#DailyNews
Published _ 8 October 2022

၁။ ငါးဒန်ကို အဆင့်မြင့်မွေးမြူ၍ ပြည်ပသို့တင်ပို့သွားမည်

၂။ ယခုဘဏ္ဍာနှစ် ပထမနှစ်ဝက်အတွင်း ပိုကုန်ရငွေ ကန်ဒေါ်လာ ၈ ဒသမ ၆ ဘီလျံခန့်ရရှိထားပြီး ယမန်နှစ်ထက် ဒေါ်လာတစ်ဘီလျံကျော်ပိုမိုရရှိ

၃။ တစ်ပါတ်ကြာရပ်နားထားပြီးမှ မူဆယ်ကုန်သွယ်ရေးလုပ်ငန်းများပြန်လည်စတင်

၄။ ဘယ်လ်ဂျီယမ်ဘီယာထုတ်လုပ်ရေးမှထွက်ရှိလာသည့် စွန့်ပစ်ပစ္စည်းများဖြင့် မှိုစိုက်ပျိုးသောလုပ်ငန်းတိုးတက်မှုရှိလာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Health_Matters
Published - 8 Oct 2022

- ဆင်တုပ်ကွေးလို့ ဘာဖြစ်လို့ခေါ်ကြတာလဲ။ အခြားတုပ်ကွေးတွေနှင့်ဘာကွာသလဲ??

#Yangon_Media_Group

#LocalNews
Published_9 October 2022

အောက်တိုဘာလ ၁၂ ရက်နေ့တွင် ရွှေအတုံး/အခဲ (၁၀) ပိသာကျော်ကို ရောင်းချပေးသွားမည်ဖြစ်ကြောင်း ရန်ကုန်တိုင်းရွှေလုပ်ငန်းရှင်များအသင်းမှ ကြေညာထားသည်။

အဆိုပါ မီးလင်းရွှေအတုံးအခဲ (၁၀)ပိဿာကျော်ကို နေ့လယ် ၁ နာရီမှ ညနေ ၃ နာရီထိ (အသင်းဝင်များမှအပ) မည်သူမဆို ရွှေ (၁)ကျပ်သားမှ (၁၀)ကျပ်သားအထိ ရောင်းချပေးမည်ဖြစ်ပြီး ဝယ်ယူလိုသူများအနေဖြင့် မှတ်ပုံတင်မိတ္တူ၊ သန်းခေါင်စာရင်း မိတ္တူနှင့်အတူ YGEA အသင်းရုံးခန်းသို့ လာရောက် ဝယ်ယူနိုင်ကြောင်း ဖော်ပြထားသည်။

အစိုးရဘက်မှ ရွှေဈေးနှုန်းကျဆင်းစေဖို့အတွက် ရွှေစင်ရွှေတုံးနှင့် ရွှေဒင်္ဂါးပြားတွေကို ရောင်းချပေးနေခြင်းဖြစ်ကြောင်း၊ ယင်းအပြင် ကမ္ဘာ့ရွှေဈေးမြင့်တက်လာခြင်းကြောင့် ပြည်တွင်းရွှေဈေးနှုန်းမှာလည်း အနည်းငယ်မြင့်တက်ခဲ့ကာ ရန်ကုန်ရွှေဈေးကွက်အတွင်းမှာလည်း အဝယ်ထက် အရောင်းသာပိုများနေကြောင်း ရန်ကုန်တိုင်းရွှေလုပ်ငန်းရှင်များအသင်း၏ ဥက္ကဋ္ဌ ဦးမျိုးမြင့်၏ ပြောပြချက်အရ သိရသည်။

ယနေ့အောက်တိုဘာလ ၉ ရက်နေ့တွင် ရန်ကုန်တိုင်းဒေသကြီး ရွှေလုပ်ငန်းရှင်များအသင်း (YGEA)ရဲ့ ထုတ်ပြန်ထားသည့်အကယ်ဒမီ မီးလင်းရွှေ တစ်ကျပ်သားကို ၁၉၈၈၀၀၀ ဖြစ်ပြီး ယင်းသည် ကြမ်းခင်းဈေးသာ သတ်မှတ်ပေးထားခြင်းဖြစ်သည်။

#ymg/sth
#Yangon_Media_Group

#LocalNews
Published_9 October 2022

တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီ၏ ကြီးကြပ်ကွပ်ကဲမှုဖြင့် အောက်တိုဘာ ပထမပတ်အတွင်း ဖမ်းဆီးရမိမှု စုစုပေါင်း အမှုတွဲ ၁၁ မှု၊ ခန့်မှန်းတန်ဖိုးငွေကျပ် ၁၇၆၄၄၂၅၃၅ ဖမ်းမိကြောင်း တရားမဝင်ကုန်သွယ်မှုတိုက်ဖျက်ရေး ဦးဆောင်ကော်မတီမှ သိရသည်။

အကောက်ခွန်ဦးစီးဌာန၏ စီမံခန့်ခွဲမှုဖြင့် ရန်ကုန်တိုင်းဒေသကြီး အေးရှားဝေါလ် ကုန်သေတ္တာစစ်ဆေးရေးစခန်း၌ တာဝန်ကျအကောက်ခွန်အဖွဲ့မှ စစ်ဆေးမှုများ ဆောင်ရွက်ခဲ့ရာ အောက်တိုဘာ ၄ ရက်တွင် လိုင်စင်ခွင့်ပြုချက်မရမီ ရက် ၆၀ ကျော်လွန်သည့် ဆက်သွယ် ရေးပစ္စည်းများ၊ CCTV Camera နှင့် ဆက်စပ်ပစ္စည်းများ (ခန့်မှန်းတန်ဖိုးငွေကျပ် ၁၂၅၀၅၅၀၀) ကိုလည်းကောင်း၊ သွင်းကုန်ကြေညာလွှာ (ID) တွင် ကြေညာထားသည်ထက် ပိုမိုပါရှိလာသော ဖိနပ်အစုံ ၁၆၅၆၀ (ခန့်မှန်းတန်ဖိုးငွေကျပ် ၂၄၈၄၀၀၀၀) ကိုလည်းကောင်း၊ အောက်တိုဘာ ၅ ရက်တွင် သွင်းကုန်လိုင်စင် တင်ပြနိုင်ခြင်းမရှိသည့် မီးဖိုချောင်သုံးပစ္စည်းများ (ခန့်မှန်းတန်ဖိုးငွေကျပ် ၈၇၈၀၄၇၅) ကိုလည်းကောင်း စုစုပေါင်း ခန့်မှန်းတန်ဖိုးငွေကျပ် ၄၆၁၂၅၉၇၅ ကို သိမ်းဆည်းရမိခဲ့ပြီး အကောက်ခွန်လုပ်ထုံးလုပ်နည်းနှင့်အညီ အ‌ရေးယူဆောင်ရွက်ထားသည်။

အလားတူ စစ်ကိုင်းတိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် မြန်မာနိုင်ငံရဲတပ်ဖွဲ့ ဦးဆောင်သော ပူးပေါင်းစစ်ဆေးရေးအဖွဲ့က စစ်ဆေးမှုများ ဆောင်ရွက်ခဲ့ရာ အောက်တိုဘာ ၅ ရက်တွင် ရွှေဘိုမြို့နယ်အတွင်း Kenbo 125 အမျိုးအစား လိုင်စင်မဲ့ ဆိုင်ကယ်တစ်စီး (ခန့်မှန်းတန်ဖိုးငွေကျပ် ၂၀၀၀၀၀)ကိုလည်းကောင်း၊ အောက်တိုဘာ ၆ ရက်တွင် စစ်ကိုင်းမြို့ ရတနာပုံတံတား ပူးပေါင်းစစ်ဆေးရေးဂိတ်၌ Toyota Mark II အမျိုးအစား လိုင်စင်မဲ့ မော်တော်ယာဉ်တစ်စီး (ခန့်မှန်းတန်ဖိုးငွေကျပ် ၃၅၀၀၀၀၀) ကိုလည်းကောင်း စုစုပေါင်း ခန့်မှန်းတန်ဖိုးငွေကျပ် ၃၇၀၀၀၀၀ ကို ဖမ်းဆီးရမိခဲ့ပြီး ပိုကုန်သွင်းကုန်ဥပဒေနှင့်အညီ အရေးယူ ဆောင်ရွက်ထားကြောင်းသိရသည်။

ယင်းအပြင် အောက်တိုဘာ ၆ ရက်တွင် ဧရာဝတီတိုင်းဒေသကြီး တရားမဝင်ကုန်သွယ်မှု တိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် ပန်တိုင်စစ်ဆေးရေးဂိတ်၌ ပူးပေါင်းစစ်ဆေးရေးအဖွဲ့မှ စစ်ဆေးမှုများ ဆောင်ရွက်ခဲ့ရာ ကုန်တင်ယာဉ်တစ်စီးပေါ်၌ တရားမဝင် သယ်ဆောင်လာသော ခိုင်းနွားနှင့် နိုစားနွား ၁၆ ကောင် ခန့်မှန်းတန်ဖိုး ငွေကျပ် ၈၀၀၀၀၀၀ ကို ဖမ်းဆီးရမိခဲ့ပြီး အရေးကြီးကုန်စည်နှင့် ဝန်ဆောင်မှု ဥပဒေနှင့်အညီ အရေးယူဆောင်ရွက်ထားကြောင်း၊ မွန်ပြည်နယ် မရမ်းချောင် အမြဲတမ်းစစ်ဆေးရေးစခန်း၌ တာဝန်ကျပူးပေါင်းအဖွဲ့က စစ်ဆေးမှုများ ဆောင်ရွက်ခဲ့ရာ မြဝတီမြို့မှ ရန်ကုန်မြို့သို့ ထွက်ခွာလာသော မော်တော်ယာဉ်တစ်စီးပေါ်၌ သွင်းကုန်ကြေညာလွှာ(ID)တွင် ကြေညာထားခြင်းမရှိသည့် ဆိုင်ကယ်အပိုပစ္စည်းများ (ခန့်မှန်းတန်ဖိုး ငွေကျပ် ၂၀၈၆၅၆၀)နှင့်အဆိုပါပစ္စည်းများ တင်ဆောင်လာသည့် နောက်တွဲယာဉ် တစ်စီးနှင့် Scania အမျိုးအစား Tractor Head တစ်စီး (ခန့်မှန်းတန်ဖိုးငွေကျပ် ၁၁၅၀၀၀၀၀၀) စုစုပေါင်း ခန့်မှန်းတန်ဖိုးငွေကျပ် ၁၁၇၀၈၆၅၆၀ ကို ဖမ်းဆီးရမိခဲ့ပြီး အကောက်ခွန် လုပ်ထုံးလုပ်နည်းနှင့်အညီ အရေးယူဆောင်ရွက်ထားကြောင်း သိရသည်။

ထပ်မံ၍ အောက်တိုဘာ ၇ ရက်တွင် ကရင်ပြည်နယ်တရားမဝင် ကုန်သွယ်မှုတိုက်ဖျက်ရေး အထူးအဖွဲ့၏ စီမံခန့်ခွဲမှုဖြင့် ကော့ကရိတ်(တံတားကျိုး) စုပေါင်းစစ်ဆေးရေးစခန်း၌ တာဝန်ကျပူးပေါင်းအဖွဲ့က စစ်ဆေးမှုများဆောင်ရွက်ခဲ့ရာ မော်တော်ယာဉ်တစ်စီးပေါ်၌ တရားဝင်စာရွက်စာတမ်း အထောက်အထား တစ်စုံတစ်ရာ တင်ပြနိုင်ခြင်းမရှိသည့် လိမ္မော်သီး ၅၁ ဖာ (ခန့်မှန်းတန်ဖိုးငွေကျပ် ၁၅၃၀၀၀၀)ကို ဖမ်းဆီးရမိခဲ့ပြီး အကောက်ခွန် လုပ်ထုံးလုပ်နည်းနှင့်အညီ အရေးယူဆောင်ရွက်ထားကြောင်း သိရသည်။

#ymg/sth
#Yangon_Media_Group

#LocalNews
Published_9 October 2022

တရားရုံးအမိန့်ဖြင့် စာရင်းရှင်းဖျက်သိမ်းနေသည့် အာရှရန်ကုန်ဘဏ်တွင် အပ်နှံထားသည့်ငွေတွေကို အမြန်ဆုံးပြန်လည်ထုတ်ယူနိုင်ပြီဖြစ်ကြောင်း နိုင်ငံပိုင်သတင်းစာမှတစ်ဆင့်ကြေညာထားသည်။

ဘဏ်ကို စာရင်းရှင်းလင်းဖျက်သိမ်းမည်ဖြစ်သည့်အတွက် အာရှရန်ကုန်ဘဏ်တွင် အပ်နှံထားသော ငွေတွေနှင့်စပ်လျဉ်း၍ ခိုင်လုံသည့် သက်သေအထောက်အထားများနှင့်တကွ တင်ပြရန် ဘဏ်၏ စာရင်ရှင်းလင်းဖျက်သိမ်းရေးအရာရှိက အောက်တိုဘာလ ၇ ရက်ထုတ် နိုင်ငံပိုင်သတင်းစာကနေ ကြေညာထားခြင်းဖြစ်သည်။

အာရှရန်ကုန်ဘဏ်ကို ပြီးခဲ့သည့် ၂၀၂၀ မတ်လအတွင်း၌ ဗဟိုဘဏ်က ဘဏ်လုပ်ငန်းလိုင်စင် ရုပ်သိမ်းခဲ့ပြီးဖြစ်ကြောင်း၊ လက်ရှိတွင် ဘဏ်ကို စာရင်းရှင်းလင်းဖျက်သိမ်းပေးဖို့အတွက် ဗဟိုဘဏ်က ရန်ကုန်တိုင်းတရားလွှတ်တော်ကို လျှောက်ထားခဲ့ပြီး တရားရုံးကလည်း စာရင်းရှင်းလင်းဖျက်သိမ်းရန် ပြီးခဲ့သည့်ဖေဖော်ဝါရီလက ခွင့်ပြုပေးခဲ့ခြင်းဖြစ်ကြောင်း သိရသည်။

လက်ရှိတွင် အဆိုပါဘဏ်နှင့် ပတ်သက်၍ ကြွေးမြီရှင်တွေအနေဖြင့် ခိုင်လုံသည့် သက်သေအထောက်အထားတွေနှင့် တောင်းဆိုချက်တွေကိုတင်ပြရန် ဗဟိုဘဏ်၏ စာရင်းရှင်းလင်းဖျက်သိမ်းရေးအရာရှိက သတင်းထုတ်ပြန်ခဲ့သည်။

အာရှရန်ကုန်ဘဏ်ကို ၁၉၉၄ ခုနှစ်တွင် ဖွင့်လှစ်ထားသည့် ဘဏ်တစ်ခုဖြစ်ပြီး ရန်ကုန်၊ မန္တလေး၊ နေပြည်တော်တို့အပြင် ဘဏ်ခွဲပေါင်း ၁၃ ခုရှိကြောင်းသိရသည်။

#ymg/sth
#Yangon_Media_Group

Published 8 Oct 2022

အိန္ဒိယဗဟိုဘဏ်က အီး-ရူပီးဆိုတဲ့ ဒစ်ဂျစ်တယ်ငွေကြေးကို အသုံးပြုနိုင်ဖို့ ဆောင်ရွက်နေရာ  ကြီးမားတဲ့ ရှေ့ပြေးစီမံကိန်းတွေ လုပ်ဆောင်ခဲ့ပြီးနောက် နောက်ဆုံးဒီဇိုင်းတစ်ခုကို ရရှိတော့မှာဖြစ်ပါတယ်။

အိန္ဒိယ အရန်ငွေကြေးဘဏ်ဟာ  လက်ကားလုပ်ငန်းတွေအတွက် ဘဏ်စာရင်းအခြေပြု ဗဟိုဘဏ် ဒစ်ဂျစ်တယ်ငွေကြေး သို့မဟုတ် CBDC နှင့် လက်လီလုပ်ငန်းတွေအတွက် တိုကင် အခြေပြု ငွေကြေးတစ်ခုကို အကောင်အထည်ဖော်ဖို့ လုပ် ဆောင်နေပါတယ်လို့ သောကြာနေ့က ထုတ်ပြန်တဲ့ စာတမ်းတစ်ခုထဲမှာ ဖော်ပြထားပါတယ်။  ဒစ်ဂျစ်တယ်ငွေကြေးကို  အီး-ရူပီးအဖြစ် လွှဲပြောင်းမှာဖြစ်ပြီး  ငွေကြေးပုံစံအားလုံးအတွက် နောက်ထပ်ရွေးချယ်မှုတစ်ခုဖြစ်လာပါလိမ့်မယ်လို့ လည်းဖော်ပြထားပါတယ်။

ငွေသားကို မှီခိုနေတဲ့ အိန္ဒိယဟာ ငွေကြေး ပေးချေမှုတွေမှာ ပိုပြီး အကျိုးရှိစေအောင် သူတို့ရဲ့ ငွေကြေးတွေကို ဒစ်ဂျစ်တယ်ပုံစံဦးတည်လုပ်ဆောင်နေကြတဲ့ တရုတ်နိုင်ငံအပါအဝင် နိုင်ငံတွေလို ဦးတည်ကြိုးပမ်းလာတာဖြစ်ပါတယ်။ အိန္ဒိယဘဏ္ဍာရေးဝန်ကြီး နီယာမာလာ ဆီသာရာမန်က ဒီနှစ်အတွင်းမှာ အိန္ဒိယအရန်ငွေကြေးဘဏ်ဟာ  ဒစ်ဂျစ်တယ်ငွေကြေးကို စတင်ဆောင်ရွက်တော့မယ်လို့ကြေညာပါတယ်။

“ ဒစ်ဂျစ်တယ်ငွေကြေးအတွက် လက်ရှိမှာ မဟာဗျူဟာအဆင့်အကောင်အထည်ဖော်မှုကို ဦးတည်ဆောင်ရွက်နေပြီး တစ်ဆင့်ပြီးတစ်ဆင့် ရှေ့ပြေးလုပ်ငန်းတွေလုပ်ဆောင်ပြီးနောက်ဆုံးမှာ ဒစ်ဂျစ်တယ်ငွေကြေးအဆင့် စတင်မှာဖြစ်တယ်” လို့ သူမကပြောပါတယ်။

ဒါပေမယ့် လုံးဝဗဟိုချုပ်ကိုင်မှုကင်းတဲ့ ပုံစံကိုတော့ ဗဟိုဘဏ်တွေက စိတ်ပူနေကြဆဲဖြစ်ပါတယ်။ ဘာဖြစ်လို့လဲဆိုတော့ အဲသလိုလုပ်ရင် ရာဇဝတ်လုပ်ငန်းတွေကို ငွေကြေးထောက်ပံ့တာတွေကို နောက်ယောင်ခံလိုက်ဖို့ ခက်ခဲသွားနိုင်တယ်လို့ မြင်ထားကြလို့ဖြစ်တဲ့အကြောင်း SCMP သတင်းစာကရေးသားပါတယ်။

Source SCMP

#Digital_Currency_India

#e-Rupee

#India_ Reserve_Bank

#Local_News
Published_ 8 October 2022

မြန်မာ့ဆန်စပါးညီလာခံ ၂၀၂၂ တွင် အစိုးရနှင့်ပုဂ္ဂလိကတို့ပူးပေါင်းပြီး မြန်မာ့ ဆန်စပါးကဏ္ဍ ဖွံဖြိုးတိုးတက်ရေးအတွက် အကောင်အထည်ဖော်သွားရမည့် သုံးသပ်ချက်များကိုဖော်ထုတ်ရရှိခဲ့ကြောင်း သိရပါတယ်။

ညီလာခံကျင်းပတဲ့ ၂ ရက်အတွင်း ပြည်နယ်/တိုင်းဒေသကြီးများအလိုက် ဒေသနှင့် ကိုက်ညီပြီး စျေးကွက်ကြိုက်နှစ်သက်သည့် မျိုးကောင်းမျိုးသန့်များကိုသာ ရွေးချယ်စိုက်ပျိုးသွားရေး၊ တောင်သူများအတွက် သက်သာသောစျေးနှုန်းဖြင့် ဓာတ်မြေသြဇာများ ဝယ်ယူရရှိနိုင်ရေး၊ အရည်အသွေးပြည့်မီသော ဆန်များ တင်ပို့နိုင်ရေးအတွက် ဆန်စက် များ အဆင့်မြှင့်တင်ရေး ဆွေးနွေးခဲ့ကြပါတယ်။

ထို့ပြင် ပြောင်းလဲနေသော ပို့ကုန်စျေးကွက်နှင့်ကိုက်ညီသည့် အမျိုးသားပို့ကုန် မဟာဗျူဟာကို ပြန်လည်သုံးသပ် အကောင်အထည်ဖော်သွားရေး၊ ပို့ကုန်တိုးမြှင့်ရေးအတွက် ပြည်ပသို့ ကိုယ်စားလှယ်အဖွဲ့များစေလွှတ်ခြင်းကို အစိုးရဌာနများနှင့် ပူးပေါင်းဆောင်ရွက်ရေး အစရှိသည့် အချက်များပါဝင်ပါတယ်။

ဆန်စပါးညီလာခံ၏ ဆွေးနွေးပွဲများတွင် ဆန်စပါးစိုက်ပျိုးထုတ်လုပ်မှု ဖွံ့ဖြိုးတိုးတက်ရေးနှင့် စပ်လျဉ်းပြီး စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ဆန်စပါးစိုက်ပျိုးရေးနှင့် မျိုးစေ့ထုတ်လုပ်မှုနှင့် ပတ်သက်သည့်စာတမ်းများ၊ ဆန်စပါး ဝယ်ယူ၊ သိုလှောင်၊ ကြိတ်ခွဲခြင်းနှင့် တန်ဖိုးမြှင့်တင် ခြင်းလုပ်ငန်းများ ဖွံ့ဖြိုးတိုးတက်ရေး စာတမ်းများကို ဖတ်ကြားခဲ့ကြပါတယ်။

စကားဝိုင်းဆွေးနွေးပွဲ အစီအစဉ်များတွင် မြန်မာနိုင်ငံဆန်စပါးအသင်းချုပ်၊ အသင်းအဖွဲ့များ၊ ကုမ္ပဏီများနှင့် လက်တွေ့စပါးစိုက်ပျိုးနေသည့် တောင်သူလယ်သမား ကိုယ်စားလှယ်များက လက်ရှိဆောင်ရွက်နေမှု၊ ကြုံတွေ့နေရသည့် အခက်အခဲများနှင့် ဆန်စိုက်ပျိုးထုတ်လုပ်မှု ဖွံ့ဖြိုးတိုးတက်စေရေးအတွက် အစိုးရမှ ပံ့ပိုးကူညီပေးစေလိုသည့် အချက်များကို ဆွေးနွေးခဲ့ကြပါတယ်။

အောက်တိုဘာ (၆) ရက်မှ (၇) ရက်အထိ ၂ ရက်ကြာကျင်းပခဲ့သည့် မြန်မာ့ဆန်စပါး ညီလာခံ - ၂၀၂၂ သို သက်ဆိုင်သည့် ဝန်ကြီးဌာနများမှ ကိုယ်စားလှယ်များ၊ မြန်မာနိုင်ငံ ဆန်စပါးအသင်းချုပ်နှင့် ညီနောင်အသင်းအဖွဲ့များမှ ကိုယ်စားလှယ်များနှင့် တောင်သူ လယ်သမားကိုယ်စားလှယ်များ စုစုပေါင်း(၄၀၀)ခန့် တက်ရောက်ခဲ့ကြကြောင်း သတင်းရရှိပါတယ်။

ygm_mnn
#Yangon_Media_Group

#World_Health
Published 9 October 2022

မျိုးရိုးစဉ်ဆက်ကျောင်းသားကျောင်းသူတွေဟာ မနက်စောစောအိပ်ရာကထပြီး ကျောင်းကိုအပြေးအလွှား သွားကြရပါတယ်။
ကျောင်းအသီးသီးက ကျောင်းတက်ချိန်ဘယ်အချိန်ချိန်ပဲဖြစ်ဖြစ် ရောက်လာတဲ့ကျောင်းသားတွေကို အားအင်အပြည့်နဲ့ သင်ကြားသမျှကို ရယူနိုင်စေချင်ကြပါတယ်။

အချို့က စောစောကျောင်းလာဖို့ စိတ်အားထက်သန်ကြပေမယ့် အချို့ကတော့ စောစောကျောင်းလာဖို့ ရုန်းကန်လူးလှိမ့်နေရပါတယ်။၂၀၂၀ အစောပိုင်း ကိုဗစ်ကပ်ရောဂါကာလအစတုန်းက ကျောင်းတွေဟာ သင်ရိုးညွှန်းတမ်းကို အကောင်အထည်ဖော်ဖို့ အခြားနည်းလမ်းများ ရှာဖွေခဲ့ရပါတယ်။
ကျောင်းတွေက လိုအပ်ချက်အတိုင်း ပြောင်းလဲလာရပြီး ကျောင်းသားတွေကလည်း အချိန်ဇယားအမျိုးမျိုးမှာ ပြောင်းလဲသင်ယူကြရပါတယ်။

အဲဒီအခါ မနက် ၈ နာရီမတိုင်ခင် စာသင်ချိန်စတင်ခြင်းက ကောင်းကျိုးထက် ဆိုးကျိုးပိုများကြောင်း သိရှိခဲ့ရပါတယ်။
ကျောင်းသားတွေရဲ့ အိပ်ချိန်၊ အိပ်ရာထချိန်၊ အိပ်ရေးကောင်းကောင်းရရှိမှုတို့ကို လေ့လာခဲ့ကြပါတယ်။
အရေးကြီးတဲ့ အခြားအချက်အလက်တွေနဲ့လည်း နှိုင်းယှဉ်ခဲ့ကြပါတယ်။

ကျောင်းကို လူကိုယ်တိုင်တက်ရောက်ရတဲ့အခါ ကျောင်းရောက်ဖို့ သွားလာရတဲ့အချိန်ကိုလည်း ထည့်တွက်ရပါတယ်။
ကျောင်းတက်ချိန်ပေါ်မူတည်ပြီး အိပ်ချိန်လည်း အတော်လေးပြောင်းလဲလေ့ရှိပါတယ်။
စောစောကျောင်းတက်ရတဲ့အခါ စောစောအိပ်၊ စောစောထရတာကြောင့် မနက်ခင်းမှာ သက်တောင့်သက်သာ မရှိလှပါဘူး။

၈ နာရီနောက်ပိုင်းမှ တက်ရတဲ့ကျောင်းသားတွေကတော့ ကိုယ်တိုင်တက်ရတာဖြစ်ဖြစ်၊ အွန်လိုင်းကနေပဲဖြစ်ဖြစ် ကောင်းစွာအိပ်ရေးဝပြီး အသိပညာရယူဖို့ အကောင်းဆုံးအနေအထားရှိပါတယ်။

အိပ်ရေးဝအောင် အိပ်ရတဲ့အခါ ကျောင်းမှာတစ်နေ့လုံး လှုပ်ရှားနိုင်ပြီး ပညာရေးအောင်မြင်မှု လမ်းစပွင့်သွားပါတယ်။
ကျောင်းစာတွေပြီးဆုံးဖို့ မပူပန်ရတဲ့အပြင် အိပ်ချိန်မတိုင်ခင် တခြားအကြောင်းအရာပညာတွေကိုပါ လေ့လာနိုင်ပါတယ်။
တစ်နေ့တာမှာ အနည်းငယ်မျှနောက်ကျပြီးမှ သွားဖြစ်ရင်တောင် ကျောင်းမှာ ကွဲပြားချက်တွေကို တွေ့ရှိနိုင်ပါတယ်။

Source: The Jerusalem Post
#Yangon_Media_Group

#World_News
Published 8 October 2022

ဘီလျံနာသူဌေးကြီး'အီလွန်မတ်စ်'က ရုရှား-ယူကရိန်းစစ်ပွဲအဆုံးသတ်နိုင်ရန် ဖြစ်နိုင်ချေရှိတဲ့ သဘောတူညီချက်တစ်ခုဆိုပြီး အကြုံပြုခဲ့ရာ ရှုတ်ချဝေဖန်မှုများ ခံခဲ့ရပြီးနောက် ရက်ပိုင်းအကြာမှာ တရုတ်နဲ့ထိုင်ဝမ်အရေးမှာလည်း ထိုင်ဝမ်အပေါ် ထိန်းချုပ်နိုင်မှုအချို့ တရုတ်ကိုပေးလိုက်ခြင်းဖြင့် ဖြေရှင်းနိုင်တယ်လို့ အကြံပြုလိုက်ပါတယ်။

"ကျွန်တော့်ရဲ့အကြံပြုချက်က ထိုင်ဝမ်အတွက် အထူးအုပ်ချုပ်ခွင့်ရေဇုံတစ်ခုသတ်မှတ်ပေးလိုက်တာပဲဖြစ်တယ်။ ဒါဟာ အကျိုးအကြောင်းဆီလျော်တဲ့ နှစ်လိုဖွယ်တစ်ခုပါ။ ဒါပေမယ့် လူတိုင်းကိုတော့ ပျော်ရွှင်စေနိုင်မယ့်ပုံတော့မရှိဘူး”လို့ ကမ္ဘာ့အချမ်းသာဆုံး မတ်စ်က ဖိုင်နယ်ရှယ်တိုင်းသတင်းစာရဲ့အင်တာဗျူးမှာပြောကြားခဲ့တာပါ။ သတင်းစာက တရုတ်အကြောင်းမေးမြန်းတဲ့အခါ ရှန်ဟိုင်းမှာ စက်ရုံကြီးဖွင့်ထားတဲ့ မတ်ခ်က မှတ်ချက်ပေးခဲ့တာဖြစ်ပါတယ်။

ဒီမိုကရေစီနည်းကျအုပ်ချုပ်နေတဲ့ ထိုင်ဝမ်ကို တရုတ်က သူတို့ပိုင်ပြည်နယ်ဟု ပြောကြားနေခဲ့ပြီး ထိုင်ဝမ်ကို တရုတ်လက်အောက်သိမ်းသွင်းကာ လိုအပ်ပါက အင်အားသုံးသိမ်းယူဖို့ကိုလည်း ကာလရှည်အဆိုပြုထားပါတယ်။

ထိုင်ဝမ်ကတော့ တရုတ်ရဲ့အချုပ်အခြာအာဏာရပိုင်ခွင့်အဆိုကို ပြင်းပြင်းထန်ထန်ကန့်ကွက်ထားကာ ပြည်သူ ၂၃ သန်းကသာ တိုင်းပြည်ရဲ့အနာဂတ်ကို ဆုံးဖြတ်လိမ့်မယ်လို့ ဆိုထားပါတယ်။

“ ပြီးတော့ ဒါဟာဖြစ်နိုင်တယ်။ သူတို့အနေနှင့် ဟောင်ကောင်ထက်ပိုပြီး သက်သက်ညှာညှာရှိမယ့် အစီအစဉ်မျိုးရနိုင်တယ်..ကျွန်တော်တော့ဖြစ်နိုင်တယ်ထင်တယ်” လို့ သူကသတင်းစာကိုပြောခဲ့ပါတယ်၊

ရှန်ဟိုင်းမှစက်ရုံဟာ မနှစ်က တက်စ်လာရဲ့ တစ်ကမ္ဘာလုံးပို့ဆောင်မှုတွေထဲက တဝက်လောက်အထိ ပါဝင်ပတ်သက်နေပါတယ်။ အဲဒီမှာရှိတဲ့ SpaceX ဒုံးပျံရဲ့ Starlink အင်တာနက်ဝန်ဆောင်မှုကိုလည်း 'မတ်စ်'က တရုတ်ကိုထောက်ပံ့မှာမဟုတ်ကြောင်း တရုတ်က အာမခံချက်ပေးထားတယ်လို့ ဆိုပါတယ်။

ထိုင်ဝမ်အရေးကိစ္စက ရှောင်လွှဲလို့မရနိုင်ကြောင်း၊ အကျိုးရိုက်ခတ်မှုက တက်စ်လာကိုသာမက iPhone ထုတ်လုပ်သူ Apple ကုမ္ပဏီနဲ့ စီးပွားရေးလုပ်ငန်းများအပေါ်ပါ သက်ရောက်လာနိုင်တယ်လို့ သတိပေးလိုက်ပါတယ်။

ဒီမှတ်ချက်တွေကို အင်တာဗျူးမှာ အကျယ်တဝင့်ဖော်ပြခြင်း မရှိပါဘူး။
အစောပိုင်းရက်သတ္တပတ်တုန်းကလည်း ယူကရိန်းက ခရိုင်းမီးယားကို ရုရှားထံ အပြီးအပိုင်ပေးအပ်ဖို့၊ ရုရှားထိန်းချုပ်ထားတဲ့ နယ်မြေအဆုံးအဖြတ်အတွက် ကုလပံ့ပိုးကူညီမှုဖြင့် လူထုဆန္ဒခံယူပွဲများကျင်းပဖို့နဲ့ ယူကရိန်းက ကြားနေနိုင်ငံအဖြစ်သဘောတူဖို့ 'မတ်စ်'က အကြံပြုလိုက်ပါတယ်။

တွစ်တာပေါ်ကနေ 'မတ်စ်'က သူ့ရဲ့အကြံပြုချက်တွေကို အလေးထားရန် တောင်းဆိုခဲ့ရာ ယူကရိန်းသမ္မတ'ဗိုလိုဒီမီယာဇယ်လန်စကီ'က ပြင်းပြင်းထန်ထန်ဝေဖန်လိုက်ပါတယ်။
"အီလွန်မက်စ်ကို ဘယ်လိုလူဖြစ်စေချင်လဲ? ယူကရိန်းကို ထောက်ခံတဲ့သူလား ဒါမှမဟုတ် ရုရှားကို ထောက်ခံတဲ့သူလား?"

Source: Reuters
#Yangon_Media_Group

#World_Health
Published 8 October 2022

နေ့ခင်းနေ့လယ် တရေးအိပ်ခြင်းက နေရာတော်တော်များများမှာ အစဉ်အလာတစ်ခုလို ဖြစ်နေပြီး ယနေ့ခေတ်အလုပ်ခွင်တွေမှာပါ လက်ခံလာကြပါပြီ။

တရေးအိပ်တတ်တဲ့သူတွေကို မေးကြည့်ရင် ဒီလိုအိပ်ခြင်းဖြင့် အာရုံစူးစိုက်မှု၊ ဖန်တီးနိုင်မှု၊ အလုပ်လုပ်ကိုင်နိုင်စွမ်း ပိုမိုကောင်းမွန်လာစေကြောင်း ပြောကြမှာပါ။

အခုလေ့လာချက်အသစ်မှာတော့ တရေးတမောအိပ်ခြင်းက ကျန်းမာရေးပြဿနာများ ဖြစ်လာနိုင်ချေနဲ့ ဆက်စပ်နေကြောင်း အံ့အားသင့်ဖွယ်တွေ့ရှိခဲ့ရပါတယ်။

ပုံမှန်အားဖြင့် နေ့ခင်းတရေးအိပ်သူတွေဟာ သွေးပေါင်ချိန်တိုးပြီး လေဖြတ်ခြင်းအန္တရာယ် ဖြစ်နိုင်ချေများကြောင်း ၂၀၂၂ ခုနှစ် Hypertension ဂျာနယ်မှာ ဖော်ပြခဲ့ပါတယ်။

တရေးအိပ်ခြင်းဖြင့် တရေးမအိပ်သူတွေထက် သွေးတိုးရောဂါဖြစ်နိုင်ချေ ၁၂ ရာခိုင်နှုန်းပိုများပြီး လေဖြတ်ခြင်းအန္တရာယ် ၂၄ ရာခိုင်နှုန်းပိုများကြောင်း ချန်ရှာရှိတက္ကသိုလ်မှ သုတေသီများက တွေ့ရှိခဲ့ပါတယ်။

ဒါတွေဟာ UK Biobank မှ အချက်အလက်များနဲ့ လူသန်းတဝက်ခန့်ရဲ့ ဆေးပညာအချက်အလက်များထံမှ အခြေခံထားတာဖြစ်ပါတယ်။

တရေးအိပ်တတ်တဲ့သူတွေထဲမှာ အမျိုးသားများက ပိုများပြီး ပညာရေးအသိ၊ ဝင်ငွေ စသည်တို့မှာ နည်းပါးပြီး ဆေးလိပ်သောက်တတ်သူ၊ အရက်သောက်သူ၊ အိပ်မပျော်တတ်သူတို့ပိုများပြီး ညဘက်မှာတော်တော်နဲ့ မအိပ်တတ်သူတွေဖြစ်ပါတယ်။

ကျန်းမာရေးထိခိုက်စေတဲ့ အကြောင်းအရင်းကတော့ နေ့ခင်းမှာ တရေးအိပ်တဲ့အတွက် ညဘက်မှာအိပ်ရေးပျက်ပြီး ကျန်းမာရေးထိခိုက်လာတာပါပဲ။

ညဘက်ကောင်းကောင်းအိပ်မပျော်တဲ့အခါ မှတ်ဉာဏ်ချို့ယွင်းခြင်းလည်း ဖြစ်လာတတ်ပါတယ်။

ခဏတဖြုတ်အိပ်စက်ခြင်းက ကြံရည်ဖန်ရည်ကောင်းမွန်စေပေမယ့် တစ်ပတ်အတွင်း တစ်ခါနှစ်ခါထက်တော့ ပိုမအိပ်သင့်ကြောင်း ပြင်သစ်မှာလေ့လာတွေ့ရှိထားပါတယ်။

တရုတ်မှာဆိုရင် အလုပ်ခွင်တွေနဲ့ စာသင်ကျောင်းတွေမှာ နေ့လယ်စာစားအပြီး တရေးအိပ်ချိန်ကိုပါ ထည့်သွင်းထားကြပါတယ်။

တရေးအိပ်သင့်တဲ့သူတွေကတော့ မနက်စောစောထရသူများ၊ အိပ်ချိန်မမှန်သူများနဲ့ မျိုးရိုးအရ အိပ်ချိန်ပိုမိုလိုအပ်သူများဖြစ်ပါတယ်။

ဩစတြေးလျသုတေသီများ အကြံပြုထားတာက တရေးမအိပ်ခင်မှာ ကော်ဖီသောက်ကာ နောက်ထပ်မိနစ် ၂၀ ကြာချိန်မှာ နှိုးစက်ပေးထားခြင်းဖြင့် ကဖင်းဓာတ်က ထကြွလာမှာဖြစ်ပါတယ်။

Source: South China Morning Post
#Yangon_Media_Group

#Health_Tips
Published 8 October 2022

ကြက်ဥကို ပြုတ်စားသည်ဖြစ်စေ၊ ကြော်စားသည်ဖြစ်စေ ဘယ်လိုပဲစားစား တစ်ပတ်ကို ငါးရက်စားသုံးသင့်တယ်လို့ သုတေသီများက ဆိုပါတယ်။

ကြက်ဥကို နေ့တိုင်းနီးပါးစားသူတွေဟာ ပိုမိုသွယ်လျကြောင်း တွေ့ရှိခဲ့ကြတာကြောင့် ဖြစ်ပါတယ်။

ကြက်ဥက အဟာရရှိပြီး သွယ်လျစေတယ်ဆိုတဲ့ ခိုင်မာတဲ့အထောက်အထား မတွေ့ရှိရပေမယ့် လေ့လာချက်တွေအရတော့ ကြက်ဥများများစားရင် ပိုမိုကျန်းမာစေကြောင်း တွေ့ရှိရပါတယ်။

အသက် ၁၈ နှစ်မှ ၃၀ ကြား တက္ကသိုလ်ကျောင်းသား ၃၅၅ ယောက်ရဲ့ ခန္ဓာကိုယ်ဖွဲ့စည်းပုံကိုလေ့လာကာ သူတို့ရဲ့ အရပ်၊ အလေးချိန်၊ ခါးအတိုင်းတို့ကို တိုင်းတာပြီး BMI တွက်ချက်ကြည့်ကြပါတယ်။

ကြက်ဥအများဆုံးစားလေ့ရှိသူတွေက ကျန်တဲ့သူတွေထက် BMI နဲ့ အဆီပမာဏ သိသိသာသာနည်းပါးပြီး ၂၂.၅ ခန့်သာရှိပါတယ်။

တစ်ပတ်ကို ကြက်ဥ ၄ လုံးစားလေ့ရှိတဲ့သူတွေကတော့ ၂၃.၅ ရှိပြီး ကြက်ဥတစ်လုံးလောက်သာ စားလေ့ရှိသူတွေကတော့ ၂၃.၅ ရှိပါတယ်။

အသက်နဲ့ ကျား/မ ခွဲခြားတဲ့အခါမှာလည်း ကြက်ဥအနည်းဆုံးစားသူတွေက ခါးနဲ့အရပ်အတိုင်းအတာများခဲ့ပါတယ်။

ဒီရလာဒ်များအရ ကြက်ဥစားခြင်းရဲ့ အကျိုးကျေးဇူးတွေက သူတို့မှာပါဝင်တဲ့ ပရိုတိန်းဓာတ်ကြောင့်ဖြစ်ပြီး ကြက်ဥကြီးကြီးတစ်လုံးဆိုရင် ပရိုတိန်း ၆ ဂရမ်ပါဝင်ပါတယ်။

တစ်ပတ်ကို ကြက်ဥငါးကြိမ်စားသုံးခြင်းဖြင့် ကျန်းမာစေကြောင်း ဒေါက်တာ'မီရီယမ်ဂါရီဒိုမီဂွယ်'က အကြံပြုလိုက်ပါတယ်။

ခန္ဓာကိုယ်က ကြက်ဥရဲ့ပရိုတိန်းဓာတ်ကို စုပ်ယူတာကြောင့် ကြက်ဥများများစားရင် ပိုမိုကျန်းမာကျစ်လစ်တဲ့ခန္ဓာကိုယ်ရရှိစေတယ်လို့ လေ့လာချက်မှာ သုံးသပ်ထားပါတယ်။

Source: The Jerusalem Post
#Yangon_Media_Group

#Local_News
Published_ 8 October 2022

တစ်ဦးလျှင် ရွှေ ၁၀ ကျပ်သားနှုန်းဖြင့် မီးလင်းရွှေ ၄ ပိဿာခွဲကို ဒီကနေ့ အောက်တိုဘာ ၈ ရက် နေ့လည် (၂) နာရီတွင် ထပ်မံရောင်းချပေးမည်ဖြစ်ကြောင်း မန္တလေးတိုင်းဒေသကြီး ရွှေလုပ်ငန်းရှင်အသင်းမှ သိရပါတယ်။

ရွှေဝယ်ယူသူများအနေဖြင့် မှတ်ပုံတင်နဲ့အတူ အိမ်ထောင်စုပါ တစ်ပါတည်းယူခဲ့ရမှာဖြစ်ပြီး ရွှေစျေးကိုနေ့လည် (၂) နာရီရောင်းချခါနီးတွင် ကြေညာသွားမှာဖြစ်တယ်လို့ ဆိုပါတယ်။
အောက်တိုဘာ ၇ ရက်က ရွှေအသင်းမှ မီးလင်းရွှေတစ်ကျပ်သားကို ၂၅ သိန်း ၄ သောင်းကျပ်နှုန်းဖြင့် ရောင်းချခြင်းဖြစ်ပြီး ဝယ်ယူသူများပြား၍ ထပ်မံရောင်းချရခြင်းဖြစ်ကြောင်း သိရပါတယ်။

မနေ့က ပြင်ပစျေးကွက်တွင် အခေါက်ရွှေ တစ်ကျပ်သားကို ၂၅၉၀၀၀၀ ကျပ်မှ ၂၆၃၅၀၀၀ ကျပ် အထိအပိတ်ဈေး မြင့်တက်သွားခဲ့ပါတယ်။ဒီကနေ့ အောက်တိုဘာ (၈) ရက်တွင် ရောင်းချမယ့် ရွှေ ၄ ပိဿာခွဲကို အသင်းသားများမှလွဲ၍ မည်သူမဆို လွတ်လပ်စွာ လာရောက်၀ယ်ယူနိုင်ပြီး မနေ့က ဝယ်ယူရရှိပြီးသူများကို ထပ်မံရောင်းချပေးမှာမဟုတ်ဘဲ ဝယ်ယူသူများအနေဖြင့် အိမ်ထောင်စုဇယားနှင့် မှတ်ပုံတင်ယူခဲ့ရန် မန္တလေးရွှေအသင်းက အသိပေးကြေညာထားပါတယ်။

ygm_mnn
#Yangon_Media_Group