#DailyNews
Published _ 15 September 2022

၁။ သထုံမြို့နယ်ရှိ သုဝဏ္ဏ၀တီမြို့၊ သိမ်ဆိပ်တောင်လေးကုန်းစေတီ မိုးကြိုးပစ်ခံရသဖြင့် စိန်ဖူးတော်မြေခခဲ့

၂။ သီတင်းကျွတ်လပြည့်နေ့အမီ ဗုဒ္ဓဂါယာကိုဘုရားဖူးခရီးသွားရောက်လိုသူများ များပြားနေ

၃။ တရုတ်-မြန်မာနယ်စပ် မူဆယ် ပို့ကုန်သွင်းကုန်လုပ်ငန်းများ ပုံမှန်ပြန်ဖြစ်

၄။ အမှိုက်ပုံးဖွင့်ပြီး အမှိုက်ဖွသည့် ကတ္တဝါငှက်များကြောင့် ဆစ်ဒနီမြို့နယ်ခံများ စိတ်အနှောင့်အယှက်ဖြစ်နေရ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

Published 15 Sept 2022

၂၀၂၂ခုနှစ် အာဆီယံမိတ်ဖက် မီဒီယာများ ဖိုရမ်ကို စက်တင်ဘာ ၁၅ ရက် ကြာသပတေးနေ့က တရုတ်နိုင်ငံ တောင်ပိုင်း ကွမ်ရှီကျန်း ကိုယ်ပိုင်အုပ်ချုပ်ခွင့်ရေးဒေသ နန်နင်းမြို့မှာ ကျင်းပရာ နိုင်ငံပေါင်း ၇၀ကျော်မှ ဧည့်သည် ၁၈၀ကျော် အွန်လိုင်းနှင့် ကိုယ်တိုင် တက်ရောက်ခဲ့ကြပါတယ်။

“အသိဉာဏ်၊ပူးပေါင်းဆောင်ရွက်မှု၊ပေါင်းစည်းညီညွတ်မှု” ဆိုတဲ့ အာဘော်နှင့် ပြုလုပ်တဲ့ ဒီနှစ်ဖိုရမ်ကို တရုတ်မီဒီယာအုပ်စု CMG နှင့် ကွမ်ရှီကျန်း ကိုယ်ပိုင်အုပ်ချုပ်ရေးဒေသအစိုးရတို့ ပူးပေါင်းကျင်းပပါတယ်။

ဖွင့်ပွဲအခမ်းအနားမှာ CMG နှင့် အာဆီယံမီဒီယာများအကြား ပူးပေါင်းဆောင်ရွက်မှုအသစ်တွေဖြစ်တဲ့ “ဇီ မျိုးဆက် ဩဇာလွှမ်းမိုးသူများ လေ့ကျင့်ရေးစင်တာ” နှင့် “ တရုတ်-အာဆီယံ မီဒီယာ အရေးပေါ်လိုင်း” စီမံကိန်းနှစ်ခုကို မိတ်ဆက်ပေးခဲ့ပါတယ်။

ဖိုရမ်နှင့်အတူ CMG နှင့် ကွမ်ရှီကျင်းအစိုးရတို့အကြား မဟာဗျူဟာမြောက် ပူးပေါင်းဆောင်ရွက်ရေးသဘောတူစာချွန်လွှာ လက်မှတ်ရေးထိုးခဲ့ကြပါတယ်။

အဲဒီအပြင် တရုတ်-အာဆီယံ မီဒီယာကွန်ပလက်စ် ဖွင့်ပွဲကိုပါ တစ်ပါတည်းကျင်းပခဲ့ကြပါတယ်။

Source CCTV+

#ASEAN_China_Media_Partners_Forum

#Guangxi_Zhuang

#China_media

#Local_News
Published - 15 September 2022

ယနေ့ စက်တင်ဘာလ ၁၅ ရက်နေ့မှာ စားအုန်းဆီတစ်ပိဿာကို ကျပ် ၈၀၀၀ အထိကျဆင်းသွားတယ်လို ဝယ်ယူသုံးစွဲသူထံကနေ သိရပါတယ်။

#Yangon_Media_Group

#Local_News
Published_ 15 September 2022

မြန်မာသံရုံး၊ တိုကျိုမြို့မှ ၂၀၂၂ ခုနှစ်၊ စက်တင်ဘာ (၁) ရက်မှ (၁၅) ရက်နေ့အတွင်း စိစစ်ပြီး နိုင်ငံခြားရေးဝန်ကြီးဌာနသို့ ပေးပို့ပြန်ကြားခဲ့တဲ့ အလုပ်ကမ်းလှမ်းစာ (၂၂၇) ခုနှင့် ပတ်သက်သည့် အချက်အလက်များအား အသိပေး အကြောင်းကြားထားပါတယ်။

အဆိုပါ အလုပ်ကမ်းလှမ်းစာ ၂၂၇ ခုအတွင် အလုပ်သမား ၆၂၄ နေရာပါဝင်ပြီး အမျိုးသား ၃၀၆ နေရာနှင့် အမျိုးသမီးများအတွက် ၃၁၈ နေရာ ခေါ်ယူထားပါတယ်။

မြန်မာသံရုံး၊ အနေဖြင့် အလုပ်သမားဝန်ကြီးဌာနက နိုင်ငံခြားရေးဝန်ကြီးဌာနမှ တစ်ဆင့် ပေးပို့လာသည့် အလုပ်ကမ်းလှမ်းစာများကို အချိန်နှင့်တစ်ပြေးညီ စိစစ်ဆောင်ရွက်ပေးလျက်ရှိတယ်လို့ ဆိုပါတယ်။

ထိုသို့ စိစစ်ဆောင်ရွက်ရာတွင် ဂျပန်နိုင်ငံရှိ အလုပ်သမားကြီးကြပ်ရေး ကုမ္ပဏီနှင့် အလုပ်ခေါ်ယူတဲ့ စက်ရုံ/ကုမ္ပဏီများသည် ဂျပန်နိုင်ငံတွင် တရားဝင်တည်ထောင်ထားခြင်း ရှိ/မရှိ စာရွက်စာတမ်း အထောက်အထားများ စိစစ်ပြီး စိစစ်တွေ့ရှိချက်များ၊ သဘောထား မှတ်ချက်များကို နိုင်ငံခြားရေးဝန်ကြီးဌာနမှတစ်ဆင့် အလုပ်သမားဝန်ကြီးဌာနသို့ ပြန်လည်ပေးပို့လျက်ရှိတယ်လို့ မြန်မာသံရုံးရဲ့ ထုတ်ပြန်ချက်မှာ ဖော်ပြထားပါတယ်။

#ygm_mnn
#Yangon_Media_Group

#Local_News
Published_ 15 September 2022

မြန်မာ့မီးရထား တိုင်းအမှတ် (၆) ၊ ပဲခူးတိုင်းဒေသကြီး လက်ပံတန်းမှ သာရဝေါသို့ လော်ကယ်ရထားလိုင်းကို စက်တင်ဘာ ၁၆ ရက်တွင် စတင်ပြေးဆွဲပေးမည်ဖြစ်ကြောင်း သိရပါတယ်။

အဆိုပါ လက်ပံတန်း-သာရဝေါ လော်ကယ်ရထားခရီးစဉ်ကို စက်တင်ဘာ ၁၆ ရက်မှစတင်၍ အပတ်စဉ် တနင်္လာနေ့နှင့် သောကြာနေ့တို့တွင် သာရဝေါဘူတာမှ နံနက် ၆ နာရီခွဲတွင် ထွက်ခွာမှာ ဖြစ်ပါတယ်။

လက်ပံတန်းဘူတာသို့ နံနက် ၈ နာရီခွဲတွင် ရောက်ရှိမည့် အမှတ် (၁၉၆) အစုန် ခရီးစဉ်နှင့် လက်ပံတန်းဘူတာမှ မွန်းလွဲ ၂ နာရီခွဲတွင် ထွက်ခွာပြီး သာရဝေါဘူတာသို့ ညနေ ၅ နာရီတွင် ရောက်ရှိမည့် အမှတ် (၁၉၅) အဆန်ခရီးစဉ်တို ဖြစ်ကြပါတယ်။

လမ်းခရီးတွင် ညောင်ဝိုင်း၊ ကျောက်အိုင်၊ စည်ပင်သာယာ၊ ခမုံဆိပ်၊ မြစ်မခ၊ သံဖြူရုံ၊ ကညင်တို၊ ဇီးဖြူကုန်း၊ ဇီးဖြူကုန်းရွာမ (၉) ဘူတာ ထွက်ခွာပြေးဆွဲပေးသွားမည်ဖြစ်ကြောင်း မြန်မာ့မီးရထားမှ သိရပါတယ်။

#ygm_mnn
#Yangon_Media_Group

#Local_News
Published-15 Setember 2022

ယနေ့ စက်တင်ဘာလ ၁၄ ရက်နေ့တွင် ပြည်တွင်းစက်သုံးဆီဈေးနှုန်းမှာ ပြန်လည်ကျဆင်းလာခဲ့ကြောင်း စက်သုံးဆီအရောင်းဆိုင်များ၏ ဈေးနှုန်းများအရ သိရသည်။

စက်တင်ဘာလ ၁၄ ရက်နေ့တွင် 92 တစ်လီတာ ၂၄၈၅ ကျပ်၊ 95 တစ်လီတာ ၂၅၇၅ ကျပ်၊ ဒီဇယ်တစ်လီတာ ၃၀၆၅ ကျပ်၊ ပရီမီယံဒီဇယ်တစ်လီတာ ၃၁၅၀ ကျပ်ဖြစ်ပြီး ယနေ့တွင် 92 တစ်လီတာ ၂၄၁၀ ကျပ်၊ 95 တစ်လီတာ ၂၅၁၅ ကျပ်၊ ဒီဇယ်တစ်လီတာ ၂၈၃၀ ကျပ် နှင့် ပရီမီယံဒီဇယ်တစ်လီတာကို ၂၉၁၅ ကျပ်အထိကျဆင်းခဲ့ကြောင်း သိရသည်။

လက်ရှိတွင် စက်သုံးဆီကို ရှရှားနိုင်ငံမှ မှာယူထားပြီး ပြည်တွင်း၌ စက်သုံးဆီပြတ်လပ်ခြင်းမရှိအောင် စီမံဆောင်ရွက်ပေးထားကြောင်း၊ ယင်းအပြင် စက်သုံးဆီဈေးနှုန်းကြီးမြင့်လာခြင်းကြောင့် ကုန်ဈေးနှုန်းမြင့်တက်လာမှုကို သက်သာစေရန် ဗဟိုဘဏ်မှ ဈေးကွက်ထဲတွင် ကန်ဒေါ်လာ သန်း၂၀၀ ထောက်ပံ့သွားမည်ဖြစ်ကြောင်းလည်း အသိပေးကြေညာထားသည်။

ရန်ကုန်၊ မန္တလေးအပါအဝင် နေပြည်တော်၊ တိုင်းဒေသကြီးနှင့်ပြည်နယ်များတွင် ရည်ညွှန်းလက်လီဈေးနှုန်းဖြင့် ရောင်းချပေးနေကြောင်း စက်သုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်မှုကော်မတီမှ သိရသည်။

#Ymg/STH
#Yangon_Media_Group

#Local_News
Published - 15 September 2022

ဘုရင့်နောင်ပွဲရုံရှိ “ အံ့ထူး” ငရုတ်သီးမှုန့်နှင့်ကုန်စုံဆိုင်မှ ထုတ်လုပ်သည့် အမှတ်တံဆိပ်မပါသည့် ငရုတ်သီးအကြမ်းမှုန့် ၊ ငရုတ်သီးအစိမ်းမှုန့် နှင့် ငရုတ်သီးခွဲခြမ်းမှုန့် ခြောက်မျိုးမှာ စားသုံးရန် မသင့်ကြောင်း အစားအသောက်နှင့် ဆေးဝါးကွပ်ကဲရေးဦးစီးဌာနမှ ထုတ်ပြန်ကြေညာထားသည်။

ဘုရင့်နောင်ပွဲရုံ “ အံ့ထူး” ငရုတ်သီးမှုန့်နှင့် ကုန်စုံဆိုင်သို့ ရှောင်တခင်သွားရောက်စစ်‌ဆေးခဲ့ရာ ငရုတ်သီးမှုန့်များတွင် ခွင့်မပြုဆိုးဆေးများ ပါဝင်နေကြောင်း တွေ့ရှိရကြောင်း၊ အဆိုပါ ငရုတ်သီးမှုန့်များအား စားသုံးခြင်းမပြုရန် ၊ ‌စျေးကွက်အတွင်း ဖြန့်ဖြူးအရောင်းချခြင်းမပြုရန်နှင့် လိုက်နာဆောင်ရွက်ခြင်းမရှိပါက အမျိုးသားအစားအသောက်ဥပဒေပုဒ်မ ၂၈ (က) အရ အရေးယူမည်ဖြစ်ကြောင်းလည်း အသိပေးထားသည်။

ကျန်းမာရေးဝန်ကြီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာနသည် အရည်အသွေး စစ်မှန်ကောင်းမွန်ပြီး ဘေးအန္တရာယ်ကင်းရှင်းသော အစားအသောက်များကို အများပြည်သူတို့ စားသုံးနိုင်ရန် စဉ်ဆက်မပြတ် ဆောင်ရွက်နေကြောင်း သိရသည်။

#Ymg/STH
#Yangon_Media_Group

#Local_News
Published _15 September 2022

နေပြည်တော်နယ်မြေအတွင်း ပြီးခဲ့သည့် ဩဂုတ်လကုန်မှစ၍ ကိုဗစ်-၁၉ ရောဂါပိုး ကူးစက်ပျံ့ပွားမှုနှုန်း မြန်ဆန်နေကြောင်း နေပြည်တော် သတင်းရင်းမြစ်များထံမှ သိရသည်။

လက်ရှိတွင် နေပြည်တော်၌ တာဝန်ထမ်းဆောင်လျက်ရှိသော ဝန်ထမ်း အချိုတွင် ကိုဗစ်ရောဂါပိုးတွေ့ရှိရသဖြင့် ကျန်းမာရေးဝန်ကြီး ဌာနက သတ်မှတ်ထားသော ဆေးရုံ(ပုဗ္ဗသီရိမြိုနယ်ဆေးရုံ၊ ကုတင်-၃၀၀)၌ တက်ရောက်ကုသမှုခံယူ နေရကြောင်းလည်း၊ စက်တင်ဘာလ ၁၄ ရက်ထိ ကိုဗစ်အတည်ပြုလူနာ (၁၆၇) ဦးရှိကြောင်းလည်း ကျန်းမာရေးဝန်ကြီးဌာနစာရင်းများအရ သိရသည်။

လက်ရှိ နေပြည်တော်၌ ပြန်လည်ဖွင့်လှစ်ပေးထားသော ကွာရန်တင်းစင်တာ(Quarantine Center) လေးခုရှိပြီး ယင်းတို့မှာ New Ayear၊ ခုတင် (၅၀) ဆံ့ ဒက္ခိဏသီရိ နှင့် ဥတ္တရသီရိ ၊လယ်ဝေးအားကစားရုံ တို ဖြစ်ကြောင်း၊ယင်းတွင် စက်တင်ဘာလ ၁၄ ရက်ထိ အဆိုပါ Quarantine Center များတွင်ထားရှိသော ထိတွေ့သူအရေအတွက် စုစုပေါင်း (၇၀)ဦးကိုထားရှိကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

"ကိုဗစ်ကာကွယ်တဲ့အနေနဲ့ နေပြည်တော်ရုံးစိုက်တဲ့ဌာန၊ အဖွဲ့အစည်းတွေမှာဆိုရင် နေ့စဉ် ရုံးတက်ရမယ့် အဖွဲ့၊ နှစ်ပတ်တက်နှစ်ပတ်နား တစ်ဖွဲ့ အဲလိုမျိုးလုပ်ထားတယ်လို့ သိရတယ်။ အိမ်ကပဲ ရုံးအလုပ်ကို လုပ်ရမှာပေါ့၊ ပြီးခဲ့တဲ့ ကိုဗစ်တတိယလှိုင်းလိုမျိုးပေါ့"ဟု နေပြည်တော်၌ နေထိုင်သည့် အရာထမ်းတစ်ဦးက ဆိုသည်။

ကျန်းမာရေးဝန်ကြီးဌာနအနေဖြင့် ပြည်သူများ Mask တပ်ရန်အတွက် Mask Campaign များ ဆောင်ရွက်ခြင်း၊ ကျောင်းများတွင် ဆရာ၊ဆရာမများနှင့် ကျောင်းသား၊ ကျောင်းသူများ နေ့စဉ် mask တပ်၍ စာသင်ကြားရန်နှင့် ဖျားနာခြင်း၊ သံသယလက္ခဏာများတွေ့ရှိပါက ကျန်းမာရေးဌာနသို့ အကြောင်းကြားရန် အသိပေးခြင်း၊စားသောက်ဆိုင်များ၊ ဈေးများနှင့် လူစုလူဝေးရှိသောနေရာများတွင် Mask တပ်ရန် ဆော်ဩခြင်းများ ဆောင်ရွက်လျက်ရှိကြောင်းကျန်းမာရေးဝန်ကြီးဌာနက သိရသည်။

#ymg/mt
#Yangon_Media_Group

#Local_News
Published - 15 September 2022

ရွှေတုံး၊ ရွှေခဲတွေများကို အရောင်းအဝယ် ပြုလုပ်သည့်အခါတွင် ဘဏ်စနစ်ဖြင့်သာ ပေးချေဆောင်ရွက်နိုင်ရေးအတွက်စီစဉ်နေကြောင်း နစကပြန်ကြားရေးသတင်းထုတ်ပြန်ချက်အရ သိရသည်။

ရွှေနှင့်ငွေကြေးဈေးကွက် ခိုင်မာစေရေးအတွက် မြန်မာနိုင်ငံတော်ဗဟိုဘဏ်ဥက္ကဌနှင့် ရွှေနှင့်ငွေကြေးဈေးကွက်စောင့်ကြည့်၊ ထိန်းသိမ်း ၊ ကြပ်မတ်ရေးလုပ်ငန်းကော်မတီတို့မှ နေပြည်တော်တွင်တွေ့ဆုံဆွေးနွေးခဲ့ခြင်းဖြစ်သည်။

စက်တင်ဘာလ ၁၄ ရက်နေ့တွင် ပြုလုပ်ခဲ့သည့် ရွှေနှင့် ငွေကြေးဈေးကွက်တည်ငြိမ်ခိုင်မာစေရေးအတွက် တာဝန်ရှိသူများ၏ တွေ့ဆုံဆွေးနွေးမှုအတွင်း အထက်ပါအတိုင်း ထည့်သွင်းပြောကြားခဲ့ခြင်းဖြစ်ပြီး ဘဏ်များ၏ ပံ့ပိုးပေးမည့် အစီအမံတွေကိုလည်း ဆွေးနွေးခဲ့ကြကြောင်း သိရသည်။

ယင်းအပြင် သက်ဆိုင်ရာ ဝန်ကြီးဌာနများနှင့် ဗဟိုဘဏ်တို့မှ ရွှေနှင့် ငွေကြေးဈေးကွက် တည်ငြိမ်စေရန် ဆက်လက်ပံ့ပိုးပေးမည်ဖြစ်ပြီး ရွှေလုပ်ငန်းရှင်များက ပူးပေါင်းဆောင်ရွက်ရမည့် လုပ်ငန်းများကို လည်းပြောကြားခဲ့ကြောင်း သိရသည်။

ပြည်တွင်းရွှေဈေးနှုန်းမှာ ကျပ်သိန်း ၃၀ အောက်ကျဆင်းနေပြီး YGEA အသင်းမှ ယနေ့ကြမ်းခင်းဈေးအဖြစ် အခေါက်ရွှေတစ်ကျပ်သားကို ကျပ် ၁,၉၈၅,၀၀၀ သတ်မှတ်ထုတ်ပြန်ထားသည်။

#Ymg/STH
#Yangon_Media_Group

#Local_News
Published - 15 Setember 2022

နောက်ဆုံးပေါ် ကိုဗစ်ရောဂါကုသဆေး PACLOVID (Nirmatrelvir 150mg; Ritonavir 100mg) (သောက်ဆေး) ကိုဆေးတစ်ဘူး (၁၀လုံးကဒ် ၃ကဒ်) ကို ကျပ် ၂၅၀,၀၀၀ ဖြင့် ရောင်းချမည်ဖြစ်ကြောင်း Pacific Medical Industries ကုမ္ပဏီလီမိတက်မှ ကြေညာထားသည်။

နောက်ဆုံးပေါ် ကိုဗစ်ရောဂါကုသဆေး (သောက်ဆေး) အဖြစ် ကမ္ဘာ့ကျန်းမာရေး အဖွဲ့အစည်း (WHO) အပါအဝင် US FDA၊ UK MHRA၊ Korea FDA၊ Singapore FDA အစရှိသည့် ကမ္ဘာ့ ဖွံ့ဖြိုးပြီးနိုင်ငံများ၏ ကျန်းမာရေး အဖွဲ့အစည်းများမှ ထောက်ခံထားသော PAXLOVID (Nirmatrelvir 150mg; Ritonavir 100mg) သောက်ဆေးအား နိုင်ငံတကာအဆင့်မီ အနောက်တိုင်းဆေးဝါးစက်ရုံ Pacific Medical Industries Ltd မှ branded generic “PACLOVID ” အမည်ဖြင့်ထုတ်လုပ် အောင်မြင်ခဲ့ပြီး Myanmar FDA မှ ထောက်ခံစာအမှတ် (2308ND012) ဖြင့် ခွင့်ပြုချက်ရရှိပြီးဖြစ်ကြောင်း ကြေညာချက်တွင်ပါရှိသည်။

ယင်းအပြင် ဆေးစတင်ရရှိပြီဖြစ်သည့်အတွက် ယနေ့မှ စတင်၍ ဝယ်ယူနိုင်ပြီဖြစ်ကြောင်းလည်း အသိပေးကြေညာထားသည်။

PACLOVID ကိုဗစ်ကုသဆေးအား ကိုဗစ်ကုသရေးဆရာဝန်များ၊ ဆေးရုံဆေးခန်းများနှင့်ဆေးဆိုင်ကြီးများအနေဖြင့် ဆရာဝန်ဆေးညွှန်းစာ ၊ ဆေးအမှာစာ request letter များဖြင့် ယနေ့ စတင်၍ဝယ်ယူနိုင်ပြီဖြစ်ကြောင်း သိရသည်။

PACLOVID ( Nirmatrelvir 150mg; Ritonavir 100mg) ဆေးသည် Covid-19 ရောဂါကြောင့် ဆေးရုံတက်ရသည့်နှုန်းလျော့နည်းစေခြင်း ၊ သေဆုံးမှုနှုန်းအား ၉၀% ထိလျော့ချပေးနိုင်ခြင်း ၊delta နှင့် omicron မျိုးစိတ်များအား (ဓါတ်ခွဲစမ်းသပ်ချက်အရ) အောင်မြင်စွာ ကုသနိုင်ခြင်း၊ အသက် ၁၂ နှစ် အထက် ကိုယ်အလေးချိန် 40kg အထက်ကလေးများအား ကုသမှုပေးနိုင်ခြင်း စသည့်ကောင်းကျိုးများရှိသည့် နောက်ဆုံးပေါ်ကိုဗစ်ကုသဆေး (သောက်ဆေး) ဖြစ်ကြောင်း သိရသည်။

#Ymg/STH
#Yangon_Media_Group

#Local_News
Published_ 15 September 2022

ရန်ကုန်တိုင်းဒေသကြီးတွင် ယခုစက်တင်ဘာလ (၁၄)ရက်တာအတွင်းကိုဗစ်ပိုးတွေ့လူနာ(၁၃၆၆)ဦးတွေ့ရှိခဲ့ရကြောင်း ကျန်းမာရေးဝန်ကြီးဌာန၏ ထုတ်ပြန်ချက်များအရ သိရသည်၊၊

စက်တင်ဘာလ(၁)ရက်မှ (၁၄)ရက်အထိ ကျန်းမာရေးဝန်ကြီးဌာန၏ ထုတ်ပြန်ချက်များအရ တစ်နိုင်ငံလုံး အတိုင်းအတာအနေဖြင့် ကိုဗစ်ပိုးတွေ့လူနာ(၂၂၃၈)ဦး အနက် ရန်ကုန်တိုင်းဒေသကြီးက ကိုဗစ်ပိုးတွေ့လူနာ (၁၃၆၆)ဦးဖြင့် အများဆုံးတွေ့ရှိနေရခြင်းဖြစ်သည်၊၊

ရန်ကုန်တိုင်းဒေသကြီးတွင် ပိုးတွေ့မှုအများဆုံးမြို့နယ်များကတော့ လှိုင်သာယာ၊ မင်္ဂလာဒုံ၊ မြောက်ဥက္ကလာ၊ မရမ်းကုန်း၊ အင်းစိန်၊ ရွှေပြည်သာမြို့နယ်များတွင် တွေ့ရှိမှုအများဆုံးဖြစ်နေပြီး လှည်းကူး၊ ဒလ၊ ဒဂုံမြို့သစ်တောင်ပိုင်း၊ ဒဂုံမြို့သစ်မြောက်ပိုင်းတွင်လည်း ပိုးတွေ့လူနာတွေ့ရှိမှုများနေကြောင်း ကျန်းမာရေးဝန်ကြီးဌာန၏ ထုတ်ပြန်ချက်အရသိရသည်၊၊

ရန်ကုန်တိုင်းတွင် ပိုးတွေ့လူနာများနေသောကြောင့် ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) ၏ Mask Campaign များ ဆောင်ရွက်နေသည်ဟု ထုတ်ပြန်ထားသည်၊၊

ကျန်းမာရေးဝန်ကြီးဌာနအနေဖြင့်လည်း ရန်ကုန်တိုင်းဒေသကြီးတွင် ကိုဗစ်နှင့် ပတ်သက်၍ အရေးပေါ်တုန့်ပြန်ရေးအဖွဲ့များ ဖွဲ့စည်းထားရှိခြင်း၊ ဖုန်းဖြင့် ကျန်းမာရေးဝန်ဆောင်မှုပေးသောအဖွဲ့များ ဖွဲ့စည်းပေးခြင်း ၊Home isolationထားပြီး ကုသပေးခြင်း၊ လိုအပ်ပါက ဆေးရုံနှင့်ကိုဗစ်ကုသရေးစင်တာများတွင် ကုသနိုင်အောင်ဆောင်ရွက်ပေးခြင်းများ ဆောင်ရွက်ထားကြောင်း ကျန်းမာရေးဝန်ကြီးဌာန၊ပြောရေးဆိုခွင့်ရှိသူ ဒေါက်တာသန်းနိုင်စိုး၏ ပြောပြချက်အရ သိရသည်၊၊

#ymg/tthl
#Yangon_Media_Group

#World_Politics
Published 15 September 2022

ထိုင်ဝမ်သို့ ဒေါ်လာဘီလီယံများစွာ တန်ကြေးရှိတဲ့ စစ်ဘက်ဆိုင်ရာအကူအညီများကို အမေရိကန်က တိုက်ရိုက်ထောက်ပံ့ခြင်းအစီအစဉ်နဲ့ပတ်သက်ပြီး လွှတ်တော်ကော်မတီက ဗုဒ္ဓဟူးနေ့(စက်တင်ဘာ ၁၄ ရက်)မှာ ပထမဆုံးခြေလှမ်းစတင်လိုက်ပါတယ်။

တရုတ်နဲ့တင်းမာမှု မြင့်တက်နေတဲ့ကြားက ထိုင်ဝမ်ကို အကူအညီများထပ်တိုးထောက်ပံ့နေကာ ထိုင်ဝမ်နဲ့ဆက်ဆံရေးကို ပိုမိုပြီးတရားဝင်ဖြစ်လာအောင် အမေရိကန်က ကြိုးပမ်းနေတာဖြစ်ပါတယ်။

အမေရိကန်ဟာ ဆယ်စုနှစ်တွေတိုင်အောင် ထိုင်ဝမ်ကို လက်နက်တွေရောင်းချနေခဲ့ပါတယ်။

ဒါပေမဲ့ ဥပဒေအသစ်အရ ၄ နှစ်အတွင်း အမေရိကန်လုံခြုံ‌ရေးထောက်ပံ့မှုအတွက် ဒေါ်လာ ၄.၅ ဘီလီယံ ထပ်မံပေးအပ်သွားမည်ဖြစ်ရာ တရုတ်အတွက်တော့ အမျက်ထွက်စရာဖြစ်မှာ သေချာပါတယ်။

ဒါ့အပြင် ထိုင်ဝမ်ကျွန်းကို တရုတ်ကအင်အားသုံးကျူးကျော်ပါက အရေးယူပိတ်ဆိုမှုတွေချမှတ်ဖိုအစီအစဉ်တွေလည်း ပါဝင်နေပါတယ်။

အကျယ်ပြန့်ဆုံး ဆက်ဆံရေးမြှင့်တင်မှုအဖြစ် ထိုင်ဝမ်မူဝါဒဥပဒေကို အထက်လွှတ်တော်နိုင်ငံခြားဆက်ဆံရေးကော်မတီက အတည်ပြုလိုက်ပါတယ်။

ယူကရိန်းကို ရုရှားကျူးကျော်ခြင်းကိစ္စအပြင် အောက်လွှတ်တော်ဥက္ကဌ'နန်စီပယ်လိုစီ' ထိုင်ဝမ်သို့လာရောက်ခြင်းတို့ကြောင့် တရုတ်က စစ်ရေးလေ့ကျင့်မှုများ ပြုလုပ်ခဲ့ပြီးနောက် ထိုင်ဝမ်အတွက် စိုးရိမ်မှုမြင့်တက်နေတဲ့အချိန်မှာ လွှတ်တော်အမတ်တွေက အခုလိုအတည်ပြုလိုက်တာဖြစ်ပါတယ်။

ကော်မတီကိုဦးဆောင်နေတဲ့ ဘိုင်ဒန်ရဲ့ ဒီမိုကရက်တစ်ပါတီမှ လွှတ်တော်အမတ်'ဘော့မီနန်ဒက်ဇ်'က အမေရိကန်ဟာ စစ်ပွဲဖြစ်လာအောင် ကြံစည်နေတာမဟုတ်သလို တရုတ်နဲ့လည်း တင်းမာအောင်ဖန်တီးနေတာမဟုတ်ကြောင်း၊ အားလုံးကို ရှင်းရှင်းလင်းလင်းမြင်သင့်ကြောင်း ပြောကြားလိုက်ပါတယ်။

"ထိုင်ဝမ်ရင်ဆိုင်နေရတဲ့ ခြိမ်းခြောက်မှုအန္တရာယ်ကို လျော့ကျအောင် ဗျူဟာကျကျလုပ်ဆောင်နေတာပါ၊ ထိုင်ဝမ်ကိုကျူးကျော်ဖို့ တရုတ်ဘက်က ဘယ်လောက်ရင်းရနိုင်လဲ ဘယ်လောက်အထိ စွန့်စားရာကျပြီး အောင်မြင်နိုင်ချေနည်းလဲဆိုတာကို မြင်သာအောင် ပြုလုပ်နေပါတယ်"လို့ ပြောပြသွားပါတယ်။

ကော်မတီထဲမှ ထိပ်သီးရီပတ်ဘလစ်ကန် လွှတ်တော်အမတ်'ဂျင်မ်ရစ်ချ်'ကလည်း သိပ်နောက်မကျခင် ထိုင်ဝမ်ရဲ့ကိုယ်ပိုင်ကာကွယ်ရေးကို အင်အားတောင့်တင်းအောင် ဆောင်ရွက်သင့်ကြောင်း ဆိုပါတယ်။

ဒီဥပဒေကြမ်းဟာ အထက်လွှတ်တော်နဲ့ အောက်လွှတ်တော်တစ်ခုလုံး အသိအမှတ်ပြုရဦးမှာဖြစ်သလို သမ္မတ'ဂျိုးဘိုင်ဒန်'က လက်မှတ်ထိုးပေးမှာလားဆိုတာ မသိရသေးပါဘူး။

ဒါပေမဲ့ ဥပဒေကြမ်းကို ထောက်ခံမှုမြင့်မားတာကြောင့် အာဏာသုံးငြင်းပယ်မယ်ဆိုရင်တောင် ကွန်ဂရက်လွှတ်တော်က ကျော်လွှားသွားနိုင်တဲ့ သဘောလည်းရှိနေပါတယ်။

အိမ်ဖြူတော်သတင်းစာရှင်းလင်းပွဲဝန်ကြီး'ကာရင်ဂျင်းပီယာရဲလ်'က ဥပဒေကြမ်းနဲ့ပတ်သက်ပြီး အစိုးရအဖွဲ့နဲ့ လွှတ်တော်အမတ်များ ပြောဆိုလျက်ရှိကြောင်း၊ ထိုင်ဝမ်အရေးအတွက် ပါတီနှစ်ဖွဲ့စလုံးက ထောက်ခံနေကြတာကို ဝမ်းသာမိကြောင်း ပြောကြားသွားပါတယ်။

Source: CNA
#Yangon_Media_Group