#Local_News
Published_ 13 September 2022

ထပ်ဆောင်းကာကွယ်ဆေးထိုးထားသူများအနေဖြင့် ကိုဗစ်ကူးစက်မှု(၀.၁) ရာခိုင်နှုန်းနှင့်သေဆုံးမှု (၁.၅) ရာခိုင်နှုန်းသာ တွေ့ရှိခဲ့ရကြောင်း ကျန်းမာရေးဝန်ကြီးဌာန၏ ထုတ်ပြန်ချက်များအရသိရသည်၊၊

နှစ်ကြိမ်ပြည့် ကာကွယ်ဆေးထိုးထားသူများတွင် ကိုဗစ် ကူးစက်မှု(၄) ရာခိုင်နှုန်းနှင့် ကိုဗစ်ကြောင့် သေဆုံးမှု (၁၄.၄) ရာခိုင်နှုန်း တွေ့ရှိရသေးသည်ဟု ထုတ်ပြန်ချက်တွင် ဖော်ပြပါရှိသည်၊၊

၂၀၂၂ ခုနှစ် ဇန်နဝါရီ(၂၈)ရက်မှ စက်တင်ဘာလ (၇) ရက်အထိ တွေ့ရှိရသော ကိုဗစ်ကြောင့် သေဆုံးသူများ၏ ကာကွယ်ဆေးထိုးနှံထားမှုအခြေအနေများဆန်း စစ်ချက်အရ ယင်းကဲ့သို့တွေ့ရှိရခြင်း ဖြစ်သည်၊၊

ဇန်နဝါရီ(၂၈)ရက်မှ စက်တင်ဘာလ(၇) ရက်အတွင်း ကိုဗစ်ကြောင့် သေဆုံးသူများတွင်(၈၄.၁) ရာခိုင်နှုန်းသည် ကာကွယ်ဆေးလုံးဝ မထိုးထားသူနှင့် တစ်ကြိမ်သာထိုးထားသူဖြစ်ပြီး (၁၄.၄)ရာခိုင်နှုန်းသည် နှစ်ကြိမ် ပြည့်ကာကွယ်ဆေးထိုးထိုးထားသူများဖြစ်ကြောင်းနှင့် (၁.၅) ရာခိုင်နှုန်းသည် ထပ်ဆောင်း ကာကွယ်ဆေးထိုးထားသူများဖြစ်ကြောင်း ထုတ်ပြန်ချက်တွင် ဖော်ပြပါရှိသည်၊၊

ဇန်နဝါရီ(၂၈)ရက်မှ စက်တင်ဘာလ(၇) ရက်အထိတွေ့ရှိရသည့် ကိုဗစ်ကူးစက်ခံရသူများကိုလည်း လေ့လာစမ်းစစ်ချက် ပြုလုပ်ရာ ကိုဗစ်ကူးစက်ခံရသူ (၈၀)ရာခိုင်နှုန်းသည် ကာကွယ်ဆေးလုံးဝ မထိုးထားသူများဖြစ်ပြီး (၁၅.၉)ရာခိုင်နှုန်းမှာ ကာကွယ်ဆေးတစ်ကြိမ်ထိုးနှံထားပြီး (၄)ရာခိုင်နှုန်းမှာ ကာကွယ်ဆေးအကြိမ်ပြည့်ထိုးနှံထားသူများဖြစ်ကြောင်းနှင့် (၀.၁)ရာခိုင်နှုန်းမှာ ထပ်ဆောင်းကာကွယ်ဆေးများထိုးနှံထားသူများဖြစ်ကြောင်း ကျန်းမာရေးဝန်ကြီးဌာနက ထုတ်ပြန်ထားသည်၊၊

ကိုဗစ်ကာကွယ်ဆေးထိုးနှံထားခြင်းဖြင့် ကိုဗစ်ကူးစက်နှုန်းနှင့် ကိုဗစ်ကြောင့်သေဆုံးနှုန်းနည်းပါးနိုင်သဖြင့် ကာကွယ်ဆေးများထိုးနှံကြဖို့နှင့် နှစ်ကြိမ်ပြည့်ထိုးထားသူများလည်း ခြောက်လအကြာတွင် ကာကွယ်နိုင်စွမ်းကျဆင်းသဖြင့် ထပ်ဆောင်းကာကွယ် ဆေးများထပ်မံထိုးနှံဖို့အရေးကြီးကြောင်းကိုလည်း ကျန်းမာရေးဝန်ကြီးဌာန ပြောရေးဆိုခွင့် ရှိသူ ဒေါက်တာသန်းနိုင်စိုးက အကြံပြုပြောကြားထားကြောင်း သိရသည်၊၊

#ymg/tthl
#Yangon_Media_Group

#World_Health
Published 13 September 2022

ဆီးချိုရောဂါရှိသူ ၉၀ ရာခိုင်နှုန်းလောက်က သူတို့မှာ ဒီရောဂါရှိနေမှန်းမသိရှိကြပါဘူး။

ဒါဟာ သူ့ရဲ့ရောဂါလက္ခဏာတွေက နေမကောင်းဖြစ်လောက်တဲ့အထိ မခံစားရတာကြောင့် ဖြစ်နိုင်ပါတယ်။

ဆီးချိုရောဂါဒုတိယအမျိုးအစားက ခန္ဓာကိုယ်ထဲမှာ အင်ဆူလင်လုံလောက်စွာ မထုတ်လုပ်နိုင်တဲ့အခါ ဖြစ်ပေါ်တတ်ပါတယ်။

ဒီရောဂါဖြစ်နေမှန်း သိသာနိုင်တာက လက်တွေဖြစ်ပြီး အထူးသဖြင့် လက်သည်းတွေကို ဂရုစိုက်ကြည့်ရှုသင့်ကြောင်း ကျွမ်းကျင်သူများက ဆိုပါတယ်။

ဆီးချိုရှိသူတွေက သွေးလည်ပတ်မှုစနစ်မှာ ပြဿနာရှိတာကြောင့် လက်သည်းတွေအနား နီမြန်းနေတာမျိုး ဖြစ်နိုင်ပါတယ်။

လက်သည်းအရင်းနားတွေနဲ့ လက်သည်းခွံပျော့လာတာတွေကို ကြည့်ရှုစစ်ဆေးသင့်ပါတယ်။

ဒီလူတွေက ဆီးလမ်းကြောင်းရေကြည်ဖုထွက်ခြင်း၊ သွေးထွက်ခြင်း၊ အနာဖြစ်ခြင်းများဖြစ်ပေါ်တတ်ပြီး သွေးလမ်းကြောင်းပိတ်ဆို့ကာ သွေးပေါက်ထွက်ခြင်းများ ဖြစ်တတ်ပါတယ်။

သွေးလှည့်ပတ်မှု မကောင်းတာကြောင့် လက်သည်းခြေသည်းတွေကတစ်ရှူးတွေက သေဆုံးသွားကာ နာတာရှည်ရောဂါသည်တွေလို လက်သည်းချိုင့်ရာများ ထွက်ပေါ်တတ်ပါတယ်။

ခြေသည်းတွေမှာလည်း မှိုရောဂါစွဲကပ်ခြင်းကလည်း အဖြစ်များပြီး လက်သည်းခြေသည်းတွေ အဝါရောင်ပြောင်းလာကာ ကျွပ်ဆတ်လာကြပါတယ်။

ဆီးချိုဒုတိယအမျိုးအစားဖြစ်နေကြောင်း သိရှိနိုင်မယ့် လက္ခဏာ ၇ ရပ်ရှိတယ်လို NHS က ဆိုပါတယ်။

ညအချိန်မှာ ခဏခဏအပေါ့သွားချင်စိတ်ဖြစ်တာကလည်း လက္ခဏာတစ်ရပ် ဖြစ်နေပါတယ်။

သွေးထဲမှာ သကြားဓာတ်များလွန်းတာကြောင့် ကျောက်ကပ်ကပိုမိုအလုပ်ရကာ ဆီးပိုသွားရစေပါတယ်။

ဆီးများများသွားခြင်းကြောင့် ရေဓာတ်ခန်းခြောက်ကာ မကြာခဏရေဆာတတ်ပါတယ်။

ဝိတ်မချဘဲနဲ့ ဝိတ်ကျခြင်း၊ အောက်ပိုင်းယားယံခြင်း၊ ထိခိုက်ဒဏ်ရာ သက်သာနှုန်းနှေးခြင်းနဲ့ အမြင်အာရုံဝေဝါးခြင်းတိုလည်း ပါဝင်နေပါတယ်။

ဆီးချိုဖြစ်နိုင်ချေရှိတာတွေက အသက် ၄၀ ကျော်အရွယ်၊ အဝလွန်ခြင်း၊ အာရှ၊ အာဖရိက-ကာရစ်ဘီယန်၊ လူမည်းအာဖရိကတို့ဆိုရင် ပိုဖြစ်နိုင်ပါတယ်။

ဒီလိုလက္ခဏာတွေ ခံစားလာရပြီဆိုရင် ဆရာဝန်နဲ့ပြသသင့်ပြီး ရောဂါရှိမှန်းစောစောသိမှ အခြားရောဂါတွေပါဖြစ်မလာအောင် ကာကွယ်နိုင်မှာဖြစ်ပါတယ်။

Source: The Sun
#Yangon_Media_Group

#World_Education
Published 13 September 2022

ကိုလံဘီယာတက္ကသိုလ်ဟာ တက္ကသိုလ်နာမည်ကျော်ကြားမှုအဆင့်ဖော်ပြရာ၌ အချက်အလက်အချို့ကို မမှန်မကန်ဖော်ပြခဲ့ကြောင်း ဝန်ခံပြီးနောက် အမေရိကန်မှ အကောင်းဆုံးကောလိပ်များ စာရင်းတွင် နံပါတ် ၁၈ နေရာသို့ ကျဆင်းသွားခဲ့ပါတယ်။

ပရင့်စ်တန်တက္ကသိုလ်ရဲ့နောက် နံပါတ် ၂ နေရာမှာ ရှိနေခဲ့တဲ့ အိုင်ဗီလိဂ်ကျောင်းက သူတို့မှာ အတန်းမည်မျှရှိကြောင်း၊ PhD ဘွဲ့ အမြင့်ဆုံးဘွဲ့များအတွက် မေဂျာမည်မျှရှိကြောင်း အလွန်အကျူးဖော်ပြခဲ့တဲ့တယ်လို့ ဆိုပါတယ်။

ကိုလံဘီယာတက္ကသိုလ်ဟာ သူတို့တင်ပြထားတဲ့ အချက်အလက်တွေထက် လျော့နည်းနေကာ ဘယ်လိုပဲအကြောင်းပြချက် ပေးစေကာမူ ကိုလံဘီယာ တက္ကသိုလ်ကိုယ်တိုင်က ကိုင်ဆောင်ထားတဲ့ စံချိန်စံညွှန်းများနဲ့ မကိုက်ညီကြောင်း တက္ကသိုလ်စီမံခန့်ခွဲရေးမှူး'မေရီဘွိုက်စ်'က သောကြာနေ့ကထုတ်ပြန်လိုက်ပါတယ်။

"အရင်ကတင်ပြခဲ့တဲ့အထဲမှာ မှားယွင်းမှုတွေရှိနေတဲ့အတွက် အနူးအညွတ်တောင်းပန်ပါတယ်၊ ဒီထက်ပိုကောင်းစေဖို့အတွက် အခုလိုဝန်ခံခဲ့တာဖြစ်ပါတယ်" လို့ ဆိုခဲ့ပါတယ်။

'ဘွိုက်စ်'ကဆက်လက်ပြီး "ကိုလံဘီယာဘွဲ့ကြိုသင်ကြားရေးက အဆင့်မြင့်ပညာရေးဌာနတွေကနေ သင်ကြားနေတဲ့ အတန်းတွေအပေါ် အမြဲတမ်းဗဟိုပြုထားပြီး ဒီအချက်က မပြောင်းလဲပါဘူး" လို့ ပြောပြခဲ့ပါတယ်။

၂၀၂၁ ခုနှစ်အတွက် အမေရိကန်ဘွဲ့ကြိုတက္ကသိုလ်များရဲ့အဆင့်ထုတ်ပြန်ချက်မှာ တင်ပြခဲ့တဲ့ Upper Manhattan ကျောင်းရဲ့အချက်အလက်တိကျမှုအပေါ် ကိုလံဘီယာတက္ကသိုလ်သင်ကြားရေးအဖွဲ့ဝင်တစ်ဦးက မေးခွန်းထုတ်လိုက်တဲ့အချိန်မှာ အခုလို သတင်းထွက်ပေါ်လာတာဖြစ်ပါတယ်။

ဖေဖော်ဝါရီလတုန်းက သင်္ချာပရော်ဖက်ဆာ'မိုက်ကယ်သဲဒီးယပ်စ်'က ကိုလံဘီယာရဲ့ အဆင့်သတ်မှတ်ချက်ဟာ မမှန်ကန်ခြင်း၊ သံသယဖြစ်ဖွယ်ရှိခြင်း၊ အထင်လွဲမှားစရာရှိခြင်းစသဖြင့် အဓိကပါဝင်ပတ်သက်သူများကို ပြစ်တင်ဝေဖန်ခဲ့ပါတယ်။

'သဲဒီးယပ်စ်'ရဲ့ပြောကြားချက်အရ ကိုလံဘီယာဟာ သူတို့ရဲ့ပညာသင်ကြားရေးအဖွဲ့ဝင်အားလုံးဟာ PhD ဘွဲ့ ဒါမှမဟုတ် အဆင့်မြင့်ဆုံးဘွဲများရရှိထားတယ်လို့ ဆိုခဲ့ပေမယ့် တကယ်တမ်းမှာတော့ သင်ကြားသူ ၉၅.၃ ရာခိုင်နှုန်းကသာ ဒီလိုဘွဲ့မျိုးတွေ ရရှိထားတာဖြစ်ပါတယ်။

ကိုလံဘီယာက အခုနှစ်အတွက် ဘွဲ့ကြိုတက္ကသိုလ်အဆင့်သတ်မှတ်ချက်မှာ အချက်အလက်တွေ လျှောက်ထားမှာမဟုတ်ဘူးလို့ ဇွန်လက ကြေညာခဲ့ပါတယ်။

US News ကနေ ပြီးခဲ့တဲ့နှစ်က နံပါတ် ၂ နေရာမှာ ကိုလံဘီယာတက္ကသိုလ်နဲ့အတူ ဟားဗတ်ဒ်၊ မာဆာချူဆက်တက္ကသိုလ်တို ပူးတွဲရရှိခဲ့ပါတယ်။
လက်ရှိမှာတော့ နံပါတ် ၁ နေရာမှာ ပရင့်စ်တန်တက္ကသိုလ် ဆက်လက်ဦးဆောင်နေပြီး မာဆာချူဆက်က နံပါတ် ၂ နဲ့ ဟားဗတ်ဒ်၊ စတန်းဖိုဒ်၊ ယေးလ်တက္ကသိုလ်တို့က ပူးတွဲနံပါတ် ၃ ဖြစ်နေပါတယ်။

"နိုင်ငံတဝှမ်းက တက္ကသိုလ်တွေရဲ့ အရည်အသွေးကို မှန်မှန်ကန်ကန်တင်ပြဖို့လိုပါတယ်၊ ဒါမှ ကျောင်းသားတွေနဲ့ အုပ်ထိန်းသူတွေက ကျောင်းတက်ဖို့ ရှာဖွေဆုံးဖြတ်နိုင်မှာ ဖြစ်ပါတယ်" လို့ US News က ပြောကြားခဲ့ပါတယ်။

#Source: NY Post
#Yangon_Media_Group

#Local_News
Published _ 13 September 2022

ယူအေအီးနိုင်ငံ၊ ဒူဘိုင်းမြို့မှာ လူကုန်ကူးခံရသည့် မြန်မာအမျိုးသမီး ၇ ဦးကို နှစ်နိုင်ငံပူးပေါင်းကယ်တင်လိုက်နိုင်သော်လည်း အယောက် ၁၀၀ လောက် ကျန်နေသေးကြောင်း အဆိုပါ နိုင်ငံရောက် မြန်မာအသိုင်းအဝိုင်းထံမှ သိရသည်။

ဒူဘိုင်းတွင် အိမ်အကူလုပ်ရမည်ဟုဆိုကာ အခန်းတွင်းပိတ်လှောင်ခံထားရသောကြောင့် လူမှုကွန်ရက်ကနေ Live လွှင့်အကူအညီတောင်းခံခဲ့သည့် အမျိုးသမီး ၇ ဦးဟာ စက်တင်ဘာလ ၉ ရက်မှာ မြန်မာနိုင်ငံသို့ ပြန်ရောက်လာခဲ့သည်။

အလားတူ လူကုန်ကူးခံထားရသည့် အမျိုးသမီး ၁၀၀ လောက် ဒူဘိုင်းမှာ ကျန်ရှိနေဆဲဖြစ်သောကြောင့် ဆက်လက်ကယ်ထုတ်ပေးရန် ဒူဘိုင်းတွင် အလုပ်လုပ်နေသူတစ်ဦးမှ ဆိုထားသည်။

"တချို့တွေ ဆက်သွယ်စရာ ဖုန်းလည်းမရှိကြဘူး။ ပတ်စ်ပို့တွေလည်း အသိမ်းခံထားရတော့ အတော်ဒုက္ခရောက်နေကြတယ်။ ကွင်းဆက်လိုက်ပြီး ကယ်ဖို့လိုတယ်"ဟု သူက ပြောသည်။

မြန်မာအမျိုးသမီးများကို ဒူဘိုင်းတွင် လစာကောင်းသည့် အလုပ်ရမည်ဟုဆိုကာ အီရတ်၊ အီရန်၊ ကာတာ၊ ဘာရိန်း၊ ကူဝိတ်၊ ဆော်ဒီ၊ ဂျော်ဒန်နှင့် အိုမန်နိုင်ငံတွေဆီ ရောင်းစားနေကြောင်း သိရသည်။

လူကုန်ကူးခံရသူများထဲမှ အမျိုးသမီး ၇ ဦးကို ကနဦးကယ်ထုတ်နိုင်ခဲ့ပြီး ၎င်းတို့ကို ဒူဘိုင်းသို့ ပို့ဆောင်ရာမှာ အဓိက ပါဝင်သူဖြစ်သည့် ဒူဘိုင်းတွင် နေထိုင်သည့် မကေသီမြင့်ကို တာမွေမြို့မရဲစခန်း၌ အမှုဖွင့်လှစ်ခဲ့ကြောင်း သိရသည်။

မကေသီမြင့်ကို ဒူဘိုင်းရဲတပ်ဖွဲ့မှ ဩဂုတ်လ ၃၀ ရက်က ဖမ်းဆီးရမိခဲ့ပြီး အင်တာပိုလ်ကလည်း လူကုန်ကူးသူအဖြစ် ကြေညာခဲ့သည်။

ရန်ကုန်မြို့မှ မကေသီမြင့်ဆီ လူပို့ပေးနေသည့် မမီးမီးနှင့် မဆွေဆွေမြင့်တို့ကိုလည်း မြန်မာရဲတွေက ဖမ်းဆီးမိခဲ့ကြောင်း ဆိုထားသည်။

ဒူဘိုင်းမှာ အလုပ်ရမည်ဟုဆိုကာ လိမ်လည်စေလွှတ်ခြင်းတွေ များနေသောကြောင့် သွားရောက်လုပ်ကိုင်မည့်သူတွေအနေနှင့် အယုံမလွယ်ကြရန် ပြည်ပအလုပ်အကိုင် အေဂျင်စီများမှ သတိပေးထားသည်။

#ymg/NN
#Yangon _ Media_ Group

#Local_News
Published-13 Setember 2022

ယနေ့ စက်တင်ဘာလ ၁၃ ရက်နေ့တွင် ပြည်တွင်းစက်သုံးဆီဈေးနှုန်းမှာ တစ်လီတာ ကျပ် ၅၀၊ ဒီဇယ်တစ်လီတာ ကျပ် ၃၀ ခန့် ပြန်တက်လာကြောင်း စက်သုံးဆီအရောင်းဆိုင်များ၏ ဈေးနှုန်းများအရ သိရသည်။

စက်တင်ဘာလ ၁၂ ရက်နေ့တွင် 92 တစ်လီတာ ၂၃၆၅ ကျပ်၊ 95 တစ်လီတာ ၂၄၇၀ ကျပ်၊ ဒီဇယ်တစ်လီတာကို ၂၉၉၀ ကျပ်နှင့် ပရီမီယံဒီဇယ်တစ်လီတာကို ၃၀၇၅ ကျပ် ရှိခဲ့ရာမှ ယနေ့တွင် 92 တစ်လီတာ ၂၄၂၀ ကျပ်၊ 95 တစ်လီတာ ၂၅၂၀ ကျပ်၊ ဒီဇယ်တစ်လီတာ ၃၀၂၀ ကျပ် နှင့် ပရီမီယံဒီဇယ်တစ်လီတာကို ၃၁၀၅ ကျပ် မြင့်တက်ခဲ့ကြောင်း သိရသည်။

ရန်ကုန်၊ မန္တလေးအပါအဝင် နေပြည်တော်၊ တိုင်းဒေသကြီးနှင့်ပြည်နယ်များတွင် ရည်ညွှန်းလက်လီဈေးနှုန်းဖြင့် ရောင်းချပေးနေကြောင်း စက်သုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်မှုကော်မတီမှ သိရသည်။

ယင်းအပြင် စက်သုံးဆီဈေးနှုန်းမှာ အတက်အကျမမှန်သည့်အတွက် အဓိက အငှားယာဉ်မောင်းများအနေဖြင့် အခက်အခဲများရှိနေပြီး ပြေးဆွဲမှုကို ရပ်နားထားရကြောင်းလည်း သိရသည်။

“စက်သုံးဆီဈေးနှုန်းတွေက တက်လိုက် ကျလိုက်နဲ့ မမှန်ဘူး။ ဈေးတက်တာက များနေတယ်။ ဈေးကျတော့လည်း အရမ်းကြီးမကျသွားဘူး။ အဲဒီတော့ ကားမောင်းရတာ ဘယ်လိုမှ အဆင်မပြေဘူး။ ခရီးသည်တွေကလည်း ကားခဈေးတက်တော့ မစီးကြတော့ဘူး။ ဒါကြောင့် တက္ကစီမောင်းတာကို ခဏရပ်ရပ်နားထားလိုက်ရတယ်”ဟု အငှားယာဉ်မောင်းတစ်ဦးက ပြောသည်။

#Ymg/STH
#Yangon_Media_Group

#Local_News
Published _13 September 2022

မန္တလေးမြို့၊ ပုသိမ်ကြီးမြို့နယ်၊ နန်းဦးလွင်ကျေးရွာအုပ်စု၊ ကန်ကောက်အရှေ့ကျေးရွာနေ အမျိုးသမီးတစ်ဦး စက်တင်ဘာလ ၁၁ ရက်က ကြိုးဆွဲချသေဆုံးခဲ့ရာ ရုပ်အလောင်းကို မန္တလေးပြည်သူ့ဆေးရုံ၌ စစ်ဆေးစဉ် ကိုဗစ်ပိုးတွေ့ရှိခဲ့ကြောင်း သိရသည်။

ယင်းအမျိုးသမီး၏ ရုပ်အလောင်ကို ကိုဗစ်စည်းမျဉ်းစည်းကမ်းများနှင့်အညီ မဟာအောင်မြေမြို့နယ်ရှိ ရွှေချည်စေတနာ ရှာဖွေကယ်ဆယ်ရေးအသင်းမော်တော်ယာဉ်ဖြင့် အေးရိပ်ငြိမ် ဘာသာပေါင်းစုံသုသာန်သို့ ပို့ဆောင်ပေးခဲ့ကြောင်း သိရသည်။

ကြိုးဆွဲချသေဆုံးခဲ့သူမှာ သူနာပြုဆရာမတစ်ဦးဖြစ်ပြီး မည်သည့်အခက်အခဲကြောင့် မိမိကိုယ်ကို သေကြောင်းကြံစည်ခဲ့သည်ကိုမူ မသိကြပေ။

#ymg/mt
#Yangon_Media_Group

#Local_News
Published - 13 September 2022

ယနေ့ စက်တင်ဘာလ ၁၂ ရက်နေ့မှ စက်တင်ဘာ ၁၈ ရက်နေ့အထိ ရန်ကုန်စားအုန်းဆီ အခြေခံလက်ကားရည်ညွှန်းဈေးနှုန်းကို တစ်ပိဿာ ၄၇၃၀ ကျပ်အဖြစ် သတ်မှတ်ထားပြီး ယခင်တစ်ပါတ်ထက် ၅၀၀ ကျပ်ခန့် စျေးပြန်ကျခဲ့ကြောင်း စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေး ကော်မတီက သတ်မှတ်‌ကြေညာထားသည်။

ပြီးခဲ့သည့် တစ်ပတ်တွင် ထုတ်ပြန်ခဲ့သည့် လက်ကားရည်ညွှန်းဈေးနှုန်းဟာ တစ်ပိဿာ ၅၂၂၀ ကျပ်ဖြစ်ပြီး ယခုတစ်ပါတ်တွက် ၅၀၀ ဝန်းကျင် စျေးကျခဲ့ခြင်းဖြစ်သည်။

မလေးရှား၊ အင်ဒိုနီးရှားစသည့် ကမ္ဘာ့စားအုန်းဆီ ထုတ်လုပ်တင်ပို့သည့်နိုင်ငံများတွင် ဖြစ်ပေါ်နေသည့်ဈေးကွက်နှင့် ပြည်တွင်းစားအုန်းဆီ ရည်ညွှန်းဈေးနှုန်းကို သတ်မှတ်ခြင်းဖြစ်ကြောင်း အသိပေးထုတ်ပြန်ထားသည်။

အခြေခံလက်ကားရည်ညွှန်းဈေးနှုန်းတွေကို အပတ်စဉ် ကြေညာပေးနေသော်လည်း လက်လီဈေးကွက်အတွင်းဈေးနှုန်းမှာတော့ ဆက်တိုက်မြင့်တက်နေသည်။

လက်ရှိတွင် ရန်ကုန်လက်လီဈေးကွက်အတွင်း ရောင်းချနေသည် စားအုန်းဆီဈေးနှုန်းမှာ တစ်ပိဿာကို ကျပ် ၁၀၀၀၀ အထိရှိနေကြောင်း သိရသည်။

#Ymg/STH
#Yangon_Media_Group

#Local_News
Published_ 13 September 2022

ဂျိုင်း(ကော့ကရိတ်)တံတားကို နည်းပညာသစ် ထည့်သွင်းအသုံးပြုထားသည့် ပင်မတံတား ကြမ်းခင်းအစိတ်အပိုင်းများနှင့် ကြိုးဆိုင်းများ ချိတ်ဆက်မှုတို့ကို ဆောင်ရွက် လျက်ရှိကြောင်း သိရပါတယ်။

ဆောက်လုပ်ရေးဝန်ကြီး ဦးရွှေလေးသည် ကရင်ပြည်နယ် ဝန်ကြီးချုပ်၊ တာဝန်ရှိသူ များနှင့်အတူ စက်တင်ဘာ ၁၁ ရက်က အတ္ထရံတံတား၊ ဂျိုင်း (ဇာသပြင်) တံတား ၊ ဂျိုင်း (ကော့ကရိတ်) တံတားနှင့် ကရင်ပြည်နယ်အတွင်းရှိ လမ်း၊ တံတားများနှင့် ဒေသဖွံ့ဖြိုးရေး လုပ်ငန်းများကို ကြည့်ရှုစစ်ဆေးခဲ့ပါတယ်။

အရှေ့ - အနောက် စီးပွားရေးစင်္ကြံလမ်းမကြီးအပိုင်းတွင် ပါဝင်သည့် အတ္ထရံတံတား A1 Side နှင့် A2 Side တို့တွင် တံတားတည်ဆောက်ရေးလုပ်ငန်းဆောင်ရွက်နေပြီး ဂျိုင်း (ဇာသပြင်) တံတား၌ Bored Pile လုပ်ငန်းများနှင့် ဆက်စပ်လုပ်ငန်းများ ဆောင်ရွက်လျက်ရှိရာ အဆိုပါ လုပ်ငန်းခွင်များ၌ မျိုးဆက်သစ်အင်ဂျင်နီယာများအား တံတားတည်ဆောက်ရေး နည်းပညာများမျှဝေသင်တန်းပေးလျက်ရှိကြောင်း သိရပါတယ်။

အတ္ထရံတံတားသစ် တည်ဆောက်ရေးလုပ်ငန်းခွင်၌ မျိုးဆက်သစ်အင်ဂျင်နီယာများကို ယခုလမ်းအပိုင်းရှိ တံတားကြီး (၃) စင်း ၊ ရန်ကုန်ရှိ ပဲခူးမြစ်ကူးတံတားအမှတ် (၃) နှင့် ဒလတံတားတည်ဆောက်ရေးလုပ်ငန်းများတွင် နည်းပညာအတွေ့အကြုံရရှိစေရန် အုပ်စု(၃) စုခွဲ၍ စေလွှတ်ထားတာ ဖြစ်ပါတယ်။

ဆက်လက်၍ ဝန်ကြီးသည် ဂျိုင်း (ဇာသပြင်) တံတားဟောင်း ကြံ့ခိုင်မှု၊ တံတားသစ်၏ Bored Pile လုပ်ငန်းနှင့် ဆက်စပ်လုပ်ငန်းများ ဆောင်ရွက်နေမှု၊ အိန္ဒု - ကော့ကရိတ် လမ်းအဆင့် မြှင့်တင်ဆောင်ရွက်ထားရှိမှုတို့ကို သွားရောက်ကြည့်ရှုစစ်ဆေးခဲ့ကြောင်း သတင်းရရှိပါတယ်။

#ygm_mnn
#Yangon_Media_Group

#World_Health
Published 13 September 2022

ကလေးငယ်တွေ မနက်စာမလွတ်တမ်းစားသင့်တဲ့အကြောင်း လေ့လာကြရာ မနက်စာမစားတဲ့ကလေးတွေဟာ စိုးရိမ်ပူပန်ခြင်း၊ ကိုယ့်ကိုယ်ကိုတန်ဖိုးမထားခြင်း၊ စိတ်ခံစားချက်မကောင်းခြင်းစတဲ့ အပြုအမူဆိုးများပေါ်ပေါက်လာနိုင်ချေ ၃ ဆပိုများနေပါတယ်။

သုတေသီတွေက စပိန်မှ အသက် ၄ နှစ်နဲ့ ၁၄ နှစ်ကြားကလေး ၃,၇၀၀ ကို စစ်တမ်းကောက်ယူပြီး မနက်စာစားတဲ့အကျင့်က သူတို့ရဲ့စိတ်ကျန်းမာရေးကို ဘယ်လောက်အထိသက်ရောက်လဲဆိုတာကို လေ့လာခဲ့ကြပါတယ်။

ဒါ့အပြင် အပြင်ဆိုင်တွေမှာ မနက်စာစားတာကလည်း အိမ်မှာစားတာထက် စိတ်ကျန်းမာရေးအခြေအနေ ပေါ်ပေါက်နိုင်ချေရှိနေကြောင်း တွေ့ရှိခဲ့ပါတယ်။

မနက်စာမစားတဲ့အခါ ကလေးတွေက တစ်နေ့လုံးအားအင်လုံလောက်စွာ မရရှိတော့ပါဘူး။

ဒီလိုအခြေအနေမျိုးမကြုံရအောင် ကလေးတွေအနေနဲ့ နေ့စဉ်မနက်စာစားသုံးသင့်တယ်လို့ ဒေါက်တာ'ဟိုဆေးဖရန်ဆစ္စကိုလိုပက်ဇ်ဂီလ်'က ဖော်ပြခဲ့ပါတယ်။

'လိုပက်ဇ်ဂီလ်'က အိမ်မှာပဲ အဟာရပြည့်ဝတဲ့မနက်စာစားသုံးခြင်းက အဓိကအချက်ဖြစ်ကြောင်း၊ ဆိုင်တွေမှာစားသုံးခြင်း၊ အချို့သောအစားအစာများကို စားသုံးခြင်းတိုကလည်း ကလေးတွေမှာ လူမှုပေါင်းသင်းဆက်ဆံရေးပြဿနာများ ဖြစ်နိုင်ချေနဲ့ဆက်စပ်နေကြောင်း ပြောပြခဲ့ပါတယ်။

ကလေးတွေရဲ့မိဘတွေကို သူတို့ကလေးတွေ မနက်စာစားတဲ့ပုံစံ၊ အစားအစာတွေအကြောင်း မေးမြန်းပြီးနောက် သူတို့ရဲ့ အပြုအမူ ပေါင်းသင်းဆက်ဆံရေးအခြေအနေကိုလည်း မေးမြန်းခဲ့ကြပါတယ်။

အသက်အရွယ်၊ ကျား/မ၊ ဒေသနေရာ စတဲ့အချက်အလက်တွေနဲ့ မပတ်သက်အောင်လည်း မှတ်တမ်းတင်ခဲ့ကြပါတယ်။

ထိုအခါ မနက်စာမစားတဲ့ကလေးတွေက စားတဲ့ကလေးတွေထက် အမူအရာမမှန်တဲ့ပြဿနာမျိုးဖြစ်နိုင်ချေ ၃.၂၉ ဆပိုများနေခဲ့ကာ ဆိုင်တွေမှာ စားလေ့ရှိတဲ့ ကလေးတွေကတော့ ၂.၀၆ ဆ ပိုများပါတယ်။

စားသောက်ဆိုင်တွေမှာ မနက်စာစားတာက ကျန်းမာရေးနဲ့မညီညွတ်တာကြောင့် ဒီလိုပြဿနာဖြစ်နိုင်ကြောင်း ယူဆနေကြပါတယ်။

စားတဲ့အမျိုးအစားတွေအရ ပေါင်မုန့်မီးကင်၊ အဟာရကွေကာတိုက ဒီလိုပြဿနာဖြစ်နိုင်ချေ ၃၁ ရာခိုင်နှုန်းပိုများကာ ကြက်ဥ၊ ချိစ်၊ အသားပြားတွေမပါဘဲစားသောက်ရင်တော့ မူမမှန်တဲ့ပြဿနာဖြစ်နိုင်ချေ ၄၄ ရာခိုင်နှုန်းလျော့နည်းပါတယ်။

ဒါ့အပြင် မနက်စာကို အိမ်မှာစားဖို့တိုက်တွန်းတာကလည်း ကျန်းမာစေမယ့်နည်းလမ်းဖြစ်ပါတယ်။

ကလေးတွေမှာ စိတ်ကျန်းမာရေးပြဿနာလျော့ကျစေဖို့ ကာဗိုဟိုက်ဒရိတ်နဲ့ နို့ထွက်ပစ္စည်းစားသုံးသင့်ပေမယ့် အဆီများတဲ့ ဝက်ပေါင်ခြောက်၊ ကြက်ဥတို့ကို မစားသင့်ပါဘူး။

Source: The Jerusalem Post
#Yangon_Media_Group

#World_Art
Published 12 September 2022

ပြင်သစ်နိုင်ငံပဲရစ်မြို့ နိုထာဒမ်းဘုရားကျောင်းရဲ့ ပန်းချီကားကြီး ၂၂ ချပ်ကို ပြန်လည်ပြုပြင်မွမ်းမံရန်အတွက် လူအများအပြားက အချိန်မီအောင် ကြိုးပမ်းဆောင်ရွက်နေကြရပါတယ်။

#Yangon_Media_Group

#Local_News
Published-12 September 2022

လက်ရှိပြည်ပကို ပဲတင်ပို့မှုအခြေအနေမှာ လက်ကျန်ပဲတွေကိုသာ တင်ပို့နေရတာဖြစ်တယ်လို့ မြန်မာနိုင်ငံပဲမျိုးစုံ၊ ပြောင်းနှင့်နှမ်းကုန်သည်များအသင်းကနေ သိရပါတယ်။

#Yangon_Media_Group

Published 12 Sept 2022

မြောက်ကိုးရီးယားခေါင်းဆောင် ကင်မ်ဂျုန်းအန်က နိုင်ငံရဲ့ နျူကလီးယားနိုင်ငံအဆင့်အတန်းဟာ နောက်ပြန်လှည့်သွားလို့ မရတော့ဘူးလို့ ပြောလိုက်ပါတယ်။

ပြုံးယမ်းဟာ သမားရိုးကျတိုက်ခိုက်မှုနှင့်ရင်ဆိုင်နေရတာတွေပါ အပါအဝင် တိုက်ခိုက်မှုတွေရှိလာတဲ့အခါ ကာကွယ်မှုအရ နျူကလီးယားတိုက်ခိုက်မှုပြုလုပ်ဖို့ အဆင်သင့်ဖြစ်စေရေး ကြေညာတဲ့ ဥပဒေတစ်ခု အတည်ပြုပြီးနောက် သူက ယင်းကဲ့သို့ ပြောကြားခဲ့ခြင်းဖြစ်ပါတယ်။

သောကြာနေ့က မြောက်ကိုရီးယား နိုင်ငံပိုင်မီဒီယာ KCTVက  ထုတ်လွှင့်တဲ့ သူ့ရဲ့ မိန့်ခွန်းမှာ သူက “ နျူကလီးယားအင်အား မူဝါဒကို ဥပဒေအဖြစ်ပြဋ္ဌာန်းလိုက်ခြင်းကြောင့် ကျွန်တော်တို့နိုင်ငံကို နျူကလီးယားလက်နက်နိုင်ငံအဖြစ် အဆင့်အတန်းကို ‌မပြောင်းလဲနိုင်တော့ပါဘူး” လို့ ထည့်သွင်းပြောကြားခဲ့ပါတယ်။

Source AFP/KCTV

#Kim_Jong_Un

#Nuclear_state

#North_Korea