#LocalNews
Published_10 June 2022

ထိုင်းနိုင်ငံ၊ မဟာချိုင်ခရိုင်အတွင်း Thai Union စက်ရုံ၏ မြန်မာရွှေ့ပြောင်းအလုပ်သမားများ လိုက်ပါလာသော ဖယ်ရီကား တစ်စီး ဇွန်လ ၉ ရက် ညနေကတိမ်းမှောက်၍ လူ ၁၀ ဦးခန့် ဒဏ်ရာ ရရှိခဲ့ကြကြောင်း သိရသည်။

မဟာချိုင် ဖလန့်စောင်ယာဉ်ကြော၌ ဆယ်ဘီးကုန်တင်ကားက ရုတ်တရက်ဘရိတ်အုပ်သဖြင့် မတိုက်မိစေရန် ဖယ်ရီကားက ဘေးဘက်သို့ ရှောင်တိမ်းခဲ့ရာမှ တိမ်းမှောက်သွားခြင်းဖြစ်ကြောင်း၊ဒဏ်ရာများမှာ အလွန်မပြင်းထန်ကြောင်း ထိုင်းနိုင်ငံ အလုပ်သမား သံအရာရှိရုံးက ထုတ်ပြန်ထားသည်။

ဓာတ်ပုံ-Golden Myanmar
ymg/mt
#Yangon_Media_Group

Published 10 June 2022

ကုလသမဂ္ဂလုံခြုံရေးကောင်စီတွင် ဂျပန်နိုင်ငံသည် ၂၀၂၃မှ ၂၀၂၄ အထိ (၂)နှစ်သက်တမ်းအတွက် အလှည့်ကျအဖွဲ့ဝင်နိင်ငံငါးနိုင်ထဲက တစ်နိုင်ငံအဖြစ် ဇွန် ၉ရက်က ရွေးကောက်ခံရတယ်လို့သိရပါတယ်။

ဂျပန်နည်းတူ လာမယ့်သက်တမ်း(၂)နှစ်အတွက် ရွေးကောက်ခံရတဲ့ (၄)နိုင်ငံက ဆွစ်ဇာလန်၊မိုဇမ်ဘစ်၊မော်လ်တာနှင့် အီကွေဒေါတို့ဖြစ်ကြပါတယ်။

အဲဒီ(၅)နိုင်ငံဟာ လက်ရှိ အမြဲတမ်းမဟုတ်သော အလှည့်ကျအဖွဲ့ဝင်နိုင်ငံတွေဖြစ်တဲ့ အိန္ဒိယ၊နော်ဝေး၊ကင်ညာ၊မက္ကဆီကိုနှင့် အိုင်ယာလန်တို့ နေရာ အစားထိုးတာဝန်ယူကြမှာဖြစ်ပါတယ်။

ကုလသမဂ္ဂလုံခြုံရေးကောင်စီမှာ အဖွဲ့ဝင်(၁၅)နိုင်ငံရှိပါတယ်။ အဲဒီအထဲက (၅)နိုင်ငံကတော့ အမြဲတမ်းအဖွဲ့ဝင်နိုင်ငံတွေဖြစ်ကြပြီး အမေရိကန်ပြည်ထောင်စု၊ရုရှား၊တရုတ်၊ပြင်သစ်နှင့်ဗြိတိန်တို့ဖြစ်ကြပါတယ်။

အခြား(၁၀)နေရာကတော့အလှည့်ကျစနစ်နှင့် အခြားနိုင်ငံတွေက တာဝန်ယူကြပါတယ်။နှစ်တိုင်း (၅)နိုင်ငံစီ ပြန်ရွေးကြတာ ဖြစ်ပါတယ်။

ဂျပန်၊ဆွစ်ဇာလန်၊မိုဇမ်ဘစ်၊မော်လ်တာနှင့် အီကွေဒေါတို့ကို ကုလသမဂ္ဂ အထွေထွေညီလာခံကနေ လျို့ဝှက်မဲနှင့် ရွေးချယ်ပေးခဲ့ကြပါတယ်။

၁၉၃နိုင်ငံတက်ရောက်မဲပေးရာမှာ ဂျပန်က ၁၈၄မဲရခဲ့ပါတယ်။

ဂျပန်ရဲ့ ထိပ်တန်းဦးစားပေးကတော့ “  စွမ်းအင်နှင့် စားနပ်ရိက္ခာအပါအဝင် လုံခြုံရေးကိစ္စဖြစ်တယ်” လို့ ဂျပန်ဒုတိယနိုင်ငံခြားရေးဝန်ကြီး အိုဒါဝါယာကီယိုရှီကပြောပါတယ်။

မိုဇမ်ဘစ်ဟာ ကုလလုံခြုံရေးကောင်စီမှာ ပထမဆုံးရွေးချယ်ခံရတာဖြစ်ပြီး ၁၉၂မဲရခဲ့ပါတယ်။

ဆွစ်ဇာလန်က ၁၈၇မဲ၊မော်လ်တာက ၁၈၅မဲနှင့် အီကွေဒေါက ၁၉၀မဲရရှိခဲ့ကြပါတယ်။

Source: AFP

Published 9 June 2022

တံတားကြီးကို သဘာဝဘေးအန္တရာယ်ဒဏ်ခံနိုင်မှုအား ရေရှည်တည်တံ့ဖို့ စဉ်းစားတွက်ချက်ဆောင်ရွက်ဖို့ နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်က မြန်မာ-ကိုးရီးယားချစ်ကြည်ရေးတံတား(ဒလ)တံတားတည်ဆောက်ရေးလုပ်ငန်းခွင်ကို ဇွန်လ(၉)ရက်က လာရောက်စစ်ဆေးကြည့်ရှုရာမှာ ပြောကြားခဲ့ပါတယ်။

တံတားချဉ်းကပ်လမ်းပိုင်းနေရာတွေက လူနေတိုက်တွေနှင့်နီးကပ်နေတဲ့အတွက် သဘာဝဘေးအန္တရာယ်နှင့် လုပ်ငန်းခွင် အန္တရာယ်ကင်းရှင်းရေးကိုပါ အလေးထားဆောင်ရွက်ကြဖို့ကိုလည်း သူကပြောပါတယ်။ အဲဒီအပြင် တည်ဆောက်ရေးလုပ်ငန်းတွေကို သတ်မှတ်ကာလအတွင်း ပြီးစီးနိုင်ရေးနှင့် ဦးစားပေးအလိုက်ဆောင်ရွက်သင့်သည်တွေကို ပြီးစီးဆောင်ရွက်ရေးအတွက်ပါ သူက လုပ်ငန်းခွင်မှာ မှာကြားခဲ့ကြောင်း နစကရဲသတင်းထုတ်ပြန်ချက်အရ သိရပါတယ်။

မြန်မာ-ကိုးရီးယား ချစ်ကြည်ရေးတံတား(ဒလ)ကို ၂၀၁၂ခုနှစ် သမ္မတဦးသိန်းစိန်ရဲ့ ကိုးရီးယားနိုင်ငံ ချစ်ကြည်ရေး ခရီစဉ်အတွင်း ဆွေးနွေးခဲ့တာဖြစ်ပြီး ၂၀၁၃ခုနှစ်မှာ စီမံကိန်းစတင်ခဲ့ပါတယ်။ ၂၀၁၅ခုနှစ်မှာ တည်ဆောက်ရေးလုပ်ငန်းတွေ စတင်ခဲ့ပါတယ်။ တံတားမှာကြိုဆိုင်းတံတားဖြစ်ပြီး ရန်ကုန်မြို့နှင့် မြစ်တစ်ဘက်ကမ်း ဒလမြို့နယ်တို့ကိုဆက်သွယ်ထားတာဖြစ်ပါတယ်။

Published 9 June 2022

မြက်ခင်းပြင်တစ်ခုပေါ်မှာ ပိုးစုန်းကြူးကလေးတွေ ကခုန်နေကြတာကို လူတွေက အံဩချီးမွမ်းနေကြပါတယ်။ ပြီးတော့ လေထိုးဝေလရုပ်ကြီးတစ်ကောင်အပေါ်ကနေ ဖြတ်လျှောက်နေကြပါတယ်။ အဲဒီနောက် ရောင်စုံအနုပညာလက်ရာတွေနှင့် အတူယှဉ်တွဲပြီး ဓာတ်ပုံရိုက်နေကြပါတယ်။ ရေရှည်တည်တံ့ရေးကို အားပေးတဲ့အနေနှင့် စင်္ကာပူမှာ အလင်းရောင်ပွဲတော်ကို ဆင်နွှဲနေကြတာဖြစ်ပါတယ်။

အိုင်-အလင်းရောင်ပွဲတော်ကို စင်္ကာပူမှာ ကိုဗစ်ကြောင့် (၂)နှစ်ရပ်နားထားရာကနေ ယခုစင်္ကာပူမြို့ မရီနာဘေ နေရာတစ်ဝိုက် ယခုပြန်လည်ကျင်းပခဲ့တာပါ။

ကြီးမားတဲ့ အင်စတောလေးရှင်းအမျိုး(၂၀)ထဲမှာ ရေခူကြီးတစ်ကောင်၊စွန့်ပစ်ထားတဲ့ ငါးဖမ်းပိုက်အဟောင်းတွေနှင့်ပြုလုပ်ထားတဲ့ မီးအိမ်တွေနှင့် စီဒီချပ်တွေနှင့်ထုလုပ်ထားတဲ့ပန်းပုတွေလည်း အပါအဝင် ဖြစ်ပါတယ်။

စွမ်းအင်ချွေတာတဲ့ မီးလုံးတွေနှင့် ပတ်ဝန်းကျင်ထိန်းသိမ်းရေး အထောက်အကူပြုပစ္စည်းတွေနှင့် အင်စတောလေးရှင်းအနုပညာလက်ရာတွေကို ဖန်တီးထားပါတယ်။ ဒီလိုဖန်တီးရတာဟာ စဉ်ဆက်မပြတ်ထိန်းသိမ်းရေး အလေ့အထတွေ ထွန်းကားစေဖို့ ရည်ရွယ်တာလို့ ပွဲတော်ကျင်းပသူတွေက ပြောပါတယ်။ဒါပေမယ့် အချို့ကတော့ သူတို့ရဲ့ ပတ်ဝန်းကျင်ထိန်းသိမ်းရေး သတင်းစကားပါးတာ ဘယ်လောက်ထိရောက်မှာလဲလို့ သံသယရှိနေကြပါတယ်။

Source AFP

#WorldNature
Published 9 June 2022

အာဂျင်တီးနားနဲ့ ဘရာဇီးလ်နိုင်ငံကြားနယ်စပ် အီဂွာဇူရေတံခွန်ရှိ ကမ္ဘာ့အကြီးဆုံးရေတံခွန်တွေထဲကတစ်ခုဖြစ်တဲ့ ဂါဂန်တာဒယ်လ်ဒီယာဘလိုရှုမျှော်ခင်းကြီးကို ခရီးသွားဧည့်သည်များအတွက် ဗုဒ္ဓဟူးနေ့ကပြန်လည်ဖွင့်လှစ်လိုက်ပြီဖြစ်ကြောင်း အာဏာပိုင်များကထုတ်ပြန်လိုက်ပါတယ်။

#Yangon_Media_Group

#LocalNews
Published - 9 June 2022

လှည်းကူးမြို့နယ်မှာတွေ့ရှိထားတဲ့ ရှေးဟောင်း အထောက်အထားပစ္စည်းတွေ စုစည်းပြသထားတဲ့ လှည်းကူးမြို့နယ် သမိုင်းပြတိုက်ကိုလှည်းကူးမြို့နယ်၊ ပိုက်ကြီးဝဲကျေးရွာမှာ အခမဲ့ပြသထားတယ်လို့ လှည်းကူးမြို့နယ်သမိုင်းပြုစုရေးအဖွဲ့၊ အတွင်းရေးမှူးဦးသက်လွင်က ပြောပါတယ်၊၊

#Yangon_Media_Group

#LocalNews
Published - 9 June 2022

ရန်ကုန်၊ မန္တလေး၊ နေပြည်တော်နှင့်တောင်ကြီးမြို့တို့ရှိ သတ်မှတ်ထားသည့် KBZ ATM ငွေထုတ်စက်များတွင် ဇွန် ၉ ရက်မှစတင်ပြီး တစ်ပတ်လျှင် အများဆုံး ကျပ် ၃ သိန်း ငွေသားထုတ်ယူနိုင်ပြီဖြစ်ကြောင်း KBZ ဘဏ်မှ သတင်းထုတ်ပြန်ထားသည်။

ကမ္ဘောဇဘဏ်အနေနှင့် ဘဏ်လုပ်ငန်းဆိုင်ရာ လိုအပ်ချက်များကို ဖြည့်ဆည်းဆောင်ရွက်ပေးနိုင်ရန်အတွက် ATM စက်များတွင် ငွေသားထုတ်ယူနိုင်ရန် စီစဉ်ဆောင်ရွက်ပေးနေခြင်းဖြစ်ကြောင်း၊ ယင်းအပြင်ကမ္ဘောဇဘဏ် MPU Debit (ATM ကတ်) မှဖြစ်စေ၊ mBanking Cardless Withdrawal ကတ်မဲ့ငွေထုတ်ခြင်းနည်းလမ်းဖြင့်ဖြစ်စေ ထုတ်ယူနိုင်ကြောင်းထုတ်ပြန်ချက်တွင် ဖော်ပြထားသည်။

ယင်းအပြင် ငွေသားထုတ်ယူနိုင်သည့် KBZ ATM စက်များကို ဆက်လက်တိုးချဲ့ပေးသွားမည်ဖြစ်ပြီး ငွေသားထုတ်ယူနိုင်သည့် ATM စာရင်းများကို အချိန်နှင့် တပြေးညီကြေညာသွားမည် ဖြစ်ကြောင်း သိရသည်။

ymg/sth
#Yangon_Media_Group

#LocalNews
Published - 9 June 2022

မြန်မာ-ထိုင်းနယ်စပ်ဂိတ် ပိတ်ထားတာကြောင့် ထိုင်းမှာပြစ်ဒဏ်ကျခံပြီးသား မြန်မာရွှေ့ပြောင်းအလုပ်သမားတွေအနေနဲ့ ထိုင်း လ.ဝ.က အချုပ်ထဲမှာ ပြစ်ဒဏ်ကာလတိုးတဲ့ပုံစံမျိုးနဲ့ ဆက်ပြီးနေကြရတယ်လို ထိုင်းနိုင်ငံတောင်ပိုင်းအခြေစိုက် ပညာရေးနဲ့ ဖွံ့ဖြိုးတိုးတက်ရေးဖောင်ဒေးရှင်းကနေ သိရပါတယ်။

#Yangon_Media_Group

#LocalNews
Published_9 June 2022

ကမ္ဘာ့ကျန်းမာရေးအဖွဲ့အစည်း (WHO) မြန်မာပြည်ရုံးခွဲ၏ ဝန်ထမ်းတစ်ဦး မော်လမြိုင်တွင် သေနတ်ဖြင့် ပစ်သတ်ခံရသည့်အပေါ် ကမ္ဘာ့ကုလသမဂ္ဂ (UN) က ရှုတ်ချကြောင်းနှင့် ကျူးလွန်သူများအနေဖြင့် တာဝန်ခံရမည်ဖြစ်ကြောင်း UN Resident Coordinator နှင့် လူသားချင်းစာနာမှုဆိုင်ရာ ညှိနှိင်းရေးမှူး Mr. Ramanathan Balakrishnan က ထုတ်ပြန်လိုက်သည်။

"လူသားချင်းစာနာထောက်ထားမှုဆိုင်ရာကို လေးစားကြဖို့ ကမ္ဘာ့ကုလသမဂ္ဂအနေနဲ့ သက်ဆိုင်ရာ အဖွဲ့အစည်းအားလုံးကို ပန်ကြားထားပြီး ဖြစ်သလို အရပ်သားတွေရဲ့ အခွင့်ရေးနဲ့လုံခြုံမှုကို ကာကွယ်ပေးဖို့အတွက်လည်း ထပ်လောင်းတောင်းဆိုပါတယ်။ အရပ်သားများအပေါ် အကြမ်းဖက်မှုလုပ်ရပ်များအပေါ် ပြင်းပြင်းထန်ထန် ရှုတ်ချပါတယ်။ ဒီဖြစ်ရပ်နဲ့ပတ်သက်ပြီး စုံစမ်းစစ်ဆေးမှုများ ပြုလုပ်ဖို့နဲ့ ကျူးလွန်သူတွေ တာဝန်ခံဖို့ ကုလသမဂ္ဂက မျှော်လင့်ပါတယ်" ဟုယင်းကဆိုသည်။

ဇွန်လ ၈ ရက် ညနေ ၅ နာရီခန့်က မော်လမြိုင်မြို့ သံလွင်ဥယျာဉ်လမ်းပေါ်တွင် ဆိုင်ကယ်စီးလာသော WHO မြန်မာပြည်ရုံးခွဲ၏ ဝန်ထမ်းဖြစ်သူ ဦးမျိုးမင်းထွဋ်ကို သေနတ်ဖြင့်ပစ်သတ်ခဲ့သောကြောင့် သေဆုံးခဲ့ခြင်း ဖြစ်ကြောင်း WHO က ထုတ်ပြန်ထားသည်။

WHO ၏ ထုတ်ပြန်ချက်တွင် အဆိုပါ WHO ဝန်ထမ်းမှာ ရုံးမှ အိမ်သို့အပြန် သံလွင်ဥယျာဉ်လမ်းတွင် ၎င်း၏ ကိုယ်ပိုင်မော်တော်ဆိုင်ကယ်စီးနင်းလာစဉ် သေနတ်ဖြင့်ပစ်ခံရကာ သေဆုံးခြင်းဖြစ်ကြောင်းနှင့် ယင်းဖြစ်စဉ်အပေါ် လုပ်ဖော်ကိုင်ဖက်၏ မိသားစုနှင့် ထပ်တူထပ်မျှ အထူးဝမ်းနည်းကြေကွဲရကြောင်းလည်း ဖော်ပြထားသည်။

ဦးမျိုးမင်းထွဋ်သည် WHO မြန်မာရုံးတွင် ၅ နှစ်ခန့် ကားဒရိုင်ဘာအဖြစ် တာဝန်ထမ်းဆောင်ခဲ့သူဖြစ်ကြောင်းနှင့် အဆိုပါ ဖြစ်ရပ်၏ အသေးစိတ်အခြေအနေမှာ အတိအကျမသိရှိရသေးကြောင်းလည်း ဖော်ပြထားသည်။

ကုလသမဂ္ဂအနေဖြင့် အဆိုပါ ဖြစ်စဉ်အပေါ် လွန်စွာဝမ်းနည်းကြောင်းနှင့် ယခုကာလတွင် အခက်အခဲများရှိနေသော်လည်း ကုလသမဂ္ဂအနေဖြင့် လူသားချင်းစာနာမှုနှင့် ဖွံ့ဖြိုးတိုးတက်ရေး အထောက်အပံ့များ ပေးနေကြောင်းလည်း အဆိုပါ ထုတ်ပြန်ချက်တွင် ပါရှိသည်။

photo-CJ
ymg/mt
#Yangon_Media_Group

#LocalNews
Published _9 June 2022

ရန်ကုန်မြို့တွင်း မြို့နယ်အချို့ရှိ လမ်းများတွင် ရေကြီးရေလျှံမှုများ မဖြစ်ပေါ်စေရန် ရန်ကုန်မြို့တော် စည်ပင်သာယာရေးကော်မတီ အင်ဂျင်နီယာဌာန(ရေစီးရေလာစီမံခန့်ခွဲမှု)က ရေစုပ်စက်များ တပ်ဆင်ထားကြောင်း သိရသည်။

ယင်းမှာ မိုးတွင်းကာလတွင် လမ်းများ၌ ရေကြီးရေလျှံမှုများ မဖြစ်ပေါ်စေရန်ဖြစ်ကြောင်း၊ အဆိုပါ ရေစုပ်စက်များကို မြစ်ထွက်ပေါက်များတွင် တပ်ဆင်ပေးထားခြင်း ဖြစ်ကြောင်း သိရသည်။

ကျောက်တံတားမြို့နယ် ပန်းဆိုးတန်းလမ်းရှိ အမှတ် (၁၀) မြစ်ထွက်ပေါက်၌ တစ်နာရီလျှင် ရေဂါလန် ၂၂၀၀၀၀ စုပ်ထုတ်နိုင်သည့် မြင်းကောင်ရေ ၁၂၈ ကောင်အားရှိ ၉၀ ကီလိုဝပ် ရေစုပ်စက် ၊ ပန်းဘဲတန်းမြို့နယ် ရွှေတိဂုံဘုရားလမ်းရှိ အမှတ်(၈) မြစ်ထွက်ပေါက်တွင် တစ်နာရီလျှင် ရေဂါလန် ၅၅၀၀၀ စုပ်ထုတ်နိုင်သည့် မြင်းကောင်ရေ ၉၅ ကောင်အား ၇၀ ကီလိုဝပ်ရေစုပ်စက်နှင့် လသာမြို့နယ် ၂၂ လမ်းရှိ အမှတ်(၆) မြစ်ထွက်ပေါက်၌ တစ်နာရီလျှင် ရေဂါလန် ၂၅၀၀၀၀ စုပ်ထုတ်နိုင်သည့် မြင်းကောင်ရေ ၁၂၅ ကောင်အား ၉၀ ကီလိုဝပ် ရေစုပ်စက်၊ လမ်းမတော်မြို့နယ် မော်တင်ယာယီဈေးရပ်ကွက် ကမ်းနားလမ်းရှိ ရွာသစ်ချောင်း ရေထိန်းတံခါးမြစ်ထွက်ပေါက်အတွင်း အမှိုက်နှင့် နုန်းများဆယ်ယူရှင်းလင်းသည့် ရေထိန်းတံခါးတွင်လည်း တစ်နာရီလျှင် ရေဂါလန် ၁၉၀၀၀၀ စုပ်ထုတ်နိုင်သည့် မြင်းကောင်ရေ ၆၀ အား ၄၀ ကီလိုဝပ် ရေစုပ်စက်များတပ်ဆင်ထားကြောင်း သိရသည်။

ယင်းအပြင် ရေစီးရေလာစီမံခန့်ခွဲမှု အနေဖြင့်ရန်ကုန်တိုင်းဒေသကြီးအတွင်း ရေမြောင်းနှင့် မြေအောက် ရေနှုတ်မြောင်းများ ရေစီးရေလာ ကောင်းမွန်စေရေးအတွက် Excavator ယန္တရားယာဉ်များ၊ မြောင်းရှင်းလုပ်သားများဖြင့် အမှိုက်နှင့်မြောင်းချေးများ ဆယ်ယူရှင်းလင်းမှုများလည်း ပြုလုပ်နေကြောင်း သိရသည်။

ymg/NN
#Yangon_Media_Group

#LocalNews
Published_9 June 2022

ရန်ကုန်တိုင်းဒေသကြီး၊ လှည်းကူးမြို့နယ်၊ ညောင်နှစ်ပင် ကျေးရွာအနီးရှိ ဖွဲ့စည်းပုံအခြေခံဥပဒေ (၂၀၀၈ ခုနှစ်) ရေးဆွဲရန် အမျိုးသားညီလာခံကျင်းပ ပြုလုပ်ခဲ့သည့် ပြည်ထောင်စုခန်းမ အဆောက်အဦကို ထိန်းသိမ်းရန် နစက ဥက္ကဌ ပြောကြားလိုက်သည်။

ဇွန်လ ၈ ရက် နံနက်တွင် အဆိုပါ ပြည်ထောင်စုခန်းမအဆောက်အဦနှင့် ဆက်စပ်အဆောက်အဦများကို သွားရောက်ကြည့်ရှုစဉ် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က အထက်ပါအတိုင်း ပြောကြားလိုက်ခြင်း ဖြစ်သည်။

အမျိုးသားညီလာခံကျင်းပခဲ့သည့် အဆောက်အဦများသည် နိုင်ငံတော်အတွက်အရေးကြီးသည့် ဖွဲစည်းပုံအခြေခံဥပဒေ (၂၀၀၈ ခုနှစ်) ရေးဆွဲဖော်ဆောင်ခဲ့သည့် သမိုင်းဝင်အဆောက်အဦများ ဖြစ်ကြောင်း၊ ယခင်ခေတ်အဆက်ဆက်က သမိုင်းဝင်အဆောက်အဦများကို တတ်နိုင်သမျှ ထိန်းသိမ်းထားခဲ့ကြောင်း၊ ယခုထိန်းသိမ်းမှုများ အားနည်းခဲ့သည့်အတွက် ပျက်စီးယိုယွင်းမှုများ ဖြစ်ပေါ်ခဲ့သည်ကိုတွေ့ရှိရသောကြောင့် ရေရှည်တည်တံ့စေရေးအတွက် အလေးထားထိန်းသိမ်းဆောင်ရွက်ရန်နှင့် ရှိပြီးသား အဆောက်အဦများကို ပြန်လည်ပြုပြင်ထားရှိရန်လိုကြောင်းပြောကြားခဲ့ခြင်းလည်း ဖြစ်သည်။

အမျိုးသားညီလာခံကျင်းပခဲ့သည့် ပြည်ထောင်စုခန်းမအဆောက်အဦးတွင် ဖွဲ့စည်းပုံအခြေခံဥပဒေ (၂၀၀၈ ခုနှစ်) အတည်ပြုပြဋ္ဌာန်းနိုင်ရေးအတွက် ၂၀၀၄ ခုနှစ်မှ ၂၀၀၇ အထိ အစုအဖွဲ့ ၈ ဖွဲ့မှ ကိုယ်စားလှယ် ၇၀၂ ဦးဖြင့် အမျိုးသားညီလာခံ ၇ ကြိမ် ကျင်းပခဲ့ခြင်းဖြစ်သည်။

အမျိုးသားညီလာခံ ကျင်းပပြုလုပ်ရာ မြေနေရာသည် ၅၈၅ ဒသမ ၈၁ ဧကကျယ်ဝန်းပြီး ဧက ၂၀၀ ကို စိုက်ပျိုးရေးဇုန်အဖြစ်လည်းကောင်း၊ ဧက ၁၀၀ ခန့်ကို မွေးမြူရေးဇုန်အဖြစ်လည်းကောင်း အသုံးပြုထားကြောင်းလည်း သိရသည်။

ymg/mt
#Yangon_Media_Group

#Local_News
Published_ 9 June 2022

ရခိုင်၊ ကချင်၊ ရှမ်း၊ ကရင်၊ ချင်းပြည်နယ်နဲ့ ရန်ကုန်မြို့ဆင်ခြေဖုံးမှ လူဦးရေ ၂ သောင်းခွဲကျော်ခန့်ဟာ ၂၀၂၂ ခုနှစ် မေလအတွင်းမှာ ယူနီဆက်ရဲ့အခြေခံ ကျန်းမာရေးဝန်ဆောင်မှုများ ရရှိခဲ့တယ်လို့ ထုတ်ပြန်ထားပါတယ်။

မြန်မာနိုင်ငံမှာ လက်ရှိဖြစ်ပွားနေတဲ့ အကျပ်အတည်းကာလ တစ်နှစ်ကျော် ကြာမြင့်လာချိန်မှာ ကလေးငယ်ဦးရေ ငါးသန်းခန့်ဟာ လူသားချင်းစာနာထောက်ထားမှု အကူအညီများ လိုအပ်နေတယ်လို့ ဆိုပါတယ်။

ဂျပန်နိုင်ငံ၊ နော်ဝေနိုင်ငံ၊ ဒိန်းမတ်နိုင်ငံ အစိုးရများအပြင် ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) ရဲ့ ပံ့ပိုးမှုများဖြင့် ယူနီဆက်က ထိခိုက်ခံစားနေကြရတဲ့ ကလေးငယ်များနဲ့ မိသားစုများကို မရှိမဖြစ်အရေးပါတဲ့ ဝန်ဆောင်မှုများကို ဖြည့်ဆည်းပံ့ပိုးပေးလျက်ရှိပါတယ်။

ဒါပေမယ့် ဆက်လက်ဖြည့်ဆည်းပံ့ပိုးနိုင်ဖို့အတွက် အထောက်အပံ့များ လိုအပ်နေတယ်လို့လည်း ထုတ်ပြန်ချက်မှာ ဖော်ပြထားပါတယ်။

ymg-mnn
#Yangon_Media_Group