#Local_News
Published_5 July 2022

မှော်ဘီမြောင်းတကာဓာတ်မြေဩဇာစက်ရုံနှင့် ကန်ကြီးထောင့်ဓာတ်မြေသြဇာစက်ရုံများမှ တစ်နေ့လျှင် ဓာတ်မြေသြဇာ တန် ၃၀၀ ထုတ်လုပ်မည်ဖြစ်ကြောင်း စွမ်းအင်ဝန်ကြီးဌာန မြန်မာ့ရေနံဓာတုဗေဒလုပ်ငန်းက သိရသည်။

အဆိုပါ အမှတ်(၄) ဓာတ်မြေသြဇာစက်ရုံ(မြောင်းတကာ)နှင့် အမှတ်(၅)ဓာတ်မြေ သြဇာစက်ရုံ(ကန်ကြီးထောင့်)တို့မှာ မြန်မာ့ရေနံဓာတုဗေဒလုပ်ငန်း ကြီးကြပ်မှုအောက်တွင်ရှိပြီး ယခုဇူလိုင်လ ၁၃ ရက်မှ စတင်လည်ပတ်ပြီးနေ့စဉ်တန် ၃၀၀ ထုတ်လုပ်မည့် ဓာတ်မြေသြဇာအမျိုးအစားများမှာ ယူရီးယားဓာတ်မြေသြဇာဖြစ်ပြီး စိုက်ပျိုးရာသီအမီ တောင်သူလယ်သမားများအတွက် ထုတ်လုပ်ဖြန့်ဖြူးပေးမည်ဖြစ်ကြောင်း သိရသည်။

မြန်မာနိုင်ငံအနေဖြင့် စိုက်ပျိုးရေးကိုအခြေခံသော နိုင်ငံတစ်နိုင်ငံဖြစ်သောကြောင့် ယခုကဲ့သို့ စိုက်ပျိုးရာသီတွင် ဓာတ်မြေသြဇာများ ဖြည့်ဆည်းနိုင်ရေး၊အရည်အသွေးပြည့်ဝသည့် ဓာတ်မြေသြဇာများ ထုတ်လုပ်ဖြန့်ဖြူးပေးနိုင်ရန်အတွက်လုပ်ငန်းသုံးစက်ပစ္စည်းများနှင့်ထုတ်ကုန်များ အရည်အသွေးပြည့်မီရန်နှင့် စီးပွားရေးအရ တွက်ခြေကိုက်ပြီးအောင်မြင်သည့် စက်ရုံတစ်ရုံဖြစ်စေရေးအတွက် လည်ပတ်ထုတ်လုပ်နိုင်ရေး လုပ်ဆောင်သွားမည် ဖြစ်ကြောင်းလည်း မြန်မာ့ရေနံဓာတုဗေဒလုပ်ငန်းက ထုတ်ပြန်ထားသည်။

ymg/mt
#Yangon_Media_Group

#Local_News
Published_5 July 2022

ဧရာဝတီတိုင်းဒေသကြီး၊ ပုသိမ်မြို့ရှိပုသိမ်လေယာဉ်ကွင်းကို အဆင့်မြှင့်တင်မည်ဖြစ်ကြောင်း နစက ဥက္ကဌက ဇူလိုင်လ ၄ ရက်တွင် ဧရာဝတီတိုင်းဒေသကြီး ပြည်နယ်၊ ခရိုင်၊ မြို့နယ်အဆင့် ဌာနဆိုင်ရာဝန်ထမ်းများနှင့် တွေ့ဆုံစဉ် ပြောကြားခဲ့သည်။

ဥက္ကဌက ရန်ကုန်-ပုသိမ်လမ်းမကြီး အဆင့်မြှင့်တင်ဆောင်ရွက်ရာတွင်လည်း အာဆီယံသတ်မှတ်ချက်များနှင့်အညီ စနစ်တကျ တည်ဆောက်သွားရန်လိုသည့်အပြင် ပုသိမ်လေယာဉ်ကွင်း အဆင့်မြှင့်တင်ရေးအတွက်လည်း ဆောင်ရွက်သွားမည်ဖြစ်ကြောင်း ထည့်သွင်းပြောကြားခဲ့ခြင်း ဖြစ်သည်။

ခရီးသွားလုပ်ငန်းအတွက် မြန်မာအမျိုးသားလေကြောင်းလိုင်းနှင့် Asia World Group of Companies ၏လက်အောက်ခံ International Travel Asia ကုမ္ပဏီတို ပူးပေါင်း၍ လွန်ခဲ့သော ၃ နှစ်ကျော်ကာလက ရန်ကုန်-ပုသိမ်လေကြောင်းခရီးစဉ်ကို တစ်ပတ်လျှင် ၄ ရက်၊ တနင်္လာ၊ အင်္ဂါ၊ ကြာသပတေး၊ စနေနေ့ ညနေပိုင်း ၃ နာရီမှ ၄ နာရီခွဲ အကြား တစ်ရက်လျှင် အသွားအပြန် တစ်ခေါက်စီ ပျံသန်းပြေးဆွဲခဲ့သေးသည်။

ရန်ကုန်မှ ပုသိမ်ခရီးစဉ်အတွက် နိုင်ငံခြားသားခရီးသည်တစ်ဦးလျှင် အမေရိကန် ၅၅ ဒေါ်လာနှင့် နိုင်ငံသားများ အတွက်တစ်ဦးလျှင် ၅၅၀၀၀ ကျပ် ၊ ပုသိမ်မှ ရန်ကုန်ခရီးစဉ်အတွက် နိုင်ငံခြားသားတစ်ဦးလျှင် အမေရိကန် ၅၃ ဒေါ်လာ နှင့် နိုင်ငံသားတစ်ဦးလျှင် ၅၃၀၀၀ ကျပ်သတ်မှတ် ပြေးဆွဲခဲ့ခြင်းလည်း ဖြစ်သည်။

ယခင်က ပုသိမ်- ရန်ကုန်ခရီးအတွက် ရေကြောင်းလမ်းနှင့် လေကြောင်းလမ်း ရှိခဲ့သော်လည်း ၁၉၆၂-၆၃ ခုနှစ် ခန့်ကာလတွင် လေကြောင်းခရီးစဉ် ရပ်ဆိုင်းခဲ့ကြောင်း၊ ၁၉၈၈ ခုနှစ်နောက်ပိုင်းတွင် ပုသိမ်-ရန်ကုန် ကားလမ်းပေါ်ပေါက်လာပြီးနောက် ၂၀၁၃ ခုနှစ်တွင် ပုသိမ်-ရန်ကုန်ရေကြောင်းခရီးသင်္ဘောလိုင်းများ ရပ်ဆိုင်းခဲ့ကြောင်း ဧရာဝတီတိုင်းဒေသကြီး အစိုးရအဖွဲ့ရုံးက သိရသည်။

ymg/mt
#Yangon_Media_group

#WorldGeopolitics
Published 5 July 2022

ပင်လယ်နက်ရှိ ဗျူဟာမြောက်စခန်းအခြေချရာ မြွေကျွန်းမှ ရုရှားတပ်များပြီးခဲ့တဲ့ရက်သတ္တပတ်ကဆုတ်ခွာပြီးနောက် အဆိုပါမြွေကျွန်းသို့ ယူကရိန်းအလံကို ရဟတ်ယာဉ်ဖြင့် သယ်ဆောင်လာခဲ့ပြီး ယူကရိန်းတပ်များရောက်ရှိလာတာနဲ့ အလံထူသွားမယ်လို့ ယူကရိန်းစစ်တပ်က တနင်္လာနေ့မှာ ပြောကြားလိုက်ပါတယ်။

ပင်လယ်နက်ထဲက ကုန်းမြေပြင်မျက်နှာပြင်နေရာမှာ အလံရောက်ရှိနေပြီးပြီလို့ ယူကရိန်းတောင်ပိုင်းစစ်ဌာနချုပ်မှ ပြောရေးဆိုခွင့်ရှိသူ 'နာတာလီယာဟွန်မန်နီယက်'က အစပိုင်းမှာ ပြောကြားခဲ့ပါတယ်။

"ယူကရိန်းအလံကို မြွေကျွန်းထံသို့ ရဟတ်ယာဉ်ဖြင့် ပို့ဆောင်ပြီးပါပြီ၊ တပ်ဖွဲ့တွေရောက်လာတာကိုစောင့်ပြီး အလံလွှင့်ထူသွားမှာပါ" လို့ 'ဟွန်မန်နီယက်'ရဲ့ပြောကြားချက်ကို ယူကရိန်းမီဒီယာတစ်ခုက ဖော်ပြသွားပါတယ်။

သတင်းထောက်တွေကို အစပိုင်းမှာပြောခဲ့တဲ့စကားတွေကို မြင်ယောင်ပုံဖော်တဲ့သဘောနဲ့သာကြည့်ရှုဖို့ 'ဟွန်မန်နီယက်'က ရှင်းပြခဲ့ပါတယ်။

ကျွန်းပေါ်မှာ ဘယ်တပ်သားမှမရောက်သေးသလို မီဒီယာတွေဓာတ်ပုံရိုက်ကူးဖို့အတွက်လည်း ဘယ်သူကမှစွန့်စားချင်မှာ မဟုတ်ပါဘူးလို့ ဆိုခဲ့ပါတယ်။

ယူကရိန်းအနောက်တောင်ဘက် ကမ်းရိုးတန်းရှိမြွေကျွန်းကနေ ရုရှားတပ်များဆုတ်ခွာသွားခြင်းက ယူကရိန်းဆိပ်ကမ်းများအပေါ် ပိတ်ဆို့မှုများ ပြေလျော့သွားမယ်လို့ လေ့လာသူများက သုံးသပ်ခဲ့ကြပါတယ်။

ဒါပေမဲ့ ယူကရိန်းရဲ့သီးနှံစပါးတွေ လုံခြုံစိတ်ချစွာဖြတ်သန်းဖို့ကတော့ မဖြစ်နိုင်သေးဘူးလို ကိဗ်အခြေစိုက်နိုင်ငံခြားရေးသံတမန်တစ်ဦးက ရိုက်တာသတင်းဌာနကို ပြောကြားခဲ့ပါတယ်။

"မိုင်းတူးဖော်ရှာဖွေရမှာတွေ ရှိနေပါသေးတယ်၊ ကုန်တင်ပို့ရေးလမ်းကြောင်းတွေမှာ ရုရှားတို့က စစ်သင်္ဘောများ၊ ကာကွယ်ရေးလက်နက်စနစ်များနဲ့ လေကြောင်းစနစ်များဖြင့် ဟန့်တားနိုင်သေးတဲ့အနေအထားရှိပါတယ်" လို့ ရှင်းပြသွားပါတယ်။

ဆိပ်ကမ်းတွေ ပြန်လည်ဖွင့်လှစ်ပြီး စပါးတွေပြန်လည်တင်ပို့နိုင်ရန်အတွက် ယူကရိန်းအနေနဲ့ မဟာမိတ်တွေရဲ့ထောက်ပံ့ကူညီမှုလိုအပ်ပြီး တူရကီကအဓိကကျကြောင်း ဖြည့်စွက်ပြောကြားခဲ့ပါတယ်။

လူသားချင်း စာနာထောက်ထားမှုအရ ယူကရိန်းနိုင်ငံမှ ဆန်စပါးတင်ပို့နိုင်ရေးကိုကြိုးပမ်းနေတဲ့ ကုလသမဂ္ဂရဲ့အားထုတ်မှုကို အနှောင့်အယှက်မဖြစ်စေကြောင်းပြသတဲ့အနေနဲ့ ကြာသပတေးနေ့က မြွေကျွန်းကနေ ဆုတ်ခွာခဲ့တာဖြစ်ကြောင်း ရုရှားတို့က ကြေညာခဲ့ပါတယ်။

ယူကရိန်းဘက်ကတော့ ဒုံးကျည်တွေအမြှောက်တွေနဲ့ပစ်ခတ်ပြီး ရုရှားတပ်များကိုနှင်ထုတ်နိုင်ခဲ့တာဖြစ်ကြောင်း ပြောကြားထားပါတယ်။

Source: Reuters
#Yangon_Media_Group

#Local_News
Published - 5 July 2022

ပုဂ္ဂလိကရင်းနှီးမြှုပ်နှံမှုဖြင့် ရေအားလျှပ်စစ်စီမံကိန်းအသစ် (၆) ခုကို ဆောင်ရွက်သွားရန် လျှပ်စစ်စွမ်းအားဝန်ကြီးဌာန၊ ရေအားလျှပ်စစ် အကောင်အထည်ဖော်ရေးဦးစီးဌာနမှ အိတ်ဖွင့်တင်ဒါခေါ်ယူထားသည်။

အဆိုပါ စီမံကိန်းဖော်ဆောင်လိုသည့် ကုမ္ပဏီများအနေဖြင့် ဖြစ်မြောက်နိုင်စွမ်း အစီရင်ခံစာပြုစုခြင်း ပြုလုပ်ရမည် ဖြစ် ကြောင်းထည့်သွင်းဖော်ပြထားသည်။

ပုဂ္ဂလိကရင်းနှီးမြှုပ်နှံမှု ဖြင့်ဆောင်ရွက်မည့် စီမံကိန်းတွင် ဖုန်အင်ခ၊ ကဆန်ရေ၊ နမ့်မယ်ဆိုင်၊ နမ့်ကန်၊ နမ့်တဘက်(ကယား)နှင့် အထက်ဆည်တော်ကြီး ရေအားလျှပ်စစ်စီမံကိန်းတို့ ပါဝင်ပြီး စိတ်ဝင်စားသည့် လုပ်ငန်းရှင်ကုမ္ပဏီများကို အပ်နှံလိုကြောင်း ထုတ်ပြန်ချက်တွင် ပါရှိသည်။

အဆိုပါတင်ဒါပုံစံကို ဩဂုတ်လ ၈ ရက်ထိ ရောင်းချပေးမည်ဖြစ်ပြီး နိုဝင်ဘာလ ၁၈ ရက် နောက်ဆုံးထား၍ အဆိုပြုလွှာတင်သွင်းရမည်ဖြစ်ကြောင်း၊ တင်ဒါကြေညာပုံစံအသေးစိတ်ကို moee.gov.mm မှာ ဝင်ရောက်ကြည့်ရှုနိုင်ကြောင်း ကြေညာထားသည်။

ymg/sth
#Yangon_Media_Group

#Local_News
Published - 5 July 2022

ရခိုင်ပြည်နယ်၊ စစ်တွေမြို့တွင် ကယ်ဆယ်ရေးပစ္စည်းအိမ်ထောင်စု (၄၅၀၀)စာ ထားရှိနိုင်မည့် ကြက်ခြေနီ သိုလှောင်ရုံသစ်ဖွင့်လှစ်လိုက်ပြီဖြစ်ကြောင်း မြန်မာနိုင်ငံ ကြက်ခြေနီအသင်းမှ သိရသည်၊၊

နယူးဇီလန်နိုင်ငံအစိုးရနှင့် မြန်မာနိုင်ငံကြက်ခြေနီ အသင်းတို့ ပူးပေါင်းဆောင်ရွက်မှု အစီအစဉ်အဖြစ် ရခိုင်ပြည်နယ်ကြက်ခြေနီ သိုလှောင်ရုံနှင့် ဘက်စုံသုံးအဆောက်အဦးကို ကျပ်ငွေသန်းပေါင်း(၁,၂၇၈) သန်း‌ကျော် အကုန်အကျခံ၍တည်ဆောက်ခဲ့ခြင်းဖြစ်သည်။

အဆောက်အဦး မြေညီထပ်တွင် အိမ်ထောင်စု(၁၅၀၀)မှ အိမ်ထောင်စု (၃၀၀၀)အထိ အသင်းမှ စံသတ်မှတ်ထားသော ကယ်ဆယ်ရေး အသုံးအဆောင် ပစ္စည်းများကို သိုလှောင်ခြင်း၊ ထိန်းသိမ်းခြင်း၊ ဖြန့်ဖြူးခြင်းများ ပြုလုပ်နိုင်မည့် အဆောက်အဦး ဖြစ်ပြီး ပထမထပ်တွင် ဆေးဝါးပစ္စည်းများ သိုလှောင်ခန်း၊ ရုံးခန်း၊ သင်တန်းခန်းမ၊ နားနေခန်း၊ အမျိုးသား တည်းခိုဆောင်နှင့် အမျိုးသမီးတည်း‌ခိုဆောင်များကိုလည်း ပါဝင်တည်ဆောက်ထားခြင်းဖြစ်သည်၊၊

အဆိုပါ ရခိုင်ပြည်နယ်ကြက်ခြေနီ သိုလှောင်ရုံနှင့် ဘက်စုံသုံးအဆောက်အဦးသည် မြန်မာနိုင်ငံကြက်ခြေနီအသင်းရှိ သိုလှောင်ရုံ(၃၀)လုံး အနက် ကယ်ဆယ်တုံပြန်ရေးလုပ်ငန်းများအတွက် သိုလှောင်လက်ခံနိုင်စွမ်းရည်၊ ကြက်ခြေနီစေတနာလုပ်အားရှင်များကို စွမ်းဆောင်ရည် တိုးတက်‌စေရန် သင်တန်းများပေးနိုင်မည်ဖြစ်ကြောင်းသိရသည်၊၊

ymg/tthl
#Yangon_Media_Group

#Local_News
Published_5 July 2022

ရန်ကုန်တိုင်းဒေသကြီး အမျိုးသမီးကော်မတီကကြီးမှူး ကျင်းပသော မြန်မာအမျိုး သမီးများနေ့ အထိမ်းအမှတ်ဖြင့် ကဏ္ဍမျိုးစုံတွင် ထူးချွန်စွာကြိုးပမ်းခဲ့ကြသည့်၊ အမျိုးသမီးများအား ယနေ့ ဇူလိုင်လ ၅ ရက်နံနက်ပိုင်းက အလုံမြို့နယ်၊ အမှတ် ၄ အခြေခံပညာအထက်တန်းကျောင်း၊ သီရိရတနာခန်းမတွင် ဂုဏ်ပြုဆုများချီးမြှင့်ခဲ့သည်။

ဆုပေးပွဲတွင် အရှေ့တောင်အာရှအားကစားပြိုင်ပွဲ ဂျူဒိုပြိုင်ပွဲနှင့် ဝူရှူးပြိုင်ပွဲတွင် ဒုတိယ ငွေတံဆိပ်ရရှိသူ၊ ကနူးကယက်လှေလှော်ပြိုင်ပွဲတွင် တတိယကြေး တံဆိပ်ဆု သုံးဆုရရှိသူတစ်ဦးနှင့် တတိယကြေးတံဆိပ်ရရှိသူတစ်ဦး၊ ASEAN +3 Mixed Country Odesst ပညာရေးပြိုင်ပွဲတွင် ဒုတိယငွေတံဆိပ်ဆုရရှိသူနှစ်ဦး ၊ တတိယ ကြေးတံဆိပ်ဆုရရှိသူတစ်ဦးနှင့် ၂၀၂၂ ခုနှစ်တက္ကသိုလ်ဝင်တန်းစာမေးပွဲတွင်၊ ရန်ကုန်တိုင်းဒေသကြီးက သိပွံဘာသာတွဲ၌အမှတ် အများဆုံးဖြင့် ပထမဆုရရှိသူ တစ်ဦးတို့ကို ဂုဏ်ပြုမှတ်တမ်းလွှာများနှင့် ဂုဏ်ပြုချီးမြှင့်ငွေများအသီးသီး ချီးမြှင့်ခဲ့ကြခြင်း ဖြစ်ကြောင်း သိရသည်။

ယင်းအပြင် သိပွံဘာသာတွဲ၌ အမှတ်အများဆုံးဖြင့်၊ ဒုတိယဆုရရှိသူနှင့် တတိယ ဆုရရှိသူ၊ ဝိပ္ပံဘာသာတွဲ၌ အမှတ်အများဆုံးဖြင့် ပထမဆုရရှိသူနှင့် ဒုတိယဆုရရှိသူ၊ ဝိပ္ပံဘာသာတွဲ တတိယဆုရရှိသူနှင့် ဝိဇ္ဇာဘာသာတွဲ၌ အမှတ်အများဆုံးဖြင့်၊ ပထမဆုရရှိသူ၊ ဝိဇ္ဇာဘာသာတွဲ ဒုတိယဆုနှင့်တတိယဆုရရှိသူ၊ အမျိုးသမီးများနေ့ အထက်တန်းဆင့် စာစီစာကုံး ပြိုင်ပွဲတွင် ပထမဆုနှင့် ဒုတိယဆု ရရှိသူ၊ အထက်တန်းဆင့် စာစီစာကုံးပြိုင်ပွဲ တတိယဆုနှင့်အလယ်တန်းဆင့် စာစီစာကုံးပြိုင်ပွဲ ပထမဆုရရှိသူ၊ အလယ်တန်းအဆင့် စာစီစာကုံးပြိုင်ပွဲ ဒုတိယဆုနှင့်တတိယဆုရရှိသူတို့အားလည်း ဂုဏ်ပြုမှတ်တမ်းလွှာများနှင့် ဂုဏ်ပြုချီးမြှင့်ငွေများကို အသီးသီးပေးအပ်ခဲ့ကြကြောင်း သိရသည်။

၎င်းအပြင် လူမှုဝန်ထမ်းဦးစီးဌာန အိမ်တွင်းမှုသက်မွေးသင်တန်းကျောင်း ဝန်ထမ်းများ ၏၊ ရိုးရာပွဲတက်ဝတ်စုံချုပ်ပြိုင်ပွဲတွင်၊ နှစ်သိမ့်ဆုရရှိသူများနှင့် သရုပ်ပြတင်ဆက်ကြသည့်အဖွဲ့များကိုလည်း ဂုဏ်ပြုချီးမြှင့်ခဲ့ကြကြောင်း သိရသည်။

အမျိုးသမီးများ၏ စွမ်းဆောင်ရည်မြင့်မားရေးနှင့် အမျိုးသမီးများဘဝဖွံ့ဖြိုးတိုး တက်စေရေးအတွက်၊ မြန်မာနိုင်ငံလုံးဆိုင်ရာအမျိုးသမီးရေးရာကော်မတီကို၊ ၁၉၉၆ ခုနှစ်၊ ဇူလိုင်လ ၃ ရက်တွင် ဖွဲ့စည်းပြီး၊ အဆိုပါ ဇူလိုင် ၃ ရက်ကို မြန်မာ အမျိုးသမီးများနေ့အဖြစ် သတ်မှတ်ပြဌာန်းကာ မြန်မာအမျိုး သမီးများနေ့ အထိမ်းအမှတ် အခမ်းအနားများကိုနှစ်စဉ် ကျင်းပခဲ့ခြင်း ဖြစ်ကြောင်း သိရသည်။

ymg/nn
#Yangon_Media_Group

#Local_News
Published _ 5 July 2022

မန္တလေးတိုင်းဒေသကြီး၊ အောင်မြေသာစံမြို့နယ်၊ မန္တလေးတောင်တော် ဆုတောင်းပြည့်စေတီတော်မြတ်ကြီးနှင့် အရံစေတီတော်လေးဆူတို့အား လုံးတော်ပြည့်ရွှေသင်္ကန်းဆက်ကပ်လှူဒါန်းခြင်း၊ ရတနာစိန်ဖူးတော်၊ ငှက်မြက်နားတော် အထွဋ်တင်လှူပူဇော်ခြင်း နှင့် ဗုဒ္ဓဘိသေက ဘုရားအနေကဇာတင်ခြင်း အခမ်းအနားကို ယနေ့ ဇူလိုင်လ ၅ ရက်တွင် ကျင်းပခဲ့သည်။

အခမ်းအနားတွင် ပထမပိုင်း(ပရိကမ္မမင်္ဂ လာ) အရ ဒါန၊ သီလ၊ ဘာဝနာ ကုသိုလ်မှုဆည်းပူးခြင်း၊ ဒုတိယပိုင်း(ဆတ္တာရောဟဏ မင်္ဂလာ) ရတနာစိန်ဖူးတော်၊ ငှက်မြက်နားတော် အထွဋ်တင်လှူပူဇော်ခြင်းနှင့် တတိယပိုင်း(ဗုဒ္ဓဘိသေက မင်္ဂလာ) ဗုဒ္ဓဘိသေက အနေကဇာတင် ပူဇော်ခြင်းတို့ဖြင့် ကျင်းပခဲ့ကြောင်းသိရသည်။

မန္တလေးတောင်တော် ဆုတောင်းပြည့်ဘုရားစေတီတော်မြတ်ကြီးအား ၂၀၂၂ ခုနှစ်၊ ဇူလိုင်လ ၁၁ရက်က ရွှေသင်္ကန်းကပ်လှူပြီးစီးခဲ့ပြီးဖြစ်ကာ ယခုဇူလိုင်လ ၅ ရက်တွင် စေတီတော်ကြီးနှင့် အရံစေတီတော် လေးဆူတို့အား စိန်ဖူးတော်နှင့် ငှက်မြက်နားတော်များ ကပ်လှူပူဇော်ခဲ့ကြတာဖြစ်ပြီး စိန်ဖူးတော်ထိပ်တွင် စိန်အစစ်ချွန်းတစ်ပွင့်၊ တွင်းထွက် " မြ " ရတနာ(၄၉)ပွင့်၊ စိန်ဖူးတော်၊ ငှက်မြက်နားတော်တို့တွင် စိန်၊ ရွှေ၊ ပတ္တမြား၊ နီလာရတနာများ တပ်ဆင်ပူဇော်ခဲ့ကြကြောင်းသိရသည်။

ymg /NN
#Yangon_Media_Group

#Health_Tips
Published 5 July 2022

နွေရာသီ အသီးအနှံလို့ပြောလို့ရတဲ့ ဖရဲသီးဟာ အရသာအရှိဆုံးအသီးတွေထဲကတစ်မျိုးဖြစ်ပါတယ်။

ဖရဲသီးမှာ ဗိုက်တာမင်ဓာတ်များ ကြွယ်ဝစွာပါဝင်ပြီး အထူးသဖြင့် lycopene ဓာတ်တွေပေါများစွာ ပါဝင်ပါတယ်။

ဖရဲသီးက ချိုတဲ့အရသာရှိပေမယ့် သကြားဓာတ်အများကြီးပါဝင်တာမျိုး မဟုတ်ဘဲ အရည်ပါဝင်မှု ရာခိုင်နှုန်းများတာကြောင့် ကယ်လိုရီပမာဏနည်းပါးပြီး ဖရဲသီး ၁၀၀ ဂရမ်မှာ ၃၀ ကယ်လိုရီသာပါဝင်ပါတယ်။

၁၀၀ ဂရမ်ရှိတဲ့ဖရဲသီးမှာ ရေ ၉၂ ဂရမ်၊ ပရိုတိန်း ၀.၆၁ ဂရမ်၊ ကာဗိုဟိုက်ဒရိတ် ၈ ဂရမ်နဲ့ အဆီဓာတ် ၀.၁၅ ဂရမ်ပါဝင်ကာ သံဓာတ်၊ ကယ်လ်စီယမ်၊ ပိုတက်ဆီယမ်၊ ဖော့စ်ဖရပ်စ် စတဲ့သတ္တုဓာတ်များစွာ ပါဝင်ပါတယ်။

ဖရဲသီးစားသုံးခြင်းရဲ့အကျိုးကျေးဇူးတွေကတော့ ...

*နှလုံးကျန်းမာရေးကိုအားပေးခြင်း

ဖရဲသီးမှာ ဆစ်ထရူလိုင်းလိုခေါ်တဲ့ အမိုင်နိုအက်ဆစ် ပရိုတိန်းတစ်မျိုးပါဝင်ပြီး သွေးကြောစီးဆင်းမှုကို ချဲ့ပေးကာ သွေးပေါင်ချိန်ချပေးနိုင်ပါတယ်။

အဲဒီအမိုင်နိုအက်ဆစ်တွေက နှလုံးရောဂါဖြစ်ခြင်းမျိုးကို ကာကွယ်ပေးနိုင်တယ်လို့တွေ့ရှိထားကြပေမယ့် အဓိကသက်ရောက်မှုကတော့ နေထိုင်မှုပုံစံသာဖြစ်ပြီး လေ့ကျင့်ခန်းလုပ်ခြင်း၊ ဆေးလိပ်မသောက်ခြင်း၊ အစားအစာညီညွတ်မျှတအောင်စားသုံးခြင်း၊ စိတ်ဖိစီးမှုလျှော့ချခြင်းနဲ့ အိပ်ရေးဝအောင်အိပ်စက်ခြင်းစတဲ့နည်းလမ်းတွေက နှလုံးကျန်းမာရေးအပေါ် များစွာသက်ရောက်နေပါတယ်။

*လိုင်ကိုပင်းဓာတ်ပေါကြွယ်ဝခြင်း

ဖရဲသီးရဲ့အနီရောင်နေရာတွေက စွမ်းအားမြင့် အန်တီအောက်ဆီဒန့်တစ်မျိုးဖြစ်တဲ့ လိုင်ကိုပင်းဓာတ်ကြောင့်ဖြစ်ပြီး အန်တီအောက်ဆီဒန့်တွေက ကင်ဆာ၊ ဆီးချိုနဲ့ အခြားရောဂါများဖြစ်နိုင်ချေကို လျှော့ချပေးပါတယ်။

အခြားအသီးအနှံအရွက်တွေထက် ဖရဲသီးမှာ လိုင်ကိုပင်းပိုမိုပါဝင်နေပြီး အရောင်ဝင်းရင့်မှည့်နေတဲ့ ဖရဲသီးအနီတွေမှာ ပိုမိုပါဝင်လေ့ရှိပါတယ်။

*အရိုးအဆစ်များကာကွယ်ပေးခြင်း

ဖရဲသီးမှာ ဘီတာခရစ်ပ်တိုဇန်သင်းလို့ခေါ်တဲ့ သဘာဝရောင်ခြယ်ပစ္စည်းပါဝင်ပြီး နှလုံးရောဂါဖြစ်နိုင်ချေနဲ့ အရိုးအဆစ်များရောင်ရမ်းခြင်းတို့မှ ကာကွယ်ပေးနိုင်ပါတယ်။

ဖရဲသီးကို ကာလကြာရှည်စွာ စားသုံးခြင်းဖြင့် အဆစ်အမြစ်ရောင်ရောဂါဖြစ်နိုင်ချေကို လျှော့ချပေးနိုင်ကြောင်း လေ့လာချက်အများအပြားမှာတွေ့ရှိထားပါတယ်။

*မျက်လုံးကျန်းမာရေးကိုထိန်းသိမ်းပေးခြင်း

ဖရဲသီးတစ်စိတ်မှာ ခန္ဓာကိုယ်ကနေ့စဉ်လိုအပ်တဲ့ ဗိုက်တာမင်-အေ ၉ ရာခိုင်နှုန်းမှ ၁၁ ရာခိုင်နှုန်းအထိ ပါဝင်ပါတယ်။

ဗိုက်တာမင်-အေဟာ မျက်စိကျန်းမာရေးကိုထိန်းသိမ်းရာမှာ အရေးပါတဲ့ဓာတ်တစ်မျိုးဖြစ်ပါတယ်။

*ပါဝင်ပစ္စည်းများဘေးကင်းစိတ်ချရခြင်း

သကြားဓာတ်ပါဝင်တဲ့ အခြားစားစရာများနဲ့ယှဉ်ရင် ဖရဲသီးက ကယ်လိုရီနည်းပါးတဲ့စားစရာဖြစ်ပြီး အဆီမပါ ကိုလက်စထရောမပါ ဆိုဒီယမ်မပါဝင်ပါဘူး။

*အစာချေရလွယ်ကူခြင်း

အစာချေခြင်းနဲ့ပတ်သက်ပြီး ပြဿနာရှိတဲ့လူတွေမှာ မစားရတဲ့အစားအစာများစွာရှိနေပေမယ့် ဖရဲသီးကတော့ စိတ်ချစွာစားသုံးနိုင်ပါတယ်။

*သကြားဓာတ်ပမာဏ

ဖရဲသီး ၂၀၀ ဂရမ်မှာ ကာဗိုဟိုက်ဒရိတ် ၁၅ ဂရမ်ပါဝင်ပြီး ပန်းသီး ၁၀၀ ဂရမ်မှာဆိုရင် ကာဗိုဟိုက်ဒရိတ် ၁၅ ဂရမ်ပါဝင်တာကြောင့် ပန်းသီးက ၂ ဆလောက်ပိုများနေပါတယ်။

ဆီးချိုရောဂါသည်တွေမှာ ဖရဲသီးမစားဖို့မှာကြားထားကြပေမယ့် အနည်းငယ်စီသာစားသုံးပေးပါက သကြားဓာတ်သိသိသာသာ တိုးလာခြင်းမရှိပါဘူး။

Source: The Jerusalem Post
#Yangon_Media_Group

#Local_News
Published - 5 July 2022

အိန္ဒိယနိုင်ငံတွင် ပဲလိုအပ်ချက်မြင့်မားနေခြင်းကြောင့် ဈေးကွက်အတွက်း ယခုရက်သတ္တပတ်အတွင်း မတ်ပဲ ဈေးမြင့်တက်လာကြောင်း ပဲကုန်သည်များထံက သိရသည်။

မတ်ပဲဈေးမြင့်တက်လာခြင်းနှင့်အတူ ပဲစင်းငုံဈေးပါ လိုက်ပါမြင့်တက်လာပြီး ပဲတီစိမ်းမှာမူ ပုံမှန်ဈေးကွက်ပေါက်ဈေးဖြင့် အဝယ်သွက်နေကြောင်း သိရသည်။

"ပို့ကုန်ပဲ အနေနဲ့ အဓိက မတ်ပဲဈေးကောင်းနေပါတယ်။ ငွေလက်ငင်းချေစနစ်တစ်အိတ်ကို ၁၆၅,၀၀၀ ကျပ်၊ တစ်လဆိုင်းဆိုရင် တစ်အိတ်ကို ၁၇၀,၀၀၀ ကျပ် ပေါက်ဈေးရှိပါတယ်။ ပဲစင်းငုံကလည်း တစ်အိတ်ကို ၅,၀၀၀ ကျပ် လောက်ဈေးမြင့်တက်လာပါတယ်။ သင်္ဘောလည်းတင်ခါနီးဆိုတော့ အဝယ်လိုက်နေပါတယ်။ မတ်ပဲဈေးကတော့ ဆက်လက်မြင့်တက်နိုင်ပါသေးတယ်"ဟု ပဲကုန်သည်တစ်ဦးကပြောသည်။

ပို့ကုန်ပဲအမျိုးအစား အလိုက်အဝယ်ကောင်းနေပြီး ဇွန်လ (၃၀)ရက်တွင် မတ်ပဲတစ်အိတ် ကျပ် ၁၆၃,၀၀၀ - ၁၆၅,၀၀၀၊ ပဲတီစိမ်း ရွှေဝါတစ်အိတ် ကျပ် ၁၅၄,၀၀၀ ပေါက်ဈေးဖြစ်လာပြီး ပဲစင်းငုံမှာ တစ်အိတ်ကျပ် ၁၃၅,၀၀၀ ဖြင့် အဝယ်သွက်နေပြီး မတ်ပဲဈေးမှာ တစ်အိတ် ကျပ် ၁၀,၀၀၀ ခန့် မြင့်တက်လာကာ ဆက်လက်မြင့်တက်နိုင်သေးကြောင်းလည်း သိရသည်။

ymg/sth
#Yangon_Media_Group

#Local_News
Published_ 4 July 2022

ရန်ကုန်တိုင်းဒေသကြီး လှိုင်သာယာမြို့နယ်ရှိ ကျန်စစ်မင်းအိမ်ရာ စီမံကိန်းအပိုင်း (၁)နှင့် အပိုင်း(၂)တို့တွင် ဆောင်ရွက်ဆဲအိမ်ရာများကို ဆက်လက်အကောင်အထည်ဖော် ဆောင်ရွက်လျက်ရှိကြောင်း သိရပါတယ်။

ဆောက်လုပ်ရေးဝန်ကြီးဌာနဝန်ကြီး ဦးရွှေလေးသည် ဇူလိုင် ၃ ရက်တွင် လှိုင်သာယာမြို့နယ်ရှိ ကျန်စစ်မင်းအိမ်ရာစီမံကိန်း၊ စီမံခန့်ခွဲရေးကော်မတီရုံးသို့ ရောက်ရှိစဉ် ပြည်သူများနေထိုင်ရေးအဆင်ပြေစေရန် အိမ်ရာစီမံကိန်းများကို အကောင်အထည် ဖော်ဆောင်ရွက်လျက်ရှိတယ်လို့ ဆိုပါတယ်။

ထို့ပြင် စား၊ ဝတ်၊ နေရေးဆိုသည့် အရေးသုံးပါးတွင် နေထိုင်ရေးသည်လည်း အဓိကကျတဲ့အတွက် အိမ်ရာစီမံကိန်းများ စနစ်ကျနစွာဖြင့် အကောင်အထည်ပေါ်လာရေးအတွက် ဆက်လက်ဆောင်ရွက်ရမယ်လို့ ပြောကြားခဲ့ပါတယ်။

ဝန်ကြီးနှင့်အဖွဲ့သည် FMI အိမ်ရာစီမံကိန်း၊ ကျန်စစ်မင်းအိမ်ရာ စီမံကိန်းအပိုင်း (၁) နှင့်(၂)၊ ထီးလှိုင်ရှင် အိမ်ရာစီမံကိန်းနှင့် ပန်းလှိုင်အိမ်ရာစီမံကိန်းများရှိ တည်ဆောက်ပြီး အိမ်ရာများနှင့် တည်ဆောက်ဆဲ အိမ်ရာများကို လိုက်လံကြည့်ရှုစစ်ဆေးခဲ့ပါတယ်။

ထို့နောက် ပြည်သူများသွားလာရေး လွယ်ကူအဆင်ပြေစေရန်နှင့် ဒေသဖွံ့ဖြိုးရေး အတွက် မှော်ဘီမြို့နယ်နှင့် လှည်းကူးမြို့နယ်အတွင်းရှိလမ်းများ အဆင့်မြှင့်တင်ခြင်း၊ ပြုပြင်ထိန်းသိမ်းခြင်းလုပ်ငန်းများ ဆောင်ရွက်နေမှုကို ကွင်းဆင်းကြည့်ရှုစစ်ဆေးခဲ့ကြောင်း သတင်းရရှိပါတယ်။

ymg-mnn
#Yangon_Media_Group

#Local_News
Published - 5 July 2022

ဇူလိုင်လ (၅)ရက်၊ နံနက် ၇ နာရီကျော်တွင် မြန်မာနိုင်ငံပြည်တွင်း၊ ရန်ကုန်မြို့၊လှိုင်မြို့နယ်အနီးတွင် မြေငလျင်လှုပ်ခတ်ခဲ့ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၊ မြေငလျင်ဌာနခွဲမှ သိရသည်၊၊

ဇွန်လဆန်းပိုင်းမှစ၍ မြန်မာနိုင်ငံတွင် မြေငလျင်ငယ်များ ဆက်တိုက်လှုပ်ခတ်ခဲ့ပြီး ယခုတစ်ကြိမ်တွင်တော့ ရန်ကုန်တွင် ပထမဦးဆုံးလှုပ်ခတ်ခဲ့ခြင်းဖြစ်သည်၊၊

ရန်ကုန်မြို့လှိုင်မြို့နယ်၏ အရှေ့မြောက်ဘက် (၁)မိုင် ခန့်အကွာအင်အားရစ်(ခ်)တာစကေး (၃.၀) အဆင့်ရှိ အင်အားအနည်းငယ် ရှိသော မြေငလျင်တစ်ခု လှုပ်ရှားသွားခြင်းဖြစ်ကြောင်းသိရသည်၊၊

လက်တလောတွင် မြေငလျင်ငယ်များ ဆက်တိုက်လှုပ်ခတ်မှုများရှိပြီး ရန်ကုန်၊မန္တလေး၊ ပဲခူးစသည့် ပြတ်ရွေ့ကြောပေါ်တွင်တည်ရှိသော ဒေသများတွင် တစ်ကျော့ပြန် မြေငလျင်ကြီးများလှုပ်ခတ်နိုင်သဖြင့် သတိပြုနေထိုင်ကြဖို့ မိုးလေဝသနှင့် ဇလဗေဒညွှန်ကြားမှုဦးစီးဌာန၊ မြေငလျင်ဌာနခွဲလက်ထောက်ညွှန်ကြားရေးမှူးဒေါက်တာယဥ်မျိုးမင်းထွေးကသတိပေး ပြောထားသည်၊၊

ymg/tthl
#Yangon_Media_Group

#WorldScience
Published 5 July 2022

လေယာဉ်တွေရဲ့ အဓိကပြဿနာတစ်ရပ်က လောင်စာဆီအပေါ်မှီခိုနေရတာဖြစ်ပြီး လောင်စာဆီတွေဟာ အကန့်အသတ်နဲ့သာရရှိနေသလို ရာသီဥတုဖောက်ပြန်ခြင်းနဲ့လည်း ပါဝင်ပတ်သက်နေပါတယ်။

အခုဆိုရင် မြေကြီးထဲက ဘက်တီးရီးယားတွေကနေရရှိတဲ့ ကာဗွန်မော်လီကျူးကိုအသုံးချပြီး လေယာဉ်လောင်စာဆီထုတ်လုပ်နိုင်အောင် သုတေသီများကနည်းလမ်း ရှာဖွေတွေ့ရှိထားပါတယ်။

ဓာတုဗေဒသဘောအရ စွမ်းအင်လိုအပ်တဲ့အရာတိုင်းဟာ ပြိုကွဲတဲ့အခါ စွမ်းအင်ထွက်ရှိစေပြီး လေယာဉ်သုံးလောင်စာဆီတွေမပါဘဲနဲ့ စွမ်းအင်အမြောက်အများထွက်ပေါ်နိုင်ဖို့ သိပ္ပံပညာရှင်တွေက လေ့လာစဉ်းစားခဲ့ကြကြောင်း ဒိန်းမတ်နည်းပညာတက္ကသိုလ်မှ အဏုဇီဝပညာရှင်'ပါဘလိုခရုဇ်မိုရာလက်စ်'က ပြောပြခဲ့ပါတယ်။

ကယ်လီဖိုးနီးယားတက္ကသိုလ်မှ ဓာတုအင်ဂျင်နီယာတစ်ဦးဖြစ်သူ'ဂျေကီစလင်း'က streptomyces လိုခေါ်တဲ့ ဘက်တီးရီးယားကနေထုတ်လုပ်တဲ့ Jawsamycin မော်လီကျူးကိုထုတ်လုပ်ဖို့ စိတ်ကူးရခဲ့တာဖြစ်ပါတယ်။

ထုတ်ဖော်တဲ့နည်းလမ်းက သဘာဝအတိုင်းရှိနေပြီးသားဖြစ်ပြီး ဘက်တီးရီးယားတွေက ဂလူးကိုစ်ဖြိုခွဲတဲ့အခါ မော်လီကျူးတွေထွက်လာတာဖြစ်ပါတယ်။

ဖြိုခွဲတဲ့ဖြစ်စဉ်ကြောင့် မော်လီကျူးတွေကနေ စွမ်းအင်တွေရရှိနိုင်တာဖြစ်ပါတယ်။
ဘက်တီးရီးယားတွေကနေရရှိမယ့်လောင်စာက ဇီဝဒီဇယ်လိုလုပ်ဆောင်နိုင်မှာဖြစ်ကြောင်း 'ခရုဇ်မိုရာလက်စ်'ကရှင်းပြပါတယ်။

ဖက်တီးအက်ဆစ်လောင်ကျွမ်းဖို့ လိုအပ်တဲ့အပူချိန်ထက် လျော့နည်းအောင်လောင်ကျွမ်းစေဖို့လိုပေမယ့် လောင်ကျွမ်းပြီဆိုတာနဲ့ အာကာသထဲကို ဒုံးကျည်ပစ်လွှတ်လိုရလောက်တဲ့အထိ စွမ်းအားမြင့်ပါတယ်။

ဇီဝနည်းလမ်းအရ လောင်စာထုတ်လုပ်နိုင်ရင် ရေနံလောင်စာတွေကို အသုံးပြုစရာအကြောင်းမရှိတော့ပါဘူးလို့ ဆိုပါတယ်။

Joule ဂျာနယ်မှာ ဇွန်လ ၃၀ ရက်နေ့က သုတေသီတွေရဲ့တွေ့ရှိချက်ကိုဖော်ပြခဲ့ရာ ဒီလိုလောင်စာကို လေယာဉ်တွေမှာလက်တွေ့အသုံးပြုနိုင်စေရန်အတွက် ထပ်မံတိုးချဲ့လေ့လာဖော်ထုတ်သွားဖို့ မျှော်လင့်နေကြောင်း သိရှိရပါတယ်။

"အခုအချိန်မှာတော့ ရုပ်ကြွင်းလောင်စာတွေကိုမှီခိုနေရတာက ပြဿနာဖြစ်နေပါတယ်၊ ဒါဟာ နည်းပညာပိုင်းအတွက်သာမဟုတ်ဘဲ ကမ္ဘာတစ်ခုလုံးရဲ့ ပထဝီနိုင်ငံရေးအရရော လူမှုနိုင်ငံရေးအဖွဲ့အစည်းတွေမှာပါ သက်ရောက်နေပါတယ်၊ အခုလက်ရှိမှာ ပြင်ဆင်မှုတွေပြုလုပ်နေရတာက ရုပ်ကြွင်းလောင်စာတွေက တချိန်ချိန်မှာ ကုန်ခမ်းသွားနိုင်ပြီး အခြားနည်းလမ်းတွေနဲ့ လောင်စာရရှိဖို့ကြိုးပမ်းလာရနိုင်ပါတယ်" လို့ 'ခရုဇ်မိုရာလက်စ်'ကပြောကြားခဲ့ပါတယ်။

Source: DailyMail
#Yangon_Media_Group