#Local_News
Published_4 July 2022

မြန်မာနိုင်ငံက နိုင်ငံရေးပြန်လည်သင့်မြတ်ရေး စဉ်ဆက်မပြတ် တွန်းအားပေးဖော်ဆောင်ရန်အတွက် တရုတ်နှင့် အာဆီယံ ပူးတွဲလုပ်ဆောင်ရန် မျှော်လင့်ကြောင်း တရုတ်နိုင်ငံ နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး Mr. Wang Yi ကပုဂံမြို့၌ ကျင်းပနေသည့် လန်ချန်း-မဲခေါင် အစည်းအဝေးအတွင်း ဆွေးနွေးခဲ့ကြောင်း မြန်မာနိုင်ငံဆိုင်ရာ တရုတ်သံရုံးက ထုတ်ပြန်ထားသည်။

ယင်းဆွေးနွေးပွဲတွင် တရုတ်နိုင်ငံ၏ မြန်မာနိုင်ငံအပေါ်ထားရှိသည့် မျှော်လင့်ချက်သုံးချက်ရှိပြီး ယင်းကိုထည့်သွင်းဆွေးနွေးစဉ် အထက်ပါအတိုင်း ဆွေးနွေးခဲ့ခြင်း ဖြစ်သည်။

ပထမအချက်အနေဖြင့် ဖွဲ့စည်းပုံအခြေခံဥပဒေနှင့် ဥပဒေမူဘောင်များအောက်၌ မြန်မာနိုင်ငံက နိုင်ငံရေးပြန်လည်သင့်မြတ်ရေး စဉ်ဆက်မပြတ် တွန်းအားပေးဖော်ဆောင်ရန်အတွက် တရုတ်နှင့် အာဆီယံ ပူးတွဲလုပ်ဆောင်ရန် မျှော်လင့်ကြောင်း၊ မြန်မာနိုင်ငံရှိ အဖွဲ့အစည်းအသီးသီးက နိုင်ငံ၏အခင်းအကျင်းနှင့် ပြည်သူလူထု အကျိုးစီးပွားကို အလေးထားပြီး ဆင်ခြင်တုံတရားနှင့် လက်တွေ့ကျမှု၊ အပြန်အလှန် နားလည်သည်းခံမှုများဖြင့် ဘက်ပေါင်းစုံ၏ ကျိုးကြောင်းဆီလျော်သော တောင်းဆိုချက်များကို ထည့်သွင်းစဉ်းစားကာ တည်ငြိမ်အေးချမ်းရေးကို ဆောလျင်စွာ ဖော်ဆောင်ကြရန် အားပေးသည့်ကိစ္စဖြစ်ကြောင်း သိရသည်။

ဒုတိယအချက်မှာ မြန်မာနိုင်ငံ၏ ဒီမိုကရေစီအသွင်ကူးပြောင်းရေးလုပ်ငန်းစဉ် ပြန်လည်စတင်ပြီး တိုင်းပြည်အာဏာကို ပြည်သူများထံ ပြန်လည်အပ်နှင်းရေး မျှော်မှန်းချက် အကောင်အထည်ဖော်ရန်အတွက် တရုတ်နှင့် အာဆီယံ အတူတွန်းအားပေးကာ မြန်မာနိုင်ငံအခြေအနေနှင့် ကိုက်ညီသော၊ မြန်မာ့ဝိသေသလက္ခဏာဆောင်သော နိုင်ငံရေးဖွံ့ဖြိုးတိုးတက်မှုလမ်းကြောင်းကို ရှာဖွေနိုင်ရန် မျှော်လင့်သည့်အချက်ဖြစ်ကြောင်း သိရသည်။

တတိယအချက်အနေဖြင့် အာဆီယံက “အာဆီယံနည်းလမ်း” ကို လက်ကိုင်စွဲ၍ ပြည်တွင်းရေး ဝင်ရောက်စွက်ဖက်မှုမရှိရေး၊ ပေါင်းစပ်ညှိနှိုင်းရေးဟူသော အခြေခံမူနှင့် အစဉ်အလာများကို ခိုင်မြဲစေကာ တည်တည်ငြိမ်ငြိမ်နှင့် နှောင့်ယှက်မှုများကို ဖယ်ရှားပြီး စိတ်ရှည်လက်ရှည် ညှိနှိုင်းခြင်းဖြင့် အာဆီယံ၏ “တူညီဆန္ဒငါးရပ်”（five-point consensus）ကို အပြုသဘောဆောင်စွာ အကောင်အထည် ဖော်ရင်း အာဆီယံ၏ ပြီးပြည့်စုံသော စည်းလုံးညီညွတ်မှုနှင့် ဦးဆောင်မှုအခန်းကဏ္ဍကို ထိန်းသိမ်းရန် မျှော်လင့်ထားသည့်အကြောင်းကို Mr. Wang Yi က ဆွေးနွေးခဲ့ခြင်း ဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

မြန်မာနိုင်ငံက အိမ်ရှင်အဖြစ် လက်ခံကျင်းပသည့် (၇) ကြိမ်မြောက် လန်ချန်း - မဲခေါင် ပူးပေါင်းဆောင်ရွက်မှု အစည်းအဝေး (LMC) ကို ယူနက်စကိုဝင် ရှေးဟောင်းမြို့တော် ပုဂံမြို့၌ ဇူလိုင်လ ၂ ရက်မှ ၅ ရက်ထိ ကျင်းပနေခြင်းဖြစ်ကြောင်း သိရသည်။

ymg/mt
#Yangon_Media_Group

#Local_News
Published_ 4 July 2022

စက်သုံးဆီအမျိုးမျိုးကို ပြည်တွင်း၌ ပိုမိုတိုးတက်ထုတ်လုပ်နိုင်ရေး ဆောင်ရွက် သွားရန်နှင့် ရင်းနှီးမြှုပ်နှံသူများအား ထပ်မံဖိတ်ခေါ်သွားရန် လျှပ်စစ်စွမ်းအားဝန်ကြီး ဌာနနှင့် စွမ်းအင်ဝန်ကြီးဌာနဝန်ကြီး ဦးသောင်းဟန်က သန်လျင်မြို့နယ်ရှိ အမှတ်(၁) ရေနံချက်စက်ရုံ(သန်လျင်)သို့ သွားရောက်ကြည့်ရှု စစ်ဆေးစဉ် မှာကြားခဲ့တာ ဖြစ်ပါတယ်။

ထို့ပြင် စက်ရုံဆိပ်ကမ်းတွင် ရေနံစိမ်းသင်္ဘောများ ဆိုက်ကပ်နိုင်မည့် အခြေအနေ ကို သက်ဆိုင်ရာ ဝန်ကြီးဌာနများနှင့် ပူးပေါင်းလေ့လာ တင်ပြသွားရန်မှာကြားခဲ့ပါတယ်။

ထို့နောက်ဝန်ကြီးသည် စက်ရုံဧည့်ရိပ်သာ၊ ရုံးအဆောက်အဦများ ပြင်ဆင်မွမ်းမံ ထားရှိမှုနှင့် ရေနံပေါင်းတင်စက်တို့ကို ကြည့်ရှုစစ်ဆေးပြီး ရှေးဟောင်း အဆောက်အဦများကို စဉ်ဆက်မပြတ် ပြုပြင်မွမ်းမံထိန်းသိမ်းရန် လိုအပ်ကြောင်း၊ စက်ရုံမွမ်းမံပြင်ဆင်ခြင်းနှင့် စက်ရုံလည်ပတ်နိုင်ရေး ဆောင်ရွက်သွားရန် လိုအပ်တယ်လို့ ဆိုပါတယ်။

စက်ဆီရောစပ်စည်သွတ်စက်ရုံကို စဉ်ဆက်မပြတ် လည်ပတ်ထုတ်လုပ်ကာ ဝန်ကြီးဌာနများ၊ အဖွဲ့အစည်းများမှ လိုအပ်သော Mono-grade အဆင့် စက်ဆီ/ချောဆီများ အမြန်ဆုံး ဖြန့်ဖြူးပေးနိုင်ရေး ဆောင်ရွက်ရန်၊ ဒုတိယအဆင့်အနေဖြင့် Mono-grade အဆင့်မှ Multi-grade အဆင့်ရှိသော စက်ဆီ/ ချောဆီများ ထုတ်လုပ်ဖြန့်ဖြူးပေးနိုင်ရေး ဆောင်ရွက်သွားရမယ်လို့ ဆိုပါတယ်။

စီးပွားရေး တွက်ချေကိုက်မှု ရှိစေရေးအတွက် ပုဂ္ဂလိကလုပ်ငန်းရှင်များက ပြည်ပမှ ကုန်ကြမ်းတင်သွင်းကာ ဝန်ဆောင်ခပေးချေသောစနစ်ဖြင့် စက်ဆီ/ ချောဆီရောစပ် ထုတ်လုပ်ဖြန့်ဖြူးခြင်းကိုလည်း ဖိတ်ခေါ်ဆောင်ရွက်သွားရန် ပြောကြားခဲ့ကြောင်း သတင်းရရှိပါတယ်။

ymg-mnn
#Yangon_Media_Group

#DailyNews
Published - 4 July 2022

၁။ မြန်မာ့လက်မှုပစ္စည်းလုပ်ငန်းများ ပြန်လည်လည်ပတ်နိုင်အောင် ဖြေလျော့မှုအချို့ဆောင်ရွက်ပေးရန် လိုဟုဆို

၂။ ရန်ကုန်ရွှေဈေးကွက် တည်ငြိမ်နေကာ လိုင်စင်လျှောက်သူပိုမိုများပြားနေ

၃။ နေ့စဉ်မိုးလေဝသသတင်း။

၄။ ကာကွယ်ဆေးဘေးကင်းစိတ်ချရရေးအတွက် မရှိမဖြစ်အရေးကြီးတဲ့ မြင်းခွာဂဏန်း... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Breaking_News
Published 4 July 2022

ဒိန်းမတ်နိုင်ငံ ကိုပင်ဟေဂင်မြို့ရှိ ဈေးဝယ်စင်တာတစ်ခုမှာ တနင်္ဂနွေနေ့ကသေနတ်ပစ်ခတ်မှုဖြစ်ပွားခဲ့ရာ လူ ၃ ဦးသေဆုံးပြီး လူအများအပြားဒဏ်ရာရရှိခဲ့ကြောင်း ဒိန်းမတ်ရဲတပ်ဖွဲ့က ပြောကြားလိုက်ပါတယ်။

ပြစ်မှုကျူးလွန်ခဲ့တဲ့ အသက် ၂၂ နှစ်အရွယ်ဒိန်းမတ်လူမျိုးကို ဖမ်းမိခဲ့ပြီး လူသတ်မှုနဲ့ တရားစွဲဆိုထားပါတယ်။

ယခုအပတ်အတွင်း ဒိန်းမတ်နိုင်ငံမှာ ပြင်သစ်စက်ဘီးမာရသွန်ပြိုင်ပွဲလက်ခံကျင်းပလျက်ရှိပြီး အများပြည်သူများပျော်ရွှင်နေကြတဲ့ကာလမှာ အခုလိုတိုက်ခိုက်မှုဖြစ်ပွားခဲ့တာဖြစ်ပါတယ်။

"ဒိန်းမတ်မှာ တနင်္ဂနွေနေ့ညက ပစ်ခတ်မှုဖြစ်ပွားခဲ့ပါတယ်။ ၃ ဦးသေပြီး လူအများအပြားဒဏ်ရာရခဲ့ပါတယ်။ ဈေးဝယ်ထွက်လာတဲ့သူတွေ စားကြသောက်ကြတဲ့သူတွေ ကလေးတွေ လူကြီးတွေ အပြစ်မဲ့သူတွေပါဝင်ခဲ့ကြပါတယ်" လို့ ဝန်ကြီးချုပ်'မတ်ဖရက်ဒရစ်ဆန်'က ထုတ်ပြန်ခဲ့ပါတယ်။

"ကျွန်တော်တို့ရဲ့လှပလုံခြုံတဲ့မြို့တော်ကြီးဟာ တခဏအတွင်းမှာပဲ ပြောင်းလဲသွားခဲ့ပါတယ်၊ အခုလိုခက်ခဲတဲ့အချိန် ဒိန်းမတ်ပြည်သူတွေအနေနဲ့ အတူတကွရပ်တည်ပြီး အချင်းချင်းထောက်ပံ့ကူညီကြဖို့ တိုက်တွန်းလိုပါတယ်" လို့ ပြောကြားခဲ့ပါတယ်။

သေနတ်ပစ်ခတ်မှုဖြစ်ပွားကြောင်းသတင်းရရှိပြီးနောက် တနင်္ဂနွေနေ့မွန်းလွဲအချိန်မှာ မြိုတော်ရှိ Field ဈေးဝယ်စင်တာကို လက်နက်ကိုင်အရာရှိတွေစေလွှတ်ခဲ့ကြောင်း ကိုပင်ဟေဂင်ရဲတပ်ဖွဲ့က ဆိုပါတယ်။

အဲဒီနောက် စင်တာထဲကလူတွေကို အထဲမှာပဲနေပြီး အကူအညီစောင့်ဆိုင်းဖို့မှာကြားခဲ့ကြပါတယ်။

ပြည်တွင်းမီဒီယာရဲ့ ဗီဒီယိုရုပ်သံထုတ်လွှင့်မှုမှာ ဈေးဝယ်စင်တာထဲက ဈေးဝယ်သူတွေအလန့်တကြားပြေးလွှားနေကြတာကို ဖော်ပြထားပါတယ်။

သံသယရှိသူတရားခံက ညနေ ၅ နာရီ ၄၈ မိနစ်မှာ ဖမ်းမိခဲ့ပြီး ရိုင်ဖယ်သေနတ်တစ်လက်နဲ့ ကျည်ဆံတွေ သယ်ဆောင်ထားပါတယ်။

ကြံရာပါတွေရှိနိုင်လားဆိုတာကို သိရဖို့ အနီးအနားဝန်းကျင်ကိုလည်း ပိုက်စိပ် တိုက်ရှာဖွေခဲ့ကြပါတယ်။

တရားခံတစ်ယောက်တည်းဆိုတာကို အသေအချာမသိရသေးခင်မှာ စုံစမ်းစစ်ဆေးမှုတွေ ပြုလုပ်နေကြပါတယ်။

သေနတ်သမားရဲ့ပစ်ခတ်မှုကြောင့် အသက် ၄၀ အရွယ်လူတစ်ဦးနဲ့ အသက်ငယ်ရွယ်သူအမျိုးသားတစ်ဦးနဲ့ အမျိုးသမီးတစ်ဦးလည်းသေဆုံးခဲ့ပါတယ်။

ဒဏ်ရာရရှိသူ အများအပြားလည်းရှိခဲ့ပြီး ၃ ဦးက စိုးရိမ်ရတဲ့အနေအထားရှိပါတယ်။

စုံစမ်းစစ်ဆေးမှုအရ အကြမ်းဖက်မှုမှာ လူမျိုးရေးခွဲခြားခြင်းမျိုး စတဲ့အခြေအနေမျိုးလည်း မတွေ့ရှိရပါဘူး။

မြို့တော်ရှိအဓိက ဆေးရုံတစ်ခုဖြစ်တဲ့ Rigshospitalet ဆေးရုံမှာ လူနာအချို့ကုသခံယူဖို့ရောက်ရှိလာကြပြီး နောက်ထပ်ဆရာဝန်တွေနဲ့ သူနာပြုတွေကိုပါ ထပ်ခေါ်ခဲ့ရကြောင်းသိရှိရပါတယ်။

ဗီဒီယိုတစ်ခုမှာတော့ လူတစ်ယောက်က ရိုင်ဖယ်သေနတ်ကြီးကို ပခုံးပေါ်မှာဝှေ့ရမ်းပြီး ဈေးဝယ်စင်တာထဲသွားနေခဲ့ကာ အလိုမကျဖြစ်နေပြီး အော်ငေါက်နေခဲ့ပါတယ်။

"အစပိုင်းကတော့ သူ့ကိုသူခိုးလိုထင်နေကြတာပါ၊ နောက်တော့ ပစ်ခတ်သံတွေကြားပြီး စတိုးဆိုင်ကောင်တာအနောက်မှာ ပုန်းနေခဲ့ရတယ်၊ အပေါ်ကိုထောင်ပစ်တာမဟုတ်ပါဘူး၊ လူအုပ်ထဲကိုပစ်တာပါ" လို မျက်မြင်တစ်ဦးကပြောပြပါတယ်။
ဒီအဖြစ်အပျက်မှာပါဝင်ခဲ့တဲ့သူတွေ၊ မိသားစုဝင်တွေ၊ သက်ဆိုင်သူတွေအတွက် အလွန်ဝမ်းနည်းကြေကွဲမိပါတယ်လို့ ဒိန်းမတ်ဘုရင်မကြီးနဲ့ အိမ်ရှေ့မင်းသားတိုစုံတွဲက ထုတ်ပြန်ကြေညာခဲ့ပါတယ်။

တနင်္လာနေ့မှာ တရားခံကို တရားခွင်စစ်ဆေးမှုများ ပြုလုပ်သွားမယ်လို့ သိရှိရပါတယ်။

Source: Reuters.
#Yangon_Media_Group

#Local_News
Published - 4 July 2022

မွန်ပြည်နယ်အတွင်းရှိ အသက်(၁၈)နှစ်နှင့်အထက် လူဦးရေအားလုံး(၁၀၀)%စလုံးကို ကိုဗစ်ကာကွယ် ဆေးများထိုးနှံပေးထားပြီးဖြစ်သည်ဟု မွန်ပြည်နယ်၊ ပြည်သူ့ကျန်းမာရေးနှင့် ကုသရေးဦးစီးဌာနမှူးဒေါက်တာနန္ဒဝင်းက YMG ကို ပြောသည်၊၊

အသက်(၁၈)နှစ်နှင့်အထက်ရှိသူအားလုံးကို ထိုးနှံပေးပြီးဖြစ်၍ ကိုဗစ်ကာကွယ်ဆေးလွှမ်းခြုံနိုင်မှု(၁၀၀) %ရှိပြီဖြစ်ကြောင်း မွန်ပြည်နယ်၊ ပြည်သူ့ကျန်းမာရေးဦးစီးဌာနမှ သိရသည်၊၊

"လတ်တလောမှာ မွန်ပြည်နယ်အတွင်းရှိ အသက် (၁၈)နှစ်နှင့် အထက်လူဦးရေအားလုံး(၁၀၀)ရာခိုင် နှုန်းစလုံး ကိုဗစ်ကာကွယ်ဆေးထိုးပေးပြီးဖြစ်ပါတယ်၊၊
မွန်ပြည်နယ်ရှိကျောင်းနေအရွယ်ကလေးငယ် (၉၈.၈)ရာခိုင်နှုန်းတို့ကို ကိုဗစ်ကာကွယ်ဆေးထိုးပေးထားပြီးဖြစ်ပါတယ်၊၊ ကျန်ရှိနေသူတွေနဲ့ ထပ်ဆောင်းကိုဗစ်ကာကွယ်ဆေးထိုးခြင်း booster ထိုးလိုသူတွေကို ဆက်လက်ထိုးနှံပေးနေပါတယ်"လိုဒေါက်တာနန္ဒဝင်းက ပြောသည်၊၊

ကိုဗစ်ကာကွယ်ဆေးနှစ်ကြိမ်ပြည့်ထိုးပြီးနောက် ထပ်ဆောင်းကာကွယ်ဆေးထိုး booster ထိုးထားသူသည် မွန်ပြည်နယ်ရဲ့လူဦးရေ( ၂၀)%ရှိကြောင်းနှင့် ကျန်ရှိနေသူများ ဆက်လက်ထိုးနှံကြဖို့ နှိုးဆော်ဆောင်ရွက်လျက်ရှိကြောင်း မွန်ပြည်နယ်၊ပြည်သူ့ကျန်းမာရေးဦးစီးဌာနမှ သိရသည်၊၊

ymg/tthl
#Yangon_Media_Group

#Local_News
Published - 4 July 2022

ယနေ့ နံနက်ပိုင်းအချိန်တွင် ရန်ကုန်တိုင်း၊ ရွှေပြည်သာမြို့နယ်အတွင်း ဆောက်လက်စတိုက် ပြိုကျမှုဖြစ်ပွားခဲ့ကာ ပိတ်မိသူအများအပြားရှိခဲ့ကြောင်း ကယ်ဆယ်ရေးအသင်းများထံမှ သိရသည်။

အဆိုပါဖြစ်စဉ်မှာ ယနေ့ ဇူလိုင်လ ၄ ရက် နံနက် ၁၀ နာရီဝန်းကျင်ခန့် ရွှေပြည်သာမြိုနယ်၊ ၅ရပ်ကွက်၊ ပတ္တမြားလမ်းရှိ ဆောက်လက်စတိုက် ပြိုကျမှုဖြစ်ပွားခဲ့ပြီး မီးသတ်တပ်ဖွဲ့ဝင်များနဲ့ ကယ်ဆယ်ရေးအသင်းများမှ ကူညီမှုများဆောင်ရွက်ပေးနေကြောင်းသိရသည်။

ရွှေပြည်သာမြို့နယ်အတွင်း ဆောက်လက်စတိုက် ပြိုကျမှုကြောင့် ရှာဖွေကယ်ဆယ်ရေးယာဉ်များ၊ ရှာဖွေကယ်ဆယ်ရေး(အထူး)တပ်ဖွဲ့ဝင်များ၊ မြို့နယ်မီးသတ်စခန်းမှ ရှာဖွေကယ်ဆယ်ရေးတပ်ဖွဲ့ဝင်များက ကယ်ဆယ်ရေးလုပ်ငန်းများ ဆောင်ရွက်နေပြီး ထိခိုက်ဒဏ်ရာရမှုကို မသိရှိရသေးကြောင်း မီးသတ်တပ်ဖွဲ့မှ သတင်းထုတ်ပြန်ထားသည်။

ymg/sth
#Yangon_Media_Group

#Local_News
Published_ 4 July 2022

ပဲခူးမြစ်ကူး သန်လျင်တံတား အမှတ် (၃) တည်ဆောက်ရေးလုပ်ငန်းများ ပြီးစီးသွားပါကဒေသ၏ လူမှုစီးပွားဘဝများ ဖွံ့ဖြိုးတိုးတက်လာမည်ဖြစ်ပြီး ယာဉ်ကြောပိတ်ဆို့မှု လျော့နည်းသက်သာစေမှာဖြစ်ကြောင်း သိရပါတယ်။

ဆောက်လုပ်ရေးဝန်ကြီးဌာနဝန်ကြီး ဦးရွှေလေးသည် ဒီကနေ့မွန်းလွဲပိုင်းတွင် ရန်ကုန်-သန်လျင်-သီလဝါ အထူးစီးပွားရေးဇုန်တို့ကို အလွယ်တကူ ဆက်သွယ်သွားလာနိုင်မယ့် ပဲခူးမြစ်ကူး သန်လျင်တံတားအမှတ်(၃)တည်ဆောက်လုပ်ငန်းကို သွားရောက် ကြည့်ရှုစစ်ဆေးခဲ့ပါတယ်။

ဝန်ကြီးသည် သာကေတဘက်ခြမ်း တံတားတည်ဆောက်ရေး လုပ်ငန်းခွင်သို့ သွားရောက်၍ P C Box Girder ထုတ်လုပ်နေမှု၊ လုပ်ငန်းခွင်အတွင်း သယ်ယူပို့ဆောင်ပေးနေမှုနှင့် Span by Span Method ဂျပန်နည်းပညာဖြင့် တပ်ဆင်မယ့် အခြေအနေနှင့် Fly Over Bridge တည်ဆောက်ပြီးစီးမှုကို ကြည့်ရှုစစ်ဆေးခဲ့ပါတယ်။

ထို့နောက် သံလျင်ဘက်ခြမ်းသို့ သွားရောက်၍ ချဉ်းကပ်တံတား ဆောင်ရွက်နေမှုကို လည်းကောင်း၊ ရေလယ်တိုင်အမှတ်(၆) လုပ်ငန်းများ ဆောင်ရွက်နေမှု၊ လွန်းထိုးခြင်း (Launching) နည်းပညာကို အသုံးပြု၍ P C Box Girder များ တပ်ဆင်ရန် ပြင်ဆင်မှုကို ကြည့်ရှုစစ်ဆေးပြီး လုပ်ငန်းခွင်ဘေးအန္တရာယ်ကင်းရှင်းရေး အမြဲဂရုပြုဆောင်ရွက်ရန် မှာကြားခဲ့ပါတယ်။

ပဲခူးမြစ်ကူး သန်လျင်တံတားအမှတ်(၃)သည် လက်ရှိ အသုံးပြုနေသည့် ရန်ကုန်-သန်လျင် အမှတ်(၁)တံတား၏အနီးတွင် တည်ရှိပြီး ပင်မတံတားအရှည် (၁၉၂၈)မီတာ၊ ယာဉ်သွားလမ်းအကျယ် (၂၄)မီတာ ယာဉ်(၄) လမ်းသွားနှင့် သာကေတဘက်ခြမ်း ချဉ်းကပ်တံတားအရှည် (၅၄၇)မီတာ၊ သန်လျင် ဘက်ခြမ်း ချဉ်းကပ်တံတား အရှည်(၁၈၈)မီတာရှိပြီး တံတား၏ ခံနိုင်ဝန်မှာ (၇၅)တန်ဖြစ်ကြောင်း သိရပါတယ်။

ymg-mnn
#Yangon_Media_Group

#Local_News
Published _ 4 June 2022

ရန်ကုန်တိုင်းဒေသကြီး၊ သုံးခွမြို့နယ် အမှတ် ၁ ရပ်ကွက်၊ မဂ္ဂင်လမ်း၊ အစိုးရရေကန်ဘေးတွင် ပန်းခြံအသစ်တစ်ခု တိုးချဲ့တည်ဆောက်လျက်ရှိကြောင်းသိရသည်။

ယင်းပန်းခြံသစ်ကို မြို့နယ်စည်ပင်သာယာရေးအဖွဲ့ ၂၀၂၂-၂၀၂၃ ဘဏ္ဍာနှစ် ခွင့်ပြုရန်ပုံငွေဖြင့် မြေယာရှုခင်းပြုပြင်ခြင်း၊ မြက်ပင်များစိုက်ခြင်း၊ အရိပ်ရသစ်ပင်၊ ပန်းမာလာများ၊ ပန်းအလှသစ်ပင်များ စိုက်ပျိုးခြင်း၊ ကန်ပေါင်ပေါ်တက်ရန် အုတ်လှေ ကား ပြုလုပ်ခြင်း၊ အပင်များကို ရေပိုက်ဒလက်စနစ်ဖြင့် ရေဖျန်းရန်ပြုလုပ်ခြင်း လျှပ်စစ်၊ မီးတိုင်များစိုက်ခြင်းများ ဆောင်ရွက်ခဲ့ကြောင်း သိရသည်။

ဆက်လက်၍ ပြည်သူများ အပန်းဖြေရန်အနားယူရန် ပန်းခြံလျှောက်လမ်း၊ ခုံတန်း လျားများပြုလုပ်ခြင်း၊ ကန်ဘောင်ပေါ် လမ်းလျှောက်ပြီးနောက် ကိုယ်လက်လှုပ်ရှား လေ့ကျင့်ခန်းပြုလုပ်ရန် စက်ကိရိယာများ ပြုလုပ်ထားရှိခြင်းများ ဆက်လက်ဆောင်ရွက်ရန် အစီအစဉ်ရှိကြောင်း၊ လက်ရှိတွင် ခြံတံခါးခြံစည်းရိုး သံပန်းကာရံခြင်းပြုလုပ်ရန် အုတ်တိုင်များ ပြုလုပ်ခြင်း၊ ရေစီးရေလာ ကောင်းမွန်စေရန် အုတ်ရေမြောင်းပြုလုပ်ခြင်းများ ဆောင်ရွက်လျက်ရှိကြောင်း ဘဏ္ဍာနှစ်အလိုက်ခွင့်ပြုရန်ပုံငွေများဖြင့် ပန်းခြံတိုးတက်ဆောင်ရွက်သွားမည်ဟု သိရသည်။

ymg/NN
#Yangon_Media_Group

#Local_News
Published - 4 July 2022

ဟိုတယ်နှင့် တည်းခိုခန်းများတွင် နိုင်ငံတကာခရီးသွားများ လာရောက်တည်းခိုနေထိုင်မှု စာရင်းဇယားများကို နည်းပညာစနစ်များနှင့်အညီ ဧည့်စာရင်းစီမံခန့်ခွဲမှုစနစ်ဖြစ်သည့် (Guest List Management System-GLMS) ကို ဆောင်ရွက်ခဲ့ရာတွင် ဟိုတယ် ၈၆ လုံး မှတ်ပုံတင် ဆောင်ရွက်ပြီးစီးခဲ့ကြောင်း သိရသည်။

အဆိုပါ ဧည့်စာရင်းစီမံခန့်ခွဲမှုစနစ် (GLMS) သည် ဟိုတယ်၌ လာရောက်တည်းခိုသည့် ဧည့်သည်များ၏ အချက်အလက်များကို မှတ်တမ်းတင်ခြင်း၊ ဧည့်သည်များ ဆက်လက်သွားရောက်မည့် ခရီးလမ်းကြောင်းများ နောက်ကြောင်းလိုက်ခြင်းများ ပါဝင်ကြောင်း သိရသည်။

ယင်းအပြင် ဟိုတယ်၊ မိုတယ်၊ တည်းခိုရိပ်သာများကို ကျန်းမာရေးနှင့် ဘေးအန္တရာယ်ကင်းရှင်းရေးဆိုင်ရာ ဒေသအဆင့်ဆင့်နှင့် အမျိုးသားအဆင့် အသိအမှတ်ပြုလက်မှက် (HSP Plaque) များကို သတ်မှတ်စည်းကမ်းချက်နှင့် အညီ ထုတ်ပေးခွင့်ပြုပေးခဲ့ကြောင်း သိရသည်။

နေပြည်တော်ကောင်စီတွင် ဟိုတယ်နှင့် တည်းခိုရိပ်သာ ၉၈ လုံးရှိရာ၊ ၇၅ လုံး ပြန်လည်ဖွင့်လှစ်နေပြီဖြစ်ကြောင်း သိရသည်။

ymg/sth
#Yangon_Media_Group

Published 4 July 2022

မြန်မာနိုင်ငံက အိမ်ရှင်အဖြစ် ပုဂံမြို့မှာ လက်ခံကျင်းပတဲ့ (၇)ကြိမ်မြောက်  မဲခေါင်-လန်ချန်း ပူးပေါင်းဆောင်ရွက်မှု နိုင်ငံခြားရေးဝန်ကြီးများ  အစည်းအဝေးကို ယနေ့ဇူလိုင် (၄)ရက် မနက်တွင် စတင်ကျင်းပခဲ့ပါတယ်။

အဆိုပါအစည်းအဝေးမှာ မြန်မာ နိင်ငံခြားရေးဝန်ကြီး ဦးဝဏ္ဏမောင်လွင်နှင့် တရုတ်ပြည်သူ့သမ္မတနိုင်ငံ နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး မစ္စတာ ဝမ်ယိတို့က ပူးတွဲသဘာပတိများအဖြစ် ဆောင်ရွက်ကြပါတယ်။

မဲခေါင်-လန်ချန်း ပူးပေါင်းဆောင်ရွက်မှု နိုင်ငံခြားရေးဝန်ကြီးများအစည်းအဝေးကို မြန်မာနှင့်တရုတ်နိုင်ငံခြားရေးဝန်ကြီးတွေနှင့်အတူ အခြား အဖွဲ့ဝင်နိုင်ငံတွေဖြစ်ကြတဲ့ ကမ္ဘောဒီးယား ဒုတိယဝန်ကြီးချုပ် နိုင်ငံခြားရေးနှင့်အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီး မစ္စတာ Prak Sokhonn ၊ လာအို ဒုတိယဝန်ကြီးချုပ်နှင့် နိုင်ငံခြားရေးဝန်ကြီး မစ္စတာ Saleumxay Kommasithi ၊ ထိုင်းဒုတိယဝန်ကြီးချုပ်နှင့် နိုင်ငံခြားရေးဝန်ကြီး  မစ္စတာ Don Pramudwinai နှင့် ဗီယက်နမ်နိုင်ငံခြားရေးဝန်ကြီး မစ္စတာ Bui Thanh Son တို့ တက်ရောက်ကြပါတယ်။

မဲခေါင်-လန်ချန်းပူးပေါင်းဆောင်ရွက်မှုအဖွဲ့မှာ တရုတ်နိုင်ငံနှင့်အတူ အာဆီယံအဖွဲ့ဝင် တစ်ဆက်တစ်စပ်ကုန်းမြေ(၅)နိုင်ငံဖြစ်တဲ့ မြန်မာ၊ထိုင်း၊လာအို၊ကမ္ဘောဒီးယားနှင့် ဗီယက်နမ်နိုင်ငံတို့ဖြင့် ဖွဲ့စည်းတည်ထောင်ထားတာဖြစ်ပါတယ်။

#WorldNews
Published 4 July 2022

မြင်းတစ်ကောင်နဲ့လိင်ဆက်ဆံခဲ့ပြီး အခြားမြင်းများကိုလည်း လိင်ပိုင်းဆိုင်ရာအကြမ်းဖက်ခဲ့တယ်လို့ ဝန်ခံခဲ့တဲ့ တက္ကဆက်မှ လူတစ်ယောက်ကို ဆယ်စုနှစ်တစ်ခုကြာအောင် ထောင်ဒဏ်ချမှတ်ခဲ့ပါတယ်။

အသက် ၂၄ နှစ်ရှိ'ဂျင်းမာရီဘူဂိုမာ'ဟာ တိရိစ္ဆာန်နဲ့လိင်ဆက်ဆံခဲ့တယ်ဆိုတာကို အပြစ်ရှိကြောင်း ဝန်ခံခဲ့ပြီးနောက် ဗုဒ္ဓဟူးနေ့မှာ ပြစ်ဒဏ်ချမှတ်ခံခဲ့ရကြောင်း KSAT က သတင်းတင်ပြခဲ့ပါတယ်။

၂၀၂၀ ဇွန်လမှ ၂၀၂၁ ဖေဖော်ဝါရီလအတွင်း ဆန်အန်တိုနီယို မြင်းမွေးမြူရေးလုပ်ငန်းမှာ ထိုလုပ်ရပ်မျိုးအနည်းဆုံး ၃ ကြိမ်ဖြစ်ပွားခဲ့ပါတယ်။

ပထမဆုံးအကြိမ်တုန်းက 'ဘူဂိုမာ'ဟာ အဝတ်အစားမပါဘဲနဲ့ မြင်းစောင်းထဲကိုဖြတ်သွားကြောင်း စောင့်ကြည့်ကင်မရာကနေတွေ့ရှိခဲ့တယ်လို့ ကျမ်းကျိန်ထွက်ဆိုချက်အရ သိရှိရပါတယ်။

မြင်းပိုင်ရှင်က သူ့ရဲ့မြင်း ၂ ကောင်ဒဏ်ရာရနေတာကို သတိပြုမိပြီး တိရိစ္ဆာန်ဆရာဝန်နဲ့ပြသရာမှာ လိင်ပိုင်းအကြမ်းဖက်ခြင်းခံခဲ့ရကြောင်းသိရှိသွားပါတယ်။

နောက်လအနည်းငယ်ကြာတဲ့အခါ 'ဘူဂိုမာ'က မြင်းစောင်းထဲထပ်သွားခဲ့ပြီး မြင်းတစ်ကောင်နဲ့လိင်ဆက်ဆံခဲ့ကြောင်း အာဏာပိုင်များက ဆိုပါတယ်။

အခြားမြင်း ၂ ကောင်ဟာလည်း ခြေထောက်တွေကြိုးတုပ်ခံထားရပါတယ်။

မြင်းတစ်ကောင်ကရရှိတဲ့ DNA ဟာ တရားခံရဲ့ DNA နဲ့ကိုက်ညီကြောင်း အာဏာပိုင်တွေကဖမ်းဝရမ်းရရှိခဲ့ပြီး ပြီးခဲ့တဲ့နှစ်ဖေဖော်ဝါရီလတုန်းက 'ဘူဂိုမာ'ကို မြင်းစောင်းထဲမှာ ဖမ်းမိခဲ့ပါတယ်။

Source: New York Post
#Yangon_Media_Group

#Local_News
Published _ 4 July 2022

အမေရိကန်နိုင်ငံတကာအကူအညီပေးရေးအေဂျင်စီ (USAID)မှ မြန်မာ့စီးပွားရေး လုပ်ငန်းရှင်များကို ရင်းနှီးမြှုပ်နှံမှု နှင့်ကုန်သွယ်မှုများ ဖွံ့ဖြိုးတိုးတက်ရန် အထောက်အပံ့များ ပေးအပ်သွားမည်ဖြစ်ကြောင်း သိရသည်။

USAID အနေဖြင့် လယ်ယာစိုက်ပျိုးရေးနှင့် ရေလုပ်ငန်းကဏ္ဍ၊ လက်လီရောင်းဝယ်ရေး ကဏ္ဍ၊ ကုန်စည်ဖြန့်ဖြူးရေးနှင့် ထောက်ပံ့ပို့ဆောင်ရေးလုပ်ငန်းကဏ္ဍ၊ အလတ်စား ကုန်ထုတ်လုပ်ငန်းကဏ္ဍနှင့် ပို့ကုန်ကဏ္ဍများတွင် အလားအလာရှိသည့် ကုမ္ပဏီများ၊ စီးပွားရေးလုပ်ငန်းများကို စိစစ်ရွေးချယ်ပြီးအကူအညီများပေးအပ်သွားမည်ဖြစ်ကာ အဆိုပါ အစီအစဉ်မှ သုံးနှစ်အတွင်း တစ်နှစ်ဝင်ငွေ ကျပ်သိန်း ၆၀၀၀ နှင့်အထက်ရှိရမည်ဟု ခန့်မှန်းထားသည်။

အစီအစဉ်တွင် စိုက်ပျိုးရေး၊ မွေးမြူရေးပို့ကုန်များကို ပြည်ပဈေးကွက်ထံ လက်လှမ်းမီစေရန် ထောက်ခံစာထုတ်ပေးခြင်းလုပ်ငန်းများကို ပံ့ပိုပေးခြင်း၊ ချေးငွေရရှိရေး အတွက်လိုအပ်သည့်ဘဏ္ဍာရေးဆိုင်ရာ ပြင်ဆင်မှုနှင့် ရင်းနှီးမြှုပ်နှံမှု တိုးတက်စေရန် လမ်းညွှန်ပြသခြင်း၊ တန်ဖိုးမြင့်လယ်ယာထွက်ကုန်များအတွက် လိုအပ်သည့်စက်ပစ္စည်းများဝယ်ယူနိုင်ရန်ပံ့ပိုးပေးခြင်း၊ ဈေးကွက်ဖြန့်ချိရေးလမ်းကြောင်းများနှင့် လက်လှမ်းမီစေရန် မိတ်ဖက်လုပ်ငန်းများနှင့် ချိတ်ဆက်ပေးခြင်းတို့ ပါဝင်သည်။

သို့ရာတွင် လုပ်ငန်းများသည် စီမံကိန်းတွင် သတ်မှတ်ထားသည့်လုပ်ငန်းဖြစ်ရန် လိုပြီး ယင်းလုပ်ငန်းများသည်ကုမ္ပဏီ မှတ်ပုံတင်ခြင်းဖြစ်စေ၊ အခြား ဌာနတစ်ခုခုတွင်ဖြစ်စေ မှတ်ပုံ တင်ထားရမည်ဖြစ် ကာ လုပ်ငန်း သက်တမ်းအနည်းဆုံးသုံးနှစ် ရှိရန်လိုအပ်မည်ဖြစ်သည်။

ယင်းပြင် ပြီးခဲ့သည့် သုံးနှစ်အတွင်းတစ်နှစ်ဝင်ငွေ ကျပ်သိန်း ၆၀၀၀ နှင့် အထက်ရှိရမည်ဖြစ်ပြီး လာမည့်နှစ်နှစ်အတွင်းကုမ္ပဏီဝင် ငွေတိုးတက်ရေး သို့မဟုတ် လုပ်ငန်းချဲ့ထွင်ရေးအတွက်ရည်မှန်းထားသည့်လုပ်ငန်းများဖြစ်ရန် လိုကြောင်းလည်း ယင်းမှ သိရသည်။

ymg/NN
#Yangon_Media_Group