#Local_News
Published_ 2 Sept 2022

စစ်ကိုင်းတိုင်းဒေသကြီး၊ စစ်ကိုင်းမြို့တွင် ငွေကျပ် ၂၆၀၃.၆ သိန်းတန်ဖိုးရှိ ထိန်းချုပ်ဓာတုပစ္စည်းများ ဖမ်းဆီးရမိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန် ထားပါတယ်။

သြဂုတ်လ ၃၀ ရက်တွင် စစ်ကိုင်းတိုင်းဒေသကြီးရဲတပ်ဖွဲ့မှ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် သတင်းအရ သက်သေများနှင့်အတူ စစ်ကိုင်းမြို့၊ တင်းတိပ်ရပ်ကွက်၊ ကောင်းမှုတော်ဘုရားအနီး ကားလမ်းတွင် မောင်ဒွေးမောင်းနှင်ပြီး စက်မောင်လိုက်ပါလာသည့် HONDA FIT အမျိုးအစား မော်တော်ယာဉ်နှင့် ငြိမ်းချမ်းဦး မောင်းနှင်ပြီး ကြည်လှိုင်နှင့် ဇော်လင်းနိုင်တို့ လိုက်ပါလာသည့် NISSAN UD အမျိုးအစား ၁၂ ဘီး မော်တော်ယာဉ်တို့အား ရပ်တန့်စစ်ဆေးရှာဖွေခဲ့ပါတယ်။

ထိုသို့ရှာဖွေရာ ငြိမ်းချမ်းဦး မောင်းနှင်သည့် NISSAN UD ၁၂ ဘီး မော်တော်ယာဉ်ပေါ်တွင် တင်ဆောင်လာသော ဆာလာအိတ်များအတွင်းမှ ဆူဒိုအက်ဖီဒရင်း ၁၃၀၀၀၀၀ ပြား (ဒေသကာလပေါက်ဈေးတန်ဖိုးငွေကျပ်သိန်း ၂၆၀၀) ၊ ပီပါများအတွင်းမှ အီသိုင်းအီသာ ၃၆၀ လီတာ (ဒေသကာလပေါက်ဈေးတန်ဖိုးငွေကျပ် ၃.၆ သိန်း) နှင့် လက်ကိုင်ဖုန်း ၅ လုံးတို့အား တွေ့ရှိသိမ်းဆည်းရမိခဲ့ပါတယ်။

စစ်ဆေးရာ ၎င်းတို့အတူတကွ သယ်ဆောင်လာခြင်းဖြစ်ကြောင်း ပေါ်ပေါက်ခဲ့သဖြင့် မောင်ဒွေး (၂၉) နှစ်၊ စက်မောင်(၄၈)နှစ်၊ ငြိမ်းချမ်းဦး(၃၂)နှစ်၊ ကြည်လှိုင်(၅၂)နှစ်နှင့် ဇော်လင်းနိုင်(၃၃)နှစ်တို့အား မူးယစ်ဆေးဝါးနှင့်စိတ်ကို ပြောင်းလဲစေသော ဆေးဝါးများ ဆိုင်ရာဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

#ygm_mnn
#Yangon_Media_Group

#Local_News
Published _ 2 September 2022

အဆိုတော် စိုင်းဆိုင်မောဝ်အား မန္တလေးမြို့တော်ဆေးရုံတွင် တင်ထားရကြောင်း သိရသည်။

ယနေ့ စက်တင်ဘာလ ၂ ရက် ညနေ ၄ နာရီခွဲအချိန်တွင် Operating ဝင်ရမည်ဖြစ်ကြောင်း ယင်း၏ မိသားစုဝင်တစ်ဦး၏ ပြောပြချက်အရ သိရသည်။

ပြီးခဲ့သည့် ၂၀၂၀ ပြည့်နှစ် ဇန်နဝါရီလကလည်း နာမည်ကြီးအဆိုတော် စိုင်းဆိုင်မောဝ်၏ ကျောက်ကပ်၌ တည်ရှိနေသည့်အစိုင်အခဲကို ခွဲစိပ်ကုသခဲ့ရသေးကြောင်း သိရသည်။

#ymg/mt
#Yangon_Media_Group

#Local_News
Published 2 September 2022

ရွှေဒင်္ဂါးပြားများကို ယနေ့သြဂုတ်လ ၂ ရက်တွင် စတင်ရောင်းချပေးရန် ညွှန်ကြားခြင်း မရှိသေးကြောင်း ကျောက်မျက်ရတနာရောင်းဝယ်ရေးလုပ်ငန်းက သိရသည်။

"ဒီနေ့ ရောင်းရမယ်လိုတော့ သိရပေမဲ့ ရောင်းပါလိုတော့ မညွှန်ကြားသေးပါဘူး၊ အခုအချိန်ထိတော့"ဟု ကျောက်မျက်ရတနာရောင်းဝယ်ရေးလုပ်ငန်းနှင့် နီးစပ်သူတစ်ဦးက ပြောသည်။

သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန အနေဖြင့် တစ်ကျပ်သား၊ ငါးမူးသားနှင့် တစ်မတ်သား အလေးချိန်ရှိ ရွှေဒင်္ဂါးပြားများကို ရောင်းချပေးမည်ဟု စက်တင်ဘာလ ၁ ရက် ညပိုင်းက ထုတ်ပြန်ခဲ့ခြင်း ဖြစ်သည်။

“ကမ္ဘာအေး ကျောက်မျက်ရတနာရောင်းဝယ်ရေးအသင်းမှာ ဒီနေ့ ရောင်းပေးမယ်လို့ သိရတယ်။ ဒါကြောင့် အဲဒီမှာ သွားဝယ်နိုင်တယ်။ကျွန်တော်တို့ကတော့ အတုံးရောင်းဝယ်ရေးလုပ်ငန်းဆိုတော့ ကြားတဲ့ သတင်းကို ပြောပြတာလောက်ပါပဲ။ ကျွန်တော်တို့ အသင်းအနေနဲ့ သုံးသပ်တာကတော့ ရွှေအဝယ်များတဲ့အတွက် ထုတ်ရောင်းပေးတာပေါ့၊ ဈေးနှုန်း ပြန်တည်ငြိမ်စေချင်လို့ ဖြစ်မှာပါ"ဟု ရွှေလုပ်ငန်းရှင်များအသင်းတာဝန်ရှိသူက ပြောသည်။

လက်ရှိတွင် ယနေ့ ရွှေဒင်္ဂါးပြားများ စတင်ရောင်းချပေးမည်ဆိုသည့် သတင်းကြောင့် အခေါက်ရွှေဈေးမှာ တစ်ကျပ်သားလျှင် ၂၇ သိန်း ခန့် ထိ ကျဆင်းသွားကြောင်း ဈေးကွက်အတွင်း ရောင်းဝယ်နေသူများထံမှ သိရသည်။

#ymg/mt
#Yangon_Media_Group

#Local_News
Published_2 September 2022

ဒေါ်အောင်ဆန်းစုကြည်၊ ဦးဝင်းမြင့်နှင့် ဦးမင်းသူတို့သုံးဦးကို ယနေ့ စက်တင်ဘာလ ၂ ရက်တွင် ပြည်ထောင်စုရွေးကောက်ပွဲကော်မရှင်အပေါ် မလျော်သြဇာသုံးသည်ဆိုသော ရာဇသတ်ကြီးပုဒ်မ ၁၃၀ (က)အမှုအတွက် အလုပ်နှင့်ထောင်ဒဏ် ၃ နှစ်စီချမှတ်လိုက်ကြောင်း တရားရုံးနှင့် နီးစပ်သူများထံမှ သိရသည်။

"သူတို့ သုံးယောက်လုံးကို အလုပ်နဲ့ ထောင်ဒဏ် ၃ နှစ်စီ ချလိုက်တာပါ။ ချုပ်ရက်တွေကိုထုတ်နုတ်ခံစားခွင့်မပြုပါဘူး"ဟု တရားရုံးနှင့် နီးစပ်သူတစ်ဦးက YMG ကို ပြောသည်။

ဒေါ်အောင်ဆန်းစုကြည်အနေဖြင့် အမှု ၁၀ မှု အတွက် ထောင်ဒဏ် ၁၇ နှစ် ချမှတ်ခံထားရသောကြောင့် ယနေ့ ချမှတ်လိုက်သည့် ထောင်ဒဏ် ၃ နှစ် အပါ ထောင်ဒဏ်စုစုပေါင်း နှစ် ၂၀ ထိ ရှိလာပြီဖြစ်သည်။

ယင်းအပြင် နောက်ထပ် ရင်ဆိုင်ရန် အမှု ၈ မှု ကျန်ရှိနေသေးကြောင်း၊ယင်းတွင် ဒေါ်ခင်ကြည်ဖောင်ဒေးရှင်းနှင့် ပတ်သက်သည့် အဂတိမှု ၂ မှု၊ လျှိဝှက်ချက်အက်ဥပဒေနှင့်တစ်မှု၊ ရဟတ်ယာဉ်ဝယ်ယူမှုကိစ္စ အဂတိမှု ငါးမှုဖြစ်ကြောင်း သိရသည်။

ဦးဝင်းမြင့် အနေဖြင့် ပုဒ်မ ၅၀၅ (ခ) အတွင် ထောင်ဒဏ် ၂ နှစ်၊ သဘာဝဘေးစီမံခန့်ခွဲမှုဥပဒေပုဒ်မ ၂၅ နှင့် ထောင်ဒဏ် ၂ နှစ် ချမှတ်ခံထားရခြင်းဖြစ်သည့်အနက် ထောင်ဒဏ် ၂ နှစ်ကို လျှော့ပေါ့ပေးထားသည့်အတွက် ယနေ့ ချမှတ်သည့် ထောင်ဒဏ် ၃ နှစ် နှင့် ဆိုပါက စုစုပေါင်း ၅ နှစ် ကျခံထားရခြင်းဖြစ်ကြောင်း သိရသည်။

ဒေါ်အောင်ဆန်းစုကြည်၏ ကျန်ရှိနေသေးသည့်အမှု ၈ မှု တွင် ဦးဝင်းမြင့် အနေဖြင့် ရဟတ်ယာဉ်ဝယ်ယူမှုနှင့် ပတ်သက်၍ အဂတိမှုငါးမှုတွင် အတူတူ တရားစွဲဆိုခံထားရခြင်းဖြစ်ကြောင်းလည်း သိရသည်။

#ymg/mt
#Yangon_Media_Group

#Local_News
Published - 2 Setember 2022

အိန္ဒိယနိုင်ငံမှ ဝယ်လိုအားကောင်းနေခြင်းကြောင့် ပို့ကုန်ပဲများ အမြင့်ဈေးတွင် တည်ငြိမ်နေပြီး ပြည်တွင်းသုံးကုလားပဲအုပ်စုမှာ ဈေးအနည်းငယ် ကျဆင်းလာကြောင်း ပဲ၊ နှမ်း ကုန်သည်များထံမှ သိရသည်။

ပို့ကုန်ပဲများဖြစ်သည့် မတ်ပဲ၊ ပဲစင်းငုံသည် အမြင့်ဈေးဖြင့် ဈေးနှုန်း အပြောင်းအလဲမရှိကြောင်း၊ ပဲစင်းငုံတစ်အိတ်လျှင် ကျပ် ၁၈၇,၀၀၀၊ မတ်ပဲတစ်အိတ်လျှင်ကျပ် ၁၉၅,၀၀၀ ပေါက်ဈေးရှိနေကြောင်း သိရသည်။

တရုတ်လိုင်းတွင် ပဲတီစိမ်း၊ နှမ်းတို့မှာ အရည်အသွေးအလိုက် ဈေးကောင်းရနေပြီး နယ်စုံမှ မြေပဲဆံအသစ်များ စဝင်လာကြောင်း ကုန်သည်များ၏ ပြောပြချက်အရ သိရသည်။

ပြည်တွင်းသုံး ကုလားပဲအုပ်စုမှာ ဈေးအနည်းငယ်ပြန်ကျနေပြီး ပဲမာလိုင်းတွေကတော့ ဈေးငြိမ်နေသော်လည်း ကျွန်းစားတော်ပဲ တစ်အိတ် ကျပ် ၄၀၀,၀၀၀ အထိ စံချိန်တင်မြင့်တက်လာကြောင်း သိရသည်။

အိန္ဒိယဝယ်လိုအားကောင်းနေခြင်းကြောင့် ဈေးနှုန်းအပြောင်းအလဲမရှိဘဲ ယခင်သီတင်းပတ်အတိုင်း အမြင့်ဈေးတွင် တည်ငြိမ်နေပြီး မတ်ပဲမှာ တစ်အိတ် ကျပ် ၁၉၅,၀၀၀၊ ပဲစင်းငုံ တစ်အိပ် ကျပ် ၁၈၇,၀၀၀ အထိ ပေါက်ဈေးဖြစ်ခဲ့ကာ စက်သုံးဆီစျေးမြင့်တက်လာခြင်းကြောင့် ပြည်တွင်းပို့ဆောင်မှု တန်ဆာခများလည်း ဈေးမြင့်တက်လာခဲ့ခြင်းဖြစ်သည်။

#Ymg/STH
#Yangon_Media_Group

#Local_News
Published _ 2 September 2022

ကျပ်ငွေတန်ဖိုးကျဆင်းနေပြီး တရုတ်ယွမ်ငွေဈေး မြင့်တက်နေသောကြောင့် မြန်မာ-တရုတ် နယ်စပ်မှာ သွင်းကုန် လုပ်ကိုင်သူများအနေဖြင့် အခက်အခဲကြုံတွေ့နေရကြောင်း နယ်စပ်ကုန်သည်များထံမှ သိရသည်။

မြန်မာ-တရုတ် နယ်စပ်တွင် ယမန်နေ့က တရုတ်ယွမ် တစ်ယွမ်ကို ကျပ် (၅၅၀) အထိ ပေါက်ဈေးရှိနေသည့်အတွက် ငွေလဲလုပ်ငန်းလုပ်ကိုင်သူအများစုမှ မြန်မာကျပ်ငွေ ဝယ်ယူမှုအား ယာယီရပ်ဆိုင်းထားကြောင်း သိရသည်။

ကျပ်ငွေတန်ဖိုးကျဆင်းလာသည့်အတွက် မြန်မာ-တရုတ် နယ်စပ်ရှိ ပို့ကုန်တင်ပို့သူများ အဆင်ပြေပြီး တရုတ်ဘက်မှ ကုန်မျိုးစုံ တင်သွင်းသူများမှာမူ အခက်အခဲကြုံတွေ့နေရကြောင်း မူဆယ် ဆန်ကုန်စည်ဒိုင်မှ သိရသည်။

လက်ရှိ မြန်မာ-တရုတ် နယ်စပ်တွင် နေ့စဉ် ပို့ကုန်တင်ပို့ကားများ ပုံမှန်အတိုင်း ဝင်ရောက်နေပြီး သွင်းကုန်ကား ဝင်ရောက်မှုမှာတော့ လျော့နည်းသွားကြောင်း သိရသည်။

ကျပ်ငွေတန်ဖိုးကျဆင်းနေသည့်အတွက် တရုတ်ဘက်မှ သွင်းကုန်များကို ပြည်တွင်း၌ ဈေးတင်ရောင်းရသည့် အတွက် စားသုံးသူ ပြည်သူများ ဈေးနှုန်းကြီးမြင့်မှုကို ရင်ဆိုင်ရမှာ ဖြစ်ကြောင်း နယ်စပ်ကုန်သည်များက သုံးသပ်ထားသည်။

မြန်မာ-တရုတ် နယ်စပ်တွင် ပို့ကုန်အနေနှင့် အဓိက ဆန်၊ ဆန်ကွဲ၊ စားသောက်ကုန်၊ ရေထွက်ကုန်များ တင်ပို့နေပြီး သွင်းကုန်အနေဖြင့် စက်မှုပစ္စည်း၊ ဓာတ်မြေဩဇာ၊ လျှပ်စစ်ပစ္စည်း၊ ဆေးဝါးနှင့် လူသုံးကုန်များကို တင်သွင်းနေလျက်ရှိနေကြောင်း သိရသည်။

#ymg/NN
#Yangon_Media_Group

#Local_News
Published_2 Septmber 2022

မလေးရှားနိုင်ငံက ထိန်းသိမ်းရေးစခန်းလေးခုတွင် ထိန်းသိမ်းခံထားရသော မြန်မာနိုင်ငံသား ၁၀၈ ဦးကို စက်တင်ဘာလ ၁ ရက်က ပြည်တွင်းသို့ MAI ကယ်ဆယ်ရေးလေယာဉ်ဖြင့် ပြန်လည်ပို့ဆောင်ပေးခဲ့ကြောင်း ကွာလာလမ်ပူမြို့ရှိ မလေးရှားနိုင်ငံဆိုင်ရာ မြန်မာသံရုံးက သိရသည်။

KLIA ထိန်းသိမ်းရေးစခန်းက ၅ ဦး၊ Bukit Jali ထိန်းသိမ်းရေးစခန်းက ၁၃ ဦး၊ Lang Kap ထိန်းသိမ်းရေးစခန်းက ၃၇ ဦး၊ Bidor ထိန်းသိမ်းရေစခန်းက ၅၃ ဦး ဖြစ်ပြီး ယင်းတို့မှာ မလေးရှားနိုင်ငံအတွင်း အကြောင်းအမျိုးမျိုးကြောင့် အဖမ်းခံရာက ပြစ်ဒဏ်ကျခံပြီးသူများ ဖြစ်ကြောင်း သိရသည်။

ပြစ်ဒဏ်ကျခံပြီးနောက် ထိန်းသိမ်းရေးစခန်းများတွင် ထိန်းသိမ်းခံရခြင်းဖြစ်ပြီး ယင်းမှတစ်ဆင့် မြန်မာနိုင်ငံသားဖြစ်ကြောင်း အထောက်အထားပြည့်စုံသူများအား သံရုံးအစီအစဉ်ဖြင့် ပြန်လည်ပို့ဆောင်ပေးခြင်း ဖြစ်ကြောင်း သိရသည်။

ပြီးခဲ့သည့် သြဂုတ်လ အတွင်းက မလေးရှားနိုင်ငံ ထိန်းသိမ်းရေးစခန်းများမှ မြန်မာနိုင်ငံသား ၄၈၀ ကျော် ပြည်တော်ပြန်နိုင်ခဲ့ကြောင်း မလေးရှားနိုင်ငံဆိုင်ရာ မြန်မာသံရုံး၏ စာရင်းများအရ သိရသည်။

#ymg/mt
#Yangon_Media_Group

#World_Technology
Published 2 September 2022

ပန်းကန်ဆေးစက်နည်းပညာအသစ်က ရေဖိုး၊ မီတာဖိုး၊ ဆပ်ပြာအကုန်အကျသက်သာအောင် ပြုလုပ်ပေးနိုင်တော့မှာပါ။

သုတေသီတွေက ပန်းကန်ဆေးဖို့အတွက် ဆပ်ပြာအစား စူပါအပူပေးရေငွေ့စနစ်ဖြင့် ပုံစံတူပြုလုပ်ပြီး စမ်းသပ်ကြည့်ခဲ့ကြပါတယ်။

ထိုစနစ်က ရေဆူကနေရတဲ့ ရေငွေ့တွေကနေအပူပေးကာ အပူချိန်အလွန်မြင့်မားပါတယ်။

၂၅ စက္ကန့်အတွင်း ဘက်တီးရီးယားတွေကို ၉၉ ရာခိုင်နှုန်းဖယ်ရှားနိုင်မယ်လို့ ကွန်ပျူတာပုံစံတူစမ်းသပ်ချက်မှာ တွေ့ရှိခဲ့ပါတယ်။

အခုအထိတော့ ဒီစနစ်က ကွန်ပျူတာထဲမှာသာရှိနေသေးပြီး တကယ့်စက်ပစ္စည်းတော့ မထုတ်ရသေးပါဘူး။

နောက်ထပ်ပန်းကန်ဆေးစက်မော်ဒယ်လ်အသစ် ဖြစ်လာတော့မယ်လို့ မှတ်ချက်ပြုခဲ့ ကြပါတယ်။

ဒီနည်းပညာကို ဂျာမနီနိုင်ငံ ဒေါ့မွန်နဲ့ မြူးနစ်နည်းပညာတက္ကသိုလ်တို့မှ သုတေသီများ ဦးဆောင်ခဲ့ကြတာပါ။

စူပါအပူပေး ရေငွေ့စနစ်က ရေ၊ သန့်ရှင်းချိန် သက်သာစေပြီး ဓာတုဆပ်ပြာများ မလိုအပ်တာကြောင့် စားသောက်ဆိုင်၊ ဟိုတယ်၊ ဆေးရုံများအတွက် အထူးသင့်တော်မှာဖြစ်ကြောင်း Physics of Fluids ဂျာနယ်မှာ ဖော်ပြထားပါတယ်။

အစားအစာအကြွင်းအကျန်များအပြင် ပိုးမွှားသန့်ရှင်းစေခြင်းကလည်း အရေးကြီးတဲ့ လိုအပ်ချက်အဖြစ် ဖန်တီးထားတာဖြစ်ပါတယ်။

ပုံမှန်ပန်းကန်ဆေးစက်တွေက ပိုးမွှားအားလုံးကိုမသတ်နိုင်ဘဲ ကျန်နေတတ်ပါတယ်။

ဒါ့အပြင် မီတာခ၊ ဆပ်ပြာအသုံးပြုမှုနဲ့ ရေများစွန့်ထုတ်ရတာကြောင့် အချိန် ကြာမြင့်ရပါတယ်။

စူပါအပူပေးရေငွေ့စနစ်ကတော့ ပိုမိုထိရောက်ပြီး ပတ်ဝန်းကျင်အတွက် ပိုပြီးသင့်တော်ပါတယ်လို့ သုတေသီများက ဆိုပါတယ်။

စတင်ဝယ်ယူတဲ့အခါမှာ ပုံမှန်ပန်းကန်ဆေးစက်တွေထက် ဈေးပိုကြီးနိုင်ပေမယ့် ရေရှည်မှာတော့ ရေဖိုး၊ မီတာခ၊ ဆပ်ပြာခ သက်သာစေမှာဖြစ်ပါတယ်။

ရေငွေ့တွေက ပန်းကန်ဆေးစက်ပုံးထဲကို အလွန်လျင်မြန်စွာထွက်လာပြီးတော့ ဘေးနံရံတွေမှာပါ ရောက်ရှိစေပါတယ်။

အဲဒီကနေ အပူချိန်မြင့်တက်လာပြီးတော့ ဘက်တီးရီးယားတွေကို ဖယ်ရှားပေးပြီး ရေငွေ့စက်တွေက အစားအစာအကြွင်းအကျန်တွေကို ဖယ်ရှားပေးပါတယ်။

၂၅ စက္ကန့်အတွင်း သန့်စင်ပေးနိုင်တာကြောင့် စားသောက်ဆိုင်လိုနေရာမျိုးတွေမှာ အလွန်ထိရောက်စေမှာဖြစ်ပါတယ်။

Source: Daily Mail
#Yangon_Media_Group

#World_Disaster
Published 2 September 2022

မစ္စစ္စပီပြည်နယ်မြို့တော်မှာ ပြီးခဲ့တဲ့ ၄ ရက်ကတည်းက
ရေသန့်စက်ရုံကြီးပျက်ယွင်းခဲ့တာကြောင့် ရေကောင်းရေသန့်မရရှိတဲ့လူတွေအတွက် မြို့တော်ရဲ့နေရာ ၇ နေရာမှာ ကြာသပတေးနေ့က ရေသန့်ဗူးများ ဖြန့်ဝေပေးနေရပါတယ်။

မြို့တော်ဂျက်ဆန်ရှိ ရေဗူးဖြန့်ဝေရေးနေရာတွေနဲ့ ကုန်စုံဆိုင်တွေမှာ ရေသန့်ဗူးရရှိဖို့ လူတွေတန်းစီစောင့်ဆိုင်းနေရပါတယ်။

O.B. Curtis ရေသန့်စက်ရုံကို ညဘက်တွေအထိပါ ပြုပြင်နေပြီး အတိုင်းအတာတစ်ခုအထိ ပြန်လည်ကောင်းမွန်လာပြီဖြစ်ကြောင်း
မြို့တော်က ကြေညာထားပါတယ်။

လတ်တလောရေလျှံခြင်းဖြစ်ပွားခဲ့တာကြောင့် တနင်္လာနေ့ညက ရေသန့်စက်ရုံဟာ ထိခိုက်သွားပြီး အလုပ်မလုပ်နိုင်ဖြစ်ခဲ့ရပါတယ်။

ပြုပြင်မှုတွေက နောက်ရက်တွေအထိ ပြုလုပ်ရဖွယ်ရှိပေမယ့် အခုလက်ရှိအလားအလာက တိုးတက်နေပါတယ်လို့ ထုတ်ပြန်ထားကာ အချို့နေရာတွေကို ရေအကန့်အသတ်ဖြင့် လွှတ်ပေးထားပြီလို့ သိရပါတယ်။

ရေသန့်မရရှိတဲ့ လူပေါင်း ၁၈၀,၀၀၀ ခန့်နေထိုင်တဲ့ နေရာတဝိုက်နဲ့ မြို့တော်ရှိ ရေသန့်ဖြန့်ဖြူးရေးနေရာများသို့ နိုင်ငံတော်လုံခြုံရေးအဖွဲ့ဝင် ၆၀၀ ခန့် စေလွှတ်သွားမှာဖြစ်ကြောင်း မစ္စစ္စပီအုပ်ချုပ်ရေးမှူး'တိတ်ရိဗ်စ်'က ပြောပြသွားပါတယ်။

"မြို့ပေါ်ကပြည်သူတွေ အားလုံးအနေနဲ့ ဒီလိုအခက်အခဲကြုံတွေ့နေရတာကို ကျွန်တော်သဘောပေါက်ပါတယ်၊ တကယ်ကိုစိတ်ပျက်စရာပါ၊
အမြန်ဆုံးပြင်ဆင်နိုင်အောင် ကြိုးစားနေပါတယ်" လို့ 'ရိဗ်စ်'က သတင်းစာရှင်းလင်းပွဲမှာ ပြောကြားခဲ့ပါတယ်။

ဂျက်ဆန်မြို့တော်မှာ အခြေအနေတွေက အတော်ရိုက်ခတ်နေကာ စတိုးဆိုင်တွေနဲ့ စားသောက်ဆိုင်များ ပိတ်ထားရပြီး စာသင်ကျောင်းများနဲ့ ဂျက်ဆန်ပြည်နယ်တက္ကသိုလ်တိုဟာ အွန်လိုင်းသင်ကြားမှုပုံစံသို့ ပြောင်းလဲသင်ကြားနေရပါတယ်။

"ကျွန်မမှာ ကလေး ၆ ယောက်ရှိပါတယ်၊ ဒီရေသန့်ဗူးတွေကရေနဲ့ သွားမတိုက်ဖို့၊ မျက်နှာမသစ်မိဖို့ ကလေးတွေကို တစ်ချိန်လုံးသတိပေးနေရပါတယ်၊ မိဘတစ်ယောက်အနေနဲ့ ဒီလိုရေသန့်မရတဲ့ အကြပ်အတည်းအတွင်း ဒီမိသားစုအသက်ရှင်ရုန်းကန်နိုင်ဖို့ ကျွန်မဘာမဆိုလုပ်ရမှာပါ" လို့ 'ဒန်နီကာဆမ်မြူယယ်'က ပြောပြပါတယ်။

တနင်္လာနေ့ စက်ရုံပျက်ပြီးတော့ ဒေသတွင်းအဖွဲ့များက ယာယီရေစုပ်စက်များ အပြိုင်အဆိုင်တပ်ဆင်ကြပြီး လက်ရှိစက်ပစ္စည်းတွေကို ပြုပြင်နေကြပါတယ်။

ကြာသပတေးနေ့မှာတော့ ရေသိုလှောင်တိုင်ကီတွေ တဝက်ကျော်လောက် ပြန်လည်စတင်ရေဖြည့်လျက်ရှိကာ ရေတိုင်ကီထဲရှိ ရေပမာဏမြင့်တက်လာတာနဲ့အမျှ ရေလွှတ်အားလည်း များလာမှာဖြစ်ပါတယ်။

နိုင်ငံတော်အစိုးရအဖွဲ့က အကူအညီများစေလွှတ်ဖို့ အင်္ဂါနေ့နှောင်းပိုင်းမှာ အရေးပေါ်ကြေညာချက်ကို အတည်ပြုလိုက်ပြီး ဖက်ဒရယ်အရေးပေါ်စီမံရေးအဖွဲ့နဲ့ ပတ်ဝန်းကျင်ထိန်းသိမ်းကာကွယ်ရေးအဖွဲ့တို့ကို ဂျက်ဆန်မြို့သို့ စေလွှတ်ထားပါတယ်။

"ဒေသတွင်းအာဏာပိုင်များနဲ့ ပူးပေါင်းအဖြေရှာပြီး ဂျက်ဆန်မြို့ကလူတွေ သန့်ရှင်းစိတ်ချရတဲ့ သောက်သုံးရေသေချာပေါက်ရရှိဖို့ ကြိုးပမ်းသွားပါမယ်" လို့ အိမ်ဖြူတော်ပြောရေးဆိုခွင့်ရှိသူ'ကာရင်ဂျွန်ပီရာ'က သတင်းထောက်တွေကို ပြောကြားခဲ့ပါတယ်။

Source: Reuters
#Yangon_Media_Group

#World_Health
Published 2 September 2022

ပုံမှန်ကိုယ်လက်လှုပ်ရှားမှုပြုလုပ်ခြင်းက ကျန်းမာရေးအတွက် အကျိုးကျေးဇူးများစွာရရှိစေပြီး ပိုမိုအသက်ရှည်စွာနေထိုင်နိုင်တဲ့ အကျိုးကျေးဇူးလည်း ပါဝင်ပါတယ်။

ဘယ်လိုလေ့ကျင့်ခန်းမျိုး၊ ဘယ်လောက်ကြာကြာ ပြုလုပ်ခြင်းမျိုးက အကောင်းဆုံးဖြစ်စေလဲဆိုတာကို လေ့လာသုံးသပ်နေဆဲဖြစ်ပါတယ်။

ကိုယ်ကာယလှုပ်ရှားမှုပဲဖြစ်ဖြစ် ကြံ့ခိုင်သန်စွမ်းမှုလေ့ကျင့်ခန်းပဲဖြစ်ဖြစ် အသက်ဆုံးပါးနိုင်ချေကို လျော့နည်းစေတယ်လို့ သုတေသီများတွေ့ရှိထားကာ ကိုယ်ကာယလေ့ကျင့်ခန်း တစ်ပတ်ကို ၁ နာရီမှ ၃ နာရီကြားနဲ့ ကြံ့ခိုင်သန်စွမ်းမှုလေ့ကျင့်ခန်း တစ်ပတ်ကို ၁ ကြိမ် ၂ ကြိမ်ပြုလုပ်ခြင်းဖြင့် အသက်အန္တရာယ် ပိုပြီးတော့တောင် နည်းပါးသွားပါသေးကြောင်း British Journal of Sports Medicine ဂျာနယ်မှာ ဖော်ပြထားပါတယ်။

အထိုင်များတဲ့ လူနေမှုပုံစံကနေ လေ့ကျင့်ခန်းပြုလုပ်ခြင်းက ဆေးလိပ်သောက်ရာကနေ ဆေးလိပ်ဖြတ်လိုက်တဲ့သူလိုပါပဲလို့ သိပ္ပံပညာရှင်'ကာဗာကိုးလ်မန်း'က ဖော်ပြခဲ့ပါတယ်။

လေ့ကျင့်ခန်းပြုလုပ်ခြင်းက သက်ရှည်ကျန်းမာဖို့အတွက် အရေးကြီးဆုံးလုပ်ဆောင်ချက်ဖြစ်ကြောင်း ဒီတွေ့ရှိချက်က သက်သေပါပဲ။

သုသေသနအတွက် ၁၉၉၇ ခုနှစ်မှ ၂၀၁၄ ခုနှစ်ကြား အမေရိကန်လူမျိုး ၄ သိန်းကျော်ကို စစ်တမ်းကောက်ယူခဲ့ပါတယ်။

လေ့ကျင့်ခန်းတွေကို ဘယ်လောက်ပြင်းထန်တဲ့အထိ ပြုလုပ်တယ်၊ တစ်ပတ်ကို ဘယ်နှကြိမ်မျှပြုလုပ်လဲဆိုတာတွေကို မေးမြန်းခဲ့ကြပါတယ်။

အခြားအချက်အလက်များနဲ့ နာတာရှည်ရောဂါအခြေအနေများပါ ထည့်တွက်ပြီးနောက် အနည်းငယ်ပြင်းထန်တဲ့ကိုယ်ကာယလေ့ကျင့်ခန်းကို တစ်ပတ်ကို ၁ နာရီမျှပြုလုပ်သူတွေဟာ သေဆုံးနိုင်ချေ ၁၅ ရာခိုင်နှုန်းနည်းပါးပြီး တစ်ပတ်ကို ၃ နာရီပြုလုပ်သူတွေက ၂၇ ရာခိုင်နှုန်း ပိုနည်းပါးခဲ့ပါတယ်။

ကြံ့ခိုင်သန်စွမ်းလေ့ကျင့်ခန်းများကို တစ်ပတ်ကို ၁ ကြိမ် ၂ ကြိမ်ခန့်ပြုလုပ်သူတွေက လုံးဝမလုပ်တဲ့သူတွေထက် သေဆုံးနိုင်ချေ ၄၀ ရာခိုင်နှုန်း ပိုနည်းခဲ့ပါတယ်။

ဒါဟာ ဆေးလိပ်မသောက်သူနဲ့ ဆေးလိပ်သောက်သူတို့ကြား ကွာခြားချက်နဲ့ ဆင်တူနေပါတယ်။

"ကြွက်သားတွေ ကျန်းမာသန်စွမ်းရင် ပိုပြီးတော့ အသက်ရှည်ကျန်းမာစွာ နေရပါလိမ့်မယ်" လို့ ဘေလာဆေးပညာကောလိပ်မှ ဒေါက်တာ'ဘရုစ်မိုစ်လီ'က ဆိုပါတယ်။

နေ့စဉ်လှုပ်ရှားလုပ်ကိုင်မှုတိုင်းအတွက် ကြွက်သားသန်စွမ်းမှုက အရေးပါ လှပါတယ်။

လူတစ်ယောက်က အသက် ၃၀ အရွယ်ခန့်ကစပြီး ကြွက်သားသန်စွမ်းမှုလျော့နည်းလာပေမယ့် ပုံမှန်လေ့ကျင့်ခန်းပြုလုပ်ခြင်းဖြင့် ကာကွယ်နိုင်သေးတာကြောင့် လေ့ကျင့်ခန်းစလုပ်ဖို့ နောက်ကျတယ်ဆိုတာမျိုး မရှိပါဘူး။

ဒါပေမဲ့ ထိခိုက်ဒဏ်ရာမဖြစ်စေရန်အတွက် ပုံမှန်လေးပြုလုပ်သွားဖို့တော့ လိုအပ်ပါတယ်။

"လူတွေကိုမေးကြည့်တဲ့အခါ အသက်ကြီးလာရင် မှီခိုမှု မရှိဘဲနဲ့ ကျန်းမာသန်စွမ်းတဲ့ဘဝကို လိုချင်ကြတာပါပဲ"လို့ ဒေါက်တာ'ကွန်စီလ်ဂျာ'က မှတ်ချက်ပြုခဲ့ပါတယ်။

Source: The Straits Times
#Yangon_Media_Group

#Local_News
Published_ 1 September 2022

လတ်တလောမှာ ပြည်တွင်းမှာ ကိုဗစ်ပိုးတွေ့ရှိမှုတွေများပြားနေပြီး ကျန်းမာရေးဝန်ကြီးဌာနအနေနဲ့ ကိုဗစ်သံသယရှိသူတွေကို မြို့နယ်တိုင်းမှာ အခမဲ့စစ်ဆေးပေးတာ၊ ကုသပေးတာတွေ ဆောင်ရွက်ပေးနေတယ်လို့ ကျန်းမာရေးဝန်ကြီးဌာနပြောရေး ဆိုခွင့်ရှိသူ ဒေါက်တာသန်းနိုင်စိုးက ပြောပါတယ်၊၊

#Yangon_Media_Group

#World_Art
Published 1 Sept 2022

အထည်ဒီဇိုင်နာ'ဘရစ်ဂျစ်ဆင်း'က အနီရောင်ပေါ်ပီဘိန်းပန်းဖောင်းကြွပုံပါတဲ့ အဝတ်စကြီးကို ဖြန့်ပြနေခဲ့ပါတယ်။

#Yangon_Media_Group