင် နေရာစိပ်စိပ်၊ မန္တလေးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး အထက်ပိုင်း၊ ကချင်ပြည်နယ်နှင့် ကယားပြည်နယ်တို့တွင် နေရာကျဲကျဲနှင့် ကျန်တိုင်းဒေသကြီးနှင့် ပြည်နယ်တို့တွင် နေရာကွက်ကျား မိုးထစ်ချုန်းရွာပြီး နေပြည်တော်တွင် နေရာကွက်၍ မိုးကြီးနိုင်ကြောင်းသိရသည်။

#YMG/NN #Yangon_Times

#World_News
Published 27 May 2026

■ အမေရိကန်သမ္မတ ဒေါ်နယ်ထရမ့်က မီဒီယာအဖွဲ့အစည်းကြီးများနဲ့ နိုင်ငံရေးအတိုက်အခံများကို ပြင်းပြင်းထန်ထန် ဝေဖန်ခဲ့ပြီး အီရန်အပေါ် အမေရိကန်စစ်တပ်က လုံးဝဥဿုံ အောင်ပွဲရရှိခဲ့ရင်တောင် ယင်းတို့ကဖြစ်ရပ်မှန်ကို ပုံဖျက်‌ဖော်ပြကြလိမ့်မယ်လို့ ပြောလိုက်ပါတယ်။

■ မီဒီယာကြီးတွေဟာ အမေရိကန်အနေဖြင့် အီရန်ကို အကြွင်းမဲ့ အောင်ပွဲခံနိုင်ရင်တောင် ထိုရလဒ်ကို လွဲမှားစွာဖော်ပြကြလိမ့်မယ်လို့ ထရမ့်က ဆိုရှယ်မီဒီယာ ပို့စ်တစ်ခုမှာ ပြောဆိုခဲ့ပါတယ်။

■ သတင်းမီဒီယာတွေက 'အီရန်ဟာ အမေရိကန်အပေါ် ပြောင်မြောက်ပြီး ထူးချွန်ပြည့်စုံတဲ့ အောင်ပွဲကို ရရှိခဲ့တယ်၊ ယှဉ်လို့တောင် မရပါဘူး’ ဆိုပြီး ခေါင်းကြီးပိုင်းသတင်း တင်ကြလိမ့်မယ်လို့ ဆိုပါတယ်။

■ ထရမ့်ဟာ The New York Times ၊ The Wall Street Journal ၊ CNN စတဲ့ နာမည်ကြီး သတင်းဌာနတွေကို အမည်ပြောင်တွေသုံးပြီး လှောင်ပြောင်ဖော်ပြခဲ့ပါတယ်။

■ ထရမ့်က ထိုအဖွဲ့အစည်းများကို သတင်းတုမီဒီယာဆိုတဲ့ အကြောင်းအရာအောက်
စုစည်း‌ဖော်ပြခဲ့ပါတယ်။

■ ဒါ့အပြင် ပြည်တွင်းနိုင်ငံရေး ပြိုင်ဘက်များအထိ ဝေဖန်ခဲ့ပြီး ဒီမိုကရက်များနဲ့ မီဒီယာလောကမှ ပုဂ္ဂိုလ်တွေဟာ လက်တွေ့ဘဝနဲ့ ကင်းကွာနေကြတယ်လို့ စွပ်စွဲခဲ့ပါတယ်။

Source: WION

#Local_News
Published 27 May 2026
 
■ လာမည့် ၅ နှစ်တာကာလအတွင်း ထာဝရငြိမ်းချမ်းရေးရရှိရန်အတွက် မျှော်မှန်းချက်ထား၍ ဆောင်ရွက်သွားမည်ဟု နိုင်ငံတော်သမ္မတဦးမင်းအောင်လှိုင်ကပြည်ထောင်စုအစိုးရအဖွဲ့အစည်းအဝေး တွင်  ပြောကြားလိုက်သည်။

■ ပြည်ထောင်စုသမ္မတမြန်မာနိုင်ငံတော်၊ ပြည်ထောင်စုအစိုးရအဖွဲ့အစည်းအဝေးကို ယနေ့နံနက်ပိုင်းတွင် နေပြည်တော်ရှိ နိုင်ငံတော်သမ္မတရုံးတော်၊ ပြည်ထောင်စုအစိုးရအဖွဲ့အစည်းအဝေးခန်းမ၌ ကျင်းပပြုလုပ်ခဲ့ခြင်း ဖြစ်သည်။

■ အစိုးရ ရက်ပေါင်း ၁၀၀ အတွင်း ငြိမ်းချမ်းရေးဆွေးနွေးခြင်းများကို ဆောင်ရွက်သွားနိုင်ရေးအတွက် ဖိတ်ခေါ်ခဲ့ပြီး လက်ရှိအချိန်၌ EAO အဖွဲ့အချို့နှင့်အောက်ခြေ အဆင့်များတွင် ထိတွေ့မှုများ ဆောင်ရွက်နေပြီဖြစ်ကြောင်း၊ PDF အမည်ခံ အကြမ်းဖက်အဖွဲ့များအနေဖြင့် ၂၀၂၀ ပြည့်နှစ်ရွေးကောက်ပွဲ၌ မဲမသမာမှုများကြောင့် ဖြစ်ပေါ်လာသည့် နိုင်ငံရေးဖြစ်စဉ်များအပေါ် ကျေနပ်လက်ခံနိုင်မှုမရှိခြင်းကြောင့် လက်နက်ကိုင်လမ်းစဉ်ကို ရွေးချယ်ခဲ့ကြခြင်းဖြစ်ကြောင်းနိုင်ငံတော် သမ္မတက ပြောသည်။

■ ယင်းအပြင် ပညာရေးဖွံ့ဖြိုးတိုးတက်လာစေရေးအတွက် တည်ငြိမ်အေးချမ်းမှုရှိရန်လည်း လိုအပ်မည်ဖြစ်သဖြင့် လာမည့် ၅ နှစ် တာကာလအတွင်း ထာဝရငြိမ်းချမ်း ရေးရရှိရန်အတွက် မျှော်မှန်းချက်ထား၍ ဆောင်ရွက်သွားမည်ဖြစ်ကြောင်း ပြောကြားခဲ့သည်။

■ နိုင်ငံတော်အစိုးရအနေဖြင့် ထာဝရငြိမ်းချမ်းရေးရရှိရန်အတွက် မည်ကဲ့သို့ပင် ဖိတ်ခေါ်ကမ်းလှမ်းနေသည်ဖြစ်စေ လက်နက်ကိုင်အဖွဲ့များအနေဖြင့် ယုံကြည်ချက်၊ ခံယူချက်ရှိစွာဖြင့် အမှန်တကယ်ငြိမ်းချမ်းရေးရယူလိုစိတ်၊ နိုင်ငံတော်ဖွံ့ဖြိုးတိုးတက်ရေးအတွက် အတူတကွ ဝိုင်းဝန်းပူးပေါင်းဆောင်ရွက် လိုစိတ်ရှိရန်လည်း လိုအပ်မည်ဖြစ်ကြောင်း၊ မိမိတို့အနေဖြင့် နိုင်ငံရေးအရ၊ လုံခြုံရေးအရ၊ စီးပွားရေးအရ အားနည်းချက်များဖြစ်ပေါ်လျက်ရှိသည်ကို အလေးထား၍ ပြုပြင်ပြောင်းလဲမှုများ ဆောင်ရွက်သွားကြရမည်ဖြစ်ကြောင်း၊ နိုင်ငံတော်တွင် ကြုံတွေ့ဖြတ်သန်းခဲ့ရသည့် သမိုင်းကြောင်းဆိုင်ရာများ၊ ခေတ်စနစ်အတွေ့အကြုံများအပေါ်တွင် သင်ခန်းစာယူ၍ အစိုးရအနေဖြင့် ကောင်းမွန်သည့် ဦးဆောင်မှုများဖြင့် နိုင်ငံရေးအား၊ စီးပွားရေးအား၊ ကာကွယ်ရေးအားများ တိုးတက်လာစေရန်၊ နိုင်ငံတကာမျက်နှာစာတွင် နိုင်ငံဂုဏ်သိက္ခာကို မြှင့်တင်သွားနိုင်ရန် ကြိုးပမ်းဆောင်ရွက်သွားကြရမည်ဖြစ်ကြောင်းလည်း သမ္မတက ပြောသည်။

■ ထို့အပြင် ပြည်ထောင်စုအဆင့်ပုဂ္ဂိုလ်များ၊ ပြည်ထောင်စုဝန်ကြီးများ၊ တိုင်းဒေသကြီးနှင့် ပြည်နယ်ဝန်ကြီးချုပ်များအနေဖြင့်လည်း နိုင်ငံရေး၊ စီးပွားရေး၊ လုံခြုံရေးနှင့်ပတ်သက်လာပါက အမြင်ကျယ်စွာဖြင့် ကျယ်ကျယ်ပြန့်ပြန့် တွေးခေါ်ဆောင်ရွက်ကြရန်လည်း အလေးထားမှာကြားခဲ့ကြောင်း သိရသည်။

■ ယခုအခါ အစိုးရအနေဖြင့် နိုင်ငံတော်တာဝန်ကိုထမ်းဆောင်ခဲ့သည်မှာ တစ်လခွဲကာလသို့ ရောက်ရှိခဲ့ပြီဖြစ်ကြောင်း၊ ပြည်ထောင်စုအဆင့်ပုဂ္ဂိုလ်များ၊ ပြည်ထောင်စု ဝန်ကြီးများ၊ တိုင်းဒေသကြီးနှင့် ပြည်နယ်ဝန်ကြီး ချုပ်များအနေဖြင့် နိုင်ငံတကာနှင့် ဆက်ဆံဆောင် ရွက်ရသည့်အခါ နိုင်ငံအတွက် အကျိုးရှိစေမည့် ပြောဆိုဆက်ဆံမှုများဖြစ်စေရန်၊ နိုင်ငံရေးအရ ပါတီစုံဒီမိုကရေစီစနစ် ခိုင်ခိုင်မာမာဖြစ်စေရေး ဆောင်ရွက်သွားမည်၊ ဒီမိုကရေစီနှင့် ဖက်ဒရယ်စနစ်ကိုအခြေခံသည့် ပြည်ထောင်စုကိုရအောင် တည်ဆောက်မည်ဖြစ်ကြောင်း၊ ဖက်ဒရယ်ဟုဆိုရာတွင် နယ်မြေဒေသကိုပေးသည့်ဖက်ဒရယ်ဖြစ်ပြီး လူမျိုးကိုပေးသည့် ဖက်ဒရယ်မဟုတ်သည်ကိုလည်း သိရှိနားလည်နိုင်ကြရန်လိုကြောင်း၊ တိုင်းပြည်သာယာဝပြောရေးဆောင်ရွက်နိုင်ရန်အလုပ်အကိုင်အခွင့်အလမ်းများရရှိစေရေး၊ အမှန်တကယ်အလုပ် လုပ်ကိုင်နိုင်စေရေး၊ လုပ်တတ်ကိုင်တတ်စေရေး ဖန်တီးပေးနိုင်ရမည်ဖြစ် ကြောင်း၊ ဗဟိုအစိုးရမှ ဖန်တီးပေးရမည်များရှိသကဲ့သို့ ပြည်နယ်နှင့် တိုင်းဒေသကြီးအဆင့်မှ ဖော်ဆောင်ပေးရမည်များလည်းရှိကြောင်း၊ ထိုသို့ ဆောင်ရွက်ပေးနိုင်မှသာလျင် ၎င်းတို့အနေဖြင့်ဝင်ငွေကောင်းလာမည်ဖြစ်ပြီး လူမှုစီးပွားဘဝများ တိုးတက်လာမည်ဖြစ်ကာ နိုင်ငံတော်အစိုးရအပေါ်တွင်လည်း ယုံကြည်မှုရှိလာမည်ဖြစ်ကြောင်း သမ္မတက ပြောကြားခဲ့သည်။

#YMG/PP #Yangon_Times

#Local_News
Published 27 May 2026

■ ပြန်လည်ထူထောင်ရေးလုပ်ငန်းများ ဆောင်ရွက် ရာတွင် လိုအပ်သည့် ဘိလပ်မြေ၊ သွပ်၊ သွပ်ရိုက်သံ အစရှိသည့် ဆောက်လုပ်ရေးလုပ်ငန်း သုံးပစ္စည်းများကို မန္တလေးမြို့မှလည်းကောင်း၊ မိမိအရပ်ဒေသသို့ ပြန်လည်ဝင်ရောက် နေထိုင်ကြမည့် ဒေသခံပြည်သူများအတွက် လူသုံးကုန်ပစ္စည်းများ၊ မီးဖိုချောင်သုံး ပစ္စည်း များ၊ ကျန်းမာရေးသုံးပစ္စည်းများကို နေပြည်တော်မှ လည်းကောင်း မေလ ၂၅ ရက်တွင် တပ်မတော်လေယာဉ်များဖြင့် ပို့ဆောင်ပေးခဲ့ရာ ကလေးမြို့သို့ ရောက်ရှိခဲ့ကြောင်း သိရသည်။

■ အဆိုပါ ကလေးမြို့သို့ ရောက်ရှိနေသည့် ပြန်လည်ထူထောင်ရေး လုပ်ငန်းသုံး ပစ္စည်းများဖြစ်သည့် ဘိလပ်မြေ၊ သွပ်၊ သံများနှင့် လူမှုကယ်ဆယ်ရေးနှင့် ပြန်လည်နေရာ ချထားရေးဝန်ကြီးဌာနမှ ထောက်ပံ့ပေးအပ်သည့် လူသုံးကုန်ပစ္စည်းများကို ယနေ့နံနက်ပိုင်းတွင် ကလေးမြို့မှတစ်ဆင့် မော်တော်ယာဉ်များဖြင့် ဆက်လက်ပို့ဆောင်ရာ ညနေပိုင်းတွင် ဖလမ်းမြို့သို့ ရောက်ရှိခဲ့ကြောင်းသိရသည်။

■ မော်တော်ယာဉ်များဖြင့် ရောက်ရှိလာသည့် ကုန်ပစ္စည်းများကိုသက်ဆိုင်ရာတာဝန်ရှိသူများက လက်ခံရယူခဲ့ကြပြီး ဒေသခံပြည်သူများ၏ လက်ဝယ်အရောက်ဆက်လက်ဖြန့်ဝေပေးသွားမည်ဖြစ်ကြောင်း၊ ပို့ဆောင်ရန်ကျန်ရှိသည့်မြို့များသို့လည်း ဆက်လက်ပို့ဆောင်ပေးသွားမည်ဖြစ်ကြောင်းနှင့် နိုင်ငံတော်အစိုးရအနေဖြင့် ဒေသ၏လိုအပ်ချက်အပေါ်မူတည်ပြီး ဖြည့်ဆည်းပေးနိုင်ရေး စဉ်ဆက်မပြတ်ဆောင်ရွက်ပေးသွားမည်ဖြစ်ကြောင်း သိရသည်။

#YMG/PP #Yangon_Times

#Local_News
Published 27 May 2026

■ ရွှေကုက္ကိုလ်နယ်မြေအတွင်း၌ အွန်လိုင်းလိမ်လည်လောင်းကစား လုပ်ငန်းလုပ်ကိုင်ရာတွင် အသုံးပြုသည့် အဆောက်အအုံ ၇၇ လုံး အနက် ၄ ထပ် လူနေအဆောက်အအုံ ၃ လုံးကို ယနေ့တွင် ယာဉ်၊ ယန္တရားများအသုံးပြု၍ စနစ်တကျ ထပ်မံဖြိုချဖျက်ဆီးခဲ့သဖြင့် စုစုပေါင်း အဆောက်အအုံ ၆ လုံးအား ဖြိုချ ဖျက်ဆီးပြီးဖြစ်ရာ ဖျက်ဆီးရန်ကျန် တရားမဝင်အဆောက်အအုံ ၇၁ လုံး ကျန်ရှိနေသေးကြောင်းနှင့် ၎င်းတို့အားဆက်လက်၍ စနစ်တကျ ဖျက်ဆီးသွားမည်ဖြစ်ကြောင်း သိရသည်။

■ နိုင်ငံတော်အစိုးရအနေဖြင့် အွန်လိုင်းလိမ်လည် လောင်းကစားမှုကျူးလွန်မှုများကို အမျိုးသားရေးတာဝန်တစ်ရပ် အဖြစ်ခံယူကာ မြန်မာနိုင်ငံအတွင်း လုံးဝအခြေမပြုနိုင်ရေး ပြည်တွင်းအင်အားစုများအပြင် အိမ်နီးချင်းနိုင်ငံအစိုးရများနှင့်လည်း ပေါင်းစပ်ညှိနှိုင်း၍ ဆက်လက်ဆောင်ရွက်သွားမည်ဖြစ်ကြောင်း သိရသည်။

■ အွန်လိုင်းလိမ်လည်လောင်းကစားမှုများကို အခြေချလုပ်ကိုင်ခဲ့ကြသော ရွှေကုက္ကိုလ် နယ်မြေနှင့် KK Park နယ်မြေများရှိ တရားမဝင်အဆောက်အအုံများအတွင်း အွန်လိုင်း လိမ်လည်လောင်းကစားလုပ်ငန်းများ လုပ်ကိုင်ခြင်းမရှိစေရေး ဝင်ရောက်ရှင်းလင်း၍ အွန်လိုင်းလိမ်လည်လောင်းကစားမှု လုပ်ငန်းစဉ်များတွင် အသုံးပြုခဲ့သည့် သိမ်းဆည်းရမိပစ္စည်းများအား စနစ်တကျ ဖျက်ဆီးခြင်းနှင့် တရားမဝင်အဆောက်အအုံများကိုစနစ်တကျဖြိုချ ဖျက်ဆီးခြင်းများကို လုံခြုံရေးတပ်ဖွဲ့ဝင်များ၊ အုပ်ချုပ်ရေးအဖွဲ့အစည်း များနှင့် ဒေသတွင်းတာဝန်ရှိသူများအပါအဝင် အဖွဲ့စုံပါဝင်သည့် ပူးပေါင်းအဖွဲ့ဖြင့် ဆောင်ရွက်လျက်ရှိကြောင်း သိရသည်။

#YMG/PP #Yangon_Times

#World_Health
Published 27 May 2026

■ ကျောက်ကပ်ကျောက်တည်ခြင်း မဖြစ်စေဖို့ ရေများများသောက်ပေးရမယ်ဆိုတဲ့ ရှေးရိုးစွဲအယူအဆက မလုံလောက်နိုင်ဘူးလို့ ၂၀၂၆ The Lancet လေ့လာချက်ထဲမှာ ဖော်ပြထားပါတယ်။

■ ရေပိုသောက်တာ တစ်ခုတည်းနဲ့ ကျောက်ပြန်ဖြစ်ခြင်းကို မကာကွယ်နိုင်တဲ့သဘော မြင်တွေ့ရတာကြောင့် ရေသောက်ရင်ရတယ်ဆိုတဲ့ အယူအဆကို စိန်ခေါ်ရာကျပါတယ်။

■ ကျောက်ကပ်ကျောက်တည်ခြင်းက ပြန်လည်ဖြစ်ပွားမှုနှုန်း မြင့်မားပြီး တဝက်နီးပါးလောက်က ဆယ်စုနှစ်အတွင်း ထပ်မံဖြစ်ပွားကြပါတယ်။

■ ရေတွေပိုသောက်ပေမယ့် ဆီးထွက်နှုန်းမလုံလောက်တဲ့ လူနာတွေမှာ ကျောက်ပြန်ဖြစ်နှုန်း သိသိသာသာ လျော့နည်းခြင်းမရှိဘူးလို့ လေ့လာချက်ကြီးတစ်ခုမှာ တွေ့ရပါတယ်။

■ ထိရောက်တဲ့ ကာကွယ်နည်းလမ်းတွေထဲမှာ ဆိုဒီယံလျှော့စားခြင်း၊ ကယ်စီယံပမာဏ လုံလောက်အောင် ထိန်းသိမ်းခြင်း၊ တိရိစ္ဆာန်ပရိုတိန်း ကန့်သတ်စားသုံးခြင်း၊ အောက်ဆဲလိတ်များတာတွေ ရှောင်ရှားခြင်းတို့ ပါဝင်ပါတယ်။

■ ပိုတက်ဆီယံဆစ်ထရိတ်၊ သိုင်ယာဇိုက်ဆီးရွှင်ဆေးများ၊ အေလိုပျူရီနောတို့လို ဆေးတွေအပြင် နောက်ခံရောဂါများ ဖြေရှင်းခြင်းက ကျောက်ပြန်ဖြစ်ခြင်းအတွက် အလွန်အရေးကြီးပါတယ်။

■ ရေသောက်တဲ့ပမာဏထက်စာရင် တစ်နေ့ကို ဆီး ၂ လီတာမှ ၂.၅ လီတာခန့် သွားဖို့ကို ဦးစားပေးသင့်တယ်လို့ ကျွမ်းကျင်သူတွေ အကြံပြုထားပါတယ်။

■ ဆီးအရောင် ဖျော့ခြင်း၊ အဝါဖျော့ဖျော့သွားခြင်းတို့က ရေဓာတ်ကောင်းမွန်တဲ့ လက္ခဏာဖြစ်ပါတယ်။

■ ကျောက်တည်ခြင်းကို ကာကွယ်ဖို့ဆိုတာက မျှတညီညွတ်စွာ ပေါင်းစပ်ဖို့လိုပြီး ရေဓာတ်ဖြည့်ခြင်း၊ စားသောက်ပုံပြောင်းလဲခြင်း၊ ကိုယ်အလေးချိန် သင့်တင့်ခြင်း၊ ဆေးကုသမှု ခံယူခြင်းတို့ ပါဝင်ပါတယ်။

Source: NDTV.

#Local_News
Published 27 May 2026

■ ထိုင်းနိုင်ငံအပါအဝင် အိမ်နီးချင်းနိုင်ငံအချို့ကို တစ်ဆင့်ခံဖြတ်သန်း၍ ကရင်ပြည်နယ်၊ မြဝတီမြို့ဝန်းကျင်ရှိ ဆိုဒ်များအတွင်းသို့ တရားမဝင်လမ်းကြောင်းမှတစ်ဆင့် ဝင်ရောက်နေခဲ့သည့် ဖိလစ်ပိုင်နိုင်ငံသား နှစ်ဦး၊ နီပေါလ်နိုင်ငံသားတစ်ဦး နှင့် အင်ဒိုနီးရှားနိုင်ငံသားတစ်ဦး၊ စုစုပေါင်း ပြည်ပနိုင်ငံသားလေးဦး ထပ်မံဖော်ထုတ်ထိန်းသိမ်းနိုင်ခဲ့ပြီး ပြည်နှင်နိုင်ရေး စစ်ဆေးနိုင်ခဲ့ကြောင်း သိရသည်။

■ အဆိုပါ ပြည်ပနိုင်ငံသားများကို သက်ဆိုင်ရာနိုင်ငံများသို့ အမြန်ဆုံး ပြန်လည်လွှဲပြောင်း ပေးနိုင်ရေးအတွက် ဌာနဆိုင်ရာ ပူးပေါင်းအဖွဲ့များ၏ လိုအပ်သည့် ကိုယ်ရေးအချက်အလက်များနှင့် မှတ်တမ်းများ စာရင်းကောက်ယူခြင်းလုပ်ငန်း ဆောင်ရွက်နေမှုတို့ကို မြဝတီခရိုင်စီမံခန့်ခွဲရေးနှင့် အုပ်ချုပ်ရေးကော်မတီဥက္ကဌ ခရိုင်အုပ်ချုပ်ရေးမှူး ဦးကောင်းစံလင်း နှင့် တာဝန်ရှိသူများက လိုက်လံကြည့်ရှုစစ်ဆေးပြီး လိုအပ်သည်များ ပေါင်းစပ်ညှိနှိုင်းဆောင်ရွက်ပေးခဲ့ကြောင်း သိရသည်။

■ ၂၀၂၅ ခုနှစ်၊ ဇန်နဝါရီလ ၃၀ ရက်မှ ၂၀၂၆ ခုနှစ်၊ မေလ ၂၆ ရက်အထိ မြဝတီမြို့နယ် အတွင်းသို့ တရားမဝင် ဝင်ရောက်လာသည့် ပြည်ပနိုင်ငံသား စုစုပေါင်း ၁၄၆၈၉ ဦး ထိန်းသိမ်းနိုင်ခဲ့ ကြောင်းနှင့် ယင်းနိုင်ငံသားအားလုံးကို စစ်ဆေးပြီးစီးခဲ့ပြီး ၎င်းတို့အနက်မှ ၁၃၅၂၁ ဦးကို ထိုင်းနိုင်ငံမှတစ်ဆင့် သက်ဆိုင်ရာနိုင်ငံများသို့ ဥပဒေလုပ်ထုံးလုပ်နည်းများနှင့်အညီ စနစ်တကျ ပြည်နှင်လွှဲပြောင်းပေးခဲ့ကြောင်း သိရသည်။

■ လွှဲပြောင်းပေးအပ်ရန်ကျန်ရှိသည့် ပြည်ပနိုင်ငံသား ၁၁၆၈ ဦးတွင် မြန်မာနိုင်ငံ လူဝင်မှု ကြီးကြပ်ရေး (လတ်တလော)ပြဌာန်းချက်များ အက်ဥပဒေပုဒ်မ ၃(၁)/၁၃(၁)နှင့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အပြစ်ပေးအရေးယူခဲ့သည့် ပြည်ပ နိုင်ငံသား ၆၆၂ ဦးရှိသည့်အတွက် ကျန်ရှိသည့် ပြည်ပနိုင်ငံသား ၅၀၆ ဦးတို့အား သက်ဆိုင်ရာ နိုင်ငံများသို့ လွှဲပြောင်းပေးရန် အသင့်ဖြစ်နေပြီဖြစ်ကြောင်းနှင့် ၎င်းတို့ကို ကောင်းမွန်စွာ ထိန်းသိမ်း စောင့်ရှောက်ထားရှိကြောင်း သိရသည်။

Yangon_Times/PP

#World_Science
Published 27 May 2026

■ တိရိစ္ဆာန်တွေဟာ ရောဂါပိုးမွှားများကို ရှာဖွေသိရှိခြင်းဖြင့် ဖျားနာသေဆုံးခြင်းကနေ ရှောင်ရှားနိုင်စေပါတယ်။

■ အထူးသဖြင့် အုံနဲ့ကျင်းနဲ့ နေထိုင်တတ်တဲ့ ပျားတွေ ပုရွက်ဆိတ်တွေလို မျိုးစိတ်တွေမှာ တစ်သိုက်လုံး ရောဂါကူးစက်ပျံ့ပွားခြင်းကနေ ကာကွယ်ပေးနိုင်ပါတယ်။

■ USDA-ARS မှ သုတေသီများ တွေ့ရှိချက်အရ ပျားတွေဟာ အစာအရင်းအမြစ်တွေထဲမှာ ဗိုင်းရပ်စ်ပိုးရှိ၊မရှိ ရှာဖွေနိုင်ရုံမက အချို့သော အခြေအနေတွေမှာ သန့်ရှင်းတဲ့အစာတွေထက် ရောဂါပိုးမွှားရှိတဲ့ အစာကို ပိုမိုနှစ်သက်ကြတယ်လို့ သိရပါတယ်။

■ သုတေသီတွေက ဗိုင်းရပ်စ်ကူးစက်ထားတဲ့ အစာတွေအပေါ် ပျားတွေရဲ့ တုံ့ပြန်မှုကို လေ့လာရန်အတွက် ဓာတ်ခွဲခန်းနဲ့ ကွင်းဆင်းစမ်းသပ်မှု နှစ်မျိုးစလုံး ပြုလုပ်ခဲ့ကြပါတယ်။

■ အသိုက်စောင့်ပျားတွေနဲ့ အစာရှာထွက်တဲ့ ပျားတွေဟာ ရောဂါပိုးရှိနေတဲ့ အစားအစာအပေါ် မတူညီတဲ့တုံ့ပြန်မှုများ ပြသခဲ့ကြပြီး ရာသီဥတု အပြောင်းအလဲတွေကလည်း ရွေးချယ်မှုအပေါ် သက်ရောက်မှုရှိခဲ့ပါတယ်။

■ ပျားတွေရဲ့ ဗိုင်းရပ်စ်ဖော်ထုတ်နိုင်စွမ်းက ပျားအုံထဲမှာ ယင်းတို့တာဝန်ယူရတဲ့ကဏ္ဍတွေနဲ့ ဆက်စပ်မှုရှိနေနိုင်ပါတယ်။

■ လွတ်လပ်ပွင့်လင်းစွာ စားသောက်ခြင်းက ပျားအုံတွေကြား ဗိုင်းရပ်စ်ကူးစက်ပျံ့ပွားမှု ပိုမိုဖြစ်စေနိုင်ပါတယ်။

■ ဒီလေ့လာချက်ကနေ ပျားတွေက ဗိုင်းရပ်စ်ကို ဘယ်လိုသိရှိလဲ၊ ဒီအသိပညာကနေ ရောဂါထိန်းချုပ်ရေးနဲ့ ထိန်းသိမ်းရေးလုပ်ငန်းတွေ ဘယ်လိုမြှင့်တင်မလဲဆိုတဲ့အပေါ် သုတေသနပြုလုပ်ဖို့ လမ်းစတွေ ဖြစ်လာစေပါတယ်။

Source: Phys