#LocalNews
Published_9 June 2022

မလေးရှားနဲ့ ထိုင်းနိုင်ငံနယ်စပ် ထိုင်းတောင်ပိုင်း၊ ဆုန်ခလာခရိုင်၊ ဟတ်ရိုင်မြိုနယ်မှာ ထိုင်းနိုင်ငံသားတစ်ယောက် သေဆုံးတဲ့ အမှုမှာ သံသယရှိနေတယ်ဆိုတဲ့ ရခိုင်တိုင်းရင်းသား ၉ ယောက် ကိစ္စကို သက်ဆိုင်ရာအနေနဲ့ အကူအညီပေးစေလိုတယ်လို ရွှေ့ပြောင်းအလုပ်သမား အခွင့်အရေးကွန်ယက် (MWRN) ရဲ့ မြန်မာအလုပ်သမားတာဝန်ခံ ကိုသိန်းထွန်းက YMG ကို ပြောပါတယ်။

#Yangon_Media_Group

#LocalNews
Published _ 9 June 2022

တရုတ်ပြည်သူ့သမ္မတနိုင်ငံ ဟွေကျိုးမြို့ကနေ ဒီကနေ့ ဇွန်လ ၉ ရက်နေ့မှာ ပြန်လာတဲ့ မြန်မာ ၃၀၀ လောက် ရှိပါတယ်။

#Yangon_Media_Group

#DailyNews
Published - 9 June 2022

၁။ နယ်စပ်ဂိတ်များ ပိတ်ထားခြင်းကြောင့် ထိုင်းတွင်ပြစ်ဒဏ်ကျ မြန်မာလုပ်သားများ ပြစ်ဒဏ်ကာလတိုးသကဲ့သို့ဖြစ်နေ

၂။ လှည်းကူးမြို့နယ်သမိုင်းပြတိုက်အခမဲ့ပြသထား၊ အနုပညာပြတိုက်တိုးချဲ့ဖွင့်နိုင်ရန်စီစဉ်နေ

၃။ နေ့စဉ်မိုးလေဝသသတင်း။

၄။ ဘရာဇီးလ်နှင့် အာဂျင်တီးနားနယ်စပ်ကြားရှိ သေမင်းခံတွင်းဝရေတံခွန် မိုးရေကြီးပြီးနောက်ပြန်လည်ဖွင့်လှစ်... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published_ 9 June 2022

ခရီးသွားကုမ္ပဏီများက စီစဥ်တဲ့ အဖွဲ့လိုက်ခရီးစဥ်များတွင် ပါဝင်မည့် နိုင်ငံခြားသားများသည်လည်း ဇွန်လ ၁၀ ရက်နေ့မှ စတင်၍ ဂျပန်နိုင်ငံသို့ ဝင်ရောက်နိုင်မှာဖြစ်ကြောင်း ဂျပန်သံရုံးက ကြေညာထားပါတယ်။

ဂျပန်နိုင်ငံသို့ သွားရောက်ကြမည့် မြန်မာနိုင်ငံသားများအား ဗီဇာထုတ်ပေးခြင်းနှင့် ပတ်သက်၍ မြန်မာနိုင်ငံတွင် နေထိုင်သူများသို့ မေလ ၂၆ ရက်နေ့တွင် ဂျပန်အစိုးရက ယခုနှစ် ဇွန်လမှာ စတင်ကျင့်သုံးမယ့် COVID – 19 ရောဂါကူးစက်ပျံ့နှံမှု တားဆီးကာကွယ် ထိန်းချုပ်ရေးစီမံချက်ကို ထုတ်ပြန်ကြေညာခဲ့ပါတယ်။

အဆိုပါ စီမံချက်အရ ဂျပန်နိုင်ငံသို့ သွားရောက်ရန် လိုအပ်သည်ဟု အသိအမှတ်ပြုခံရတဲ့ မိသားစု/အသိမိတ်ဆွေထံ အလည်အပတ်သွားရောက်ရန် ရည်ရွယ်သော နိုင်ငံခြားသားများသည် ဇွန် ၁ ရက်မှစတင်၍ ဂျပန်နိုင်ငံသို့ဝင်ရောက်နိုင်နေပြီ ဖြစ်ပါတယ်။

အဆိုပါ စီမံချက်အသစ်အရ ဂျပန်သံရုံးတွင် ဗီဇာလျှောက်ထားခြင်းနှင့် ပတ်သက်၍ ကျောင်းသားများ၊ နည်းပညာအလုပ်သင်သင်တန်းသားများနှင့် ခရီးသွားကုမ္ပဏီစသည်တို့က လက်ခံဆောင်ရွက်ပေးသည့် အလည်အပတ်သွားရောက်မည့်သူများ အပါအဝင် ဂျပန်နိုင်ငံသို့ သွားရောက်လိုသူများအတွက် ဗီဇာလျှောက်ထားရာတွင် ဂျပန်နိုင်ငံအတွင်းရှိ တာဝန်ယူလက်ခံမည့် တာဝန်ခံ (ကျောင်းများ၊ ကုမ္ပဏီနှင့် အဖွဲအစည်းများ၊ ခရီးသွားကုမ္ပဏီများ) သည် ကျန်းမာရေး၊ အလုပ်သမားနှင့် လူမှုဖူလုံရေးဝန်ကြီးဌာန၏ နိုင်ငံတွင်းဝင်ရောက်မည့်သူ၏ ကျန်းမာရေးစစ်ဆေးမှုစနစ် (ERFS) အတွက် သတ်မှတ်ထားတဲ့ လျှောက်ထားမှုများကိုပြုလုပ်ပြီး ရရှိလာသောလျှောက်ထားမှု လက်ခံပြီးစီးကြောင်းထောက်ခံစာကို တင်ပြရန် လိုအပ်ပါတယ်။

သို့ရာတွင် မိသားစု၊ အသိမိတ်ဆွေထံ အလည်အပတ်ရည်ရွယ်ချက်ဖြင့် သွားရောက်သူများမှာမူ ကျန်းမာရေးစစ်ဆေးမှုစနစ်(ERFS)အတွက် သတ်မှတ်ထားတဲ့ လျှောက်ထားမှု လက်ခံပြီးစီးကြောင်းထောက်ခံစာ မလိုအပ်ဘူးလို့ ဆိုပါတယ်။

ymg-mnn
#Yangon_Media_Group

#LocalNews
Published - 9 June 2022

ပြည်ပနိုင်ငံများသို့ သွားရောက်အလုပ်လုပ်ကိုင်မည့်သူများ အနေဖြင့် ပြည်ပအလုပ်သမားမှတ်ပုံတင်ကတ် (Overseas Worker Identification Card- OWIC ) ပါရှိမှသာ အပြည်ပြည်ဆိုင်ရာ လေဆိပ်များ၊ နယ်စပ်ဂိတ်များမှ တစ်ဆင့်ပြည်ပနိုင်ငံများသို့ သွားရောက်နိုင်မည်ဖြစ်ကြောင်း အလုပ်သမားဝန်ကြီးဌာနမှ ထုတ်ပြန်ထားသည်။

အဆိုပါ ကတ်ကို ငါးနှစ်သက်တမ်းဖြင့် ထုတ်ပေးလျက်ရှိပြီး ယင်းသတ်မှတ်ငါးနှစ်အတွင်း ခွင့်ဖြင့်ပြန်လာ၍ ပြန်လည်ထွက်ခွာမည်ဆိုပါက အဆိုပါ OWIC ကို ဆက်လက်ကိုင်ဆောင် အသုံးပြုနိုင်ကြောင်းလည်း သိရသည်။

ပြည်ပနိုင်ငံသို့ သွားရောက်လုပ်ကိုင်နေသည့် အလုပ်သမားစာရင်းများ ရရှိနိုင်ရေး၊ အလုပ်သမား စေလွှတ်သည့် ပြည်ပအလုပ်အကိုင် အကျိုးဆောင် လိုင်စင်ရ အေဂျင်စီများမှ ဝင်ငွေခွန်များ၊ ကုန်သွယ်ခွန်များကို စနစ်တကျ ပေးဆောင်စေ၍ နိုင်ငံတော်အတွက် ဝင်ငွေများရရှိစေရေး၊ အလုပ်သမားများ ပြည်ပနိုင်ငံများတွင် အခက်အခဲပြဿနာ တစ်စုံတစ်ရာဖြစ်ပွား၍ အကူအညီတောင်းခံလာပါက အချက်အလက်များကို စစ်ဆေးပြီး ထိရောက်စွာကူညီဆောင်ရွက်ပေးနိုင်ရေး၊ နိုင်ငံအလိုက် လုပ်သားထွက်ခွာမှု စာရင်းများမှ တစ်ဆင့် လိုအပ်သည့်မူဝါဒများ ရေးဆွဲချမှတ်နိုင်ရေး၊ ပြည်ပနိုင်ငံများသို့ သွားရောက်အလုပ်လုပ်ကိုင်မည့်သူများကို စနစ်တကျ မှတ်ပုံတင်ထားရှိနိုင်ရေးတို့အတွက် Data Server တွင် အချက်အလက်များ သိမ်းဆည်း၍ ပြည်ပအလုပ်အကိုင် အလုပ်သမား သက်သေခံကတ် Overseas Worker Identification Card- OWIC ကို သက်တမ်း ငါးနှစ်ဖြင့် ထုတ်ပေးနေခြင်းဖြစ်ကြောင်း ထုတ်ပြန်ချက်အရ သိရသည်။

ymg/sth
#Yangon_Media_Group

Published 9 June 2022

တောင်ကိုးရီးယားနိုင်ငံ ဒေဂူးမြို့ရှိ ရုံးအဆောက်အအုံတစ်ခုတွင် ဇွန် ၉ရက် ကြာသပတေးနေ့က ရှို့မီးဟုသံသယဖြစ်စရာ  မီးလောင်မှုကြောင့်  အနည်းဆုံးလူ(၇)ဦးသေဆုံးပြီး ဒါဇင်များစွာ ဒဏ်ရာရရှိသွားခဲ့ကြတယ်လို့ ဒေသမီးသတ်နှင့်ရဲအရာရှိတွေကပြောပါတယ်။

မီးသတ်သမားဒါဇင်များစွာနှင့် မီးသတ်ယာဉ်တွေဟာ အခင်းဖြစ်ပွားရာသို့ အမြန်ဆုံးရောက်ရှိလာကြပြီး  ဒေသံစံတော်ချိန် မနက်၁၀နာရီ ၅၅မိနစ်ခန့်က စတင်လောင်ကျွမ်းခဲ့တဲ့ မီးကို ငြှိမ်းသတ်ခဲ့ကြပါတယ်။မီးဟာ ရုံးအဆောက်အဦကြီးရဲ့ ခုနှစ်ထပ်မှာ လောင်ကျွမ်းတာဖြစ်ပါတယ်။

လူ(၇)ဦးသေဆုံးကြောင်း သက်ဆိုင်ရာက အတည်ပြုပါတယ်။ အဲဒီအထဲမှာ ရှေ့နေရုံးခန်းကို မီးရှို့တယ်လို့ သံသယဖြစ်ရတဲ့ အမည်မသိသူတစ်ဦးလည်းပါဝင်ပါတယ်။

အနည်းဆုံး လူ၄၁ ဦးဒဏ်ရာရရှိခဲ့ကြပြီး အများစုကတော့ မီးခိုးတွေကြောင့် အသက်ရှုကြပ်ကြသူတွေဖြစ်ပါတယ်။ အဲဒီထဲက ၂၆ ဦးကို အနီးအနားက‌ ဆေးရုံတွေဆီ ပို့ဆောင်ခဲ့ကြတယ်လို့ ဒေးဂူးခရိုင်ရဲဌာနမှူး ပတ်ခ်ဆောင်ဂျင်းက ပြောပါတယ်။

တစ်ဦးတစ်ယောက်မျှ အခန်းထဲမှာ ပိတ်မိမနေဘူးလို့ ပတ်ခ်ကပြောပါတယ်။

အဲဒီသံသယဖြစ်စရာအမျိုးသားဟာ မီးရှို့ရာမှာ အသုံးပြုဖို့ဖြစ်နိုင်တဲ့ ပုံးတစ်လုံးကို သယ်ပြီး အိမ်ကထွက်ခွာသွားတာကို လုံခြံရေးကင်မရာကနေ တွေ့ရတယ်လို့ ဒေးဂူးမြို့ပြရဲတပ်ဖွဲ့က အရာရှိ ဂျုန်းဟေဝုခ် ကပြောပါတယ်။

သေဆုံးသူတွေအားလုံးကို အခန်းတစ်ခန်းထဲမှာပဲတွေ့ကြရပြီး ဘာကြောင့် ဖြစ်ရသလဲဆိုတာကို ရဲက စုံစမ်းမှုတွေပြုလုပ်နေပြီလို့ဂျုန်းက ပြောပါတယ်။

ဘီအိုမီအိုဒေါင်းရပ်ကွက်က အဲဒီအဆောက်ကအဦထဲကနေ မီးခိုးတွေထွက်လာတာကိုမြင်ရတဲ့ မျက်မြင်သက်သေတွေဆီက ရတဲ့ပုံတွေကို တောင်ကိုးရီးယား မီဒီယာတွေက ထုတ်ပြန်ပါတယ်။ ဒေးဂူးဟာ တောင်ကိုးရီးယားရဲ့ စတုတ္ထအကြီးဆုံးမြို့ဖြစ်ပြီး လူဦးရေ ၂.၆သန်းကျော်နေထိုင်ကြပါတယ်။

ဒေးဂူးမှာ မီးရှို့တိုက်ခိုက်မှုတွေ အဆိုးရွာဆုံးဖြစ်ခဲ့တဲ့ မှတ်တမ်းရှိခဲ့ပါတယ်။ ၂၀၀၃ခုနှစ်က အသက်၅၆နှစ်အရွယ် အမျိုးသားတစ်ဦးက မြေအောက်ရထားအတွင်း မီးရှို့ခဲ့လို့ လူပေါင်း ၁၉၂ ဦးသေဆုံးခဲ့ရတာဖြစ်ပါတယ်။

Source AP

#LocalNews
Published - 9 June 2022

မြန်မာနိုင်ငံမှာ ကိုဗစ်ကာကွယ်ဆေးထိုးထားသူ စုစုပေါင်း(၃၃)သန်းကျော်နဲ့ ထပ်ဆောင်းကာကွယ်ဆေး(၂)သန်းကျော်ထိုးနှံပေးပြီးဖြစ်တယ်လို့ ကျန်းမာရေးဝန်ကြီးဌာနရဲ့ ထုတ်ပြန်ချက်တွေအရ သိရပါတယ်၊၊

ဇွန်လ(၇)ရက်ကကျန်းမာရေးဝန်ကြီးဌာနရဲ့စာရင်းတွေအရသိရတာဖြစ်ပြီး ကိုဗစ်ကာကွယ်ဆေးပထမအကြိမ်နဲ့ အကြိမ်ပြည့်ထိုးထားသူ စုစုပေါင်း(၃၃)သန်းကျော်နဲ့ ထပ်ဆောင်းကာကွယ်ဆေးထိုးထားသူ(၂)သန်းကျော်ရှိတယ်လို့ ဖော်ပြပါရှိပါတယ်၊၊

လာမယ့်မိုးရာသီမှာ ကိုဗစ်အပါအဝင်အသက်ရှူလမ်းကြောင်းဆိုင်ရာရောဂါတွေ ပြန်အဖြစ်များနိုင်တဲ့အတွက် ကိုဗစ်ကာကွယ်ဆေးထိုးရန်ကျန်ရှိနေသူတွေ ထိုးနှံထားသင့်တယ်လို့ ဆရာဝန်ကြီးတွေက အကြံပြုထားပါတယ်၊၊

အသက်(၁၈)နှစ်နဲ့အထက် ပြည်သူများကို ကိုဗစ်ကာကွယ်ဆေးအခမဲ့ထိုးပေးခဲ့ပြီးအသက်(၁၅)နှစ်အထက်ပြည်သူများနှင့် အသက်(၅)နှစ်မှ(၁၈)နှစ်ကျောင်းသား၊ ကျောင်းသူများ အခမဲ့ ထိုးပေးနေကာအသက်(၁၈)နှစ်အထက်အကြိမ်ပြည့်ထိုးပြီးသူတွေ (၆)လကြာမြင့်ပါကထပ်ဆောင်းကာကွယ်ဆေးများ ဆက်လက်ထိုးနှံပေးလျက်ရှိတယ်လို့ သိရပါတယ်၊၊

ymg/tthl
#Yangon_Media_Group

#LocalNews
Published - 9 June 2022

ပြည်တွင်း၌ ကြက်သွန်လက်ကျန်နည်းနေသဖြင့် ဈေးဆက်မြင့်ဦးမည်ဖြစ်ကြောင်း ဘုရင့်နောင်ကုန်စည်ဒိုင်မှ ဥက္ကဌ ဦးခင်ဟန်က YMG ကို ပြောသည်။

"ကြက်သွန်ပြည်တွင်းလက်ကျန်နည်းနည်း နည်းနေတယ်။ လက်ကျန်နည်းတယ်ဆိုတာထက် ထိန်းပြီးတင်နေကြတာ။ ပစ္စည်းကရှိတယ်။ ထိန်းပြီးတင်နေကြလို။ အများကြီးရှိတယ်။ အကြီးဆုံးက ၁၆၀၀ အသေးက ၁၁၀၀၊ နည်းနည်းပါးပါးတော့ ဈေးတတ်တာရှိနေအုံးမယ်။ ဈေးက တော့မြင့်နေအုံးမယ်" ဟုဦးခင်ဟန်ကပြောသည်။

ပြီးခဲ့သည့် ၂၀၂၁ ခုနှစ်တွင် ကြက်သွန်စိုက်တောင်သူနှင့် ကုန်သည်များ အရှုံးပေါ်ခဲ့ပြီး သွင်းအားစုနှင့် စက်သုံးဆီဈေး အဆမတန် မြင့်တက်မှုကြောင့် ယခုနှစ်တွင် ဧကလျှော့ပေါ့ စိုက်ပျိုးခဲ့ကြခြင်းဖြစ်ကြောင်း သိရသည်။

တောင်သူများမှ ရောင်းချသည့် ဈေးနှုန်းသည် တစ်ပိဿာ ၁၀၀၀ ဝန်းကျင်နှုန်းထားဖြစ်သဖြင့် ပြည်တွင်းဈေးကွက် တွင် ကြက်သွန်တစ်ပိဿာလျှင် ကျပ်ငွေ ၁၀၀၀ မှ ၁၆၀၀ ဝန်းကျင်အထိ ပေါက်ဈေးရှိကြောင်း သိရသည်။

ပြည်တွင်းကြက်သွန်များကို ဘင်္ဂလားဒေ့ရှ်၊ တရုတ်၊ အိန္ဒိယ၊ ထိုင်းနှင့် မလေးရှားနိုင်ငံများသို့ တင်ပို့ရောင်းချနေခြင်းဖြစ်ပြီး ယခုနှစ်တွင် ဘင်္ဂလားဒေ့ရှ်မှ ဝယ်ယူမှု နည်းကြောင်း သိရသည်။

ymg/sth
#Yangon_Media_Group

#LocalNews
Published - 9 June 2022

သဗ္ဗာန်ဆိပ်ငါးခုကို ဇွန်လ(၉)ရက်မှ (၁၁)ရက်အထိ သုံးရက်တာယာယီပိတ်ထားမည်ဟု ကြားသိရသော်လည်း ကမာအောင်သဗ္ဗာန်ဆိပ်၊ သမ္မတကမ်းခြေနှင့် ဆိပ်ကြီးခနောင်တို့ဘက်ခြမ်းဖွင့်ထားဆဲဖြစ်သည်ဟု ကမာအောင်သဗ္ဗာန်ဆိပ်မှ သဗ္ဗာန်သမားကိုကျော်ရထံမှ သိရသည်၊၊

"သဗ္ဗာန်ဆိပ်ငါးခုကို ပိတ်ထားမယ်လို့တော့ကြားမိပါတယ်၊၊ ကျွန်တော်တို့ဆိပ်မဟုတ်လို့ ပိတ်ရတဲ့အကြောင်းအရင်းတော့ အတိအကျ မသိပါဘူး၊၊ ကျွန်တော့်ကမာအောင်ဆိပ်တော့ အခုထိအထက်က အကြောင်းကြားတာမျိုး မရှိသေးပါဘူး၊၊ တကယ်လို့ ပိတ်လိုက်မယ်ဆိုရင် သဗ္ဗာန်သမားတွေနဲ့ သဗ္ဗာန်သမားတွေကို မှီခိုနေရသူတွေ၊ ခရီးသွားတွေ အခက်အခဲအများကြီး ကြုံနိုင်ပါတယ်"လို့ ကိုကျော်ရက YMG ကို ဇွန်လ(၉)ရက်မနက်ပိုင်းကပြောသည်၊၊

သဗ္ဗာန်ဆိပ်များဖြစ်သော (၁)မှော်စက်၊(၂)ကမာကဆစ်၊(၃)စက်မြေ၊(၄)ကမာကသွယ်၊(၅)ကားဂိတ်သဗ္ဗာန်များ ဇွန်လ(၉)ရက်မှ(၁၁)ရက်အထိ သုံးရက်တာ ယာယီပိတ်ထားမည်ဖြစ်ပြီး ဒလဆိပ်ကမ်းမှ ချယ်ရီသင်္ဘောဖြင့်ကူးရန်ရေးသားထားချက်များပြန့်နှံနေပြီး သဗ္ဗာန်သမားများလည်းကြားသိရကြောင်း သိရသည်၊၊

ymg/tthl
#Yangon_Media_Group

#LocalNews
Published _ 9 June 2022

လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ ယခုအကောင်အထည်ဖော်ဆောင်ရွက်လျက်ရှိသည့် ၂၀၂၄ ခုနှစ်၊ သန်းခေါင်စာရင်း၏ မြေပုံရေးဆွဲခြင်းနှင့် စာရင်းကောက်ကွက်ဖွဲ့စည်းခြင်းလုပ်ငန်းတွင် ပထမခြေလှမ်းဖြစ်သည့် ရပ်ကွက်၊ ကျေးရွာ တည်နေရာ Point များ ကောက်ယူလျက်ရှိရာ ရှိပြီးသည့် တည်နေရာ Point များကို အတည်ပြုရန်နှင့် မရရှိသေးသည့် တည်နေရာ Point နှစ်သောင်းကျော်ကို ရယူရန် ဆောင်ရွက်သွားမည်ဖြစ်ကြောင်း လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာန၊ ဗဟိုသန်းခေါင်စာရင်းကော်မရှင် ဥက္ကဋ္ဌ ပြည်ထောင်စုဝန်ကြီး ဦးခင်ရီက ပြောသည်။

"ဝန်ကြီးဌာနအနေနဲ့ ပြီးခဲ့တဲ့ ၂၀၁၄ ခုနှစ်တွင် ပြည်လုံးကျွတ် လူဦးရေနှင့်အိမ် အကြောင်းအရာ သန်းခေါင်စာရင်းကို အောင်မြင်စွာကောက်ယူခဲ့ပြီး ၂၀၂၄ ခုနှစ်တွင် နောက်တစ်ကြိမ် သန်းခေါင်စာရင်းကောက်ယူရန် အလှည့်ကျရောက်ပြီဖြစ်ပါတယ်။ ယင်းလုပ်ငန်းစဉ်ဟာ နိုင်ငံတော်အဆင့်ဆောင်ရွက်ရမည့် စီမံကိန်းလုပ်ငန်းတစ်ခုဖြစ်တာကြောင့် ကြိုတင်ပြင်ဆင်ခြင်း လုပ်ငန်း၊ စာရင်းကောက်ယူခြင်းလုပ်ငန်း၊ စာရင်းဇယား ပြုစုခြင်းလုပ်ငန်း၊ ဆန်းစစ်လေ့လာခြင်းနှင့် အစီရင်ခံစာထုတ်ပြန်ခြင်းလုပ်ငန်း စတဲ့လုပ်ငန်းစဉ် (၄) ရပ်နဲ့ လုပ်ငန်းစီမံချက်ရေးဆွဲပြီး ၂၀၂၁ ခုနှစ်၊ အောက်တိုဘာလမှ စတင်ဆောင်ရွက်ခဲ့ပါတယ်။ လက်ရှိနိုင်ငံတော်အစိုးရ တာဝန်ယူစဉ်ကာလအတွင်းမှာ ပြီးစီးနိုင်သမျှသော လုပ်ငန်းတွေကို ဆောင်ရွက်မှာဖြစ်ပြီး သန်းခေါင် စာရင်း ကောက်ယူရာတွင် အသုံးပြုမည့်စနစ် တည်ဆောက်ခြင်း၊ လိုအပ်သောစက်ပစ္စည်း ကိရိယာများနှင့် ဆက်စပ်ပစ္စည်းများ ဝယ်ယူတပ်ဆင်ခြင်း စသည့်အဆင့် (၅) ဆင့်ကို စတင်အကောင်အထည်ဖော် ဆောင်ရွက်လျက်ရှိနေပါတယ်" ဟု ယင်းက ပြောသည်။

ဇွန်လ ၈ ရက် တွင် နေပြည်တော်၌ ကျင်းပပြုလုပ်သည့် ၂၀၂၄ ခုနှစ်၊ လူဦးရေနှင့် အိမ်အကြောင်းအရာ သန်းခေါင်စာရင်း ကောက်ယူနိုင်ရေးအတွက် ရပ်ကွက်၊ ကျေးရွာတည်နေရာ Point များ ကောက်ယူခြင်းသင်တန်း (၁/၂၀၂၂) ဖွင့်ပွဲတွင် အထက်ပါအတိုင်းပြောကြားခဲ့ခြင်းဖြစ်သည်။

ymg/NN
#Yangon_Media_Group

#War_Crisis
Published 9 June 2022

ယူကရိန်းကို ရုရှားကျူးကျော်ခြင်းရဲ့အကျိုးဆက်တွေက တစ်ကမ္ဘာလုံးမှာ ပိုမိုဆိုးရွားလာပြီး လူပေါင်း ၁.၆ ဘီလီယံခန့် ဒုက္ခရောက်ဖွယ်ရှိနေကြောင်း ကုလသမဂ္ဂအထွေထွေ အတွင်းရေးမှူးချုပ်'အန်တိုနီယိုဂူတာရက်စ်'က ဇွန်လ ၈ ရက်နေ့ ဗုဒ္ဓဟူးနေ့က သတိပေးပြောကြားလိုက်ပါတယ်။

"စားနပ်ရိက္ခာဖူလုံရေး၊ စွမ်းအင်ကဏ္ဍ၊ ဘဏ္ဍာရေးကဏ္ဍတို့မှာ စစ်ပွဲရဲ့သက်ရောက်မှုက ပိုပြီးပြင်းထန်လာပါပြီ၊ တစ်ကမ္ဘာလုံးမှာ စစ်ပွဲရဲ့သက်ရောက်မှုက မကြုံစဖူးငတ်မွတ်ခေါင်းပါးမှုဖြစ်ပေါ်လာနိုင်စေပြီး လူမှုရေးစီးပွားရေးများ မငြိမ်မသက်ဖြစ်လာနိုင်ပါတယ်၊ ယခုနှစ်မှာ စားနပ်ရိက္ခာရရှိရေးအကျပ်အတည်းဖြစ်နေပြီး နောက်နှစ်မှာတော့ စားနပ်ရိက္ခာပြတ်လတ်မှုဖြစ်ပေါ်လာနိုင်ပါတယ်၊ ဒီပြဿနာတွေရပ်တန့်ဖို့တစ်ခုတည်းသောနည်းလမ်းက ရုရှားကျူးကျော်ခြင်း အဆုံးသတ်မှရပါမယ်"လို့ ကုလထွေချုပ်က ပဋိပက္ခဂယက်ရိုက်ခတ်မှုများနဲ့ ပတ်သက်ပြီး ကုလသမဂ္ဂရဲ့ဒုတိယအကြိမ်အစီရင်ခံစာကို တင်ပြခဲ့ပါတယ်။

ပင်လယ်နက်မှတဆင့် ယူကရိန်းနိုင်ငံထုတ်ကုန်အစားအသောက်များကို ဘေးကင်းစိတ်ချစွာတင်ပို့နိုင်ရေးနဲ့ ရုရှားအစားအစာများနဲ့ မြေဩဇာများ ကမ္ဘာ့ဈေးကွက်သို့ အတားအဆီးမရှိဝင်ရောက်နိုင်ရေးတို့အတွက် ကုလထွေချုပ်က လက်တွဲဖော်နိုင်ငံများအား အကူအညီတောင်းဆိုထားပါတယ်။

ဒီဆောင်ရွက်ချက်က ဆာဟာရအာဖရိကအပါအဝင် ဖွံ့ဖြိုးဆဲနိုင်ငံများမှ သန်းပေါင်းရာနဲ့ချီတဲ့လူတွေအတွက် အလွန်အရေးကြီးကြောင်း 'ဂူတာရက်စ်'ကဆိုပါတယ်။

ကုလသမဂ္ဂရဲ့အစီရင်ခံစာထဲမှာ နိုင်ငံ ၉၄ နိုင်ငံလောက်က လူဦးရေ ၁.၆ ဘီလီယံလောက်ဟာ အကျပ်အတည်းအနည်းဆုံးတစ်မျိုးလောက်ကို ပြင်းပြင်းထန်ထန်ရင်ဆိုင်နေရပြီး ဖြေရှင်းနိုင်စွမ်းမရှိဘူးလို့ ဖော်ပြထားပါတယ်။

၁.၆ ဘီလီယံထဲကမှ ၁.၂ ဘီလီယံလောက်က ဘဏ္ဍာရေး၊ စားနပ်ရိက္ခာ၊ စွမ်းအင်ကဏ္ဍသုံးရပ်စလုံးမှာ တစ်ပြိုင်တည်းဒုက္ခတွေ့နိုင်ပါတယ်။

၂၀၂၂ အတွင်း စားနပ်ရိက္ခာမလုံလောက်သူဦးရေ ၄၇ သန်းရှိရာမှ နှစ်ကုန်ရောက်တဲ့အခါ ၃၂၃ သန်းရှိလာမယ်လို့ ခန့်မှန်းထားပါတယ်။

ယခုနှစ်အတွင်း အာဖရိကနိုင်ငံသား ၅၈ သန်းခန့် ဆင်းရဲတွင်းကျနိုင်တယ်လို့လည်း ဖော်ပြထားပါတယ်။

၂၀၂၂ မှာ အရှေ့အလယ်ပိုင်းနဲ့ အာဖရိကမြောက်ဘက်ပိုင်းတို့မှာ လူဦးရေ ၂.၈ သန်းဆင်းရဲတွင်းနက်နိုင်ပြီး တောင်အာရှမှလူဦးရေသန်း ၅၀၀ ဒုက္ခရောက်နိုင်ဖွယ်ရှိနေပါတယ်။

အထိခိုက်နိုင်ဆုံးနေရာဒေသတွေကို စားနပ်ရိက္ခာနဲ့ စွမ်းအင်ထောက်ပံ့ရရှိရေးအတွက် ကြိုးစားအားထုတ်ရပါမယ်လို့ အစီရင်ခံစာမှာ ဖော်ပြသွားပါတယ်။

Source: The Straits Times
#Yangon_Media_Group

#LocalNews
Published_9 June 2022

ကမ္ဘာ့ကျန်းမာရေးအဖွဲ့အစည်း(WHO) တွင် တာဝန်ထမ်းဆောင်နေသော ဌာနေဝန်ထမ်းတစ်ဦး မွန်ပြည်နယ် မော်လမြိုင်မြို့တွင် ဇွန်လ ၈ ရက် ညနေ ၅ နာရီခန့် သေနတ်ဖြင့် ပစ်သတ်ခံခဲ့ရကြောင်း WHO က ထုတ်ပြန်ထားသည်။

ယင်းထုတ်ပြန်ချက်တွင် အဆိုပါ WHO ဝန်ထမ်းမှာ ဦးမျိုးမင်းထွဋ်ဖြစ်ပြီး ရုံးမှ အိမ်သို့အပြန် သံလွင်ဥယျာဉ်လမ်းတွင် ၎င်း၏ ကိုယ်ပိုင်မော်တော်ဆိုင်ကယ်စီးနင်းလာစဉ် သေနတ်ဖြင့်ပစ်ခံရကာ သေဆုံးခြင်းဖြစ်ကြောင်းနှင့် ယင်းဖြစ်စဉ်အပေါ် လုပ်ဖော်ကိုင်ဖက်၏ မိသားစုနှင့် ထပ်တူထပ်မျှ အထူးဝမ်းနည်း ကြေကွဲရကြောင်းလည်း ဖော်ပြထားသည်။

ဦးမျိုးမင်းထွဋ်သည် WHO မြန်မာရုံးတွင် ၅ နှစ်ခန့် ကားဒရိုင်ဘာအဖြစ် တာဝန်ထမ်းဆောင်ခဲ့သူဖြစ်ကြောင်းနှင့် အဆိုပါ ဖြစ်ရပ်၏ အသေးစိတ်အခြေအနေမှာ အတိအကျမသိရှိရသေးကြောင်းလည်း ဖော်ပြထားသည်။

ymg/mt
#Yangon_Media_Group