#Local_News
Published_29 August 2022

အင်းလျားကန်အတွင်းသို့ ယနေ့ သြဂုတ်လ ၂၉ ရက်မွန်းလွဲ ၂ နာရီကျော်အချိန် လူတစ်ဦးခုန်ချသွား၍ ကမာရွတ်မြို့နယ်မီးသတ်စခန်းမှ မီးသတ်ယာဉ်(၁)စီး၊ ရှာဖွေကယ်ဆယ်ရေးတပ်ဖွဲ့ဝင်များဖြင့် ကယ်ဆယ်ရေးလုပ်ငန်းများ ဆောင်ရွက်လျက်ရှိကြောင်း သိရသည်။

"အခုထိ မတွေ့သေးပါဘူးခင်ဗျ"ဟု ရန်ကုန်တိုင်း ဒေသကြီး မီးသတ် ဦးစီးဌာန၏ အရာထမ်းတစ်ဦးက ပြောသည်။

ပဲခူးတိုင်းဒေသကြီး ပြည်မြို့တွင်လည်း သြဂုတ်လ ၂၈ ရက် ညနေ ၃ နာရီခန့် အသက် ၂၄ နှစ်အရွယ် အမျိုးသမီးက သူ၏ ၃ နှစ် သမီးငယ်အား ချီကာ နဝဒေး တံတားပေါ်က ခုန်ချသွား၍ လက်ရှိအချိန်ထိ ရှာဖွေနေဆဲ ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published-29 August 2022

ပြင်ပရွှေဈေးကွက်တွင် ရွှေတစ်ကျပ်သားလျှင် ကျပ်သိန်း ၃၀ ခန့်ထိဈေးနှုန်းမြင့်တက်လာကြောင်း ရန်ကုန်ရွှေဈေးကွက်အသင်းမှ သိရသည်။

ရန်ကုန်တိုင်းဒေသကြီးရွှေလုပ်ငန်းရှင်များအသင်းမှ သတ်မှတ်ထားသည့် ရည်ညွှန်းဈေးမှာ ရွှေတစ်ကျပ်သား သိန်း ၂,၀၂၇,၀၀၀ ထုတ်ပြန်ထားသော်လည်း ပြင်ပပေါက်ဈေးသည် ရွှေတစ်ကျပ်သားလျှင် သိန်း ၃၀ ခန့်ထိဈေးနှုန်းမြင့်တက်နေခြင်းဖြစ်သည်။

မြန်မာကျပ်ငွေတန်ဖိုးကျဆင်းလာခြင်းကြောင့် ခိုင်မာမှုရှိသည့် အိမ်ခြံမြေ၊ ကားနှင့် ရွှေဘက်တွင် ရင်းနှီးမြှုပ်နှံမှုစိတ်ဝင်စားခြင်းကြောင့် ရွှေဈေးနှုန်းမှာ ဆက်တိုက်မြင့်တက်လာခြင်းဖြစ်ကြောင်း သိရသည်။

လက်ရှိတွင် ရွှေဈေးနှုန်းမှာ မြင့်တက်နေသော်လည်း အရောင်းအဝယ်မှာ အေးနေပြီး တစ်ဦးချင်းအရောင်းအဝယ်လုပ်နေသည့် ဈေးကွက်တွင်လည်း ဒေါ်လာငွေလဲနှုန်းသည် ကျပ် ၃,၁၀၀ ဝန်းကျင် ပေါက်ဈေးရှိနေကြောင်း သိရသည်။

ပြီးခဲ့သည့် သြဂုတ် ၂၇ ရက်တွင် ရွှေနှင့်ငွေကြေးဈေးကွက်စောင့်ကြည့်ထိန်းသိမ်းကြပ်မတ်ရေးကော်မတီက ရွှေလုပ်ငန်းရှင်များနှင့် နေပြည်တော်တွင် အစည်းအဝေးပြုလုပ်ခဲ့ပြီး အစည်းအဝေးဆုံးဖြတ်ချက်မသိသေးသည့်အတွက် ဖြေကြားခြင်း မပြုနိုင်သေးကြောင်း ရန်ကုန်တိုင်းရွှေလုပ်ငန်းရှင်များအသင်းဥက္ကဋ္ဌ ဦးမျိုးမြင့်က YMG ကို ပြောသည်။

#Ymg/STH
#Yangon_Media_Group

#Local_News
Published_29 August 2022

ဒူဘိုင်းတွင် ဒုက္ခရောက်နေသည့် မြန်မာအမျိုးသမီး (၈)ဦး လွတ်မြောက်အောင် ရီရတ်ဒ်မြို့ရှိ မြန်မာသံရုံးကကူညီဆောင်ရွက်ပေးလျက်ရှိကြောင်း ရီရတ်ဒ်မြို့ရှိ မြန်မာသံရုံးက ထုတ်ပြန်လိုက်သည်၊၊

Facebook လူမှုကွန်ရက်ပေါ်မှာ Khaing Lay အကောင့်ဖြင့် ဒူဘိုင်းတွင် မြန်မာအမျိုးသမီး (၈)ဦး ဒုက္ခရောက်နေ၍ အကူအညီတောင်းခံသည့် ဗီဒီယိုကို သြဂုတ်လ(၂၅)က ထုတ်လွှင့်ခဲ့သည့်အတွက် ကာယကံရှင်အမျိုးသမီးများကို ရီရတ်ဒ်မြို့ရှိ မြန်မာသံရုံးအနေဖြင့် ဒူဘိုင်းမြို့သို့ ဆက်သွယ်မေးမြန်းပြီး ပွဲစားဆိုသူနှင့်ကာယကံရှင်များအကြား သြဂုတ်လ(၂၆)ရက်တွင် ညှိနှိုင်းမှုများဆောင်ရွက်ပေးခဲ့သည်ဟု ထုတ်ပြန်ချက်တွင် ဖော်ပြပါရှိသည်၊၊

မြန်မာသံရုံး၏ ညှိနှိုင်းမှုကြောင့် နိုင်ငံကူးလက်မှတ်များကို ကာယကံရှင်များထံ ပြန်လည်ပေးအပ်၍ မြန်မာနိုင်ငံကို အမြန်ဆုံးထွက်ခွာနိုင်ရေးအတွက်စီစဉ်ဆောင်ရွက်ရေး ညှိနှိုင်းရရှိနိုင်ခဲ့သည်ဟုဆိုသည်၊၊

ယင်းသို့စီစဉ်ဆောင်ရွက်နေစဉ် ပွဲစားဆိုသူနှင့် ကာယကံရှင်အမျိုးသမီး(၈)ဦးတို့၏ လုံခြုံရေးနှင့် မလိုလားအပ်သောပြဿနာများ မဖြစ်ပွားစေရန်နှင့် စစ်ဆေးမေးမြန်းမှု ပြုလုပ်နိုင်ရန် ယူအေအီး CIDမှတာဝန်ရှိသူများကသြဂုတ်(၂၇)တွင် ၎င်းတို့နေထိုင်ရာနေရာများမှ ဒူဘိုင်းမြို့ CIDဌာနချုပ်သို့ ခေတ္တပို့ဆောင်ထားသည်ဟုဆိုသည်၊၊

၎င်းတို့ကိုယူအေအီးနိုင်ငံ၏ ဥပဒေနဲ့အညီ လူဝင်မှုကြီးကြပ်ရေးနှင့် ရဲလုပ်ငန်းစဉ်အတိုင်း စစ်ဆေးဆောင်ရွက်ပြီးပါက ဥပဒေချိုးဖောက်မှု မရှိသူများကို ပြန်လည်လွှတ်ပေးမည်ကြောင်း ဖော်ပြပါရှိသည်၊၊

မြန်မာသံရုံးအနေနဲ့ ယူအေအီးနိုင်ငံမှတာဝန်ရှိသူများနှင့် အချိန်နှင့်တပြေးညီ ဆက်သွယ်ညှိနှိုင်းဆောင်ရွက်လျက်ရှိကြောင်းနှင့် ပြန်လည်လွတ်မြောက်လာသူများ မြန်မာနိုင်ငံကို အမြန်ဆုံးထွက်ခွာနိုင်ရေးအတွက် ဒူဘိုင်းမြို့ရှိ လူမှုကူညီရေးအဖွဲ့များဖြင့် ပူးပေါင်းဆောင်ရွက်လျက်ရှိကြောင်း ရီရတ်ဒ်မြို့ရှိ မြန်မာသံရုံးကထုတ်ပြန်ထားသည်၊၊

ymg/tthl
#Yangon_Media_Group

#Local_News
Published _ 29 August 2022

ပြည်ပကို ပဲမျိုးစုံ၊ ပြောင်းနှင့် နှမ်း တင်ပို့သူတွေအပေါ် ကန့်သတ်ထားမှုများထဲမှ ပို့ကုန် လိုင်စင်လျှောက်ထားရမည့် ကိစ္စကို နစကက ဖြေလျှော့ပေးလိုက်ပြီဖြစ်ကြောင်း မြန်မာနိုင်ငံ ပဲမျိုးစုံ၊ ပြောင်းနှင့် နှမ်းလုပ်ငန်းရှင်များ အသင်းမှ ထုတ်ပြန်ထားသည်။

ယင်းဖြေလျှော့ပေးမှုနှင့် ပတ်သက်သည့် သတင်းထုတ်ပြန်ချက်ကို မြန်မာနိုင်ငံ ပဲမျိုးစုံ၊ ပြောင်းနှင့် နှမ်းလုပ်ငန်းရှင်များ အသင်းက ဩဂုတ်လ ၂၇ ရက် ရက်စွဲဖြင့် ထုတ်ပြန်ကြေညာခဲ့ခြင်းဖြစ်သည်။

ယခင်က ပြည်ပသို့ ပဲမျိုးစုံ၊ ပြောင်း၊ နှမ်းနှင့် ဆီထွက် သီးနှံများ တင်ပို့ရာတွင် ပို့ကုန်လိုင်စင် လျောက်ထားရာတွင် မြန်မာနိုင်ငံ ပဲမျိုးစုံ၊ ပြောင်းနှင့် နှမ်းလုပ်ငန်းရှင်များ အသင်း၏ ထောက်ခံချက်ပါရှိမှသာ လိုင်စင်ထုတ်ပေးမည်ဟု ဩဂုတ်လ ၁ရက်တွင် စီးပွားကူးသန်းဝန် ကြီးဌာနက ညွှန်ကြားချက် ထုတ်ပြန်ထားခြင်းဖြစ်သည်။

ယခု အဆိုပါ ညွှန်ကြားချက်ပါ ထောက်ခံချက်ယူရမည် ကိစ္စအား လုပ်ဆောင်ရန်မလိုဘဲ လိုင်စင်လျှောက်ထားနိုင်ကြောင်း ပြန်လည်ဖြေလျှော့ပေးလာခြင်း ဖြစ်သည်။

အဆိုပါ ဖြေလျှော့ပေးမှုအရ ဩဂုတ်လ ၂၉ ရက်မှ စတင်ကာ ပို့ကုန်လိုင်စင်လျှောက် ထားသူများအနေဖြင့် အသင်း၏ ထောက်ခံစာရယူခြင်း မပြုဘဲ လုပ်ဆောင်နိုင်ကြောင်း သိရသည်။

ပြီးခဲ့သည့် ဇူလိုင်လအတွင်းက နစက လက်အောက်ခံ စီးပွားကူးသန်းဝန်ကြီးဌာက ပြည်ပသို့ နယ်စပ်ကုန်သွယ်ရေးစခန်းများမှ ပဲမျိုးစုံ၊ ပြောင်း၊ နှမ်းမြေပဲနဲ့ ဆီထွက်သီးနှံ တင်ပို့သူများအနေဖြင့် ပို့ကုန်ရငွေလိုင်စင်နှင့်အတူ ပို့ကုန်ရငွေ ဘဏ်အထောက်အထားပြနိုင်မှသာ တင်ပို့ခွင့်ပြုမည်ဖြစ်ကြောင်း ညွှန်ကြားထားသည်။

ယင်းအပြင် ပြည်ပသို့ နယ်စပ်ကုန်သွယ်ရေးစခန်းများမှ ပဲမျိုးစုံ၊ ပြောင်း၊ နှမ်းနှင့်ဆီထွက်သီးနှံ တင်ပို့သူများအနေဖြင့် ငွေပေးချေမှု လုပ်ဆောင်ရာတွင် ဒေါ်လာဖြင့်သာ ငွေပေးချေမှု လုပ်ဆောင်ရမည်ဖြစ်ပြီး ထိုပိုကုန်ရငွေများကို ဗဟိုဘဏ်၏ သတ်မှတ်ရည်ညွှန်းဈေးဖြင့် နစက အစိုးရလက် အောက်ခံ ဗဟိုဘဏ်ထံသို့ ပြန်လည်လဲလှယ်ရမည်ဟုလည်း ညွှန်ကြားထားခြင်းပင် ဖြစ်သည်။

ymg/NN
#Yangon_Media_Group

#World_Crime
Published 29 August 2022

အိန္ဒိယအမျိုးသမီး ၄ ဦးကို တက္ကဆပ်မှအမျိုးသမီးတစ်ဦးက လူမျိုးရေးခွဲခြားပြီး "အိန္ဒိယကို ပြန်ကြတော့"ဟု အော်ဟစ်နေခဲ့တဲ့ ဗီဒီယိုဟာ ဆိုရှယ်မီဒီယာတွေမှာ ပျံ့နှံသွားကာ အစိုးရအာဏာပိုင်များအထိ သိရှိခဲ့ပြီးနောက်မှ ထိုဗီဒီယိုထဲမှ လူမျိုးရေးခွဲခြားခဲ့တဲ့ အမျိုးသမီးကို တက္ကဆပ်ရဲအရာရှိများက ဖမ်းဆီးထိန်းသိမ်းလိုက်ပါတယ်။

"ဒီဖြစ်ရပ်က တက္ကဆပ်ဥပဒေများအရ လူမျိုးခွဲခြားရေးပြစ်မှုမြောက်ပါတယ်၊ ဒါ့အပြင် အစိုးရဥပဒေနဲ့လည်း ငြိစွန်းနေနိုင်တာကြောင့် အက်ဖ်ဘီအိုင်၊ တရားမျှတမှုလူ့အခွင့်အရေးဆိုင်ရာဌာနတို့နဲ့ ပူးပေါင်းလုပ်ဆောင်လျက်ရှိပါတယ်"လို့ တက္ကဆပ် ပလေနိုမှရဲအရာရှိက စနေနေ့က ထုတ်ဖော်ပြောကြားခဲ့ပါတယ်။

ဒီဗီဒီယိုအဖြစ်အပျက်ထဲမှာတော့ ကားပါကင်တစ်နေရာမှာ အမေရိကန်အမျိုးသမီးတစ်ဦးက အိန္ဒိယလူမျိုးအမျိုးသမီး ၄ ဦးကို လူမျိုးရေးခွဲခြားတဲ့ အသုံးအနှုန်းများဖြင့် အော်ဟစ်ခဲ့ပြီး ကိုယ်ထိလက်ရောက်ပြုလုပ်ခဲ့ပုံများ ရိုက်ကူးမိခဲ့ပြီး ဆိုရှယ်မီဒီယာပေါ်မှာ တင်ခဲ့ရာမှာတော့ ကြည့်ရှုသူအရေအတွက် သန်းနဲ့ချီသွားခဲ့ပါတယ်။

ဗီဒီယိုထဲမှာ "အိန္ဒိယကိုပြန်သွားကြ၊ နင်တို့ကို ဒီမှာမရှိစေချင်ဘူး၊ နင်တို့အိန္ဒိယတွေကို အရမ်းမုန်းတယ်"လို့ အမျိုးသမီးက အော်ဟစ်နေခဲ့ကာ မက္ကဆီကို-အမေရိကန်လူမျိုးဖြစ်ကြောင်း သိရှိခဲ့ရပါတယ်။

ဗုဒ္ဓဟူးနေ့ကဖြစ်ခဲ့တဲ့ ဒီအဖြစ်အပျက်ဗီဒီယိုက အိန္ဒိယနဲ့ အမေရိကန်တို့ကြား ဆိုရှယ်မီဒီယာတွေမှာ လျင်မြန်စွာပျံ့နှံသွားခဲ့ပြီး ကြာသပတေးနေ့မှာ ဖမ်းဆီးခဲ့တာဖြစ်ပါတယ်။

'အက်စ်မာရယ်လ်ဒါအက်ပ်တန်'လို အမည်ရတဲ့ အမျိုးသမီးကို ကိုယ်ထိလက်ရောက်ကျူးလွန်မှု၊ အကြမ်းဖက်ခြိမ်းခြောက်မှုတို့ဖြင့် ဖမ်းဆီးခဲ့ကာ ဒေါ်လာ ၁ သောင်း ဒဏ်ကြေးဆောင်ရန် သတ်မှတ်ခဲ့ပါတယ်။

အိန္ဒိယအမျိုးသမီး ၄ ဦးထဲက 'ရာနီဘာနာဂျီ'က သူငယ်ချင်း ၃ ဦးနဲ့အတူ စားသောက်ဆိုင်တစ်ခုမှာ ညစာစားပြီးထွက်လာစဉ် ကားပါကင်တစ်နေရာမှာ အမေရိကန်အမျိုးသမီးနဲ့ ထိပ်တိုက်တွေ့ခဲ့တာဖြစ်တယ်လို့ ထွက်ဆိုထားပါတယ်။

"ရုတ်တရက် အဲဒီအမျိုးသမီးက ကျွန်မတို့ကိုလှမ်းအော်ပြီး ကျွန်မတို့ဆီကို လျှောက်လာပါတယ်၊ လူမျိုးရေးခွဲခြားတဲ့ စကားလုံးတွေပြောပြီး လက်ပါပါလာတော့ ထိတ်လန့်သွားရပါတယ်" လို့ 'ဘာနာဂျီ'က ABC News ကို ပြောပြခဲ့ပါတယ်။

'ဘာနာဂျီ'ကပဲ ထိုအဖြစ်အပျက်ကို ဗီဒီယိုမှတ်တမ်းရိုက်ကူးခဲ့တာဖြစ်ပါတယ်။

ဗီဒီယိုထဲမှာ 'အက်ပ်တန်'က အိန္ဒိယတွေကို လက်နဲ့ရိုက်ခဲ့တဲ့အဖြစ်လည်း ပါဝင်ပါတယ်။

"ကြောက်စရာကောင်းတာက သူကနီးနီးကပ်ကပ်ရောက်လာပြီးတော့ နှုတ်နဲ့တင်စော်ကားတာမဟုတ်ဘဲ လက်ပါ ပါခဲ့တာဖြစ်ပါတယ်"လို့ ဆိုပါတယ်။

'အက်ပ်တန်'ဘက်က ကိုယ်စားလှယ်ကတော့ မှတ်ချက်ပြုပြောကြားပေးဖို့ ရှိမနေခဲ့ပါဘူး။

Source: Reuters
#Yangon_Media_Group

#World_Science
Published 29 August 2022

လူတွေဟာ ဆွဲဆောင်မှုရှိပြီး ကြည့်ကောင်းတဲ့လူတွေကို ကိုယ်ရည်ကိုယ်သွေးကောင်းရှိမယ်လို့ ခန့်မှန်းယူဆတတ်ကြကြောင်း လေ့လာမှုအသစ်တစ်ခုမှာ ဖော်ပြထားပါတယ်။

သုတေသီတွေက အပြင်ပန်းဆွဲဆောင်မှုအမြင်ကိုကြည့်ပြီး လူတွေအကြောင်း ခန့်မှန်းခြင်းကိုလေ့လာဖို့အတွက် နိုင်ငံပေါင်း ၄၅ နိုင်ငံမှ စမ်းသပ်ပါဝင်မယ့်သူ ၁၁,၀၀၀ ကို လူတွေရဲ့ဓာတ်ပုံများပြသခဲ့ပါတယ်။

ဓာတ်ပုံထဲမှာ ကြည့်ကောင်းပြီး ဆွဲဆောင်မှုရှိပုံပေါ်တဲ့သူလူတွေဟာ ထူးချွန်ထက်မြက်ပြီး ယုံကြည်အားကိုးနိုင်တယ်လို့ စမ်းသပ်ခံသူတွေက မှတ်ယူလိုက်ကြကြောင်း တွေ့ရှိခဲ့ရပါတယ်။

ဓာတ်ပုံထဲက ဆွဲဆောင်မှုမရှိတဲ့လူတွေကိုတော့ မကောင်းတဲ့အမြင်တွေ မှတ်ချက်ပေးခဲ့ကြပါတယ်။

ဒီလိုမျိုး ကြည့်ကောင်းတဲ့သူတွေကို အလိုလိုနေရင်း လူကောင်းလို့ထင်နေတာက တကယ့်လက်တွေ့မှာ အန္တရာယ်များတဲ့အယူအဆဖြစ်ကြောင်း သုတေသီများက သတိပေးလိုက်ပါတယ်။

အရင်လေ့လာမှုတွေအရလည်း တရားသူကြီးတွေဟာ ဆွဲဆောင်မှုရှိပြီး ပုံပန်းသဏ္ဍာန်ကြည့်ကောင်းတဲ့ တရားခံတွေကို အပြစ်လျှော့ပေါ့ပေးလေ့ရှိပါတယ်။

လန်ကက်စတာမှ စိတ်ကျန်းမာရေးဆရာဝန်'ကာလိုတာဘာတရက်စ်'က အပြင်ပန်းသဏ္ဍာန်က တရားမျှတမှုကို ဖုံးလွှမ်းသွားတယ်လို့ မှတ်ချက်ပြုလိုက်ပါတယ်။

လူတွေက မျက်နှာမြင်ပြီး ၁၀၀ မီလီစက္ကန့်အတွင်းမှာပဲ ထင်မြင်ချက်ချတတ်ကြကြောင်း တွေ့ရှိထားပါတယ်။

အပြင်ပန်းအရ ဆွဲဆောင်မှုရှိတဲ့လူတွေကို ကိုယ်ရည်ကိုယ်သွေးကောင်းမွန်တဲ့သူတွေလို့ ထင်မှတ်တတ်ကြပါတယ်။

စမ်းသပ်ခံမယ့်သူတွေကို ကမ္ဘာ့နေရာအနှံအပြားရှိ ၄၅ နိုင်ငံမှ ခေါ်ယူစုဆောင်းခဲ့ပါတယ်။

သူတို့ကို အမေရိကန်ပြည်ရှိ လူမည်း၊ လက်တင်လူမျိုး၊ လူဖြူ၊ အာရှလူမျိုး စတဲ့ အမျိုးသား အမျိုးသမီးတွေရဲ့ ဓာတ်ပုံတွေကို ပြသခဲ့တာဖြစ်ပါတယ်။

စမ်းသပ်ခံတစ်ဦးချင်းစီက ဓာတ်ပုံ ၁၂၀ လောက်ကို အမြင်တစ်မျိုးတည်းနဲ့ ခွဲခြားခဲ့ပါတယ်။

အဲဒါကတော့ ဆွဲဆောင်မှုရှိ/မရှိကို ကြည့်ပြီး ခွဲခြားသွားတာဖြစ်ပါတယ်။

ကြည့်ကောင်းတဲ့ အမျိုးသား အမျိုးသမီးတွေရဲ့မျက်နှာကိုကြည့်ပြီး ယုံကြည်ချက်ရှိခြင်း၊ တည်ငြိမ်ခြင်း၊ ဉာဏ်ရည်ထက်မြတ်ခြင်း၊ တာဝန်သိခြင်း၊ လူမှုရေးကောင်းမွန်ခြင်း၊ ယုံကြည်လောက်ဖွယ်ရှိခြင်း စတဲ့အချက်များ ပိုင်ဆိုင်မယ်လို့ မှတ်ချက်ပေးခဲ့ကြပါတယ်။

ခြုံပြောရရင်တော့ ရုပ်ရည်ကြည့်ကောင်းတဲ့သူတွေကို လူကောင်းသူကောင်းဖြစ်မယ်လို့ လူတွေက ယူဆချင်တဲ့သဘောဖြစ်ပါတယ်။

Source: Daily Mail
#Yangon_Media_Group

#World_Health
Published 29 August 2022

သတင်းအကြောင်းအရာတွေကို အလွန်အမင်း အာရုံစိုက်ဖတ်ရှုနေသူတွေဟာ ရုပ်ပိုင်းဆိုင်ရာရော စိတ်ပိုင်းဆိုင်ရာမှာပါ ထိခိုက်စေနိုင်တယ်လို့ Health Communication ဂျာနယ်မှာ ဗုဒ္ဓဟူးနေ့က ဖော်ပြခဲ့ပါတယ်။

အင်တာနက်၊ ဂိမ်း၊ စမတ်ဖုန်းတို့ကို စွဲလမ်းခြင်းက ကျန်းမာရေးထိခိုက်နိုင်ကြောင်း အခိုင်အမာတွေ့ရှိထားသကဲ့သို့ စစ်ပွဲသတင်းများ၊ ဝမ်းနည်းဖွယ်ဖြစ်ရပ်သတင်းများ၊ ရောဂါကပ်ဆိုးသတင်းများကို အစဉ်တစိုက်ဖတ်ရှုနေတာကလည်း ပြဿနာတစ်ရပ်ဖြစ်လာနိုင်ပြီး ကျန်းမာရေးကို ထိခိုက်စေတယ်လို့ သိပ္ပံပညာရှင်များက ဖော်ညွှန်းထားကြပါတယ်။

သတင်းအကြောင်းအရာတွေကို အာရုံစိုက်ဖတ်ရှုခြင်းဖြင့် လူအချို့မှာ အလွန်ခံစားမိလွယ်ပြီး ကမ္ဘာကြီးကို အန္တရာယ်တွင်းကြီးအဖြစ် ထင်မှတ်လာစေကြောင်း တက္ကဆပ်နည်းပညာတက္ကသိုလ်ကောလိပ်မှ တွဲဖက်ပရော်ဖက်ဆာ'ဘရိုင်ယန်မက်လက်ဖ်လင်'က ဖော်ပြခဲ့ပါတယ်။

လူအချို့က သတင်းတွေကို စွဲစွဲလမ်းလမ်းဖတ်ရှုပြီး သူတို့စိတ်ခံစားချက် ပြေပျောက်စေဖို့ သတင်းအသစ်တွေကို အမြဲရှာဖွေနေကြောင်း၊ ဒါပေမဲ့ သတင်းတွေ ပိုသိလာလေ အခြားသူတွေရဲ့ဘဝကို နှောင့်ယှက်လာလေဖြစ်ကြောင်း ဆိုပါတယ်။

သတင်းကြည့်ခြင်းက စိုးရိမ်ပူပန်စိတ်တွေ ပြေပျောက်မယ်လို့ ထင်ထားကြပေမယ့် သတင်းမကြည့်ရမနေနိုင်လောက်အောင် စွဲလမ်းသွားတတ်ပါတယ်။

အမေရိကန်မှ အရွယ်ရောက်ပြီးသူ ၁,၁၀၀ ခန့်ကို မေးမြန်းခဲ့ရာမှာ သတင်းကို စိတ်ဝင်စားသွားရင် ပတ်ဝန်းကျင်ကိုမေ့သွားကြောင်း၊ သတင်းဖတ်နေတဲ့အတွက် ကျန်တဲ့အရာတွေကို မပြုလုပ်မိတော့ကြောင်း လက်ခံခဲ့ကြပါတယ်။

ကျန်းမာရေးအပိုင်းကိုလည်း လေ့လာသုံးသပ်ရာမှာ သတင်းစွဲလမ်းသူတွေက ပုံမှန်သာသတင်းကြည့်တဲ့သူတွေထက် စိတ်ပိုင်းဆိုင်ရာနဲ့ ရုပ်ပိုင်းဆိုင်ရာ နာမကျန်းရောဂါများဖြစ်နိုင်ချေ ၂၇.၃ ရာခိုင်နှုန်း ပိုများနေပါတယ်။

ဒါကြောင့် နာမကျန်းဖြစ်ခြင်းတရားခံက သတင်းမဟုတ်ဘဲ သတင်းစွဲလမ်းမိခြင်းကြောင့်သာ ဖြစ်တယ်လို့ ထောက်ပြထားပါတယ်။

သတင်းစွဲလမ်းခြင်းကြောင့် မကျန်းမာလာရတာကို သိလာတဲ့လူတွေအနေနဲ့ သတင်းမဖတ်ဘဲနေလိုက်ပြန်လို့လည်း သက်သာလာမှာ မဟုတ်ပါဘူး။

အရေးကြီးသတင်းတွေ လွတ်သွားပြီလားလို့ စိုးရိမ်ပူပန်လာရပြီး နိုင်ငံကြီးသားမပီသတဲ့သူအဖြစ် ထင်မှတ်နေစေပါတယ်။

အဲဒီအစား အခြားကိစ္စတွေကို အာရုံပြောင်းသွားအောင်လုပ်ဆောင်တာက ပိုပြီးထိရောက်နိုင်ပါတယ်။

ဒီလိုမျိုးဖြစ်နေရတာတွေအတွက် စီးပွားရေးအရရော နည်းပညာအရပါ အသုံးချလာကြတဲ့ သတင်းမီဒီယာတွေမှာ အဓိကတာဝန်ရှိတယ်လို့ ယူဆနေကြပါတယ်။

သတင်းစွဲလမ်းတဲ့ပြဿနာကို ဖြေရှင်းဖို့ လေ့လာစရာများစွာကျန်နေသေးပြီး ဒီလေ့လာချက်ကလည်း သတင်းရဲ့သက်ရောက်မှုတွေကို သိရှိနားလည်လာစေမှာဖြစ်တယ်လို့ သုံးသပ်ပြထားပါတယ်။

Source: The Jerusalem Post
#Yangon_Media_Group

#Local_News
Published_29 August 2022

ရခိုင်ပြည်နယ် စစ်တွေမြို့တွင် အိန္ဒိယ-မြန်မာ ချစ်ကြည်ရေး အစီအစဉ် အရ အိန္ဒိယနိုင်ငံမှ အကောင်အထည်ဖော်နေသည့် ကုလားတန်ဘက်စုံစီမံကိန်း (Kaladan Multi Transit Transport) မှာ ပြီးစီးနေပြီဖြစ်၍ မကြာမီလည်ပတ်တော့မည်ဟု အိန္ဒိကောင်စစ်ဝန်ချုပ် Mr.Bibekananda Bhattamishra က ပြောကြားလိုက်သည်။

သြဂုတ်လ (၂၇) ရက်က ရခိုင်ပြည်နယ်ကုန်သည်များနှင့် စက်မှုလက်မှုလုပ်ငန်းရှင်များအသင်းနှင့် စစ်တွေမြို့ရှိ Royal Sittwe Resort ၌ တွေ့ဆုံစဉ် ယင်းကအထက်ပါအတိုင်း ပြောကြားလိုက်ခြင်း ဖြစ်ကြောင်း ရခိုင်ပြည်နယ် ကုန်သည်များနှင့် စက်မှုလက်မှုလုပ်ငန်းရှင်များအသင်း တာဝန်ရှိသူကပြောသည်။

ယင်းတွင် တန်ချိန် ၅၀၀၀-၆၀၀၀ သင်္ဘောများ ဆိုက်ကပ်နိုင်တော့မည် ဖြစ်ကြောင်းနှင့် ဆိပ်ကမ်းစတင်လည်ပတ်နိုင်ရေး လုပ်ငန်းရှင်များ၏ ပူးပေါင်းဆောင်ရွက်မှုများကို လက်ခံကြိုဆိုပါကြောင်း၊ အလုပ်အကိုင်အခွင့်အလမ်းများ ဖန်တီးပေးရေး၊ ကုန်သွယ်မှု လုပ်ငန်းစဉ် များ လွယ်ကူစွာဖြင့် စနစ်တကျ ဖွံ့ဖြိုးပါဝင်လာစေရေးနှင့် သတင်းအချက်အလက်များ ကျယ်ပြန့်စွာ အပြန်အလှန်မျှဝေ သိရှိနိုင်ရေး အတွက် RSCCI နှင့် လက်တွဲဆောင်ရွက်သွားမည်ဖြစ်ကြောင်း Mr.Bibekananda Bhattamishra က ပြောကြားခဲ့ခြင်း ဖြစ်သည်။

ymg/mt
#Yangon_Media_Group

#Local_News
Published_29 August 2022

ရန်ကုန်-မန္တလေး အမြန်လမ်းမကြီးမိုင်တိုင်အမှတ်(၂၁/၆-၇) ကြားတွင် သြဂုတ်လ ၂၈ ရက် ညနေပိုင်းက Karry yoyo(အမျိုးစား)အိမ်စီးကားနှင့်မော်တော်ဆိုင်ကယ်တို တိုက်မိ၍ တစ်ဦးသေဆုံးကာ တစ်ဦးဒဏ်ရာ ရရှိခဲ့ကြောင်း အမြန်လမ်းမကြီး ရဲတပ်ဖွဲ့က သိရသည်။

ဆိုင်ကယ်မှာ လမ်းဖြတ်ကူး‌မောင်းနှင်လာခြင်းဖြစ်သောကြောင့် တိုက်မိခြင်းဖြစ်ပြီး ဆိုင်ကယ်ပေါ်မှ နှစ်ဦးအနက် တစ်ဦးသေဆုံးကာ တစ်ဦး ဒဏ်ရာ ရခြင်း ဖြစ်ကြောင်း သိရသည်။

အခင်းဖြစ်ပွားရာနေရာသို့ ဘောနတ်ကြီးအမြန်လမ်းနယ်မြေမီးသတ်စခန်းမှ တပ်ဖွဲ့ဝင်များ၊‌ ဘောနတ်ကြီးအမြန်လမ်းမကြီးရဲစခန်းမှတပ်ဖွဲ့ဝင်များ သွားရောက်ကူညီကယ်ဆယ်ရေးများ ဆောင်ရွက်ခဲ့ကြကြောင်း၊
ဒဏ်ရာရရှိသူအား EMS 192 သူနာတင်ယာဉ်ဖြင့် ပဲခူးပြည်သူ့ဆေးရုံသို့ ပို့ဆောင်ထားကြောင်းလည်း သိရသည်။

ymg/mt
#Yangon_Media_Group

#LocalNews
Published_29 August 2022

အများသိ တေးသီချင်းများ ဖြစ်သော " နှစ်ကိုယ်တူချစ်သမျှ၊ ချစ်အာရုံ၊ပန်းမျိုးတရာ၊ နှုတ်ခွန်းဆက်သင်္ကြန်၊ ချစ်သူနဲ့သာဆိုပါရင်၊ ချစ်ကမ္ဘာထဲ နှစ်ယောက်တည်း၊ မောင်မယ်တိုနှစ်ဦး၊ မခွဲတမ်းကြင်မယ် " စသည့် တေးသီချင်းများကို ရေးစပ်သီကုံးခဲ့သည့် နာမည်ကြီး တေးရေးဆရာကြီး မြို့မ ကိုပေါ ကွယ်လွန်ခဲ့ပြီဖြစ်ကြောင်း သိရသည်။

သြဂုတ်လ ၂၈ ရက် ညသန်းခေါင်အချိန် မန္တလေးမြို့ ပုလင်းဝင်းရပ်ရှိ သူ၏ နေအိမ်၌ ကွယ်လွန်ခဲ့ခြင်းဖြစ်ပြီး အသက် ၉၅ နှစ်အရွယ်ရှိပြီဖြစ်ကြောင်း သိရသည်။

ယခုသြဂုတ်လ လဆန်ပိုင်းက ၎င်း၏နေအိမ်၌ စန္ဒယားတီး၍ ပြန်အထတွင် လဲကျခဲ့ပြီး ပေါင်ရင်းမှ ကျိုးသွားသောကြောင့် ဆေးဝါးကုသခံယနေရသူလည်းဖြစ်ကြောင်းနှင့် နှလုံးရောဂါအခံလည်းရှိကြောင်း သိရသည်။

ဂီတပညာရှင်မြို့မ ကိုပေါအား မြန်မာသက္ကရာဇ် ၁၂၈၉ တွင် အဖ ဦးပေါ်နှင့် အမိ ဒေါ်လှ တို့က မန္တလေး၊ ဒါးတန်းရပ်၌ မွေးဖွားခဲ့သည်။ သူ၏အမည်ရင်းမှာ ဦးကျော်စိုးဖြစ်ပြီးအသက်၂၄နှစ်အရွယ်တွင် မန္တလေးမြို့မှ နာမည်ကျော် မြို့မတူရိယာအသင်း၌ ဆက်ဆိုဖုန်း မှုတ်သူအဖြစ် ဂီတလောကသို့ စတင်ဝင်ရောက်ခဲ့သူဖြစ်သည်။

၁၉၄၉ ခုနှစ် တွင် သီချင်းများ စတင်ရေးခဲ့ပြီး မန္တလေးရုပ်ရှင်တွင် ကင်မရာဆရာအဖြစ် လုပ်ကိုင်ခဲ့ကာ ၁၉၆၁ ခုနှစ်အတွက် “ကိုယ်ပိုင်မေတ္တာ” ဇာတ်ကား၌ ရုပ်ရှင်ဓာတ်ပုံ ထူးချွန်ဆု အကယ်ဒမီကို ဦးလူကလေးနှင့်အတူ ပူးတွဲရရှိခဲ့သူလည်း ဖြစ်သည်။

၁၉၈၅ ခုနှစ်တွင် ရုံတင်ပြသခဲ့သော သင်္ကြန်မိုး ဇာတ်ကား၌ ဂီတမှူးအဖြစ်ဆောင်ရွက်ခဲ့သည့်အပြင် “နှစ်ကိုယ်တူချစ်သမျှ” သီချင်းကိုလည်းကောင်း၊၁၉၉၁ နှစ်က ရုံတင်ခဲ့သော ဒဏ္ဍာရီဇာတ်ကားအတွက် “အောင်စေမင်္ဂလာ” သီချင်းကိုလည်းကောင်း ရေးစပ်ပေးခဲ့ကြောင်းလည်း သိရသည်။

ymg/mt
#Yangon_Media_Group

Published 28 Aug 2022

ကမ္ဘာကြီးဟာ  စားနပ်ရိက္ခာ မရေရာမှုတွေ ယိုယွင်းလာမှုတွေနှင့်  လွန်ခဲ့တဲ့ သုံးနှစ်အတွင်း  ရင်ဆိုင်နေခဲ့ရတယ်လို့  ကုလသမဂ္ဂ စားနပ်ရိက္ခာအစီအစဉ်အဖွဲ့က သတိပေးလိုက်ပါတယ်။ စားနပ်ရိက္ခာ မလုံလောက်မှုတွေ အကြီးအကျယ် ရင်ဆိုင်နေရတဲ့ ကမ္ဘာ့လူဦးရေဟာ  လူဦးရေ ၃၄၅ သန်းအထိရှိလာပြီး ရာခိုင်နှုန်းအားဖြင့် ၁၅၀ ရာခိုင်နှုန်းတိုးလာတာ လို့ အဖွဲ့ကပြောပါတယ်။

ကိုဗစ်-၁၉ ကပ်ရောဂါ၊ ရာသီဥတုပြောင်းလဲခြင်းနှင့်ကမ္ဘာ့အကြီးဆုံး ဂျုံထုတ်လုပ်တင်ပို့တဲ့ ရုရှားနှင့်ယူကရိန်း ပဋိပက္ခတွေကြောင့် စားနပ်ရိက္ခာ မလုံခြုံ မရောရာမှုတွေဖြစ်နေပါတယ်။ ဂျုံတင်ပို့မှုကျဆင်းသွားတဲ့အတွက် ကမ္ဘာ့ဈေးနှုန်းတွကလည်း မြင့်တက်လာတယ်လို့ ကမ္ဘာ့စားနပ်ရိက္ခာအဖွဲ့ကပြောပါတယ်။

ကပ်ရောဂါဘေးမသင့်ခင် ၂၀၁၉ခုနှစ်မှာ လူဦးရေ ၁.၃၅ သန်းဟာ စားနပ်ရိက္ခာမလုံလောက်မှုနှင့်ရင်ဆိုင်ခဲ့ရပြီး  အရှေ့အလယ်ပိုင်းနှင့် မြောက်အာဖရိကတို့လို အားနည်းမှုတွေရှိနေတဲ့ ဒေသက ယီမင်လိုနိုင်ငံမျိုးတွေမှာ စားနပ်ရိက္ခာ မလုံခြုံမှု နာတာရှည်ခံစားနေကြရပါတယ်။

ကမ္ဘာ့လူဦးရေ ၈၂၈သန်းဟာ ညစဉ် ဆာလောင်မွတ်သိပ်စွာနှင့်ပဲ အိပ်ရာဝင်နေကြရပြီး နိုင်ငံပေါင်း ၄၅ နိုင်ငံမှ လူသန်း၅၀ခန့်ဟာ အငတ်ကပ်ဘေးရောက်လုနီးဖြစ်နေကြရတယ်လို့ ကမ္ဘာ့စားနပ်ရိက္ခာအဖွဲ့က သတင်းထုတ်ပြန်ထားပါတယ်။

Source: CCTV Plus

#World_Food_Programme

#Severe_food_shortage

#Russia_Ukraine_Crisis

#LocalNews
Published_28 August 2022

အမေရိကန် တစ်ဒေါ်လာလျှင် ၂၇၀၀ ကျပ် ၊ ရွှေတစ်ကျပ်သားကို သိန်းအစိတ်ဖြင့် ဈေးဖွင့်မည်ဆိုသည့်သတင်းများကို မယုံကြရန် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦးက သူ၏ လူမှုကွန်ရက် စာမျက်နှာတွင် ရေးသားထားသည်။

"ဒီရက်ပိုင်းတွေမှာ စီးပွားရေးနဲ့ ငွေကြေးဈေးကွက်အတွင်း သမားရိုးကျမဟုတ်တဲ့ လုပ်ဆောင်မှုတွေ ၊ လူထုကို ထင်ယောင်ထင်မှားဖြစ်စေမယ့် သတင်းမှားထုတ်လွှင့်မှုတွေ ခပ်စိတ်စိတ် တွေ့လာရပါတယ်၊ဒီနေ့တွေ့လိုက်ရတဲ့ လုပ်ကြံသတင်း၊သတင်းမှားတစ်ခုကို ပူးတွဲဖော်ပြပေးလိုက်ပါတယ်၊လုံးဝမှားယွင်းပြီး အခြေအမြစ်မရှိဘဲ လူထုကို ချောက်တွန်းတဲ့ သတင်းလို့ ပြောပြလိုပါတယ်၊ကုန်သွယ်မှုနဲ့ ပတ်သက်လာရင် ပိုမိုလွယ်ကူချောမွေ့လာစေဖို့ ကျွန်တော့ဝန်ကြီးဌာန ဝန်ထမ်းများက ကြိုးပမ်းဆောင်ရွက်သွားပါမယ်၊ကုန်သွယ်မှုနဲ့ ပတ်သက်ရင် အများပြည်သူ သိသင့်တဲ့ သတင်းမှန်များကို စီပွား/ကူးသန်း website နဲ့ Facebook ကနေ ပုံမှန်ထုတ်ပြန်ပေးပါမယ်၊ထပ်မံပြောကြားလိုတာကတော့ တရားဝင်ထုတ်ပြန်တာ မဟုတ်တဲ့ အခြေအမြစ်မရှိတဲ့ သတင်းတွေကို မယုံကြပါနဲ့ခင်ဗျား"ဟု ပြည်ထောင်စုဝန်ကြီးက ရေးသားထားခြင်း ဖြစ်သည်။

ပူးတွဲဖော်ပြထားသည့် သတင်းတွင် "အစည်းအဝေးဆုံးဖြတ်ချက်" ဟူသော ခေါင်းစဉ်ဖြင့် ရေးသားထားပြီး ယင်းတွင် "တရားမဝင်ဒေါ်လာရောင်းဝယ်ကစားသူများအား ဖမ်းဆီးရန်၊အမေရိကန် တစ်ဒေါ်လာလျှင် ၂၇၀၀ ကျပ် နှင့် အခေါက်ရွှေ တစ်ကျပ်သားလျှင် ၂၅ သိန်းဖြင့် ဈေးဖွင့်ရန်၊ဒေါ်လာအကောင့် Transfer များကို (၅၀/၅၀) ပြန်လည် ဖွင့်ပေးရန် ၊ အရေးပေါ် ဆေးဝါး၊ကုန်မှလွဲ၍ သွင်းကုန်အားလုံးကို ယာယီ ဆိုင်းငံ့ရန်၊စက်သုံးဆီကို ရုရှားက သာ တင်သွင်းကြရန်နှင့် အမေရိကန်ငွေအစား ရုရှားငွေကိုပြောင်းလဲ သုံးစွဲနိုင်ရန်အတွက် ရုရှား-အိန္ဒိယ-တရုတ် တို့နှင့် ကုန်သွယ်မှုမြှင့်တင်ရန်"ဟူ၍ ဖြစ်သည်ကိုတွေ့ရသည်။

ymg/mt
#Yangon_Media_Group